TBP Balochi

بلوچ یکجھتی کمیٹی ءِ دزبندی ءَ شال ءِ پریس کلب ءِ دیم ءَ ھوشاپ ءَ بلوچ زھگ مراد امیر ءِ گون ءَ بیتگیں جنسی زوراکی ءِ بگیری ءَ زھرشانی کنگ بیتگ –

زھرشانی شال ءِ پریس کلب ءِ دیم ءَ بیتگ ءُ اود ءَ نودربر گل، سیاسی ءُ جتا جتائیں تکاں بندوکیں مردماں بھر زُرتگ اشاں ابید وائس فار بلوچ مسنگ پرسنز ءِ وائس چیئرمین ماما قدیر بلوچ ءُ بلوچ نودربر رھشون ڈاکٹر مھرنگ ھم زھرشانی ءَ ھوار بیتگ اَنت –

زھرشانی ءَ زھرشانی کنوکاں گوشت کہ ھپتاد سال ءِ چیردستی ءَ بلوچستان ءِ سر ءَ زُلم ءُ زوراکی یکشل ءَ برجاہ اَنت ءُ روچ پہ روچ اے زُلم ءُ زوراکی وتی رنگ ءُ دروشماں مَٹ کنان اَنت –

آیاں گوشت کہ بلوچستان ءَ پاکستانی پوج ءِ نیمگ ءَ گوست ءَ ھم بلوچ زالبول ءُ زھگ جنسی زوراکیانی آماچ کنگ بیتگ اَنت بلے کسے ءَ اے گپ نا گوشداشتگ ءُ نا دیم ءَ آؤرتگ –

آیاں گوشت کہ امیر مراد ءِ گون ءَ پوجی کارمنداں جنسی زوراکی کرتگ ءُ اشی ءَ ھمے کساس ءَ ایر بہ جن ئے اے کم اِنت ءُ اے وئیل رستری وئیل ءَ ھواریں مردم دلجم ءَ سزا دیگ بہ بنت –

آیاں گوشت کہ پاکستان ءَ گوست ءِ راجدپتر ءَ ماں بنگلہ دیش ءَ وتی رستری کرتگ اَنت نِی آ بلوچستان ءَ ھما راستریانی کنگ ءَ بندات کنگ ءَ اِنت بلے اے بلوچستان اِنت ءُ بلوچ راج ءَ ھروھد ءَ وتی ننگ ءُ ناموس ءِ ھاتر ءَ گھگیری کرتگ ءُ انگت ءَ گھگیری ءَ بلوچ پُشت ءَ نہ کنز اَنت –

زانگ بہ بیتگ گوستگیں روچاں کیچ ءَ ھواریں دمگ ھوشاپ ءَ جنسی زوراکی ءِ وئیل دیم ءَ اتکگ اَت کہ اود ءَ مھلوک ءَ ھوار جنسی زوراکی ءِ آماچ بیتگیں امیر مراد ءِ کھول ءَ سی پیک دگ بند کرتگ اَت –

چریشی ءَ پد کھول ءَ لوٹ کرتگ اَت کہ مئے زھگ ءِ گون ءَ بیتگیں وئیل ءَ ھواریں مردم سزا دیگ بہ بنت ءُ آ کانود ءِ تہ ءَ آرگ بہ بنت –

کھول ءِ بھتام اَت کہ ھوشاپ ءَ ایف سی ءِ کارمنداں مئے زھگ امیر مراد ءِ گون ءَ جنسی زوراکہ کرتگ ءُ آ بے ھوشی جاوراں چگل داتگ، چریشی ءَ پد کھول ءَ مراد امیر چِست کرتگ ءُ تربت نادراہ جاہ ءَ برتگ ءُ اود ءَ آئی ءِ چِک ءُ تان ءَ ڈاکٹراں ٹیسٹانی تہ ءَ آئی ءِ جنسی زوراکی پدر نہ کرتگ اِت اَنت ءُ چریشی ءَ پد آئی ءِ مستریں برات ءَ ڈاکٹر ءِ چِک ءُ تان رد کرتگ اِت اَنت –

چریشی ءَ پد ایف سی ءِ واکداراں وتی یک کارمندے لیویز ءِ دست ءَ داتگ ءُ ایف سی ءَ گوشتگ کہ اے کار سرجمیں ادارہ ءِ نہ اِنت بلکیں یک پردے ءَ کرتگ ھمے ھاتر ءَ پرد لیویز ءِ ھوالگ ءَ کنگ بیتگ، بلوچ سیاسی ءُ لس مردمانی گوشگ اِنت کہ اے وڑیں وئیلانی پژدر ءَ مدام پاکستانی پوج ھمے وڑ گوش ایت کہ اے وئیل ادارہ ءِ نہ اِنت بلکیں یک پردے ءِ میان ءَ بیتگ –

چریشی ءَ پد کیچ ءِ بنجاھی شھر تربت ءُ گوادر ءَ بلوچ یکجھتی کمیٹی ءِ دزبندی ءَ ھوشاپ وئیل ءِ بگیری ءَ زھرشانی ءَ پد مروچی شال ءَ زھرشانی کنگ بیتگ –

بلوچ تکاں اے وئیل ترندی ءَ ایر جنگ بیگ ءَ اِنت ءُ چاگردی رسانکجاھاں ھم امیر مراد ءِ واستا ھیش ٹیگ کارمرد بیتگ –

نبشتانک: چاگرد، دیمروی ءُ پدمنتگی

نبشتہ کار: شھزاد اسلم

دی بلوچستان پوسٹ

ھژدھمی کرن ءَ پد چاگردی زانوگرانی یک پگری زْرمبشے دیم ءَ آتک. اول سر ءَ آیاں اے جار جت کہ باید انت چاگرد ءِ پھمگ ءِ واست ءَ ما وتی کْوھنیں لیکھاں مٹ بکن ایں ءُ چاگرد ءَ یک نوکیں رنگے ءَ چارگ ءِ جُھد بکن ایں بزاں اے لیکہ کہ چاگرد ءِ جِند چے یے، چاگرد کُجام رنگ ءَ کار کنت، چاگردی لیکہ چتور چَہ نپری (individual) لیکھاں جتا انت، چاگرد مھلوک ءِ سر ءَ چے پیمیں سان (effect) دور دنت ءُ مھلوک ءِ سْیادی گوں چاگرءَ چے انت پد ءَ چاگرد ءِ جتائیں تک ءُ پھناتانی پھمگ ءَ پد اے چیز گشینگ بوت کہ آ کجام چیز انت کہ یک چاگرے ءَ را پدمنتگ کن انت ءُ کجام وڑ ءَ نوکیں راہ ءُ راھبند اڈ دیگ بہ بنت کہ چاگرد ءِ مچّی گھبودی سدّک بہ بیت-

چاگرد ءِ پھمگ ءِ واست ءَ سائنسی رد ءُ بند اڈ دیگ ءُ کارمرز کنگ بوت انت اے پدّر کنگ بوت کہ چاگرد یک ھاسیں جاگھے ءَ مردمانی مُچّی یا هور تور بوھگ ءِ نام نہ اِنت، بگند ئے چاگرد یک جُتائیں راستی یے دار ایت. چاگرد ناں ایوک ءَ مردمانی زندگی کنگ ءِ راہ ءُ راھبنداں گِش ءُ گیوار کنت بلکیں اے ھم پدر کنت کہ مردمانی لیکھاں گوں ٹوھیں راستیاں سْیادی ھست ھما راھبند کہ چاگرد ءِ تہ ءَ نندوکیں مردم آیاں پہ وت راست لیک انت، آ چتور ءُ چہ کُج ءَ بندات بوتگ انت ءُ مرچی آیانی راست بوگ ءِ گُمان چنکس انت یا اے سدّکی ءَ مارا کَے بدنت کہ اے راست انت-

مستریں آشوبی جار ھمیش ات کہ راستی ھچبر یک ءُ ٹک بوت نہ کنت راستی ءِ واست ءَ جُھد کنگ کپ ایت، راستی در گیجگ کپ ایت. اے ھبر پدّر کنگ بوت کہ ھما چاگرد کہ یک راستی یے ءِ سر ءَ پیسر ءَ چہ ءُ ابید جیڑگ ءَ سدّک انت گڑا آ پشت کپوکیں چاگردے بیت. مردماں اِے سکین رس ایت کہ راستی ءِ سْیادی گوں مادی (material) جاوراں بندوک انت ءُ الّم نہ اِنت کہ زِکّیں راستی مرچیگیں یا مرچیگیں راستی باندات ءِ راستی بوت بہ کنت-

مردم سرپد بوت انت کہ چاگرد سک باز ترامیگجانی (institutions) یک گْرنچے ءُ ھرچ یک ترامگیجے ءِ وتی یک کردے ھست سیاسی (political) ترامگیجانی چاگردءِ گون ءَ سْیادی دگہ رنگے ءَ انت، زرکاری (economic) ترامگیج چاگرد ءِ سر ءَ جُتائیں رنگے ءَ سان (effect) دور دنت ھمے وڑ ءَ اِلم (educational)، نیکراھی (religious) ءُ دگہ چاگردی ترامگیج وتی وتی وڑ ءَ چاگرد ءِ تب ءَ مٹ کنگ ءَ وتی کرد ءَ پیلو کن انت-

ترامگیج توری مزنینے بہ بیت یا کسانینے، آئی ءِ کرد وتی جاہ ءَ ھست انت ءُ ھرچ وھد ءَ جاورانی ھساب ءَ آئی ءِ کرد مٹ بوھان ھم بیت ءُ ھے وڑ ءَ ترامگیج وت ھم مٹ بوان بنت مادی جاورانی ھساب ءَ نوکیں ترامگیج اڈ بوان بنت،کوھنیں ترامگیج چیر ترّان بنت ءُ وھد ءِ پجیگ ءَ ھلاس بوان بنت ھمے وڑ ءَ چاگردی راستی ھم مٹ بوان بنت ءُ لس مھلوک ءِ لیکہ ءُ جیڑگ ءِ داب ءِ سر ءَ ھم سان کپان بیت ءُ جیڑگ ءِ دْروشم ھم مٹ بنت-

بُندر ءَ چاگرد ھمے ترامگیجانی نام انت دراھیں چاگردی ترامگیج یک دومی ءِ گون ءَ ھمگرنچ انت یکے اگاں نزور ترّ ایت گڑا دومی ءِ سر ءَ اوں سان کپ ایت، ھمے وڑ ءَ یکے اگاں شر بیت گڑا دومی ءِ سر ءَ ھم شریں سان دور دنت اے ھبرانی نز آرگ ءَ پد مُچّی ھساب ءَ چاگرد ءِ چارگ ءُ ٹپّاسگ، مردمانی جیڑھاں گوں ھم دپ بوھگ ءَ پد، آیاں درشان کنگ ءُ گشینگ گیش ارزان تر بوھان بوت-

بلے اے راھبندانی ٹھینگ چو ارزان نہ بوتگ کہ چو پیش دارگ یا گْوشگ بیت چاگرد گوں وتی ٹھنتگیں راستیاں بندوک بنت کْوھنیں دودانی مٹ کنگ یا نوکیں ھبر ءِ دیم ءَ آرگ چو ارزان نہ بوتگ. کوھنیں دود کہ لس مھلوک ءِ واست ءَ ازاب جوڑ بنت، یا یک ھاسیں تبکے ءِ پلّامرزیءَ پہ کارمز کْنگ بنت، گڑا جاور وت مردماناں سکین دے اَنت کہ آ کوھنیں ءُ بُندری ءَ زوراکیں دودانی سر ءَ جُست چست بکن انت یا جاور وت یک انچیں مارشتے ودی کن انت کہ لس مھلوک وتی ایمنی ءِ واست ءَ نوکیں راہ ءُ راھبند اڈ دیگ ءِ جہُھد ءَ بنا کنت-

اے مارشت ھموک لس مھلوک ءِ اندر ءَ چست بنت بلے لھتیں مردم اے مارشتاں سرپد بوت نہ کن انت لھتیں مردم سرپد بوت کن انت بلے ایشاں درشان کت نہ کن انت. لھتیں مردم ترس ءِ آماچ بنت ءُ اے مارشتاں وتی اندر ءَ کُشنت ءُ بگند ئے وت ءَ تسلّا دے اَنت کہ اے مارشت راست نہ اَنت-

بلے لھتیں مردم اے مارشتاں درشان کن انت نوکیں جُست چست کن انت ءُ دیم ءَ کار اَنت کوھنیں راھبندانی سر ءَ نگد کن انت یک کردیے ءِ واھُند بنت چیزّاں بدل کنگ ءِ جُھد ءَ کن انت ھما راھبند کہ لس مھلوک ئِے ازابانی آماچ کتگ، آیانی ھلاپ ءَ آشوبی لیکہ دے اَنت ءُ مٹّی ءِ جار ءَ جن انت. مھلوک ءَ سرپدی دے اَنت ءُ آیانی ترس ءَ ھلاس کن انت-

اے پیمیں مردم ھما تبکّ ءِ مردماں نادوست بنت کہ ترامگیجانی سر ءَ آیانی مستری انت ءُ کوھنیں راھبند ءُ دود ایشانی وشھالی ءُ ایمنی ءِ پھازگ کنگ ءَ انت پمیشکا اے وڑیں مردم مُدامی وتی اھد ءَ بزّگء ُُُلاچار کنگ بنت اے مردم دودانی لگت مال کنوک گْوشگ بنت ءُ الیٹ تبک (elite class) ءُ سٹیٹس کو ءِ (status-co) ٹھنتگیں راھبند ءُ کانود ءِ آماچ بنت. مزنیں زوراکیانی آماچ کنگ بنت ءُ جُھد کْنگ بیت کہ اے ھاموش کنْگ بِہ بنت-

بلے اے ھاموش نہ بنت ایشاں زوراکی گیش توانا کنت ءُ ایشانی توار گیش برز تر بیت اے جنگ کن انت اے سرگْوستگیں مردم انت کہ وتی ساہ ءِ پرواہ ءَ نہ دار اَنت. پرچی ءَ کہ اے مرچیگیں ناں باندات ءِ مساپر انت. ایشاں آوکیں راج ءِ بیرک بڈّا انت پمیشکا انوں بگند ئے اے مردم ایر جنْگ بہ بنت، ازابانی آماچ کنْگ بہ بنت، تُن ءُ گژن بسّگ انت بلے آوکیں پدریچ ایشاں وتی بامرد (hero) گْوش ات. پرچی ءَ کہ ایشاں ھمایانی جنگ کتگ. ھمایانی واست ءَ وتی ھون ریتکگ انت-

اے وڑیں بامرد ھرچ چاگرد ودی کنت بلے ھمْک چاگرد ارزانی ءَ وتی بامرداں پجّا نیار ایت ھما چاگرد کہ ھمینچو زوت وتی بامرداں پجّا کار ایت، آیانی لیکھاں گوں مھر کنت، آیانی ھمراھداری ءَ کنت، آ چاگرد ھمینچو زوت ءُ ھمینچو ارزانی ءِ گون ءَ دیم ءَ ودّ اَنت-

ھما چاگرد دیم ءَ ودّ انت کہ اود ءَ راستی چہ پیسر ءَ ٹھینتگ مہ بیت. اود ءَ چاگردی راستیانی (social facts) سر ءَ جُست چست کنگ بہ بیت. اود ءَ سیاسی کماش ءُ اگدھدارانی سر ءَ نگد کنگ ءِ موہ دیگ بہ بیت، یا نگد کنوک ءُ جُست چست کنوکانی پلامرزی کنگ بہ بیت اود ءَ نیکراھی لیکھانی سر ءَ جُست چست کنوک ایر جنْگ مہ بنت. اود ءَ پگر، زانت، لبزانک ءُ آرٹ پہ راستی ءِ پد جنْگ ءَ کارمرز کنْگ بہ بنت. گڑا میزاں میزان ءَ آ چاگرد ءِ نزوریں راھبند ءُ ھما دود کہ پہ تاکت ءُ تُرس مردمانی سر ءَ پرمُشگ بوتگ انت، چیر ترّان بنت ءُ نوکیں راستی دیم ءَ آیان بنت ءُ پد ءَ چاگرد ءِ واست ءَ دیمروئی ءِ راہ پچ بوھان بنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: کِرد مان اَنت

نبشتہ کار: وسیم وپا

دی بلوچستان پوسٹ

زندگی ءِ تھ ءَ چوناھا مردم گوں انچیں کِسّھاں دچار کپ اِیت کہ آ چہ کردار ءَ پُر اَنت ھمے کرد ھمے کِسّہ کہ زندگی ءِ بھر اَنت یک کارستے ءَ گوں دوچار کپتگ اَت آں ھمیشی ءَ نبشتہ کنگ لوٹ آں کہ پہ راج ءَ وت ءَ را ابدمان ئِے کُت ۔

یک شپے سنگتے ءِ لوگ ءِ پیژگاہ ءَ لھتیں سنگت نشتگ اَت، دیوان مزن اَت کندگ ءُ مسکرا اَت کسے نہ کسے وڑے نہ وڑے ءَ دَزگٹ اَت پیرَک گوں سئے سنگت  ءَ ٹُلّو ءِ گوازی ءِ جَنَگ ءَ گلائیش اَت من بس ھمے گوازی ءِ ندارگ ءَ چارگ ءَ اتاں ھمے دمان ءَ پیرک ءِ کر ءَ پونے اَتک گڑا گُشت ئِے گْونڈل نند منی جاگہ ءَ من انوں کایاں ، پد ءَ پہ بچکندے گُشت ئِے کہ بلے اشانی ڈارھاں نیلئے سُرگ ءَ۔ من پسہ دات ھھھھھ بے پگر بو، پیرک پاد اَتک ءُ شت لوگ ءِ کشی نیمگ ءَ لھتیں دمان گوست پد ءَ گوازی وتی سیمسر ءَ رس اِتگ اَت پیرک  پون ءَ گوں گپ ھلاس کت ءُ آتک منی کر ءَ نشت  ءُ اے  گشت ئِے کہ واہ بھئی شما پلانی زئی ءِ ڈارہ نیشتگ اَنت روگ ءَ ھمے وڑ ءَ لھتیں دمان گوست ءُ گوازی ما کٹ اِت ءُ پد ءَ سنگتے ءَ گشت کہ بیا اِت پد ءَ دگہ یک گوازی یے کنیں آ دگہ سنگتاں گشت یار بس انت دمبرتگ من پاد آتک ءُ شت آں آپے ءِ ورگ ءَ آپ وارت ھما پیسریگیں جاگہ ءَ نشت آں، پیرک ءَ دست منی سر ءَ سمارت ءُ گشت تو چیا وتی موداں تیل نہ جن ئے من گشت پیسر ءَ چوناھا جتگ اَنت نوں بلے دیر اِنت کہ تیل کارمرز نہ کرتگ چیا زاناں پیرک ؟ گش اِیت سک شوک اَنت بلے وتی موداں ھُشکی ءَ میل کہ پد ءَ چہ تھا تاک تاک بنت پْرش اَنت تیل اِش بہ جن
من پسہ دات شر اِنت نوں جنان اِش۔

دیوان ءَ سنگت برے یک سرھالے ءِ سر ءَ گپ ءَ اَت اَنت دیوان ھم ھلاس بوان اَت  “کندیل تمامیں شھر ءِ مران اَنت یک یک ءَ” سنگت ھرکس یک ءَ یک ءَ وتی لوگاں روان اَت اَنت من ھم پاد آتک ءُ جنزان بوت آں دیم پہ وتی لوگ ءَ چیزے روچ گوست پد ءَ من شھر ءِ نیمگ ءَ شت آں  لھتیں ماہ ءَ پد ھمانگر شھر ءِ نیمگ ءَ داشت ، پد ءَ آتک آں میتگ ءَ، میتگ ءِ جاورانی تھ ءَ بدلی اَتکگ اَت سنگتانی دیوان ءُ گند ءُ نند ھم برجاہ اَت بلے گوش ئے پیسریگیں وڑ ءَ نہ اَت لھتیں سنگت گندگ نہ بوت پیرک ھم اود ءَ نہ اَت دو سے روچ گوست من سنگتے ءَ را جست کرت یار پیرک درا نہ بیت؟ گشت ئےِ کہ دیر اِنت سپر ءَ شتگ من پسہ دات ھاں شر چو بہ گُش وھد گوزان اَت لھتیں ماہ گوست یک روچے من ءَ مردمے ءَ پون کرت جوڑی ڈڈی ءَ پد گشت ئِےِ کہ باریں ھال کن پروم ءَ انچو ھال اِنت کہ جنگے برجاہ اِنت ءُ سنگت ھمے جنگ ءِ تہ ءَ اَنت ءُ باریں ھالے بہ گر منا ھال دئے، من پسہ دات اللہ ھیرے بیار اِیت کئی زئی اَنت؟ گشت ئے پیرک اِنت گوں سنگتاں من آئی ءِ پون کٹ کرت پیرک ءِ نمبر منا گون نہ اَت اے وھد ءَ گڑا گلاب ءِ نمبر جت تاں رِنگ رَوگ ءَ اِنت چست ئِے کرت من ھلو کرت بلے چہ اود ءَ ھچ توار نہ اَتک۔ سئے چار رنداں ھلو کرت تاں ھچ گُشگ ءَ نہ اِنت من کٹ کرت پد ءَ نمبر جت تاں انگت ھچ نہ گش اِیت پد ءَ کٹ کرت دگہ سنگتے ءِ کر ءَ پون کرت کہ باریں چوشیں ھالے شنگ اِنت گُشت ئِے ھؤ راستے سنگتانی ءُ لشکر ءِ جنگ برجاہ اِنت لشکر ءَ درسیں راہ ءُ در بستگ اَنت سنگتانی چپ ءُ چاگرد اَنگّر کرتگ لھتیں ساھت گوست سنگتانی شھیدی ءِ ھال شنگ بوت۔

چمانی ارس دارگ نہ بوت اَنت چماں ارسانی گوارگ بندات کرت یاد اَتک اَنت ھما دْراهیں کسّہ کرد مان اَنت ءُ بس کسّہ جوڑ بنت ءُ ابدمان بنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سبین محمود ءِ کوش بلوچستان ءِ سر ءَ گپ جنوکیں توار ئِے ایرموش کنگ بوتگ – ماما قدیر بلوچ

سبین محمود ءِ شھیدی بلوچستان ءِ توار ءِ ھلاس کنوکیں توار ئِے ایرموش کنگ ات، دیمروئی لوٹوکیں چاگردی باسک سبین محمود ءَ لاھور ءَ پشت کپتگیں کارے سرجم کنگیں ڈبہ وتی کوپگاں زرتگ ات ءُ کراچی ءَ رژناہ پگر سیاسی ءُ ادبی چست ءُ ایراں ءُ وتی بنجاہ ءَ بلوچستان ءِ سر ءَ ھاموشی ءِ ھلاس کنگ ءِ ھاتر ءَ گپ باوست ءِ سرجم کُت –

وائس فار بلوچ مسنگ پرسنز ءِ رھشون ماما قدیر بلوچ ءَ وی بی ایم ایم پی زھرشانی بنجل ءَ اے ھیالانی درشانی کت – بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ مروچی چار ھزار دوسد ءُ نود ءُ چار روچ سرجم بوتگ –

ماما قدیر بلوچ ءَ دیمتر ءَ گوشتگ کہ آ مراگش ءِ اولی بھر ءَ جست ءُ پسو سیشن بوت، سبین محمود وتی اے واھش ءِ سر ءَ سک باز وش ات کہ آئی ءَ ھما مراگش لاھور ءَ کرت نہ کتگ ات آئی ءَ سوبمند کنگ ءَ سوبین بوت –

ماما قدیر بلوچ ءِ گوشگ ات کہ شھید سبین محمود ءَ ترس بیھار دیگ ءَ پد ھم بلوچستان ءِ ھاموشی ھلاس ءِ کنگ ءِ جُرت کرت ھمے ھاتر ءَ آ کُشگ بوت-

آئی ءِ گوشگ ات کہ سبین محمود مدامی بیھار دیگ بوت آ پھریز کنگ ءِ ھاتر ءَ ھم گوشگ بوت بلے سبین ءِ پسو ھمیش ات کہ یکی وَ الم جنگ کنگی انت آ سرپد ات کہ آ یک ھنیچیں پرز ئِے پیلو کنگ ءَ انت کہ آئی ءِ سزا مرگ انت بلے سبین محمود ءَ وت ءَ مدامی وتی دیمروئی لوٹوکیں آشوبی سنچ ءُ سما ءِ دیم ءَ پسو یک رندے مِرگ ءُ راجدپتر ءَ مدامی ابدمان بوگ ءِ راہ گچین کت-

دومی نیمگ ءَ ماما قدیر بلوچ ءَ وتی شنگ کرتگیں تامری درشان ءَ گوشتگ کہ باندا دو شمبے ءِ روچ ءَ شال ءَ ھوشاپ ءِ وئیل ءِ بگیری ءَ بلوچ یکجھتی کمیٹی شال ءِ نیمگ ءَ زھرشانی کنگ بیت کہ وی بی ایم پی ھم ھوار بیت –

ماما قدیر بلوچ ءِ گوشگ ات کہ ھوشاپ وئیل سک باز دردناکیں وئیلے، اشی ءَ پیش ھم بلوچستان ءِ تہ ءَ پوجی کارمنداں امیر مراد ءِ وڑیں گونڈلانی گون ءَ زیادھی کتگ – اے درگت ءَ ما پیش ءَ ھم گپ جتگ – بانداتگیں زھرشانی ءَ کلیں مردم بھر بہ زور انت اے وئیلے بگیری ءَ وتی انگیز ءِ درشانی ءَ بہ کن انت –

گیشیں ھالانی رِد ءَ بلوچستان ءِ بنجاھی شھر شال ءُ مستونگ ءَ تیرگواری وئیل ءَ دو مردم بیران ءُ بازینے زدگ بوتگ وھدیکہ بیلہ ءَ دگ ءِ وئیل ءَ شھدربرجاہ ءِ پرنسپل ءِ بیران بیتگ –

گیشیں ھالانی رِد ءَ بلوچستان ءِ دمگ بیلہ ءَ دگ ءِ وئیل ءَ سرکاری شھدربرجاہ ءِ پرنسپل بیران بوتگ –

ھالانی رِد ءَ سرکاری شھدربرجاہ بیلہ ءِ پرنسپل پروفیسر نگھت سلطانہ مروچی شھدربرجاہ ءِ روگ ءِ وھد ءَ دگ ءِ وئیل ءِ آماچ بوتگ ءُ بیران بوتگ –

زانگ بہ بیت گوستگیں ھمے ھپتگ ءِ بلوچستان ءَ اے دومی وئیل انت کہ وئیل ءَ دربرجاھانی پرنسپل بیران بوتگ اشی ءَ پیش وڈھ وہیر ءَ دگ ءِ وئیل ءَ انٹر کالج وڈھ ءِ پرنسپل غلام نبی بلوچ بیران بوتگ ات –

دومی نیمگ ءَ مستونگ ءِ دمگ سورگز ءَ بدزوئی ٹک ءِ دو ٹولیانی میان ءَ جنگ ءُ چوپ ءَ تیرگواری وئیلے ءَ دو برات بیران بوتگ اَنت-

ٹپی بوتگیں مردمانی پجار عبدالمجید ءُ عبدالمنان ءِ ناماں چہ بوتگ انت – وئیل مروچی دبوج ءِ میان ءَ دیم ءَ اتکگ ھمے گوشگ بوگ ءَ انت کہ اشانی پیشی زاتی دژمنی یے بوتگ –

ھمے وڑ شال ءَ شاپنگ سنٹر ءِ بند کنگ ءِ جھد ءَ پولیس ءِ تیر گواری ءَ بازیں کاردارے ٹپی بیتگ –

اھوالکارانی رِد ءَ ھارون سنٹر ءِ بند کنگ ءِ جھد ءَ پولیس ءِ کارمند ءِ تیرگواری ءَ بازیں مردمے زدگ بوتگ، زدگ بوتگیں مردم نادراہ جاہ ءَ سر کنگ بوتگ انت –
ھمے گوشگ بوگ ءَ انت کہ مروچی لاک ڈاؤن ءِ سوب ءَ بازیں دکان ءُ شاپنگ سنٹر ءِ بند کنگ بوتگ اَنت- ھارون سنٹر ءِ زورانسری بند کنگ ءِ میان ءَ پولیس ءِ کارمند ءِ تیرگواری ءَ بازیں دکان دار ءُ کار دارے ٹپی بوتگ اَنت –

سربوتگیں ھالانی رِد ءَ گوستگیں شپ ءَ تربت ءِ دمگ آبسر کولوائی بازار ءَ ناشناسیں سلاہ بندیں مردماں وارث ء سید محمد ءُ داد جان ء ابوبکر تیرباران کُتگ ءُ کشتگ انت –

ھمے گوشگ بوگ ءَ انت ھردو مردم ریاستی ڈیتھ اسکواڈ ءِ کارمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ ھردوکانی کوش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ تربت ءِ دمگ آبسر کولوائی بازار ءَ زورگیریں پاکستانی پوج ءُ چیریں ادارھانی سرپرستی ءَ برجاھیں ڈیتھ اسکواڈ ءِ دو کارمند تیرباران کتگ ءُ کشتگ اَنت –

جارکش ءَ گوشتگ کہ سرمچارانی اُرش مُرتگیں وارث ء سید محمد زامرانی ءُ داد جان ء ابوبکر جھمنند پروم دژمن ءِ گون ءَ ھوار بوتگ ءُ بلوچ ورنایانی آوار جنی، جھدکارانی راھانی نشاندھی کنگ ءُ لشکر کشیاں دژمن ءِ کمک کنگ ءِ وڑیں کتکاریاں دست ءِ مان بوتگ انت ھمے ھاتر ءَ نشانگ کنگ بوتگ انت –

جارکش گوشتگ اے مردم گوستگیں روچاں ءَ زامران ءَ بلوچ جھدکارانی راھانی بندگ ءَ ھم ھوار بوتگ انت – وھدیکہ وارث دوھزار چاردہ ھم سنتیں گل ءِ اُرش ءَ مرتگیں ڈیتھ اسکواڈ ءِ کارمند دوستو ءِ ھمراھی ءَ بلوچ راجی زرمبشت ءِ بگیری ءَ پُرکار بوتگ –

آئی ءَ گوشتگ کہ بلوچ لبریشن آرمی دژمنیں پوج ءُ چیریں ادارھانی سرپرستی ءَ بلوچ راجی زرمبشت ءِ بگیری ءَ کارکنوکیں ڈیتھ اسکواڈ ءِ کارمندانی سر ءَ اُرشانی تہ ءَ ترندی آرگ بیت – لس مھلوک چہ اشاں دور بہ بنت –

دشت کھیر کور ءَ شش پوجی کارمندانی سر ءَ اُرش کُتگ ءُ سے کارمند کُشتگ اَنت – میجر گوھرام بلوچ

سربوتگیں ھالانی رِد ءَ مروچی یکشمبے ءَ ناشناسیں سلاہ بندیں مردماں دشت ءِ دمگ سندان ءَ پاکستانی پوج ءِ سر ءَ اُرش کتگ –

اُرش سندان ءِ دمگ کھیر کور ءَ ھما وھد ءَ کنگ بوتگ کہ پاکستانی پوجی وتی پانگس ءَ در اتکگ ءُ دیم پہ کور ءَ رؤگ ءَ بوتگ انت اُرش ءَ پاکستانی پوج ءَ جانی تاوان رس اتگ ءُ سلاہ بندیں مردم در آیگ ءُ رؤگ ءَ سوبین بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں مروچی سُھب ءِ ادار ھپت ءَ کیچ ءِ دمگ دشت سندان “کھیر ءِ کور” ءَ شش پاکستانی پوج ءِ کارمندانی سر ءَ ھما وھد ءَ اُرش کتگ کہ آ وتی پانگس ءَ در اَتکگ اَنت ءُ دیم پہ کور ءَ آپ ءِ پُر کنگ ءَ رؤگ ءَ بوتگ اَنت-

جارکش ءَ گوشتگ کہ شش پوجیانی تہ ءَ سَے ھما جاہ ءَ مرتگ اَنت ءُ آ دگہ سئیں دیم پہ پانگس تتکگ ءُ شتگ اَنت-

گُڈسر ءَ جارکش ءَ وتی درشان ءَ گوَشتگ کہ زورگیریں پاکستانی پوج ءِ سر ءَ مئے ارش بلوچستان ءِ آجوئی ءَ تاں برجاہ مان اَنت-

بلوچ یکجھتی کمیٹی ءِ نیمگ ءَ ھوشاپ ءَ جنسی زوراکی ءِ ھلاپ ءَ شال ءَ زھرشانی کنگ ءِ جار پِرینتگ ءُ گوشتگ کہ ھوشاپ ءِ وئیل سرجمیں بلوچستان ءَ لشکریانی ھما بے ھودیں چھرگ اِنت کہ ھروھد ءَ چیر دیگ بیتگ اَنت –

درشانی ءَ گوشگ بیتگ کہ ھوشاپ وئیل ءَ ھواریں کارمند ھنچش پہ نام دزگیر کنگ بیتگ بلے بلوچستان ءَ اے وڑیں ھزارانی کیس ھست اَنت کہ آیاں جرمانی تکاں ھوار نہ گیج اَنت ءُ بلکیں سرجمی ءَ آیاں مھار گُٹ ءَ دیگ بیتگ کہ آ بلوچستان ءَ ھرچی کُت کن اَنت آ میر ءِ شِنک اَنت –

آئی ءَ گوشت کہ بے ھودی ءِ آماچ بیتگیں مراد امیر ءِ مات ءِ رد ءَ ھوشاپ ءَ پنچمی وئیل اِنت کہ مردمانی دیم ءَ بیگ ءَ اَنت بلے ترس ءُ لَج ءَ اے وڑیں وئیل چیر داتگ ءُ بے تواری ءَ نشتگ اَنت،پاکستانی پوج ءَ بلوچ راج ھزاراں سالانی لَج ءَ ناوشیں رنگے ءَ پامال کنگ ءَ اِنت کہ گیش اوپار کنگ نہ بیت اِنت –

جارکش ءَ گوشت کہ بلوچستان ءَ وھدیکہ پوج ءِ اے وڑیں بے ھودیانی سر ءَ توار چِست کن ئے گڑا آ پُرزوری ءَ کیت ءُ رسانکدرانی دیم ءَ کُتگکار ءَ دزگیر کنت ءَ آئی ءَ سزا ءِ بھتام ءَ ھُنر سازی ءَ بندات کنت راستی ءَ بلوچستان ءَ پوج چریشاں ابید ناوش تِریں کارپداں ھوار اِنت بلوچستان ءَ ھزارانی سیاسی باسک ءُ بے میاریں مردم شھید کنگ بیتگ اَنت، وھدیکہ مروچی اے جُرم ءَ دزمانجنیں یک مردمے ءَ سزا دیگ نہ بیتگ اَنت، بلوچستان ءَ گیشتر پوج امیر مراد ءِ وڑیں وئیلاں ھوار اِنت بلے اے وڑیں بےھودیانی سر ءَ سزا دیگ ءَ ابید آیاں اے وڑیں کارپداں دلبڈی دے اَنت –

جارکش ءَ بلوچ راج ءَ گپ کنان ءَ گوشت کہ اے وئیل ھما منانک اِنت کہ پوج ءِ دستاں بلوچستان ءَ کس پھریزی نہ اِنت بلے مئے بے تواری ءِ سوب ءَ اے وڑیں وئیلانی کنگ ءَ ترس نہ بیت اِنت اگاں گیش بے توار بیت اِنت گڑا اے مردم چریشی ءَ گیش باندا چوشیں جاورھال مئے سر ءَ کپ اَنت نِی وھد اتکگ کہ پاکستان ءَ ھوار دنیا ءَ اے وڑیں وئیلانی بارہ ءَ سرپدی دیگ بہ بیت -مئے بے تواری بلوچ راج ءِ بیرانی بیت کُت کنت، بلوچستان ءَ اے اولی کھول نہ اِنت پوج ءِ بے ھودیانی نشانگ ءَ اِنت ایشی ءِ چیر ءَ ابید توار بُرز کنگی اِنت –

درشانی ءَ گوشگ بیتگ کہ شال ءَ ھواریں بلوچ راج ءُ دراھیں تکاں بندوکیں مھلوک ءَ گوں دزبندی اِنت باندا بیوکیں زھرشانی ءَ بھر بہ زور اَنت اے بے ھودی ءِ ھلاپ ءَ توار ءَ برز بہ کن اَنت اشی ءِ ھمراھی ءَ چاگردی رسانکجاھاں دراھیں انسان دوستاں گوں دزبندی اِنت #BalochKidRapefByFc ھیش ٹیگ ءَ کارمرد بہ کن اَنت ءُ پوج ءِ اے وڑیں گیر انسانی کارپداں مھلوک ءِ دیم ءَ آشنا بہ کن اَنت –

آزمانک: چمّ گناہ کار اَنت

نبشتہ کار : بی، کے بلوچ

دی بلوچستان پوسٹ

شپ سَکّ سَرد اَت پانزدہ دسمبر دوھزار ءُ بیست ءِ یک سَکّیں سارتیں شپے اَت من ءَ بس ءِ کلینڈر ءَ واب ءَ چِہ پاد کُت سنگت او سنگت پادا، پادا تئی جاگہ رس اِتگ کیلنڈر مُکّینگ ءَ اَت من ءَ اَنچوش گُمان بوت آئی ءِ زُبان گَٹّگ، دَدّ کنگ،اڑگ ءَ اَت، من زیت زیت ءَ وتی چَمّانی پچ ساپ کُت اَنت وتئی گْوانکو ءَ وھد چار اِت وھد شپ ءِ چار ءُ نیم اَت من جیڑ اِت اے بس ءَ من ءَ سک زیت آؤرتگ، بَلے ھیر من وتی بیگ بڈّ ءَ جَت ایر کَپت آں چَہ بس ءَ سَکّ تھار اَت اَنگت شپ اَت!-

کراچی ءِ زیرو پوائنٹ ءَ من سَر بیتگ اِت آں چد ءُ پیسر ھم من چَہ جاوید ٹرانسپورٹ ءَ سپر کُتگ بَلے بِھ چوش زیت بس نیتکگ اَنت پد ءَ من جیڑ اِت بیت کنت زمستانی شپ اَنت مَزَن اَنت ھمے واست ءَ بس زیت اتکگ ، زیرو پوائنٹ ءِ ھوٹل ءِ مردم بیت کن اَنت وتی ھوٹل ءِ تہ ءَ وپتگ اَنت ڈَنّ ءَ ھچ نیست اَت ڈَنّ تْرسینگ ءَ اَت یک کُچکے دَگ ءِ نیم ءَ وپتگ اَت من ھمے زیرو پوائنٹ ءِ ھوٹل ءِ کاپَر ءِ چیر ءِ تھت ءِ سَر ءَ وتی بیگ سَر ءِ چیر ءَ کُت تچک بیت آں واب ءَ گپتگ اَت بَلے سَکّ سَرد اَت سَردی واب ءَ نیلگ ءَ اَت من جیڑگ ءَ اِت آں شالکُوٹ “کوئٹہ” ءِ بس سُھب ءِ دَہ ءُ یازدہ ءَ کاینت اِد ءَ زیرو پوئنٹ ءَ سَر بنت واب وَ من ءَ نیایگ ءَ اِنت گُڑا مردم چے بہ کنت اے ساھت ءَ چہ پیم ءَ کارمرز بہ کنت ھمے جیڑگانی تہ ءَ من ءَ وتی ھما سنگت ءِ ھیال اَتک کہ آ دو ھزار ءُ نوزدہ ءَ شھید بیتگ اَت آئی ءَ گون من یک کِسّھے کُتگ اَت من جیڑ اِت پرچَا وتی ھما سنگت ءِ کِسّہ ءَ نبشتہ مَہ کن آں اے ھاموشی پد ءَ من ءَ بِھ نہ رَس اِیت کِسّہ ءِ وشتریں وھد ھمیش اِنت گُڑا من سگریٹے روک کُت گْوانکو چَہ کیسّگ ءَ کش اِت نبشتہ بِندات کُت منی سنگت ءِ کِسّہ چوش اے وڑ ءَ اَت آئی ءَ گُشتگ اَت کہ آئی ءِ لوگانی نزدیک ءَ کساس دوکلومیٹر چہ دیر ءَ یک جَنکانی دینی وانگجاھے ھست ھمے وانگجاہ ءَ یک جَنکے کرآن “قرآن ” شریپ ءِ وانگ ءَ کیت جَنک سرجم ءَ پردہ ءَ اِنت بَلے تھنا دِیم ئِے ڈَنّ ءَ اِنت جَنّک سَک شَرنگے اَت گُڑا من ھر وھد ءَ آئی ءِ وانگجاہ ءِ وھد ءَ راہ ءِ سَر ءَ نشتگ آں پرچَا کہ آ من ءَ دوست بیتگ ءُ من ءَ ھچ تْرس ھم نہ بیتگ پرچَا کہ آئی ءَ دگہ بْرات ءُ گُھار ھچ نہ بیتگ آ وتی مات ءُ پتانی یکیں جَنّک بیتگ پد ءَ شَرنگے بیتگ وتی لوگ ءِ لَڈوک بیتگ گُڑا من یک روچے ، روچ دو ءِ ساھت ءَ وانگجاہ ہ راہ ءِ سَر ءَ اوشتات آں من اے روچ ءَ دِل کُتگ اَت کہ مرچی اَلّم گوں جَنّک ءَ وتی دِل ءِ گپاں گْوش آں کہ تو من ءَ دوست بہ ئے بے کِساس دوست بہ ئے ھمے جیڑگ ءِ تہ ءَ من دیست نسرین پیداک اِنت نسرین ھمے جنک ءِ نام اِنت گُڑا منی نزّیک ءَ اَتک سَر بوت منی دِل ءِ رپتار تیز تر بیان اَت داں کہ نسرین اَتک منی کِرّ ءَ من تَوار کُت نسرین، نسرین ،بوشت من ءَ گپے گْوشگی اِنت ترا بس دو دمان! نسرین : بہ گْوش ھاں چے گْوشگی اِنت ترا زیت بہ گْوش من ءَ روگی اِنت وانگجاہ ءَ تنویر: تو،تو، نسرین : چے تو، تو ، بہ گْوش تو چے گْوشگ لوٹ ئے ؟ تنویر: من نہ زان آں چہ پیم ءَ بہ گْوش آں ھو تو من ءَ دوست بہ ئے آ دگہ گپ من اے کاگز ءَ نبشتہ کُتگ اَنت تو بہ وان ئِے گوں من ءَ اے ساھت ءَ باز گپ نہ بیگ ءَ اِنت اے ساھت ءَ تو بُرو تئی وانگجاہ ءِ وھد اِنت نسرین ءَ کاگز دست گپت راہ کپت دِیم پہ وانگجاہ ءَ ، تنویر ءَ دِل ءَ جیڑگ ءَ اَت باریں چے بیت وتی پت ءَ ھال مَہ دَنت جاور ھراب مَہ بنت آ سَکّ پریشان اَت آئی ءِ تیوگیں شپ پَہ جیڑگ ءَ گوست بَلے سُھب ءِ دَرگت ءَ آ واب کپت وھد ے سُھب ءَ چَہ واب ءَ پاد اَتک گُڑا اولی سَر ءَ مات ءِ کر ءَ شت جُست ئِے کُت اماں اِد ءَ کس نیتکگ مات ءَ گْوشت ھو بلے تئی سنگت نوید اَتکگ گْوشت ئِے تو واب ءَ پاد کائے بہ گوش ئِے بْیا لیبجاہ ءِ سَر ءَ مرچی لیب اِنت اِناں نوید ءَ نہ گْوشگ ءَ آں دگہ کس نیتکگ مات ءَ گْوشت دگہ کئی جُست ءَ ئے تو، ساپ ،ساپ بہ گْوش تو کئی جست ءَ ئے ھچ ھچ من کسی جُست ءَ نہ آں آ ھمے زانگ لوٹگ اَت باریں زیکیں جیڑہ ءِ سَر ءَ ھچ نوکیں گپ نہ بیتگ مات ءَ گْوشت برو جان بہ شود ورگ بہ وَر آئی ءَ جان شُشت ورگ وارت وتگِند ئِے چالو کُت تامر” فلم ” ءِ چارگ ءَ لگ اِت نسرین ءِ وانگجاہ ءِ وھد نزدیک بوت شت راہ ءِ سَر ءَ ئِے اوشتات دیست ئِے نسرین پیدک اِنت نسرین نزدیک ءَ اَتک تنویر ءَ را کاگزے دات ئِے کاگز ءَ نبشتہ اَت تو ھم من سک ءَ دوست بہ ئے گنوک اے کاگز ءِ وھد نہ اِنت گْوانکو ءِ وھد اِنت منی لمبر ھمیش اِنت من شش ءِ ساھت چہ وانگجاہ ءَ دست ھُورک باں گُڑا من ءَ پون “فون” بپ کن تنویر سک گل اَت آئی ءِ دِل ءِ مُراد سرجم اِت اَنت!-

ھمے پون ءُ ھالانی تہ ءَ یک ماھے گْوست تنویر ءُ نسرین ھر روچ وانگجاہ ءِ پُشت ءِ کبرستان ءَ شت اَنت مگرب ءِ وھد ءَ نسرین ھر روچ دیر ءَ لوگ ءَ اتک پِت ءَ جُست کُت نسرین تو مرچاں دیر ءَ لوگ ءَ پیداک ئےنسرین ءَ گْوشت ھو ابّا وانگجاہ ءِ یک وانینوکے “معلم “کراچی ءَ وتی تیمّارگ ءَ شُتگ گُڑا من آئی ءِ جاگہ ءَ نودربراں وانینگ ءَ آں ھمے واست ءَ دیر بیت آیَگ ءَ بَلے راستی اے نہ اَت راستی اِیش اَت کہ نسرین وانگجاہ ءَ چہ دست ھُورک بیت گُڑا وانگجاہ ءِ پُشت ءِ کبرستان ءَ تنویر ءَ گوں باریں چے ،چے کنت یک راستی یے اِیش اِنت کہ تنویر ءِ سنگت ملا اکبر ءَ تنویر ءُ نسرین نِکاہ داتگ اَنت دگنیا سھی نہ اِنت نسرین ءُ تنویر مرد ءُ جنین اَنت من ھم سھی نہ بیتگ اِت آں اَگاں تنویر ءَ وتی مرگ ءَ ساری من ءَ ھال مَہ دات اِنت تنویر ءِ مرگ ءَ چِہ پد نسرین جنوزام اِنت بَلے تھنا نسرین زانت کہ آ جَنوزام اِنت ءُ من زان آں کہ نسرین جنوزام اِنت اے نِکاہ ءِ سوج تنویر ءَ نسرین ءَ داتہ بیتگ نسرین ءَ گُشتگ کہ بگیر ءِ نِکاہ ءَ تو درامدیں مردے ئے پہ من، ءُ اسلام ءِ تہ ءَ سرامد ءِ دِیم ءَ کَپگ ءِ اجازت نہ اِنت اِشکنگ ءَ نسرین ءِ پت ءَ نسرین ءِ سور گوں نسرین ءِ ناکوزتک لیاکت ءَ گوں کنائینگی اَت منی بس اَتکگ من روگ ءَ آں دِیم پہ شالکُوٹ “کوئٹہ” ءَ-

آئی ءَ کرسچن ھیگن ءِ جوڑ کُتگیں گڑیال چار اِت نماز ءِ وھد نزّیک اَت ،آ پاد اَتک ءُ ایڈی بوئر ءِ جوڑ کُتگیں جیکٹ ئِے گْور ءَ کُت ،ڈیملر ءُ میبج ءِ جوڑ کُتگیں موٹر سائیکل ئِے کَش اِت ءُ مسیت ءِ نیمگ ءَ شت آ مسیت ءَ رس اِت گُڑا ھالسے ٹیلر ءِ جوڑکُتگیں واٹر کولر ءَ چہ پلٹر کُتگیں ساپیں آپ ئِے وارت ءُ کلارکس والاینی چمپل ئِے کَش اِت اَنت دز نماز ءِ کنگ ءَ لگ اِت بینجامن موگن ءِ جوڑ کُتگیں گیزر ءِ سبب ءَ گرمیں آپ پیدک اَت آئی ءَ پہ دزنماز ءَ ھچ مشکل نیست اَت دزنماز ءَ رند آ مسیت ءِ توکی دروازگ ءِ نیمگ ءَ شت ءُ رابرٹ ھاومن ءِ جوڑ کُتگیں شیشگ ءِ دروازگ ئِے پچ کُت پد ءَ ایڈیسن ءِ جوڑ کُتگیں بلب ئِے روک کُت بینجامن پریکلن ءِ جوڑ کُتگیں دامچراگ ءِ چہ کمک ءَ بلب روژنا بوت مسیت ءِ تہ اَنچوش روژنا بوت گْوش ئے روچ ءِ سَبَب ءَ ڈَنّ ءَ اَنچوش روژنائی بیت پد ءَ مسیت ءِ تہ ءَ جا بجا پلپ ڈائل ءِ جوڑ کُتگیں وشگْوات لگ اِتگ اِت اَنت بَلے سردی ءِ سَبَب ءَ وشگْوات ئِے چالو نہ کُت اَنت دیم ءِ دیوالے ءَ کریر ءِ جوڑ کُتگیں سارتو ھم لگ اِتگ اَت ،بَلے آئی ءَ چارلس بیکر ءِ جوڑ کُتگیں ھیٹر روک کُت ءُ جیمزویسٹ ءِ جوڑ کُتگیں مائیکروپون ءِ سَر ءَ بانگ ءِ دیگ ءَ لگ اِت ۔

ایڈورڈ کیلنگ ءُ چیسٹر رائس ءِ جوڑ کُتگیں لاوڈ اسپیکر ءِ سَبَب ءَ آواز دور،دور ءَ تاں دْرستیں مسلماناں سَر بیگ ءَ اَت پد ءَ آئی ءَ چائنہ ءِ جوڑ کتگیں نمازیگ سَر ءَ نماز ئِے ونت ءُ دست ئِے دوا ءِ واست ءَ برز ءَ کُت اَنت گُشت ئِے یا اللہ کاپراں نیست ءُ نابود بہ کن ءُ مسلماناں کاپرانی سَر ءَ گلبہ بہ دے اے دوا ءِ اِشکنگ ءَ آئی ءِ ھردکیں کوپگانی سَر ءِ پرشتگاں کہ، کہ ،کہ کندگ بندات کُت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ کیچ ءِ بنجاھی شھر تربت کوشک ءَ مروچی دومی روچ ءَ مھلوک ءَ لینانی بندش ءِ ھلاپ ءَ زھرشانی کُرتگ –

زھرشانی کنوکاں چاہ سر ءِ کراس ءَ دگ بند کرتگ ءُ دگ ءِ سر ءَ ٹائر مانداشتگ ءُ دمگ ءَ روگ ءُ آیگی ءَ مھتلی ءِ جیڑہ بیتگ اَنت –

زھرشانی کنوکاں کیسکو ءِ واکدار ءُ سرکار ءِ ھلاپ ءَ اوگام جتگ ءُ گوشتگ کہ کوشک تربت ءِ یک کسانیں جاہ ئِے کہ اد ءَ سک گرم اِنت ءُ رمزان ءِ ماہ ءَ یازدہ ھزار تار بُرگ بیتگ اَنت –

آیاں گوشت: تارانی برگ ءَ پد مروچی پانزدہ روچ اِنت کہ لین نیست ءُ ما روچگداریں ءُ زالبول ءُ چک لُڑیں آپانی ورگ ءَ لاچار ءُ دبوج ءُ سھریاں ھم ناگیگی ءِ آماچ اَنت –

آیاں گوشت کہ یازدہ ھزار تارانی برگ ءُ ٹرانسپارم ءِ بند کنگ ءَ بل ءِ پُرکنگ ءَ مھلوک ھم آسرمند اَنت –

چریشی ءَ پد تھسلیدار شیر جان دشتی ءُ ایس ڈی او کیسکو مھیم بلوچ سر بیتگ ءُ زھرشانی کنوکیں مردماں دُچار کپتگ ءُ گند ءُ نند ءَ پد یازدہ ھزاریں تارانی جنگ ءُ گیر تارانی برگ ءِ شَور بندی بیتگ اَنت –

چریشی ءَ پد تھسلدار ءِ میان ءَ گپ ءُ تران ءُ سدکی ءَ پد زھرشانی کنوکاں وتی زھرشانی ھلاس کرتگ ءُ دگ پچ کرتگ –

زانگ بہ بیت بلوچستان ءَ بازیں جاھان لین ءِ نہ بیگ ءَ مھلوک ءِ نیمگ ءَ وھد وھد ءِ سر ءَ زھرشانی بیگ ءَ اَنت بلے لینانی سرجم کنگ ءَ سرکاری واکدار گامگیج گیندگ ءَ نہ اَنت –