TBP Balochi

شال،چمن پنجگور ءَ تیرگواری وئیلاں چار مردم بیران، پنجگور ءَ ایرانی تیل لڈوکیں دو گاڑیاں ٹکر وارتگ ءُ چریشی ءِ آسر ءَ یک ڈرائیورے سُتکگ ءُ بیران بیتگ –

پولیس ءِ رد ءَ شال ءِ دمگ نواکلی ءَ سانگبندی ءَ بیوکیں جیڑہ ءَ تیرگواری ءُ فیروز نامیں ورنایے بیران بیتگ –

ھمے وڑ ءَ سریاب دگ ءَ ناشناسیں مردماں تیرگواری کرتگ ءُ مھمد اللہ نامیں مردمے کُشتگ ھمے وڑ ءَ چمن ءَ شھدگ ءَ ناشناسیں مردمانی تیرگواری ءَ اختر جان بیران بیتگ –

ھمے وڑ ءَ پنجگور ھدابادان ءَ ندیم ء جمعہ ءُ احسان ء اکبر ءِ میان ءَ زمینی جیڑھے ءِ سر ءَ یکے دومی ءَ تیرگواری کرتگ چریشی ءَ ندیم بیران ءُ احسان زدگ بیتگ –

ھمے وڑ ءَ پنجگور ءِ دمگ پروم کپ ءَ ایرانی تیل ءَ پُریں دو گاڑیانی میان ءَ ٹکر وری بیتگ ءُ ھردوکیں گاڑیاں آس کپتگ ءُ چریشی ءِ آسر ءَ یک گاڑی ءِ ڈرائیور سُتکگ ءُ بیران بیتگ –

چریشاں ابید بولان ءِ مٹھڑی ءِ نزیک ءَ سواری گاڑی ءُ ٹرالرے ءِ میان ءَ ٹکر وری بیتگ ءُ ھپت مردم زدگ بیتگ اَنت، ھمے وڑ شال ءَ رودراتکی شھدگ ءَ گاڑی ءَ پرپٹے ءَ را ٹکر جتگ ءُ پرپٹ سواریں مھمد اکبر زدگ بیتگ –

ھمے وڑ ءَ دوشمبے ءِ روچ ءَ کراچی ءَ شال ءَ روکیں ویگو گاڑی بنجاھی شھدگ ءَ نغاڑ ءِ ھند ءَ ترند روگ ءِ سوب ءَ دست ءَ لگوشتگ ءُ چریشی ءِ آسر ءَ نجیب اللہ مسلم خان ءُ سَے سالی ئیں ھارون ءِ مھمد داود ھما دمان ءَ بیران بیتگ اَنت وھدیکہ قافیہ دختر مھمد نسیم، ثانیہ دختر مھمد نسیم، خالد ء عبدالسلام ءُ مھمد ءِ لوگی عارفہ جھمنند کچلاک سک زدگ بیتگ اَنت –

دو روچ ءَ پیش نمل یونیورسٹی اسلام آباد ءَ نودربرانی میان ءَ جنگ ءُ چوپ بوتگ، جنگ ءُ چوپ ءَ پد آھانی میان ءَ سلاہ کنگ بوتگ – گوستگیں روچ ءَ بگیری داروکیں گل ءِ نودربراں دوبر پشتون اسٹوڈنس کونسل ءِ نودربرانی سر ءَ اُرش کُتگ –
اُرش ءَ عبدالحق نامیں نودربرے بیران بوتگ وھدیکہ دگہ پنچ پشتون نودربر ٹپی بوتگ انت –

ٹپی ءُ بیران بوتگیں مردم پمز ھسپتال ءَ برگ بوتگ انت، ھمے گوشگ بوھگ انت کہ نودربر چاکو جتگ کُشتگ –

زانگ بہ بیت اے اولی رند نہ انت کہ پشتون نودربرانی سرا بگیری داروکیں گل ءَ اُرش کُتگ چدو پیش ھم اسلام آباد ءَ پہ وانگ ءِ ھاتر ءَ شتگیں بلوچ ءُ پشتون نودربرانی سرا اُرش کنگ بوتگ –

بلوچستان ءِ جتا جتائیں جاھاں ھپت سال ءُ یک سالے ءَ بیگواہ بیتگیں دو مردم یلہ بیتگ اَنت –

سر بیتگیں ھالانی رد ءَ بلوچستان ءِ دمگ نوشکی ءَ بیگواہ بیتگیں عبداللہ یلہ کنگ بیتگ ءُ وتی لوگ ءَ سر بیتگ –

ھمے وڑ ءَ چہ ھاران لجے ءَ یک سالے ءَ پیسر آوار جنگ بیتگیں مھمد ء کشمیر ھان یلہ کنگ بیتگ ءُ وتی لوگ ءَ سر بیتگ –

ھردوکیں مردمانی یلہ بیگ ءِ ھال بلوچستان ءَ گار ءُ بیگواھیں مردمانی واستا توار چِست کنوکیں گل وائس فار بلوچ مسنگ پرسنز ءَ راست کرتگ اَنت –

وائس فار بلوچ مسنگ پرسنز ءَ گوشتگ کہ بیگواھیں مردمانی یل بیگ وشی یے ءُ سرکار ءَ ھمے اُمیت ءَ کن ایں کہ آ درسیں بیگواہ بیتگیں مردماں یلہ کنت –

آئی ءَ گوشتگ کہ ما سرکار ءَ ھمے اُمیت ءَ کن ایں کہ بازیں سالاں بیگواہ بیتگیں مردماں یلہ کنگ ءُ کھولانی تھاریں شپ ءَ رژنا کنت –

ھمے وڑ سراج اھمد ءِ بیگواھی ءَ چار سال سرجم بیگ ءَ چاگردی رسانکجاہ ٹوئٹر ءَ کمیپئن کامرد بیتگ –

سراج اھمد ءِ دیم ءَ آرگ ءِ واستا بازیں مردماں ٹوئٹر ءَ آئی ءِ یل کنگ ءِ واستا دزبندی کُتگ ءُ ھمے وڑ ءَ وائس فار بلوچ مسنگ پرسنز ءَ ھم آئی ءِ یل کنگ ءِ دزبندی کرتگ –

سراج اھمد چار مارچ دوھزار ءُ ھبدہ ءَ کلات ءَ آوار جنگ بیتگ ءُ مروچی آئی ءِ بیگواھی ءَ چار سال سرجم بیتگ –

بلوچستان ءَ بندوکیں سیاسی ءُ انسانی ھکانی گلانی گوشگ اِنت کہ سرکار یک نیمگے ءَ لس مردماں یل کنگ ءُ دومی نیمگ ءَ مردماں بیگواہ کنگ اِنت –

زانگ بہ بیت گوستگیں روچ ءَ آواران ءَ پاکستانی پوج ءِ لشکر کشی ءِ میان ءَ پانزدہ مردم بیگواہ کنگ بیتگ اَنت –

ھمے وڑ گوستگیں روچ ءَ ھزدار ءَ پاکستانی پوج ءَ دو کس ھم آوار جتگ ءُ بیگواہ کرتگ اَنت کہ آیانی نام عبدالوحید ءُ نثار اھمد ءِ ناماں زانگ بیتگ اَنت کہ ھردوک برات اَنت ڈاکٹر ھدا بکش ءِ چُک اَنت –

سربوتگیں ھالانی رِد ءَ بلوچستان ءِ بنجاھی شھر شال ءَ ناشناسیں مردمانی تیر گواری ءَ دو مردم بیران بوتگ، دکی گونڈوے آپ ءَ کپتگ ءُ بیران بوتگ، شال شھدگ ءِ سر ءَ دگ ءِ وئیلے ءَ یک مردمے بیران بوتگ –

گیشیں ھالانی رِد ءَ شال ءِ دمگ نواں کلی ءَ ناشناسیں مردمانی تیر گواری ءَ یک مردمے بیران بوتگ – وھدیکہ دومی وئیل سریاب دگ ءِ سر ءَ دیم ءَ اتکگ کہ ناشناسیں مردمانی تیر گواری ءَ یک مردم بیران بوتگ –

دمگی مردماں جون چست کتگ ءُ نادراہ جاہ ءَ سرکتگ انت – اژدری چار ءُ ٹپاس ءَ پد جون کھولانی ھوالگ ءَ کنگ بوتگ اَنت- وئیلانی درگت ءَ گیشیں پٹ ءُ پول دمگی پھازدار کنگ انت –

دگہ وئیلے بلوچستان ءِ دمگ دکی ءَ دیم ءَ اتکگ کہ آپ ءِ کڈ ءَ کپگ ءِ سوب ءَ کسان سالیں گونڈوے بیران بوتگ –

اھوالکار ءِ رِد ءَ دکی ءِ دمگ جلال آباد ءَ میتگ ءَ آپ ءِ کڈ ءَ کپگ ءِ سوب ءَ محمد اقبال ترین ءِ ھشت سالی ئیں چُک بیران بوتگ –

گونڈوے جون سول ھسپتال ءَ برگ بوتگ اژدری ءُ چار ٹپاس ءَ پد جون کھول ءِ ھوالگ ءَ کنگ بوتگ –

ھمے وڑ بلوچستان ءِ دمگ کلات ءَ دگ ءِ وئیلے ءَ یک مردمے بیران بوتگ –
دمگی پولیس ءِ رِد ءَ مروچی شال ءُ کراچی ءِ شھدگ ءِ سر ءَ شال ءَ رؤکیں گاڑی ءَ موٹر سیکل ءِ ڈیکر کُتگ –

ٹکر جنگ ءِ سوب ءَ جمعہ خان ء عبدالخالق شاھوانی جھمنند کلات کلی گمگزار بیران بوتگ –

دمگی پولیس ءَ جون دست گپتگ ڈی ایچ کیو ھسپتال ءَ سرکتگ، اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ –

پولیس ءِ رِد ءَ گاڑی ڈرائیور دزگیر ءُ گاڑی دستیگ کُتگ ، اے درگت ءَ گیشیں پٹ ءُ پول کنگ ءَ اَنت –

مادگ پونزگ ءَ برجاھیں پوجی پانگس ءِ سر ءَ اُرش کُتگ ءُ دو کارمند کُشتگ ءُ یکے زدگ کُتگ – بیبگر بلوچ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں کیچ ءِ دمگ ڈنڈار ءَ برجاھیں پاکستانی پوج ءِ پانگس ءِ سر ءَ اُرش کُتگ –

اُرش ڈنڈار ءِ دمگ مادگ پونزگ ءِ پانگس ءِ سر ءَ کنگ بوتگ – اُرش ءِ آسر ءَ پاکستانی پوج ءَ جانی تاوان رس اتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں روچ ءَ بیگاھے وھد ءَ کیچ ءِ دمگ کولواہ ڈنڈار ءَ مادگ پونزگ ءَ برجاھیں زورگریں پاکستانی پوج ءِ پانگس ءِ سر ءَ دور جنگ ءُ وتکاریں سلاھانی گون ءَ اُرش کُتگ –

آئی ءَ گوشتگ کہ اے اُرش ءِ آسر ءَ زورگریں پوج ءِ دو کارمند مُرتگ ءُ یکے زدگ بوتگ –

گڈسر ءَ بی آر اے ءِ جارکش بیبگر بلوچ ءَ وتی درشان ءِ تہ ءَ گوشتگ کہ اے وڑیں اُرش سرڈگار ءِ آجوئی ءَ تاں برجاہ مان انت –

نبشتانک: مات ءُ چُک ءِ میان ءِ باوست

نبشتہ کار: بشیر زیب

رجانکار: مھروز بلوچ

دی بلوچستان پوسٹ

نازُرکیں لُنٹ ءُ کسے ءِ ودار ءَ چارانیں چم اوشت اوشت ءَ گپ کنگ ءَ اِت اَنت –

چُک: اماں او اماں منی پت کجا اِنت؟

مات ءَ چُک ءِ نازرکیں لُنٹ چُک ایت ءُ بے توار بوت –

چُک ءَ چم چست کُت انت ءُ دیم گوں شنگتگیں مید، ھُشکیں لُنٹاں سینگ ءِ سر ءَ بلاھیں درد زوروکیں گمزدگیں ماتے ءِ نیمگ ءَ چارت ءُ گُشت!
اماں او اماں بہ گوش ناں ابا کُجا اِنت؟

مات: منی چُک ترا ورگی ءُ لیبی چیزے زلورت اِنت، من پہ تو زوراں، ترا ھر چیزے لوٹ ایت بہ گوش – مات ءَ سَر سُرینت ءُ سارتیں گِینے کش ایت ءُ آئی ءِ شرپ داریں چماں ھرس چمکگ اِت اَنت، دل ءِ روک ات بلے اوپار ءِ دامن یل نہ دات گوں نرمیں توار ءَ درائینت ئِے –

چُک: اناں اماں اناں، من ءَ ابا لوٹ ایت ءُ دگہ ھچ من ءَ نہ لوٹ ایت ناں ورگ وراں ناں لیب کن آں وھدیکہ ابا کیت من ھم دومی چکانی وڑ ءَ ابا ءِ گون ءَ بازار ءَ رواں، آ پہ من وت درست زوریت- اماں تو من ءَ بہ گوش ناں منی پت کُج اِنت؟من یکرندے ھم وتی پت ندیستگ اماں تو بہ گوش ناں منی پت کُجا اِنت؟

پہ مات ءَ ھر ساھت گران تر بوان ات کہ وتی چُک ءَ چی پسو بہ دے آں ءُ چتو بہ سرپد بہ کن آں چُک ءِ دل ءُ دماگ ءَ چی اسر کپ ایت؟ کجام ھد ءَ داں چُک بید ءِ پت ءَ اوپار کُرت کنت – اگاں من وتی چُک ءَ اگاں سرجمیں راستی ءَ بہ گوشاں ھدانخواستہ ءَ آئی ءَ ھچ مہ بات بلے اگاں چیزے بہ بیت ئِے گڑا منی چی بیت؟ منی وڑیں جنین ءَ کَے سھارا دنت؟ منی زندے گڈی استال ھمے چُک انت – من ءَ گوں وتی زھگ ءَ سک باز مھر اِنت- یکے اے منی جگرے ٹکر انت دومی گندگ ءَ ھم وتی پت ءِ چھرگ ءَ جنت – ھمے ھاتر ءَ من ءَ وتی پُل وتی ساہ ءَ چہ دوستر اِنت – اگاں زھگ ءَ اے وھدی آئی ءِ پت ءِ بارو ءَ درسیں ھالاں آئی ءَ بہ دے آں گڑا چی بیت؟ بازیں جُستانی امبار انت – مات وتی لنکک ھُشکیں لُنٹانی سر ءَ ایر کُرت پہ مھری چُک ءِ نیمگ ءَ چارگ ءَ لگ ات ءُ وتی گوست ءِ ھیالانی تہ ءَ گار بوت –

چُک : اماں منی پت کُجا اِنت؟ آئی ءَ زھر ءَ زھر جست کُت –

مات: آ وَ شُتگ – دل ءِ سر ءَ گُشے ڈوک ءِ ایرکُت، ھُشک ءُ لرزوکیں لُنٹانی توار ءَ درائینت ئِے – مات ءِ دردیگیں چماں ارساں پٹگ بنا بوت –

چُک: اماں بہ گوش ناں منی پت کجا شُتگ؟ پد ءَ کدی لوگ ءَ کیت – آئی پد ءَ جست گپت –

پہ مات ءِ ھاتر ءَ اے دگہ چکاسے اَت، آئی ءَ گوں ارسیگیں چماں گوشت!
مات: منی جان، منی جگر تئی پت نوں ھچبر لوگ ءَ نئیت- آ چرے دنیاء چہ ھم شُتگ –

ایشی ءِ اِشکنگ ءَ چُک ءَ گوں ھیرانی ئیں چماں چاریت ءُ گوشت-
چُک: اماں آ یکرندے ھم پہ منی ھاتر ءَ نئیت؟
پد ءَ گوں لیمرتگیں توار ءَ گوشت ئِے اماں ابا ءَ گوں من ھچ مھر نیست –

مات: منی چُک اگاں آ تئی گور ءَ بہ بوت اِنت آئی ءَ الم ترا مھر داتگ ات بلے نوں ترا سرجمیں زند ءَ آئی ءِ مھر نسیب ءَ نہ بیت اِنت –
چُک : اڑی کُت درائینت ئِے اماں تو منی پت ءَ لوٹارین من بس یکرندے آئی ءَ دچار کپ آں پد ءَ من آئی ءَ گُش آں ابا تو لوگ ءَ یلا مہ دے مہ رو پرچاکہ من ءُ اماں ایوک اِنت پد ءَ آ ھچبر مارا یلا نہ دنت ءُ نہ روت – چُک ءَ پہ بچکندی سر چست کُت گوں لیمرتگیں نگاھاں مات چاریت –

مات : منی چُک من ترا گوشت ناں نوں تئی پت ھجبر در ءِ دپ ءَ پاد ءَ ایر نہ کنت ھمے گپ ءِ کنگ ءَ مات شرو بوت گریوگ ءَ –

چک: اماں اماں من ھچ نہ گوشت بلکیں من بس ابا ءِ ھاتر ءَ جُست کرت پرچا کہ من وتی پت ءِ واستا سک باز پریشاناں- اماں تو پرچا گریوْے؟ ترا کَے ءَ جتگ –

مات ءَ گریت ءُ گوں دردیگیں توار ءَ گوشت ئِے:
مات: من ءَ کس ءَ نہ جتگ، بلکیں تئی پت کُشگ بوتگ –

چُک: اماں اماں منی پت کَے ءَ جتگ؟ من رواں آئی ءَ جن آں؟ آئی ءَ گشاد گُشاد ءَ درائینت-

مات: منی چُک انی وپس تئی بیداری ءِ وھد دنیگت ءَ نیتکگ – آئی ءَ پشک ءِ دامن زرت ءُ ھرس پھک کُرت ءُ درائینت ئِے-

چُک: اناں اماں من چتور بہ وپس آں، منی پت جنگ بوتگ، تو بہ گوش ناں منی پت کَے ءَ جتگ؟

مات: تئی پت پاکستانی پوجیاں جتگ – مات ءَ گون ترندیں توار ءَ گُوشت –

چُک – اماں منی پت دُزے بوتگ، ڈنگی کرتگے؟ یا ناشرکارے بوتگ؟ آئی ءِ دیم زرد تریتگ ات ءُ درینت ئِے –

مات: اناں اناں منی جان تئی پت سرمچارے بوتگ – آئی گوں لرزتگیں لُنٹاں درائینت –
چُک: اماں اے سرمچار چی یے؟ آئی ءَ زوت ءَ جست کُت –

مات: منی چُک سرمچار ھما انت کہ وتی سرڈگار ءِ ھاتر ءَ دیمونی دے اَنت – مات وتی چک ءَ گوشت منی چُک دُز ڈنگ ، ناشرکار، نشہ باپاریاں اے ملک ءِ تہ ءَ کس ھچ نہ کنت پرچا کہ اے مُلک ھماھانی ئیگ اِنت – مات ءَ پہ پھری درائینت –

چُک: اماں اے مُلک پاکستان مئے نہ انت؟ آئی گوں ھیرانگی جُست کُت –

مات: اناں اناں پاکستان بلوچانی ملک نہ انت بلوچانی ملک بلوچستان انت – مات ءِ دل ءِ تہ ءَ آس روک بوت درائینت ئِے –

چُک: اماں زانان بلوچستان ءُ پاکستان یک ایں نہ انت – آئی ھیرانگی ءَ جُست کرت –

مات: اناں یک نہ انت بلکیں پہ زور توپکے زور ءَ پنجاپیاں بلوچستان ءِ سر ءَ زورگری کُتگ – پمے ھاتر ءَ تئی پت ءَ پاکستان ءَ چہ بلوچستان ءِ رکینگے ھاتر ءَ تُپنگ چست کرتگ –

چُک: اماں منی پت ءَ ایوک ءَ جنگ کُتگ ؟

مات: اناں منی چُک، آئی ءِ سنگتیں سرمچار مروچی ھم جنگ ءَ انت –

چُک: اماں ابا ءِ سرمچاریں سنگت انو کجا انت؟

مات: آ کوھان انت –

چُک: گڑا من ھم ھمودا رواں،ءُ پاکستانی پوج ءِ بگیری ءَ جنگ کن آں تانکہ منی پت ءِ بلوچستان ءَ پاکستانیاں پچ بہ گراں؟ چُک ءَ جزبگی ءَ درائینت –

مات: اوپار کن منی چُک، دنیگت ءَ تو کسانے وھدیکہ مزن بئے من وت ترا دیم دے آں سرمچارانی گون ءَ –

چُک: گڑا اماں ایندگر مزنین انت گڑا آ پرچا سرمچارانی گون ءَ نہ رؤنت جنگ نہ کن انت – آ تُرس انت؟ آئی ءَ ھیرانگی ءَ جست کرت –

مات: نزاناں، اگان تُرس انت اگاں ناں وتی سرڈگار ءَ چہ گیشتر وتی جن ءُ چکاں گوں مھر کن انت – آئی ءَ آھے کشیت ءُ درائینت –

چُک : اماں زاناں منی پت ءِ گون ءَ مھر نہ بوتگ؟

مات: اناں منی چُک آئی ءَ گوں ما مھر سک باز بوتگ بلے چہ بلوچ راج ءُ بلوچستان ءَ چہ گیشتر اناں –

چُک: ھیال ءِ تہ ءَ اوژناگ ات ءُ اناگہ ءَ گوشت ئِے: گڑا اماں ما چہ پاکستان ءَ رکیت کن ایں؟ گڑا ما آجو بہ ایں؟
مات: ھو منی چُک پرچا نہ بہ ایں آئی ءَ پہ تمردی درائینت –

چُک: اماں من لوٹاں بلوچستان یک جتا ءُ آجوئیں ڈیھے بہ بیت – آئی ءَ گوں لیمرتگیں ءُ نپرتی نگاھاں درائینت –
مات: منی چُک ھیال کنگ ءَ لوٹ واب سرجم نہ بنت – بلکیں ھیال کنگ ءَ پد امل کنگی انت، وابانی تابیر کنگی انت، واھشت ءُ واب گندوک سک باز انت، بلے دیمروئی ءُ بدلی مدامی ھما مردم کار انت کہ واھشت ءُ وابانی سر ءَ ھیال کن انت ءُ امل کن انت ءُ راجدپتر ءَ نمیران بنت بس واب گندوک ءُ واھشت داروک گوات ءِ مُجاں گار بنت –

چُک: اماں من املی انسان ءِ جوڑ باں بس واب ءِ گندوکے نہ باں –

مات: شر منی چُک؛ منی دوا انت درسیں بلوچ راج واھشت ءُ وابانی دنیا ءَ چہ در بئیت املی ءَ وتی آجوئی ءِ ھاتر ءَ جُھد بہ کنت –

چُک: آمین

دلگوش: اے نبشتانک بلوچ نودربر گل ءِ گوستگیں سرکماش بشیر زیب ءِ شھیدیں بلوچ پُسگے ءِ لوگی ءُ آئی ءِ زھگے میان ءَ بیتگیں باوست انت کہ سال دوھزار ءُ نُھ ءَ ماں بی ایس او آزاد ءِ تاک سگار ءَ شنگ بوتگ –

---

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

شھید اسمائیل تمپ ءَ ینگ اسٹار بلوچ آباد ءِ پیلانٹی ءَ باج برتگ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی اولی راؤنڈ ءِ ششمی گوازی کنگ بوتگ –

مروچگیں گوازی ءَ شھید اسمائیل تمپ ءُ ینگ اسٹار بلوچ آباد لیبیاں جوانی ءَ لیب داشتگ، دؤئیں ٹیم مکابلہ بوتگ اَنت – پیلانٹی مکابلہ ءَ شھید اسمائیل تمک ءَ باج برتگ- ینگ اسٹار بلوچ آباد ٹیم پروش داتگ-

آؤکیں گوازی گومازی ءَ بلوچ کلب دازن ءُ گلشن گومازی ءِ میان ءَ اسکول ءِ پٹ ءَ بیت انت-

وئیل مَچ ءُ نوشکی ءَ پیش اتکگ اَنت کہ اود ءَ دو ٹولیانی میان ءَ جنگ ءُ چوپ ءَ پنچ مردم زدگ بیتگ اَنت –

سر بیتگیں ھالانی رد ءَ مچ ءَ دو ٹولیانی میان ءَ جنگ ءُ چوپ بیتگ کہ اود ءَ پنچ مردم زدگ بیتگ اَنت –

ایدھی ءِ بنشون ءِ رد ءَ زدگ بیتگیں مردمانی پجار سکندر ذولقرینین ء مھمدایوب، فقیر بکش ء کریم بکش، علی گل ء حضور بکش، رھمت اللہ ء اکبر ءُ علی شیر ء گلام ھسین ءِ ناماں زانگ بیتگ اَنت –

ایدھی ءِ بنشون وئیل بوڈیل لیویز ایریا بیتگ کہ اود ءَ دو نیمگی تیرگواری ءَ پنچ مردم زدگ بیتگ اَنت کہ اشانی تہ ءَ یکے ءِ جاور گیش ناگیگ بیتگ اَنت ءُ شال ءَ برگ بیتگ –

وئیل ءِ بارہ ءَ گیشیں سرپدی نہ بیتگ –

ھمے وڑ نوشکی ءَ زمباد گاڑی ءَ یک مردمے کپتگ ءُ سک ٹپیگ بیتگ، ٹپیگیں جاوراں نوشکی ءِ نادراہ جاہ ءَ سر کنگ بیتگ کہ اود ءَ آئی ءَ درد نہ سگ اِتگ ءُ بیران بیتگ –

بیران بیتگیں مردم ءِ پجار مھمد اسھاک ء فتح مھمد ٹک عالیزئء دھوار جھمنند مستونگ گوشگ بیتگ –

دشت ءَ یک مردمے ءِ جون دزکپتگ –

گیشیں ھالانی رد ءَ دشت ءِ ھند متوارا یک چاتے ءِ تہ ءَ یک ورنایے جون دزکپتگ –

دمگداراں ھال ءِ سر بیگ ءَ دمگدار جون ءِ جاہ ءَ سر بیتگ اَنت اود ءَ آیاں جون چِست کرتگ ءُ نادراہ جاہ ءَ سر کرتگ –

لیویز بنشون ءِ رد ءَ جون ءِ پجار اورنگزیب ء خیر بکش جھمنند متوار دشت ءِ نام ءَ بیتگ –

لیویز بنشون ءِ رد ءَ اورنگزیب دو روچ ءَ پیسر وتی لوگ ءَ دراتکگ ءُ مروچی آئی ءِ بے سائیں جون دزکپتگ –

جون ءِ اژدری چار ءُ ٹپاس ءَ پد جون کھول ءِ گور ءَ رسینگ بیتگ ءُ کوش ءِ سوب نہ بیتگ –

سندھ ءِ مزن شھر کراچی ءَ بلوچ متھدہ مھاز ءِ دزبندی ءَ کراچی پریس کلب ءِ دیم ءَ گوستگیں ماہ ءَ روکپتی بلوچستان ءَ ایرانی لشکر ءِ دست ءَ بلوچ پوریاگرانی کوش ءِ ھلاپ ءَ زھرشانی بیتگ –

چارشمبے ءِ نیمروچ ءَ زالبول، ورناہ ءُ چُکانی دستاں بازیں کچے ءَ پلے کارڈز ءُ بینرز بیتگ اَنت پریس کلب ءِ دیم ءَ بلوچ پوریاگرانی انساپ ءِ لوٹ کنگ بیتگ –

ھمے وھد ءَ بلوچ متھدہ مھاز ءُ بلوچ یکجھتی کمیٹی ءِ رھشوناں تران کنان ءَ گوشت ھواریں دستانی دستاں بلوچ پوریاگرانی کوش بلوچ نسل کُشی ءِ درچ اَنت – بلوچ یک دروگیں لکیرے ءَ بھر کنگ بیتگ اَنت ءُ ھردوکیں نیمگاں زُلم ءِ آس جمبور اِنت –

تران کنوکاں گوشت کہ ما یکیں انداماں بندوک اِنت مئے جان ءُ گوشت یک اِنت روکپت ءُ رودراتک ناں بلوچستان یک اِنت ءُ مئے وتن اِنت –

آیاں گوشت ما زُلم ءِ ھلاپ ءَ گھگیری بلوچ ءِ ھون ءَ ھوار اِنت بلے مئے کوش ءَ میان اُستمان پرچا بے توار اِنت –

زھرشانی ءَ کراچی ءَ بندوکیں مردماں ھوار نودربر ءُ جتا جتائیں پھناتاں ھواریں مردماں بھر زرتگ –

زانگ بہ بیت گوستگیں ماہ ءَ روکپت ءُ رودراتکی بلوچستان ءَ جتا کنوکیں لکیر ءِ سر ءَ ایرانی لشکر ءَ تیرگواری کرتگ ءُ بازیں بلوچ پوریاگر بیران بیتگ اَنت –

اے وھد ءَ روکپتی بلوچستان ءِ بازیں شھراں جاورنگیگ اَنت ءُ کار ءُ باری بنجل بند اَنت ءُ میان اُستمان ءَ ھوار بازیں انسانی ھکانی گلاں اے وئیل ءِ زمہ واری ایران کرتگ ءُ ایر جتگ –