TBP Balochi

بلوچستان ءِ دمگ دالبندین ءُ تمپ ءَ تیرگواری وئیلاں دو مردم بیران ءُ یکے زدگ بیتگ –

سر بیتگیں ھالانی رد ءَ دالبندین ءِ دمگ ڈنو ءَ ناشناسیں مردمانی تیرگواری ءَ یک مردمے بیران بیتگ ءُ یکے زدگ بیتگ – جون ءُ زدگ بیتگیں مردن پرنس فھد نادراہ جاہ ءَ برگ بیتگ اَنت کہ اود ءَ بیران بیتگیں مردم ءِ پجار عبدلمنان نوتیزی ءِ نام ءَ زانگ بیتگ –

ھمے وڑ ءَ تمپ ءِ دمگ نزر اباد ءَ ناشناسیں پرپٹ سوارانی تیرگواری ءَ برکت نامیں مردمے بیران بیتگ –

بلوچستان ءِ جتا جتائیں جاھاں وھد وھد ءِ سر ءَ تیرگواریاں لس مردم بیران ءُ زدگ بیگانی ھال پیداک اَنت –

بیتگیں ھردوکانی وئیلانی بارہ ءَ گیشیں سرپدی نہ بیتگ اَنت –

سر بیتگیں ھالانی رد ءَ روکپتی بلوچستان ءِ دمگ راسک ءَ ناشناسیں مردماں تیرگواری کرتگ ءُ یک مردمے کُشتگ –

اھوالکار ءِ گوستگیں شپ ءَ راسک ءِ دمگ پارود ءَ ناشناسیں مردماں تیرگواری کرتگ ءُ عمران پنّام ءِ اِمُل ء جعفر جھمنند پارود کُشتگ –

کوش ءِ سوب زانگ نہ بیتگ، تیرگواری کنوکاں عمران ءِ سر ءَ شش دانک تیر جتگ ءُ کُشتگ –

ھمے وڑ ءَ روکپتی بلوچستان ءَ دو جتا جتائیں وئیلاں سَے مردم بیران بیتگ اَنت –

گیشیں ھالانی رد ءَ روکپتی بلوچستان ءِ دمگ چھبار ءُ پھرہ ءَ دگ ءِ دو وئیلاں سَے مردم بیران بیتگ اَنت-

اھوالکار ءِ رد ءَ یک وئیلے چھبار ءُ نوکبندیانی میانی جاہ دپ مہ دپ ءَ دو گاڑیاں ٹکر وارتگ ءُ چریشی ءِ سوب ءَ ولید رکش ء ابراھیم جھمنند دشتیاری بیران بیتگ –

دومی وئیل دلگان ءَ دیم پہ پھرہ ءَ گاڑی رؤکیں سواری گاڑی ءُ یک بارکشیں گاڑی ءَ ٹکر وارتگ ءُ چریشی ءَ دو کس بیران بیتگ اَنت –

بیران بیتگیں مردم سرباز ءِ دمگدار ءِ براتزتک گوشگ بیگ ءَ اَنت ھردوک دیم پہ دلگان ءَ روگ ءَ بیتگ اَنت کہ راہ ءَ دگ ءِ وئیل ءِ آماچ بیتگ اَنت –

مروچی جاوید دھکان ایرانی آمیدگس ءَ جیش العدل ءِ بھتام ءَ پاھو داتگ-

سر بیتگیں ھالانی رد ءَ مروچی روکپتی بلوچستان ءِ بنجاھی شھر دزاپ “زاھدان ” ءَ جاوید دھکان پاھو دیگ بیتگ –

جاوید دھکان پنچ جون دوھزار ءُ پانزدہ ءَ دزگیر کنگ بیتگ ءُ دوھزار ءُ ھبدہ ءَ آئی ءِ سر ءَ روکپتی بلوچستان ءِ شھر ایرانشھر ءَ دو گجرانی کُشگ ءِ بھتام جنگ بیتگ –

جاوید دھکان ءِ وکیل مستپا نیلی ءَ رسانکدراں گپ کنان ءَ گوشتگ کہ ما ایرانی آمیدگس ءَ جاوید دھکان ءِ پاھو نہ دیگ ءِ دزبندی کرتگ-

آئی ءَ گوشت کہ مئے دزبندی رد کنگ بیتگ ءُ آ مروچی سھب ءَ دزاپ ءِ مزنیں زندان ءَ پاھو دیگ بیتگ –

زانگ بہ بیت ایمنسٹی انٹرنیشنل ءَ ھوار ایران ایمنسٹی ءَ ھم جاوید دھکان ءِ پاھو نہ دیگ ءِ دزبندی کرتگ –

ایرانی آمیدگس ءِ گوشگ اِنت جاوید دھکان ءَ گوں ایران ءِ بگیری ءَ پرکاریں گل جیش العدل ءَ گوں سیادی بیتگ –

ایرانی آمید گس ءِ گوشگ اِنت ایرانشھر ءَ دو گجر جنگ بیتگ اَنت آیانی کُشگ ءَ جاوید دھکان ءِ دست مان بیتگ –

دومی نیمگ ءَ چاگردی رسانکجاہ ٹوئٹر ءَ روکپتی بلوچستان ءَ بندوکیں انسانی ھکانی باسکاں ایرانی آمیدگس ءِ نیمگ ءِ جاوید دھکان ءَ جتگیں بھتام رد کرتگ اَنت –

گوستگیں روچ ءَ جاوید دھکان ءِ پاھو نہ دیگ ءِ سر ءَ ٹوئٹر ءَ یک کمپئن ءِ ھم کارمرد کنگ بیتگ –

اھوالکار ءِ رد ءَ جاوید ءِ دھکان ءِ پاھو دیگ ءَ پد ھم بازیں مردمانی پاھو دیگ ءِ پرمان کنگ بیتگ اَنت کہ دزاپ ءِ مزنیں زندان ءَ بندیگ اَنت –

جاوید دھکان ءِ کھول گوستگیں روچ ءَ ایرانی آمیدگس ءِ پرمان ءَ دزاپ ءَ لوٹائینگ بیتگ ءُ آئی ءِ گڈی گِندوک گوستگیں روچ ءَ آئی ءِ کھول ءَ کرتگ –

دستونک

دستونکار: ھمراز شکاری

دی بلوچستان پوسٹ

بنا بوتگ سپر ما دم نہ دات اَنت پاد پرچہ
روان اِنت ھر کجا تئی پش کپان ءَ یاد پرچہ

ھمے چاگرد مارا گونزگ ءَ کنت واب گیج اِیت
ھمے چاگرد گوں ما دنت پد ءَ پریاد پرچہ

کُشان اِنت ھر گْور ءَ مئے یک یک ءَ پُلیں براتاں
برے شال اِنت برے گوادر منی برباد پرچہ

کُتگ تو وادہ ءُ کول ءُ کرارے راج ءِ دیم ءَ
نہ بیت اِنت نوں گُشئے تو گوں منا آزاد پرچہ

نہ لوٹ اِنت چہ ترا درمان ءُ دارو بِل مارا
اے ٹپاں آزگیں مئے پِر کن ئے تو واد پرچہ

منا ھمراز مرچاں بے وپا یاں کار نیست اِنت
نہ زاناں نوں نیایاں بے وپاءِ یاد پرچہ

وائس فار بلوچ مسنگ پرسنز ءِ نیمگ ءَ سندھ ءِ مزن شھر کراچی پریس کلب ءِ دیم ءَ بیگواھیں بلوچانی ھاتر ءَ زھرشانی برجاہ زھرشانی ءَ مروچی چار ھزار ءُ دوسد ءُ ھپت روچ سرجم بوتگ-

دی بلوچستان پوسٹ

کمیونسٹ پاٹی ءِ ڈاکٹر ریاض، جنرل سیکٹری یامین بلوچ، نغمہ شیخ ءُ دگہ تکاں بندوکیں مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

بیگواھیں انسانی ھکانی باسک راشد حسین بلوچ ءِ برات زتک ماھزیب بلوچ ءَ بنجل ءَ اتکگ ءُ وتی زھرشانی نبشتہ کنائینتگ –
ماھزیب بلوچ ءِ گوشگ ات کہ متھدہ عرب امارات ءُ پاکستان ءِ نیمگ ءَ دنیگت ءَ راشد حسین بلوچ یل کنگ ءُ آئی ءِ دیم ءَ آرگ ءِ ھاتر ءَ ھچ وڑیں گامگیج زورگ نہ بوتگ –

آئی ءَ گوشتگ کہ راشد حسین بلوچ زورانسری آوار جنی ءُ بیگواھی ءِ درگت ءَ سِی ءُ یک جنوری یکشمبے ءِ روچ ءَ ما چاگردی ترامجاہ ٹویٹر ءَ کمپئین کنگ بیت –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ پاکستان ءَ سندھی ءُ بلوچانی سرڈگار ءِ سر ءَ زورانسری قبضہ کتگ آھانی زند تباہ کرتگ – مروچی پاکستانی پوج بلوچستان ءِ سر ءَ کھر کنگ ءَ انت ھزارانی کچ ءَ بلوچ پرزند شھید کنگ بوتگ انت ھزارانی کچ ءَ بلوچ پرزند زورانسری اوار جتگ ءُ وتی زنداناں بندیگ کرتگ انت کہ انگت کنگ ءَ انت –

ماما قدیر بلوچ ءَ گوشتگ کہ وی بی ایم پی ءِ بازیں زھرشانی ءُ لوٹاں ابید میان اُستمانی ادارہ ءُ انسانی ھکانی ادارہ بلوچستان ءَ پاکستانی زوراکی ءُ بیگواھیں بلوچانی یل کنائینگ ءَ بے سوب بوتگ – پاکستانی پوج بلوچستان ءِ تہ ءَ لشکرکشیاں گیش کنگ انت –

آئی ءَ گوشتگ کہ اے وڑیں نازرکیں جاورھالاں بائد وَ ھمیش انت کہ درسیں راجداریں گل سنجیدگی ءِ درشان ءَ بہ کن انت بلے ما بے نپیں باوستانی تہ ءَ وت مین کتگ ءُ یکے دومی ءِ سر ءَ بھتام جنگ ءَ انت- جست ایش انت کہ اے وڑیں بے نپیں کار ءَ چہ وتی راجی ءُ راجدپتری پرز ءَ پیلو کرت کنیں؟ –

ماما قدیر بلوچ ءِ گوشگ ات کہ میان استمانی ادارہ ایردستیں راجانی ھمایت ءَ بس لھتے شرتانی سر ءَ کنت ءُ آھانی تہ ءَ شرتریں شرت ایردستیں راجانی لوٹ یکسانیت ھوار انت – البت اے وڑیں جاورھالاں وھدیکہ تاکتورانی میان ءَ ساد کشی، ءُ سَپ بندی بوگ ءَ انت ھمے ھاتر ءَ مئے راجی ءُ انسانی ھک بیت ما وتی ردانی تہ ءَ املی یکجاھی ءِ درشان ءَ بہ کنیں پہ دیم ءِ رؤگ ءَ گامگیج بہ زور ایں –

گوستگیں سال ءِ گڈی ماہ نوزدہ دسمبر ءَ ایرانی آمیدگس ءِ پرمان ءَ روکپتی بلوچستان ءَ شانزدہ کس پاھو دیگ بیتگ اَنت –

ٹی بی پی اھوال

روکپتی بلوچستان ءَ ایرانی چیریں ادارھانی دست ءَ آوار جنی ءَ پد لس مردم پاھو دیگ بیگ ءَ اَنت –

گوستگیں روچ ءَ چاگردی رسانک جاہ ٹوئٹر ءَ ایرانی ایمنسٹی ءِ نامیں یک تندجاھے ءَ دزبندی جار ءِ پِرینتگ ءُ ایرانی آمیدگس ءَ دزبندی کرتگ ءُ گوشتگ کہ جاوید دھکان نامیں یک بلوچے ءَ پاھو ءِ دار ءَ بہ رکین اِت ءُ آئی ءَ پاھو مہ دے اِت –

ایرانی ایمنسٹی ءِ رد ءَ جاوید دھکان ءِ سر ءَ مئی دوھزار ءُ ھبدہ ءَ جرمے جنگ بیتگ ءُ انی آئی ءِ سر ءَ پاھو دیگ ءِ ھکم دیگ بیتگ کہ ایرانی آمیدگس ءِ رد ءَ سِی جنوری ءَ آ پاھو دیگ بیت اِنت-

جاوید دھکان پنچ جنوری دوھزار ءُ پانزدہ ءَ گرگ بیتگ ءُ بازیں سالانی بندیگ بیگ ءَ پد آئی ءِ سر ءَ پاھو نامہ اتکگ ءُ ایرانی ایمنسٹی ءَ ایران ءِ واکداراں لوٹ کرتگ ءُ گوشتگ کہ جاوید دھکان ءَ پاھو مہ دے اِت –

جاوید دھکان یک رندے پیسر ءَ ھم پاھو دیگ ءِ ھکم بیتگ ءُ آئی ءِ ھمراہ شعیب ریگی ءُ ھسن دھواری بیتگ اَنت کہ ھردوھیں ھما وھد ءَ پاھو دیگ بیتگ ءُ جاوید ءِ وکیل ءَ دوبر دزبندی کنگ ءَ پد آئی ءِ پاھو داشتگ –

جاوید دھکان ءِ پاھو ءِ ھلاپ ءَ گوستگیں شپ ءَ چاگردی رسانکجاہ ٹوئٹر ءَ یک کمپئن ءِ بنگیج بیتگ #savejaviddehghan ءِ نام ءَ بیتگ ءُ ایران ءَ اے کیمپئن درستاں سربر بیتگ –

گوستگیں روچ ءَ ایران ءِ اُستان اصفھان ءَ ھم زاھدان ءِ جھمنندیں بلوچے ایرانی آمیدگس ءِ پرمان ءَ پاھو ءِ دار ءَ درنجگ بیتگ ءُ کُشگ بیتگ، کہ آئی ءِ نام انور ناروی ء یار مھمد جھمنند دزاپ “زاھدان ” ءِ نام ءَ پجارگ بیتگ –

یک اھوالءِ رد ءَ روکپتی بلوچستان ءَ بازیں مردمے ایرانی آمیدگس ءِ پرمان ءَ اے درچ ءَ دو ماھانی تہ ءَ بازیں مردمے پاھو دیگ بیتگ ءُ کُشگ بیتگ اَنت آ روکپتی بلوچستان ءِ جتا جتائیں جاھاں بندوک بیتگ اَنت ءُ پاھو دیگ بیتگیں مردم بلوچانی ناماں زانگ بیتگ اَنت –

ایرانی آمیدگس بندیگ کرتگیں مردماں جتا جتائیں بھتامانی سر ءَ پاھو نامہ ءِ پرمان ءَ کنگ ءَ اِنت ءُ آئی ءِ گوشگ اِنت کہ اے مردم ایران ءَ ناشری، نشہ باپاری ءُ دگہ دگہ وئیلاں دزمانجن اَنت –

بلے دمگ ءِ مردمانی رد ءَ اے گپ ءُ بھتام رد اَنت ءُ اے پاھو دیگ بیتگیں مردم لس مردم اَنت ءُ اشانی تہ ءَ بازیں کساسے ءَ لاپ شوھازیں مردم اَنت ءُ اشاں ایرانی چیریں ادارہ دزگیر کن اَنت ءُ بازیں وھداں زنداناں بند کنگ ءَ پد آیاں پاھو ءِ دار ءَ درنجگ ءَ اَنت-

ھمے گپ ٹوئٹر ءَ روکپتی بلوچستان ءَ انسانی ھکانی لگتمالی ءِ سر ءَ لیکہ درشان کنوکیں تندجاہ بلوچ کمپئن فعالین ءِ تندجاہ ءَ ھم گندگ بنت کہ اود ءَ ھمک وھد ءَ روکپتی بلوچستان ءَ گپتگیں ءُ پاھو دیگ بیتگیں مردمانی ھالاں شنگ ءُ تالان کنت –

ٹی بی پی ءَ روکپتی بلوچستان ءَ بندوکیں انسانی ھکانی باسکے ءَ پاھو دیگ بیتگیں مردمانی بارہ ءَ رھوت کرتگ –

انسانی ھکانی باسک ءَ گوشت کہ گوستگیں سال ءِ نوزدہ دسمبر ءَ بہ گر داں انیگ ءَ شانزدہ بلوچ پاھو دیگ بیتگ اَنت –

آئی ءَ گْوشت کہ بھنام، شعیب ریگی، عبدلباسط، حمید میر بلوچ زئی، مھروان براھوئی، الیاس قلندرزئی، حسن دھواری، امید مھمدوزئی، مجید ریگی، جما زاروزئی، یونس خانشینی، عبدالرؤف کبدانی، یونس جمشیدزئی، شمس الدین باجیزئی ءُ گوستگیں روچ ءَ انور ناروی ء یارمھمد پاھو دیگ بیتگ اَنت –

انسانی ھکانی واستا کارکنوکیں باسک ءَ گوشت کہ روکپتی بلوچستان ءَ ایران ءِ سرکار ءَ انسانی گل ھم مردمانی پاھو دیگ ءَ چاگردی رسانکجاھاں زھرشانی ءُ سرکار ءَ مدام ھمے دزبندی ءَ کنگ ءَ اَنت کہ لس مردماں کسان کسانیں جرمانی سر ءَ پاھو مہ دے بلے ایرانی سرکار انسانی ھکانی گپاں مانیارگ ءُ مردماں پاھو دیگ اِنت –

ایران ءِ سرکار اے درگت ءَ دگہ گیشیں ھال ھم دیم ءَ نیار اِت ءُ گپتگیں مردمانی بارو ءَ گیشیں گپ ھم ایرانی واکدارانی نیمگ ءَ دز نہ کپ اَنت –

انسانی ھکانی باسک ءَ جھان ءِ انسانی ھکانی گلاں چہ لوٹ کرتگ ءُ گوشتگ کہ آ بلوچستان ءِ نیمگ ءَ دلگوش بہ کن اَنت ءُ بلوچستان ءَ پاھو ءِ دیگ ءَ مردماں بہ رکین اَنت، آئی ءَ گوشت اگاں اے دارگ نہ بیت اَنت گڑا بلوچانی بازیں مردم ھمے رنگ ءَ پاھو ءِ دار ءَ درنجگ ءُ کُشگ بنت –

روکپتی بلوچستان ءَ بلوچانی آکبت چی بیت ءُ آیانی گڈسر چی اِنت آیانی چم انسانی ھکانی گلانی وداریگ اَنت –

بلوچستان ءَ وتکشی ءُ اشکرانی کھن ءَ دو مردم بیران بیتگ اَنت ءُ مستونگ ءِ دگ ءِ وئیلے ءَ سَے زالبول زدگ بیتگ اَنت-

سر بیتگیں ھالانی رد ءَ ھزدار ءَ یک مردمے ءَ ساد گُٹ ءَ کرتگ ءُ وتکشی کرتگ –

گیشیں ھالانی رد ءَ ھزدار ءَ مروچی مھمد ندیم نامیں مردمے ءَ ساد گُٹ ءَ کرتگ ءُ وتکشی کرتگ، پاھو دیگ ءِ سوب زانگ نہ بیتگ –

دکی ءَ اشکرانی کھن ءَ زھریں گیس ءِ پُر بوگ ءَ یک کاریزکارے بیران بیتگ ءُ یکے بے ھوش بیتگ –

گیشیں ھالانی رد ءَ دکی ءَ اشکرانی کھن ءَ زھریں گیس ءِ پُر بوگ ءِ سوب ءَ یک مردمے بیران بیتگ ءُ یکے بے ھوش بیتگ –

مائینز بنشون ءِ رِد ءَ دویں مردم افغانستان ءِ نندوک انت – بیران بوتگ ءِ کاریزکار ءِ پجار خان ء وزیر خان ءُ بیھوش بوتگیں اکبر ء خان محمد ءِ نام ءَ چہ بوتگ انت – دویں مردم شملزئی ٹک ءَ چہ سیادی دار انت –

بیران ءُ بیھوش بوتگیں مردم چہ اشکرانی کھن ءَ درکنگ بوتگ ءُ دمگی نادراھجاہ ءَ سر کنگ بوتگ انت – اود ءَ اژدری چار ءُ ٹپاس ءَ پد بیھوش بوتگکں مردم پہ گیشیں جاندراھی ھاتر ءَ شال ءَ دیم دیگ بوتگ –

ھمے وڑ مستونگ ءَ مزن شھدگ ءَ مستونگ ءَ دیم پہ شال ءَ رؤکیں کوچ وئیل ءِ آماچ بیتگ –

وئیل ءَ سَے زالبول زدگ بیتگ اَنت، زدگ بیتگیں زالبول نواب غوث بکش نادراہ جاہ ءَ برگ بیتگ اَنت –

ھاران، شال ءُ تمپ کوھاڈ ءَ چار بندیگیں مردم یلہ بیتگ ءُ وتی لوگاں سر بیتگ اَنت –

دی بلوچستان پوسٹ

بلوچستان ءَ گار ءُ بیگواھیں مردمانی واستا توار چِست کنوکیں گل وائس فار بلوچ مسنگ پرسنز ءَ دو مردمانی یلہ بیگ ءِ ھال راست کرتگ اَنت –

گل ءِ رد ءَ بلوچستان ءِ دمگ ھاران ءَ ھپت سالاں بندیگیں بابو ھسن گوستگیں روچ ءَ یلہ بیتگ ءُ وتی لوگ ءَ سر بیتگ –

وائس فار بلوچ مسنگ پرسنز ءَ گوشتگ کہ ھمے وڑ ءَ بیگواہ بیتگیں ثناء اللہ سمالانی ھم یلہ کنگ بیتگ ءُ وتی لوگ ءَ سر بیتگ –

ھمے وڑ ءَ تمپ ءَ آوار جنگ بیتگیں دو کس یلہ بیتگ ءُ وتی لوگاں سر بیتگ اَنت –

گیشیں ھالانی رد ءَ تمپ کوھاڈ ءَ پاکستانی پوج ءَ دست ءَ آوار جنگ بیتگیں عزت ء خورشید ءُ مھران رسول بکش گوستگیں شپ ءَ یلہ کنگ بیتگ ءُ وتی لوگاں سر بیتگ اَنت –

دمگی مردمانی رد ءَ عزت ءُ مھران سال دوھزار ءُ نوزدہ ءَ جولائی ءِ ماہ ءَ آوار جنگ بیتگ ءُ گوستگیں شپ ءَ یل بیتگ اَنت –

وائس فار بلوچ مسنگ پرسنز ءِ سروک نصراللہ بلوچ ءَ بیگواھیں مردمانی یلہ بیگ وشی ءِ گوشتگ ءُ لوٹ کُتگ کہ بازیں سالاں بندیکیں دراھیں بلوچاں سرکار یلہ کنت ءُ آیانی لوگاں شاتمانیاں کار اِت –

ندر پہ اُستاد اسلم ءِ ارواہ ءَ

لچہ: رھبر

عمر مراد

دی بلوچستان پوسٹ

جلشک ماھکان سکین
ھیال دَرپشیں روچ برانز
کرن دیدیں راھبروک
جُنز ءِ آجوئی سروک
وتی زمین تو کوپگ ءَ کُتگ
زِر ءَ تئ دیدگاں پناہ زُرت
گیاب ءُ ڈنّ ءُ پٹّ ءُ وڈّھ
تئ سینگ ءَ گوں لِچ اِتنت
زید گواڈگیں ندارگاں دُرھیں
تئ پاگ ءِ پیچے ءَ ٹَٹات وتا
ساز ءُ گوات ءُ بو ءُ باس
تئ ساہ ءِ ساھگ ءَ واب کپتگ اَنت
اَبد
منزل ءُ سَبَر تاں کِشک ءُ دَگ
دل ءِ تئ دریکگاں گوں بستگ اَنت
حَیا ءُ لَجّ ءُ گئیرتاں
تئ پونز ءِ سربِر ءَ کلات بَست
جہان ءِ دیدگاں بَدیں
مُدام چو کُنٹگ ءَ تِج ئے
وتن نہ رؤت من سَدِّکاں
بلوچ رنگیں سُہر چمّ
ترا سلام سد سلام
توامیں دؤر ءُ باری آں مُدام
جَلشک ماھکان سکین
ھیال درپشیں روچ برانز
وتی زمین تو کوپگ ءَ کُتگ

نبشتانک: منی اُستاد شھید بابا علی جان

نبشتہ کار: گزین بلوچ

دی بلوچستان پوسٹ

بابا تو اے نگیگیں وھد ءُ جاورانی توک ءَ وڑ وڑیں تنگی ءُ بزگی دیستگ بلے تئ رُژنائیں زانت ءَ ترا چو درور ء کوہ ءَ بُرز ءُ بالا کُت بابا من ھمے اشکُت تئی گْور ءَ چونیں انسانے بہ یتکیں ترا گوں دیوان ئِے بہ کتیں گُڑا دومی رند ءَ الّم تئی گِندگ ءِ جُھد ئِے کُت چی ءَ کہ تو ھما اِکلاک ءِ واھُند اَت تئی دیم ءَ کسان ءُ مزن ءَ ھچ پرک نہ اَت تو کُل یکیں نِگاہ ءَچارِ اِتگ اَنت ءُ مار اِتگ اَنت آ دور شر گیر کیت کہ من ترا گوں لھتیں ھمبلاں ڈیک دات من باز کسان اَتاں گُڑا تئی نِند ءُ گِند من ءَ گوں بُوت نشتاں وشات ءُ شادات بُوتاں رند ءَ ھرکس پہ دیم کندگ ءُ مزاک کنگ ءَ اِتاں بلے تو سجھیں دیوان ءَ توار پِرجت ءُ گُشت کہ اے بے مانائیں ھبر مُدام ھست اَنت بلے مرچی بیا اِت شوکیں دیوانے اڑ دے ایں وتی راج ءُ ڈیھ ءِ بابت ءَ چیزے ھبر ءُ تراں کنیں بابا تو دیوان ءِ پاگ واجہ بُوت ئے چیزے شھد ءُ شکلیں ھبر مارا سوگات دات ءُ گُشت شما سنگتاں کُل سرپد اِت کہ ما یک گُلامیں راجے اِیں مئے سر ءَ ابید ابرمی ریاست ء پاکستان پہ ٹوپ ءُ بم وتی کبزہ برجاہ کُتگ بیا اِت ما شما انچیں کارے بہ کنیں کہ مئے کارانی پُشت ءَ مئے راج ءُ ڈیھ آزات بِہ بیت اے جُلگھیں جھان ءَ دگہ منی گِندگ ءَ چہ کار ءَ دیم تِریں کار نیست اگاں دگہ چونیں کارے ما بہ کنیں آ مئے تھنا جند ءَ کار دنت درور:- سرکار ءُ نوکر بُوگ چی ءَ کہ پوسٹے بہ بیت آ مئے شُمئے جِند ءَ پائدگ دنت بلے مئے سجھیں راج چہ وانگ ءُ زانگ ءَ پشت کپتگ کہ ما وشھال بہ بہ ایں ایں دگہ ھزاراں براتانی لوگ ءَ یک وھدے نگن ھم ودی نہ بیت گُڑا بیا اِت وتی بلوچی زھرگ ءَ کار بَند ایں اے ھون واریں رستر ءَ چہ وتی مُلک ءِ ھاک ءَ پہ تچگ مجبور کن ایں اگاں سنگتاں ما ءُ شُما اے جنگ ءَ ھور نہ بوت ایں ءُ وت ءَ پُشت ءَ داشت مارا اے مُلک ءِ تہ ءَ نِندگ باز مُشکل ءُ گِران کپ اِیت پرچاکہ کہ مارا شُمارا وتی دائم پنجگانی توک ءَ کنت ءُ چہ وانگ ءُ زانگ ءَ دور کِنزین ایت ما ھرگور ءَ گِند ایں بس منی تنگھیں براتانی جون بے چادر ءُ بے گَندل ءَ روڑانی سر ءَ کپتگ اَنت ما ءُ شُما اچ اِشاں دیم تِر نہ ایں اے شھید بوتگ اَنت مئے شُمئے بلکیں بلوچ کوم ءِ شھید انت ستم نہ اِنت کہ منی ءُ تئی جِند ءِ لوگ ءَ کسے شھید نہ بوتگ اے کُل مئے شھید اَنت اے کُلاں وتی نازاکیں زند ببا داتگ مئے ءُ شُمئے باندات ءِ آزاتی ءُ وشھالی ءِ واست ءَ بیا اِت کہ بالاچ ءِ نام ءَ دوبر نوک کن ایں آجوئی ءِ جنگ ءِ پڑ ءَ رو ایں گوں سرمچاریں ھمبلاں بند ایں کتاراں دیم پہ مات کوھیں سِنگاں چو درور ء بالاچ ءَ وتی سرجاہ کن ایں بابا پد ءَ تو گُشت من وتی ھبر ءَ نوں گونڈ گِراں کہ وھد شُتگ ماں نی رو ایں دیم تِر ءَ مارا کمو کار ھست شُما درکپت اِت دیم پہ وتی نیمگ ءَ ما پہ وتی نیمگ ءَ –

بابا تئی اے شھدیں ھبر من ءَ باز وش بوت انت من چہ تئی ھبرانی پُشت ءَ سک باز جیڑ اِتگ بلے منی زِھن ءَ تئی کُلیں ھبر دِل ءَ جاگہ داتگ اَنت ءُ گُشتگ ھبر واکی ھمیش اَت انت بابا جان ءَ دیم پہ دیم ترا گوں نِشت ھبر کُت ھیر من ھم اے دور ءَ وانگ ءَ اِتاں چمَ ء وت دیست کہ وانگ ءِ تہ ءَ اے وڑیں ھبر مارا مئے اُستاداں ھچبر نہ گُشتگ من پد ءَ دِل ءَ جیڑ اِت من ھمے ھبراں شھید بابا علی جان ءِ وتی اُستاداں جُست گِر ایں باریں آ من ءَ چہ پسّو دِے انت من پہ تْرس ءُ لرز ھمے ھبر وتی اُستادانی مستر ءَ جُست کُت ھمے مستریں اُستاد ءَ من ءَ گُشت ترا اے ھبر کے ءَ گُشتگ اَنت؟ کے ءَ تئی زِھن چپّ ءُ چوٹ برتگ ءُ بران اِنت منی دپ ءَ درشُت کہ ھبر زاناں ھراب اَنت من ترا جُست کُت گُشت ئِے ھو من گُشت کُجام بُنیاد ءَ ھراب اَنت من ءَ ئِے پسّو دات ءُ گُشت تو گریبے ئے ترا نان پہ ورگ ءَ نیست تو کُجا اے وڑیں ھبر در برتگ کُجا چی ءَ چُشیں پندل زور ئے کار ئے آ دگہ ورناھانی زِھناں ھراب کن ئے من زاناں ترا اے ھبر ماسٹر علی جان ءَ گُشتگ انت-

من گُشت علی ماسٹرے بوتگ ُ پدا ھم وتی نوکری ئِے یل داتگ مستریں اُستاد ءَ گُشت ھو آ شُتگ جنگءَ اِدا گز ءَ جت نوں ڈیھ ءَ آزات کنت من ھچ نہ گُشت ھاموش بوتاں من ءَ اُستاد ءَ اِجازت دات من شُتاں دیم پہ کِلاس ءَ ھیر وھد ھمے وڑ ءَ گوزان بُوت پد ءَ من ڈیک دات گوں بابا علی جان ءَ من گُشت من تئی ھبر وتی کُلیں اُستادانی مستر ءَ گُشتگ اَنت اُستاد ءَ تئی ھلاپ ءَ ھبر جتگ منی زھن دو جاگہ ءَ اِنت من نہ زاناں کئی ھبر شر اِنت بابا جان ءَ گُشت نا کہ منی ھبر ءَ بہ کن نا کہ اُستاد ءِ اے جنگے ترا وت نشان دنت کے شر اِنت کے ھراب اِنت من پد ءَ دل ءَ جیڑ اِت باریں دیم ءَ چے بیت ھیر من وتی وانگ ءِ پد ءَ کپتاں وھد ھم کم کم ءَ گوزان بُوت یک روچے بابا علی جان اَتک اسکول ءَ لھتیں کاکز ئِے گون اَت لھتیں کتاب بلوچی ھم گون اَت مارا گوں کُلیں ھم کلاس پیلواں دات ئِے وت اوگام ئِے جَت بلوچستان زندگ بات بلوچ آجو بات پد ءَ درکپت ءُ شُت ھیر ما کتاب ونت انت ءُ اے کتابانی توک ءَ بلوچ ڈیھ ءِ بلوچ ءِ گُلامی ءِ بابت ءَ سجھیں کِسہ نبشتہ اَت من ءَ یاد بیت ھمے بلوچی کتاب ءِ نام اَت( سنگر ) من ونت نوں سرپد بوتاں کہ منی وانگ ھچ پائدہ نہ داریت اِد ءَ مارا مئے اُستاداں مطالعہ پاکستان ءِ بارہ ءَ وانینتگ اسل کتاب ھیش اِنت کہ اِد ءَ مئے پجار بلوچی نام ءَ زانگ بوگ ءَ اِنت بلوچی ترانہ ھم نبشتہ اِنت ایشی توک ءَ ماں دربرجاہ ءَ ھمے کتاب ءَ وانگ ءَ اِتاں کہ یک روچے پاکستان ءِ پوج ءَ اُرش کُت مئے وانگ جاہ ءَ ھمے کتاب ئِے مارا چہ پچ گِپت ءُ روان بُوت من ءَ یاد اِنت بابا جان ءِ نام ءَ ھم لھتیں ھبر ءُ ھال ئِے کُت چار پنچ تیر ھم جت ئِے پہ مئے تْرس ءِ واست ءَ گُشت ئِے اگاں دوبر من اِد ءَ بلوچی کتاب دیست انت شُما ونت من شُمارا ھم نہ بکشاں نی من زانت کہ مئے پِگر بابا جان ءَ پِر اِنت اسل ھبر ھمائی ئیگ انت ءُ راست اِنت کہ وھد ءَ مارا سرپد کُت وتی نپ ءُ نُکس من زانت بابا تو مئے راہ چیدگ ءُ نشان کُت تئی پِگر ءِ لکیر داں جھان ھست تو ءُ تئی پِگر نمیران اِنت۔

یاد بہ بئیت 3 جنوری 2020 ءَ ماسٹر بابا علی جان ءَ پاکستان ءِ کاسگ چَٹّیں دپ چلوسکاں مگربی بلوچستان ءَ وتی تیرانی آماچ کُت شھید کنگ بُوت شھید بابا علی جان بلوچستان ءِ دمگ آواران مشکے نوکجو ءِ جاہ مِنند اَت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔