TBP Balochi

تربت ءَ ایف ڈبلیو او ءِ سر ءَ بوتگیں زمّہ واری منّیں، دمگی ٹھیکداراں مکن کن ایں کہ پوجی منسوبھانی بھر مہ بنت- میجر گْوھرام بلوچ

سربوتگیں ھالانی رِد ءَ ناشناسیں سلاہ بندیں مردماں کیچ ءِ بُنجاھی شھر تربت ءَ بالی پٹ چارراہ ءِ نزیک ءَ دگ ءِ سر ءَ کار کنوکیں کمپنی ءِ گاڑی ءُ مشینریانی سر ءَ اُرش کُتگ –

اے اُرش ھما وھد ءَ کنگ بوتگ کہ دگ ءِ سر ءَ کار برجاہ بوتگ- اُرش دگ جوڑ کنوکیں پوجی کمپنی ءِ گاڑی تاوان رس اِتگ-

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں کیچ ءِ بُنجاھی شھر تربت ءَ بالی پٹ چار راہ ءِ نزیک ءَ ایف ڈبلیو او ءِ سر ءَ ھما وھد ءَ اُرش کتگ کہ آ دگ ءِ جوڑ کنگ ءَ دلگوش بوتگ اَنت-

جارکش ءَ گوشتگ کہ اُرش ءِ آسرا مشینریاں تاوان رس اِتگ ءُ آھانی چلائینوک ھم تیرانی زد ءَ اتکگ اَنت –

میجر گْوھرام بلوچ ءَ گوَشتگ کہ زورگیریں پاکستانی پوج ، پوجی بند ءُ ساچی کمپنی ءُ آھانی کُمکار، وتگڑیں دیمروی ءَ ھواریں لشکری ءُ ھندی بند ساچی کمپنی ھم مئے نشانگ ءِ توک ءَ بنت –

گڈسر ءَ جارکش میجر گْوھرام بلوچ ءَ گوشتگ کہ ما یکرندے پد ءَ درسین دمگی ٹھیکداراں ھم من کن ایں کہ آ اے پوجی منسوبھانی بھر مہ بنت اگاں ناں آ وتی ھر وڑیں تاوانانی زمہ وار وت انت –

سندھ ءِ مزن شھر کراچی ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل برجاہ – زھرشانی بنجل ءَ مروچی چارھزار ءُ دوسد ءُ سینزدہ روچ سرجم بوتگ –
چہ لیاری ءَ سیاسی ءُ چاگردی باسک ابوبکر بلوچ، نظیر بلوچ ءُ دگہ مردماں بنجل ءِ تر ءُ تاب کرتگ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی گون ءَ باوست کنان ءَ گوشتگ کہ پاکستان بیگواھیں مردمانی کھول ءِ دلیریں جھد ءُ آھانی تمردی ءَ تُرسگ ءَ انت – آئی ءَ ھمے ترس انت کہ بیگواھیں مردمانی کھولانی نیمگ ءَ چہ میان استمان ءَ ھوار ایندگہ ھکی آمیدگس ءُ انسانی ھکانی ادارہ ءُ فورمز پاکستان ءِ زوراکیاں سرپد بہ بیت ءُ سرکار ءِ دروگ پدر بنت –

آئی ءَ گوشتگ کہ بیگواھیں بلوچانی جیڑہ ءِ یکیں گیش ءُ گیواری دروشم ءَ میان استمان تیزی ءَ گوں دلگوشی ءُ دزمانجنی گون بہ بیت میان اُستمانی ءَ دمگی لڑ ءَ گندگ بوگ ءَ انت چریشی ءَ چہ وی بی ایم پی بیگواھیں بلوچانی نیمگ ءَ چست بوتگیں توار ءَ گیشتر مھکم کنت-

سر بیتگیں ھالانی رد ءَ کراچی ءِ دمگ گُل مھمدی لین گلی نمبر بیست ءُ پنچ لیاری ءَ انسانی ھکانی واستا کار کنوکیں باسکے دزگیر کنگ ءُ بیگواہ کنگ بیتگ –

آوار جنگ بیتگیں مردم ءِ پجار سلطان سعید ءِ نام ءَ زانگ بیتگ، آ کراچی ءَ سِی جنوری ءَ رینجرز ءَ دزگیر کرتگ ءُ برتگ –

آئی ءِ کھول ءِ گوشگ اِنت سِی جنوری ءِ بامسار ءِ وھد چار ءَ رینجرز ءَ مئے لوگ ءِ سر ءَ بیڑ برتگ ءُ لوگ انگیر ءَ کرتگ ءُ لوگ ءَ مئے ورنائیں بچ سلطان سعید آوار جتگ ءُ برتگ –

کھول ءِ گوشگ اِنت رینجرز ءُ چیریں ادارھانی کارمنداں گوشتگ کہ سلطان سعید ءَ بس پَٹ ءُ پول ءَ رند یلہ کن ایں بلے مروچی پنچ روچ ءِ گوزگ ءَ پد آ یلہ کنگ نہ بیتگ –

سلطان سعید بلوچستان ءِ ھنکین تمپ بالیچہ ءِ نندوک اِنت ءُ انی بازیں وھدے بیت کہ آ کراچی ءَ جھمنند بیتگ –

آئی ءِ کھول ءِ گوشگ اِنت اگاں سلطان سعید ءَ دگہ گیشیں جرمے ھست گڑا آئی ءَ آمیدگس ءَ پیش بہ کن اِت –

آئی ءِ کھول ءِ گوشگ اِنت سلطان سعید کریمہ بلوچ ءِ جنازہ ءَ پد آ واتر کراچی ءَ اتکگ گڑا آ دزگیر کنگ ءُ بیگواہ کنگ بیتگ –

سر بیتگیں ھالانی رد ءَ بلوچستان ءِ دمگ قلعہ سیف اللہ ءَ دگ ءِ وئیلے ءَ دو مردم بیران بیتگ اَنت –

وئیل قلعہ سیف اللہ ءَ شھدگ ءِ سر ءَ پیش اتکگ کہ اود ءَ رکشہ ءُ کنٹینرے ءِ میان ءَ کزا بیتگ ءُ چریشی ءَ دو مردم بیران بیتگ اَنت –

ھالانی تہ ءَ گوشگ بیتگ کہ رکشہ ءَ سواریں دوئیں مردم بیران بیتگ اَنت –

بیران بیتگیں مردمانی پجار حمید ء میرو ءُ ولی مھربان ءِ ناماں زانگ بیتگ اَنت، وئیل ءَ پد بیران بیتگیں مردمانی جون چِست کنگ ءُ نادراہ جاہ ءَ سر کنگ بیتگ اَنت-

بلوچستان ءِ دگ ءِ وئیلاں بازیں مردمانی بیران ءُ زدگ بیگانی ھال ھمک روچ پیداک اَنت، چاگردی مردمانی گوشگ اِنت سنگلیں دگانی سوب ءَ گیشتریں مردم وئیلانی آماچ بیگ ءَ اَنت ءُ چاگردی مردم سرکار ءِ سر ءَ ایراد گرگ ءُ گوشگ ءَ اَنت کہ سرکار دگانی نام ءَ ھزارانی پوڑی گپت ءُ وارت بلے دگانی سر ءَ ھچ کلدار ھرچ بیگ ءَ نہ اِنت –

سر بیتگیں ھالانی رد ءَ گوستگیں روچ ءَ شال ءِ دمگ ژوب ءِ میانی دگ ءَ بادنزئی ءَ ناشناسیں مردمانی تیرگواری ءَ زالبولے ءَ ھوار دو کس بیران بیتگ اَنت –

لیویز بنشون ءِ رد ءَ وئیل مزن شھدگ ءَ پیش اتکگ ءُ اود ءَ ناشناسیں مردماں گاڑی ءَ زالبول ءُ یک مردینے گاڑی ءَ ایرگپتگ ءُ کُشتگ اَنت ءُ کوشکار تتکگ اَنت –

لیویز بنشون ءِ رد ءَ کُشتگیں مردم چہ شال ءَ ژوب ءَ روگ ءَ بیتگ اَنت ءُ کوشکاراں آیانی رندگیری کنان کرتگ ءُ بادنزئی ءَ آ گاڑی ءَ ایرگپتگ ءُ کُشتگ اَنت –

لیویز بنشون ءِ رد ءَ کُشتگیں ورناہ اسد خان پشتونخوامیپ ءِ رھشون ءُ گوستگیں سنیٹر رضا مھمد ءِ ناکوزتک اَنت –

لیویز بنشون ءِ رد ءَ وئیل ءَ پد لاش چست کنگ ءُ ڈی ایچ کیو ءَ سر کنگ بیتگ اَنت ءُ پَٹ ءُ پول برجاہ اِنت –

سر بیتگیں ھالانی رد ءَ پنجگور ءَ سوردو سریکوران اتھاد پاٹی ءِ نیمگ ءَ بجلی ءِ نہ بوگ ءِ سوب ءَ کیسکو واپڈا آفس ءِ دیم ءَ زھرشانی نندانک جتگ ءُ نشتگ اَنت –

ھرتال ءِ اولی روچ ءَ یحٰی لیاقت، عظیم جان گچکی، مجیب الرحمان، شیر جان، حسن جان ءَ زھرشانی بنجل ءَ نشتگ اَنت –

نندانک ءَ نشتگیں مھلوک ءَ گوشتگ کہ دوھزار ءُ شانزدہ ءَ ھم زھرشانی کرتگ ءُ ھمے رنگ ءَ گوستگیں سال ءَ ھم دمگ ءِ مھلوک ءِ نیمگ ءَ بجلی ءِ نہ بوگ ءِ سر ءَ زھرشانی بیتگ ءُ دمگی واکداراں تنی وھدی ھچ نہ کرتگ ءُ چریشی ءِ پشدر ءَ دمگ ءِ مھلوک ءَ کمیٹی ءِ جوڑ کرتگ ءُ سوردو سریکوران اتھاد ءِ نام ءَ جوڑ کنگ بیتگ –

ھرتال ءَ نشتگیں مردماں رسانکدراں تران کنان ءَ گوشت کہ پیسری زھرشانیاں ڈپنی کمشنر پنجگور ءِ دوچار کپگ ءَ پد آئی ءَ سدکی داتگ ءُ بلے تنی وھدی بجلی نیست اِنت-

سوردو سریکوران اتھاد ءَ گوشت کہ لھتے روچانی مھلت دیگ ءَ پد سودرو سریکوران اتھاد لاچار بیتگ ءُ شدکشیں ھرتال ءِ جار پِرینتگ-

آیان گوشت کہ واپڈ ءِ واکدارانی زُلم ءُ زوراکی سر ءَ گوستگ اَنت ءُ سورود سریکوران ءِ مھلوک ءَ چُکی ءِ دروشم ءَ ھم نہ چار اَنت ءُ آیاں گوشت کہ ھما وھد ءَ مئے ھرتال برجاہ بیت تانکہ مئے لوٹ منّگ نہ بنت –

آیاں گوشت کہ مئے لوٹ بجلی ءِ پچ کنگ، نیزوریں والٹیج ءِ جیڑھانی ھلاس کنگ، ایس ڈی او واپڈا پنجگور ءِ بدل کنگ، میٹر ریڈر ءِ دومیگ ءَ زرانی گرگ ءُ یونٹاں کم کنگ ءُ دومی مھلوک ءِ بِلاں گیش کنگ ءُ چوشیں مردمانی ھلاپ ءَ کاروائی کنگ، دراھیں دمگاں راستیں میٹر ریڈنگ ءِ پیش کنگ ءُ راستیں بِل ءِ پیش کنگ بہ بنت –

آیاں گوشت کہ سوردو سریکوران ءِ جتائیں فیڈر ءِ بکس ءُ بند کنگ، ھما کہ بِلاں پُر نہ کن اَنت آیانی وئیر بُرگ بہ بنت، سوردو سریکوران ءُ دگہ دمگاں بجلی ءِ سرجمی کنگ بہ بیت –

آیاں گوشت کہ ستمبر ءِ ماہ ءَ سوردو سریکوران ءَ بجلی نہ بیتگ بل چار ھزار پنچ ھزار اتکگ ءُ اے بلانی ھلاسی بہ بیت –
آیاں گوشت کہ گیرکانودی کنکشنزانی ھلاپ ءَ ویلڈنگ دکاندارانی سوب ءَ ٹرانسفارمر ھلگ ءَ اَنت اشانی لین کٹ کنگ بہ بنت-

آیاں گوشت مئے دھیں لوٹ سرجم کنگ بہ بنت ءُ ما ھرتال ءَ نشتگ اِنت ءُ آیاں گوشت کہ انوگیں ایس ڈی او ءِ گون ءَ گپ نہ بیت دانکہ مزنیں واکدار دیم ءَ نیائنت –

سند ءِ مزن شھر کراچی ءَ وائس فار بلوچ مسنگ پرسنز ءِ زھرشانی بنجل کراچی پریس کلب ءِ دیم ءَ برجاہ ۔ زھرشانی مروچی چار ھزار دو سدو دوازدہ روچ سرجم بوتگ ۔

دی بلوچستان پوسٹ

بلوچستان نیشنل پاٹی ءِ رھشون نوابزادہ ھاجی لشکری رئیسانی، بلوچ متھدہ مھاز ءِ عزیز بلوچ، بشیر بلوچ، وھاب بلوچ، بلوچ جھدکار حوران بلوچ ءُ کراچی پریس کلب ءِ نوک گچین بوتگیں کابینہ سرکماش فاضل جمیلی، سیکرٹری رضوان بھٹی، پریس کلب ءِ گوستگیں سرکماش امتیاز خان فاران، اھوالکار سعید سربازی، عارف بلوچ، شاہد جتوئی، رفیق پٹیل، سعید جان بلوچ، ءُ اھوالکار نزیر لغاری ءَ بنجلے تر ءُ تاب کرتگ بیگواھیں مردمانی کھولے گوم ءَ دلپدردی درشانتگ ۔

ھمے وھد ءَ نوابزادہ حاجی لشکری رئیسانی ءَ گوشتگ کہ مئے راجی پجار ھلاس کنگے جھد بوھگ ءَ اِنت بلے بلوچستان ھکانی زرمبشت نوں گراس روٹ لیول ءَ تاں سربوتگ ءُ ورناھانی دست ءَ اِنت ۔

آئی ءَ گوشتگ کہ یک مھکمیں پئیم ءَ زری نیستی ءِ سوب ءَ جیڑہ ءُ جنجال اے ھد ءَ تاں سرکنگے جھد بوھگ انت کہ ھنچیں ھنرے سازگ بہ بیت کہ پاکستان رکینگ بہ بیت یا ایٹم بمب؟ آئی ءَ گوشتگ کہ ھپتاد ءُ سئے سالاں ما ھمے اشکنگ انت کہ بلوچستان ءِ بدھالیانی زمہ وار سردار انت – ما ھمے جست کنگ لوٹاں آیا پاکستان ءَ آئی ایم ایف وامدار کنوک ھم سردار انت؟

آئی ءَ گوشتگ کہ بلوچ نودربر گل ءِ گوستگیں سرکماش بانک کریمہ بلوچ کوش ءِ زمہ وار ھم ھما مردم انت ھماھاں کہ بانک بلوچستان ءِ یل کنگ ءَ لاچار کتگ۔ بنجاہ ءِ بگیری ءَ زھرانی کم کنگے ھاتر ءَ نوزدہ سدو چل ءِ کراداد ءَ چہ بندات کنگی ءُ راجی کچءَ باوست بندات کنگی انت۔

یک جست ءِ پسو ءَ آئی گوشتگ کہ جام کمال اسٹبلشمنٹ ءِ دل دوست اِنت، آئی سروزیر جوڑ کنگے ھاتر ءَ شپ ءِ شپ پاٹی ءِ جوڑ کنگ بوتگ اُستان ھمائی کوزہ دئیگ بوتگ۔اے مردم نوں ریکوڈک ءَ بھا کنگے چن ءُ لانچ ءَ انت مئے جھد ءُ کوشست انت کہ جمہوری جھد ءَ گوں بلوچستان جام کمال ءُ آئی ءِ ٹولہ ءَ چہ رکینگ بہ بیت ۔

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ راجداریں گل کہ جوڑ بنت آ ھما وھد ءَ سوبین بنت کہ وھد ءُ جاور ھالانی رِد ءَ ھکمت املی جوڑ ءُ حکمت عملی رِد ءَ وتی پروگراماں دیم ءَ بر انت – سیاست جیڑھانی گیشگواری ءِ نام انت سیاست راجے ھذمت کنگے ھاتر ءَ کنگ بیت ۔ راستگیں گل ھما بنت کہ بس پہ راج ءَ کار کن انت۔

ماما قدیر بلوچ ءَ گوشتگ کہ مردم گیشتر جاور ھالاں نہ پھم انت دژمن ءِ پندلاں کائنت ھماھانی جندے دیمروئی ءُ وشھالی ھاتر ءَ جھد کنوکیں باسک ءُ سیاسی گلانی بگیری ءَ بؤکیں پروپیگنڈھانی بھر بنت در راستی اے ھما بے وقوفی ءَ کنگ ءَ اَنت کہ چریشی ءَ بس دژمن ءَ پائدگ رسیت ۔ راجداریں گلاں اے وڑیں پندل دیما کنگی انت ءُ جوانیں ھکمت املی ٹھینگی انت پرچاکہ ردیں ھکمت املی ءُ پیسلہ تاوان بار کن انت ۔

نبشتانک: شاھینہ شاھین ءِ اناگتیں روگ ءُ بلوچ چاگردے پدمنتگی

نبشتہ کار:عبدالواجد بلوچ 

دی بلوچستان پوسٹ

“من ھما درچکے بر بوھگ لوٹاں

وش بہ بیت تامے چہ براں وشیں

دروشم ءَ چہ درائین آں زیبا تر

ساھگے سارتیں بکشیت دنیا ءَ”

برے برے جیڑاں کہ مئے چاگردے پد منتگی ءِ سیمسر کساس کنگ نہ بنت، بلے زانگ المی انت اے پدمنتگی ءِ ودی کنوک مئے چاگردے ھکّگیں دو دست ءُ دو پادیں ھما جناور نہ انت کہ “اشرف المخلوقات “گشگ بنت منی چاگردے اشرف المخلوقات بلوچ انت ءُ اے گپ ءَ من پہ سِدک گشاں کہ بلوچ ءِ جند چہ بُن ءَ پد منتگ نہ ایں بلکیں اے پد منتگی ءِ نہ کٹّوکیں جمبرانی ساھگ دژمن ءِ نیمگ ءَ پیدا کتگیں ھما رِپک انت کہ بلوچے تہا آئی بلوچیت ءَ ولگوج کنگ لوٹیت اگاں چُش مہ بوتیں گڑا روچ رھمانی اِلم ءُ ادب ءَ چہ چکاریں کیچ ءِ پئیمیں زمین ءِ سرا بانک ملکناز، برمش ءِ چورہ بوھگ، بانک کلثوم ءِ گردن چہ بدن ءَ جتا کنگ، ھیات ماتے دیما تیر باران کنگ ءُ بلوچ ازمکار، اھوال کار شاھینہ شاھین چو اے رنگ ءَ کُشگ نبوتگ اتاں۔

شاھینہ ءِ میار ہمیش ات کہ آئی ءَ دژمن ءِ نپسیات ءَ چہ چکاریں بلوچ ءِ چاگردے دو دست ءُ دو پادیں جناوراں شعور ءُ زانت بکشاھگے ردیے کتگ ات، من اے گپ ءَ سد رندا گشاں کہ شاھینہ ءِ پئیمیں پھمیدہیں سرانی اے پئیما رؤگ مئے چاگرد ءُ بلوچی ھیائے ارواہ ءِ گٹ گیر کنگے بستارا داریت۔شاھینہ ءِ میار ہمیش ات کہ آئی ءَ کوریں چمّاں دید بکشاھگے ردی کتگ ات؟ گڑا سرپد بوھگی انت کہ بلوچے لجّ، ھیا، میار جلّی ءِ بام ءَ جورکاں داتگ بگندے اے ھیال کنگ ءَ من باز ھبکّہ باں کہ یک با اِلمیں زالبولیں سرے ءِ کُشگ چو ارزانیں کارے نہ انت اے گَھِتگیں کارے کنوک ھم سازش ءِ بھر انت کہ لوٹ انت بلوچ ءِ گلامی تا ابد برجاہ بہ بیت۔ شاھینہ ءِ میار ھمیش ات کہ آئی واھگ ات کہ بلوچ زالبول کلم ءَ گوں مھر بکن انت ءُ وتی جبین ءِ چیریں رازاں رنگانی دروشم ءَ دنیا ءَ پیش بدار انت ءُ بگش انت کہ مئے ھم رُدوکیں ارمان است، مئے ھم لھتے زندگیں واھگ است کہ ھماہانی سوب ءَ ما چار روچ زندگ بوھگ لوٹیں؟ گڑا ھئو اگاں اے کار ردیں ایوک شاھینہ ءَ نا بلکیں اے چاگردے تہا ہر ھما بلوچ زالبول کشگ بہ بیت کہ وتی واھگ ءُ ارمانانی درنگازی ءَ فن، آرٹ ءُ رنگانی ھمرائی چار گپ جنگ لوٹاں۔

مرچی دو ماہ ءَ گیش کبل بیتگ کہ اے کورانی جھان ءَ شاھینہ ءِ کشندہ انگت ساہ کشگ انت، ھئو ھما مھراب کہ چاگردے توکا بنّامی ءِ سوب انت ھما ساہ کشگ انت ءُ شاھینہ ءِ پئیمیں پھمیدہیں سرانی چمّانی بند کنگے سوب جوڑ انت۔

من پمشکہ جیڑاں کہ اے جیڑگانی میان ءَ اے ھیال منا سد رندا تکانسر کنت ءُ من سک درد باں کہ “شاھینہ” ءِ پئیمیں سر مئے چاگرد ءَ پہ ردی ودی بوتگ انت۔ شاھینہ دروشمیں ھر ھمک گھار کہ زندگ بوھگ لوٹاں، گپ کنگ لوٹاں، نبشتہ کنگ لوٹاں، وتی مارشتاں رنگانی تہا آرگ ءُ آھاں دنیا ءَ پیش دارگ لوٹاں آھانی دیار مئے پدمنتگیں چاگرد نہ انت کہ اودا روچے سد رند ءَ دژمن وتی مکر ءُ ھُنرانی سوب ءَ بلوچے بلوچیت ءَ چہ ھُنڈالاں نہال کنگ لوٹیت۔

مارا اے زانگی انت اگاں ما لوٹیں مئے چاگردے بلوچیت، بلوچی ھیائے ھما درچک کہ مئے پیریناں آپ داتگ ءُ زھمت کش اتگ مزن کتگ آ مرتگیں درچک پدا شاہ بہ جنت سبز بہ بیت گڑا شاھینہ ءِ وابانی پورا کنگ ءَ آئی کاروانے ھمراہ بوھگی انت “دزگھارے” تاکانی سیاہ کنگ ءُ آئی ھمک بلوچے گِس ءَ سر کنگ شاھینہ ءِ ارواہ ءِ تاھیر دئیگے سوب جوڑ بیت کنت۔

ہزاروں سال نرگس اپنی بے نوری پہ روتی ہے 

بڑی مشکل سے ہوتا ہے چمن میں دیدہ ور پیدا

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ٹی بی پی پتر ھال ءَ سر بیتگیں ھالانی رد ءَ کیچ ءَ پاکستانی پوج ءَ لشکر کشی ءِ وھد ءَ یک ورنایے آوار جتگ ءُ برتگ –

گیشیں ھالانی رد ءَ تمپ نزر آباد ءَ گوستگیں شپ ءَ پاکستانی پوج ءَ بیڑ برتگ ءُ یک ورنایے آوار جتگ ءُ گون وت برتگ، آوار جنگ بیتگیں مردم ءِ پجار جاوید ء خالد رھیم ءِ نام ءَ زانگ بیتگ –

بیگواہ کنگ بیتگیں مردم ءِ کھول ءِ رد ءَ بیڑی ءِ وھد ءَ زالبولاں پوج ءِ دیم ءَ ورناہ ءِ نہ برگ ءِ دزبندی کرتگ بلے پوج ءِ کارمنداں زالبول ءُ چک لَٹ ءُ کُٹ کرتگ اَنت –

واکداراں تنی وھدی اے درگت ءَ گیشیں ھال دیم ءَ نیاھورتگ –

زانگ بہ بیت گوستگیں روچاں بیست مردم لشکری زنداناں یلہ بیتگ اَنت دومی نیمگ ءَ بیگواھیانی ھال ھم دیم ءَ اتکگ اَنت –

گوستگیں روچ ءَ بولان ءِ دمگ ساروں ءَ دینار مزارانی ءِ گوں دو چکانی ھمراھی ءَ بیگواھی ءِ ھال اتکگ اَنت- دینار مزارانی ءُ آئی ءِ چُک پاکستانی پوج ءَ لشکر کشی ءِ وھد ءَ دزگیر کرتگ ءُ ناشناسیں جاھاں برتگ اَنت –

ھمے وڑ ءَ پنجگور ءِ دمگ گومازین ءَ یک جونے دزکپتگ، جون ءِ پجار ثناء اللہ ء بھار جان جھمنند گومازین ءِ نام ءَ زانگ بیتگ –

دمگی مردمانی رد ءَ ثناء اللہ گوستگیں ماہ بیست ءُ یک جنوری ءَ بیگواہ کنگ بیتگ ءُ آئی ءِ جون گومازین ءِ نزیکیں کور ءَ دزکپتگ ءُ آئی ءِ گُٹ ءَ سادے ھم مان بیتگ –

دزکپتگیں جون ءِ بارہ ءَ گیشیں سرپدی نہ رس اِتگ –

نبشتانک: بلوچ زالبول توپک چِست کت نہ کن اَنت

نبشتہ کار: آئشہ بلوچ

رجانکار: اتیکہ بلوچ

دی بلوچستان پوسٹ

وھدیکہ کُرد زالبول پہ وتی راجی آجوئی ءِ ھاتر ءَ ایراک، تُرکی، سوریا ءُ ایران ءِ ھلاپ ءَ تُپنگ چِست کن اَنت، اسرائیل ءِ ھلاپ ءَ لیلہ ھالد پہ پلستین ءِ آزاتی ءَ چیرجنگ (گْوریلہ وار) جنگ کنت گُڑا زاناں ما بلوچ زالبول پہ وتی آجوئی ءَ چی ءَ جنگ کُت نہ کن ایں؟

اگاں ما بلوچ زالبُول لوٹ ایں گُڑا ما ھم پہ وتی راجی آجوئی ءِ ھاتر ءَ جنگ وَ کُت کن ایں ما بے ھال مہ بہ ایں کہ ماں 1555 ءَ دھلی ءِ جنگ ءَ بانُک بانُڑی ھم یک بلوچ زالبُولے اَت کہ وتی بْراس واجہ چاکر ھان ءِ ھمکوپگی ءَ جنگی لشکر ءَ سر ءُ سوج کنان ءَ دژمن ءِ ھلاپ ءَ جنگ ئِے کُتگ ءُ سوریاں پْروش ئِے داتگ۔

اگاں ما دُنیا ءِ راجدپتر ءَ وان ایں گُڑا مارا اِے دابیں بے کساس درور رس ایت کہ بازیں زالبوالاں ءَ پہ وتی ڈیھ ءِ آجوئی ءُ وتی دیمپانی ءَ تُپنگ زُرتگ ءُ دژمن ءِ ھلاپ ءَ جنگ اش کُتگ۔

ناں کہ تھنا پہ راجی آجوئی ءَ وتی جان اش ندر کُتگ اَنت بلکیں پیگمبرانی وھداں ھم پہ اسلامی نیکراہ ءِ دژمنانی ھلاپ ءَ زھم ءُ تُپنگ زُرتگ ءُ ماں جنگاں بھر اش زُرتگ۔ میان اُستمانی ءُ اسلامی نیکراہ رِد ءُ رھبندانی رِد ءَ ھر زیردست ءُ گلامیں راج ءَ پہ وتی راجی آجوئی ءِ ھاتر ءَ سِلاہ چِست کنگ ءِ ھک وَ ھست۔!

ما بِہ گِند ایں کہ بلوچستان ءِ چاریں کُنڈاں بلوچ راج ءِ ھون گَنگا کَور ءِ ڈول ءَ رِچگ ءَ انت اِے دُراہ پاکستانی لشکر ءِ کارانی آسر اَنت اگاں ما بلوچ راج لوٹ ایں کہ ما گلامیں راج یک شرپمند ءُ وتواجھیں زِندے گْوازین ایں گُڑا ما زالبُول ءُ مردیناں دژمنیں استان ءِ ھلاپ ءَ تُپنگ اَلم زُورگی اِنت۔

بِہ گِر اِے استان ءِ ھاکم تاں کسانیں تبک ءِ مردم، بزاں دُراھیں تُپنگ ءِ توار ءَ زیت سرپد بنت ءُ چوناھیگا اِے استان ءِ ھر جیڑھانی توجیلّ ھم تُپنگ اِنت پمیشکا ما بلوچ زالبوالاں ھم پہ وتی بلوچ راجی آجوئی ءُ دیمپانی ءَ تُپنگ زُورگی اِنت۔

البت من اِے نہ گْوش آں کہ ما تھنا تُپنگ ءَ چِست بہ کن ایں بلکیں تُپنگ ءِ ھمراھی ءَ مارا ند ھم چِست کنگ لوٹ ایت چی ءَ کہ اگاں بِہ گِند ئے ند چہ تُپنگ ءَ ھاٹیگی اِنت چی ءَ کہ تُپنگ ءِ تِیر ءَ وَ یکے مِر ایت بلے ند ءِ زَد ءَ دژمن ءِ ھزاریں نپر مِر اَنت۔

اگاں بلوچ زالبُول ند ءِ ھمراھی ءَ تُپنگ ءِ جِست کنگ ءَ ھم بندات بہ کن اَنت گُڑا استان ءَ نزور ترینت کُت کن اَنت ءُ چوناھیگا پہ مارا “مزھمت زِندگی ہے” بزاں ابید جنگ ءَ دگہ ھچ راہ وَ نیست کہ ما بلوچ داں 73 سال اَنت گلامی ءِ ساھگ ءَ لٹ ورگ ءَ این ءُ یکشل ءَ کُشگ بوگ ءَ ایں۔

مئے جِند ءِ سرڈگار ءَ پاکستان مارا نندگ ءَ وَ نئیل ایت پمیشکا ما بے وس ایں کہ وتی ڈیھ ءِ آجوئی ءِ ھاتر ءَ گُڈسری ھدّ ءَ برو ایں ءُ ھون ءِ ھمُک تْرمپ ءَ پہ دژمن ءِ ھلاپ ءَ ریچ ایں چوناھیگا مئے ھون ھمروچ کور ءِ داب ءَ ھار گِران اِنت۔ یک گپے ما تچک بہ زان ایں کہ دژمن مارا تیوگیناں بلوچ راج ءِ لیکھی ءَ کُشان اِنت توری کَسے راجی آجوئی ءِ جُنز ھست یا توری آجوئی ءِ جُنز ءِ باسکے نہ اِنت پمیشکا گھتر ءُ جْوان اِنت کہ ما بلوچ راج ءِ دُراہ بْراس ءُ گْوھار پہ راجی آجوئی ءَ تُپنگ چِست بہ کن ایں۔
گُلامی ءَ مُدام پِٹ بات، بلوچ راج شالا تپاک بہ بات اَنت، بلوچ راجی سِلاھبندیں جُنز شالا سوبین بات ءُ بلوچ راج وتی ماتیں سرڈگار بلوچستان ءِ وتواجہ بہ بات اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔