TBP Balochi

پنجگور ءَ بسم اللہ چوک ءَ کریمہ بلوچ ءِ گائبانہ نماز جنازہ وانگ بیتگ ءُ پسنی، ھاران ءُ لاھور ءَ ھم کریمہ بلوچ ءِ گائبانہ نماز جنازہ ءِ جار پِرینگ بیتگ اَنت –

سر بیتگیں ھالانی رد ءَ بلوچ زالبول رھشون ءُ بی ایس او آزاد ءِ گوستگیں سروک کریمہ بلوچ ءِ نماز جنازہ آئی ءِ بنکی ھنکین تمپ ءَ وانینگ بیتگ، جنازہ ءَ لس مردماں ھوار زالبولاں ھم بھر زرتگ –

جنازہ ساھت دوازدہ ءَ تمپ ءِ ادیرہ جاہ ءَ وانگ بیتگ ءُ آ تمپ ءِ مانشجاہ ءَ کَل ءُ کسارت کنگ بیتگ –

کریمہ بلوچ ءِ نماز جنازہ ءَ بھر زورگ ءِ نیلگ ءِ سر ءَ سیاسی مردمانی زھرشانی درشان ءُ آئی ءِ جسد ءَ سیاسی مردم ءُ لس مردمانی دست ءَ نہ دیگ ءِ سر ءَ بلوچستان ءَ بلوچ یکجھتی کمیٹی ءِ نیمگ ءَ دربندیں ھرتال کنگ بیتگ – ھرتال ءَ کیچ ءِ بنجاھی شھر تربت، بلیدہ ءُ دگہ دمگ ھوار اَنت –

بلوچ یکجھتی کمیٹی ءِ گوشگ اِنت کہ کراچی ءَ بانک کریمہ بلوچ ءِ جسد ءِ نہ دیگ ءُ آئی ءِ جسد ءَ جتا جتائیں دگاں برگ ءُ بلوچ راج ءِ دست نہ دیگ ءِ سر ءَ بلوچستان ءَ ھرتال کنگ بیتگ –

ھمے رنگ ءَ بلوچ یکجھتی کمیٹی ءِ نیمگ ءَ شال ءَ کریمہ بلوچ ءِ جسد ءِ کمشرپی ءِ سر ءَ پنتاک بھر بیتگ اَنت –

پنتاکاں بلوچ یکجھتی کمیٹی ءَ جار جتگ کہ باند ءَ بلوچ رھشون کریمہ بلوچ ءِ گائبانہ نماز جنازہ شال ءَ نیوکاھان ءَ شھیدانی مانشجاہ ءَ وانگ بیت اِنت-

جار ءِ تہ ءَ بلوچ یکجھتی کمیٹی ءَ لس مھلوک ءَ گوں دزبندی کرتگ ءُ گوشتگ کہ آ بانداتگیں روچ ءَ کریمہ بلوچ ءِ گائبانہ نماز جنازہ ءَ بھر بہ زور اَنت –

پنجگور ءَ بانک کریمہ بلوچ ءِ گائبانہ نماز جنازہ بسم اللہ چوک ءَ وانگ بیتگ ءُ اود ءَ بازیں کچے ءَ مردماں بھر زرتگ –

اے وھد ءَ چاگردی رسانک جاھاں ھم کریمہ بلوچ ءَ ستاشانی ءُ آئی ءِ جسد ءِ نہ دیگ ءِ سر ءَ چاگردی رسانککار زھرشانی کنگ ءَ اَنت –

ھمے رنگ ءَ پسنی، ھاران ءُ پاکستان ءِ شھر لاھور ءَ کریمہ بلوچ ءِ گائبانہ نماز جنازہ وانگ ءِ جار پِرینگ بیتگ اَنت –

زانگ بہ بیت کریمہ بلوچ ءِ نماز جنازہ ءَ بلوچستان ءِ بازیں جاھاں مردم روگ ءَ بیتگ اَنت بلے ترندیں پھزداری ءُ پاکستانی پوج ءِ نیمگ ءَ دگانی بند بیگ ءِ سوب ءَ مردم واتر کنگ بیتگ اَنت –

چاگردی رسانکدر کارمرد کنوکیں سھیلہ بلوچ ٹوئٹر ءَ نبشتگ کنت: گوستگیں روچ ءَ من گوں وتی کھول ءِ ھمراھی ءَ بانک کریمہ بلوچ ءِ وش اتکی ءَ در اتکگ اِنت بازیں پوجی چیک پوسٹانی زوراں ما واترینگ بیتگ اِنت –

دیمتر ءَ سھیلہ بلوچ نبشتگ کنت وشبھتی ءَ بانک کریمہ بلوچ ءِ جسد کہ ھما گاڑی ءَ مان بیتگ آیاں مارا دیستگ ءُ ما دارگ ءِ واستا دست داتگ اَنت چریشی ءَ آ اوشتاتگ اَنت ءُ ما کریمہ بلوچ ءِ گڈی دیدار کرتگ –

زانگ بیت کریمہ بلوچ گوستگیں سال ءِ بیست دسمبر ءَ کینیڈا ءِ شھر ٹورنٹو ءَ بیگواہ بیتگ ءُ دومی روچ ءَ آئی ءِ جون ٹورنٹو ءَ یک کورے ءِ تہ ءَ دزکپتگ ءُ گوستگیں روچ ءَ آئی ءِ جسد کراچی ءِ بالی پَٹ ءَ سر کنگ بیتگ ءُ اود ءَ آئی ءِ وش اتکی ءَ بلوچ یکجھتی کمیٹی ءِ نیمگ ءَ مردم کڈن کنگ بیتگ اَنت –

کراچی ءِ بالی پَٹ ءَ مردم روگ نیلگ بیتگ اَنت کریمہ بلوچ ءِ جون کراچی ءِ جتا جتائیں چیریں راھاں کشگ بیتگ ءُ بلوچستان ءِ سیمسراں سر کنگ بیتگ –

بلوچ یکجھتی کمیٹی ءِ جار ءِ پد ءَ کریمہ بلوچ ءِ جسد لیاری ءَ مولوی عسمان پارک ءَ برگ بیت ءُ اود ءَ آئی ءِ نماز جنازہ وانگ ءَ پد آئی ءِ کل ءُ کسارت بنکی ھنکین تمپ ءَ کنگ بیت –

اے سرکار ءِ واکداراں رد کرتگ ءُ کریمہ بلوچ ءِ جون چیریں راھاں کشگ بیتگ ءُ آئی ءِ ھمراھی ءَ کھول ءِ چیزے مردم کنگ بیتگ ءُ بلوچستان ءَ پوجی پھزداری ءَ دیم دیگ بیتگ –

بلوچ یکجھتی کمیٹی ءِ گوشگ بیتگ کہ کریمہ بلوچ ءَ لیاری ءَ جنازہ ءَ پد آئی ءَ راجی پھر ءُ شانے ءَ بلوچستان ءَ آئی ءِ بنکی ھنکین تمپ ءَ سرکنگ بیت ءُ آ راجی ستاشانی ءَ گوں زمین ءِ باھوٹ کنگ بیت اِنت –

چریشی ءَ پد کریمہ بلوچ ءِ جسد ءِ نہ دیگ ءِ سر ءَ بلوچ یکجھتی کمیٹی ءِ نیمگ ءَ چاکیواڑہ ءَ کریمہ بلوچ ءِ گائبانہ نماز جنازہ وانگ بیتگ –

ھمے رنگ ءَ بلوچ زالبول رھشون ڈاکٹر مھرنگ بلوچ زالبول کریمہ بلوچ ءِ واستا ستاشانی ءِ سروکی ءَ کنگ بیتگ ءُ آئی ءِ کاروان کیچ تربت ءَ گوستگیں روچ ءَ سر بیتگ ءُ اود ءَ دیم ءِ روگ ءَ نیلگ بیتگ اَنت ءُ مروچی ڈاکٹر مھرنگ پولیس ءِ چیردستی ءِ پھزداری ءَ تمپ ءَ سر کنگ بیتگ –

لچہ: نازبوئیں کبرستان ءِ ساچتگ

امجد بیکس

دی بلوچستان پوسٹ

کوڑھیں زمانگ ءِ دَرد ءُ دور
وتی اَنگریں دل ءِ چاگل ءَ کُت اَنت
وھدے گوں وتی تُستگیں ارواہ ءَ
چہ تئی دل ءِ دامن ءَ گْوستگ اَنت
اناگتہ !
منی ارواھے پوشاک تو پہ بے اِنانی ءَ
گوں نازاکیں بچکندگاں شَمُشتگ اَنت
من ءَ را ھچ سما ءَ نہ بیت
کہ زندگاں یا مُرتگاں
البت گیمُرتگیں زندگی
ھر روچ منی تلشپیں لُنٹانی سر ءَ لیب کنت
ماں کرنیگیں ودارانی
ھوشامیں زر ءِ میان ءَ بُک ور آں
بلکن ءَ کھربائیں زندگی وتی گُڈی لیب ءَ باج بارت
من پہ وتی کولنجیں جون ءَ
بِہ گُمان ءِ واھگانی لھد ءَ
پہ نازبوئیں کبرستان ءِ ساچتگ
ماں ترانگانی آزمان ءِ
چتر ءِ دل ءَ
گوں سُمبوکیں اندوھاں
بادشاھی کن آں
اَبدمانیں ابیتکی ءَ را پہ وت گیدی کسھے کن آں
گوں ناشناسیں دیدگاں
ھزار بر ءَ جیڑگانی چمّگاں چُکاں چّماں کن آں
تپلیں ھیالانی بوجی ءَ سپر کن آں
مونجانیں زندگی ءَ
گوں چیدگیں زمانگ ءَ
کہ چپ ءُ چوٹیں کشکاں پہ ھیلایے سپر کُت ءَ
پشپدیں وابانی منزل ءِ
ھمپکریں تلاراں
راھی بوتگاں
ھما بے باوریں جیڑگاں
منی جبین ءِ روکیں واھگان ءَ
مھتل کُت ءَ
من پہ وتی ناگُمانیں زندگی ءَ
پہ ھجتے !!!
بِہ گُمان ءِ واھگانی لھد ءَ
نازبوئیں کبرستان ءِ ساچتگ

سر بیتگیں ھالانی رد ءَ روکپتی بلوچستان ءِ دمگ نیکشھر ءُ چھبار ءِ دگ ءَ دو گاڑیاں ٹکر وارتگ، چریشی ءَ پنچ مردم بیران بیران ءُ دو زدگ بیتگ اَنت –

ایرانی پولیس ءِ رد ءَ ھال سر بیگ ءَ پولیس ءَ وت ءَ وئیل جاہ ءَ سر کرتگ ءُ اود ءَ بیران ءُ زدگ بیتگیں مردم چِست کرتگ اَنت –

اھوالکار ءِ رد ءَ گوستگیں روچ ءِ مگرب ءَ پیسر دیگر ءَ رند پیش اتکگ کہ اود ءَ دو گاڑیاں چھبار ءُ نیکشھر ءِ میان ءَ دگ ءَ ترن روگ ءِ سوب ءَ ٹکر وارتگ –

اھوالکار ءِ رد ءَ وئیل ءَ پنچ مردم بیران ءُ دو زدگ بیتگ اَنت کہ یک گاڑی ءَ پنچ نپر سوار بیتگ اَنت ھر پنچیں مردم بیران بیتگ اَنت ءُ دومی گاڑی ءَ سواریں دو مردم زدگ بیتگ اَنت –

اھوالکار ءِ رد ءَ زدگ بیتگیں مردم پولیس ءَ چِست کرتگ ءُ نیکشھر ءَ مھمدورسول اللہ نادراہ جاہ ءَ سر کرتگ اَنت کہ اود ءَ ھردوکیں زدگ بیتگیں مردمانی جاور نگیگ گوشگ بیگ ءَ اَنت –

دی بلوچستان پوسٹ

بلوچ یکجھتی کمیٹی ءِ بنجاھی جارکش ءَ شنگ کرتگیں درشان ءِ تہ ءَ گوشتگ کہ باند ءَ سرجمیں بلوچستان ءَ دربندیں ھرتال جار پِرینتگ ءُ گوشتگ کہ مروچی راجی رھشوج بانک کریمہ بلوچ ءِ جسد ءِ کراچی ءَ سربیگ ءِ ھواری ءَ پوج ءَ کُنٹ دستیگ کرتگ ءُ گڈی دیدار ءَ کس نئیشتگ ءُ کُنٹ ءِ کمشرپی کرتگ –

بلوچ یکجتی کمیٹی ءِ نیمگ ءَ شنگ بیتگیں درشان ءَ گوشگ بیتگ کہ بیست ءُ پنچ جنوری ءَ سرجمیں بلوچستان ءَ دربندیں ھرتال ءِ جارپرینتگ ءُ گوشتگ کہ تاجر برادری ھرتال ءَ سوبمند بہ کن اَنت –

جار ءَ گوشگ بیتگ کہ بیست ءُ چار جنوری ءِ سھب ءَ کراچی ءَ جسد ءِ سر بیگ ءَ پوجی سلاہ بنداِ جسد دستیگ کرتگ ءُ کھول ءِ منگ ءَ ابید ایمبولینس ءَ کرتگ ءُ لشکریانی ترندیں پھزداری ءَ بنکی ھنکین تمپ ءَ برگ بیتگ –

ریاست ءِ نیمگ ءَ دراھیں انسانی ھک پامال کنگ ءُ بانک کریمہ بلوچ ءِ نماز جنازہ کراچی ءُ گڈی دیدار ءِ اجازت نہ داتگ ھمے وڑ ءَ بازیں اداراں ودار کنگ ءَ ابید ھم گڈی دیدار ءِ موکل نداتگ –

آئی ءَ گوشت کہ ریاست برزیں دستاں کارمرد کنگ ءُ کیچ ءِ دراھیں دمگانی نیٹورک اش بند کرتگ اَنت ءُ دراھیں رھوتی ھال اش بند کرتگ -بانک کریمہ بلوچ ءِ گڈی دیدار ءَ جتا جتائیں ھنداں رؤکیں مردم زورانسری دارگ بیتگ اَنت ءُ بانک کریمہ بلوچ ءِ بنکی ھنکین تمپ ءَ چاپ ءُ شاگرداں سلاہ بندی اوشتارینتگ اَنت ءُ تمپ ءَ رؤکیں دراھیں راہ بند کنگ بیتگ اَنت –

آئی ءَ درشان ءِ گڈسر ءَ گوشتگ کہ بانک کریمہ بلوچ یک راجی رھشونے بیتگ ءُ آ بلوچستان ءَ بلوچانی نگاھاں جوانیں شرپے ءَ چارگ بیت اِنت، لس مھلوک ءَ بانک کریمہ بلوچ ءِ گڈی دیدار ءِ پیش نہ دارگ ءُ نماز جنازہ ءَ نیلگ دراھیں انسانی، نیکراھی ءُ راجی رھبندانی پروشگ اِنت –

ھمے درشان ءِ پژدر ءَ آئی ءَ جار پِرینتگ کہ باند ءَ بیست ءُ پنچ جنوری ءَ سرجمیں بلوچستان ءَ دربندیں ھرتال کنگ بیت ءُ اے درگت ءَ دراھیں تاجر برادری ءُ ٹرابسپورٹ واکداراں ھمک رنگیں کمکانی دزبندی کرتگ –

دی بلوچستان پوسٹ

سر بیتگیں ھالانی رد ءَ مستونگ ءَ مزدا ءُ سواری گاڑی ءِ میان ءَ ٹکر وری بیتگ، چریشی ءِ آسر ءَ سواری گاڑی ءِ دڑائیور بیران ءُ زالبولے ءَ ھوار سَے مردم زدگ بیتگ اَنت –

مستونگ ءَ بیران ءُ زدگ بیتگیں مردمانی سیادی پشین ءَ اِنت ءُ دارو درمان ءَ نواب غوث بکش رئیسانی نادراہ جاہ ءَ برگ بیتگ اَنت –

ھمے رنگ ءَ کلات سوراب ءَ پٹرول پمپ ءِ کوٹی ءَ گیس ءِ پُر بوگ ءَ دو مردم بیران ءُ دو بے ھوش بیتگ اَنت –

پولیس ءِ رد ءَ کلات سوراب ءَ پمپ ءِ کارکنوکاں کوٹی ءَ گیس ھیٹر روک کرتگ ءُ واب کپتگ اَنت –

پولیس ءِ رد ءَ کلات ءَ بیران ءُ بے ھوش بیتگیں مردمانی سیادی پشاور ءَ اِنت –

بیران ءُ بے ھوش بیتگیں مردم ڈی ایچ کیو سوراب ءَ برگ بیتگ اَنت –

دی بلوچستان پوسٹ

سر بیتگیں ھالانی رد ءَ کریمہ بلوچ ءِ جون ءِ وش اتک ءَ لس مھلوک کیچ ءِ بنجاھی شھر تربت ڈی بلوچ ءَ مُچ بیتگ ءُ آئی ءِ ستاشانی ءِ ودار ءَ اَنت –

گیشین ھالانی رد ءَ تربت ءَ رؤ ءُ آؤکیں راہ بند کنگ بیتگ اَنت ءُ مھلوک ءَ روگ ءُ آیگ ءَ نیلگ ءَ اِنت-

چاگردی رسانکدراں سر بیتگیں ھالانی رد ءَ کیچ ءَ ھوار بازیں جاھاں مباھل نیٹورک ھال ھم بند کنگ بیتگ ءُ دمگ ءَ رھوتی ھال مھتل اَنت –

ھالانی تہ ءَ گوشگ بیتگ کہ تربت تمپ ءَ رؤکیں گاڑی ھم پاکستانی پوج ءِ نیمگ ءَ دارگ بیتگ ءُ ھرچ گاڑی ءِ تربت ءِ شھر ءِ تہ ءَ اِنت آیاں ڈن ءِ روگ ءَ نیلگ اِنت –

ھالانی تہ ءَ گوشگ بیتگ کہ تمپ ھم سرجم ءَ پوجی انگیر ءِ تہ ءَ اِنت ءُ لس مردماں روگ ءَ آیگ ءَ بندش جنگ بیتگ –

زانگ بہ بیت کریمہ بلوچ ءِ بلوچ نودربر گل آزاد ءِ گوستگیں سروک ءُ بلوچ زالبول رھشون بیتگ کہ آ گوستگیں سال ءِ بیست دسمبر ءَ کینیڈا ءِ شھر ٹورنٹو ءَ ناگتی بیگواہ بیتگ ءُ دومی روچ آئی ءِ جون یک کورے ءَ دزکپتگ –

کریمہ بلوچ ءِ جون گوستگیں شپ ءَ کراچی ءِ بالی پَٹ ءَ آرگ بیتگ ءُ اود ءَ بلوچ یکجھتی کمیٹی ءَ ھوار جتاجتائیں سیاسی ءُ چاگردی مردماں آئی ءِ ستاشانی ءِ ودار کرتگ-

آئی ءِ جون ءِ سربیگ ءَ آئی ءِ جون چیریں راھاں بالی پَٹ ءَ کشگ ءُ دیم پہ تمپ ءَ آئی ءِ کھول ءِ ھمراھی ءَ پوجی کاروان ءِ پھزداری ءَ دیم دیگ بیتگ –

سیاسی مردمانی لوٹ بیتگ کہ کریمہ بلوچ ءِ جون ءَ مئے دست ءَ بہ دے ما وتی ھساب ءَ آئی ءَ راجی پھر ءُ شانے ءَ گُلزمین ءِ باھوٹ کن ایں –

سیاسی مردمانی گوشگ بیتگ کہ کریمہ بلوچ ءِ جون ءِ آیگ ءَ کراچی ءِ بالی پَٹ ءَ آئی ءِ دروتی ستاشانی بیت ءُ چریشی ءَ پد آئی ءِ نماز جنازہ مولوی عثمان پارک لیاری ءَ وانگ بیت –

بلوچ یکجھتی کمیٹی ءَ ھم ھمے جار گوستگیں روچ ءَ پِرینتگ اَت کہ کریمہ بلوچ ءِ جون لیاری ءَ مولوی عثمان پارک ءَ برگ بیت ءُ اود ءَ آئی ءِ نماز جنازہ ءَ پد روانکی دروشم ءَ آئی ءِ جون آئی ءِ بنکی ھنکین تمپ ءَ برگ بیتگ –

جون ءِ چیریں راھاں برگ ءَ پد سیاسی مردماں کراچی ءَ زھرشانی ءُ کریمہ بلوچ ءِ جون ءِ نہ دیگ ءِ سر ءَ اوگام جتگ –

چریشی ءَ پد کریمہ بلوچ ءِ گائبانہ نماز جنازہ لیاری ءَ دگانی سر ءَ لس مھلوک ءِ مچی ء ھمراھی ءَ وانگ بیتگ –

ھمے رنگ ءَ بلوچستان نیشنل پاٹی ءِ سروک سردار اختر مینگل ءَ ھم وتی ٹویٹر تندجاہ ءَ گوشتگ کہ منی ڈیھ ءَ، کپن ءُ مانشانی سر ءَ توپکداروک اوشتاتگ اَنت ھمیش اِنت منی بلوچستان –

نبشتانک: گوں بانک ءَ منی گُڈی تران

نبشتہ کار: شھمیر بلوچ

دی بلوچستان پوسٹ

بانک ءِ اولاک پُل پوش کنگ بہ بیت ءُ مردمانی هارے آئی ءِ پد ءَ ملان بہ بیت گوں چاپ ءُ نازینکاں وتی ابدی واجاه ءَ سر کنگ بہ بیت –

شهمیر : ” چون ئے؟ لُمہ جان-
بانک : من وشاں تو چون ئے کرباناں دیریں هال نہ کتگ ؟-
شهمیر : من وشاں ، برے برے همد ءَ آں تُرساں هاهاهاها اگاں موه رس اِت گڑا پونے بکن کہ زهیروں کُرتگ لُمہ –

بانک : جی هو ! انی چکّاس بوگ ءَ انت 22 ءَ چکّاس ءَ رند موکل بنت پون کن آں گڑا دل ءِ سیر ءَ گپ کنیں -شهمیر : شما انگت نودربر ات هاهاهاها ، ما پیر بوتیں ( سلامت بات ئے لُمہ جان ) –
بانُک : ” هاهاها چتور بہ کنیں اد ءَ وانگ لوٹ اِیت ، نہ وان ئے هچ نزان ئے گپ ، زبان هرچی دربرگی انت-

شهمیر : جی هو شمئے نیمگ ءَ همے هسیت اِنت گوهار وتی اکسے دیم دئے – بانک : ” ویٹ کن من انی ڈن ءَ آں ، لوگ ءَ سر باں روان ئِے کناں “-

شهمیر : جی شر “( بانُک ءَ دو اکس دیم دات ) اکسانی گندگ ءَ پد شهمیر : پد ءَ مُلک ءَ بہ گندات ئے لُمہ جان پہ آجوئی ءَ –
باُنک : ” تئی اے دوا پہ من ءَ ، منی زندگی ءِ مستریں سوگات انت ، It Touched my heart “-

شهمیر : من ءَ باور بیتگ کہ من بیگواهی ءَ پد ، پد ءَ گوں تو گپ ءُ دیوان کناں مروچی من گوں تو گپ ءَ آں نی من ءَ پد ءَ باور انت کہ ما پد ءَ دوار هوار بہ ایں بلے وتی مُلک ءَ – هاهاهاها بلے داں وھدے کہ ما پیر بہ اِیں “-

بانک : هاهاهاهاها من انی پیراں ، بلے پیری جیڑھے نہ انت ، ملک ءَ مِرگ لوٹاں اد ءَ ناں – پد ءَ تمپ ءِ منی دوستیگیں کبرستان ءَ کہ چہ همود ءَ مئے لوگ زاهر انت مئے اسکول همود ءَ انت – دُرستیں بازار ءِ مردم ، کھول، من مدام گوں وتی دزگوهاراں مزاک کتگ کہ ما اگاں بہ مریں کبراں نزیک نزیک ءَ کنیں – همے کبرستان ءَ کہ ما پہ مدام یکے دومی ءَ شپاں چہ کبراں درکا اِیں دیوان کنیں ءُ داوت کنیں هاهاهاها-

شهمیر :بانک تو هچبر نہ مرئے تو زندگ ئے ( لاش مرچاں پارسل بوگ ءَ انت گم مکن هاهاها تو وتی دزگوهارانی گْور ءَ روئے بلے چو نہ بیت ما چہ مرگ ءَ پیسر آجوئی ءَ گندیں اے منی گمان انت)-

بانک : ” پوووووو ! هینچک زندگی چون کناں هاهاها ها لاش پارسل بیت بلے گُڈی ساه همود ءَ کشگی انت وتی ڈیهہ ءِ دگہ یک Level اد ءَ هرچیز درامد انت اد ءَ شپ ءُ روچ هور بہ بیت هاک ءِ بو مارگ نہ بیت- شهمیر : ( باور کن ! ترا بلوچ هکومت ءِ نیمگ ءَ سرکاری پروٹوکول رس اِیت هاهاهاها)-
بانک : اود ءِ ترمپانی رچگ ءَ چونیں وشیں بو یے تالان بیت ءُ ما همے بو ءِ رکینگ ءَ ناکام مہ بیتیں -بانک : ( سرکاری پروٹوکول هاهاهاها -)

شهمیر : ” گوهار تو وَ تمپ ءَ روئے بلے مئے وَ کبرستاں هاجی پیر کراچی انت – گڑا ما چون کنیں هاهاهاها- بانک : من شمئے جیڑواں دگہ رندے توجیلّ کناں ، پد ءَ مرچاں دامگ ءِ زمانگ انت -Communication ءِ جیڑہ نہ بیت –

شهمیر : ” تو گڑا بزاں مارا آن لائن کڈ کن ئے ؟ بانک : هاهاهاها تو انی مہ مر ترا من وتی جاهنشین کناں هاهاهاها –

شهمیر : چش مہ گش گڑا من سک گل باں تئی اے کلوہ منی کر ءَ ایر انت بلکیں زمانگے ءَ کار ءَ اتک هاهاهاها( مئے گْور ءَ رمس مٹ بوت ءُ بیست دسمبر بوت)-

بانُک : هاهاهاها ایر اِنت جان
شهمیر : اے پل پہ تو ندر انت سلامتی پہ سنگتاں ءُ پہ تو بات –

بانک : اے پل پہ تو ندر انت
( 22) ءَ شپ ءِ دوازده ءُ یازده منٹ ءَ منی سر ءَ سنگتے ءَ بلوچستان ٹائمز ءِ اسکرین شارٹے راه دات کہ هما اکسے جتگ کہ پرندوشی بانک ءَ منی سر ءَ راه داتگ ات ءُ انگریزی ءَ نبشتہ ات کہ زیکین انت بانک بیگواه انت ءُ هچ هال ئےِ نیست –

من هما دمان ءَ همے اسکرین شارٹ بانک ءِ سر ءَ راه دات ءُ کلوہ کُت کہ “گوهار ”اے چے چکرے ، سنگت پریشان انت پہ تو ! دومی نیمگ ءَ هچ پسو نیست ات –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ٹلینگوخ ءَ پاکستانی پوج ءِ کاروان ءِ سر ءَ اُرش کُتگ یک پوجی کارمندے کُشتگ ءُ یکے زدگ کُتگ – مزار بلوچ

سربوتگیں ھالانی رِد ءَ مروچی شمبے ءَ ناشناسیں سلاہ بندیں مردماں پاکستانی پوج کاروان ءِ سر ءَ اُرش کُتگ – اُرش کوھلو ءُ کاھان ءِ میانی دمگ ٹیلنگوخ ءَ کنگ بوتگ، اُرش ءَ پاکستانی پوج ءَ جانی تاوان بوتگ –

بلوچ آجوئیں لوٹوکیں سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ اے اُرشے زمّہ واری منّ اِتگ ءُ گوشتگ کہ مروچی سَے ءُ چِل ءَ مئے سرمچاراں پاکستانی پوج ءِ کاروان ءِ سر ءَ اُرش کُتگ –

جارکش ءَ گوشتگ کہ مئے سرمچاراں ھما وھد ءَ پاکستانی پوج ءِ سر ءَ اُرش کہ آ کوھلو ءُ کاھان ءِ میانی دمگ ٹلینگوخ ءَ پہ آرام ءِ ھاتر ءَ مھتل بوتگ انت –

جارکش ءَ گوشتگ کہ اے اُرش ءَ یک پوجی کارمندے مُرتگ وھدیکے یکے زدگ بوتگ، مئے اے وڑیں اُرش بلوچستان ءِ آجوئی ءَ تاں برجاہ مان انت –

بامردیں سنگتانی دیمونی، پدائی، شھیدی ءُ زنداناں بندیگیں پرزند درپشوکیں استال ءَ ترپ اَنت- ماما قدیر بلوچ

دی بلوچستان پوسٹ

سندھ ءِ مزن شھر کراچی ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دو سد ءُ یک روچ سرجم بوتگ-

پاکستان قومی آزادی مھاز ءِ سرکماش ایڈوکیٹ صادق جارچوی ءَ گوں وتی ھمراھاں بنجل ءِ تر ءُ تاب کرتگ بیگواھیں مردمانی کھولانی گوم ءَ دلپدردی درشان اتگ ءُ بنجل ءِ تاک ءُ اکسانی دِرّگ ایرجتگ –

اتکگیں مردمانی گون ءَ تران کنان ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچانی شھیدی، بیگواھی، بلوچ زالبولانی پُرایمنیں زھرشانی ءَ لٹ شاپ کنگ ءُ بیگواھیں مردمانی بنجل ءِ دِرگان دِرگان کنگ ریاستی زوراکیانی راجدپتری نہ کُٹوکیں بھر اِنت – ریاستی ھاکمانی ایواناں نشتگیں پارلمنٹ پرستیں وتگڑیں بلوچ ھم اے کتکاریاں گوں آھاں ھوار انت – بلوچ راج ءِ سربلندی ءُ جزبگ چہ ریاستی زورکایاں گیشتر مھکم بیت اِنت –

آئی ءِ گوشگ ات کہ بامردیں سنگتانی دیمونی، پدائی، شھیدی ءُ زنداناں بندیگیں پرزند درپشوکیں استال ءِ بستار ءَ دار اَنت ءُ بلوچ راج ءَ اے درونت دیگی انت کہ پرزندانی یل کنائینگے ھاتر ءَ ھر وڑیں زاتی مپاداں کَل بہ کن اَنت ءُ راجے ھاتر ءَ یکجاھ بہ بنت ءُ ھروڑیں دیمونی دیگے ھاتر ءَ ھر وھد ءَ وت ءَ ساڑی بہ کن اَنت –

ماما قدیربلوچ ءِ گوشگ ات کہ مروچی پد ءَ میان استمانی براداری ءَ چہ لوٹ کن ایں کہ پاکستانی ریاست ءَ بلوچ راج ءِ سر ءَ میان استمانی کانودانی لگتمالی کتگ – پاکستانی ریاست یکشل ءَ بلوچ ءِ چکچینی ءَ کنگ ءَ انت، ریاست ءَ ھما وڑ ءَ مچھ، بولان، کیچ، مکران ءُ بلوچستان ءِ دگہ ھند ءُ دمگانی تہ ءَ پرزندانی شھیدی ءُ آھاں زورانسری آوار جنگ ءُ بیگواہ کنگ انت آ میان اُستمانی برادری دیم ءِ سر ءَ ترندیں شھمات ئے –

آئی ءِ گوشگ ات کہ اگاں انگت ءَ میان اُستمانی براداری ءَ وتی بے تواری ھلاس نہ کرت گڑا بلوچستان ءِ تہ ءَ بوکیں انسانی ھکانی لگتمالی ءَ آ ھم ھوار بیت –