TBP Balochi

نبشتانک: ڈاچی پوک نہ بیت

نبشتہ کار: ابدلستار بُگٹی

دی بلوچستان پوسٹ

”سڑدار، اگاں کلموّ مئیت گُڑا ڈاچی پُوک اِنت؟”سڑدار: سلیمانی گالوار ءِ بدلتوارے کہ بُنتوار ئِے (سردار) اِنت، کلموّ بلوچی زُبان ءِ زگریں گالے کہ اَربی ءَ (قلمہ) گْوش اَنت ئِے کہ ھمے کُران ءِ گالرِد ءِ وانگ ءَ بنی آدم مسلمان منّگ بیت پوک: چوناھا “پوک” ءِ بازیں مانا بنت بلے اد ءَ اِے گال ءِ بزانت (بے مُز) اِنت بزاں یک چیزے بے بھا زیان بیت یا ماں یک آمیدگِسے ءِ سوڑگ ءَ یک تبکے کَٹّ ایت ءُ دومی برّائین ایت ئِے بزاں سوڑگ ءِ برّائینگ ءِ تبک ءَ پوک گْوش اَنت۔

اِے بتل ءِ پژدر ءِ زانگ ءَ پیش ءَ مارا لھتیں چیز دلگوش کنگ لوٹ ایت کہ بلوچیت وت یک سرجمیں نیکراہ ءُ رھبندے، بلوچ راج ءِ دود ءُ ربیدگ، بلوچ راج ءِ ٹَکری رِد ءُ رھبند (ٹرائیبل روُلز) وت پیلوئیں کانود اَنت کہ آیانی تہ ءَ ھر وڑیں جیڑھانی توجِیل ھست اَنت۔

توری راج ءِ ٹَکرانی میان ءَ کِشت ءُ کِشارانی جیڑہ بہ بنت، بلوچ چاگِرد ءِ تہ ءِ ھمساھِگ ءُ سْیادانی سِیر ءُ سانگانی جیڑہ بہ بنت یا توری دُزّی، ڈُنگی، ویل ءُ جنگانی جیڑہ بہ بنت بزاں اے ڈولیں ھزاریں جیڑھانی توجیلّ بلوچی دود ءُ ربیدگ یا گْوش ئے بلوچیت ءِ تہ ءَ ھست انت کہ یک راجمستریں مُلک ءُ اُلسی سرکاری کانود ءِ توک ءَ بنت دلگوش بَہ اِت کہ من “بلوچیت” ءِ گال ءَ پمیشکا نبیسّ آں کہ منی نز ءَ “بلوچیت” وت یک نیکراھے ءُ من بلوچیت ءَ چہ دین ءُ نیکراہ گیشتر دوست دار آں چی ءَ کہ ما شش ھزار سال ءَ پیش بلوچ اِت ایں چریشی ءَ من اول وت ءَ بلوچ لیکھان ءُ منّ آں، دومی لمبر ءَ ھم من گوں پھر ءُ ناز ءَ وت ءَ بلوچ گْوش آں۔ گُڑا سیمی رند ءَ من مسلمانے آں چی ءَ کہ بلوچیت چہ اسلام نیکراہ ءَ پیش ءَ اَت ءُ تچکیں ٹوک اِنت کہ مرچاں اسلامی وتگڑیں ملکانی کانود اسلامی نیکراہ ءِ رِد ءَ نہ اَنت۔

بہ گِند ئے سرکاری آمیدگِساں سرکاری کانودانی رِد ءَ جج ءُ وکیل بنت کہ پیسر ءَ پِیس ءَ زَر لوٹ اَنت ءُ پد ءَ ھر جج ءُ وکیل سِلکار اَنت بلکیں آمیدگِس ءِ ھر کارندہ سِلکار اِنت آمیدگِس ءَ ھچ کس ءَ مُزّ نہ رس ایت ءُ سوڑگ سک باز دیر درشان بیت پمیشکا انگریزی ءَ گْوش اَنت “جسٹس ڈیلیڈ، جسٹس از ڈینائیڈ” البت بلوچیت ءِ تہ ءَ اِے وڑ ءَ نہ اِنت بلکیں اگاں بلوچ چاگِرد ءَ چیزے جیڑھے ودی بیت گُڑا بلوچ راج ءِ ٹکری سروک زیت وت کا اَنت ءُ مُچ بنت، دوئیں تبکانی زھر ءِ توسگ ءِ تچ تاگ ءَ رند بلوچی رھبندانی رِد ءَ جیڑہ گیش ءُ گیوار کن اَنت انچوشکہ آس ءُ آپ ءِ جِرگہ مئے دیم اَنت آس ءُ آپ ءِ وتی یک رِدے کہ سْیاھکاری، کُشت ءُ کوش ءِ وڑیں جیڑھانی توجیلّ ءَ کارمرز بیت

اگاں یک چیزے دُزّی بیتگ ءُ ھما چیزے ءِ مرچیگیں وھد ءَ نھاد یک لکھ ءُ نیم لکھ ءَ گیشتر اِنت گُڑا بلوچ ٹکری سروک یا دمگی میر ءُ نواب آس ءُ آپ ءِ سوڑگ ءَ زیر اَنت آس ءُ آپ ءِ سوڑگ ءَ پیش دُزی بیتگیں چیز ءِ نیم کلداریں زَرے سردار ءِ ھزانگ ءَ ایر کنائین ایت کہ اگاں دُزّ آس ءَ ما سوچ ایت گُڑا ھما زَراں بارات کہ آئی ءَ ناھکّیں دُزی ءِ تھمت جنگ بیتگ اگاں دُزی بیتگیں چیز ءِ بھا یک لکھ ءُ نیم لکھ ءَ کم اِنت گُڑا شَکی ئیں دُز ءَ میر ءُ نواب ءِ مُچّی ءِ تہ ءَ اسلامی کلمو وانگ بیت یا میست ءِ تہ ءِ برگ بیت ءُ اود ءَ کُران مجید ءِ سر ءَ دست ایر کنت ءُ گْوش ایت کہ منّ اے دُزّی ءِ گُناھیں کار نہ کُتگ یا گل ءَ ھوار نہ ات آں-

نی ما بتل ءِ پژدر ءَ کا ایں کہ اِے بتل ءَ کوہ سلیمان ءِ گالواریں بلوچ، ھاس مری ءُ بُگٹی گیشتر گْوش اَنت کِسہ چو اِے وڑ ءِ انت کہ چَہ یک سادگیں بَاگّیایے(شْوانگ) ءِ بَگّ ءَ یک ڈاچی یے دُزّی بوتگ، آئی ءَ سک باز پٹ ءُ پول کُت کہ وتی ڈاچی ءِ دُزّ ءَ بہ زانان ءُ ڈاچی ءَ درگیج آں بلے بے سوب بوت۔ گُڑا یک نامداریں دُزّے ءِ سر ءَ شَکی اَت کہ گُمان ءَ منی بَگ ھمے مرد ءَ جتگ ءُ ڈاچی دُز اتگ۔مرد ءَ وتی ٹکری سروکاں ھال دات ءُ آ گوں سروکاں ھمراھی ءِ سردار ءِ مُچّی ءَ ساڑی بوت انت۔ آیاں سردار ءَ وتی جیڑہ بیان کُت کہ مارا گُمان ءُ شک اِنت مئے ڈاچی یے پلان ٹکر ءِ مرد ءَ دُزّ اِت ما بلوچی رواج ءِ رِد ءَ وتی پلّو ءِ گرگ ءَ لوٹ کن ایں سردار ءَ دُزّ ءِ ٹکری سروکاں لوٹ دات کہ باندا دُزّ ءُ دُزّ ءِ ٹکری سروک ساڑی بہ بنت کہ اِے جیڑہ گیش ءُ گیوار کنگی انت۔ دومی روچ آتک ءُ دوئیں تبک ءِ مردم ساڑی بوتگ اَنت۔ دوئیں نیمگی سروک سُھل ءُ تْران ءِ آسر ءَ تپاک بوت اَنت کہ ڈاچی ءِ بھا آس ءُ آپ ءِ زَراں برابر نہ کنگ ءَ انت گُڑا سردار ءَ شَک بیتگیں دُزّ ءِ نیمگ ءَ تْرُندیں چمشانکے دات ءُ گْوشت “ تو اڑے کلمو ءَ وان کہ تو اے بزگ ءِ بَگّ نہ جتگ ءُ ڈاچی نہ دُزّ اِت” دُزّ وَ تانسریں جاھیلے ءَ اَت گُڑا سردار ءَ پسّو ئِے دات ءُ گْوشت “سردار من ءَ کلمو وانگ نئیت”-

یک نیمگ ءَ بَاگیا بزگ زھر ءَ بْرانز اَت کہ منی ڈاچی ءِ بھا کم ایرکنگ بیتگ اَنت چیریشی ءَ سوڑگ آس ءُ آپ ءِ نیمگ ءِ نہ شُت، دومی اِے ھیال ءُ وسواساں گار اَت کہ دُزّ وَ بے نیکراہ بنت پمیشکا آیانی دیم ءَ کران مجید ءُ کلمو ھچ بستارے نہ دار اَنت چمیشکا دُزّ کلمو ءَ وان ایت ءُ من پوک بہ آں۔ بلے ھمے دمان ءَ چار اِت ئِے کہ دُزّ چَٹیں جاھیلے کہ کلموّ ءِ وانگ ءَ نہ زانت گُڑا یکپارگی بَاگیا ءِ اوپار سِست ءُ سردار ءِ نیمگ ءِ کوکار ئِے کُت “سڑدار، اگاں کلموّ مئیت گُڑا ڈاچی پُوک اِنت؟” گُڑا گوں اِے گِلّوتگیں کُوکار ءَ دْراھیں مُچّی ءَ کَند اِت ءُ گْوشت کہ اِنّا ناں تئی ڈاچی پوک بیت ءُ نَیکہ تو پوک بَہ ئے پمیشکا اِے بتل ءَ ھما بزگ گیشتر گْوش اَنت کہ وھدے آئی ءَ مُزّ دیگ مہ بیت یا وام وھد ءِ سر ءَ دیگ مہ بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ سرکار ءِ نیمگ ءَ جھانی وابا کرونا وائرس ءِ سبب ءَ سرجمیں بلوچستان ءَ ھشت مئی ءَ بہ گر داں شانزدہ مئی ءَ بند ارگ ءِ پرمان شنگ کنگ بیتگ-

جار تاک ءِ رد ءَ ٹرانسپورٹ ءُ مزنیں باپاری بنجل سرجمی ءَ بند کنگ بنت اِنت ءُ رو ءُ آیگ ءُ دگہ مُچیانی سر ءَ پابندی جنگ بیتگ –

سرکار ءِ جار تاک ءِ رد ءَ اگاں کسے ءَ سرکار ءِ مسام لگتمال کرت اَنت گڑا آئی ءِ ھلاپ ءَ ترندیں گامگیج زورگ بیت اِنت –

جار تاک ءَ پبلک ٹرانسپورٹ، لوکل ءُ ایندگہ رو ءُ آیانی سر ءَ ھم پابندی جنگ بیتگ اَنت –

بلوچستان ءِ بنجاھی شھر شال ءَ دگانی رو ءُ آ سرکار ءِ نیمگ ءَ بندات کنگ بیتگ اَنت ءُ سرکار ءِ گوشگ اِنت گیشیں رو ءُ آیانی سر ءَ سرجمی ءَ بند آرگ بیتگ ءُ مھلوک سرکار ءِ ایر کرتگیں مسام ءَ بہ منّ اِیت –

گوستگیں روچ ءَ بلوچستان ءَ کرونا نادراھی ءَ دگہ سَے مردم بیران بیتگ اَنت ءُ داں انیگ ءَ کرونا نادراھی ءَ بیران بیتگیں مردمانی کچ دو سد ءُ چِل ءُ شش ءَ سر بیتگ اَنت-

کرونا نادراھی ءَ دگہ یک سد ءُ ھپتاد مردمانی نادراھی پدر بیتگ ءُ اُستان ءَ نادراھی ءَ آماچ بیتگیں مردمانی کچ بیست ءُ سَے ھزار ءُ یک سد ءُ ھشتاد ءُ شش ءَ سر بیتگ اَنت ءُ بیست ءُ یک ھزار ءُ پنچ سد ءُ نُھ مردم نادراھی ءَ دراہ بیتگ اَنت –

جھانی وبا کرونا نادراھی ءَ سرجمیں جھان وتی ارجان جتگ ءُ اے وھد ءَ درسیں ڈیھاں اسرمندتریں ڈیھ ھندوستان اِنت کہ اود ءَ ھمک روچ لَکانی ھساب ءَ مھلوک واٰئرس ءِ آماچ بیان اَنت ءُ بازیں کچے ءَ مھلوک تنی وھدی اے نادراھی ءَ بیران بیتگ اَنت –

پاکستان ءِ مستریں شھر کراچی ملیر ءَ بحریہ ٹاؤن کارندھانی نیمگ ءَ جھنندیں مردمانی زمینانی سر ءَ زورانسری گرگ یک رندے دوبر گوستگیں روچ ءَ بندات بیتگ، بحریہ ٹاؤن ءِ کارمند ءُ سندھ پولیس ءَ لس شھریانی سر ءَ تیرگواری کرتگ ءُ چریشی ءَ یک شھری ءِ بیران ءُ یکے زدگ بیتگ –

دمگی مردمانی رد ءَ بحریہ ٹاؤن ءِ کارمند مزنیں مشینریانی گون ءَ دمگ ءِ آبادیانی سر ءَ بیڑ اش برتگ ءُ جاگھاں کروجگ ءَ بیتگ اَنت چریشی ءَ جھمنندیں مردم برانزگپتت اَنت ءُ پولیس آیانی سر ءَ تیرگواری کرتگ –

چاگردی رسانکجاھاں گندگ بیت اِنت کہ پولیس ءِ کارندھاں شھریانی سر ءَ تیرگواری کنگ ءَ اِنت ءُ یک مردمے زدگ بیگ ءَ گندگ بیت اِنت کہ آئی ءِ سر ءَ ٹپ پر اِنت ءُ لاپ ءَ تیرانی ٹپ پر اَنت –

چریشی ءَ پد دمگی مردمانی سر ءَ پولیس ءُ دگہ کارندھاں لَٹ ءُ کُٹانی نشانگ کرتگ اَنت یک تامربندے ءَ گندگ بیت اِنت یک مردمے ءَ گران کنگ ءَ ھم گندگ ءَ کیت ءُ دگہ یک زدگیں مردمے ءَ بحریہ ٹاؤن ءِ کارندہ زدگیں جاوراں ھسپتال ءَ ابید پولیس ءِ اسٹیشن ءَ برگ ءَ اَنت ءُ پد ءَ دمگ ءِ مردماں دزمانجنی کرتگ ءُ پچ گپتگ –

دمگی مردمانی رد ءَ بحریہ ٹاؤن ءِ انتزامیہ ءَ دمگی مردمانی سر ءَ تیرگواری کرتگ کہ بحریہ ٹاؤن کراچی ءِ زمینانی زورگری ءِ بگیری ءَ برانزگپتگ اَنت چریشی ءَ یک مردمے بیران بیتگ اَت کہ آئی ءِ پجار شوکت بلوچ ءِ نام ءَ زانگ بیتگ اَت ءُ بازیں مردمانی زدگ بیگ ءِ ھال ھم بیتگ اَنت –

چریشانی پژدر ءَ چاگردی رسانکجاھاں کمپئن ءُ سیاسی گل ءُ دگہ ھواریں سیاسی مردماں بحریہ ٹاون ءِ زورگری ءِ بگیری ءَ زھر ءِ درشان کرتگ –

چاگردی رسانکجاہ ٹوئٹر ءَ بندات بیتگیں کمپئن ءَ بازیں مردماں بھر زرتگ ءُ پاکستان ءَ پنچ ادارانی تہ ءَ #SayNoToBahriaTown ھیش ٹیگ درستاں سر بُر بیتگ –

ٹوئٹر ءَ لس مردماں زمینانی زوگری ءِ بگیری ءَ زھر ءِ درشان بیتگ ءُ زمیناں بنکی مردمانی ھک ءَ وتی وتی لیکہ ءُ زھر درشان کرتگ اَنت –

ھمے وڑ ءَ پی پی پی سندھ ءِ باسک سید ناسر ھسین شاہ ءَ نبشتگ کرتگ اے درچ ءَ سرجم ءَ گامگیج زورگ بیتگ ءُ سرکار ءِ نیمگ ءَ اسسٹنٹ کمشنر، واکدار ءُ دزمانجنیں پولیس آفیسرانی ھلاپ ءَ گامگیج زورگ بیتگ، زدگ بیتگیں مردمانی چار ءُ گداری بیگ ءَ اِنت ءُ بنجاھی پتر ءِ باسک عبدالکریم ءُ اُستانی پتر ءِ باسک سلیم بلوچ ھم ھوار اَنت ءُ اے مردماں الم انساپ رس اِت اِنت –

ھمے وڑ ءَ دگہ ٹوئٹر کارمد کنوک ءُ انسانی ھکانی واستا گپ جنوکیں ایما خان ءَ ملک ریاض ءِ اکس تالان کرتگ ءُ نبشتگ کرتگ کہ ملک ریاض یک انسانے ءِ نام نہ اِنت ملک ریاض مئے تہ ءَ کپتگیں نشان اِنت وتی دولت ءُ مال ءِ زور ءَ اے ڈیھ ءِ سیاست، آمیدگس ءُ پوج وتی دست ءِ پنجگاں کرتگ اَنت –

ملیر ءَ نندوکیں مردمانی گوشگ اِنت کہ بحریہ ٹاؤن ءِ واھند مئے پِت ءُ پیروکی میراساں کروجگ ءُ اد ءَ مزنیں ماڑی مِک کنگ لوٹ ایت ءُ چُشکہ اے مئے بُنکی ھک اَنت ءُ کرناں ما اے زمینانی سر ءَ آباد اِنت –

آیانی گوشگ اِنت کہ ما وتی زمیناں ھچبر دات نہ کن ایں مارا اگاں زمینانی واستا ھرچی کنگ کپ ایت ما چریشی ءَ چَک ءُ پد بیت نہ کن ایں –

گوستگیں بازیں روچاں ملیر ءِ بازیں جاھاں گبول گوٹھ ءُ دگہ جاھانی سر ءَ زمینانی زورگری ءَ بلڈوزر ءُ دگہ مشینری کاربندگ بیگ ءَ اَنت –

دم نہ بروکیں جھد ، ھاٹیگ ءِ نہ پروشگ ءِ جھد بیگواھیں مردمانی درگیجگ ءِ دَر انت – ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ ھپت روچ سرجم بوتگ – جتائیں پگراں بندوکیں مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءِ گوشگ انت کہ مدامی جھد چہ ما وتی دوستگیں مردمانی یلا کنائینگ ءَ سوبین بوت کنیں – حسیبہ قمبرانی ءَ وتی دوستیگیں مردمانی ھاتر ءَ وائس فار بلوچ مسنگ پرسنز ءِ پتر ءِ سرا مدامی جھد کنان ءَ حزب اللہ قمبرانی ءُ حسان قمبرانی یل کنائینگ سرجم کتگ ءُ وتی گِس ءِ تہ ءَ وشھالی آؤرتگ –

ماما قدیر بلوچ ءِ گوشگ ات کہ ھزاراں مات، گھار ءُ چکانی امیتانی تہ ءَ گیشی اتکگ – انگت ءَ ھزارانی کچ ءَ مردم بیگواہ انت ھمے ھاتر ءَ مدامی جھد برجاہ دارگی انت، ناکہ وتی دوستیگیں مردمانی ھاتر ءَ بلکیں ھما درسانی ھاتر ءَ کہ آھانی گِسانی وشی بیگواہ بوتگ انت –

آئی ءَ دیمتر ءَ گوشتگ کہ بیگواھیں مردمانی کھول دیم ءَ بیا انت ءُ وتی دوستیگیں مردمانی ابید ارزی گُرزی ءَ زورانسری آوار جنی ءِ بگیری ءَ توار چست بہ کن انت، آھانی درسیں ھالاں دنیاء ءَ سر بکن انت، دانکہ ما توار چست نہ کنیں ھچ کس مئے نیمگ ءَ دلگوش نہ دنت –

ریاستی ڈیتھ اسکواڈ ءِ کارمندانی سر ءَ اُرش کُتگ دو کارمند ٹپی کتگ اَنت – دوستین بلوچ

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں بولان ءِ دمگ شوران ءَ پاکستانی پوج ءِ چیردستی ءَ برجاھیں ریاستی ڈیتھ اسکواڈ ءِ کارمندانی بنجل ءِ سر ءَ اُرش کُتگ، اُرش ءَ ڈیتھ اسکواڈ ءِ کارمنداں جانی تاوان ءِ دیمپانی بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ ریپبلکن گارڈز ءِ جارکش دوستین بلوچ ءَ رسانکدراں وتی شنگ کُتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں بولان ءِ دمگ شوران ءَ ریاست ءِ چیردستی ءَ کارکنوکیں ڈیتھ اسکواڈ ءِ بُنجل ءِ سر ءَ گوں وتکاریں سلاھاں اُرش کتگ ءُ دو کارمند ٹپی کُتگ اَنت-

جارکش ءَ دیمتر ءَ گْوشتگ کہ ریاست ءِ چیردستی ءَ کارکنوکیں درسیں ڈیتھ اسکواڈ کارندھاں مکن کن ایں کہ آ وتی ردیں کاراں چہ شر بہ بنت اگاں ناں گُڑا اشانی بگیری ءَ تُرند ءَ چہ تُرندتریں اُرش کنگ بنت، ریاستی پوج ءُ ڈیتھ اسکواڈ کارندھانی سر ءَ اُرش دیمتر ءَ گوں تُرندی ءَ برجاہ بنت-

گڈسر ءَ جارکش دوستین بلوچ ءَ وتی درشان ءِ تہ ءَ گوشتگ کہ مئے جھد آزادیں ءُ وشھالیں ڈیھ ئِے جوڑ کنگ ءَ تاں برجاہ مان انت –

سر بیتگیں ھالانی رد ءَ ڈیرہ گازی ھان ءَ دو گاڑیاں ٹکر وارتگ ءُ چریشی ءَ دو کس بیران ءُ بازینے زدگ بیتگ اَنت –

وئیل ڈیرہ گازی خان ءِ دگ ءَ میختر ءِ نزیک ءَ ٹرک ءُ ویگنے ءَ ٹکر وارتگ، چریشی ءَ یک کسانیں چُکے ءَ ھوار زالبولے بیران بیتگ اَنت ءُ بازیں مردمے زدگ بیتگ اَنت –

وئیل ءَ پد ریسکیو ءِ کارمند سر بیتگ ءُ لاش ءُ زدگ بیتگیں مردم سیول ھسپتال لورالائی ءَ برگ بیتگ اَنت –

بلوچستان ءَ دگ ءِ وئیلاں ھمک روچ بازیں کچے ءَ مردم زدگ ءُ بیران بیگ ءَ اَنت ءُ دمگ ءِ مردمانی گوشگ اِنت وئیلانی گیشتریں سبب ڈرائیورانی بے دلگوشی ءُ دگانی پُرشت ءُ پروشی اِنت –

ھمے وڑ ءَ جھل مگسی ءَ چانڈرامہ ءِ نزیک ءَ گوستگیں سلاہ بندیں مردمانی تیرگواری ءَ دو کس بیران بیتگ اَنت –

وئیل گوستگیں شپ ءَ دیم ءَ اتکگ کہ اود ءَ سلاہ بندیں مردماں تیرگواری کرتگ ءُ دین مھمد دھرپالی ء مھمد عارف ءُ آئی ءِ ھمراہ نثار اھمد دھرپالی ء رجب علی کُشتگ اَنت –

وئیل ءَ پد لیویز ءِ کارمند وئیل جاہ ءَ سر بیتگ اَنت ءُ لاش اش چِست کرتگ ءُ ڈی ایچ کیو ھسپتال ءَ برگ بیتگ اَنت –

نبشتانک: ماہ شان ءُ گلزمین دوریانی موسم ءَ

نبشتہ کار: مھروان کمبر

دی بلوچستان پوسٹ

ماھو!
ٹپ نبشتہ نہ بنت سگگ بنت درد وانگ نہ بنت مارگ بنت من ءَ یک مُدت ئِے بیت کہ ھاموشاں منی سینگ ءَ ھاموشی اَنچو گیش کپتگ چو کہ کبرستانے ءِ کبرانی وپتگیں مردمانی وڑ ءَ منی دل اَنچو ویران اِنت کہ اود ءَ مُدت ئِے بیت واھشت ءُ وشی نہ رس اتگ بس ابیتکیں بچکنداں لُنٹانی نیام ءَ پُژمُردگ ءَ کپتگ اَنت منی کندگ ارساں چہ میچل اَنت ءُ منی لبز مُرتگ اَنت من اَنچو تھنایاں کہ ساھگ ھم ھمراہ نہ اِنت بلاھیں سیاھیں ڈن ئے ءَ گار بیتگاں کہ وت ءَ درگیتک کُت نہ کنگ ءَ آں۔

او منی گُلزمین!
من باز جُھد کُتگ کہ ترا نبشتہ بہ کناں وتی کسھانی ءُ آزمانکانی تہ ءَ بلے سک باز جُھد ءَ رند انگت نبشتہ کُت نہ کتگ پرچا کہ تو ھما مارشت ءِ کہ ترا لبزاں گوں درشان کُت نہ کناں نہ اے اسپیت چکیں کاگدانی سر ءَ تو نبشتہ کنگ بہ بَے اے مارشت بس منی دل ءِ سرزمین ءَ رُست کن انت دور ریگزارے ءَ گاریں تُنیگیں مساپرے ءَ آپ ءِ ترمپ ءِ رس ایت تو آئی ءَ جُست کن کہ تو اے ساھتاں درشان کُت کن ئے؟ یا کہ مَرگ ءِ کنڈگ ءَ اُوشتاتگیں مردم ءَ جُست بکن کہ گڈی دَم یا ساہ ءِ کشگ ءَ چنچو تاھیر دنت؟ آ درشان کُت نہ کنت ھمے وڑ ءَ من وتی سرجمیں زُوراں بہ جناں بلے انگت اے مارشتاں نا درشان کُت کناں نا کہ نبشتہ کُت کناں آ دگہ گپ ءِ کہ ھر وھد نبشتہ کُتگ گڑا بس ترا نبشتہ کتگ بلے پد ءَ ھم ترا نبشتہ کُت نہ کُتگ-

او منی ماھو!
تو منی زندگی ءِ اولی ءُ گڈی کتاب ءِ کہ ترا منی ارواہ ءَ ونتگ تو سرپدئے کہ من کتابانی شیدائی آں مرچاں کتاب زیراں بلے نہ واناں پرچا کہ لبز درمان نہ بنت نی من نبشتہ ھم نہ کناں پرچا کہ نبشتہ کنگ ءِ واستا منی گور ءَ ھچ نیست، یا من ھما مارشتاں کہ نبشتہ کنگ لوٹاں آ وڑیں لبز منی کر ءَ نیست شش سال سرجم اِنت کہ ترا چہ سستگاں وھد ءَ منی ٹپ درمان نہ کُتگ اَنت بلکیں گیشتر کُدینتگ ءُ آزگ کتگ اَنت باز مردم گش ایت وھد درستیں ٹپانی درمان کنگ ءَ زانت بلے من باور نہ کناں پرچا کہ لَھتیں ٹپانی درمان کنگ انگت وھد ءَ در نہ برتگ۔

او منی گُلزمین!
مھر، واب، وشبو، رنگ، بچکند، مارشت، پُل، بھیسہ، جمبر، ھور، سنج، چول، ساھگ، دگ، بازار چنچو مانا اَنت کہ تئی نام ءَ چہ درکاینت چنچو جلواہ اَنت منی چمانی تہ ءَ ناچ ءَ اَنت بے تو نا من ءَ رنگ ھست، نا نور، نا جلواہ منی زند یک ھورک ءُ ھالی ئیں جاگھے کہ تو من ءَ پُر کُتگ۔

او منی ماھو!
او منی ھم نپس! منی وامداریں چماناں تئی سدپ رنگیں واب اَنت کہ پیوست اَنت ترا چہ پیسر من زندگی ءِ رُنگراھاں تھنا سرجنان اتاں اے توئِے اتے کہ من ءَ دست ءَ گپت ءُ تھاریں زندگی ءِ رُنگراھاں در کت ءُ رنگ ءُ نورانی، شادہ ءُ بچکندانی دنیا ءَ سر کُت منی درستیں واب ءُ وشی گون تر ءَ بندوک اَنت تئی یک بچکندے ءَ منی زرد ءِ باگ ءَ ھزاراں پُل وتی وشبواں تالان کن انت تئی یاکُوتیں لُنٹانی سر ءَ منی نام اتکگ گڑا منی ھستی ءَ مانایے رُستگ منی چمانی روک، زرد ءِ کرار، ساہ ءُ نپس تو من ءَ تھاریں راھاں تھنا یل کن ئے ءُ کجا روے مرو کہ اے رندی منی چمانی واب پُرشتاں گڑا منی درستیں وشی ھلاس بنت ءُ زندگی ھم من ءَ دروھیت اے تو ات ئے کہ گشت من ءُ تو یکجاہ بہ ایں یک نوکیں دنیا ءِ جوڑ کنیں اود ءَ نور شنزانت ءُ ماہ، استال ءُ بالو بنت بلے بچار کسمت ءَ پد ءَ منی وابانی پیژگاہ ءَ آس کپتگ۔

اوہ منی گُلزمین!
ھردیں سُھب ءِ نوداں گوں سمین لیب کنت من ءَ تئی تبدیں موسمانی گیر انگراں کن انت دل ءِ بندیں دریگاں چہ یات ءُ گیرانی کُونج سر کش انت ءُ منی گوشاں ھلوت کن انت پد ءَ انچو گُمان بیت درد زمستان ءِ سارتیں شپاں برھنگ ءَ ناچ ءَ انت نا زانتگ یات ءُ گیرانی چُشیں امبارے من ءَ گون بیت ءُ گوست ءِ ھما درستیں ندارگ چو تیاب ءَ منی ھیالانی تہ ءَ چول جن انت۔ نہ زانتگ گیر کاینت ھما گرماگی روچانی تراولیں پندانی سپر، ریکانی دلبند ءَ گوازینتگیں شپ، رولھی بیگاھانی دیگریں برمش نہ زانتگ تئی مھر ءِ گستائی دل ءَ مئے آس جمبور کنت ءُ درستیں وشیاں سوچیت نہ زانتگ ترا چہ دور ءُ گستا باں درانڈیھ ءِ ابیتکیں کوٹیانی مُنجار باں بلے تو بژنیگ مہ بو ءُ مہ کن ارمان پرچا کہ تنیگا پاداں ھاٹیگ ءُ اُوستانی کشکاں ساہ انگت ءَ مان اِنت ءُ روان اَنت ھمے کشکانی وازمندگیں تئی مزاریں بچ ءُ تلاریں بچ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءَ گوستگیں یک ھپتگے ءَ بیتگیں ھور ءُ ھرگاں بجلی ءَ بازیں کساسے ءَ تاوان بیتگ اَنت ءُ چریشی ءَ بازیں جاھاں لین ھم نیستی ءِ بروبری ءَ بیتگ اَنت –

گوستگیں لھتے روچانی تہ ءَ بجلی ءِ گر ءُ ھِلانی تہ ءَ گیشی گندگ ءَ اتکگ اَنت –

لین ءِ سروک اللہ بکش بلوچی ءَ رسانکدراں گوں گپ کنان ءَ گوشتگ کہ سیستان ءُ بلوچستان ءِ لین ءِ مستریں بنجل نیکشھر ءَ بجلی ءِ بنجل ءَ ھشت سد ملین تومن تاوان تاوان بیتگ اَنت –

اللہ بکش بلوچی ءِ گوشگ اِنت نیکشھر ءِ ھند بنت، مھمدان، چاھان، شریکی، تابکی ء تل ءُ ھنزم ءَ ھم بازیں کچے ءَ بجلی ءِ کمبھاں تاوان بیتگ اَنت ءُ کمبہ کپتگ اَنت –

آئی ءِ گوشگ اِنت ترندیں ھورانی گورگ ءَ سیستان ءُ بلوچستان ءِ یک مزنیں ٹانسپارُمے ھم کپتگ ءُ چریشی ءَ بازیں دمگاں بجلی مھتل بیتگ اَنت –

آئی ءِ گوشگ اِنت ھورانی گورگ ءَ پد دمگانی بندیں بجلی دوبر روک کنگ بیتگ اَنت ءُ بازیں جاھاں انگت ءَ بجلی ءِ کار بیگ ءَ اَنت –

آئی ءَ گوشتگ کہ بازیں جاھاں کچ ءُ کساس چِل ءُ ھشت کمبہ ھور ءُ ترندیں گواتانی سبب ءَ کپتگ اَنت کہ اشانی تہ ءَ تیربرگ ھم ھوار اَنت –

آئی ءِ گوشگ اِنت سیستان ءُ بلوچستان ءِ ھند گنداوگ ءَ ھم ترندیں گوارانی دگ ءُ راہ بند بیتگ اَنت ءُ چریشانی ھمراھی ءَ بجلی ءِ کاردامگاں ھم تاوانباریانی دیمپانی بیتگ اَنت –

مکران لائبریری شال ءَ شنگ کرتگیں وتی جار ءَ گوشتگ کہ نوکیں ایڈمیشن عید ءَ پد بندات کنگ بنت اِنت –

آئی ءَ گوشتگ کہ ھما نودربرانی سیادی نیزگاریں کھولانی اِنت کہ آیانی گور ءَ زر نیست اِنت آ انٹری ءِ چِن ءُ لانچ ءَ کنگ ءَ اَنت آ جنکیں نودربرانی ایڈمیشن ءُ رجسٹریشن سرجمی ءَ مُپت ءَ کنگ بیت اِنت –

مکران لائبریری ءِ سال دوھزار ءُ بیست ءِ اکتوبر ماہ ءَ بندات بیتگ ءُ آئی ءِ سرجمی سال دوھزار ءُ بیست ءُ یک ءِ جنوری ءَ سرجم بیتگ –

مکران لائبریری ءِ شنگ بیتگیں جار ءِ پد ءَ جھانی نادراھی ءِ نیزور ترگ ءُ بندآر ءِ کمی ءَ ھما نیزگاریں نودربر کہ وانگ ءَ ھب دار اَنت آیانی داخل ءَ مُپت ءَ کنگ بیت اِنت –

آئی ءِ گوشگ اِنت کہ زانت ءُ زانش ءَ گامے ءَ جنزگ ءَ دراھیں تکاں بندوکیں مردماں نپمندی اِنت چریشی ءَ باید مردم زانت ءِ نیمگ ءَ دلگوش بہ کن اَنت –

لائبریری شال ءِ دمگ بروری دگ ءَ اِنت کہ اود ءَ لائبریری شَے مرید رشید نامیں ورنایے ءَ وتی کمک ءَ وت جوڑ کرتگ –

شَے مرید رشید ءِ گوشگ اِنت کہ لائبریری ءِ مول ءُ مراد ھما مردمانی واستا اِنت کہ لائبریری ءَ کاینت وتی کورساں گیش کُت کن اَنت ءُ ھما مردم کہ لائبریری ءِ فیساں سرجم کت نہ کن اَنت آ مُپت ءَ وتی وانگیانی چِن ءُ لانچ ءَ کُت کن اَنت –

آئی ءِ گوشگ اِنت: بلوچستان ءَ وانگ ءِ پُشت کپگ ءَ آئی ءِ دیمروئی ءِ جنزگ ءَ گام جنگ ھمک تکاں بندوکیں مردمانی ھاٹیگ ءَ پرکار کُت کنت آ اِلم ءُ زانت ءِ نیمگ ءَ جنزان کنت آ بلوچستان ءِ باندات گیشتر کُت کنت اِنت –