TBP Balochi

بلوچستان لبریشن فرنٹ ءِ جارکش میجر گوھرام بلوچ ءَ ناشناسیں جاھے ءَ شنگ کرتگیں درشان ءِ تہ ءَ گوشتگ کہ دوشمبے ءِ روچ ءِ ساھت دو ءَ آواران ءِ دمگ جھاؤ نوندڑہ تلارُک ءَ پوجی چوکی ءِ سر ءَ سرمچاراں یک کارندھے اسنائپر ءِ گون ءَ نشانگ کرتگ ءُ کُشتگ –

آئی ءَ گوشت اُرش ءَ پد پروش وارتگیں لشکر ءَ ھمک وھد ءِ وڑ ءَ لس دست ءُ گوشیں میتگانی سر ءَ بیڑ برتگ مھلوک لَٹ ءُ کُٹانی نشانگ کرتگ اَنت ءُ لوگ پَٹ ءُ ھنڈ کرتگ ءُ لوگانی مڈی برتگ اَنت –

میجر گوھرام بلوچ ءَ ناشناسیں جاھے ءَ رسانکدراں شنگ کرتگیں بیان ءِ تہ ءَ گوشتگ کہ زورگریں پوج ءِ سر ءَ اُرش بلوچستان ءِ آجوئی ءَ داں برجاہ مان اَنت –

سر بیتگیں ھالانی رد ءَ شال ءِ دمگ سریاب دگ ءَ سیکورٹی فورسز ءَ سلاہ بندیں گلے ءَ بندوکیں باسکے ءِ دزگیر کنگ ءِ ٹاہ داتگ –

سیکورٹی فورسز ءِ رد ءَ شال ءِ دمگ سریاب دگ ءَ پٹ ءُ پول کرتگ ءُ اود ءَ سلاہ بندیں گلے ءَ بندوکیں یک باسکے دزگیر کرتگ –

سیکورٹی فورسز ءِ رد ءَ دزگیر کرتگیں باسک شال ءَ تراک ءُ کُشت ءُ کوشاں ھوار بیتگ –

سیکورٹی بنشون ءِ رد ءَ گپتگیں جرمکار اوگستان ءَ لھتے روچ پیسر اتکگ ءُ تراکناکیں شورو ءُ سلاہ دستیگ کرتگ اَنت –

گپتگیں مردم ءِ بارہ ءَ دمگی مردمانی نیمگ ءَ دگہ ھال دیم ءَ نیاتکگ اَنت، گوست ءَ ھم ھمے وڑیں مردمانی دزگیری ءِ ٹاہ سیکورٹی فورسز ءَ داتگ اَنت –

نبشتانک: زیردستی

نبشتہ کار: آئشہ بلوچ
رجانکار: اتیکہ بلوچ

دی بلوچستان پوسٹ

زیردستی یک انچیں نادْراھی یے کہ اِے گلامیں راج ءُ بنی آدم ءَ رمیز ءِ داب ءَ چہ تہ ءَ وران ءُ ھلاس کنت۔ اگاں یک راجے کہ سسّائی گلام اِنت گُڑا آ پہ وتی زیردستی ءِ سانکلانی سِندگ ءَ ھجبر آسانی ءَ نہ جیڑ ایت انچوشکہ سکرات ءِ زمانگ ءَ لھتیں مردم ماں رودانی تہ ءَ سانکلاں یک انچیں دْروشمے ءَ بندیگ اِت انت آیاں وتی سر ھم سُرینت نہ کُت اِت انت ایشانی رود ءِ دیم ءَ یک دیوالے اَت ءُ دیوال ءَ یک آسے روک کنگ بیتگ اَت گُڑا ایشانی ھیال ءَ اسلیں دنیا ھمے دیوال ءُ آس اَت چمیشکا آیاں ڈنّی راستیں دنیا ءِ بارہ ءَ ھجبر ھیال ءُ پکر ھم نیست اَت۔ یک روچے ءَ لھتیں مردماں چہ ھمیشاں یکے، چہ رود ءَ کَشت ءُ ڈنی دنُیا ءِ سیل ءُ سوات کنائینت ءُ پد ءَ ماں رود ءَ مان کُت۔

پد ءَ ھمے گلام ءَ وتی ھمبندیگاں ھال دات ءُ گْوشت کہ بُندری دنیا چہ اِے رودیں بندیگجاہ ءَ ڈنّ ءَ اِنت، اِے وَ نہ اِنت! گُڑا آیاں ایشی ءِ گپ نہ منّ اِت انت ءُ گْوشت اش اِنّا راستیں دنیا ایش اِنت ءُ اد ءَ اِنت، ڈنّ ءِ دُنیا دْروھگے بزاں رود ءِ بندیگ ھما زِندان ءِ تہ ءَ بندیگ اِت اَنت-

پمیشکا اگاں کسے کہ سسّائی گلام اِنت گُڑا آ ناں وت ءَ چہ گلامی ءَ آزات کنت ءُ ناں کہ وتی کِرّ ءُ کش ءِ مھلوک ءَ چہ گلامی ءَ آزات کنگ کِل ایت۔ البت آجوئی یک انچیں ھُدائی دادے کہ ھر راج ءَ مُراد نہ بیت پمیشکا اگاں بلوچ راج پہ وتی راجی آجوئی ءِ ھاتر ءَ چہ اِے زیردستی ءِ دیوال ءَ درکپگ ءِ جُھد ءَ مہ کنت گُڑا پہ آیوکیں پدریچ ءَ اِے گلامی ءِ سانکل گیشتر ھاٹیگ زُور اَنت۔

بلے نی ما چیزے گوں وتی چَمّاں گِندگ ءَ ایں کہ مئے گون ءَ چونیں بدروائیں کھر بوگ ءَ انت؟ نی ما ماں وتی سرڈگار ءَ چوں دلوت ءِ رنگ ءَ واڑ ءَ بندیگ ایں، ما مرچی ماں گلامی ءِ تھاروکیاں در پہ در ایں، باید اِنت ما پہ وتی آیوکیں پدریچ ءَ یک روژنائیں باندات ءِ کندیلے روک کنان ءَ وتی راج ءُ سرڈگار ءِ آجوئی ءِ ھاتر ءَ وتی جُھد ءَ تْرُند بہ کن ایں۔ انچوشکہ ماں دنیا ءَ ھچ چیزے بے جُھد ءَ نہ رس ایت۔ البت ما پہ راجی آجوئی ءِ ھاتر ءَ وتی ھوناں ریچ ایں، وتی سراں ھم ندر کن ایں بلے ما آجوئی ءَ ماں وتی چَمّاں دیت نہ کن ایں۔۔۔بلے ما اُمیتوار ایں کہ مئے آیوکیں پدریچ اِے آجوئی ءَ ماں وتی چَمّاں اَلم گِند ایت بلے شرت ایش انت کہ بلوچ راج ءِ ھر بْرات ءُ گْوھار وت ءَ گوں راجی آجوئی ءِ جُھداں ھوار ءُ ھمگرنچ بہ دار ایت، انچوشکہ بتلے گْوش اَنت “چاپ یک دست ءَ توار نہ کنت ءُ پہ توار ءَ دوئیں دستاں ھوار بوگ لوٹ ایت۔”پمیشکا پہ آجوئی ءِ ھاتر ءَ مارا یکمُشت بوگ لوٹ ایت ءُ اگاں گیشتر ما یکمُشت بہ ایں گُڑا مارا گیشتر سوب ھم رس ایت۔

زیردستی بنی آدم ءِ سسّا ءُ پکری ءِ بودی ءَ ھلاس کنت، زیردست راجاں بیرانی ءِ نیمگ ءَ بارت، زیردستی زیردستیں راج ءِ زُبان، دود ءُ ربیدگ ءَ گار ءُ بیگواہ کنت ، زیردستی زیردستیں راجاں بے سُدّ کنت، زیردستی راجاں دژمن ءِ دیم ءَ سرجھل ھم کنائین ایت۔ ھما راج کہ آجو اَنت آ وش بھت انت کہ چہ گلامی ءُ زیردستی ءَ آسودگ ءُ وتواجہ اَنت ءُ وتی راجمستری ءِ آسر ءَ ھر سوڑگے وت اڈ کن اَنت بلے گلامیں راج ءِ مرچی باندا ءِ ھر سوڑگ ءَ آئی ءِ دژمن کنت چی ءَ کہ دژمن ءِ چمّاں تو بس یک گلامے ئے-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: هَواریں لُمّہ

نبشتہ کار: ماهل بلوچ

دی بلوچستان پوسٹ

کریمہ پہ مارا ماتےءَ چہ کمتِر نہ بوتگ ، ما هما اِنت کہ وتی راجی آجوئیءِ تحریکءِ باروءَ سرپد بوتگ ایں ، وتی گُلامی مار اِتگ، پوه بوتگ آں کہ ما گُلام اِیں ، ایردستیں راجےءَ چہ بندوکیں ما کریمہ پہ جد ءُ جُھد ءَ دیستگ، ما کریمہ پہ راستیءِ گْوشگءَ دیستگ، ما کریمہ بلوچستانءِ چار راہ ءُ دگانی سر ءَ دیستگ-

کریمہ کسان اُمبرےءَ چہ راجی آجوئیءِ جھدءَ پہ جد جھد بنا کُتگ اَت، میتگ پہ میتگ شھر ءُ بازار، گِدان ءُ گدان ءُ ھلک پہ ھلک، سرجمیں بلوچستانءِ کنڈ کُنڈاں پہ راجی آگھیءِ ھاترا کریمہ جد جھدءَ اَت-

تمپءَ بِگر داں مند ، دشت، شالکوٹ ، کُلانچی ، کیچ ءُ سرجمیں بلوچستانءَ را چہ گلامیءِ وابءَ پاد کنگءِ هاتِر ءَ کریمہ نا شپ چار اِتگ اَت ءُ نئیکہ روچ۔ اے سپرءِ میانءَ باریں آ چے پیمیں جیڑھانی دیمپان بوتگ ات، بلئے ھرچ پیمیں کسان تا مزنیں جیڑھانی دیم ءَ چو اَلبُرز ءِ کوهءَ مِکّ اَت- بے سریں تژن ، بے بنیاتیں بھتام، زاه ءُ بد ادا آئی راجءِ مکاریں مردمانی دپءَ چہ چے نہ اشکتگ ات، بلئے درستانی دیمے داشتگ ات ءُ تُشے هَم چہ وتی راجی لیکہءَ ، وتی کرتگیں پیسلہ ءُ گْوشتگیں دانکاں پُشت نہ کِنز اِت، چیءَ کہ آئیءِ اے پیسلہ یک ریشنل پیسلہ یے ات، آ سرپد بوتگ ات کہ پہ بلوچءَ اگاں کشکے است گڑا ھمیش انت۔ اَگاں مروچی ما اے راہ نہ گپت گڑا آؤکیں وھدءَ پما هِچّ نہ مان ایت- ما پَشت کپ اِیں – ما گیشتِر ایردست ءُ گُلام بِہ اِیں – مئے دُژمن گیش توانا ءُ زوراور تر بیت- کریمہ وتی منزل ءُ آئیءِ کِشک مارا پیش داشتگ، وتی چمّے مارا داتگ اَنت ءُ وت پہ مُدامی اَبدمان بوتگ-

نوں کریمہ ءِ گچتگیں پگر مئے ءُ شُمئے کوپگان اِنت ، کریمہ بکش اِتگیں چمّ ، کریمہءِ ساپ ءُ پلگاریں کِشک، کریمہءِ راستیں ءُ تَچکیں هبر ءُ آئیءِ لیکہ۔۔۔ مارا نوں وتی جِند، وتی گام وتی جُھد ھمے چیزانی پشتءَ جنزگی انت، هما زورگر ءِ کبزہ گیریءِ ھلاپءَ کہ کریمہءَ یک جد جھدے بِندات کُتگ اَت مارا ءُ شُمارا دیم ءَ ھما لیکہ گوں مُهکمیءَ ، گوں توکل ءُ جزبگاں دیما برگی اِنت-

کریمہ مُدام مارا وانگ ءُ زانگ ءِ سکین داتگ کہ دُرستاں چِہ پیسر شُمارا وانگی اِنت ، وانگ ءَ وهد بِہ دے اِت پرچا کہ وهدے شُما وان اِت، شُمئے کار مُھکم بُوان بنت، شُمئے کار پہ گیگ ءُ گْوَم بُوان بنت، شُما وت ءَ یکشلہ گوں وانگءَ نزیک بِہ کن اِت-

کریمہ وتی سرجمیں زِند پہ جُھد گْوازینت نوں مئے باریگ اِنت هما کدم کہ کریمہ ایر کنان کُتگ اَنت، هما کدمانی سر ءَ جُنزان بِہ بِہ اِیں .کریمہ روَگ پہ مارا ، پہ بلوچستانءَ یک مزنیں تاوانے اِے هبر راست اِنت بَلے اَگاں ما وتی جُهد برجم داشت گُڑا باندا روچ ءَ بلوچستان همُک کُنڈ ءَ کریمہ ودی بُوان بنت-

کریمہ بلوچستانءِ دِلبند ءَ چو ھما سرپتگیں پُل ءَ اِنت کہ آئیءِ وشیں بوہ ھر کجا آتار اِنت ، جلواناک ءُ زیبا نا بگندئے باز زیبا اِنت آئیءِ ریتکگیں هون دگہ ھزاراں پُل ءُ گُل رودین انت،
آئیءِ پِگر پما هزاراں باهڈیں سر زِندگ کنت کریمہ هما شیرزالیں سَر اَت کہ آ وتی جِند ءِ پادانی سر ءَ اُوشتات ءُ گوں جوزگ ءُ دلیری ءَ سرجمیں راجءِ تہا یک آشوبے آؤرت یے، پہ بلوچ زالبولانی ھاترا یک راھے گیشینت ‌، آهاناں اِے باوری کنائینت کہ شُما چہ کسّے ءَ کمتِر نہ ئے شُما را ھم زندگ بوگءِ ھکّ ءُ اُکبال هست ، شُما هم ساهدار اِت ، شُما را زِندگ بوّگ ءِ ھکّ هست— لُمّہ وتن بلوچ سیاستءِ تہءِ اَولی زالبول اَت کہ آ پولیٹیکل بنیاتءَ دیمءَ اتکگ ات، وتی زمین ءِ گُلامیءِ مار اِت وتی راج ءِ ایردستی ءِ پَهم اِت ءُ راج ءُ زمین ءِ آجوئی ءَ پہ داں گُڈی ساه ءَ جَنگ ئِے کُت-

کریمہءِ اَرواه داں هما وھد ءَ آسودگ نہ بیت دانکہ من ءُ تو آئی پِگر ءُ جُنز ءَ دیم ءَ نہ بر ایں آ گوں ما هما کتره ءَ دِلگران اِنت داں ما وتی زانگ ءِ جُھدءَ نہ کن ایں ، وتی پھمگءِ کوشستءَ نہ کن ایں ، نہ وان ایں، وتی اندر ءَ شعور جوزگ ءُ بلوچیءَ زِندگ نہ دار ایں …. ءُ یک هبرے پہ مُژدھی سرپد بِہ بِہ اِت کہ کریمہ نہ سِستگ چہ مارا ، کریمہ جُھد ءَ اِنت ،کریمہ  گوں مارا هوار اِنت ، بلوچستان ءِ دلبند ءَ چو پُلےءَ سرپان اِنت، تا کہ آجوئیءِ روچ نہ ٹِکّ اِیت-

” دِگہ راجےءِ زمینءَ پہ زور گِرَگ لالِچے هَوَسے، ءُ وتی سرزمین ءِ آجوئی ءِ جُهد اِشکے مُهبتے اِشک ستَر نزور بِہ بیت بَلے چہ لالِچ ءَ هزار وار سر ئِے بُلندتِر اِنت۔” (بانُک کریمہ بلوچ)

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ناشناساں سَے مردم آوار جتگ ءُ دو کس تیر جتگ ءُ چگل داتگ چریشیاں پد سیمی آوار جنگ بیتگیں مردم ءِ جون ھم دزکپتگ-

ٹی بی پی پتر ھال ءَ سر بیتگیں ھالانی رد ءَ گوستگیں شپ ءَ ناشناسیں مردماں سَے مردم آوار جتگ ءُ برتگ اَنت، چریشی ءَ پد دو کس تیر جتگ ءُ کُشتگ اَنت سیمی مردم گوں وت برتگ ءُ آئی ءِ جون پد ءُ ھم دزکپتگ –

کُشتگیں مردمانی پجار ماجد ء اکبر اوغان جھنند پسنی وارڈ نمبر 2، جمیل اھمد ء صاحب داد، عبدالحمید ء صاحب داد ءِ ناماں زانگ بیتگ اَنت –

دمگی مردمانی رد ءَ ھرسئیض سیشب کورٹ گوادر ءَ دیریگیں یک کوشے ءِ وئیل ءَ سوبمند بیتگ ءُ پسنی ءَ آیگ ءَ بیتگ اَنت کہ ناشناسیں سلاہ بندیں مردماں آوار جتگ ءُ برتگ اَنت –

مستونگ ءَ بیگواھیں سعید اھمد ءِ واستا ڈی سی ھاؤس ءِ دیم ءَ زھرشانی، چاگردی رسانکجاہ ٹوئٹر ءَ بیگواھیں شبیر بلوچ ءِ گوھار سیما بلوچ ءَ گوشتگ کہ بیگواھیں مردمانی کمیشن بے سوب بیتگ منی برات سرکار ءِ بندیگجاہ ءَ بند اِنت –

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی ءَ چار ھزار ءُ دو سد ءُ ھبدہ روچ سرجم بیتگ – وائس فار مسنگ پرسنز آف سندھ ءِ رھشون سورٹھ لوھار ءُ دگہ مردماں بنجل ءِ تر ءُ تاب کرتگ کھولانی گون ءَ پدردی درشان اِتگ –

وی بی ایم پی ءِ رھشون ماما قدیر بلوچ ءَ گوشتگ کہ بلوچستان ءَ انسانی ھکانی پھریزگ ءِ واستا کار کنگ ءَ سک ءَ مشکل ءُ جنجال اِنت، اد ءَ بلوچ باسک، نودربر، سوسائٹی ءِ باسکانی گون ءَ اسٹبلشمنٹ ءَ ھما رویش ایر کرتگ آ سگگ ءِ اوپار ءُ دور اِنت –

آئی ءَ گوشت بلوچستان ءَ انسانی ھکانی واستا توار چِست کنگ یک جرمے زانگ بیت کہ آئی ءِ سزا گردن جنی ءَ سر بیتگ -پاکستان ءَ انسانی ھک لگتمال بیگ ءَ گڑا آیانی گیشتریں بھر بلوچستان ءَ بیگ ءَ اَنت –

ماما قدیر ءَ گوشت کہ بلوچاں بہ گر سندھی، اردو گپ جنوک، شیعہ، ھزارہ، پشتوناں ھوار دگہ مھلوک ءُ کمیونٹیز ھوار بہ بنت ناانساپی ءِ بگیری ءَ توار چِست بہ کن اَنت -ھمسنتی ءِ برزیں توار ءَ نپمندی ءِ زور مان اَنت –

ماما قدیر ءَ منظور پشتین ءِ نیمگ ءَ بلوچ راج ءِ گون ءَ ھمسنتی ءِ گوانک ءِ جد ءُ جھد ءِ پلامرزی ءَ کن آں ءُ ما ھمے سرپد بہ ایں یکیں ریاست ءِ پالیسی ءِ آماچیں مھلوک ھوار بہ ایں ءُ وتی دوستگینانی یلہ کنگ ءُ دگہ جیڑھانی سر ءَ توار چِست کنگ المی بیت اِنت –

ھمے وڑ ءَ بلوچستان ءِ دمگ مستونگ ءِ جھمنندیں سعید اھمد ءِ بیگواھی ءِ ھلاپ ءَ کھول ءَ مستونگ ءَ زھرشانی ءُ نندانک جتگ –

ڈپٹی کمشنر مستونگ ءِ گس ءِ دیم ءَ نندوکیں کھول ءَ گوشت سعید اھمد ء حبیب اللہ سال دوھزار ءُ سیزدہ ءَ مستونگ ءَ لدھا ءِ ھند ءَ بیگواھی ءِ آماچ بیتگ ءُ ھشت سال ءِ گوزگ ءَ پد ھم بیگواہ اِنت –

بیگواھیں سعید اھمد ءِ مات ءَ گوشت منی چُک لیویز فورس ءِ ملازمے بیتگ ءُ ما گوستگیں ھشت سالاں ھمک دروازگ ٹک اِتگ ءُ دمبرتگ بلے تنی وھدی مئے توار ءِ گوشداروک کس نیست اِنت –

آئی ءَ گوشت ما سرکار ءَ گوں دزبندی کن ایں اگاں منی چُک ءَ جرمے ھست گڑا آمیدگس ءَ پیش کنگ بہ بیت بلے اے وڑ ءَ سالانی سال گار ءُ بیگواہ کنگ کجام انساپ اِنت؟ –

آئی ءَ گوشت مروچی ما لاچار بیتگیں ڈی سی ھاؤس ءِ دیم ءَ پریات کنگ اِنت بیت کنت آ وتی فورس ءِ کارندہ ءِ یلہ بیگ ءِ واستا جاہ ئِے نا جاہ ئِے گپ بہ کنت –

سعید اھمد کھول ءِ زھرشانی ءَ بی ایس او ءِ نزیر، بی ایس او پجار ءِ رھشون جھانگیر منظور بلوچ، بابل ملک بلوچ، بی این پی رھشون نصیب اللہ لھڑی، انجینئر امیر جان نثار اھمد لھڑی، بی ایس او ءِ دمگی سروک آغا عدنان شاہ، عصمت بلوچ، منیر اھمد لھڑی ءُ دگہ سیاسی چاگردی ءُ نودربراں ھمدردی ءِ واستا بھر زرتگ ءُ چہ سرکار ءَ سعید اھمد ءَ ھوار دراھیں بیگواھیں مردمانی یل کنگ ءِ لوٹ کرتگ ءُ گوشتگ بلوچستان ءِ سرکار یک نادلگوشی ءِ آماچ اِنت –

آیاں گوشت بیگواھیں مردمانی جیڑہ سنگینیں رنگے ءَ اِنت اگاں سرکار جیڑہ ءِ سر ءَ بے سوب بیت گڑا بلوچستان ءِ گیشتر ناوش بنت –

ھمے رنگ ءَ نودربر رھشون شبیر بلوچ ءِ گوھار سیما بلوچ ءَ گوشت بیگواھیں مردمانی واستا ھستیں کمیشن بے سوب بیتگ، کمیشن وتی روتگانی برجاہ کنگ ءَ دنیا ءَ بدلی کنگ ءَ اِنت – اے گپ آئی ءَ چاگردی رسانکجاہ ٹوئٹر ءَ کرتگ اَنت –

سیما بلوچ ءَ نبشتگ کرتگ مروچی من بیگواھیں مردمانی بارہ ءَ جوڑ کرتگیں کمیشن ءِ دیم ءَ پیش بیتگ اَنت، آئی ءَ گوشت (کمیشن) ءَ گوشتگ کہ انگت ءَ ھچ نزاناں تئی برات شبیر کجا اِنت – شبیر اکتوبر دوھزار ءُ شانزدہ ءَ لشکری کارندھاں آوار جتگ – اے کمشین بے سوب بیتگ بس دنیا ءِ گمراہ کنگ ءَ وتی روتگاں زندگ کنگ ءِ جھد ءَ کنگ ءَ اِنت –

زانگ بہ بیت کمشین ءَ بنجاھی سرکار ءِ گوشگ ءَ بیگواھیں مردمانی یل کنگ ءِ واستا کار کرتگ – کمشین ءِ سروکی ءَ بلوچستان ءِ ھائی کورٹ ےِ ریٹائرڈ جج جسٹس فضل الرحمٰن کنگ اِنت –

محکمہ داخلہ ءِ رد ءَ کمیشن ءِ پیشی سیزدہ فروری ءَ سکندر جمالی ھال بلوچستان سول سیکریٹ شال ءَ بیت اِنت –

سیما بلوچ ءَ دیمتر ءَ گوشتگ منی برات پاکستانی پوج ءِ دست ءَ اِنت – شبیر آئی ءِ لوگبانک ءِ دیم ءَ آوار جنگ بیتگ -اگاں کمیشن ءَ اینکس ھمت نیست اِنت کہ آ سیکورٹی ادارھاں شبیر ءَ ھوار آ دگہ بیگواھیں مردمانی بارہ ءَ جست بہ کنت ھدا ءِ نام ءَ مئے کیس ءَ زوال مہ کن اِت اشی ءَ بہ منّ اِت کہ سیکورٹی فورسز مئے گپاں دلگوش نہ کنت –

زانگ بہ بیت شبیر بلوچ بی ایس او آزاد ءِ بنجاھی انفارمیشن سیکرٹری بیتگ آ چار اکتوبر دوھزار ءُ شانزدہ ءَ بلوچستان ءِ دمگ کیچ ءَ دگہ مردمانی ھمراھی ءَ بیگواہ کنگ بیتگ – بی ایس او آزاد ءُ آئی ءِ کھول ءِ گوشگ اِنت شبیر بلوچ پاکستانی پوج ءُ چیریں ادارھاں دزگیر کنگ ءَ پد بیگواہ کرتگ وھدیکہ شبیر ءَ پد آ دگہ آوار جنگ بیتگیں مردم یلہ بیتگ اَنت –

شبیر بلوچ ءِ بیگواھی ءِ ھلاپ ءَ آئی ءِ گوھار سیما بلوچ ءُ لوگبانک زرینہ ءَ وائس فار بلوچ مسنگ پرسنز ءِ ھمراھی ءَ شال ءَ ھوار کراچی ءَ بازیں کچے ءَ زھرشانی کرتگ اَنت –

بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ کلات منگچر ءِ دمگ کلی خراسانی ءَ مئے سرمچاراں پاکستانی چیریں ادارھانی کارمندانی سر ءَ اُرش کُتگ ، اُرش ءَ سئے چاریگ مُرتگ وھدیکہ یکے زدگ بوتگ-

جارکش ءَ دیمتر ءَ گوشتگ کہ اے مردم چہ پنجاپ ءَ سیادی دار انت کہ گوستگیں بازیں روچاں منگچر ءُ ایندگہ دمگاں ساڑی بوتگ انت، ھال ءِ سر بوگ ءَ آھانی سر ءَ چاریگ داشتگ، پٹ ءُ پول ءَ ھمے سرپدی رس اتگ کہ اے مردم پاکستانی چیریں ادارھانی ھاتر ءَ کار ءَ انت ھمے ھاتر ءَ گوستگیں شپ ءَ نشانگ جوڑ کرتگ انت –

جارکش مزار بلوچ ءَ دیمتر ءَ گوشتگ کہ پاکستانی پوج ءُ چیریں ادارہ بلوچستان ءِ تہ ءَ دمگی ءُ دری مردماں یکجاہ کنگ ءُ بلوچ زرمبشت ءِ بگیری ءَ کار گرگ ءَ انت – باپ پاٹی جوڑ کنگ بیتگ ءُ سرجمیں بلوچستان ءَ دز ءُ ڈنگ بلوچ راجے سر ءَ مُشگ ءَ ھوار کتکاریں مردم ھما پاٹی زور ءَ یکجاہ کتگ انت بلے بلوچ راجی زرمبشت ءَ اے پندلاں چہ ھلاس کرت نہ کن انت –

جارکش ءَ گوشتگ کہ یو بی اے راست کنت کہ منگچر ءَ ھوار کلات ءِ دگہ دمگاں پاکستانی پوج ءُ چیریں ادارھانی گوشگے پد ءَ بلوچ سرمچارءُ زرمبشت ءِ بگیری داروکاں ھچ وڑ ءَ نہ بکش ایت – مئے کار بلوچستان ءِ آجوئی ءَ تاں برجاہ مان انت –

ٹی بی پی پتر ھال ءَ سر بیتگیں ھالانی رد ءَ بلوچستان ءِ دمگ کیچ ءَ پاکستانی پوج ءِ لشکر کشی برجاہ اَنت –

دی بلوچستان پوسٹ

لشکر کشی کیچ ءِ دمگ گروک ءَ بوگ ءَ اِنت اود ءَ پوج ءَ سَے روچ اِنت کہ راہ ءُ دربستگ ءُ لشکر کشی کنگ ءَ اِنت –

دمگی مردمانی رد ءَ کوھی دمگاں لھتے مردم پکنک ءَ شتگ اَنت پوج ءَ دزگیر کرتگ ءُ لَٹ ءُ کُٹ کنگ ءَ پد یلہ کرتگ اَنت-

دمگی مردمانی رد ءَ پوج ءَ پکنک ءَ رؤکیں سیزدہ سالی ئیں گونڈوے گپتگ ءُ بے کساس ءَ جتگ ءُ ژند ءُ پند کرتگ، لشکر کشی ءَ پوج ءِ کساس سَے سد ءَ برز گوشگ بیگ ءَ اِنت-

زانگ بہ بیت بولان، ھرنائی، آواران ءُ کوھلو ءَ ھم پوجی لشکر کشیانی ھال اتکگ اَنت –

سیاسی ءُ چاگردی مردمانی گوشگ اِنت کہ بلوچستان ءِ بازیں جاھاں پاکستانی پوج ءِ لشکر کشی ھمک روچ برجاہ اَنت ءُ مروچیگیں لشکر کشیانی بارہ ءَ پوج ءِ نیمگ ءَ تنی وھدی ھال دیم ءَ نیاتکگ اَنت –

کوھلو ءَ پوج ءِ لشکر کشی ءِ میان ءَ سلاہ بند ءُ پوج ءِ میان ءَ جنگ ءُ چوپانی ھال بیتگ –

بلوچستان ءِ دمگ ھاران، ھرنائی ءُ آواران ءَ پاکستانی پوج ءِ نیمگ ءَ لشکر کشی بندات کنگ بیتگ – دو مردم دزگیری ءَ پد ناشناسیں جاھاں برگ بیتگ اَنت –

گیشیں ھالانی رد ءَ ھاران ءَ ھواریں دمگ کلان ءَ پاکستانی پوج ءِ لشکر کشی برجاہ اَنت -کُلان ءَ لوگ پَٹ ءُ پول کنگ بیگ ءَ اَنت ءُ وڑ راہ ءُ دربند کنگ بیتگ اَنت –

چہ کُلان ءَ پوج ءَ دو مردم دزگیر کنگ ءَ پد ناشناسیں جاھاں برتگ اَنت ءُ آیانی پجار تنی وھدی نہ بیتگ اَنت –

ھمے وڑ ھرنائی ءِ کوھی دمگاں پوجی لشکر کشی برجاہ اَنت – زاوی ءُ کش ءُ گوراں جنگی بالگردانی بال ھم برجاہ بیتگ اَنت –

دمگی مردمانی رد ءَ زاوی ءُ کش ءُ گوری راہ ءُ در بند کنگ ءُ بیتگ اَنت – تنی وھدی پوج ءِ نیمگ ءَ لشکر کشی ءِ بارہ ءَ ھچ ھال دیم ءَ نیاتکگ اَنت –

زانگ بہ بیت گوستگیں روچاں ھرنانی ءُ بولان ءِ بازیں جاھاں پوج ءِ نیمگ ءَ بازیں اداراں مارٹر گولہ آس دیگ بیتگ اَنت –

چہ آواران ءَ سر بیتگیں رد ءَ پاکستانی زمینی پوج ءَ دراسکی، والی، تیرتیج، گواش سرجم ءَ انگر ءَ کرتگ ءُ لشکر کشی برجاہ اِنت –

پوج ءِ بازیں گاڑی ءِ کوھی دمگاں شتگ اَنت ءُ پند ءَ ھم بازیں لشکری ءِ لشکر کشی ءَ ھوار اَنت –

ھمے وڑ ءَ کوھلو ءَ پاکستانی پوج ءَ مروچی لشکر کشی بندات کرتگ، ھمے وھد ءَ پوجی کارندہ ءُ سلاہ بندیں مردمانی میان ءَ جنگ ءُ چوپ بیتگ –

دمگی مردماں ٹی بی پی ءَ گوں گپ کنان ءَ گوشتگ پاکستانی پوج ءَ کوھلو ءُ سبی ءِ میانی دمگ بیجی کور ءَ مروچی سھب ءَ پیش گامی کرتگ، بمبگواریں بالگرداں تیرگواری کرتگ ءُ چریشی ءَ پد پندی پوجی سر بیتگ اَنت –

لشکر کشی ءِ وھد ءَ پوج ءُ سلاہ بندیں مردمانی جنگ ءُ چوپانی ھال بیتگ اَنت بلے تنی وھدی ھردوکیں نیمگاں جانی ءُ مالی تاوانانی ھال نہ بیتگ اَنت –

وئیل ھب ءَ یک مردمے ءَ وتکشی کرتگ ءُ ڈیرہ مراد جمالی ءَ دو ٹکانی میان ءَ جنگ ءُ چوپ ءُ ھزدار ءَ دگ ءِ وئیلے ءَ شانزدہ مردم زدگ بیتگ اَنت-

ٹی بی پی پتر ھال ءَ سر بیتگیں ھالانی رد ءَ بلوچستان ءِ باپاری شھر ھب چوکی ءَ یک مردمے ءَ وتکشی کرتگ –

وتکشی ءِ وئیل ھب چوکی ءَ جام کالونی ءَ پیش اتکگ کہ اود ءَ آئی ءِ پجار ظھیر ء علی بکش ءِ نام ءَ زانگ بیتگ-

ایدھی ءِ بنشون ءِ رد ءَ ایدھی ءَ ھالانی سر ءَ بیگ ءَ جام کالونی ءَ یک مردمے درتکگیں جون دزکپتگ کہ آئی ءِ جون ایدھی ءَ چِست کرتگ ءُ سول نادراہ جاہ ءَ سر کرتگ –

ھمے وڑ ءَ ڈیرہ مراد جمالی ءَ نوتال ءَ دو ٹکانی میان ءَ زمینی جیڑھے ءِ سر ءَ تیرگواری بیتگ کہ چریشی ءَ یک مردمے بیران ءُ چار زدگ بیتگ اَنت –

گیشیں ھالانی رد ءَ نوتال ءَ بیجوانی جمالی ءُ سیال ٹک ءِ میان ءَ زمینی جیڑہ ئِے سر ءَ دو نیمگی تیرگواری بیتگ کہ چریشی ءَ طاھر سیال بیران ءُ گل مھمد سیال، بشیر اھمد سیال ءُ قمر دین سیال زدگ بیتگ اَنت –

دومی ٹک ءِ میف سنجر خان جمالی زدگ بیتگ، وئیل ءَ پد سیال برادری ءَ دگ بند کرتگ ءُ پولیس ءِ کارمند وئیل جاہ ءَ سر بیتگ اَنت –

ھزدار ءَ دگ ءِ وئیلے ءَ شانزدہ مردم زدگ بیتگ اَنت وئیل ءَ زدگ بیتگینانی تہ ءَ زالبول ھم ھوار اَنت-

وئیل ھزدار ءِ دمگ کراڑو ءِ نزیک ءَ پیش اتکگ کہ اود ءَ کوسٹر گاڑی ءِ وئیل ءِ آماچ بیتگ-

وئیل ءَ پنچ مردمانی جاور نگیگ گوشگ بیتگ اَنت کہ چریشانی تہ ءَ سَے زالبول ءُ دو مردینانی جاور نگیگ بیتگ اَنت بنداتی درمان ءَ پد کراچی ءَ برگ بیتگ اَنت –