TBP Balochi

سر بیتگیں ھالانی رد ءَ روکپتی بلوچستان ءَ ایرانی آمیدگس ءِ پرمان ءَ دو بلوچ پاھو دیگ بیتگ اَنت-

اھوالکار ءِ رد ءَ سیزدہ فروری ءَ ایرانی آمیدگس ءِ پرمان ء دو بندیگیں بلوچ پاھو داتگ اَنت – پاھو داتگیں مردمانی پجار جمال الدین براھوئی ء خداداد جھمنند سفید آباہ ءُ مھمد براھوئی ء نبی بکش جھمنند جوتیع ءِ ناماں زانگ بیتگ اَنت –

اھوالکار ءِ رد ءَ ھردوکیں مردم زابل ءِ زندان ءَ بندیگ بیتگ اَنت ءُ آ سیزدہ فروری ءَ ایرانی آمیدگس ءِ پرمان ءَ پاھو دیگ بیتگ اَنت بلے تنی وھدی ھردوکیں مردمانی جرم آمیدگس ءَ نہ گوشتگ اَنت –

روکپتی بلوچستان ءَ انسانی ھکانی واستا کارکنوکیں بلوچ فعلین ءِ گوشگ اِنت کہ گوستگیں دو ماھانی تہ ءَ بیست ءَ چار بلوچ ایرانی آمیدگس ءَ پاھو داتگ اَنت ءُ چریشاں ابید ھم بازیں مردمے تیرانی آماچ کنگ ءُ کُشگ بیتگ اَنت –

زانگ بہ بیت گوستگیں ماہ ءَ جاوید دھکان نامیں مردمے ھم ایرانی آمیدگس ءَ پاھو داتگ اَت ءُ آئی ءِ پاھو دیگ ءِ ھلاپ ءَ ایرانی ایمنسٹی نیشنل ءَ ھوار دگہ انسانی ھکانی ادارھاں جاوید دھکان ءَ ھوار لس مردمانی پاھو دیگ ایر جتگ اَت –

ناگاھی ءَ اوتاک ءِ سر ءَ پاکستانی پوج ءِ اُرش بے سوب کتگ ءُ پوج ءِ گون ءَ جنگ داتگ، چریشی ءَ بازیں پوجی کارمندے مُرتگ ءُ زدگ بوتگ اَنت، پوج ءِ بالی گرد راکٹ ءِ گون ءَ نشانگ کُتگ ءُ تاوان داتگ – میران بلوچ

بلوچ سلاہ بندیں گل بلوچ لبریشن ٹائیگرز ءِ جارکش میران بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ سینزدہ فروری ءَ کلات ءُ کچی ءِ میانی دمگ ناگاھی ءِ کوہ ءَ گل ءِ اوتاگ ءِ سر ءَ پاکستانی پوج ءِ کمانڈواں اُرش کتگ ءُ اوتاک ءِ انگر کنگ ءِ جُھد کتگ-

جارکش ءَ گوَشتگ کہ پوج ءِ اُرش چیرجنگی رِپکانی آسرا بے سوب کتگ ءُ ھمے میان ءَ پاکستانی پوج ءِ گون ءَ مئے سرمچاراں جنگ داتگ، چریشی ءِ آسر ءَ پاکستانی پوج ءِ بازیں کارمندے مرتگ ءُ زدگ بوتگ اَنت –

میران بلوچ ءَ گوَشتگ کہ اوتاک ءِ نزیک ءَ کمانڈو ایرگیجگ ءِ وھد ءَ پاکستانی پوج ءِ بمب گواریں بالگرد راکٹ ءِ نشانگ کتگ چریشی ءَ چہ بالگرد ءَ سک تاوان رس اِتگ –

ریاستی چاریگ لیاقت ءِ سیادی چہ ڈیتھ اسکواڈ ءِ ٹولی ءَ بوتگ، آئی ءَ نشہ باپاری ءَ ابید دگہ چاگردی سلکاریاں ھم دزمانجنی کُتگ – میجر گْوھرام بلوچ

بلوچ سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ پنجگور ءَ ریاستی ڈیتھ اسکواڈ لیاقت ءِ کوش زمّہ واری منّ اِتگ ءُ گوشتگ کہ مئے سرمچاراں پنجگور ءِ بُنجاھی بازار ءَ چاکر آعظم چار راہ ءِ سر ءَ ریاستی چاریگ لیاقت ء عباس وتی نشانگ کتگ ءُ کُشتگ-

آئی ءَ گوشتگ کہ لیاقت ریاستی چاریگے بوتگ آ دوھزار ءُ پانزدہ ءِ گڈی ءَ گچک ءَ چہ تَتکگ ءُ پنجگور ءَ اتکگ- ریاستی چاریگ لیاقت گچک ءَ بوتگیں بازیں لشکرکشّیاں پاکستانی پوج ءِ ھمراھی ءَ ھوار پنجگور ءَ بلوچ پُسگانی چاریگری ءَ ھم آئی ءِ بلاھیں دستے مان بوتگ-

آئی ءَ گوشتگ کہ ریاستی چاریگ ءَ آئی ایس آئی ءِ گوَشگ ءِ پد ءَ ھمک روچ پنجگور بازار ءَ گچک ءِ جھمنندیں مردمانی چاریگ گری کنگ ءَ بوتگ کہ آ وتی کھول ءِ واستا وردنی مڈی زورگ ءَ پنجگور ءَ اتکگ بوتگ ریاستی چاریگ لیاقت ءِ سیادی چہ ڈیتھ اسکواڈ ٹولی ءَ بوتگ آئی ءَ نشہ ءِ باپاری ءَ ھوار دگہ چاگردی سلکاریاں ھم دزمانجنی کتگ-

جارکش ءَ گوَشتگ کہ چہ گچک ءَ آئی ءَ علی دوست نامیں بلوچ پسگے زورگریں پاکستانی پوج ءِ دست آوار جنائینتگ ءُ پد ءَ پاکستانی پوج ءَ آ شھید کتگ-

گڈسر ءَ بی ایل ایف ءِ جارکش میجر گوھرام بلوچ ءَ گوَشتگ کہ اے وڑیں درستیں ریاستی مردم مئے نشانگ ءِ توک ءَ اَنت کہ زورگیریں پاکستانی پوج ءِ واستا کار کنگ ءَ اَنت آ دراھیں مردم اِبرت ءِ نشانگ جوڑ کنگ بنت –

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ بیست پنچ روچ سرجم بوتگ – جئے سند متھدہ مھاز ءِ الھی بخش بکک، اللہ بخش ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان اتگ ءُ گوشتگ کہ بلوچستان ءِ تہ ءَ ریاست پُرایمنیں جھد ءَ ھلاس ءِ کنگ درسیں رپک، زوراکی، لشکر کشی، زانگولیں جونانی دور دیگ، لب ءُ ملام دیگ ءُ یکجاھیں کبراں چہ بے سوبی ءَ پد نوکیں پندل سازگ ءَ انت، نوں ریاست ءَ میان اُستمانی درسیں کانود ءُ انسانیت پُشت ءَ یلا داتگ سر زاھری ءَ اے پالیسیانی پلامرزی ءَ کنگ ءِ انت –

آئی ءَ گوشتگ کہ بلوچستان ءِ تہ ءَ پُرایمنیں جھد گیشی ءُ مھلوک ءِ ھمدستی گندگ ءَ پد ترس آماچیں پاکستان وتی مول ءَ مرادانی گرگ ءِ ھاتر ءَ ھنچیں گیر انسانی ڈیتھ اسکواڈ جوڑ کتگ کہ آ بلوچانی آوار جنی ءُ کوش ءَ ھوار انت –

ماما قدیر بلوچ ءَ گوشتگ کہ پُرایمنیں جھد روچ پہ روچ بلوچ راج ءُ دنیا ءَ چاپُلسکی گرگ انت – چریشی ءَ ترس آماچیں پاکستانی سامراج نوکیں پندل سازگ انت میان اُستمان ءَ گمراہ کنگ ءِ تگ دو انت –

ھاکم گوشداشت نہ کن اَنت بلے دیست کن اَنت، منی دوستیں براتانی درگیجگ ءَ منی کمک ءَ بہ کن اِت – اے گپانی درشان بیگواھیں حسان قمبرانی ءِ گوھار ءُ حزب اللہ قمبرانی ناکوزتک حسیبہ قمبرانی ءَ اسلام آباد ءَ رسانکدراں گوں گپ ءُ تران ءِ وھد ءَ کرتگ اَنت –

حسیبہ قمبرانی وتی دوستیگیں مردمانی شوھازگ ءَ اسلام آباد ءَ سر بیتگ- پاکستان ءِ بنجاھی شھر اسلام آباد ءَ بیگواھیں مردمانی کھولانی زھرشانی نندانک ءَ مروچی پنچ روچ سرجم بیتگ، کھولاں گوشتگ باندا زھرشانی روانک کشگ بیت اِنت –

حسبیہ قمبرانی ءِ گوشگ اِنت من وتی دوستیگینانی واستا پریات کنان ءَ دمبرتگ، مئے دوستیگیں مردماں آمیدگس ءَ پیش بہ کن اِت

آئی ءَ گوشت: من ءَ ھروھد ءَ چی ءَ ایشی ءَ لاچار کن اَنت من اے ڈیھ ءِ شھری آں ءُ کانود ءِ رد ءَ من ءَ انساپ لوٹ ایت –

آئی ءَ گوشت ھاکم مئے توار ءَ اشکُنگ ءَ نہ اَنت بلے مئے جاوراں گندگ ءَ اَنت -ما چہ بلوچستان ءَ اسلام آباد ءَ اتکگ اِنت دانکہ مئے گپاں گوش بہ دار اَنت ءُ دراھیں بیگواھیں مردماں انساپ بہ دے اَنت –

بیگواھیں بلوچانی کھولاں پنچ روچاں نیشنل پریس کلب اسلام آباد ءِ دیم ءَ نندانک جتگ ءُ نشتگ اَنت کہ اود ءَ جتا جتائیں تکاں بندوکیں مردماں اتکگ ءُ کھولانی گون ءَ پدردی درشان کرتگ –

زھرشانی کنوکانی نیمگ ءَ مروچی پریس کانفرنس بیتگ کہ اود ءَ آیاں گوشتگ کہ سر وزیر عمران خان بئیت ءُ بیگواھیں مردمانی کھولاں دوچار بہ کپ ایت ءُ آیاں گاریں مردمانی یل کنگ ءِ سدکی ءَ بہ دنت –

ھمے وھد ءَ آیاں گوشتگ کہ باندا بزاں کہ سَے شمبے ءَ اسلام آباد ءِ پریس کلب ءَ داں ڈی چوک ءَ یک زھرشانی روانکے کشگ بیت اِنت ءُ نندانک جنگ بیت –

سر بیتگیں ھالانی رد ءَ بلوچستان ءِ دمگ پنجگور ءَ تیرگواری ءَ یک مردمے زدگ بیتگ –

دی بلوچستان پوسٹ

تیرگواری ءِ وئیل تار آفس چاکر ھان چوک ءِ نزیک ءَ پیش اتکگ کہ اود ءَ ناشناسیں مردمانی تیرگواری ءَ لیاقت ء عباس جھمنند وشاپ زدگ بیتگ –

گیشیں ھالانی رد ءَ ناشناسیں مردمانی تیرگواری ءَ لیاقت زدگ بیتگ، تیرگواری ءَ پد پولیس سر بیتگ ءُ پولیس ءَ زدگ بیتگیں مردم چِست کرتگ ءُ نادراہ جاہ ءَ برتگ اود ءَ آئی ءَ وتی درد نہ سگ اِتگ ءُ بیران بیتگ –

کوش ءِ سوب زانگ نہ بیتگ، بلوچستان ءِ بازیں جاھاں تیرگواریانی ھال بیگ ءَ اَنت-

بلوچستان ءِ بازیں جاھاں بیگواہ بیتگیں مردمانی کھول وائس فار بلوچ مسنگ پرسنز ءِ سروکی ءَ گوستگیں پنچ روچاں نیشنل پریس کلب ءِ دیم ءَ زھرشانی نندانک ءَ نشتگ اَنت –

زھرشانی نندانک ءَ بھرزیروکاں بیگواھیں اصغر بنگلزئی ءِ کھول، بیگواھیں ڈاکٹر دین مھمد بلوچ ءِ جنک سمی بلوچ، بی ایس او آزاد ءِ بیگواھیں رھشون شبیر بلوچ ءِ گوھار، بیگواھیں زاکر مجید ءِ مات، حسان قمبرانی ءِ گوھار، حزب اللہ قمبرانی ءِ مات، بیگواھیں جھانزیب ءِ مات، بیگواھیں راشد ھسین ءِ مات ءُ کراچی ءَ بیگواہ بیتگیں نسیم بلوچ ءِ دیشتار ھانی بلوچ، بیگواھیں سعید اھمد شاھوانی ءِ مات ءُ بیگواھیں مھر گل مری ءِ جنک ءَ ھوار بیگواھیں مردمانی کھول ھوار اَنت –

مروچی پنچمی روچ ءَ کھول ءِ نیمگ ءَ پریس کانفرنس کنگ بیتگ- پریس کانفرنس ءَ وائس فار بلوچ مسنگ پرسنز ءِ نصر اللہ بلوچ ءُ کھولاں گوشت بیگواھیں مردمانی کھول وتی بیگواھیں مردمانی بیگواھی ءِ سر ءَ ترندی ءَ مازگی جیڑگانی آماچ اَنت ھمے واستا آیاں بلوچستان ءِ دراج کشیں ھند ءُ دمگاں درد ءُ گم بڈ ءَ بستگ ءُ یک اُمیتے ءَ اسلام آباد ءَ اتکگ ءُ زھرشانی کنگ ءَ اَنت دانکہ ڈیھ ءِ بنجاھی راجدادانی ءَ یکے آیانی توار گوش بہ دار اِیت ءُ آیاں ڈیھی کانونانی تہ ءَ انساپ بہ رسین اِیت –

آئی ءَ گوشت کہ انیگیں سرکار ءِ وھد ءَ باز مردم یلہ بیتگ کہ چریشاں بازیں مردم بازیں سالاں بیگواہ بیتگ اَنت ءُ اے یک شریں گامگیجے ءُ چریشی ءَ ما اشی ءَ جوانیں نگاھاں چاریں ءُ یل کنگ ءِ درچ برجاہ بہ بیت پرچاکہ یک نیمگے یل بیتگیں مردم ءِ کھول ءِ وشی درشان بنت ءُ دومی نیمگ ءَ بلوچستان ءِ بزگی ءُ بلوچستان ءِ مھلوک ءِ دلاں نپرت کمتر بنت –

آئی ءَ دیمتر ءَ گوشت گوست ءَ سروزیر عمران خان ءَ یک درشان ءِ داتگ کہ ما نہ لوٹ ایں ڈیھ ءِ تہ ءَ یک مردمے بیگواہ بہ بیت چُشکہ اے شریں گپے یک مردمے ءِ بیگواہ بیگ ءِ سوب ءَ آئی یِ کھول مازگی جیڑھاں ھوار بازیں مشکلانی دیمپان بیت اِنت ءُ چریشی ءِ سوب ءَ کھول ءِ زندگی تباہ ءُ برباد بیت اِنت ءُ ما پاکستان ءَ بیگواھی ءِ دامن ءَ پھک گندگ لوٹ ایں ھمے واستا ما سروزیر عمران خان ءُ ڈیھی ادارھانی سروکاں گوں دزبندی کن ایں آ بیگواھیں مردمانی جیڑہ ءَ انسانی ھمدردی ءِ بنیاد ءَ بہ چار اَنت ءُ بیگواھیں مردماں تچک ءَ یل بہ کن اَنت اگاں آیانی سر ءَ بھتام ھست آیاں آمیدگساں پیش بہ کن اَنت اگاں آ بیران بیتگ اَنت آیانی کھولاں گوشگ بہ بیت زورانسری بیگواہ کرتگیں مردمانی جیڑہ ءَ ڈیھی رھبندانی رد ءَ گیش ءُ گیوار کنگ بہ بیت ءُ زورانسری آوار جنگیں بیتگیں مردمانی واستا ھما کانود جوڑ کنگ بیتگ آئی ءَ تچک ءَ راجمان پتر ءِ دیم ءَ ایر بہ کن اَنت –

آئی ءَ گوشت ما اُمیت کن ایں سروزیر عمران خان ءُ ڈیھی ادارھانی سروک مارا نا اُمیت نہ کن اَنت ءُ پاکستان ءِ لگتمالیں اُستان بلوچستان ءَ اتکگیں بیگواھیں مردمانی گمزدگیں کھولانی سر ءَ دست ءَ ایرمرز اَنت ءُ مئے بیگواھیں دوستگیں مردماں یل کنگ ءُ سرجمیں زند ءَ اے درد ءَ جتا کنگ –

پریس کانفرنس ءَ آئی ءَ گوشت ما شمئے کمک ءَ سروزیر ءَ گوں دزبندی کن ایں آ بئیت ءُ مارا ءَ دوچار بہ کپ ایت ءُ مئے دوستگیں مردمانی یل کنگ ءِ سدکی ءَ بہ دنت ما چیئرمین سینٹ ءَ ھم دزبندی کرتگ کہ آ سروزیر ءِ گون ءَ دوچار کپگ ءَ وھد بہ دنت بلے چار روچ ءِ گوزگ ءَ پد ھم مارا مئے پسو نہ رس اتگ ھمے واستا ما پیسلگ کرتگ کہ سَے شمبے شانزدہ فروری دوھزاد ءُ بیست ءُ یک ءَ ما کھول یک روانکے ءِ دروشم ءَ اسلام آباد ءِ پریس کلب ءَ بہ گر داں ڈی چوک ءَ روئیں ءُ اگاں سروزیر دوچار کپگ ءَ وھد نہ کش ایت گڑا ما ڈی چوک ءَ نندانک جن ایں نندیں –

سر بیتگیں ھالانی رد ءَ پنجگور ءِ بازار چتکان ءَ انجمن تاجرانی نیمگ ءَ ھرتال کنگ بیتگ –

انجمن تاجران ءِ رھشوناں بسم اللہ چوک ءَ زھرشانی کرتگ ءُ گوشتگ کہ گوستگیں شپ ءَ پولیس ءَ چوکیدار ءُ دگہ مردم دزگیر کرتگ اَنت ءُ چریشی ءِ ھلاپ ءَ پنجگور ءَ ھرتال ءِ جار پِرینتگ –

ھرتال ءَ پنجگور ءَ باپاری بنجلاں ھوار بینک ءُ دگہ ادارہ بند بیتگ اَنت – پنجگور انجمن تاجران ءِ سروک خلیل اھمد دھانی ءُ دگہ مردماں گوشت کہ پولیس ءِ رویش ءِ ھلاپ ءَ مروچی ھرتال کرتگ کہ چریشی ءَ پولیس ءَ پنچ مردم دزگیر کرتگ ءُ برتگ اَنت –

زھرشانی وھد ءَ ڈی ایس پی ءُ انجمن تاجرانانی میان ءَ دپ جاکی بیتگ ءُ چرے پژدر ءَ ڈی پی او پنجگور حنیف بلوچ ءِ گوشگ اِنت انجمن تاجران پنجگور ءِ سروک ءِ رپورٹ ءِ پژدر ءَ گوستگیں روچ ءَ چوکیدار ءَ ھوار پنچ مردن دزگیر کرتگ اَنت ءُ پولیس ءِ کارگس ءَ بند کرتگ اَنت –

پنجگور ءَ گپتگیں مردمانی تہ ءَ پنجگور پریس کلب ءِ یک باسکے ھم ھوار اِنت دمگی مردمانی گوشگ اِنت ھر پنچیں مردم چوکیدار ءِ کوٹی ءَ جاڑیگ بیتگ اَنت –

سر بیتگیں ھالانی رد ءَ روکپتی بلوچستان ءِ بنجاھی شھر دزآپ ءَ دو گاڑیاں ٹکر وارتگ چریشی ءَ پنچ کس بیران ءُ شش مردم زدگ بیتگ اَنت –

اھوالکار ءِ رد ءَ روکپتی بلوچستان ءِ بنجاھی شھر دزاپ ءَ نود ءُ پنچ میل دور واش ءَ دو گاڑیاں ٹکر وارتگ ءُ چریشی ءَ پنچ مردم بیران ءُ شش زدگ بیتگ اَنت –

زدگ بیتگیں مردم اوگستان ءِ جھمنند اَنت ءُ دزاپ ءِ نادراہ جاہ ءَ برگ بیتگ اَنت –

اھوالکار ءِ رد ءَ اے مردم اوگستان ءَ اتکگ اَنت ءُ ایران ءِ جتا جتائیں ھنداں روزگار ءَ اتکگ اَنت ءُ راہ ءَ دگ ءِ وئیل ءِ آماچ بیتگ اَنت –

ھمے رنگ ءَ دزاپ ءُ ھاش ءِ میانی دگ ءَ دو گاڑیاں ٹکر وارتگ –

گیشیں ھالانی رد ءَ دزاپ ءُ ھاش ءِ دگ ءَ دو گاڑیاں ٹکر وارتگ چریشی ءَ ھردوکیں گاڑی سُتکگ اَنت ءُ گاڑیاں سواریں مردم ھم سُتکگ ءُ بیران بیتگ –

سامی ءَ ریاستی ڈیتھ اسکواڈ ءِ بنجل ءِ سر ءَ اُرش کتگ ءُ سَے کارمند کُشتگ اَنت ءُ پنجگور بالگتر ءَ سی پیک دگ ءِ سر ءَ پاکستانی پوج ءِ سر ءَ اُرش کرتگ دو کارمند کُشتگ اَنت – میجر گوھرام بلوچ

سربوتگیں ھالانی گوستگیں شپ ءَ کیچ ءِ دمگ سامی ءَ ناشناسیں سلاہ بندیں مردماں دیدگ نامیں مردمے ءِ بنجل ءِ سر ءَ اُرش کرتگ-

ھالانی رِد ءَ اے اُرش ھما وھد ءَ بوتگ کہ دیدگ گوں وتی ٹولی ءَ یکجاہ ءَ نندوک بیتگ اَنت -اُرش ءَ دیدگ ءِ سَے کارمند مُرتگ ءُ دگہ چار کارمند زدگ بوتگ اَنت –

دومی نیمگ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءِ ادار دوازدہ ءَ کیچ ءِ دمگ سامی ءَ ریاستی ڈیتھ اسکواڈ ءِ بنجل ءِ سر ءَ اُرش کتگ، آئی ءَ گوشتگ کہ اے بنجل ءَ ریاستی ڈیتھ اسکواڈ ءِ دمگی سروک دیدگ نامیں مردمے ءِ بوتگ، اے اُرش ءَ ڈیتھ اسکواڈ ءِ سَے کارمند مرتگ ءُ دگہ چار سک زدگ بوتگ اَنت-

جارکش ءَ دیمتر ءَ گوشتگ کہ ریاست ءِ چیردستی ءَ برجاھیں ڈیتھ اسکواڈ ءِ کارمند ناکہ تھنا بلوچ راجی جُنز ءِ بگیری ءَ کار کنگ ءَ انت بلکیں بلوچ پُسگانی آوار جنی، پاکستانی پوج ءِ گون ءَ لشکر کشیاں دُرستاں پیسر بوگ ءِ ھواری ءَ دُزّی ءُ ڈونگی، نشہ باپاری ءُ دگہ چاگردی سلکاری ءَ ھم ھوار اَنت-

آئی ءَ گوشتگ کہ ھما مردم کہ راجی آجوئی ءِ جُنز ءِ بگیری ءَ کہ کار کنگ ءَ اَنت آ ھچ وڑ ءَ بکشگ نہ بنت –

چریشی ءَ ابید بلوچستان لبریشن فرنٹ ءِ جارکش میجر گْوھرام بلوچ ءَ دگہ یک اُرشے ءِ زمہ واری منّ اِتگ –

میجر گْوھرام بلوچ ءَ رسانکدراں شنگ کرتگیں درشان ءِ تہ ءَ گوشتگ کہ پنجگور ءِ دمگ بالگتر ءَ سی پیک دگ ءِ پھازوکیں پاکستانی پوج ءِ چوکی ءِ سر ءَ سرمچاراں اُرش کرتگ –

آئی ءَ گوشتگ کہ یکشمبے ءِ بیگاہ ءِ ساھت پنچ ءَ بالگتر چکیں گوران ءَ لشکر کور ءِ ھند ءَ ھستیں پاکستانی پوج ءِ چوکی ءِ سر ءَ سرمچاراں مزنیں سلاھاں گوں اُرش کرتگ چریشی ءَ دو کارمند مرتگ ءُ یکے زدگ بیتگ –

میجر گوھرام بلوچ ءَ گوشتگ کہ اُرش کرتگیں چوکی سی پیک دگ ءِ سر ءَ اِنت ءُ اے دمگ ءَ پھازگ ءَ جوڑ کنگ بیتگ ءُ آئی ءَ گوشتگ زورگریں پوج ءِ سر ءَ اُرش بلوچستان ءِ آجوئی ءَ برجاہ مان اَنت –