TBP Balochi

ٹی بی پی پتر ھال ءَ سر بیتگیں ھالانی رد ءَ بلوچستان ءِ تیابدپی شھر پسنی دراتکگیں دو گاڑی وئیل ءِ آماچ بیتگ اَنت، چریشی ءَ بازیں مردمے زدگ بیگ ءِ ھال اِنت-

گیشیں ھالانی رد ءَ پسنی ءَ دراتکگیں الواجد کوچ ماکولا ءَ دگ ءِ وئیل ءِ آماچ بیتگ، چریشی ءَ سَے مردم زدگ بیتگ اَنت –

وئیل ءَ سَے مردم زدگ بیتگ اَنت، وئیل ءَ پد موٹروے پولیس ءَ زدگ بیتگیں مردم چِست کرتگ ءُ نزیکیں نادراھجاھاں برتگ اَنت –

ھمے وڑ ءَ کرولاگاڑی ءُ پسنی ءَ دراتکگیں وین سروس ھنگول ءِ نزیک ءَ وئیل ءِ آماچ بیتگ اَنت-

چریشی ءَ بازیں مردمے زدگ بیتگ اَنت، زدگ بیتگیں مردمانی تہ ءَ بازیں مردمانی جاور نگیگ گوشگ بیتگ اَنت –

زانگ بہ بیت بلوچستان ءَ ھمک روچ دگانی وئیلانی لس مردم زدگ ءُ بیران بیگ ءَ اَنت، چریشی ءَ ڈرائیورانی بے دلگوشی ءُ دگانی پُروشت ءُ پروشی ءِ سوب گوشگ بیگ ءَ اَنت –

نبشتانک: بانک کریمہ ءُ درانڈیھ

نبشتہ کار: ھدایت بلوچ

دی بلوچستان پوسٹ

من مدام ھمے گُشاں ھما مردم کہ ڈنّی ملکاں نشتگ انت آھانی زند سک وش انت آھاں ھچ گم ءُ پریشانی نیست بلے درانڈیھی مرگ ءِ نزیک ءَ انت وتی ھنکین ءَ چہ دور بوگ سک گران انت بلاھیں اوپارے درکار انت ھمک مردم ھمے اوپار ءَ سگ اِت نہ کنت ۔ درانڈیھ ءِ زند ءَ ھما کس ھما دلبند ءَ سگگ ءَ انت کہ آھاں یک بانداتے یک روژنائی یے دیم ءَ گِندگ ءَ کیت درانڈیھ ءَ مردم گم ءُ سکّیاں چون گْوازین اِیت۔

ھنکین ءَ نشتگیں مردم اے چیزاں ھچبر نہ مار ایت
پرچا کہ درانڈیھ ءَ مات گون نہ انت برات ءُ سنگت گون نہ انت پت، ناکو ، ترو ، برات زھگ ءُ ، آ دگہ سیاد وارس ھچ کس مردم پہ چم نہ گند ایت گم ءُ سکّی بلاھیں کوہ انت شاتکامی وشیاں مردم ھچ نہ زانت گوں کے ءَ بھر بہ کنت۔ ائیدانی روچ گیشتر ابیتک بنت ھرچ نیمگ ءَ کہ چم کار کنت بس تجنائی انت ءُ بس۔

ھمل ھیدر ءُ بانُک کریمہ ھمے راہ ءِ مساپراں ھوار بنت ایشاں وتی زند ءِ متا ءُ وشی پہ گلزمیں ءِ باندات ءِ رُژنائی ءَ ندر کُرت انت وھدے ھنکین ءِ نندگ ایشانی واستا بلاھیں دیم پہ دیمی یے جوڑ وت گڑا ایشاں درملکی ءُ درانڈیھی ءِ سگگ ءِ پیسلہ زُرت بلی دژمن ءِ زوراکیانی منّوک نہ بوت انت وھدے ھمل ءُ بانُک درانڈیھ بوت انت گڑا دورءُ دریں راجانی دیم ءَ وتی راج ءِ سر ءَ بوتگیں ھمک زوراکیانی توار جوڑ بوت انت۔

ھمک روچ بلوچ ءِ ژانگولیں جونانی ، بلوچ ءِ مانداشتگیں گِدانانی ، بلوچ راج ءِ سر ءَ بوتگیں ھمک زوراکیانی اکس دست ءَ بوتگ ءُ دگّانی سر ءَ اوشتاتگ ءُ دُگنیا ءَ را پیشداشتگ کہ مئے سر ءَ چینچو کیامت گوزگ ءَ انت ھمے درانڈیھی ءُ ابیتکیں زند ءَ ایشاں پہ وت کہ دگہ ھچ کس نہ دیست گڑا ایشاں وتی زند ءِ کسانیں وشی بزاں آروس ءِ پیسلہ زُرت کہ ما دوئیں درانڈیھ ءَ یک بہ بہ ایں۔

وھدے ایشانی ابیتکیں آروس بوت گڑا ناں کہ ھمل ءَ سنگتے ھارے گور ءَ دیگ ءَ ات ءُ۔۔ ناں کہ دیوان ءُ مراگشے ھست ات
ناں کہ بانُک ءِ دستاں دست گھار ھنی کنگ ءَ ات انت ناں کہ ماہ گنج ءُ مات بانور ءِ کش ءَ نِشتگ ات انت۔ بس یک ابیتکی یے ایشانی میان ءَ ساڑی ات درانڈیھ ءُ ابیتکی ءَ اے کمیں وشی برے برے ایشانی لنٹانی بچکند جوڑ بوت بلے گیشر گوں راجی جیڑھاں دست گٹ ات انت۔

20 دسمبر ءَ من وھدے چہ واب ءَ بُست کُرت ءُ گْوانکو زُرت وھدے وٹس ایپ پچ کُرت داں وٹس اہپ گُش ئے مرچی دگہ رنگے ءَ انت ھمک سنگتے ءِ پروپائل سیاہ انت اشتاپ اشتاپ ءَ چارگ ءَ لگ اتاں کہ باریں چے بوتگ وھدے بانُک ءِ شھادت ءِ ھال دیست گُش ئے منی چم تھار بوت انت دل سک پدرد بوت دل درک درک ءَ جنگ ءَ لگ اِت گْوانکو چہ دست ءَ لگُشت ءُ چمانی ارس دارگ بوگ ءَ نہ ات انت۔۔ سر درد ءَ لگ ات ھنچو سما بوت گش ئے من ءَ بلاھیں بیماری یے گران ات۔

بانک ءِ شھادت ءَ بلوج راج تاوان بار کُت ھمک زندگیں دل ئِے پروشت انت ءُ پدرد کُرت انت تیوگیں بلوچستاں پُرسیگ بوت مھلوک ءَ شال ءَ بہ گر داں گوادر ءَ ھاران ءُ آواران ھمک شھر ءُ بازاراں زوراکانی ھلاپ ءَ زھرشانی بُنگیج بوت مات ءُ گھار دگانی سر ءَ اھت انت گوں وتی کوکار ءُ پریاتاں ھمل درانڈیھ ءَ تھنا بوت لنٹانی سر ءِ کسانُکیں بچکند پہ لنٹانی ھشکی ءُ بیچارگی ءَ بدل بوت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ دمگ بنپور ءَ پولیس راہ ءَ ناشناسیں مردماں تیرگواری کرتگ ءُ یک مردمے کُشتگ –

گیشیں ھالانی رد ءَ تیرگواری ءِ گوستگیں روچ ءَ پیش اتکگ کہ ناشناسیں مردماں بنپور ءَ تیرگواری کرتگ ءُ یک مردمے کُشتگ، کُشتگیں مردم ءِ پجار ارمان مارندگانی شریف جھمنند رندگ ایرندگان ءِ نام ءَ زانگ بیتگ –

وئیل ءَ پد دمگ ءِ پھزدار سر بیتگ ءُ جون اش چِست کرتگ ءُ نادراہ جاہ ءَ برتگ ات –

کوش ءِ سوب تنی وھدی زانگ نہ بیتگ ءُ دمگ ءِ پولیس ءَ کوشکارانی پَٹ ءُ پول بندات کرتگ –

اے وھد ءَ مئے گور ءَ راجی تاکت ءُ ایمانداریں سنگتانی جزبگ ءَ ابید دگہ ھچ وڑیں مزنیں تاکت ءُ مال مڈی ءِ نیست اگاں اے دلپروش بہ بنت ما ھچ درد ءِ دوا نہ بہ ایں – ماما قدیر بلوچ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ چاردہ روچ سرجم بوتگ –

گوستگیں روچاں یل بوتگیں عبدالمجید ءِ کھول ءَ بنجل ءَ اتکگ ءَ وائس فار بلوچ مسنگ پرسنز ءِ منّت گپتگ –

عبدالمجید ء شھداد جھمنند ھب چوکی گوستگیں سال ءَ پاکستانی پوج ءَ آوار جتگ ءُ چیریں جاھاں بندیگ کرتگ، عبدالمجید ءِ یل کنگ ءِ ھاتر ءَ وائس فار بلوچ مسنگ پرسنز ءَ آئی کھول ءِ گون ءَ زھرشانیاں ھوار بوتگ –

ھمے وھد وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ مارا اے وھد ءَ وتی پگر دور چاری کنگی انت پرچاکہ اے وھد ءَ دشمن وتی ھنراں چہ بلوچ ءِ پُرایمنیں جھد ءِ نیزور کنگ ءَ وتی درسیں تاکت ءَ کارمرز کنگ ءِ انت مدامی لشکر کشیانی میان ءَ بازیں پرزنداں آوار جنگ ءُ آھانی جوناں چگل دیگ ءَ اِنت –

آئی ءَ گوشتگ کہ وھدیکہ پُرایمنیں جھدے روانک ءُ زھرشانیانی تہ ءَ گیشی کیت گڑا دژمن وتی رکینگ ءِ ھاتر ءَ وڑ وڑیں ھنر کنت – مروچی بلوچستان ءِ تہ ءَ ھمے وڑ بوگ انت، بازیں جیڑہ ءُ جنجال ءِ ودی کنگ انت ءُ مھلوک ءَ مازگی جیڑھاں گوں دُچار کنگ انت –

ماما قدیر بلوچ ءَ گوشتگ کہ دژمن وتی پندلاں گیش کنگ ھر روچ نوکیں دابے ءَ اُرش کنت – مروچی اگاں مئے تہ ءَ کسانیں اڑ ءُ جنجال ھست انت دژمن ھمیشی ءَ چہ پائدگ چست کنت ءُ مئے تہ ءَ رد پھمی پیداک کنت ءُ وتی اسل مکسد ءَ سرجم کنت –

گڈسر ءَ ماما قدیر بلوچ ءَ گوشتگ کہ من ھمے پھماں کہ اے وھد ءَ مئے گور ءَ راجی تاکت ءُ ایمانداریں سنگتانی جزبگ ءَ ابید دگے ھچ وڑیں مزنیں تاکت ءُ مال مڈی ءِ نیست اگاں اے دلپروش بہ بنت ما ھچ درد ءِ دوا نہ بہ ایں –

بلوچ لبریشن آرمی ءِ جارکش جیئند بلوچ ءَ گوشتگ کہ مئے سرمچاراں شال ءَ پاکستانی پوج ءِ سروکی ءَ برجم کرتگیں کشمیر ءِ واستا وتگڑیں روانک ءِ سر ءَ اُرش کرتگ ءُ ریاستی دو کارندہ کُشتگ ءُ چار زدگ کرتگ اَنت -اے اُرش ءِ زمہ واری ءَ بی ایل اے منّ اِیت –

جارکش ءَ گوشت کہ بی ایل اے سرمچاراں تراک ءَ رھگیرانی تاوان ءِ نہ بیگ ءِ واستا جتا جتائیں ریپک کاربستگ ءُ اے وتگڑیں روانک ءِ بنجاہ ءِ سر ءَ نوکیں ھنراں بمب کل کرتگ – سرمچاراں روانک ءِ سر ءَ ھما وھد ءَ اُرش کرتگ کہ آ انسکمب دگ ءَ روگ ءَ بیتگ اَنت – اُرش ءِ آسر ءَ روانک ءَ ھواریں دو مرتگ کہ اشانی تہ ءَ یک توپکی مردمے ھوار بیتگ وھدیکہ چار زدگ بیتگ اَنت، دراھیں مرتگین ءُ زدگ بیتگیں مھلوک پاکستانی پوج ءِ نیمگ ءَ کش اِتگیں روانک ءَ ھوار بیتگ اَنت –

جارکش ءَ گوشت کہ پاکستانی سرجمیں زور ءَ کارمرد کنگ اِنت وتی دمگی کارندھانی کمک ےَ بلوچستان ءَ اے وڑیں وتگڑین روانکاں برجاہ کنگ ءُ میان اُستمانی تکاں اے ھال دیگ ءِ جھد ءَ کنگ ءَ اِنت کہ بلوچستان ءِ جاور سرجم ءَ پوج ءِ دست ءَ اَنت ءُ بلوچ راج پاکستان ءُ پاکستانی پوج ءِ بیاناں گوں ھمسنت اِنت بلے زمین ءَ گوں نزیکیں جاور چریشی ءَ باز گستا اَنت بلوچ ءُ بلوچستان ءَ پاکستان ءِ سیادی بس زورگپتی اِنت – مئے دیدانک، مئے دوست ءُ دشمن ءُ مئے راجی کاز ءِ جیڑھاں چَٹ جتا اِنت –

جیئند بلوچ ءَ گوشت: پاکستانی پوج ءُ آئی ءِ دمگی کارندہ ترس ءُ لاچ ءَ کارمرد کنگ ءُ اے وڑیں روانکاں کشگ ءَ اَنت – ما ھروھد ءَ اے وڑیں بیان شنگ کرتگ ءُ گوشتگ کہ اگاں کجام ھم مردم ءَ اے وڑیں پاکستانی روانک، مچی، میڑیاں ھوار بیت آئی ءِ مول ءُ مراف بلوچ راجی زرمبشت ءِ آجوئی ءُ بلوچ راجی کاز ءِ تاوان دیگ اِنت، آ مردم وتی جان ءُ مالانی تاوان ءِ زمہ وار وت اِنت ما انگت اشی ءَ تچک کنگ لوٹ ایں کہ اے وڑیں بلوچانی ھلاپ ءَ بیوکیں مچیانی سر ءَ اُرش بے کساس ترند ءُ بیمناکیں رنگے ءَ دیم ءَ کنگ بنت –

بلوچستان ءِ دمگ پنجگور ءَ پاکستانی پوج ءَ درانڈیھ بوتگیں سیاسی باسکانی لوگاں بیڑ بُرتگ، پِت دزگیر کُتگ اَنت گوں وت برتگ انت –

بلے پد ءَ رند ءَ میتگ ءِ مردمانی زھرشانی ءُ دزگیر بوتگیں یک مردمے ءِ نادراہ بوگ ءِ سوب ءَ یل بیتگ بلے ھمے گوشگ بوتگ انت کہ پد ءَ بنجل ءَ پیش بہ بنت –

گیشیں ھالانی رِد ءَ پنچ شمبے ءِ بیگاہ ءَ بلوچستان ءِ دمگ پنجگور جائین پروم ءَ بی این ایم ءِ درانڈیھ بوتگیں باسک عالم پنام ءِ کھور ءُ عمران حکیم ءِ لوگاں پاکستانی پوج ءَ بیڑ بُرتگ ءُ آھانی کماش ھاجی صالح محمد ء جمال ءُ ھاجی عبدالحکیم ء جمال دزگیر کُتگ ءُ نزیکیں وانگجاھی پانگسے ءَ بُرتگ اَنت-

اھوالکار ءِ رِد ءَ آھاں چہ زھگانی بابت ءَ جُست پُرس کُتگ ءُ ماژگی ازیت ءِ نشانگ جوڑ کُتگ اَنت- پوجی زوراکی ءُ کانود لگتمالی ءِ بگیری ءَ میتگ ءِ مردماں زھرشانی کُتگ۔ مزنیں کساسے ءَ زھگ ءُ جنیناں بنجل ءِ دیم ءَ شُتگ ءُ دوئیں پیرمردانی یل کنگ ءِ لوٹ کُتگ-

پٹ ءُ پول ءِ میان ءَ عالم ءِ پِت ھاجی محمد صالح ءِ بلڈپریشر ءِ بُرز بوگ ءَ آئی تب ناوش بوتگ، ھمے واستا آ یل کنگ بوتگ، وھدیکہ عمران ءِ پِت ھاجی عبدالحکیم دو ادار ءَ پد ھمے شرت ءَ یل کنگ بوتگ کہ مرچیگیں روچ ءَ دوئیں ایف سی ءِ بنجل ءَ پیش بہ بنت-

عالم پنام ء کھور ءُ عمران حکیم دوئیں بلوچ نیشنل موومنٹ پروم ھنکین ءِ باسک اَنت کہ سیاسی کارکنانی بگیری ءَ استان ءِ کریک ڈاؤن، در آمیدگسی دزگیری ءُ زورانسری بیگواہ کنگ ءَ پد درانڈیھ بوگ ءَ لاچار بوتگ اَنت ءُ اے وھد ءَ نیدرلینڈ ءَ درانڈیھی زند گوازینگ ءَ اَنت-

وئیل لسبیلہ، سوئی، ژوب ءُ شال ءَ پیش اتکگ اَنت کہ اود ءَ دو زالبولاں ھوار پنچ مردم بیران ءُ دَہ زدگ بیتگ اَنت –

سر بیتگیں ھالانی رد ءَ بلوچستان ءِ دمگ لسبیلہ ءَ مکران مزن شھدگ ءَ ھنگول ءِ نزیک ءَ چہ کراچی ءَ کنڈملیر ءَ رؤکیں گاڑی دگ ءِ وئیل ءِ آماچ بیتگ چریشی ءَ گاڑی ءَ سواریں دو گوھار بیران بیتگ اَنت ءُ یکیں کھول ءِ شش چُک زدگ بیتگ اَنت –

زدگ بیتگیں مردم اورماڑ ءِ نادراہ جاہ ءَ برگ بیتگ اَنت کہ آیانی تہ ءَ دو چکانی جاور نگیگ گوشگ بیتگ اَنت- وئیل آماچیں مردم کراچی ءَ دیم پہ کنڈملیر ءَ پکنک کنگ ءَ روگ ءَ بیتگ اَنت –

ھمے رنگ ءَ سوئی ءَ شازین پٹرول پمپ ءِ نزیک ءَ دگ ءِ وئیلے ءَ دو مردم زدگ بیتگ اَنت، زدگ بیتگیں مردم نادراہ جاہ ءَ برگ بیتگ اَنت –

ھمے رنگ ءَ ژوب ءِ دمگ ڈی آئی خان ءَ مزن شھدگ ءَ دگ ءِ وئیلے ءَ قاسم نامیں مردمے زدگ بیتگ ءُ آئی ءِ برات بیران بیتگ –

ھمے رنگ ءَ شال ءَ بالی پَٹ دگ ءَ دگ ءِ وئیلے ءَ یک مردمے بیران بیتگ، آئی ءِ جون چِست کنگ بیتگ ءُ نادراہ جاہ ءَ سر کنگ بیتگ –

دگہ یک وئیلے بیلہ ءَ آر سی ڈی دگ ءَ کاٹھوڑ ءِ نزیک ءَ مھراب گاڑی ءُ پرپٹے ءِ میان ءَ ٹکر وری بیتگ کہ چریشی ءَ صوفیان ءُ غلام حیدر نامیں دو مردم زدگ بیتگ اَنت –

زدگ بیتگیں مردم بیلہ ءِ نادراہ جاہ ءَ برگ بیتگ اَنت اود ءَ آیانی تہ ءَ غلام حیدر گیش نگیگ بیگ ءَ کراچی ءَ برگ بیتگ –

زانگ بہ بیت بلوچستان ءِ ھمک روچ دگانی وئیلاں بازیں کچے ءَ مردم بیران بیگ ءَ اَنت ءُ سرکار ءِ سر ءَ مھلوک ایرادگرگ ءَ گرگ اَنت –

گوستگیں روچ ءَ پنجگور ءَ دیم پہ کراچی ءَ رؤکیں بس بیلہ ءِ نزیک ءَ وئیل ءِ آماچ بیتگ اَت چریشی ءَ چاردہ مردم بیران بیتگ اِت اَنت ءُ گوستگیں روچ ءَ بی این پی مینگل ءِ رھشون ثناء بلوچ ءَ ھم بلوچستان اسمبلی ءَ پنجگور ءَ بیران بیتگیں مردمانی بارہ ءَ سرکار ءِ سر ءَ ایراد گپتگ –

ثناء بلوچ ءَ گوشتگ اَت کہ اے مچی لین ءُ دگہ چیزانی بارہ ءَ نہ اِنت بلکیں اے ھما چاردھیں مردمانی جنازہ ءَ اَنت کہ لسبیلہ ءِ ھونواریں دگ ءَ کُشتگ اَنت –

ثناء بلوچ ءَ گوشتگ اَت اے جنازہ لس مھلوک ءِ نہ اَنت بلکیں اے جنازہ بلوچستان ءِ سرکار ءُ پاکستان ءِ بنجاھی سرکار ءِ بے سوبی ءِ جنازہ اَنت کہ آ ھمک وھد ءَ بلوچستان ءِ دیمروی ءِ ٹاہ ءَ دے اَنت بلوچستان ءَ ابید ءِ ھونیں دگاں دگہ ھچ گندگ ءَ نئیت اِت اِنت –

بلوچ سرڈگار ءِ سر ءَ شوروانی آس روک کنوک ءُ مھلوک ءِ سر ءَ شورو درنزوک کشمیر روچ ءِ دارگ ءَ روانک ءِ کشوکیں وتگڑ دنیا ءِ چماں پُر مان کنگ ءِ بے سوبیں جھد کنگ ءَ اَنت – بیبگر بلوچ

بلوچستان ءِ دمگ سبی لونی دگ ءَ ناشناسیں مردماں کشمیر ءِ واستا کشوکیں روانک ءِ سر ءَ بمب اُرشے کرتگ –

بنداتی ھالانی تہ ءَ اُرش ءَ روانک ءَ بھر زیروکیں دَہ مردم زدگ بیتگ اِت اَنت ءُ بمب پَرپٹے ءَ بندوک بیتگ ءُ روانک گوزگ ءَ بیتگ ھمے وھد ءَ بمب ترک اِتگ ءُ دَہ مردم زدگ بیتگ اَنت –

دومی نیمگ ءَ بلوچستان ءِ آجوئی ءِ لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ وتی شنگ کرتگیں درشان ءِ تہ ءَ اُرش ءِ زمہ واری منّ اِتگ –

بیبگر بلوچ ءَ گوشتگ کہ مروچی سرمچاراں سبی ءَ چاکر ھان دگ ءَ پاکستانی چیریں ادارھانی نیمگ ءَ کشمیر ءِ واستا کش اِتگیں وتگڑیں روانک ءِ سر ءَ دزبمب اُرشے کرتگ کہ چریشی ءَ شانزدہ کارندھاں گیش زدگ ءُ پولیس کارمند ھم زدگ بیتگ اَنت-

بیبگر بلوچ ءَ گوشتگ کہ ریاست ءَ بلوچ ڈیھ ءَ زُلم ءُ زوراکیانی درچ ترند کرتگ اَنت، لس بلوچانی لوگاں کروجگ، ھزارانی کچ ءَ بلوچانی آوار جنگ ءُ بیگواہ کنگ وھدیکہ ریاست وتی جوڑ کرتگیں ریاستی ڈیتھ اسکواڈ ءُ دمگی دُز ءُ لپنگایانی کمک ءَ وتگڑیں روانکانی کشگ ءَ دودمانیں دنیا ءَ گنوک کنگ ءُ بلوچ جیڑہ ءِ نیمگ ءَ دلگوش ترینگ ءِ بے سوبیں جھدے کنگ ءَ اِنت چریشی ءِ سر ءَ ما ھمک تک ءَ وتی جد ءُ جھد ءَ کن ایں –

بیبگر بلوچ ءَ گوشگ ما مھلوک ءَ گوں دزبندی کن ایں آ ریاستی گوشگ ءَ روانکاں بھر مہ زور اَنت ءُ وت ءَ دور بہ دار اَنت پرچاکہ آ مئے نشانگ ءِ تہ ءَ اَنت –

نبشتانک: کاگدے لُمہءِ وتن بانک کریمہ بلوچ ءِ ارواہ ءَ

نبشتہ کار: شکیل بلوچ

دی بلوچستان پوسٹ

سھرچکیں سلام
بانک من سر پد نہ بان کہ کسہ آسر بوت یا نوک بندات بیت بلے کسہ بندات بوگ ءَ پیسر آسر بوت ءُ یک انچنائیں آسرے بوت کہ بازیں کارستے پروشت ءُ تُش تُش بوت ءُ ھما کارست کہ چو بولان ءِ کوہ ءَ مھکم بوتگ اَنت بلے ھما پروشت ءُ آزگ بوت اَنت ءُ کسہ ءِ کارستان چہ یکے واجہ اے آر داد اَت کہ آ چہ اندر ءَ پروشت ءُ آزگ بوت، گڑا مئے چہ بستار؟”اکس کشگ آسان اِنت بلے درد ءَ چون کش ئے”لُمہ تو زان ئے کہ تمپ انقلاب ءِ بو ءَ کنت ءُ ھمے انقلاب ءِ بو سرجمیں بلوچستان ءِ باتن ءَ آتار اِنت –

“تمپ ءَ سرجمیں سنگار ایں
مسک ءُ وشبواں آتار ایں”

ھو ھان ھما وھدا کہ وتن ءِ مھر تئی باتن مردم ءَ امبازیت تو پہ اے ھلاس نہ بوکیں مھر ءَ دیوانگ ءُ تئی وتی کول اِنت ۔”دگہ راجے ءِ زمین ءَ پہ زور ایردست کنگ یک لاچے،ھوسے ءُ وتی سرزمین ءِ آجوئی ءِ جھد عشق ءُ ھمے عشق ھر وڑ ءَ نزر بہ بیت بلے چہ لاچ ءَ ھزار سر گھتر اِنت – زمین ءِ عشق یک انچنائیں عشق ئِے ھچ رنگ ءَ نزر نہ بیت۔ لُمہ ترا من ھبرے ھال دایگ ءَ بے ھیال آں کہ تو یک نبشتانکے نمیرانیں سنگت ساجدحسین ءِ نام ءَ نبشتہ کتگ اَت(مئے زندمان ھورک بوت) من ءَ انچو گمان بیت کہ تو وتی زند ءَ ھمے کسہ پہ وت ءَ نبشتہ کتگ ۔

تو زان ئے بلوچستان چہ تئی روگ ءَ رند چنچو پروشتگ ءُ ابیتک اِنت ءُ اد ءَ چنچو کسہ نا سرجم بوت ءُ چنچو درد اَنت کہ بلوچستان ءَ وتی باتن ءَ جاہ داتگ اَنت لُمہ تو ءُ ساجد ھما گار ءُ بیگواہ بوتگیں سنگتانی نام ءَ 220 تاک دیمیں کتاب ءِ چن ءُ لانچ ءَ بوتگ اِت کہ 2021 دنیگا ھما انسان دوستیں مردمانی دیم ءَ ساڑا کن اِت کہ چنچو بلوچ گار ءُ بیگواہ اَنت بلے نون آ کسہ ءَ کَے سرجم کنت ءُ اے گرانیں بار ءَ کَے وتی کوپگ ءَ زوری اِیت بقول ءِ ڈاکٹر ھنیف شریف ئیگ ءَ سڑک ءِ سر ءِ سنگ ءَ کَے دور کنت ۔

اے یک گواچنیں ھبرے کہ کُل بلوچ کینڈا ءِ نام ءَ چنچو ھسد ءُ کینگ داراِیت زانان درملک نہ ریچیت گل ءُ گوہر پہ من بِل کہ من شاتان وتئی تنگھیں براتانی تہ ءَ بانک ترا زانان پہ نمیرانیں سنگت رضا ءُ کمبر امنچو باز زھیر بوت کہ چو زوت مارا چور کت ءُ شت ئے ءُ انگت ءَ رضا ءُ کمبر ءِ کار سرجم نہ اَنت ،نون تئی کاران مئے نزوریں کوپگ کجا زرت کن اَنت ۔ تو سرپدے کہ تئی زانگولیں کنٹ پہ استان ءَ یک ترسے ءُ انچنائیں ترسے کہ استان اوپار کت نہ کنت ءُ تئی مانش پہ آئی ءَ ترس ءُ پہ بلوچ ءَ آشوب ءِ چیدگ بیت –

لُمہ گپ ءُ ھبر باز اَنت ءُ کسہ ھم ناسرجم ءُ کسہ تو چہ تھاریں کوٹی ءَ در کت ءُ بلے سرجم نہ کت ءُ شت ئے ءُ زاھد بہ یات ما چے بگش آں لُمہ کجا شتگ ءُ پد ءَ آئی چم ارس بان ءُ کَے آئی ءِ ارسانی بولی سرپد بیت ءُ کَے آئی ءِ ارسان نبشتہ کنت۔کسہ ءِ گڈسرا من امنچو گش آں
بانک تئی ارواہ آسودگ بات ءُ درستیں نمیرانان سلام کن۔

نہ ملک ملکے نہ درملک وتی ڈگار ءَ بات ئے پرچا کہ تئی ڈگار تئی بھشت اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ پنجگور ءِ دمگ گرمکان ءَ ناشناسیں سلاہ بندیں مردماں ڈاکٹر انور بگٹی ءِ گاڑی پُل اِتگ –

گیشیں ھالانی رد ءَ ڈاکٹر انور بگٹی ءِ گاڑی ءِ پُلگ ءَ پد ڈاکٹراں سول نادراہ بند کرتگ وئیل ءِ بارہ ءَ پَٹ ءُ پول ءِ لوٹ کرتگ –

ھمے وڑ ءَ گوستگیں شپ ءَ زامران پروم بسد ءِ میانی سیمسراں ناشناسیں مردماں تیراباران کرتگ –

چاگردی رسانکجاھاں سر بیتگیں ھالانی رد ءَ تیرباران کُرتگیں مردم ءِ پجار نورالدین ء ھاجی مھمد نور جھمنند روکپتی سرباز گران ءِ نام ءَ زانگ بیتگ –

دمگی مردمانی رد ءَ نورالدین سیمسراں تیل ءِ باپاری کنوکیں مردمے بیتگ کہ آ گوستگیں شپ ءَ دُزاں تیرباران کرتگ –