TBP Balochi

بلوچستان ءِ دمگ کلات ءَ سلاہ بندیں مردمانی تیرگواری ءَ سَے کس بیران بیتگ اَنت، کہ ،آیانی سیادی پنجاب ءِ گوشگ بیگ ءَ اِنت –

تیرگواری ءِ وئیل منگچر ءِ دمگ خراسانی ءَ گوستگیں شپ ءَ پیش اتکگ کہ اود ءَ سلاہ بندیں مردماں ٹیوب ویل مشینریاں کار کنوکیں مردمانی سر ءَ اُرش کرتگ، کُشتگیں مردمانی سیادی پنجاب ءِ دمگ رحیم یار خان ءَ اِنت –

لیویز بنشون ءِ رد ءَ وئیل شپ ءِ ساھت دو ءَ پیش اتکگ – وئیل ءَ پد اُرشکار تچگ ءُ روگ ءَ سوبمند بیتگ اَنت ءُ لشکر ءَ دمگ انگر ءَ کرتگ ءُ اُرشکارانی پَٹ ءُ پول بندات کرتگ –

سر بیتگیں ھالانی رد ءَ پنجگور ءِ دمگ ھدابادان ءَ یک گاڑی ءِ سر ءَ تیرگواری کرتگ ءُ یک مردمے زدگ کرتگ، تیرگواری ھما وھد ءَ بیتگ کہ پولیس دمگ ءَ تر ءُ تاب ءَ بیتگ –

پولیس ءِ رد ءَ پولیس ءِ کارمنداں یک پک اپ گاڑی ءِ دارگ ءِ جھد کرتگ چریشی ءَ گاڑی نہ اوشتاتگ ءُ گاڑی ءَ سواریں مردماں تیرگواری کرتگ –

پولیس ءِ رد ءَ پولیس ءَ تیرگواری ءِ پسو دیان ءَ گاڑی ءِ پشت ءَ سواریں یک سلاہ بندیں مردمے کپتگ ءُ زدگ بیتگ ءُ پولیس ءَ توپک ءِ ھمراھی ءَ دزگیر کرتگ –

پولیس ءِ رد ءَ آئی ءِ ھمراھاں گاڑی یلہ کرتگ ءُ تتکگ ءُ زدگ ءُ دزگیر کرتگیں مردم ءِ پجات شھاب ء مستری پزیر جھمنند ھدابادان ءِ نام ءَ زانگ بیتگ –

ھمے رنگ ءَ شھاب ءِ کھول ءِ گوشگ اِنت شھاب پولیس ءِ ناگتی تیرگواری ءَ زدگ بیتگ ءُ آ بے گناھیں مردمے –

لس مردمانی نیمگ ءَ تنی وھدی اے بارہ ءَ ھچ گپ دیم ءَ نیاتکگ –

زانگ بہ بیت بلوچستان ءِ وھد وھد ءِ سر ءَ تیرگواری ءُ اود ءَ مردمانی زدگ ءُ بیران بیگانی ھال یکشل ءَ پیداک اَنت –

خیبر پختوانخواہ ءِ بنجاھی شھر پشاور ءَ پشتون تحفظ مومنٹ ءِ چیردستی ءَ مُچی ءِ بیتگ، مچی ءَ تران کنان ءَ منظور پشتین ءَ گوشتگ مہ من بلوچ راج ءَ اے گپ ءَ گوشگ لوٹ آں بیا اِت ھوار بہ ایں حیات بلوچ، کریمہ ءِ واستا جد ءُ جھد کن ایں –

آئی ءَ گوشت کہ مروچی ریاست ءِ نیمگ ءَ پولیس، پوج، چاریگاں جتا جتائیں راہ بند کرتگ اَنت چریشی ءَ ابید ھم پشاور ءِ مچی ءَ پیش داشتگ ءُ منّینتگ –

آئی ءَ گوشت کہ وتی راج ءُ ڈیھ ءِ دوستی ءَ ھمے واستا جنجال کاینت دانکہ چکاس ءِ واھد ءَ کسے دوستی ءِ ٹاہ ءَ مہ دنت –

آئی ءَ گوشت کہ مروچی مئے مھمان عثمان کاکڑ زمین ءِ سر ءَ ءُ باجوا مئے ھوناں گوں جوڑ بیتگیں ماڑیانی تہ ءَ کرسیانی سر ءَ نشتگ اَنت –

منظور پشتین ءَ گوشت کہ ھروھدے پشتون وتی ھکانی واستا گپ کن اَنت گڑا اے مردم انکاری زبان ءَ ناں بلکیں پاکستان ءِ بیرک ءَ مِک کن اَنت ءُ ھکانی دیگ ءَ انکار کن اَنت –

پی ٹی ایم ءِ سروک ءَ گوشت ارمان لونی ءِ زند ءَ مارا سکگ لوٹ ایت کہ ھمک روچ آئی ءِ سالگشت ءَ بہ کن ایں، ءُ آئی زانت ءُ گھگیری ءَ زندگ بہ کن ایں –

مچی ءَ تران ءِ تہ ءَ منظور پشتین ءَ گوشت کک سندھی ءُ بلوچاں گوشگ لوٹ آں بیاینت ھوار بہ بنت جد ءُ جھد بہ کن اَنت اے زوراکیں ریاست ءِ زُلم ءُ زوراکیاں ھوار بہ ایں پروش دے –

آئی ءَ گوشت مروچی علی وزیر، نور اللہ ترین، اویس ابدال، جبار ءَ ھوار بازیں ھمراھے مئے میان ءَ جاڑیگ نہ اَنت بلے پی ٹی ایم ھروھد ءَ مھکمی ءَ گوں اوشتوک اِنت –

آئی ءَ گوشت کہ اوگستان ءَ برجائیں جنگ ءِ سرجمی ءَ ایر جن آں – اوگستان ءِ مھلوک ءَ گوشگ لوٹ آں ما کاریچ ءِ چیر ءَ ھم مھر ءِ درشان کن ایں – زُلم ءُ زوراکیاں پشتون پشت ءَ نہ کنز اَنت –

آئی ءَ گْوشت کہ اُستان ءُ بنجاھی سرکار وٹسپ کال ءَ چلگ ءَ اَنت آئی ءَ سر ءَ ھچ واک نیست بلکیں آئی ءِ تاکت بس پادانی چیر ءَ اَنت –

آئی ءَ گوشت کہ پوج ءِ ھلاپ ءَ پی ٹی ایم ءِ جد ءُ جھد برجاہ مان اِیت، پی ٹی ایم باسکانی ھیلکاری بیتگ آ اے سرڈگار ءِ دیمون بیان بنت –

آئی ءَ گوشت مئے ممبر سازی کجام سیاسی پاٹی ءِ بگیر مہ اِنت سیاسی پاٹیانی مھکمی مئے مھکمی اِنت –

بلوچستان ءِ گون ءَ ھمک سرکار ءِ رویش گوں مھلوک ءَ نوک آبادکاری ءِ وڑ ءَ بیتگ اَنت – ماما قدیر

دی بلوچستان پوسٹ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ دو سد ءُ شانزدہ روچ سرجم بوتگ-
لیاری عوامی مھاز ءِ عبدالخالق،زردان، جنرل سیکرٹری عیسیٰ بلوچ، شکیل ایڈوکیٹ، عمران فاخر ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان اتگ ءُ گوشتگ کہ ھاکمانی نیمگ ءَ چہ اے کارے یک رندے پد ءَ دیمترا روان بوگ ءَ انت کہ پاکستان ءِ تہ ءَ آمریت جمھوریت ءَ ھوار ھر وڑیں سرکارے بہ بیت آئی ءَ بلوچستان ءِ گون ءَ وتی رویش نوک آبادیاتی ءُ بلوچ راج ءِ واھشت رَد بوتگ اَنت –

ماماقدیر بلوچ ءَ گوشتگ کہ گوستگیں سرکار ءِ وھد ءَ بلوچستان ءِ تہ ءَ ریاستی تاکت کارمرز ءُ کنگ ءُ بلوچانی آوارجنی ءُ آھانی زانگولیں جونانی دور دیگے سر ءَ مزنیں زور یکجاہ ءَ گندگ ءَ شور کتگ ءُ گوشتگ کہ آ واک دار اَنت کہ بلوچانی بگیری تاکت ءِ کارمرزی بند کنت بلے واکداری آیگ ءَ پد بلوچستان ءِ تہ ءَ پد ءَ ھما وڑ کنگ بوتگ –

آئی ءَ گوشتگ کہ مروچی ھم بلوچستان ءِ تہ ءَ پوجی تاکت کارمرز بوگ ءَ انت – گوستگیں روچ ءَ بولان ءُ ھرنانی ءَ ھشت ادار ءَ تاں ماٹر گولہ آس دیگ بوتگ اَنت- اے دمگاں مھلوک نشتگ انت کہ آھانی کار مالداری انت، گمان انت بازیں ماٹر گولہ آھاں جانی ءُ مالی تاوان رس اِتگ –

آئی ءَ گوشتگ کہ اگاں بلوچانی جیڑہ دری ڈیھاں پیدا کرتگ انت گڑا تو بلوچ راج ءِ گوست ءَ داتگیں ٹپاں درمان کنگ ءِ دروگ ءَ پرچا بندے –

دومی نیمگ ءَ سئے فروری ءَ بلوچستان ءِ دمگ تمپ نظرآباد ءَ بیگواھیں جاوید ء خالد رحیم یل بوتگ –

وی بی ایم پی ءَ ورنایے درایگے گپ راست کرتگ ءُ ساڑاتگ- وی بی ایم پی ءِ گوشگ انت کہ ما امیت کن ایں سرکار بازیں سالاں چہ بیگواہ بوتگیں مردماں یل کنت ءُ آھانی کھولاں زندے ازیت ءَ چہ رکین ایت –

ھمے وڑ چاردہ فروری ءَ حسان قمبرانی ءُ حزب اللہ قمبرانی زورانسری آوار جنی ءَ سالے سرجم بوگ اِنت کھول ءِ نیمگ ءَ چاگردی ترامجاہ ٹویٹر ءَ #SaveQambraniBrother ھیش ٹیگ چلائینگ ءِ جار جنگ بوتگ –

ھمے وڑ دہ سالاں چہ بیگواھیں محمد رمضان ءِ چُک علی حیدر بلوچ ءَ چاگردی ترامجاھاں چہ گوشتگ کہ ما سرکاری ادارھاں چہ دزبندی کن ایں کہ منی کماش محمد رمضان ءَ انسانی ھمدردی بنیاد ءَ یل بہ کن انت، دہ سال پرگوستگ ما بس ھمے امیت ءَ نشتگ ءُ ودار ءَ انت کہ رمضان بلوچ یل کنگ بیت –
علی حیدر بلوچ ءَ نبشتگ کہ منی پت چاردہ جولائی دوھزار ءُ دہ ءَ اوتھل ءِ زیرو پؤنٹ ءَ آوار جنگ بوتگ –

علی حیدر ءِ ٹویٹ ءَ گیش کنان ءَ سمی دین ءَ نبشتگ کہ علی حیدر ءِ کماش چاردہ جولائی دوھزار ءُ دہ ءَ اوتھل ءِ زیرو پوائنٹ ءَ علی حیدر ءِ چمانی دیم ءَ چیریں ادارھاں آوار جتگ بیگواہ کتگ، پت یل کنائینگے ھاتر ءَ ھر وڑیں زھرشانیاں ھوار دہ سال امر ءَ سَے ھزار کلومیٹر شال ءَ بگر تاں اسلام آباد ءَ پند جتگ – دہ سال گوزگ ءَ پد انگت بیگواہ انت –

زانگ بہ بیت سمی دین بیگواھیں ڈاکٹر دین محمد ءِ چُک انت، ڈاکٹر دین محمد ھم بیگواہ انت آئی ءِ زورانسری آوار جنی ءُ بیگواھی ءَ یازدہ سال ءَ گیش انت –

آزمانک: من ءُ بے سائیں سنگت

آزمانکار :مھم جان گُل

دی بلوچستان پوسٹ

نی وَ ورگ ءَ پیداگ اِنت، سی ماہ اِنت یکیں کوٹیءِ تہ ءَ آں ، کوٹی ءِ چاریں کُنڈاں موکواں تند بستگ موکوانی تنداں چون دیر بہ کن آں؟ پیشے چہ کُجا بیاراں ؟ منی دست ھم نہ رس ایت کہ دست ءَ بزیراں ءُ دنداں دیر بکناں،  ڈن ءِ رنگ من نہ دیستگ باریں چی رنگ ءَ اِنت راہ ءُ دراں من نزاناں برواں، اگاں بُرواں منی جند گار بیت
کوٹیءِ بتی ھم ساہ دیان اِنت سوچگ ءِ یراد ءَ کوتگی وتی، منءَ ھال ھم دیگا اِنت کہ وتی روژنای ءِ وستءَ ترا نوکیں بتی یے شوھاز کنگ لوٹ ایت،  بلے من بتی ءَ گوشگ لوٹ آں کہ من پیش ءِ موکوانی تندانی وستا شوھاز کُت کنگ ءَ نہ آن گڑا بتی یے چہ کُجا شوھاز کُت کناں؟- ترا اگاں سُچگی اِنت بہ سُچ من ءَ درمیان ءَ گر ءُ چیلاں چگل مہ دئے تھاری ءَ من ھیلداراں من ءَ تھاری ءِ ترس ءَ مہ دے۔

نشتاں ءُ جیڑگ ءَ لگ اِتاں کہ چون بہ کناں من نی؟ منی کَش ءَ ٹیبل ءِ سر ءَ سیگریٹ ءِ پارکیٹ ءِ ایر اَت شتگیں مردم ئیگ اَت کہ من ءَ چی ساری ھمد ءَ بیتگ اَت بس ھمے سگریٹ ءِ پارکیٹ کوٹی ءِ تھا پش کپتگ، من ھروچ دیستگ دل ءَ گوشتگ اے اِد ءَ چیی ءَ ایر اِنت دور دیان ئے بلے پد ءَ بے ھیال بیتگاں دور دیگ ءَ ،  بلے مرچی سگریٹ من پَچ کُت دوازداہ ٹال مان اِنت ئِے من چہ چُل ءَ باکسے آورت وتی کش ءَ ایر کُت،  دل ءُ دو دل اِت اَنت بلے من روک کُت کَشگ ءَ لگ اِت اَنت سگریٹ ءِ دیت منی لاپ ءَ شُت اَنت چماں ارس دراتک اَنت بلے انگت سگریٹ دور نہ دات دل ءَ گوشت ھمی یکیں چیز اِنت کہ منی ایوکی ءَ سھارہ بہ دنت ، من ءُ سیگریٹ نو سنگت بوت اِنت ما ھردویناں گپ ھم کُت زار گیپ اِنت مڑیت اِنگ زار کُت پد ءَ وشان بیت اِنگ بلے سیگریٹ ءَ منءَ یلا نہ کُت نہ کے من۔

بے تواری وشتر اِنت یار بیل کہ ھاموشی اِنت، بِلے بَتی وتی رژن ءَ تالان نہ کنت چہ مارا بیزار بیت ءُ وتی گڈی پاساں جَنت ءُ روکست بیت، بلے تھاری مئے سر ءَ چو ساھگ ءَ پاس جنان کنت، بِلے کہ ایوکی درداں گیش کنان کنت ءُ مئے سر ءَ کند ایت، بِلے ھاموشی وت مئے باتن ءَ ایر کپ ایت سجوئیں بسواں دنت کہ بِلے بَتی ءَ کہ وتی رژن ءَ شنگ نہ کنت تھاری ءِ ترس ءَ دنت، بِلے تھاری ءَ کہ وتی بیمناکیں پادبرمشاں چہ مارا گڑینت ، بِلے ایوکی ءَ کہ مئے میان ءَ وتی ساڑی بوگ ءِ سر ءَ کند ایت۔

منءُ سگریٹ ءَ شور کُت کہ نی اِد ءَ چی در کپیں ءُ دم ءَ بالا کن دلمبند ءَ گوات ءَ دے ما در کپتیں دیم دات باریں کُجا بلے ما راہ گار کُتگ اَت، روچ ھم وتی گڈی پاس ءَ جنگ ءَ اَت، روچ ایر بُکان اَت کمو رَند ءَ پَد تھاری ءَ وتی گام آستہ آستہ اِیر دات اَنت،  ما یک انچیں جاھے ءَ رستگتیں کہ اود ءَ بید ء رسترانی اُلاسگ ءُ مُرگانی کَپرگانی آواز ءَ  چہ آبید دگہ ما ھچ ایش کنگ ءَ نہ اِت اِنت بس جنگل اَت سک بَز اَت درچکانی شاھاں وتی لمب زمین ءِ سر ءَ پراھگ پراھگ ءَ گپتگ اَت، من دل ءَ ھیال کُت کہ اگاں مارا اے جنگل ءِ توک ءَ رسترے وتی توشگ بکنت، مارا بہ وارت گڑا؟ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ بولان ءُ ھرنائی ءَ پاکستانی پوج ءِ نیمگ ءَ پوجی لشکر کشی برجاہ -بازیں دمگاں پوج پیش کدمی کنگ ءَ اِنت ءُ ھمے رنگ ءَ پوج ءَ بازیں مارٹرے آس داتگ-

ٹی بی پی ءَ سر بیتگیں ھالانی رد ءَ پوجی لشکر کشی ءِ بندات گوستگیں روچ ءَ کنگ بیتگ – پاکستانی پوج ءَ شاھرگ، جمبرو، جھالاوان ءُ میژداری ءَ ھوار بازیں ھند ءُ دمگاں پیش کدمی کنگ ءَ اِنت –

دمگی مردمانی رد ءَ چریشی ءَ پد انگر کرتگیں دمگ ءِ کش ءُ گوری ھنداں پاکستانی پوج ءِ نیمگ ءَ بازیں مارٹرے آس دیگ بیتگ اَنت -مارٹرانی آس دیگ سھب ءِ ساھت ھشت ءَ بندات بیتگ اَنت ءُ بلے جانی ءُ مالی تاوانانی ھال سر نہ بیتگ اَنت –

زانگ بہ بیت جنگ زدگیں دمگ ءَ بلوچ ءُ پشتون مھلوک آباد اَنت کہ بنکی ءَ مالداری ءَ گوں بندوک اَنت –

واکداراں تنی وھدی لشکر کشی ءِ بارہ ءُ ھچ نہ گوشتگ –

زانگ بہ بیت گوستگیں روچاں پاکستانی پوج ءَ بولان ءِ دمگ سارو ءُ کش ءُ گوری ھنداں لشکر کشی کرتگ ءُ ھمے وھداں پوج ءَ ککی وڈھ ءِ ھند ءَ دینار مزارانی گوں دو چکانی ھمراھی ءَ دزگیر کرتگ ات کہ چریشانی بارہ ءَ تنی وھدی ھچ ھال نیست اِنت –

گوستگیں گڈی ءَ ھم بولان ءُ ھرنائی ءَ بازیں کچے ءَ لشکر کشی بیتگ اَنت کہ چریشی ءَ مردمانی بیگواھی ءُ لوگاں ھوار جنگلانی سوچگ ءِ ھال سر بیتگ اَنت –

ایرانی ایمنسٹی انٹرنیشنل ءَ چار بندیگیں بلوچ ءُ چار بندیگیں عربانی یلہ کنگ ءِ دزبندی کرتگ –

ایرانی ایمنسٹی انٹرنیشنل ءَ روکپتی بلوچستان ءَ نندوکیں چار بندیگیں بلوچ ءُ ایران ءِ اُستان ایواز ءِ جھمندیں چار بندیگیں عربانی یلہ کنگ ءِ دزبندی چہ جھانی انسانی ھکانی کلاں کرتگ –

ایران ءِ ایمنسٹی انٹرنیشنل ءِ رد ءَ ایرانی آمیدگس ءَ ھشتیں بندیگیں مردمانی پاھو ءِ دیگ ءِ جار پِرینتگ ءُ گوشگ بیتگ کہ آ ھمے زوتاں پاھو نامہ ءَ روگ ءَ اَنت –

ایرانی ایمنسٹی انٹرنیشنل ءَ جھانی انسانی ھکانی گلاں چہ لوٹ کرتگ ءُ گوشتگ کہ اے بندیگیں مردمانی سر ءَ مپتیں بھتام جنگ ءُ آیانی پاھو دیگ ءِ ھکم ءِ جار پِرینگ بیتگ اَنت –

ھمے رنگ ءَ گوریچانی افریقہ ءِ انسانی ھکانی گل ءِ سروک الطھاوی ءَ گوشتگ کہ بندیگیں بلوچ ءُ ایواز ءَ گپتگیں عربانی پاھو دیگ انسانی ھکانی لگتمالی یے ءُ اے مردماں وتی بنکی ھک لوٹ اِتگ اَنت –

آئی ءَ گوشتگ کہ بندیگیں مردمانی لوٹ ھمے بیتگ کہ آ کمتر کنگ مہ بنت ءُ آیانی اے بنکی ھک اِنت ءُ باید ایرانی سرکار انسانی ھکاں سرگوز مہ کنت ءُ گپتگیں مردماں سلامتی ءَ یلہ بہ کنت –

آئی ءَ گوشتگ کہ ھمے ھال مارا سر بیتگ کہ ایرانی آمیدگس ءَ ھشتیں مردمانی پاھو دیگ ءِ ھُکم داتگ ءُ آ ھمے زوتاں پاھو دیگ بیگ ءَ اَنت –

آئی ءَ گوشتگ کہ اے مردماں دَہ سال اِنت کہ اے مردم گرگ ءُ بندیگ کنگ بیتگ اَنت ءُ ایرانی سرکار ناانساپیں منّانک پیش کنگ ءُ مردماں زیردست کنگ ءَ اِنت –

آئی ءَ گوشتگ کہ ھامدریگی ءُ مھران ناروی اُستان اسفھان ءِ بندیگ جاہ ءَ بند اَنت ءُ اشانی تہ ءَ دگہ دو کسانی نام پجار نہ بیتگ اَنت ءُ آ دزاپ ءِ مزنیں بندیگ جاہ ءَ بندیگ اَنت –

ایرانی ایمنسٹی انٹرنیشنل ءِ گوشگ اِنت کہ اے مردمانی واستا وکیل دارگ نہ بیتگ ءُ چریشی ءَ یکسریں گپاں اے مردم زیردست کرتگ ءُ پاھو ءِ نزیک ءَ رسینتگ اَنت –

آئی ءَ گوشتگ کہ ایران ءِ سرکار انسانی ھکاں لگتمال کنگ ءَ اِنت آ باید کانودانی رد ءَ مردماں ھک ءُ اگبال بہ دنت –

سندھ ءِ مزن شھر کراچی ءِ پریس کل ءِ دیم ءَ بیگواھیں بلوچانی ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ پانزدہ روچ سرجم بوتگ، دادمحمد بلوچ، نبی بخش بلوچ، علی احمد بلوچ ءُ دگہ مردماں بنجل ءِ تر ءُ تاب کرتگ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ایردستیں بلوچستان ءِ کُنڈ کُنڈ ءَ پاکستانی پوج ءِ زلم ءُ زوراکیانی آماچ انت بلے اے ھم دلگوش کنگی انت کہ بلوچ ءَ ریاست ءِ زلم ءُ زوراکیانی دیم ءَ سر جھل نہ کرتگ کہ یک رژنیں زندے ئے مانزمان انت –

آئی ءَ گوشتگ کہ ایشی ءَ گلامی ءِ بگیری ءَ بیداری گوشگ بیت کہ ایردست وھدیکہ زورگپتانی زوراکیانی پہ تمردی دیمپانی کنت گڑا اے وڑ ءَ پُرایمنیں جھد اوستی ءِ بیت –

آئی ءَ دیمتر ءَ گوشتگ کہ پاکستان ءِ چیریں ادارھانی کارمند کہ آھانی زوراکی پیش ءَ چہ بلوچستان ءَ بوگ ءَ انت ءُ روچ ء رھمانی گِساں رو انت ءُ بلوچاں آوار جن انت بیگواہ کن انت یا سر ء بازار کُش انت پد ءَ دگہ ناماں زمہ واری ءَ زور انت ءُ ایردستی ءِ بگیری ءَ بؤکیں جد ءُ جھد ءَ نیکراھی ناشرکاری ءِ نام دیگ ءِ وڑ وڑیں پندل کنگ ءَ انت –

ماما قدیر بلوچ ءَ گوشتگ کہ پوجی ادارھاں مھار گُٹ ءَ دیگ ءُ یل ءَ کنگ بوتگ انت کہ بلوچ ءِ چکچینی ءَ برجاہ بدار انت – پاکستانی پوج ءِ ھما وھد ءَ دل بہ لوٹ ایت آ گیش ءَ چہ گیش انسانی ھکانی لگتمالی ءُ بلوچ ربیدگ ءَ لگتمال کن انت – دنیا ءِ ھچ نہ گوشگ ءَ انسانیت ءِ بگیری ءِ کتکاریاں آھاں گیشتر ارزانی بیت-

تربت سیٹلائیٹ ٹاؤن ءَ پاکستانی چیریں ادارھانی کارندہ تیرباران کرتگ ءُ کُشتگ – میجر گوھرام بلوچ

سر بیتگیں ھالانی رد ءَ گوستگیں شپ ءَ ناشناسیں مردماں کیچ ءِ بنجاھی شھر تربت ءَ یک مردمے تیرباران کرتگ ءُ کُشتگ –

کُشتگیں مردم ءِ پجار عبدالکریم ء ملا محمد رھیم جھمنند دشت لنگاسی ءِ نام ءَ زانگ بیتگ –

دمگی مردمانی رد ءَ کُشتگیں مردم ءِ سیادی چیریں ادارھانی نیمگ ءَ جوڑ کرتگیں ڈیتھ اسکواڈ ءَ گوں بندوک بیتگ –

عبدالکریم پسنی ءِایس ایچ او خالد دشتی ءُ اسپیشل برانچ تربت ءِ سب انسپکٹر حسین دشتی ءِ کستریں برات اِنت –

دومی نیمگ ءَ بلوچستان ءِ آجوئی لوٹوکیں سلاہ بندیں گل بلوچستان لبریشن فرنٹ ءَ تربت ءَ کُشتگیں مردم ءِ کوش ءِ زمہ واری منّ اِتگ –

بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں شنگ کرتگیں درشان ءِ تہ ءَ گْوشتگ کہ گوستگیں شپ ءِ ساھت دَہ ءُ نیم ءَ مئے سرمچاراں کیچ ءِ بنجاھی شھر تربت ءَ سیٹلائیٹ ٹاؤن ءَ پاکستانی ملٹری انٹیلجنس ءِ کارندہ عبدالکریم ءِ سر ءَ تیرگواری کرتگ ءُ کُشتگ –

جارکش ءَ گْوشت کہ مئے سرمچاراں آئی ءِ سر ءَ ھما وھد ءَ اُرش کرتگ کہ آ ریاستی ڈیتھ اسکواڈ ءِ دمگی سروک یاسر بھرام ءِ گس ءَ دراتکگ ءُ وتی گس ءَ روگ ءَ بیتگ کہ ھال ءِ سر بوگ ءَ آئی ءِ سر ءَ اُرش کرتگ ءُ کُشتگ- آ میلٹری انٹلجنس ءِ یک گند ءُ نندے ءَ کشمیر ءِ روچ ءِ درگت ءَ داشتگیں روچ ءِ واستا زری پوڑی ءِ بھر ءُ بانگ کنگ ءِ ھاتر ءَ اتکگ –

جارکش ءَ گْوشت: عبدالکریم بازیں لشکر کشی، مردمانی آوار جنی ءُ کُشت ءُ کوشاں پاکستانی پوج ءِ ھمراھداری ءَ بیتگ ءُ ایشی ءَ ابید آ بازیں چاگردی سلکاریاں ھوار بیتگ – مئی دوھزار ءُ نوزدہ ءَ دشت اچانک بازار ءَ لوگاں دزی کنگ ءِ سر ءَ پولیس ءَ دزگیر کرتگ، پولیس ءَ آئی ءِ گور ءَ دُزی کتگیں سھر ءُ ایندگہ چیزانی درایگ ءَ ابید ملٹری انٹلجنس ءِ گوشگ ءِ پد ءَ پولیس ءَ یل کرتگ –

جارکش ءَ گوشت: آ پیدارک ءَ ھم دزی، ڈنگی، پوج ءِ ھمراھی ءَ لشکر کشی ءُ کشت ءُ کوشاں ھوار بیتگ، چریشاں ابید ھنکین دشت ءِ کوہ ءُ میتگاں ھم بازیں لشکر کشیاں تچک ءَ ھوار بیتگ کہ اود ءَ بازیں مردم گار ءُ بیگواہ کنگ بیتگ اَنت –

بی ایل ایف ءِ جارکش میجر گْوھرام بلوچ ءَ گْوشت: ما یکرندے پد ءَ ھما دراھیں مردماں سرپد کن آں کہ آ زورگریں پاکستانی پوج ءِ ھمراھداری ءَ یل بہ کن اَنت اگاں ناں گڑا آیانی آسر بیمناک اِنت –