TBP Balochi

بلوچستان ءِ بنجاھی شھر شال ءَ پریس کلب ءِ دیم ءَ حسان قمبرانی ءُ حزب اللہ قمبرانی ءِ بیگواھی ءَ سالے سرجم بیگ ءَ زھرشانی کنگ بیتگ –

زھرشانی ءَ زالبول، چُک ءُ نودربرانی بازیں کچے ءَ دستاں بینرز ءُ پلے کارڈز چِست کرتگ کہ آیانی سر ءَ قمبرانی برادرز ءِ یل کنگ ءَ ھوار بلوچستان ءَ زورانسری بیگواھیانی ھلاپ ءَ اوگام نبشتگ بیتگ –

زھرشانی ءَ تران کنان ءَ حسان قمبرانی ءِ گوھار حسیبہ بلوچ ءَ گوشت کہ لھتے مردم بیت کنت اولی رند اِنت منی توار ءَ اشکنگ ءَ اَنت بلے شال ءِ دمگ شری ءِ سر ءَ من ءَ زان اَنت کہ گوستگیں یک سالے ءَ انساپ لوٹگ ءَ آں –

آئی ءَ گوشت اے سال بے کساس ناوش بیتگ ءُ منی بیچارگیں مات اے دگانی سر ءَ پریات کنگ اِنت، سیاسی مردماں گوں دوچار کپ ایت آئی ءِ گیمرتگیں چھرگ ءَ بہ چار اِت -آئی ءَ گوشت آمیدگس ءُ کمیشن ءَ پیش بیتگیں گڑا من سما کرتگ زُلم چی ءَ گوش اَنت –

آئی ءَ گوشت من ءَ دو لاش دزکپتگ کہ آیانی بدناں بے کساسیں ٹپ پِر بیتگ اَنت، من یک ھاندانے ءِ تباہ بیگ دیستگ –

آئی ءَ گوشت کہ من ھمے واستا پشت کنزگ ءِ پیسلہ نہ کرتگ حسان قمبرانی ءُ حزب اللہ قمبرانی بیگواہ اَنت من نہ لوٹ آں دگہ یک ھاندانے منی وڑ ءَ آیانی دیم ءَ بے وس بہ بیت –

آئی ءَ گوشت کہ من گوستگیں یک سالے ءَ اے دردمان ءَ گوزگ ءَ آں، اد ءَ یازدہ یازدہ سالاں مردم درداں سگگ ءَ اَنت – آئی ءَ گوشت ما ھما وھد ءَ بُست کن ایں بس بژن ءَ ابید دگہ گون نیست –

آئی ءَ گوشت اے سال ءَ من وتی کَش ءُ گوراں بازیں مردمے دیستگ بلے من کس نیاھورتگ – من وتی کش ءُ گوراں گھگیری ءِ آورتگ بلے توار چِست کنوک کس نیست اِنت -ھرچی کہ منی ھمراہ اَنت ھما منی زندگی ءِ مڈی اَنت –

آئی ءَ گوشت کہ پاکستان ءِ وزیر شیرین مزاری گوش ایت مک جمھوریت ءَ مردمانی بیگواہ ءِ گنجائش نیست اِنت بلے منی برات تئی دور ءِ سرکار ءِ وھد ءَ بیگواہ بیتگ اَنت –

آئی ءَ گوشت یک سالے ءَ بس انساپ ءِ شوھاز ءَ آں من ءَ بندیں کوٹیاں تسلی دیگ بیگ ءَ اَنت، بے توار بیگ ءَ گوش اَنت ھچ مہ گوش – آئی ءَ گوشت کہ من نزاناں اے جد ءُ جھد من ءَ کجا داں بارت ءُ سر کنت بلے شما درست منی توار ءَ گوں ھم توار بہ بئے –

زھرشانی ءَ بھر زیروکیں مردمانی دیم ءَ تران کنان ءَ آئی ءَ گوشت کہ بلوچستان نیشنل پاٹی ءُ نیشنل پاٹی ءِ رھشوناں ھوار دگہ رھشوناں گوشت اگاں بیگواھیں مردم ریاستی کانود ءِ مجرم اَنت ریاست وتی کانود ءِ دیم ءَ آیاں پیش بہ کنت اگاں مجرم گوشگ بیت اَنت گڑا آیاں آمیدگس سزا بہ دنت بلے ریاست ءِ گور ءَ ھچ منانک نیست چہ سالاں سال مردم بیگواہ اَنت کھولاں تکانسری ءَ پِرینگ ءَ اَنت –

زھرشانی کنوکاں گوشت اے ریاست ءَ بلوچانی گون ءَ ھروھد ءَ زُلم ءَ ابید دگہ ھچ نہ دیستگ –

آیاں گوشت کہ اے ریاست ءِ گور ءَ کجام ھم بیگواھیں مردم ءِ ھلاپ ءَ یک منانکے نیست اِنت شرم ءِ رکگ ءِ واستا آیاں زنداناں کنگ ءُ بلوچ پدریچ ءِ نیزوری ءَ پیش کنگ اِنت –

زانگ بہ بیت حسان قمبرانی ءُ حزب اللہ قمبرانی گوستگیں سال ءِ چاردہ فروری ءَ بلوچستان ءِ بنجاھی شھر شال ءَ زورانسری بیگواہ کنگ بیتگ اَنت ءُ مروچی آیانی بیگواھی ءَ یک سالے سرجم بیگ ءِ سر ءَ چاگردی رسانکجاہ ٹوئٹر ءَ بلوچ سوشل میڈیا ایکٹیوسٹسانی نیمگ ءَ کمپئین ءِ برجم دارگ بیتگ کہ پاکستان ءَ درستاں سربُر بیتگ –

سوشل میڈیا ءِ کارمرد کنوک بیگواھیں مردمانی یل کنگ ءِ لوٹ ءَ کنگ ءَ اَنت –

ھمے رنگ ءَ پاکستان ءِ بنجاھی شھر اسلام آباد ءَ بیگواھیں مردمانی کھولانی نیمگ ءَ نندانکی زھرشانی بنجل چارُمی روچ ءَ ھم برجاہ بیتگ ءُ جتاجتائیں تکاں سیاسی ءُ چاگردی مردم بنجل ءَ اتکگ ءُ پدردی اش درشان کرتگ ءُ بنجل ءَ آیاں پاکستان ءِ سرکار ءَ بیگواھیں مردمانی یل کنگ ءِ لوٹ کرتگ –

شھیدی نوں مھرے درونت ایں، زند ءِ اے سپر ھچ زانگ نہ بیت بلے یک راستی ءِ روچ ءَ امباز کنگ ءَ اَنت – ماما قدیر بلوچ

دی بلوچستان پوسٹ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار دوسدو بیست چار روچ سرجم بوتگ –
سندھ کورٹ بار ءِ وکیلاں بنجلے ترءُتاب کرتگ ءُ بیگواھیں مردمانی کھول گوما دلپدردی درشانتگ –

کراچی ءَ چہ زورانسری آوار جنگ بوتگیں سلطان سعید ءِ گھار بنجل ءَ اتکگ ءُ وتی زھرشانی نبشتہ کنائینتگ ءُ سلطان سعید ءِ گیشیں ھال اھوال وی بی ایم پی ءَ داتگ انت –

سلطان سعید ءِ گھار ءِ گوشگ ات کہ سلطان سعید جاھمنند گل محمد لین، لیاری سی جنوری دوھزار بیست ءُ یک ءَ رینجرز ءُ چیریں مردماں چہ وتی لوگ ءَ آوار جتگ ءُ چیریں جاھاں بندیگ کرتگ، آ روچ ءَ پد آئی درگت ءَ ھچ وڈیں ھال اھوال نیست-
کھول ءِ گوشگ ات کہ آ سلطان سعید ءِ زورانسری آوار جنی ءِ بگیری ءَ ارزی نبشتہ کنائینگ ءَ کلاکوٹ پولیس اسٹیشن ءَ شُتگ انت، بلے آھاں ایف آئی آر نبشتہ کنگ ءَ مکن کُتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ شھیدی نوں مھرے درونت ایں، زند ءِ اے سپر ھچ زانگ نہ بیت بلے یک راستی ءِ روچ ءَ امباز کنگ انت کہ دیمونی ءِ دروشم وتی مانا پمے ھاتر ءَ گار کنت کہ آئی حصول ءِ یک بھرے ھالیگ انت –

آئی ءِ گوشگ ات کہ بلوچستان ءِ تھا آس ھون ءِ ندارگ ءَ گیش کنگے ھاتر ءَ ھمک روچ ریاستی تاگت نوکیں وڈی ءَ انسانی المیہ ءُ زلم زوراکی دیم ءَ آرگ انت – ھر ھما دمگے تھا پُرایمنیں جھدے پراہ شاھگانیں بنیات ھست انت اودا ریاستی تاگت سرجمیں بلوچستان ءَ سلاہ بندیں زوراکی وڈ وڈیں پندلاں آھاں نشانگ کنگ ءَ انت –

ماما قدیر بلوچ ءَ گوشتگ کہ ھاکم زمینی راستیاں وتگڑیں کسہ گوش انت بلوچستان ءَ برجاھیں لشکر کشی ءَ چہ انکاری انت – بلے پوجی کاروائیاں چہ انکار کنگے ٹاھانی سر ءَ گوستگیں ماہ ءَ بولان ءِ جتا جتائیں ھند ءُ دمگاں بیتگیں لشکر کشی یک دگہ پددراھی اِنت ۔

نبشتانک: ناکو روزی ءُ شاہ پری ءِ داستان

نبشتہ کار : داد شاشانی

دی بلوچستان پوسٹ

ناکو روزی ءَ وتی کمر زانی بست ، دیم گوں ساچان ءَ کُت ، کمو بچکند اِت ئِے، وتی اے دیم ءُ آ دیم چار اِت ءُ گْوشت ئِے” منی چُک آ کِسھاں بل چیر ءُ سریں کِسہ اَنت !”ساچان انگت وتی زِدّ ءِ سر گوں زور ءَ داشتگ اَت ءُ ساچان ءَ گوشت” اِنّا ناکو جان مرچی الّم کسھاں بہ کن”ناکو روزی پد ءَ وتی اے دیم ءُ آ دیم چار اِت کسانیں شاکارگے جَت ءُ گْوشت ئِے “بچار منی چُک ساچان جان تو کہ زِدّ وتی گوں تُرندی ءَ داشتگ گُڑا گوش دار ۔۔۔

چوناھیگا من شاہ پری نہ دیستگ ، بس نام اِشکُتگ نوں من ترا ھال مہ دے آں نام چون اِشکُتگ تو وَ پد ءَ جُست کن ئے شَرتر ھمیش اِنت اے کسہ ءَ گوں بہ کن آں ۔۔۔”ساچان ءَ بشکُرّ اِت کمو وتی سرگ چو ھان کنگ ءِ وڑ ءَ چَنڈ اِینت ناکو ءَ گوں زور ءَ ٹھکے دات ءُ گْوشت ” من زانت گند ئے” ؟پد ءَ کمو وت ءَ ھیران ئِے کُت ءُ گْوشت ئِے”شاہ پری ءِ کھول ءَ شاہ پری یک لوگے ءَ بند کُتگ اَت ءُ ڈن ءَ در روگ ءَ نہ اِشتگ اَت گُڑا شاہ پری گوں وتی سنگتاں کلوہ کُتگ اَت ” من ءَ چَہ اے ازاب ءَ در بہ کن اِت” من ءَ سنگتے ءَ جُست کُتگ اَت” تو ء ناکو روزی مارا شَریں سوجے بہ دے ما اے جیڑہ ءَ چوں گیش ءُ گیوار بہ کن اِیں’؟
من ھما روچ ءَ شاہ پری نام اِش کُتگ ۔ناکو ءَ پد ءَ بچکندے کُت ساچان ءَ جُست ئِے کُت” نوں سرپد بوت ئے من چون نام اِشکُتگ “؟
ساچان ءَ ھم کند اِت ءُ گوں جھلیں توارے ءَ گْوشت” ھو ھو ۔۔ـ”

ناکو ءَ پد ءَ وتی گپ ءِ سر گپت ءُ دیم ءَ روان بوت”بزاں یک روچے شاہ پری مزن شھر ءَ اومان کنت ءُ سنگتے منی نمبر ءَ ئِے دنت ءُ گوش اِیت” اگاں مزن شھر ءَ رو ئے گُڑا ناکو ءَ ھال کن ءُ ناکو ءِ کر ءَ بدار کہ ترا دگہ جاگہ نیست شَر اِنت”من ءَ شپ ءَ ھما سنگت ءَ ھال کُت” من تئی شمار شاہ پری ءَ داتگ ترا ھال کنت تو جاگے وڑ کن “-

من گْوشت “شَر ھیر بیت “
گُڑا شاہ پری ءَ پازدہ روچ منی کِرّ داشت وتی کار گیگ ءُ گْور کُت اَنت ءُ پد ءَ شُت، گڑا منی ءُ آئی ءِ ھال ءُ اھوال برجم بوت، ھر وھد ءَ کہ آ مزن شھر ءَ اَتک گُڑا جاہ ئِے منی لوگ اَت، انچوش بہ پھم منی لوگ ءِ مردُمے ءِ ھساب ءَ اَت ءُ آئی ءِ کھول ءِ مردُم ھم اتک ءُ شُت اَنت، آ ھم ما روچ پہ روچ گیش نزدینک بیان اَت اِیں ،ما اگاں دو ساھت یکے دومی ءَ را ھال مہ کتیں بزاں ما سالے ھال نہ کُتگ، ھر وھد ءَ ما گپ ءَ اَت اِیں دم پہ ساھت ،بس انچوش مار اِت ھُدا مارا پمیشکا اے اِمروز ءَ ودی کُتگ دانکہ ما وت ماں وت یک بہ بہ اِیں ۔

ھمے رنگ ءَ سے سال ما وتی انچی پہ گْوازینت ناکو گپ ءَ اَت کہ چَہ دور ءَ مردُمے درا بوت کہ اُشترے مھار اَت ئِے دیم پہ کوچگ ءَ روگ ءَ اَت ناکو ءَ ساچان جُست کُت” زھگ بچار آ دِھکان بازید نہ اِنت “؟ساچان ءَ وتی دست پیشانی ءِ سر ءَ داشت ءُ ھُورت چارگ ءَ بوت کمو بے تواری ءَ پد گْوشت ئِے “ھو دِھکان بازید اِنت” ۔ناکو ءَ گْوشت” زاناں وتی ڈگارانی سر ءَ روگ ءَ اِنت” ! ساچان ءَ گْوشت” ھو دیم ئِے گوں ڈگاراں کُتگ ۔کمو پد ءَ بے تواری بوت ساچان ءَپد ءَ جُست کت”ھاں ناکو گُڑا دیم ءَ چے بوت” ؟ناکو ءَ پد ءَ کسانیں کندگ ءِ جَت ءُ گپ وتی بندات کُت ناکو ءَ پد ءَ کسہ بنا کت”یک روچے من ءُ آ کسانیں گپے ءِ سر ءَ کمو دلگران بوت اِیں”-ناکو ءَ کہ چُش گْوشت ساچان ءِ دیم مونجا بوت ھیران ءُ پریشانی یے پدر بوت -ناکو ءَ دیست زھگ دگہ وڑ بوت کمو پد ءَ بچکند اِت ئِے ءُ گْوشت ئِے “اے زندمان ءِ بھر اَنت منی زھگ چُش الم بیت”پد ءَ وتی کسہ ئِے بنا کُت” شاہ پری ءَ یک سکیں بدیں آدتّے گون اَت وتی گپ ءَ را پہ زور منّارینگ لوٹ اِت ئِے ھر وھد ءَ گْوشت ئِے” من شَر آں دومی رد اِنت” ۔

ساچان ءَ کسانیں آسردے کَش اِت وتی دوئیں دست وتی دیم ءِ سر ءَ ایر کُت اَنت ناکو ءَ یکبرے پد ءَ وتی گپ دیم ءَ بَران کُت”پد ءَ روچ پہ روچ ما گیش گِستا ءُ جُتا بیان بوت اِیں، کسان کسانیں گپانی سر ءَ بلا بلائیں جیڑہ پہ زور ودی کُت دانکہ زھر بوتیں اِیں”-

ناکو ءِ چمانی ارس رچان بوت اَنت ، ساچان ءَ کہ دیست ناکو ءِ چم ارسیگ اَنت ساچان ءِ چمانی ارس ھم اَتک اَنت -ھر دو بے توار بوت اَنت وت ماں وت ءَ چارگ ءَ اَت اَنت کس گپی نہ اَت کسانیں دمانے ءَ پد ساچان ءَ گْوشت” شَر نہ بوتگ”۔

ناکو ءَ پد ءَ وتی اے کَش ءُ آ کَش چار اِت اَنت وتی گُٹّ ءِ گج ایر بُرت اَنت، کسانیں شاکارگے جَت ءُ گینّ سارتے ءِ کَشگ ءَ پد گْوشت ئِے” دو سال ءَ داں من ءَ ھچ ءِ سما نیست اَت من وت نہ زانت من چے کنگ ءَ آں !؟چے بہ کن آں!؟ کُجا بُرو آں!؟ چو گنوک ءَ اَت آں، بازیں جُھدے ءَ پد گڑا کم کم ءَ پد ءَ گیگ ءُ گْور بیاں بوت آں “۔

ساچان ءَ ناکو ءِ گپ توک ءَ دَور کُت گپ چَہ ناکو ءِ دپ ءَ پُل اِت ءُ جُست ئِے کُت ” گُڑا پد ءَ شاہ پری ءَ ھچ ھال ءُ اھوال نہ کُت؟ دگہ ھچ وڑیں لاچاری ءُ بزگی یا وتی ردی ءُ نزوری ئِے درشان نہ کُت اَنت کہ چَہ ترا انچو بے ھیال بوتگ ” ؟
ناکو ءَ وتی لنکُک دوئیں چمانی سر ءَ داشت اَنت کمو گوں زور ءَ کَج اِت اَنت ءُ ھچ ئِے نہ گْوشت،دمانے ءَ پد دگہ گینّ سارتے کَش اِت ءُ گْوشت ئِے” ھو منی چُک پد ءَ ھچ وڑیں گپے من نہ اِشکُت کہ چون اِنت؟ کُجا اِنت؟ چے کنگ ءَ اِنت؟ کَے ءَ گوں گون اِنت؟ سور ءُ سانگ ئِے بوتگ یا اِنّاں!؟-

ساچان سک بے وار بوت ءُ ناکو ءَ آئی ءِ سر ءَ دست لگاش اِت ءُ گْوشت” زندمان کدی کدی مردُم ءَ انچیں ھندے ءَ دْروہ اِیت کہ کسہ نہ بیت “پد ءَ ھر دو بے توار بوت اَنت.

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءِ جارکش میجر گْوھرام بلوچ ءَ وادی مشکے ءَ پوجی گاڑی یے تراکناکیں شوروانی گون ءَ نشانگ کنگ ءِ زمہ واری منّ اِتگ ءُ پھمیانگیں جاھے ءَ رسانکدراں گپ کنان ءَ گوشتگ کہ گوستگیں روچ ءَ وادی مشکے ءِ دمگ تنک ءَ ملک سنگ ءِ ھند ءَ یوج ءِ یک گاڑی یے ھما وھد ءَ نشانگ کرتگ کہ وردنی ازباب ءِ زرتگ ءُ بنجل ءِ نیمگ ءَ روگ ءَ بیتگ –

جارکش ءَ گْوشتگ کہ اُرش ءَ دو پوجی کارمند مرتگ ءُ دو زدگ بیتگ اَنت ءُ گاڑی ءَ تاوان بیتگ –

آئی ءَ گوشت زوگریں پوج ءِ سر ءَ اُرش داں بلوچستان ءِ آجوئی ءَ برجاہ مان اَنت –

روکپتی بلوچستان ءَ ایرانی انٹی نارکوٹکس ءِ تیرگواری ءَ یک مردمے بیران ءُ ھمے رنگ ءَ ناشناسیں مردمانی تیرگواری ءَ ھم یک مردمے بیران بیتگ –

سر بیتگیں ھالانی رد ءَ روکپتی بلوچستان ءَ ایرانی نارکوٹکس ءِ تیرگواری ءَ یک مردمے بیران بیتگ –

اھوالکار ءِ رد ءَ ایرانی نارکوٹکس ءَ روکپتی بلوچستان ءِ سوران پسکو ءَ یک گاڑی ءِ سر ءَ تیرگواری کرتگ ءُ گاڑی چپ بیتگ –

اھوالکار ءِ رد ءَ ایرانی انٹی نارکوٹکس ءَ گاڑی ءِ ھما وھد ءَ تیرگواری کرتگ کہ یک گاڑی روگ ءَ بیتگ ابید ءِ دست دیگ ءَ آیاں تیرگواری کرتگ ءُ چریشی ءَ گاڑی چپ بیتگ ءُ گاڑی ءَ سواریں مردم زدگ بیتگ ءُ دمانے ءَ پد آئی ءَ وتی ٹپ نہ سگگ اِتگ ءُ بیران بیتگ –

بیران بیتگیں مردم ءِ پجار قاسم ارزئی ء عیدو جھمنند دزاپ ءِ نام ءَ زانگ بیتگ –

اھوالکار ءِ رد ءَ ایرانی انٹی نارکورٹکس ءِ گوشگ اِنت کہ شکی ءِ بنیاد ءَ گاڑی ءَ نشہ باپاری گون اَنت چریشی ءَ آئی ءِ سر ءَ تیرگواری کرتگ –

ھمے وڑ ءَ روکپتی بلوچستان ءِ دمگ دلگان ءَ ناشناسیں مردمانی تیرگواری ءَ یک مردمے بیران بیتگ –

گیشیں ھالانی رد ءَ روکپتی بلوچستان ءِ دمگ دلگان ءَ ناشناسیں مردماں تیرگواری کرتگ ءُ یوسف سابکی ء اھمد جھمنند شاھان دلگان کُشتگ –

دومی نیمگ ءَ روکپتی بلوچستان ءَ انسانی ھکانی واستا کار کنوکیں بلوچ فعلین ءِ گوشگ اِنت گوستگیں سال دوھزار ءُ بیست ءَ ایرانی لشکر ءِ تیرگواری ءَ سد ءَ گیش بلوچستان ءِ جھمنند کُشگ بیتگ اَنت –

مالار ءَ پاکستانی پوج ءِ پانگس ءِ سر ءَ دور جنگیں ءُ دگہ سلاھاں گوں اُرش کُتگ ءُ جانی مالی تاوان داتگ – میجر گْوھرام بلوچ

سربوتگیں ھالانی رِد ءَ بلوچستان ءِ دمگ آواران مالار کھن ءَ ناشناسیں سلاہ بندیں مردماں پوجی پانگس ءِ سر ءَ اُرش کُتگ –

اُرش ءِ آسر ءَ پاکستانی پوج ءَ جانی ءُ مالی تاوان رس اتگ، سلاہ بندیں مردم درآیگ ءُ رؤگ ءَ سوبین بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں آواران ءِ دمگ مالار کھن ءَ برجاھیں پاکستانی پوج ءِ پانگس سر ءَ دورجنگیں، مزنیں ءُ وتکاریں سلاھاں گوں اُرش کُتگ –

جارکش ءَ گوشتگ کہ پانگس ءِ سنگر ءَ نشتگیں پوجی کارمند دورجنگیں توپک ءِ گون ءَ نشانگ کنگ ءُ کُشگ ءَ پد پانگس ءِ سر ءَ مزنیں سلاھانی گوم ءُ اُرش کتگ، اُرش ءَ چہ بازیں کارمندے مرتگ ءُ ٹپی بوتگ اَنت –

گڈسر ءَ بی ایل ایف ءِ جارکش میجر گْوھرام بلوچ ءَ گوشتگ کہ زورگپتیں پاکستانی پوج ءِ سر ءَ مئے اُرش ایردستیں بلوچستان ءِ آجوئی ءَ تاں برجاہ مان انت –

عطاء شاد – ٹی بی پی ستاشانی

1نومبر 1939 ءَ ودی بیتگیں بلوچی زبان ءِ مزن نامیں شائر عطاء شاد 13 فروری سال1997 ءَ بیران بوت۔

عطاء شاد ءِ پجار بلوچی زبان ءِ مزن نامیں شائرانی تہ ءَ بیت عطاء شاد ءَ بلوچی ءُ اردو زبان ءِ تہ ءَ وتی نبشتگیں شئرانی سوب ءَ چاگرد ءِ تہ ءَ پہ وت ءَ یک جتائیں جاہ ءِ اڈ کُتگ مروچی ابدمانیں عطاء شاد ءَ 24 سال بیت کہ اَچ ما جتا بیتگ بلے عطاء ءِ شئرانی زبان دوستی انگت ءَ بلوچ شائر ءُ نودربرانی رھشونی ءَ کنگ ءَ اِنت۔

دی بلوچستان پوسٹ عطاء شاد ءِ بیست ءُ چارمی سال روچ ءِ درگت ءَ آئی ءَ گوں اے دستونک ءَ یات کنگ ءَ اِنت۔

دستونک

عطاء شاد

شپے کہ بام مہ ساریت چُشیں شپ ءَ را سوچ
پہ عمرےءَ کہ وداریت، چُشیں شپ ءَ را سوچ

تو روچ ءِ واجہ ئے، استال ءُ ماہ ءِ واھندئے
ترا کہ پَجّہ میاریت، چُشیں شپ ءَ را سوچ

بدنت داغ، چُشیں نیمروچ ءَ آس بِدئے
دِلاں پہ آس بُگواریت، چُشیں شپ ءَ را سوچ

کُشیت واھگاں پہ روژنائی ءِ نام ءَ
دل ءِ چراغ ءَ تھاریت چُشیں شپ ءَ را سوچ

ما “کوہ نند” بنی آدماں پہ آس ءِ اپوگ،
تریشک پہ من شھاریت، چُشیں شپ ءَ را سوچ

ما روچ زردگ ءُ گوربام، ما سمین ءُ صبا،
نہ انگہ مارا کماریت، چُشیں شپ ءَ را سوچ

ما “رُژن ءِ بخت” تھاروکی ءَ پہ روک، عطآ
چو روچ ءِ راہ ءَ بداریت، چُشیں شپ ءَ را سوچ

زھرشانی نندانک ءَ پی ٹی ایم ءِ رھشون منظور پشتین ءَ کھولانی گون ءَ پدردی ءِ درشان کنگ ءَ بنجل ءَ اتکگ ءُ پدردی درشان کرتگ –

پاکستان ءِ بنجاھی شھر اسلام آباد ءَ نیشنل پریس کلب ءِ دیم ءَ مروچی سیمی روچ ءَ بلوچستان ءَ بیگواہ بیتگیں مردمانی کھولانی زھرشانی نندانک برجاہ-

زھرشانی بنجل ءَ ڈاکٹر دین مھمد ءِ جنک سمی دین، شبیر بلوچ ءِ گوھار سیما بلوچ، عرب امارات ءَ بیگواہ بیتگیں راشد ھسین ءِ مات ءُ آئی ءِ براتزتک ماھزیب بلوچ، ھانی گُل بلوچ ءُ بلوچ نودر گل آزاد ءِ بیگواھیں رھشون زاکر مجید ءِ مات ءَ ھوار ھزب اللہ کمبرانی مھمد ھسان کمبرانی ءِ کھول ھم ھوار اَنت –

چاردہ فروری ءَ ھسان کمبرانی ءُ ھزب اللہ کمبرانی ءِ بیگواھی ءَ یک سالے سرجم بیگ ءَ چاگردی رسانکجاہ ٹوئٹر ءَ کمپئن ءِ جار پِرینگ بیتگ –

اسلام آباد ءَ بیگواھیں مردمانی نیمگ ءَ بیگواھیں مردمانی واستا جوڑ کرتگیں کمیشن ءِ نادلگوشی ءُ بیگواھیں مردمانی کھولانی ریپینگ ءِ پژدر ءَ بیگواھیں مردمانی کھولاں گوسگیں سَے روچاں اسلام آباد ءِ نیشنل پریس کلب ءِ دیم ءَ زھرشانی نندانک جتگ ءُ نشتگ اَنت –

کھولانی گوشگ اِنت مئے گار ءُ بیگواھیں مردمانی واستا پاکستان ءِ نیمگ ءَ یک کمیشن ءِ جوڑ کنگ بیتگ آ کمیشن مارا ھشک ءَ ریپینگ ءَ اِنت ءُ مئے گپاں گوشدارگ ءَ نہ اِنت –

آیانی گوشگ اِنت کہ کمیشن ءَ ھروھد ءَ ما پیش بیتگیں آئی ءَ مارا ھروھد ءَ جتا جتائیں ھنر ءُ ٹگی کرتگ ءُ رپینتگ ءُ گڈی ءَ گوشتگ مئے گور ءَ نِی مہ یا ءِ –

مروچی اسلام آباد نیشنل پریس کلب ءِ دیم ءَ وائس فار بلوچ مسنگ پرسنز ءِ چیئرمین نصر اللہ بلوچ ھم جاڑیگ اِنت ءُ آئی ءَ گوشتگ کہ مروچی ما سَے روچ اِنت نشتگ اِنت اد ءَ پاکستان ءِ راجماناں نشتگیں مردماں اے سما نیست اِنت کہ بلوچستان ءَ اتکگیں مردمانی لوٹ چی اَنت ءُ آ چی گوشگ ءَ اتکگ اَنت –

نصر اللہ بلوچ ءَ گوشت کہ اے وھد ھما اِنت کہ دراھیں زیردست ءُ لگتمالیں راجاں یکجاہ بیگ ءُ وتی ھکانی پدجنی ءَ توار چِست کنگی اِنت –

آئی ءَ گوشت کہ آ راج پشتونے بیت یا سندھی ءِ بیت یا زیردستیں پنجاپی ءِ بیت آئی ءِ گون زلم ءُ زوراکی بنت آیاں ما ایرجن ایں –

نصراللہ بلوچ ءَ گوشت: پاکستان ءَ آمیدگس ھست اَنت آئی ءِ سیول آمیدگس ھست اَنت اگاں آئی ءَ سیول آمیدگسانی سر ءَ اوست نیست گڑا وتی ملٹری آمیدگساں بیگواھیں مردماں پیش بہ کنت ءُ آیاں کانود ءِ رد ءَ سزا بہ دنت بلے اے وڑ ءَ گار ءُ بیگواہ کنگ پاکستان ءِ کانودانی لگتمالی ءُ انسانی ھکانی رد ءَ ھم اے ھکانی لگتمالی ءِ –

نصراللہ بلوچ ءَ گوشت کہ پاکستان ءَ مئے واستا نا پروفیسر اِشتگ، نا نودربر اشتگ نا ورناہ اشِتگ نا کماش اِشتگ ءُ بلوچستان ءَ سیاست کنگ مردینانی واستا کھرے ءِ کوھے ءِ سر ءَ کپگ ءِ بروبری ءَ سر بیتگ – ھمے واستا مئے ھما زالبول کہ ماہ ءَ نہ دیستگ اَنت آ مروچی دگانی سر ءَ نشتگ ءُ انساپ لوٹگ ءَ اَنت –

ھمے وڑ ءَ پی ٹی ایم ءِ رھشون منظور پشتین ءَ ھم اسلام آباد ءَ بیگواھیں بلوچانی کھولانی گون ءَ اتکگ ءُ پدردی درشان کرتگ –

منظور پشتین ءِ ھمراھی ءَ پی ٹی ایم ءِ دگہ باسک ھم ھوار بیتگ اَنت –

منظور پشتین ءَ بنجل ءَ تران کنان ءَ گوشت کہ من ءَ بژن اِنت کہ پاکستان ءِ رسانکدر کشمیر ءِ بارہ ءَ گپ کن اَنت، ھندوستان ءَ دھکانی بارہ ءَ گپ کن اَنت بلے آیانی لوگ ءِ دیم ءَ اتکگیں مردمانی لوٹ آں گوشدارگ ءُ گپ ءَ نہ کن اَنت-

منظور پشتین ءَ گوشت کہ چریشی ءَ ھمیشی ءَ زانگ بیت پاکستان ءِ ریاست ءَ انسانی درکار نہ اِنت بلکیں آیانی وسائلانی درکار اِنت مروچی اگاں کشمیر پاکستان ءِ دست ءَ کپ ایت گڑا آیانی گپ ھمے وڑ ءَ چیر تر اَنت-

منظور پشتین ءَ گوشت کہ پاکستان ءِ سروزیر عمران ءَ واک ءَ پیسر گوشتگ کہ اگاں مان اقتدار ءَ بہ باں بیگواھیں مردمانی جیڑہ ءَ ھلاس کن آں بلے تنی وھدی آئی ءِ اقتدار ءَ بازیں وھد گوزگ ءَ پد ھم آئی ءَ ھچ نہ کرتگ ءُ نِی بلوچستان ءِ لاچاریں مردم آئی ءِ گس ءِ دپ ءَ اتکگ ءُ وتی بیگواھیں مردمانی واستا انساپ لوٹگ ءَ اَنت بلے عمران گندگ نہ بیت –

منظور پشتین ءَ گوشت کہ من اے پُر ایمنیں جد ءَ جھد ءَ ھمے سرپد کہ اے ھما زانتکار ءُ کواسیں زانتانی برود اِنت اشانی پاکستان ءِ ھمک شھر ءَ زھرشانی کرتگ آ پُر ایمن بیتگ اَنت آیانی اے جد ءُ جھد ءَ دروت ندر کن آں –

زانگ بہ بیت گوستگیں سَے روچاں اسلام آباد ءِ نیشنل پریس کلب ءِ دیم ءَ بلوچستان ءَ گار ءُ بیگواھیں مردمانی بازیں کھولے ھوار اِنت ءُ آیانی گوشگ اِنت اے زھرشانی نندانک داں چاردہ فروری ءَ برجاہ بیت ءُ چاردہ فروری ءِ روچ ءَ مچی ءِ زھرشانی اسلام آباد ءِ پریس کلب ءِ دیم ءَ کنگ بیت اِنت –

راسک ءَ نیکراھی وانگ ءِ مولوی واھد بکش ایران ءِ چیریں ادارھاں گوں وت برتگ

سر بیتگیں ھالانی رد ءَ گوستگیں روچ ءَ روکپتی بلوچستان ءِ دمگ راسک ءَ ایران ءِ چیریں ادارہ اطلات ءَ راسک ءِ نیکراھی وانگ جاہ ءِ مولوی واھد بکش گوں وت برتگ کہ تنی وھدی آئی ءِ ھال نیست –

اھوالکار ءِ رد ءَ گوستگیں روچ ءَ چیریں ادارھاں مولوی واھد بکش ءَ را نپر کرتگ ءُ تو چیریں ادارھانی کارگس ءَ بیا اود ءَ آیاں گوں وت برتگ ءُ تنی وھدی آئی ءِ ھال نیست اِنت –

اھوالکار ءِ رد ءَ دمگی مردماں گوشتگ کہ مولوی واھد بکش ھمے واستا برگ بیتگ کہ آئی ءَ مولوی کوھی ءِ بارہ ءَ گوشتگ کہ ایران ءِ آمیدگساں مولوی کوھی زورانسری زندانی کرتگ –

دمگی مردمانی رد ءَ مولوی واھد بکش ءَ ھوار بازیں مردم ھمے پژدر ءَ دزگیر کنگ ءُ برگ بیتگ اَنت کہ آیاں مولوی کوھی ءِ زندانی ایر جتگ –

مولوی واھد بکش ءِ برگ ءَ پد تنی وھدی آئی ءِ ھچ ھال نیست ءُ ایران ءِ واکداراں ھم تنی وھدی آئی ءِ بارہ ءَ ھچ ھال شنگ نہ کرتگ –

شھید آمو مری ءُ شھید دین اھمد مری گل ءِ باسک باسک بیتگ اَنت – مزار بلوچ

یونائیٹڈ بلوچ آرمی ءِ جارکش مزار بلوچ ءَ ناشناسیں جاھے ءَ رسانکدراں گوں گوشتگ کپ زورگریں ریاست ءَ بلوچستان ءَ ھمک روچ پوجی زوراکیانی سوب ءَ وتی زورگری ءَ دراج کش کنگ اِنت بلے اے زوراکیاں بلوچ راج ءِ جزبگ ءِ پُشت کنزگ ءَ ابید گیش توان بیگ ءَ اِنت –

جارکش ءَ گوشت زورگریں ریاست ءَ ھشت فروری ءِ سھب ءَ کوھلو ءُ ھرنائی ءِ میانی دمگاں پوجی لشکر کشی ءِ کنگ ءِ واستا سدانی پوجی ایرگپتگ اَنت کہ آیانی کمک ءَ بمبگواریں بالگرد ھم گون بیتگ اَنت، مھلوک ءِ لوگانی سوچگ ءَ پد پاکستانی پوج ءَ اود ءَ مردین، زالبول ءُ چکاں وتی بنجل ءَ برگ ءَ بیتگ ڈونگان ءِ ھند ءَ مئے گل ءِ سرمچاراں راج ءِ پھازگ ءَ پوج ءِ سر ءَ اُرش کرتگ، جنگ ءِ وھد ءَ مئے دو سرمچار آمو مری ءُ دین اھمد مری ءَ پہ شھہد بیتگ اَنت-

جارکش ءَ گْوشت کہ شھید آمو مری ءُشھید دین اھمد مری سال دوھزار ءُ چاردہ ءَ گل ءَ ھوار بیتگ اَنت ءُ بازیں جنگانی میان ءَ دشمن ءِ پروش دیگ ءَ سوبمند بیتگ اَنت – زورگریں ریاست ءِ کارمنداں شھیدیں سرمچارانی لاش ھم گوں وت برتگ اَنت ءُ ناشناسیں جاھے ءَ کَل ءُ کسارت کرتگ ءُ آ گڈی دیدار ءِ واستا ھم آیانی کھول اِلگ نہ بیتگ اَنت –

جارکش ءَ گوشت زووگریں ریاست پاکستان ءِ زوراکیاں ما وتی سرمچاریں ھمراہ ءَ بلوچ ءِ کمک ءَ پروش دئیں ءُ بلوچ سرڈگار ءِ آجوئی ءَ داں جنگ برجاہ بیت اِنت –