TBP Balochi

سر بیتگیں ھالانی رد ءَ روکپتی بلوچستان ءَ ناشناسیں مردمانی تیرگواری ءَ یک مردمے بیران بیتگ –

تیرگواری ءِ وئیل سراوان ناگا بالا ءَ دیم ءَ اتکگ کہ اود ءَ سلاہ بندیں مردماں تیرگواری کرتگ ءُ اود ءَ شریف سیاھانی ء سھراب جھمنند ناگان بالا بیران بیتگ –

کوش ءِ سبب زانگ نہ بیتگ ءُ گیشیں پَٹ ءُ پول پولیس کنگ ءَ اِنت –

روکپتی بلوچستان ءَ انسانی ھکانی گلانی گوشگ اِنت کہ روکپتی بلوچستان ءَ بازیں کچے ءَ مردم جنگ ءُ کُشگ بیگ ءَ اَنت کہ آیانی پُشتگیری ءَ مزنیں دست ھوار اَنت –

آیانی گوشگ اِنت کہ روچ ء رھمان پھزدارانی اوشتگ ءَ ابید ھم سلاہ بندیں مردم کاینت ءُ لس مردماں نشانگ کن اَنت ءُ آیاں کُش اَنت –

دستونک

گلؔ بلوچ

دی بلوچستان پوسٹ

جبین ءَ بن دیاں کن آں، دل ءَ را آسے روک کن آں
نیا ئے انشپی اگاں، وت ءَ من چٹ گنوک کن آں۔

زمین ءِ ھک ادا نہ کت، لگوری ءَ گوں رپت ئے تو
بہ گنداں مھشر ءَ ترا ، من لٹ ءُ سنگ ءُ ڈوک کن آں

بہ دے سر ءَ وتیگ ءَ تو، زمین ءِ ھک ادا بہ بیت
اگاں نہ دات بہ چار ترا، شگان ءُ تْرندیں ٹوک کن آں

امیتے داشتگ پہ وتن، پدائیاں گوں سرگراں
اگاں بہ بہ ئے تو اسلمے ، ترا گوں من زروک کن آں

بہ بر بہ بر من ءَ بہ بر، دل ءَ مہ کش وتیگ ءَ تو
ترا گوں ھمسپر بہ آں، ترا گوں وت بندوک کن آں

وتی گھاریں سمی ءَ ، ھانی ماھرنگیں دُتّک ءَ
کریمہ ءِ باں بنپداں ، وتی من نام ءَ نوک کن آں

وتن وتن وتن کتگ، در کپتگاں پہ منزلے
سر ءَ من بستگ شر کپن، بداں پہ آسے روک کن آں۔

بر ئے بہ بر گل ءَ بہ بر، وتن پہ ساہ ئِے ندر کتگ
مپت ءَ مہ بیت زیان سرے، وت ءَ من راج ءِ توک کن آں

بلوچستان ءَ تیرگواری، دزکپتگیں جون دزکپتگیں پنچ جونانی ھال اتکگ اَنت، دو ٹکانی میان ءَ بیست ءُ دو مردم زدگ بیتگ اَنت –

ٹی بی پی پتر ھال ءَ سر بیتگیں ھالانی رد ءَ پنجگور ءِ دمگ تسپ ءَ مانش جاہ ءِ نزیک ءَ گون بندیں جون ءِ دزکپتگ کہ آئی ءِ پجار مجاھد ء زباد جھمنند ھدابادان ءِ نام ءَ زانگ بیتگ –

پولیس ءَ جون چِست کرتگ ءُ نادراہ جاہ ءَ سر کرتگ ءُ اود ءَ آئی ءِ گیشیں پَٹ ءُ پول بندات کرتگ –

کوش ءِ سوب زانگ نہ بیتگ، پولیس ءِ گوشگ اِنت کہ اے مرد کارچ جنگ بیتگ ءُ آئی ءِ جون گونی ءِ تہ ءَ کنگ بیتگ ءُ چگل دیگ بیتگ –

ھمے وڑ ءَ پنجگور ءِ دمگ گرمکان ءَ ناشناسیں سلاہ بندیں مردمانی تیرگواری ءَ یک مردمے بیران بیتگ –

وئیل گرمکان ءَ دیم ءَ اتکگ کہ اود ءَ سلاہ بندیں پرپٹ سواریں مردماں تیرگواری کرتگ ءُ عزت اللہ ء نیک مھمد ءَ زانگ بیتگ –

ھمے رنگ ءَ پنجگور تسپ ءَ کارچ ءِ جنگ ءَ مھسن ء عبدالعزیز نامیں مردمے زدگ بیتگ –

ھمے وڑ پنجگور وشبود ءَ مچ ءَ درتکگیں جون ءِ دزکپتگ –

جون پنجگور ءَ وشبود ءَ کسٹم ءِ نزیک ءَ مچانی باگ ءَ یک دراتکگیں جون ءِ دزکپتگ، جون چِست کنگ بیتگ ءُ نادراہ جاہ ءَ رسینگ بیتگ –

ھمے وڑ ءَ بلوچستان ءِ بنجاھی شھر شال ھزار گنجی نیوکاھان ءِ جھمنندیں ھدامرزی بالاچ خان شیرانی ءِ چاردہ سالی ئیں زھگ ءِ جون دزکپتگ –

ھالانی تہ ءَ گوشگ بیگ ءَ ایں بالاچ خان ءِ زھگ گوستگیں روچ ءَ بیگواہ بیتگ ءُ مروچی سھب ءَ آئی ءِ جون ھزار گنجی ءَ شھدگ ءِ نزیک ءَ دزکپتگ –

بلوچستان ءَ دگہ یک وئیلے ءَ بیست ءُ دو مردم زدگ بیتگ اَنت –

وئیل کلات ءَ یوسفزئی چھبر ءَ دیم ءَ اتکگ کہ اود ءَ لانگو ٹک ءِ دو کھولانی میان ءَ جنگ ءُ چوپ بیتگ کہ چریشی ءَ بیست ءُ دو مردم زدگ بیتگ اَنت –

ھمے وڑ ءَ بلوچستان پسنی ءَ پولیس ءِ گاڑی دگ ءِ وئیل ءِ آماچ بیتگ ءُ یک کارندھے بیران بیتگ –

گیشیں ھالانی رد ءَ پسنی ءَ پولیس ءِ گاڑی دگ ءِ وئیل ءِ آماچ بیتگ ءُ چریشی ءَ پسنی ءِ جھمنندیں پولیس منشی عظیم جان بیران بیتگ –

نبشتانک: بیگواھیں زھگ ءِ ودار

نبشتہ کار: زرینہ بلوچ

دی بلوچستان پوسٹ

‏گار ءُ بیگواھیں مردمے ءِ چُکے گوں مات ءَ جُست ءُ پُرس، چُک: امّا باندا ائید انت۔ مات: ھو منی واجُل باندا ائید انت کُرباناں۔

چُک: باندا گُڑا سجئیں نوکیں گُد گور ءَ کناں نوکیں چپل پاداں کناں – مات: ھو منی شررنگ من تئی واست ءَ سرجمیں چیز زُرتگ آں پریشان مہ بو۔

چُک: امّا من گُد چپل اے چیز نہ لوٹ آں مات: منی جگر ءِ بند دگے ترا چے لوٹ ایت بگوش من ءَ منی دست رَس ایت پتو زوراں من۔

چُک: من ءَ وتی ابّا لوٹ ایت من باریں چُنت سال بیت کہ نہ دیستگ باریں چُنت ائید گْوستگ ابّا نیاتکگ ابّا ءَ باریں مئے واست ءَ زھیر نہ کنت ؟(کمو دیر ھاموشی یے) مات: انّا منی پت چو مہ گْوش تئی ابّاءَ ھم مئے واست ءَ زھیر کنت بلے تئی ابّا اے دور ءِ یزید ءَ باریں کُجام تھاریں کوٹیانی توک ءَ بندیگ کُتگ کہ در آتک نہ کنت۔

چُک: امّا اے ائید ھم ابّا نئیت گڑا؟ مات: کیت منی شررنگ تو ءُ من دوا کن ایں کیت انت انشااللہ ھُدا دوایاں گوش دار ایت۔

چُک: امّا! ابّا تو وت گْوشت تھاریں کُوٹیاں بندیگ انت ابّا وَ ھُداوند ءِ کر ءَ نہ انت کہ مئے سر ءَ بزگ بکنت ءُ مئے دُوا اش بہ کنت ابّا و یزید ءِ لشکر ءِ گور ءَ انت۔

مات: منی جگر ءِ بند اے گپ راست اِنت بلے مئے دست آیاں رس اِت نہ کنت بلے ما ھُدا ءَ توار جت کن ایں مئے دُوا ءَ گوشدار ایت بلکّیں تئی ابّا ءُ سرجمیں بندیگ آجو بنت کا اَنت-

چُک: امّا من گڑا دوا کناں کہ واجہ ھُدا سرجمیں بندیگاں آجو بہ کنت ائید ءِ نوک ءَ تیوگیں بلوچستان ءِ واست ءَ وشی بیارات۔ مات: آمین ثم ءَ آمین شالا انچوش بات منی ارواہ۔ ھُدا تئی دوایاں گوش بہ دارات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

وھدیکہ گس ءِ درا چم کپ اَنت آئی ءِ دروازگاں ھم گوشگ ئیگ ءَ وتی توارانی تہ ءَ کمی آورتگ ھمک آیوکیں در ءَ ھمے ودار اِنت بہ گندے منی زھگ بیگواھیں زھگ اِنت اے ائید ءُ وشی پِر گوز اَنت بلے ما چوشیں وشیاں زبھریں اے گپ بیگواھیں کھولانیگ اِت اَنت کہ ھمک ائیداں بلوچستان ءِ بنجاھی شھر شال ءِ پریس کلب ءِ دیم ءَ زھرشانی کن اَنت –

زھرشانی کنوکانی گوشگ اِنت کہ اگاں مارا مسلمان ءُ انسان لیکہ ءِ گڑا مارا ھم وتی وشی ءُ ھکانی بروبری ءَ بھر ھست اِنت –

مروچی ائید ءِ روچ ءَ بلوچستان ءِ بنجاھی شھر شال ءَ بیگواھیں مردمانی کھولانی نیمگ ءَ زھرشانی کنگ بیتگ،زھرشانی ءَ وائس فار بلوچ مسنگ پرسنز ءِ کسان کمک سرکماش ماما قدیر بلوچ، بلوچ نودربر رھشون ڈاکٹر مھرنگ بلوچ، ڈاکٹر دین مھمد ءِ براتزتک ءُ جھانزیب بلوچ ءِ مات ءَ ھوار بازین مردمانی کھول ھوار بیتگ اَنت –

زھرشانی ءَ بلوچ نودربر گل بی ایس او ءِ رھشوناں ھم بھر زرتگ ءُ تران کرتگ اسرار بلوچ ءِ گوشگ اَت کہ بلوچستان ءَ اے بازیں زھرشاں بلوچانی سر ءَ زُلم ءُ زورکیانی کوہ دور دیگ بیتگ اَنت بلوچانی سر ءَ بیوکیں زُلمانی سر ءَ پرچا بے تواری؟-

آئی ءَ گوشت کہ فلسطین، کشمیر ءُ ایندگہ ڈیھانی سر ءَ بیوکیں زلمانی ھلاپ ءَ توار چِست کنگ بیت اِنت بلے بلوچستان ءَ اے ھپتاد سالاں گیش برجاھیں زُلمانی ھلاپ ءَ پرچا مردم بے توار اَنت –

آئی ءَ گوشت کہ فلسطین مردماں کُشگ اِنت ءُ آیانی لاشاں کھولانی گور ءَ رسینگ اِنت بلے پاکستان وت ءَ اسلامی ڈیھ ءِ گوش ایت مئے مردماں بیگواہ کنت گار کنت، نانکہ مارا ھال دنت نانکہ مئے لاشاں مارا دنت –

آئی ءَ گوشت پاکستان ءَ وت جوڑ کرتگیں آمیدگس ھست اگاں آ اے آمیدگسانی سر ءَ بیسہ کت نہ کنت گڑا باید اشانی دپ ءَ کُبل نہ جنت ءُ بند اش بہ کنت،آئی ءَ گوشت مارا بہ کُش ایت بلے مئے لاشاں بہ دنت ءُ ما ھچبر دگانی سر ءَ زھرشانی نہ کن ایں –

بلوچستان ءَ گار ءُ بیگواھیں مردمانی زھرشانی ھمک سالانی ائیداں برجاہ اَنت زھرشانی کنوکانی لوٹ اِنت کہ اے اسلامی ائید ءُ مسلمانانی وشی ءِ روچ اِنت بلے مئے اے روچ دگانی سر ءَ پریس کلبانی دیم ءَ گوزگ ءَ اَنت –

ھمے رنگ ءَ سندھ ءِ بنجاھی شھر کراچی ءَ ھم سندھی بیگواھیں مردمانی نیمگ ءَ وائس فار آف سندھ ءِ نیمگ ءَ زھرشانی برجاہ اِنت –

نبشتانک: من درستیں وداریگیں مات ءُ گوھارانی دیم ءَ شرمندگاں

نبشتہ کار : جابر مُراد

دی بلوچستان پوسٹ

مرچی تاریک 13 مئی 2021 اِنت مرچی کسانیں ائیدے روچ اِنت، من سُھب سر ءَ واب ءَ کہ پادتکاں ڈارک گوانکو چِست کُت کہ مات ءَ گوانکے کن آں ءُ ائید مُبارکی ءِ کن آں گوں، بلے چوش نہ بیت کہ نمبر ءَ ڈائل بہ کن آں منی ھمکار ءَ توار دات بیا روئیں کارجاہ ءِ سر ءَ من ءُ تو 20 منٹ ءَ لیٹ اِنت مرچی ائید اِنت بلکیں ( پورمین ٹنڈیل ) جاک مہ کنت من گوانکو جلدی جلدی کیسگ ءَ کُت راہ ءُ رواجُکی چمّے شوشت دیم پہ کارے نیمگ ءَ کار جاہ ءَ کہ شُت ایں چاریں پورمین مارا دگہ نگاہ ءَ چارگ ءَ اِنت، چار ایت گھڑی ءَ ءُ مارا چار ایت بلے دگہ گپّی نہ کُت کہ مرچی ائید اَت ، ما جلدی جلدی کار بندات کُت داں سَے گھنٹہ ءِ اشتاپ کار ءِ سبب ءَ وتی اے سئیں گھنٹایانی کار ھلاس کُت اَنت ءُ اتکیں ناشتہ ءِ کنگ ءَ چوش کہ ناشتہ وت بنائینگی اَت ءُ مرچی منی ھمکارے نمبر اَت بلے من چار اِت مرچی ائید اِنت بیت کنت آ وتی لوگ ءَ پون کَنت چُکانی گوم ءَ گپ کنت گڑا من گوشت تو بہ نیند ناشتہ من وت جوڑ کن آں آئی پہ وشّی گوشت شریں مھربانی بیت تئی-

من پہ اشتاپی ناشتہ جوڑ کنگ ءَ اِتاں ءُ دل ءَ جیڑگ ءَ اِتاں کہ مرچی ملک ءَ ائید اِنت مئے دُرستیں سنگتاں نوکیں گُد گور ءَ کُتگ اے وھد ءَ کِسٹُم ءِ مسیت ءَ نمازے کُتگ مردماں گوں ائید مبارکی کنگ ءَ اَنت مرچی دُرستیں سنگت یک دومیگ ءَ بگلہ کنگ ءَ اَنت وتی ھکّاں چہ دُرستاں پھلی لوٹگ ءَ اَنت، ھمے ھیالانی تہ اِتاں کہ ھیال اتک مات ءَ گوانک کنگی اِنت ائید ءُ مُبارکی کنگی اِنت پرچا کہ من زانتگ اَت مات سُھبیگینیں منی گوانک ءِ ودار ءَ کنگ ءَ اِنت آ باریں وتی دل ءَ چی چی جیڑگ ءَ اِنت ءُ چینچو پریشانی ءُ گماں گوں دُچار اِنت کہ مرچی ائید انت منی چُک پرچا پون کنگ ءَ نہ اِنت، چوش بیت ائیدے روچ ءَ ھم کار کنگ ءَ اِنت من زاناں منی چُک ءَ تکلیپی ءِ ھست کہ پون کنگ ءَ نہ اِنت اللہ من ءَ بزیرات منی چُک سک تکلیپ اِنت درملک ءَ آئی ھک ءُ اُگبالانی زیروک ما لوگ ءِ مردم اِنت آ مئے ھمے شُمیں لاپ ءِ وجھ ءَ درملک اِنت مات وتی دل ءَ منی تکلیپی ءِ وجھ ءَ چہ وت ءَ بدوا دیگ ءَ اَت من گوانکو چہ کیسگ ءَ کش اِت کہ مات ءَ گوانک کن آں بلے سنگتانی بازیں کلوہ اتکگ اِت اَنت لیٹ کہ پچ کُت گوانکو ھینگ بیت ، ھِنگ بیگ ءِ سبب ءَ دمان ءَ پد ءَ شر بیت ءُ وتسرا برے یک ایپ ئِے تہ ءَ شُت برے پیس بُک ءُ برے وٹساپ اے سنگتانی مھر اِتاں کہ وٹساپ ءَ ھمینچو کلوہ اَتکگ اَت ءُ دگہ گیشتر کلوہ آیگ ءَ اَت کہ سنگتانی مھر پہ من باز ءُ گوانکو ءِ مھر گوں من کم بیگ ءَ اَت من جلدی جلدی ڈیٹا بند کُت گڑا گُڈسر ءَ پیس بُک پچ بیت، چوش نہ بیت کہ من مات ءَ پون بہ کن آں چاراں بلوچ مات ئِے اکس زاھر اِنت گریوگ ءَ اِنت من اکس پجا آرت کہ زاکر مجید ءِ مات اَت آئی ءِ کُٹ ءَ اکسے ایر اَت آ ھما اکس ءَ چارگ ءَ اَت ءُ گریوگ ءَ اَت اکس زاکر مجید اَت کہ 12 سال اِنت گار ءُ بیگواہ اِنت، زاکر مجیدے مات ءِ اکس گُشے گپ جنگ ءَ اَت کسہ آرگ ءَ اَت آ یک ھنچیں دردے بیان کنگ ءَ اَت کہ آ دردے کسہ گوں لبزانی تہ ءَ بیان کنگ نہ بیت، من جیڑگ ءَ لگ اِتاں کہ من ءَ چار سال اِنت کہ درملک ءَ آں کارایاں وتی کھول ءَ لاپ دیگ ءَ آں ءُ منی کھول اے زانت کہ اے ملک ھنچوش امن اَنت کہ اد ءَ کس ءَ اے مجال نہ اِنت کہ ترا لٹ بہ جنت ترا دگہ نُکسانے بہ دنت بلے انگت من گوانک کن آں منی مکّھیں مات وت ءَ دوا دیگ ءَ لگ ات گڑا زاکر مجید ءُ آدگہ گار ءُ بیگواھیں ماتانی دل ءَ چی گوز ایت آیاں جابر تو اے چیز ءَ مار اِت کن ئے ،؟ آیاں تئی مات ءِ تکلیپی چہ زاکر مجید ءُ آدگہ گار ءُ بیگواھیں ماتانی تکیپاں چہ گیشتِر اَنت ،؟ من کمو وتی مات ءِ تکلیپی ءُ پریشانیاں ھما ماتانی جاگھ ءَ کنگ ءَ اِتاں ءُ آھانی درداں مارگ ءَ اِتاں بلے منی دیم ءَ بس اے گپ اوشتگ اَت کہ دنیائے مستریں دروگ کہ من تئی تکلپی ءُ گماں گوں ھواراں من ءَ پھل کن اِت من شمے دُرستیں ماتانی تکلیپانی دیم ءَ شرمندگاں ءُ پھل کن اما جان کہ من پہ ترا شریں چُکّے سابت بیت کنگ ءَ نہ آں ءُ ترا شریں آرامیں زندے بکشات کنگ ءَ نہ آں من شمے کُلانی دیم ءَ شرمندگاں اگاں بیت کنت گڑا من ءَ کُل پھل کن اِت، منی ھرس من ءَ مرّینگ ءَ نہ اِتاں سنگت گوانک کنگ ءَ اَت تو زاناں کول کُتگ کہ مرچی ائیدے روچ ءَ مارا پورمین کرا بے ازّت کنائینگے جلدی ناشتہ ءَ بیار روئیں پد ءَ کار ءَ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کوسٹ گارڈ بنجل ءِ مزنیں گیٹ ءِ دپ ءَ اوشتوکیں کارمندانی سر ءَ دز بمبے چگل داتگ – جئیند بلوچ

سربوتگیں ھالانی رِد ءَ بلوچستان ءِ کاروباری شھر ھب ءَ برجاھیں پاکستانی کوسٹ گارڈ ءِ بنجل ءِ سر ءَ ناشناسیں مردماں دز بمب اُرشے کتگ – اُرش ءَ پاکستانی پوج ءَ جانی تاوان رس اتگ – اُرشکار درآیگ ءُ روگ ءَ سوبمند بوتگ انت –

بلوچ آجوئی لوٹوکیں سلاہ بندیں بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے ارش ءِ زمّہ واری منّ اِتگ ءُ گوشتگ کہ مئے سرمچاراں ھب ءِ شھر ءَ برجاھیں زورگیریں پاکستانی کوسٹ گارڈز بنجل ءِ مزنیں گیٹ ءِ پھازداریں کارمند دز بمبے چگل داتگ-

جارکش ءَ گوشتگ کہ اُرش ءِ آسر ءَ زورگیریں پوج ءِ دو کارمند ٹپی بوتگ اَنت کہ آھانی تہ ءَ یکے سک باز زدگ بوتگ –

روکپتی بلوچستان ءَ ھلال کمیٹی دزاپ “زاھدان ” ءِ نیمگ ءَ شنگ بیتگیں جار ءَ باندا بزاں پشمبے ءَ ائید ءِ جار پِرینگ بیتگ –

دارالعلوم زاھدان ءِ گوشگ اِنت روکپتی بلوچستان ءِ بازیں جاھاں نوک گندگ بیتگ چریشی ءَ دراھیں چم دیتگیں مردمانی گندگ ءَ پد روکپتی بلوچستان ءَ پشمبے ءِ روچ ءَ ائید کنگ بیت اِنت –

ھلال کمیٹی ءَ مھلوک ءَ گوں دزبندی کرتگ ءُ گوشتگ کہ ائید ءِ روچ ءَ جھانی وبا ءِ ھلاس ءِ واستا یکتائیں ھدا ءِ در ءَ دوا بہ کن اَنت ءُ ائید ءَ نادراھی ءَ ھم وتی پھریز ءَ بہ کن اَنت –

نیکراھی ڈیھاں مروچی سعودی عرب ءَ ھوار، امارات، عمان ءُ ایندگہ ڈیھاں ھم ائید کنگ ءِ جار جتگ اَنت –

نبشتانک: ماں اوگانستان ءَ دْراھینانی زمہ وار: گوں امریکہ ءِ برجاہ داشتگیں کُمک ءَ

نبشتہ کار: ابدلستار بُگٹی

دی بلوچستان پوسٹ

وھدیکہ 1989 ءَ سوت یونین ءَ وتی جنگی لشکر چہ اوگانستان ءَ کشت اَنت گُڑا ھما وھدیگیں سرکار پْروشت ءُ نی یکرندے پد ءَ مرچی ھم ھمے یکیں ھلوت انت کہ اگاں امریکہ ھم وتی لشکر ءَ چہ اوگانستان ءَ سرجمی ءَ بہ کش ایت گُڑا اوگانستان ءِ انیگیں راجمستری سرکار ھم پْروش ایت۔

اگاں ما 1989 تاں 1990 ءِ میان ءَ بچّار ایں گُڑا ما سرپد بَہ ایں کہ چَہ سوت یونین ءِ لشکر روگ ءَ پد ناں ڈاکٹر نجیب اُلہ ءِ سرکار پْروشت ءُ پْروش ءِ آماچ بیتگ نَیکہ چہ اوگانستان ءَ امریکی جنگی لشکر ءِ روگ ءَ انیگیں سرکار پْروش ایت ما بے ھال مہ بَہ ایں کہ ھما وھداں یک بلاھیں باوستے ھم ھست اَت کہ چَہ سوت یونین ءِ روگ ءَ پد ڈاکٹر نجیب اُلہ ءِ سرکار لھتیں روچانی تہ ءَ پْروش ایت بلے ھمے سرکار ءَ وت ءَ یکشل ءَ تاں سَے سال ءَ برجاہ داشت۔ ایشی ءِ دو مستریں سبب ایش اَت اَنت کہ چریشی ءَ ڈاکٹر نجیب ءِ سرکار نہ پْروشتگ اَت۔

اولی بُندری سوب ھمیش اَت وھدیکہ سوت یونین چہ اوگانستان ءَ درآتک ءُ شُت گُڑا بہ گِر 1989 تا 1991 ءَ ھر ماہ ءَ ڈاکٹر نجیب الہ ءِ سرکار ءَ $300 ملین کُمک دیگ ءَ اَت۔ گُڑا تاں دو سال ءَ پہ مجاھدین گل ءِ بیگری ءَ ھمے ھرماھیں کُمک پہ اوگانستان سرکار ءِ بلاھیں مدتے بیتگ اَنت بلے وھدیکہ کہ سوت یونین وت بھر ءُ بانگ ءِ آماچ بوت گُڑا روس ءَ ھما وھدیگیں اوگان سرکار ءِ کُمک کنگ بند کُت ءُ دومی نیمگ ءَ امریکہ ءَ ھم مُجاھدین ءِ جنگی کِمک ءَ بج اِت۔ بے کُمکی ءِ آسر ءَ ڈاکٹر نجیب اُلہ ءَ دزکشّی کُت ءُ کابل ءَ میان اُستمانی گل ایو این او ءِ کارگس ءَ پناہ ئِے زُرت۔ ڈاکٹر نجیب ءِ دزکشّی ءَ پد مجاھدین ءِ باٰزیں سِلاھبدیں گلاں یکدومی ءِ ھلاپ ءَ اُرشاں کنان ءَ کابل تباہ کُت۔ چریشی ءَ اوگانستان السی جنگے(سِول وار) ءَ دُچار کپت۔

بِہ گند ئے سوت یونین گوں ھما وھدی ئیں اوگانستان سرکار ءَ بے منّگ نامھے ءِ آسر ءَ اوگانستان ءَ آتکگ اَت بلے امریکہ گوں راجمانی گل یو این او ءَ منّگ نامہ کُت ءُ میان اُستمانی ناشرکاری ءِ ھلاپ ءَ جنگ ئِے بُنگیج کُتگ پمیشکا باید انت امریکہ یک زمہ واریں مُلکے ءِ وڑے ءَ چہ اوگانستان ءَ وتی جنگی لشکر ءَ بہ کش ایت باید انت امریکہ ھما رَدیِاں دوبر مہ کنت کہ گْوست ءِ سوت یونین ءَ وتی جنگی لشکر چہ اوگانستان ءَ کشت ءُ کُتگ اِت اَنت بزاں وھدیکہ نجیب ءِ سرکار بے کُمک بوت گُڑا سرجمیں اوگانستان دنیا ءِ ھر وڑیں ناشرکاریں گالانی یک ترامگیجی ھنکینے جوڑ بوت، ھاس الکائدہ ءُ دِگہ بازیں گلے انچوشکہ ما مرچی گِندگ ءَ ایں۔ نی اگاں امریکہ ھم اوگانستان ءَ ھما وڑ ءَ یلہ کنگ ءَ انت انچوشکہ 1990 ءَ روس ءَ یلہ کُتگ اَت گُڑا دلجم بِہ بَہ اِت اِے رندی ھم الکائدہ، دائیش، اسلامک موّمنٹ آپ اُزبکستان(آئی ایم یو)، ٹی ٹی ہی ءُ دِگہ بازیں شُمار ءُ کچے ءَ ناشرکاریں گل ماں اوگانستان ءَ وتی جنگی ھنکیناں اڈ کن اَنت ءُ وتی وتگڑیں سسّائی جُنزاں دیم ءَ بر اَنت گُڑا اِے تھنا پہ اوگانستان ءُ اوگان لس مھلوک ءَ اِنّا بلکیں پہ سرجمیں کِرّ ءُ کش ءِ استان، بزاں اوگانستان ءِ ھمساھِگیں مُلک ءُ سرجمیں جھان ءِ مُلکاں یک ٹوھیں تُرس ءُ اندوھے جوڑ بیت پمیشکا من گْوش آں اِے تھنا امریکہ ءِ اِنّا بلکیں سرجمیں دنیا ءِ مُلکانی زمہ واری یے کہ اوگانستان ءِ دِیرین ءُ انیگیں جنگ ءَ توجیلّے ءَ آسر بہ کن اَنت انچوشکہ اوگانستان ءِ ایمنی پہ سرجمی جھان ءِ مُلکاں ایمنی بیت ءُ دنیا ءِ سرجمی ایمنی گوں اوگانستان ءَ ھمگرنچ ءُ وازمندگ اِنت وھدیکہ سَے سال ءَ پیش واجہ زلمے ھلیلزاد ءِ سرکماشی ءَ امریکہ ءَ گوں تالبان ءَ سُھل ءُ تْران بُنگیج کُت گُڑا تالبان ءِ گل ءَ ھر جیڑہ ءِ ھلاسی ءَ تپاک کُت کہ چریشی ءَ امریکہ ءِ سرکار ءَ پائدگ زُرت چی ءَ کہ بُنکی ٹَوک ءُ توار ھمیش اِت انت کہ اوگانستان ءِ سرڈگار امریکہ ءِ ھلاپ ءَ کارمرز نہ بیت گُڑا ما یک سوالے جُست کن آں کہ اگاں تالبان ءُ امریکہ وت ماں وت تپاک اَنت گُڑا یک بُندری منّگ نامھے چی ءَ آسر نہ کن انت؟ گُڑا ناشریں گل تالبان اوگانستان ءِ مُھکمیں سرکار، راجی لشکر ءُ جنگانی کُشت ءُ کوش ءِ دُچارکپگتیں اوگان لس مھلوک ءِ ھون ریچی ءَ چی ءِ کنگ ءَ انت؟ پہ تالبان ءَ امریکہ ءُ نیٹو ءِ بیگری ءَ جھاد زاناں ھرام بیتگ ءُ وتی لس مھلوک ءِ سر ءَ وتکشیں بمب ءُ تراک کنگ جھاد اِنت؟ منی ھیال ءُ لیکہ ءِ رِد ءِ نی تالبان ءَ جھاد ءِ گپ زیب ءُ راستی نہ دنت۔ تالبان اوگانستان ءَ یک رندے پد ءَ اُلسی جنگ ءِ نیمگ ءِ برگ ءِ جُھد ءَ انت بلے ھمے اُلسی جنگ سرجمیں اوگانستان ءَ ھر وڑیں نیکراھی ناشرکاریں گالانی ترامگیجی ھنکینے جوڑ کنت کہ ائی ءِ تاوان ءَ بازیں مُلکے آماچ بیت-

یک رندے پد ءَ گْوش آں باید انت امریکہ ءَ تچکیں جُھد بہ کنت ءُ اوگانستان ءِ جیڑھاں یک دائمی توجیلّے بہ دنت اگاں اِنّا گُڑا اوگانستان یک رندے پد ءِ میان اُستمانی ناشرکاریں گالانی یک آسودگیں پناھگاھے جوڑ بیت۔ انچوشکہ اوگانستان مُدام پہ دگریں راجانی پائدگ ءَ جنگی میدانے اڈ دیگ بیتگ گُڑا ھمے ناشرکاریں گلانی جنگی اندوھانی آماچ تھنا اوگانستان ءِ لس مھلوک بیتگ۔ اوگانستان ءِ بامردیں راجی لشکر ءَ ھمے ناشرکاریں گلانی بیگری ءَ مُدام جنگ کُتگ آیاں پْروش داتگ ءُ اگاں وھدیکہ امریکہ چَہ اوگانستان ءَ بِہ روت گُڑا پد ءَ ھم وتی راجی آجوئی ءُ سرڈگار ءِ پھازگ ءَ بامردیں اوگان راجی لشکر جنگ کنت ءُ یک میان اُستمانی ناشرکاری ءِ ھلاپ ءَ اوگانستان راجی لشکر ءِ کِمک کنگ پہ تیوگیں میان اُستمانی چاگِرد ءَ پائدگے پمیشکا امریکہ ءَ لازُم اوگان راجی لشکر ءِ جنگی کُمک کنگی انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔