TBP Balochi

گلشن یونائیٹڈ گومازی ءَ سوگات گومازی ءِ دیم ء سئے گول ءَ باج برتگ ءُ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی کواٹر فائینل ءِ اولی گوازی کنگ بوتگ –

مروچگیں گوازی سوگات گومازی ءُ گُلشن یونائیٹڈ گومازی ءِ میان ءَ بوتگ ، دؤئیں ٹیمانی لیبیاں گوں جوانی ءَ لیب داشتگ – گُلشن یونائیٹڈ گومازی ءَ سئے گول داتگ ءُ باج برتگ، سوگات ءِ ٹیم پروش داتگ-

ٹورنمنٹ ءِ سرکماش اختر عمر بلوچ ءَ دؤئیں ٹیمانی لیبی دلبڈی داتگ ءُ آھانی ستاشانی کرتگ –

کواٹر فائینل ءِ دومی گوازی گومازی ءَ بُلبل ھوزئی مند ءُ شھید اسمائیل تمپ ءِ میان ءَ اسکول گراؤنڈ ءِ پٹ ءَ بیت انت –

سر بیتگیں ھالانی رد ءَ روکپتی بلوچستان ءِ دمگ جکیگور ءَ ناشناسیں سلاہ بندیں مردماں ایرانی چیریں ادارہ “اطلاعات ” ءِ سر ءَ تیرگواری کرتگ –

گیشیں ھالانی رد ءَ سر بستگیں سلاہ بندیں مردماں جکیگور ءَ راہ بستگ ءُ ایرانی چیریں ادارھانی گاڑی ءِ سر ءَ ھرچاریں نیمگاں اُرش کرتگ ءُ چریشی ءَ چیرین ادارھانی مرگ ءُ زدگ بیگ ءِ ھال اِنت –

اُرش ءِ زمہ واری تنی وھدی کس ءَ نہ منّ اِتگ ءُ نانکہ سرکاری بنشونانی نیمگ ءَ دگہ ھال دیم ءَ اتکگ اَنت –

زانگ بہ بیت روکپتی بلوچستان ءَ سیمسر ءِ سر ءَ بازیں پوریاگرانی کوش ءَ پد ایرانی پوج ءُ دگہ ادارھانی سر ءَ اُرشانی ترندی گندگ ءَ آیگ ءَ اِنت –

سربیتگیں ھالانی رِد ءَ بلوچستان دمگ ھزدار، نوکنڈی پنجگور ءُ ژوب تیرگواری وئیلاں چار مردم بیران دو ٹپی بوتگ وھدیکہ شال ءَ یک مردم ءَ وتکشی کنگے جھد کتگ –

گیشیں ھالانی رِد ءَ بلوچستان ءِ دمگ ھزدار ءَ دو مردمانی آوار جنی پولیس ءَ بے سوب کُتگ تیرگواری ءِ آسر ءَ دو مردم بیران ءُ یکے ٹپی بوتگ –

اھوالکارانی رِد ءَ لیویز فورس ءُ آوار جنوکانی میان ءَ تیر گواری ءِ سوب ءَ کوش ءِ وئیل دیم ءَ اتکگ – آھانی رِد ءَ آوار جنوکاں یک مردمے کُشتگ ءُ یکے زدگ کُتگ –

وئیل ھزدار ءِ دمگ باغبانہ ءَ دیم ءَ اتکگ کہ پنچ شمبے روچ ءَ ناشناسیں مردماں دو مردم دین محمد ءُ حاجی خان محمد آوار جتگ گاڑی ءَ کتگ ءُ دیم پہ کوھی دمگاں روگ ءَ بوتگ انت – دمگی پولیس ءَ آوار جنوکانی رندگیری کتگ پاشتہ خان ءِ دمگ ءَ وتی انگر کتگ انت اوار جنوکانی یل کنگے لوٹ کتگ – بلے آوار جنوکاں آھانی یل کنگے جاہ پولیس ءِ سر ءَ تیرگواری کتگ، تیرگواری ءَ یک آوار جنوکیں مُرتگ وھدیکے آوار جنوکاں یک مردمے کُشتگ ءُ یکے زدگ کُتگ تتکگ ءُ شتگ انت –

بلوچستان ءِ دمگ نوکنڈی ءَ ھم تیرگواری ءِ وئیل ءَ یک مردمے بیران بوتگ –

ھالکارانی رِد ءَ نوکنڈی ءِ دمگ گریب آباد ءَ دگ ءِ سر ءَ پیک اپ گاڑی ءَ سواریں ناشناسیں مردمانی تیرگواری نادر نامی مردمے بیران بوتگ –

بیران بوتگیں مردم نوکنڈی ءِ جھمنند، وئیل سوب دنیگت ءَ زنگ نہ بوتگ، دمگی پھزداراں وت ءَ وئیل جاہ ءَ سر کتگ لاش دست گپتگ اے درگت ءَ گیشیں پٹ پول برجاہ انت –

دگہ تیرگواری وئیلے بلوچستان ءِ دمگ پنجگور ءَ دیم ءَ اتکگ کہ ناشناسیں مردمانی تیر گواری ءَ یک مردمے ٹپی بوتگ –

پولیس ءِ رِد ءَ ناشناسیں سلاہ بندیں مردماں پنجگور ءِ دمگ سوردو ءَ نور اللہ نامیں مردمےئے سر ءَ تیر گواری کتگ، تیر گواری آسر ءَ ٹپی بوتگ پولیس ءَ آ دست گپتگ ءُ ھسپتال ءَ سرکتگ –

ھمے وڑ بلوچستان ءِ دمگ ژوب ءَ اناگتی تیر لگگے سوب ءَ زالبولے بیران بوتگ –

ھالکارانی رِد ءَ ژوب ءِ دمگ صافی محلہ ءَ سَربرزی ءَ تیرگواری ءِ سوب ءَ مسیت ءِ امام عبدالقیوم ءِ لوگی اناگتی تیر لگگے سوب ءَ بیران بوتگ –
ھمے گوشگ بوگ ءَ انت کہ آ سھب ءَ وتی دزگھارانی گوم ءَ لوگ ءِ پیژگاہ ءَ نشتگ بوتگ کہ اناگتی تیر ءَ سر ءَ لگ اتگ ءُ بیران بیتگ –

دگہ وئیلے بلوچستان ءِ بنجاھی شھر شال ءَ یک مردمے ءَ وتی سر ءَ وت تیزاب پریتکگ وتکشی کنگے جھد کُتگ – پولیس ءِ رِد ءَ شال ءِ دمگ کوئلہ پھاٹک ءَ ھمایوں نامیں مردمے ءَ وتی سر ءَ وت تیزاب پِر ریتکگ وتکشی کنگے جُھد کُتگ – چریشی ءَ چہ آ ٹپی بوتگ وتکشی کنوکیں مردم ھما دمان ءَ ھسپتال ءَ سر کنگ بوتگ-

زاھد بلوچ ءِ زورانسری بیگواھی ءَ ھپت سال سرجم بیگ ءَ آئی ءِ کھول ءِ نیمگ ءَ شال ءَ زھرشانی کنگ بیتگ –

بلوچ نودربرگل آزاد ءِ گوستگیں سرکماش زاھد بلوچ ءِ زورانسری بیگواھی ءَ ھپت سال سرجم بیگ ءَ کھول ءِ نیمگ ءَ شال ءِ پریس کلب ءِ دیم ءَ زھرشانی روانک کشگ بیتگ چریشی ءَ جتائیں پھناتاں ھواریں مردماں بھر زرتگ –

روانک ءَ بھرزیروکیں مردماں زورانسری بیگواھی ءُاشی ءِ بارہ ءَ ادارھانی نادلگوشی ءِ ھلاپ ءَ بینرز چِست کرتگ –

زھرشانی روانک ءَ تران کنان ءَ گوشت اِت ھپت سال ءِ گوزگ ءَ پد ھم یک سیاسی باسکے ءِ بندیگ کنگ انسانی ھکانی لگتمالی اِنت – زاھد بلوچ ءِ سیادی یک پُر امن ءَ جمھوری جد ءُ جھد ءِ سر ءَ اوست داروکیں نودربر گلے ءَ بیتگ ءُ اے بنیاد ءَ آئی ءَ زنداناں بند کنگ یک گیر کانودی ءُ گیر انسانی کارے –

زھرشانی کنوکاں گوشت: بلوچستان ءَ برجاھیں زُلم ءُ زوراکیانی داستان ھمک روچی ءِ رنگ ءَ روان اَنت – ورنایاں ءُ سیاسی باسکانی زورانسری آوار جنگ یک نہ کُٹوکیں درچے جوڑ بیتگ – بلوچستان ءَ ریاستی ادارھانی دستاں بیگواھیانی درچ روچ پہ روچ گیش بیان اَنت، زورانسری بیگواہ کنگ بیتگیں مردمانی کھول سالانی سال وتی دوستگیں مردمانی شوھاز ءَ جد ءُ جھد کنان اَنت ءُ پیداک اَنت بلے سرکاری سدکیاں پد ھم زورانسری بیگواھیانی جیڑہ بھمنانگیں رنگے ءَ روان اِنت –

زھرشانی کنوکاں گوشت کہ زورانسری بیگواہ کنگ بیتگیں زاھد بلوچ چم دیتگیں مردمانی دیم ءَ بیگواہ کنگ بیتگ – زاھد بلوچ ءِ بیگواھی ءِ ھلاپ ءَ آئی ءِ ھمراھاں شدکشیں ھرتال کرتگ ءُ میان اُستمانی ادارھانی سدکی ءَ پد ھم زاھد بلوچ ءِ دیمدراھی ءَ ھچ وڑیں گامگیج زورگ نہ بیتگ –

آیاں گوشت کہ زاھد بلوچ ءِ ھپت سال پِر گوزگ ءِ وھد ءَ زورنسری بیگواھی ءُ آئی ءِ بارہ ءَ میان اُستمانی ادارہ بے توار اَنت ءُ ھچ وڑیں گامگیج ءِ نہ زورگ یک اجبناکیں بژنیگی یے – ما دراھیں انسان دوست ءُ انسانی ھکانی ادارھاں گوں دسبستگی کن ایں کہ زاھد بلوچ ءِ زورانسری بیگواھی ءِ ھلاپ ءَ توار چِست بہ کن اَنت –

دومی نیمگ ءَ وائس فار بلوچ مسنگ پرسنز ءِ نیمگ ءَ بیگواھیں بلوچانی زھرشانی گدان برجاہ، گدان ماما قدیر بلوچ ءِ سروکی ءَ برجاہ اِنت – مروچی زھرشانی ءَ چار ھزار ءُ دو سد ءُ پنجاہ ءُ پنچ روچ سرجم بیتگ – زاھد بلوچ، زاکر مجید بلوچ ءِ کھول، نیشنل پاٹی ءِ میر غفار قمبرانج، بی ایس او ءِ شکور بلوچ ءُ دگہ مردماں اتکگ ءُ کھولانی گون ءَ پدردی درشان کرتگ –

مستونگ ءَ پوجی میجر ءِ لوگ ءِ پھازگی سنگر ءِ سر ءَ بوتگیں اُرش ءِ زمّہ واری ءَ منّ اِیں – میجر گْوھرام بلوچ

سربیتگیں ھالانی رِد ءَ گوستگیں روچ ءَ ناشناسیں مردماں مستونگ آر سی ڈی دگ ءِ نزیک ءَ شھید شفیع چوک ءِ سر ءَ برجاھیں پاکستانی پوج ءِ چوکی ءِ سر ءَ دز بمب اُرشے کُتگ –
اُرش ءَ پد ناشناسیں مردم درایگ ءُ روگ ءَ سوبمند بوتگ انت –

دومی نیمگ ءَ بلوچستان ءِ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ ءُ گوشتگ کہ مئے سرمچاراں چارشمبے ءِ بیگاہ ءِ ادار شش ءَ مستونگ آر سی ڈی دگ ءِ نزیک ءَ شھید شفیع چوک ءَ پاکستانی پوج ءِ میجر ءِ لوگ ءِ پھازگی مزنیں سنگر ءِ سر ءَ دز بمب اُرشے کتگ-

آئی ءَ گوشتگ کہ دز بمب سنگر ءِ تہ ءَ کپتگ، اُرش ءَ پد پوجی کارمنداں وتی تاوان چیر دیگ ءِ ھاتر ءَ اُرش جاہ ءَ رسانکدراں ھوار ھچ وڑیں مردم روگ ءَ نہ اِشتگ ءُ سرجمیں دمگ انگر کتگ-

میجر گْوھرام بلوچ ءَ دیمتر ءَ گوشتگ کہ ھمے سنگر ءَ نِشتگیں پوجی کارمند ٹرانسپورٹراں ءَ ھوار لس مھلوک ءِ تنگ کنگ ءُ آھاں چہ زوریں ملام گرگ ءَ دزمانجن بوتگ اَنت-

گڈسر ءَ میجر گْوھرام بلوچ ءَ وتی درشان ءِ تہ ءَ گوشتگ کہ ایردستیں بلوچستان ءِ آجوئی تاں زورگیریں پوج ءِ سرا مئے اُرش برجاہ مان انت –

سمان ءِ دمگ ءَ پوجی پانگس ءِ سر ءَ وتکاریں سلاھاں گوں اُرش کُتگ جانی ءُ مالی تاوان داتگ – لونگ بلوچ

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں ھزدار ءِ دمگ سمان ءَ برجاھیں پاکستانی پوج ءِ پانگس ءِ سر ءَ اُرش کُتگ – اُرش ءَ پاکستانی پوج ءَ تاوان رس اِتگ –

دومی نیمگ ءَ بلوچ سلاہ بندیں گل لشکر ء بلوچستان ءِ جارکش لونگ بلوچ ءَ رسانکدراں وتی شنگ کرتگیں درشان ءَ اے اُرش ءِ زمہ واری منّ اِتگ ءُ گوشتگ کہ مئے سرمچاراں گوستگیں شپ ءَ ھزدار ءِ دمگ سمان ءَ ایف سی پانگس ءِ سر ءَ وتکاریں سلاھاں گوں اُرش کُتگ –

جارکش ءَ گوشتگ کہ اُرش ءِ آسر ءَ ایف سی ءَ جانی ءُ مالی تاوان رس اِتگ –

نبشتانک: چیئرمین زاھد بلوچ

نبشتہ کار : سرباز وپاؔ

دی بلوچستان پوسٹ

من گوں نبشتہ کنگ ءِ بندات ءَ ھزار رند ءَ واجہ ھُدا ءِ شُکر ءُ منت ءَ گِراں کہ من انچین اَھدے ءَ زندگاں اے اَھد منی بلوچ راجدپتر ءِ گرانکدریں اَھدے زانگ بیت چی ءَ کہ اے اَھد ھر بلوچ ءَ چکاسگ ءَ اِنت آئی ءِ کردار ءَ جتا نبیسگ ءَ اِنت مئے آؤکیں پدریچ مئے کسہ ءَ کتابانی تہ ءَ گند ایت ءُ وان ایت ، بلے من ھمے اَھد ءَ زندگی کنگ ءَ آں ھو اے گپ راستے کہ اے پہ بلوچ راج ءَ سکیں گران ءُ دردناکیں اَھدے زانگ بیت ایشی ءِ تہ ءَ شھیدی ، بیگواھی در پہ دری گون اِنت، بلے ایشی ءِ مستریں شری ھمیش اِنت ھر شے ءَ جتا جتا گیشین اِیت ءُ نامے دنت اے اَھد مارا ھمک رنگیں ندارگ پیشدارگ ءَ اِنت گَم ءُ وشی ، درد ءُ مھر ، در پہ دری ءُ بے گسی ، دوستی ءُ دُژمنی ، ھمک ندارگ ءَ یک جتائیں مارشتے دنت ھمے اَھد ءَ شیر ءُ آپ گیشینتگ ءُ مارا پیشداشتگ۔ اے اَھد ءَ لکاں راجی راجی بامرد جوڑ کرتگ ، راجی دلّار ھم دیم ءَ آؤتگ الّم اے پہ بلوچ ءَ گرانیں اَھدے ، بلے ھرکسی کِردار ءَ گوں جتائیں ناماں سمبھین اِیت ۔

اے ھما اَھد اِنت کہ بلوچ ءِ ھمک تَب ءِ مردم پہ آجوئی جنگ ءِ ھاتر ءَ پاد آتکگ ءُ جنگ کنگ ءَ اِنت ءُ بازینے شھید بوتگ چہ بلوچ ءِ آجوئی جُھد ءَ ھواریں جُھدکار باسک ءُ سِپائی ءَ بگر داں داں کماندار ءُ رھشون ءَ ھوار لَس مھلوک شھید کنگ بوتگ ، ھمک لیکہ ءِ مردم دُژمن ءِ دست ءَ بیگواہ کنگ بوتگ اے ھما اَھد اِنت کہ ایشی ءِ تہ ءَ مئے کسانسالیں بچ ءَ بگر داں پیرمرداں بیا ، مئے کسانسالیں جنک ءَ بگر داں مئے شیرزالیں پیریں ماس ھمے جُھد ءُ کربانی بھر بوتگ اَنت من ھمے کلیں چیزاں گون وتی چماں گندگ ءَ آں۔

منی مستریں وش بھتی ھمیش اِنت کہ من بلوچ راج ءِ لھتیں راجی بامردیں رھشون وتی چمان دیستگ۔ اے ھم واجہ ھُدا ءِ شکر اِنت من ءَ آھانی گندگ نیسب بوتگ۔ چہ ھمے رھشوناں یکّے چیئرمین زاہد اِنت انگت دُژمن ءِ دست ءَ بیگواہ اِنت اے وھد ءَ کہ من کلم چِست کرتگ ءُ پہ چیئرمین زاھد بلوچ ءَ چار پُرشتگیں لبز نبشتہ کنگ ءَ آں ، بلکیں آ انچیں کوھیں کردارے ءِ ھُدابُند اِنت ۔ بلوچ ءِ زھگ زھگ شریں وڑے ءَ زانت ءُ سرپد اِنت ، چیئرمین زاھد بلوچ کے اِنت ؟ منی نبشتہ کنگ مول ءُ مراد ھمیش اِنت ، من چون دیستگ ھما لھتین یات اَنت من آھاں نبشتہ کنگ لوٹ آں چیئرمین زاھد بلوچ وتی تہ ءَ یک شھدربر جاھے ، اِلم ءُ زانت ءِ یک دریایے۔ آ گوں گلزمین ءُ راج ءِ مھبت ءَ ھوار آ یک کتاب اِشکیں مردمے۔

وھدے کہ من دو ھزار سینزدہ ءَ داں دوھزار چاردہ ءِ اولسر ءَ گوں آئی ءَ ھوار اِت آں آئی ءِ ھمک گپ چہ کتاب ءَ بندات اَت ءُ داں کتاب ءَ ھلاس بوت آ وھدے گوں سنگتاں راجکاری ءُ راجدپترانی سر ءَ گپ ءُ تران کنگ ءَ بوتیں ، گڑا ھمے گپ اَلّم گوشتگ اَت ئِے پلان کتاب ءَ بہ وان ترا گیشتر سرپد کنت آئی ءِ مدام گپ ھمیش اَت کتاب بہ وان اِت ، کتاب شمئے رہبری ءَ کنت کتاب ترا زندگ بوگ ءِ راھاں پیشداریت گوں کتاب ءَ مھر بکن اِت ، کتاب ترا تئی جند ءَ سرپد کنت ، کتاب ترا تئی جُھد ءَ سرپد کنت ، کتاب تئی تہ ءَ زانت ءُ زانگ ودی کنت اَبید زانت ءَ مردم ناسرجم اِنت چوناھا آئی کجام وھد ءَ سنگتے بہ دیستیں ھمے جُستے اَلّم کرتگ اَت سنگت تو چے ونتگ یا تو چے وانگ ءَ ئے ۔

من ءَ یات اِنت کہ ما گوں چیئرمین زاھد بلوچ ءَ جاگھے نشتگ اَت ایں آ پاد آتک ءُ نزیکیں جاھے ءَ شُت ءُ پد ءَ زوت آتک۔ ما نشتگیں کلیں سنگت ھاموش اَت ایں ، دمانے پد گوش اِیت سنگتاں شما کُل ھاموش اِت دگہ گپ ءُ دیوانے ءَ نہ اِت ، بھتاوراں شما انچو کتاب ءِ تہ ءَ وتی وھد ءَ پرچا مُپت ءَ زوال کن اِت ، چہ ھشکیں نندگ ءُ بے تواری ءَ شما کتاب بہ وان اِت چہ کتاب ءِ چارگ ءَ الّم چیزے نہ چیزے دربر اِت ۔

یکروچے ما نشتگ اَت ایں مارا چیئرمین زاھد یک یک ءَ جُست کنگ ءَ اَت تو چے ونتگ ؟ کجام کتاب ءَ وانگ ءَ ئے؟ ، یا پرچا نہ وان ئے ؟ مئے دیوان ءَ یک سنگتے ءَ گوشت واجہ اے گلامی ءَ مارا وانگجاہ ءَ وانگ ءَ نہ اشتگ من چیزے بہ وان آں چیئرمین زاھد گوش اِیت سنگت تئی کیسگ ءِ کلم ءَ گنداں من اے گپ ءَ سرپد باں تو چیزے زان ئے سنگت ءَ گوشت جی ھو واجہ منی وانگ ھمینچُک اِنت من نامے نبشتہ بکن آں ءُ نام ءِ بہ وان آں من وانگ ءِ وھد ءَ سَے تبک ونتگ پہ منی وڑیں مردمے ءَ اے وڑیں کتاب ءِ وانگ ءُ دربرگ سک گران اِنت چیئرمین زاھد کند ات ءُ گوشت سنگت تئی بُنکی وانگ ھمیش اِنت کہ تو دربرتگ اے کتابانی تہ ءَ ھمے نام اَنت نبشتہ اَنت اگاں تو چنچو وان ئے گیشتر دربُرت کن ئے ، اے وڑ ءَ کہ تو نا اُمیت بہ بہ ئے گڑا تئی ھمے دربرتگیں لبز گار بنت تھنا وانگجاہ ءَ چہ مردم اِلم دربرت نہ کنت ، اِلم ترا چہ کتاباں دست کپ اِیت ۔ گوں کتاباں مھر ءُ نزیکی بکن ۔

اگاں من ءَ کسے جُست بہ کنت چیئرمین زاھد ءَ تو چون زان ئے ؟ منی پسہ ھمیش بیت چیئرمین زاھد یک اِلمے ءِ نام اِنت ، ھما اِلم کہ انسان دوستی ءِ درس ءَ دنت ھما الم مردم ءَ راجدوستی درس ءَ دنت ھما اِلم کہ پہ بلوچ راج ءِ وشین باندات ءِ دیمروئی ءَ گوں بندوک اِنت ، راج ءِ رھشونی ءَ کنت۔ ھما اَلم کہ مرچی بلوچ راج ءِ تہ ءَ جتا جتائیں نام ءُ شریں کِردار ودی کنگ ءَ اِنت ۔

ھو!اے گپ راستے کہ چیئرمین زاھد ءَ زورگیریں دُژمن ءَ چہ بلوچ راج ءِ دیم ءَ بیگواہ کرتگ۔ مرچی آئی ءِ بیگواھی ءَ ھپت سال سرجم بوتگ ، آئی اِلم ءُ زانت مرچی مئے بلوچ ءِ ھمک پرزند ءِ تہ ءَ جاگہ کرتگ وتی نیک ءُ بدّ ءَ زانت پہ بلوچ ءِ وشیں باندات ءَ اِلم ءِ دربرگ ، انگت برجاہ اِنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ چہ ھزدار ءَ زورانسری بیگواھیں کبیر بلوچ، مشتاق بلوچ ءَ عطاء اللہ بلوچ ءِ کھولاں آیانی بیگواھی ءَ دوازدہ سال سرجم بیگ ءَ شال ءِ پریس کلب ءَ پریس کانفرنس کرتگ –

ھمے وھد ءَ آیانی ھمراھی ءَ وائس فار بلوچ مسنگ پرسنز ءِ وائس چیئرمین ماما قدیر بلوچ ھم جاڑیگ بیتگ –

کھولاں گوشت اے گپ ءَ بلوچستان ءِ ھم مردم سرپد اِنت کہ دو دھکاں بلوچستان ءَ زورانسری بیگواھی یک نہ اوشتوکیں درچے،سیاسی ءُ چاگردی باسک بس ھمے واستا بیگواہ کنگ بیگ ءَ اَنت کہ آ زانت دار اَنت، کمتری ءُ زوراکیانی ھلاپ ءَ گپ جن اَنت، ھمے پژدر ءَ ھزاراں گمنام تھاریں زنداناں وتی نا ایوک ءَ گناھاں ھساب کنگ ءَ اَنت بلکیں بازیں ورنایانی زانگول کرتگیں جون جنگل ءُ گیاباناں دزکپتگ اَنت – زُلم ءِ راجدپتر دراج کش ءُ باز پدردناک اِنت، زوگری ءَ بہ گر داں انیگ ءَ بلوچ ھونریچانی دیمپان اِنت –

وھید بلوچ ءِ گوھار ءَ گوشت کہ زاتی رنگ ءَ من ءُ منی کھول دوازدہ سالاں درد ءُ درناکیں زندگی ءَ گوازینگ ءَ ایں، ما ھم زورانسری بیگواھی ءُ تیرانی آماچی بیتگ اِنت، منی برات وھید بلوچ گوں ھمراہ ءِ سلمان ءَ بیست ءُ نُھ فروری دوھزار ءُ دوازدہ ءَ ھزدار ءَ شھید کنگ بیتگ وھدیکہ منی دومی برات کبیر بلوچ ءُ وتی دو ھمراہ مشتاق بلوچ ءُ عطاء اللہ بلوچ ءِ ھمراھی ءَ دوزدہ سالاں بیگواہ اَنت، بیست ءُ ھپت مارچ ءَ دوھزار ءُ نُھ ءَ ھزدار ءِ زورانسری بیگواہ بیتگ اَنت ءُ اے دوازدھیں سالاں ما انساپی ادارھانی دروازگاں ٹکان ءُ پیداک اِنت بلے مارا ھچ جاہ ءَ ھچ انساپ ءِ رسگ دورے گپے کسے ءَ تسلا ھم نداتگ کمشن ءَ کیس درکتگ، جسٹس جاوید اقبال ءِ کمیشن یک دروگیں کمیشنے کہ میان اُستمانی انسانی ھکانی گمراہ کنگ ءَ جوڑ کنگ بیتگ –

کھولاں گوشت: کبیر بلوچ، مشتاق بلوچ ءُ عطا ء اللہ بلوچ ءَ دوازدہ سالانی پرگوزگ ءَ میان اُستمان ءُ انسانی ھکانی گلاں سرکار ءُ آمیدگساں دلگوش ترینگ ءِ واستا ءُ آیانی سلامتی ءِ یلہ کنگ ءَ دزبندی کن آں ما بیست ءُ شش مارچ دوھزار ءُ بیست ءُ یک ءَ وائس فار بلوچ مسنگ پرسنز ءِ بنجل ءَ نندانکی شدھرتال ءَ نندیں –

آیاں گوشت کہ بیست ءُ شش مارچ ءِ بیگاہ ءِ ساھت شش ءَ داں ساھت دوازدہ ءَ #ReleaseBalochMissingPresons ھیش ٹیگ آن لائن کمپین کارمرد کنگ بیت اِنت ءُ بیست ءُ ھپت مارچ ءَ شال ءِ پریس کلب ءِ دیم ءَ زھرشانی کنگ بیت اِنت ما رسانکدر ءِ زور ءَ سیاسی ءُ چاگردی پاٹی، نودربر ءُ زالبولانی گل ٹریڈ یونینز، وکیلاں ھوار سرجمیں تکاں بندوکیں مردماں گوں دزبندی کن ایں آ بیست ءُ شش مارچ ءَ یک روچی ءِ شدھرتال، بیگاہ ءَ آن لائن کمپین ءُ بیست ءُ ھپت مارچ ءَ زھرشانی ءَ بھر بہ زیر اَنت ءُ مئے دوستگیں مردمانی یلہ کنگ ءَ وتی شرپمندی ءُ انسانی ھک ءَ پیلو بہ کن اَنت –

زاھد بلوچ ءِ بیگواھی ءَ ھپت سال سرجم بیگ ءَ شال ءَ زھرشانی کنگ بیت اِنت ءُ ٹوئٹر ءَ کمپئن کنگ بیت، بیگواھیں مردمانی کھول اسلام آباد ءَ سر وزیر پاکستان عمران خان ءَ دُچار کپ اَنت –

بلوچ نودربر گل ءِ گوستگیں سرکماش زاھد کرد ءِ بیگواھی ءَ ھپت سال سرجم بیگ ءَ آئی ءِ کھول ءِ نیمگ ءَ شال ءِ پریس کلب ءِ دیم ءَ زھرشانی کنگ ءِ جار جتگ ءُ ٹوئٹر ءَ #SaveZahidBaloch ءِ کمپئن ءِ جار جتگ –

کھول ءِ رد ءَ ھژدہ مارچ ءِ بیگاہ ءَ شال ءِ پریس کلب ءِ دیم ءَ زاھد بلوچ ءِ ھپت سال بیگواھی ءَ بیگاہ ءِ ساھت سَے ءَ یک زھرشانی کنگ بیت اِنت ءُ زھرشانی ءَ سرجمیں تکاں بندوکیں مردماں بھر زورگ ءِ دزبندی کنگ بیتگ –

ھمے وڑ ءَ زاھد بلوچ ءِ لوگ بانک زرجان بلوچ ءَ وتی چاگردی رسانک جاہ ٹوئٹر ءَ گوشتگ کہ یک مردمے ءِ بیگواہ بیگ ءَ ھپت سال گوزگ کسانوکیں گپے نہ اِنت اے درد ءُ گماں من زاناں ءُ بلوچستان ءَ بیگواھیں مردمانی کھول زان اَنت –

زرجان بلوچ ءَ گوشتگ کہ زاھد بلوچ ءِ مات ءَ ودار وداراں داں آئی ءَ وتی گرانیں گم آسودگ کرتگ ءُ اے جھان ءَ شتگ بلے مئے انگت ءَ زاھد بلوچ ءِ راہ ءَ چاریگ اَنت –

زانگ بہ بیت زاھد بلوچ بی ایس او آزاد ءِ گوستگیں سرکماش اِنت ءُ ھژدہ مارچ دوھزار ءُ چاردہ ءَ شال ءَ آوار جنگ بیتگ ءُ آئی ءِ آوار جنی ءِ چم دیدیں مردمانی تہ ءَ یکے بانک کریمہ بلوچ بیتگ ءُ کریمہ بلوچ بی ایس او آزاد ءِ سرکماش بیتگ ءُ گوستگیں وھداں کینیڈا ءَ بیگواہ بیگ ءَ پد آئی ءِ لاش دزکپتگ –

بی ایس او آزاد ءِ بازیں رھوشون ءُ باسکے گار ءُ بیگواہ اَنت ءُ بازینے کُشگ ءُ چگل دیگ بیتگ اَنت-

بی ایس او آزاد ءِ گاریں رھشونانی تہ ءَ انفارمیشن شبیر بلوچ ھوار اِنت کہ آئی ءِ کھول ءَ گوستگیں وھداں اسلام آباد ءَ زھرشانی نندانک ءَ بھر زرتگ –

ھمے رنگ ءَ وائس فار بلوچ مسنگ پرسنز ءِ سروک نسر اللہ بلوچ ءَ وتی شنگ کرتگیں بیان ءِ تہ ءَ گوشتگ کہ پشمبے ءِ روچ ءَ پاکستان ءِ بنجاھی شھر اسلام آباد ءَ سروزیر پاکستان عمران خان ءَ دُچاری بیت اِنت –

بیگواھیں بلوچانی یل کنگ ءِ واستا آیانی کھولاں ھمے سال ءِ فروری ءَ اسلام آباد ءَ زھرشانی کرتگ کہ دَہ روچاں ڈی چوک ءَ زھرشانی نندانک ءَ بیگواھیں مردمانی کھولاں سر وزیر عمران خان ءَ مارچ ءِ ماہ ءَ سدکی دیگ ءَ زھرشانی نندانک ھلاس کرتگ اَت –

اے گند ءَ نند ءِ دوچاری بیگواھیں ڈاکٹر دین مھمد ءِ جنک سمی دین ءَ راستی کرتگ –

لس رداں سر وزیر پاکستان ءَ بیگواھیں مردمانی کھولانی گون ءَ دُچار کپگ ءَ پوجی سروکاں ھم بیگواھیں مردمانی بارہ ءَ سرپدی زرتگ –

مروچیگیں گند ءُ نند ءَ بلوچستان ءَ گار ءُ بیگواھیں مردماں ھوار دیم پہ دیمی جنگ ءَ جنگ بیتگیں مردمانی کوشانی سر ءَ گپ ءُ تران بیت اِنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی پریس کلب ءِ دیم ءَ برجاہ، زھرشانی ءَ مروچی چار ھزار دوسد ءُ پنجاہ ءُ چار روچ سرجم بوتگ –

چہ ھزدار ءَ بیگواہ بوتگیں کبیر بلوچ، مشتاق بلوچ ءُ عطا اللہ بلوچ ءِ کھول ءُ ھکپان بلوچستان گل ءِ رھشوناں بنجل ءَ اتکگ ءُ وتی زھرشانی نبشتہ کنائینتگ ءُ پد ءَ رند ءَ شال پریس کلب ءَ پریس کانفرنس کُتگ –

گوستگین سینٹر افراسیاب خٹگ، گوستگیں ایم این اے بشرہ گھور، گوستگیں ایم پی اے جمیلا گیلانی، پشتون تحفظ مومنٹ زبیر شاہ آغا، اورنگزیب مندوخیل، کلیم مندوخیل ءَ وائس فار بلوچ مسنگ پرسنز ءِ زھرشانی بنجل ءَ اتکگ ءُ ماما قدیر بلوچ ءُ بیگواھیں مردمانی کھولاں گوں دُچار کپتگ ءُ دلپدردی درشان اتگ اِت –

ھمے وھد ءَ افراسیاب خٹک، بشرہ گھور، جمیلا گیلانی ءَ گوشتگ کہ ورنایانی زورانسری آوار جنی کانودانی بگیری دارگ ءُ زوراکی ءِ گڈی سیمسر انت، اے امل کانون آئی ءِ رھبندانی بگیری دارگ انت، رھبندانی لگتمال کنوکیں مردم زاھر کنگ بہ بنت آھانی بگیری گامگیج زورگ بہ بیت، زورانسری ورنایانی آوار جنگ ءُ بیگواہ کنگ ریاست ءِ بے سوبی اِنت –

آھانی گوشگ ات کہ بیگواھیں مردمانی یل کنائینگ ءُ اے جیڑہ ھلاس کنگ ءِ ھاتر ءَ پارلیمانی ءُ راجداریں گلاں وتی کرد پیلو کنگی انت – ھزارانی کچ ءَ پشتونانی کوش ءُ سدانی کچ ءَ ورناہ آوارجنگ ءُ بیگواہ کنگ بوتگ اَنت – ما بلوچ بیگواھیں مردمانی گون ءَ اوشتوک انت –

ھمے وھد ءَ ماما قدیر بلوچ ءَ اتکگیں مردمانی منت گپتگ گوشتگ کہ اد ءَ درسیں راج یکیں پالیسی زوراکیانی اماچ انت – بلوچ، پشتوناں ھوار سندھی ءُ دگہ راجانی مردم زورانسری آوار جنی آھانی جونانی دست کپگ نگیگیں جاور ودی کتگ –

آئی ءَ گوشتگ کہ مروچی ھم بنجل ءَ بلوچ گوھار ءِ وتی برات کبیر بلوچ یل کنائینگے ھاتر ءَ زھرشانی کنگ انت کہ آئی ءِ برات ءُ دگہ دو ھمراہ مشتاق بلوچ ءُ عطاء اللہ بلوچ ھمراھی دوازدہ سالاں چہ بیگواہ انت –

ماما قدیر بلوچ ءَ گوشتگ کہ ایردستیں راجاں ھوار بوگ ءُ اے زوراکیانی بگیری ءَ توار چست کنگی انت، اے گامگیج پیش زورگی بوتگ بلے مروچی جاورھال وت راہ ءَ پیش دارگ انت کہ ھوار بیگ ءُ توار چست کنگ ءَ سوبمندی ممکن انت –