TBP Balochi

سربوتگیں ھالانی رِد ءَ بلوچستان ءِ دمگ مند، بالگتر، ھرنائی، پنجگور، نوشکی ءُ خاران ءَ پاکستانی پوج ءُ ڈیتھ اسکواڈ ءِ کارمندانی سر ءَ اُرش کنگ بوتگ، چرے اُرشاں پاکستانی پوج ءَ جانی ءُ مالی تاوان رس اِتگ – اُرشانی زمّہ واری بلوچ آجوئی لوٹوکیں سلاہ بندیں گلاں منّ اِتگ انت –

بالگتر ءُ مند ءَ پاکستانی پوج ءِ سر ءَ بوتگیں اُرشانی زمّہ واری بی ایل ایف ءَ منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ مند ءُ بالگتر ءَ پاکستانی پوج ءِ سر ءَ بوتگیں اُرشانی زمّہ واری منّ اِتگ گوشتگ کہ گوستگیں شپ ءَ مئے سرمچاراں دمب بالگتر ءَ پاکستانی پوج ءِ پانگس ءِ سر ءَ دو نیمگاں راکٹ ءُ مزنیں سلاھانی گوما نشانگ کتگ- چریشی ءَ چہ پانگس تاوان بار بوتگ پوجی کارمندانی مرگ ءُ زدگ بوگ ءِ گمان ھست –

میجر گوھرام بلوچ ءَ گوشتگ کہ اے نوکیں پانگس ءِ بوتگ کہ پنچ روچ بوتگ لشکر ءَ جوڑ کتگ کہ پٹ ءُ پول ءِ نیمون ءَ مدام رھگوزی ءُ دمگی مردم دارگ بنت ءُ تنگ کنگ ءِ ھواری ءَ کم شرپ کنگ بوتگ انت –

میجر گْوھرام بلوچ ءَ دیمتر ءَ گوَشتگ کہ چار شمبے ءِ روچ ءَ مگرب ءِ وھد ءَ کیچ ءِ دمگ مند گیاب ءَ شھید سالم کوہ ءِ سر ءَ برجاھیں پانگس ءِ سنگر ءِ سر ءَ دور جنگیں توپک ءِ سر ءَ اُرشے کتگ ءُ یک پوجی کارمندے کشتگ – آئی ءَ گوشتگ کہ مئے اُرش داں سرڈگار ءِ آجوئی ءَ برجاہ مان اَنت –

بی ایل ایف ءِ جارکش میجر گوھرام بلوچ ءَ ھوشاپ وئیل ءِ درگت ءَ وتی درشان ءِ تہ ءَ گوشتگ کہ بلوچستان ءِ بستار یک زورگپیں دیارے ئیگ اِنت ءُ ایردستیں راج ءِ بگیری ءَ زورگیراں مدام چاگردی ءُ دودمانی میارباری نپسیاتی سلاہ ءِ دروشم ءَ کارمرز کتگ اَنت دانکہ ایردستیں راج ءِ مھلوک وتی دود، شرپ، لج ءُ ننگ ءِ سر ءَ اے وڑیں جُرمیں اُرشاں ءُ چاگردی سلکاریاں یکشلی کار سرپد بہ بنت ءُ وتی دود ءُ شرپ ءِ لپاشگ ءِ سر ءِ ھچ گوَشت مہ کن اَنت-

جارکش ءَ گوَشتگ کہ زورگیر ءِ نیمگ ءَ اے وڑیں میارباریں وئیل پہ زانت یکشلہ کنگ بوگ ءَ اَنت دانکہ آ وتی زور ءَ پیش بدار اِیت ءُ برجم بدار اِیت – چوشکہ ھوشاپ وئیل ءِ سر ءَ بلوچ راج پاد اَتک گڑا پاکستان لاچار بوت ءُ اے زمہ واری تھنا یک کارمندے ءِ سر ءَ لڈ اِت ءُ زورگیریں پوج ءَ بے میار کنگ ءِ جھد کنگ ءَ اِنت انچوش کہ حیات بلوچ ءِ کوش ءِ سر ءَ ایشاں کتگ اَت- اے وڑیں سلّیں کار شوربندی ءِ دِرچ ءَ مدام کنگ بوگ ءَ اَنت بلے ایشانی توک ءَ سک کم وئیلانی گپ دیم ءَ کیت ءُ پاشک بیت-

جارکش ءَ گوَشتگ کہ پاکستانی پوج ءُ آئی ءِ داشتگیں چریکاں بنگلہ دیش ءَ ھم ھمے وڑیں کار کتگ بلکیں چد ءُ گنتر کتگ- لکّانی کچ ءَ بنگالیانی کوش ءُ بدکاری ءِ سر ءَ تپاکیں راجانی گل ءَ میان استمانی واکدارانی بے تواری ءُ جنگی میارباری ءُ انسانیت ءِ بگیری ءَ میارباریاں پاکستانی پوج ءِ میارباریں کارمندانی جست گرگ ءِ بدل ءَ بے شرت ءَ یلہ کنگ ءَ چہ پاکستان ءِ میارباریں پوج ءَ گیشتر سکین رس اِت آئی ءِ سبوت ایش اِنت کہ نوزدہ سد ءُ ھپتاد ءِ دھک ءَ ءُ پد ءَ دوبر سال دوھزار ءَ چہ پاکستانی لشکر بلوچستان ءَ ھما سلکاریاں کنگ ءَ اِنت کہ نوزدہ سد ءُ ھپتاد ءُ یک ءَ آئی ءَ بنگلہ دیش ءِ توک ءَ کتگ اَنت-

گڈسر ءَ میجر گوھرام بلوچ ءَ درشان ءِ تہ ءَ گوَشتگ کہ تپاکیں راجانی گل ءُ میان استمانی واکدار پاکستان ءِ واستا وتی اڈ داتگیں شونداتاں دوبر چمشانک بدے اَنت اگاں ناں گڑا بلوچستان ءَ بنگال ءِ دروشم ءَ برجاھیں جنگی میارباری، انسانیت ءِ بگیری ءَ میارباری ءُ بلوچ ءِ چکچینی گنتریں دابے ءَ روان کن اَنت-

ھرنائی ءَ پاکستانی پوج ءِ پانگس ءِ سر ءَ بوتگیں اُرش ءِ زمہ واری ءَ بی ایل اے ءَ منّ اِتگ –

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کتگیں درشانے ءِ تہ ءَ پاکستانی پوج ءِ پانگس ءِ سر ءَ بوتگیں اُرش ءِ زمہ واری من اِتگ ءَ گوَشتگ کہ مئے سرمچاراں گوستگیں شپ ءَ ھرنائی ءِ دمگ گیچن ءَ زورگیریں پاکستانی پوج ءِ پانگِس ءِ سر ءَ اُرش کتگ-

جارکش ءَ گوشتگ اُرش ءِ آسر ءَ پاکستانی پوج ءَ جانی ءُ مالی تاوان رس اتگ آئی ءَ وتی درشان ءِ گڈسر ءَ گوشتگ کہ ما کول کن اِیں کہ زورگیریں پاکستانی پوج ءِ سر ءَ مئے اُرش داں سرڈگار ءِ آجوئی ءَ برجاہ مان انت –

پنجگور ءَ پاکستانی پوج ءُ دمگی ڈیتھ اسکواڈ ءِ سر ءَ بوتگیں اُرش ءِ زمہ واری بی آر اے ءَ مَنّ اتگ –

بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کتگیں درشانے ءِ تہ ءَ گوشتگ کہ مئے سرمچاراں مروچی سھب ءِ ادار یازدہ ءَ پنجگور ءِ دَمگ گوارگو ءَ سَراپ ءَ کُشندہ ٹولی ءُ پاکستانی پوج ءِ کارمندانی سر ءَ سنگر بستگ ءُ اُرش کتگ کہ لشکری کارمند لس پوشاک ءَ ھَندی ڈیتھ اسکواڈ ءِ کارمندانی ھمراھی ءَ کاروان ءِ دروشم ءَ سرمچارانی رندگیری ءَ کوھانی نیمگ ءَ روگ ءَ بوتگ اَنت-

آئی ءَ گوشتگ کہ اے دیم پہ دیمی ءِ میڑ داں یک ادارے ءَ برجاہ بوتگ- اُرش ءِ آسر ءَ ملٹری انٹیلیجنس ءِ یک کارمندے ءُڈیتھ اسکواڈ ءِ یک کارمندے مرتگ ءُ بازینے زدگ بوتگ اَنت-

نوشکی ءُ ھاران ءَ پاکستانی پوج سر ءَ بوتگیں اُرش ءِ زمّہ واری بی ایل ٹی ءَ منّ اِتگ اَنت –

بلوچ لبریشن ٹائیگرز ءِ جارکش ءَ میران بلوچ ءَ رسانکدر ءَ وتی شنگ کُتگیں درشانے ءَ گْوشتگ کہ نوشکی ءِ دمگ سیمکری ءَ مرچی سُھب ءَ پاکستانی پوج ءَ گل ءِ اوتاک ءِ سر ءَ اُرش کُتگ، اوتاک ءِ دیمپانی ءَ سرمچاراں گوں پاکستانی پوج ءَ دو اداراں جنگ داتگ ءُ پاکستانی پوج گوں دمگی ڈیتھ اسکوڈ ءَ پد کِنزگ ءَ لاچار کُتگ-

میران بلوچ ءَ گْوشتگ کہ اے میڑ ءِ میان ءَ پاکستانی پوج ءِ ھشت کارمند مرتگ ءُ ٹپی بوتگ اَنت ایشانی تہ ءَ دمگی ڈیتھ اسکواڈ کارمند ھم ھوار اَنت-

جارکش ءَ گَوشتگ کہ دوشی سرمچاراں ھاران شھر ءَ گْواش دگ ءِ سر ءَ برجاھیں وڈھ پانگس ءِ سر ءَ گوں راکٹاں اُرش کُتگ – اُرش ءَ پاکستانی پوج ءَ جانی ءُ مالی تاوان رس اتگ-

تربت ءَ بلوچ یکجھتی کمیٹی ءِ دزبندی ءَ ھوشاپ بدکاری ءِ وئیل ءِ ھلاپ ءَ زھرشانی کنگ بیتگ،زھرشانی شھر ءِ جتا جتائیں جاھاں تران بیتگ –

زھرشانی ءَ بلوچ زالبول ءُ چکاں ھوار انسانی ھکانی باسک ءُ سیول سوسائٹی ءِ مھلوک ءَ بھر زرتگ، زھرشانی ءَ ھوشاپ ءَ بدکاری ءِ وئیل ءِ آماچ بیتگیں سیزدہ سالی ءِ امراد امیر ءِ کھول ھم ھوار بیتگ-

زھرشانی بلوچ یکجھتی کمیٹی کیچ ءِ نیمگ ءَ بندات بیتگ زھرشانی تربت شھر ءَ پولیس کارگس ءَ بندات بیتگ ءُ تھرمامیٹر چوک ءَ داں شھید فدا بلوچ ءِ چار راہ ءَ مُُچی ءِ دروشم ءَ مُچ بیتگ –

زھرشانی ءَ زھرشانی کنوکانی دستاں بدکاری ءِ نشانگ کنگ بیتگیں دوازدہ سالی ئیں مراد امیر ءِ انساپ ءِ واستا نبشتگیں کرتگیں بینر ءُ اکس دستاں بیتگ اَنت ءُ زھرشانی کنوکاں وئیل ءِ ھلاپ ءَ اوگام جتگ –

زھرشانی ءَ لس مردمانی مراد امیر ءِ انساپ ءِ واستا تران کنان ءَ گوشتگ کہ گوستگیں روچ ءَ میڈیکل رپورٹ کنگ بیتگ اَنت بلے ڈاکٹراں بدکاری ءِ چیر داتگ ءُ وئیل ءِ گار کنگ ءِ جھد کرتگ –

آیاں گوشت کہ پاکستانی پوج وت ءَ اسلامی ریاست ءِ پھزدار سرپد بیت بلے بلوچستان ءَ آئی ءِ آ دگہ زُلم ءُ زوراکی وتی جاہ ءَ نِی رمزان ءِ ماہ ءَ کسان سالیں زھگاں بدکاری ءِ نشانگ کنگ اِنت –

بلوچ زھگ مراد امیر ءِ گون ءَ “بدکاری وئیل ” ءَ پد بلوچستان ءَ مھلوک ءِ برانزانی تہ ءُ گیشی گندگ ءَ آیگ ءَ اِنت سیاسی ءُ چاگردی مردمانی نیمگ ءَ اے وئیل ترندی ءَ ایر جنگ بیگ ءَ اِنت –

ھمے وڑ ءَ شال ءَ بلوچ اسٹوڈنٹس شال ھنکین ءِ نیمگ ءَ زھرشانی کنگ بیتگ –

بلوچ اسٹوڈنٹس آرگنائزیشن ءِ رھشوناں ھوار بازیں کچے ءَ شال پریس کلب ءِ دیم ءَ ھوشاپ وئیل ءِ ھلاپ ءَ زھرشانی کرتگ –

زھرشانی کنوکاں گوشت کہ اے پاکستان ءِ راجدپتر ءَ مان اِنت کہ ھما راج ءِ سر ءَ زورگری اِنت ھما راجانی سر ءَ زوراکی پانچُل ترند اَنت –

آیاں گوشت کہ مروچی ءَ پنجاہ سال ءَ پیسر ھمے وڑیں کیس ماں بنگلادیش ءَ پاکستانی پوج ءَ کرتگ اَنت نِی اے وئیل بلوچستان ءَ بیگ ءَ اَنت –

آیاں گوشت: کہ بلکیں اے نوک آبادکاری ءِ تہ ءَ یک مردمے ءِ نام اِنت بلکیں اے سرجمیں نوک آبادکاری ءِ نزام ھلاس کنگ بہ بیت –

آیاں گوشت کہ ایف سی ءَ بیان داتگ کہ اے یک فردے ءِ جیڑہ اِنت اے ایف سی ءِ میار نہ اِنت آیاں گوشت کہ ایف سی ھروھد ءَ ھمے وڑ کنگ ءَ اِنت آئی ءَ ھیات جتگ ءُ پد ءَ ھمے وڑ درانگازی کرتگ –

نبشتانک: ساجد هُسین ابدمان اِنت

نبشتہ کار : دُروشُم بلوچ

دی بلوچستان پوسٹ

چوناهیگا بنی آدم کہ اے دُگنیا ءَ ودی بیت گُڑا الم یک روچے چہ اے دُگنیا ءَ چہ روت ءُ آئی ءِ زندگی هلاس بیت. بلئے لهتیں مردُم مرگ ءَ پد هم ابدمان بنت لهتیں مردُم دگنیا ءَ چہ روگ ءَ پد هم زندگ بنت راج آهاں یات کنت آهانی واستا پُرسیگ بیت چیا کہ اے هما مردُم انت پہ وتی گُلزمین ، راج ءُ پہ وتی زبان ءِ واستا زندمانی کنّ انت آهانی کِرد آهاں زندگ کنت ءُ ابدمان کنت-

ساجد هُسین چہ هما کارستاں یکے ات کہ داں بلوچ راجدپتر ھست انت ساجد هُسین ھست ءُ ابدمان انت ساجد هُسین ءَ پہ وتی راج ءُ گُلزمین ءِ رکینگ ءِ هاترا جهُد کُتگ پہ وتی زبان ءِ دیمروی ءِ هاترا جهُد کتگ ساجد هُسین ءَ بلوچی زبان سک باز دوست بوتگ ساجد ءَ هروهد ءَ همے جیڑاتگ کہ بلوچی زبان چون اے دگنیا ءِ تہ ءَ ابد مان ایت ءُ چون دیمروئی کنت ساجد هُسین ءِ وڑیں مردم باز کم ودی بیت چیا کہ ساجد هُسین ءَ کار کنگ ءُ جهُد کنگ ءِ هُنر گون بوتگ ساجد هُسین برے لبزانک ءِ پِڑا جهُد ءَ بوتگ برے راجمانی کنگ ءَ بوتگ ءُ برے اهوال کاری ءَ گوں وتی راج ءِ بزگی ءُ پد منتگی ءَ میان اُستمانی دگنیا ءَ آشنا کنگ ءِ جُهد ءَ بوتگ-

ساجد درانڈیھ کنگ بوت در پہ در کنگ بوت چوناهیگا باز مردم وهدے چہ وتی گلزمین ءُ راج ءَ درانڈیھ کنگ بیت گُڑا آهانی لیکہ ءُ پِکر مٹ بنت آ هما درملکی زندگی ءَ گوں وت ءَ مُلما کن انت بلے ساجد هُسین هما کارست ات کہ درملک ءُ درانڈیھ بوگ ءَ پد هم وتی راج وتی لبزانک ءُ وتی گلزمین ءَ گوں بندوک بوت ساجد هُسین ءِ نبشتانک نہ مُلک، مُلک ءِ نہ درمُلک مُلک ءِ وهدے دیم ء گوست من زانت ساجد هُسین درمُلک ءَ هم بے تاهیر انت پہ وتی گُلزمین ءِ مِسکیں هاک ءِ هاترا زَر ایت-

ساجد هُسین ءَ وتی راج ءِ زیردستی ءُ لگتمالی مار اتگ پمشکا ساجد هُسین ءَ رسانکدر بلوچستان ٹائمز ءِ بُن هشت ایر کتگ ءُ اهوالکاری بندات کتگ بلوچستان ٹائمز ءَ ساجد هُسین ءِ کِرد چہ هچ کس ءَ چیر نہ انت ءُ نہ کہ لبزانک ءِ پِڑا چیر انت بلوچی زبان مدام ساجد هُسین ءَ گیر کار ایت-

انچو کہ بلوچستان ءِ نگیگیں جاورانی سبب ءَ ساجد هُسین درانڈیھ بوت بلے درمُلک ءَ هم ساجد هُسین نہ ساچیت ءُ اناگہ یک روچے انچیں هالے شنگ بوت گُشے زمین ءُ آزمان یک بوت انت بزان ساجد هُسین ءِ درملک ءَ بیگواھی ءِ هال اتک مُلک ءَ وَ اے همک روچی دپ ءِ گپ بنگیج بوتگ اَت کہ پلان مردم آوار جنگ ءُ بیگواه کنگ بوتگ بلئے درملک ءَ آ ھوں سویڈن ءِ وڑیں ملکے ءَ کس ءَ باور نہ بوگ ءَ اَت اے هال ءَ سرجمیں راج گمیگ کُتگ اَت ساجد هُسین ءِ جُست ءُ پُرس برجاه بوت بلے ساجد هُسین ءِ هچ هال نیست ات 40 روچ ءَ رند 23 اپریل 2020 ءَ هال شنگ بوت کہ ساجد هُسین ءِ کُنٹ ماں سویڈن ءِ کورے ءَ دست کپتگ اَت سرجمیں راج پُرسیگ ءُ گمیگ بوت کہ درملک ءَ ھم بلوچانی ساہ رکینگ بیگ ءَ نہ اِنت-

ساجد هُسین ءِ شهیدی پہ بلوچ راج ءُ بلوچی زبان ءَ سک باز تاوان انت ساجد هُسین ءِ کَنڈ ءَ کس پُر کُت نہ کنت دوا انت گوں هاوند ءَ کہ ساجد هُسین ءَ وتی رھمتانی ساهگ ءَ جاگہ بہ دنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: زمین جُمبیں آزار

نبشتہ کار: سعید احمد بلوچ

دی بلوچستان پوسٹ

ما یک اَنچیں اَهدے ءَ زندگ اِیں کہ اے اَهد ءَ زندگی ناں بلکیں زندگ بوگ سک گْران اِنت پرچا کہ ما هما اَهد ءَ زندگ اِیں اِد ءَ بنی آدم ءِ هوَس ءِ تہ ءَ اے کچ ءَ گیشی اَتکگ کہ آ مُراد دابیں ده سالی ئیں گونڈل ءَ وتی هوَس ءِ نِشانگ جوڑ کنت ءُ گوں آئی ءِ گوما پہ زور بدکاری کنت-

اے اَهد ءَ کُجا انسان زندگ بوت کنت؟ کُجام انسان اِنت کہ آئی ءِ دل کپ کپ نہ بیت؟ کُجام انسان اِنت کہ اے دابیں وئیلانی سر ءَ هاموش بہ بیت؟ اَنچُش کہ مَلِکناز اَت آئی ءَ رند کلثوم بوت، اَنچُش کہ هیات اَت بے میار ءَ آئی ءِ دلبند ءَ هَشت تیر سُرپت ءُ مروچی ده سالی ئیں مراد اِنت کہ زوراک ءَ وتی هوَس ءِ نِشانگ جوڈ کنگ ءَ هوار مَرگ ءِ امبازاں دات ءُ چَگل دات اے وئیل تھنا هوشاپ ءِ نہ اِنت اے وئیل سرجمیں بلوچستان ءِ ئیگ اِنت اے وئیل پہ انسانی اُگبالانی ادارھانی ءَ واست ءَ ترندیں شھماتے –

بلے ھمنچو گنج اِنت کہ اے وئیل کشمیر ءُ فلسطین ءَ نہ بوت اگاں بوتیں گُڈا مروچی مردماں سرجمیں دگنیا سر ءَ زُرتگ اَت پہ ما ھمنچو گنج اِنت کہ پہ مئے کسانُکیں براتک ءَ مئے بلوچ راج اَنچو یکمُشت یکدست اِنت کہ پہ مراد ءَ تھنا هوشاپ ءَ ناں بلکیں مکران، سیستان ءُ بولان ءَ هوار سرجمیں بلوچستان دردیگ ءُ بژنیگ اِنت مروچی کل بلوچ ھر کُجام تک ءِ مردم پہ مراد ءَ وتی توار ءَ وتی وس ءُ واک ءَ دگنیا ءِ انسان دوستیں ادارھانی گوشاں سر کنگ ءِ جھد ءَ کنگ ءَ اَنت-

کُل انسان دوست بلوچ راج ءَ هوار سرجمیں پاکستان ءِ نندوک پہ مراد ءَ وتی توار ءَ بُرز بہ کن اَنت دانکہ مراد ءِ توار میان استمانی انسان دوستیں ادارھاں سر بہ بیت ءُ مراد ءَ انساپ بہ رس اِیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

مراد امیر ءِ وڑ ءَ پوجی کارمند زھگاں آوار جن انت ءُ جنسی زوراکی ءِ نشانگ جوڑ کن انت – ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ نود ءُ یک روچ سرجم بوتگ – جتا جتائیں پگرانی منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ ھوشاپ ءِ وئیل ءِ درگت ءَ وتی ھیال درشان اتگ ءُ گوشتگ کہ کسانسالیں مراد امیر ءِ گون ءَ دیم ءَ اتکگیں وئیل کابل ءِ ایر جنگ انت –

آئی ءَ گوشتگ کہ بلوچستان ءِ تہ ءَ اے وڑیں وئیل پیش ءَ ھم بوتگ انت بلے آھانی کھول ءِ نیمگ ءَ تُرس ءُ بناّمی ءِ سوب ءَ اے درگت ءَ گپ نہ جتگ – آئی ءَ گوشتگ کہ ما پیش ءَ ھم مدامی گوشتگ کہ فرنٹیئر کور کارمنداں کسانسالیں زھگاں آوار جن اَنت ءُ چیریں جاھاں جنسی زوراکی نشانگ جوڑ کن اَن کہ آئی سبوت مئے گور ءَ ھست انت –

آئی ءَ گوشتگ کہ ما دنیا ءَ سرپد کنیں کہ پاکستان ءَ بلوچستان ءِ تھ ئِے کتکاریانی سر ءَ کانون تھتگ ءَ آرگ بہ بیت ءُ مراد امیر ءَ ھک دیگ بہ بیت – مراد امیر میڈیکل رپورٹ سر ءَ المیں دلگوش کنگ نبیت پرچاکہ اے ملک ءِ تہ ءَ شپ ءِ شپ بیلٹ باکس بدل کنگ بنت، نام نھادیں ریفرنڈمز ءَ ڈکٹیٹر لکانی کچ ءَ وؤٹ گرگ ءَ انت آھانی واستا میڈیکل رپورٹ بدل کنگ ھچ مشکل نہ انت –

ماما قدیر بلوچ ءِ گوشگ اَت کہ بلوچ راج ءِ پُرایمنیں جھد ءَ کس داشت نہ کنت پرچاکہ ترس گم زھری ءِ تہ ءَ بدل بوتگ وھدیکہ من چہ بلوچ راج ءَ لوٹ کناں کہ باندا تربت ءَ بؤکیں زھرشانی ءَ ھوار بہ بنت ءُ اے رستری زوراکی ءِ بگیری ءَ وتی ھیالانی درشانی بہ کن انت –

سربوتگیں ھالانی رِد ءَ گوستگیں روچ ءَ پاکستانی پوج ءِ دست ءَ جنسی زوراکی ءِ آماچ بوتگیں مراد امیر ءِ کھول ءِ سر ءَ زور دیگ بوگ ءَ انت ءُ میڈیکل رپورٹ ھم وتی ھک ءَ کنگ بوتگ – جنسی زوراکی ءِ آماچ بوتگیں گونڈو ءِ مستریں برات ءَ اے رپورٹ رد کتگ ءُ دوبر ماھریں ڈاکٹر ءَ ٹیسٹ کنگ ءِ لوٹ کتگ –

ڈاکٹر ءِ نیمگ ءَ شنگ بوتگیں رپورٹ ءِ تہ ءَ گوشگ بوتگ کہ دیر گوزگ ءِ سوب ءَ آھاں چار ءُ ٹپاس ءَ جنسی زوراکی ءِ سبوت نہ رس اِتگ – رپورٹ ءِ تھا گوشگ بوتگ گونڈو ءِ جان ءَ ھچ وڑیں جنسی زوراکی ءِ نشان نہ رس اتگ – کسانیں گونڈو بیست ءُ یک اپریل دوھزار ءُ بیست ءُ یک ءَ چارشمبے بیگاہ ءِ ادار سَے ءُ پنجاہ ءَ نادراھجاہ ءَ آرگ بوتگ کہ اود ءَ چار بج ءَ گونڈو ءِ ٹیسٹ کنگ بوتگ اَنت –

رپورٹ ءِ رِد ءَ گونڈو ھما روچ ءَ نادراھجاہ ءَ چہ ڈسچارج کنگ بوتگ رپورٹ ءِ تہ ءَ گونڈو ءِ اُمر سینزدہ سال نبشتہ انت –

تربت سول ھسپتال ءِ یک کاردارے ءَ رسانک جاہ ءَ گونڈو ءِ درگت ءَ گوشتگ کہ گونڈو بے ھوشی ءِ جاوراں نادراھجاہ ءَ آرگ بوتگ ءُ آئی ءِ جان ءِ سر ءَ جنسی زوراکی ءِ زاھریں سبوت بوتگ بلے چار ءَ ٹپاس ءَ دیر کنگ بوتگ تانکہ نشان نزور کنگ بہ بنت –

اے درگت ءَ گونڈو ءِ مستریں برات میڈیکل رپورٹ رد کتگ ایف سی ءِ کارمندے سزا دیگ ءِ لوٹ کتگ –

آئی ءَ رسانکدر ءَ گپ جنان ءَ گوشتگ کہ ھمے میڈیکل رپورٹ کہ دیم ءَ آرگ بوتگ اشی ءِ تہ ءَ راستی چیردئلیگ بوتگ، آئی ءَ لوٹ کُتگ کہ رپورٹ ملک ءِ شریں ماھریں میڈیکل ٹیم ءِ نیمگ ءَ چہ کنگ بہ بیت –

آئی ءَ گوشتگ کہ اے کارمند ءَ منی کستریں برات ءِ گوم جنسی زوراکی ءُ آئی ءِ گون ءَ جانوری ھم کتگ ، منی کستریں برات جاندر کُتگ ءُ زوراکی نشانگ جوڑ کتگ ، وھدیکہ میڈیکل رپورٹ ءِ تہ ءَ اے راستی چیر دیگ بوگ ءَ انت –

آئی ءَ گوشتگ کہ ما ارزی نبشتہ کنگ ءِ جُھد کتگ بلے آھاں ھمے گوشتگ ءُ ارزی نبشتہ کنگ ءَ مکن کتگ کہ میڈیکل رپورٹ ءِ آیگ ءَ پد ما ارزی ءَ نبشتہ کنیں –
آئی ءَ ایف سی کارمند ءِ اے کتکاری ءِ سزا دیگ ءِ لوٹ کتگ –

زانگ بہ بیت بلوچستان ءَ بندوکیں سیاسی پاٹیانی نیمگ ءَ اے وئیل ترندی ءَ ایر جنگ بیگ ءَ اِنت ءُ اے رستری ءَ ھواریں مردمانء سزا دیگ ءِ لوٹ ءَ کنگ ءَ اَنت –

ھمے درگت ءَ بلوچ یکجھتی کمیٹی کیچ ءَ بانداتگیں روچ ءَ زھرشانی ءِ جار پِرینتگ ءُ گوشتگ کہ باندا سھب ءَ کیچ ءِ بنجاھی شھر تربت ءَ شھید فدا چار راہ ءَ زھرشانی کنگ بیت ءُ دراھیں تکاں بندوکیں مردماں بھر زورگ ءِ دزبندی کرتگ اِت –

دزاپ: روکپتی بلوچستان ءِ جانسلامتی ءِ گر ءُ دار کنوکانی گوشگ اِنت روکپتی بلوچستان ءَ ھشتاد درسد مھلوک کرونا وائرد ءِ آماچ اَنت –

جانسلامتی ءِ گر ءُ دار کنوکانی گوشگ اِنت کہ گوستگیں بیست ءُ چار ادارانی تہ ءَ یک ءُ سد ءُ نُھ کیس رپورٹ بیتگ اَنت-

نوکیں کیسانی رپورٹ بیگ ءِ ھواری ءَ سِی ھزار ءُ نُھ سد ءُ چل ءُ پنچ مردم نادراھی ءِ آماچ اَنت-

آئی ءِ گوشگ اَت یک سد ءُ شست ءُ ھشت نادراھانی نفسی جاور نگیگ اَنت ءُ سیستان ءُ بلوچستان ءِ جتا جتائیں نادراہ جاھاں تھتیگ اَنت –

اشانء تہ ءَ ھشتاد ءُ یک نادراہ ھنچیں ھوار اَنت کہ آ ویروس ءَ ناگیگیں رنگے ءَ گپتگ اَنت ءُ آیانی دیم ءِ چھرگ ھم شتگ اَنت –

جانسلامتی ءِ رد ءَ گوستگیں بیست ءُ چار ادارانی تہ ءَ یک مردمے بیران بیتگ ءُ اشی ءِ ھواری ءَ سرجمیں بیران بیتگیں مردمانی کچ یک ھزار ءُ دو سد ءُ بیست ءُ دو ءَ سر بیتگ اَنت –

آئی ءَ گوشت خامنہ ای ءِ گوشتگ کہ امریکہ ءِ ویکسن ءِ نہ زورگ ءَ چریشی ءَ نادراھی ءِ مانشان گیش بیان بیت کنت –

بلوچ عالم دین ءُ کیچ ءِ بنجاھی جمعیت اھل حدیث ءِ بلوچستان ءِ سوبائی ناظم اعلیٰ مولانا عبدالغنی زامرانی ءَ وتی شنگ کرتگیں بیان ءِ تہ ءَ گوستگیں روچ ءَ ھوشاپ ءَ بیتگیں بدکاری وئیل ایر جتگ ءُ گوشتگ کہ اے وڑیں کارپد مسلمانانی نہ اَنت ءُ اے زمران ءِ نیکیں ماہ ءَ چوشیں جاور کنوک الکاپیں سزا دیگ بہ بنت –

مولانا عبدالغنی زامرانی ءَ گوشتگ کہ اے وئیل ءَ ھمینکس ایر بہ جن ایں کم اِنت ءُ ایف سی مردمانی پھریزگ ءِ واستا دارگ بیتگ بلے آئی ءِ پھریزگ بس ھمے کساس ءَ اَنت دَہ سالی ئیں زھگاں بہ گر ءُ وتی زونڈانی چیر ءَ بہ کن ءُ وتی واھشت ءَ سرجم بہ کن –

آئی ءَ گوشتگ کہ گیر زروریں جاھاں ایف سی پاد کنگ بہ بیت ءُ پولیس ءُ لیویز دارگ بہ بنت آئی ءَ گوشتگ کہ اے وڑیں بلوچستان ءَ بازیں وھداں بیگ ءَ اَنت بلے باز مردماں وتی لَج ءِ میار ءَ چوشیں وئیل چیر داتگ اَنت – بلے نِی آپ سرگوز کنگ ءَ اِنت ءُ چوشیں وئیل چیردیگ ءِ گنجائش ءَ گوزگ ءَ اَنت –

آئی ءَ گوشتگ کہ چریشی ءَ پیسر بلوچستان ءَ زالبولانی آوار جنگ ءُ جیلانی تہ ءَ بند کنگ ءِ وئیل پدر بیتگ اَنت ءُ ایف سی بلوچ مھلوک ءِ سر ءَ ناروائیں کردگاراں کنگ ءَ اَنت ءُ ایف سی گرگ ءُ ھنچیں جاھاں کنگ بہ بیت آ جاھاں ابید ایف سی دگہ جاھاں گندگ مہ بیت –

آئی ءَ گوشتگ کہ چوشیں وئیلانی کنوک ترندیں سزا ءِ ھکدار اَنت ءُ باید اے سزا دیگ بہ بنت –

بلوچستان ءَ ھواریں سیاسی پاٹیانی نیمگ ءَ کیچ ھوشاپ ءِ وئیل ترندی ءَ ایر جنگ بیگ ءَ اِنت ءُ اے درگت ءَ مھلوک زھر ءِ درشاناں کنگ ءَ اِنت ءُ گوستگیں شپ ءَ چاگردی رسانکجاھاں بلوچ پھناتاں اے وئیل ءِ گپ درستاں سر بیتگ ءُ ٹوئٹر ءَ کمپیئن کارمرد بیتگ ءُ انساپ ءِ لوٹ کنگ بیتگ –

ھمے وڑ بلوچستان نیشنل پاٹی ھزدار ءِ دمگی سروک میر شفیق رھمان ءَ وتی بیان ءَ گوشتگ کہ اے وڑیں بدکاریاں ھمینکس ایر بہ جن ئے کم اِنت –

آئی ءَ گوشتگ کہ بلوچستان ءَ ایف سی ءَ مھار گُٹ ءَ دیگ بیتگ ءُ مھلوک ءِ ننگ ءُ ناموس ءَ لُٹگ ءَ اِنت ءُ باید بلوچستان ءِ سیاسی پاٹیاں ھمگرنچ بیگ ءُ ایف سی ءِ بگیری ءَ توار چِست کنگی اِنت –

سر بیتگیں ھالانی رد ءَ گوستگیں روچ ءَ روکپتی بلوچستان ءِ دمگ سراوان ءَ ایرانی گجر ءِ تیرگواری ءَ تیل کشیں یک مردمے بیران بیتگ –

وئیل سراوان ءِ سیمسری دمگ کلگان ءَ بیتگ کہ اود ءَ ایرانی سپاہ ءَ یک تیل کشیں گاڑی ءِ سر ءَ تیرگواری کرتگ ءُ چریشی ءَ گاڑی ءِ ڈرائیور بیران بیتگ –

بیران بیتگیں مردم ءِ پجار اسلم آجزئی ء نواب جھمنند کینار بست سراوان ءِ نام ءَ زانگ بیتگ –

گیشیں ھالانی تہ ءَ گوشگ بیتگ کہ اسلم آجزئی پنجگور ءَ واتر سراوان ءَ روگ ءَ بیتگ کہ اود ءَ ایرانی گجر ءَ آئی ءِ سر ءَ تیرگواری کرتگ ءُ چریشی ءَ آ بیران بیتگ-

ھمے وڑ ءَ روکپتی بلوچستان ءَ انسانی ھکانی واستا کارکنوکیں بلوچ کمپعن فعالین ءِ گوشگ اِنت کہ اے سال ءَ ایرانی گجر ءِ تیرگواریاں لس مردمانی بیرانیانی تہ ءَ گیشی اَتکگ کہ نوکیں سال ءِ بندات ءَ تنی وھدی بازیں تیل کش ءُ لس باپاری مردم ایرانی گجر ءِ تیرانی ھرجان بیتگ اَنت –

زانگ بہ بیت روکپت ءُ رودراتکی دوئیں بلوچستان ءِ سیمسر “کش اِتگیں لکیر ” ءِ آ دیم ءُ اے دیم ءَ نندوکیں مردمانی زرکاری گوں سیمسر ءَ بندوک اِنت کہ اے سیمسر ھردوکیں نیمگاں بند بیگ ءِ سوب ءَ ھزارانی مردم پہ چُنڈے نان ءَ مھتاج اَنت –

روکپتی بلوچستان ءَ دگہ یک وئیلے ءَ دو مردم بیران بیتگ اَنت ءُ یک مردمے زدگ بیتگ-

وئیل روکپتی بلوچستان ءِ بنجاھی شھر دزاپ ءِ ھند نصر آباد ءَ یک گاڑی ءِ چپ بیتگ ءُ چریشی ءَ دو مردم بیران ءُ یکے زدگ بیتگ –

روکپتی بلوچستان ءِ انتزامیہ ءِ سروک اھمد ثمری ھسینی ءَ گوشتگ کہ پولیس ءِ بنجل ءَ ھال سر بیتگ کہ نصر آباد ءَ یک گاڑی ءِ چپ بیتگ –

اھمد ثمر ھسینی ءِ گوشگ اِنت ھال ءِ سر بیگ ءَ پولیس ءِ کارمند ءُ انتزامیہ ءَ وئیل جاہ ءَ سر بیتگ اَنت ءُ اود ءَ زدگ ءُ بیران بیتگیں مردم چِست کنگ بیتگ ءُ نادراہ جاہ ءَ سر کنگ بیتگ اَنت –

سربوتگیں ھالانی رِد ءَ بلوچستان ءِ دمگ پنجگور ھزدار، کیچ، سوراب کوھلو ءَ تیرگواری وئیلاں دو مردم بیران وھدیکہ کوھلو ءَ بور تری پاٹ کپگ ءَ یک مردمے بیران بیتگ –

گیشیں ھالانی رِد ءَ ھزدار ءِ دمگ کھنڈ ءَ ناشناسیں مردمانی تیرگواری ءَ یک مردمے بیران بوتگ –

بیران بوتگیں مردم ءِ پجار احمد خان ء علی بخش ءِ نام ءَ چہ بوتگ – پولیس ءِ رِد ءَ وئیل زاتی جیڑہ ئِے سر ءَ بوتگ، پولیس ءَ ارزی نبشہ کتگ ءُ وئیل درگت ءَ گیشیں پٹ ءُ پول کنگ ءَ انت –

کیچ ءَ دُزانی تیرگواری ءَ یک مردمے بیران، دزاں گاڑی گوں ٹیلاں بُرتگ –

وئیل کیچ ءِ کوھی دمگ کلبر ءَ دیم ءَ اتکگ کہ دزانی تیرگواری ءَ علیم نامیں مردمے بیران بوتگ –

ھمے وڑ پنجگور ءِ دمگ وشبود ءَ دُزانی تیرگواری ءَ یک مردمے ٹپی بوتگ –

پولیس ءِ رِد ءَ وشبود ءَ سَے سلاہ بندیں مردم مختار ء خیر جان ءِ دکان ءَ پُترتگ ، دکان ءَ بیست ھزار کلدار ءُ آئی ءِ سیونٹی پرپٹ گوں وت برتگ – پولیس رِد ءَ ھمے وھد ءَ محمد حیات دکان ءَ سربوتگ دُزانی تیرگواری ءَ آئی ءَ دست ءُ پاداں تیروارتگ –

ٹپی بوتگیں مردم سول ھسپتال ءَ برگ بوتگ –

ھمے وڑ ناگ ءُ سوراب ءِ میان ءَ دُزاں دو زمباد گاڑیانی سر ءَ تیرگواری کتگ دؤئیں گاڑیاں ڈیک وارتگ ءُ چپی بوتگ انت –

اھوالکار رِد ءَ سوراپ لیوز پوسٹ ءِ نزیک ءَ دو گاڑیاں ناگ ءَ چہ کمے دور سی پیک شھدگ ءِ سر ءَ گوزگ ءَ بوتگ انت – پیسرا چہ دگ بستگیں دُزاں گاڑی والا پہ اوشتگ ءَ دست داتگ اَنت ءُ نہ اوشتگ ءِ سوب ءَ دزاں تیرگواری کتگ چریشی ءَ پشت گاڑی ءِ ٹیر بسٹ بوتگ دومی گاڑی ءَ ٹکر اِتگ چریشی ءَ دؤئیں گاڑی چپی بوتگ انت –

گاڑیاں سواریں یک مردمے کمے ٹپی بوتگ انت –

کوھلو ءَ کلندرانی مری ٹک ءِ وت ماں وتی زاتی جیڑہ ءِ سر ءَ جنگ ءُ چوپ ءَ دو مردم ٹپی بوتگ اَنت –

ٹپی بوتگیں مردمانی پجار کریم بخش ءُ منیر احمد ءِ نام ءَ چہ بوتگ انت –

ٹپی بوتگیں مردم ڈی ایچ کیو نادراھجاہ کوھلو ءَ برگ بوتگ انت اے درگت ءَ پولیس گیشیں پٹ ءُ پول کنگ ءَ انت –

بلوچستان ءِ دمگ کوھلو کاھان ءَ بور ءِ تری پاٹ کپگ ءَ یک مردمے بیران بوتگ –

بیران بوتگیں مردم ءِ پجار محمد سلیم ء سعیدو شیرانی نام ءَ چہ بوتگ –