TBP Balochi

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ شش روچ سرجم بوتگ – گوستگیں سینیٹر مھیم خان بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

بیگواھیں راشد حسین بلوچ ءِ مات ءَ بنجل ءَ اتکگ ءُ زھرشانی نبشتہ کنائینتگ – آئی ءِ گوشگ ات کہ اسلام آباد ءِ زھرشانی ءَ پد پاکستان ءِ سروزیر عمران خان ءَ بیگواھیں مردمانی کھولانی گون ءَ دچار کپتگ ءُ باور کنائینتگ کہ بیگواھیں مردمانی جیڑہ گیش ءُ گیوار کنگ بیت، بلے انگت ھچ وڑیں گامگیج زورگ نہ بوتگ –

راشد حسین بلوچ ءِ مات ءِ گوشگ ات کہ منی چُک متحدہ عرب امارات ءَ چہ زورانسری آوار جنگ ءُ بیگواہ کنگ ءَ پد پاکستان ءَ آرگ بوتگ، گواھانی بوگ ءَ ابید کمیشن ءُ آمیدگساں پیشی ءِ میان ءَ من ءَ گوشگ بوتگ کہ راشد حسین پاکستان ءَ نہ انت بلے راشد حسین ھمے ملک ءِ نندوک انت ھمے ھاتر ءَ پاکستان ءِ ھکومت متحدہ عرب امارات ءَ پسو بہ لوٹ ایت کہ راشد حسین کجا انت –

ھمے وھد ءَ وی بی ایم پی ءِ رھشون ماما قدیر بلوچ ءِ گوشگ ات کہ ائید ءِ وشی ءُ شادمانی ءِ اسلامی مزہبی تہوار ئے – ائید ءِ روچ ءَ سداں ھزاراں میل دوراں نندوکیں مردم وتی مردمانی گندوکی ءَ کایاں مھر بھر کنگ ءِ ھاتر ءَ یک ءِ دومی ءَ گورمباز کن انت –

آئی ءِ گوشگ ات کہ اے تھوار ءَ ھکئیں وشی ھما وھد ءَ رسیت کہ گسر کپتگیناں گوں دچار کپگ ءُ کھول ءِ درسیں مردمانی یکجاہ بوگ ءَ رس ایت بلے گوستگیں دھکاں چہ بلوچ راج ءِ تہ ءَ ائید ء وشی نیست انت نوں اے تہوار وشیاں وتی دوستگیں مردمانی گسر کپگ چہ آھانی زہنی روھانی گم ءُ بے کراری ءَ گیش کنت –

شیشان ءَ زوگیریں پوج ءِ کاروان ءِ سر ءَ اُرش کُتگ جانی ءُ مالی تاوان داتگ – جئیند بلوچ

سربوتگیں ھالانی رد ءَ ھوشاپ ءِ دمگ شیشان ءَ ناشناسیں سلاہ بندیں مردماں پاکستانی پوج ءِ کاروان ءِ سر ءَ اُرش کُتگ – اُرش ءَ پاکستانی پوج ءَ جانی ءُ مالی تاوانانی دیمپانی کنگ کپتگ وھدیکہ سلاہ بندیں مردم چہ جنگجاہ ءَ در آیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِجارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں کیچ ءِ دمگ ھوشاپ شیشان ءِ میتگ ءَ زورگیریں پاکستانی پوج ءِ کاروان ءِ سر ءَ اُرش کتگ- اے اُرش ءَ بلوچ سرمچاراں مزنیں سلاہ کارمرز کرتگ ءُ دژمنیں پوج ءِ دو کارمند ھما دمان ءَ مرتگ اَنت ءُ دگہ سَے زدگ بوتگ اَنت، وھدیکہ کاروان ءَ ھواریں گاڑیاں سک باز تاوان رس اتگ-

گڈسر ءَ جارکش جئیند بلوچ ءَ گوشتگ کہ بی ایل اے اے گپ ءُ مسام ءَ کنت کہ وتی مکسد ءِ سرجمی ءَ تاں مئے اُرش برجاہ مان انت –

بلوچستان ءَ بازیں جاھاں کتابانی نادسرسی ءَ بلوچ پدریچ ءِ آؤکیں باندات وتی زانت ءَ زبھر بیان اَنت ھمے درچ ءَ باز ھند ءَ دمگاں دمگی نودربر وتی کمک ءَ وت کتابجاہ پچ کنگ ءُ نوکیں پدریچ ءَ زانت ءِ راہ ءَ پرینگ ءَ اَنت –

چاگردی رسانکجاھاں وھد وھد ءِ سر ءَ بلوچستان ءِ بازیں جاھاں کتابی دیوان ءُ اشانی ھواری ءَ جتا جتائیں جاھاں کتاب فیسٹول ھم جنگ ءَ گندگ ءَ کاینت –

ھمے درچ ءَ ڈیرہ بگٹی ءِ دمگ زین کوہ ءَ دمگ ءِ نودربراں وتی کمک ءَ وت زین کوہ “لائبریری ” ءِ بنھشت ایر کرتگ- لائبریری ءَ کمے کساس ءَ کتاب ءِ مان بیگ ءِ ھواری ءَ آیاں وتی لائبریری ءِ بنھِشت ایر کرتگ ءُ نوکیں باندات ءَ یک گامے ءِ جنزگ ءَ جنزینتگ –

لائبریری ءِ واکداراں چاگردی رسانکجاہ فیس بک ءَ وتی کتاب جاہ ءِ نام ءَ پیج ءَ شنگ کرتگیں جار ءَ گوشتگ کہ کتاب جاہ ءَ کتابی اژدری درکار اِنت –

آئی ءَ جار ءَ بلوچ نودربر گل، بلوچ اسٹوڈنٹ کونسلز، ادیب ءُ شائراں ھوار کتاب دوستیں مردماں گوں دزبندی کرتگ ءُ گوشتگ کہ اے کتاب جاہ ءَ کتابی واستا مارا کُمک بہ کن اَنت –

آیانی گوشگ اِنت کتابانی آرگ ءَ مئے لائبریری ءَ اتکگیں مردمانی واستا پہ زانت ءَ گیشتریں کمکی بیت کن اَنت –

زانگ بہ بیت بلوچستان ءَ پرکاریں بلوچ نودربر گل بلوچ اسٹوڈنٹس ایکشن کمیٹی ءَ ھم بلوچستان ءِ بازیں جاھاں کتابی نیاد ایر کرتگ ءُ اود ءَ کتابی جم کنگ ءَ ھم فیسٹول جنگ بیتگ اَنت –

نبشتانک: بیوسانی لنٹانی بچکند

ننشتہ کار: ھدایت بلوچ

دی بلوچستان پوسٹ

رمزان ءِ ماہ ءِ گُڈی روچ اَت بیگاہ ءِ وھد اَت منی پت ءَ من ءَ توار کُت ءُ گُشت ئِے وتی براتُک ءَ بزور دکان ءَ رو اِیں پہ شما چَوٹ گراں ،من چہ گَلا بال بوتاں وتی براتک توار کُت ءُ دست ءَ گپت پت ءِ دُمب ءَ بوت اِیں دکان ءَ شُت اِیں دکان سک رش ءُ کشّ ات، پمشکا کہ باندا ائید اَت ،مردم پہ وت ءَ چیز زورگ ءَ اِت انت، من پہ وت ءَ شوکیں جوڑی یے چَوٹ زُرت پت ءَ منی براستک ءِ واستا چوٹ زُرت گھارُکانی واستا مود بند ءُ ھنّی زُرت دگہ دبوجی سامان زُرت ما لوگ ءَ اھت اِیں۔

دبوج بوت ائیدے شپ اَت من سک گَلہ بال اتاں کہ سُھب ءَ ائید انت مات ءَ مئے دست ھنی لگاشت اَنت من چہ ائید ءِ گلہ واب نہ کپتاں۔ ھمے ھیالانی تہ ءَ نزاناں کُجام وھد ءَ منی چم بند بوتاں مات ءِ توار اَت پادا اِت زھگان جان بہ شود اِت ائیدے نماز ءَ بُہ رو اِت، من چِست بوتاں جان شُشت نوکیں گُد گور ءَ کُرت اَنت چَوٹ پادا کُرت انت، وت ءَ را سینگار اِت، مات ءَ سیوئی یے گراستگ ات، ما سیوئی وارت ءُ پاد اھت اِیں پت ءِ دُمب ءَ بوت ءُ دیم پہ ائیدگاہ ءَ شُت اِیں من ءُ منی لھتیں سنگت مسیت ءِ دپ ءَ نشت اِیں، ملا واز کنگ ءَ اَت ، منی سنگتاں نوکیں گُد گور ءَ اَت ما ھر یکے وتی گُد ءُ چَوٹانی توسیپ ءَ ات اِیں ، ھمد ءَ مئے میتگ ءِ یک کماشے گوست کہ یک گونڈوے دست ءَ گپتگ اِت ئِے ،کماش گوں وتی کْوھیں گُدان ءُ اسپیتُکیں دزمال ءَ پاد ءِ سواساں گِر کنان اَت دیم پہ مسیت ءَ، گونڈو ھمے گوں سِستکیں چمپلاں دِرتگیں گُداں ھمے کماش ءِ دست گپتگ اَت ءُ مسیت ءَ روگ ءَ اَت، گوں اشانی گِندگ ءَ منی چم گُش ئے دراھت اَنت، من ھیران بوتاں کہ مرچی ائید ءِ روچ ءَ ایشان ءَ وتی نوکیں گُد پرچا گورا نہ انت؟
نماز ھلاس بوت من پت ءِ ھمراھی ءَ دیم پہ لوگ ءَ شُتاں ، بلے دُرسیں راہ ءَ بس من ھمے جیڑگ ءَ اتاں ایشان چے ءَ وتی نوکیں گُد گورا نہ کُرتگ اَنت۔ لوگ ءَ کہ سر بوتاں من مات ءَ جُست کُرت کہ امّان مرچی ائید بوتگ دُرسیں میتگ ءِ مردمان ءَ نوک نوکیں گُد گورا بوتگ بلے یک کماشے گوں یک گونڈوے ءَ ھمود ءَ نماز ءَ اھتگ اَت کہ ایشاں وتی نوکیں گُد گورا نہ کُرتگ اِت اَنت؟ –

مات ءَ منی پت ءَ را جُست کت، “اے کماش کے بوتگ؟” پت ءَ پسّو دات، ” اے کماش شھید بلوچ ءِ پت بوتگ” منی مات ءِ چم پُر ارس بوت اَنت، دست منی سر ءَ لگاشت ءُ گُشت ،” منی چک اے گریب ءُ بیوس اَنت ایشان ءَ نوکیں گُد نیست، اے گونڈو ءِ پت گوں گلزمین ءِ جنگولیں سرمچاراں گون بوتگ ، گوں زوراکاں جنگ کنان ءَ شھید بوتگ، اے گونڈو چوروے ایشان ءَ چُشیں زر ءُ مالے نیست کہ پہ وت ءَ نوکیں گُد ءُ چوٹ بِہ گر اَنت” منی چم گُش ئے تھار بوت اَنت کہ یک مردمے وتی زندگی ءَ پہ مادریں وتن ءَ پہ راج ءِ وشیں باندات ندر بہ کنت بلے چہ آئی شھادت ءَ پد ھمے راج ءِ تہ ءَ   ھچ کس ءَ سما مہ بیت کہ ایشانی سر ءَ کجام کیامت گوزگ ءَ اِنت، ھچ کس ءَ ھمے سُد مہ بیت کہ ایشان ءَ لُنکھے نان ھست پہ روگ ءَ یا کہ نیست ھمے رمزان ءَ کہ ما وش تامیں ورگ ور اِیں، ایشانی دست دپ ءَ روت یا ناں ،ھمے ائید ءُ شاتکامی بنت ما نوکیں گداں گورا کن اِیں، وتی زھگاں نوکیں گُد گورا دے اِیں، کسے ءَ اے سما بیت اشان ءَ گُد ءُ چمپل ھست یا نا ؟ بس پہ شھیدانانی اکسانی پیس بُک ءَ ایر کنگ ءَ ھچ من تو راج دوست نہ بہ اِیں، من ءُ تو ھما وھد ءَ راج دوست بہ ایں، کہ یک راج دوستیں زمیں پھازیں شھیدے ءِ زھگانی بے وسی ءُ ھشکیں لنٹانی بچکند جوڑ بہ بَہ اِیں گڑا من تو راج دوست بہ ایں اگاں چُشیں چیزانی سما مارا مہ بیت گڑا سد لانت بات مئیگ ءُ چُشیں راج ءِ بے سنچ ءُ بے سُدیں مالدار ءُ واجہ ءُ میرانی سر ءَ ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

تیرگواری وئیل شال ءُ مستونگ ءَ دیم ءَ اتکگ اَنت شال ءَ پولیس ءِ تیرگواری ءَ یک مردمے بیران، مستونگ ءَ لوگواجہ ءَ وتی زال ءِ ھمراھی ءَ یک مردمے کشتگ ءُ پنجگور ءَ یک جونے دزکپتگ –

سر بیتگیں ھالانی رد ءَ بلوچستان ءِ بنجاھی شھر شال سریاب دگ ءَ پولیس ءَ یک گاڑی ءِ سر ءَ تیرگواری کرتگ ءُ یک مردمے کُشتگ ءُ یکے زدگ کرتگ –

پولیس ءِ رد ءَ گاڑی ءِ دست دیگ ءَ گاڑی نہ اوشتاتگ ءُ چریشی ءَ ایگل اسکواڈ ءِ کارندھاں گاڑی ءِ سر ءَ تیرگواری کرتگ ءُ چریشی ءَ یک مردمے بیران بیتگ ءُ یکے زدگ بیتگ – بیران بیتگیں مردم ءِ پجار فیضان جتک ء میر داد مھمد جتک ءِ نام ءَ زانگ بیتگ –

وئیل ءَ پد مھلوک ءَ دگ بند کرتگ ءُ زھرشانی بندات کرتگ ءُ کوشکارانی دزگیری ءِ لوٹ کرتگ –

چاگردی رسانکجاھاں شنگ بیتگیں تامربندے ءَ وئیل بیران بیتگیں فیضان جتک ءِ برات ءَ گوشتگ کہ منی گاڑی اوشتوک بیتگ ءُ پولیس ءَ آئی ءِ سر ءَ تیرگواری کرتگ ءُ منی برات کُشتگ –

آئی ءِ رد ءَ مپت ءِ ھدا منی برات کُشگ بیتگ ءُ منی برات ءِ کوشکاریں کارندہ گرگ ءُ سزا دیگ بہ بیت –

ھمے درگت ءَ بلوچستان ءِ سرکار ءِ جارکش لیاقت شاھوانی ءَ سریاب دگ ءَ ناگتی پولیس ءِ تیرگواری ءَ ورنا فیضان جتک ءِ بیرانی ءُ آئی ءِ ھمراہ ءِ زدگ بیگ ءِ پدردی درشان کرتگ –

آئی ءَ گوشتگ کہ پولیس ءِ مزنیں واک اے وئیل ءِ بارہ ءَ پَٹ ءُ پول کنگ ءِ پرمان کرتگ –

ھمے وڑ ءَ مستونگ ءَ لوگواجہ ءَ تیرگواری کرتگ ءُ وتی زال ءِ ھمراھی ءَ دگہ مردم ءِ کُشتگ –

گیشیں ھالانی رد ءَ مستونگ کھڈکوچہ ءَ لوگواجہ ءَ تیرگواری کرتگ ءُ وتی زال ءِ ھمراھی ءَ دگہ یک مردمے کُشتگ، وئیل ءَ پد لیویز کارمنداں کوشکار ءِ دزگیری ءِ پرمان کرتگ –

ھمے وڑ ءَ پنجگور ءَ تیرسپتگیں جون ءِ دزکپتگ –

پنجگور ءَ رکشان کور ءَ یک تیرسپتگیں جون ءِ دزکپتگ کہ آئی ءِ پجار گل شیر ء عبدالباقی ءِ نام ءَ زانگ بیتگ –

دمگی مردمانی رد ءَ گل شیر لھتے روچ ءَ پیسر دمگ ءَ پرکاریں چیریں ادارھانی چیردستی ءَ جوڑ کرتگیں “ڈیتھ اسکواڈ ” ءِ مردماں رھوت کرتگ ءُ وتی گور ءَ لوٹائینتگ چریشی ءَ آ بیگواہ بیتگ ءُ گوستگیں روچ ءَ آئی ءِ تیرسپتگیں جون رکشان کور ءَ دزکپتگ –

زانگ بہ بیت گوستگیں بازیں دو روچانی تہ ءَ پنجگور ءَ تیرگواری وئیلاں اے سیمی مردم اِنت کہ بیران بیگ ءَ اِنت کہ چریشی ءَ پیسر سلاہ بندیں مردمانی تیرگواری ءَ بلوچی زبان ءِ شائر فضل شیر ءِ مستریں برات ءِ ھمراھی ءَ یک کسے جنگ بیتگ اِت اَنت –

سیاسی مردمانی گوشگ اِنت بلوچستان ءَ ریاست ءِ نیمگ ءَ ڈیتھ اسکواڈ برجم کنگ بیتگ ءُ چریشی ءَ لس مردمانی کُشت ءُ کوش ءُ آوارجنیاں اے ٹولی دزمانجن اَنت –

بلوچستان فوڈ اتھارٹی ءَ پَٹ ءُ پول کرتگ ءُ دگرانی ناماں جوڑ کرتگیں چیز دزکپتگ اَنت ءُ فیکٹری سیل کنگ بیتگ –

نامی ئیں برانڈز ءِ نام ءَ کاربونیٹڈڈرنکس جوڑ کنوکیں فیکٹری گرگ بیتگ، شال ءِ دمگ چمن ھاؤسنگ اسکیم ءِ ڈپٹی ڈائریکٹر آپریشنز نگھت دین ءُ سجاد علی ءِ سروکی ءَ بی ایف اے فوڈ “وردنی گر ءُ دار “سیفٹی ٹیم ءَ پَٹ ءُ پول کرتگ –

چریشی ءِ آسر ءَ دروگیں کمپنی ءَ نامی ئیں کمپنیانی کوکاکولا، فانٹا، ڈیو ءُ اسٹنگ ھزاراں لیٹر دروگیں نوشگی دزکپتگ اَنت چریشی ءِ آسر ءَ فیکٹری سیل کتگ –

ڈی جی بلوچستان فوڈ اتھارٹی ابراھیم بلوچ ءِ رد ءَ شھر ءِ چیریں جاھاں جھمنندی لوگے ءِ دروشم ءَ گپتگیں فیکٹری سیٹ اپ ءِ سر ءَ نگاہ ایر کتگ اَنت، چریشی ءَ فیکٹری ءَ نامی ئیں برانڈزانی کولڈرنکس بازیں کچے ءَ جم کتگ ءُ رمزان ءُ عید ءِ واستا اسٹور کرتگ اَنت ءُ فیکٹری ءِ تہ ءَ شتگ ءُ آئی ءِ دراھیں چیزانی پَٹ ءُ پول کنگ ءَ پد فیکٹری بند کرتگ –

ڈائریکٹر جنرل بی ایف اے ءَ گوشت: بے سریں کاربونیٹڈڈرنکساں جتا جتائیں نادراھی تالان بیت کن انت، وسریں بوتلاں تچکیں لیبل ءِ جنگ ءَ مھلوک زانت نہ کنت ءُ نامی ئیں برانڈانی نوشگی چیزانی نام ءَ نکلی کنگ بیتگ ءُ شال ءَ ھوار بازیں جاھاں بھاھی بیتگ اَنت –

ھور ءُ تور کرتگیں نوشکاریانی بگیری ءَ بی ایف اے سرجم ءَ برانز گپت اِنت بے سریں ورگ جوڑ کنگ ورد ءُ وردنیانی ھلاس کنگ الم کنگ بیت اِنت –

پنجگور ءِ سیول ھسپتال ءِ ڈاکٹراں مروچی پریس کانفرنس کنان ءَ گوشتگ کہ لس مردم کاینت ءُ ایمرجنسی ءَ جاڑیگیں ڈاکٹرانی گون ءَ برانز گر اَنت ءُ آیاں بیھار دے اَنت –

پنجگور ایم ایس سول ھسپتال ءِ ڈاکٹر عزیز پی ایم اے سروک ڈاکٹر مھمد ایوب، پءرامیڈیکس ءِ سروک مھمد عارف بلوچ، ڈاکٹر نصرت اللہ، ڈاکٹر عرفان اللہ ءَ ھواریں بازیں ڈاکٹراں پنجگور ءَ پریس کانفرنس کنان ءَ گوشتگ کہ سَے روچاِ سول ھسپتال ءَ ایمرجنسی ءِ ڈاکٹرانی گون ءَ لس مردم برانز گرگ ءَ اَنت –

آیاں گوشت کہ مئے کسور بس ھمیش اِنت کہ ما ناوشیں جیڑھاں وتی پرز ءَ سرجم کنگ ءَ اِنت، ڈاکٹر ھچبر نہ لوٹ ایت کہ نادراہ زوال بہ بیت، آ ھرچ ھساب ءَ نادراہ ءِ رکینگ ءِ جھد ءَ کنت اشاں ابید ھم ڈاکٹرانی گون ءَ ناوشیں رویشانی دیمپانی کنگ کپگ اِنت –

آیاں گوشت کہ نِی اے جاور ھما کچ ءَ سر بیتگ اَنت ما دومی مردمانی رنگ ءَ دگانی سر ءَ در بہ کپ ایں ءُ زھرشانی بہ کن ایں –

آیاں گوشت کہ ھچ ڈیھ ءَ اے وڑ نہ بیت اود ءَ نادراہ ءِ بیرانی ءَ ڈاکٹر لَٹ شاپ کنگ بنت بلے ما لٹ شاپ کنگ بیگ ءَ ایں، آیاں گوشت کہ پنجگور ءَ اگاں کسے تیرانی آماچ یا دگہ وئیلے ءِ آماچ بیت گڑا آئی ءِ دراھیں زمہ اسٹاف ءِ سر ءَ لڈگ بیگ ءَ ایں آیاں گوشت اے وڑیں رویش بازیں وھداں پنجگور ءَ برجاہ اَنت بلے ما ھچ گپ دیم ءَ نیاؤرتگ –

آیاں گوشت سول ھسپتال ءَ اے وھد ءَ شش میڈیکل آفیسر اَنت ءُ ھپت نرسز ھرچ رنگ ءَ نادراھانی جاندراھی ءَ جھد کنگ ءَ اَنت –

آیاں گوشت کہ او پی ڈیز ءَ ابید ھم ما سَے ماھانی وھد ءَ یک ھزار ءِ کچ ءَ دگ ءِ وئیلانی آماچ بیتگیں کیس ھینڈل کتگ اَنت، اے وھد ءَ سرجمیں زور ڈی ایچ کیو ءِ سر ءَ اِنت ءُ اد ءَ پرائیوٹ ھسپتالانی نہ بیگ ءَ سامانی نہ بیگ ءَ اسٹاف دراھیں گر ءُ داراں کنگ ءَ اَنت –

آیاں گوشت کہ اد ءَ پنچ ڈاکٹرانی جاڑیگ بیگ ءَ اگاں یک ڈاکٹرے نادراہ بہ بیت گڑا مئے کار اوشت ءِ آماچ بیت کُت کنت –

آیاں گوشت کہ مئے ڈاکٹرانی تہ ءَ یک ڈاکٹر ءِ کرونا ءِ نادراھی ءِ سبب ءَ ڈیوٹی ءَ جاڑیگ نہ اِنت ءُ ھمیشی ءِ جیڑہ ءَ پندل کنگ ءُ اسٹاف ءِ گون ءَ بدتمیزی کنگ بیتگ اَنت –

آیاں گوشت کہ گوستگیں شپ ءَ پاھو ءِ دار ءَ درتکگیں مردمے ءِ زند ءِ رکینگ ءَ ابید ڈاکٹر توپکانی کُنداکاں گوں مانبندگ بیتگ اَنت –

آیاں گوشت کہ اے وڑیں رویش مئے گون ءَ بیگ ءَ اَنت ءُ ما چون اے جاوراں ڈیوٹی کرت کن ایں گیشیں ڈاکٹر اد ءَ آیگی بیتگ اَنت آ نِی بلکیں نیاینت گیشتریں جاہ ھالیگ اَنت آیاں مزن واکداراں گوں لوٹ کرتگ ءُ گوشتگ کہ ھسپتال ءِ ڈاکٹرانی ایش کنگ ءَ پیسر آ بیاینت ءُ اے گپاں دلگوش بہ کن اَنت ءُ رند ءَ دگہ چیزے ءَ بہ جیڑ اَنت –

روکپتی بلوچستان ءِ بنجاھی شھر دزاپ ءَ یک سالے ءَ ایرانی چیریں اداھانی دست ءَ آوار جنگ بیتگیں ھمزہ بیلرانی ءِ کھول ءَ دزبندی کرتگ ءُ گوشتگ کہ مئے زھگ یل کنگ بہ بیت –

آئی ءِ کھول ءِ رد ءَ ھمزہ گوستگیں سال ءِ بیست ءُ پنچ اپریل ءَ چِست کنگ بیتگ ءُ داں پنچ ماہ ءَ آئی ءِ بارہ ءَ ھچ ھال نہ بیتگ –

ھمزہ ءِ کھول ءِ رد ءَ پنچ ماہ ءَ پد رند ءَ ھال سر سرانی اتکگ ءُ سرکار ءَ جار پِرینتگ ءُ گوشتگ کہ ھمزہ ایران ءِ بگیری ءَ کار کنوکیں پاٹیاں ھوار بیتگ –

آئی ءِ کھول ءِ گوشگ اِنت گرگ ءَ پنچ ماہ ءَ رند ھمزہ گوں سَے ھمراھاں دزاپ ءِ مزن جیل ءَ برگ بیتگ اَنت –

ھمزہ ءِ کھول ءِ گوشگ اِنت ھمزہ ھما وھد ءَ داں گرگ ءُ گار کنگ بیتگ داں انیگ ءَ مارا ھچ دوچاری ءُ ھال ءُ اھوالی ءَ نئیشتگ اِت –

ھمزہ ءِ کھول ءِ گوشگ اِنت ھمزہ ھمے جیل ءَ بندیگ اِنت چریشاں ھمزہ ءِ لھتے ھمراھی ءَ کہ بندوک بیتگ اَنت آ پاھودیگ بیتگ اَنت –

ھمزہ ءِ کھول ءِ گوشگ اِنت مارا ھم ترس اِنت کہ ھمزہ ءَ ھما دگرانی رنگ ءَ پاھو مہ دنت ءُ انسان ءُ انسانی ھکانی ادارہ باید مئے کمک ءَ بہ کن اَنت –

آیاں گوشت کہ ھمزہ ءِ بندیگ ءُ گار کنگ ءَ مئے لوگ ءِ سرجمیں مردمانی زند بندیگ کنگ بیتگ ءُ ما ھمک روچ آئی ءِ راہ ءَ چاریگ اِنت –

زانگ بہ بیت روکپتی بلوچستان ءَ بازیں کچے ءُ مردمانی پاھو دیگ ءِ ھال چاگردی رسانکجاھاں شنگ بیگ ءَ اَنت –

روکپتی بلوچستان ءَ بندوکیں سیاسی ءُ انسانی ھکانی کارکنوکیں باسکانی گوشگ اِنت کہ اد ءَ سرکار مردماں گر ایت ءُ جیلانی تہ ءَ بندیگ کنگ ءُ وتی آمیدگسانی زور ءَ مردماں پاھو ءِ دار ءَ درنجگ ءَ اِنت

ننشتانک: زند ءَ گوں زندگی کنگ لوٹ ایت

نِبشتہ کار: سعید احمد بلوچ

دی بلوچستان پوسٹ

آ اے دھر ءِ دراھیں مردماں چہ جتائیں مردمے اَت پرچا کہ آ مدام گوں هیالاں زندگی کناں اَت آئی ءَ مدامی گُشت کہ ھر سکّی ءِ پُشت ءَ الّم وشی یے کیت آئی ءَ هچبر زندگی ءِ زنگ نہ جَت بلکیں آئی ءِ وڑ ءَ زندگی باز کم مردم کنت پرچا کہ مردم باز کم چوشیں اڑ ءُ جنجالاں کپ ایت چوش کہ آ کپتگ ات گوں همے مُشکل ءُ مسیبتاں شوکیں وڑے ءَ زندگی کنگ ءَ اَت۔ آئی ءِ هیال دائمی هما جاه ءَ پِٹ اَت کہ ھر سکّی ءِ پُشت ءَ وشی الّم کیت۔ گوں همے هیالاں آ زندگی ءَ گیشیں اڑ ءُ جنجالاں چَہ هم زندگی ءَ گیش ملار بوان اَت-

بلے اَنچُش گُش اَنت کہ اے دگنیا ءَ هما بامرد زندگی کُت کن اَنت کہ آ اے زندمان ءَ هچبر دلپروش مہ بنت ءُ ھر دابیں سکّی ءُ سوریانی دیم ءَ چو کوه ء البُرز ءَ مِک ءُ مھکم بہ بنت ءُ اے زندمان ءَ هجبر دلپروش ءُ پہ هرابیں راهانی گچینکاری کنوک لگورانی ءُ بے دلانی کار اَنت، زندگی ءَ ھرچ وڑیں سکّی ءُ سوریانی گوما چو مردی ءَ جنگ کنگ لوٹ ایت چُش کہ آ کنگ ءَ اَت-

من ھر وھدے آ دیست گوں مھروانیں بچکنداں من وت اَجکہ بیت آں ءُ جیڑ اِت اے کُجام داب ءِ انسانے کہ اے زندمان ءَ ھزار اڑ ءُ جنجال ءَ چہ ابید هم چش شادمان اِنت،آ پہ هما مردمانی واستا یک بلائیں درورے اَت کہ آ چَہ زندمان ءَ چہ دلپروش ءُ هرابیں راهانی گچین کنگ ءَ هچ چک ءُ پد نہ بوتگ اِت اَنت-

آ مدامی گوں هیالاں زندگ اَت، آئی ءِ زندمان جو اولاک ءِ داب ءَ اَت کہ اَنچُش اولاک بید ء تیل ءَ نہ جُنز ایت اَنچُش آ وتی زندمان ءَ گوں وتی هیالاں دیم ءَ بران اَت همے هیال اَت کہ آئی ءِ زندگ بوگ ءِ هاٹیگ ءِ بکشات ِاِتگ ئِے آ گوں همے هیالاں وتی زندمان ءَ دِکہ دیان ءُ دیم پہ وتی منزل ءَ جُنزان اَت هُدا بزانت کہ آئی ءَ وتی هیالانی توک ءَ وتی منزل چتوْ گچین کُتگ اَت بلے آ پہ وتی منزل ءَ ھر ساهت یک گامے دیم ءَ جنان اَت-

اے زندمان ءِ ھر دابیں جاوراں گوں مارا جنگ دارگی اِنت ءُ دیم ءَ جُنزگی اِنت چو لگور ءَ پُشت کنزگ ءُ رَدیں راهانی گچینکاری کنگی نہ اِنت اے زندگی بس یک برے دیگ بوتگ بس مارا گوں اے زند ءَ زندگی کنگ لوٹ ایت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ دمگ سراوان ءَ سلاہ بندیں مردماں تیرگواری کرتگ ءُ یک مردمے کُشتگ –

گیشیں ھالانی رد ءَ وئیل سراوان ءِ ھند شوشتری ءَ سلاہ بندیں مردماں تیرگواری کرتگ ءُ اود ءَ حمزہ گمشازئی ء برکت خان کُشتگ –

حمزہ گمشادزئی ءِ سر ءَ ھما وھد ءَ تیرگواری کنگ بیتگ کہ آ عشاء ءِ نماز ءَ تراویحاں پد آئی ءِ سر ءَ سلاہ بنداں تیرگواری کرتگ ءُ کُشتگ –

زانگ بہ بیت روکپتی بلوچستان ءَ بازیں وھداں تیرگواری وئیلاں مردمانی بیرانی ءُ زدگ ءِ بیگ ءِ ھال چاگردی رسانکجاھاں شنگ بیگ ءَ اَنت، گوستگیں شپ ءَ تیرگواری ءَ کوش ءِ سبب زانگ نہ بیتگ –

دومی نیمگ ءَ دمگی مردمانی گوشگ اِنت کہ سیستان ءُ بلوچستان ءَ بازیں مردمے ھمے رنگ ءَ سلاہ بندیں مردمانی تیرانی آماچ بیتگ اَنت ءُ آیانی گیشتریں سبب چیریں ادارھانی نیمگ ءَ لس مردمانی سلاہ بند کنگ اِنت کہ آ ھمک مردم ءِ سر ءَ تیرگواری کن اَنت ءُ وتی زاتی جیڑھانی سر ءَ لس مردماں کُشگ ءُ ریچگ ءَ اَنت –