TBP Balochi

نبشتانک: تُپنگ ءَ دَور نہ دیاں

نبشتہ کار : شیردل بلوچ

دی بلوچستان پوسٹ

تئی ھیال جیڑگ ءَ پرما اَنت مُدام گیر کائے تئی ترانگاں چہ ساھتے دَر نہ باں ساہ ءِ کپ، تو پہ راج ءِ وتواجھی ءُ گلزمین ءِ واستا ندر بوتگ ئے، وھدے کہ تو ھما روچ ءَ گوں راجی کاروان ءَ ھور بوتگ ئے، ھمے اَھد کرت، پہ زمین ءِ موکگ ءَ وتی ھوناں ریچاں داں ساہ ءِ گُڈی کَشگ ءَ تُپنگ ءَ دور نہ دے آں، تئی اے ھبر دراہ راست بوت اَنت، گوں زور گیریں ڈیھ ءِ دُز ءُ لگوریں لشکر ءَ جنگ ءِ پڑ ءَ مِڑ داتگ ءُ ندر بوت ئے، تئی پُشت پد تئی جُتائی ءَ بژنیگ نہ اَنت، پھر ءُ شان کن اَنت ۔

تو انچیں مکسدے ءِ دیم ءَ کربان بوتگ ئے، آ ٹوھیں لوٹے، راج ءِ آجوئی اِنت، پمشکا درد نہ بیت، واھگ وَ ھمے بوتگ تو داں آجوئی ءِ روچاں جُنز ءِ ھمراہ بوتیں ئے، اے راہ ندر بوگ ءِ راہ اِنت، انچو گوش اَنت، زند مرگ ءِ وامدار اِنت، چوناھا یک روچے گوں نپس گریں ملکموت ءَ دُچار کپگی انت، بَلے!! سرمچنڈ ءِ زند چہ آئی ءِ مرگ ءَ رند بندات بیت، ھرکس ھمے راستی ءِ منوگر اِنت، بلوچ راجدپتر گوں ھوناں نبیسوک اِنت، ندر بوؤکیں بچّانی نامانی لڑ سک مزن اِنت، چہ ھمے ندر بوتگیں بچّاں یکے شھید اسدھسن اُرپ کامریڈ بالاچ آئی آریپیں پِت ءِ نام مھمد ھسن بلوچ، آ تیرتیج آواران ءَ ودی بوتگ ءُ درائیں گُھار ءُ براتانی کستر اَت، گوں وانگ ءَ گیشیں دلگوش ئِے نیست اَت، کمو وانتگ اَت ئِے، گوشگ ءَ دل نہ بوتگ، پرچہ کہ کسترین اَت، درائیں برات ءُ گھارانی دست سر ءَ ئِے ساھگ بیت، گیشتر مھر دیگ بیت، دو ھزار یازدہ ءَ سور ئِے دے اَنت، چار چُک ئِے ھم ھست، سمُل جان ، ھانل جان، دوستین جان ، اَمل جان اَنت، اَمُل جان ءِ چہ ودی بوگ ءَ ساری آئی پِت شھید بیت۔

اے ھمے دَور ءُ باریگ اَت راجی آجوئی ءِ زرمبشت بلوچستان ءِ کُنڈ پہ کُنڈ ءَ چست بوتگ اَت، بزاں، اے دَور دو ھزار ھپت ءُ ھشت اَت، ھرچ بلوچ گوں جُنز ءَ ھمراہ بوگ ءَ واھگدار اَت، اے وھد ءَ راجکاری گوں شَرّیں دروشمے ءَ بوگ اَت، ھرکسی دپ ءَ راجی سروکانی نام اِت اَنت، شھید چیرمین گلام مھمد ،واجہ سبا دشتیاری ءُ دگہ بازیں رھشونانی گُشتانکاں روچ ءُ شپ ھرچ جاہ ءَ شپانک، دھکان ، پوریاگر ،نودربر ءُ زندمان ءِ ھَمُک پڑ ءِ مردم ءَ را گوانکوے گون اَت، مُچی نشتگ اَت گوشدارگ ءَ اِت اَنت، ورنائیں رھشون سنگت شھید رزا جھانگیر ھم آواران ءِ دَمگ ءَ گوں راجکاری ءِ کاراں مُدام گلائیش اَت لوگ پہ لوگ آجوئی ءِ کلوہ ءَ سر کنگ ءَ اَت، گیدی ءِ کجام ھم کُنڈے ءَ لشکر ءَ زوراکی یے بُکتیں سھب ءَ ماں آواران ءِ ھار بازار ءَ روانکے الم دراتکگ ءُ زھرشانی بوتگ، من ءَ یات بیت آواران ءَ ھار بازار ءَ روانکے دَراتکگ اَت، پوج ءَ ھمے روانک ءِ سر ءَ اُرش کرت ءُ سنگت ئِے گپت ءُ لٹ دات اَنت، رند ءَ دْرائیں یل دیگ بوت اَنت، گون ھمے سنگتانی رِد ءَ ھم شھید کامریڈ اسد ھسن ھمراہ اَت، بہ گند ئے آ چد ءُ ساری ھم دوزواہ ءُ باسکے بوتگ ھر وھد ءَ دیستگ گوں آجوئی ءِ جُنز ءِ کاراں دست گلائیش اَت وھدے ءَ رند من دیست ،راجی آجوئی ءِ گل BNM ءِ باسکے اَت، چد ءُ رند بزان دوھزار یازدہ ءِ وھد ءَ من وت BNM آواران ءِ دمگ ءِ کُمک کارمستر اِتاں، انگت چد ءُ ساری شھید اُستاد الی جان ھم ایشانی بُنزہ دیوانے کرتگ اَت، ھمے دیوان ءَ اے پیسلہ ئِے کُت جَنک ءُ بَچک بُنزہ ءَ ھور بہ بنت، مارا اے پرک ھلاس کنگ لوٹ ایت، رند ءَ بُنزھانی گچینکاریاں کامریڈیں گُھار، براتانی ھم رِد ءَ تنزیم کاری ءَ ھور بھر زُرتگ ۔

دوھزار دوزدہ ءَ ماھتاک سنگر ءَ بنشتھے وانتاں، ھمے نبشتہ اَت چُک ءِ مھر پِت ءُ ماتاں لاچار کنت، جُھد ءِ منوگر بہ بنت، چہ پرزند ءَ پہ وس گستا بوت نہ بیت، بَلے! مرچی زورگیریں ڈیھ ءَ بلوچ پرزنداں چہ پت ءُ ماتاں کجام دروشم بیت، زندان بہ بیت، دَر پہ دَری یا شھیدی ءِ دروشم ءَ جتا کُرتگ اَنت، بلوچ ءِ مکھیں مات پہ وتی زندانیگیں بچانی گندگ ءَ تلوسگ ءَ اَنت، ھو مئے گلزمین ءِ سر ءَ ناشریں ڈیھ وَ ھُدائی کنگ ءَ اِنت، بلوچ راج ءِ زند ءِ بکشایگ ءُ زند ءِ پچگرک ءِ بے جُستیں ھاکم وت ءَ لیکگ ءَ اِنت ۔

“کامریڈ اسد ھسن ءِ کھول ءِ مردمانی ھچبر چُشیں گپّے منی گوشاں ھم نہ اُشکتگ، وتی چُک ءِ راجی جُنز ءَ گوں بوگ ءَ نا وش بوتگ اَنت، اَلم یک چیزے من دیستگ کھول ءِ مردمانی تہ ءَ پِت ءُ براتاں ھر روچ ماں استان ءِ پوج ءِ بُنجل ءَ لوٹائینگ بوتگ اَنت، پوج ءِ سروکاں گوشتگ وتی زھگ ءَ را بُگش اِت، بیا تُپنگ ءَ دَور بِہ دے، مدام براتان ئِے ھمے گوشتگ،” آ مئے ھبر ءَ نَئیت اِنت، گڑا براتاں بے ھال نہ بوتگ، ھر روچ ماں استان ءِ پوج ءِ بنجل ءَ آواران ءَ لوٹائینگ ءُ بیھار دیگ بوتگ اَنت، یک براتے دوبر ءَ چست کنگ زنداں کنگ ءُ ازیت دیگ بوت ایدگہ لاچار بوتگ اَنت، چہ وتی ھنکین ءَ لڈ اتگ ءُ کدی جاھے ءَ وتی زند ءِ روچ اِش تیلانک داتگ اَنت-

شھیداسد ھسن ھر وھد ءَ نشت ءَ ھمے تران ئِے کُرتگ، اِستان ءِ پوجیگ پھک ءَ گنوک اَنت، گوشگ ءَ اَنت بیا تُپنگ ءَ دَور دے ءُ لگور بو، من ھچبر نہ رواں ءُ وتی دست ءِ تُپنگ ءَ دَور نہ دیاں ءُ لگور نہ باں، وت ھم جاھے ءَ گوش اِیت کسانیں تامرے شنگ اَت، گُشگ ءَ اَت، ھرکس بزانت ھر کسی کار بزان اَنت من داں ساہ ءِ گڈی کشگ ءَ جُھد ءِ ھمراہ آں، ءُ تُپنگ ءَ دَور نہ دیاں، ھمے تران آئی ءِ باتن ءِ تہ ءَ بوتگ ءُ جھان ءِ دیم ءَ پدر ئِِے کرتگ، تُپنگ زند ءِ گڈی ھمراہ اَت، داں ساہ ءِ گڈی کَشگ ءَ ئِے گون اَت ۔

آئی ءَ گوں راجی جُنز ءِ ھمراھداری ءَ راجی پندے بُر اتگ، دو ھزار بیست ءَ ماں کولواہ جت ءَ سپرے ءَ دَر کیت گوں سنگتانی ھمرائی ءَ لگوریں پوج راہ ءَ اِش بند اِیت ءُ وھدیکہ آ کا اَنت، ڈیک دے اَنت، جنگ مچ اِیت” اسد ھسن ءُ ” راشد رمزان ءِ ھمرائی ءَ رمزان شریپ ءِ ھم گُڈی روچاں گڈی شپ ءِ بَارت ءَ نُھ ءِ بیگاہ ءَ وتی دائمی جاہ ءَ رپتگ اَنت، بیست ءُ سئے سُچکان دو ھزار بیست ءَ آوانی اولی سالروچ بیت راجی کُنگر داں ساہ ءِ گڈی کَشگ ءَ جنگ ءَ دے اَنت ءُ شھید بنت ـ

شھید اسد ھسن اُرپ کامریڈ بالاچ ءُ شھید راشد رمزان اُرپ سوبین بلوچ یکے ماں آواران تیرتیج ءَ ءُ دومی ماں کولواہ چمبر ءِ گڈی وابجاھاں سیر واب اَنت شھید اسد ھسن اُرپ کامریڈبالاچ ءُ شھید راشدجان اُرپ سوبین جان، بلوچ سرڈگار ءِ سُچکان ءِ شھیداں ھور درائیں شھیداں سھریں سلام پیش کناں
آجوئی ءِ جُنز زندگ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ائیدانی وشی بلوچستان ءَ زھرشانی گندگ بنت ھمک دراں دراتکگیں چَم ء ھرسانی تہ ءَ گار اِنت ھرکس وتی وشیانی شوھاز ءَ درکپ ایت بلے بلوچستان ءَ بندیگیں مردمانی کھول ھرسانی ھاراں دگانی سر ءَ درپہ دری ءَ گندگ ءَ بنت کہ آیانی تہ ءَ اے وھد ءَ گیشتریں مردم زالبول اَنت –

گوستگیں روچ ءَ بلوچستان ءَ گار ءُ بیگوابیں مردمانی پانکجنوکیں گل وائس فار بلوچ سروک نصر اللہ بلوچ ءَ وتی درشانی ءَ گوشتگ یل بیوکیں مردمانی یل بیگ وشی یے ءُ ما اشی ءَ سر ءأ چماں داریں ءُ چریشی ءَ ما سرکار ءِ منّت ءَ گریں بلے سرکار ءَ لوٹ ایت کہ بازیں سالاں بیگواھیں مردماں ھم یلہ بہ کنت –

نصر اللہ بلوچ ءَ گوشت کہ دوھزار ءُ نوزدہ ءَ اُستانی سرکار مئے گون ءَ گند ءُ نند ءَ بیگواھیں مردمانی جیڑہ ءِ گشینگ ءَ بازیں سالاں بندیگیں مردمانی یل کنگ ءِ مسام اش کرتگ بلے داں انیگ ءَ بازیں وھدانی پت گوزگ ءَ ابید بازیں سالاں بندیگیں مردمانی کیسانی سر ءَ چار ءُ گداری نہ بیتگ –

نصر اللہ بلوچ ءَ گوشت کہ ھمے وڑ ءَ سر وزیر ءَ مئے گند ءُ نند بیتگ بیگواھیں مردمانی جیڑہ ءُ بازیں سالاھاں گاریں مردمانی یلہ کنائینگ ءَ گیش کرد ءِ پیلو کنگ ءِ دزبندی کرتگ ءُ سروزیر ءَ مارا سدکی داتگ ءُ گوشتگ کہ بیگواھیں مردمانی جیڑہ زوت ھلاس کنگ بیت اِنت ءُ سرکار گاریں مردماں یل کنت یا آیانی بارہ ءَ جیڑھاں گوش ایت بلے داں انیگ ءَ مارا ھچ گندگ ءَ آیگ ءَ نہ اِنت ءُ نانکہ مارا اشانی بارہ ءَ سرپدی رسگ ءَ اِنت چریشی ءِ سوب ءَ بازیں مردمانی کھول زھنی دردناکیں جیڑھانی آماچ اَنت –

آئی ءَ گوشت کہ سرکار ءِ دست ءَ مئے داتگیں لسٹانی تہ ءَ علی بنگلزئی، ڈاکٹر دین مھمد بلوچ، زاکر مجید، ڈاکٹر اکبر مری، ایڈوکیٹ منیر، زاھد بلوچ، شبیر بلوچ، عبدالمالک سرپرہ، ظفر بنگلزئی، شمس بلوچ، سیداھمد شاھوانی، منظفر شاھوانی، رمضان بلوچ، گڈو بگٹی، سفر خان مری، ماسٹر عبدالرحمان مری ءُ توتک ءَ بازیں سالاھاں بندیگیں قلندرانی ٹک ءِ مردماں ھوار دگہ سدانی کچ ءَ بیگواھیں مردم ھوار اَنت –

نصر اللہ بلوچ ءَ سرکار ءُ ڈیھی ادارھاں گوں دزبندی کرتگ ءُ گوشتگ کہ اے ائید ءَ بازیں سالاں بیگواھیں مردمانی یل کنگ ءَ سرکار المی بہ کنت ءُ بزگیں کھولانی وداراں اسر بہ کنت –

جھانی نادراھی “کرونا وائرس ” ءَ بلوچستان ءَ دو کسانی ساہ گپتگ اَنت، بلوچستان ءَ کرونا نادراھی ءَ بیران بیتگیں مردمانی کچ دو سد ءُ پنجاہ ءُ پنچ ءَ سر بیتگ اَنت –

بلوچستان ءِ جانسلامتی ءِ گر ءُ دار کنوکانی رد ءَ سَے شمبے ءَ بلوچستان ءَ یک سد ءُ بیست مردمانی تہ ءَ نادراھی پدر بیتگ –

جانسلامتی ءِ رد ءَ بلوچستان ءَ بیست ءُ سَے ھزار ءُ شش سد ءُ پنجاہ ءُ مردمانی ٹیسٹ داں انیگ ءَ نادراھی ءَ پدر بیتگ اَنت ءُ بیست ءُ دو ھزار ءُ دوازدہ مردم وش بیتگ اَنت –

ھمے وڑ ءَ ویکسینیشن ءِ کم بیگ ءَ ہیومین رائٹس آف پاکستان ءَ گوشتگ کہ اُستان ءَ ٹیسٹانی کمی اِنت ءُ اُستان ءِ دگہ جاھاں ٹیسٹ نہ بوگ ءِ بروری ءَ اَنت –

آئی ءِ گوشگ اِنت نادراھی ءِ ٹیست بس بنجاھی شھر شال ءَ کم ءُ کساسی بیگ ءَ اَنت آ دگہ جاھاں نا بروبری ءِ کچ ءَ اِنت-

آئی ءِ گوشگ اِنت اُستان ءِ آ دگہ شھر ٹیسٹاں زبھر اَنت ءُ اے جاورھالاں اے نادراھی ءِ رکگ ءَ ویکسینشن ءِ کمی اِنت کہ تنی وھدی اُستان ءَ بس سںی ءُ چار ھزار مردماں ویکسن جنگ بیتگ –

ہیومین رائٹس ءَ واکداں گوں لوٹ کرتگ ءُ گوشتگ کہ اے نادراھی ءِ سر ءَ الکاپ ءَ دلگوشی بہ دے اَنت مھلوک سرکار ءِ گوشتگیں گپانی سر ءَ بہ بنت اگاں گڑا ھندوستان ءِ جاورھال ڈیھ ءَ اتک کن اَنت –

ائید ءِ روچ وشی ءُ بچکنداں گوں وت زور ایت ایر رؤت، ھمود ءَ کہ ھما راج کہ ایردستی ءِ زمزیلاں گوں بندوک انت آھانی ھاتر ءَ ائید ءِ وشی پہ دردیگ انت – ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ یانزدہ روچ سرجم بوتگ – بلوچستان نیشنل پاٹی ءِ بنجاھی پتر ءِ باسک ءُ ایم این اے ہاشم نوتیزئی ءَ بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ – ھمے وھد ءَ آھانی گوشگ ات کہ ماما قدیر ءَ مئے گھار ءُ دگہ مردمانی ھمراھی ءَ بیگواھیں بلوچانی ھاتر ءَ شاھگانیں جھدے کتگ ما آئی ءِ جھدے ستاشانی ءَ کنیں –

ہاشم نوتیزئی ءَ دیمتر ءَ گوشت کہ دنیا ءِ تہ ءَ چشیں ھچ وڑیں کانودے نیست کہ ریاست وتی مردماں آوار بہ جنت ءُ بیگواہ بہ کنت ءُ بازیں سالاں پد آھاں یلا بہ کنت یا آھانی جون در بئیت – اے سک باز گرانتر ءُ گمزدگیں جاورھال انت –

آئی ءِ گوشگ ات کہ بلوچستان نیشنل پاٹی ءَ اولی روچ ءَ چہ بنجاھی اسمبلی ءِ تہ ءَ بیگواھیں مردمانی لڑ دیم ءَ آؤرتگ – ما گوشگ لوٹیں کہ ریاست سر ءَ ھوش بہ گپت اے وڑیں وئیلاں ایرجنی ریاست ءِ بگیری ءَ گیشتر بنت –

وائس فار بلوچ مسنگ پرسنز ءِ رھشون ماما قدیر بلوچ ءَ گُشگ ات کہ اے راستی ءِ کہ راج ءِ یک بھرے انگت واب انت ءُ یک بھرے بے شعوری ءَ پُرایمنیں جھد کنوکانی سر ءَ تنکید کنگ ءَ انت پرچا کہ اے مردم ھر امل ءَ وتی واھشتانی درچ ءَ چارگ لوٹ انت –

ماما قدیر ءِ گوشگ ات کہ ائید ءِ روچ وشی ءُ بچکنداں گوں وت زور ایت ایر رؤت، ھمود ءَ کہ ھما راج کہ ایردستی ءِ زمزیلاں گوں بندوک انت آھانی ھاتر ءَ ائید ءِ وشی پہ دردیگ انت – ائید ءِ بابرکتیں روچ ھم بیگواھیں بلوچانی بنجل پچ بیت ءُ اے روچ ءَ روانک ءُ زھرشانی بیت –

آئی ءِ گوشگ ات کہ بلوچستان راجدپترے گرانتریں جاورھالاں گوں دوچار انت، مردم وت ماں وت گلائیش انت، چیریں ادارہ ءُ پوج بلوچستان ءِ جاورھالانی ھرابی ءِ زمّہ وار انت –

دومی نیمگ ءَ متھدہ ارب امارات ءَ ءُ پاکستان ءَ بیگواھیں انسانی ھکانی باسک راشد حسین بلوچ ءِ کھول ءَ سینزدہ مئی پنچ شمبے روچ ءَ ھلیجی ڈیھاں ائید روچ ءَ آن لائن کمپئین جار پرینتگ –

کھول ءَ وتی جار ءِ تہ ءَ گوشتگ کہ ائید ءِ روچ ءَ متھدہ ارب امارات ءُ پاکستان ءِ نیمگ ءَ راشد حسین یل کنائینگے ھاتر ءَ #SaveRashidHussain ءِ ھیش ٹیگ کمپئین کنگ بیت اِنت –

گوریچانی وزیرستان ءِ ھلال کمیٹی ءَ شنگ کرتگیں ھالانی تہ ءَ گوشتگ کہ ائید ءِ نوک گندگ بیتگ ءُ چریشی ءَ باندا ائید کنگ بیت اِنت –

ھمے درگت ءَ پی ٹی ایم ءِ رھشون مھسن داوڑ ءَ چاگردی رسانکجاہ ٹوئٹر ءَ گوشتگ کہ وانا ءَ بیست مردماں نوک دیستگ چریشی ءَ بیست مردمانی گندگ ءَ باندا ائید کنگ بیت اِنت –

آئی ءَ گوشتگ کہ مئے دوا بیگواھیں مردم ءُ ابید ءِ امیدگس ءِ پرمان ءَ کُشتگیں مردمانی واستا اَنت –

گوریچانی وزیرستان ءِ میتگ حیدر خیل ءِ دراھیں ملایاں نوک ءِ گندگ ءَ نیاد لوٹائینتگ – میر علی خیدر خیل ءَ مروچی بیست ءُ نُھمی روچ ءِ روچگی بیتگ چریشی ءَ جتا جتائیں جاھاں نوک گندگ بیتگ باندا وزیرستان ءَ ائید کنگ ءِ جار جتگ اش –

نامی ئین ندکار، کواس ءُ پروفیسر عزیز بگٹی بازیں وھداں نادراھی ءَ پد مروچی آ بیران بیتگ –

پروفیسر عزیز بگٹی بلوچستان ءَ بازیں وانگی، نود ءُ رگام، بلوچی اردو بول چاپ، بلوچستان قبائلی نزام ءُ سیاسی کلچر، راجدپتر ء بلوچستان ءُ بلوچ گھگیری لبزانک ءَ ھوار بازیں کتابی واھند اِنت آئی ءَ بلوچی اکیڈمی ءِ دیمروئی ءَ بے کساسیں جھد کتگ اَنت –

ھدامرزی بلوچستان یونیورسٹی ءَ پولٹیکل سائنس ءِ استادے بیتگ ءُ چریشی ءَ پد نوزدہ سد ءُ ھشتاد ءُ ھشت ءَ چیف منسٹع بلوچسفاب نواب مھمد اکبر ھان بگٹی ءِ سیکرٹری ھم بیتگ –

پروفیسر عزیر بگٹی ءِ بیرانی ءَ چاگردی رسانکجاھاں بازیں کچے ءَ لبزانک ءُ نودربر گلاں ھوار بازیں کچے ءَ پدردی درشان بیتگ –

سر بیتگیں ھالانی رد ءَ سبی ءُ شال ءُ رؤکیں دگ پھاٹک دشت ءِ نزیک ءَ ٹرکے ءَ پرپٹے ءَ را ٹکر جتگ چریشی ءَ یک مردمے بیران ءُ یکے زدگ بیتگ –

بیران بیتگیں مردم ءِ پجار بابل ء حبیب اللہ جھمنند مَچ ءُ آئی ءِ ھمراہ زدگ بیتگ –

ھمے وڑ ءَ دگہ یک وئیلے ءَ زالبول ءُ یک چُکے زدگ بیتگ اَنت –

گیشیں ھالانی رد ءَ شال ءَ دیم پہ دکی ءَ رؤکیں وین بغاو ءِ ھند ءَ کَلٹی بیتگ ءُ چریشی ءَ زھگ ءُ زالبولے زدگ بیتگ اَنت –

زدگ بیتگیں مات ءُ چُک دکی ءِ نادراہ جاہ ءَ سر کنگ بیتگ اَنگ زدگ بیتگیں زھگ عبدالسلام ءِ چُک اِنت ءُ آئی ءِ لوگی ھم زدگ بیتگ –

ھردوک نادراہ جاہ ءَ سر کنگ بیتگ اَنت اود ءَ ٹپانی درمان کنگ ءَ پد ھردوک مات ءُ چَک لوگ ءَ روان دیگ بیتگ اَنت –

مشکہ ءَ پوج ءِ سر ءَ اُرش کرتگ ءُ سَے پوجی کارمند کشتگ اَنت – میجر گوھرام بلوچ

سر بیتگیں ھالانی رد ءَ مروچی مشکہ ءَ پاکستانی پوج ءُ ناشناسیں سلاہ بندیں مردمانی میان ءَ جنگ ءُ چوپ بیتگ –

دمگی مردمانی رد ءَ جنگ ءُ چوپ بازیں وھدے ءَ برجاہ بیتگ ءَ جنگ ءَ سلاہ بندیں مردماں پوج ءَ را جانی ءُ مالی تاوانانی دیمپان کرتگ –

دومی نیمگ ءَ بلوچ سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ اے اُرش ءِ زمہ واری منّ اِتگ –

بی ایل ایف ءِ جارکش میجر گوھرام بلوچ ءَ رسانکدرھاں شنگ کرتگیں درشان ءِ تہ ءَ گوشتگ کہ مروچی مشکہ ءِ دمگ پتندر ءَ سرمچار ءُ پاکستانی پوج ءَ دیم پہ دیمی ءَ ڈک وارتگ چریشی ءَ پوج ءُ سرمچارانی میان ءَ جنگ بندات بیتگ –

جارکش ءَ گوشت کہ دیم پہ دیمی ھما وھد ءَ بیتگ کہ پوج کوھی دمگانی نیمگ ءَ روگ ءَ بیتگ ءُ ھمے وھد ءَ پوج ءِ سر ءَ راکٹ ءُ دگہ سلاھانی گون ءَ اُرش کرتگ ءُ پوج پَشت کنزی ءَ لاچار کرتگ، اُرش ءَ پوج ءِ سَے کارمند مرتگ اَنت ءُ باز زدگ کرتگ اَنت –

آئی ءَ گوشتگ کہ اُرش ءَ پد بالگرد جنگجاہ ءَ سر بیتگ اَنت ءُ پروش وارتگین پوج ءَ بازیں کچے ءَ تیرگواری کرتگ – آئی ءَ گوشت زورگریں پوج ءِ سر ءَ اُرش داں بلوچستان ءِ آجوئی ءَ برجاہ مان اَنت –

نبشتانک: 11 سوچکان شَھمیریں سنگت آغا عابد شاہ ءِ دَھمی سالروچ اِنت

نبشتہ کار: نود بلوچ

دی بلوچستان پوسٹ

شھمیریں سنگت آغا عابد شاہ پَرزندِ ڈاکٹر سعید بلوچ 1980 ءَ بلوچستان ءِ دمَگ پنجگور ءَ ودی بوت۔ آئی ءَ دہ تبک (میٹرک) ھائی سکول پنجگور ءَ پاس کرتگ، ءُ انٹرمیڈیٹ ءُ گریجویشن چہ ڈگری کالج پنجگور ءَ در بُرتگ آئی ءَ ماسٹری ڈگری چہ بلوچستان ءِ مَزن شاھدربرجاہ ءَ سوشیالوجی ءِ کارگل ءَ ھاسل کرت شھمیریں سنگت آغا عابد شاہ وتی مُلکاری 1993 ءَ چہ بلوچ نودربر گل (BSO) ءَ بِندات کرت، تاں 2002 بلوچ نودربرگل ءِ تَلّو ءِ سر ءَ راجکاری ئِے برجم داشت۔

چہ 2002 ءَ بِہ گِر تاں 2008 ءَ آئی ءَ بلوچ نودربر گل (آزات) ءِ تہ ءَ یک پِگرمند ءُ نامداریں سنگتے ءِ دروشم ءَ وتی مُلکاری برجم داشت بلوچ نودربر گل آزات ءِ 2006 ءِ راجی لس مجلس ءَ آ بلوچ نودربر گل آزات ءِ کُمک کماش گچین کنگ بوت وھدے کہ آ بلوچ نودربر گل ءِ یک باسکے اَت گُڑا اِے وھداں آئی ءَ بلوچ نودربر گل آزات ءِ پیام تیوگیں بلوچ سرڈگار ءِ ھند ءُ دمگاں سر کرت ءُ لس مھلوک ءَ را سرپدی ئِے دات۔

وھدے کہ آئی ءَ وتی ماسٹر ءِ ڈگری گپت ءُ گُڑا آئی ءَ 2009 ءَ بلوچ راجی جُنز (BNM) ءِ باسکے جْوڑ بوت ءُ بلوچ راجی جنز ءِ تلّو ءِ سر ءَ وتی ملکاری ئِے بندات کرت، دیمتر ءَ آ بلوچ راجی جنز ءِ بُنجاھی باسکے گْچین کنگ بوت۔، تاں وتی زندمان ءِ گُڈّی شَھمیری ءِ روچاں بلوچ راجی جُنز ءِ بھرے اَت۔
آئی اِے نگیگیں جاورانی تہ ءَ بلوچ راجی جُنز ءِ تلو ءِ سر ءَ وتی جھد برجم داشت آئی ءَ وتی نودربری ءِ روچاں بہ گِر تاں زندمان ءِ گُڈّی ساھتاں بلوچ نودربر گل ءُ بلوچ راجی جنز ءِ تلّو ءِ سر ءَ یک جوانیں دابے ءَ مُلکاری کرت آئی ءِ پگر، زانت ءُ بے بھائیں کُربانی بلوچ ملکاری ءِ رودپتر ءِ تہ ءَ ابدمان ءُ زِندگ اِنت تاں اِے جھان ءَ بلوچے زِندگ اِنت گُڑا آئی ءِ زرد ءِ تہ ءَ شھمیریں سنگت آغا عابد شاہ زِندگ اِنت۔ پرچے کہ شھمیریں سنگت کدی ھم نہ مِر اَنت بلکیں زوراکیں سرکار ءَ جسمانی دروشم ءَ سنگت چہ ما جِتا کرتگ بلے آئی ءِ پِگر ءُ لئیکہ انگت زِندگ اِنت۔ مرووچی بلوچستان ءِ کُنڈ کُنڈ ءَ شھمیریں سنگت آغا عابد شاہ ءِ دروشم ءَ پِگری ءُ لایکھی سنگت موجود اَنت۔

زوراکیں استان ءِ ایف سی ءُ چْیریں ترامگْیجاں رمس 15 ساچان 2010 ءَ پنجگور چتکان ءَ چہ سنگت آغا عابد شاہ ءَ را گْوں آئی ءِ دو سنگت ماسٹر عبدالستار ءُ ماسٹر سفیر بلوچ ءَ ھوَار روچِ رھمانی آوار جت ءُ بیگواہ کرت اَنت یک سالے ءَ رَند 11 سوچکان 2011 ءَ شھمیریں سنگت آغا عابد شاہ ءُ آئی ءِ سنگتانی ژانگولیں جْون چہ ویرانَگیں گورستان ءِ تہ ءَ چہ دست کپت اَنت شھمیریں سنگت آغا عابد شاہ ءِ گُڈّی وابجاہ پنجگور ءِ دمَگ چتکان ءَ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ دمگ پھرہ “ایرانشھر ” ءَ ایرانی لشکر ءَ تیرگواری کرتگ ءُ یک زھگے کُشتگ –

گیشیں ھالانی رد ءَ تیرگواری ءِ وئیل پھرہ ءِ ھند مھمد آباد ءَ بیتگ کہ اود ءَ کسان سالیں زھگے ایرانی پھزداراں تیرگواری کرتگ ءُ کُشتگ –

بیران بیتگیں زھگ ءِ پجار میثم ناروی ءِ نام ءَ زانگ بیتگ کہ تامر بندانی تہ ءَ گندگ بیت اِنت زھگ مات ءِ چنکان اِنت ءُ انساپ ءِ تواراں پِر جنگ ءَ اِنت-

وئیل ءَ پد مھلوک ءَ زھر درشان کرتگ ءُ دگانی سر ءَ زھرشانی کرتگ –

ھمے وڑ ءَ روکپتی بلوچستان ءَ تپاکی راجمانی گل ءَ اے وئیل ایر جتگ ءُ سیستان و بلوچستان ءَ بلوچ مھلوک ءِ برجاھیں زوراکیانی درچ کرار داتگ –

تپاکی گل ءِ سازمان ءِ گوشگ اِنت کہ میثم ناروی ءِ سر ءَ بیوکیں تیرگواری ءَ بلوچ راج سرجم ءَ سوگیگ ءُ پرسیگ اِنت ءُ چریشی ءَ پیسر ھم بازیں زھگ مرتضیٰ، حسنا، رویا، مھمد، غفور جدگال ءُ دگہ بازیں زھگ ایرانی لشکر ءِ تیرانی آماچ کنگ ءُ کُشگ بیتگ اَنت –

تپاکی گَل ءِ گوشگ اِنت کہ چوشیں وئیلانی پژدر ءَ تپاکی گل زھر ء درشان کنت ءُ اے وڑیں وئیلانی بگیری ءَ پشت ما پُشت ءَ توار چِست کنت –

چاگردی رسانکجاھاں روکپتی بلوچستان ءَ ایرانی لشکر ءِ تیرگواریاں زھگانی بیرانی یکشل ءَ آیگ ءَ اَنت پھرہ، دزاپ، چھبار ءَ پیسر ءَ ھم چوشیں وئیل دیم ءَ اتکگ اَنت اے جاھاں تنی وھدی لھتے سالانی تہ ءَ ھشت زھگ تیرانی آماچ کنگ ءُ کُشگ بیتگ اَنت –

روکپتی بلوچستان ءَ انسانی ھکانی گل ھم چوشیں وئیلانی پژدر ءَ گوشگ ءَ اَنت کہ بلوچستان ءَ ایرانی لشکر انسانی ھکانی لگتمالی ءَ کنگ ءَ اِنت باید آ اُستمان ءُ میان اُستمانی انسانی ھکاں سرگوز مہ کنت –