TBP Balochi

نوزدہ سد ءُ ھپتاد ءُ یک ءِ پوجی کاروائیانی میان ءَ ھزارانی کچ ءَ بلوچ آوار جنگ ءُ بالیگرابانی سر ءَ برگ بوتگ انت کہ آھانی درگت ءَ روچ مروچی کسے ھم سرپد نہ انت بلے بلوچ چہ وتی پرزنداں ھچبر شمشکار نہ بوتگ انت – ماما قدیر بلوچ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل ماما قدیر بلوچ ءِ سرکماشی ءَ برجاہ، زھرشانی بنجل ءَ مروچی چار ھزار ءُ دو سد ءُ سِی ءُ سَے روچ سرجم بوتگ –
اے این پی ءِ بنجاھی کمک کار مستر شازیہ مروت، صوبائی سیکرٹری شبیر آفریدی، بنجاھی کونسل ء باسک نور اللہ اچکزئی ءَ بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدری درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ چہ اولی روچ ءَ بلوچ، پشتون، سندھی اے ریاستی زوراکیانی بگیری ءَ گپ جنگ ءُ پُرایمنیں زھرشانی کنان ءُ پیداک انت – ھما وھد ءَ بگر تاں روچ مروچی بلوچ پرزندانی آوارجنی ءُ بیگواھی ءِ رد یکشل ءَ برجاہ انت –

آئی ءَ دیمتر ءَ گوشتگ کہ زورانسری آوارجنیانی ھساب جنگ بہ بیت تو بس نوزدہ سد ءُ ھپتاد ءُ یک ءِ پوجی کاروائیانی میان ءَ ھزارانی کچ ءَ بلوچ آوار جنگ ءُ بالیگرابانی سر ءَ برگ بوتگ انت کہ آھانی درگت ءَ روچ مروچی کسے ھم سرپد نہ انت بلے بلوچ چہ وتی پرزنداں ھچبر شمشکار نہ بوتگ انت –

ماما قدیر بلوچ ءَ گوشتگ کہ مروچی ھم سندھی، بلوچ ءُ پشتون پاکستانی زوراکیانی آماچ انت مروچی ھم پہ آھاں زند گوازینگ گران انت – اد ءَ ھک گپ جنوک اوپار کنگ نہ بنت، آ آوار جنگ ءُ بیگواہ کنگ بنت، آھانی جون دیم دیگ بنت یا ٹارگٹ کنگ ءُ شھید کنگ بنت –

سر بیتگیں ھالانی رد ءَ بلوچستان ءِ دمگ کیچ ءِ بنجاھی شھر تربت ءَ گوستگیں شپ ءَ ناشناسیں مردماں پاکستانی پوج ءِ بنجل ءِ سر ءَ اُرش کرتگ –

اُرش گوستگیں شپ ءَ تربت سنگانی سر ءَ بیتگ کہ بیتگ کہ ناشناساں دزبمبے چگل داتگ، چریشی ءَ پوج ءَ جانی تاوان بوگ ءِ ھال بیتگ اَنت –

دومی نیمگ ءَ بلوچ سلاہ بندیں گل بلوچستان لبریشن فرنٹ ءِ جارکش میجر گوھرام ءَ تربت ءَ بیتگیں اُرش ءِ زمہ واری من اِتگ –

آئی ءَ گوشتگ کہ سرمچاراں دوشمبے ءِ شپ ءِ ساھت ھشت ءَ تربت سنگانی سر ءَ پاکستانی پوج ءِ یک چیک پوسٹے ءِ سر ءَ دزبمبے چگل داتگ – چیک پوسٹ ءَ جاڑیکیں کارمند بیران ءُ زدگ بیتگ اَنت، اے چیک پوسٹ سنگانی سر سائن بورڈ ءِ چیر ءَ جوڑ کنگ بیتگ –

میجر گوھرام ءَ گوشتگ کہ زورگریں پاکستانی پوج ءِ سر ءَ اُرش بلوچستان ءِ آجوئی ءَ برجاہ مان اَنت –

گوستگیں روچ ءَ روکپتی بلوچستان ءِ سیمسری دمگ حق آباد ءَ ایرانی سیمسری لشکر ءِ تیرگواری ءَ جنگ بیتگیں مردمانی تہ ءَ دَہ کسانی پجار بیتگ اَنت، رودراتکی بلوچستان ءَ سیاسی گلاں وئیل ایرجتگ –

سر بیتگیں ھالانی رد ءَ روکپتی بلوچستان ءِ سیمسری دمگ حق آباد ءَ ایرانی سیمسری لشکر ءِ تیرگواری ءَ دَہ کس بیران بیتگ اِت اَنت ءُ بازیں کچے ءَ مردم زدگ بیتگ اِت اَنت –

ایرانی لشکر ءِ تیرگواری ءَ جنگ بیتگیں مردمانی تہ ءَ دَہ کسانی ءُ زدگ بیتگینانی تہ ءَ پنچ زدگیں مردمانی پجار بیتگ اَنت –

بیران بیتگیں مردمانی نام یحیٰ گنگوزھی ء علی ھان، عبدالرحمان شھرسان زئی، عبدی شھرسان زئی ء بھار شاہ، سلمان شھرسان زئی جھمنند مھرستان، رھمان بکش دھواری ء بھار شاہ جھمنند سوران، عبدالوھاب دامنی جھمنند تابدیم، انس صاحب زادہ جھمنند سید آباد، عبدالغفور توتازئی، مھمد میربلوچزئی، مھمد نصرت زئی ء بشیر جھمنند سراوان ءِ ناماں زانگ بیتگ اَنت –

زدگ بیتگیں مردمانی تہ ءَ پنچ کسانی پجار بیتگ اَنت بھزاد آزادی ء رسول بکش جھمنند مھرستان، ادریس بلوچ زئی ء ھسن بلبل، مھمد مندازئی جھمنند سرجنگل کورین، سلمان ء جنگھان جھمنند پرکن سوران، عبدالستار دھواری ء خیر مھمد جھمنند کلپورگان ءِ ناماں زانگ بیتگ اَنت –

دمگی مردمانی رد ءَ زدگ بیتگیں مردمانی کچ سِی ءَ گیش اَنت ءُ اشانی تہ ءَ بیرانیانی گمان ھست اِنت –

دومی نیمگ ءَ کھولاں ساراوان ءَ زھرشانی بندات کرتگ ءُ انتظامیہ ءِ کارگس ءَ سر بیتگ اَنت –

زدگ ءُ بیران بیتگیں مردمانی سیادی تیل ءِ باپاری ءَ اِنت ءُ زدگ بیتگیں مردمانی تہ ءَ بازیں مردم پنجگور ءَ آرگ بیتگ اَنت –

دومی نیمگ ءَ رودراتکی بلوچستان ءَ بلوچ راجدوستیں گل بلوچ نیشنل مومنٹ ءَ ایرانی لشکر ءِ تیرگواری ءَ تیل باپاری ءَ جنگ بیتگیں مردمانی جنگ دردیگ ءُ ایرجتگ –

بلوچ نیشنل مومنٹ ءِ جارکش ءَ گوشتگ کہ روکپتی بلوچستان ءِ سیمسراں سیمسری لشکر ءِ تیرگواری ءَ دَہ بلوچانی شھیدی ءُ بازیں کچے ءَ دزگ بیگ پدردیگ اِنت ءُ اے وئیلاں ایر جن آں ءُ اے بلوچانی ھمک روچ ھونریچی ئیں کسھاں یک پدراھی ءِ –

آئی ءَ گوشتگ کہ اے زوراکی ءَ ھمینکس ایر جن آں ءُ تیل ءِ باپاری ءَ ھواریں گاڑیانی واھند ءُ ڈرائیورانی سر ءَ تیرگواری کنگ ءُ دَہ مردمانی شھادت یک پچیں زوراکی یے ءُ اے وڑیں وئیل ھمک وھد ءَ بلوچ راج ءِ سر ءَ برجاہ اَنت بلے میان اُستمانی برادری انگت ءَ بے توار اِنت –

ھمے وڑ ءَ فری بلوچستان مومنٹ ءَ ھم اے وئیل ایر جتگ ءُ گوشتگ کہ برطانیہ ءِ سامراج ءِ نیمگ ءَ کش اِتگیں لکیر گولڈ سمتھ لائن ءَ زیردستیں بلوچستان ءِ ھردوکیں نیمگاں تیل ءِ باپاری ءَ ھواریں بلوچانی سر ءَ تیرگواری کنگ بیتگ ءُ چریشی ءَ ایرانی لشکر ءِ تیرانی زد ءَ دَہ کس اتکگ ءُ شھید بیتگ اَنت –

آئی ءَ گوشتگ کی داں انیگ ءَ بازیں ھالانی تہ ءَ بازیں مردمے زدگ اِنت کہ چریشانی تہ ءَ بازیں زدگینانی جاور ناگیگ گوشگ بیگ ءَ اِنت، زدگ بیتگیں مردم جتا جتائیں نادراہ جاھاں برگ بیتگ اَنت ءُ چریشی ءَ بیرانیانی گیشی ءِ گمان بیت کنت –

نبشتانک: دَمک

نبشتہ کار: حیر جان قدیر

دی بلوچستان پوسٹ

یک سکّیں دراجیں دَمکے اَت کہ من روان روان بس روان اِتاں ۔دَمک اَنچو دراج اَت کہ ھلاسی ءِ نام ئِے نہ زانت من ءَ لھتیں کتاب ءُ ند ھم گون اَت ، من کدم جنگ بندات کُت اول سر ءَ دَمک ءَ کَس نیست اَت من تھنا جُنزان اِتاں دیم پہ منزل ءَ کش ءُ کِرّ ءَ ھچ تِرک ءُ توار اوں من اِش نہ کت من ءَ گُش ئے بیمے تہ ءَ پُترگ ءَ بوت۔

بلے من دل ڈڈ کت ءُ روان بوتاں داں اچانک ءَ لھتیں کُچک منی دیم ءَ دَر اَتک ، منی سر ءَ بندات ئِے کُت وکّگ من پشت ءَ نپ کنز اِتاں اوشتاتاں داں کُچکاں ھم وتی دنتان ڈنّ ءَ کرتگ اِت اَنت انچو وکّگ ءَ اِت اَنت ، من ھمے جیڑ اِت من نوں ھچ ھال ءَ پشت ءَ نہ کنزاں تُری اے من ءَ دِرّ دِرّ بکن اَنت-

کُچکاں منی راہ داشتگ ءُ نوں بلے من ءَ انگِرّ کنگ ءَ اَنت پہ ورگ ءَ منی کتاباں چہ منی دست ءَ چاپگ ءِ جُھد اِش کُت بلے من ھمت کُت وتی کتاب وتی سینگ ءِ سر ءَ ایر کُت اَنت ءُ کدم دیم ءَ جنان بوتاں باریں چون کُچک من ءَ دپ جن اَنت یا ورانت؟ من جُنزان بوتاں من وتی گام تِیزتر کُت اَنت ءُ پشت ءَ چَک نہ جت داں کُچکانی توار دور بوان بوت-

پد ءَ من گون ایوکی ءَ وتی کدمانی برمش ءَ اِش کنگ ءَ بوتاں دمَک چٹ ھاموش اَت بس منی پادانی آواز ءَ اِے دَمک ءِ تہ ءَ شُور کُتگ اَت ، من ءَ ھمے گُمان بوت گش ئے منی کتاب ، منی گال دَمک ءِ تہ ءَ تالان اَنت ءُ چہ من ساری اِت انت ، گش ئے یک توارے منی گوشاں پیداک اَت کہ نوں دْرست سرپد اِت اَنت کہ اِے میتگ ءَ زانت ءُ پھم ،سرپدی ، اِلم پیدا بوگ ءَ اِنت ، جنین چہ مردانی پنجگاں دراگ ءَ اِت اَنت اِے دَمک زانت ءِ رنگانی تہ ءَ رنگ زورگ ءَ اَت کتاب گوں من گپ کنگ ءَ اِت-

اَنت کہ بازیں کُچک تئی دیم ءِ دارگ ءِ کوشش کنت ، لھتیں کُچک تئی باپُشت ءَ سُک سُک ءُ وک اِیت بلے تئی گال ءُ زبان ما اِیں کدم مدام دیم ءَ بہ کپ اِیت کدم پُشت کنزگ مہ زانت-

اچانک ءَ منی ھیال پْرشت داں من روان اِتاں دَمک ءَ ، ھمے دمان ءَ مئے بازار ءِ مسیت ءِ پیش امام منی دیم ءَ کپت ءُ گشت ئِے ، کئی چُک ئے تو گرم آرک ءَ یلہ ئے؟ اسکول ءَ بوتگ ئے ؟ تئی پت ءَ من ءَ چینچو رند ءَ گشتگ اے اسکول جنکی جاگھے نہ اِنت بلے سرپد نہ بہ ئے ، روچ ءِ دو بج ءَ جنکیں چُکے ایوک ءَ دَمک ءَ ویل اِنت ، من بس ھمے پسّو دات ، واجہ تو روچ ءِ دو بج ءَ گشت کن ئے گڑا من پرچا گشت نہ کناں ، ھُدا ءِ کتاب ءَ مان اِنت کہ جنین ءِ گردگ وھد ءُ پاس اِش انت یا جنک لوگ ءَ بہ نند اِیت ھچ مہ کنت؟ –

مُلا ءَ منی گپ وش نہ بوت ءُ زھر زھر ءَ من ءَ چار اِت ئِے ءُ شت ، دمک ءُ منی پادانی توار اَت بس ھمے دنیا چینچو وش اِنت کہ کسی توار نیست ، من وتی ھیالانی تہ ءَ کتاب منی منزل ءَ وت ساچ اِیت منی زانت منی رھبری ءَ وت کنت ، اِلم من ءَ جاگھے سر کنت ، سرپدی من ءَ وتی جند ءِ زمین ءَ سرپد کنت ، گش ئے چو سیاہ مار ءِ پیم ءَ زَمزیل پمن پیداک اَنت ، من ءَ اِشکیل اِش کُت من وتی ھاٹیگ دور نہ دات منی کدم دیم ءَ کپت اَنت ، منی دست ءِ جولاں جت بلے منی دست ءِ کتاب نہ کپت اَنت من نبشتہ کُت-

من وتی آواز بُرز کُت کوکار کُت ءُ گشت لھتیں زالماں دگہ کار نیست ابید دِگر ءِ پادانی کَشگ ءَ یا بندگ ءَ بلے داں کد تو من ءَ دار ئے منی دپ اِش دوتک ، منی چم اِش دوتک اَنت-

لھتیں تاک من ءَ گون اَت اِشانی سر ءَ من وتی مارشت نبشتہ کُتگ اِت اَنت نگیگیں جاور ءُ وتی سپر ءِ بزّگی نبشتہ کُتگ اِت اَنت ۔ اِیشاں منی تاک دِرت ءُ دور دات اَنت ءُ وتی پادانی سر ءَ لگت اِش دات اَنت بلے کے جاھل ءَ سرپد کنت کہ اے مارشت منی توک ءَ اَنت لگت دیگ نہ بنت ، گار کنگ نہ بنت-

گش ئے لھتیں توار منی گوشاں پیداک اَت کہ ھمے دَمک ءِ دیوالانی سر ءَ ایشی ءِ بارو ءَ گپ نبشتہ کنیں بلے من دستانی پچ کنگ ءِ جھد ءَ اِتاں ، کوکار کنگ لوٹگ ءَ اِتاں کہ دپ ءَ پچ کناں ، چمانی پچ کنگ ءِ جھد ءَ اِتاں، داں تو تیر ءَ توار کُت ، من پچ لرز اِتاں گش ئے گون تیرانی توار ءَ منی دستانی زمزیل منی دوتکگیں دپ منی بستگیں چم دْرست آجو بوت اَنت ، من سر چست کت داں دمک ءَ منی دیم پہ دیم ءَ بس یک ھُنڈا سیکلے پیداک اَت من وت ءَ دیوال ءَ داشت کہ بلے گْوز اِیت ، سیکل منی نزیک ءَ آتک ءُ آستو گوست منی نیمگ ءَ دو کلم ئِے دور دات ءُ شُت ، من چہ ھید ءَ میچل اِتاں گش ئے۔ بس من پد ءَ روگ بندات کُت دمک ءَ ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دیوان ءَ سید ھاشمی ریفرنس کتابجاہ ءِ نیمگ ءَ گلام رسول کلمتی ءِ نبشتگ کرتگیں کتاب “بلوچی گالگنچ” ءِ دیمدرائی بیتگ –

بیست ءُ یک فروری ءَ ماتی زبان ءِ میان اُستمانی روچ دنیا ءِ ھمک راجاں داشتگ ھمے وڑ ءَ بلوچی زبان ءَ ادیب ءُ لبزانکاراں ھم بیست ءُ یک فروری ءَ بلوچستان ءَ ھوار کراچی ءَ ھم ماتی زبان ءِ میان اُستمانی روچ ءَ دیوان برجم کنگ بیتگ –

دیوان سید ھاشمی ریفرنس کتابجاہ ءِ نیمگ ءَ کمونیٹی سنٹر صدیق میتگ ملیر ءَ دارگ بیتگ، دیوان چار بھر ءَ بیتگ ءُ دیوان ءِ چارچینی اقبال ھاشمی ءَ کرتگ –

دیوان ءَ لبزانکار، زیملکار، کواساں بھر زرتگ ءُ ماتی زبان ءِ ارزشت ءُ زیملی ءَ دیوان وشنود کرتگ –

دیوان ءَ بازیں کچے ءَ زالبول ءُ نودربراں ھوار لس لبزانکاراں بھر زرتگ ءُ دیوان ءِ مردم شرپ بکش اِتگ اَنت –

دیوان ءِ اولی بھر ماتی زبان ءِ میان اُستمانی روچ ءِ سرھال بیتگ کہ جاڑیگیں نبشتہ کاراں وتی وتی نبشتگ ونتگ اَنت، وانوکانی تہ ءَ گلام رسول بلوچ، عاصم زھیر ءَ وتی نبشتانک ونتگ اَنت –

دیوان ءِ دومی بھر چہ سید ھاشمی ریفرنس کتابجاہ ءِ نیمگ ءَ چاپ بیتگیں گالگنج، بلوچی گالگنج ” ءِ دیمدرائی ءُ آئی ءِ گچین ءَ لبزانکاراں چمشانک داتگ –

چمشانک دیوکانی تہ ءَ ڈاکٹر کلیم اللہ لاشاری، ایوب قاسم، اسحاق خاموش، ملا گلام رسول کلمتی ءُ ڈاکٹف رمزان بامری ءَ گالگنج ءِ سر ءَ چمشانک داتگ ءُ وتی لیکہ درشان کرتگ اَنت –

دیوان ءِ سیمی بھر “سر سنگار ازمی مجلس ” ءِ ازمکاراں تلوی کسمانکے ایر کرتگ کہ آئی ءِ نام “مُرتگیں چاگرد ” ءِ نام ءَ پیش کرتگ –

دیوان ءِ چارُمی بھر ءَ ساز ءُ زیملی بیتگ کہ زیملی بھر ءَ ورنائیں گشندہ ثناء سائل، شھباز رزاق ءُ سلیم بلوچ ءَ وش گُٹی ءَ دیوان وشنود کرتگ –

سربوتگیں ھالانی رِد ءَ جھل مگسی گنداواہ ءَ ھیڈکواٹر ءِ نزیک ءَ سلاہ بندیں مردمانی تیرگواری ءَ دو مردم ٹپی بوتگ اَنت – ٹپی بوتگیں مردمانی پجار غلام مرتضیٰ ء عبداللطیف ءُ ساون خان ء محمد مراد ءِ ناماں بوتگ انت –

دمگی پھازداراں دمگ انگیر ءَ کُتگ یک کتکارے دزگیر کُتگ ءُ زدگ بوتگیں مردم دمگی نادراہ جاہ ءَ سر کرتگ انت –

دگہ وئیلے ساکھانی مگسی ءَ لیویز تانہ ءِ نزیک ءَ عربی کیمپ ءَ دیم ءَ اتکگ کہ دو مگسی ٹکانی دیریگیں زاتی جیڑہ ئِے سر ءَ تیرگواری ءَ امیر بخش ء دریا خان ءُ آئی ءِ چُک شھزاد ءِ امیر بکش بیران بوتگ انت –

کُشندہ تچگ رؤگ ءَ سوبین بوتگ انت – دمگی لیویز ءَ وئیل جاہ ءَ وت ءَ سرکُتگ، بیران بوتگیں مردم نادراھجاہ بُرتگ اَنت –

ھمے وڑ بلوچستان ءِ دمگ مستونگ ءَ ڈسٹرکٹ اینڈ سیشن کورٹ ءِ نزیک ءَ دو ٹولیانی میان ءَ جنگ ءُ چوپ ءَ پد تیرگواری ءِ آسر ءَ شبیر نامیں مردمے زدگ بوتگ –

پولیس رِد ءَ دؤئیں مردمانی میان ءَ پیسری زاتی جیڑہ ئِے بوتگ کہ مروچی پیشی ءَ اتکگ بوتگ انت –

پیشی ءَ پد آمیدگس ءَ چہ در اتکگ انت وت ماں وت اڑ اِتگ انت پد ءَ تیرگواری ءَ چہ شبیر ٹپی بوتگ – تیرگواری کنوک ھم تچگ ءَ بوتگ کہ سینکل ءِ سر ءَ چہ کپتگ ٹپی بوتگ – دوئیں ٹپی بوتگیں دمگی نادراھجاہ ءَ برگ بوتگ انت –

چہ شون ادبی دیوان خضدار ءِ نیمگ ءَ ماتی زبان میان استمانی روچ ءِ درگت ءَ مراگشے برجاہ دارگ بوتگ – شون ادبی دیوان ءِ کارمستر محمد انور ءِ سرکماشی ءِ شائری دیوانے ھم اڈ دیگ بوتگ –

مراگش ءِ مھمان ھاس ڈاکٹر باری آجو ءُ پروفیسر عامر فیاض بوتگ انت – شائری دیوان ءَ پروفیسر محمد علی دشتی ءُ پروفیسر جہانگیر ھم ساڑی بوتگ انت –

مراگش ءِ بندات چہ تلاوت ءَ بوتگ سنگت قدیر شیخ ءَ تلاوت کرتگ – مراگش ءِ تلو ءِ زمّہ واری شوکت بلوچ ءُ شیخ سراج ءَ کتگ –

ماتی زبان میان استمانی روچ ءِ درگت ءُ بلوچی ءُ براہوئی زبان ارزشت ءُ آئی دیمروئی بارو ء سمیع بلوچ ءُ حبیب قاضی بلوچ ءَ تران کُتگ –

شائری دیوان ءَ ڈاکٹر باری آجو، شیخ سراج، سمیع بلوچ، بلال بلوچ، حکیم بلوچ، شوکت شکست بلوچ، شوکت بلوچ، نعمان بلوچ، محمد انور بلسُم، عاقب فصیح، ارسلان ارسل بلوچ ءُ دگہ سنگتاں بھر زرتگ –

شائری دیوان ءِ گڈسر ءَ پروفیسر عامر فیاض ماتی زبان میاں استمانی روچ ءِ درگت ءَ وتی ھیال درشانتگ انت – مراگش ءِ گڈی ءَ شون ادبی دیوان خضدار ءَ باسک شیخ سراج اتکگیں مھمان ءُ شائرانی منّت گپتگ دیوان ھلاسی جار جتگ –

ھوشاپ ءَ صالح کریم داد ءِ نشہ باپاری بنجل ءِ سر ءَ بوتگیں اُرش ءِ زمّہ واری ءَ منّ ایں دیمترا ھم اے وڑیں زھر باپاری کنوکانی سر ءَ اُرش کنگ بیت اِنت – میجر گْوھرام بلوچ

سربوتگیں ھالانی رِد ءَ شمبے ءِ شپ ءَ ناشناسیں سلاہ بندیں مردماں بلوچستان ءِ دمگ ھوشاپ ءَ نشہ باپاری کنوکیں سالح کریم داد ءِ بنجل ءِ سر ءَ اُرش کتگ- اُرش ءِ زمّہ واری بلوچستان ءِ آجوئی لوٹوکیں گل ءَ منّ اِتگ –

بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ شمبے ءِ شپ ءَ مئے سرمچاراں ھوشاپ ءَ صالح کریم داد ءِ نشہ باپاری بنجل وتی نشانگ جوڑ کرتگ –
آئی ءَ گوشتگ کہ ھوشاپ ءَ اے بنجل ءِ تہ ءَ تریاک، شراب ھوار دگہ نشھی باپاری ءَ بیتگ اَنت –

جارکش ءَ وتی درشان ءِ تہ ءَ دمگی مردماں چہ لوٹ کُتگ کہ آ اے وڑیں مردم ءُ نشھی باپاری بنجلاں گستا بہ بنت، سرمچار آھاں کجام ھم وھد ءَ نشانگ کرت کن انت –

گڈسر ءَ میجر گْوھرام بلوچ ءَ وتی درشان ءِ تہ ءَ گوشتگ کہ اگاں اے وڑیں بنجل بند کنگ نہ بوت اَنت گڑا اے زھر باپاری کنوک وتی جان ءُ مالانی تاوان زمّہ وار وت انت –

نبشتانک: نمدی یے پہ سمی ءِ بابا ءَ

نبشتہ کار: ھاتراسلم

دی بلوچستان پوسٹ

دروت ءُ دراھبات ئے ڈاکٹر ساھب اُمیت کن آں تو وش ءُ وشھال ئے ءُ وتی زند ءِ مرادانی منگیران ئے-

بابا جان، تو پرچا چو بے وپا ئے؟ترا 12 سال اِنت کہ تو شُتگ ئے ءُ آھگ ءِ نام ءَ نہ زان ئے؟ترا زاناں پہ مھلب ءَ زھیر نہ کنت؟ تئی گوشاں سمی ءِ توار نہ کپ اِیت کہ برے ماں کوئٹہ ءِ ءُ برے ماں کراچی ءِ دگانی سر ءَ چو مھلب ءِ پیم ءَ گْوش اِیت.”بابا تو پرچا نیا ئے” ؟بلکیں تو ھمے واستا نیا ئے کہ کَسانی ءَ مھلب ءَ گْوشتگ ،”ابا، زاکر جان ءِ اَکس ماں ھالتاکاں کیت بلے تئی اکس پرچا نئیت”؟-

دین جان تو بلکیں ھمے زِد داشتگ کہ تئی اکس ھر روچ ماں ھالتاکاں بِہ بیت کہ مھلب ءُ سمی تئی اکس ءَ بچار اَنت ءُ دل ءِ رنگ ءُ چمانی ارساں بہ ریچ اَنت،تئی اکس ھر روچ ماں ھالتاکاں پیداک اِنت،سمی ءُ مھلب تئی اکس ءِ چارگ ءَ چہ گَل ءَ بال نہ اَنت بلکیں آیاں گریوگ ءَ دم برتگ-

ھستی ئیں بے وپا! مھلب ءَ پہ نادانی اے گپ گْوشتگ تو ھما اِنت زَھر کُتگ، نوں بیا ڈاکٹر جان پرچاکہ مھلب وتی نادانی منّ اِتگ ءُ چہ ترا پھلی لوٹ ایت-

بابا من گْوش آں تئی وڑیں بے وپائیں مردُم نیست ، سمی ءَ چہ کوئٹہ ءَ تئی اکس گوں اَت ءُ اسلام آباد ءَ شُت کہ بلکیں تو بیا ئے،بلے تو انگت نیاتک ئے، پرچا ترا پہ سمی ءَ بزگ نہ بوت ءُ نہ بیت؟ نوں کے بئیت ءُ ترا وشّان بہ کنت؟ تئی وشّانی ءَ زبیدہ جلال ، کوم ءِ راھشون ، کوم ءِ ھستی ءُ نیستی آتک تو وشّان نہ بوت ئے،شیرین مزاری اوں آتک تو رازی نہ بوت ئے، دگہ بازیں کَاسگ چَٹّ آتک بلے تو انگت کینگ ءِ سر داشتگ گوں سمی ءُ مھلب ءَ وش نہ بوت ئے،تو ھمے کلوہ دیم داتگ اَت “منی اکس ءَ انگت دیم ءَ بہ کن اِت ءُ بچار اِت کہ شمئے دل ءِ مراد سرجم بنت، بلے رَندتر ءَ ترا بزگ اوں بوت ، تو گوں شریں مزاری ءَ گْوشتگ اَت،”بلکیں من 15 مارچ ءَ آتک آں.‌”-

مارا اُمیت اِنت کہ تو 15 مارچ ءَ کا ئے پرچاکہ سمی ءُ مھلب ءَ ھوار سرجمیں بلوچستان تئی وداریگ اِنت سمی ءُ مھلب ءِ کسہ وَ کنگ نہ بیت کہ آیاں تو شرتر زان ئے تئی زھیراں کور اَنت-

بلے ڈاکٹر، ھُدا ءَ بچار نوں بے وپائی مہ کن ئے،بزگیں سمی ءُ مھلب ءَ پد ءَ زھرشانی ءُ دگانی سر ءِ نندگ ءَ لاچار مہ کن،ما تئی راھچاریں تو چو سالونک ءَ بہ بہ ئے ءُ 15 مارچ ءَ کایے،اگاں پیسر ءَ آتک ئے وَ شر اِنت بلے نوں ھرچ وڑ ءَ ترا آیاگی اِنت بابا جان-

تئی راھچار سمی ءُ مھلب گوں گُلیں بلوچستان ءَ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ ڈیھ ءِ مڈیانی لُٹ ءُ پُل کنوکیں کمپینیانی بگیری ءَ جنگ ترند کنگ بیت اِنت – دوستین بلوچ

بلوچ ریپبلکن گارڈز ءِ جارکش دوستین بلوچ ءَ رسانکدراں شنگ کرتگیں درشان ءِ تہ ءَ گوشتگ کہ مئے سرمچاراں مروچی رکنی ءَ داں کاھان ءِ دگ ءِ پاکستان ءِ بندساچی ساچی کمپنی او جی ڈی سی ایل ءِ انجینئرانی گاڑی دیرواگ بمب ءِ نشانگ کرتگ کہ چریشی ءَ دو انجینئرز مرتگ اَنت –

جارکش ءَ گوشت کہ اے کمپنی کاھان ءَ تیل ءُ گیس ءِ شوھاز ءَ دزبند بیتگ اَنت ما یک رندے پد ءَ اشی ءَ تچک کن ایں کہ بلوچ ڈیھ ءِ مڈیانی لُٹ ءُ پُلوکیں کمپنیانی بگیری ءَ مئے سلاہ بندیں جنگ ترند کنگ بیت اِنت دانکہ آ بلوچ ڈیھ ءِ مڈیانی لُٹ ءُ پُل ءَ بند نہ کن اَنت –

آئی ءَ گوشت اے اُرش داں بلوچستان ءِ آجوئی ءَ برجاہ مان اَنت –