TBP Balochi

ٹی بی پی پتر ھال ءَ سر بیتگیں ھالانی رد ءَ بلوچستان ءِ دمگ بولان ءَ گاڑیانی ٹکر ورگ ءَ دو مردم بیران ءُ دو زدگ بیتگ اَنت –

لیویز بنشون ءِ رد ءَ وئیل پنجرہ پُھل ءِ ھند ءَ ٹوڈی کار ءُ مزدا گاڑی ءِ میان ءَ پیش اتکگ –

وئیل ءَ پد لیویز ءِ کارمند وئیل جاہ ءَ سر بیتگ ءُ اود ءَ آیاں زدگ ءُ بیران بیتگیں مردم چِست کرتگ ڈھاڈر ءَ سول ھسپتال ءَ برتگ اَنت –

لیویز بنشون ءِ رد ءَ بیران بیتگیں مردمانی پجار سعد اللہ، احسان اللہ ءُ زدگ بیتگینانی پجار محمد صدیق ءُ نصیب اللہ ءِ ناماں زانگ بیتگ اَنت-

لیویز بنشون ءِ رد ءَ ھرچاریں مردمانی سیادی چمن ءَ اِنت ءُ مزدا ءِ ٹکر جنگ ءَ سواری گاڑی جھل ءَ لگوشتگ ءُ کپتگ کہ چریشی ءَ آئی ءَ سواریں مردم چیر ترینتگ اَنت –

زانگ بہ بیت گوستگیں ماہ ءِ بیست ءُ یک رمس ءَ ھم بولان ءَ کوچ ءُ وینے ءِ میان ءَ ٹکر وری بیتگ اَت کہ چریشی ءَ سَے مردم بیران ءُ ھژدہ زدگ بیتگ اِت اَنت –

زانگ بہ بیت گوستگیں روچ ءَ چہ پنجگور ءَ کراچی ءَ رؤکیں کوچ اوتھل ءِ ھند ءَ وئیل ءِ آماچ بیتگ اَت ءُ چریشی ءَ چاردہ مردم بیران ءُ پانزدہ زدگ بیتگ اِت اَنت ءُ بیران بیتگیں مردمانی تہ ءُ چُک ءُ زالبول ھم ھوار بیتگ اَنت –

بیران بیتگیں مردمانی سیادی پنجگور ءِ دمگ ءِ نندوک گوشگ بیتگ اِت اَنت ءُ چاگردی رسانکجاھاں چاگردی مردمانی نیمگ ءَ گوستگیں روچ ءَ بیتگیں وئیل ءِ پدردی درشان اِتگ ءُ سرکار ءِ سر ءَ ایراد گرگ بیتگ اَنت –

چاگردی مردمانی گوشگ اِنت کہ سرکار دگانی نام ءَ لکانی زرگپت بلے دگانی سر ءَ یک کلدارے ھم ھرچ بیگ ءَ نہ اِنت-

چاگردی مردماں سرکار ءِ سر ءَ ایراد گپتگ ءُ گوشتگ کہ سرکار دگہ کارانی نام ءِ سر ءَ ھم باز پوڑی گرگ اِنت بلے دگانی سر ءَ ھزارانی انسانانی جان روگ ءُ زوال بیگ ءَ اَنت اشانی گر ءُ دار بیگ ءَ نہ اَنت –

دی بلوچستان پوسٹ

سد سالی ئیں سر ٹام مور ءَ وتی یک سدمی بوتن روچ ءِ وھد ءَ وتی لوگ ءَ پاد جتگ ءُ کرونا ویروس ءِ ھلاپ ءَ جنگ ءَ این ایچ ایس ءِ کمک ءَ پہ کساس33 ملین جم کُتگ اَت، مروچی بیران بیتگ۔

بیران بیتگیں ٹام مور ءِ جنک ھنا این گرام- مور ءَ رسانکدراں گپ کنان ءَ گُشتگ کہ آ لھتیں ھپتگاں چہ پنیومونیہ ءِ جاندراھی ءَ بیتگ ءُ گوستگیں ھپتگ ءَ کرونا ءَ پوزیٹیو بیتگ۔

بکِنگھم پیلس ءَ وتی درشان ءَ گُشتگ کہ راج بانُک پہ کیپٹن سر ٹام مور ءِ کھول ءَ پدردی ءِ کلوہ دیم دیگ ءَ اِنت۔

شاھی کھول ءَ ٹوئٹ کُتگ: “راج بانک گوں کیپٹن سر ٹام مور ءُ آئی ءِ کھول ءَ گوستگیں سال ءِ نیاد ءَ باز وش بوتگ۔ آئیءُ شائی کھول ءِ ھیال ءُ لیکہ پشت کپتگیں کھول ءَ اَنت۔”

ٹی بی پی اھوال

گوستگیں روچ ءَ چندے دماناں چاگردی رسانکجاھاں شنگ بیتگیں تامرے ءَ گوادر اسٹیڈیم “بزانکہ میان اُستمانی گوازی جاہ ” ءِ آئی سی سی ءِ نیمگ ءَ شنگ بیتگ اَت –

اے تامر ءَ پد گوادر ءِ زبیائی ءِ ستاہ گوازی کنوکیں مردماں جوانیں رنگے ءَ کرتگ اَت، گوازی کنوکیں مردمانی گوشگ اِنت نیولینڈز ءُ بھارت دھرم شالا ءَ پد گوادر ءِ اسٹیڈیم سیمی زیباتریں اسٹیڈیم اِنت کہ اود ءَ دو نیمگی زر ءُ کوہ ءُ گوادر ءِ ندارگانی تہ ءَ باتیل ءِ کوہ ءِ جھلی دامن ءَ اِنت –

اے گپ زرباری افریقہ ءِ ٹیم ءِ باسک تبریز شمسی ءَ کیپ ٹاؤن ءَ نیولینڈز ءُ بھارت دھرم شالا ءَ پد گوادر ءِ اسٹیڈیم ءِ زیبائی ءَ سیمی نمبر گوشتگ اَت –

ھمے رنگ ءَ چاگردی رسانکجاہ ٹوئٹر ءَ پاکستانی گلوکار فخر عالم ءَ ھم گوادر اسٹیڈیم ءِ اکس ءُ تامر شنگ کرتگ ءُ وتی کلوہ ءِ تہ ءَ گوشتگ کہ سرجمیں دنیا ءِ ھستیں دراھیں کرکٹ گوازی کنوک پاکستان ءَ بیا اَنت ءُ گوادر کرکٹ اسٹیڈیم ءَ مئے گون ءَ گوازی بہ کن اَنت –

اے دیمرویانی تہ ءَ زانگ بیت گوادر ءَ کمے باز دیمروی کرتگ بلے گوادر ءِ بنکی جھمنند اے دیمروی وتی جاہ ءَ بلکیں ترمپیں آپے ءَ ھم دگانی سر ءَ اوشتاتگ اَنت چوشیں بازیں چیز چاگردی رسانکجاھاں دمگی اھوالکار ءُ دگہ تندجاھاں شنگ ءُ تالان اَنت کہ گوادر ءِ لس مردم آپ ءُ دگہ آسراتیانی واستا زھرشانی کنگ ءَ اَنت –

آیاں اے دیمروی گوادر ءِ مردمانی واستا کارامد اَنت یا آیانی پشکپتگیں گزراناں سرجم کرت کن اَنت؟ اے جست ھما جاھاں مردماں جیڑین اَنت کہ یک نیمگے ءَ چاگردی رسانکجاھاں گوادر ءِ دیمروی ءِ اکس ءُ تامر شنگ بیگ ءَ اَنت ءُ دومی نیمگ ءَ گوادر ءِ مھلوک ءِ تنیگ ءُ ھشکیں لُنٹانی اکس ءُ تامر چاگردی رسانکجاھاں گندگ ءَ کاینت –

چاگردی رسانکدر کارمرد کنوکیں عبدالعزیز بلوچ دو اکسانی پجیگ ءَ نبشتگ کنت بژنیگیں گپ ایش اِنت کہ سرکار ءِ گور ءَ بلوچستان ءِ مھلوک ءِ زند ءِ رکینگ ءِ واستا ءُ سِنگلیں روڈ ءِ جاہ ءَ ڈبلیں روڈ ءِ زر نیست اَنت بلے گوادر کرکٹ اسٹیڈیم دنیا ءُ پنجاپ کرکٹ ءِ واستا اربانی زر ھرچ کنگ بیتگ ءُ اشی ءَ زانگ بیت “وفاق” چِنکس بلوچستان ءِ گون ءَ نزیک اِنت –

آینا نامیں ٹوئٹر کارمرد کنوکے گوادر ءِ اسٹیڈیم ءِ اکس ءِ پجیگ ءَ ھسبیہ کمبرانی ءِ اکس ءَ شنگ کنت ھسبیہ کمبرانی ءَ وتی بیگواھیں براتانی اکس دست ءَ اَنت ءُ دگ ءِ سر ءَ اوشتاتگ “آئینا گوش ایت ھما کہ گوادر ءِ اسٹیدیم ءِ آباد کنوک بیتگ اَنت آ بیگواہ کنگ بیتگ، اے چونیں مسکراھی ءِ بلوچستان ءِ گون ءَ بیگ ءَ اِنت –

ھمے درگت ءَ گوستگیں روچ ءَ گوادر ءِ جھمننداں ھم تامر ءِ شنگ بیگ ءَ پد وتی ھیال ءُ لیکھانی تہ ءَ گوشتگ کہ گوادر ءِ زیبائی ءَ دنیا گند اِیت بلے مئے رنج ءُ گم کسے ءَ سما بہ کرتیناں گڑا مروچی مئے جاور گھتر بیتگ اِت اَنت –

الیاس بلوچ گوادر ڈگری کالج ءِ سیکنڈ ایئر ءِ نودربرے ءُ دمگی کرکٹ گوازی کنوکے، آئی ءَ دی بلوچستان پوسٹ ھال ءَ گپ کنان ءَ گوشتگ کہ مارا دمگی گوازی کنوکاں اد ءَ روگ ءِ ھک نیست اِنت –

الیاس ءِ گوشگ اِنت اگاں اد ءَ انٹر نیشنل میچ بہ بنت مئے واستا وشی ءِ بیت اِنت بلے راستی ءِ گپ ایش اِنت کہ ہیلی کاپٹر ءُ توپکانی چیر ءَ ڈنی گوازی کنوکانی واستا مشکلانی دیمپانی بیت اِنت –

الیاس گوش ایت گوادر ءِ دمگی مردم یک نیمگے ءَ پسانی پیم ءَ واڑ ءَ کنگ بیگ ءَ اَنت اگاں اد ءَ دو چار میچ بیت گڑا اشی ءِ تہ ءَ ھچ مزنیں جیڑھے گپے نہ اِنت چُشکہ اد ءَ ڈنی مردم ھمک روچ کاینت گوازی ءِ واستا –

الیاس ءَ گوشت: گوادر ءِ مردم دیمروی ءِ ھلاپ نہ اَنت بلے مروچی اے دیمروی مئے چمانی دیم ءَ کپگ ءَ اَنت ءُ چریشی ءِ تہ ءَ ما بنکی جھمنندیں مردم درامد لیکگ بیگ ءَ ایں ءُ وتی شھر ءِ تہ ءَ گار بیگ ءَ اِنت –

نِی اے چیزانی گندگ ءَ پد گوادر ءِ مردمانی واستا چی بیت آیانی تُن ءِ ھلاھوش ھلاس کنگ بنت یا آ چہ گوادر ءَ گلینگ ءُ دری مردم آرگ بنت، اے گپ ءِ پکر بلوچستان ءِ زانتکار ءُ وانندھیں ورنایانی کوپگ ءَ اِنت یا دری مردمانی سر ءَ ایر اِنت –

وئیل چہ پنجگور ءَ دیم پہ کراچی ءَ رؤکیں کوچ اوتھل ءِ ھند ءَ کپتگ چاردمردم بیران، مستونگ، ھب، اورماڑہ ءَ بیتگیں وئیلاں یک یک مردمے بیران، شش زدگ بیتگ اَنت –

ٹی بی پی پتر ھال ءَ سر بیتگیں ھالانی رد ءَ بلوچستان ءِ دمگ لسبیلہ ءَ اوتھل ءِ ھند وایار فارم ءِ نزیک ءَ چہ پنجگور ءَ دیم پہ کروچی ءَ رؤکیں کوچ کپتگ، چریشی ءَ چاردہ مردم بیران ءُ پانزدہ زدگ بیتگ اَنت –

ایدھی ءِ بنشون ءِ رد ءَ جون ءُ زدگ بیتگیں مردم سول ھسپتال اوتھل ءَ برگ بیتگ اَنت، بیران بیتگیں مردمانی تہ ءَ دو چُکاں ھوار پنچ زالبول ھوار اَنت، ھمے وڑ اشانی تہ ءَ ھشت کسانی جاور نگیگ اَنت ءُ بنداتی درمان ءَ پد کراچی ءَ برگ بیتگ اَنت –

زدگ بیتگیں مردمانی رد ءَ مساپر کشیں کوچ شپ ءِ ساھت دو ءَ پیش اتکگ ءُ وئیل ءَ پد سَے اداراں رند پھزدار اتکگ اَنت ءُ چریشی ءِ سوب ءَ مردمانی بیرانی تہ ءَ گیشی اتکگ –

ھمے وڑ ھب ءَ آر سی ڈی شھدگ ءَ پرڈی جی ھان سیمنٹ فیکٹری ءِ نزیک ءَ ویگو گاڑی ءُ مزدا ٹرکے ءَ ٹکر وارتگ چریشی ءَ سوب ءَ یک مردمے بیران ءُ یکے زدگ بیتگ –

بیران بیتگیں مردم ءِ پجار بیلہ ءِ نامی ئیں باپاری ھاجی مولا بکش رونجھو ءِ نام ءَ زانگ بیتگ ءُ دومی آئی ءِ برات ھاجی مھمد بکش ءِ نام ءَ زانگ بیتگ –

ھمے وڑ گوادر ءَ دیم پہ کراچی ءَ رؤکیں گاری اورماڑ ءِ دمگ ماکولہ ءِ وئیل آماچ بیتگ کہ چریشی ءِ سوب ءَ دو مردم زدگ بیتگ اَنت،زدگ بیتگیں مردم اورماڑہ ءَ برگ بیتگ اَنت –

ھمے وڑ مستونگ ءِ دمگ کھڈ کوچہ ءَ دو ترند رؤکیں پرپٹان ٹکر وارتگ کہ چریشی ءِ سوب ءَ سَے کس زدگ بیتگ اَنت –

زانگ بہ بیت گوستگیں ماہ ءِ بیست رمس ءَ چہ پنجگور ءَ دراتکگیں بس ھم اوتھل ءَ وئیل ءِ آماچ بیتگ اَت کہ چریشی ءَ دو لیویز کارمنداں ھوار ھشت مردم بیران ءُ بیست ءُ دو زدگ بیتگ اِت اَنت –

وئیل کوچ ءِ بریکانی ندارگ ءِ سوب ءَ پیش اتکگ اَت -اے گپ ھم زانگی ءِ بلوچستان ءِ ھمے نزیکیں روچاں دگ ءِ وئیلانی تہ ءَ باز گیشی اتکگ ءُ گیشتر سوب دگانی پُرشت ءُ پروشی گوشگ بیگ ءَ اِنت –

نبشتانک: بابا شھید ڈاکٹر منان جان

نبشتہ کار :ایم بلوچ

دی بلوچستان پوسٹ

اُمیت اِنت ھر کُجائے وش ئے کندگ ءَ ئے بابا پھل کن دیر انت گوں تو گپ نہ کُرتگ مرچی دل ءَ توارے پِر جت تئی ھیالاں کپت آں دل ءَ گُشت بابا جان پہ نمدی یے نبشتہ بہ کن ءُ راہ دے ءُ گوستگیں پنچ سالاں بلوچستان ءِ تہ ءَ بوتگیں ھالت ءُ جیڑھانی سر ءَ کمو تران بہ کن آں اے زانگ ءَ ابید ھم کہ بابا چہ من ساری اے دُرست جیڑھاں سرپد اِنت۔

بلے انگت دل لوٹ ایت لھتیں گپ بہ کن آں کہ من ءَ سک زھیر کنت پر تو، پہ تئی گپاں،پہ تئی مھراں،پہ تئی نیاداں، ھما مجلساں کہ آشوبی بوتگ اَنت،ھما کہ مسکرائی بوتگ اَنت۔ منءَ پہ درستیں ساھتاں زھیر کنت کہ تئی امبراھی ءَ گوستگ اَنت اے ساھتاں کہ تئی زھیر بنت دگہ ھچ زانت نہ کن آں بس ھمے زاناں کہ چم ارساں پُر اَنت۔ اے گپ ءَ تو ھم الم ءَ زانتگ اَت ءُ ما ھم سرپد اَتاں کہ تئی دابیں مھروان کس نیست،تئی مٹ ءُ درور تئی جند اِنت بلے ما ھمے درداں نی مارگ ءَ اں کہ تو یکیں بوتگ ئے کس ھم تئی وڑ ءَ نہ اِنت، کس چو تئی داب ءَ مھروان نہ اِنت،کس چو تئی وڑ ءَ امبراہ نہ اِنت کس ھم چو ترا نہ اِنت کس ھم بابا ھر کُجا کہ چماں شانک دئے بس درآمدی اِنت بے مھری اِنت، تیوگیں جھان تامُر اِنت کہ مئے چراگ تو بوتگ ئے مئے زند ءِ تھاریانی روژنائی، مئے ابیتکیانی امبراہ،مئے دردانی دوزواہ مئے زندمان ءِ مڈی اے کُلیں گوں تئی بچکندگ ءَ بندوک بوتگ اَنت۔ کدی کہ تئی بند بوت اَنت مئے زندمان ھم مٹ بوت کس ءَ کہ نہ گند آں علی جان دادءِ شئیر دل ءَ کیت” اے درآمدیں شھرءَ کس نہ جنت وتی چھر ءَ گوں کئےءَ بنشتین آں گپ ءُ گلھے بہ کُتیں “-

بابا تو بہ گندئے جیڑگءَ ئے کہ پنچ سالءَ رند من ترا نمدی یے راہ داتگ بلے وتی وشیانی گپاں نہ کنت بس ھمے گُشیت کہ من ابیتک آں بے تو،زھیری آں پہ تو، کس مھروانے نیست۔

من زان آں تو کندگءَ ئے ،ڈیھءِ بابتءَ گپءَ ئے۔ برے گوں بابا خیربکش مریءَ،برے گوں شھید صباّ دشیاریءَ، برے گوں شھید رازق گُلءَ ،برے گوں واجہ گلام محمدءَ، برے گوں لالا منیرءَ، برے گوں شیر محمدءَ، برے گوان وتی بچوک جانءَ۔۔۔۔

بابا بیا کمو سیاسی جاورانی سرءَ۔ بلوچ ڈیھءِ زمینی جاور روچ پہ روچءَ بلوچءَ پہ گیشتر تنگ بوھگءَ اَنت۔ چین ھم وتی نوکیں پندلاں سازگ ءَ اِنت۔ پاکستان بازیں بلوچاں کارمز کنگ ءَ اِنت۔ بازینے رد ریگءَ اِنت ءُ وتی امبراہ کنگءَ اِنت۔ استاں بلوچ جھدءَ ھلاس کنگءَ پہ ھرچ پیمیں پندل سازگءَ اِنت۔ ھرچ تاکتءَ وتی جنّگءَ اِنت۔

شھید اُستاد اسلم ءُ لمہ یاسمینءَ بلوچ جھدءِ تہ نوکیں دپترے جوڑ کُت۔ وتی کسان سالیں بچ شھید ریھان جانءَ دست بڈءَ جت ءُ پدائیءَ راہ دات۔ بلوچ فدائین ھملھاں رند پاکستان ءُ چین تُرس ءُ لرزءِ آماچ اَنت۔ ریھان جانی فدائین کنگءَ رند بلوچ ورناھانی تہ نوکیں جوش ءُ جزبھے ودی بوت ءُ بلوچ فدائینانی لڑے در آھت، برے کراچی،برے گوادر، پد ءَ کراچیءَ اے درُستیں اُرشاں پاکستان ءُ چین ءَ را لرزینت-

2020ءَ چہ ما لُمہ کریمہ دور بوت۔ آئیءَ ھم مارا یل کُت ءُ تئی نیمگءَ آھت۔ آئی روگءَ رند یک آشوبے اتک،بلوچ شیرزالانی جوزہ کہ لھتیں ساری ءَ اَتاں ھما داب ءَ پدا دیم ءَ اتک اَنت۔ بلوچ جُھدءَ را نوکیں دروشمے دات۔ دژمن چہ بانک ءَ ھمینچو ترسگءَ اَت کہ بانک ءِ میت ءَ را ھم بلوچ راج ءِ دست ءَ نہ دات ئِے کہ آ وتی رھشُون ءَ گڈی وار بگند اَنت۔ دژمن ءَ وتی فوجی کانوائی تہ بانک ءِ میت ڈارک پہ تمپ ءَ بُرت کہ کسے آتک مہ کنت بلئے بلوچ ءِ تمردیں بچ ءُ زالاں کسےءَ سواری ءُ کسے ءَ وت ءَ پند ءَ تمپ ءَ سر کُرت اوار اِیں بابا روچے اَلم ڈیک وریں۔
تئی بچ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

مشکے تنک ءَ پاکستانی پوج ءِ پانگس ءِ سر ءَ دور جنگ ءُ وتکاریں سلاھاں گوں اُرش کُتگ – میجر گْوھرام بلوچ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں مشکے تنک ءَ برجاھیں پاکستانی پوج ءِ پانگس ءِ سر ءَ اُرش کتگ، اُرش ءَ پاکستانی پوج ءَ جانی تاوان بوتگ –

دومی نیمگ ءَ بلوچ سلاہ بندیں بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوَستگیں شپ ءِ ادار نُھ ءَ مشکے تنک ءَ برجاھیں زورگیریں پاکستانی لشکر ءِ پانگس ءِ سر ءَ دور جنگیں توپکے ءِ گون ءَ اُرش کُرتگ ءُ یک کارمندے کُشتگ، پد ءَ پانگس ءِ سر ءَ گوں وتکار ءُ مزنیں سلاھاں گوں اُرش کُرتگ کہ چہ ایشی ءَ پانگس ءَ ساڑی ئیں بازیں کارمندے مُرتگ ءُ ٹپی بیتگ اَنت –

گڈسر ءَ میجر گْوھرام بلوچ ءَ گوشتگ کہ بلوچستان آجوئی ءَ تاں زورگپتیں پوج ءِ سر ءَ مئے اُرش برجاہ مان انت –

زندگیں راج وتی شھید ءُ ایندگہ جھد کنوک کہ زوراکانی لگتمال اَنت آھاں مدامی یات کن انت ءُ آھاں دروت ندر کن انت – ماما قدیر بلوچ

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی بنجل کراچی پریس کلب ءِ دیم ءَ برجاہ، زھرشانی ءَ مروچی چار ھزار ءُ دوسد ءُ دہ روچ سرجم بوتگ – سند ساگر پاٹی ءِ رھشون ھاپز سکندر، گل شیر کویجو، وائس فار مسنگ پرسنز آف سندھ ءِ سسی لوھار، سارنگ دانی ءَ بنجل ءِ تر ءُ تاب کرتگ بیگواھیں مردمانی کھولانی گون ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ زورگپت مدامی ایردستانی پُرایمنیں جھد ءِ ھلاس کنگ ءِ ھاتر ءَ زورکی ءِ سیمسراں سرگوز کنت – آئی ءَ گوشت ھمے وڑ بلوچانی آوار جنگ ءُ آھاں زنداناں بندیگ کنگ، آھاں شھید کنگ ءُ آھانی زانگولیں جوناں ویرانگاں دور دیگ ءُ ریاستی پوج ءِ داشتگیں ڈیتھ اسکواڈ ءِ دست ءَ بلوچانی کُشت ءُ کوش وتی باجگزارانی زور ءَ پُرایمنیں جھد کنوکانی بگیری ءَ پندل کنگ ھر زورگپتانی کار بوتگ اَنت –

آئی ءَ دیمتر ءَ گوشتگ کہ پُرایمنیں جھد وتی سوب مندی ءِ نزیک ءَ سر بیتگ گڑا زورگپت وتی زورگری برجاہ دارگ ءُ پُرایمنیں جھد ءَ درگان درگان کنگ ءِ ھاتر ءَ بازیں شِر ءُ شیتانی ءَ گندگ بوگ ءَ انت –

آئی ءَ گوشتگ کہ ھر وڑیں راج ءِ ھاتر ءَ راجدپتر ءُ راجدپترے جوڑ کنوکانی ارزشت ءُ راجی کاز ءُ راجی پجار ءَ چہ کمتر نہ بیت – ھمے ھاتر ءَ زندگیں راج وتی شھید ءُ ایندگہ جھد کنوک کہ زوراکانی لگتمال انت آھاں مدامی یات کن انت ءُ آھاں دروت ندر کن انت –

مند شیراز ءَ پاکستانی پوج ءِ پانگس ءَ یک پوجی کارمندے دور جنگیں توپکے نشانگ کتگ – بیبگر بلوچ

سربوتگیں ھالانی رِد ءَ مروچی کیچ ءِ دمگ مند شیراز ءَ چک آپ ءِ کور ءَ برجاھیں پاکستانی پوج ءِ پانگس ءِ سر ءَ ناشناسیں سلاہ بندیں مردماں اُرش کُتگ – اُرش ءَ پاکستانی پوج ءَ جانی تاوان بوتگ –

دومی نیمگ ءَ بلوچ سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مرچی سھب ءَ مئے سرمچاراں مند ءِ کوھی دمگ شیراز ءَ چُک آپ کؤر ءَ برجاھیں پاکستانی پوج ءِ پانگس ءِ سر ءَ دُور جنگیں ءُ وتکاریں سلاھاں گوں اُرش کُتگ –

جارکش ءَ گوشتگ کہ اے اُرش ھما وھد ءَ کتگ وھدیکہ پوج ءِ کارمند چہ سنگر ءَ ڈنّ گردگ ءَ بوتگ اَنت – اُرش ءِ آسر ءَ یک کارمندے مرتگ ءُ یکے زَدگ بوتگ-

گڈسر ءَ جارکش بیبگر بلوچ ءَ گشتگ کہ مئے اے وڑیں اُرش بلوچستان ءِ آجوئی ءَ تاں برجاہ مان انت-

نبشتانک: عبداللہ ثناء، منی سنگت ءُ مصری مچ

نبشتہ کار: اصغر بلوچ

دی بلوچستان پوسٹ

عبداللہ ثناء نادرئی ءِ ھال ءَ دیر انت کہ چاگِردی رسانکدر ءَ گردگ انت۔ یک روچے من پوسٹے دیستگ کہ فرنٹیر کروف( ایف سی) ءِ کماندان عبداللہ ئِے چارگ ءَ شتگ۔ دل ءَ گشت کہ نوں عبداللہ ءِ سر ءَ ھاوند ءَ رھم کتگ، نوں توجیلّ ئِے بیت۔ اے ھمے وھد ات کہ حیات مرزا تربت آبسر ءَ شھید کنگ بوتگ ات ءُ ایپ سی وتی کرد ءَ اندیم کنگ ءُ وتی ھونی ئیں دستاں شودگ ءِ جھدے کنگ ءَ ات۔ بلے ھیر، ھمے وھد ءَ منی سنگت اوں بیمار ات، شومک ءِ نادراھی ات ئِے،گڈی اسٹیج-

من یک روچے وتی سنگت ءَ گشُت، “شوم تو اد ءَ جرمنی ءَ بہ مر ئے،ما ترا ھمد ءَ بُن دے ایں، مئے کر ءَ چوشیں پیسہ نیست کہ ترا کبر بکناں،” (جرمنی مانش کنگ ءِ ھاتر ءَ مردم مانش ءِ جاگہ ءَ بھا زورگی انت ءُ ایوک ءَ کل ءُ کسارت ءِ ھرچ چاردہ پانزدہ ھزار یورو بیت،ملکی بیست ءُ پنچ لکھ ءَ بُرز بہ زُور ئے، ھمے ھاتر ءَ دمی آسانتریں راہ، بُن دیگ انت) من پد ءَ اے گشت،”مئے کر ءَ چوشیں پسھے نیست کہ تئی جُون ءَ ملک ءَ راہ بہ دیاں۔” بلے، منی سنگت نوں وش انت، سلامت انت؛ سے مزنیں آپریشن ( میجر سرجری) بوت۔ اے آپریشناں کساس ملکی کروڑ ءُ نیم ، تو انگت گیش بہ زور،اتکگ۔ بلے اے درائیں ھرچ جرمنی ءِ سرکار ءَ کتگ انت، بلے کہ منی سنگت ءَ اے ملک ءِ شناس نامہ گون نہ انت؛ ءُ ما پہ باھوٹی نشتگ ایں۔

گپ بندر ءَ عبداللہ ثناء ءَ چہ چست بوتگ ات۔ چار پنچ روچ بیت کہ چاگردی رسانکدر ءَ پد ءَ عبداللہ ثناء ءِ نادراھی ءِ ھال گردگ ءَ انت۔ عبداللہ ءِ تب سک ھراب بوتگ ءُ کراچی ءَ برگ بیتگ؛ نادرجاہ ءَ انت۔ ڈاکٹر ءِ گشگ انت کہ جگر ئِے مٹ کنگی انت۔ ءُ اے آپریشن کنگ ءِ ھرچ ءُ درچ ھشتاد لک انت۔ اے وھد ءَ عبداللہ ءِ دست ءَ ھچ نیست، اوست آرگنائزیشن آئی ءِ کمک ءُ ھرچ درچ ءَ مدت کنگ ءَ انت، ھمے رنگ ءَ واجہ اسحاق خاموش ھم وتی بالاد ءَ چاگردی رسانکدر ءَ کیمپن کنگ ءَ انت۔ھمے ڈول ءَ بازیں عبداللہ ءِ منوک آئی ءِ کمے کمک ءَ کنگ ءَ انت۔ مروچی من دیستگ کہ فدا شھید چوک تربت ءَ پہ عبداللہ ثناء ءِ توجیل ءِ درگت ءَ چندہ کنگ بوگ ءَ انت۔

عبداللہ ثناء ءَ من چہ کسانی ءَ زاناں؛ ھما وھد ءَ چہ کہ عبداللہ ءَ نوکی سوت جنگ بندات کتگ۔ آ مجتّی، مئے باگ ءَ اتکگ، ھمود ءَ سوت ئِے جتگ۔ من ءَ شر یاد انت کہ مدام عطا شاد ءِ اے شیر جتگ ئِے “اے چتوریں سر گنوک انت پہ کے ءَ ودار بند انت کسے دامنے نہ کرز ایت اے دلاں کوار بند انت”مئے باگ ءَ سے مصری( شکر) بوتگ،من سر گپتگ آں ءُ عبداللہ ءُ آئی ءِ سنگتانی واستا پپونک( رنگ) سر شتگ ءُ داتگ انت۔ وھدے کھن ءُ کور جوہ شت انت، گڑا منی پت ءَ ڈیزل بیکو مشین ءِ سر ءَ باگ ءَ داشت۔ بلے ڈیزل گران بوان بوت، پت ھم ھلاس بوان ات، گڑا ما وتی باگ ءِ جند یلہ کت، باگ مرت ءُ ویران بوت۔ اے شکریں مچ ھم گیمران بوت ءُ مُرت انت۔ مروچی من عبداللہ ءِ گیمرتگیں دیم دیست کہ آ گوں وزیر ءُ گزیراں دست بندی کنگ ءَ انت ،گڑا مروچی من ءَ وتی ملک ءِ مصری مچ یاد اتک انت کہ آ نوں مرتگ انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ کیچ ءِ دمگ مند ءَ پاکستانی پوج ءَ بیڑ برتگ ءُ دمگ انگر کرتگ ءُ لشکر کشی بندات کرتگ –

گیشیں ھالانی رد ءَ مند ءِ ھند گوبرد ءَ پاکستانی پوج ءَ بیڑ برتگ ءُ لشکر کشی بندات کرتگ، تنی وھدی پوج دمگ ءَ جاڑیگ اِنت ءُ لس مردمانی دزگیری ءِ ھال اِنت –

دمگی مردماں ٹی بی پی ءَ گوں گپ کنان ءَ گوشتگ کہ مروچی مند گوبرد پوج ءَ انگر کرتگ ءُ سجوئیں مردم لوگاں کَش اِتگ ءُ وانگ جاہ ءَ برتگ ءُ مُچ کرتگ اَنت –

دمگی مردمانی رد ءَ پوج ءِ گوشگ اِنت کہ درسیں مردم مُچ بہ بیت ءُ پاکستان ءِ پلامرزی ءِ واستا اوگام بہ جن اِت ءُ اے گپ ءَ ھم بہ جن اِت کہ ما آجوئی نہ لوٹ ایں –

دمگی مردمانی رد ءَ پوج گوبرد ءِ بازار ءَ مانرتکگ ءُ لوگ لوگ ءَ پَٹ ءُ پول کنگ اِنت ءُ مردماں بیھار دیگ ءَ اِنت ءُ پوج ءِ ھمراھی ءَ دمگ ءِ چریک ھم گون اَنت –

دمگ ءَ باز مردمانی دزگیری ءِ ھم ھال ھست اَنت ءُ تنی وھدی پوج دمگ ءَ جاڑیگ اِنت –

دومی نیمگ ءَ مند شیراز چُک آپ کور ءَ پاکستانی پوج ءِ سر ءَ ناشناساں ھم اُرش کرتگ-

گیشیں ھالانی رد ءَ مند ءِ کوھی دمگ شیراز چک آپ کور ءَ پاکستانی پوج ءِ چیک پوسٹ ءِ ناشناسیں سلاہ بندیں مردماں اُرش کرتگ –

زانگ بہ بیت گوستگیں روچ ءَ مند ءَ پاکستانی پوج ءِ سر ءَ بمب تراکے ھم بیتگ اَت –

تراک مند باگزو ءَ بیتگ اَت ءُ تراک ءِ زمہ واری بلوچستان ءِ آجوئی لوٹوکیں گل بی ایل ٹی نامیں گلے ءَ منّ اِتگ اَت –

بی ایل ٹی ءِ جارکش میران بلوچ ءَ گوشتگ اَت کہ مند باگزو ءَ پوج ءِ پانگس ءِ واستا راشن سرکنوکیں کارمندانی سر ءَ بمب تراکے کرتگ –