TBP Balochi

نبشتانک: ماتی زبان ءِ ارزشت

نبشتہ کار: اقصہ حیدر

دی بلوچستان پوسٹ

زبان راجانی ھما وسیلہ انت کہ انسان چہ اشی ءَ وت ءَ ءُ دنیا ءَ گوں روژنائیں چماں چار ایت ءُ پجا کار ایت, چہ زبان ءَ ابید بنی آدم بے کس بیت ءُ چہ وتی پشپداں سدان کنت۔

بیست ءُ یک فروری 1999 ءَ یونیسکو ءَ ھمئے روچ پہ ماتی زبانانی میان اُستمانی روچ نامینتگ اَت۔ پرچہ کہ بنگلادیش ءِ نودربراں وتی ماتی زبان بزاں کہ بنگالی ءِ واستا جھد کتگ ءُ ھمے جھد ءِ میان ءَ آیانی ھون ریچگ بیتگ اَنت، بلے زبان انگت ءَ دیم ءَ آرگ نہ بوتگ ءُ اردو زبان راجی زبان اش کتگ بنگالی ڈالچار بوتگ۔

گڑا بنگالی نودربرانی نمیران بوگ ءَ پد دنیا ءِ قوماں وتی زبانانی سرءَ چم شانک دیگ بندات کتگ ءُ مئے بلوچ راج ءِ سر ءَ ھم فرض بیت انت کہ ما وتی بلوچی ءُ براہوئی زبان ءِ دیمروی ءِ واست ءَ آ دگہ قومانی وڑ ءَ وتی زبانانی دیم ءَ برگ ءِ جد ءُ جھد ءَ بہ کن اَنت- مئے راجی ڈبو ءُ زمہ واری انت ما آ دِگہ راجانی وڑ ءَ وتی زبانانی واستا ھمک وڑیں مراگش بِداریں ءُ وانگ ءُ نبشتہ کنگ ءِ سکین ءَ بہ دے ایں –

اگاں یک راجے وتی زبان ءُ دود ءُ ربیدگ ءَ چہ دل گوش مہ بیت گڑا آوتی قومی زبان ءَ پشت ءَ براگ ءَ اِنت ۔ انچو کہ مئے بلوچ قوم گندَگ ءُ زانَگ ءَ وتی زبان ءِ سر ءَ روچ پہ روچ پد کنزان انت ءُ آ وتی زبان ءُ دود ءُ ربیدگ ءَ چہ پد کنزان انت۔ مئے نوک آؤکیں نسل بزاں پدریچ وتی پُچ ءُ پوشاک ءُ بلوچے اَت ءَ چہ در روان انت۔

مئے سَجائیں بلوچ قوم ءِ سر ءَ پرز بیت اِنت کہ آ وتی قومی زبان ءِ دارگ ءِ واست ءَ جھد بِکنت ءُ دنیا ءِ راجانی وڑ ءَ بلوچ ءِ زبان ھم وانگ ءُ زانگ ءِ پڑا آرگ بہ بنت دانکہ زبان پدریچ گوں بہ بیت ءُ دیمروی بکن اَنت۔ اشی ءِ نپ اش انت کہ یکے وَ مئے زھانت گیشتر کارمرز بیت کنت, دومی اش انت زبان ھم پَشت نہ کپیت ءُ دیمروی کنان بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ سیمسراں “کُشگ ” بیتگیں پوریاگرانی وئیل ءِ پژدر ءَ روکپتی بلوچستان ءَ زھرشانیانی میان ءَ پولیس ءَ تیرگواری کرتگ ءُ دو مردم بیران بیتگ اَنت، روکپتی بلوچستان ءِ بنجاھی شھر زاھدان ءِ دارالعلوم امام جمعہ اھل سنت سیستان و بلوچستان ءِ سروک مولانا عبدالحمید ھم سراوان ءَ سر بیتگ ءُ اود ءَ مردمانی میان ءَ آئی ءَ تران کرتگ –

روکپتی بلوچستان ءِ سیمسراں پیش اتکگیں وئیل ءِ پژدر ءَ روکپتی بلوچستان ءِ جاور نگیگ بیتگ اَنت اود ءَ گوستگیں روچ ءَ ھرتال ءُ زھرشانی بیتگ اَنت –

زھرشانیاں مھلوک ءَ سرکاری کارگس ءُ دگہ چیز تاوان داتگ اَنت ءُ مھلوک ءِ گوشگ اِنت ایران ءِ سرکار بلوچانی لاپ ءِ شوھاز ءَ بند کنگ ءُ لاپ شوھاز کنوکیں مردماں کُشگ اِنت – چاگردی رسانکجاھاں ایران ءِ سرکار ءِ سر ءَ ایراد گرگ بیگ ءَ اِنت ءُ بلوچ تکاں اے وئیل پہ بلوچانی ھمک وھدی کوش گوشگ بیگ ءَ اِنت –

رودراتکی بلوچستان ءَ سیاسی گلانی نیمگ ءَ ھم اے وئیل ایرجتگ ءُ وئیل ءِ پَٹ ءُ پول ءِ لوٹ کنگ ءِ دزبندی کنگ بیتگ اَنت –

ٹی بی پی اھوالکار ءِ رد ءَ گوستگیں روچ ءَ زھرشانیانی میان ءَ پولیس ءِ تیرگواری ءَ دو کس بیران بیتگ اَنت –

زھدان ءَ بیست میل دور سرجنگل ءَ مھلوک ءَ زھرشانی کرتگ ءُ اود ءَ مھلوک ءَ پولیس ءِ کارگس ءِ سر ءَ اُرش کرتگ ءُ اود ءَ پولیس ءِ تیرگواری ءَ دو کس بیران بیتگ اَنت –

ھمے وڑ ءَ گوستگیں روچ ءَ روکپتی بلوچستان ءِ دمگ سراوان ءَ دالعلوم امام جمعہ اھل سنت ءِ سروک مولانا عبدالحمید ھم سر بیتگ –

اود ءَ مولانا عبدالحمید ءَ سراوان ءِ مردماں گوں دزبندی کرتگ ءُ گوشتگ کہ مھلوک وتی ایمنی ءِ زھرشانیاں بہ کنت ءُ سرکار ءَ ھمے سماہ ءَ بہ پِرین اِیت کہ ما چنڈے نان ءِ واستا در پہ دری ءَ تچگ ءَ اِنت –

آئی ءَ گوشتگ کہ مھلوک سرکاری کارگس ءُ پولیس ءُ دگہ ادارھاں تاوان مہ دنت آ وتی ھک ءِ واستا زھرشانی بہ کن اَنت ءُ سرکار ءَ ھمے لوٹ ءَ بہ کن اَنت مئے واستا شریں کار ءُ روزگار مارا بہ دنت –

آئی ءَ گوشتگ کہ سیمسر پہ لاپ شوھاز کنوکانی واستا پچ کنگ بہ بیت ءُ چوش مردمانی سر ءَ زوراکی کنگ مہ بیت –

اے گپ آئی ءَ سراوان ءِ عیدگاہ ءَ بازیں مھلوک ءِ مُچی ءِ میان ءَ کرتگ اَنت –

زانگ بہ بیت گوستگیں سَے روچ ءَ پیسر روکپتی بلوچستان ءِ سیمسر حق آباد ءَ ایرانی پاسداران انکلاب ءِ لشکر ءِ تیرگواری ءَ لس مردمانی رد ءَ کم چہ کم ءَ سِی ءُ ھپت کس بیران بیتگ اَنت کہ اشانی تہ ءَ دَہ کسانی نام دیم ءَ اتکگ اَنت آ دگہ مردمانی نام تنی وھدی زانگ نہ بیتگ اَنت ءُ روکپتی بلوچستان ءِ بازیں جاھاں انٹرنیٹ سروس بند کنگ بیتگ اَنت –

دی بلوچستان پتر ءَ سربوتگیں ھالانی رِد ءَ بلوچستان ءُ کراچی ءَ چہ زورانسری آوار جنگ ءُ بیگواہ بوتگیں پنچ مردم یل بوتگ انت –

یل بوتگیں مردمانی پجار شاکر ء ولی محمد جھمنند نظر آباد ، اسد ء عبداللہ جھمنند ملک آباد ءُ جمیل ء حبیب اللہ جھمنند نظرآباد مروچی تربت ءِ پوجی بنجل ءَ چہ یل بوتگ ءُ وتی گِس ءَ سربوتگ انت –

اھوالکار ءِ رِد ءَ ھر سئیں مردم گوستگیں سال ءَ مئی ءِ ماہ ءَ پاکستانی پوج ءِ دست ءَ آوار جنگ ءُ بیگواہ کنگ بوتگ انت –

فھد ء ابراھیم جھمنند تمپ ملانٹ ھم یل بوگے ھال آیگ انت کہ آ ھم چہ تربت ءَ پوجی بنجل ءَ یل بوتگ ءُ گِس ءَ سربوتگ –

دومی نیمگ ءَ یکشمبے ءِ روچ ءَ چہ کراچی ءَ ناشناسیں مردمانی دست ءَ آوار جنگ ءُ بیگواہ بوتگین سراج بلوچ جھمنند پنجگور گچک گوستگیں روچ ءَ یل بوتگ –

زانگ بہ بیت گوستگیں یک دھکے ءَ چہ گیش انت کہ بلوچستان ءِ تہ ءَ زورانسری آوار جنی رِد یکشل ءَ برجاہ انت – بیگواھیں مردمانی کھول گوستگیں بازیں سالاں چہ کراچی ءُ شال پریس کلب ءِ دیم ءَ چہ وائس فار بلوچ مسنگ پرسنز ءِ نیمگ ءَ برجاھیں بنجل ءَ وتی زھر شانی ءَ نبشتہ کنائینگ انت –

بلوچستان ءَ کار کنوکیں انسانی ھکانی گل بی ایچ آر سی ءِ رِد ءَ بلوچستان ءِ تہ ءَ انسانی ھکانی بگیری ءُ مردمانی آوار جنی ءِ جیڑہ روچ پہ روچ گیشتر بوان انت، مردمانی یل کنگ ءِ ھمراھی ءَ چد ءُ گیشتر مردم اوار جنگ ءُ بیگواہ کنگ بنت –

میان استمان ورکنگ گروپ بنام زورانسری یا گیر ارادی آوارجنی ءِ یکسد ءُ بیست سیمی چار ءُگزاری مراگش ءَ بلوچ ھیومن رائٹس کونسل بی ایچ آر سی ھوار بوتگ – مراگش ءَ بی آیچ آر سی ءِ انفارمیشن سیکرٹری کمبر مالک بلوچ ءَ بلوچستان ءِ جاورھال ءُ بلوچستان ءِ تہ ءَ چہ ریاست پاکستان ءِ نیمگ ءَ بلوچانی زورانسری اوارجنی ءِ درگت ءَ ورکنگ گروپ گیشیں سرپدی داتگ اَنت –

بی ایچ آر سی ءَ بلوچستان ءِ تہ ءَ زورانسری آوار جنی ءُ انسانی ھکانی لگتمالی ءِ دارگ ءُ بیگواھیں مردمانی یل کنائینگ ءِ ھاتر ءَ لوٹ کتگ کہ پاکستانی سرکار ءِ سر ءَ زور دیگ بہ بیت –

ھر وڑیں راجے ئِے ھاتر ءَ آئی ءِ راجدپتر ءُ راجدپتر جوڑ کنوکانی بستار راجی شان ءُ راجی پجار ءَ چہ کمتر نہ بیت- ماما قدیر بلوچ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ سی ءُ چار روچ سرجم بوتگ – سندھ ساگر پاٹی ءِ رھشون حافظ سکندر، گل شیر ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ زورگر مدامی ایردستانی پُرایمنیں جھدے ھلاس کنگے ھاتر ءَ زوراکی ءِ سیمسراں سرگوز کنت، بلوچانی آوار جنی ءُ زنداناں بندیگ کنگ ءُ آھاں سزا دیگ، شھید کنگ ءُ ویرانگاں چگل دئیگ، ءُ ریاستی پوج ءِ چانیگوار ڈیتھ اسکواڈ ءِ زور ءَ بلوچانی کُشت ءُ کوش ءُ پُرایمنیں جھدے بگیری ءَ پروپکنڈہ کنگ ھمک زورگرانی کار بوتگ –

آئی ءَ دیمتر ءَ گوشتگ کہ پُرایمنیں جھد وتی سوبمندی ءِ نزیک ءَ سر بیت گڑا زورگر وتی زاگری ءَ برجاہ دارگ ءِ ھاتر ءَ پُرایمنیں جھدے تہ ءَ بدگمانی پیدا کنگ ءِ ھاتر ءَ بازیں پندل سازیانی رِد ءِ گندگ ءَ کیت –

ماما قدیر بلوچ ءَ گوشتگ کہ ھر وڑیں راجے ئِے ھاتر ءَ آئی ءِ راجدپتر ءُ راجدپتر جوڑ کنوکانی بستار راجی شان ءُ راجی پجار ءَ چہ کمتر نہ بیت، ھمے ھاتر ءَ زندگیں راج وتی شھیداں ءُ دگہ جھداں کہ زوراکانی ایردست بوتگ انت اھاں مدامی یات کن انت ءُ آھاں ازت ءُ شرپ بکش انت –

بلوچستان ءِ بنجاھی شھر شال ءَ تیرگواری وئیلے ءَ یک مردمے بیران ءُ ھزدار ءَ دگ ءِ وئیلے ءَ یک مردمے بیران –

سربوتگیں ھالانی رِد ءَ بلوچستان ءِ بنجاھی شھر شال ءَ تیرگواری وئیلے ءَ یک مردمے بیران بوتگ –

پولیس ءِ رِد ءَ وئیل شال ءِ دمگ دشت تیرا میل ءَ دیم ءَ اتکگ کہ ناشناسیں مردماں عبدالطیف تیر باران کُتگ ءُ کُشتگ –

پولیس ءَ لاش دست گپتگ ءُ دمگی نادراھجاہ ءَ سرکُتگ ، ھژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ –

دومی نیمگ ءَ بلوچستان ءِ دمگ ھزدار ءَ دگ ءِ وئیلے ءَ یک مردمے بیران بوتگ –

اھوالکار ءِ رد ءَ شال داں کراچی ءَ رؤکیں شھدگ ءِ سر ءَ مسافر کشیں گاڑی ءَ یک مردمے ٹکر جتگ –

وئیل توتک کراس ءَ دیم ءَ اتکگ کہ گاڑی ءَ زھری ءَ آؤکیں مسافر کشیں گاڑی ءَ عبدالقادر محمد حسنی نامیں مردمے ٹکر جتگ –

ٹکر جنگ ءِ سوب ءَ عبدالقادر ھما دمان ءَ بیران بوتگ – بلوچستان ءَ ھمک روچ وئیلانی ھال پیداک اَنت کہ چرے وئیلاں بازیں مردمے بیران ءُ زدگ بیگ ءَ اَنت

صوفی سنگر لس بلوچے ءِ رنگ ءَ گل ءِ آمیدگس ءَ پیش نہ بیت گڑا آئی ءَ ترندیں سزا دیگ ءَ چک ءُ پد نہ بہ ایں – بیبگر بلوچ

بلوچ ریپبلکن آرمی ءِ جارکش بیبگر بلوچ ءَ رسانکدراں شنگ کرتگیں درشانی ءَ گوشتگ گل ءَ بندوکیں باسک ریاض پنّام صوفی سنگر جھمنند گڈگی بالگتر ءَ وتی ھند ءَ یک چاگردی جیڑھے ءَ دزمانجن بیتگ، دمگ ءِ مھلوک ءَ زنگ جتگ ءُ گل ءَ ھال سر کرتگ اش ءُ چریشی ءَ آ گل ءِ دیم ءَ پیش بیگ ءِ کڈن کرتگ بلے پیش بیگ ءَ ابید آ تتکگ، چریشی ءَ گل ءَ آئی ءِ بنکی باسکی ھلاس کرتگ –

بیبگر بلوچ ءَ دومی گلاں گوں دزبندی کرتگ ءُ گوشتگ کہ تتکگیں مجرم ءَ وتی تہ ءَ جاگہ مہ دے اَنت آ لس بلوچے ءِ رنگ ءَ گل ءِ دیم ءَ پیش نہ بیت گڑا آئی ءَ ترندیں سزا دیگ ءَ چَک ءُ پد نہ بہ ایں –

روکپتی بلوچستان ءَ ایرانی سیمسری لشکر ءِ دست ءَ جنگ بیتگیں مردمانی پژدر ءَ روکپتی بلوچستان ءَ دربندیں ھرتال، مروچی چیریں ادارھاں دو کس دزگیر کرتگ اَنت –

رودراتکی ءُ روکپتی بلوچستان ءِ سیمسری دمگ ءَ گوستگیں روچاں ایرانی لشکر ءِ تیرگواری ءَ بیران بیتگیں مردمانی نماز جنازہ وانگ بیتگ اَنت –

روکپتی بلوچستان ءِ دمگ سراوان ءَ مردماں نماز جنازہ ءَ بازیں کچے ءَ بھر زرتگ ءُ مھلوک ءِ زھر درشانی درشان کنگ ءَ اَنت –

چاگردی رسانکجاھاں ایرانی لشکر ءِ سر ءَ ایراد گرگ ءَ اَنت ءُ چاگردی رسانکجاھاں ھیش ٹیگ Dontkillbalochi کامرد بیگ ءَ اِنت –

گوستگیں روچاں روکپتی بلوچستان ءِ سیمسری دمگ حق آباد ءَ بیتگین وئیل ءَ لس مردمانی رد ءَ سِی ءُ ھپت مردم کُشگ بیتگ اَنت ءُ بازیں کچے ءَ زدگ بیتگ اَنت –

گوستگیں روچ ءَ سراوان ءَ دمگدار ءِ کارگس سوچگ بیتگ ءُ گاڑی ءُ دگہ جاہ ماندارگ بیتگ اَنت –

بیتگیں وئیل ءِ بگیری ءَ مروچی روکپتی بلوچستان ءَ لس مھلوکی جار ءَ زاھدان، ایرانشھر، سراوان، جگیکور ءُ بازیں جاھاں دربندی ھرتال اِنت کار ءُ باری بنجل بند اَنت ءُ دگانی سر ءَ سست روانی گندگ ءَ اتکگ –

سراوان ءِ جاورانی گر ءُ دار کنگ ءَ سراوان ءِ سیکورٹی ترند کنگ کنگ بیتگ ءُ گیشیں سیکورٹی اتکگ ءُ دمگ ءَ مردمانی سر ءُ مانسراں نگھپانی کنگ ءَ اَنت –

دمگ ءَ انٹرنیٹ بند کنگ بیتگ ءُ بازیں جاھاں شریں نیٹورک ھم بیگ ءُ نہ بیگ ءِ ھساب ءَ اِنت –

ھمے وڑ ءَ مروچی سراوان ءَ چیریں ادارھاں دو کس دزگیر کرتگ ءُ ناشناسیں زنداناں برتگ اَنت –

آوار جنگ بیتگیں مردمانی پجار مھمد شھرسان زئی ءُ عزیر شھرسان زئی ءِ جھمنند کلات دزک ءِ ناماں زانگ بیتگ اَنت-

دمگی مردمانی گوشگ اِنت کہ ھردویں مردم گوستگیں روچاں ایرانی لشکر ءِ تیرگواری ءَ کُشگ بیتگیں مردمانی تہ ءَ ھمیشانی ناکوزتک ھم ھوار بیتگ ءُ گوستگیں روچ ءَ سراوان ءَ اتکگ اَنت وتی جنگ بیتگیں مردمانی شوھاز ءَ ایرانی چیریں ادارھاں دزگیر کرتگ اَنت –

ھمے وڑ ءَ ایرانی پولیس ءَ زھرشانی مُچی ءَ آنسو گیس ھم جتگ ءُ چریشی ءَ چار مردم دمتوس بیتگ اَنت –

بلوچی زبان ءِ نامی ئیں شائر عبدالمجید گوادری ءِ سیمی سالگشت ءِ درگت ءَ آر سی ڈی کونسل گوادر ءِ چیردستی ءَ دیوان ءِ برجم دارگ بیتگ،

دیوان ءَ نامی ئیں ادیب پروفیسر اے آر داد ءُ چندن ساچ ءَ ھوار بازیں مردماں بھر زرتگ –

دیوان ءَ نمیرانیں شائر عبدالمجید گوادری ءِ ازم ءُ آئی ءِ بارہ ءَ گپ بیتگ ءُ آئی ءِ زند ءِ پڑ ءَ ندکاراں چمشانک داتگ –

نمیرانیں شائر عبدالمجید گوادری بلوچی زبان ءِ تہ ءَ مزنیں نامانی لڑا زانگ بیت اِنت کہ آئی ءَ بلوچ راجی سوت” ما چکیں بلوچانی ” پربستگ ءُ تنی وھدی ھمے سوت بلوچستان ءِ ھرجاہ ءَ ھما نندوکیں بلوچ اے سوت ءَ راجی سوت لیک اَنت ءُ آئی ءِ پِربستگیں سوت ءِ سر ءَ پھر درشان کن اَنت –

دیوان ءَ بھر زرتگیں ندکار ءُ مھلوک ءَ گوشت: نیمرانیں عبدالمجید گوادری ءِ نبشتگ کرتگیں شَیر بلوچانی ھروھد ءِ رھشونی ءَ کن اَنت کہ آئی ءَ وتی شَیرانی دروشم ءَ بلوچ راج ءِ رھشونی کرتگ ءُ انگت ءَ ھماھی ءِ شَیرانی رندپد ءَ ندکار ءُ شائر سکین زورگ ءَ اَنت –

عبدالمجید گوادری نوزدہ ءُ سد ءُ سِی ءُ ھپت ءَ گوادر ءَ پیداگ بیتگ ءُ سال دوھزار ءُ ھژدہ ءَ بیست ءُ سَے فروری ءَ نادراھی ءِ سوب ءَ بیران بیتگ –

ٹی بی پی اھوال

گوستگیں روچاں روکپتی بلوچستان ءِ سیمسری دمگ حق آباد ءَ ایرانی پاسداران ءِ انکلاب ءِ تیرگواری ءَ بازیں کچے ءَ تیل کشیں مردم کُشگ ءُ زدگ کنگ بیتگ اِت اَنت کہ آیانی سیادی سراوان ءُ دگہ ھندانی گوشگ بیتگ اِت اَنت –

سیمسراں جنگ بیتگیں باپاری ءُ لاپ شوھازیں مردمانی کوش ءِ پژدر ءَ چاگردی رسانکجاھاں ھوار روکپتی بلوچستان ءِ جاور نگیگ بیتگ اَنت مھلوک برانزگپتگ ءُ ایران ءِ پاسداران ء انکلاب ءِ بگیری ءَ لس مھلوک ءِ زھر ترند بیتگ اَنت –

سرکار ءَ روکپتی بلوچستان ءَ بازیں جاھاں رھوت ءُ انٹرنیٹ ءِ سِسٹم ھم بند کرتگ اَنت ءُ بازیں جاھاں رھوتی ھالرسانی سرجم ءُ ناسرجم اِنت –

داں سھب ءَ بندات بیتگیں زھرشانی سراوان ءَ دراج کش بیتگ ءُ روکپتی بلوچستان ءِ بنجاھی شھر ءَ ھوار بازیں جاھاں اے زھرشانی برجاہ اِنت ءُ چاگردی رسانکدراں شنگ بیتگیں تامراں بازیں دگانی سر ءَ مھلوک ءَ راہ ءُ درانی سر ءَ ٹائر مانداشتگ ءُ دگ بند کرتگ اَنت –

ٹی بی پی ءِ اھوالکار ءِ رد ءَ سراوان، بم پشت، زاھدان ءُ سرباز ءِ جاور نگیگ اَنت اود ءَ لس مھلوک پاسداران ء انکلاب ءِ بگیری ءَ زھرشانی ءُ اوگام جنگ بندات اَنت ءُ بازیں جاھاں تنی وھدی راہ ءُ دربند کنگ بیتگ اَنت –

ٹی بی پی ءِ اھوالکار ءِ رد ءَ سیستان و بلوچستان ءَ لس مھلوک ءَ ھم مروچی ھرتال ءِ جار پِرینتگ ءُ گوشتگ کہ مروچی سرجمیں دکان بند کنگ بہ بنت –

ٹی بی پی ءِ اھوالکار ءِ رد ءَ سراوان ءَ ایرانی پوج بازیں کچے ءَ سر بیتگ ءُ اود ءِ مردمانی سر ءُ مانسرانی سر ءَ نگاہ ایر اش کرتگ اَنت اے وھد ءَ کساس ھپتاد گاڑیانی کچ ءَ پوجی سر بیتگ اَنت –

سراوان ءِ شھر ءَ سرکار ءِ فرمانداری “ڈی سی ” ءِ کارگس ءُ جاہ لس مھلوک ءِ زھرشانی ءَ سوچگ بیتگ اَنت ھمے رنگ ءَ مھلوک ءَ دگہ سرکاری گاڑی چیز ھم مانداشتگ اَنت –

لس مھلوک ءِ گوشگ اِنت ایرانی پاسداران ء انکلاب ءِ تیرگواری ءَ کساس سِی ءُ ھپت مردم کُشگ بیتگ اَنت ءُ بازیں کساسے ءَ زدگ کنگ بیتگ اَنت ءُ جتا جتائیں نادراہ جاھاں دار ءُ درمان بیگ ءَ اَنت ءُ بازیں ٹپی ءِ مردمانی جاور ھم نگیگ اَنت ءُ بیت کنت بیرانیانی کساس گیش بیت کن اَنت –

دومی نیمگ ءَ روکپتی بلوچستان ءِ تپاکی گل ءِ سروک حبیب اللہ سربازی ءَ چاگردی رسانکجاھاں شنگ کرتگیں وتی تامر بندے ءَ گوشتگ “ ایرانی پاسداران ء انکلاب ءِ تیرگواری ءَ کساس پنجاہ مردم کُشگ بیتگ اَنت –

آئی ءَ دیمتر ءَ گوشتگ کہ اے مردم ناں دگہ بندشی مالے ءِ سر ءَ کُشگ بیتگ اَنت بلکیں اے مردم لاپ ءِ شوھاز ءَ چُنڈے نانے ءَ تیرانی گونڈلاں دُرشگ ءُ کُشگ بیتگ ءُ آیانی لوگ ءِ در بند کنگ بیتگ اَنت-

حبیب اللہ سربازی ءَ بی بی سی پارسی ءَ ھم اے گپ جتگ کہ سرکار بازیں وھدے ءَ بلوچاں کُشگ اِنت برے آیاں پاھو ءِ دار ءَ درنج ایت ءُ برے آیاں نانے چُنڈے ءَ تیرانی آماچ کنت –

آئی ءَ گوشتگ کہ جھانی انسانی ھکانی گل بلوچستان ءِ سر ءَ دلگوش بہ کن اَنت ءُ اود ءَ لس مردمانی کوشاں بہ دار اَنت –

نیکراھی مردماں ھوار لس مردمانی نیمگ ءَ اے بیتگیں وئیل ءَ ایرجنگ ءُ بلوچاں لُنکہ ءِ نان ءِ پچگرگ گوشگ ءَ اَنت –

ھمے وڑ ءَ سروک دار العلوم امام جمعہ اھل سُنت سیستان و بلوچستان ءِ سروک مولانا عبدالحمید ءَ ھم سراوان ءِ آیگ ءُ کُشگ بیتگیں مردمانی گون ءَ پدردی ءِ واستا آیگ ءِ جار جتگ –

مولانا عبدالحمید ءَ یک شنگ کرتگیں بیانے ءِ تہ ءَ کُشتگیں مردمانی وئیل ایر جتگ ءُ گوشتگ کہ اے وئیل کانودانی لگتمالی اِنت –

آئی ءَ دیمتر ءَ گوشتگ کہ سیستان و بلوچستان ءَ بدبھتی ءَ دگہ روزگار ءِ نہ بوگ ءِ سوب ءَ لس مردم لاچار اَنت کہ تیل ءِ پاباری ءَ ھوار اَنت – ءُ اے کار ءُ بار جرمے نہ اِنت ءُ بندشی ءِ نہ اِنت ءُ سرکار اگاں بندش جنت گڑا نشہ باپاری داراں بہ دار ایت –

آئی ءَ گوشتگ کہ ایرانی سرکار باید مھلوک ءِ پگار ءِ بندگ ءِ شوربندی ءَ بہ کنت دانکہ مھلوک چوشیں ساہ کشیں کاداں دزمانجن مہ بنت –

دومی نیمگ ءَ چاگردی رسانکجاھاں سراوان ءَ جنگ بیتگیں مردمانی واستا کارمرد بیتگیں ھیش ٹیگ ھم ایران ءَ درستاں سر بر بیتگ –

سیمسراں جنگ بیتگیں مردمانی ھون رنگ کار اَنت؟ یا آیانی ھون ھمے رنگ ءَ یکشل ءَ رچان بنت، اے اشانی واستا سرکار ءَ ھواریں مردم گامگیج زیر اَنت یا ھنچش اشانی ندارگاں چار اَنت؟ باید اشانی واستا الکاپیں گامیجے بہ زور اَنت ءُ لاچار ءُ نیزوریں مردمانی موز دیگ بہ بیت –