TBP Balochi

نبشتانک: رودپتر ءِ سیمی بھر

نبشتہ کار: شاؔری لال

دی بلوچستان پوسٹ

در نئیت چُشیں بَلّی یے کہ ماھکانیں شپاں لوگ ءِ پیشگاہ ءَ کِلّہ دار ءَ تکّہ بہ دنت گوں وتی زھگ ءُ نماسگاں کسہ بہ گْوش اِیت، چے ءَ کہ کسّہ جنوکیں بَلّی مُرتگ اَنت بلے پد ءَ اوں بید چہ بَلّی ءَ کسے وتی نگاھاں ھر نیمگ ءَ شانک بہ دنت آئی ءَ کسّھانی گرنچ گندگ ءَ کیت تھنا آئی ءَ ھمے گرنچانی تہ ءِ کسہ بوجگ ءُ چارگ ءَ پد جیڑگی اَنت۔

منی جاڑکیں برات کہ یک سالے ءُ سے ماہ ءَ پیسر ناگتیں مرگ ءَ ھدامرزی بوت ءُ چہ ما پہ مدامی جتا بوت۔ مرچی کہ من ءَ آئی ءِ چاڑاں زرتگ اَت من چہ گنوکی ءَ آئی ءِ پولگ ءَ آئی ءِ کتاب ءُ دپتراں چارگ ءَ اِت آں کہ بوت کنت آئی ءِ چیزے بہ گندان ءُ آزگیں زرد ءَ بہ ساڑیناں پٹّان پٹّان ءَ من آئی ءِ رودپتر ءَ دیست کہ آئی ءَ اے رودپتر ءِ نویسگ ءِ وھد ءَ ھچ کس ءَ وتی کرّ ءَ نیشتگ ءُ مرچی رودپتر کہ من دیست رودپتر ءِ تہ ءَ آئی ءِ بازیں یاتے منی دیم ءَ آتک ءُ رودپتر ءِ سر ءَ گوں وش نویسی ءَ نبشتہ اِنت ”ایشی ءَ پچ مکن رازے مان“-

بلے من ھدامرزی ءِ کول پروشت رودپتر پچ کت، دپتر ءِ پچ کنگ ءَ گوں منی ارسانی ھار ملّ اِت۔ اولی تاک ءِ سر ءَ منی ءُ آئی ءِ کسانی ءِ اکسے جنوک ءَ اَت کہ اکس ءِ تہ ءَ من ءُ آ بگل ماں بگل اوشتوک اَنت رو دپتر ءِ اولی بھر ءِ تہ ءَ آئی ءِ کسانی ءِ یات ءُ وانگجاہ ءِ نوبت نویس اتگ اَنت دومی بھر ءِ تہ ءَ درانڈیھی ءِ وھد ءَ آئی ءَ وتی جنجالی ءُ بزگی نویس اِتگ۔ سیمی بھر ءِ تہ ءَ کہ آئی ءَ پہ وتی میتگ ءِ دیمروئی ءَ گوں سرکار ءَ جنگے کتگ اَت ھما کسہ نویس اِتگ اَت من آئی ءِ کسہ ونت من ءَ پہ وتی برات ءَ ناز بوت کہ آ چوشیں کردے ءِ واھند بوتگ ءُ اے کسہ ءِ بوجگ ءَ پد من گرنچ دات نہ کت ءُ شمے دیم ءَ ایر اِنت۔

آ رودپتر ءِ سیمی بھر ءَ تہ ءَ چوش کسہ کنت:- ”من وانگ ءَ اِت آں اسکول ءُ مدرسہ ءَ نہ نئیکہ سنٹراں من وانگ ءَ ات آں دامگ (انٹرنٹ) ءِ سر ءَ۔ اسکول ءُ مدرسہ وھد ءِ ھرجان بوت اَنت ءُ بند بیت اَنت نی من نشتگ ءُ دامگ ءِ تہ ءَ گھوانی کن آں، چونائی ءَ اسکول ءُ مدرسہ آں تئی دل ءِ تب ءَ وانگ نہ بیت اود ءَ چونیں ماسٹر یاکہ مولوی کتاب دنت ترا ھما کتاب الّم وانگی اِنت بلے دامگ ءِ تہ ءَ تئی دل ءَ چونیں کتاب تب کنت تو آئی ءَ ونت کت کن ئے کسے ترا ٹوکے گوشت نہ کنت“۔

”من دامگ ءِ تہ ءَ ھمک رنگ ءِ کتاب گھوانی کنگ ءَ اِت آں بزاں شائری، لبزانکی، گْوستانکی، راجدپتری، زندجاورھال، نیکراھی ءُ شھزانتی، ءُ دگہ بازیں من ھمے رنگ ءِ کتاب وانگ ءَ اِت آں ءُ دگہ سدانی ھساب ءَ ھمے رنگ ءِ کتاب انگت پہ منی جانبنڈی ءِ سوب ءَ کپتگ ءُ پہ وانگ ءَ ایر اَنت وانگ ءَ وَ چونائی ءَ من ھمک رنگ ءِ کتاب واناں بلے آ ھما کتاب کہ من ءَ سک دوست بیت آ گدار انت“۔

منی گھوانی ءِ شوک نوکی برجاہ اَت کہ ما چہ وتی بنکی ڈیھ ءَ درآتکیں ءُ درانڈیھ بوتیں نوکین ءُ ھشکاوگیں دیارے ءَ آتکیں اِے دیار ءَ اوں مئے ڈیھ ءِ سان زرتگ ات ءُ چو مئے ڈیھ ءَ ھشکاوگ اَت ھما بے اسکولی ءُ بے وانندھی، نئیکہ اد ءَ نادراہ جاھے ھست ات ءُ نئیکہ اد ءَ شرّیں آسراتی یے ءُ مستریں ھبر ایش اَت کہ پہ منی گھوانی ءَ دامگ نیست اَت ھاں البت کاردام (نٹورک) ھست بلے کرّ ءُ گْور ءِ دمگاں دامگ ھست بلے اے دمگ چہ دامگ ءَ زِِبھر اَت۔

اے ھند ءِ آیگ ءَ پیسر من ءَ اد ءَ ھچ سنگتے نیست اَت ءُ نئیکہ من ءَ پجّاروکے ھست اَت من چو ھما ائیدی بُز ءَ سربتگ اِتاں کہ چہ کوچگے ءَ آرگ بوتگ شھر ءَ پہ ائیدی کنگ ءَ ھاں بلے لھتے ماہ ءَ پد من ءَ یک ءُ دو پہ نام ءَ سنگت بوت کہ نوں منی سنگت نہ اَنت نزاناں آھاں من ءَ وتی سنگت لیک اِتگ یا نا بلے آھاں من وتی سنگت لیک اِتگ ءُ انگت وتی سنگت اِش لیک آں بلے من ءَ نوں آ من ءَ وتی نکن اَنت برے برے من آھاناں گوانکو ءِ سر ءَ دروت ءُ سلامے میسج کن آں آ منی میسجانی پسہ ءَ نکن اَنت گڑا من ءَ سک بژن بیت کدی کدی من جیڑ آں بوت کنت آ نہ لوٹ اَنت کہ من آیاناں میسج بہ دیاں یا بوت کنت چہ من ءَ دلگران اَنت بلے دل وت ءَ وت پسہ دنت کہ من ھچ چشیں کارے نہ کتگ آ چہ من ءَ دلگران بہ بنت برے دل گش اِیت آ نوں سیر بوتگ اَنت گاڑی ءُ مزنیں لوگانی ھُدابند بوتگ اَنت پمیشکا منی ڈولیں گریبے ءِ زھگ ءَ یات ءَ نہ اَنت۔ من وَ چہ آھاں کدی یک آنہ یے ءِ لوٹ نہ کتگ ءُ نئیکہ واھگ داراں ھاں یکبرے من چہ آئی ءَ یکبرے یک بینک اکاؤنٹے ءِ لوٹ کت چیاکہ من یک کار ءُ روزگارے بنا کتگ اَت (آ روزگار ءَ را وتن دوست ءُ راج دژمناں بند کت آ کسہ ءَ دگہ برے کن آں) من آ ملک ءِ باشندھے نہ اِت آں من ءَ اے ملک ءَ بینک اکاؤنٹ پچ کت نہ کت) آئی ءَ من ءَ ساپ ءَ ساپ گوشت کہ من بینک اکاؤنٹے دات نہ کن آں گڑا من باز دلپدرد نہ بوت آں چے ءَ کہ من پیسر ءَ دلجم اِت آں کہ اے دردواریں سنگتے نہ ئِِے ءُ منی دومی سنگت بلوچ ءِ زھریں نشہ تریاک ءِ آماچ بوتگ کہ گیش ء وت نہ اِنت اِے دیار ءِ آیگ ءَ من ءَ دو سال گوستگ اَت ءُ منی زندگی ءِ روچ زوال بوان اِت آں وانگ نیست اَت، نئیکہ کتابجاھے ءُ دامگے ھست اَت کہ کتابے بوان اِیت من کہ سرچِست کتگ من ءَ کتاب ءِ ھڈکّہ بوتگ ھرچ رنگ ءِ کتابے دیستگ دل ءَ گشتگ بس بہ زورے اینچو نہ ونتگ کہ اینچو کتاب من ءَ گون بوتگ، بلے اد ءَ من ءَ ھچ کتاب گون نیست اَت ءُ منی وھد ھچ روگ ءَ نہ اَت۔

ماہ ءُ روچ گْوزان اِت اَنت کہ یک روچے ھبرے شنگ اِت کہ سرکار ءَ میتگ ءَ را دامگ دیگ لوٹ اِتگ بلے میتگ ءِ میر ءُ متبراں دامگ جنگ مکن کتگ پرے ھاتر ءَ کہ دامگ میتگ ءِ مردم ءُ جاوراں ھراب کنت۔ پرے ھال ءِ اِشکنگ ءَ رند من سک ابکّہ ءُ ھیران بیت آں دامگ مردماں چتور ھراب کنت، اگاں ھرابے بہ کتیں اینچو وھد ءَ من ھراب بوتگ ات آں من رند ءَ سرپد بوتاں کہ میتگ ءِ میر ءُ متبر انگت ھما ”رجعت پسندی“ ءِ چات ءَ اَنت۔ منی دل ءَ وس وسے ودی بوت۔ یک شیتانی یے۔ یک پندلے کہ چتور چے رنگ ءَ میتگ ءِ مردماں لاچار بکن آں کہ میتگ ءَ دامگ بہ دے اَنت بوت یک روچے من گوں وتی ریٹائر بوتگیں دوئیں سنگتاں ھمے ھبر پیش کت کہ چونیں پندلے سازگی اِنت کہ میتگ ءِ دامگ ءِ ھاتر ءَ گڑا آھاں گوشت مئے میتگ ءَ دامگ نہ رس اِیت اِد ءِ مردم ھچبر چشیں آسراتی نہ لوٹ اَنت دانکہ زاھدان ءَ یک ویرے لونجان کتگ اش سدانی ھساب ءِ کلومیٹر ءِ دوری ءَ یک ویرے تچک کتگ اِش ءُ کاردام ءِ آورتگ بلے دامگ ءِ باری ءَ تپ انت اِش،-

سنگت ءِ گپ ءِ اشکنگ ءَ منی زرد ءَ اوستے ءَ باھند کت من ھما دمان ءَ گوشت اگاں ما ھمے کاردام ءِ ویراں بہ بُرّیں چون اِنت؟ سنگت: کاردام ءِ ویر ءَ چے ءَ بُرّیں؟ من: ویر ءَ ما ءُ شما بُرّیں کاردام بند بیت میتگ ءَ کاردام نہ بیت ءُ ما میتگ ءِ میر ءَ گوش ایں دانکہ میتگ ءَ دامگ جنگ نہ بیت ما کاردام ءَ پچ کنگ ءَ نئیل ایں سنگت ءِ دپ ءَ بچکندگے اَتک واکی راست گشے چوش وش انت بلے ویر ءَ کدین بُرّیں من گوشت ھنی سنگت دامگ ءِ شوکی ات پہ کتاب ءُ وانگ ءَ نہ، بلکیں پہ تامر چارگ ءَ گنوک اَت ما راہ کپتگیں پہ ویر ءِ نیمگ ءَ“۔

من رودپتر ءِ وانگ وانگ ءَ نہ زانت چنچو وھد گْوستگ اَت۔ من ساھت چار اِت کہ سہ بج ءَ بیست ءُ پنچ ملٹ اَت ھنو من ءَ شیما ءِ جنک کلسوم ءَ ٹیوشن دیگی اِنت رودپتر ءِ دیم ءِ تاکاں دگہ وھدے واناں۔

روان اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: آشوبی زُرمبِشت ءُ راجی استان ءُ آئی ءِ جوڑشت ءِ زرمبِشت

نبشتہ کار : جاوید بلوچ

دی بلوچستان پوسٹ

آشوب یک سیاسی ءُ غیر سیاسی ، صنعتی ، زرعی ءُ راجمانی بدلی یے بازیں زانتکار مُلک ءِ سر رهبند ( Constitution) ءِ تہ ءِ بدلی ءَ ، ءُ اداره ءِ جوڑشت ءِ تھ ئِے بدلی ءَ هَم آشوب گْوش اَنت-بلے ایش آشوب  کسانیں کچ ئیگ بنت انچو گْوشت کن ات کہ مهدود تهر ئیگ انت وهدیکہ ما دپتر ءِ سرا چمّاں شانک بہ دے  ایں مارا اِے شے گندگ ءَ کیت کہ آشوب دپتر ءِ تہ ءَ جِتائیں دورانی تہ ءَ جتائیں چاگرد ءُ مُلکانی تہ ءَ اتکگ همے آشوبانی سَوَب ءَ آ راج ءُ آیانی راجمان ءُ استان ءِ تہ ءَ نہ ایوکا سیاسی بلکیں ربیدگی ، زرعی ءُ صنعتی بدلی آؤرتگ بلے بازیں وهداں  سیاسی آشوباں شرّیں بدلی آؤرت کرت نہ کرتگ کہ آیانی واست ءَ آ آشوبانی مقصد بوتگ بازیں مردم انقلاب ءَ گْوں راجدوستی ءِ جُهد ءَ همگرنچ کن اَنت جوانیں آسرال دات کرت نہ کن انت پرچ ءَ کہ راجدوستی ءِ جُهد الگیں  اِستانے ءِ واست ءَ بیت اِنت آ اِستانی سیمسر ءُ اِستان ءِ حدود ءِ تھ ئِے جُهد نہ بیت انت راجدوستی ءِ جتائیں  بزانت کنگ بوتگ  یک راجی تهریکے کہ آ پہ راجی پجّار ءِ بحالی ءِ واست ءَ انت آئی ءِ وجود غضب کنگ بوتگ گڑا اِے رنگیں راجی تهریک ءِ کُمک کنگ آئی تہ ءَ وتی کرد ءَ پیلو کنگ ، راجی پجّار ءُ آئی بحالی ءِ واست ءَ جذبگانی ءُ مارشتانی هستانکی راجدوستی اِنت بلوچ ءُ کُرد راجدوستی ءُ راجی آجوئی زرمبشت همے لڑ ءَ کاینت وطن دوستی  Patriotism: بازیں زانتکار ایشرا هَم راجدوستی گوش اَنت ءُ قوم پرستی ءِ یک دروشمے لیکنت وتی اِستان ، راجمان ءُربیدگانی سر ءَ بےکساس پھر بندگ، ایشی ءِ گیشیں دروشم ءَ را Jingoism گْوش انت مطلب وتی راج ءَ را دُهمی راجاں چہ برزتر سمجَهگ ، وتی راجی لوٹانی واست ءَ هرچ وڑیں قدم زورگ ، دومی ءِ هچ پروا نہ دارگ ، گڑا ایشی ءَ را جرمن ءِ نازی اِزم ءِ یک درورے هَم
کرار دات کن انت-

بازیں زانتکار راجدوستی ءِ نوعیت ءُ ابرم ءُ آئی بزانت هما ھاسیں وهدے تہ ءَ یک راجے یے هما خاصیں بوهوکیں جاورانی  سرا گون کن انت اگاں بہ چار ایں هما راج کہ وتی آجوئی ءِ واست ءَ جُهد کنگ ءَ اَنت آیانی سر ءَ راجدوستی ءِ هَما بزانت جوان کیت انت کہ ساری برز ءَ کنگ بوتگ راجانی  راجدوستی ءِ جذبگ راجی آجوئی ءَ پد هَم هلاس نہ بنت بلکیں اِستان ءِ واهند بوهگ ءَ پد راجانی تہ ءَ هم راجدوستی بیت انت اے الم نہ انت کہ آجوئیں چاگرد ءُ راجانی تہ ءَ راجدوستی مہ بیت  البت دوئیں هالتانی تہ ءَ آیانی نوعیت ءُ ہیئیت ءِ تہ ءَ تپاوت الم بیت بلوچ راجی زرمبشت قبضہ ءِ بگیری ، راجی پجار ءُ بلوچ اِستان ءِ بحالی ءُ آجوئی ءِ یک تهریکے بازیں بلوچ نودربر ،ورنا ءُ بازیں کواس ءُ زانتکار بلوچ راجی جیڑه ءُتهریک ءَ کیوبا ءِ فیڈل کاسٹرو ءُ  روس ءِ سوشلسٹ انقلاب ءَ گوں یک کن انت یاکہ هما آجوئیں راج ءُ مُلکانی تہ ءَ کہ رجیم ءِ بدلی ءِ (Internal regime Change ) تهریکاں گوں یک کن اَنت یاکہ هما تهریکاں چہ رہنمائی زورگ ءِ جهد ءَ کن انت یاکہ آیاں  وتی رول ماڈل کنگ ، Ideal سمجهگ روس ءِ آشوب ءُ کیوبا ءِ تہ ءَ بٹیستا ءِ رجیم ءِ هلاپ ءَ فیڈل کاسٹرو ءُ ڈاکٹر چے ءِ کمیونسٹ تهریک کابل زکر اِنت- بازیں بلوچ ورنایاں ءُ نودربراں  روس ءِ کمیونسٹ لبزانک ءِ کتابانی سرا وتی توجہ کرتگ  ءُهمے روس ءِ کمیونسٹ لبزانک ءَ  رٹا جن انت باز ایشاں چہ متاثر بوتگ انت ، گڑا همے واست ءَ کمیونسٹ انکلاب ءُ قوم پرستی یا آجوئی ءِ تہ ءَ چے تپاوت هست انت هنچوکہ ساری ءَ گوشتگ ات کہ بلوچ ورناهانی سرا گیشتر روس ءِ سوشلسٹ آشوب ءُ کیوبا ءِ کمیونسٹ   آشوب ئیگ انت گڑا نبشتانک ءِ تہ ءَ راجدوستی یا راجی آجوئی ءِ تهریک ءُ کمیونسٹ آشوب یا کہ یک آجوئیں راجے یے ، ملک  ءِ تہ ءَ رجیم ءِبدلی ءَ تهریک ءِ تہا چے فرق انت، اے نبشتانک ءِ تہ ءَ اشانی تچک ءَ گیشینگ ءِ جُهد کرتگ اشتراکیت( socialism) ءُ راجدوستی ( nationalism) دو جتائیں لیکہ اَنت- سوشل ازم  راجمان ءِ تہ ءَ معاشی طبقات ءِ چیرتراِتگیں طبقاتانی گپ ءَ کنت- راجدوستی راجی جوڑشت ءُ آئی تہا کُلیں راجمان ءُ گُزرانکی تبکات کاینت سوشل ازم یک مخصوصیں طبقہ یے جُهد ءَ کنت آئی ءَ را چاگرد ءِ تہ ءَ یک خاصیں طبقہ یے کمک گون بیت وهدیکہ راجدوستی  راج ءِ  جوڑشت ءُ راج ءَرا گلامی ءَ چہ درکنگ ءَ اِستان ءِ آجوئی ءِ یک تِهریکے کہ راج ایردست ءُ گلام اِنت گڑا آ راج ءِ سرجمیں چاگرد ءِ تہ ءَ هرچ طبقہ چہ سیادی داروکیں مردم گلام اَنت گلامی ءِ سانکلانی پروشگ ءِ واست ءَ راجمان ءِ تہ ءَ کُلیں طبقات،   درنیامی طبقہ( Middle Class) ، برزی تبکہ( Upper Class) ءُ جَهلی تبکہ ( Lower Class) ایش کُلیں طبقھاں چہ سیادی داروک آ تُری نیکراهی(religious) بہ بنت یاکہ سوشلسٹ ءُ لبرل بہ بنت ایش کُلانی راجی پجّار( national identity)  خطره ءِ تہ ءَ بیت انت ایش کُلیں طبقہ آں چہ سیادی داروکیں مردم گلامی ءُ مازین ءِ بگیری ءَ جهد ءَ یکمُشت بنت روس ءِ سوشلسٹ انکلاب ایران ءِ نیکراهی آشوب ءِ ذریعہ ءَ زار ءُ شاه ءَ ایران ءِ رجیم ءِ بدلی ءَ چِہ روس ءُ ایران ءِ جغرافیائی ءُ سیمسرانی تہ ءَ  بدلی نہ اتکگ راجی آجوئی تهریک ءِ سوبمندی سورت ءَ جغرفیائی وھدت پُرش انت- هنچوکہ رودَراَتکی پاکستان ءِ آجوئی ءَ چہ پاکستان ءِ جغرفیائی حد پرشت اَنت راجی آجوئی ءِ تهریک ءَ یکے دُهمی ءَ تاگت داروکیں راج  یاکہ ملکے ءِ دیم ءَ بیت انت اچ آئی چہ رَکّگ سک باز گرانے کارے رجیم ءِ ءِ تہ ءَ بدلی آرگ ءُ دگہ یک سیاسی نظامے ملک ءِ تہ ءَ آرگ ءِ جهد کنگ ، یکیں راج ءَ چہ سیادی داروکیں  جتائیں طبقہ ءِ فکر داروکانی نیام ءَ بیت انت ایش گران ءُ هون ریز الم ءَ بیت انت بلے یک اِستانے ءِ ءُ راج ءِ جوڑشت ءِ امل ءَ چہ گرانتر نہ انت- ملک ءِ رجیم ئے یاکہ سیاسی نظام ءِ بدلی ءِ تِهریک هما وهد ءَچِست بیت انت وهدیکہ گُڈ گوورنس مہ بیت ، زالمیں ، سفّاکیں نظام بہ بیت ، اولس ءَ وتی گپانی جنگ ءِ آجوئی ءِ مہ بیت ، گڑا وهدیکہ عوام زالمیں بادشاه ءِ هکومت ءِ هلاپ ءَ پاد کاینت ، پد ءَ هما ملک ءِ سربراه وتی پوج ءُ طاقت ءِ ذریعہ ءَ لس مهلوک ءِ جَنَگ ءَ جهد کن انت، آ وتی رجیم ءِ برجاه دارگ ءِ هاتر ءَ وڑ وڑیں جبر کن انت بلے اے جاورانی تہ ءَ فوج ءِ بازیں افسر عوام ءِ کمک ءَ ملک ءِ هکمران ءِ هکم عدولی ءَ کرت کن انت ایران ءِ تہ ءَ شاه هلاپ ءَ تهریک ، عرب شپرنگ ، مصر ءِ تہ ءَ ایشی ءِ درور رس اَنت وهدیکہ آجوئی تِهریکانی تہا زورگیر بے کساس زلم ءِ سہارءَ زور ایت ، ایردستیں راج ءَ را وتی جند ءِ گلزمین ءِ سر ءَ وتی فوج ءُ پولس ءِ ذریعہ گوں سنگدلی ءُ سفاکی چہ جنت همے رنگ پاکستان ءِ تہ ءَ عمران خان ءُ طاهرالقادری اسلام آباد ارش کرتگ ، آشوب ءِ آرگ ءِ جُهد کرت، آیاناں پاکستان ءَ کار هم نہ داشت پرچا آ ملک ءِ تہ ءَ آشوب آرگ لوٹ اِتگ همے رنگ ءَ پی ڈی ایم ات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نیشنل موومنٹ ءِ گوستگیں بنجاھی پتر ءِ باسک ڈاکٹر دین مھمد بلوچ ءِ بیگواھی ءَ مروچی دوازدہ سال سرجم بیتگ، بیگواھیں ڈاکٹر دین مھمد ءِ جِنِک سمی ءُ مھلب مروچی کراچی ءَ روانک کَشگ ءَ اَنت، بلوچ یکجھتی کمیٹی ءَ روانک ءِ پلہ مرزی کنان ءَ کراچی ءَ نشتگیں بلوچ دزبندی کُتگ اَنت کہ روانک ءَ بھر بہ زیر اَنت۔ دومی نیمگ ءَ سندھی بیگواھیں مردمانی آجوئی ءِ ھاتر ءَ کارکنوکیں زالبولیں جھدکار سورٹھ لوھار ءَ ھم زھرشانی ءِ پلہ مرزی کُتگ ءُ بھر زیرگ ءِ جارجتگ ءُ ھمے وڑ ءَ بلوچ ڈاکٹر فورم ءَ ھم روانک ءِ پلامرزی ءُ ڈاکٹر دین مھمد ءُ ڈاکٹر اکبر مری ءِ یل کنگ ءِ لوٹ کتگ اَنت اے وھد ءَ بلوچستان ءَ بندوکیں مردماں ھوار جتا جتائیں پھناتانی ھمگرنچی ءِ سمی ءُ مھلب ءَ کنگ بیگ ءَ اِنت ۔

بیست ءُ ھشت جون سال دوھزار ءُ نھ ءَ چہ اورناچ، خضدار ءَ بیگواہ بیتگیں ڈاکٹر دین مھمد بلوچ ءِ بیگواھی ءَ دوازدہ سال سرجم بیگ ءِ درگت ءَ مروچی چاگردی رسانکدر ءَ ھوار کراچی ءَ روانک کَشگ بیت اِنت۔ اے روانک سمی ءُ مھلب ءِ جارے پد ءَ کشگ بیگ ءَ اِنت، روانک ءِ تہ ءَ جتا جتائیں پگراں گوں سیادی داروکیں مردماں گوں بھر زیرگ ءِ دزبندی کنگ بیتگ۔

دومی نیمگ ءَ بلوچ نیشنل موومنٹ ءَ وتی رھشون ءِ بیگواھی ءِ دوازدہ سال سرجم بیگ ءِ درگت ءَ جھان ءِ جتا جتائیں ملکانی زھرشانیانی درچ بندات کُتگ، بی این ایم ءِ نیمگ ءَ چہ جرمنی، برتانیہ، نیدرلینڈ، گریس امریکہ ءُ کوریا ءَ زھرشانی کنگ بیتگ اَنت، اے زھرشانیانی تہءَ بی این ایم ءِ درملکی باسک ءُ رھشوناں مزنیں کساس ءَ بھر زرتگ ءُ ڈاکٹر دین مھمد ءِ یل کنگ ءِ لوٹ کُتگ۔

ھمے پئیم ءَ چاگردی رسانکدر کارکنوکیں جھدکار مروچی بی این ایم ءُ ڈاکٹر دین مھمد ءِ کھول ءِ جار ءِ پد ءَ یک کمپین ءِ گوں #SaveDrDeenMohdBaloch ءِ ھیشٹیگ ءَ کارمرز کنان ءَ جنزین اَنت۔

دی بلوچستان پوسٹ چاگردی رسانک ءِ اھوال کار ءِ رد ءَ کرونا وائرس ءِ آسری ءَ پد یک مھکمیں کمپین ءِ پد ءَ چہ بلوچ نیشنل موومنٹ ءُ بیگواھیں مردمانی کھولانی نیمگ ءَ چہ گندگ پیداک اِنت۔

سمی بلوچ ءَ مروچیگیں روانک ءَ بھر زیرگ ءُ چاگردی کمپین ءَ ھوار بیگ ءِ ھاتر ءَ بلوچ راج ءُ کلیں انسان دوستیں مردماں چہ دزبندی کنان ءَ گُشتگ کہ مئے مرچیگیں روانک پاکستان ءِ وھد چار ءُ نیم ءَ چہ کراچی آرٹس کونسل ءَ در کپیت ءُ پریس کلب ءِ دیما آسر بیت۔

کرونا ءِ گیش بیگ ءَ گوستگیں روچاں روکپتی بلوچستان ایرانشھر ءَ وانگی بنجلاں دَہ روچ ءِ موکل دیگ بیتگ اَنت –

روکپتی بلوچستان ءِ جانسلامتی ءِ رد ءَ بیست ءُ چار ادارانی سر ءَ ھشت سد ءُ چِل ءُ یک نوکیں نادراہ پدر بیتگ اَنت –

روکپتی بلوچستان ءَ بیست ءُ چار ادارانی تہ ءَ دَہ مردم بیران بیتگ کہ چرے بیران بیتگیں مردمانی ھواری ءَ درستیں بیران بیتگیں مردمانی کچ یک سد ءُ سِی ءُ چار ءَ سر بیتگ اَنت –

کرونا ءِ نادراھی ءَ روکپتی بلوچستان ءَ گپتگیں مردمانی کچ نُھ ھزار ءُ ھپت سد ءُ پنجاہ ءُ ھشت ءَ سر بیتگ اَنت ءُ وش بیتگیں مردمانی کَچ سیزدہ ھزار ءُ دو سد ءُ بیست ءُ نُھ بیتگ اَنت –

کوپا امریکہ ءِ گوازی ءَ برازیل ءُ ایکواڈور یک یک گولے ءَ دیمیگ، پیرو ءَ یک گولے ءَ باج برتگ، یورو کپ ءَ چیک ریپبلکن ءَ دو گول ءُ بلجئیم ءَ یک گولے ءَ باج برتگ –

کوپا امریکہ ءِ گوازی برجاہ انت دوشی شپ ءَ پنچمی راؤنڈ ءِ اولی گوازی برازیل ءُ ایکواڈور ءِ میان ءَ بوتگ ءُ دومی گوازی وینزیلا ءُ پیرو ءِ میان ءَ بوتگ – اولی گوازی ءَ برازیل ءُ ایکواڈور ءِ لیبیاں جوانی ءَ گوازی کنان ءَ ھردو ٹیمانی لیبیاں یک یک گولے اسکور کتگ دؤئیں ٹیم دیمیگ بوتگ انت – ایکواڈور ءِ نیمگ ءَ چہ ایکواڈور ءِ لیبی اینجل مینا ءَ گول اسکور کتگ ءُ برازیل ءِ ٹیم ءِ نیمگ ءَ چہ لیبی ایدِر میلتاؤ یک گولے اسکور کتگ –

وینزیلا ءُ پیرو ءِ میان ءَ بوتگیں گوازی ءَ وینزیلا ءِ نیمگ ءَ چہ ھچ گول کنگ بوتگ وھدیکہ پیرو ءِ لیبی ایندرے کاریلیو ءَ یک گول ءِ اسکور کتگ گوازی وتی نام ءَ کتگ –

کوپا امریکہ ءِ دیم ءِ گوازی یوروگاوے ءُ پیراگاؤ، بلوؤیا ءُ ارجنٹینا ءِ میان ءَ بوگ ءَ انت ـ

دومی نیمگ ءَ یوئیفا یورو کپ فٹبال گوازی برجاہ دوشی شپ نیدر لینڈ ءُ چیک ریپبلک ، بلجئیم ءُ پرتگال ءِ میان ءَ گوازی کنگ بوتگ –

دوشیگیں گوازی ءَ چیک ریپبلکن ءَ نیدرلینڈ ءِ دیم ءَ دو گول، بلجئیم ءَ پرتگال ءِ دیم ءَ یک گولے ءَ باج برتگ-

یوئیفا یورو کپ ءِ شابزدھمی راؤنڈ ءِ سیمی گوازی نیدر لینڈ ءُ چیک ریپبلک ءِ میان ءَ بوتگ کہ نیدرلینڈ ءِ نیمگ ءَ ھچ گول کنگ نبوتگ وھدیکہ چیک ریپبلکن ءَ دو گول داتگ ءُ باج برتگ، چیک ریپبلکن ءِ نیمگ ءَ یک گولے توماس ءَ داتگ دومی گول پاترک ءَ اسکور کتگ گوازی وتی نام ءَ کتگ –

چارمی گوازی بیلجئم ءُ پرتگال ءِ میان ءَ بوتگ کہ پرتگال ءِ نیمگ ءَ چہ ھچ گول اسکور کنگ نہ بوتگ وھدیکہ بیلجئیم ءِ لیبی تارگن ھازرڑ ءَ یک گولے اسکور کتگ گوازی وتی نام ءَ کتگ –

زانگ بہ بیت یوئیفا یورو کپ ءِ شانزدھمی راؤنڈ ءِ تہ ءَ بلجئیم ءُ اٹلی، چیک ریپبلک ءُ ڈینمارک ءِ لیبیاں جوانی ءَ گوازی کنان ءَ وت ءَ کواٹر پائینل ءَ سرکتگ –

یورو کپ ءِ شانزدھمی راؤنڈ ءِ دیمے گوازی کروتیا ءُ اسپین، پرانس ءُ سویزر لینڈ ءِ میان ءَ جتا جتائیں پٹاں بوگی اِنت –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ پاکستانی پوج ءِ سر ءَ بیتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں کیچ ءِ دمگ شاپُک ءَ ڈیم ءِ سر ءَ برجاھیں پاکستانی پوج ءِ پانگس ءِ نزیک ءَ آپ بروکیں ٹینکر ءُ پرپٹ تراک ناکیں شوروانی نشانگ کتگ اَنت-

جارکش ءَ گوشت: ٹینکر ءُ یک پرپٹے تراک ناکیں شوروانی زد ءَ اَتکگ اَنت ءُ دو پوجی کارمند ھما دمان ءَ مُرتگ دو سک باز زدگ بوتگ اَنت –

میجر گوھرام بلوچ ءَ گوشتگ کہ اے پانگس چین ءُ پاکستان اکنامک کوریڈور (سی پیک) دگ ءِ پھازگ ءِ ھاتر ءَ جوڑ کنگ بوتگ –

گڈسر ءَ جارکش میجر گوھرام بلوچ ءَ گوشتگ کہ بلوچستان ءِ آجوئی ءَ تاں زورگیریں پوج ءِ سر ءَ مئے اُرش برجاہ مان انت –

بلوچستان ءَ دو ھپتگانی تہ ءَ بازیں کَچے ءَ ورنائیں نودربر آوار جنگ ءُ بیگواہ کنگ بیتگ اَنت-

بلوچستان ءِ دمگ چہ کیچ ءَ سر بیتگیں ھالانی رد ءَ گوستگیں روچ ءَ کیچ ءِ دمگ کلگ ءَ پاکستانی پوج ءَ دو نودربر آوار جنگ ءَ پد بیگواہ کرتگ اَنت –

آوار جنگ بیتگیں نودربرانی پجار شاہ میر ء پیر بکش ءُ فدا ءِ ناماں زانگ بیتگ اَنت –

دمگی مردمانی رد ءَ ھردوکیں ورناہ عطاشاد ڈگری کالج ءِ نودربر اَنت ءُ ھردوکانی اے وھد ءَ چکاس بیگ ءَ اَنت –

زانگ بہ بیت ھمے ماہ ءَ بلوچستان ءَ پاکستانی پوج ءِ بیڑ ءُ زورانسری آوار جنیانی تہ ءَ بازین کچے ءَ گندگ ءَ اتکگ اَنت ءُ ھمے ماہ ءَ بلوچستان ءِ بازیں جاھاں آوارجنیانی ھال شنگ بیتگ اَنت –

سبی ءُ کیچ ءَ پاکستانی پوج ءِ سر ءَ سلاہ بندیں مردماں اُرش کرتگ کم چہ کم چار کارمندانی کُشگ ءِ ھال بیتگ اَنت –

بلوچستان ءِ دمگ سبی ءَ سلاہ بندیں مردماں پاکستانی پوج ءِ سر ءَ اُرش کرتگ ءُ اُرش ءِ آسر ءَ سَے کارمند کُشگ بیتگ اَنت –

سبی ءَ کُشگ بیتگیں کارمندانی پجار ھولدار علی زمان، سپاھی آصف اقبال ءُ زوھیب ءِ ناماں زانگ بیتگ اَنت –

ھمے وڑ ءَ کیچ ءِ دمگ شاپک ءخ پاکستانی پوج ءِ سر ءَ ناشناسیں مردماں بمب تراکے کرتگ ءُ چریشی ءَ یک کارمندے مرتگ ءُ یکے زدگ بیتگ –

تراک ایف سی ءِ واستا آپ پُجارینوکیں گاڑی ءِ سر ءَ کنگ بیتگ کہ اود ءَ گاڑی ءِ ڈرائیور مرتگ –

مرتگیں کارمند ءِ پجار کفایت اللہ ءِ نام ءَ زانگ بیتگ –

زانگ بہ بیت بلوچستان ءَ اے لھتے ادارانی تہ ءَ اے دومی اُرش اِنت کہ پوجی بنشون ءِ رد ءَ چار کارمند کُشگ ءُ سَے زدگ بیتگ اَنت –

زانگ بہ بیت گوستگیں روچاں بولان ءِ دمگ سانگان ءَ پوج ءِ سر ءَ اُرش کنگ بیتگ اَت کہ پنچ کارمند کُشگ بیتگ اِت اَنت آیانی زمہ واری بلوچ لبریشن آرمی ءَ منّ اِتگ اِت اَنت بلے مروچی بیتگیں اُرشانی زمہ واری تنی وھدی ھچ گل ءَ پہ وت ءَ نہ زُرتگ اَنت –

شَیر: بال ءَ بیا کپوت

شائر: آمد سیپ ساجدی

دی بلوچستان پوسٹ

بال ءَ بیا کپوت او چاھی
مناگیر اتک ھانلءِ ھمراھی

زوت بر منی کلوہ ءَ سرکن
دوست ءَ را بہ گوش واترکن

درکپ اوکپوت چہ مئے ھلکءَ
کُوچو ءَ بہ چار تھمبل کن

دیمءَ سر بہ گر گوں بال آں
من نیائین تو بہ دئے ھال آں

گُنکیءَ دہ بجے ٹیمءَ بیا
گونیءَ انگتءَ دیمءَ بیا

نَدگی ئے کاچراں شوکیناں
چار آں کن کوچگ آں دراھیناں

بند ترکوھی تچوکیں جوھاں
دیمءَ کئیت باھڑی گوں وشبوّان

ساھتے تو بہ دار الکاپ ءَ
ترکن بانزل آں چہ نوک آپ ءَ

ھچبر در میا اشتاپ ءَ
اگاں کائے واتری شکر آپءَ

ترا دست آں گوں وتی بال داتگ
بیا چمے شانک بہ دئے رباط ءَ

بالاں بند وتی ایوک ءَ
دیم ءَ بہ دئے وتی چروک ءَ

سُھر دپ مئے تلاہءُ زر ایں
مئے مسکیں زباد سک شر ایں

جست کن ھانلی تو یکو
برو شام ءَ تو بہ دار تاپکو

ادا کس ئے ترا نہ دنت ھانلی سوجءَ
سُھب ءَ سر بہ گر سر ریج ءَ

گِنداری جَمبراں وش بستءَ
بیا تو پوگی ءُ گواراست ءَ

داں ھینارو برو تیگاپ ءَ
رواں کن ھانلی نام ءَ پہ

چیل ئے جنگل آں کوکو کن
گری ءَ تو برو زوت زو کن

جمبر تئی سرءَ ساچان انت
تو کائے واتر ءَ دار دان ءَ

درستیں کوچگ آں وش وش چار
پیگامءَ ھانلی الم بیار

کوچگ بابلی سرسبزآں
وتی کوکوھاں بہ جن وش لبز آں

پہ کوکوھاں بہ جن اپسوزی
بلکیں ھانل ءَ جا ئِے ات دیست

سیل ءِ تو بہ کن جاورجی
کپوت سک دیر انت ترا آ وھدی

اسپکنری انگتءَ دیم ءَ انت
روچ نی جال شُتگ بیگاہ انت

بد رنگ مئے گلیں گلزار انت
پتکنری منی میتگ ءُ بازار انت

شائر تئی کپوت راھچار ایں
اھوال آں بہ دئے تو باریں

آتکے تو کپوت سر بوت ئے
گومن وش ءُ وش ھبر تو بوت ئے

آمد من تئی سلام سر کرت آں
گول ات گریشگءَ دَم برت آں

ساھتے گس دپءَ من نشت آں
دراھیں گپ ھانل ءَ من گُشت آں

من دیست ءَ تئی ھانل ءَ وش گپ ایں
چم آں چست ءَ کنت دل ٹپ ایں

گپ کنت ھبر وش کند انت
من درست کت ھانلیءِ جند انت

ھانل گُش ئے زیبا انت
ماہ ءَ چہ انگت ءَ رُژنا انت

مندریک لنکُکانی مان انت
سرومگ ھانلی چمان انت

وش بو دلبرے زلپانی
منا دیم داتگ برو تئی ءَ

باریں تو نیتکگے ءِ پرچی ءَ
جوابے دات ھانل ءَ زیبا ءَ

آمد من تئی ھمراہ آں
پہ تئی دوری ءَ تباہ آں

آمد تئی وھدءَ آں من بند آں
دیریں اشکتگ درد مند آں

ساھتے من جتگ سوداھی
اچ تو نی نہ بیت جتائی

بہ گوش کائین لازمی تئی شھر ءَ
اچ من تو مہ بر اوپار ءَ

نبشتانک: راج وتی راجی زّبان ءَ چی ءَ رَد نبیسّ ایت

نبشتہ کار : ابدلستار بُگٹی

دی بلوچستان پوسٹ

رَدی وَ بنی آدم ءِ دست ءَ بیت ءُ بنی آدم ءَ مُدام چہ ردیاں دربُرتگ پمیشکا من ءَ ھم رَدی دوست بنت چی ءَ کہ داں وھدے ما رَدی نہ کن ایں ما ھچ دربُرتگ نہ کن ایں۔ اِے ٹَوکاں من نہ گْوشگ ءَ آں بلکیں گیدی ءِ بلاھیں زانتکار ءُ شاھزانت ھم گْوش اَنت انچوشکہ واجہ ھینری پورڈ جاھے ءَ گْوش ایت “بُندری رَدی ھما اِنت کہ ما چہ ھما ردی ءَ ھچ دربرگ ءِ دلگوش نہ کن ایں”
واجہ پاول بیر بریانٹ گْوش ایت “وھدے کہ تو رَدی یے کن ئے گُڑا ترا سَے چیز چَہ ھمے رَدی ءَ دلگوش کنگ لوٹ ایت: وتی رَدی ءَ بہ منّ، چہ ردی ءَ دربر ءُ ردی ءَ دوبار مہ کن”
واجہ بریڈون مُل گْوش ایت “سرپدیں مردم چہ وتی رَدیاں دربر اَنت البت شیوّار چہ دِگر ءِ کُتگیں رَدی ءَ دربرگ ءِ جُھد کن اَنت”
اگاں تو ردی ءِ بستار ءُ ارزِشت ءِ بابت ءَ گیشتریں پٹ ءُ پولے کنگ لوٹ ئے گُڑا چہ گوگل پریام ءَ شوھاز بہ کن گُڑا ردی ءِ بابت ءَ اود ءَ ھم ترا بازیں سرپدی یے رس ایت۔ البت ترا اود ءَ ھم ھمے یکیں سرپدی رس ایت کہ ردی دربرگ ءِ بُندری پادینک اِنت بزاں نودربری ءَ بِہ گر داں شاھزانتی ءَ ردی بنی آدم ءِ ھمراہ اِنت ءُ بنی آدم مُدام ءُ یکشل ءَ چہ وتی رد کُتگیناں دربرگ ءِ جُھد ءَ انت۔

نی ما وتی نبشتانک ءِ سر ءَ کا این ءُ گپ کن ایں مئے راجی زُبان بلوچی چی ءَ رَد نبیسّگ بیت؟! مارا یک ٹوکے ءِ سر ءَ تچک بیگ لوٹ ایت کہ دنیا ءِ توک ءَ تھنا ھما راجانی زُبان دیمروئی کنات وھدے کہ آ وتواجھیں راج ءِ زھگیں نودربر ءُ پدریچ وتی راجی زُباناں وت ماں وانگجاھاں وان اَنت، راجی زُبان ءِ روتاک، ماھتاک ءُ گِندگُش ءِ وڑیں آسراتی بہ بنت پد ءَ مرچیگیں زمانگ ءَ ھر راج ءِ وانِندگیں مھلوک ماں گْوانکواں پہ کلوہ، ٹپال ءُ گپ ءُ رپ ءَ وتی جِند ءِ زُبان ءَ کارمرز بہ کن اَنت۔ بلے پہ بلوچ راجی زُبان ءِ دیمروئی ءَ اِے آسراتی نیست ناں کہ بلوچ راج ءَ ماں وانگجاھاں جِند ءِ راجی زُبان وانینگ بنت ءُ ناں کہ پہ براھوھی ءُ بلوچی ءِ دیمروئی ءَ آسراتی یے ھست ءُ نَیکہ بلوچ راج ءِ تہ ءَ ھم چوشیں سرپدی ءُ آگاھی یے ھست کہ ما گْوانکو آنی تہ ءَ وتی راجی زُبان ءِ آبیکدار ءُ بزانت بلد ءَ ایرگیج ءُ کارمرز بہ کن ایں۔

البت ما راج ءَ یک سرپدی یے اَلم گْوشگ لوٹ ایں مارا وتی راجی زُبان رکینگ لوٹ ایت کہ مئے راجی زُبان ءِ زگریں گال گار ءُ بیگواہ مہ بنت۔ مارا وتی راجی زُبان وت وانگ ءُ زانگی انت ءُ پد ءَ کم کم ءَ دربرگ ءُ نبیسّگی انت۔ توری رَد ھم نبیسّ ایں بلے پد ءَ وت کم کم ءَ وت ھیل گِر ایں۔ راجی زُبان ءِ وانگ ءُ زانگ ءِ وھد ءَ مارا ھر چیز ھورت چارگی انت گُڑا ما چیزے دربر ایں۔ انچوشکہ دنیا ءِ ھر زُبان ءَ نامگال(Noun)، پنامگال(Pronoun)، کارگال(Verb)، کُمکّار گال(Helping Verb or Modal verbs)، ستاگال(Adjectives) ءُ تپور گال(Preposition) ءِ وڑیں رھبند چیز بنت۔ اگاں ما وتی راجی زُبان ءِ اِے چیزاں سرپد بوتگ ایں گُڑا بزاں ما وتی راجی زُبان ءَ وت سے روچ ءِ تہ ءَ زان ایں البت پد ءَ پہ ھیل کنگ ءَ مارا وانگ ءُ نبشتہ کنگ لوٹ ایت۔

انچوشکہ ما دْراہ سرپد ایں کہ بلوچی مئے راجی پجّار اَنت ءُ چہ زُبان ءِ وانگ ءُ نبیسّگ ءِ برکت ءَ سرجمیں راج ڈیھ دوست ءُ راجدوست بنت پمیشکا مرچاں بازیں بلوچ برات ءُ گْوھار پہ راجی زُبان ءِ دیمروئی ءَ ماں وٹس ایپ، ٹیلی گرام، پیسبُک ءُ دگہ دامگی پریاماں کار ءَ اَت۔ ھر کس راجی زُبان ءَ وت دربرگ ءُ دیم ءَ ھم وانینگ ءِ جُھد ءَ انت چریشی ءَ ما دْراہ زیت راجی زُبان ءَ وت وان این ءُ دربر ایں بلکیں پد ءَ دیم ءَ ھم وتی سْیاد، وارس، دزگْوھار ءُ سنگتاں راجی زُبان ءِ بارہ آگاھی دے ایں کہ ھر کس وتی گْوانکو آنی راست کارمرزی ءَ راجی زُبان ءِ نبشتہ ھیل کُت کنت۔

البت پہ بلوچی نبشتہ دربرگ ءَ من شُمارا یک سوج دیگ لوٹ آں کہ چوناھیگا ما دْراہ وَ بلوچ ایں پمیشکا ما دْراہ وتی ماتی ءُ راجی زُبان ءِ وانگ ءُ سرپد بیگ ءَ زبر ایں۔ گُڑا ما ءُ شُما لھتیں روچاں بلوچی نبشتانک، آزمانک ءُ گْوشکنداں وانان کن ایں، بزاں شُما ھم یک انچیں دابے ءَ بلوچی نبشتانک، آزمانک ءُ گْوشکنداں بہ وان اِت کہ شُما وت استاد اِت بزاں انچو نبشتھاں ھورت ءُ دلگوش ءَ وان اِت کہ شُما چَہ نودربرانی نبشتھاں ردیِاں چارگ ءَ اِت۔

بلے بَے (شَرت) ایش انت کہ ما ھر کسے پیسر ءَ وت راجی زُبان ءِ درونتاں سرجمی ءَ بہ وان ایں بزاں ما پیسر کارگال، کُمکّار گال ءُ ستاگال وڑیں چیزاں جْوان سرپد بَہ ایں۔ بزاں یکبرے بلوچی درونتانی وانگ ءَ رَند تو انچیں دابے ءَ بلوچی وانان کن کہ تو چہ نبشھاں نزوریاں چارگ ءُ رَدیاں پٹگ ءَ ئے گُڑا ھمے داب ءَ تو زیت دربر ئے۔ چریشی ءَ مستریں پائدگ ایش انت کہ ترا مُدام بلوچی درونت تاجگ بنت۔

منی راج ءِ بْرات ءُ گْوھاراں ما اُمیت کن ایں کہ شُما زیت وتی راجی زُبان ءِ نبشتہ دربر اِت چوناھیگا شّما وت بلوچ اِت پمیشکا پہ شُما بلوچی نبشتہ دربرگ ھچبر اڑ ءُ اڑاندے نہ بیت۔ بس ما اشتاپ مہ کن ایں ھمے ھیالداری بہ کن ایں کہ ھر چیزے ما نبیسّگ ءَ ایں گُڑا ما وت ھم ھمے نبشتگیں چیزاں دو سے رند ءَ چمشانک بہ دے این ءُ وتی نبشتہ رَدیاں وت کَشان کن ایں چی ءَ کہ ھر زُبان ءِ ندکار ءُ نبشتہ کار نبیسّگ ءِ وھد ءَ اشتاپیگ نہ بنت بلکیں دو سَے رند ءَ وتی نبشتگیں گالرِداں وت وانان ءُ وتی رَدیاں راست کن اَنت ھمے داب ءَ مارا چہ وتی رَدیاں دربرگ لوٹ ایت ءُ پہ راجی زُبان ءِ دیمروئی ءَ مارا وت جُنزان کنگی اِنت چی ءَ کہ اے مئیگ ءُ شُمئے راجی زمہ واری اِنت کہ ما راج ءَ سرپد کنان ءَ بلوچی وت دربر ایں ءُ وتی راج ءَ ھم وانین ایں کہ مئے بلوچ راجی زُبان ءَ ھم گیدی ءِ دگریں زُبانی ڈول ءَ دیمروی بہ رس ایت۔

بلوچ شالا میزران بات اَنت، راج شالا مُدام وتی راجی زُبان وانان ءُ راجدوست بہ بات اَنت ءُ راجی زُبان شالا دیمرویاں سربات۔ شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔