TBP Balochi

مشکے ءُ تمپ ءَ پاکستانی پوج ءِ سر ءَ اُرش کتگ جانی ءُ مالی تاوان داتگ – میجر گْوھرام

مشکہ ءُ کیچ ءَ ناشناسیں مردماں پاکستانی پوج ءِ سر ءَ اُرش کرتگ ءُ جانی ءُ مالی تاوانانی دیمپانی پوج ءَ کنگ کپتگ –

مشکہ ءَ سلاہ بندانی اُرش ءَ دو لیویز کارمند ھم بیران بیتگ اَنت، دمگی مردمانی گوشگ اِنت پوج ءِ سر ءَ اُرش ءَ پد لیویز کارمند کل کرتگیں شوروانی نشانگ ءَ اتکگ ءُ بیران بیتگ اَنت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ تمپ ءُ مشکے ءَ بوتگیں اُرشانی زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ مشکے ءَ پوجی پانگس ءِ سر ءَ بوتگیں سرمچارانی سوبمندیں اُرش ءَ پد زیک پاکستانی پوج ءَ مشکے ءِ دمگ کوہ ء اسپیت ءَ سرمچارانی رندگیری کتگ – پوجی کاروان ءَ گاڑیاں ھوار دو پرپٹ ھم گون بوتگ اَنت- اے پیشگامی ھما وھد ءَ پُشت ءَ کنزیتگ کہ وھدیکہ دوئین پرپٹ کوہ ء اسپیت کور ءَ پیسر چہ چیر کتگیں شوروانی زد اتکگ انت- شوروانی تراک دو پرپٹاں سواریں کارمند مرتگ ءُ دو زدگ بوتگ اَنت کمے وھد ءَ پد یک بالگرد جونانی چست کنگ ءَ اَتکگ ءُ سر بوتگ-

جارکش ءَ دیمتر ءَ گوشتگ کہ اے اُرش ءِ دو ادار ءَ پد مئے سرمچاراں مشکے ءِ دمگ بنڈکی ءَ پوج ءِ کاروان ءِ یک گاڑی نشانگ کتگ ءُ چریشی ءِ آسر ءَ لیویز کارمند بیران بیتگ ءُ زدگ بوتگ اَنت ءُ آئی ءَ گوشتگ مئے نشانگ لیویز کارمند نہ بوتگ اَنت بلے پوجی گاڑی ءُ گُدانی تہ ءِ سوب ءَ آ بیران ءُ زدگ بوتگ اَنت آھانی مرگ ءَ ما بژنیگ انت –

جارکش میجر گوھرام بلوچ ءَ گوشتگ لیویز کارمندانی کُشگ نشانگ مئے رھبند ءَ نیست بلے چیزے وھد بیت بلوچ راجی زرمبشت ءَ چہ باجو بوتگیں سرمچار گیشتر لیویز ءِ تہ ءَ ھوار کنگ بیتگ اَنت کہ زورگریں پاکستانی پوج ءِ جوڑ کتگیں ڈیتھ اسکواڈ ھمراہ بوگ ءُ بلوچ سرمچارانی بگیری ءَ پاکستانی پوج ءِ ھاتر ءَ کار کنگ ءَ اَنت ما یکرندے پد ءَ لیویز کارندھاں گوں دزبندی کن ایں کہ پاکستانی پوج ءِ ھاتر ءَ کار کنگ ءَ پد کنز بہ بنت-

جارکش ءَ گوشتگ کہ ھمک وھد راج ءِ زنگ ءُ زاری آیگ ءَ اَنت کہ مشکے ءِ دمگ نوکجو، سنیڑی ءُ گجر ءَ چہ ابید آواران ءِ دمگ مالار ءُ گیشکور ءَ لیویز کارمند مردمانی گوم ءَ بے ادبی کن اَنت ءُ پاکستانی پوج ءِ پُشت ءَ راج ءَ را بزگ کنگ ءُ سرمچارانی بگیری ءَ لشکر کشی ءَ دیم ءَ اَنت – آ پاکستانی پوج ءِ ھمکوپگی ءَ چہ بہ سُدر اَنت اگاں ناں اے وڑیں کردگار کنگ ءِ سبب ءَ پھل کنگ نہ بنت- بلوچ راجی جُھد ءِ بگیری ءَ کارکنوکیں زورگریں پوج ءِ وڑ ءَ سزا دیگ بنت-

جارکش ءَ دیمتر ءَ گْوشتگ مشکے لیویز کارندہ زورگریں پوج ءِ ھمراھداری مہ کن اَنت- اگاں اے وڑ پوج ءِ کاروانانی بھر جوڑ بیت اَنت گُڑا آ پوج ءِ رنگ ءَ نشانگ کنگ بنت- لیویز ءُ زورگریں پوج دو جتائیں ادارہ اَنت یا کہ اش آپیسرانی نیمگ ءَ چہ لاچار کنگ بنت گُڑا مارا لیویز آپسراں گوں تُرندی ءَ پیش آہگ لوٹ اِیت-

جارکش میجر گوھرام بلوچ ءَ گوشتگ کہ مئے سرمچاراں تمپ ءِ دمگ آسیاباد ءَ موسّی کور ءَ ھستیں پوجی پانگس ءِ سر ءَ دور جنگیں توپک ءِ گون ءَ اُرش کتگ ءُ یک کارندھے کُشتگ-

گڈسر ءَ جارکش ءَ وتی درشان ءِ تہ ءَ گوشتگ کہ زورگیریں پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

سر بیتگیں ھالانی رد ءَ کیچ ءِ دمگ تمپ ءَ گوستگیں شپ ءَ سلاہ بندیں مردماں یک لوگے ءَ بیڑ برتگ ءُ اود ءَ لوگ ءِ مردم بیھار داتگ ءُ لوگ ءَ جاڑیگیں زالبول ءُ چُک کمشرپ کرتگ اَنت –

دمگی مردمانی رد ءَ گوستگیں شپ ءَ تمپ دازین ءَ سرکار ءِ چیردستی ءَ کہ بلوچستان ءَ “ڈیتھ اسکواڈ ” ءِ نام ءَ زانگ بیت ملا عبدالصمد نامیں مردمے ءِ لوگ ءَ اتکگ ءُ زالبول ءُ چُک بیھار داتگ اَنت ءُ گوشتگ کہ دوبر مئے آیگ ءَ گوں سرجمیں سامان روپگ بنت –

دمگی مردمانی رد ءَ سلاہ بنداں گوستگیں چیزے روچ ءَ پیسر ھم اتکگ ءُ لوگ ءَ مردم بیھار داتگ اَنت ءُ دوشیگیں شپ ءَ واتر اتکگ ءُ ملا عبدالصمد ءِ نماسگ ھم آوار جتگ ءُ گوں وت برتگ –

دمگی مردمانی رد ءَ ڈیتھ اسکواڈ ءِ کارمند دمگ ءَ پُرکار اَنت ءُ آیاں گوست ءَ ھم چوشیں بے ھودیں کار کرتگ ءُ جنین ءُ چُکانی ننگ ءُ شرپ لُٹ اِتگ اَنت ءُ دمگ ءَ نیزگاریں مھلوک بلیک میل کرتگ اَنت –

دمگی مردمانی ٹی بی پی ءَ گوں گپ کنان ءَ گوشتگ دمگ ءَ سرکار ءِ چیردستی ءَ سعید ء عابد، نادل ملانٹی، منیر ملانٹی، ظھور ء گپور،بالاچ ء گزابیک، عادل سرور، بیبگر امان کہ اے دمگ ءَ پرکار اَنت ءُ لس مھلوک ءِ بیھار ءُ سرکاری کمک ءَ لس نیزگاریں مردمانی سر ءَ زوراکی کنگ ءَ اَنت –

زانگ بہ بیت گوستگیں وھداں کیچ ڈنک ءَ ملکناز نامیں زالبولے کُشگ بیتگ اَت ءُ آئی ءِ کسان سالیں زھگ برمش زدگ کنگ بیتگ اَت چریشی ءَ پد دمگ ءِ مھلوک ءَ وئیل ڈیتھ اسکواڈ ءِ سر ءَ لڈ اِتگ اَت –

ھمے رنگ ءَ تمپ ءَ ھم کلثول نامیں زالبولے آئی ءِ چکانی دیم ءَ آئی ءِ سر برگ بیتگ اَت ءُ چریشی ءَ پد دمگ ءِ مھلوک ءَ زھرشانی کرت ءُ آئی ءِ کوش ءِ بھتام سرکار ءِ چیر دستی ءَ پرکاریں ڈیٹھ اسکواڈ ءِ سر ءَ لڈ اِتگ اَت –

گوستگیں روچاں چاگردی رسانکجاھاں ھم ڈیتھ اسکواڈ ءِ بگیری ءَ بلوچ سیاسی ءُ چاگردی مھلوک ءِ نیمگ ءَ کمپئن کنگ بیتگ اَت کہ کمپئن درستاں برز شتگ اَت –

بلوچ سیاسی مردمانی گوشگ اِنت کہ بلوچستان ءَ سرکار ءُ چیریں ادارھانی نیمگ ءَ جوڑ کرتگیں ڈیتھ اسکواڈ لس مھلوک ءِ کُشت ءُ کوشاں ھوار اِنت ءُ مھلوک ءَ آوار جنگ ءُ چاگردی دگہ سلکاریاں دزمان جن اَنت –

نبشتانک: ابا من تئی دُتّکاں

نبشتہ کار: زرینہ بلوچ

رجانکار:معراج لعل

دی بلوچستان پوسٹ

ابا من تئی ھما بانُکیں دُتُّکاں کہ تو پہ نازے من ءَ رُودینتگ چہ منی زبان ءَ در آیگ ءَ پیسر تو منی ھرچ تماہ پورا کُتگ اَنت ابا گندے تو گُشتگ اَت من تئی شھزادی ءُ تئی دُتُّکاں تئی ھمے شھزادی کہ لوگ ءِ بانک بوتگ سور ءَ پد یک گُلامے جوڑ بوت اد ءَ ہمک روچ منی ازت ءِ سر ءَ داگ جن اَنت اد ءَ ابو! ترا یات بیت کہ وھدے من ورگ ھراب جوڑ کُتگ تو گُشتگ پراوہ نیست منی چُک ءِ دیم ءَ شرتر بیت مرچگیں ورگ ھم اِنچو ھراب نہ اَنت بلے اد ءَ اگاں ورگانی توک ءَ واد یا سُوچاکی کمیں کم ءُ گیش بہ بنت گُڑا منی تُرو ءُ ناکو من ءَ رنگ رنگیں گپ گُش اَنت ءُ آ (لوگ واجہ) من ءَ جَنت-

ابا تو ھچ بر منی سر ءَ زھر نہ گپتگ ئے تو ھرچ گپ من ءَ گوں مھر ءُ دوستی ءَ سمجائینتگ ءُ من پھمتگ اِت اَنت بلے اد ءَ چُشیں چیز نیست اد ءَ بس۔

منی بابُل ترا یات بیت کہ یک روچے ءَ ردی ءَ گوں ما منی دست کارچ ءَ بُر اِت من سرجمیں لوگ سر ءَ زُرت ءُ ھمے نیام ءَ منی گِروگانی سبب ءَ دو ءُ چار ھمسایگ ءَ درک بست ءُ اتک اَنت بلے اد ءَ اِنچو لٹ ورگ ءُ ٹپ ءُ ٹور ءَ پد ھم من ھچ نہ گُشاں بس کمرہ ءِ دپ ءَ بند کن آں گِریوْاں ءُ ترا سک یات کن آں ۔

ابا من ھرچ وھد ءَ گونڈ گونڈیں گپ ترا ھال داتگ اَنت ءُ ھرکسی گِلہ تئی کِر ءَ کُتگ بلے نوں تئی جنک اے دُرائیں گپ ءُ چیزانی برداشت کنگ ءَ لگ اِتگ-

نوں من ءَ تُرس ایت اگاں تو سرپد بہ بِے من اد ءَ گوں درد ءُ رنج ءُ گوں اذیتاں زندگی گوازینگ ءَ آں گُڑا تو من ءَ چد ءَ چہ برے بلے اے چاگرد ءِ مردمانی گپ ءُ شیگان مئے ھردوکینانی زندگی ءَ ھرام کن اَنت پرچہ کہ سور ءَ پد جنک ءِ لوگ آئی ءِ مرد ءِ لوگ بیت ، مات ءُ پت ءِ نہ بیت اِنت الّے ابو من تئی گُشگ ءَ بے ھال بوت آں کہ من باز گل آں گوں وتی زندگی ءَ من ءَ ھچ چیز ءِ کمی نیست آ (لوگ واجہ) من ءَ باز دوست دار ایت ءُ منی ھیال ءَ کنت منی دُرائیں تماھاں پورا کنت من باز وش آں بس ابا شُمے یات باز کیت بلے وھد نہ رس ایت کہ شُمے کِر ءَ بیا آں ابا تئی دُتّک اد ءَ شھزازی ءِ پیم ءَ راج کنگ ءَ اِنت۔ من باز آسودگ آں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

زورانسری آوار جنگ بیتگیں حزب اللہ قمبرانی یل بیتگ ءُ آئی ءِ ھمراھی ءَ آوار جنگ بیتگیں حسان قمبرانی انگت ءَ بیگواہ

بلوچستان ءِ بنجاھی شھر شال ءَ گوستگیں سال ءِ چاردہ فروری ءَ بیگواہ بیتگیں قمبرانی برادری ءِ یک ورنایے حزب اللہ قمبرانی یل بیتگ ءُ وتی لوگ ءَ سر بیتگ –

ورنایانی بیگواھی ءِ واستا توار چِست کنوکیں حسان قمبرانی ءِ گوھار حسیبہ قمبرانی ءَ حزب اللہ ءِ یل بیگ ءِ راستی پدر کرتگ ءُ گوشتگ کہ حزب اللہ قمبرانی یک سالے ءَ بیگواہ بیگ ءَ پد یل بیتگ – حزب اللہ منی برات حسان ءِ ھمراھی ءَ دزگیر کنگ ءُ بیگواہ کنگ بیتگ کہ تنی وھدی منی برات بیگواہ اِنت –

حسیبہ ءَ گوشتگ کہ ھاکماں ما حزب اللہ ءِ یل بیگ ءَ وشی درشان بہ کن آں یا حسان ءِ گمانی دامن ءَ بہ داراں؟ –

ھمے وڑ ءَ وائس فار بلوچ مسنگ پرسنز ءَ ھم حزب اللہ قمبرانی ءِ یل بیگ ءِ راستی کرتگ ءَ ما اُمیت داریں حسان قمبرانی یل کنگ بیت اِنت –

روکپتی بلوچستان ءِ جانسلامتی ءِ رد ءَ بازیں شھراں جھانی نادراہ کرونا وائرس بیمناک اِنت ءُ گیش تالان بیگ ءَ اِنت –

جانسلامتی ءِ رد ءَ سیستان ءُ بلوچستان ءَ ھاش، زابل،دزاپ، نیکشھر، بستک، میناب ءُ جاشک ءَ جھانی نادراھی گیش اِنت ءُ اود ءَ نادراھی گیش تالان اِنت –

جانسلامتی ءِ رد ءَ سیستان ءُ بلوچستان ءِ ھند بنگلان ءُ سرباز ءِ ھند کیشکور ءَ نادراھی روچ پہ روچ گیش بیان اِنت –

آئی ءِ رد ءَ کیشکور ءَ بیست ءُ سَے نوکیں نادراہ پدر بیتگ اَنت ءُ سَے کس ھمے نادراھی ءَ بیران بیتگ اَنت –

آئی ءِ رد ءَ بنگلان ءَ ھم نادراھی گیش اِنت اود ءَ بازیں کچے ءَ مردمانی جان ءَ نادراھی ھست اِنت ءُ روچ پہ روچ اے نادراھی گیش بیان اِنت –

جانسلامتی ءِ گوشگ اِنت باید مھلوک وتی جان ءِ پھریز ءَ بہ کنت ءُ اے جھانی نادراھی ءَ وت بہ رکین ایت ءُ اے نادراھی باز ناوشیں نادراھی ءِ –

زانگ بہ بیت جھانی نادراھی ءَ سرجمیں جھان ءَ بازیں کچے ءَ مھلوک وتی ھرجان جتگ اَنت ءُ اے وھد ءَ ھندوستان ءَ گیش اے نادراھی ترند اِنت ءُ اود ءَ ھمک روچ سَے ھزار ءَ گیش مھلوک ھمے نادراھی ءَ بیران بیگ ءَ اَنت –

بلوچستان ءِ جتا جتائیں جاھاں پوجی کمپنی ءُ پوج ءِ سر ءَ سلاہ بندیں مردماں اُرش کرتگ ءُ تاوانبار کرتگ اَنت –

اسلام آباد ءَ ھستیں تھنک ٹینک پاکستان انسٹی ٹیوٹ فار کنفلکٹ اینڈ سیکیورٹی اسٹڈیز (پی آئی سی ایس ایس) ءِ رد ءَ سرجمیں پاکستان ءَ اپریل ءِ ماہ ءَ ھشت اُرش بیتگ اَنت کہ چریشانی تہ ءَ چار سیکیورٹی کارمنداں ھوار دوازدہ مردم کُشگ بیتگ اَنت –

پی آئی سی ایس ایس ءِ رد ءَ گیشتریں اُرش بلوچستان ءَ پیش اتکگ اَنت کہ چریشانی تہ ءَ پوج ءِ کارمند ھوار اَنت –

ھمے وڑ ءَ بلوچستان ءَ زیک ءُ مروچی بیتگیں اُرشاں لشکری کارمنداں ھوار بند ءُ ساچی شرکتانی سر ءَ سلاہ بندیں مردماں اُرش کرتگ ءُ جانی ءُ مالی تاوانانی دیمپانی سیکیورٹی فورسز ءَ کنگ کپتگ –

بلوچستان ءِ آجوئی ءِ لوٹوکیں سلاہ بندیں گل یونائیٹڈ بلوچ آرمی ءَ شنگ کرتگیں درشانی ءَ کوھلو ءَ بیتگیں اُرش ءِ زمہ واری منّ اِتگ –

یو بی اے ءِ جارکش مزار بلوچ ءَ گوشتگ کہ مئے سرمچاراں کوھلو ءُ رکنی ءِ میان ءَ پاکستانی پوج ءِ بند ءُ ساچی شرکت ایف ڈبلیو او ءِ کارمند ھما وھد ءَ تراکناکیں شوروانی نشانگ کرتگ اَنت کہ آ وتی کار ءَ گوں دزبند بیتگ اَنت ءُ چریشی ءَ کار کنوکیں کارمند زدگ بیتگ اَنت ءُ مشینری تاوانبار بیتگ اَنت –

ھمے وڑ ءَ بلوچستان ءِ دمگ مشکہ ءَ پاکستانی پوج ءِ سر ءَ بیتگیں اُرش ءِ زمہ واری بلوچستان لبریشن فرنٹ ءَ منّ اِتگ –

بی ایل ایف ءِ جارکش میجر گوھرام بلوچ ءَ وتی شنگ کرتگیں درشانی ءَ گوشتگ کہ گوستگیں شپ ءَ مئے سرمچاراں مشکہ ءُ آرمی ءِ ھیڈکوارٹر ءُ النگی ءَ پوجی پانگس ءِ سر ءَ اُرش کرتگ –

آئی ءَ گوشتگ کہ مشکہ گجر ءَ پاکستانی پوج ءِ ھیڈ کوارٹر مزنیں سلاھانی گون ءَ اُرش کرتگ ءُ ھمے رنگ ءَ النگی ءَ پانگس راکٹانی نشانگ کرتگ ءُ چرے اُرشاں پوج ءَ جانی ءُ مالی تاوانانی دیمپانی کنگ کپتگ –

چریشاں ابید بلوچ ریپبلکن گارڈ ءَ ھم رسانکدراں شنگ کرتگیں وتی درشانی ءَ پاکستانی پوج ءِ سر ءَ بیتگیں اُرش ءِ زمہ واری منّ اِتگ –

بی آر جی ءِ جارکش دوستین بلوچ ءَ گوشتگ کہ ڈیرہ مراد جمالی ءَ مزدور چوک ءَ پاکستانی پوج ءِ چیریں ادارھانی گاڑی ءِ سر ءَ دزبمبے چگل داتگ –

آئی ءَ گوشتگ کہ چرے اُرش ءِ آسر ءَ یک کارمندے مرتگ ءُ دو ٹپی بیتگ اَنت –

بلوچستان ءَ ھمک روچ اے وڑیں اُرشانی ھال چاگردی رسانکجاھاں گندگ ءَ آیگ ءَ اَنت-

بلوچستان ءِ دمگ پنجگور ءَ ناشناسیں گاڑی سواراں ایرانی ءَ آؤکیں گاڑی ءِ سر ءَ تیرگواری کرتگ ءُ چریشی ءَ بیران بیتگ اَنت –

تیرگواری ءِ وئیل پنجگور ءِ بنجاھی شھر چتکان ءَ دیم ءَ اتکگ کہ اود ءَ بیران بیتگینانی تہ ءَ ھان جان ء شیر مھمد ءُ علی ء امیر بکش ءِ ناماں زانگ بیتگ اَنت –

ھان جان بلوچی زبان ءِ شائر فضل شیر ءِ مستریں برات اِنت –

دمگی مردمانی رد ءَ جتگیں مردم ایرانی آؤکیں گاڑی ءَ سوار بیتگ اَنت کہ سلاہ بندیں مردماں تیرباران کرتگ ءُ کُشتگ اَنت –

زانگ بہ بیت ھان جان سال دوھزار ءُ ھبدہ ءَ پاکستانی پوج ءَ آئی ءِ لوگ ءَ آ بیگواہ کرتگ ءُ بازیں وھداں بیگواھی ءَ پد یل کنگ بیتگ، مروچی بیتگیں وئیل ءِ بارہ ءَ گیشیں سرپدی نہ بیتگ اَنت –

ھمے وڑ ءَ کیچ ءُ ڈیرہ بگٹی ءَ تیرگواری وئیلاں دو مردم بیران بیتگ اَنت –

ڈیرہ بگٹی ءِ دمگ سوئی ءَ ناشناسیں سلاہ بندیں مردماں تیرگواری کرتگ ءُ برکت پنام ءِ اندھا کُشتگ –

ھمے وڑ ءَ کیچ ءِ دمگ بلیدہ ءَ سلاہ بندیں مردماں تیرگواری کرتگ ءُ اسماعیل ء ابراھیم نامیں مردمے کُشتگ –

نبشتانک: چاگرد ءِ رُدوم ءُ نپسیاتی لیکہ

نبشتہ کار: شھزاد اسلم

دی بلوچستان پوسٹ

ارستو ءِ گوشگ اِنت کہ انسان چاگردی ھیوانے بزاں بے چاگرد ءَ انسان زندگی کُت نہ کنت انسان ایوک ءَ بے چاگرد ءِ کُمک ءَ زندگ بوت نہ کنت مئے پگر، جیڈگ، مارگ درست گوں چاگرد ءَ بندوک انت ما چاگرد ءَ اڈّ دئے ایں ءُ چاگرد مارا اڈّ دنت- اے یک سرجمیں سبجکٹے (subject) جوڈ کنگ بوتگ کہ نپر (individual) ءِ سیادی گوں چاگرد ءَ چون اِنت یا چوں بہ بیت ءُ چاگرد نپر ءِ کِرد ءِ سر ءَ چوں اسر دور دنت-

نپری کِرد ءِ اڈّ دیوک چاگردی راستی انت، چاگرد ءِ دود ءُ راھبند انت- اگاں چاگرد ءِ دود مُھکم بہ بنت گڑا گمان امیش بیت کہ چاگرد ءِ گیشتریں نپر ھم مھکمیں کِردے ءِ واھند بنت اگاں اشی ءِ چپ بہ بیت گڑا آسر ئِے اوں چپ گندگ ءَ کیت چاگردی راھبند نزور بہ بنت گڑا اشی ءِ آسر مارا نپر ءِ کرد ءُ کارپدانی تہ ءَ گندگ ءَ کیت-

چاگرد ءِ پھنات سک باز انت، من بس یک پھناتے ءِ سر ءَ چمشانک دے آں-من بس نپسیاتی تک ءَ چاگرد ءَ چارگ ءِ جُھد ءَ کن آں انچوش کہ ھمُک نپر یک نپسیاتے دار ایت،ھمئے وڑ ءَ ھمک چاگر ءِ اوں یک مُچّی نپسیاتے بیت کہ آئی ءَ را کُل چاگرد ءِ مردم اڈّ دینت- ھمُک چاگرد ءِ تہ ءَ توانائیں مردم ھست ءُ ناشرکار ھم بلے نپسیات شرّی ءُ ناشری ءِ روتگاں در کپ ایت ءُ آئی ءِ سوب ءُ ھلّتاں در گیجگ ءِ جُھد کنت-

نپسیات گْوش ایت کہ مردم چاگرد ءِ تہ ءَ ھما کِرد ءَ پیلو کنت کہ چاگرد گوں آئی ءَ ھما وڈ ساڈی بیت بزاں مردم چاگرد ءَ را بیر گیت چاگرد ءَ گوں آئی ءَ ھما وڑ کُتگ آ گوں چاگرد ءَ هما وڑ کنت شر پہ ھیر، بلے بزاں ھمُک ناشریں مردم کہ چاگرد ءَ را تاوان دنت، گڑا ما سرپد بہ ایں کہ آ یک انچیں مردمے بوت کنت کہ چاگرد ءَ آئی ءَ را وڑے نا وڑے ءَ تاوان داتگ آئی ءَ مئے چاگرد ءِ تہ ءَ رُدوم زُرتگ اگاں آ ناشری کنت، چاگرد ءِ مُچّی نپ ءِ ھِلاپ ءَ روت، چاگرد ءَ تاوان دنت، گُڑا ما سرپد بہ ایں کہ اِے نپر مئے چاگرد ءِ زوراکیانی آماچ بوتگ یا چاگرد ءَ اشی ءِ تب نزورتگ، یا چاگرد ءِ تہ ءَ کلاگ زورگ بوتگ یا کُجام ھم رنگ ءَ مئے چاگرد پہ آئی ءَ تاوان بار بوتگ پمیشکا نوں آ چاگرد ءَ بیر گیت آئی ءِ کِرد چاگرد ءِ مُچّی نپ ءِ ھِلاپ بنت آ چاگرد ءِ ھمراہ داری ءَ نہ کنت آ پہ چاگرد ءَ بدوایے بیت ءُ چاگرد ءَ تاوان بار کنت-

ما وتی چاگرد ءَ بچار ایں کہ ھمُک ھما مردم کہ ما آیاں چاگرد ءِ دژمن لیک ایں، آیانی کِرد ءِ چارگ ءَ ساری ما کدی جُھد کُتگ کہ آیانی کِرد ءِ پشتدر ءَ نپسیاتی راستیانی سر ءَ چمشناکے بدیاں! ما کدی مارتگ کہ اے ھما مردم بوت کت کن انت کہ sexually abuse کنگ بوتگ انت، ایر جنگ بوتگ انت، لوڈی گْوشگ بوتگ انت، گلام گْوشگ بوتگ انت، ناانساپی ءِ آماچ بوتگ انت، کم شرپ کنگ بوتگ انت، پہ نانے ءَ چمدار کنگ بوتگ انت، لٹ ءُ کُٹ کنگ بوتگ انت، نام ءُ دپ کنگ بوتگ انت، کلاگ زورگ بوتگ انت ءُ دگہ چے چے مردم ھچبر نزور یا زور آور نہ بیت، مردم ھچر شر یا ھراب نہ بیت، چاگردی راھبند ءُ دود آئی ءَ را شر یا ھراب کن انت چاگرد آئی ءَ را شرپ دنت یا بے شرپ کنت ھمئے وڑ ءَ نپر اوں گوں چاگرد ءَ ھما وڑ ساڑی بیت کہ چاگرد گوں آئی ءَ ھما ھساب ءَ ساڑی بوتگ-

نپسیات گْوش ایت کہ چیز ھچبر پراموش بوت نہ بنت، بلکیں مئے لاشئور ءِ تہ ءَ پشت کپ انت چاگرد ءِ دُرائیں کارپد مئے زھن ءَ نکش بنت ءُ یک نہ یک وھدے وت ءَ پدّر کن انت ءُ هما وھد ءَ کہ بیرگیری ءِ موکل بہ رس ایت گڑا مردم ھِچ چک ءُ پد نہ بیت ءُ چاگرد ءَ را وتی رنگ ءَ پیش دار ایت ھما وڑ ءَ کہ چاگرد ءَ وتی رنگ پیش داشتگ-

بے شرپیں مردم، کلاگ بستگیں مردم، اجالت بیتگیں مردم، نزوریں مردم، ھکّل بیتگیں مردم، جھل جتگیں مردم، نو پہ کُجام اوست ءَ اے مردمانی سر ءَ ھیر ءِ اُمیت کنگ بہ بیت یا پرچا چُش بوت مہ کنت کہ اے پہ چاگرد ءَ هما وڈ بہ بنت کہ چاگرد گوں اِشاں ھما وڑ بوتگ! پرچا اے پہ چاگرد ءَ ھیر بہ لوٹ انت وھدے کہ چاگرد ءِ تہ ءَ اِشاں پہ وت ھیر نہ دیستگ! پرچا وتی چاگرد ءِ سر ءَ پَھر بہ بند انت وھدے کہ چاگرد ءَ آیانی سر ءَ پَھر نہ بستگ- کُجام وشّی ءَ وتی دودانی سر ءَ ناز بہ کن انت وھدے کہ دوداں آیاناں کم تر ءُ نزور تر پدّر کتگ آ پرچا بدواھانی ھمراہ مہ بنت، پرچا دژمن ءِ بار ءَ سبک مہ کن انت وھدے کہ چاگر پہ آیاں دوزواہ نہ بوتگ-

اے ٹوئیں نپسیاتی راستی انت کہ چاگرد ءِ سر ءُ اسر دور دینت، امنچوک کہ اشانی سر ءَ دلگوشی دیگ مہ بیت یا اے مارگ مہ بنت ما تری پراموش بہ بہ ایں، ما بہ مار ایں، بلے اے راستی مئے چاگرد ءَ اڈّ دے انت ما وتی چاگرد ءَ بچار ایں، وتی مھلوک ءِ چاگردی کِردانی سر ءَ چمشانک بدی ایں، وتی چاگرد ءِ سر ءَ چمشانک بدی ایں، مارا کُجام نزوری گِندگ ءَ کاینت اگاں یک چاگردے یک نزوریں مردے پیداک کُت کنت گُڑا آ چاگرد نزور انت- نزوری چاگرد ءِ جند ءِ تہ ءَ هست اِنت- اگاں ما اے نزوریاں در مہ گیج ایں، اے نزوریاں مہ مار ایں، اشاں ھلاس کنگ ءِ جھد مہ کن ایں، گُڑا اے نِزوری مئے چاگرد ءَ کم کم ءَ چو وروک ءَ وران کنت ءُ سرجمیں چاگرد چیر ترّان بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ بلوچستان ءِ دمگ کچلاک ءَ روجھلی شھدگ ءَ ڈی ایچ اے ءِ نزیک ءَ گاڑی ءِ دگ ءِ وئیل ءِ آماچ بیتگ-

وئیل ءَ ضیاء خان نامی ئیں مردمے بیران بیتگ ءُ وئیل ءَ پد انتزامیہ ءَ سر بیتگ ءُ آئی ءِ جون چِست کنگ ءُ شال ءَ برگ بیتگ –

ھمے وڑ ءَ ڈیر اللہ یار ءَ یک گاڑی ءِ دگ ءِ وئیل ءِ آماچ بیتگ ءُ اود ءَ زالبول زدگ بیتگ اَنت –

گیشیں ھالانی رد ءَ ڈیرہ اللہ یار ءِ دمگ کولپور ءَ ڈمپر ءِ ٹکر ءَ سَے زالبولاں ھوار چار مردم زدگ بیتگ اَنت –

زدگ بیتگیں زالبول ءُ مردین چِست کنگ ءُ شال ءَ ٹپانی درمانی ءَ برگ بیتگ اَنت –

بلوچستان ءَ ھلاس نہ بیوکیں وئیلاں ھمک روچ بازیں کچے ءَ مردم بیران ءُ زدگ بیگ ءَ اَنت –

بلوچستان ءَ ھواریں مردمانی گوشگ اِنت کہ دگانی شر نہ بیگ ءِ ھواری ءَ گاڑیانی ڈرائیور ھم ترند رو اَنت چریشی ءَ گاڑی آیانی دستاں لگوش اَنت ءُ تاوانباری بنت –

بلوچ اسٹوڈنٹس ایکشن کمیٹی شال ءِ نیمگ ءَ گوستگیں شپ ءَ بی ایم سی ءَ لبزانکی مراگاہ برجم دارگ بیتگ –

مراگاہ جتا جتائیں سرھالانی سر ءَ بلوچی زبان ءِ بنکی نبشتگی رھبند، کسمانک ءُ جتا جتائیں تھراں ھواریں باوست بیتگ اَنت –

لبزانکی مراگاہ ءَ پروفیسر ھامد بلوچ، پروفیسر اے آر داد ءُ پروفیسر رھیم بلوچ گچینی ءِ مھمان بیتگ اَنت،اشانی ھواری ءَ تلو ءِ سر ءَ مسلم شفعی ءُ آسم زھیر ءَ گچینی ءِ مھمانی میان ءَ بلوچی لبزانک ءُ زبان ءِ درگت ءَ جُست ءُ پرس کرتگ اَنت –

مراگاہ ءَ بازیں مردماں نودربر ءُ مردماں بھر زرتگ ءُ لبزانکی درچ ءَ دیوان ءَ دلگوش بیتگ اَنت –

مراگاہ ءَ بلوچی زبان ءِ پدمنتگی ءُ پشکپگ ءِ بارہ ءَ گپ ءُ تران بیتگ ءُ بازیں سرھالانی سر ءَ گپ بیتگ اَنت –

مراگاہ ءَ اھدی شائری ءُ بلوچی زبان ءِ بنریشگ ءِ سر ءَ گپ بیتگ اَنت دیوال ءَ بھر زیروکیں زانتکار ءُ کواساں وتی وتی ھیال ءُ لیکہ پہ بلوچی زبان ءَ درشان کرتگ ءُ نودر ءُ دیوان ءَ بھر زیروکیں مردم سرپد کرتگ اَنت –

مراگاہ ءَ بھر زیروکیں مردماں گوشت کہ بلوچی زبان ءِ پشکپگ ءِ گیشتریں سوب ایش اَنت آئی ءَ تنی وھدی ھچ کمک ءُ دزرس نیست کہ آئی ءَ مزنیں ادارہ ءُ دگہ کارے جوڑ کرت بہ کنت-

دیوان ءِ گڈسر ءَ بلوچستان ءِ بیگواھیں مردمانی درچ ءَ یک کسانوکیں کردے ھم پیش کنگ بیتگ ءُ اشی ءَ ابید بانک کریمہ بلوچ ءُ ساجد ھسین ءِ اکس ءُ تامر بند اسکرین ءَ پیشدارگ بیتگ اَنت –