TBP Balochi

سر بیتگیں ھالانی رد ءَ بلوچی زبان ءِ نامداریں گشندہ عبد اللہ ثناء گوستگیں شپ ءَ کراچی ءَ بیران بیتگ –

گیشیں ھالانی رد ءَ عبد اللہ ثناء گوستگیں بازیں وھداں جگر ءِ نادراھی ءِ آماچ بیتگ ءُ آ کراچی ءَ پہ جاندراھی ءِ ھاتر ءَ برگ بیتگ ءُ گوستگیں شپ ءَ آ کراچی ءَ یک نادراہ جاھے ءَ بیران بیتگ –

عبد اللہ ثنا بلوچستان ءِ نامداریں گشندھانی لڑ ءَ ھوار بیتگ ءُ کساس بیست ءُ پنچ پیت بند آئی ءِ دیم ءَ اتکگ اَنت-

عبد اللہ ثناء بلوچستان ءَ ھوار درملک، عرب امارات، عمان ءُ بھرن ءَ ھم پہ بلوچ گشندھی ءَ برگ بیتگ ءُ اشاں ھوار رودراتکی ءُ روکپتی بلوچستان ءِ بازیں جاھاں ھم پہ گشندھی مراگشاں شتگ ءُ آئی ءَ وتی ازم ءِ گشندھی گوشتگ –

عبداللہ ثنا ءِ بیرانی ءِ سر ءَ چاگردی رسانکجاھاں بلوچ مھلوک ءِ نیمگ ءَ پدردی درشان بیگ ءَ اِنت ءُ عبد ثناء بلوچستان ءَ نامداریں گشندھانی پیم ءَ گوشدارگ بیتگ ءُ آئی ءَ بلوچی زبان ءِ پڑ ءَ وتی ازمکاری گشندھی ءَ کرتگ –

نیشنل پاٹی ءِ بنجاھی کلانی کسان کمک سرکماش سنیٹر میر کبیر مھمد شھی ءِ سروکی ءَ پاٹی ءِ باسکاں بیگواھیں بلوچانی کھولانی نیمگ ءَ نیشنل پریس کلب ءِ دیم ءَ زھرشانی بنجل ءِ تر ءُ تاب کرتگ ءُ کھولانی گون ءَ پدردی درشان اِتگ –

باسکاں تہ ءَ نیشنل پاٹی ءِ بنجاھی رھشون سنیٹر اکرم دشتی، بنجاھی زالبول سیکریٹری یاسمین لھڑی، اُستانی چاگردی رسانکدری سیکریٹری سعد دھوار، بنجاھی پتر ءِ باسک ملک نذیر اعوان، اُستانی سیکریٹری فنانس پنجاب وحدت فرخ، مختار چھلگری ءَ ھوار دگہ ھوار بیتگ اَنت –

ھمے وھد ءَ سنیٹر کبیر مھمد شھی ءَ رسانکدراں گوں گپ کنان ءَ گوشتگ کہ مزن نامیں واکداریں زور چہ بنداتی روچ ءَ بلوچستان ءِ جیڑہ ءَ بدبھتی ءَ تاکت ءُ زور ءِ سر ءَ ھلاس کنگ اش لوٹ اِتگ چریشی ءِ سوب ءَ بلوچستان ءِ جیڑہ بس گشینتگیں جیڑہ ئِے ءُ یک سیاسی بنادی ءُ اشی ءِ گیش ءُ گیوار بس سیاسی تب ءَ الکاپیں رنگے ءَ گپ ءُ تران اِنت گیش دیر روان اِنت داں انوگ ءَ بلوچستان ءَ سدانی کچ ءَ ورناہ زورانسری آوار جنگ ءُ بیگواہ کنگ بیتگ اَنت ءُ بازیں کَچے ءَ زانگول کرتگیں جون دزکپتگ اَنت ءُ اشانی دزکپگ ءُ لڑ تنی وھدی برجاہ اَنت ھمے سوب ءَ مروچی کھول یک لاچاریں رنگے ءَ گیمرتگیں دیمے ءَ گوں زھرشانی بنجلاں نندگ ءَ لاچار اَنت ءُ وتی جگر ءِ ٹکرانی شوھاز ءَ جد ءُ جھد کنگ ءَ اَنت -بیگواھیں مردمانی کھول یک ترندیں گم ءُ مازگی گنوکیانی دیمپان اَنت پیریں پِت وتی ورنائیں بچے واستا، چُک وتی پِت ءِ واستا، گوھار وتی برات ءِ واستا، زال وتی لوگ واجھانی واستا بے وسی ءِ راہ ءَ چاران اَنت ءُ گیمرتگیں چم نز بیان اَنت – نِی اے جیڑہ ءَ بلوچستان پوناتگ ءُ سندھ ءُ ھیبرپختون خواہ ءَ سر بیتگ –

نیشنل پاٹی بنداتی روچ ءَ اے بنیادی انسانی ھکانی سر ءَ توار چِست کنگ ءَ اِنت ءُ مروچی ھم اے گپ ءِ سدکی ءَ دار اِیت دانکہ ڈیھ ءِ سازمان وتی شھرانی پھریزگ ءَ کانود ءُ کانودارانی ءَ رژنائیں نیار اِیت ءُ اے ڈیھ دیم ءَ شُت نہ کنت – ھمے درچ ءَ نیشنل پاٹی ءَ وتی سرکار ءِ وھد ءَ بلوچ رھشوناں گپ ءُ تران بندات کرتگ بدبھتی ءَ اے وھد سرجم نہ بیتگ ءُ وھد ھلاس بیتگ، ما دزبندی کن ایں دراھیں بیگواھیں مردماں اگاں کجام جرمے ھست گڑا آ آرگ ءُ ڈیھی رھبند ءُ کانود ءِ چیر ءَ آرگ بہ بیت ءُ پیش کنگ بہ بیت، نیشنل پاٹی بیگواھیں بلوچانی واستا جتگیں بنجل ءُ آیانی لوٹ ءِ پلامرزی ءَ کنت ءُ کھولانی گون ءَ پدردی درشان کنت –

بیگواھیں مردمانی کھولاں اسلام آباد ءَ نیشنل پریس کلب ءِ دیم ءَ زھرشانی بنجل برجاہ داشتگ – زھرشانی نندانک ءَ بلوچستان ءِ جتا جتائیں جاھاں بندوکیں بیگواھیں مردمانی کھول ھوار اَنت –

بیگواھیں مردمانی کھول گوستگیں روچ ءَ اسلام آباد ءَ سر بیتگ ءُ اود ءَ آیاں زھرشانی بنجل بندات کرتگ – وائس فار بلوچ مسنگ پرسنز ءِ سروک نصر اللہ بلوچ ھم زھرشانی ءَ ھوار اِنت –

بیگواھیں مردمانی کھولانی گوشگ اِنت آ بیگواھیں مردمانی کھولانی واستا برجاہ کرتگیں کمیشن ءِ رویش ءُ کار ءُ کساباں ھوار بازیں سالاں بیگواھیں مردمانی بیگواھی ءِ سر ءَ زھرشانی ءَ یاداشت کنگ ءَ اِیں –

گوستگیں روچ ءَ کھولاں پریس کلب ءِ دیم ءَ زھرشانی بنجل ءِ دیم ءَ زھرشانی ننداک ءِ جنگ ءَ پیسر پولیس ءِ نیمگ ءَ جیڑہ ودی بیتگ اَنت چریشی ءَ پد جیڑہ گش اِتگ ءُ کھولاں زھرشانی بنجل برجاہ داشتگ –

پشتون تھپز مومنٹ ءِ رھشون ءُ راجمان پتر ءِ باسک مھسن داوڑ، نیشنل پاٹی ءِ سینیٹر اکرم دشتی، پشتونخواہ ملی عوامی پاٹی ءِ سینٹر عثمان کاکڑ ءُ نامی ئیں اھوالکار ھامدمیر ءَ بنجل ءِ تر ءُ تاب کرتگ ءُ کھولانی گون ءَ پدردی درشان اِتگ –

مھسن داوڑ ءَ ھمے وھد ءَ گوشت کہ بیگواھیں بلوچانی کھولانی بنجل ءِ پتر لگت داتگ کہ اے وتی لوگاں چہ دور دراتکگ ءُ اد ءَ سر بیتگ اَنت اشانی لوٹ اِنت مارا گوشگ بہ بیت اشانی مردم زندگ انت یا کُشگ بیتگ اَنت –

مھسن داوڑ ءَ گوشت کہ زورانسری اوار جنوک مجرم گوشگ بہ بنت، ما اے کارپدانی بگیری ءَ وتی جد ءُ جھد ءَ برجاہ داریں – نیشنل پاٹی ءِ اکرم دشتی ءَ گوشت کہ دراھیں سیاسی باسک یلہ کنگ بہ بنت اگاں کسے ءَ جرمے کرتگ یا آئی ءِ سر ءَ بھتامے ھست گڑا آمیدگساں پیش کنگ بہ بیت –

وائس فار بلوچ مسنگ پرسنز ءِ چیئرمین نصر اللہ بلوچ ءَ ٹی بی پی ءَ گوں گوشتگ کہ بیگواھیں مردمانی کھولاں یک اُمیت ءِ زرتگ ءُ اسلام آباد ءَ اتکگ اَنت بیت کنت وفاقی سرکار، سروزیر ءُ ادارہ گپاں دلگوش بہ کن اَنت ءُ انسانی ھکانی گل کھولانی گپاں دنیا ءَ سر بہ کن اَنت –

نصر اللہ بلوچ ءَ گوشت کہ مئے لوٹ ھمیش اِنت زورانسری گار ءُ بیگواھی ءِ کار ھلاس کنگ ءُ اے جیڑہ کانودی رنگ ءَ گیش ءُ گیوار کنگ بہ بیت –

بیگواھیں مردمانی واستا کمیشن ءِ کارانی سدگ نہ اَنت آیانی گوشگ اِنت کمیشن پیشیانی وھد ءَ بس وتی وھد ءَ تیلانک دیگ ءَ اِنت چریشی ءَ پد کھول ھمے بھتام ءَ جنگ ءَ اَنت کمیشن پیشیانی وھد ءَ رنگ رنگیں پندل ءُ رپینگاں آیاں زلیل کنگ اِنت ءُ ھروھد ءَ چم دیتگیں گواھانی نام ءِ سر ءَ دیم ءِ رمس ءَ دیگ ءَ اِنت –

اسلام آباد ءَ دومی روچ ءَ زھرشانی بنجل برجاہ نصر اللہ بلوچ ءِ رد ءَ کمیشن ءِ ھکیگیں مول ءُ مراد زورانسری آوار جنگ بیتگیں مردمانی یل کنائینگ اِنت کمک ءَ ھوار ھواریں مردمانی بارہ ءَ گپانی دیم ءَ آرگ بیتگ بلے سال دوھزار ءُ دوازدہ ءَ کمیشن بس نام ءِ پیشی بیگ ءَ اَنت، کجا ھم یک مردمے یلہ بیت کمیشن بس آئی ءِ یلہ بیگ ءِ نام ءَ نبشتگ کنت ءُ کیس ءَ گار کنت –

دی بلوچستان پوسٹ ءَ بیگواھیں مردمانی کمیشن ءِ بارہ ءَ بلوچ نیشنل مومنٹ ءِ بنجاھی انپارمیشن سیکریٹری دلمراد بلوچ ءَ گوں گپ ءُ تران کنان ءَ آئی ءَ گوشت پاکستان ءَ کمیشنانی یک راجدپترے ھست کہ حمودالرحمان ءَ کمیشن ءَ بندات بیت اِنت – مروچیگ ءَ داں کجام کمیشنے ءِ شریں کار کنگ ءِ وتی جاہ ءَ بلکیں آ شنگ ءُ تالان ھم نہ بیتگ اَنت -گڑا گپ بلوچستان ءِ کیت کمیشن ءِ بے مانا ءُ ھشکیں نام ءَ ابید دگہ ھچ پشت نہ کپ ایت –

دلمراد بلوچ ءَ گوشت کہ وھدیکہ ھزدار ءَ گاریں گور دزکپ اَنت گڑا جسٹس مسکان زئی ءِ سروکی ءَ کمیشن ءِ بندات کنگ بیتگ – اے کمیشن ءَ ریاست رکینتگ ءُ شفیق مینگل ءُ زمہ دار گوشتگ – دومی نیمگ ءَ مروچی ھم شفیق مینگل سر ءِ بازار ترگ ءَ اِنت بلکیں آ گوستگیں گچینکاری ءِ بھر مند بیتگ –

دلمراد بلوچ ءَ گوشت کہ بیگواھیں مردمانی کمیشن بس یک گالے دانکہ میان اُستمانی برادری یا میان اُستمانی ادارھاں پیشدارگ بہ بیت ریاست انسانی ھکانی ناوشیں جاورانی شر کنگ ءِ جد ءُ جھد ءَ کنگ ءَ اِنت -اے کمیشن ءَ تچکیں کار بس ریاست ءِ جنگی جاورانی چیر دیگ اِنت ءُ اے درستیں کاراں ریاست ءِ جنگی کارپداں بے میار کنگ ءُ ساپ ءُ سلوہ شودگ اِنت –

آئی ءَ گوشت کہ اے وتگڑیں کمیشن ءَ بیگواھیں مردمانی یل کنگ وتی جاہ ءَ، بیگواھیں مردمانی کھولاں کمشرپ کنگ اِنت – آیانی گپانی گوشدارگ ءَ ھم تھمبل نہ کش اِت – مارا اے کمیشن ءَ ھچ وڑیں امیت نیست اِنت – ما سرپد بہ ایں اے دراستیں ھنر ءُ ٹگی ریاست ءِ بدیں کردانی چیر دیگ ءَ بیگ ءَ اَنت ءُ اشی ءِ ھچ آسر نہ بنت –

اسلام آباد ءَ زھرشانی ءِ بارہ ءَ دلمراد گوشگ اِنت اسلام آباد پرچاکہ اسلام آباد پاکستان ءِ بنجاھی راجدانی اِنت، اود ءَ ڈیھانی سپارت ھانہ ءُ میان اُستمانی رسانکدر جاڑیگ اَنت ھمے واستا بیگواھیں مردمانی کھول ھمک چندے سالاں پد اسلام آباد ءَ رو اَنت ما درست گواہ اِنت اود ءَ ھُشکیں دستاں کاینت – پرچاکہ پاکستان ءِ دراھیں ادارہ بلوچستانی آوار جنگ ءُ بیگواھی ءِ سر ءَ بے توار اَنت – اسلام آباد ءَ دمگی ءُ میان اُستمانی رسانکدرانی بنجل زانگ بیت اِنت بلے بلوچستان ءِ بارہ ءَ گپ جنوک ءُ نبشتگ کنوکاں درستاں بندشی اِنت – اگاں کسے ھمت بہ کنت گڑا ڈیکلان واش ءِ رنگ ءَ شپ تھاری ءَ ھوٹل ءَ دور کن اَنت پاکستان ءِ یل کنگ ءِ بارانی چنک ءِ ساجو کنگ ءَ گوش اَنت یا ھامد میر ءِ رنگ ءَ تیرانی نشانگ کنگ بیت اِنت – ھامد میر ءَ بیگواھیں بلوچانی بارہ ءَ وتی ٹاک شو ءَ یک پروگرامے ءِ سوب ءَ مروچی ھم دو تیراں وتی جسم ءَ سمب ءِ یاتاں کنگ اِنت –

اسلام آباد ءَ بیگواھیں مردمانی کھولانی زھرشانی دومی روچ ءَ ھم برجاہ اِنت چریشی ءِ سر ءَ جتا جتائیں پھناتاں بندوکیں مردمانی رؤ آ برجاہ اِنت – زھرشانی کنوکانی گوشگ اِنت اے زھرشانی داں پنچ روچاں برجاہ مان اِت ءُ چاردہ فروری ءَ یک زھرشانی مچی ءِ کنگ بیت اِنت ءُ چاگردی رسانکجاھاں بیگواھیں مردمانی بارہ ءَ کمپئین ھم برجاہ اِنت-

زھرشانی کنوکانی لوٹ اِنت کہ عمران خان ءَ وتی بیان ءِ تہ ءَ “سرکار نہ لوٹ ایت ڈیھ ءَ کسے بیگواہ بہ بیت ” برجم بہ بیت بلوچستان ءَ زورانسری بیگواہ بیتگیں مردم یلہ کنگ بہ بنت –

وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گوشتگ کہ اسلام آباد ءَ بیگواھیں مردمانی کھولانی زھرشانی مول ءُ مراد مزنیں واکدانی ت ءَ نندوکیں مردماں توار ءِ سر کنگ اِنت پرچاکہ مزنیں کُرسی ءُ واکانی تہ ءَ نندوکیں مردماں شال ءَ بیگواھیں مردمانی واستا نشتگیں مردمانی درد ءُ واہ ءُ زاریاں اِشکُت نہ کن اَنت –

ماما قدیر بلوچ ءَ گوشت کہ کراچی پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل برجاہ اِنت وھدیکہ مئے مات، گوھار ءُ چُک نیشنل پریس کلب آسلام آباد ءَ گوستگیں روچ ءَ چہ زھرشانی بنجل ءَ نشتگ اَنت چریشی ءِ سر ءَ دراھیں تکاں بندوکیں مردماں بھر زیروگ ءُ پدردی درشانی کنگی اِنت –

آئی ءَ دیمتر ءَ گوشت کہ من پشتون تھپز مومنٹ ءِ رھشون مھسن داوڑ، نیشنل پاٹی ءِ رھشون اکرم دشتی ءُ پشتونخواہ ملی عوامی پاٹی ءِ سینیٹر عثمان کاکڑ ءِ منت ءَ گراں کہ آیاں بنجل ءَ اتکگ ءُ بیگواھیں مردمانی کھولانی گون ءَ پدردی درشان اِتگ –

آئی ءَ گوشت کہ مھسن داوڑ شال ءَ بیگواھیں مردمانی بنجل ءَ آیگ ءَ دارگ بیتگ بلے آ وتی زبان ءَ پُشت نہ کنز اِتگ گوستگیں روچ ءَ اسلام آباد ءَ کھولانی گور ءُ رس اِتگ –

ماما قدیر بلوچ ءَ گوشت کہ ما انسانی ھکانی گل، چاگردی گلاں ھوار میان اُستمانی رسانکدرانی نمائندگاں گوں دزبندی کن ایں کہ آ بہ آں اَنت ءُ بیگواھیں مردمانی کھولانی گون ءَ پدردی ءِ درشان ءَ ھوار آیانی توار جوڑ بہ بنت ءُ دنیا ءَ آیانی توار ءَ سر بہ کن اَنت –

سر بیتگیں ھالانی رد ءَ روکپتی بلوچستان ءَ ناشناسیں مردماں تیرگواری کرتگ ءُ یک مردمے کُشتگ-

اھوالکار ءِ رد ءَ روکپتی بلوچستاں ءِ دمگ ایرانشھر ءَ ناشناسیں مردماں تیرگواری کرتگ ءُ یک مردمے کُشتگ –

تیرگواری ءِ وئیل ایرانشھر ءِ ھند ابتر ءَ پیش اتکگ کہ اود ءَ ناشناسیں مردماں مسیت ءِ تہ ءَ تیرگواری کرتگ ءُ سلام ناروئی کُشتگ –

وئیل ءَ پد دمگ ءِ پھزدار اتکگ اَنت ءُ لاش اش چِست کرتگ ءُ نادراہ جاہ ءَ برتگ اِت- وئیل ءِ بارہ ءَ دگہ گیشیں سرپدی نہ بیتگ –

بولان ءَ پاکستانی پوج ھما وھد ءَ تراکناکیں شوروانی نشانگ جوڑ کرتگ کہ پوج دمگ ءِ تہ ءَ لشکر کشی ءَ بوتگ – جئیند بلوچ

سربوتگیں ھالانی رِد ءَ گوستگیں روچ ءَ ناشناسیں مردماں بولان ءَ جالڑی ءُ سانگان ءِ میانی دمگ ءَ پاکستانی پوج ءِ راہ ءِ سر ءَ تراک ناکیں شورو کل کُتگ ءُ تراکینتگ انت – تراک ءِ آسر ءَ پاکستانی پوج ءِ جانی تاوان ءِ ھال انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں روچ ءَ بولان ءَ جالڑی ءُ سانگان ءِ میانی دمگ ءَ پاکستانی پوج ھما وھد ءَ (آئ ای ڈی ) تراک ناکیں شوروانی نشانگ جوڑ کرتگ کہ آ دمگ ءِ تہ ءَ لشکر کشی ءَ بوتگ-

جارکش ءَ وتی درشان ءِ تہ ءَ گوشتگ اے اُرش ءَ یک پوجی کارمندے ھما دمان ءَ مُرتگ ءُ سئے پوجی کارمند ٹپی بوتگ اَنت – اُرش ءِ زمّہ واری ءَ مئے گل بی ایل اے من ایت-

زی مند شیراز ءَ لشکری پانگسے ءَ پانک جنوکیں کارمندے گوں دورجنگیں توپک ءَ نشانگ کتگ ءُ کُشتگ ۔ بیبگر بلوچ

بلوچ ریپبلکن آرمی ءِ جارکش بیبگر بلوچ ءَ ماں رسانکدراں شکساتگیں وتی ترانے ءَ گشتگ کہ زی سھبءَ کیچ ءِ دَمَگ کولواہ بَلگور کؤر ءَ زورگیریں لشکر ءِ کمانڈو ٹولی آں گَل ءِ یک مزن بُنجلے ءِ سر ءَ پَندی ءُ بُرزی لشکریانی ھواری ءَ اُرش کتگ ۔ بُنجل ءِ پھریزی ٹولیءَ زورگیر ءِ دیم کِنزیں لشکر ءِ دو کارمند نشانگ کتگ ءُ کُشتگ۔ ھمے نیام ءَ لشکر ءِ کمک ءَ آیوکیں بالگرداناں گوں نوکیں سِلاھاں نشانگ جوڑ کتگ۔ ترند ءُ تیزیں جنگے ءِ میان ءَ مئے ھمراہ چیر جنگی ھیلکاریانی سَوَب ءَ چہ دژمن ءِ گرانیں انگِرّ ءَ پہ سلامتی در آیگ ءَ سوبمند بوتگ اَنت۔

جارکش ءَ گُشت کہ گْوستگیں روچ ءَ ماں مند شیراز ءِ کوھی دَمَگ شیراز کؤر ءَ لشکر ءِ برجاہیں یک پانگسے ءَ پانک جنوکیں کارمندے گوں دورجنگیں توپک ءَ نشانگ کتگ ءُ کُشتگ ۔

بیبگر بلوچ ءَ دیمترءَ گشت کہ زورگیریں لشکر بلوچ چیرجنگی ءِ ھیلکاریں ٹولی آنی بگیری ءَ بے سوبیں لشکر کشی ءَ پد لَس مھلوک ءِ سرا گوں جنگی بالگرداں تیر گواری کنگ ءَ اِنت۔ کہ آئی ءِ مَکّاریاں پَدّر کنت ۔ لشکر کشی ءِ میان ءَ لَس مُچّی آں ساڑی ئیں زھگ ءُ زالبولانی سر ءَ زوراکیانی رِد روچ پہ روچ گیشتر بُوَان اِنت۔ کہ دژمن ءِ پروش ءَ پدر کنگ ءَ اِنت۔

آئی ءَ دیمتر ءَ گُشت کہ زورگیریں لشکر ءِ بگیری ءَ مئے اُرش داں آجوئیں سرڈگارے ءَ برجاہ مان اَنت۔

دی بلوچستان پتر ھال ءَ سر بیتگیں ھالانی رد ءَ بلوچ اسٹوڈنٹس ایکشن کمیٹی ءِ گوستگیں وائس چیئرمین فیروز بلوچ یلہ بیتگ ءُ لوگ ءَ سر بیتگ –

بلوچ اسٹوڈنٹس ایکشن کمیٹی ءَ فیروز بلوچ ءِ یل بیگ ءِ ھال راست کرتگ ءُ گوشتگ کہ وائس چیئرمین فیروز بلوچ نوشکی ءَ یل بیتگ –

زانگ بہ بیت فیروز بلوچ گوستگیں سال ءِ بیست ءُ نُھ مئی ءَ جمیل بلوچ ءِ ھمراھی ءَ بلوچستان ءِ دمگ پنجگور ءَ روگ ءَ بیتگ کہ کلات ءِ ھند ءَ ناشناسیں سلاہ بندجنن مردماں دزگیر کنگ ءَ پد بیگوای کرتگ ءُ بازیں وھداں بیگواہ بیگ ءَ پد مروچی یل بیتگ ءُ وتی لوگ ءَ سر بیتگ –

بلوچستان ءِ تہ ءَ مروچی ھم پاکستانی پوج ءِ لشکر کشی گیشی ءِ گون ءَ برجاہ انت اود ءَ سدانی کچ ءَ لس مھلوک آوار جنگ بنت یا آھاں تھاریں کوٹیاں سالانی سال بندیگ کن انت یا آ شھید کنگ ءُ آھانی جون دور دیگ بنت – ماما قدیر بلوچ

دی بلوچستان پوسٹ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزارءُ دو سد ءُ بیست روچ سرجم بوتگ-

کراچی پریس کلب ءِ سرکماش جمیل فاضلی، گوستگیں سرکماش امتیاز فاران، سعید سربازی بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ھما جاورھالانی تہ ءَ کہ راجداری بے سوب بوان انت مروچی ھما راجداریں گل ءُ اشرافیہ ءُ کتکاریں مردم راجے سود ءَ پہ زانت کنگ ءَ انت ءُ آ مردماں چہ زھر ءُ بیزار انت، مراگشانی تہ ءَ آھاں بد ءُ رد کن انت – مروچی مئے تہ ءَ ھم لھتے ھمے ردیانی آماچ انت ھر کسی ءِ ھیال انت کہ آ جنگل ءِ بادشاہ انت، مارا اے وھد ءَ وتی پگر پراہ ءُ شاھگان کنگی انت پرچاکہ دژمن مئے پُرایمنیں جھد ءَ ھاسکر وی بی ایم پی زھرشانی ءَ ھلاس کنگ لوٹ ایت –

آئی ءَ گوشتگ کہ بلوچستان ءِ تہ ءَ مروچی ھم پاکستانی پوج ءِ لشکر کشی گیشی ءِ گون ءَ برجاہ انت اود ءَ سدانی کچ ءَ لس مھلوک آوار جنگ بنت یا آھاں تھاریں کوٹیاں سالانی سال بندیگ کن انت یا آ شھید کنگ ءُ آھانی جون دور دیگ بنت اشی ءَ ابید دژمن وتی مکر ءُ پندلاں مردماں وت ما وت ءَ میڑین ات ءُ کسان کسانیں جیڑہ ءُ جنجالانی دچار کنت –

ماما قدیر بلوچ ءَ گوشتگ کہ دژمن ءَ رھم ءِ اوست کنگ نہ بیت بلے ھما تاوان ءَ دژمن ءَ ابید وتیگ دے اَنت آ سالاں سال پُر کنگ نہ بنت – اے وھد ءَ یکجاھی ءُ یکمشتی کمی ءِ گواہ ھمیش انت کہ مئے میان ءِ دوری ھر روچ گیش بوان انت، ءُ رد پھمی گیش بوان انت ءُ مروچی ما یکے دومی ءِ درگت ءَ بازیں رد پھمگ ءِ آماچ انت –

چہ بلوچستان ءَ بیگواھیں مردمانی کھولانی نیمگ ءَ مروچی اسلام آباد ءِ پریس کلب ءِ دیم ءَ شدکشیں ھرتالی بنجل بنگیج کرتگ -چہ بلوچستان ءِ جتاجتائیں ھنداں دَہ ءَ گیش بیگواھیں مردمانی کھول زھرشانی ءَ یاداشت کنائینگ ءَ اَنت –

بیگواھیں مردمانی کھول وتی دوستیگیں مردمانی یلہ کنائینگ ءِ ھاتر ءَ مروچی اسلام آباد ءِ پریس کلب ءِ دیم ءَ زھرشانی برجاہ –

اسلام آباد ءَ برجاہ بیتگیں شدکشیں ھرتال ءِ بنجل ءَ بیگواھیں ڈاکٹر دین مھمد بلوچ ءِ جنک سمی بلوچ، بی ایس او آزاد ءِ بیگواھیں رھشون شبیر بلوچ ءِ گوھار، بیگواھیں ھسان ءُ ھزب اللہ ءِ کھول، بیگواھیں جھانزیب ءِ مات، چہ عرب امارات ءَ بیگواہ بیتگیں راشد ھسین ءِ مات ءُ چہ کراچی ءَ بیگواہ بیتگیں نسیم بلوچ ءُ سعید بلوچ ءِ کھولاں ھوار دگہ کھول ھوار اَنت –

بیگواھیں ڈاکٹر دین مھمد ءِ جنک سمی بلوچ ءَ ٹوئٹر ءَ نبشتگ کرتگ ما بیگواھیں اسلام آباد ءَ سر بیتگ اِنت بیگواھیں مردمانی واستا جوڑ بیتگیں کمیشن ءِ رویش ءُ سروزیر پاکستان عمران ھان ءَ بیگواھیں مردمانی واستا داتگیں درشان ءِ پژدر ءَ مروچی ما اسلام آباد ءِ پریس کلب ءِ دیم ءَ نندانک ءَ نشتگیں –

سمی بلوچ ءَ گوشت: اسلام آباد ءَ جاڑیگیں دراھیں مردماں گوں دزبندی اِنت کہ آ بیا اَنت ءُ بیگواھیں مردمانی جتگیں بنجل ءَ بھر بہ زور اَنت ءُ زورانسری بیگواہ کرتگیں مردمانی کھولاں انساپ ءِ دیگ ءَ کمک بہ کن اَنت –