TBP Balochi

سر بیتگیں ھالانی رد ءَ جائو ءِ کوھی دمگ سورگر ءَ گوستگیں چار روچاں پاکستانی پوج ءِ لشکر کشی برجاہ اَنت ءُ چریشی ءَ بازیں کچے ءَ مردمانی بیگواھی ءِ ھال اِنت ءُ آوار جنگ بیتگیں مردمانی تہ ءَ سیزدہ کَسانی نام دیم ءَ اتکگ اَنت –

گیشیں ھالانی رد ءَ جائو ءِ کوھی دمگ سورگر ءَ پاکستانی پوج ءِ زمینی لشکر ءِ ھمراھی ءَ برزی ءَ بالگراب ھم گون اَنت ءُ کوھی دمگاں گن شپ ھیلی کاپٹرانی سر ءَ کمانڈوز ایر گیجان بیتگ –

ھالانی تہ ءَ گوشگ بیتگ کہ بازیں جاھاں بمبگواریانی سوب ءَ بازیں کَچے ءَ پس ءُ دگہ دلوتانی زوال بیگ ءِ ھال اِنت ءُ دمگ ءَ الکاپیں دامگانی بند بوگ ءِ سوب ءَ سرجمیں راستیں ھالانی گرگ جنجالانی دیمپانی اِنت –

لشکر کشی ءِ میان ءَ پوج ءِ دست ءَ آوار جنگ بیتگیں سیزدہ کَسانی نام پجار بیتگ اَنت جمل ء قادر بکش، فیض مھمد ء قادر بکش، علی بکش ء قادر بکش، غوث بکش ء مراد، رمزان ء مراد، ارشد ء مراد، ثنا ء اللہ ء مھمد ھسین، منظور اھمد ء مھمد ھسین، یار مھمد ء نورا، مھمد عارف ء اللہ بکش، عبدالواحد ء رسول بکش، چھٹہ ء اللہ یار ءُ رسول بکش ء نورا ءِ ناماں زانگ بیتگ اَنت –

گڈی ھالانی تہ ءَ جائو ءُ مشکہ ءَ پوج ءِ لشکر کشی برجاہ اَنت –

ھمے وڑ بلوچ نیشنل مومنٹ ءَ گوشتگ کہ پاکستانی ریاست بیگواھیں مردمانی جیڑہ ءَ گار کنگ ءِ پد ءَ نوکیں پندل سازگ ءَ اِنت-

ھمے وڑ ءَ بلوچ سیاسی گل بلوچ نیشنل مومنٹ ءِ بنجاھی جارکش ءَ گوشتگ کہ پاکستانی ریاست ءُ پوج ءَ بلوچانی ھلاپ ءَ نوکیں پندل بندات کرتگ اَنت –

آئی ءَ گوشتگ کہ یورپ ءُ امریکہ ءَ میار بندی ءَ شتگیں پاٹی ءِ باسکاں بیگواھی ءِ لڑ ءَ ھوار کنگ اِنت کہ چریشی ءَ آ بیگواھیں مردمانی جیڑہ ءَ دنیا ءِ دیم ءَ گار کنگ لوٹ ایت –

آئی ءَ گوشت کہ پسنی وارڈ نمبر شش ءَ پاکستانی پوج ءَ پاٹی ءِ باسکانی لوگانی سر ءَ بیڑ برتگ ءُ اود ءَ آیانی کھول لَٹ ءُ کُٹ کرتگ اَنت کہ شما پرچا وتی مردمانی واستا زھرشانی کنگ ءَ ئے –

جارکش ءَ گوشت کہ پسھی ءَ کھولاں گوشتگ کہ مئے چُکاں ڈیھ یلہ کرتگ ءُ درانڈیھی زند گوازینگ ءَ اَنت ءُ چریشی ءَ ابید پوج ءَ زالبول جتگ ءُ مباھل ءُ لوگانی پَٹ ءُ پول کرتگ اَنت –

زانگ بہ بیت اے وھد ءَ بلوچستان ءَ بیگواھیں مردمانی آجوئی ءِ واستا گوانک برز بیتگ ءُ بلوچ بیگواھیں مردمانی کھولانی لوٹ اِنت کہ مئے مردماں آمیدگساں پاکستان پیش بہ کنت ءُ یا اگاں نیست اَنت ھم مارا بہ گوش ایت –

زانگ بہ بیت گوستگیں ماہ ءَ پاکستان ءِ بنجاھی شھر اسلام آباد نیشنل پریس کلب ءِ دیم ءَ بیگواھیں مردمانی کھولاں زھرشانی نندانک جتگ ءُ نشتگ اَنت –

چریشی ءَ پد کھول پاد اتکگ ءُ اسلام آباد ءِ دزبندیں دگاں ھواریں دگ ڈی چوک ءَ نندانک جتگ ءُ نشتگ اَنت ءُ اود ءَ آیاں پاکستان ءِ سروزیر عمران خان ءِ آیگ ءِ لوٹ کرتگ اَت –

بازیں روچاں نندانک ءَ پد کھول لاچار بیتگ ءُ پاد اتکگ اَنت ءُ سروزیر عمران خان ءَ زوت ءَ زوت دوچار کپگ ءِ زبان داتگ اَنت ءُ پابزدہ مارچ ءَ بیگواھیں مردمانی بارہ ءَ سرجمیں ھال دیگ بنت –

بیگواھیں مردمانی کھولانی تہ ءَ ڈاکٹر دین مھمد ءِ جنک سمی دین، بیگواھیں شبیر بلوچ ءِ گوھار سیما بلوچ، ھزب اللہ ءُ حسان کمبرانی ءِ گوھار ھسیبہ بلوچ، راشد ھسین ءِ مات ءُ براتزتک، زاکر مجید ءِ مات، نسیم بلوچ ءِ دیشتار ھانی بلوچ، سعید اھمد ءِ مات، مھر گل مری ءِ کھول، وائش فار بلوچ مسنگ پرسنز ءِ سرکماش نصر اللہ بلوچ ءَ ھوار بازیں مردم ھوار بیتگ اَنت –

ءُ ھمے وڑ ءَ گوستگیں روچ ءَ بلوچ دود ءُ ربیدگی روچ ءِ درگت ءَ کراچی ءَ بلوچ یکجھتی کمیٹی ءَ ھم اے روچ بیگواھیں مردمانی کھولانی ھمدردی ءُ بیگواھیں مردمانی یات ءَ داشتگ –

ھمے وڑ ءَ بلوچستان ءَ ھم ازمکاراں اے روچ بیگواھیں مردمانی مات ءُ گوھارانی دگانی سر ءَ نندانکانی پژدر ءَ مراگشاں بھر نہ زورگ ءِ جار جتگ ءُ مراگش نہ بروبری ءَ بیتگ اَنت –

ھمے وڑ ءَ گوستگیں روچ ءَ ھاران ءَ بلوچ دود ءُ ربیدگی روچ بلوچستان نیشنل پاٹی ءِ دمگی سروک شفیق الرحمان ءِ سروکی ءَ بیگواھیں مردمانی یات ءَ دارگ بیتگ –

نبشتانک: بالاچ چون شَموشگ بیت

نبشتہ کار: گزین بلوچ

دی بلوچستان پوسٹ

‌بالی جان من ءَ پھل کن من تئی پِگر ءِ توسیپ ءَ شری ءَ کُت نہ کن آں من زاناں کہ راجی شھیدانی راجدپتر شریں وڑے ءَ یات کنت تئی توسیپ کنگے مول ءُ مراد پہ من بس ھمنچو ارزِشت دار ایت کہ منی سُتکگیں زِرد ءَ یک آھے درکیت-

وھدے تئی یات من ءَ کاینت من پمشکا چار لبز پتو نبشتگ کن آں وتی زِرد ءَ وشان کن آں چیاکہ تو بلوچ راج ءِ ھما درد وار ایں سرمچارے بیتگ اِت ترا ھر کس وان ایت ءُ مار ایت-

‌بالی تئی جُدائی من ءَ انچیں دردے بَکشِ اِتگ آدرد ءِ دوا بس یکیں آجوئی اِنت تو وتی زگریں ھون گُلزمین ءِ دلبندا رِتک اَنت ءُ من ءَ تھنا ناں بہ گندے بلوچ راج ءَ ھمے کلوہ دات کہ داں مرگ ءِ ساھتاں گُلامی ءَ ھِچبر مہ منّ اِت ءُ مرگ ءَ مڑاہ ئِے گون کن اِت-

بالی من یاداں ءُ شر یاد اَنت تئی ھما نِند ءُ نیاد کہ من ءُ تو مُدام یکجاہ سیل ءُ سواد ءَ درکپتگ اِنت ءُ تو رھسراں ھمُک مردم بہ دیست اِنت وتی وشیں زُبان ءَ گوں راجی جُنز ءِ بارو ءَ آئی ءَ را شریں وڑے یاسرپدی داتگ اَت ءُ بالی من ترا گُشت انچو سرپدی ھم شر نہ انت تو اے وڑ ءَ مھلوک ءَ سزا کن ئے بِل جنگ وت سرپدی دنت راج ءَ من ءَ گُشت یار من ءَ مرچیگیں وھدا وھد رسگ ءَ اِنت منی دل لوٹ ایت من وتی جنگ ءِ بابت ءَ چار ھبر راج ءِ دیم ءَ ایر بکن آں باندا انچیں وھد ءُ ھالاتے کیت ھمے جاہ ءَ دُژمن کیت وتی زورکیانی گون ءَ منی راج ءَ جنت ءُ کُش ایت گارءُ بے گواہ کنت منی ءُ تئی ھلاپ ءَ چُش آجوئی جُنز ءِ ھلاپ کارکنت ءُ تُرس ءِ سر ءَ کار گپت منی تئی دست ءَ وتی جِندے کوپگاں جن ءَ اینت اَنت چو مہ بیت منی راج بلوچ آجوئ ءِ جُنز ءِ ھلاپ ءَ پہ ناسرپدی کار بہ کنت منی واھگ ھمیش اِنت مئے ءُ دُژمن ءِ پرک ءَ بہ زانت اگاں باندا بِہ زانت ءُ کار بِہ کنت آئی ءِ ھک وتی جِندے سراں گُڑا گَدار گُشگ بیت-

‌بالی تئی اے ھبر من اش کت آں من وَ توک ءَ چہ بے کِساس سرپد بوت آں کہ تئی لوٹ ءُ تما چے بوتگ ءُ من ترا چے ئِے لیک اِتگ من پد ءَ پُرشُتاں بالی من ترا سوج گِپتاں تو چِنکس ونتگ تو من ءَ ھما دمان ءَ گُشت من ھاک نہ ونتگ من گُشت بس کن یار اِنچو ھبر تو چون زان ئے؟تو گُشت من ءَ ءُ منی جُھد ءِ ھمُک ھمبلاں اے جنگ ءِ توک ءَ وھد ھالات ءَ ھمنچو تعلیم ءُ سبک پرماتگ کہ تو چون ایں وانوکیں کسے بیار من آئی ءِ مکابلہ ءَ شریں وڑے ءَ کُت کناں اے کوہ مئے درسگاہ اَنت مئے بلوچی اسکول اَنت مئے ادراہ اَنت مئے سرپدی چمداں بوگ ءَ اِنت تو ھم اے جنگ ءِ بھرے ترا اے ھبر پھک زانگی اِنت کہ ما گلام ایں کوم ءَ مارا دگہ وانگ جاہ نیست کُلیں وانگ جاہ ءُ مال مڈی شوم ایں دُژمن ءِ ارجان اَنت دانکہ ما زِندگیں وتی پاک ءُ پلگاریں گُلزمین ءِ ھاترا جنگ ءُ جُھد بکن ایں اگاں شھید بُوت ایں کسے مئے تُپنگ ءَ چِست کنگ ءِ واھگ بِہ دار ایت چو مہ بیت ما ءُ شُما پَشت بہ کپ ایں چہ وتی زانت ءُ زانگ ءَ لگت مالیں راج ءِ دردوار جوڑ مہ بہ ایں گُڑا چرے زِندا مرگ بھتر اِنت مرگ ھما اِنت کہ ترا دوبر زِندگ بہ کنت داں جھان اَست اِنت تو نمیراں بہ بئے ‌بالی تو پد ءَ کَندت ءُ گُشت من دپ ءَ سک ڈَڈّآں باریں سکّی ءِ وھداں چون باں رواں دُژمن ءِ دیم ءَ سلاہ دؤر دے آں یاکہ شھادت ءَ وتی نام ءَ کن آں بالی تو نہ پروشت ئِے تو باج بُرت تو بھا نبوت ئے تو پہ وت نامے راج دپترا نوک کُت تو دُژمن ءَ پروش دات ‌بالی جان تو دُژمن ءِ دیم ءَ سر جھل نہ کُت تو دُژمن ءِ شِلسریں تیراں پہ کندان ءَ وتی سینگ ءَ جاہ دات اَنت ءُ وت ءَ نمیراں کُت تو وتئی ھک اد ءَ کُت پہ گُلزمین من میاریگاں تئی ھونانی دیم ءَ ‌بالی جان من ءَ یاد اَنت تئی وش رُوہ ءُ وش زبانی مُدام تئی دپ ءَ کندگ ءُ ٹوک اَت تو اے کدی نہ گُشت کہ من بلاھیں مردمے آں تو وت ءَ چہ کُلاں کستِر لیک اِت ءُ من مُدام دیستاں چون ایں گِرانیں پندے ڈُکے بُوت ایں تو چہ کُلاں دیم ءَ اِت ئِے تو دم برگ ءِ نام ھم نزانت ‌نوں من زاناں کہ تئی پِگر پھتو بُوتگ تو جسمانی ھوالہ شمّ ءَ جُدا ئِے بلے تئی پِگر مئے رھبری ءَ کنت تئی کاروان جُنزان اِنت دیم پہ وتی منزل ءَ ‌یاد بِبیت شہید بالاچ جان ءِ شھیدی ءِ روچ 14پروری 2021ءَ روکپتی بلوچستان ءَ پاکستان ءِ کاسگ چٹانی تیر گواری ءَ شھید بُوتگ سنگت شھید بالاچ جان بلوچستانءِ دمگ آواران مشکہ ءِ جاہ منند اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

تمپ کلات ءَ مچکدگ گومازی ءِ یک گولے ءَ باج برتگ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی اولی راؤنڈ ءِ پنچمی گوازی کنگ بوتگ –

مروچگیں گوازی ءَ تمپ کلات ءِ لیبیاں گوں جوانی ءَ لیب داشتگ یک گولے داتگ ءُ باج برتگ- مچکدگ گومازی ٹیم پروش داتگ-

آؤکیں گوازی گومازی ءَ شھید اسمائیل تُمپ ءُ ینگ اسٹار بلوچ آباد ءِ میان ءَ اسکول گراؤنڈ ءِ پٹ ءَ بیت انت-

دی بلوچستان پوسٹ

ٹی بی پی پتر ھال ءَ سر بیتگیں ھالانی رد ءَ بلوچستان ءِ دمگ لسبیلہ ءِ ھند ھب کور ءَ مائی گاڑی ءِ نزیک ءَ یک جونے دزکپتگ –

دمگدار جون ءِ گور ءَ سر بیتگ اَنت ءُ جون اش چِست کرتگ ھب سول نادراہ جاہ ءِ سر اش کرتگ ءُ اود ءَ آئی ءِ پجار گودھا خان ء بھوٹا خان جھمنند تمبو نصیر آباد ءِ نام ءَ زانگ بیتگ –

دمگدارانی رد ءَ جون ءِ نزیک ءَ یک بیگے ھم دزکپتگ آئی ءِ گُد مان بیتگ اَنت ءُ جون ءَ سَے تیرانی ٹپ پِر بیتگ اَنت –

جون سول نادراہ جاہ ءَ ایر کنگ بیتگ ءُ پولیس گیشیں پَٹ ءُ پول کنگ ءَ اِنت –

زانگ بہ بیت گوستگیں روچ ءَ ھب ءَ جان کالونی ءَ یک پجار نہ بیتگیں جونے دمگداراں دزکپتگ ءُ گوستگیں جون ءِ بارہ ءَ دمگدارانی دگہ گپ دیم ءَ نیاتکگ اَنت – ھمے وڑ ءَ شال لنک روڈ ءُ شھدگ ءَ یک چاتے ءَ جونے دزکپتگ کہ آئی ءِ پجار نہ بیتگ –

روانک بلوچ یکجھتی کمیٹی ءِ دزبندی ءَ آر ٹس کونسل ءَ بندات بیتگ ءُ شھر ءَ پند ءَ روان بیتگ ءُ بیگواھیں بلوچانی واستا نشتگیں بنجل ءَ سر بیتگ –

دی بلوچستان پوسٹ

روانک ءَ بازیں کچے ءَ زالبول، چکاں ھوار لس مردماں بھر زرتگ ءُ بے تواری ءِ دروشم ءَ بیگواھیں مردمانی یات ءَ روانک بیتگ –

روانک ءَ بھر زیروکیں مردمانی دستاں بیگواھیں مردمانی اکس ءُ روکپتی بلوچستان ءَ ایرانی لشکر ءِ دست ءَ کُشگ بیتگیں مردمانی اکس ءُ بینر بیتگ اَنت کہ آیانی سر ءَ بلوچ پہ چُنڈے نان ءَ بزگ اِنت، روانک ءَ بلوچستان ءِ نامی ئیں گشندہ میر اھمد میر، منھاج مکتار، آسمی ءُ دگہ گشندھانی سوت ھم پِر بیتگ اَنت –

روانک ءَ بلوچی سوت ءُ بیگواھیں گمگینی ءَ لس مردماں وتی درشانی ءَ شھر ءَ تران بیتگ ءُ بیگواھیں مردمانی واستا جتگیں بنجل ءَ سر بیتگ –

روانک ءَ بلوچ یکجھتی کمیٹی ءِ باسکاں ھوار بیگواھیں مردمانی کھول ھوار بیتگ اَنت –

روانک کراچی پریس کلب ءِ دیم ءَ جتگیں وائس فار بلوچ مسنگ پرسنز ءِ بنجل ءَ سر بیتگ ءُ اود ءَ جتا جتائیں مردماں وتی وتی ھیال ءُ لیکہ درشان کرتگ اَنت –

بلوچ دود ءُ ربیدگی روچ ءِ درگت ءَ کراچی پریس کلب ءِ دیم ءَ بلوچ یکجھتی کمیٹی ءِ نیمگ ءَ برجم کرتگیں مُچی ءَ بلوچستان ءَ بیگواہ بیتگیں مردمانی کھولاں ھم تران کرتگ –

بلوچستان ءَ بیگواہ بیتگیں مردمانی کھولانی تہ ءَ ڈاکٹر دین مھمد ءِ جنک، سمی بلوچ، عرب امارات ءَ بیگواھی ءَ پد پاکستان ءَ چیریں ادارھانی دست ءَ دیگ بیتگیں راشد ھسین ءِ برات زتک ماھزیب بلوچ، ھانی بلوچ، سیما بلوچ ءُ کراچی ءَ بیگواہ بیتگیں سلتان سعید ءِ گوھار ءَ ھوار بازیں مردماں تران کرتگ –

ڈاکٹر دین مھمد ءِ جنک سمی ءَ گوشت: مروچی ءِ روچ بلوچ دود ءُ ربیدگی روچ اِنت بلے بلوچستان ءَ ھزارانی مات ءُ گوھار دگانی سر ءَ کپتگ اَنت ھزاراں مات وتی بچانی ودار ءَ نشتگ اَنت ھزاراں کھول ناوشیں زند ءِ گوازینگ ءَ اَنت –

آئی ءَ گوشت کہ زیکیں بلوچاں مروچی ءِ بلوچاں گیشتر سما کرتگ کہ آیاں وتی دود داشتگ بلے بیگواھیں مردمانی یاتگیری ءَ داشتگ –

آئی ءَ گوشت کہ دود تھنا اے نہ اِنت کہ وتی سر ءَ پاگ ءَ بند ءُ ناچ بہ کن دود ءَ اشی ءَ ھم سما بہ کن کہ تئی پیر ءُ آجزیں مات دگانی سر ءَ در پہ در اَنت –

آئی ءَ گوشت کہ اے دو مارچ ءَ ما دیستگ کہ بلوچستان ءِ بازیں گشندھاں وتی جارانکانی تہ ءَ گوشتگ کہ ما اے دو مارچ ءَ ھچ مراگشاں بھر نہ زوریں ءُ اے دو مارچ ءَ ما وتی بے تواری ءَ نندیں ءُ ھزاراں گماں گوں وتی مردماں یات کن ایں –

سمی دین ءَ گوشت کہ ما دراھیں ھما بلوچ، ازمکارانی منت ءَ گراں کہ آیاں روچ ءِ درگت ءَ مئے درد مار اِتگ ءُ دود ءُ ربیدگ بیگواھیں مردمانی یات ءَ کرتگ –

زانگ بہ بیت اے اولی بلوچ دود ءُ ربیدگی روچ اِنت کہ بلوچ یکجھتی کمیٹی ءَ بلوچستان ءِ بیگواھیں مردمانی یات ءَ داشتگ ءُ ھمک سال بازیں جاھاں بلوچ دود ءُ ربیدگی روچ جتا جتائیں دروشماں دارگ بیتگ اَنت –

چِد ءُ پیسر سال دوھزار ءُ دہ ءَ ھزدار یونیورسٹی ءَ بی ایس او آزاد ءِ نیمگ ءَ بلوچ دود ءُ ربیدگی ءِ روچ ءِ بنھشت ایر کنگ بیتگ اَت کہ اود ءَ جوڑ کرتگیں مراگش ءِ سر ءَ سرکار ءِ داشتگیں ڈیتھ اسکواڈ ءِ کارمنداں دزبمباں گوں اُرش کرتگ ءُ چریشی ءَ بی ایس او آزاد ءِ دو باسک بیران ءُ بازیں کچے ءَ نودربر زدگ بیتگ اِت اَنت –

مروچی دو مارچ ءَ چاگردی رسانک جاھاں ھم بلوچ سیاسی مردمانی نیمگ ءَ بیگواھیں مردماں ھوار بلوچستان ءَ پاکستانی پوج ءِ دست ءَ جنگ بیتگیں مردمانی اکساں گوں دارگ بیگ ءَ اِنت –

نبشتانک: بلوچ راجی دود ءُ ربیدگ ءِ روچ ءُ گلامی

نبشتہ کار: شانتُل بلوچ

دی بلوچستان پوسٹ

دنیا ءِ ھر آزات ءُ وتواجھیں راج وتی راجی دود، ربیدگ، پوشاک ءُ وتی راجی زبان ءِ سر ءَ ناز کن اَنت ءُ ھمے دْراھیں چیز راجی مڈّی اَنت کہ زندگیں راجاں ماں میان اُستمانی چاگِرد ءَ یک جُتائیں دْروشم ءُ الکاپیں پجّارے دے اَنت۔ پد ءَ ھمے زِندگیں راج پہ وتی پدریچ ءَ راجی دود ءُ ربیدگانی آگاھی ءُ دیگ ءِ ھاتر ءَ دود ءُ ربیدگی روچے ھم برجم دار اَنت کہ ھمے روچ ءَ زِندگیں راج ءِ شھر ءُ کوچّگاں، دمگ ءُ میتگاں ءُ وانگجاہ ءُ دمکاں راجی سوت ءُ دگہ راجی لیب ءُ گْوازی ءِ مراگش بیت ءُ شپ ءَ دیوان برجم دارگ بنت۔ ھمے دیوان ءُ مراگشاں مستریں کماش مراگاھانی تہ ءَ راجی زُبان، پوشاک ءُ دگہ رواجانی ارزِشت ءُ بستار ءِ بارہ گْوشتانکاں گوشت انت کہ مئے راجی رواج، پوشاک ءُ دود گار مہ بہ بنت ءُ راج ءِ تہ ءَ ھمے دُود مُدام البار بہ بنت ءُ راج ءِ تہ ءَ راجی دود ءُ ربیدگانی بستارے ودی بہ بیت ءُ پد ءَ چہ چوشیں مرگشاں راج ءِ تہ ءَ راجدوستی یے ءِ ودی بیت۔ راج وتی دود ءُ ربیدگ مھکم ءُ زِندگ دار اَنت۔
بزاں اِے شاتکامی ءِ روچے بیت کہ مرد ءُ جنین آدم، ورناہ، کماش، اُستاد ءُ نودربر دْراھیں نوکیں راجی پوشاکاں گور ءَ کن اَنت ءُ شاتکامی ءَ کن اَنت۔
چوناھیگا پہ اِے دْْراھیں مراگشانی اڈ کنگ ءَ وتواجھیں ڈیھ ءِ سرکار وت جار جنت ءُ ھر دمگدار ءِ ھرچگ ءُ کارمستری اے دْراھیں کار بنت نی بیا اِت کمیں بہ جیڑ ایں کہ بلوچ ھم یک سرجمیں راجے، بلوچ راج ءِ ھم دنیا ءِ گریں راجانی ڈول ءَ راجی زُبان، دود ءُ ربیدگ وَ ھست انت گُڑا زاناں بلوچ راج ھم دود ءُ ربیدگی روچے برجم بہ دار ایت ءُ شاتکامی بہ کنت یا اِناں-

اگاں چہ کَسے من ءَ جُست بہ کنت گُڑا من گْوش آں ھو بلوچ راج ءَ ھم ھمے ھکّ ھست کہ راجی دود ءُ سِستانی روچے الم برجاہ بہ دار ایت ءُ بلوچ وتی ھستیں وھد ءِ پدریچ ءَ سرپد بہ کنت کہ ما بلوچ ایں، ما گوں وتی دود ءُ ربیدگاں یک سرجمیں راجے ایں ءُ مارا وتی جُتائیں پجّارے ھست ءُ ما وت یک شاھگانیں زُبانے ءِ واھند ایں ءُ چریشی ءَ راج ءِ تہ ءَ راجی رواج ءُ دودانی بستاے ودی بیت، راج ءِ تہ ءَراجدوستی، زبان دوستی ءُ ڈیھ دوستی یے رُدان بیت ءُ پمیشکا بلوچ راج ءِ اولی دود ءُ ربیدگ ءِ روچ بلوچ نودربر گل (بی ایس او) آزات ءَ برجم داشتگ ءُ راج ءَ سرپد کنگ ءَ اَت کہ تئی وتی دود ءُ ربیدگ یک رِد ءُ رھبندے داب ءَ اَنت، تئی بلوچی آروس، گم، جیڑھانی میڑ ءُ مراکہ، مُچّی ءُ دیوان ترا سرپدی دے اَنت کہ تو یک جُتائیں راجے ئے بلے تو دُژمن ءِ دست ءَ زیردست ئے باید اِنت نوں تو سرپد بِہ بَہ ئے ءُ وتی گُلامی ءَ مار ئے ھمے وڑیں راجی دود ءُ ربیدگی دیوان گُلامیں راج ءِ تہ ءَ ھم راج ءِ تہ ءَ گُلامی ءِ مارشتاں ودی کنگ ءَ اَت چریشی ءَ راج ھم کم کم ءَ سرپد ھم بوُان اَت کہ ما گُلام ایں۔

وھدیکہ تئی دژمن ءَ زانت کہ تو وتی پجّار ءَ زانگ ءُ وتی گلامی ءَ مارگ ءَ ئے گُڑا تئی دُژمن تُرسے آماچ بوتگ کہ اِے دود ءُ ربیدگ ءِ روچ بلوچ راج ءِ تہ ءَ آشوبے رُدین ایت پمیشکا تئی دُژمن چہ تئی دود ءُ ربیدگ ءَ تُرس اِت ءُ 2 مارچ 2010 ءَ وھدیکہ ھُزدار یونیورسٹی ءَ بلوچ نودربر گل (بی ایس او) آزات ءَ بلوچی دود ءُ ربیدگی روچ ءَ شپ ءَ دیوانے برجم داشتگ اَت گُڑا دُژمن ءَ گوں راجدْراوھاں ھوار ھمے بلوچ نودربر گل- آزات ءِ سر ءَ اُرش کت ءُ سے نودربر شھید کُت ءُ بازیں کچے ءَ ٹپی بوتگ انت۔
چوناھیگا اِے اُرش ءِ مول ءُ مُراد ھمیش اَت کہ بلوچ چاگِرد ءِ تہ ءَ بیمے ودی بیت ءُ راج اِے وڑیں دود ءُ ربیدگی روچاں برجاہ مہ دار ایت۔

البت دُژمن ءِ ھمے لگوریں اُرش ءَ پد دُنیا ءِ ھر کُنڈ ءِ بلوچاں دو مارچ ءِ بلوچی دود ءُ ربیدگ ءِ روچ ءِ ایرکنگ ءِ تپاک کُت پمیشکا توری اوگانستان ءِ بلوچ بہ بنت، توری اومان، ایران ءُ پاکستان ءِ زیردست بلوچستان ءِ بلوچ بہ بنت ھر بلوچ دمگاں بلوچی دود ءُ ربیدگ ءِ روچ برجاہ بوُان بیتگ اَنت۔ ھر دیوان ءَ راجی سوت گُشگ بوتگ انت۔

گّڑا پد ءَ دژمن ءَ ھم ھیال کُت کہ چہ چوشیں مراگشانی تہ ءَ بلوچ راج وتی گُلامی ءَ مارگ ءَ اِنت گُڑا پندلے ساز اِت ئِے کُت کہ پہ ایشانی ھلاپ ءَ ما وت بلوچی دود ءُ ربیدگ ءِ روچاں برجم بہ دار این ءُ ایشانی ھلاپ ءَ پوتاری کن ایں۔ بہ گِند ئے مرچی تئی دژمن ھم لھتیں بلوچ گُشندہ بھا زور ایت ءُ بلاھیں بلوچی دود ءُ ربیدگی دیواناں جوڑین ایت کہ مئے مراگاہ مُچی بز بہ بیت۔ ھمے مُچّیاں پاکستان ءِ ستا ءُ دْروگیں گْوشتانک باز ءُ بلوچی دود ءِ باروہ ھچ نیست۔ ھیرانی گپ وَ ایش انت کہ راج ءِ دژمن بلوچی دود ءُ ربیدگ ءِ روچ ءَ برجاہ دار ءَ انت ھما دژمن کہ چہ تئی زُبان ءَ تُرس ایت، چہ تئی دوداں تُرس ایت! ھما دژمن ک تئی گِساں ماندار ایت، تئی بزگیں شْوانگ ءُ شپانکانی سر ءَ کُش ایت، راج ءِ تہ ءَ دپچٹ، کاسگ چٹّ ءُ راجدْروھاں کُمکّ انت، راجی مڈّیاں پُل ایت ءُ راج ءَ بزگ کنت گُڑا چوں راج ءِ دوداں دوست دار ایت۔

من گپ ءَ گْونڈ کنان ءَ گْوش آں کہ بلوچ راج مرچاں پُرسیگ انت، ھزارانی کچّ ءَ مئے ورناھیں بلوچ برات ءُ گْوھار شھید کنگ بوتگ انت ءُ ھزارانی کچ ءَ دُژمن ءِ تھاریں زِنداناں دژمن ءِ لگتمالی ءِ آماچ اَنت، مات ءُ گْوھارانی چمّ ارسیگ اَنت ءُ ما گوں دژمن ءَ نِند این ءُ شاتکامی کن ایں؟منی ھیال ءَ ما وتی راج ءِ برات ءُ ٹپاں واد مہ ریچ ایں، دژمن ءِ اڈکُتگیں دْروگیں دود ءُ ربیدگی مُچیاں بھر مہ زور ایں۔

اگاں ما بلوچ ایں گُڑا وتی گلامی ءَ مار ایں، وتی راجی زُبان ءَ بہ وان ایں گُڑا ما بلوچ بہ ایں انچوشکہ زِندگیں راجانی پجّار راجی زُبان اَنت پمیشکا واجہ ڈاکٹر ناگُمان گْوش ایت “داں وھدے کہ کسے زُبان دوست مہ بیت آ راجدوست بیت نہ کنت گُڑا پہ راجدوستی ءَ باید انت ما زُبان دوست بہ این ءُ وتی راجی زُبان ءَ بہ وان ایں چی ءَ کہ وھدیکہ ما زُبان دوست بیتگ ایں گُڑا ما راجدوست ءُ ڈیھ دوست بہ ایں۔ پد ءَ ما وتی گُلامی ءَ مار ایں، ما وتی برگی ءَ مار ایں، ما وتی بدواہ ءُ دوزواہ زان ایں۔ بلوچی دود ءُ ربیدگ زِندگ بات انت، مرگ بات پارسی ءُ ھندی۔ بلوچ ءُ بلوچی زِندگ بات، شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کتاب جاہ ءِ نام یوسف عزیز مگسی لس کتاب جاہ ایر کنگ بیتگ ءُ کمیٹی ءِ نوکیں سروک ءُ اگدودار گچین کنگ بیتگ اَنت –

یوسف عزیز مگسی لس کتاب جاہ ءِ اولی دیوان بوائز ھائی اسکول تیرتیج ءَ برجم دارگ بیتگ-

دیوان ءَ بھر زیروکیں مردماں ءُ کمیٹی ءِ باسکاں کتاب جاہ ءِ لوٹ ءُ گزرانی سر ءَ سوڑگ کرتگ ءُ چریشی ءَ کتاب جاہ ءِ ھواریں باسکاں یک کمیٹی ءِ جوڑ کرتگ ءُ ھر ھما باسک ءُ اگدو داراں زمہ واری دیگ بیتگ اَنت –

کتاب جاہ ءِ سروک جھانزیب عظیم، کمکار مستر صغیر اھمد، کارگشاد سرفراز اھمد، کمک کارگشاد، سالم اے بی بلوچ ءُ ھزانگ ءَ اداروکی کارمستر نیاز اھمد نامینگ بیتگ اَنت –

کتاب جاہ ءِ اگدوداراں گوشت کہ دمگ ءَ کتاب جاہ ءِ نہ بوگ ءِ سوب ءَ وانندگیں ورنایاں جیڑ اِتگ ءُ ھمے جیڑگانی پُژدر ءَ یک کتاب جاھے ٹھینتگ ءُ پہ نوکباھند ءُ وانوکیں مردمانی واستا یک درے پَچ بیتگ –

برمش دازن ءَ ھمبل ملک آباد ءِ یک گولے ءَ باج برتگ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی اولی راؤنڈ ءِ چارمی گوازی کنگ بوتگ –

مروچگیں گوازی ءَ برمش دازن ءِ لیبیاں گوں جوانی ءَ لیب داشتگ دومی ھاپ ءَ یک گولے داتگ ءُ باج برتگ-

گول برمش دازن ءِ لیبی سناء بلوچ ءَ ءَ داتگ ءُ ھمبل ملک آباد ٹیم پروش داتگ-

زانگ بہ بیت اے ٹورنمنٹ آل ڈسٹرکٹ ءِ بیست ءُ چار ٹیماں بھر زرتگ مروچی اولی راؤنڈ ءِ چارمی میچ برجاہ دارگ بوتگ – ٹورنمنٹ بلوچی زبان شائر اختر عمر ءُ شھید محبوب ءِ کستریں برات ھماد بلوچ ءِ چیردستی ءَ ما گومازی اسکول گراؤنڈ برجاہ انت – مروچی ٹورنمنٹ ءِ مھمان ھاس ماسٹر عبدالغنی بوتگ ـ

آؤکیں گوازی گومازی ءَ مچکدگ گومازی ءُ تمپ کلات ءِ میان ءَ اسکول گراؤنڈ ءِ پٹ ءَ بیت انت-

بلوچستان ءِ تہ ءَ مردمانی بُنکی ھک روچ مروچی ھم مھکمیں وڑے ءَ لگتمال کنگ بوگ ءَ انت کہ آئی ءِ تہ ءَ زندگ بیگے ھک، سیادانی دُچار کپگے ھک، نبشتہ کنگ ءُ گپ جنگے ھک ھَتا کہ زگر کنگ ھم پچگرگ بوتگ اَنت – ماما قدیر بلوچ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ سِی ءُ نُھ روچ سرجم بوتگ – ایچ آر سی پی کماش اسد بٹ، صوبائی کماش قاضی خضر، کونسل باسک سعید بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ مروچی بلوچستان ءِ تہ ءَ پُرایمنیں جھد برجاہ انت اشی تہ ءَ ھچ شک نیست کہ اے پُرایمنیں جُھد یک کشمکش سر ءَ جوڑ بوتگیں جھدے، یک نیمگے ھما انت کہ پُرایمنیں جُھد ءَ دیم ءَ برگ ءَ انت ءُ دومی نیمگ ءَ ھما انت کہ جمھوریت وشنما بلے راستی ءَ بے نپیں نارھانی چیر ءَ مردماں رد دیگ ءُ گلامی نیمگ ءَ برگ لوٹ انت –

آئی ءَ دیمتر ءَ گوشتگ کہ راستی ءِ نام سر ءَ جوڑ کرتگیں کمیشن بید ءِ چہ راستی چیرترینگ ءَ دگہ ھچے نہ انت ، کُشندہ، جلاد کُتکاراں ءُ مظلومانی گون ءَ کجام وڑ ءُ پیم ءُ چونیں ایمنی، آھانی مانش ءَ چہ توار آیگ انت کہ مئے جان ءَ زند ءِ ھم ھساب ءِ ھست –

ماما قدیر بلوچ ءَ گوشتگ کہ بلوچستان ءِ تہ ءَ مردمانی بُنکی ھک روچ مروچی ھم مھکمیں وڑے ءَ لگتمال کنگ بوگ ءَ انت کہ آئی ءِ تہ ءَ زندگ بیگے ھک، سیادانی دچار کپگے ھک، نبشتہ کنگ ءُ گپ جنگے ھک ھَتا کہ زگر کنگ ھم پچگرگ بوتگ بلے اے درستیں بندشاں ابید مروچی ھم بلوچستان تہ ءَ پُرایمنیں جھد جوانی ءَ دیم ءَ روگ اِنت –

نبشتانک: 2 مارچ بلوچ دود ءُ ربیدگی روچ

نبشتہ کار: زروان بلوچ

دی بلوچستان پوسٹ

بیا اِت اے روچ ءِ پشدر ءَ چار اِیں کہ اِے روچ بِزاں دود ءُ ربیدگی روچ کَدی اَیر کنگ بوتگ۔ اگاں ما ایشی ءِ پُشدر ءَ بہ چار اِیں گُڑا اِے روچ دو مارچ 2010 ءَ بلوچ دود ءُ ربیدگی روچ ءِ نام ءَ برجم دارگ بوت۔ دو مارچ 2010 ھما روچ اِنت کہ بلوچ نودربراں اوّلی رند ءَ بلوچ دود ءُ ربیدگی روچ ماں خضدار شھدربرجاہ ءَ داشتگ ھما سنگتاں کہ اِے روچ برجم داشتگ اَت گُڑا زوراکیں استانی لشکر ءِ کارندھاں سنگتانی سر ءَ دستی تراکے چَگل دات ءُ لھتیں سنگت شھید بوت ءُ لھتیں سنگت زدگ بوت اَنت۔

بی ایس او آزاد، بی این ایم ءِ سنگتاں خضدار شھدربرجاہ ءَ اولی رَند ءَ اِے روچ ءَ بلوچ دود ءُ ربیدگی روچ ءِ نام ءَ یک مراگشے اڈ کرت۔ اد ءَ یک جُستے پاد کیت کہ بازیں سنگتے اِے روچ ءِ برجم دارگ ءَ تپاوت نہ کنت ءُ بازیں سنگتے تپاوت نہ دار اِیت۔ زاناں آ وهد ءَ بلوچ مھلوک گار ءُ بیگواہ کنگ نہ بوتگ اَت ؟ اے روچ ھما وهد ءَ دارگ بوتگ کہ آ وھد ءَ بی ایس او آزاد ءِ بنجاھی کمک کماش زاکر مجید گار ءُ بیگواه کنگ بوتگ اَت بی این ایم ءِ سنگت ڈاکٹر دین جان ءُ دگہ بازیں سنگت گار ءُ بیگواه کنگ بوتگ اِت اَنت۔ بلے انگت بی ایس او ءُ بی این ایم ءِ سنگتاں اے پیسلہ کرت کہ 2 مارچ ءَ بلوچ دود ءُ ربیدگی روچ برجم دارگ بہ بیت۔

بلوچ دود ءُ ربیدگی روچ ءَ برجم نہ دار اِیں کہ مئے راج جنگی جاورے ءِ تہ ءَ اِنت۔ اِد ءَ یک جُستے ودی بیت کہ تو مروچی اگاں اے روچ ءَ برجم دارگ نہ لوٹ ئے آیا ترا گوں بلوچ راج ءِ مات ءُ گُھاراں یانچو ھمدردی ھست یا کہ تو رسانکدر ءَ نشتگ ءُ ھمدردی پیش دارگ ءَ ئے ؟-

گڑا مروچی ما چے ءَ جزباتی ایں کہ بلوچ دود ءُ ربیدگی روچ دارگ مہ بیت . مئے مردم گار ءُ بیگواه کنگ بیتگ اَنت مئے مات ءُ گُھار دگانی سر ءَ نشتگ اَنت۔ گُڑا ما باید اِنت اگاں اِے روچ ءَ را دِگہ یک نوکیں رنگے بہ دات اِیں۔ چو اِے پیم ءَ کہ ما ناچ ءُ ترپُنزی ءُ سُبَکی مہ کن اِیں بلکیں ما اِے روچ ءَ یک انچیں مراگشے اڈ بہ کن اِیں کہ آ روچ ءِ تہ ءَ زانتکار ءُ کواس بیا اَنت ءُ بلوچ راجدپتر ءِ سر ءَ وتی مھلوک ءَ را زانت ءُ سرپدی بہ دے اَنت۔

باز سنگت اے گپ ءَ دو مارچ ءَ بلوچ دود ءُ ربیدگی روچ ءِ ھکّ ءَ نہ اِنت کہ ما بس دو مارچ ءَ ناچ کن اِیں۔ بلے اگاں ما اِے جھد ءَ بہ کن اِیں کہ ما دو مارچ ءَ بلوچ راج ءِ راجدپتر ءَ چمشانکے دے اِیں ءُ مھلوکءِ دیم ءَ پیش ئِے بہ کن اِیں گُڑا اِے روچ یک بروَرد آروکیں روچے بیت۔ باید اِنت اِے روچ ھلاس کنگ مہ بیت ءُ نہ کہ اِے روچ ءَ ناچ ءُ تَرپُنزی بہ بیت۔ بلکیں اِے روچ ءِ برجم ءِ دارگ ءِ واست ءَ راجدپتر نویسوک ، نبشتہ کار آرگ بہ بنت ءُ یک شریں وڑے ءَ بلوچ دود ءُ ربیدگانی بابت ءَ زانت ءُ سرپدی دیگ بہ بیت۔

اگاں ما دو مارچ ءِ پُشدر ءَ بہ چار اِیں کہ آ سنگتاں اِے روچ پرچے ءَ داشتگ گُڑا اِے گپ پدّر بیت کہ آیاں ھمے جھد کرتگ کہ اِے روچ ءَ بلوچ ءِ دود ءُ ربیدگ ءَ ھوار آئی ءِ راجدپتر ءِ سر ءَ گپ ءُ تران کنگ بہ بیت تاں کہ بلوچ مھلوک وتی راج ءِ راجدپتر ءَ گوں سرپد بہ بیت آیاں کدی اِے گپ نہ لوٹ اِتگ کہ اِے روچ پہ ناچ ءُ سُبکی کنگ ءَ برجم دارگ بہ بیت۔ اِے روچ ءَ را وت اِستانی کارندہ ءُ کاسگ چَٹّاں یک ردیں دروشمے داتگ کہ مھلوک لوٹائینگ بیت ءُ ناچ ءُ سُبکی بیت۔

بلے ما اِے روچ ءَ یک جوانیں رنگے دات کرت کن اِیں۔ پرچے ءَ کہ اِے روچ ھما سنگتاں برجم داشتگ کہ آیاں تئی راجی آجوئی جنز ءِ ڈُبہ وتی کوپگاں زرتگ ءُ مروچی کوھانی تہ ءَ گوں دژمن ءَ دیم پہ دیم جنگ کنگ ءَ اَنت۔ ءُ بازیں سنگتے ھم شھید کنگ بیتگ۔

دو مارچ ءَ بلوچ دود ءُ ربیدگی روچ ءِ ایر کنوک اوں پِگری سنگت بوتگ اَنت۔ کہ آیاں اِے روچ ءِ بُنھِشت ایر کرتگ باید اِنت کہ بلوچ رھشون ءُ زانتکار اِے روچ ءَ دگہ یک رنگے بہ دے اَنت ءُ سرجمیں بلوچستان ءَ ھوار دگہ کجام جاہ ءَ کہ بلوچ مھلوک نشتگ اَنت آ جاہ ءَ اِے روچ برجم دارگ بہ بیت ءُ بلوچ دود ءُ ربیدگ ءَ ھوار بلوچ راج دپتر گوں جوانی ءَ پیش کنگ بہ بیت۔

باید اِنت اِے روچ پہ ناچ ءِ واست ءَ ایر کنگ مہ بیت پرچے ءَ کہ مئے مات ءُ گُھار دگانی سر ءَ نشتگ اَنت پہ وتی برات ءُ چکانی آجوئی ءِ واست ءَ زھرشانی کنگ ءَ اَنت۔ اگاں ما اِے روچ ءَ برجم دارگ لوٹ اِیں گُڑا ما اِے روچ ءَ وتی راجدپتر ءِ سر ءَ مراگش اڈ بہ کن اِیں ءُ دود ءُ ربیدگ ءَ ھوار وتی راج ءِ گْوست ءِ بابت ءَ مھلوک ءَ را سرپدی بہ دے اِیں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔