نبشتانک: مز پہ جھد
نبشتہ کار: درویش بلوچ
دی بلوچستان پوسٹ
اے گپ ءَ ھر مردم زانت کہ دنیا ءِ توک ءَ دو چیز چہ ابرم ءَ ھواری ءَ بندوک انت، وشی ءُغم ، زندگی ، مرگ ، نیکی، بدی ، مہر ، کھر، نپ ءُ تاوان، دوزاہءُ بھشت، شپ ءُروچ ، وپا ءُ دروھگ، ازگاری ءُ نیزگاری، زانت ءُ بے زانتی، سواب ، گناہ مردم اے گپءَ اوں زانت کہ دنیاءِ کسانیں وھد یک چکاس جاھے بلے انگت ترس ءِ آماچ بیت۔ ھر کس ہمے جیڑیت کہ سکّی منی کر ءَ مئیت دگر ءِ کر ءَ بروت ،غم منی کرءَ مئیت دگر ءِ کر ءَ بروت، نیزگاری منی کر ءَ مئیت دگر ءِ کر ءَ بروت ۔ ھرکس لوٹیت کہ دنیاءَ من وش ءُ آباد بہ باں بلئے سکّی ءِ دیمپان مہ باں ۔
پدمنتگیں چاگردءَ سکّیءَ چہ مردم انچو ترسےءِ آماچ بیت کہ زلمءِ دیمءِ اوشتگءِ بدلءَ وتی سرا جھل کنت لگوریں زندگی یے گوازین ایت ۔ تھنا انفرادی ھوالہءَ جیڑیت کہ ھر چی بیت منءَ کار نیست بس منی سرا سکّی مئیت اگاں بازار ءَ یکے بے گناہ جنگ بوگا ِانت گڈا ھرکس گنگ بیت ءُ بس ندارگ چاریت کس ھمت نہ کنت کہ زورآورءَ بگشیت اے بے گناہ ءَ پرچہ تو، جنگءَ ئے ھمے انفرادی جیڑگ کم کمءَ اجتماعی چاگرد ءِ مرگ جوڑ، بیت۔ منءَ کار نیست من چیا مسیبتءَ وتی گٹءَ لوپ بکناں،
بے دردیں سرا دردے بدیاں۔
انچو کہ روایتی سردار، وڈیرہ، ٹکری یے کہ ھرچی وتی ریعت ءَ جائز ءُ ناجائز ھکم دنت ریعت آئی ھکمءَ لبیک کنت، بلے آ سردار، وڈیرہ، ٹکری تری رد بہ بیت بلئے ھکمءِ منگءَ ابید دگہ راہ ریعت پہ وتءَ نہ گندیت پرچہ کہ بلاءِ لاپءَ بلاءِ بیم، ترس کہ چاریں نیمءَ چاگرد کنت گڑا جیڑگءِ دروازگاں گبار مان پوش ایت۔
ترسءِ ھسارءَ چہ ڈن زندگی دست کپیت، پدمنتگیں چاگردءَ چکے کہ ودی بیت ھوشءُ زانتءِ عمر ءَ رسیت گڑا چہ لوگءَ بنداتءَ آئی ءَ برے مزہب ءِ ھدا ءِ ترس، گناہ ءُ دوزہ ءِ ترس ، کسہ ءُ داستاناں دیہہ ءُ بلایانی ترس بزاں وڑے نہ وڑے ءَ آئی ءِ ردومی بودشتانی سرا سان دؤر دیگ بیت، پہ ھمے ھاترا سرجمیں زندءَ آ مانگیشگی جاورءِ تھا گوزیت۔
دیمروی کتگیں چاگرداں گونڈویے ودی بیئگءَ بگر داں امرءِ کجام اسٹیجے بہ بیت اود ءَ مھر، دلبڈی، ھواری ءُ ھمراہداری ءِ چھرگ ترا گندگءَ کئیت انت۔
پمیشکہ دیمروی کتگیں چاگردانی مردماں ھر وڑیں سکی، گمءُ درد ءُ چیلنج گوں تمردی ءَ مقابلہ کتگ انت ءُ پہ وتی مھلوک ءَ توجیل سازتگ جیڑھانی تہا زند چو لیبے ءَ گوازینتگ انچو گشئے آ چشیں زندءِ گوازینگ ءَ آدت بیتگ انت۔
پہ وت ءَ مرگ گچین کتگ ءُ زند وتی مھلوک ءَ بکشاتگ۔
راستیءِ بیرکدار بیتگ انت ءُوتی زندگی پہ دگرءَ سکّی آں دورایش داتگ ۔چشیں کربانی پمیشکہ آیاں داتگ کہ مئے راج گوں دنیاءِ مردماں آسودگءُ آسراتیں زندے بہ گوازین ایت بدلی ابیدء گمءُ دردءَ نہ بیت، ھما انسان کہ وھد ءِ سکّیانی دیمءَ اوشتیت آ چو بولان ءِ کوہ ءَ مھکم بیت،پرآئی زند ءِ ھر وڑیں جنجال چو لیبءَ بیت ھر سکّی ءِ پشتہ یک مکسدے بیت، مکسد ءِ واستا ایماندار بوگ لازم انت دنیاءِ تھا کہ لیجنڈ گوستگ انت آیانی زندءِ سرا چمشانکے مردم بدنت گڑا زانت مز بے جھد ءَ دست نہ کپیت آیاں اگاں بدلی آرتگ گڑا عملی کارئے کتگ، سگ ءُ اوپارئے کتگ پہ گھتری ءِ ھاترا زورآورانی گوں ما داں گڈی ءَ جنگ ئے ھم کتگ۔
وتی زات ءَ چہ دراھگ ءُ مھلوک ءِ گھتری ءَ پہ کار کنوک ءُ کربانی دیوکیں مردم لس مردم نہ بنت راجدپتر ءِ تاکاں آ لیجنڈے بستار ءَ یات کنگ بنت انچو کہ گڈی نبی محّؓمد ءَ کلیں بنی آدم ءِ گھتریں زند ءِ ھاترا بے کساس سکّیانی دیمپانی کت اسلام ءِ تبلیغ دنیا ءِ کنڈکنڈ ءَ سر کت، داں امت گمراہ مہ بیت۔
مارکس ءَ کلیں پوریاگرانی تورشت وتی کت اَنت ءُ پوریاگرانی ھکءِ بابتءَ گپ جت، نبشتہ کت پوریاگر سکین دات انت کہ وتی ھکاں چہ زورآراں پچ بہ گرات۔ سکرات ، چی گویرا ، لینن، لوتھر کنگ، نیلسن منڈیلاءَ ھوار کل ھما لیجنڈ کہ بدلیءُ گھتریءِ بیرکدار بیتگ انت جد ءُ جہد اش کتگ سکی ایش دیستگ پدا گڑا پہ مھلوکءَ بدلی یے آرتگ ۔
بلوچ ھم اھدے نویسگ انت، جھدے کنگ اِنت، کربانی دیئگ ِانت، وتی پدریچاں پہ آجوئی ایں بانداتے ءِ وابءَ گندگ ِانت، وتی ھمساھگیں راجاں کدمے دیماتر گامے جنگ ِانت پہ ھمے امیتءَ کہ جد ءُ جھد ءَ زندگی ھمگرنچ ِانت، اوشت مرگ ءِ نام ِانت۔
بلوچ راجی جنزءَ ھما سنگت کہ شہید بوتگ اَنت، وتی زندئے پہ راج ندر کتگ اے راجی ھستی انت۔ ھمے ھستی آں وتی مرچیگ کربان کتگ پہ بلوچءِ آزاتیں بانداتءَ ۔
اے کربانی ءِ عمل ءِ تھا ھمے فلسفہ بندوک ِانت کہ ابید ء جھد ءَ مز دست نہ کپیت، ءُ یک پڑےءَ پند ءِ جنگ بے آسر نہ بیت ءُ کرد ءِ واھند ءَ راجدپتر ھچبر ڈالچار نہ کنتءُ سوبینی جھدکارانی پداں چک ایت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
