TBP Balochi

روکپتی بلوچستان ءِ دمگ سراوان ءَ مولانا عبدالصمد ساداتی ءَ گوشتگ کہ سرکار ءِ نیمگ ءَ لس مردم سِلاہ بند کنگ بیتگ اَنت چرے مردماں سِلاہ پچگرگ بہ بنت ءُ داں شھری شریں ساہ ئِے کَش اِت بہ کن اَنت –

آئی ءَ گوشتگ کہ ھما مردماں سِلاہ دیگ بیتگ اَنت چرے سِلاھاں مردم دُزی ءُ ڈنگی کنگ ءَ اَنت لس گریب ءُ نیزگاریں مردماں کُش اَنت ءُ آیانی زر ءُ مالانی ھواری ءَ آیانی زندمانی ءَ ھم پچگر اَنت –

آئی ءَ گوشتگ کہ سراوان ءِ کَش ءُ گوراں سِلاہ بندیں مردمانی سِلاہ بندی ءَ ناشریاں رُدوم زرتگ ءُ شھر ءَ ایمنی ءِ جاور نہ بیگ ءِ بروبری اَنت –

آئی ءَ گوشتگ کہ یک مردمے ترگ ءَ در کیت گڑا آئی ءِ دل لاپ ءَ نہ اِنت کہ باریں سلامتی ءَ واتر باں یا اناں اے ناشریاں بازیں کچے ءَ مردم وتی ارجان جتگ اَنت –

آئی ءَ گوشت: سراوان ءِ کش ءُ گور پیسر ءَ ایمنی ءِ جاوراں بیتگ اَنت ھما کہ ایرانی چیریں ادارھاں لس مردم وتی ھاتر ءَ سلاہ بند کرتگ اَنت ھما اِنت اے دمگانی تہ ءَ ناوشی ءِ جاور دمگانی سر ءَ ساھیل اَنت –

زانگ بہ بیت ھمے سال ءَ داں انیگ ءَ سِی ءُ یک مردم ناشناسیں مردمانی تیرگواری ءَ زدگ ءُ بیران بیتگ اَنت کہ لس مردمانی بھتام اِنت اے چیریں ادارھانی نیمگ ءَ سلاہ بندیں مردماں کُشتگ اَنت –

سر بیتگیں ھالانی رد ءَ شال ءَ ناشناسیں مردمانی تیرگواری ءَ ھال تاک آزادی ءِ اھوالکار عبدالواحد رئیسانی بیران بیتگ –

پولیس بنشون ءِ رد ءَ شمبے ءِ بیگاہ ءَ شال ءِ دمگ کمبرانی دگ ءَ بینک کالونی ءَ ناشناسیں سلاہ بندیں مردمانی تیرگواری ءَ “روزنامہ “آزادی ءِ رپورٹر عبدالواحد رئیسانی زدگ بیتگ، زدگیں جاوراں نادراہ جاہ ءَ برگ ءِ وھد ءَ آئی ءَ ساہ داتگ ءُ بیران بیتگ –

پولیس ءِ رد ءَ تیرگواری کنوک وئیل ءَ پد تتکگ اَنت ءُ پولیس ءَ جون چِست کرتگ ءُ نادراہ جاہ ءَ سر کرتگ ءُ پولیس ءَ وئیل ءِ پَٹ ءُ پول بندات کرتگ –

ھمے وڑ ءَ بلوچستان ءِ دمگ کیچ ءِ بنجاھی شھر تربت ءَ سلاہ بندیں مردمانی تیرگواری ءَ دو مردم بیران بیتگ اَنت –

وئیل تربت آبسر کولوائی بازار ءَ پیش اتکگ کہ اود ءَ سلاہ بندیں مردماں تیرگواری کرتگ ءُ اود ءَ داد جان ء ابوبکر جھنند پروم ھما جاہ ءَ بیران بیتگ ءُ دومی وارث زدگ بیتگ ءُ نادراہ ءَ برگ ءِ وھد ءَ آئی ءَ ساہ داتگ اَنت –

دمگی مردمانی رد ءَ اے ھردوکیں مردمانی سیادی سرکاری پلامرزی ءَ برجائیں ٹولی ءَ اِنت –

گوستگیں روچاں سرکاری پلامرزی ءَ سیادی داروکیں ٹولیاں بندوکیں پنچ مردم کُشگ بیتگ اَنت کہ اشانی تہ ءَ سَے کسانی کوش ءِ زمہ واری بلوچ سلاہ بندیں گل بلوچ لبریشن آرمی ءُ بلوچستان لبریشن فرنٹ ءَ منّ اِتگ اَنت –

بارڈر ٹریڈ یونین ءِ رھشوناں شمبے ءِ روچ ءَ تربت پریس کلب ءَ پریس کانفرنس کنان ءَ گوشتگ کہ دمگدارانی نیمگ ءَ سیمسر ءِ رھگوزیانی پچ کنگ ءِ سدکیانی ناسرجمی ءَ کرار ھلاس بیتگ ءُ چریشی ءَ زھرشانیانی جار پرینتگ –

اولی زھرشانی بیست ءُ ھپت اپریل ءَ تربت ءَ ھوار بلیدہ، زامران، ھوشاپ، ھیرونک ءَ ھرتال کنگ بیت اِنت دومی بیست ءُ نُھ اپریل ءَ ڈی بلوچ سی پیک دگ بند کنگ بیت اِنت ءُ سیمی درچ ءَ سرجمی ءَ دگ بند ءُ تھتک بندیں ھرتال کنگ بیت اِنت –

آیاں گوشت کہ بارڈر ٹریڈ یونین گوستگیں بیست ءُ شش روچ ءُ زمران ءِ ماہ ءَ زھرشانی کنگ ءَ اِنت بلے داں انیگ ءَ مارا دورگیں گپ ءُ تسلیاں ابید دگہ ھچ دیگ بیگ ءَ نہ اِنت،

پریس کانفرنس بارڈر یونین ءِ سروج مھمد اسلم بلوچ، جنرل سیکرٹری گلزار دوست ءَ تران کرتگ ءُ اے وھد ءَ میر شاہ داد دشتی، میر عبدالوحید آسکانی، غلام جان بلوچ، نور اھمد، میر شعیب زامران، کفایت اللہ بلوچ، مراد جان بلوچ، پزیر بشیر بلوچ، ندیم بلوچ، قمبر واحد بلوچ، عبدالصمد یار بلوچ، چیف عبدالطیف، امان اللہ بلوچ ءُ دگہ مردم جاڑیگ بیتگ اَنت –

آیاں گوشت کہ دوازدہ اپریل ءَ وھدیکہ یونین نیمگ ءَ سی پیک M -8 دگ بند کنگ بیتگ گڑا دمگداراں سدکی داتگ کہ دَہ روچانی تہ ءَ جیڑہ ءِ گیش ءُ گیوار کنگ بیت اِنت ءُ چریشی ءِ سر ءَ دگ پچ کرتگ، بلے چریشی ءَ دَہ روچانی گوزگ ءَ پد کول ءُ کرار ھلاس بیتگ اَنت ءُ دمگدارانی گند ءُ نند ءَ مارا ابید ھشکیں گپاں ابید دگی ھچ دز نہ کپتگ اَنت –

آیاں گوشت کہ بارڈر ٹریڈ ایوک ءَ مکران ءَ ناں بلکیں سرجمیں بلوچستان ءَ ھوار اِنت ءُ بلوچستان ءِ گون ءَ وفاق ءَ بنداتی روچ ءَ یک ماتوئِے ھساب ءَ ابید دگہ نگاھاں نہ چار اِتگ –

آیاں گوشت کہ اد ءَ سرکاری کار، نا کشت ءُ کشار، نا وانگی ادارہ، جانسلامتی، چاگردی ءُ گوازیانی پرکاریاں نہ جانسلامتی چاگرد ءِ واستا ناکہ دگہ دراں سرکاری نوکریاں، اد ءَ ما وت وتی کُمک ءَ بازیں دھکاں بارڈر ٹریڈ ءُ دریا ورد وتی زھگاں لاپ دیگ ءَ اَنت –

آیاں گوشت کہ تیادپی ھنداں دریا ورداں زر ءِ روگ ءُ نیلگ ءُ مزنیں ٹرالرزانی آرگ ءُ مُچ کنگ نِی بارڈر ٹریڈ ءِ بند کنگ ءَ دریاوردانی وڑ ءَ مزنیں دپار وارانی دستانی تہ ءَ کپتگ ءُ اے وڑ وڑیں پندل ءُ ھنرانی سر ءَ پرچی، ٹوکن ءُ دگہ رنگاں مزنیں مردماں نپ دیگ ءَ اَنت ءُ لس نیزگاریں مردم نا ایوک ءَ وتی زھگانی دو وھد ءِ نگن ءِ گزران ءَ سرجم کُت کنگ ءَ اَنت بلکیں گژن ءِ آماچ اَنت –

آیاں گوشت کہ ما لوٹ ایں سیمسر لس مردمانی واستا ہچ کنگ بہ بیت ءُ ما پنچ جاھانی پچ کنگ ءِ لوٹ کرتگ بلے تنی وھدی ھچ جاہ پچ کنگ نہ بیتگ اَنت –

آیاں گوشت کہ دمگدار بے وس اَنت آیاں گوشتگ کہ بارڈر ءِ بندش ایف اے ٹی ایف ءَ گوں ھوار کنگ بیگ ءَ اِنت کہ سرجمی ءَ رد اِنت، ایف اے ٹی ایف ءِ کار دگر اَنت کہ آئی ءِ تہ ءَ ناشرکاری، منی لانڈرنگ، کرپشن ءُ دگہ ھوار اَنت –

آیاں گوشت کہ بلوچانی نگن ءِ ڈنگر جنگ ءَ اے وڑیں پندل سازگ بیگ ءَ اِنت کہ اشاں ھچ رنگ ءَ سرکچ مردم نہ وارت کہ اے پالیسیانی مول ءُ مراد لس مردمانی دپار ءِ پچگرگ اِنت ءُ مارا دپارے ورگ ءَ مھتاج کنگ ءِ سرجمیں چِن ءُ لانچ کنگ بیتگ اَنت –

آیاں گوشت کہ پما پیسر ءَ مئے سر گاری ءَ چِن ءُ لانچ بیتگ اَنت بلے نِی اے آیانی گُڈی پندل اِنت پہ مئے نیست ءُ نابود کنگ ءَ اَنت ءُ باز ھنر ءُ ھژاری ءَ مارا مئے سرزمین ءِ کار ءُ بار ءَ زبھر کنگ ءَ آیاں وتی دستاں بلوچانی کُشگ ءُ گار کنگ ءَ المیں نکش کش اِتگ اَنت –

آیاں گوشت کہ ما وتی زھگاں زالمانی دست ءَ دات نہ کن ایں سیمسر ءِ بندش مئے زند ءُ مرگ ءِ بروبری اِنت ھمے واستا بارڈر ءِ بندش ءِ ھلاپ ءَ مھلوک داں گڈی درچاں شُت کنت ءُ ما پُر ایمنیں تکاں زھرشانی کن ایں ءُ بارڈر ءَ بندی ءَ نیل ایں ءُ ھمے واستا ما مھکمیں زھرشانی درچ بندات کرتگ اَنت –

آیاں گوشت کہ ما وتی ھرتالانی وھد ءَ انسانی ھمدردی ءَ بس ایمبولینس گاڑیانی روگ ءَ آیگ ءَ اجازت دے دومی درچ ءَ اسٹیرنگ ھرتال کنگ بیتگ ءُ چریشی ءَ بارڈر ءَ تیل باپاری ءَ بندوکیں دراھیں گاڑی دگانی سر ءَ اوشتارینگ بنت ءُ ھچ چیز نھاد جاھاں برگ نہ بنت ءُ اگاں مئے اژدری لوٹ سرجم نہ بیت اَنت گڑا چریشی ءَ پد ڈویژنل ءِ درچ ءَ زھرشانیانی درچاں بندات کن ایں –

جوھان شاہ پیر ءَ پاکستانی پوج ءِ کاروان ءِ سر ءَ اُرش کُتگ ءُ جانی ءُ مالی تاوان داتگ – مرید بلوچ

سربوتگیں ھالانی رِد ءَ کلات ءَ ناشناسیں سلاہ بندیں مردماں پاکستانی پوج ءِ کاروان ءِ سر ءَ اُرش کرتگ، اُرش ءَ پاکستانی پوج ءَ جانی مالی تاوان رس اتگ – سلاہ بندیں مردم در آیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مرید بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں کلات ءِ دمگ جوھان شاہ پیر ءَ زورگیریں ریاست پاکستان ءِ پوجی کاروان ھما وھد ءَ تراک ناکیں شوروانی نشانگ جوڑ کتگ کہ دمگ ءِ تہ ءَ پہ لشکر کشی ءَ رؤگ ءَ بوتگ انت –

جارکش ءَ گوشتگ ریمورٹ کنٹرول بمب تراک ءَ پد بلوچ سرمچاراں دشمن پوج ءِ کاروان ءِ سر ءَ راکٹ ءُ وتکاریں سلاھانی سر ءَ ھم اُرش کتگ، چریشی ءَ دژمن ءَ جانی ءُ مالی تاوان رس اتگ –

جارکش مرید بلوچ ءَ دیمتر ءَ گوشتگ کہ یونائیٹڈ بلوچ آرمی چین ءَ ھوار درسیں درملکی سرمایہ داراں مکن کنت کہ آ بلوچستان ءِ تہ ءَ سرمایہ کاری مہ کن انت پرچاکہ درسیں ملکی ءُ درمکی سرمایہ کارانی پراجکٹس ءُ کارمند بلوچ سرمچارانی نشانگ ءِ تہ ءَ انت –

آئی ءَ گوشتگ کہ بلوچ مھلوک پوجی کارمند، پانگس، بنجل ءُ سرکاری کارجاھاں چہ دور بہ بنت، ریل گاڑی ءَ سپر مہ کن انت، سرکاری لٹ ءُ پُلانی بھر مہ بنت پرچاکہ آ بلوچ سرمچارانی نشانگ ءِ تہ ءَ انت –

گڈسر ءَ جارکش ءَ وتی درشان ءِ تہ ءَ گوشتگ کہ اے دابیں اُرش بلوچستان ءِ آجوئی تاں برجاہ مان انت –

نبشتانک: آزمانک: زند ءَ وپا نیست

نبشتہ کار ۔ ڈاکٹر لاشاری

دی بلوچستان پوسٹ

من ھما سِنگ دلیں مردم آں تو مُدام من ءَ را سِنگے ءِ درور دات من ھمے سنگ دلی ءَ چہ ترا دور بیت آں تئی زھیرانی تہ ءَ چینچو کمی مار اِت بلے من ھم بے وس اِت آں کہ من پہ تو ھچ وڑ ءَ اَتک نہ کُت دل ءَ باز گُشت بلے تو زان ئے ھما مئے لوگ ءِ چراگ بندیگجاہ ءَ زندان اَت من ھم پد ءَ تئی دردانی ساڑینگ ءَ ترا باز تسلّا دات بلے من لاچار بیت آں ھچ کُت نہ کُت پہ تو۔

تو من ءَ سک دوست بوتگ ئے چو مات ءِ پیم ءَ بلے من ءَ تئی ھما مھر ءُ دوستی پہ من جھان ءِ وشیاں چہ دوست بوتگ اَنت برے برے اگاں من زھر کُت ءُ یا لوگ ءَ ورگ نہ وارت تو چینچو من ءَ ھبر دات ءُ من ءَ مِڑ اِت گوں من تئی ھمے ھبر دیگ ءُ مِڑگ سک دوست بوتگ اَنت بلے تو من ءَ سک دوست داشتگ اَت دائم دوا کُتگ کہ منی لالا سلامت بات اَنت۔

ترا یات بیت اولی رند ءَ کُچک مئے میتگ ءَ اَتگ اِت انت ءُ من نماز ءَ شُتگ اِت آں ءُ آدینگ ءِ روچ اَت رستراں سرجمیں میتگ سر ءَ زُرتگ اَت بلے من گوں وتی پل ءِ ھمراھی ءَ کور ءُ جنگلاں تچان اِت ایں ھمے دمان ءَ منی گوانکو ءَ گوانک جَت ءُ من چِست کُت تو گریوگ ءَ اِت ایں ءُ تو جُست کُت کجا ئے؟ من ھمے گّشت کہ من گوں پُل ءَ کور ءُ جنگلاں تچان اِیں تو پہ گریوگ گُشت میا اِت انوں لوگ ءَ بلے ترا سما نیست اَت تو انچُش مارا دوست داشتگ اَت اگاں یک دمانے ما لوگ ءَ چہ در اِتکگ اِت ایں تو وت ءَ سک پریشان کُتگ اَت پہ ما۔

بلے یک چیزے ءَ من سک گِلہ آں چہ تو تو ھما ئے شُت ئے من ترا نہ دیستگ تو سرپد ئے یک گپے ءَ تئی پل چہ بندیگجاہ ءَ آجو بوت تو بلے لوگ ءَ نہ اَتک ئے تئی پُل ءَ ترا باز جیڑ اِت ءُ تو پُل ءِ پہ گندگ ءَ ھم نہ اَتک ئے ۔

ھمے تئی دوری ءَ پد تو زان ئے منی دل موم بیتگ ءُ من سک گریواں تئی واست ءَ بلے من سِنگ دلے نہ بیت آں تو اگاں ھمد ءَ اِت ئے من ھما سِنگ دل اِت ئے تو کہ شُت ئے من موم بیتگ آں مرچاں دل نرم چکر اِتگ پرچا کہ تئی دوری ءَ منی سرجمیں واھگ تباہ بوت اَنت ءُ من وتی دل مومے کُت ترا بلے نہ دیست زند ءَ وپا نیست اَت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ کیچ ءِ بنجاھی شھر تربت ءَ بارڈر ءِ بندش ءِ ھلاپ ءَ زھرشانی ءِ پنتاک شنگ کنگ بیتگ اَنت –

پنتانک نیشنل پاٹی ءُ بی ایس او پجار ءِ نیمگ ءَ شنگ کنگ بیتگ اَنت، پنتاکانی سر ءَ نبشتگ اِنت کہ بیست ءُ پنچ اپریل ءَ سھب ءِ ساھت دَہ ءَ تربت ءَ بارڈر ءِ بندش ءِ ھلاپ ءَ زھرشانی کنگ بیت اِنت –

زھرشانی ءَ آیاں دراھیں تکاں پوریاگر، باپاری مھلوک ءُ سیاسی ءُ چاگردی باسکاں ھوار ھمک پھناتاں بندوکیں مردماناں بھر زیرگ ءِ دزبندی کرتگ –

زانگ بہ بیت گوستگیں روچاں پنجگور ءَ زھرشانی ءَ پد کیچ ءَ سیمسر ءِ بندش ءِ ھلاپ ءَ زھرشانی کنگ بیتگ ءُ زھرشانی کنوکانی گوشگ اَت کہ سیمسراں مھتلیں ڈرائیورانی تہ ءَ تنی وھدی چار مردم تن ءُ شد ءُ بیران بیتگ اَنت –

کیچ ءَ زھرشانی کنوکاں ڈی بلوچ ءَ دگ بند کتگ ءُ نشتگ ءُ نندانک جتگ چریشی ءَ پد دمگ ءِ انتزامیہ ءَ گپ ءُ تران ءُ سدکیاں نندانک ھلاس کنگ بیتگ اَت –

ھمے وڑ ءَ اوگستان ءَ ھواریں سیمسر چاگی ءَ ھم پاکستانی پوج ءَ سِی گاڑی مُچ کرتگ ءُ چریشانی تہ ءَ سَے گاڑی مانداشتگ اَنت –

اشی ءَ پیسر روکپتی بلوچستان ءَ ھم ایرانی گجر ءَ سیمسر ءَ تیرگواری کرتگ اَت کہ چریشی ءَ بازیں کچے ءَ گاڑیانی ڈرائیور بیران بیتگ اِت اَنت ءُ اے وئیل ءِ پژدر ءَ روکپتی بلوچستان ءَ زھرشانی درچ گیشی ءَ گندگ ءَ اتکگ اَنت –

نبشتانک: بلوچی زُبان ءِ نبشتہ رھبند

نبشتہ کار: ابدلستار بُگٹی

دی بلوچستان پوسٹ

توری رودرآتکی بلوچستان بہ بیت یا توری روایرشُتی زیردستیں بلوچستان بہ بیت، بلوچ راجی زُبان دوئیں نیمگاں لگتمالی ءُ ڈالچاری ءِ آماچ اِنت۔ بلوچ راج ءَ ناں بلوچی ماں وانگجاھاں وانینگ بیت ءُ نَیکہ بلوچی زُبان ءِ وانگ ءُ دیمروئی ءِ واست ءَ گِندگُش، روتاک ءُ ماھتاک ءِ وڑیں آسراتی ھست اَنت پمیشکا بلوچ راج وتی راجی زُبان ءِ وانگ ءُ زانگ ءَ ھیل نہ اِنت۔ بلوچ راج وتی راجی زُبان ءَ ناں کہ شَر ءُ راست نبشتہ کُت کن اَنت ءُ نَیکہ بلوچ ورناہ ءُ کماشاں سرپدی یے ھست کہ بلوچی نبشتہ رھبند ءُ سْیاھگ چے یے۔ بلوچ راج ءَ مزنیں وھد ءُ کرن گْوستگ اَنت کہ یکشل ءَ پارسی ءُ ھندی ءَ وانان اِنت، پارسی ءُ ھندی ءِ روتاک، ماھتاک ءُ گِندگُشاں بلوچ راج ءِ راجی زُباناں بے کساس تاوان داتگ اَنت ءُ دنیگا تاوان دیگ ءَ اَنت پمیشکا مرچاں راج وتی گُپتاری ءَ وتی راجی زُبان ءِ کْوھن ءُ زگریں گالاں ڈالچار کنان ءَ پارسی ءُ ھندی ءِ گالاں جاہ دیان اِنت چریشی ءَ بلوچ راجی زُبان باز پُشت ءَ کپتگ بلے مرچاں بلوچی راجی زُبان ءِ جُھدکاراں دامگ ءُ چاگِردی رسانکدر ءِ راست کارمرزی ءَ بلوچی پیسبُکی تاکدیم، پیسبُک ءُ وٹس ایپی وانگجاھی گل اڈ کُتگ اَنت کہ بلوچ راج ءَ ماں وتی دزھُورکی ءِ وھد ءَ بلوچی وانینگ بہ بیت۔

چی ءَ کہ اگاں ما بلوچ مرچیگیں زمانگ ءِ وٹس ایپ ءُ پیسبُک ءِ آسراتیاں پہ وتی زُبان ءِ دیمروئی ءَ کارمرز مہ کن ایں گُڑا مئے زُبان گوں تْرُندیں رشتے ءَ پُشت ءَ روت انت پمیشکا باید اِنت ما ھر بلوچے وتی راجی زمہ واری منّان ءَ وٹس ایپ ءُ پیسبُکی لبزانکی گلاں باسکی بزُور ایں، وتی راجی زُبان ءِ درونت، نبشتانک ءُ آزمانکاں وانان ءَ راجی زُبان ءِ نبشتہ ھیل کن ایں-

بلے ماں اِے جُنز ءَ راجی زُبان ءِ جُھدکاراں یک سوالے یکشل ءَ جُست کنگ بیت کہ اِے مکُرانی گالوار اِنت، اِے منی گالوار نہ اِنت َ من وتی گالوار ءِ رِد ءَ نبیسّگ لوٹ آں۔ گُڑا اِے درگت ءَ من راج ءَ سرپدی یے دیگ لوٹ آں کہ ھر زُبان ءَ گالوار بنت اگاں ما اَربی زُبان ءَ چمشانکے بہ دے ایں گُڑا ما سرپد بَہ ایں کہ بیست ءُ ھشت اَرب ءِ مُلک گوں چِل ءُ پنچ گالوار ءَ یکیں اَربی نبشتہ تپاک اَنت اگاں روسی زُبان ءَ ما چار ایں کہ روسی زُبان ءِ ھر پنچیں گالوارانی یکیں نبشتہ رھبندے، ھمے داب ءَ انگریزی، پرینچ، چینی، ھندی، پارسی ءُ دگہ بازیں زُبان اَنت کہ گوں بُنتواریں گال ءُ آباں یکیں نبشتہ رھبندے ءَ نبیسّگ بنت بزاں ھر یک ءَ ھکّ ھست کہ وتی گالوار ءِ ھساب ءَ گپ ءُ تْران بہ کنت بلے نبشتہ ھر زُبان ءِ یکینے بیت اگاں تو کراچی ءَ برو ئے گُڑا تو زان ئے کہ اود ءَ ھندی گپ ءُ توار ءُ ھندی نبشتاری جُتا اَنت انچوشکہ-
• کائے کو دیرکریلائے۔
• اپن کو کا پتا۔
• مت جَائیو۔

اگاں تو مُلا زاکر نائیک ءِ ھِندی تواراں دلگوش بہ کن ئے یا اگاں تو ھندوستان ءِ بھیار ءِ مردمانی تواراں دلگوش کن ئے گُڑا تو سرپد بہ ئے کہ ھندی لبزانک ءُ گالوار ءَ ھم دگری اِنت اگاں ما انگریزی ءِ گُپتاری ءَ چار ایں کہ انگریز گْوش اَنت-
• I wanna complete my work
• You gonna learn it.
بلے انگریزی لبزانک اِے رنگ ءَ نبیسّگ نہ بیت۔

نی من بُنگپ ءِ سر ءَ ٹَوک کن آں کہ بلوچی نبشتاری بلوچی زُبان ءِ بُنتواریں گال ءُ بُنتواریں آبانی رِد ءَ یک نبشتہ سْیاھگ ءُ رھبندے ءِ نام اِنت کہ ھمے نبشتہ رھبند بلوچی زُبان ءِ سرجمیں بُنتواریں گالواراں پیلو کنگ ءَ اِنت اگاں کسے گْوش ایت کہ بلوچی سْیاھگ ءَ منی گالوار ءِ تام نیست اِنت آ رِد اِنت اگاں کسے گْوش ایت اِے مکرانی ءُ رکشانی گالوار ءَ اِنت ءُ سلیمانی ئِے نیست اِنت گُڑا آ ھم رَد انت چوناھا ما دْراہ وتواہ ایں ما ھرکسے ھمے لوٹ ایں کہ راجی زُبان ءِ نبشتہ ءَ منی دمگی گالوار ءِ تام گیشتر بیت ءُ من ءَ دگراں ھچ کار نیست بلے چوشیں مردُم سرپد نہ اَنت کہ بلوچ راج یک بلاھیں راجے ءُ بلوچی یک شاھگانیں زُبانے گُڑا اگاں ما ھرکسے وتی دمگی گالوار ءِ ھساب ءَ راجی زُبان ءَ نبشتہ کن ایں گُڑا زُبان بھر ءُ بانگ بیت البت من راج ءَ سرپدی دیاں کہ راجی زُبان ءِ نبشتہ ءَ بازیں مکرانی دمگی گالوار ءِ گال ھم روا نہ اَنت انچوشکہ کہ مکرانی گالوار ءِ لاپ ءَ گْوش اَنت-
• من ترا چے دُور آں
• من لیلہ ءِ سیر ءَ روئیں
• من بی تئی کار کو یا کُتہ
• گڈا تو من ءَ زی چے گو
• من تئی اِے کار ءَ چتو کنی۔

بزاں اِے رنگ ءَ ھزاریں توارکشیں گال ءُ توار اَنت کہ دمگی توار ءُ گُپتار ءِ راست بنت ءُ چوناھا ھر بلوچ ءَ ھک ھست کہ وتی ابرمی گالوار ءِ رِد ءَ ٹَوک ءَ بہ کنت بلے بلوچی لبزانک ءُ بلوچی سْیاھگ ءِ نبشتہ رھبند ءَ اے ڈولیں گالرِد ءُ توار نبیسّگ ءَ رَد اَنت اے وڑیں توار ماں لبزانک ءُ سْیاھگ ءَ اِے داب ءَ نبیسّگ بنت انچوشکہ-
• من چہ ترا دِیر آں۔
• من لیلہ ءِ سیر ءَ رو آں۔
• من ھم تئی کار کُت / کُتگ۔
• گُڑا تو من ءَ زی چے گْوشت۔
• من تئی اِے کار ءَ چتور بہ کن آں –

بزاں مکرانی گالوار ءِ بازیں گال ءُ توارے ھم سْیاھگ ءِ رِد ءَ وَ نہ اَنت ھمے داب ءَ سلیمانی ءُ رکشانی گالوار ءِ بازیں توار ءُ گالے ھم سْیاھگ ءَ نہ بنت۔ چی ءَ کہ گالوار ءَ بازیں بدلتوار ءُ زورگیریں زُبانانی سان ھم ھست اَنت۔

نی باید اِنت ما بلوچ بہ زان این ءُ پوہ بَہ ایں کہ مئے راجی زُبان چو انگریزی، ھندی ءُ پارسی ءِ وڑ ءَ گْونڈ وَ نہ اِنت بلکیں ما بلوچ یک شاھگانیں زُبان ءِ واھُند ایں پمیشکا ما وتی دمگی گالوار ءِ رِد ءَ نبیسّان ءُ راجی زُبان ءَ گْونڈ مہ کن ایں یکیں نبشتہ ءِ رھبند ءَ نبیسّ ایں کہ سرجمیں دنیا ھم ھمے سرپد بہ بیت کہ بلوچ یک سرجمیں راجے ءُ بلوچی بلوچ راج ءِ راجی زُبان اِنت۔ ما نہ گْوشگ ءَ ایں کہ شُما وتی گالوار ءِ ھساب ءَ ٹَوک مہ کن اِت بلکیں شُمئے گپ ءُ تْران گالوار ءِ رِد ءَ بہ بیت بلے نبشتہ یکیں سْیاھگ ءُ رھبند ءِ رِد ءَ بہ بیت بزاں اگاں ترا وتی گالوار دوست اِنت گُڑا بلوچی بِوان ءُ بلوچی نبشتہ بِہ کن چی ءَ بلوچی وانگ ءُ نبیسّگ ھر گالوار ءِ دیمروئی اَنت کہ چہ نبشتہ ءَ ھر گالوار ءِ زگریں گالاں ھاٹی رس ایت ءُ مئے زُبان ءِ زگریں گال گار ءُ بیگواہ نہ بنت باید اِنت ما دْراہ بلوچ وٹس ایپ ءُ پیسُبک ءِ لبزانکی گلاں باسکی بزُور ایں، بلوچی درونتاں وت بِوان ایں ءُ دیم ءَ راج ءَ ھم وانین ایں کہ مئے بلوچی ھم دنیا ءِ دگہ زُبانی ڈول ءَ دیمروئی بہ کنت۔

بلوچ شالا وش ءُ آسودگ بہ بات اَنت، بلوچ شالا وتی راجی زُبان ءَ وانان ءُ راجی زُبان ءَ دیمروئیاں سرکنات اَنت۔ شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: ڈاکٹر منان جان ءِ کتاب جاہ

نبشتہ کار: وتن بلوچ

دی بلوچستان پوسٹ

زند ءِ سرگوْست انچوش باز اَنت کہ پہ نبشتہ کنگ ءَ دست دم بر اَنت بلے کسہ ھلاس نہ بنت لھتیں انچیں کارست کہ آوانی بابت ءَ تو نبشہ کنگ بندات کن ئے تہ کلم کمو پشل پشل بیت انچیں مردم کہ پہ دگر ءِ زندگ کنگ ءِ ھاتر ءَ وتی زند ءِ توامیں وشی آں بہ باں دے اَنت ھمے پیم ءَ ڈاکٹر منان جان کہ ما اولی رند ءَ ماں سنو ءِ ڈک ءَ دُچار کپتیں۔ من ءَ واجہ ءَ دیم داتگ اَت کہ برو مھمان ءِ پیداکیں دست گرے بیارے گوں وت من روگ ءَ پیسر سک ھیران اِتاں کہ اے زاناں کَے بوت کنت کہ اے راہ ءُ رھبنداں سرپد نہ اِنت۔ دل ءَ من باز جیڑگ ءَ اِتاں کہ اگاں درآمدے بیت گڑا زاناں کھلو کاھان یا کہ انچیں دوریں ھندی ءِ مردم ءِ بیت کہ اے راھاں ھِچ نزانت بلے من ءَ روگی اَت ءُ مردم دست گرگی اِتاں۔ من سھراب ءِ پرپٹ اسٹارٹ کت دیم پہ سنو ءِ ڈک ءَ رھادگ بوت ایں شپ سک تھار اَت ءُ لئیٹ ھم روک کنگی نہ اَت واجہ کارانی تُرس ءَ، بلے بازیں روگ ءُ آھگ ءَ راہ من ءَ دل یاد اِتاں من بس اے جیڑگ ءَ اِتاں کہ اگاں واتری ءِ وھد ءَ مھمان ءَ چیزے بوت گڈا بزاں واجہ من ءَ سک ھبر دنت چی ءَ کہ واجہ ءَ منی سرا باز بیسہ است اَت ءُ اے زمہ واری منی بہر ءَ کپتگ اَت کہ من آئی ءَ پہ وش ءُ سلامتی سر بکن آں۔ من ءَ وتی ھِچ تُرس نیستگ اَت بلے ھیر! من رھادگ اِتاں بازیں دُور گند کنگ ءَ رند من میزان میزان ءَ جنزان اِتاں۔ پند وَ 3 کلاک ئیگ اَت بلے بازیں جل ءُ مجل بوھگ ءَ سپر 6 کلاک ءِ بوت۔ من ءَ انگت یات انت کہ واجہ ءَ من ءَ کمو ورگ داتگ اَت کہ راہ ھچ زانگ نہ بنت، بگندے شمارا کمو مھتل کپگ بے کپیت۔ من روان اِتاں دیم پہ منزل ءَ تھنائی اَت ءُ پرپٹ اَت کہ من جماز اِتاں ئے کوھانی سارتی منی جبین ءَ گوں ھوار اَت سرد اَت بلے من ءَ سردی کنگ ءَ نہ ات۔ من نوں ھیل کُتگ اَت ءُ من ءَ یک زمہ واری یے سر ءَ اَت کہ مھمان سر کنگی اَنت نوں بام دیگ ءَ اَت ءُ من ھم سر بوھگ ءَ اِتاں کمو دیر نہ گوْست من سر بوتاں داں بابل ءُ مھمان پیسر ءَ نندوک آں چاہ آچ ءِ سر ءَ پر انت منی چم وھدے مرد ءَ کپت آں داں اے مرد پہ من نوک اِنت من سلامے ٹُک اِت مرد ءِ دست گپتاں من وتارا گیگ کنگ ءَ اتاں کہ ننداں آئی ءَ درائینت کہ بیا ابا آس ءِ کرِ ءَ بہ نند، تو سپر ءَ چہ پیداک ئے، ترا سرد کنگ ءَ اِنت من آئی ءِ گوشگ ءِ پد ءَ آس ءِ نوان ءَ نشت آں آئی سلیمانی چاھے ایر ریتک ءُ منی دیم ءَ ایر کت ءُ گپ ءِ بندات کُت ترا دیر اِنت کہ تو راہ ءَ ئے؟ من گشت اِناں واجہ 5 کلاک ءُ نیم بیت، منی گپ انگت ھلاس نہ ات کہ آئی ءَ من ءَ بگل ءَ کت ءُ گشت ئے اڑے تو سک ازاب بوتگ ئے آئی ءَ منی سرگ پرتک ءُ زنڈیں ساھ کشگ ءَ اَت من ھمد ءَ زانت کہ کسانیں مردمے نہ اِنت۔

من دیم ھمائی نیمگ ءَ کت ءُ جست کت کہ واجہ من ترا زانگ ءَ نیاں آھی کسانیں بچکندگے جت ءُ گوشت ئے من کئے آں؟ من ءَ تو ندیستگ پیسر ءَ؟ من گشت اِناں واجہ آئی ءَ گشت من چُنائی ءَ ڈاکٹرُکے آں بس انچو گون کپتگاں من ھیران اِتاں منی دپ پچ اَت ھوش اد ءَ نہ اَت پد ءَ اناگہ ءَ آئی ءَ من ءَ ٹوھینت کہ ھاں ھالان کن، اگاں دم نہ برتگ گڑا رو اَنت من بابل اجازت کت ءُ بابل ءَ من ءَ گشت کہ واجہ ءَ پہ سلامتی سر کن۔ من گشت ھؤ تو بے پکر بو۔ ما سر اتکگیں ورگانی نیم بابل ءَ داتاں ءُ نیم ماں پرپٹ ءِ ھرجین ءَ کت۔ پرپٹ چالو کت واجہ ماں منی پشت ءَ ما دیم پہ منزل ءَ مارا اداچہ در کپگی اَت 1 کلاکے ءِ راہ ءَ پد ءَ سرجمیں روچ ءَ ھمود ءَ اوشتگی اَت داں کہ شپ بئیت ءُ مارا شپ جت ءَ سپر کنگی اَت آ چہ بازیں ژندی ءَ کوچنڈان اَت بلے اے پیش دارگ ءَ نہ ات کہ آ ژند اِنت دراھیں راہ ءَ ھبر کنان اَت من ءَ دنیا ءُ جھان ءِ جستاں کنان اَت من ھم جواب کنان اِتاں کدی کوھانی بارو ءَ ءُ کدی ھلک ءِ ھالاتانی جست۔ من ھیران اِتاں کہ اے وَ مئے نیمگ اولی رندا کہ پیداک ءَ بلے من ءَ انچیں جست کنگ ءَ اَت منی ھند ءُ دمگانی باروا کے من ھیران اِتاں کہ من وتی کسانی بگر دان جوانی ھمدا گوازینتگ من ءَ انچو سرپدی نیست اَت، بلے آ جست کنان اَت کدی کدی کہ من ءَ انچیں جستے کہ کت کہ من آئی ءِ پسہ دات ما کتیں گڑا سک کندت اِت من ھم کند اِت گوں۔ من ءَ گوشیت کہ واتری ءَ من ترا برزی دمگ ءَ براں گوں اگاں واجہ ترا اجازت بہ دنت گڑا تو کائے گوں گون من؟ من گشت ھو واجہ اے منی وش بھتی انت کہ تئی پیمیں مردم ءِ دست ءَ کپتگ آں اِد بیت یا اود کار وَ یک اَنت کوھے چپیں نیمگ ءَ من ءَ سُر ءُ پرُ گندگ ءَ اتک من اشتاپ اشتاپی ءَ پرپٹ دازی ءِ پشت ءَ اوشتارینت ءُ گشادی چہ پرپٹ ءَ ایر کپتان دور گند چہ کورا کش اِت ءُ چماں کت چارگ بنا کت آئی ءَ گشت ھیر انت؟ من گشت ھؤ بلے من ءَ کمو شک بوگ ءَ انت کہ چیزے موجود انت من ءَ گوشیت اد ءَ ھچ نیست تو ھما اِنت آگہ ئے پمیشکا تئی چماں چیزی ھست من گشت ناں واجہ پکہ ءِ کنیں نوں در کپیں چو مہ بیت کہ دلّار بہ بنت مرچاں اِد ءَ سرکاری چِرّیک سک باز اَنت آئی ءِ تب کمّو ھراب بوت ءُ گوشت ئِے ‘پہ چار کلدار ءِ ھاتر ءَ اے چونیں گندگیں کار کن اَنت۔’ من ءَ دور گِند انگت چمان اَت ءُ دور گِند کنگ ءَ اِتاں –

منی چم ماں کوھی ھرابی رم ءِ گندگ اتک داں کوہ ءَ ایر کپگ ءَ اَنت من دلجم بوت آں تاں پد ءَ پرپٹ چالو کت، رھادگ بوت ایں پہ سپر ءَ کمو وھد گوست ما سر بوتیں ھما جاہ ءَ کہ مارا دارگی اَت۔ ھمدا چہ شپ ءَ در کپگی اَت ما داشت چم شُشت آں۔ ھما نان کہ ما ھرجین ءَ کتگ اِتاں، کشّ اِتاں ءُ گوں چاہ ءَ وارت آں من آئی ءَ گُشت تو وپس آرام کن من برز ءَ نشتگاں گاٹ دے آں ءَ من ءَ ءُ ترا پد ءَ سپر جنگی اِنت تو بلاھیں پندے برِتگ تو دم برتگ آئی ءَ چادر چیر گیپت ءُ وپت من بُرز ءَ نشتاں وھد گوازینت مگرب نزّوک اَت کہ آ چہ واب ءَ پاد اَتک۔ چمّے شُشت، اتک منی کر ءَ گوشیت، ‘تو برو کمو وپس من اد ءَ ننداں داں مگرب بہ بیت تئی واب ءِ سر پرْوش ایت چادر پیسر ءَ پچ اَت، من شُت ءُ چادر ءِ سر ءَ تچک بوت آں چم ماں واب ءَ شتاں گپڑے وھد گوزگ ءَ رند آئی ءَ من ءَ چہ واب ءَ ٹوھینت، پادا پادا ابا من مزنیں جان ءِ کش اِت ءُ پاد اتکاں چماں لتاران لتاران ءَ آپ ءِ سر ءَ شت ءُ چمان ءَ شُشت ءُ دیم چادر ءِ سر ءَ پھک کت پد ءَ سپر بندات بوت نو بس تھاری ات ءُ ما جنزان اِتیں 5 کلاک ءِ سپر ءَ پد ما واجہ ءِ کِر ءَ سر بوتیں داں واجہ مئے وداریگ ات آئی ءَ گوں بچکندگی گالوارے ءَ سلامے دات، وت ءُ واجہ بگل ماں بگل بوتاں یک ءِ دومی ءَ ھال اھوال کنگ ءَ اِتان من شُتاں اوتاک ءِ کُنڈ ءَ تچک بوتاں سک دم برتگ اَت من وھدے چم پچ کُتاں داں سھب اَت منی کش ءَ واجہ ءُ آ نندوک اِتاں گپ ءُ تران کنگ ءَ اِتاں واجہ چم پہ من ءَکپتاں گوشیت، ‘آں ساربان چوں دم برتگ؟’من زانت کہ واجہ مزاک ءِ موڈ ءَ اِنت من گشت ھو واجہ کمو دم برتگ یکّے اے سھراب ءِ پرپٹ اِنت، من چنت رند ءَ گُشتگ کہ جوڑے ءِ شاک ءِ مان کن بلے بھتاور مدام بیھیال بیت چُشیں گڑا چمپ ءِ جنگ۔ ناں من ءَ سرین گوں ناں کہ گردن چہ اے پرپٹ ءِ بدل ءَ قسمیں مردم ھرے ءَ سوار بوتیں وش تر اَت۔ آئی ءَ گشت ھیر بیت سنگت، چہ شھر ءِ نیمگ ءَ پیداکاں پرپٹ ءَ وڑے کنیں من چہ واب جاہ ءَ پاد اتکاں چم ششتاں چاھے چہ کرہ ءَ ایر ریتک، اتک ءُ واجہ ئِے ءُ منان کِر ءَ نشت آں۔

گوں نندگ ءَ واجہ منی بارو ءَ منو ءَ سرپدی دیگ ءَ اَت منو گوشدارگ ءَ اَت منو ءَ درّائینت کہ واجہ تو اگاں ساربان ءَ اجازت بدے اِت من گوں وت ءَ برزی دمگ ءَ براں ئے گوں واجہ گشت اگاں ساربان گون تو کہ کئیت گوں من مکن ءِ کت نکن آں۔ منو ءِ ادے دیوان 7 روچ ءَ چہ پد ھلاس بوتاں من پد ءَ گوں منو ءَ سپر کنگ ءَ اِتاں اے منی وش بھتی اَت کہ کساس 10 روچ ءِ سپر ءَ پد ما منو ءِ اوتاک ءَ سر بوت ایں منی واست ءَ اد ءِ ھر چیز نوک اَت۔

اد ءِ سنگت، اد ءِ ھند ءُ دمگ، اد ءِ کوھ ءُ کھچر، دراہ! بلے یک چیزے کہ کلاں چہ گیش منی واست ءَ نوک اَت آ منو ءِ کتاب جاہ اَت کہ اے کوہ ءِ جبل ءِ تہ ءَ انچوکیں بلاھیں کساسے ءَ کتاب منی دیم ءَ کپگ ءَ اِت اَنت من سک ھیران اتاں وڑ وڑیں کتاب گندگ پیداک ات، انچوش سما بوگ ءَ اَت کہ گوشے زاناں من شھر ءِ شاہ دربر جاہ ءِ کتاب جاھے ءَ نشتگ آں، بلے اے شاہ دربرجاہ ءِ کتاب جاہ ءَ چہ تشے ھم کمتر نہ اَت پرک بس اِش اَت کہ اود ءَ کتاب شلپانی سر ءَ ایر اِت اَنت ءُ اد ءَ سنگانی سر ءَ ایر اِت اَنت من چم ء کتاباں چہ کتابے چست کت اشی ءِ اولی تاک ءِ سر ءَ نبشتہ اَت سوگات ءِ پہ منو ءَ جھل جھل ءَ نبشتہ ءَ تئی نودربر کمبر من ترا گوشگ لوٹاں کہ تئی روگ ءَ پد من ھما جاہ ءَ اوشتوکاں کہ تو منی دست ھما جاہ ءَ یلا داتگ ءُ پہ مدامی نمیران بوتگ ئے من ءَ ھما کتاب انگت دست ءَ انِت گوں ھما نام ءَ بلے بس اے نبشتہ نہ اِنت کہ تئی نودربر کمبر-

وئیل جھل مگسی، کلات لورالائی ءَ پیش اَتکگ اَنت اود ءَ زالبولے ننگ ءِ نام ءَ کُشگ بیتگ ءُ دگ ءِ وئیل ءَ پروفیسر بیران –

سر بیتگیں ھالانی رد ءَ جھل مگسی ءَ لوگ واجہ ءَ تیرگواری کرتگ ءُ وتی زال کُشتگ –

لیویز بنشون ءِ رد ءَ جھل مگسی ءَ لوگ واجہ ءَ گیرت ءِ نام ءَ تیرگواری کرتگ ءُ وتی زال کُشتگ ءُ یک مردمے زدگ بیتگ –

لیویز بنشون ءِ رد ءَ لاش ءُ زدگ بیتگیں مردم چِست کنگ ءُ ھسپتال ءَ برگ بیتگ اَنت ءُ لاش اژدری چار ءُ ٹپاس ءَ پد کھول ءِ دست ءَ دیگ بیتگ ءُ زدگ بیتگیں لاڑکانہ ءَ برگ بیتگ –

ھمے وڑ ءَ کلات ءَ دگ ءِ وئیلے ءَ پروفیسر بیران بیتگ –

گیشیں ھالانی رد ءَ کلات ڈگری کالج ءِ گوستگیں پرنسپل استاد پروفیسر غلام نبی مھمد ھسنی ھزدار ءُ وڈھ ءِ میانی دمگ ءَ دگ ءِ وئیل ءَ بیران بیتگ –

ھمے وڑ ءَ لورالائی ءُ قلعہ عبداللہ ءَ ھونریچی ءَ دو براتاں ھوار سَے مردم بیران ءُ یکے زدگ بیتگ –

بلوچستان ءِ دو ھنداں ھونریچی جنگ ءُ چوپاں دو براتاں ھوار سَے کس بیران بیتگ اَنت ءُ یکے زدگ بیتگ –

لورالائی ءِ دمگ کلی اغبرگ ءَ دو ٹولیانی میان ءَ جنگ ءُ چوپ بیتگ چریشی ءَ کارچ جن ءُ کائی ءَ دو برات زدگ بیتگ اَنت کہ آ سول ھسپال ءَ برگ ءِ وھد ءَ جاوید خان ء ظریف خان زخپیل ءَ ٹپ نہ سگ اِتگ ءُ بیران بیتگ ءُ دومی برات مھمد صادق سک زدگ اِنت –

لیویز ءَ وئیل ءِ ارزی نبشتگ کرتگ ءُ جرمکارانی دزگیریانی واستا پَٹ ءُ پول بندات کرتگ-

بیران بیتگینانی تہ ءَ جاوید کاکڑ پی ٹی آئی یوتھ ونگ زیارت ءِ کسان کمک سرکماش اِنت-

دومی نیمگ ءَ قلعہ عبداللہ ءَ جنگل پیر علیزئی ءَ ناکو ءَ تیرگواری کرتگ ءُ دو برات زتک ھما دمان ءَ کُشتگ اَنت –

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ نود ءُ دو روچ سرجم بوتگ -بی ایس او ءِ باسکاں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ بے لگامیں جزبگ، زد کنگ ءِ زھرگ ، کس ءُ کینگ، دروگیں پندل سازوکیں کردار کشی ءِ لھڑانی برجاہ دارگ ءِ زوراکیں پنجگانی ھاتر ءَ وتگڑیں جیڑہ پیداک کنگ ءُ پُرایمنیں جھد ءَ دیست نہ کنت بلکیں پُرایمنیں جد ءُ جھد ءِ ھلاپ ءَ کَل کرتگیں پندلاں پروش دنت ءُ آشوبی ءَ بساد ءِ دیم ءَ اوشتات نہ کنت –

آئی ءَ گوشتگ کہ منی وڑیں ناچیز ءَ ھوار بلوچ راج ایشی ءَ شری ءَ سرپد بیت کہ مروچی بلوچ راج چونیں جاورھالانی تہ ءَ گوزگ ءَ انت – سرڈگار ءِ کُنڈ کُنڈ ءَ پرزندانی ھوناں شودگ بوتگ –

ماما قدیر بلوچ ءَ گوشتگ کہ پاکستانی مرگ پرشتگانی پیم ءَ ترگ ءَ انت چیریں ادارہ، ایف سی ءُ دمگی ڈیتھ اسکواڈ سیاسی باسک، نودربراں ھوار ھر پڑ ءَ سیادی داروکیں مردماں بے دردی کُشگ ءُ چگل دیگ ءَ انت –

آئی ءَ گوشتگ کہ اے ھونی جاور ھالاں راجداریں گل، ءُ پاٹی ھچ وڑ ءَ پندل کُشی ءِ پانچانی آماچ نہ بنت پرچاکہ آھاں چہ بلوچ راج ءِ وشھالیں باندات بندوک انت –