TBP Balochi

بلوچی زبان ءِ شائر نور سلام نور ءِ شَیرانی اولی دپتر “ھانل اِنت زمین مِسکیں ” چاپ ءُ شنگ بیتگ –

نور سلام نور ءِ شَیرانی دپتر چہ زربار شنگکار مکران ءِ نیمگ ءَ چاپ ءُ شنگ بیتگ –

جار ءِ رد ءَ بلوچی زبان ءِ شائر نور سلام نور ءِ شَیرانی دپتر سِی ءُ یک جنوری دوھزار ءُ بیست ءُ یک ءَ چاپ بیتگ ءُ اے کتاب زربارشنگکار مکران ءِ باسکانی گور ءَ دست کپ ایت –

کتاب ءِ تہ ءَ نور سلام نور ءَ بلوچستان ءِ زیردستی ءُ بزگیں مھلوک ءِ توار شَیرانی رنگ ءَ کماتگ ءُ دیم ءَ آؤرتگ اَنت –

ھانل اِنت زمین مسکین ءِ پیشگال بلوچی زبان ءِ مزن نامیں لچہ کار منظور بسمل ءَ نبشتگ کرتگ ءُ شیرانی ستاہ مزنیں رنگے ءَ کرتگ اَنت –

پیشگال ءَ منظور بسمل ءِ گوشگ اِنت اے نور سلام نور ءِ شیرانی اولی دپتر کہ منی دیم ءَ اِنت اے وانگی ءِ تہ ءَ نور سلام نور ءَ ھما گپ ءُ ھیال شیرانی دروشم ءَ درنگاز کرتگ اَنت وتی درور وت اَنت –

پیشگال ءَ منظور بسمل ءِ گوشگ اِنت کہ نور سلام نور ءِ وانگی ءِ تہ ءَ آئی ءَ وتی گلامیں راج ءَ ھما سکین ءَ دنت کہ اے تھاریں شپ ءَ الم بانداتیں وشھالیں زندے گون اِنت –

پیشگال ءَ منظور بسمل ءِ گوشگ اِنت نور سلام نور ءِ وانگی ءِ تہ ءَ اے سما ھم کپ ایت کہ بلوچستان ءَ مروچی ھزارانی زالبول ءُ بیگواھیں مردمانی گوھار ءُ کھول دگانی سر ءَ ھرس ریچگ ءَ اَنت اشانی پدراھی ءُ ھرس گواریں ءُ گلامی ءَ درکپگ ءَ مزنیں سکینانی واھند اِنت –

بیگواھیں دین مھمد ءِ جنک سمی دین مھمد بلوچ ءَ شال ءَ بیگواھیں مردمانی کمیشن ءِ دیم ءَ پیش بیگ ءَ پد بیگواھیں مردمانی واستا جوڑ بیتگیں کمیشن بس نامے جوڑ بیتگ ءُ کھولانی گون ءَ کمک کنگ ءَ نہ اِنت –

سمی بلوچ ءِ گوشگ اَت منی پِت ڈاکٹر دین مھمد بلوچ بیست ءُ ھشت جون دوھزار ءُ نُھ ءَ پاکستانی چیریں ادارھاں زورانسری آوار جتگ ءُ بیگواہ کرتگ –

آئی ءَ گْوشت کہ وتی پِت ءِ سلامتی ءِ یلہ کنائینگ ءَ پاکستان ءِ سپریم کورٹ، ھائی کورٹ ءَ ھوار درسیں ادارھاں شتگ اَنگ بلے من ءَ ھچ انساپ نہ رس اِتگ –

آئی ءَ گوشت کہ چریشاں پد وھدیکہ پاکستان ءَ بیگواھیں مردمانی واستا یک کمیشنے جوڑ بیتگ گڑا من داں دوھزار ءُ چاردہ داں ھبدہ ءَ یکشل ءَ آئی ءِ دیم ءَ پیش بیتگ بلے یک رندے وانگی پرکاری ءِ سوب ءَ کمیشن ءَ پیش بیگ ءِ موہ نہ رس اِتگ گڑا آئی ءَ منی پت ءِ نام کمیشن ءَ چہ درکرتگ،چریشی ءَ پد دوبر پت ءِ نام کمیشن ءَ ھوار کنگ ءِ دزبندی کرتگ ءُ گوستگیں سال ءَ داں انیگ ءَ پنچ رند ءَ کمیشن ءِ دیم ءَ پیش بیتگ آں –

آئی ءَ گوشت کہ وھدیکہ من کمیشن ءِ پیشیاں من پیش بیتگ آں گڑا کمیشن ءَ بھانگ کرتگ ءُ گوشتگ کہ کیس ءِ رپورٹ سرجم نہ اِنت برے گوشتگ ئِے آفیسر اد ءَ نہ اِنت –

آئی ءَ گوشت کہ اے کمیشن ءَ آئی ایس آئی، ایم آئی پولیس ءُ دگہ ادارہ جاڑیگ اَنت ءُ اشانی رویش کھولانی گون ءَ ترند اَنت ءُ بیگواھیں مردمانی کھولانی گون ءَ اے ادارہ بے ھودیں رنگے ءَ دیم ءَ کاینت –

آئی ءَ گوشت من کمیشن ءَ را گوشتگ کہ من دوازدہ ادارانی سفر ءَ کن آں (شال) ءَ سر باں بازیں جیڑہ بنت من ءَ منی پت ءِ بارہ ءَ ھچ گپ گوشگ نہ بیت ءُ گڑا کمیشن ءَ گوشتگ تو مہ یا –

آئی ءَ گوشت کہ اے کمیشن بس نامے جوڑ بیتگ ھما رنگ ءَ پاکستان ءِ دگہ ادارہ ءُ انسانی ھکانی گل ھست اَنت اے ادارہ بس نامگپت اَنت –

آئی ءَ گوشت وھدیکہ اے کمیشن جوڑ بیتگ اشی ءِ تہ ءَ کھولانی گپ گوشدارگ نہ بنت اگاں اے کمیشن بیگواھیں مردمانی واستا جوڑ کنگ بیتگ گڑا گپاں تچک ءَ تچک گوش بہ دار اِیت –

زانگ بہ بیت بیگواھیں مردمانی یلہ کنائینگ ءِ واستا ھستیں کمیشن ھمے سال ءِ ھشت فروری ءَ بلوچستان ءِ بنجاھی شھر شال ءَ کیسانی پیشی ءَ کنگ اِنت – کمیشن وفاقی سرکار ءِ پرمان ءَ بیگواھیں مردمانی درگیجگ ءَ جوڑ کنگ بیتگ –

کمیشن ءِ سروکی ءَ بلوچستان ءِ ھائی کورٹ ءِ پیسریگیں جج جسٹس فضل الرحمن کنگ ءَ اِنت –

بلے بیگواھیں مردمانی کھول اے کمیشن ءَ سدک نہ اَنت ءُ آیاں جتاجتائیں وھداں کمیشن ءِ رویشانی سر ءَ وتی لیکھ درشان کرتگ اَنت –

گوستگیں روچ ءَ بی ایس او آزاد ءِ بیگواھیں رھشون شبیر بلوچ ءِ گوھار کمیشن ءِ پیش بیگ ءَ پد آئی ءَ گوشتگ منی برات پاکستانی سیکورٹی فورسز ءِ گور ءَ اِنت – شبیر آئی ءِ لوگبانک ءِ دیم ءَ آوار جنگ بیتگ – اگاں کمیشن ءِ تہ ءَ اینکس ساہ نیست کہ سیکورٹی ادارھاں شبیر ءُ دگہ بیگواھیں مردمانی بارہ ءَ جست بہ کنت ھدا ءِ نام ءَ مئے کیس ءَ ھراب مہ کنت ءُ اشی ءَ تچک ءَ بہ گوش ایت سیکورٹی ادارہ مئے گپ ءَ دلگوش نہ کن اَنت –

زانگ بہ بیت گوستگیں سال ءَ انسانی ھکانی باسک راشد ھسین ءِ مات کمیشن ءِ دیم ءَ پیش بیتگ ءُ آئی ءَ کمیشن ءِ رویشانی سر ءَ وتی لیکھ درشان کتگ اِت اَنت ءُ گوشتگ اَت کہ کمیشن ءِ سروک جسٹس فضل الرحمن ءَ کھولانی گون ءَ بے ھودیں رنگے ءَ دیم ءَ اتکگ-

آئی ءِ رد ءَ “وھدیکہ ما چہ آئی ءَ بیگواھیں مردمانی بارہ ءَ کمک لوٹ اِتگ گڑا کمیشن ءِ سروک ءَ گوشتگ من وھدیکہ اد ءَ پاد کایاں ڈن ءَ شمارا ھیرات ءِ زر دے آں ”

بیگواھیں مردمانی کھولانی رد ءَ ما وتی دوستگیں مردمانی یلہ کنائینگ ءِ واستا لاچاری ءِ سوب ءَ پیش بہ ایں گڑا “ کمیشن سرجم ءَ چیریں ادارھانی لَنکُکانی سر ءَ سُریت ءُ دروگ بندگ ءَ ابید دگہ ھچ نہ کنت ”-

وائس فار بلوچ مسنگ پرسنز ءِ رد ءَ گل ءَ دوھزار ءُ چاردہ ءَ کمیشن رد کرتگ، بیگواھیں مردمانی کھول وتی کیساں کمیشن ءَ برگ ءَ اَنت ءُ پیش بیگ ءَ اَنت بلے کمیشن ءِ کار ءُ کسب ھما رنگ ءَ نا اُمیتی اَنت –

بلوچستان ءِ تہ ءَ ایمنی ءِ نشانی بلوچانی درد ءُ گم ءُ بارود گواری گندیت آ ھم ھون، ارس گریوگ ءَ گندگ ءَ کاینت – ماما قدیر

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزارءُ دو سد ءَ نوزدہ روچ سرجم بوتگ-
ایچ آر سی پی ءِ سرکماش اسد بٹ، کمیونسٹ پاٹی ءَ چہ ڈاکٹت ریاض ءُ بزگرانی پاٹی ءِ سرکماش ازراہ سعید ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ ءِ رھشون ماما قدیر بلوچ گوشتگ کہ ھر نیمگ ءَ بچاریں آس ءِ تہ ءَ مردم سُچگ ءَ انت ، تپنگ، بمب گولھانی توارے تہ ءَ ھَسُکیانی توار گوشاں کپ ایت ، بلوچانی کپتگیں لاشانی تہ ءَ مات ءِ مھر، گھارانی گشان ءِ لمب، بلوچ ءِ جزبگ ءُ واھشتات ءُ واب درگان درگان ءَ گندگ بنت –

آئی ءَ دیمتر ءَ گوشتگ کہ بلوچستان ءِ تہ ءَ ایمنی ءِ نشانی بلوچانی درد ءُ گم ءُ بارود گواری گندیت آ ھم ھون، ارس، گریوگ ءَ گندگ ءَ کیت –

آئی ءَ گوشتگ کہ بلوچستان ءَ رسانکداراں اھوالکاری ءِ ھم موکل نیست، بلوچانی ھیال درشان کنگ ءَ ھم بندش انت بلے لھتے لاچانی زوروکیں رسانکدر ءُ اھوالکار ریاست ءِ جوڑ کرتگیں ھالاں شنگ کن انت –

ماما قدیر بلوچ ءَ گوشتگ کہ بلوچستان سلاہ بندانی ھوالگ ءَ کنگ بوتگ کہ دگانی سر ءَ بلوچانی ازت ءُ آبرو ءَ لگتمال کن انت ءُ ناشرکاریں ارشاں سرکاری لَڑ ایمنی ءِ نام ءَ دے اَنت –

مند سنگستان گنڈگ ءَ پاکستانی پوج ءِ پانگس ءِ سر ءَ اُرش کُتگ سَے پوجی کارمند کُشتگ اَنت – میجر گْوھرام بلوچ

سربوتگیں ھالانی رِد ءَ گوستگیں روچ ءَ سَے شمبے ءَ ناشناسیں سلاہ بندیں مردماں مند ءِ دمگ سنگستان کنڈگ ءَ برجاھیں پاکستانی پوجی پانگس ءِ سر ءَ اُرش کُتگ –

اُرش ءَ پاکستانی پوج ءَ جانی ءُ مالی تاوان رس اتگ، سلاہ بندیں مردم جنگجاہ ءَ در آیگ ءُ رؤگ ءَ سوبین بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرشے زمّہ واری من اتگ ءُ گوشتگ مئے سرمچاراں گوستگیں روچ ءَ سَے شمبے ءِ بیگاہ ءِ چار ءُ نیم ءَ کیچ ءِ دمگ مند سنگستان کنڈگ ءِ سر ءَ برجاھیں پاکستانی پوج ءِ پانگس ءِ سر ءَ دور جنگیں ءُ دگہ وتکاریں سلاھاں گون ءَ اُرش کُتگ-

جارکش ءَ گوشتگ پانگس ءِ سنگر ءِ تہ ءَ نشتگیں پوجی کارمند دورجنگیں توپک ءِ نشانگ کُتگ ءُ کُشتگ وھدیکہ پانگس ءِ تہ ءَ دگہ دو پوجی کارمند ترندیں اُرش نشانگ جوڑ بوتگ ءُ مرتگ انت، اُرش ءَ یک کارمندے ٹپی ھم بوتگ –

گڈسر ءَ میجر گْوھرام بلوچ ءَ گوشتگ کہ بلوچستان ءِ آجوئی ءَ تاں زورگیریں پوج ءِ سر ءَ مئے اُرش برجاہ مان انت –

سر بیتگیں ھالانی رد ءَ بولان ءِ دمگ بھاگ ءَ تھانہ ءِ ھد ءَ شھنشاہ قبرستان ءِ نزیک ءَ ناشناسیں سلاہ بندیں مردمانی تیرگواری ءَ یک مردمے بیران بیتگ –

گیشیں ھالانی رد ءَ بیران بیتگیں مردم ءِ پجار لیویز انچارج ھدابکش رونگھا ءِ چُک وزیر علی ءِ نام ءَ زانگ بیتگ –

وئیل ءَ پد پولیس سر بیتگ ءُ پولیس ءَ چَپ ءُ چاگرد انگر کرتگ اَنت –

چاگردی رسانکجاھانی ھالانی رد ءَ وزیر علی ءَ سَے تیر لگ اِتگ ءُ چریشی ءَ پد کھول ءَ آئی ءِ جون دگ ءِ سر ءَ ایر کرتگ ءُ زھرشانی بندات کرتگ –

کھول ءِ گوشگ اِنت کہ پولیس کوشکارانی زانگ ءَ ابید ھم آیانی پشت ءَ نہ کپگ اِنت ءُ چریشی ءَ آیاں دگ بند کرتگ ءُ دگ ءِ سر ءَ جون ایر کرتگ –

ھمے وڑ ءَ گوستگیں روچاں تیرگواری ءِ آسر ءَ سَے مردم بیران بیتگ اِت اَنت کہ آیانی تہ ءَ حمیف ساھبداد، جمیل ء ساھبداد ءُ ماجد اوغان جھمنند پسنی ھوار اِت اَنت –

مروچی پولیس ءَ ھرسئیں بیران بیتگیں مردمانی کوشکار دزگیر کرتگ اَنت –

پولیس ءِ رد ءَ پولیس ءَ پسنی ءَ وارڈ نمبر شش ءُ پنچ ءَ بیڑ برتگ ءُ اود ءَ کشندہ دزگیر کرتگ اَنت –

پولیس ءِ رد ءَ دزگیر کرتگیں مردمانی گور ءَ سلاہ ءُ گاڑی دستیگ کرتگ اَنت ءُ گپتگیں مردمانی پجار ناصر ء عمر، آصف ء عمر ءُ سلیم ء رفیق بنگالی ءِ ناماں زانگ بیتگ اَنت –

نبشتانک: ھُدا ءِ ھستی ءِ سما

نبشتہ کار: ھدایت بلوچ

دی بلوچستان پوسٹ

یک ماتے ءِ لاپ ءَ دو چُک ھست ات یکے ءَ چہ دومی ءَ جُست کُت تو اے مات ءِ لاپ ءِ زندگی ءَ رند دگہ آؤکیں زندگیانی سر ءَ اوست بستگ؟ دومی ءَ گُشت ، بلکل چہ اے زندگی ءَ رند یک نا یک زندگی یے ھست بوت کنت ما اد ءَ پہ ھما واست ءَ اھتگ اِیں کہ پہ دومی ءِ زندگی ءَ وت ءَ را ساجو بہ کن ایں۔

من ءَ باور نہ بیت اولی ءَ گُشت، نہ زاناں گڑا آ چونیں زندگی یے بیت دومیءَ گشت ، من نہ زاناں چونیں زندگی یے بس من ھمینچو زاناں یک زندگی یے ھست بوت کنت اود ءَ چہ اِد ئیگ ءَ شرتر رژنائی بیت بلکیں اود ءَ ما وتی پادانی سر ءَ گشت کنیں بلکیں ورگ چہ دپ ءَ وارت بوت کنت اود ءَ ھنچیں ھنچیں چیز بیت آ مئے ھیالانی تہ ءَ نہ انت۔

اولی ءَ کندگے جت ءُ گُشت اے چونیں اھمکیں ھبر انت کہ تو اش کنگ ئے؟ پادانی سر ءَ گردگ ءُ دپ ءِ سر ءَ ورگ ھچبر بوت نہ کنت مارا ھر چیز ءِ المّی بیت آ چہ ناپگ ءِ روتگ ءَ مارا رس اِیت اگاں اے ناپگ ءِ روتگ مہ بیت زندگی بوت نہ کنت دومی ءَ گشت ، من دگہ ھچ نہ زاناں بس ھمینچو زاناں اود ءَ ھرچیز کہ ھست چہ اے زندگی ءَ شرتر انت بوت کنت ما اود ءَ گوات ءِ تہ ءَ دم کشّگ ءِ سر ءَ زندگ بوت ایں-

اولی ءَ گشت ، بے مانائیں ھبر انت کہ تو اش کنگ ئے گوات ءِ ھبر ءَ ھچ مہ کن گوات ءِ تہ ءَ چوں بوت کنت ما وَ آپانی تہ ءَ ایں۔۔ بے آپ ءَ ھچ ما زندگ بوگ ءِ ھیال ءَ مہ کن ایں اگاں دگہ زندگی یے بوتیں گڑا یکے واپس اھتگ اَت مارا گُشتگ اِت ئِے کہ دیم ءِ زندگی چی یے؟بس تو ھمے بزان کہ زندگی ھمیش انت ءُ بس دگہ ھچ نیست-

دومیءَ گشت، من دگہ ھچ نہ زاناں بس ھمے سما بیت کہ اگاں وھدے اے زندگی ھلاس بوت گڑا اود ءَ ما گوں وتی مات ءَ دُچار کپ ایں ھما مئے ھست ءُ نیست بیت مارا رودین اِیت مارا چہ سکی ءُ سوریاں رکین اِیت اولی ھیران بوت ءُ گشت ئِے ، تو زاناں مات ءِ ھستی ءِ منوّک ئے؟اگاں مات ھست انت گڑا کُجا اِنت؟-

دومیءَ گشت ، من ءَ سما بیت مات مئے چاریں نیمگ ءَ انت مات ھست انت کہ ما ھست انت بے مات ءَ اے زند ءُ آ زند ھچ بوت نہ کنت اولی منوّک نہ بوت ءُ گشت ئِے ، اگاں مات بوتیں گڑا ما دیستگ اَت گوں ما گپ ئِے جتگ اَت وت ءَ را چہ ما چیر ئِے نہ داتگ اَت اگاں مات بوتیں مارا چو تھنائی ءَ یلہ ئِے نہ داتگ اَت من ھمے سرپد باں مات نیست اے ھنچائیں گپ اَنت کہ تو اش کنگ ئے۔

دومی ءَ پسو دات ، برے برے ما بے توار بہ ایں مات ءِ ھستی ءِ سما بیت کہ واکی ماتے است مارا اے دیم ءُ آدیم ءَ سُرین اِیت مارا آرام دنت مارا سک دوست دار اِیت منی مڑاہ دار ءُ واجھیں سنگتاں گپ بس ھستی ءِ سما بوگیگ انت۔

بس ھمے ھال مئیگ ءُ مئے ھزار مات ءَ چہ گیشتر دوست داروکیں مھروانیں واجہ ھدا ئیگ انت کہ مارا جوڑ ئِے کُرتگ مارا واجہ ھدا ءِ ھستی ءِ سما ءُ یکین بہ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ایرانی پولیس ءَ یک گاڑی ءِ دست داتگ گاڑی نہ اوشتاتگ چریشی ءِ آسر ءَ ایرانی پولیس ءَ آئی ءِ سر ءَ تیرگواری، تیرگواری ءِ آسر ءَ گاڑی چپ بیتگ ءُ زالبولے ءَ ھوار سَے کس بیران بیتگ اَنت-

سر بیتگیں ھالانی رد ءَ روکپتی بلوچستان ءِ دمگ بندر عباس ءَ ایرانی پولیس ءِ تیرگواری ءَ یک زالبولے ءَ ھوار سَے کس بیران بیتگ اَنت ءُ دو زدگ بیتگ اَنت –

اھوالکار ءِ رد ءَ بندر عباس ءِ دگ ءَ ایرانی پولیس ءَ راہ بستگ ءُ یک سواری گاڑی دست داتگ کہ چریشی ءَ سواری گاڑی نہ اوشتاتگ ءُ پُشتی ءَ ایرانی پولیس ءَ آئی ءِ سر ءَ تیرگواری کرتگ –

ایرانی پولیس ءِ تیرگواری ءَ گاڑی ءَ دگہ یک گاڑی ءَ گوں ٹکر وارتگ ءُ چپ بیتگ چریشی ءِ آسر ءَ گاڑی ءَ سواریں یک زالبولے ءُ دو مردین بیران بیتگ اَنت دومی گاڑی ءَ سواریں دو کَس زدگ بیتگ اَنت –

دمگی مردمانی گوشگ اِنت ایرانی پولیس شھرانی تہ ءَ کورکائی تیرگواری مہ کنت چریشی ءَ لس مردمانی زندگیاں تاوان ھم بیت کنت –

آیانی گوشگ اِنت اگاں کسے ءِ سر ءَ پولیس ءَ شک اِنت گڑا آئی ءِ رندگیری ءَ بہ کنت چوش تیرگواری مہ کنت ءُ مردماں تاوانبار مہ کنت-

بلوچستان ءِ دمگ چہ مستونگ ءَ دزگیری ءَ پد بیگواہ بیتگیں دو مردم مروچی یلہ بیتگ اَنت ءُ وتی لوگاں سر بیتگ اَنت – کھول ءَ ھردوکیں مردمانی یلہ بیگ راست کرتگ اَنت –

گیشیں ھالانی رد ءَ پنچ سالاں بیگواہ بیتگیں اختر شاہ ء نور شاہ ءُ چہ مستونگ ءَ ھشت سالاں پوج ءِ دست ءَ بیگواہ بیتگیں نور اللہ ء جان مھمد یلہ بیتگ اَنت –

زانگ بہ بیت گوستگیں لھتے روچاں چہ بلوچستان ءِ جتا جتائیں جاھاں زورانسری آوار جنگ بیتگیں بیست مردماں گیش یل بیتگ ءُ وتی لوگاں سر بیتگ اَنت، یل بیتگیں مردم بلوچستان ءِ جتا جتائیں ھندانی نندوک بیتگ اَنت –

دومی نیمگ ءَ بلوچستان ءَ بیگواہ بیتگیں مردمانی توار چست کنوکیں گل وائس فار بلوچ مسنگ پرسنز ءِ رد ءَ بلوچستان ءِ بازیں جاھاں پوجی لشکر کشی ءُ دگہ مردماں دزگیر کنگ ءُ بیگواہ کنگ ءَ اَنت –

ھمے وڑ ءَ بیست ءُ نُھ اگست دوھزار ءُ سیزدہ ءَ لدھا مستونگ ءَ بیگواہ بیتگیں لیویز کارمند سعید اھمد ءِ بیگواھی ءِ ھلاپ ءَ ڈی سی کارگس ءِ دیم ءَ نندانک جتگ ءُ نشتگ اَنت –

بیگواھیں لیویز کارمند ءِ گوھار ءِ گوشگ اِنت برات ءِ بازیں سالاں بیگواھی ءِ سوب ءَ مئے کھول مازگی جیڑگانی آماچی ءِ ھوار بازیں مشکلانی آماچ اَنت،مروچی ڈی سی مستونگ ءِ کارگس ءِ دیم ءَ زھرشانی کنگ ءَ اِنت دانکہ مئے توار ءَ گوش بہ دار اِیت ءُ مارا انساپ ءِ دیگ ءَ کرد ءَ پیلو بہ کنت –

نبشتانک: فرانز فینن پرچہ وانَگی اِنت

نبشتہ کار: عبدالمتین بلوچ

دی بلوچستان پوسٹ

فرانز عمر فینن، ابراھیم فرانز فینن، یک تب زانت ءُ سیاسی شَھزانتے بیتگ، واجہ ءِ سیادی بندرءَ چہ فرانسءِ زیردستیں زروان مارٹینیکءَ انت۔ فینن زیردستیں راجانی تب ءُ میلانی وانوکے ءُ مارکسی لیکہءِ منوگرے بوتگ۔

چہ فیننءِ وانَگءَ پد ترا سما بیت، جنگ ءُ آشوب چی انت زوراک کئے اِنت ءُ کئے زُلمءِ آماچ اِنت. فیننءِ وانَگءِ وشی ایش انت فینن گپّ ءَ تچک کَنت ءُ گُش اِیت۔ پہ درور فینن ءِ کتاب (افتادگانِ خاک) ماں اردو ءَ یا ھمے وانَگیءِ اِنگریزیءَ رجانک (The Wretched of the Earth) وانَگ کپیت۔ اے کتاب بنداتءَ ماں فرنچ زُبان ءَ نبیسگ بیتگ ءُ اِیشی ءَ را گوگل کارمرز کنوکیں دگنیا ءِ کتاب دوستاں شریں وانَگی یا (گُڈ ریڈز) (Good Reads) ریٹینگ تہا (4.2/5) اِینکس ریٹ کُتگ ءُ گوگل سرچ انجن ءِ کارمرز کنوکیں %91 مردماں اے کتاب وَنتگ۔ بائید ما شُما هم بے بہر مہ بئیں۔

فینن پرچہ ؟
فیننءِ وانَگءَ پَد ترا نوکیں لیکہ یے رَسیت کہ آ “فینن اِزم” نام ءَ چہ زانگ بیت، فینن اِزم چی یے؟ اے ھما لیکہ اِنت کہ ترا گوشیت دُگنیاءِ ھر کجا کہ زلم ءُ زوراکی یے ماں ایردستیں راجانی سرا بوگءَ آھانی ھلاپءَ پاد آھگءِ سکینءَ دنت۔ فینن گش ایت کہ دُراھیں اِنسان یک برابر انت ءُ اِیشی ءَ ھوار فینن طبقات یا نسل پرستیءَ تُرندی ءَ گوں اِیر جنت ءُ فینن ترا ڈالچار کنت تو وتی لگتمالی، گُلامی ءُ بزگیءَ بہ مار ، فینن ترا بے چاڑ کنت ءُ ترا راستی ءَ گوں دیم پہ دیم کنت، آ اے وَڑ ءَ کہ فینن یکے زوراک ءُ دومی زُلم آماچیں مہلوک ایردستانءَ گِیشّینیت ءُ درجہ بندی کنت، فینن ءِ اے درجہ بندیءِ تہا وتی لیکہ ءَ ابید کارل مارکس ءِ لیکہ ءَ ھم ھوار گیج اِیت۔
وشیءِ گپ اِیش اِنت فینن وتی کارستاں گُوں گیشی نہ کنت، چوشکہ جاھے فینن وتی کتاب (افتادگان خاک)ءِ اردو رجانک تہا گُشیت “کوئی شخص بھی خواہ وہ رہنما ہو یا کارکن حقیقت کو چھپا نہیں سکتا۔ مقامی رجحانات میں حقیقت کی تلاش اجتماعی مسئلہ ہوتی ہے۔ بعض لوگ تجربے سے مالامال اور اپنے خیالات کی وضاحت میں تیز ہوتے ہیں اور ماضی میں زیادہ زہنی رابطے قائم کرچکے ہوتے ہیں۔ اس کے باوجود اُنھیں عوام کو نظر انداز کرنے سے احتراز کرنا چاہئیے۔ کیونکہ ہر فیصلے کی کامیابی کا انحصار تمام عوام کی مشترکہ اور شعوری کوشش پر ہوتا ہے، اس صورت حال سے کوئی بھی صاف بچ کر نہیں نکل سکتا۔ ہر شخص کو یا تو موت کے گھاٹ اُتار دیا جائے گا یا اذیت دی جائے گی اور آزاد قوم کے پورے ڈھانچے میں ہر شخص بھوکا رہے گا اورہرشخص قیمتوں کے گرنے سے مصیبت میں مبتلا ہوگا۔ اجتماعی جدوجہد کے لئے نچلی سطح پر اجتماعی ذمہ داری اور بالائی سطح پر مجلس نمائندگان کی ذمہ داری ہوگی۔ بلاشبہ اجتماعی فلاح و بہبود کی جنگ میں ہر شخص کو شامل کرنا ہوگا۔کسی شخص کا ہاتھ مکمل طورپر صاف نہیں ہوتا۔ اس صورت حال میں نہ توکوئی معصوم ہوتا ہے اور نہ تماشائی۔ ہم سب کے ہاتھ آلودہ ہوتے ہیں۔ ہم سب انہیں اپنے ملک کی دلدلوں اور اپنی خوفناک خالی الذہنی میں آلودہ کرتے رہتے ہیں۔ ایسی صورت حال میں ہر تماشائی یا بزدل ہوتا ہے یا غدار۔ “

فینن اِسپیت ءُ سیاہ ءَ تئی دیما ایر کنت ءُ ترا گُشیت بِزاں پہ تو کئے شر انت ءُ کئے ھراب، اے شَر ءُ ھراب تہا فینن کالونائزر یا گلام داروکیں تَب ءُ نفسیات ءَ ترا گُشیت، پدا ترا شِیوّار کنت کہ کالونائزر چون ترا بَبا دنت ءُ رد دنت، فینن ترا نیکراہ ءِ کارمرز کنوکیں مزھبی دُز، راجی سوداگریں پارٹیز ءُ آوانی طریقہ واردات یا ڈُنگی، لبزانکی شُودیگ یا لبزانک ءَ پہ لاپ کارمرز کنوک، راجی جُنز یا چِست بِیتگیں گلامی ءِ هلاس کنوکیں آشوبی جُنز ءَ چُونی ءَ مانگیشین اَنت ءُ جُنز ءَ چُون کاؤنٹر کن اَنت، فینن تئی پدمنتگی ءَ ترا جاه پہ جاه مارگ ءَ پرمائین ایت ءُ ترا سِنچ دنت ءُ گْوشیت دوست ءُ دژمن کئے اَنت، بدیں کارستاں فینن شَر اِیر جنْت ءُ گوں لبزاں اے دُراھیناں فینن شَر لَٹ ءُ کُٹ کنت بلے دومی نیمگ ءَ اے کرداراں گِیشینَگ ءَ پد ترا سرپدی هم دَنت ءُ گُشیت گلامیں چاگِرد ءَ آشوب تہا اَڑاند چون زانَگی انت فینن جیڑہ ءِ جِند ءَ ترا گُشیت کہ آ تئی راجی گلامی اِنت نہ تہنا نیکراہ ءُ مزھب، پہ درور مئے چاگِرد ءَ اگاں ماں نیکراھی لیکہ ءِ ھساب ءَ گوں بجن ءُ بہ شوهاز انت گُڈا مئے گَور ءَ چندے سہرا اِیں کِرد گِندگءَ کیت فینن ترا گُش اِیت : درباری ملا آنی کِرد چی اِنت ءُ واجہ مولانا عبدالحق بلوچ وڑیں راج دوستیں ملا ءَ آنی کِرد چی اِنت پہ راج ءَ، چُشکہ واجہ مولانا عبدالحق بلوچ وتی یک مشہوریں آرٹیکلے ءِ تہا گُشیت کہ آ روتاک انتخاب کوئٹہ ءَ 24 ستمبر سال 2014 ءَ چاپ بیتگ واجہ اے آرٹیکل تہا درائین اِیت ءُ زوراکیں تاکتاں پہ ڈاہ توار جنت ءُ گُشیت “تبائی کی اس صورتحال سے اس مخلوق کو بچانے اور نکالنے کے لئے ایک ملک گیر مزاحمتی تحریک کی ضرورت ہے جو اس ملک کی بے لگام قوتوں کو لگام دے کر غریبوں کو ان کی دست برد سے بچائے” فینن ءِ وانَگ ئے یا کہ فینن اِزم ءِ لیکہ ءِ دِگہ یک وشی یے اِیش انت کہ فینن تنگ نظرے نہ یے، فینن گِیشیتگیں کِرداں ساڑا اِیت ءُ ما گیشیتگیں یا دُو پوستیں کرداں یک کِر کنت ءُ تئی چماں پَچ کَنت ترا اُوپار ءُ سرپدی دنت. استیں جاوراں پہ دیما جُنزگ ءَ فینن درونتی شون ئِے باید ما وت ءَ بے بہر مکن انت اے پنتیں درونت ءَ چہ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پنجگور ءَ ڈیتھ اسکواڈ کارمند صبیر تیرگواری کتگ ءُ کُشتگ، صبیر بلوچ پُسّگانی بیگواہ کنائینگ ءُ شھید کنگ ءَ پاکستانی پوج ءِ گون ءَ تچکی ءَ ھوار بوتگ – بیبگر بلوچ

دی بلوچستان پوسٹ

سربوتگیں ھالانی رِد ءَ بلوچستان ءِ دمگ پنجگور ءَ ناشناسیں سلاہ بندیں مردماں گوستگیں روچ ءَ عیسیٰ ءِ میتگ ءَ یک مردمے تیرباران کُتگ کُشتگ-

کشتگیں مردم ءِ پجار صبیر نام ءَ بوتگ، ھمے گوشگ بوگ ءَ انت کہ اے مرد پاکستانی پوج ءِ جوڑ کرتگیں ٹولی ڈیتھ اسکواڈ ءِ کارمندے بوتگ-

دومی نیمگ ءَ بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ آئی ءِ کوش ءِ زمّہ واری منّ اِتگ ءُ گوشتگ کہ مئے سرمچاراں گوستگیں روچ ءَ پنجگور دمگ عیسیٰ ءَ ڈیتھ اسکواڈ ءِ کارمند صبیر ءِ سر ءَ تیر گواری کُتگ ءُ کُشتگ -اے کارمند ءَ بازیں سالاں بلوچ پُسّگانی بیگواہ کنگ ءُ شھیدی ءَ دمگی ڈیتھ اسکواڈ ٹولی ءِ ھمراہ بوتگ-

جارکش ءَ گوشتگ کہ ما یکرندے پد ءَ گوں بلوچ ورنایاں دزبندی کن ایں کہ آ اِستانی چریکانی گپ آں میا اَنت ءُ بلوچ جُنز ءِ بگیری ءَ کارمرز مہ بنت- زورگیر پہ وتی اَدارُکی نَپ ءُ سیت ءَ ورنایاں اَدارُکی لَب ءُ ملام دیگ ءَ اَنت ءُ جُنز ءِ بگیری ءَ سنگر بند کنگ ءِ بے سوبیں جھد ءَ دزگٹّ اَنت- ما کؤل کنیں کہ ریاستی اے مَکر ءُ ھنراں گوں مھکمی ءَ بے سوب کن ایں-

جارکش بیبگر بلوچ ءَ گشتگ کہ گوستگیں روچ ءَ ریاستی کارمند ءِ کوش ءَ پد پولیس ءَ مئے سرمچارانی رَند گیری کتگ- ما پنجگور ءِ پولیس ءَ یکبرے پد ءَ مکن کن ایں کہ دوبر چوشیں رَدی مہ کنت اگاں ناں آھانی بگیری ترندیں گامگیج زورگ بیت اِنت –