TBP Balochi

سر بیتگیں ھالانی رد ءَ شال ءِ دمگ بالی پَٹ دگ ءَ نوحصار ءِ ھند ءَ اے این پی ءِ بنجاھی اُستانی جارکش اسد خان اچکزئی ءِ جون دزکپتگ –

اسد خان اچکزئی پنچ ماہ ءَ پیسر آوار جنگ بیتگ ءُ آئی ءِ جون مروچی دزکپتگ –

جونے ءِ گندگ ءِ ھال ءَ پولیس بالی پَٹ دگ ءَ سر بیتگ ءُ اود ءَ دزکپتگیں جون ءِ پجار اسد خان اچکزئی ءِ نام ءَ زانگ بیتگ –

اسدخان اچکزئی عوامی نیشنل پاٹی ءِ راجمان پتر ءِ باسک اصغر خان اچکزئی ءِ ناکوزتک اِنت ءُ آئی ءِ بیرانی ءِ ھال اے این پی ءِ بنجاھی جوائنٹ سیکرٹری رشید خان ناصر ءَ راست کرتگ –

آوار جنوکانی بارہ ءَ تنی وھدی دگہ ھال پولیس ءَ دیم ءَ نیاؤرتگ، کوش ءِ سوب زانگ نہ بیتگ –

مراگش ءَ استاد ءُ نودربراں ھوار لس مردماں بھر زرتگ ءُ وانگ ءُ زانگ ءِ سر ءَ گپ کرتگ –

ایس ایف اے ءِ چیردستی ءَ 26 فروری 2021 ءَ تربت ءِ دمگ کِکن ءَ وانگ ءُ زانگ ءِ ارزشگ ءِ بارہ ءَ یک مراگشے برجم دارگ بیتگ، مراگش ءَ کِکن ءِ جھمننداں ھوار تربت ءِ زانتکار ءُ کواساں بھر زرتگ –

مراگش وانگ ءِ زانگ ءِ سر ءَ بیتگ، مراگش ءَ ککن ءِ زھگ ءُ زالبولاں ھم بھر زرتگ ءُ آیاں دیوان ءَ تران کنوکاناں دلبڈی داتگ –

مراگش ءَ پروفیسر عبدالماجد ناصر ءَ وانگ ءِ زانگ ءِ ارزشت ءِ سر ءَ گوشت کہ باید چوشیں مراگش کنگ بہ بنت کہ چرے مراگشاں چورہ، بزگ ءُ لاچاریں گونڈو وانگ جاھاں سرکنگ ءُ آ وانینگ بہ بنت –

ھمے وڑ ءَ ایس ایف اے بنجاھی کمیٹی ءِ رھشون درویش عزیز ءَ گْوشت وانگ ءُ زانگ بنی آدمانی تہ ءَ ھما ارزشت ءَ داریت کہ چراھی ءَ بنی آدم دیم ءَ جنزان کنت –

آئی ءَ گوشت کہ وانگ ءُ زانگ ءِ ارزشت ءُ ھما زھگانی پد جنگ کہ آ چہ وانگجاھاں دور اَنت ءُ آیانی پتاں اینکس گنجائش نیست کہ وتی زھگاں وانگ جاھاں دیم دات کُت بہ کن اَنت –

درویش عزیز ءَ گوشت کہ مئے مول ءُ مراد ھمے زھگانی وانگجاھاں سر کنگ اِنت – آئی ءَ گوشت کِکن یک پد منتگیں میتگے ءُ اے اولی رند اِنت کہ اد ءَ وانگ ءُ زانگ ءِ بارہ ءَ چوشیں مراگشے ٹھینگ بیتگ- آئی ءَ گوشت کہ ایس اہف اے پہ وانگ ءُ زانگ ءِ دیمروئی ءِ ھاتر ءَ ھمک کمکاری ءَ ساڑی اِنت-

اے مراگش ءَ بلوچستان ءِ نامدار ءُ کوھنتریں اکسکار کمانچر بلوچ ھم ھوار بیتگ ءُ آئی ءِ اکسکاری ساڑا ءُ سرٹیفکٹ ھم آئی ءَ دیگ بیتگ –

مراگش ءَ رائزنگ یوتھ آف بلوچستان ءِ جنرل سیکریٹری زرگل زبیر ءَ ھم بھر زرتگ ءُ آئی ءَ گوشتگ کہ ایس ایف اے ءِ جھد ستا کرزیت ءُ کِکن ءِ وڑیں جاھے ءَ ایس ایف اے سوبمندی ءِ پدراھی ءَ کنت –

مراگش ءَ ایس ایف اے ءِ بنجاھی کمیٹی ءِ باسک کامران گچکی ءُ نور اھمد تگرانی ھَ ایس ایف اے ءِ گوستگیں کارانی ھال پیش کرتگ ءُ دیم ءِ کارانی بارہ ءَ سرپدی داتگ –

مراگش ءَ شیر جان سید، اسد للہ بلوچ، کمانچر بلوچ، مجید بلوچ ءُ دیوان ءَ بھر زیروکیں آ دگہ زانتکاراں وتی ھیال ءُ لیکہ درشان کرتگ اَنت –

ھمے درگت ءَ مراگش ءَھواریں مردماں ایس ایف اے چیردستی ءَ 30 بے وسیں زھگاں وانگجاہ ءِ بستہ، کتاب، پنسل ءُ دگہ پکاری چیز بھر کرتگ اَنت –

سوبمندیں دیوانے ءِ برجم دارگ ءَ کِکن ءِ مھلوک ءَ ایس ایف اے ءِ منت گپتگ اَنت –

بلوچ یکجھتی کمیٹی کراچی ھنکین ءِ نیمگ ءَ شنگ بیتگیں درشانی ءَ گوشتگ کہ دود ءُ ربیدگ راجانی پجار اِنت ءُ دود راجاں زندگ داریت –

آئی ءَ درشان ءِ تہ ءَ گوشت: جھان ءَ دودمانیں راجاں وتی زبان، پوشاک، رسم ءُ رواجانی زندگ کنگ ءِ ھر وڑیں جھد ءُ کوشست کرتگ چریشی ءَ ھما راجاں جھان ءِ سازمان ءَ نا ایوک ءَ وتی بنھشت زندگ کرتگ بلکیں بلکیں جھان ءِ دیمروئی ءِ واستا جوان جوانیں کردماناں پیلو کنگ ءَ اَنت –

جارکش ءَ گوشت: بلوچ دود ءُ ربیدگ ھزاراں سالاں ھست اِنت ءُ بلوچ راج بازیں جنجال ءُ مُشکلاں ابید ھم وتی زبان، پوشاک ءُ دود ءُ ربیدگ ءِ دارگ ءَ سوبمند بیتگ اَنت –

آئی ءَ گوشت: ابید زبان ءُ دوداں راج وتی بنھشت ءَ ایر کرت نہ کن اَنت ءُ راجی دودمان ءِ دارگ ءِ واستا مارا ھروھد ءَ جد ءُ جھد ءِ راہ ءِ کَشگ ءِ المی اِنت دانکہ بلوچ راجی زبان ءُ دود ءُ ربیدگاں داشت کُت بہ کن ایں ءُ بلوچ راج ءِ بنپد ءَ مھکم کُرت بہ کن ایں –

جارکش ءَ وتی درشانی ءِ گُڈسر ءَ گوشتگ کہ بلوچ یکجھتی کمیٹی بلوچ دود ءُ ربیدگی روچ ءَ بیگواھیں بلوچانی گون ءَ ھمدردی ءِ یات ءَ برجم داریت –

آئی ءَ گوشت کہ دود ءُ ربیدگی روچ ءِ درگت ءَ چہ کراچی آرٹس کونسل ءَ داں پریس کلب کراچی ءَ پندی روانک ءِ کَش ایت ءُ بیگواھیں مردمانی بنجل ءَ بھر زور ایت ءُ ھمدردی درشان کنت –

بلوچ اسٹوڈنٹس ایکشن کمیٹی کراچی شھدربرجاہ ءِ ھنکین ءِ نیمگ ءَ کراچی شھدربرجاہ ءَ یک لبزانکی دیوانے کنگ بیتگ –

دیوان ءَ بلوچ شائر ءُ بلوچ لبزنکاراں ھوار نودربراں بھر زرتگ ءُ بلوچی لبزانک ءِ سر ءَ چمشانک ءُ شائراں وتی شیر ونتگ اَنت –

دیوان سَے بھراں بیتگ کہ اولی بھر ءَ نودربر لبزانک ءُ بلوچی لبزانک ءِ سر ءَ کواساں وتی لیکہ درشان کرتگ اَنت –

دیوان ءِ دومی بھر آزمانک ءُ نبشتانکانی سر ءَ بیتگ کہ اود ءَ بھر زرتگیں ازمانکاراں وتی آزمانک ونتگ ءُ دیوان وتی نیمگ ءَ دلگوش کرتگ –

دیوان ءِ سیمی بھر شائری بیتگ کہ بلوچی زبان ءِ شائراں ھرکس ءَ وتی وتی باریگ ءَ شَیر ونتگ ءَ دیوان وشنود کرتگ –

دیوان ءَ لس مھلوک ءُ نودربر ءُ لبزانکاراں ھوار بازیں کچے ءَ مردماں بھر زرتگ،دیوان ءَ ھنکین ءِ کارگشاد سنگت وسیم الیاس ءَ دیوان بھر زرتگیں مردمانی مِنت گپتگ ءَ دیوان ھلاس کرتگ –

پاکستان ءِ وتگڑیں زانتکار، اینکر پرسن رسانکدراں کائنت ءُ بلوچ راج ءِ کم شرپی ءَ کن انت بلے اے شری ءَ زان انت اے دمگ ءِ تہ ءَ بلوچ ھما راج انت کہ مال ءُ مڈیاں سر ریچیں سرڈگار ئِے واھند انت بلے گریبی ءِ زند ءَ گوازینگ ءَ انت – ماما قدیر بلوچ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ سی ءُ شش روچ سرجم بوتگ – جماعت اسلامی کراچی ءِ امیر نعیم الرحمن، جنرل سیکرٹری ھدایت الرحمن بلوچ، محمد اسماعیل مینگل ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ پاکستانی زورگریں پوج بازیں سلاہ ءُ ازباباں بلوچستان ءِ تہ ءَ لشکر کشی ءُ آوار جنیاں مھلوک ایر جنت ءُ آھانی سر ءَ زھر انت – اُستانی وزیر ءُ گزیر رسانکدراں کائنت ءُ دروگ بند انت پاکستانی پوج ءِ زوراکیانی چیردیگ ءِ جھد ءَ انت –

آئی ءَ گوشتگ کہ گوستگیں بیست ءُ چار ادارانی میان ءَ چہ کیچ ءَ پنچ مردم یل کنگ بوتگ بلے دومی نیمگ ءَ کاھان ءُ سبی دگہ پنچ مردم پوج ءَ زورانسری آوار جتگ ءُ بیگواہ کتگ اَنت –

ماما قدیر بلوچ ءَ گوشتگ کہ پاکستان ءِ وتگڑیں زانتکار، اینکر پرسن رسانکدراں کائنت ءُ بلوچ راج ءِ کم شرپی ءَ کن انت بلے اے زر زیریں دانشور شری ءَ زان انت اے دمگ ءِ تہ ءَ بلوچ ھما راج انت کہ مال ءُ مڈیاں سر ریچیں سرڈگار ئِے واھند انت بلے گریبی ءِ لکیر جھلیں زند ءَ گوازینگ ءَ انت –

ماما قدیر بلوچ ءَ گوشتگ کہ انو پاکستانی پوج ءَ سرجمیں بلوچستان ءِ تہ ءَ وتی سُر ءُ پُر گیش کرتگ انت – چار روچ ءَ پیش کاھان ءَ پوجی زوراکیاں چہ پد گوستگیں روچ ءَ بمبور ءِ تہ ءَ لشکر کشی کنگ بوتگ وھدیکہ ایندگہ دمگاں ھم مزنیں کچے ءَ لشکر کشیانی گمان انت –

گوستگیں روچ ءَ کاھان ءَ پوجی لشکر کشی ءِ میان ءَ پنچ مردم بیگواہ کنگ بیتگ اَنت ءُ لوگ ءُ جاگہ سوچگ بیتگ اَنت –

سر بیتگیں ھالانی رد ءَ بلوچستان ءِ جتا جتائیں ھنداں بیست ءُ چار اداراں یلہ کنگ بیتگ اَنت-

بیگواھیں مردمانی یل بیگ ءِ راستی بلوچستان ءَ گار ءُ بیگواھیں مردمانی واستا کار کنوکیں گل وائس فار بلوچ مسنگ پرسنز ءَ راست کرتگ اَنت –

وائس فار بلوچ مسنگ پرسنز ءِ رد ءَ گورکوپ ءَ شانزہ ماہ ءَ بیگواہ بیتگیں عارف ء ارشاد، ستمبر دوھزار ءُ نوزدہ ءَ پیدارک ءَ بیگواہ بیتگیں دودا ء راشد، دو سال ءَ چہ تربت ءَ بیگواہ بیتگیں فھد ء ابراھیم، ھوشاپ سنگ آباد ءَ دو سالاں بیگواہ بیتگیں نودربر دولت ء واھد بکش، چہ دوسالاں بیگواہ بیتگیں لیاقت ء داد مھمد جھمنند گوشندر بلیدہ ءَ یلہ کنگ بیتگ اَنت –

وائس فار بلوچ مسنگ پرسنز ءَ یل بیتگیں مردمانی یل کنگ وشی ءِ گوشتگ کہ ءُ سرکار ءَ لوٹ کرتگ کہ دراھیں بیگواہ بیتگیں مردم یلہ کنگ بہ بنت –

ھمے وڑ ءَ گوستگیں روچ ءَ کاھان ءَ پاکستانی پوج ءَ بیڑ برتگ ءُ پنچ کس آوار جتگ ءُ لوگ ءُ جاگہ سوتکگ اَنت –

لشکر کشی کوھلو ءِ دمگ کاھان ءُ سبی ءَ کنگ بیتگ اَنت اود ءَ پوج ءَ پنچ کس دزگیر کرتگ ءُ ناشناسیں زنداں برتگ اَنت –

دمگی مردماں ٹی بی پی ءَ گوں گپ کنان ءَ گوشتگ کہ کاھان ءِ دمگ گیشترانی ءَ پاکستانی پوج ءَ بیست ءُ سَے فروری ءَ لشکر کشی ءِ میان ءَ سَے کس کیرو ء شاہ میر مری، دینلی ء شاہ میر مری، باغلی ء کشو مری دزگیر کرتگ ءُ ناشناسیں زنداناں برتگ اَنت – ھمے رنگ ءَ کاھان ءِ جھمنند گل بھار ءُ آئی ءِ چُک انگلی چہ سبی ءَ پاکستانی چیریں ادارہ ءُ پوجی کارندھاِ دزگیر کرتگ ءُ چریشی ءَ پد آیانی بارہ ءَ ھچ ھال نیست –

ھالانی تہ ءَ گوشگ بیتگ کہ پوج ءِ دست ءَ آوار جنگ بیتگیں کیرومری ءِ لوگ ھم پوج ءَ سوتکگ اَنت ءَ بیگواہ بیتگیں مردمانی کچ گیشتر گوشگ بیتگ اَنت بلے آیانی پجار نہ بیتگ اَنت –

زانگ بہ بیت گوستگیں روچ ءَ ھمے دمگ ءَ ھواریں دمگ بمبور ءَ پوجی لشکر کشی برجاہ بیتگ اَنت کہ چریشی ءَ گن شپ ھیلی کاپٹراں ھوار چیریں بالیگاں ھم بھر زرتگ –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ ھزدار، شال ءُ کلات ءَ پاکستانی چاریگر ءُ لٹ ءُ پُل کنوکیں کمپنی کارمندانی سر ءَ بوتگیں بمب تراکانی زمہ واری منّ اِتگ اَنت –

جارکش جئیند بلوچ ءَ وتی درشان ءِ تہ ءَ گوشتگ کہ مئے سرمچاراں مروچی خضدار ءِ دمگ کٹھان ءَ سی پیک دگ ءِ سرا کار کنوکیں کمپنی ءِ کارمند وتی نشانگ جوڑ کرتگ انت – کارمندانی سر ءَ تراک ناکیں شوروانی (آئی ای ڈی) اُرش ھما وھد ءَ کُتگ وھدیکہ زورگپتیں پاکستانی پوج ءِ کاروان آھانی ھمراھی ءَ رؤگ ءَ بوتگ اَنت – اُرش ءَ لٹ ءُ پُل کنوکیں کمپنی ءِ چار کارمنداں ھوار دو پوجی کارمند زدگ بوتگ اَنت –

جارکش ءَ گوشتگ کہ اے کمپنی کارمند ھزدار ءَ وینگو ءِ دمگ ءَ سی پیک دگ ءِ سر ءَ کار ءَ بوتگ انت –
آئی ءَ گوشتگ کہ بلوچ لبریشن آرمی درسیں کمپنیاں مکن کنت کہ آ زورگرانی اے وڑیں لٹ ءُ پُل پراجیکٹساں چہ دزکش بہ بنت ، کہ ھماھانی سوب ءَ زورگریں پاکستان ءُ آئی ءِ ھمراہ دار بلوچ راج ءِ مڈیانی لٹ ءُ پُل ءَ کنگ ءَ انت –

بلوچ لبریشن آرمی جارکش جئیند بلوچ ءَ شال ءُ کلات ءَ ریاستی چاریگانی سر ءَ بوتگیں دزبمب اُرشانی زمّہ ھم زرتگ –

جارکش جئیند بلوچ ءَ گوشتگ کہ مئے سرمچاراں بیست ءُ سئے فروری ءَ شال ءَ گولی مار چوک ءِ سرا برجاھیں یک ھجام دکانے ءِ سر ءَ دزبمب اُرشے کُتگ –

آئی ءَ گوشتگ کہ اے ھجام ءَ پاکستان ءِ چیریں ادارھانی آلہ کار چلائینگ ءَ بوتگ انت، اشاں چہ چاریگری ءَ ھوار دگہ ایجنٹساں جاہ دئیگے کار گرگ بوتگ – اے اُرش ءَ چہ یک ریاستی کارمند ءَ ھوار یک لس مردمے ھم زدگ بوتگ –
جارکش ءَ گوشتگ کہ ما یک رندے پدا لس مردماں مکن کنیں کہ آ وتی پھازگے ھاتر ءَ زورگپتیں پوج ءُ آئی دمگی چاریگراں چہ گستہ بہ بنت –

جارکش جئیند بلوچ ءَ دیمتر ءَ وتی درشان ءِ تھا گوشتگ کہ بیست پروری مئے سرمچاراں کلات ءَ ٹولونٹی گیاوان نزیک ءَ پاکستانی پوج ءِ چیریں ادارہ ملٹری انٹیلجنس (ایم آئی ) ءِ کارمند نصیب اللہ زہری دزبمب اُرش ءِ نشانگ جوڈ کتگ، چریشی ءَ چہ آ سک باز زدگ بوتگ –
آئی گوشتگ کہ کارمند اھوالکار ءِ دروشم ءَ چارگردی ترامجاھاں پاکستانی پوج ءُ چیریں ادارھانی گوشگے پد ءَ اھانی ھک ءَ پروپکنڈہ کنگ ءُ بلوچ راج ءِ چارگری ءِ کتکاریاں ھوار بوتگ –

ٹی بی پی شونگال

چہ کدرتی آسراتیاں چکار بیگ ءَ ابید ھم بلوچستان ءِ مھلوک گریبی ءِ لیکہ ءَ چیرتریں زند ءِ گوازینگ ءَ لاچار اَنت، اِشی ءِ درستاں مستریں سوب دھکاں برجاھیں لوٹ ءُ پُلوکیں ءُ بدیں واکداری اَنت۔

بے کاری ءِ ودیتگیں کساس ءِ سوب ءَ بلوچ ورناہ، کہ ایشانی تہ ءَ بازیں چہ مزن شھدربرجاھاں وانگ ءِ آسر کنوک ءُ ڈگریانی واھند اَنت، تیل ءِ اسمگلنگ ءِ باپاری ءَ لاچار اَنت دانکہ آ وتی چُلانی آس روک ءَ داشت بہ کن اَنت۔ واکدار اے باپارءَ “اسمگلنگ” ءِ نام دے اَنت، بلے گولڈ سمتھ کِشک ءِ ھردوئیں نیمگ ءَ نشتگیں بلوچانی ھاتر ءَ اَے زر ودی کنگ ءِ یکیں وسیلہ اِنت، کہ اِشی ءَ ابید مزنیں واری، بزگی ءُ بےکاری ءِ سوب ءَ مھلوک پہ گژن ءِ زند گوازینگ ءَ لاچار بنت۔

اے تیلانی آرگ “گولڈ سمتھ کِشک” ءِ سر ءَ چہ بیت۔ یات بہ بیت گولڈ سمتھ کِشک بلوچانی راجدپتری سرڈگار ءَ دو بھرانی تہ ءَ، روبرکتی بلوچستان کہ پاکستان ءِ واکداری ءِ تہ ءَ اِنت ءُ روکپتی بلوچستان کہ ایران ءِ واکداری ءِ تہ ءَ اِنت بھر کنت۔ بلے بلوچانی گیشتریں بھر، ھاسیں پیمے ءَ بلوچ راجدوست بلوچستان ءِ اے بھر ءُ بانگ ءُ گولڈ سمتھ کِشک ءَ نہ من اَنت، پمیشکا کِشک ءِ دوئیں نیمگاں بازیں دھکاں چہ “سرجمیں آجوئیں بلوچستان” ءِ ھاتر ءَ گھگیری برجاہ اَنت۔

اے کِشک ءِ کش ءُ کِراں جھمنندیں ھزاراں لوگ، تیل بھا کنگ ءِ ھترناکیں باپار ءَ گوں بندوک اَنت، کہ اے آیانی یکیں زر ودی کنگ ءِ وڑ اِنت۔ اِشی ءَ ابید ھم کہ تیل ءِ باپاری ءَ بندوکیں مردماں ھردوئیں نیمگاں ایران ءُ پاکستانی پھازگی لشکر ءِ نیمگ ءَ کم شرپی ءِ دیمپانی کنگ کپ ایت۔ دانکہ اے شکایت ھم پاشک ءُ پدر اَنت کہ پھازگی لشکر چہ اے باپاری مردماں مزنیں کساسے ءَ زر رشوت ءُ بھتہ پہ زور گر اَنت۔ بلے اِشی ءَ ابید مردمانی وار کنگ ءِ یکشلی دارگ نہ بیت۔

22 فروری ءَ ھمے پیمیں یک وئیلے ءِ تہ ءَ ایرانی سیمسری ھنکین ھق آباد ءُ پاکستانی سیمسری ھنکین پروم ءِ نیام ءَ دو روچاں داں ھزارانی کساس ءَ مردم سیمسر ءِ ابید ءَ جار ءَ بندش ءِ سوب ءَ دارگ بیتگ اَنت۔ کسانیں وھدانی ھاتر ءَ سیمسرانی بندش ھمک روچی ئیں گپ ئِے بلے داں دو روچ ءَ اے بندش ءِ سوب ءَ مردمانی وردنی شئے آسر بیتگ اَنت، کہ اِشی ءِ سوب ءَ باپاری مردماں یک جاہ بیتگ اَنت ءُ زھرشانی بندات اِت کتگ اَنت ئِے –

بلے اے راستیں زھرشانی ایرانی لشکر ءَ گوں آسنی دستاں چیر ترینگے پیسلہ کُت ءُ زھرشانی کنوکانی سر ءَ تیر گواری بندات کُت، کہ اِشی ءِ سوب ءَ روبرکتی ءُ روکپتی بلوچستان ءَ سیادی داروکیں کم چہ کم یک درزنے ءَ گیشتر مردم ھما دمان ءَ بیران بیتگ اَنت، وھدیکہ بازینے ٹپیگ بیتگ اَنت۔ بازیں ھالانی رد ءَ بیران بیتگیں مردمانی کساس گیشتر گُشگ ءَ اَنت بلے اھوالکاری بندش ءِ سوب ءَ راستیں کساس زانگ بیگ ءَ نہ اَنت۔

اے زوراکی ءَ پد جتائیں شھرانی تہ ءَ پرشت ءُ پروش ءُ زھرشانی یکشلی بندات بیت، کہ اود ءَ دگ بند کنگ بیت اَنت، ایرانی پوج ءِ اولاک ءُ بنجل مان دارگ بیتگ اَنت۔ سَے شمبے ءِ روچ ءَ زھرشانی کنوکاں سراوان ءِ گورنر ءِ کارگس ءِ سر ءَ اُرش کُتگ اَت۔ زھرشانیانی درچ چار شمبے ءُ مروچی ھم برجاہ اِنت۔

گولڈ سمتھ کِشک ءِ دوئیں نیمگاں جھمنندیں بلوچانی ءُ ھاسیں پیم ءَ بلوچ راج دوستیں گلاں اے وئیل ترندیں لبزاں گوں ایر جتگ۔ بلوچ نیشنل موومنٹ (بی این ایم) کہ رودراتکی بلوچستان ءِ یک راج دوستیں گلے اے وئیل ءَ ایر جنان ءَ گُشتگے کہ “ بزگیں مھلوکانی سرءَ سیمسری لشکر ءِ تیرگواری پھکیں زوراکی ءُ انسانی ھکانی پادمالی اِنت۔ ھواریں مردم زیت سزا دیگ بہ بنت۔”

دومی نیمگ ءَ روکپتی بلوچستان ءِ یک سانمندیں مردم ءُ دارالعلوم سیستان ءُ بلوچستان ءِ مستر مولانا عبدالحمید ءَ اے وئیل ایر جتگ ءُ گُشتگے کہ بزگیں باپاری مردمانی ایرانی لشکر ءِ دست ءَ ھون قانودانی سر زاھریں پادمالی یے۔

نوکتریں وئیل اے پیمیں اولی وئیل نہ اَنت، گولڈ سمتھ کِشک ءِ کِشک ءُ کر ءَ نشتگیں مردم دھکاں چہ چُشیں زوراکیانی شکایت کنگ ءَ اَنت۔ کنٹگ جتگیں واڑ جتگ ءُ ھزاراں کھول بھر کنگ بیگ ءَ اَنت، کرناں چہ سیادی داروکیں مردم نی وتی سیادانی گندگ ءَ ھم ابید کم شرپ بیگ ءُ لَٹ ءُ کُٹانی دیمپانی کنگ کپگ اِنت ۔

دوئیں نیمگ ءِ لشکر ءِ کردگاراں اے دمگانی تہ ءَ بلوچستان ءِ آجوئی ءِ گرگ ءِ جزبگانی تہ ءَ گیشی ودی کُتگ۔ بازیں سلاھبندیں ءُ سیاسی گل سیمسر ءِ دوئیں نیمگاں بلوچستان ءِ آجوئی ءِ ھاتر ءَ جھد کنگ ءَ اَنت ءُ آیانی دیمروئی ءِ تہ ءَ گیشی ودی بیان اِنت۔ اے گھگیری گل چہ پاکستان ءُ ایران ءَ ھر دوئیں ڈیھاں چہ آجوئی ءِ لوٹ کنگ ءَ اَنت۔

ھندی اھوالانی رد ءَ باپاری مردماں تھنا ایرانی پوج ءِ زوراکیانی دیمپانی نہ اِنت بلکیں پاکستانی پوج ءَ ھم گوست ءَ بازیں رند ءَ مھلوک ءِ سر ءَ تیرگواری کُتگ ءُ بازیں مردم کُشتگ اَنت۔

انسانی اگبالانی بازیں گلاں اے دزبندی کُتگ کہ آجوئیں میان اُستمانی پَٹ ءُ پول کنوکیں گلاں ھمے دمگاں داں روگ ءِ موہ دیگ بہ بیت دانکہ اے وئیل ءِ پَٹ ءُ پول ءَ کُت بہ کن اَنت۔

بلوچ چہ کرناں اَے سرڈگار ءِ واھند بیتگ اَنت، آیاں وتی جندے سرڈگار ءِ سر ءَ دومی درجہ ءِ شھری جوڑ کنگ ءِ جھد ءَ سوبمند گندگ نہ بنت ۔

بلوچستان ءِ دمگ کوھلو ءُ ڈیرہ بگٹی ءِ میانی دمگ بمبور ءَ پاکستانی پوج ءَ لشکر کشی بندات کرتگ – لشکر کشی ءَ ھیلی کاپٹراں ھوار چیریں بالیگ ھم برز ءَ بال اَنت –

پوجی لشکر کشی ءَ بمبور ءِ دمگ ڈُل ءُ کش ءُ گوری ھنداں برجاہ اِنت – چم دیتگیں مردمانی رد ءَ پوجی ھیلی کاپٹراں جنگ زدگیں دمگ ءَ بازیں جاھاں پوجی کارمند ایر کنگ ءَ دیستگ اَنت ءُ گن شپ ھیلی کاپٹر تیرگواری کنگ ءَ ھم گندگ بیتگ اَنت –

اے دمگ مالداری ءَ بندوکیں مردم نندوک اَنت، اے بارہ ءَ پوجی واکداراں ھچ گپ دیم ءَ نیاؤرتگ –

گوستگیں روچاں ناسرجمیں ھالانی تہ ءَ پاکستان ءِ مزن اردی ادارھاں بلوچستان ءِ بازیں جاھاں ترندیں پوجی لشکر کشی ءِ سوڑگ کرتگ – لشکر کشی ءِ پژدر سی پیک دگ ءَ بازیں اُرشاں پد پاکستان چین ءِ بند ءُ ساچی ءِ پھزداروک ءَ بولان ءِ کش ءُ گوری دمگاں پوج ءِ سر ءَ بیتگیں اُرشانی پد کنگ بیتگ –

ھال ءِ رد ءَ یک شوربندی ءِ رد ءَ بلوچستان ءَ پیسر ءَ برجاھیں پوجی لشکر کشی ءَ ترندی ءُ دراج کش کنگ بیت اِنت – اے ترندیں لشکر کشی بلوچستان ءِ ھند مکران، بولان، کوھلو ءُ کلات ءِ دمگاں گوشگ بیتگ –

چار روچ ءَ پیسر پاکستان ءِ تھ ئِے کارانی وزیر شیخ رشید ءَ بلوچستان ءِ بنجاھی شھر شال ءَ آئی جی ایف سی ءِ گون ءَ گند ءُ نند کرتگ ءُ چریشی ءَ لشکر کشی ءِ ترند کنگ ءِ گمان گیش کنگ بیتگ اَنت –