TBP Balochi

بلوچ ریپبلکن آرمی ءِ جارکش سرباز بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ گَل ءِ کلانیں کماندار کریم بخش ء حضور بخش بگٹی پنام ء ماما بگٹی ءُ شکیل ء مراد بخش پنام ء اسد بلوچ گل ءَ ھوار بوتگیں کلات ءِ جھمنند زیب زھری پنام ء راشد ءُ خالد نامیں دلاراں شھید کُتگ ءُ تکگ اَنت –

جارکش ءَ گوشتگ کہ ھشت مئی ءَ ماما بگٹی گوں وتی ھمراھاں گَل ءِ کارے ءِ ھاتر ءَ تر ءُ تاب ءَ بوتگ اَنت کہ سرکار ءِ داشتگیں دلار کہ سرمچارانی پوشاک ءَ بوتگ اَنت ءُ ماما ءِ ھمراہ بوتگ اَنت ءُ وت ءَ گیگ ءُ گوم اِش کتگ ءُ ماما واب ءِ تہ ءَ ءُ اسد بلوچ دبوج ءِ جوڑ کنگ ءَ گوں دلگوش بوتگ ھمے میان ءَ آھاں پُشتکائی تیرگواری کتگ ءُ شھید کتگ ءُ تتکگ اَنت-

سرباز بلوچ ءِ گْوشگ ات کہ ماما بگٹی ءَ گوستگیں پانزدہ سالاں ڈیھ ءِ آجوئی ءِ ھاتر ءَ الگرد بیتگ ءُ آ دہ سال ءَ پیش بُنجاھی کمانڈ کونسل ءِ باسکے گچین کنگ بوتگ وھدیکہ شکیل بلوچ سال دوھزار ءُ سینزدہ ءَ گوں گل ءَ ھوار بوتگ-

سرباز بلوچ ءِ گْوشگ ات کہ ماما بگٹی ءَ ڈیرہ بگٹی، نوشکی، کراچی ءَ ھوار سندھ ءِ جتاجتائیں دمگاں ءُ مکران ءَ بازیں سالے ءَ جُھد ءِ آجوئی ءَ ھاتر ءَ وتی پرز پیلو کتگ انت –

آئی ءِ گْوشگ ات کہ کلات ءَ چہ سیادی داروکیں زیب زھری پنام ء راشد ھشت ماہ ءَ پیش گل ءَ ھوار بوتگ ءُ سَے ماہ ءَ پیش آئی ءَ وتی ناکوزتک خالد ھم گل ءَ ھوار کنائینتگ-

اے دوئیں مردماں مھکمیں شوربندی ءَ چہ گل ءِکلانیں کماندار ماما بگٹی ءُ سنگت اسد شھید کتگ اَنت – آیانی سرجمیں سرپدی گَل ءِ کر ءَ اَنت ءُ آیانی بگیری ءَ گل ءُ ڈیھ ءِ گوما گداری ءُ سنگتانی شھید کنگ ءِ وڑیں کتکاریانی بگیری ءَ گل ءِ رھبندانی رِد ءَ گامگیج زورگ بیت-

شھید کماندار ماما بگٹی ءُ سنگت شھید اسد ءِ شھیدی راجی جھد ءُ گل ءِ ھاتر ءَ الّم یک بلاھیں تاوانے ءَ چہ کم نہ اِنت بلے راجی زرمبشت ماما ءِ وڑیں جوانیں بچّاں وتی سالانی جُھد ءَ چہ مھکم کُتگ راجی جزبگ چہ سرچکاریں ماما ءِ سنگت ڈیھ ءِ آجوئی ءَ تاں وتی جنگ ءَ برجاہ دار اَنت-

بلوچ ریپبلکن آرمی شھید کماندار ماما بگٹی ءُ شھید سنگت اسد بلوچ ءَ را جُھد آجوئی ءِ ھاتر ءَ گرانبھائیں کربانی دیگ ءَ آھاں سھرچکیں دروت ندر کنت ءُ آھانی ستاشانی کنت –

ریاست ءَ بلوچ ءِ چکچینی ءِ ھاتر ءَ گُڈی سیمسراں تاں آستینک لانتکگ انت- ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ دہ روچ سرجم بوتگ – بلوچستان نیشنل پاٹی ءِ رھشون نوابزادہ ھاجی لشکری خان رئیسانی ءَ بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ – ھمے وھد ءَ آئی ءَ گوں ماما قدیر بلوچ ءِ گون ءَ بیگواھیں مردمانی جیڑہ ءِ سر ءَ باوست کتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گُشت کہ اے وھد ءَ بلوچستان ءِ تھ ئِے جاورھال چہ ھچ کس ءَ چیر نہ اَنت، زلم ءُ زوراکیانی تہ ءَ روچ پہ روچ گیشی آیگ انت – ریاست ءَ بلوچ ءِ چکچینی ءِ ھاتر ءَ گُڈی سیمسراں تاں آستینک لانتکگ انت –

آئی ءِ گوشگ ات کہ بلوچستان ءِ تہ ءَ ھمک روچی یے وئیلاں ھوار چُک ءُ زالبولانی گون ءَ جنسی زوراکی وئیل دیم ءَ آیگ ءَ انت – ءُ اے وئیلاں پاکستانی پوج یا آئی ءِ جوڑ کرتگیں ڈیتھ اسکواڈ ءِ ٹولی تچکی ءَ ھوار انت –

ماما قدیر بلوچ ءِ گوشگ ات کہ مارا یات دارگی انت کہ اے بس ھما وئیل انت کہ دیم ءَ اتکگ وھدیکہ بلوچستان ءِ تہ ءَ اے وڑیں بازیں وئیل بوتگ اَنت کہ دنیگت ءَ دیم ءَ نہ اتکگ انت –

سر بیتگیں ھالانی رد ءَ گوادر ءَ اسپیئر پارٹس ءِ باپاری ءَ ھواریں تاجراں ڈپٹی کمشنر ءِ گس ءِ دیم ءَ نندانک جتگ ءُ نشتگ اَنت –

تاجرانی گوشگ اِنت سَے روچ ءَ داں مارا دکانانی پچ کنگ ءَ بِل اِت ءُ داں ائید ءِ سیزن ءَ مئے روزگار ءِ تہ ءَ گھتری اتکگ بہ کنت –

آیانی گوشگ اِنت اے وڑیں بند آری ھچ وڑ ءَ منّگ نہ بیت کہ ائید ءِ آیگ ءَ مئے دکانانی بند کنگ ءُ مئے روزگار ءِ بند کنگ مئے گون ءَ زوراکی یے –

نندانکی زھرشانی ءَ اسپئرپارٹس تاجراں ھوار دگہ باپاری مردم ھوار اَنت آیانی لوٹ اِنت اے سَے روچاں مئے دکان پچ کنگ بہ بنت –

آیانی گوشگ اِنت اے سئیں روچاں مئے دکان پچ کنگ بہ بنت چریشی ءَ پد دَہ روچ ءِ بند آری مارا کبول اِنت –

زانگ بہ بیت بلوچستان ءِ سرکار ءَ ھشت مئی ءَ داں شانزدہ مئی ءَ سرجمیں بلوچستان ءَ بنداری ءِ جار پرینتگ ءُ سرکار ءِ گوشگ اِنت کہ جھانی نادراھی کرونا وائرس ءِ گر ءُ دار ءَ اے بند آری کنگ بیتگ کہ ائید ءِ وھد ءَ مردمانی مُچی گیش بیت کُت کنت چریشی ءَ نادراھی ءِ گیش تالان بیگ ءِ گمان اِنت –

زانگ بہ بیت مروچی بلوچستان ءِ بنجاھی شھر شال ءَ ھم تاجر برادری ءَ دکانی بند کنگ ءِ ھلاپ ءَ زھرشانی کرتگ –

تاجرانی گوشگ اِنت کہ ما مال پہ ائید ءَ مُچ کرتگ اَنت بلے سرکار ءَ مئے دکان بند کرتگ اَنت چریشی ءَ تاجر برادری ءَ تاوان اِنت –

شال ءَ سریاب دگ ءِ سر ءَ پاکستانی پوج فرنٹیر کور ءِ دو کارمند تراک ناکیں شوروانی نشانگ کرتگ انت – جئیند بلوچ

سربوتگیں ھالانی رِد ءَ بلوچستان ءِ بنجاھی شھر شال ءِ دمگ سریاب دگ ءِ سر ءَ چیرکتگیں تراک ناکیں شوروانی تراک ءَ پاکستانی پوج ءِ فرنٹیر کور ءِ دو کارمند بیران بیتگ اَنت –

اے اُرش شال ءَ طارق نادراھجاہ ءِ نزیک ءَ دگ ءِ سر ءَ ھما وھد ءَ کنگ بوتگ کہ پاکستانی پوج فرنٹیر کور ءِ کارمند پرپٹ ءِ سر ءَ سریاب دگ ءِ سر ءَ تر ءُ گرد کنگ ءَ بوتگ انت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تراک زمّہ واری منّ اِتگ گوشتگ ءُ کہ مئے سرمچاراں دو شمبے ءِ روچ ءَ شال ءِ دمگ سریاب دگ ءَ پاکستانی پوج فرنٹیر کور دو کارمند بمب تراک اُرش ءَ کُشتگ انت –

آئی ءَ گوَشتگ کہ اے پوجی کارمند پرپٹ ءِ سر ءَ شال ءِ دمگ سریاب دگ ءِ سر ءَ تر ءُ گرد ءَ بوتگ اَنت کہ مئے سرمچاراں چیرکتگیں تراک ناکیں شوروانی نشانگ جوڑ کتگ انت-

جارکش ءَ گوشتگ کہ تراک آسر ءَ پوج ءِ دوئیں کارمند ھما دمان ءَ مرتگ اَنت –

آئی ءَ گوشتگ کہ مئے اُرش وتی مول مرادانی برجم ءَ تاں برجاہ مان انت –

ھندو میتگ ءِ وانگجاہ ءِ سر ءَ برجاھیں پوجی پانگس ءِ سر ءَ دستی بمب اُرش ءِ کُتگ یکے کارمندے کُشتگ – مزار بلوچ

سربوتگیں ھالانی رِد ءَ گوستگیں شپ ءَ ناشناسیں مردماں خاران ءَ ھندو میتگ ءِ وانگجاہ ءِ سر ءَ برجاھیں پاکستان پوجی پانگس ءِ سر ءَ دز بمب اُرشے کُتگ-
اُرش ءَ پاکستانی پوج ءَ جانی تاوان رس اتگ ءُ اُرشکار درآیگ ءُ رؤگ ءَ سوبمند بوتگ انت –

بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءِ ادار دہ ءُ نیم ءَ ھاران ءَ ھندو میتگ ءِ وانگجاہ ءِ سر ءَ برجاھیں ایف سی ءِ پانگس ءِ سر ءَ دز بمب اُرشے کتگ – اُرش ءِ آسر ءَ یک پوجی کارمندے مرتگ ءُ دو ٹپی بوتگ اَنت –

جارکش ءَ گڈسر ءَ وتی درشان ءِ تہ ءَ گوشتگ کہ بلوچستان ءِ آجوئی تاں مئے اُرش برجاہ مان انت –

پنجگور ءَ کُڈے ءَ آس کپتگ ءُ زھگے بیران، زھری ءَ ناشناسیں ٹکی سروک زدگ، لورالائی ءَ دو ٹولیانی میان ءَ جنگ ءُ چوپ ءَ دو کس بیران –

سر بیتگیں ھالانی رد ءَ پنجگور ءَ یک لوگے ءَ آس کپتگ، چریشی ءَ یک زھگے ستکگ ءُ بیران بیتگ –

گیشیں ھالانی رد ءَ پنجگور ءِ دمگ پھنچی کھن ءَ ھارون نامیں زھگے ءَ کُڈکے ءَ آس لگ اِتگ چریشی ءَ کسان سالیں زھگ ستکگ ءُ بیران بیتگ –

ھالانی تہ ءَ گوشگ بیتگ زھگ ءَ کُڈ ءِ تہ ءَ باکسی ڈِل روک کرتگ ءُ چریشی ءَ کُڈ ءَ آس کپتگ ءُ کسان سالیں زھگ ستکگ ءُ بیران بیتگ –

ھمے وڑ ءَ زھری ءَ ناشناسیں مردمانی تیرگواری ءَ ٹکی رھشون زدگ بیتگ –

گیشیں ھالانی رد ءَ زھری ءَ ناشناسیں سلاہ بندیں مردمانی تیرگواری ءَ ٹکی رھشون ءُ گوستگیں ڈسٹرکٹ کونسل مھمد شریف زھری سک زدگ بیتگ –

دمگی مردمانی رد ءَ مھمد شریف ءَ سَے تیر لگ اِتگ ءُ چریشی ءَ آ سک زدگ ءُ ناوشیں جاوراں نادراہ جاہ ءَ سر کنگ بیتگ –

لورالائی ءَ دو ٹولیانی میان ءَ جنگ ءُ چوپ بیتگ چریشی ءَ دو کس بیران بیتگ اَنت –

دمگی مردمانی رد ءَ لورالائی ءِ دمگ میختر تیرخہ چینہ ءِ نزیک ءَ بارکڈولہ ءَ مری ءُ حمزئی ءِ ٹکانی میان ءَ جنگ ءُ چوپ بیتگ ، دولت ھان ءُ مھمود بیران بیتگ اَنت –

چریشی ءَ پد دمگ ءِ مردم سر بیتگ ءُ جنگ ءُ چوپ ءَ اڑیتگیں مردم اش گشین اِنتگ اَت ئِے گیشین پَٹ ءُ پول انتزامیہ کنگ ءَ اِنت –

نبشتانک: ترا شھید بوھگی نہ ات

نبشتہ کار : منزور آدل رھگوزؔ

دی بلوچستان ہوسٹ

نہ زاناں وتی کڑو بڑو ءُ بےسر ءُ بے پائدگیں گپ آں چہ کُجا بُنگیج بہ کن آں بلے پد ءَ ھم دل گُش ایت کہ ھر کجا کہ ترا بُنگیج کنگی انت چہ ھمودا بنُگیجے بکن زندگی ءِ تہ ءَ منی ھمے ھُب ءُ واھگ ات کہ من وتی زند ءَ گوں انچیں منلگ ءُ دیوانگے ءَ ڈیک بہ وراں کہ چہ آئی ءَ لہتیں چیز من در بہ براں اللہ ءِ لک لک شُگر انت کہ اللہ ءَ منی دل ءِ اے ھُب ءُ مُراد پیلو کُت بلے پد ءَ ھم اینِچو موہ ئِے نہ دات کہ اینچو موھے دئیگی ات من وتی زند ءَ دو انچیں منلگ تب ایں انسان آں گوں ڈیک وارت کہ یکے ءِ کر ءَ اللہ پاک ءَ من ءَ اینچو موہ نہ دات من آ سنگت ءَ وَ پَرشتہ ئِے بہ گُش آں بلکیں من رد نباں پرچا کہ آ انچیں منلگ ءُ دیوانگ ءُ پَرشتہ تب ایں سنگتے ات. من ءَ اگاں یات بہ بیت منی ھیال ءَ 2013 ءَ من اولی رند ءَ اے سنگت ءَ گوں ڈیک وارتگ ات من اولی رند ءَ اے سنگت دیست ءُ اے سنگت ءِ گپ ءُ کندگ ءُ گوں اوتاک ءِ تہ ئِے کستریں سنگتاں گوں مھروانی دیست من ءَ انچو گمُان بوت کہ اے سنگت چہ ماتے ءَ کمتر نہ انت اے گپ و باوری گپ ئِے کہ ماتے ءَ چے کمتر ھم نہ ات 2013 ءَ چے پد پد ءَ گوں اے سنگت ءَ من ڈیک نہ وارت دانکہ 2019 ءَ من پد ءَ گوں ھمے سنگت ءَ ڈیک وارت پیسرا من گوں اے سنگت ءَ اینچو نزیک نہ اتوں وھدے کہ 2019 ءَ من اے سنگت ءَ گوں نزیک تر بوھان بوت آں ءُ سنگت ءَ شریں وڑے ءَ پجاروک بوت آں تاں من ھمے جیڑ ات کہ اے سنگت منی ھیال ءَ پہ منا چے ابید کلُیں سنگتاں پہ پرشتھے ءَ چے کمتر نہ ات ھمینچو وھد گوزان بوت من ءُ سنگت گیشتر پجاروک بوَان اتاں ھر وھد ءَ سنگت ءِ گپ ءُ ھیال ھمیش ات کہ ما ءُ شما راجی جُھد کار ایں مارا ءُ شمارا جھُد کنگی انت بلے پہ وھد ءِ گوازینگ ءَ نہ بلکیں گوں دل ءُ ستک ءُ پہ ایمانداری ءَ گوں کنگی انت اے جھد مئے ءُ شمئیگ انت مارا ءُ شمارا کنگی انت ھر وھد ءَ سنگت ءِ گپ ءُ سکین ھمیش ات 2019 چے پد پد ءَ چیزے مُدّتے ءَ من اے سنگت نہ دیست اے سنگت گوں گَل ءِ کاراں گُلائیش ءُ منی ھم سر دگہ نیمگے ءَ کپت انَچو گوں وتی کار ءُ دَزگٹی آں گوں وھد گوزان ات چیزے وھدءَ پد منی سر پد ءَ ھمے سنگت ءِ کر ءَ کپت بلئے اے رند ءَ منی کر ءَ وھد سک کم ات ءُ آ سنگت ءِ کِر ءَ ھم وھد چہ منی ءَ کمتر ات پمیشکا اے رند ءَ بازیں گپ ءُ تران نہ بوت بلے پد ءَ ھم سنگت ءَ ھما گپ کُت اَنت کہ پیسرا ھر وھد ءَ کہ ما ڑیک وارتگ ات گپ کتگ ات اے رند ءَ بس یک شپ ئِے مئے دوئینانی دیوان بوت سنگت ءَ پد ءَ ھم من ءَ ھمے سر ءُ سوج کُت اَنت کہ اے جنگ مئیگ ءُ شمئیگ انت اے جنگ مارا ءُ شمارا کنگی انت مئے مسترین ءُ کسترینان کنگی انت بلے یک گپ ئِے مئے ھیال ءَ بہ بیت کہ مارا یک مُھر ءُ مھکمیں گَل ئِے جوڑ کنگی انت مارا وتی پدریچان آں یک مھُر ءُ مُھکُمیں گَل ئِے دیگی انت ھمے گپ ءُ تران ھلاس بوت اَنت ءُ ما شُت ءُ وپت آں شپ روچ بوت من ءَ سنگت آں ھال کت کہ زوت بیا ترا سنگت لوٹگ ءَ انت من گُشت پیرک من ءَ سنگت لوٹگ ءَ انت تو چے گُشئے گڑا ؟ بچکندات ءُ گُشت ئِے کہ تو جلّ ئے منی چم سارت بنت اگاں تو جنزئے گڑا اللہ ءِ میارئے پد ءَ گُشت ئِے کہ شر تو انوں برو آ سنگت کمو نہ گیگ اَنت من ءَ ھم گَل ءِ لھتیں کار ھست من اوں نوں اوتاک ءَ نہ باں تو برو پلال سنگتانی نیمگ ءَ من کہ گیشّ آں پد ءَ ترا ھالے کن آں بیا گڑا شریں وڑے ءَ گندُک ءُ دیدارے بیت من در کپت آں اتک آں سنگتانی نیمگ ءَ ءُ شھید پیرک اوں وتی کارانی نیمگ ءَ راھی بوت۔ 26 اپریل 2020 ءِ یک بدنسیب ءُ ملور ءُ ابیتکیں بیگاھے اَت ما کُلیں سنگت اوتاک ءَ نشتگ ات اِنت دو سنگت نیٹورک ءَ شتُگ ات ما ھمدا گپ ءُ کندگ ءَ ات اِنت کہ نیٹورک ءِ دوئیں سنگت اتک اَنت ءُ ھمے بدیں ھال اش دات کہ پیرک گوں دگہ سے سنگت ءَ پروم ءَ شھید کنگ بوتگ اَنت گوں ھمے گپ اِش کنگ ءَ منی دل ءَ آزمان زمین ءَ اتک ءُ زمین ءَ ھم وتی لانک پہ آزمان ءَ بست اَنت من گوں اے گپ ءِ اِش کنگ ءَ گوں ھُشک بوت آں ءُ جیڑگے ءَ کپت آں دل ءِ تہ ءَ اللہ ءَ را انچو گُشگ ءَ لگّ اتاں کہ آ مردم ترا برگی انت تو آھاں نہ برئے آ کہ ترا برگی نہ انت تو آھاں پرچا برئے؟ ھمدا آ دگہ سنگتاں جُست کُت کہ چونی ءَ شھید کنگ بوتگ اَنت سنگت ءَ سرجمیں کسہ کُت اَنت-

منی ھیال ءَ شھید ھر وھد ءَ مارا ھمے گُشگ ءَ انت کہ من وَ شھید بوتگ آں، پہ من بژنیگ مہ بئے اگاں من شمارا دوست آں گڑا منی پشکپتگیں کاراں دوست بدار ات ءُ منی پشکپگتیں کاراں دیمءَ بہ بر اِت پرچا کہ ما ءُ شُما اگاں نزیک ءُ سنگت بوتگیں مئے ءُ شمئے نزیکی ءُ سنگتی ءِ سوْب ھمے کار بوتگ اَنت مرچی اگاں من شھید بوتگ آں پہ ھمے کارانی ھاترا اگاں کسے منا یاد کنت یا دوست داریت گڑا من ءَ چے گیش منی گَل ءِ کاراں دوست بہ داریت ءُ منی ناسرجمیں کارانی سرجمی ءِ جھد ءَ بہ کنت-

پیسر ءَ کہ من دگہ یک ملنگ تب ایں سنگتے ءِ نام ءَ زاھر کنگ ءَ اتاں آ سنگت روچے مرچی ھست اِنت ءُ اللہ پاک مدام اے سنگت ءَ زندگ بہ کنت من کدی کدی گوں ھمے سنگت ءَ ڈیک وراں منا انچو سما بیت کہ پورا من پرشتھے ءِ دیم ءَ نشتگ آں اے سنگت ماتے ءِ جاہ ءَ مات ءُ پت ءِ جاہ ءَ پت ءُ برات ءُ گُھار ءِ جاہ ءَ برات ءُ گُھار ءُ سنگت ءِ جاہ ءَ سنگت اگاں مرچی من ادِ ءَ نشتگ آں چار لبز نبشتہ کنگ ءَ آں یا ادِ ءَ گوں سنگتاں بندوک آں اول ھدا ءُ دومی ھمے سنگت انت-

من نہ زاناں منی بد بھتی انت یا منی بےزانگی انت آ کدّ ءَ کہ اے سنگت ءِ ازت ءُ اھترام پہ من اَلّمی انت من آ کدّ ءَ وتی ڈُبّہ ءَ پیلو کنگ ءَ نہ آں من وت برے برے جیڑ آں کہ کسے مارا دوست دارگی انت ما آھی زند ءَ دوست بہ داراں وھدے کہ آ چہ ما گسر بیت گڑا مئے دوست دارگ ءَ نہ لوٹیت۔

آئی ءَ را وت دوست داروک بیت منی دوست ءُ براتاں منی ارز انت گوں شُما اگاں شمارا کسے دوست دارگی انت گڑا آئی ءِ زند ءَ دوست بہ دار ات وھدے آ کہ چہ ما جتا بیت گڑا مئے ءُ شُمئے دوستی ءَ نہ لوٹ ایت منی ھیال ءَ مئے تہ ءَ چُشیں سنگت ھم باز اِنت کہ آھانی گْور ءَ مئے دربرگی چیز باز اَنت مئے گور ءَ سرپدیں سنگت ھست مئے گْور ءَ وھد ھست ما در بہ بریں اگاں نہ گڑا رند ءَ ما پشومان مہ بہ ایں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: سنگت نوک آجو بوان اَت

نبشتہ کار: ڈاکٹر مھروان بلوچ

دی بلوچستان وسٹ

من گوں آئی ءَ سک ھمگرنچ ات آں، ھردیں کہ مئے گند ءُ نند بوت گڑا ما وڑ وڑیں سرھالانی سر ءَ باوست کت بلے راج دوستی ءُ راج ءِ آجوئی مئے دوست تریں سرھال ات اَنت ءُ ما راج ءِ بزگی، لاچاری ءُ زوراکی ءِ سر ءَ مُدام گپ جت بلے آئی ءَ من ءَ دائم گْوشت ئِے کہ ھیال بکن کہ دیواراں ھم مرچاں گوش پِر، سنگت ءِ ھمے گپ ءَ منی دل ازینت گڑا من گوں کندگ ءِ دپ ءَ گْو شت: “کھروار! بگند ئے تو ڈیتھ اسکوائیڈ ءِ مردمے ئے؟” برے برے من ءَ ھمے سما بوتگ کہ سنگت لگور ءُ بزدل ئے ءُ باز رند ءَ من لوٹیتگ کہ من وتی دلءِ بڑاس ءَ بِہ کشاں ءُ ھمے گپ ءَ بگش آن ئِے بلے من گشت کت نہ کُتگ، بلکیں اے واست ءَ ناں کہ دل ءَ کار یت، بگند ئے اے واست ءَ کہ من ءَ گْشگ ءَ دل نہ بوتگ اَت بلے یک گپے ھست، وھدے کہ اے گال ءِ من ءَ گْوشتاں گڑا منی دیم کرچ ءُ کوس بوتگ اَت ءُ پد ءِ آئی ءَ اے گپ ھم مار اتگ من ءَ اے گال دوست نہ بنت، ھمے ساھت ءَ من ءَ اے ھم گْوشتگ ئِے کہ من زاناں تو چے سوچگ ءَ ئے، من گْوشت: “بل یار اے گپاں، سگریٹے روک کن ءُ منءَ دئے” سگریٹ ءِ کشگ ءَ پد ما دوئیں پہ وتی وتی جاہ ءَ شت ایں، لجتیں پندے جنگ ءَ پد من ترانگءَ کپتاں کہ باندا کارے ٹھینّگی اَنت من توار پِر دات:
“باندا وتارا سھبءَ مھلا بیھٹک ءَ سر کن” من ءَ ھمے گُمان بوت کہ بگند ئے کندگے جنت ءُ گْوش ایت منءَ مھلا پاد آھگ تمبل نہ کنت بلے ناں بس سر ئِے سورینت ءُ رھادگ بوت، منی باز ودار ءَ پد چاراں کہ چہ دور ءَ مرد ءِ ملّان اِنت، اسپیت ءِ پچ ءِ گُوار ءَ، بلوچی چادر ءِ بڈا اِت ءُ دیم پہ من ءَ پیداک اِنت، من گْوشت: “تو وتارا چوں سالونک ءَ سمبائینتگ وَ” من ءَ بلے گشت ئِے کہ منی جان وش نہ اِنت گڑا من کندگے جت ءُ گْوشت: “ھمے کہ کارے کنگ ءِ باری بیت، تئی جان نہ وش بیت” گڑا پد ءَ من ءَ گشتے: “بل یار کار سرجم کنگی انت” ھمے وھد ءَ منی گوانکو ءَ رینگے اتک ءُ من ءَ گشگ بوت کہ وتی سامان ءَ بزور ایت ءُ دھر کپ ایت، ما شما کھل کور والا ٹکانہ ءَ یکجاہ بہ ایں۔ سر بوگءَ پد ءَ مارا سر ءُ سوج کنگ بوت، چوناھا مئے پلانگ ماھے بوتگ ات کہ سرجم بوتگ ات، دْراھیں سنگتاں وتی توپگ ءُ جنگی اوزار زرت اَنت بلے چہ آئیءِ دست ءَ توپگ کپت، من دیست کہ سنگت ھید اِنت گڑا من سنگت نادینت ءُ گْوشت: “من زاناں کہ تو نوک ئے ءُ تئی اولی جنگ انت، تئی جان ھم وش وش نہ اِنت تو ھمد ءَ نند ءُ آرام بکن بلے گْوشت ئِے: “ناں من شر اوں ءُ من شمئے ھمراہ بوگ لوٹ آں، ھمے میان ءَ توارے آتک کہ سنگتاں وتی وتی پوزیشن ءَ بیگر اِت بلے آ من وتی کر ءَ کُت۔

آئی ءَ ساہ ءِ کشگ ءِ آواز منی گوشاں پیداک اَت، ھمے ساھت ءَ من ءَ ھیالے ءَ پتات کہ باریں سنگت توپگ ءَ آس دات کنت یا کہ ناں، ھمے دمان ءَ کامریڈ دودا ءَ جار جت کہ سنگت ءَ اُرش کن اِت بلے درساں پیسر لشکرءِ سر ءَ اسنائپر والا تیر سرومبین اِت، پد ءَ گڑا یکپاریگی سنگتاں تیر گْواری کُت، ماہ داں دژمن ءَ اچ نیشت، ما سوبین بوت ایں، مئے یک سنگتے ھم ٹپی نہ بوت، سنگتاں سنگر ءَ آس دات ءُ دیم پہ ٹکانہ روان بوت ایں، وھد بیگاہ ءِ ھلاسی اَت، سنگت کوچرائی کنان ات اَنت، من ھم سک کندگ ءَ ات اوں بلے آ ھاموش ات دژمن سرپد بوتگ اَت اَنت کہ سنگت چہ اِد ءَ پیداک اَنت، سنگتاں گوں دژمن ءَ پد ءَ ڈیک وارت ءُ داں دیراں جنگ بندات بوت، داں دیر سنگتاں جنگ داشت بلے سنگتاں دم ھم باز برتگ اَت گڑا کامریڈ دودا ءَ چار اِت چوں دْراہ سنگت جَنَگ بنت، گڑا کامریڑ ءَ سنگتاں ءَ گْوشت کہ شما کور ءِ دومی راہ ءَ گران بہ اِت ءُ روان بہ اِت، ما 3 کس دیم ءَ دار ایں بلے آ ھچ منّگ ءَ تیار نہ اَت ءُ گشت ئِے کہ کامریڈ تو گوں سنگتاں راہ ءَ گِر، جنگ ءَ من دار آں، کامریڈ گوں سنگتاں شُت بلے من گوں کامریڈ ءَ نہ شُت آں داں دیراں جنگ بوت، دیمے من ءُ دیمے آ، ساھتےءَ پد “آہ” ءِ توار منی گوشاں کپت ءُ من زانت کہ آئی تیر ءِ آماچ بوتگ ءُ من مدان مدان ءَ آئی ءِ نزدیک ءَ شتاں ءُ دیست کہ آئیءِ راستیں نیمگ ءِ سینگ ءَ تیرے لگ اِت ءُ ھون باز ریچگ ءَ اِنت ئِے ءُ من آئیءِ کوپگ ءِ بلوچی چادر زرت ءُ ھما جاہ ءَ بست کہ ھون ریچگ اَت، گڑا من دیست کہ آ بچکندگ ءَ اِنت ءُ من ءَ گْوشت ئِے کہ ساہ سیگریٹے روک کن ءُ دئے، من مار اِت کہ آ سالونک پہ وتی گلزمین بوتگ اَت، آ سالونک پہ وتی گلزمینءَ گل اَت، آ سالونک پہ وتی گلزمینءَ آجو بوتگ ات، گڈسر ءَ من مار ات کہ آئی ءِ لگوری ءُ بزدلی چہ آئی اندر ءَ مرتگ اَت ءُ منءَ سما بوت کہ سنگت نوک آجو بوان اَت، اہو! سنگت نوک آجو بوان اَت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: پاتما اَئید ءِ ودار ءَ نہ اِنت

نبشتہ کار: رُکسانہ دوست مھمد

دی بلوچستان پوسٹ

لالا اَزیم دوست ءِ آیگ پہ پاتما ءَ وت یک اَئیدے، نوں شش سال پِر گْوستگ کہ لالا اَزیم دوست چہ مئے کھول ءَ گستا اِنت آ وھد ءَ کہ لالا ازیم دوست چست کنگ بوتگ، آ وھد ءَ پاتما پیداگ نہ بوتگ، نوں لالا اَزیم جان ءَ شش سال پُرّیں سرجم اِنت لالا جان چہ ماں گِسر گپتگ بِلے بیا کہ پاتما ءَ چار سال اِنت نوں آ ھم وتی اَگل ءُ ھوش ءَ برابر اِنت، لالا جان ءِ اکساں چار اِیت ءُ جست کنت، اَدّا اے کَے اِنت، کئی اکس اِنت دم پہ سھت ترا پُچ گون اِنت ساپ ئِے کنگ ءَ ئے ءُ شپّ ءُ روچ وتی دِل ءَ داشتگ ءُ شپّ ءَ وپسگ ءِ وھد ءَ ھم ترا بَگل ءَ اِنت؟من یک بَرے اجکہ بوت آں کہ اے کسانُکیں پاتما من ءَ اے اکس ءِ جست ءَ اِنت من پاتما ءَ چوں سرپد بہ کن آن ءُ چونیں پسّو ئِے بہ دے آں، یک اناگہ ءَ دل پُر کُت ءُ گُشت اِے مئے لالا اِنت-

پاتمہ ءَ گشت: لالا چونیں لالا؟ من اے لالا ھچبر مئے گِس ءَ نہ دیستگ؟ نوں من چہ وت ءَ جست کنگ ءَ آں کہ اے پاتما من ءَ پرچا انچو جست کنگ ءَ اِنت من پاتو ءَ چوں سرپد بہ کن آں؟من گوں وت ءَ وت گپ ءَ اِت آن ءُ ھمے وھد ءَ پاتو ءَ من ءَ دست گون جت ءُ گشت اَدّا ترا چے بوت بہ گْوش ناں لالا مئے گِس ءَ پرچا نَئیت زاناں گوں ما زھر اِنت بلے تو بہ گْوش ھنّی کُج ءَ اِنت؟-

من یک بَرے دِل ءَ جیڑ اِت پاتو ءِ اے جستانی پسّو یک روچے نہ روچے من ءَ دیّگی اَنت، ھنّی دیان اِش شر یاں وھد گوزان کنت شر بلے پاتو اے جستانی پسّواں الّم لوٹ اِیت، من گوں وتی اندر ءَ پاتو ءِ جستانی پسّو ءَ گر ءُ چیل اِت آن ءُ منی دپ ءَ دَر اَتک کہ لالا ءَ شش سال اِنت بدواھاں برتگ گار ءُ بیگواہ اِش کُتگ، آ وھد ءَ تو پیداگ نہ بوتگ ئے لالا چہ مارا گستا اِش کُتگ ھما شش سال اِنت کہ ما لالا ءِ رنگ نہ دیستگ ھما اِنت کہ من ءَ لالا ءِ اکس دستانی دِل ءَ اِنت، شپ کہ بیت من اے اکس ءَ وتی دِل ءَ دار آں دانکہ وتی دِل ءِ درد ءُ رنجاں کمتر بہ کن آں ۔

من کہ چمّ چست کُت انت ءُ چار اِت پاتو واب کپتگ من جیڑ اِت نوں پاتُل من ءَ جست نہ کنت آ کسان اِنت بے ھیال بیت اے شپ ءِ ھلاسی ءَ سھب بیت ءُ پَد ءَ پاتُل ءِ جستانی ھمبار پچ بوت، ھما جست کہ پاتُل ءَ شپ ءَ ایر کُتگ اِت انت ءُ آ جستانی پجّیگ ءَ دگہ سے چار جست ئِے گون اَت لالا پرچا برتگ اِش لالا ءَ زاناں چے کُتگ لالا ءِ میار ءُ گناہ چے اِنت لالا ءَ زاناں ایشانی چے کار ھراب کُتگ؟ اے پیمیں تپلانی جستانی پسّو ءِ دیگ سک گران اِنت بلے نوں پاتُل زانت کہ مئے لالا پہ زور برتگ اِش پاتما گوش اِیت منی لالا ءَ بیار اِت ائید اتکگ، شما چست کنوک ءُ گار کنوک پہ وشھالی وتی گِساں نشتگ ءُ ائید ءِ وشیں روچاں گوں وتی چُک ءُ برات ءُ کھول ءِ مردمانی گوما وشھال اِت، گڑا منی لوگ ءَ شما پرچا آس جمبور کُتگ پرچا شما مئے ائید ءِ وشیں روچ چہ ما چِہ پُل اِتگ اَنت ءُ پچ گپتگ اَنت؟ ما ھم انسان اِیں ما ھم زندگ بوگ لوٹ اِیں، شمارا اگاں وتی کھول ءُ وتی لوگ ءِ مردم دوست اَنت گڑا منی لالا ءَ ھم بیار اِت پہ من پہ مئے کھول ءَ وشھالی کیت –

منی ائید ءِ واست ءَ چمپل ءُ گُد کار اِیت من لالا ءِ کستریں گوھارُک آں منی پریاتاں گوش بہ دار اِت من لالا ءِ جند ءَ چارگ لوٹ آں پاتُل ءِ اے گپ ءُ پریاتاں گوں منی ھرس شیپ گراں بوت اَنت کہ منی شش سال ءِ ودارانی کرن گوستگیں ودار کدی آسر بیت ، ودار زندگی ءِ یک بلاھیں بھرے بلے پد ءَ ھم کسان سالی ئیں پاتما ءَ اے بھر چِست کُتگ اوشتاتگ راھچار اِنت، آئی ءِ چمّ گوں ھما کشک ءَ سکّ اَنت کہ لالا اَزیم ھمے راہ ءَ کیت-

اَئید ءِ اے وشیں روچاں لوگ ءِ مردمے ءِ گسر بوگ ءِ سک دردناک اِنت آ ھمے جیڑ اِیت ءُ ھیال کنت ھرکس وتی لوگ ءِ مردمانی ھمراھی ءَ سیل سواد ءَ اِنت، بلے منی دل لالا جان ءَ اِنت کہ آ چے ھال ءِ تہ ءَ اِنت اے ائید ءِ وشیں روچاں بلے پاتما ءِ ودار انگت آسر نہ اِنت آ پہ لالا جان ءَ وداریگ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ٹی بی پی پتر ھال ءَ سر بیتگیں ھالانی رد ءَ بلوچستان ءِ دمگ کیچ ءِ ھند بلیدہ ءَ ناشناسیں سلاہ بندیں مردماں تیرگواری یک نودربرے کُشتگ –

ھالانی تہ ءَ گوشگ بیتگ کہ تیرگواری ءِ وئیل یکشمبے ءِ شپ ءَ میناز ءَ پیش اتکگ –

تیرگواری ءَ بیران بیتگیں ورنا ءِ پجار یاسر ظفر امام جھمنند میناز ءِ نام ءَ زانگ بیتگ –

دمگی مردمانی رد ءَ ورنا کراچی ءَ وانگ بییتگ ءُ انی ائید ءِ موکلاں وتی بنکی ھنکین ءَ اتکگ –

تیرگواری ءِ سبب زانگ نہ بیتگ- لیویز ءَ گیشیں پَٹ ءُ پول بندات کتگ –

ھمے رنگ ءَ پنجگور ءَ ناشناسیں مردماں تیرگواری کرتگ ءُ یک مردمے زدگ کرتگ –

وئیل پنجگور تسپ پسکول کور ءَ دیم ءَ اتکگ اود ءَ سلاہ بندیں مردمانی تیرگواری ءَ زاھد ء دلمراد جھمنند پنچی کھن نامیں مردمے زدگ بیتگ –

دمگی مردمانی رد ءَ دُزاں زاھد ءِ سر بستگ ءُ آئی ءِ پَرپٹ ءِ برگ ءِ جھد کرگتگ گر ءُ چِلی ءِ وھد ءَ دُزاں تیرگواری کرتگ ءُ چریشی ءَ آ زدگ بیتگ-

دمگی مردمانی رد ءَ پنجگور ءِ کش ءُ گوراں بازیں وھدے بیت کہ دُزی گیش بیتگ اَنت وھد وھد ءِ سر ءَ دُزی بیگ ءَ اَنت –

دمگی مردمانی رد ءَ گیشتریں دُزانی سیادی پاکستانی چیریں ادارھانی دزکمک ءَ جوڑ بیتگیں گل ڈیتھ اسکواڈ ءَ اِنت –

بلوچستان ءَ سیاسی ءُ چاگردی مردمانی گوشگ اِنت لس مھلوک سرکار ءَ سلاہ بند کرتگ ءُ مھار گُٹ ءَ داتگ اَنت کہ چریشانی زور بلوچستان ءِ جتا جتائیں جاھاں برجاہ اَنت – آ دمگاں دُزی، سلکاری، کوش ءُ آوارجنیاں ھوار اَنت –