TBP Balochi

نبشتانک: سے استال ابدمان بوت انت

نبشتہ کار:نودان بلوچ

دی بلوچستان پوسٹ

یک روچے شام ءَ پد من لوگ ءَ نشتگ ات آں من ءَ گونڈویے ءَ گْوشت ڈن ءَ ترا لھتیں مردم توار ءَ اِنت۔ من ھیران بوت آں، اے چونیں مردم انت کہ من ءَ لوٹگ ءَ انت۔ منی درستیں سنگت وھدے بیا اَنت گڑا من ءَ موباھل ءَ گوں کلو ہ دیم دے انت ءُ من آوانی ودار کن آں۔اے اولی رَند اَت ابید کلوہ ءُ گوانک ءَ منی واست ءَ سنگت ڈن ءَ ودار ءَ اِت انت۔ من سمجھت گڑا سنگتے بیت ءُ موباھل ءِ چارج کُٹ اِتگ انت ئِے۔
ھیر من وتی سواس پادءَ کرت ءُ دیم پہ دَر ءَ شُت آں،دَر پچ کرت من چٹ دگہ پگرے ءِ تہ ءَ شُت آں۔ مزنیں مدتے ءَ پد منی چمانی دیمءَ شہید بارگ جان اوشتاتگ اَت، من ھبکہ ءُ ھشک ھیران ات آن کہ بارگ جان ءَ گوں یک بچکندگے ءَ درائینت، پُلّک وش آھت نہ کن ئے۔ ؟ من گشت اڑے بارگ جان تو ئے ؟ جگر قربان بات آں، بیا لوگ ءَ، من دروازگ کمو مزن پَچ کرت ءُ ھمے دمان ءَ بارگ منی کِرّا رست ءُ من ءَ بَگل ئِے کرت، من ءُ بارگ دوئیں تا سک دیراں یکے دومی ءِ امبازان ات اِنت اناگہ یکے ءَ پشت ءَ ماں تھاری ءَ توارے دات
مئے پیمیں گریباں بہ ئے کن ئے یا ناں؟ منی گوشاں اے توار کپت ءُ من چک جَت دور دورءَ دومی نیمگءَ سے مردم اوشتاتگ اَت،بلے ھمے توار شہید میرل جان سبا ئیگ اَت من گشت کربان بات آں میرل تو دورءَ اوشتاتگ ئے؟ –

بیا اِت لوگ ءَ نند ایں دیوانے کن ایں، منی چماں ارس یل دات ءُ من شہید بارگ ءِ دست یل ءَ دات ءُ دیم پہ میرل ءُ ایندگہ سنگتانی نیمگ ءَ شت آں گڑا بارگ بچکندگ ءَ لگ اِت ءُ گشت ئِے۔میرل تئی دوستیگیں سنگت اِنت ھمے ھاتر ءَ تو آئی ءِ نیمگ پہ تچگ روگ ءَ ئے، ۔۔۔میرل منی نیمگءَ آیگ ءَ اَت ءُ ماں گلی ءِ میان ءَ یکے دومی ءَ امباز کت ءُ منی ھیال پشت ءِ سنگتانی نیمگءَ ات کہ باریں آ دوئیں سنگت کے کے انت کہ ھاموش انت!-

میرل ءِ وش آتک ءَ پد من میرل ءُ بارگ دیم پہ ایندگہ دوئیں سنگتانی نیمگ ءَ شُت ایں،اے ھدا من چے گِندگ ءَ آں، یکے منی جانیگ انت ءُ دومی واجہ شہید ڈاکٹر منان جان انت، سنگتاں من امبازاں زُرت، ءُ پد ءَ اشتاپ اشتاپی وش یھت کت انت، انچش کہ من چٹ ھیسک بوت آں، ءُ منی گپ دراگ ءَ نہ ات انت، منی واست ءَ گشیگہ ائید ءِ نوک ءَ ٹک دات۔

من وت ھیران ات آں کہ چے بوگ ءَ انت۔ من سک وشھال ات آں ، من گشت بیا اِت لوگ ءَ بِہ نند اِت چاہ ءُ تامے ور ایں، منا میرل ءَ گشت کہ تو اے مردماں زان ئے؟من بچکنداِت ءُ گشت ڈاکٹر ساب ءَ را کے پجا نیار ایت۔

منی ءُ ڈاکٹر منان ءِ اولی ءُ گڈی گند ءُ گدار ھمیش اَت، من وت ءَ وت چوں اشتاپ ات آں منی گپ سرجم ءَ نہ بوت انت چہ وشی من گلاں بال ات آں، ڈاکٹر ءَ گشت کہ سنگتاں گشتگ کہ اے لوگ مے سنگت پُلّک ئیگ انت۔ گڑا من گشتگ کہ پُلّک ءَ گند ایں پد ءَ وتی سپر راھادگ بئیں۔ من گشت ڈاکٹر ساب اے تئی مھر انت کہ تو گوں من گپ ءُ ھبر کنگءَ ئے وتی گران بہائیں وھد پہ ما ندر کنگ ءَ ئے۔ من گشت بارگ جان ، میرل جان ءُ جانیگ مارءَ ھچ لپٹ نہ کن انت۔ مروچی تئی مھرانی وجہ ءَ گندگ بوت انت، گڑا شہید بارگ جان گشت پُلّک تو مئے بی ایس او ءِ وھدے سنگت ئے ، مدام تئی سر ءُ سوج گپتگ اَنت بلے مئے دزگٹی انچو باز بوتگ انت کہ پرے زوت ءَ تئی نیمگءَ آیگ نہ بوتگ، تئی سرءَ ما سک باز امیت داشتگ کہ گوں تو ءُ راجءِ جہد ءَ گوں سنگتانی ھمراہ ءَ بَہ ایں، بلے تئی دزگٹی ءُ لاچاری ءَ ما سرپد بہ ایں، اے یک بلاھیں ھبرے کہ تو مروچی گوں ما دوچار کپتگ ئے۔

من گشت بارگ جان راستی ھبر ءَ پرچا چھر دے ئے،! پرچا چُش نہ گش ئے کہ پُلّک تو لگورے ئے۔ ؟ تو شہ مرگ ءِ ترسءَ جہد ءِ ھمراہءَ نَہ بَہ ئے،!!
میرل ءَ گشت پُلّک اے گپاں بِل کمو وھد ھست دل گش ایت گوں وت ءَ گپ ءُ ھبر بِہ کن آں، گڑا مھمانانی جاہ ءَ پچ کن رند ءَ من ءُ تو نند ایں دیوانے کن ایں، جاگھانی پچ کنگ ءَ پد لوگ ءِ تہ نشت ایں داں دیر ءَ ھبر ءُ ھال کرت، ڈاکٹر منان جان ءَ وتی کلوہ دات کہ من پَہ راج ءِ آجوئی ءِ ھاترءَ لوگ لوگ ءَ راوگ ءَ آں ءُ میرل جان ءُ بارگ جانءِ کمک ءَ مروچی من خاران ءِ تہ ءَ بازیں سنگتے ءَگوں گند ءُ نند کرتگ ءُ راج ءِ بزگی ءُ لاچاری ءِ واست ءَ شئوری راہ ءُ راھبنداں بی این ایم ءِ پلیٹ پارم ءِ سرءَ جہد داشتگ، اے راج ءِ واستا ھزارانی کساس ءَ بلوچ ورنا، کماش زندان ءَ انت ءُ ھزارانی کساسءَ شہید کنگ بوتگ انت۔ انچو زیکیں روچءَ گلام محمد ءُ لالا منیر جہد کنگ ءَ ات انت مروچی مئے نیام ءَ نیست انت۔ باندا بوت کنت کہ ڈاکٹر منان ءُ بارگ ءُ میرل شہیدانی لڑا ھوار بہ بنت ءُ راج ءِ وت واجھی جھد شمئے وڑیں نوجواناں وتی کوپگاں بیت، وت جہد بہ کن اِت ءُ ھمے کلوہ ءَ دیم ءَ بہ بر اِت۔ اے جہد داں آجوئی ءِ بام ءَ برجم بہ بیت۔ ڈاکٹر ءُ میرل ءُ بارگ ءَ داں شپ ءِ یک پاسے ءَ دراج کشیں شئوری ءُ زانشتی دیوانے اِش کرت، پد ءَ سنگتاں شپ ءِ نیم ءَ اجازت کرت ءُ شُت انت۔ اگاں من رَد مہ باں اے منی ھیال ءَ 2016 ءِ سال ات مدّتے پد ھال رس اِت کہ واجہ ڈاکٹر منان جان ماں مستونگ ءَ شہید کنگ بوتگ، ڈاکٹر ءِ شہادت ءَ من ءَ سک پریشان کرت ءُ مدام آئی ھما شپ ءِ دیوان منی ھیال ءِ تہ ءَ اَت کہ نشت اِنت ءُ دیوان کرت آئی ء را من مدام یات آں، ءُ لھتیں سال ءَ پد ءَ یک انچیں دردناکیں ھالے آتک کہ میرل جان مستونگ ءَ شہید کنگ بوتگ، پد ءَ آئی ءَ را خاران آؤرت ئِے ءُ من آئی گڈی دیدار آئی میتگءَ کرت شہید میرل جان ءَ گلزمین ھم گلزمین ءِ میار کنگ بوت ، شہید میرل جان ءِ درد کم نہ ات انت دگہ یک انچیں ھالے آتک کہ بارگ جان گوں دلجان ءِ ھواری ءَ ماں خضدار ءِ کوہاں 19 فروری ءَ شہید کنگ بوتگ۔ اے ھال ءَ منا سک دلپدرد کرت۔ بلے پد ءَ شہید بارگ ءِ داتگیں پنت ءُ ھبراں من وتی دل ڈَڈ کرت آئی مدام گشت پہ سرزمین ءَ شہید بوگ مرگ ءِ نہ انت ءُ بلکیں شھادت ءَ چے آشوب ردوم زیر ایت داں شہید ءِ پگر زندگ انت شہید زندگ انت ، شہید بارگ جان دومی روچءَ آؤرت اش ءُ خاران ءَ گلزمین ءِ میار ئِے کرت،اے سئیں رژنائیں استال مروچی مئے نیام ءَ ساڑی نہ انت بلے سئیں استالانی داتگیں زانت ءُ داتگیں سوچ ءُ پگر زندگ اِنت ءُ بلان انت، داں جھان ھست آ نمیران انت۔

مروچیگیں روچ شہید بارگ جان ءُ شہید دلجان ءِ سیمی سال روچ انت۔ سیمی سال روچ ءِ درگت ءَ من وتی شہیداں سھر چکیں دروت ندر کن آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بیگواھیں ڈاکٹر دین مھمد ءِ جنک سمی بلوچ ءَ چاگردی رسانکجاھاں گوشتگ کہ گوستگیں شپ ءَ پولیس ءُ دگہ ادارھاں نندانک ءِ ھلاس کنگ ءِ بیھار ھم داتگ، کیچ ءَ بلوچ یکجھتی کمیٹی ءَ زھرشانی نندانک ءِ پلامرزی ءُ پولیس ءِ ناروائیانی ھلاپ ءَ زھرشانی ءِ جار پِرینتگ –

اسلام آباد ءِ سارتیں مولم ءَ دگانی سر ءَ بیگواھیں بلوچانی مات ءُ گوھارانی ءُ زھگانی نندانک برجاہ،نندانک ءِ ھلاس کنگ ءَ گوستگیں شپ ءَ پولیس ءُ دگہ ادارھاں ھلاس کنگ ءِ پرمان کرتگ –

نندانک ءَ آجزیں مات ءُ میراث بلوچ ءِ وڑیں کسان عمریں چُک ھم ھوار اَنت، اسلام آباد ءِ شپ ءِ سارتی ءَ بلوچستان ءِ بیگواھیں مردمانی کھولانی چَم پاکستان ءِ سروزیر عمران خان ءِ راہ ءَ چاران اَنت دَہ دمان ءِ دوری ءَ پارلیمنٹ ءِ در ءَ نشتگیں پیر ءُ آجزیں ماتانی ھرس پارلیمنٹ ءِ مردمانی چماں تنی وھدی کپگ ءَ نہ اَنت –

گوستگیں شپ ءَ پولیس ءُ دگہ ادارھاں نندانک ءِ ھلاس کنگ ءِ پرمان کڈنی کرتگ اَت بلے کھولاں پولیس ءِ گپ رد کرتگ ءُ نندانک ءِ نندگ ءِ سوڑگ کرتگ –

گوستگیں روچ ءَ اسلام آباد پولیس ءَ نندانک ءِ پلامرزی کنوکیں بلوچ نودربر دزگیر کرتگ ءُ بازیں ادارانی دارگ ءَ پد بیھار داتگ ءُ یلہ داتگ اَنت کہ شما اے نندانک ءِ نزیک ءُ گوراں دوبر زاھر نہ بئے ءُ دومی نیمگ ءَ بیگواھیں ڈاکٹر دین مھمد بلوچ ءِ جنک سمی بلوچ وتی شنگ کرتگیں تارمر بندے ءَ وتی ھمراھانی رکینگ ءَ ھاتر ءَ بلوچ نودربر یک گور ءَ نندگ ءِ کڈن کرتگ اَنت –

نندانک ءِ سروکی ءَ وائس فار بلوچ مسنگ پرسنز ءِ سرکماش نصراللہ بلوچ ءُ زالبولانی رھشونی ءَ سمی دین بلوچ کنگ ءَ اِنت نندانک ءَ دَہ ءَ گیش کھول ھوار اَنت کہ آ گوستگیں شش روچاں اسلام آباد نیشنل پریس کلب ءِ دیم ءَ نندانک ءَ روانکے ءِ دروشم ءَ اسلام آباد ڈی چوک ءَ اتکگ اَنت ءُ مروچی سیمی روچ ءَ آیانی زھرشانی نندانک برجاہ اِنت –

ھمے وڑ گوستگیں روچ ءَ شال ءَ اسلام آباد ءَ نشتگیں کھولانی ھمدردی ءُ آیانی سر ءَ پولیس ءِ ناروائی ءُ زوراکیانی بگیری ءَ زھرشانی روانک کشگ اِتگ ءُ روانک ءَ بازیں کچے ءَ بلوچ سیاسی پاٹی ءُ پی ٹی ایم ءِ باسکاں بھر زرتگ –

ھمے رنگ ءَ مروچی ھم بلوچ یکھتی کمیٹی تربت ءِ نیمگ ءَ اسلام آباد ءَ نشتگیں بلوچ کھولانی پلامرزی ءُ پولیس ءِ زوراکیانی ھلاپ ءَ زھرشانی کنگ ءِ جار جتگ اَنت –

جار ءَ یکجھتی کمیٹی ءَ دزبندی کرتگ ءُ گوشتگ کہ مھلوک ءَ گوں دزبندی اِنت آ بلوچ کھولانی سر ءَ گوزوکیں زُلم ءُ زوراکیانی ھلاپ ءَ آیانی ھمراھداری ءَ بہ کن اَنت-

زانگ بہ بیت چریشی ءَ پیسر کراچی ءَ ھم بلوچ یکجھتی کمیٹی ءِ نیمگ ءَ اسلام آباد ءَ نشتگیں مردمانی پلامرزی ءِ ھمدردی ءَ زھرشانی کرتگ –

کھولانی لوٹ اِنت پاکستان ءِ سروزیر عمران خان بئیت ءُ مارا دوچار بہ کپ ایت ءُ مارا مئے بیگواھیں مردمانی بارو ءَ سدکی بہ دنت –

بلوچ لبریشن آرمی بلوچ راجی لشکر اِنت، وتی سرڈگار ءُ راج پھازی کنگ مئے سر ءَ المی اِنت، اے دشمن ءَ دراھیں زُلم ءُ زوراکیانی ھساب گرگ بیت اِنت – جیئند بلوچ

بلوچ لبریشن آرمی ءِ جارکش جیئند بلوچ ءَ وتی شنگ کرتگیں درشان ءِ تہ ءَ گوشتگ بی ایل اے ءِ سرمچاراں گوستگیں بیگاہ ءَ کوھلو ءِ دمگ کاھان ءَ پاکستانی پوج ءِ دو پوسٹانی سر ءَ اُرش کرتگ ءُ یک پوسٹے گپتگ ءُ سرجم ءَ سُتکگ – اُرش ءَ دشمن ءِ ھپت کارمند کُشتگ ءُ پنچ زدگ کرتگ اَنت -اے اُرش ءِ زمہ واری ءَ بی ایل اے منّ ایت –

آئی ءَ گوشتگ: بی ایل اے ءِ سرمچاراں گوستگیں بیگاہ ءَ کاھان ءَ زورگریں پاکستانی پوج ءِ 84ونگ ءِ جامک ءُ کوٹڑی پوسٹ ءِ سر ءَ ھمک نیمگ ءَ اُرش کرتگ کوٹڑی پوسٹ ءِ گرگ ءَ سوبمند بیتگیں – سرمچاراں اُرش ءَ گرگ ءِ ھواری ءَ ھپت کارمند جاہ پہ جاہ ءَ کُشتگ اَنت ءُ پنچ زدگ کرتگ اَنت ءُ بزدلیں دشمنیں پوج ءِ بازیں کارمنداں سِلاہ دور داتگ ءُ تتکگ اَنت – ھمے وھد ءَ سرمچاراں جامک پوسٹ مزنیں سلاھانی گون ءَ نشانگ کرتگ چریشی ءِ سوب ءَ دشمنیں پوج ءَ جانی ءُ مالی تاوان چِست کنگ کپتگ –

جارکش ءَ گوشت: سرمچاراں پوسٹ ءِ گرگ ءَ پد اود ءَ جاڑیگیں سِلاہ ءُ گولہ بارود مزنیں کساسے ءَ دستیگ کرتگ اَنت ءُ زورگریں پوج ءِ پوسٹ سُتکگ –

جیئند بلوچ ءَ گْوشت کہ بی ایل اے شاھو کنڈگ ءِ ھند ءَ ھستیں لیویز کارمنداں سرپد کن آں آ اے دمگ ءَ یلہ بہ کن اَنت ءُ بہ رو اَنت، چریشی ءَ پیسر ما باز براں لیویز کارمند بلوچ جنز ءِ دیم ءَ ملانک بیگ ءَ گستا بہ بنت بلے اے پوسٹ ءِ کارمند سرپد بیگ ءَ نہ اَنت – شاھو کنڈگ لیویز پوسٹ یل نہ کنگ ءِ سوب ءَ اے پوسٹ ءِ ترندیں اُرش کن ایں –

آئی ءَ گوشت بلوچ لبریشن آرمی بلوچانی راجی پوج اِنت، وتی سرڈگار ءُ راج ءِ پھازی ءَ المی ءَ کنت – مروچی دشمن ھما وڑ ءَ بزگیں بلوچ شھریانی لوگ ءُ گداناں سوچگ اِنت، مئے مات ءُ گوھاراں دگانی سر ءَ گریوْائینگ ءَ اِنت،چریشی ءَ مئے ورنایانی جزبگ ءُ ترومبشت ءَ گیش ءُ دشمن ءِ ھلاپ ءَ زھردارگ گیش بیگ ءَ اَنت – بی ایل اے اے دشمن ءَ دراھیں زُلم ءُ زوراکیانی ھساب ءَ گپت اِنت –

اسلام آباد ءَ بلوچستان ءَ بیگواہ بیتگیں مردمانی کھولانی گون ءَ پولیس ءِ زوراکیانی ھلاپ ءَ شال ءَ بلوچ یکجھتی کمیٹی ءِ نیمگ ءَ زھرشانی برجاہ اِنت، اسلام آباد ءَ بیگواھیں مردمانی کھولانی پارلیمنٹ ءِ باسکاں بھر زرتگ ءُ پدردی درشان کرتگ ءُ اسلام آباد ءَ زھرشانی ءَ ھواریں نُھ کس بیگواہ کنگ بیتگ اَنت –

شال ءَ بلوچ یکجتھی کمیٹی ءِ نیمگ ءَ اسلام آباد ءَ ڈی چوک ءَ نشتگیں بلوچانی ھمدردی ءُ اسلام آباد پولیس ءِ زوراکیانی ھلاپ ءَ روانک ءُ زھرشانی کنگ بیگ ءَ اِنت –

زھرشانی ءَ بلوچ زالبول ءُ چُک ءُ پی ٹی ایم ءِ باسکاں بھر زرتگ ءُ شال ءِ جتا جتائیں دگانی سر ءَ روانکی دروشم ءَ تران ءُ مُچی ءِ دروشم ءَ مُچ بیتگ ءُ اود ءَ زھرشانی برجاہ اِنت –

زھرشانی ءَ بیگواھیں مردمانی کھول ھم ھوار اَنت ءُ آیانی گوشگ اِنت کہ عمران خان ءَ گوشتگ ما پاکستان ءَ بیگواھیاں دیست نہ کن ایں ءُ بلوچستان ءَ ھزاراں مردم گار ءُ بیگواہ اَنت –

زھرشانی پی ٹی ایم ءِ رھشون آگا زبیر شاہ ءَ گوشت کہ مئے سرڈگار ءَ مئے کماشاں جنگ داتگ ءُ انگریز تاچینتگ ءُ اے ریاست ھما وڑ کنگ ءَ اِنت اگاں ھما وڑ کنت گڑا ما جنگ کنگ ھم زانیں گھگیری ءَ کم ایں –

ھمے وڑ ءَ اسلام آباد ءَ زھرشانی نندانک ءَ ھواریں نُھ کسانی بیگواھی ءِ ھال پیداک اَنت –

بیگواھیں ڈاکٹر دین مھمد ءِ جنک سمی بلوچ ءَ ٹویٹ کرتگ ءُ گوشتگ کہ مئے زھرشانی نندانک ءَ ھواریں نُھ کس گرگ بیتگ اَنت ءُ آیانی ھال نیست ءُ ما سَے پولیس کارگساں شتگ اِنت بلے کس ءَ پسو نہ داتگ ءُ مئے مردم دز نہ کپتگ اَنت –

اسلام آباد ءَ ڈی چوک ءَ نشتگیں بیگواھیں مردمانی کھولانی پدردی ءَ پارلمینٹ ءَ ھواریں باسکاں ھم بھر زرتگ ءُ پدردی کرتگ –

آیاں گوشتگ کہ ریاست ءَ آمیدگس جوڑ کرتگ، ریاست ءَ کانود جوڑ کرتگ ءُ گڑا اد ءَ نشتگیں بلوچ مات ءُ گوھار اتکگ اَنت اشانی ھچ گپ گوشدارگ بیگ ءَ نہ اِنت –

آیاں گوشت گڑا اے آمیدگس ءُ کانوداں ریاست کُبل بہ جنت ءُ بہ نند اِیت ریاست وت جلاد اِنت وت کُشندہ اِنت وت ھرچی کنت بہ کنت بلے اے زیردستیں مردمانی ٹپاں درمان کرت نہ کنت گڑا آیانی ٹپاں واد پِر مہ کنت –

انسداد منشیات کمیٹی ءِ زامران ءِ نیمگ ءَ شنگ بیتگیں درشان ءِ تہ ءَ گوشگ بیتگ انسداد منشیات کمیٹی زامران ءِ سروک ھاجی برکت بلیدھی ءِ سروکی ءَ گند ءُ نند کنوکاں منشیات ءِ دارگ ءِ واستا پھزداراں گوں دزبندی کرتگ –

آیاں گوشت بلیدہ ءِ مھلوک ءَ وتی کمک ءَ وت جھد کرتگ ءُ منشیات بازیں گر ءُ دار کرتگ اَنت –

گند ءُ کنوکیں مردماں گوں اسسٹنٹ کمشنر ءَ گْوشت کہ سرکار ءِ اے زمہ واری بیت کہ آ منشیات ءَ بند بہ کنت بلے بلیدہ ءِ مھلوک ءَ وتی کوپگ دمگ ءِ پھزداراں گوں ھم کوپگ کرتگ اَنت –

آیاں گوشت کہ اگاں پھزدار ءُ سرکار مئے گپاں دلگوش نہ کنت گڑا ما لاچار بہ ایں اگاں سرکار اے زر فروشاں لگام کرت نہ کنت گڑا مھلوک ءِ نسل ءَ جان ءِ تھپز کجام رنگ ءَ بیت اِنت –

آیاں گوشت کہ بلیدہ زامران ءِ لھتے منشیات فروشانی نام پھزداراں داتگ اَنت بلے پھزدار سارتی ءَ نشتگ ءُ مئے داتگیں ناماں بس چارگ ءَ اَنت –

آیاں گوشت کہ بلیدہ زامران ءِ مھلوک ءِ کمک ءُ سرجمجں مکران ءِ مھلوک ءُ دگہ جاھانی کمیٹیاں ھوار کن ایں ءُ تربت ءَ کمشنر ءِ کارگس ءَ انگیر کن ایں –

آیاں گوشت انسداد منشیات کمیٹیانی گیش کن ایں ءُ سرجمیں بلوچستان ءَ زھرشانی درچاں برجاہ داریں –

انسداد منشیات کمیٹی بلیدہ زامران ءِ جارکش ءَ گوشت کہ نِی مھلوک ءِ اوپار ھلاس بیتگ منشیات ءَ سرجمیں بلوچستان تباہ کرتگ ءُ منشیات فروشانی چو یل کنگ ءَ ھمے سما بیت بلوچستان ءَ سرکار نیست اِنت –

سارتیں شپ ءُ روچ ءِ گرانیں برانزاں بیگواھیں بلوچانی کھولانی نیمگ ءَ دو روچ ءُ شپاں اسلام آباد ڈی چوک ءَ زھرشانی نندانک برجاہ –

کھولانی گوشگ اِنت سروزیر پاکستان عمران بئیت ءُ مارا گپے دست ءَ بہ دنت ءُ آئی ءَ چہ مارا سدکی بہ بیت، بلے پارلیمنٹ ءِ چندے گامانی دوری ءَ اسلام آباد ڈی چوک ءِ سر ءَ سارتیں شپ ءُ روچ ءَ روچ ءِ برانزانی چیر ءِ نندوکیں بلوچستان ءَ اتکگیں بیگواھیں بلوچانی مات، گوھار ءُ آیانی کھول ءِ واستا تنی وھدی ھچ چوشیں زھمت ءِ نہ کش اِتگ کہ کھول چرھانی سَدک بہ بنت –

کھول گوستگیں پنچ روچاں اسلام آباد نیشنل پریس کلب ءِ دیم ءَ نندانک ءَ پد بیگواھیں مردمانی کھولاں گوستگیں دو روچاں روانکی دروشم ءَ اسلام آباد نیشنل پریس کلب ءَ داں ڈی چوک ءَ شتگ ءُ نندانکی زھرشانی ءَ نشتگ اَنت –

ھمے وڑ گوستگیں شپ ءَ وزیر داخلہ شیخ رشید ءِ گون ءَ بیگواھیں کھولانی گند ءُ نند بیتگ ءُ شیخ رشید کھولانی گون ءَ سدکی دیگ ءَ بے سوب بیتگ –

بیگواھیں مردمانی کھولاں گوشتگ وزیر داخلہ ءَ بیگواھیں مردمانی کھولانی گوں گند ءُ نند کرتگ، سدکی نہ کرتگ –

بیگواھیں مردمانی کھولاں مریم نواز ءَ پد وزیر داخلہ شیخ رشید ءِ گون ءَ گند ءُ نند بیتگ – کمک ءِ دزبندی کرتگ بلے آئی ءَ بیگواھیں مردمانی واتر آرگ ءِ ھچ سدکی نہ داتگ – شیخ رشید ءِ گون ءَ گند ءُ نند کنوکانی گوشتگ کہ وزیر داخلہ ءَ ھچ سدکی نہ داتگ زھرشانی ھلاس نہ بیت –

سرکاری نمائندگ ءُ بیگواھیں بلوچانی کھولانی گپ ءُ تران برجاہ اِنت بلے تنی وھدی زھرشانی کنوک ءَ سرکاری نمائندگانی میان ءَ ھچ گپ ءِ تپاکی نہ بیتگ –

ھمے وڑ ءَ بلوچ یکجھتی شال ءِ نیمگ ءَ اسلام آباد ءَ گار ءُ بیگواھیں مردمانی پد جنگ ءَ نشتگیں کھولانی گون ءَ ڈالچاری ءِ رویش ءِ ھلاپ ءَ مروچی شال ءَ زھرشانی ءِ جار پِرینتگ –

بلوچ یکجھتی کمیٹی شال ءِ جارکش ءَ وتی شنگ کرتگیں درشان ءِ تہ ءَ شال ءَ زھرشانی روانک ءِ جارپِرینتگ ءُ گوشتگ کہ بیگواھیں مردمانی کھولاں وتی مردمانی درگیجگ ءَ شال ءُ کراچی ءَ پد زھرشانی بنجل اسلام آباد ءَ جتگ ءُ نشتگ اَنت اود ءَ پھزدارانی نیمگ ءَ ناروائیں رویش ءِ رھبند گپتگ اَنت چریشی ءِ پژدر ءَ ھمدردی ءِ واستا شال ءَ یک زھرشانی روانک ءِ کشگ بیت اِنت –

آئی ءَ گوشت کہ اسلام آباد ءَ برجم کرتگیں زھرشانی بنجل ءَ ھپت روچ سرجم بیگ ءَ گوستگیں روچ ءَ یک روانکے ءِ دروشم ءَ ڈی چوک ءَ نندانک ءِ جتگ ءُ نشتگ اَنت ءَ ھمے راہ ءَ دمگ ءِ پھزدارانی نیمگ ءَ زھرشانی کنوک لَٹ ءُ کُٹ ءُ ترسینتگ اَنت –

آئی ءَ گوشت کہ بیگواھیں مردمانی کھول یک نیمگے ءَ وتی مردمانی درد ءُ رنجاں سربار اَنت ءُ دومی نیمگ ءَ اسلام آباد ءِ دگانی سارتیں شپ گوازگ ءَ اَنت ءُ دومی نیمگ ءَ پھزدارانی نیمگ ءَ سھت ءُ دمان آیانی ترسینگ سک پدردی اِنت –

آئی ءَ گوشت کہ کھولاں جمھوری رھبند کاربستگ ءُ پُرایمنیں زھرشانی روانک کش اِتگ ءُ ڈی چوک ءَ نندانک جتگ بلے پھزدارانی نیمگ ءَ زھرشانی کنوکانی سر ءَ لٹ ءُ کُٹ ءُ بیم دیگ ءَ ھچ رنگ ءَ اوپار کرت نہ کن ایں ءُ مروچی شال ءَ چریشی ءِ پژدر ءَ زھرشانی روانکے کشگ بیت ءُ ما نودربر گل، انسانی ھکانی ادارہ ءُ دراھیں انسان دوستیں مردماں روانک ءَ بھر زورگ ءِ دزبندی ءَ کن ایں –

ھب ءَ آر سی ڈی دگ ءِ نزیک ءَ تراک ناکیں شورو کل کُتگ ءُ گیس پائپ لائن تراکینتگ – لونگ بلوچ

سربوتگیں ھالانی رِد ءَ مروچی بلوچستان ءِ کار ءُ باری شھر ھب ءَ ناشناسیں مردماں آر سی ڈی دگ ءِ نزیک ءَ ھب ءُ اوتھل ءِ گیس پائپ لائن تراک ناکیں شوروانی گون ءَ تراکینتگ –

اُرش ءَ چہ گیس پائپ لائن تباہ بوتگ –

دومی نیمگ ءَ بلوچ آجوئی لوٹوکیں سلاہ بندیں گل لشکر ء بلوچستان ءِ جارکش لونگ بلوچ ءَ رسانکدراں وتی شنگ کرتگیں درشان ءِ تہ ءَ گیس پائپ لائن ءِ سر ءَ بوتگیں اُرش ءِ زمہ واری منّ اِتگ ءُ گوشتگ کہ مئے سرمچاراں کار ءُ باری شھر ھب ءَ آر سی ڈی دگ ءِ نزیک ءَ تراک ناکیں شورو کل کُتگ گیس پائپ لائن تراکینتگ –

جارکش ءَ گوشتگ کہ گیس پائپ لائن تراکینگے زمہ واری مئے گل لشکر بلوچستان من ایت –

شورما بند ءَ پاکستانی پوج ءَ گل ءِ اوتاک ءِ سر ءَ اُرش کنگے جھد کُتگ، مئے سرمچاراں جوانیں رِپکاں دژمن ءَ گوں جنگ داتگ ریاستی ڈیتھ اسکواڈ ءِ دو کارمند کُشتگ بازیں پوجی کارمندے زدگ کُتگ اَنت – مزار بلوچ

سربوتگیں ھالانی رِد ءَ گوَستگیں روچ ءَ بلوچستان ءِ دمگ کیچ ءَ کلاتک ءُ گیبن ءِ میانی کوہ شُورما ءِ بند ءَ مروچی دومی روچ ءَ ھم لشکر کشی برجاہ بوتگ –

مروچی لشکر کشی ءِ میان ءَ پاکستانی پوج ءُ سلاہ بندانی میان ءَ ٹوھیں جنگے بوتگ، جنگ ءِ آسر ءَ پاکستانی پوج ءُ دمگی ڈیتھ اسکواڈ ءَ جانی تاوانانی ھال انت – لشکر کشی ءَ پاکستانی پوج ءَ جنگی بالگردانی کمک ھم گون بوتگ –

دومی نیمگ ءَ بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مروچی سھب ءِ ادار ھشت ءَ کیچ ءِ دمگ شورما بند ءَ مئے گل ءِ اوتاک ءِ سر ءَ زورگریں پاکستانی پوج ءَ اُرش کنگ ءِ جھد کتگ، زورگریں پوج ءَ دمگی ڈیتھ اسکواڈ ھوار چار جنگی بالی گرابانی کمک ھم گون بوتگ، زورگریں پوج ءَ جنگی گرابانی سر ءَ دمگ ءِ تہ ءَ دیراں تاں تیرگواری ھم کُرتگ –

جارکش ءَ گوشتگ کہ سرمچاراں جوانیں رِپکاں گوں سنگر بستگ ءُ دژمنیں پوج ءِ سر ءَ اُرش کُتگ، اُرش ءِ آسر ءَ دژمنیں پوج ءِ دمگی ڈیتھ اسکواڈ ءِ ٹولی ءِ دو کارمند مرتگ وھدیکہ پاکستانی پوج ءِ بازیں کارمندے ٹپی بوتگ اَنت –

جارکش مزار بلوچ ءَ گوشتگ کہ اے جنگ شش اداراں تاں برجاہ بوتگ، گل ءِ سرمچاراں جوانیں جنگی رپک ءُ ھنراں گوں دژمنیں پوج ءَ جانی ءُ مالی تاوان چِست کنگ کپتگ ءُ وت در اتکگ ءُ مُھریں بنجلے ءَ شتگ اَنت-

دشت ءَ زونگ ءِ ٹاور ءِ نشانگ کنگے زمّہ واری ءَ منّ ایں – میجر گْوھرام بلوچ

سربوتگیں ھالانی رِد ءَ بلوچستان ءِ دمگ کیچ دشت ءَ ناشناسیں سلاہ بندیں مردماں مروچی سُھب ءِ ادار دہ ءَ چوٹ میتگ ءَ زونگ ءِ ٹاور ءِ سر ءَ اُرش کتگ ءُ ٹاور مانداشتگ-

ماندارگ ءِ سوب ءَ ٹاور ءِ سرجمیں مشینری سُتکگ اَنت ءُ ٹاور ءِ سگنل سرجم ءَ بند بوتگ-

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گھرام بلوچ ءَ رسانکدراں وتی شنگ کرتگیں درشان ءِ ٹاورے ماندارگے زمّہ واری منّ اِتگ گوشتگ کہ مئے سرمچاراں چار شمبے ءِ سُھب ءِ ادار دہ ءَ کیچ ءِ دمگ دشت ءَ سی پیک دگ ءَ چینی کمپنی زونگ ءِ موبائل ٹاور نشانگ کتگ ءُ تاوان داتگ-

جارکش ءَ گوشتگ کہ سی پیک دگ ءَ پاکستانی پوج نیٹ ورک دئیگ ءِ منسوبھانی سرا کار ءَ اِنت دانکہ بلوچ سرمچارانی سُرپُر ءُ وتی پوج ءِ پھازداری ءَ کت بہ کنت-

گڈسر ءَ میجر گھرام بلوچ ءَ گوشتگ کہ اے وڈیں ھرچ منسوبہ یے کہ راجی آجوئی ءِ زرمبشت ءَ تاوان دنت ما آھاں سوب مند بوھگ ءَ نئیل اِیں-

بیگواھیں مردمانی کھولانی ھمدردی ءِ واستا مریم نواز ءُ مزن نامیں اھوالکار حامد میر ءَ ھوار لس اھوالکار ءُ دگہ گلانی باسکاں پدردی ءِ درشان کرتگ –

دی بلوچستان پوسٹ

زھرشانی نندانک مروچی دومی روچ ءَ اسلام آباد ءِ ڈی چوک ءَ برجاہ اِنت اود ءَ بلوچستان ءَ اتکگیں مردمانی کھول کہ آیانی تہ ءَ شیرزالیں زالبول ھم ھوار اَنت ءُ بازیں زالبول ھم ھنچین اَنت کہ آ نادراھی ءِ آماچ بیگ ءَ ابید ھم وتی مردمانی شوھازگ ءَ اسلام آباد ءِ شپ ءَ سارتی ءُ روچ ءِ گرمیں برانزانی چیر ءَ نشتگ ءُ پریات کنگ ءَ اَنت –

بلوچ زالبولانی رھشونی ءَ بیگواھیں ڈاکٹر دین مھمد ءِ جنک سمی بلوچ کنگ ءَ اِنت ءُ گوستگیں شپ ءَ سمی بلوچ ءَ چاگردی رسانکجاھاں یک تامر بندے ءَ گوشتگ کہ بلوچستان ءِ مھلوک مئے سر ءَ بیتگیں زوراکیانی ھلاپ ءَ زھرشانی بہ کنت ءُ دومی نیمگ ءَ بلوچ یکجھتی کمیٹی کراچی ءِ نیمگ ءَ زھرشانی برجاہ اِنت –

بلوچ یکجھتی کمیٹی کراچی ءَ گوستگیں روچ ءَ جار پِرینتگ ءُ گوشتگ کہ مروچی کراچی پریس کلب ءِ دیم ءَ اسلام آباد ءَ بلوچستان ءَ بیگواہ بیتگیں مردمانی واستا نشتگیں بلوچ زالبولانی ھمدردی ءِ واستا کراچی پریس کلب ءِ دیم ءَ نندانکی زھرشانی کنت –

ھمے وڑ مروچی اسلام آباد ءَ مریم نواز شریف ءَ بیگواھیں مردمانی کھولانی گون ءَ اتکگ ءُ پدردی درشان کرتگ –

ھمے میان ءَ اھوالکاراں گپ کنان ءَ مریم نواز شریف ءَ گوشت کہ انیگیں ھاکم ھنچش بے وس بیتگ اَنت ڈی چوک داں پاریمنٹ کارگس ءَ دَہ دمان ءِ پند اِنت بلے انیگیں ھاکم عمران اے جاہ ءَ اتک نہ کنت –

مریم نواز ءَ گوشت کہ عمران ءِ دست ءَ اگاں ھچ بیت نہ کنت بلے آ بئیت ءُ اے زالبولانی سر ءَ دست ءَ ایرمرزی بہ کنت دانکہ نشتگیں مردمانی ھاتر وشتر بیت کنت –

مریم نواز ءَ گوشت کہ عمران چوشین بیان دنت کہ من پاکستان ءَ یک مردمے بیگواہ بیگ ءَ گندگ نہ لوٹ آں گڑا اے مردم کجا چہ اتکگ اَنت چی لوٹگ ءَ اَنت-

آئی ءَ گوشت آ اگاں چوشیں بیان مہ دنت یا اے گپ ءَ تچک ءَ بہ گوش ایت من ءَ لاش بلیک میل کرت نہ کن اَنت اے لاش نہ اَنت اے زنگیں انساناں دگانی سر ءَ نشتگ اَنت اسلام آباد ءِ دگ ءِ سر ءَ نشتگ اَنت –

ھمے رنگ ءَ چاگردی رسانکجاہ ءَ پاکستان ءِ راجمان ءِ وزیر فواد چوھدری ءَ نبشتگ کرتگ کہ “ اے مات پنجاپ ءَ زھرشانی کُرت کن اَنت کس اشاں پجار کاڈ ءِ جست ءَ نہ کنت ءُ نہ کُش ایت بلے پنجاپ ءِ ماتاں جست بہ کن اِت کہ آیانی چُک بلوچستان ءَ بساں ایرگیجگ ءُ کُشگ بیتگ اَنت اے زلمے نہ اِنت یا پنجاپیانی ھون سھر نہ اَنت –

دومی نیمگ ءَ بلوچ نودربر رھشون ڈاکٹر مھرنگ بلوچ ءَ فواد چوھدری ءِ ٹویٹ ری ٹویٹ کرتگ ءُ گوشتگ “ ما بلوچ وتی دوستیگیں مردمانی یل کنائینگ ءِ لوٹ ءِ واستا چریشی ءِ بدل ءَ ریاست ءِ اے بیان ءَ پسو سرپد بہ بہ ایں –

آئی ءَ گوشت تو بلکیں اے ریاست ءِ کانود ءَ لگتمال کنگ ءَ اِت بلکیں بیگواھی ءِ وڑیں سنگینیں جرمانی پلامرزی ءَ کنگ ءَ ئے –

ھمے درگت ءَ بلوچ نیشنل مومنٹ ءِ یوکے ءِ سروک ھکیم واڈیلہ فواد چوھدری ءِ ٹویٹ ری ٹویٹ کرتگ ءُ گوشتگ کہ “ پنجاب ءَ بلوچستان ءِ ھون ءِ ملینگ بندات کرتگ، نِی بلوچ لاچار بیتگ ءُ سلاہ اش چِست کرتگ، پنجاب ءَ بلوچستان ءِ سر ءَ زوگری کرتگ بلوچاں علم ءِ توار برز کرتگ زورگر ھروھد ءَ زیردستانی دیم ءَ اے وڑیں درشان دے اَنت –

ھمے وڑ بلوچ اھوالکار کازی ریھان ءَ ٹویٹ کرتگ ءُ گوشتگ “پنجابی ھاکمانی سیاھیں کردارانی سوب ءَ بلوچستان ءَ پنجاپیانی واستا نفرت چِست بیتگ اَنت – پنجاپی جرنلاں گریبیں مردم چاریگ جوڑ کرتگ اَنت –