TBP Balochi

ہیومین رائٹس کمیشن آف بلوچستان (ھقپان) ءِ رھشوناں بلوچستان ءِ بنجاھی شھر شال ءَ پریس کانفرنس کرتگ – پریس کانفرنس ءَ ھقپان ءِ رھشوناں بلوچستان ءَ انسانی ھکانی لگتمالی ءُ جاورھالانی گزارش شنگ کرتگ اَنت –

آیاں گوشت: سال دو ھزار ءُ بیست ءَ بلوچستان ءِ جتا جتائیں جاھاں177 مردم کُشگ 480 مردم ابید ءِ آمیدگسی پرمان ءَ گار کنگ بیتگ اَنت – آیاں گوشت اے کچ ءُ کساس لھتے دمگانیگ اَنت کہ مارا بس ھمے دمگاں دزرسی ھست اِنت – گیشتریں دمگاں گر ءُ بندیانی سوب ءَ راستیں ھال سر نہ بیتگ اَنت –

آیاں گوشت: سال دوھزار ءُ بیست ءَ بلوچستان سیاسی، زرکاری، چاگردی کارانی تہ ءَ بدتریں ناوشیانی دیمپانی بیتگ کہ کورنا نادراھی ءَ دنیا ءِ زرکاری ءُ چاگردانی بنزہ سرینتگ اَنت بلے اے نادراھی ءِ وھد ءَ نسل ء انسان ءِ پھازگ ءَ بازیں ڈیھاں یکے دومی ءِ کُمک کتگ بلے بلوچستان اے وبا ءِ روچاں ھم انسانی ھکانی پادمالیانی دیمپان بیتگ –

کرونا نادراھی ءِ سوب ءَ شھراں وانگ جاہ بند بیتگ اَنت گڑا بلوچستان ءِ نودربر موکلاں وتی گساں شتگ اَنت کہ آ دگہ شھراں شھدربرجاہ ءُ مزن شھدربرجاھاں وانگ ءَ بیتگ اَنت ءُ ھمے مردم دیم پہ وتی میتگاں شتگ اَنت ھمے میتگ ھروھد ءَ پوجی آپریشنانی سوب ءَ وتی میتگ اش یلہ کرتگ ءُ دیم پہ شھراں شتگ اَنت ءُ اشانی تہ ءَ بازیں نودربر ءُ شھری ریاستی کارمنداں آوار جتگ ءُ بیگواہ کرتگ ءُ بازینے روچ ءِ رھمانی مردمانی دیم ءَ کُشگ ءُ چگل دیگ بیتگ اَنت –

ھکپان ءِ رھشوناں گوشت: وانگی ادارھانی بوگ ءِ سوب ءَ سرجمیں دنیا ءُ پاکستان ءَ وانگی درس آنلائن برجاہ بیتگ اَنت – بلے وھدیکہ چم بلوچستان ءِ نودربرانج انٹرنیٹ ءِ لوٹ ءَ کپ اَنت تانکہ آ وتی وانگی درچ ءَ سرجم کت بہ کن اَنت چریشی ءَ اے لوٹ ءِ پژدر ءَ پولیس گوات دیگ بیتگ ءُ نودربرانی لَٹ ءُ کُت دزگیرکنگ ءُ جیلاں کنگ بیتگ اَنت، ھمے رنگ ءَ ڈاکٹراں پھریزگی کِٹ لوٹ اِتگ گڑا پولیس ءَ چُپتگ اَنت –

آیاں گوشت: موکلاں اتکگیں کیچ ءِ جھنند، زمیندار ءِ زھگ کہ کراچی شھدربرجاہ ءِ نودربر ءَ وتی پِت ءُ گوھار ءُ براتانی ھمراھی ءَ ڈگارانی سر ءَ کار ءَ بیتگ، اود ءَ آ فرنٹیرکور ءِ کارندھاں ھیاف بلوچ گران کرتگ ءُ دگ ءِ سر ءَ آورتگ ءُ آئی ءِ مات پوجیانی دیم ءَ پریات کنان ءَ بیتگ کہ سپاھیگاں آئی ءِ گشان سر جتگ ءُ ھیات بلوچ ءِ دست ءُ پاد بستگ اَنت ءُ آئی ءِ سینگ ءَ ھشت تیر جتگ، چریشی ءَ ھیات بلوچ ھما دمان ءَ بیران بیتگ –

دہ اپریل ءَ مشکہ آواران ءِ جھمنندیں مراد جان ایف سی ءِ کارمنداں وتی بنجل ءَ لوٹائینتگ ءُ آ جست ءُ پرس کنگ بیتگ چُشکہ مراد جان ءَ اردو نہ زانتگ ءُ نانکہ آ جستاں سرپد بیتگ ءُ نانکہ آئی ءَ جواب دات کتگ اَنت چریشی ءِ سر ءَ مراد جان لَٹ ءُ کُٹانی آماچ کنگ بیتگ ءُ آ دومی روچ ءَ یلہ کنگ بیتگ ءُ دومی روچ ءَ اے پرمان کنگ بیتگ یک اردو گپ جنوکیں مردمے ءِ گون ءَ بنجل ءَ بیا بلے مراد جان ءَ اے درد نہ سگگ اِتگ ءُ بیران بیتگ –

ھپت مئی ءَ مند ءِ جھمنند جاوید گوھرام ایف سی ءِ کارندھاں مند بلوچ آباد ءِ میتگ ءِ مسیت ءَ دزگیر کرتگ – کھول ءِ مردناں دمگ ءِ آفیسر ءِ گون ءَ رھوت کرتگ گڑا آیاں گوشتگ کہ جاوید ءِ برات زبیر ءَ مئے دست ءَ بہ دے اِت ءُ جاوید ءَ بہ بر اِت کھول ءِ مردماں ھم ھمے وڑ ءَ کرتگ ءُ جاوید نگیگیں جاوراں کھول ءِ دست ءَ دیگ بیتگ کھول ءِ مردماں جاوید پیسر ءَ تربت ءَ برتگ ءُ پد ءَ بیست ءُ شش مئی ءَ کراچی ءِ نادراہ جاھے ءَ آئی ءَ ساہ داتگ اَنت ءُ آئی ءِ گُٹگ ناکارہ بیتگ اَنت ءُ بندیگی ءِ وھداں آ لَٹ ءُ کُٹ کنگ بیتگ ءُ ورگ دیگ نہ بیتگ ءُ نانکہ آپ دیگ بیتگ –

آیاں گوشت: دوھزار ءُ بیست آ دگہ سالانی تہ ءَ ھاسکر زالبولانی کُشت ءُ کوشاں گیشی اتکگ، مئی ءِ ماہ ءَ تربت ءِ دمگ ڈَنُک ءَ شپ تھاری ءَ دُزاں ءَ یک لوگے ءِ سر ءَ بیڑ برتگ ءُ اود ءَ لوگ ءَ جاڑیگیں زالبول ملکناز ءَ گھگیری کرتگ ءُ دزاں تیرگواری کرتگ ءُ ملکناز شھید بیتگ ءُ آئی ءِ چار سالی ئیں زھگ برمش زدگ بیتگ لوگ ءِ آدگہ مردم دو دزانی تہ ءَ یکے ءِ گرگ ءَ سوبمند بیتگ اَنت ءُ اے دز ءِ کِسگ ءَ ملٹری ءِ کاڈ دزکپتگ ءُ آئی ءَ منّ اِتگ کہ یک ٹولی ءُ ملٹری ءِ سروکی ءَ کار کن اَنت ءُ آئی ءَ اے ھم منّ اِتگ کہ ما ایف سی ءِ سروکی ءَ سیاسی باسکانی آوار جنگ ءُ کوشاں کن ایں ءُ چریشی ءِ سوگات ءَ مارا ھرچ رنگیں دُزی ءُ کارانی سر ءَ آجوئی اِنت –

ھکپان ءِ رھشوناں گوشت: چاردہ جون ءَ تربت ءِ دمگ تمپ ءَ یک دگہ زالبولے کلثوم بلوچ ءِ لوگ ءَ ھمے رنگ ءَ دزی ءِ بنیاد ءَ آوکیں دو کساں آئی ءِ زھگانی دیم ءَ کارچ ءِ سر ءَ سر بُر اِتگ ءُ کُشتگ کشوکانی زانگ ءَ ابید ھم کُشوک آجوئی ءَ ترگ ءَ اَنت –

آیاں گوشت کہ ھژدہ اکتوبر ءَ یک دگہ زالبولے آسیہ بی بی یک پولیس کارمندے ءَ تیرانی آماچ کرتگ ءُ کُشتگ ءُ کشوک مروچی ھم آجوئی ءَ ترگ ءَ اَنت -یک دگہ ھنچیں وئیلے تربت ءَ نامی ئیں شائر، اھوالکار، بتکار ءُ زالبولانی ھک ءِ واستا کارکنوکیں پرکاریں باسک شاھینہ شاھین اچانگی ءَ آئی ءِ لوگ واجہ مھراب گچکی ءَ کُشتگ – کُشوک روچ ء مروچی ءَ گرگ نہ بیتگ چُشکہ بلوچستان ءِ ھچ شھر، ھچ میتگ ءُ کُچگ نیست کہ اود ءَ ایف سی ءِ کنٹرول نیست اِنت دراھیں میتگ ءِ مردماں وھد وھد ءِ سر ءَ ملٹری ءِ بنجل ءَ روگ ءُ پیش بیگی اِنت یک میتگے ءِ مردماں دومی میتگ ءِ مردمانی گندوک ءَ ملٹری ءِ بازیں چیک پوسٹاں وتی پجار کنائینگی ءُ سپر کنگ ءَ مزنیں جنجالے ءِ دیمپان اَنت -بلے کُشوک بلوچستان ءَ مزنیں کھولاں گوں سیادی دار اَنت ءُ انیگیں سر وزیر بلوچستان ءِ ٹک اَنت، ھمے سوب ءَ مروچی ءَ تاں درگیجگ ءُ دزگیر کنگ ءِ کوشش نہ بیتگ اَنت –

آیاں گوشت کہ زالبول ءُ چکانی کوشانی تہ ءَ باز گیشی اتکگ سِی اپریل ءَ تمپ ءَ ایف سی ءِ کارندھاں یک گاڑی ءِ سر ءخ تیرگواری کرتگ ءُ چریشی ءَ ھبدہ سالی ئیں امام شیر ءَ دو تیر لگ اِتگ ءُ چریشی ءَ پد کارمنداں آ ٹپیگیں جاوراں گران کرتگ ءُ وتی چوکی ءِ نزیک ءَ روچ ءِ سر ءَ چگل داتگ، امام داں بیگاہ ءَ ھمے رنگ ءَ دگ ءِ سر ءَ سَپٹوکی جنگ ءَ بیتگ ءُ چریشی ءَ داں آئی ءِ بازیں ھونانی رچگ ءَ آ بیران بیتگ- بیست دسمبر ءَ پنجگور ءِ دمگ کیلکور ءَ یک پوجی آپریشنے ءِ وھد ءَ ھیلی کاپٹراں تیرگواری کرتگ ءُ چریشی ءَ یکیں لوگ ءِ ھپت مردم بیران بیتگ اَنت ءُ چریشانی تہ ءَ چاردہ سالی ئیں ھمزہ عمر ھوار بیتگ –

یک دگہ وئیلے ھپت دسمبر ءَ سیزدہ سالی ئیں ھنیپ میران ءُ شانزدہ سالی ئیں امیر بکش ھما وھد ءَ بیگواہ کنگ بیتگ اَنت آ تجابان ءَ دیم پہ تربت ءَ روگ ےَ بیتگ ءُ دومی روچ ءَ ھردوکانی لَٹ ءُ کُٹ کرتگیں جون ھیرونک پُھل ءِ نزیک ءَ دزکپتگ اَنت –

آیاں گوشت: دہ ستمبر ءَ چاگی ءَ ھورانی سوب ءَ یک چیلے ءَ انسانی لاشانی ھڈ گندگ بیتگ اَنت وھدیکہ میتگ ءَ ھال شنگ بیتگ گڑا بیگواھیں مردمانی کھول ھمے جاہ ءَ شتگ اَنت گڑا ھپیز اللہ مھمد ھسنی کہ سَے سال ءَ پیسر بیگواہ بیتگیں لاش دزکپتگ – ھپیز اللہ سِی اگست دوھزار ءُ شانزدہ ءَ ایف سی ءِ کارمنداں چِست کرتگ ءُ آوار جنگ ءَ پد ایف سی ءِ یک میجرے ءَ کھول ءَ گوں رھوت کرتگ ءُ شست لَک ءِ لوٹ کرتگ – کھول ءَ وتی سرجمیں مڈی بھا کرتگ ءُ پنجاہ ءُ ھشت لک داتگ ءُ ھپیز اللہ ءِ واتری ءِ ودار ءَ بیتگ اَنت ءُ ھپیز اللہ ءِ برات ءَ آئی ءِ دنتان پجاہ آورتگ اَنت –

ڈیھ ءَ ابید درملکاں جھمنندیں بلوچستان ءِ دو نامی ئیں مردم ساجد ھسین ءُ بانک کریمہ بلوچ پیسر ءَ بیگواہ ءُ پد ءَ ھردوکانی لاش سویڈن ءَ کینیڈا ءِ کورانی تہ ءَ دزکپتگ اَنت ھردوکیں وئیلانی بارہ ءَ تنی وھدی سرجمیں گپ دیم ءَ نیاتکگ اَنت ھردوکیں وئیلاں ھمے ملک ءِ ملٹری ءُ آئی ایس آئی ءِ سر ءَ شک کنگ ءَ اَنت –

وئیل ءِ پَٹ ءُ پول ءِ زمہ واری تچک ءَ سویڈن ءُ کینیڈا ءِ سر ءَ بنت ءُ ھردوکیں میتانی گون ءَ ناروائی کنگ مردمانی شک ءُ گمان راستی ءِ نیمگ ءَ بر اَنت –

بانک کریمہ بلوچ ءِ میت کراچی ءِ بالی پَٹ ءَ ملٹری ءَ دستیگ کرتگ ءُ مکران ءِ بازیں جاھاں ترندی کرتگ ھتاکہ میتگ ءِ مردم ھم جنازہ ءَ ایلگ نہ بیتگ اَنت ءُ ادیرہ ءِ سر ءَ ھم دوا لوٹگ ءِ اجازت نہ بیتگ ھمے رنگ ءَ ساجد ھسین ءِ لاش پاکستان ءَ بروکیں کمپنی ءِ رد ءَ ساجد ھسین ءِ لاش سویڈن آرلَندآ بالی پَٹ ءَ بازیں ھپتگاں ایر بیتگ ءُ پرچاکہ پاکستان ءِ نیمگ ءَ این او سی نہ رس اِتگ –

ھمے سال ءَ چار سد ءُ ھشتاد مردم آوار جنگ ءُ بیگواہ بیتگ اَنت اشانی سیادی آواران، ڈیرہ بگٹی، گوادر، ھرنائی، لسبیلہ، کچھی، کیچ، ھاران، ھزدار، مستونگ، نوشکی، پنجگور، شال، سبی ءُ واشک ءَ اِنت، اشاں ابید چہ کراچی ءَ سَے ءُ تھ ئِے سندھ ءَ دو مردم گار کنگ بیتگ اَنت – سال دوھزار ءُ بیست ءَ بیگواہ بیتگیں مردمانی تہ ءَ یک لڑے نودربرانیگ اِنت اشاں ابید ھبدہ زالبول ھوار اَنت بازیں لَٹ ءُ کُٹ کنگ ءَ پد یلہ کنگ بیتگ اَنت –

آیاں گوشت کہ چاردہ فروری ءَ شال ءَ ھسان کمبرانی ءُ ھزب اللہ کمبرانی ایف سی ءَ چِست کرتگ اَنت کہ روچ ء مروچی اشانی بارہ ءَ ھچ ھال نیست کہ آ چون اَنت، کجام بھتام ءَ دزگیر کنگ بیتگ اَنت کھول ءَ پولیس ءِ گور ءَ ایف آئی آر درج کرتگ بلے پولیس ءَ ناشناسانی نام ءَ نبشتگ کرتگ ءُ پولیس ءَ اے گوشگ بیتگ کہ آوار جنوک کَے اَنت –

پولیس ءِ ایف آئی آر ءَ ابید آیانی گوھار بی بی ھسیبہ ءَ ڈیھ ءِ آمیدگس، پارلیمان، عسکری دست، رسانکدر، درستانی گور ءَ شتگ ایمنسٹی انٹرنیشنل، میان اُستمان، یورپی یونین ءُ امریکی اسٹیٹ ڈپارٹمنٹ ءِ گور ءَ ھم کیس جمع کرتگ اے لوٹ ھم کرتگ بلے تاں انگت ءَ ھچ نہ سرپدی نہ بیتگ – آئی ءِ لوگ والا ناں زندگ بیت کن اَنت ناں مرت کن اَنت –

آیاں گوشت کہ گوستگیں وھداں لھتے مردم یلہ کنگ بیتگ بلے یلہ بیتگیں مردمانی کچ ءَ بیگواہ بیتگیں مردمانی کچ گیشتر اِنت –

آیاں گوشت: چریشاں ابید گوستگیں سال ءِ اگست ءِ ماہ ءَ گچک ءِ دمگ اللہ داد ءِ سرجمیں کھول زالبول ءُ چک ھوار اَنت ھما وھد ءَ دزگیر کنگ بیتگ اَنت آ بازار ءَ سامان ءِ زورگ ءَ شتگ ءُ واتر آیگ ءَ بیتگ اَنت ءُ داں شش روچ ءَ بندیگ جاھاں بندیگ کنگ بیتگ اَنت ءُ پد ءَ یلہ کنگ بیتگ اَنت – گوستگیں سال ءِ اگست ءِ ماہ ءَ گچک ءِ بازیں میتگ ءُ دمگ ملٹری آپریشن برجاہ بیتگ اَنت -ملٹری آپریشن ءِ وھداں سدانی کچ ءَ مھلوک آوار جنگ ءُ لَٹ ءُ کُٹ کنگ بیتگ اَنت اشاں ابید سدانی کچ ءَ لوگانی مڈی برگ ءُ ماندارگ بیتگ اَنت –

آیاں گوشت: گوستگیں روچاں پشتون تھپز مومنٹ ءِ رھشون منظور پشتین ءُ آئی ءِ ھمراھانی سر ءَ ارش بیتگ کہ اشی ءَ ترندی ءَ ایر جن ایں ما سرپد بہ ایں کہ منظور پشتین ءُ آئی ءِ ھمراھانی سر ءَ اُرش انسانی ھکانی ءُ انسانی شان ءِ زندگ کنگ ءِ واستا پُرایمنیں جد ءُ جھد ءِ سر ءَ اُرش ءُ اے پالیسانی پژدر باز نگیگ بنت اِنت –

آیاں گوشت: اشاں ابید سی ٹی ڈی شال ءَ ھپت مارچ ءَ پنچ ورناہ دروگیں دیم پہ دیمی جنگ ءِ نام ءَ کُشتگ اَنت کہ اشانی کوش ءَ ھمینچک ایر بہ جن ئے کم اِنت – اے پنچیں ورناہ سیکورٹی ادارھاں جتا جتائیں جاھاں ابید ء آمیدگسی پرمان ءَ دزگیر کرتگ اَنت – اشاں ابید سی ٹی ڈی ءَ پنجگور ءَ بندوکیں دگہ دو ورناہ ناشرکار پدر کرتگ ءُ وتی روتاکاں اے ٹاہ شنگینتگ کہ شال ءَ دزگیر کرتگ اَنت اشی ءِ ھچ راستی نیست اِنت ھردوکیں ورناہ سیکورٹی ادارھاں پنجگور ءَ لھتے ماہ ءَ پیسر آوار جتگ اَنت –

آیاں گوشت: ھمے رنگ ءَ راشد ھسین ءِ مات سی ٹی ڈی کراچی ءَ توار جتگ ءُ راشد ھسین ھِ کیس ءَ دروگیں ھال ءِ سر ءَ دسھت کنگ ءَ بیھار دیگ بیتگ -اشی ءَ ابید گوستگیں ماہ ءَ بیگواھیں مردمانی کھول اسلام آباد ءَ وتی دوستگیں جگرانی ٹکرانی یلہ کنائینگ ءِ ھاتر ءَ دَہ روچاں داں نندانک ءَ نشتگ اَنت چریشی ءَ پد وفاقی وزیر برائے انسانی ھقوق شیرین مزاری ءِ زمانت ءَ نندانک ھلاس کنگ بیتگ پانزدہ مارچ ءَ داں کھول ھال دیگ بنت ءُ سر وزیر آیاں گوں دوچار کپ ایت – بلے بیگواھیں مردمانی درگیجگ ءَ ابید بیگواھیں مردماں دروگیں کیسانی نام ءَ دروگیں جنگ ءِ نام ءَ کشگ ءَ اَنت –

بلوچستان گوستگیں بازیں دھکاں ریاستی پالیسیانی سوب ءَ لاکانونیت ءُ سنگینیں انسانی ھکانی لگتمالیانی آماچگاہ جوڑ بیتگ – اگاں اے پالیسی دلگوش کنگ نہ بیت اَنت گڑا بلوچستان ءَ ناوشی ءِ جاور وتی لمباں پراہ ءُ شاھیگان تِر کت کن اَنت –

نبشتانک: زاتی جْیڑہ ءُ راجکاری تَلّو ءِ سر ءَ تپاک نہ دارگ

نبشتہ کار: گُل ھسن بلوچ

دی بلوچستان پوسٹ

چْوش کہ ارسطو  گُش اِیت بنی “آدم چاگِردی ھیوانے بنی آدم ءَ  تھنائی وش نہ بیت یکے دومی ءَ گوں ھمگرنچ انت” تھنا زندگ بوگ گران بیت بلے چاگِرد ءِ  تہ ءَ انچیں چست ءُ ایر ھست اَنت کہ آوانی سر ءَ یکے دومی ءَ تپاکی ھم  نہ بیت آوانی مجگ یکے دوھمی ءَ گوں جود ءَ بنت ڈاکٹر ھنیپ شریپ یک جاگھے ءَ گُشی کہ “دراھیں بنی آدم یکیں چیز ءِ سرا تپاک بوت نہ کن انت”بلے دگنیا ءِ توک ءَ اے وڑ نہ انت کہ تو گوں دومی مردم ءَ تِپاک نہ دار ئے گُڑا آئی ءَ گوں گند ءُ نند مہ کن دُوا ءُ سلام مکن راجکاری ءِ پِڈ ءَ تپاک نہ دارگ ھر یک باسکے ءَ را بیت گوں دومی ءَ گُڑا اے گپ ءِ مول ءُ مراد اِے نہ انت کہ تو گْوں آئی ءِ زات ءِ سرا ھملہ بکن ما بلوچانی تہ ءِ بد بھتی ءَ راجکاری پڈ ءَ تپاک نہ دارگ ءَ چہ گْیش ءَ انا  ھست انچش کہ مرچی بلوچ دو بھر ءَ راجکاری  کنگ ءَ انت یکے پارلیمانی راجکاری ءُ دومی گیر پارلیمانی راجکاری ھر یکے ءَ  را گوں دومی ءَ جیڑہ ھست آ ھم راجکاری جیڑہ انت ھرکس پہ راج ءَ کربانی دیگ ءَ انت بلے ھمے انگت ءَ کس کسے ءَ را اوپار نہ کنت بی این ایم  ءِ  رھشون گْوں ایف بی ایم  ءُ بی آر پی ءِ رھشوناں اوپار نہ کن آنت۔ آ ایش آں ءَ ھمے پیم ءَ پارلیمانی راجکاری ءِ پِڈ ءَ نیشنل پارٹی ءُ بی این پی مینگل اِے گیر پارلیمانی گلاں اوپار نہ کن انت بلے پد ءَ ھر یکے ھمے گپ ءَ پہ پھر بند اِیت ءُ گْوش اِیت کہ ما پہ بلوچ راج ءَ کربانی دیگ ءَ انت بد بھتی ءَ مئے بلوچانی کِرّ ءَ اوپار کنگ ءِ ھاٹیگ ھلاس کنگ بوتگ۔

بلے پد ءَ اگاں تو بہ چار ئے اِے کہ وت ءَ رھشون ءُ راجکاری گل آنی باسک سر پد بنت اے ھم راجکاری تلّو ءِ سر ءِ ناتپاکی ءِ بگیری ءَ یکے دومی ءِ زات ءِ سر ءَ اُرش کن اَنت گُڑا اِے پیمیں جْیڑھاں مردم ءِ مَگز کار نہ کن اَنت کہ اِے پرچے چْو ناسرپدی کن اَنت۔

چْوش کہ واجہ ھیر بکش مری بلوچ راجی جُنز ءِ  پیگمبر گْوشگ بیت آئی ءَ گوں ھزاراں مردم ءَ راجکاری ءِ پِڈ ءَ تپاک نہ داشتگ ءُ آئی ءِ پِگر ءِ منّوگر نہ بوتگ اَنت گُڑا اِے وڑ ھم نہ اِنت کہ گْوں آئی ءِ زات ءَ نپرت بہ کن اَنت۔

انچش کہ بانُک کریمہ بوتگ آئی ءِ جھد ستا کرز اِیت، آئی ءَ بلوچ راجکاری ءَ را ءُ زالبُولاناں راجکاری ءَ را یک نوکیں رنگے دات ھاں البت ءَ باز جاگہ ءَ بانُک ءِ ردی ھم بوتگ بلے بدبھتی ءَ مئے کر ءِ اگاں مردم شھید کنگ بوت چاہ ءِ آئی چینچو ردی کُتگ آیانی سر ءَ ما ھچ بر گپ ءُ تراں نہ کن انت پرچے کہ ما مُردگ پرست اَنت۔

سک باز مردم بوتگ آئی بانُک ءَ گوں راجکاری ناتپاکی داشتگ بلے آئی ءِ نمیران بوگ ءَ پد آئی ءَ را سک باز درد بوتگ گُڑا اے گپ ءِ مول ءُ مراد اِے نہ انت تو آئی پِگر ءَ گوں تپاک نہ کن ئے گُڑا آئی ءِ جتائی ءَ ترا درد نہ بیت ۔انچیں باز سنگت ھست آ گْوش اَنت کہ یار پلانی پْیسر ءَ گوں بانُک ءَ جیڑہ داشتگ بلے مرچی آئی ءِ واستا ارس ریچگ ءَ اِنت۔
گُڑا اِد ءَ اِے گپ ءِ مول ءُ مراد اِے ھم نہ اِنت کہ آئی ءَ بانک ءِ نُکس ورگ ءَ وش بُوتگ ھمے وڑ ءَ بازیں سنگت گْوں ڈاکٹر مھرنگ ءَ راجکاری ءِ پِڈ ءَ تپاک نہ دار اَنت گُڑا اِے گپ ءِ مول ءُ مراد اِے نہ اِنت کہ سنگت گْوں ڈاکٹر مھرنگ ءِ زات ءُ تپاک نہ دار اَنت۔

انچو یک روچے من ءُ دِگہ یک سنگتے نشتگ ات اَنت گُڑا من ءَ سنگت ءَ گْوشت کہ  زیکیں روچ ءَ باز مردم ءَ گوں بانُک کریمہ ءَ راجکاری ءِ پڑ ءَ تپاک نہ داشتگ داشتگ ءُ مرچی آئی واستا ارس ریچگ ءَ انت۔ مرچی اگاں شما گوں ماہ رنگ ءَ تپاک نہ دار اِت باندات ءِ روچ ءَ اگاں ماہ رنگ ءَ تاوانے بہ رس ایت شما سنگت کا اِت ءُ پہ ماہ رنگی واستا ارس ریچ اِت ۔

من سنگت ءِ اِے ناسرپدیں گپ ءِ سرا کندگے جت ءُ پسو دات سنگت تو کُجام وڑیں جیڑہ گُشگ ءَ ئے راجکاری یا زاتی؟ یکے ءَ را گُش انت راجکاری جیڑہ ءُ یکے ءَ را گُش انت زاتی جیڑہ مارا گوں کس ءَ زاتی جیڑہ نیست اگاں ھست گُڑا آ جْیڑہ راجکاری جیڑہ انت اگاں مرچی ما بچار اَیں کہ بلوچستان ءِ ھر دمگانی تہ ءِ مردم ترا یک گلے ءِ تہ یکمشت بوگ ءَ گند پیداک اَنت گڑا اِے راجکاری انت کہ مارا یک جاگہ جاگہ ءُ یکمشت ئِے کرتگ۔

مردم ءَ را زاتی  جیڑہ بیت گوں وتی  ھْونی رشتہ دار ءُ وارساں ءُ کش ءُ کِرّ ءِ ھمسائگاں۔ بلے ھر مردم ءَ گوں زاتی جْیڑہ بوت کرت نہ کنت اگاں جْیڑھے ءُ ناتپاکی یے بیت گُڑا آ راجکاری ءِ تَلّو ءِ سر ءَ ھم بوت کرت کنت۔
انچو کہ بساک ءِ تہ ءَ لھتیں   وھد انت سنگتانی میان ءَ راجکاری جیڑہ بندات بوتگ اَنت ءُ آ جْیڑہ جتا جُتائیں جیڑہ بوتگ انت اِے جیڑھانی گْیش ءُ گیوار کنگ ءِ ھاتر ءَ گند ءُ نند کرتگ ءُ گپ ءُ باوست کرتگ بلے اِے یک دگہ باوستے۔

بلے ھمے جْیڑھانی میان ءَ باز ناسرپدیں باسکاں ءُ موہ پرستیں مردماں انچش چِست ءُ ایر کرتگ تو گْوش ئے زاناں مئے جْیڑہ راجکاری ءِ جْیڑہ نہ بوتگ اَنت بلکیں آ ھونی جْیڑہ بوتگ اَنت
اگاں ما بہ چار اَیں مرچی بساک ءِ بُنجاہ ءَ بگر تاں باسک ءَ کسے ءِ ھاندانی جیڑہ نیست ءُ کس ھم یکیں ھند ءُ دمگ ءِ مردم نہ انت کہ آیانی جیڑہ زمینی ءُ زاتی جیڑہ بہ بنت اگاں جْیڑھے ھست گُڑا آ راجکاری ءِ تلّو ءِ سر ءِ جْیڑہ اَنت۔

مروچی تاں بساک ءِ بُنجاھی سنگتاں گوں ما نند انت ھوٹل ءَ چاہ ور انت ءُ یکے دومی ءَ گْون وشگپی ءُ تران بیت، سلام ءُ  دوا بیت  بلے زاتی سنگتی کسّے ءِ گْوں کسّ ءَ گوں ھلاس نہ انت ۔۔ ھاں بازیں ناسرپدیں سنگت ھست کہ مرچی تاں یکے دومی ءَ گوں دیم پہ دیم نہ بنت منی ھیال ءَ اے راجکاری جیڑھے بلے زاتی جْیڑھے نہ اِنت۔ بایدیں سنگت راجکاری جیڑھاں پہ وتی زات ءَ مہ زُور اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گلشن یونائیٹڈ گومازی ءَ نونھال کنشکلات ءِ دیم ءَ ھپت گول ءَ باج برتگ ءُ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی دومی راؤنڈ ءِ گڈی گوازی کنگ بوتگ –

مروچگیں گوازی نونھال کُنشکلات ءُ گُلشن یونائیٹڈ گومازی ءِ میان ءَ بوتگ ، دؤئیں ٹیمانی لیبیاں گوں جوانی ءَ لیب داشتگ – گُلشن یونائیٹڈ گومازی ءَ ھپت گول داتگ ءُ باج برتگ، نونھال ءِ ٹیم پروش داتگ-
گومازی ٹورنمنٹ ءَ اے اولی رند انت کہ زیرو ءِ سر ءَ گلشن یونائیٹڈ ھپت گول ءِ ریکارڈ ایر کُتگ –

مھمان ھاس ماسٹر عظیم آزگ، ھلیل نیکی ءُ ملا سگیر بلوچ ءَ دؤئیں ٹیمانی لیبی دلبڈی داتگ ءُ آھانی ستاشانی کرتگ –

زانگ بہ بیت مروچی گومازی اسکول پٹ ءَ برجاھیں پٹبال گوازی ءِ دومی راؤنڈ ءِ گُڈی گوازی کنگ بوتگ، اے ٹورنمنٹ آل ڈسٹرکٹ ءَ بیست ءُ شش ٹیماں بھر زرتگ، آھانی تہ ءَ دومی راؤنڈ ءَ شش ٹیماں جوانی ءَ لیب داشتگ ءُ دیم ءِ ٹیم پروش داتگ انت ءُ وت ءَ سیمی راؤنڈ ءَ جاہ داتگ –

سربوتگیں ھالانی رِد ءَ بلوچستان ءِ دمگ ھرنائی ءَ اشکرانی کھن ءِ وئیل ءَ ھپت مردم بیران وھدیکہ بلوچستان ءِ جتا جتائیں دمگاں دگ ءِ وئیلاں یازدہ مردم ٹپی ءُ تیرگواری ءِ وئیلاں سَے مردم بیران بوتگ اَنت-

گیشیں ھالانی رِد ءَ ھرنائی ءَ اشکرانی کھن ءِ وئیل ءَ ھپت بیران بوتگیں کاریز کارانی جون ھبدہ ادار ءَ پد در کنگ بوتگ انت –

ریسکو بنشون ءِ رِد ءَ ریسکیو آپریشن سرجم بوتگ درسیں جون در کنگ بوتگ انت –

ھرنائی ءِ ڈپٹی کمشنر سھیل انور ھاشمی ءِ رِد ءَ اے وئیل گوستگیں روچ ءَ دوشمبے ءَ ھرنائی ءَ چہ کساس چل ءُ پنچ کیلو میتر ءَ دیر تور غر ءَ اشکرانی کھن ءَ دیم ءَ اتکگ کہ کھن ءِ لمبگ ءُ آکسیجن ءِ کمی بوگے سوب ءَ دوازدہ سد یا چاردہ سد فٹ جھلی ھپت کاریز کار چیر تر اِتگ اَنت –

آئی ءِ گوشگ ات کہ اے دمگ ءَ مبائیل دامگ نبوگے سوب ءَ دمگی پھازدار ءُ ریسکیو ءَ پہ وھد ھال سر نہ بوتگ –
اے درگت ءَ مائینز چیف شفقت فیاض ءِ گوشگ انت کہ کھن ءِ تہ ءَ اول ءَ پنچ مردم چیر تر اِتگ بوتگ اَنت کہ آھانی درکنگے ھاتر ءَ دگہ دو کاریز کار ءَ شُتگ آھم وئیلے آماچ بوتگ انت چہ گیس ءَ دم پُر نہ بوتگ بیران بوتگ انت –

آئی ءِ گوشگ ات کہ ریسکیو آپریشن گوستگیں پانزدہ ادار ءَ برجاہ انت بلے بدکسمتی ءَ اشکرانی کھن ءَ چیر تر اِتگیں کاریز کارانی تہ ءَ یکے ھم نہ رک اِتگ درسیں کاریز کارانی جون سَے شمبے ءِ روچ ءَ درکتگ نادراہجاہ ءَ سر کتگ انت –

بیران بوتگیں سَے مردمانی سیادی چہ افغانستان انت ءُ وھدیکہ ایندگر بلوچستان ءِ دمگ پشین دگہ دمگانی جھمنند انت –

گوستگیں روچاں بلوچستان ءِ تہ ءَ اشکرانی کھن ءَ دیم ءَ اتکگیں وئیلاں چہ اے سیمی مزنیں وئیل انت گوستگیں یک ماھے ءِ میان ءَ بلوچستان ءِ تہ ءَ بیران بوتگیں کاریز کارانی کچ بیست ءُ دو انت –

پھازگی کانودانی سر ءَ امل نہ کنگ ءُ پھازگی انتزام نہ بوگے سوب ءَ بلوچستان ءَ اشکرانی کھن ءَ ھر سال سدانی کچ ءَ کاریز کار وئیلانی آماچ بنت ءُ بیران بنت یاکے سرجمیں اُمر ءَ لنگ بنت –

زانگ بہ بیت یازدہ مارچ ءَ شال ءِ دمگ مارواڑ ءَ اشکرانی کھن ءَ گیس پُر بوگے سوب ءَ شش کاریز کار بیران بوتگ اَنت وھدیکہ ھبدہ فروری ءَ ہرنائی ءِ دمگ شاھرگ ءَ گیس تراک ءَ چار کاریز کار مرگ ءِ دیمپان بوتگ اَنت-

دومی نیمگ ءَ بلوچستان ءِ دمگ نوشکی ءَ دگ ءِ وئیل ءَ دو پولیس افسراں ھوار پنچ کارندہ ٹپی بوتگ اَنت –

وئیل نوشکی ءِ دمگ مل ءَ شھدگ ءِ سر ءَ دیم ءَ اتکگ کہ کسانیں گاڑی ءَ کراس کنگے میان ءَ پولیس وین دگ ءَ چہ در اتکگ ءُ کوہ ءَ ٹکریتگ، چریشی ءَ چہ دو پولیس افیسراں ھوار سَے کارندہ ٹپی بوتگ اَنت –

ٹپی بوتگیں مردمانی پجار منیر احمد مینگل ءُ اجاز احمد سپاھیگ محمد طاہر، وحید احمد ءُ عاقل شاہ ءِ ناماں بوتگ انت – ٹپی بوتگیں مردماں جاندراھی ھاتر ءَ ٹیچنگ ھسپتال نوشکی ءَ سر کنگ بوتگ انت –
ھمے وڑ بلوچستان ءِ دمگ ڈیرہ مراد جمالی ءَ دو جاھاں دیم ءَ اتکگیں دگ ءِ وئیلاں شش مردم ٹپی بوتگ اَنت –

یک وئیلے نصیر آباد ء دمگ بیر چوکی ءِ نزیک ءَ دیم ءَ اتکگ کہ دو گاڑیانی ڈیک ورگے سوب ءَ چار مردم ٹپی بوتگ اَنت، ٹپی بوتگیں مردمانی پجار عبدالحکیم، عبدالحق، حضور بخش، نبی بخش ءِ نام ءَ بوتگ اَنت- دومی وئیل نصیر آباد ءِ دمگ پولیس چوکی ءِ نزیک ءَ پٹرول پمپ ءَ دیم ءَ اتکگ کہ موٹر سیکل ءَ گوں رکشہ ءَ ڈیک وارتگ چریشی ءَ دو عبدالطیف ءُ اربیلا ٹپی بوتگ انت – پہ جاندراھی ءِ ھاتر ءَ ھما دمان ءَ نادراھجاہ ءَ سر کنگ بوتگ انت –

بلوچستان ءِ جتا جتائیں دمگاں تیرگواری وئیلاں سَے مردم بیران بوتگ اَنت –

بلوچستان ءِ بنجاھی شھر شال ءَ ٹی اینڈ ٹی ءَ ناشناسیں سلاہ بندیں مردماں لوگے ءَ تیرگواری کُتگ، تیرگواری ءِ آسر ءَ دو مردم بیران بوتگ اَنت-

آھانی تہ ءَ یکے ءِ پجار طارق اعوان جھمنند پنجاپ ءِ نام ءَ چہ بوتگ – دوئیں مردم ھما دمان ءَ نادراھجاہ ءَ برگ بوتگ انت –

دگہ وئیلے شال ءِ دمگ پشین یارو میتگ ءَ لوگی جیڑہ ئِے سر ءَ تیر گواری ءَ یک مردمے بیران بوتگ، بیران بوتگیں مردمے پجار محمد سعید نام ءَ بوتگ –

دمگی پھازداراں لاش دست گپتگ دمگی نادراھجاہ ءَ سرکتگ اژدری چار ءُ ٹپاس ءَ پد لاش کھول ءِ ھوالہ کنگ بوتگ –

ھمے وڑ بلوچستان ءِ دمگ دالبندین ءَ ناشناسیں مردماں باپ پاٹی ءِ ضلعی صدر اسفند یار یار محمد زئی ءِ بیٹک ءَ تیر گواری کُتگ، تیر گواری ءَ ھچ وڑیں تاوان ءِ ھال نیست اسفند یار یار محمد زئی چہ آ جاہ ءَ در اتکگ ءُ شتگ –

تربت ءَ سول سوسائٹی ءِ چیردستی ءَ تربت گرلز ماڈل اسکول ءَ صنفی برابری ءُ زالبولانی وت واکی ءِ سر ھال ءِ سر ءَ مراگشے برجم دارگ بوتگ ، وھدیکہ تربت زون پنڈال ءَ “بامسار لیٹریچر” بینر ءِ چیر ءَ بُک اسٹال ءِ ھم جنگ بوتگ کہ اود ءَ جتائیں سرھالانی سر ءَ کتاب ایر کنگ بوتگ انت –

مراگش ءَ گچینی ءِ مھمان بی ایس او ءِ گوستگیں سرکماش ڈاکٹر کھور خان ، بی اس او ءِ گوستگیں سرکماش ڈاکٹر تاج بلوچ، راجی ءِ جنرل سیکرٹری بانک کلثوم بلوچ ڈی ایس ایف گوستگیں سرکماش نغمہ شیخ، تربت سیول سوسائٹی ءِ کنوینر گلزار دوست ءُ گرلز ماڈل اسکول ءِ پرنسپل میڈم زُمرِد بلوچ ءُ بی ایس او ءِ زریف رند ءَ تران کُتگ، وھدیکہ تلو ءِ ڈبہ شگر اللہ بلوچ گون بوتگ –

سیمنار ءِ سرھال ءِ سر ءَ باز جوانی زانشتی باوست کنگ بوتگ ءُ گچینی راجدپتری تک ءُ پھنات ءُ نگدکاری ءِ سر ءَ چمشانک دیگ بوتگ – وھدیکہ مراگش ءَ نودربر، استاد ورنا سیاسی باسکاں بھر زرتگ –

زانگ بہ بیت چیزے وھد اِنت بلوچستان ءِ بازیں جاھاں وانگی، لبزانکی ءُ چاگردی سرھالانی سر ءَ مراگش بیگ ءَ اَنت ءُ اشاں بلوچ زانتکار ءُ کواس زانشتی ءِ دیمروئی ءِ تکاں ساڑایگ ءَ اَنت –

سر بیتگیں ھالانی رد ءَ روکپتی بلوچستان ءَ ناشناسیں مردماں یک ورنایے سر ءَ اُرش کرتگ ءُ آ کارچ جتگ ءُ کُشتگ –

کوش ءِ وئیل روکپتی بلوچستان ءِ دمگ پھرہ ءَ بیتگ کہ اود ءَ ناشناسیں مردماں میثم جمشید زئی کارچ جتگ ءُ کُشتگ –

وئیل ءِ بارہ ءَ گیشیں سرپدی نہ بیتگ ءُ دمگداراں ھم اے درگت ءَ دگہ گپ دیم ءَ نیاؤرتگ –

لس مردمانی گوشگ اِنت کہ ایرانشھر ءِ وڑیں جاھے ءَ ایرانی پولیس ءُ آ دگہ ادارھانی جاڑیگ بیگ ءَ ابید ھم مردم کُشگ بیگ ءَ اَنت ءُ چریشی ءَ زانگ بیت کہ اے مردمانی کوشاں ایرانی چیریں ادارھانی دز کمک اَنت –

نبشتانک: جنگ المی اِنت

نبشتہ کار: رباس بلوچ

دی بلوچستان پوسٹ

اے دنیا ءِ تہ ءَ ھزارانی کساس ءَ جنگ بوتگ ءُ بیت، جنگانی یک سکیں مزنیں لڑے جوڑ بیت اگاں ما انسان ءِ پُشدر ءَ بچاراں اے سوج کنگ سک گران اِنت کہ دنیا ءِ اولی جنگ کُجام بوتگ بلے دنیا ءِ راجدپتر ءِ ھساب ءُ دادانی سوج ءُ پد اِنت کہ دنیا ءِ اولی جنگ مھسوپُٹمیا ءَ کنگ بوتگ کساس دو ہزار ھپسد بی، سی ءَ مہسوپُٹمیا دُگنیا ءِ توكا اولی تھزیباں چہ یكے دگے یک گپے اش انت کہ دُگنیا ءِ اولی کہ راہ ءُ راہبند بزاں کانون بوتگاں آ ھم مھسومٹیمیا ءَ اڑ دیگ بوتگ انت اے گپ ءَ ما شُما دُرس سدک بہ ایں کہ ارچ کُجا بنی آدم ءِ پد گندگ بنت اود ءَ جنگ ءِ بوگ الم اِنت انسان داں ھما وھد ءَ کہ ودی بوتگ تاں روچ ءِ مروچی جنگ ءِ تہ ءَ اِنت آ دگے گپے کہ برے وت ما وت ءَ ءُ برے گوں اندگیں قوماں بلے آدمزاد ءِ جنگ الم کُتگ اے جنگ کدی پہ مال ءُ زر کدی پہ زمین، بیرگیری، عشق، ننگ ءُ ناموس ءُ دگہ ہزاراں چیزانی واستا کنگ بوتگ اَنت ۔ھمے وڑ ءَ دنیا ءِ بازیں ملکاں جنگ پہ یک ہوزارے ءَ کارمز کُرتگ ءُ اے گپ ءِ توکا اچ شک نیست کہ آ اے کار ءِ تہ ءَ سوبمند بوتگ اَنت پرچا کہ جنگ ساری ءَ ھم بوتگ ءُ انوں ھم بوگ ءَ اِنت بس ھمے یکیں مٹی اتکگ کہ پیسر ءَ مڑگ بے کانونی بوتگ بلے مروچی جنگ کانونی کنگ بوتگ۔اشی ءِ مسترے درور مارا افغانستان ءُ عراق ءَ گندگ ءَ کیت بلوچی ءَ بتلے گوش اَنت زورا سر ءَ راہ اِنت ءُ انو دنیا ءِ مزنیں طاقتاں انچوش کُتگ، ھرچی کہ آ کنت آ راست ءُ فق اَنت بلے اگاں دگک کمزوریں راجے پہ وتی رکینگے یا کہ بقا ءِ واستا اگاں کسانے گامگیجے زور ایت، آ راج پاد مال کنگ بیت یا کہ آئی ءِ سرا پہ زور بندیش جنگ بیت۔

اد ءَ اگاں ما گیدی ءِ کوھنیں راجی جنگاں بچاراں گڑا آ دُرس یک وھدے ڈالچار کنگ بوتگ اَنت مزنیں راجانی دستاں مروچی امریکا کہ وت ءَ مزن لیکیت ءُ اندگہ قوماں پہ جنگ ءَ مکن کنت،آ اے گپ ءَ چہ ہچبر پرا موش مہ بیت کہ یک دورے آئی ءَ وت جنگ کُتگ پہ وتی بقاءِ واستا اے گپ ھم راست اِنت کہ چین ھم پادمالیں کوماں چہ یکے بوتگ بلے آئی ءِ جوانیں جنگ کارانی ءُ جہدکارانی زورے پد ءَ آ مروچی سک وشحال اَنت نِی اے گپ الم منگی اِنت کہ جنگ المی اِنت اگاں جُست تئی زندگ بوگ ءِ بابت ءَ اِنت ءُ ھچ کوم پُشتاہ ما کنزیت اگاں گپ آئی ءِ آؤکیں پدریچے آسودگی ئیگ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ پتر ھال ءَ سر بیتگیں ھالانی رد ءَ کیچ ءِ دمگ تمپ گومازی ءِ کوھی دمگ کلبر ءُ دگہ جاھاں پوجی کارمند جنگی ساز ءُ ساماناں روگ ءَ گندگ بیتگ اَنت –

ھالانی تہ ءَ گوشگ بیتگ کہ گومازی ءِ کوھی دمگ کلبر ءِ کوہ ءِ تہ ءَ پُتر اِتگ ءُ لشکر کشی بیگ ءَ اِنت –

کیچ ءَ ھواریں دمگ تمپ ءِ کوھی دمگاں گوستگیں بازیں روچاں پوجی لشکر کشی برجاہ اَنت ءُ گمان ھمے کنگ بیگ ءَ اِنت اے لشکر کشی گیش دراج کش کنگ بیتگ، پوجی کارمنداں سرجمیں راہ ءُ در بستگ اَنت –

گوستگیں شپ ءَ چہ مند ءَ پوجی کارمندانی بازیں کَچے ءَ گاڑی ءُ پَرپٹاں ھواریں کارمند اپسھی کھن ءِ نیمگ ءَ شتگ اَنت دمگ ءِ مردماں لشکر کشی ءِ گمان کرتگ ءُ گوشتگ کہ دمگ ءَ یک مزنیں لشکر کشی ءِ چِن ءُ لانچ کنگ بیتگ اَنت ءُ بازیں پوجی مُچیاں لشکر کشی گیش ترندیانی گمان اِنت –

زانگ بہ بیت گوستگیں روچ ءَ مند ءِ دمگ ءَ پوجی کاروان ءِ سر ءَ اُرش بیتگ اَت کہ آئی ءِ زمہ واری بلوچستان ءَ لبریشن فرنٹ ءِ جارکش میجر گوھرام بلوچ ءَ من اِتگ ءُ گوشتگ اَت کہ پوجی کاروان ءِ سر ءَ اُرش کرتگ ءُ چار پوجی کارمند کُشتگ –

پوج ءِ سر ءَ بیتگیں اُرش ءَ پد پوج ءَ مند ءِ بازار بند کرتگ ءُ پوج ءِ سر ءَ بیتگیں اُرش ءَ ھواریں مردمانی دزگیر کنگ ءِ لوٹ کرتگ –

تنی وھدی کیچ ءِ کوھی دمگاں برجاھیں پوجی آپریشنانی بارہ ءَ پوج ءِ واکدارانی نیمگ ءَ ھچ گپ دیم ءَ نیاتکگ اَنت –

بلوچ کلب مند ءَ ینگ اسٹار تمپ یک گولے ءَ باج برتگ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی دومی راؤنڈ ءِ پنچمی گوازی کنگ بوتگ –

مروچگیں گوازی ء ینگ اسٹار تمپ ءُ بلوچ کلب مند میان ءَ بوتگ ، دؤئیں ٹیمبانی لیبیاں گوں جوانی ءَ لیب داشتگ – بلوچ کلب مند ءَ یک گولے داتگ ءُ باج برتگ- ینگ اسٹار تمپ ءِ ٹیم پروش داتگ-

مھمان ھاس واجہ یاسین بلوچ ءُ ماسٹر امام بلوچ ءَ دؤئیں ٹیمانی لیبی دلبڈی داتگ انت ءُ آھانی ستاشانی کرتگ –

دومی راؤنڈ ءِ گُڈی گوازی گومازی ءَ گُلشن گومازی ءُ نونھال کنشکلات ءِ میان ءَ اسکول گراؤنڈ ءِ پٹ ءَ بیت انت- وھدیکے بُلبل ھوزئی مند سیمی راؤنڈ ءَ لیب دارگ بیت انت –

سربوتگیں ھالانی رِد ءَ شال ءَ ناشناسیں مردماں لوگے ءَ دور کتگ سَے کسانیں زھگ کُشتگ اَنت وھدیکہ یکے زدگ کُتگ، دکی ءَ اشکرانی کاریز ءِ وئیل ءَ یک مردمے بیران بوتگ –

گیشیں ھالانی رِد ءَ بلوچستان ءِ بنجاھی شھر شال ءَ ناشناسیں مردماں لوگے ءَ دور کُتگ تیزیں کارچے ءَ گوں سَے کسانیں زھگانی سر ءَ اُرش کتگ ءُ کُشتگ انت –

وئیل شال سریاب کسٹم ءِ نزیک ءَ گلام رسول پھاٹک ءَ دیم ءَ اتکگ کہ ناشناسیں مردماں محکمہ تعلیم جونئیر کلرک عطاء اللہ ءِ لوگ ءَ دور کُتگ آئی ءِ سَے کسانیں زھگ حسنین، زین ءُ اقصی کارچ جتگ ءُ کُشتگ انت وھدیکہ آئی ءِ دگہ جنکوے کشمالہ ٹپی کُتگ –

پولیس ءِ رِد ءَ وئیل ءِ وھد ءَ عطاء اللہ ءُ آئی ءِ لوگی لوگ ءَ ساڑی نہ بوتگ انت وھدیکہ لوگ ءِ کاردار ھم ساڑی نہ بوتگ – وئیل ءِ ھال ءِ سربوگ ءَ پولیس ءَ وت ءَ سر کُتگ ٹپی ءُ بیران بیتگیں گونڈو نادراہ جاہ ءَ سر کُتگ انت-

پولیس ءِ رِد ءَ گونڈوانی اُمر کساس شش سال ءَ بگر داں دوازدہ سال انت وھدیکہ پولیس ءَ لوگ ءِ کاردار دزگیر کتگ اے درگت ءَ پٹ ءُ پول کنگ ءَ اِنت –

دومی نیمگ ءَ بلوچستان ءِ دمگ دکی ءَ اشکرانی کھن ءِ وئیل ءَ یک کاریز کارے بیران بوتگ-

وئیل کھن ءِ ھاک ءِ کپگے سوب ءَ دیم ءَ اتکگ چریشی ءِ سوب ءَ رحمت اللہ ء ملا محمد خان جھمنند افغانستان بیران بوتگ –
بیران بوتگیں مردم ءِ جون ھسپتال ءَ سرکنگ بوتگ اود ءَ اژدری چارءُ ٹپاس ءَ پد افغان ءَ دیم دیگ بوتگ –

ھمے وڑ بلوچستان ءِ دمگ ھرنائی طور غر ءَ اشکرانی کھن ءَ کاریز کاری ءِ میان ءَ یک بھرے نشتگ ءُ کھن ءَ تراک ءِ توار ھم اشکنگ بوتگ -اشکرانی کھن ءَ آس برانز گرگے سوب ءَ ریسکو ءِ کار ھم اڑاندے دیمپان بوتگ –

اشکرانی کاریزے یک بھرے لمبگ ءُ آس لگگ ءِ سوب ءُ کاریز کاری ءِ میان ءَ ھپت کاریز کار چات ءِ تہ ءَ پس اتگ اَنت کہ ھمے وھد ءَ کار ءَ بوتگ انت – گڈی ھالاں دنیگت ءَ ریسکو کار بندات نہ بوتگ اشکرانی کاریز ءَ آس انگت ءَ روک انت – زانگ بہ بیت اے دمگ ءَ ریسکو سنٹر ھم نیست –