TBP Balochi

ٹی بی پی اھوال

8مارچ ءَدنیا ءِ ھمک کنڈ ءَ زالبولانی سر ءَ بیتگیں ناانساپیانی ھلاپ ءَ زالبولاں توار چِست کرتگ ءُ وتی بروبری ءِ ھکانی پد جنگ ءَ روانک ءُ دگہ دگہ مراگش برجاہ داشتگ اَنت –

اے روچ ءَ گیشتر ھمے واستا دار اَنت کہ زالبولاں بنکی ھک بہ رس اَنت چُشکہ چاگردی، زرکاری، سیاسی ءُ دودمانی پِڑاں دیم ءَ در اتک بہ کن اَنت ءُ آیانی دیم ءَ جنجال ایر کنگ مہ بنت –

اے روچ کدی دارگ بیتگ چتور دارگ بیتگ کجام ھساب ءَ دنیا ءَ اے روچ منّ اِتگ ءُ زالبولانی ھکانی پدجنگ ءَ جھانی تکاں جھانی روچے لیکگ بیتگ –

زالبولانی ھکانی واستا دنیا ءِ گوست ءَ بازیں کساسے ءَ زالبولاں روانک ءُ پند جتگ ھمے رنگ ءَ اے روانکانی بھرانی نوزدہ سد ءُ یازدہ ءَ نوزدہ مارچ ءَ ڈنمارک کوپن ھیگن ءَ زالبولانی روچ شرپے ءَ دارگ بیتگ دَہ لَک مردماں گیش جتا جتائیں ڈیھاں روانک کش اِتگ ءُ زالبولانی ھواری ءَ مردیناں ھم زھرشانی کرتگ ءُ لوٹ ءِ تہ ءَ ووٹ ءِ ھک، روزگار ءِ ھک ءُ دگہ تکاں ھواریں جاھاں جاگہ دیگ بہ بنت –

ھمے درچاں نوزدہ سد ءُ یازدہ ءِ سال ءَ بیست ءُ پنچ مارچ ءَ امریکہ ءَ یک ناوشیں وئیلے دیم ءَ اتکگ اَت کہ اود ءَ یک کارکانھے ءَ آس ءِ کپگ ءِ سوب ءَ یک سد ءُ چِل زالبولانی ساہ گپتگ اَت ءُ اشانی تہ ءَ ھواریں زالبول اٹلی ءُ یھودی بیتگ اِت اَنت کہ چرے وئیل ءَ پد زالبولانی کارانی سر ءَ بازیں اسر کپتگ اِت اَنت ءُ امریکہ ءَ پوریاگریانی رھبند ءِ جوانتر کنگ ءَ باوست بندات بیتگ اِت اَنت ءُ ھمے سال ءَ زالبولاں “ Bread and roses” نگن ءُ پُل ” ءِ نام ءَ یک کمپئنے بندات کتگ اَت –

دنیا ءَ زالبولانی سر ءَ بیتگیں ناگیگیں وئیلاں پد میان اُستمان ءَ نوزدہ ءُ سد ءُ ھپتاد ءُ پنچ ءَ ھشت مارچ زالبولانی میان اُستمانی روچ منّ اِتگ ءُ دسمبر نوزدہ سد ءُ ھپتاد ءُ ھپت ءَ یونائیٹڈ نیشنز جنرل اسمبلی ءَ زالبولانی ھک ءُ میان اُستمانی ریزولوشن ھم منّیتگ – ھمک ڈیھ ھمے روچ ءَ وتی ھساب ءَ وتی راجدپتر ءِ رد ءَ اے روچ ءَ داشت کنت –

نِی بلوچستان ءَ ھم اے روچ دارگ بیتگ اِنت ءُ بلوچ زالبول ھم ھمے روچ ءَ وتی ھکانی بروبری ءَ دارگ ءَ اَنت ھمک سال اے روچ ءَ زالبول وتی ھکانی واستا جتا جتائیں مراگش ءُ روانک کن اَنت –

بلوچستان ءَ اے سال ءَ گیشتر زالبولانی میان اُستمانی روچ ءَ بی ایس او آزاد ءِ گوستگیں سروک ءُ زالبول رھشون کریمہ بلوچ ءُ بلوچستان ءَ گار ءُ بیگواھیں مردمانی کھولانی ناماں دارگ بیگ ءَ اِنت –

گوستگیں روچ ءَ بلوچستان ءِ بنجاھی شھر شال ءُ دگہ ھنداں ھم ھشت مارچ زالبولانی میان اُستمانی روچ ءِ درگت ءَ مراگش بیتگ اَنت –

مروچی ھم بلوچستان ءِ بنجاھی شھر شال ءَ زالبولانی میان اُستمانی روچ ءِ درگت ءَ مراگش بیتگ –

مراگش وومن ڈیموکریٹک فرنٹ ءِ نیمگ ءَ بیتگ مراگش ءَ جتا جتائیں پاٹیاں بندوکیں مردماں مھتاپ ھزارہ، خالدہ ضیاء ایڈوکیٹ، زرگون، سازین بلوچ، فاطمہ خیلجی، کنزا، نفیصہ شاہ، ھُما فرھادی،صوفی خالد، راجیب بلیدھی ءَ مراگش ءَ تران کرتگ –

تران کنوکاں گوشت کہ ما وتی ھک ءِ سر ءَ گپ جن آں ھمے ھساب ءَ زالبولاں ھم وتی ھک دیگ بہ بیت ءُ بروبری ءَ زالبول چارگ بہ بنت –

آیاں گوشت کہ بلوچستان ءَ زالبول گیشتر ازابی ءَ گوزگ ءَ اَنت ءُ وتی روچاں دگ ءُ پریس کلبانی دیم ءَ وتی دوستیگیں مردمانی شوھاز ءَ ٹوکر وران اَنت ءُ بزگی ءِ زندمان ءَ کپتگ اَنت –

آیاں گوشت کہ بلوچ زالبولانی سر ءَ کپتگیں اسر سرجمیں مردمانی دیم ءَ پدر اَنت ءُ مروچی کہ چوش گوست ءَ بلوچستان شھدربرجاہ ءِ وئیل درستانی دیم ءَ اِنت کہ اود ءَ زالبولانی گون ءَ چی کنگ بیتگ ءُ آیانی دیم ءَ کجام اڑانک بیتگ اَنت –

تران کنوکاں گوشت کہ مئے چاگرد ءَ زالبول چارگ نہ بنت بلکیں تھنا نام چارگ بنت ءُ ھما زالبول اگاں زات ءُ زُریات ءَ کمتر اِنت گڑا آ پُشت ءَ چگل دیگ بیت اِنت –

مراگش ءَ کردش زالبولانی بارہ ءَ ھم گپ کنگ بیتگ کہ ءُ آیاں گوشت کہ مروچی کردش زالبول وتی ھکانی پد جنگ ءَ وت جھد کنگ ءَ اَنت ھمے وڑ ءَ باندا بہ گندے بلوچ زالبول ھم وتی ھکانی پد جنگ ءَ ھمے راہ ءَ روان بنت ءُ باید وتی ھکانی پد جنگ ءَ ھمک تکاں شت بہ کن اَنت –

آیاں گوشت کہ اگاں چاگرد ءِ مھکمی ءَ لوٹ ئے گڑا زالبولانی دیم ءَ آرگ المی اِنت ابید زالبولاں چاگرد مھکم بیت نہ کنت تانکہ زالبول دیم ءَ اتک مہ کن اَنت گڑا چاگرد نیزور بیت ءُ دیمروئی کت نہ کنت –

ھمے وڑ ءَ مروچی ھم بلوچستان ءِ دگہ جاھاں بلوچ زالبولانی میان اُستمانی روچ ءِ درگت ءَ مراگش کنگ بیتگ اَنت – بلوچستان ءِ دمگ کیچ بلیدہ الندور ءَ زالبولانی میان اُستمانی روچ ءِ درگت ءَ نِشہ ءِ ھلاپ ءَ زھرشانی کتگ –

ھمے رنگ ءَ کیچ ءِ بنجاھی شھر تربت ءَ ھم زالبولانی میان اُستمانی روچ ءِ درگت ءَ مراگش بیتگ -اے مراگش ایچ آر سی پی ءِ چیردستی ءَ ایس پی او ءُ این آر ایس پی ءِ کمک ءَ ملا فاضل ھال ءَ ایس پی او ءِ مراگش بیتگ –

مراگش ءَ زالبولاں ھوار دگہ تکاں بندوکیں مردماں بازیں کچے ءَ بھر زرتگ- مراگش ءِ وھد ءَ شاھینہ شاھین اکیڈمی آف آرٹس ءِ نیمگ ءَ پینٹنگ ھم پیشدارگ بیتگ اَنت –

ھمے رنگ ءَ زالبولانی میان اُستمانی روچ ءَ چاگردی رسانکجاھاں بلوچستان ءَ بندوکیں مردماں اے روچ کریمہ بلوچ ءُ بلوچستان ءَ گار ءُ بیگواھیں مردمانی کھولانی نام ءَ دارگ بیتگ –

چریشاں ابید بلوچستان ءَ مڈی ءُ دراھیں آسراتیانی واستا زمین ءِ چیر ءَ پہ بلوچ زالبولانی آسراتیانی سرجم ءَ سرگنج اَنت بلے بلوچستان ءِ زالبولاں اے مڈیانی واھند بیگ ءَ ابید ھم زند ءِ جتا جتائیں جیڑھانی آماچ اَنت –

نِی بلوچستان ءِ زالبول پہ وتی ھکانی واستا کجام ھد ءَ شت کن اَنت ءُ آ چی کُت کن اَنت ءُ آیاں پہ چی کنگ بیت اِنت – باید ھمیش اِنت کہ دگہ ڈیھانی ھواری ءَ بلوچستان ءِ زالبولاں ھم زند ءِ دراھیں آسراتی ءِ آجوئی دیگ بہ بنت –

سربوتگیں ھالانی رِد ءَ دو ھپتگ ءَ پیش ناشناسیں مردماں قادر ء پیرک دزگیر کُتگ گوں وت برتگ، وھدیکے گوستگیں شپ ءَ آئی ءِ تیر سپتگیں جون دستکپتگ –

دی بلوچستان پوسٹ

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گھرام بلوچ ءَ رسانکدراں وتی شنگ کرتگیں درشان ءَ قادر ءِ کوش ءِ زمّہ واری منّ اِتگ گوشتگ کہ ریاستی چاریگ قادر ء پیرک دزگیر کُتگ جست پرس ءَ پد ءُ وتی کتکاریانی منّگ ءَ پد کُشتگ –

جارکش میجر گھرام بلوچ ءَ دیمتر ءَ گوشتگ کہ قادر ء پیرک ءَ آواران ءِ بازیں دمگ ءَ ھاسکر کولواہ ءَ بلوچ سرمچارانی رندگیری کنگ ءَ ھوار زورگیریں پوج ءِ ھمراھی ءَ لشکر کشی ءَ پوج ءِ رھشونی کرتگ ات، دو ھپتگ ءَ پیش سرمچاراں آ دزگیر کتگ – جست ءُ پُرس ءِ میان ءَ قادر ء پیرک جاھمنند گشانک آواران ءَ وتی درسیں کتکاری منّ اِتگ انت – اے مرد ءَ کولواہ، گیشکور ءُ چپ چاگردی دمگاں سرمچارانی دلاری کُتگ، آئی ءَ دپ ءِ وت منّ اِتگ کہ آ بازیں براں لشکرکشی آں پوج ءِ ھمراہ بوتگ –

جارکش ءَ گوشتگ کہ قادر ء پیرک راجی آجوئی جھدکارانی بگیری ءَ پاکستان ءِ ھمراھ داری کنگ ءُ کتکاریانی منّگ ءَ پد گوستگیں شپ ءَ آ مرگ ءِ سزا دئیگ بوتگ –

گڈسر ءَ جارکش میجر گھرام بلوچ ءَ گوشتگ کہ ھر وڈیں مردمے جنگی جرم ءُ بلوچ چکچینی ءَھوار بیت ءُ پاکستانی ءِ پوج ءِ ھمراہ داری کنت، آئی ءِ سزا دئیگ مئے راجی پرز انت –

سربوتگیں ھالانی رِد ءَ بلوچستان ءِ بنجاھی شھر شال، کوھلو، سبی ءُ ھزدار ءَ دگ ءِ وئیلاں ھپت مردم ٹپی بوتگ وھدیکہ یک مردمے بیران بوتگ –

دی بلوچستان پوسٹ

گیشیں ھالانی رِد ءَ بلوچستان ءِ بنجاھی شھر شال ءَ دگ ءِ وئیلے ءَ دو جنکُو ٹپی بوتگ انت –

دمگی پولیس ءِ رد ءَ شال ءِ دمگ دشت تیرہ میل ءِ نزیک ءَ گاڑی ءَ گوں موٹر سیکلے ءَ ڈیک وارتگ ، ڈیک ورگے سوب ءَ سیکل سواریں دو کسانیں جنکو سائمہ ءُ سعدیہ ٹپی بوتگ انت –
ٹپی بوتگیں گونڈو پولیس ءَ دست گپتگ ءُ نادراھجاہ ءَ سرکتگ انت –

ھمے وڑ بلوچستان ءِ دمگ کوھلو ءَ دو پرپٹانی ڈیک ورگ ءِ سوب ءَ دو مردم ٹپی بوتگ اَنت –

پولیس ءِ رِد ءَ کوھلو ءِ دمگ شاہیجہ آباد ءِ نزیک ءَ دو موٹر سینکلانی تیز رؤگ ءِ سوب ءَ ڈیک وارتگ، ڈیک ورگے سوب ءَ دو مردم سک باز ٹپی بوتگ اَنت –
دوئیں مردم ڈسٹرکٹ ھیڈکوارٹر ھسپتال ءَ سر کنگ بوتگ انت، ؤئیل ءِ درگت ءَ گیشیں پٹ ءُ پول پولیس کنگ انت –

دگہ وئیلے بلوچستان ءِ دمگ سبی ءَ دیم ءَ اتکگ کہ مازدہ گاڑی ءَ گوں کسانیں گاڑی ءَ ڈیک وارتگ، ڈیک ورگ ءِ سوب ءَ دو مردم ٹپی بوتگ اَنت –

دوئیں مردمانی پجار سید بابل شاہ ء محمد شاہ ءُ سید عبدالواحد شاہ ء عبدالستار شاہ ءِ نام ءَ چہ بوتگ انت –
دوئیں ٹپی بوتگیں مردم سول ھسپتال ڈھاڈر ءَ برگ بوتگ انت –

ھمے وڑ ھزدار ءِ دمگ وڈھ وہیر ءَ تیز رؤکیں ٹرالر ءَ موٹر سینکل سواریں دو مدرسہ فیض العلوم ءِ دو نودربر ڈیکر کُتگ انت – ڈیکر کنگے سوب ءَ یک ورنایے ھما دمان ءَ بیران بوتگ وھدیکہ یکے سک باز ٹپی بوتگ، ٹپی بوتگیں نودربر ھما دمان ءَ ھزدار ءِ نادراھجاہ ءَ سرکنگ بوتگ –

ھمے وڑ پنجگور ءَ بس ٹرمینل ھِ نزیک ءَ یک لوگے ءَ مردمے ءِ جون دزکپتگ، جون پولیس ءَ چِست کتگ ءُ ھسپتال ءَ برتگ کہ اود ءَ آئی ءِ پجار نہ بیتگ –

ھمے وڑ ءَ ھرنائی ءِ دمگ شاھرگ ءَ مسیھی ادیرہ جاہ ءِ نزیک ءَ اللہ بکش ء پیارا ھان جھمنند بولان مٹھری ءِ جون دزکپتگ –

جون چِست کنگ ءُ ھسپتال ءَ برگ بیتگ کہ اود ءَ ڈاکٹرانی گوشگ اِنت اے مرد دل پَٹ بیتگ ءُ بیران بیتگ –

ھمے وڑ ءَ مستونگ ءَ بی اے پی ءِ رھشون ءُ کیڈٹ کالج مستونگ ءِ ملازن میر دریا ھان لھڑی ناشناسیں مردمانی تیرگواری ءَ بیران بیتگ –

وئیل ءِ سوب زانگ نہ بیتگ ءُ دمگی مردمانی گوشگ اِنت کک دریا ھان لھڑی ءِ سر ءَ ھما وھد ءَ تیرگواری کنگ بیتگ کہ آ کالج ءَ دراتکگ ءُ دیم پہ وتی لوگ ءَ روگ ءَ بیتگ –

نبشتانک: زالبولانی میان اُستمانی روچ

نبشتہ کار: رفیق بلوچ

دی بلوچستان پوسٹ

ھمُک سال ھشت مارچ ءَ مَراگش (پروگرام ) دارگ بیت ، ھشت مارچ بزان کہ زالبولانی واست ءَ دارگ بیت اِنت ، اے روچ ءَ زالبول وتی ھکانی گپ ءَ کن اَنت ،اگاں ما ایشی ءِ پُشدر ءَ بچار ایں ۔ اے دود چہ کُجا ءُ کدی رواج گپتگ؟ 1908 ءَ نیویارک ءِ شھر ءَ زالبولانی یک مُچی ءِ بوتگ اَت ءُ یک روانکے ھم کَشگ بوت ،کساس 15000 ھزار زالبول ءَ بھر زرتگ ات ، اود ءَ اے روانک ھمے واست ءَ کشگ بوت کہ زالبول بے کساس کار گِرگ بوتگ اِت اَنت،بیست ءُ چاریں کلاکانی تہ ءَ گیشتریں وھد ءَ بزگیں زالبول کار ءَ ات اَنت ۔

ھشت مارچ یک جوانیں (اسپشیل)روچے پہ زالاں زانگ ءُ پجّارگ بیت آیاں مزدور تھریک ( Labour Movement ) بندات کُرت،آیانی گُشگ ھمیش اَت کہ مئے کار کنگ ءِ وھد کم کنگ بہ بنت ءُ مئے مُز گیشتر بہ بیت ءُ مارا ووٹ ءِ دیگ ءِ ھک ھم بہ بیت ،گُڑا امریکہ ءَ شوشلیسٹ پارٹی ءَ ھشت مارچ پہ زالبولانی واست ءَ میان اُستمانی روچ(Women’s International Day)1909 ایر کنگ بوت ءُ 1910 ءَ ھمے روچ ءَ یک کانپرینس ءِ بوت ، اود ءَ سد جنین ءَ بھر زورت  اے زالبول 17 ملک ءِ زالبول ات اَنت آ رازیگ بوت اَنت ءُ گوش ات اش کہ مئے لوٹ ھمیش اِنت کہ مارا ھک دیگ بہ بیت اِنت،ھمینچو ھک مردیناں را دیگ بوگ ءَ اِنت ھمینچو جنین آدماں ءَ دیگ بہ بیت گُڑا ھمے ھاتر ءَ 1911 ءَ ھمے روچ برجم دارگ بوت آسٹریلیا ، جرمنی ، ڈینمارک ءُ سوزرلینڈ ءَ دیمتر ءَ 1996 ءَ یونائیٹڈ نیشن ءَ اے رواج گپت وتی ڈیھے تہ ءَ ھمے روچ زالبولانی کارمرز کُرت ۔

1975 ءَ اولی رند ءَ ھشت مارچ یونائیٹڈ نیشن ءِ توک ءَ زالبولانی میان اُستمانی روچ دارگ بوت ءُ 1977 ءَ اے روچ  ھمُک سال زالبولانی میان اُستمانی روچ برجم دارگ بوت،گُڑا ھمے روچ ءَ ایندگہ زالبولاں ءَ ھمے سوج ءُ پنت دیگ بوت کہ یک انچیں وھدے بوتگ کہ جنین سک بزگ ءُ لاچار کنگ بوتگ اَنت۔ 

اے روچ ءَ ھمے درس دیگ بیت کہ زالبول میان اُستمانی روچ ءَ سے رنگیں پٹی زالبول دست ءَ کن اَنت ءُ وتی سر ءَ ھمے پٹی ءَ بند اَنت ۔ اے رنگ چو اے وڑ ءَ اَنت(جامی،سبز،اسپیت) جامی رنگ ھمے زاھر کنت”انساپ ءُ ازت ” ، سبزیں رنگ اے زاھر کنت”  اُمید ” اسپتین رنگ “برابری” پیش دار ایت کہ جنین چہ مردیناں کمتر نہ اَنت ھر ھسب ءُ کسب ءَ چَے وانگ ءِ پڑ بہ بیت ھمینچو ھک کہ بچکیں زاھگ ءَ را ھست گڑا المّ ءَ جنکیں چک ءَ را ھمے وڑ ءَ بہ رس ایت کُجام پڑ ءِ گپ ءَ بکناں ھرجاگہ ءَ ھر وڑ ءَ مردینے ھک ءُ جنینے ھم سَنگ بہ اَنت بچک ءَ را سور ءُ سانگ ءِ جُست ءَ گر اَنت جنک ءَ را المّ ءَ جُست گرگ بہ بیت ،آ وتی زندگی ءَ یک مردے ءِ گوما وتی رنگ ءَ گوازین ایت ءُ کربان کنت بلے ما انگت بچار ایں اے چیز ھست مئے راجانی توک ءَ کہ زالبولانی  لوگ ءِ توک ءَ تانکہ ھک ءُ مُز دیگ یکیں وڑ ءَ نہ اَنت ، ھمینکس کہ مرد کار کنت جنین ھم کنت بلے جنین ءَ را آ تاکت دست ءَ نیست %25 درسد زالبول ءَ را گوں تاکت بازیں ملک ءَ انگت جنینان ءَ بنُکی ھک دیگ بوگ ءَ نہ انت، کہ چُک پیداک بہ کن اَنت یا کہ مہ کن اَنت۔ اے ھک کہ نیست اِنت ھچ ھک اِش نیست کہ آ وتی لاپ ءِ چُک ءَ زوال بہ کنت بلکیں آ بزگ ءَ را آ ھاٹیگ نیست وت بیمار اِنت دگرے چّمدار اِنت بلے انگت ھمے زالمیں مرد گُش اِیت منی چُک ترا پیداک کنگی اِنت‏World is News(Wion)) رپورٹ ءِ شنگ کُت کہ یک سالے ءِ تہ 23000 جنین چُک ءِ سر ءَ مرگ ءِ ارجان بیت ءُ بوگ ءَ اِنت پد ءَ اے Wion ءِ گُشگ ھمیش اِنت ھمُک ساھت شش  زالبول کُشگ بیت مردانی دست ءَ دنیا ءِ تہ ءَ یک روچے کساس 137 جنین کُشگ بیت دنیا ءِ تہ ءَ بوت کنت مرد ءِ دست ءَ یا بوت کنت وتی پت ءُ براتانی دست ءَ World Economic  Forum گُشگ اِنت کہ %45 درسد زالبول  اپریکہ، ایشیا ءِ تہ ءَ Sexeual ءُ Physical تشدد ءِ آماچ اَنت-

32 درسد امریکہ ءَ ، 38 درسد ساؤت ایشیا ءَ لاٹن امریکہ ، 31 درسد سب ساھاران اپریکہ (Sub-Saharan Africa) 31% درسد ویسٹرن یورپ (West Europe) 27 درسد کاریبّئن(Caribbean) ءَ اد ءَ کُجام مُلک گوں نہ اِنت کہ اے وڑیں کار نہ بوگ ءَ اِنت ۔ اگاں وانگجاھاں وانگ ءِ لیاز ءَ بیچار ءِ جنکین چُک پرائمری اسکول ءَ % 66 درسد دنیا ءِ مُلکانی تہ ءَ اے ھک ھست ۔ یا کہ سیکنڈری ایجوکیشن (secendary education) بس %25 درسد جنک وانگجاہ ءَ ھست اِنت ایندگہ %75 جنکیں چُک ءَ را انگت وانگجاہ نہ دیستگ بزان کہ وانگ ءَ نہ اَنت ۔

1920 ءَ امریکہ ءَ زالبولاں ووٹ ءِ دیگ ءِ ھک داتگ بلے ما انوگیں دور ءَ بہ چار ایں مئے چاگرد ءِ تہ ءَ زالبول چونیں اڑ ءُ جنجالاں گوں مان گیش اتگ اَنت ، اے ھشت مارچ ھمے وڑ ءَ برجم دارگ بیت پہ جنینانی پنت ءُ نسیتے کہ سرجمیں دنیا ءِ تہ دارگ ءُ اے روچ زانگ بیت
ھشت مارچ زالبولانی میان اُستمانی روچ زالبولاناں مُراد بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: بلوچ زالبول ءِ ارزشت

نبشتہ کار:اندلیب گچکی

دی بلوچستان پوسٹ

دنیا ءِ تہ ءَ مدام زوراور ءُ نزور ءِ نیام ءَ کش ءُ چیل بوتگ ، ءُ اے کش ءُ چیل انگت برجاہ اِنت جتا جتائیں دروشم ءَ ، ءُ ھمے کش ءُ چیلانی سوَب ءَ انساناں پہ وت سیاسی ءُ چاگردی گَل جوڑ کتگ اَنت داں کہ آیانی ھک پھازگ بہ بنت ءُ کسے آیانی ھک جنی ءَ کُت مہ کنت ءُ اگاں کنت ھم گڑا آ اشی ءِ سزا ءَ بہ گند ایت ، پہ وتی لھتیں ھکانی پھازگ ءِ ھاتر ءَ انسان وتی لھتیں ابرمی آزاتیاں چہ دست کش بوتگ، بَلے زور ءُ نزوری ءِ میانجی ءَ کش ءُ چیل برجاہ، پہ ادارھانی جوڑ بوگ ءَ پد ھم ھلاس نہ بوتگ ، بلکیں پد ءَ سنپ ءِ (صنف) ءِ ھساب ءَ کہ مردین جسمانی سورت ءَ زوراتر بوتگ اچ زالبول ءَ گڑا آئی ءَ دراھیں آسراتی پہ وت ءَ زرتگ، پہ زالبول ءَ بزگی ءُ گلامی اشتگ ، ھژدھمی کرنءَ چہ بگش کہ دنیا ءِ تہ ءَ زالبولاں وتی ھکانی پچ گرگ ءُ مردین آدمانی برابری ءَ آیگ ءِ جھد بنا کت ، نیوزی لینڈ اولی استان بیت کہ آ زالبولاں سیاست ءِ تہ ءَ آیگ ءِ بزاں اوٹ دیگ ءِ ھک ءَ دنت ، اشی ءَ پد برتانیا ءِ تہ ءَ زالبول وتی ھکانی پھازگ ءِ ھاتر ءَ چست بنت بلکیں آ اے درگت ءَ بازیں سکی ءُ بزگی ءِ آماچ ھم بنت ، ما گند ایں کہ ارب وت ءَ دگنیا ءِ تہ ءَ درستاں گیش تھزیب یاپتہ گُش اَنت بَلے اسلام ءَ چہ پیش آیانی کر ءَ زالبول ناں ایوک ءَ شرم ءُ لج ءِ گپ بوتگ بلکیں آیانی تہ ءَ گیشتر ءَ زالبول کسان اُمری ءَ زندگ ءَ کشتگ ءُ کل کتگ اَنت ، ھندوانی کر ءَ زالبول ءَ وت ءَ جتائیں بستار نہ بوتگ ءُ انگت ھم اے چیز ھست باز جاگھاں ، زالبول ءِ وھدے کہ مرد مرتگ گڑا آ زالبول ءِ درور یک زندگیں مردگے ءِ بوتگ ، مرد ءِ مرگ ءَ گوں اچ آئی ءَ دراھیں وشی پچ گرگ بوتگ اَنت ، ءُ انگت ھم گیشتر راجانی تہ ءَ جھیز یک انچیں نالتے کہ اچ اشی ءِ سوب ءَ یک لوگے ءَ زالبول ءِ ودی بوگ یک کیامتے ءَ کم نہ اِنت ، گپ بلوچ زالبول ءِ وھدے ارزشت ءُ شرپ ءِ کیت گڑا ما پہ پھر گشت کنیں کہ دگنیا ءِ تہ ءَ تکریباً اولی راج بلوچ اِنت کہ آئی ءِ تہ ءَ زالبولاں پہ وت ھک پچ نہ گپتگ – چی ءَ کہ پچ گرگ ئِے الّمی نہ بوتگ ، لوٹ ھما چیز ءِ کنگ بیت کہ آ چیز دزرسءَ مہ بیت ، آ چیز ءِ لوٹ کنگ نہ بیت کہ آ دست ءَ بہ بیت ، ( بَلے اے ھم راستے کہ سدی سد ھک بلوچ زالبول ءَ ھم نہ رس اِتگ بَلے اے دگہ راجانی ھساب ءَ بلوچ زالبول باز پیسر ءُ گیشتر ھکانی واھند بوتگ ) بلوچ راج ءِ تہ ءَ راستے کہ مردین آدم لوگ ءِ مستر ءُ کماش بوتگ ءُ انگت ھم کماش اَنت ، بزاں چہ پدرسری اے رھبند بلوچ راج ءِ تہ ءَ ھم ھست ، بَلے اے پدرسری رھبند یک ترندیں رھبندے نہ اِنت بلکیں زالبول ءِ رزا ءُ منشا ءَ اچ مردین ءَ مستر ءُ کماش کتگ ھاں اے گپ ھم نہ اِنت کہ سدی سد بلوچ زالبول آزات بوتگ اَنت بلکیں بلوچ جنین چک ھم لہتیں جاھاں آزاتی دیگ نہ بوتگ اَنت ، مستریں درور آئی ءِ سانگ ئیگ اِنت کہ جنین چک ءَ وتی سور ءِ کہ زند ءِ مستریں پیسلہ اِنت اشی ءِ مستری آئی ءَ نہ بوتگ ءُ انگت ھم باز جاھاں نیست اے وڑیں دودانی تہ ءَ بدلی آرگ ءُ جھد پکار اِنت ، گپور شاد وتی بلوچی وانگی کتاب شھدیں بلوچی تاکدیم 73 ءَ یک شیرے ءِ نبشتہ کنت ءُ اے شیر ءِ پژدر ءَ ما گشت کنیں اگاں مئے دودانی بھرے بوتیں گڑا سازین ءَ پہ چاکر ءِ ھاتر ءَ ھانی دگہ چون گشت کہ جنک تو منی سوجاناں بگر شری ءِ سر ءَ بل مرید ءَ تو بگر میریں چاکر ءَ راج ءِ سردار ءُ چل ھزار پوج ءِ کنگر اَت اچ اشی ءَ ھم اے زانگ بیت کہ سجھیں بلوچ جنک اچ اے ھک ءَ زبھر نہ بوتگ اَنت ۔

یک پگرے کہ بلوچ زالبول ءِ کار پیسر ءَ پس چارینی ءُ چک ءِ رودینگ بوتگ ، مرچی ءُ باندا بلوچ زالبول وانندہ اِنت ، بَلے مرچی ھم دُرست وانندہ نہ اَنت ءُ آ وھد ءَ کہ بلوچ زالبول وانندہ نہ بوتگ آ وھداں وانگی آسراتی ھم نہ بوتگ ، اسکول ، کالج ، یونیورسٹی آ وھداں بلوچ ءَ کجا بوتگ ؟ اے وَ راستے کہ بلوچانی مستریں کار ءُ روزگار دلوت ءِ دارگ بوتگ ، چی ءَ کہ آ وھداں کٹّ ءُ کمائی ھمے بوتگ ، ءُ ھرکسءَ کہ گیش ءَ گیش دلوت بوتگ آ مالدار زانگ بوتگ ، ءُ چک ءِ رودینگ ناں ایوک ءَ آ وھد ءَ یک بلوچ زالبولے ءِ کار بوتگ بلکیں انوں ھم بلوچ زالبول وتی چکاں رودین ایت ءُ یک بلوچ ماتے وتی چکانی رودینگ ءَ چِہ وشتریں ءُ شرتریں وشی دگہ ھچ وشی ءِ تہ ءَ نہ مار ایت ، لیلو مئے لبزانک ءِ یک بھرے ، اے بلوچ زالبول وتی چکاں واپینگ ءُ تاھیر بکشگ ءِ ھاتر ءَ گُش اَنت اِش ، بلوچ زالبول ءَ مدام پیش داشتگ کہ ھر تھر ءِ تہ ءَ دیمروی کتگ بلوچ راج ءِ تہ ءَ اِزت، شرپ ، ھکانی ھچ وڑیں تپاوتے مردین بوگ ءُ جنین بوگ ءِ واستا نیست ، دگہ گپے اے ودی بوتگ کہ بلوچ وتی زالبولاں چیر دے اَنت پردگ ءِ تہ ءَ کن اَنت ، چوناھا بلوچ زالبول ءِ پوشاک ءِ وڑ ءُ پیم انچیں وڑے ءَ اِنت کہ آ وت یک پردگے ءُ اشی ءِ سر ءَ دگہ پردگے الّمی بیگ نہ اِنت ، بلے انچوش کہ کسے بلوچ پوشاک ءَ بہ بیت ، ھمل کلمتی وتی زالبولانی ستا ءَ اے وڑ ءَ کنت من ءَ وتی کاڑ ھُمار چمیں دوست بنت پشک ءُ شلوار ءُ سریگ ءُ سرچادر اَنت اے انو کسے اگاں نکاب ءَ بیت اے ملاازم یا بگش اسلام ءِ سوب ءَ ، نانکہ بلوچ دودانی سوب ءَ ، اگاں بلوچ ءَ وتی زالبول چیر داتیں گڑا داد شاہ گوں سپاہ ءَ وتی گھار ءَ چوں گوں وت جنگ ءَ برت؟ ءُ زالبول کہ سد نکاب ءِ تہ ءَ بوتیں گڑا مست توکلی آشک نہ بوتگ اَت وتی دوستار ءِ ھُسن ءِ بندیگ نہ بوتگ اَت ، اے نہ انت کہ من یک بلوچے آں یا کسے بلوچے گڑا آ زالبول ءَ ھچ وڑیں جنجال پر نیست ، بَلے اے جنجال بلوچ بوگ ءِ سوَب ءَ نہ اَنت نہ کہ اے جنجال منی دود ءُ رسمانی سوَب ءَ اَنت ، انو اگاں یک مردینے یک زالبولے ءَ بد ءُ رد کنت یا آئی ءِ راہ ءَ اڑاند پیداک کنت گڑا چے آ اے بگش ایت کہ بلوچ راج منی گوما اے وڑ کنگ ءَ اِنت ؟ انا بلکیں آ زانت کہ راج ناں ایوک ءَ یک پردے یا چندے مردم ، پناہ بلوچ ءُ مھمد اپزل بلوچ زالبول ءِ ارزشت ءِ سر ءَ وتی ریسرچ پیپر ءِ تہ ءَ اے وڑیں بازیں شیرزالانی ناماں دیم ءَ کار اَنت کہ آیاں سیاست لبزانک بلکیں زند ءِ ھمک پڑ ءَ وتی کرد پیلو کتگ ، اگاں بلوچ ءَ زالبول اچ وت کمتر بزانتیں گڑا ھان آپ کلات ءَ بازیں جنگے ءَ پروش ورگ ءَ پد وتی گھار ءَ کمان ءَ نہ دنت ، بلوچ زالبول ءِ کار بس پس چارینی بوتگ گڑا بی بی مریم کے بوتگ ؟ بی بی روزاتون حاکم مکران ملک دینار گچکی ءِ لوگ بانک ءِ کار چے بوتگ ؟ آ بازیں ٹکانی جنگانی سروکی ءَ کنت ءُ وتی لوگ واجہ ءِ ھمکوپگی ءَ کنت ، بی بو کے بوتگ ؟ بی بی بانو کے بوتگ ؟ چاگولی کے بوتگ ءُ اشانی کار چے بوتگ ؟ میر چاکر ء آزم ءِ گھار بی بی بانڑی ءِ کرد ءَ سرپدئے ؟ آ بلوچانی نیمگ ءَ دھلی ءِ جنگ ءِ سربراھی ءَ کنت ءُ سوبین بیت ، من گشاں مئے کار ایوک ءَ پس چارینی نہ بوتگ ، ءُ ھاں راستے کہ یک راجے ءِ سجھیں مردم سیاستکار یا لبزانکار وَ نہ بنت ، انسانی سوچ ءُ پگر ءُ تربیت انچوش کہ انوں کاردار ایت آ وھد ءَ ھم ھمے وڑ ءَ کار ئِے داشتگ ، ادب بیت کہ سیاست بلوچ زالبول ھچبر ءُ ھچ وڑ ءَ پشت ءَ نہ بوتگ-

بانل دشتیاری ، رابیہ ھُزداری ، سیمک ، ھانی ، دگہ بازیں نامے اے کَے بوتگ اَنت ؟ءُ ادب ءِ تہ ءَ آ جاگہ ءُ ارزشتے کہ اشاں پہ وت ایر کتگ وتی بود ءِ سوب ءَ ، ءُ یکے ءَ جست کتگ اَت کہ وھدے تو گْوش ئے مالی جاور ءِ نہ گیگی ءِ سوب ءَ پرچا پت وتی بچکیں چک ءَ دیم ءَ بارت پہ وانینگ ءِ ھاتر ءَ جنک ءَ نہ بارت ، گڑا اے گپ ءِ پسو ءَ ھم من گشاں کہ اے انوگیں جاورانی پیداک کتگین اَنت اے چیز ءِ سوب ھم بلوچ زالبول بوگ نہ اِنت ، اگاں یک جاگھے مالی جیڑہ مہ بیت ھم الاکائی سوچ ، جاورال بازیں چیزے ھست کہ بازیں مردمے اچ اے جیڑھانی سوَب ءَ وتی جنکاں نہ وانین اَنت ، بلے گپ پد ءَ ھما کیت کہ اشانی اے جیڑہ اے اڑ بلوچ زالبول بوگ ءِ سوب ءَ نہ اِنت ، ءُ پد ءَ یک چیزے گیشنگی اِنت کہ بلوچ راج ءِ تہ ءَ ھم لھتیں انچیں کھول ھست راستے کہ آ وتی زالبولانی وانینگ ءَ ایبے زان اَنت ، بَلے اے ھم جاورانی سوَب ءَ وتی جند ءِ سوچ ءُ پگر ءِ سوب ءَ بلوچ بوگ ءِ سوب ءَ اناں ، ءُ اگاں یک کھولے ءَ یا لھتیں کھولاں اے پہ وت دود جوڑ کتگ اَنت گڑا اشانی تہ ءَ ھم بدلی آرگ پکار اِنت ، ءُ من نہ گشاں کہ من ءَ اگاں وتی ھک رس اِتگ اَنت گڑا پہ اے وڑیں زالبولاں کہ مرچی ءُ باندا آیاں وتی ھک رسگ ءَ نہ اَنت کس کار مکنت ، کار کنگی اِنت ، بَلے گپ ایش اِنت کہ اے جیڑہ راجی جیڑہ جوڑ کنگی نہ اَنت ، ھر کس ھر وڑ ءَ گھتر زانت کہ من کار کت کناں آ کار بکنت ، بَلے اے نہ اِنت کہ وت ءَ برز بہ لیک ایت ءُ وتی راجدپتر ءَ ایر بہ جنت-

جست ودی بیت کہ پیمینزم مئے راج ءِ تہ ءَ چے ھد ءَ داں ھست ؟ گڑا منی پسو ایش اِنت کہ پیمنزم ھما وھد ءَ یک چاگردے ءَ ودی بیت وھدے آ چاگرد ءِ تہ ءَ زالبول ءِ واستا دگہ رھبند ءُ پہ مردینے ءَ دگہ رھبند بہ بیت بزاں کہ مردم ءَ دراھیں ھک دیگ بہ بنت ءُ جنین آدم چہ ھکاں زبھر بہ بیت گڑا آ چاگرد ءِ تہ ءَ زالبول مردین ءِ برابری ءَ اوشتگ ءِ ھاتر ءَ پیمنزم ءِ لیکہ ءَ گوں دیم ءَ کیت ، ءُ یک چاگردے ءَ اگاں جنیناں وتی ھک مہ رس اَنت یا آ اچ مردیناں کم ھک دیگ بہ بنت گڑا اود ءَ پیمنزم الم چست بیت ءُ ھاں مئے بلوچانی تہ ءَ ھم اے نہ اِنت کہ سرجم ءُ ھر جاگہ ءَ ھر زالبولے ءَ وتی سرجمیں ھک رس اِتگ اَنت –

من یک برے پد ءَ گشاں کہ لھتیں تبکہ ھست کہ زالبول اِش دُراھیں ھک نہ داتگ اَنت ، بِلے گپ پد ءَ ھما بیت کہ اے اشانی وتی سوچ یا جاورانی سوب ءَ ، یا بگندئے لھتیں جاگھاں مئے دود ھم ھمے وڑ بوتگ اَنت کہ اود ءَ مردین اچ جنین ءَ گیش ارزشت دار بوتگ ءُ یک گپے دگہ یاد کنگی اِنت کہ ھر وھد ءَ دور دیم ءَ روان بنت چاگرد ءِ تہ ءَ بدلی آیان بیت ءُ اے بدلیانی واستا المی اِنت کہ ھر ھما دود اگاں تئی راجی دیمروی یا جندءِ دیمروی ءِ دیم ءَ اڑند بوت آ یلہ دیگی اِنت بچار وھدے وانگی مزنیں ادارھانی تہ ءَ اگاں زالبول ءِ بلیک میلنگ ءِ وڑیں اسکینڈل دیم ءَ کیت گڑا اگاں یک پتے یا براتے اے جاوراں چہ ترس ایت ءُ زالبول ءَ نیل ایت گڑا اے نیلگ بلوچ بوگ ءِ سوب بوت کہ جاور بوت اَنت ؟گُڈی ءَ من ھمے گشاں کہ بلوچ ءِ دودانی تہ ءَ زالبولانی واستا ایدگہ راجانی دودانی نسبت ءَ گیشتر ازت ، ھک ءُ شرپ ھست ۔

زالبول ءِ مستریں شرپ ءِ درور کجام بہ بیت ؟ یک بلوچ سردارے بزاں نواب اکبر ھان بگٹی یک زالبولے ءَ انساپ دیگ ءِ ھاتر ءَ ریاست ءِ گوما جنگ ءِ جار ءَ جنت ءُ وتی جان ءَ داں کہ ندر کنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سنج تمپ ءَ آل شاھین کورجو ءِ دیم ءَ پنچ گول ءَ باج برتگ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی اولی راؤنڈ ءِ دھمی گوازی کنگ بوتگ –

مروچگیں گوازی ءَ سنج تمپ ءُ آل شاھین کورجو ءِ میان ءَ بوتگ ، دؤئیں ٹیمانی لیبیاں گوں جوانی ءَ لیب داشتگ – سنج تمپ ءَ پنچ گول داتگ ءُ باج برتگ- آل شاھین کورجو ءِ ٹیم پروش داتگ-
گومازی ٹورنمنٹ ءِ اے اولی بر اِنت کہ زیرو ءِ سرا سنچ تمپ ءِ لیبیاں پنچ گول داتگ ءُ آل شاھین کورجو پروش داتگ –

ٹورنمنٹ ءِ مھمان ھاس مُلا منصور ءُ ماسٹر عظیم بلوچ ءَ دؤئیں ٹیمانی لیبی دلبڈی داتگ ءُ آھانی ستاشانی کتگ-

آؤکیں گوازی گومازی ءَ سینگار ملانٹ ءُ کلات مند گیاب ءِ میان ءَ اسکول گراؤنڈ ءِ پٹ ءَ بیت انت-

میان اُستمانی زالبولانی روچ ءِ درگت ءَ بلوچ وومن فورم ءُ نیشنل ڈیموکریٹگ پاٹی ءِ نیمگ ءَ شال ءِ پریس کلب ءَ دیوان برجم دارگ بیتگ –

دیوان ءَ جتا جتائیں پکراں بندوکیں مردماں بھر زرتگ ءُ ھمے درچ ءَ پروفیسر ڈاکٹر منظور بلوچ، عادل بلوچ، بانک بانڑی بلوچ، پی ٹی ایم ءِ زبیر شاہ، ضیاء بلوچ، بلوچ وومن فورم ءِ زین گل بلوچ ءُ این ڈی پی ءِ سائمہ بلوچ ءَ تران کرتگ –

دیوان ءَ کریمہ بلوچ ءَ ستاشانی پیش کنگ بیتگ ءُ آئی ءِ راجداری جھد ءَ را بلوچ زالبولانی واستا یک رھشونی ءِ لیک اِتگ –

تران کنوکاں گوشت کہ بلوچ راجی راجداری ءَ شھید بانک کریمہ ءِ کردار یک سنچداریں تکے دار ایت – مروچی بلوچ زال دراھیں مڈیانی پرچکار بیگ ءَ ابید ھم ٹوھیں مشکل ءُ جنجالانی دیمپان اَنت، گیس ءِ بوگ ءَ ابید بلوچ زالبول دارانی گون ءَ وتی آسروکی ءَ کن اَنت – لاپری ءُ چِلگی ءَ بلوچ زالبول مرگ ءِ دیمپان بیگ ءَ اَنت – سنگرتگیں آپ ءُ دگہ اژدریانی واستا بلوچ زالبول در پہ در اَنت –

تران کنوکاں گوشت: دومی نیمگ ءَ بلوچ زالبول وتی جگرانی ٹکرانی شوھاز ءَ اسلام آباد ءِ دگانی سر ءَ بدیتگیں شپاں وپسگ ءَ لاچار بیتگ اَنت اے درستیں جیڑہ بلوچ زالبولانی بھت ءَ نہ کپتگ اَنت بلکیں پہ زانت اسلام آباد دیگ اِنت – بلوچستان ءِ شھدربرجاہ ءَ ھنچش کہ اسکینڈل ءِ وڑیناں بے تواری ءَ گار کنگ اِنت کہ چریشی ءَ بلوچ زالبولانی ننگ ءُ شرم ءِ سر ءَ بے کساس اسر کپتگ اے ھما کارپد کنوک اَنت کہ آ نہ لوٹ اَنت بلوچ راج ءِ جنکیں زھگ مہ وان اَنت مروچی اے سردار بلوچ راج ءَ سرجم ءَ رد کرتگ اَنت چُشکہ کشمیر ءِ واستا پھر ءُ شانے ءَ روانک کش اَنت بلے وتی بلوچ زالبولانی ھکانی واستا گُنگ اَنت کہ ایشی ءِ راستیں چھرگ بلوچستان یونیورسٹی ءِ اسکینڈل اِنت –

تران کنوکاں راجداریں پاٹیانی سر ءَ ایراد گپتگ ءُ گوشتگ کہ پارلیمنٹ ءَ نشتگیں راجپرست پاٹی پرچا بلوچ زالبولانی واستا کار نہ کن اَنت آیاں وتی واستا کنگ ءَ باز ھست بلے بلوچ راج ءِ جنکانی واستا ھچ نیست، اے پاٹیاں بلوچ زالبول یک کُنڈے ءَ داشتگ اَنت اشاں پرچا پاٹیانی تہ ءَ بھر مندی ءَ بروبری ءَ چارگ نہ بنت مروچی بلوچ جنک راجداری ءِ پِڑ ءَ آیگ لوٹ اَنت بلے آیانی واستا جاہ نیست اِنت –

آیاں گوشت کہ ما اے جاوراں گوشت کن ایں کہ بلوچ راج ءِ دیمروئی کنت اگاں مارا دیم ءَ روگی اِنت گڑا بلوچ زالبولاں وتی کوپگ ءَ بہ بندیں مارا ھزاراں بانک کریمہ جوڑ کنگی اِنت گڑا داں ھما ھد ءَ گڑا رژنائیں بلوچستانے ءِ واستا چیزے کرت کن ایں –

تندوری ءَ پاکستانی پوج ءِ گاڑی تراک ناکیں شوروانی نشانگ جوڑ کُتگ،اُرش ءَ پوجی کارمنداں ھوار لٹ ءُ پُل کنوکیں کمپنی ءِ ھپت کارندہ مُرتگ پنچ ٹپی بوتگ اَنت – جئیند بلوچ

سربوتگیں ھالانی رد ءَ ناشناسیں مردماں پنچ مارچ ءَ سبی ءِ دمگ ببر کچ تندوری ءَ پاکستانی پوج تراک ناکیں شوروانی نشانگ جوڑ کُتگ – شوروانی تراک ءَ پاکستانی پوج ءَ جانی ءُ مالی تاوان رس اتگ –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ مروچی رسانکدراں وتی شنگ کرتگیں درشان ءِ تہ ءَ اے بمب تراک ءِ زمّہ واری منّ اِتگ ءُ گوشتگ کہ مئے سرمچاراں پنچ مارچ ءَ آدینگ ءِ روچ ءَ سبی ءِ دمگ ببر کچ تندوری ءَ زورگیریں پاکستانی پوج ءِ یک گاڑی تراک ناکیں شورہ (آئی ای ڈی) نشانگ جوڑ کُتگ – تراک ءَ دشمنیں پوج ءِ کارمنداں ھوار لٹ ءُ پُل کنوکیں کمپنی ءِ ھپت کارمند ھما دمان ءَ مُرتگ ءُ پنچ کارمند ٹپی بوتگ اَنت –

جارکش ءَ دیمتر ءَ وتی درشان ءِ تہ ءَ گوشتگ کہ دژمنیں پوج بلوچ سرڈگار ءِ سر ءَ زورگری ءَ برجاہ دارگ ءُ بلوچ مال ءُ مڈیانی لٹ ءُ پُل ءِ تہ ءَ گیشی آرتگ، ھمے زورگری ءِ برجاہ دارگ ءِ ھاتر ءَ یک نیمگے بلوچستان ءِ تہ ءَ لشکر کشیانی تہ ءَ گیشی آرگ انت ءُ دومی نیمگ ءَ بازیں دری کمپنی ءُ پوج ءِ جھلی ادارہ ایف ڈبلیو او ءِ کمک ءَ لٹ ءُ پُلی پروجیکٹسانی سر ءَ کار کنگ ءُ بلوچ مال ءُ مڈیانی لٹ ءِ پُل ءِ تہ ءَ گیشی ارگ بوگ ءَ انت –

جارکش جئیند بلوچ ءَ گوشتگ کہ بی ایل اے ءَ اے گپ پیسرا گیشینتگ کہ بلوچستان یک جنگ زدگیں دمگے، بلوچ ءِ مال ءُ مڈیانی پیسلہ ءَ بلوچ راج کنت پمے ھاتر ءَ ھچ وڑیں لٹ ءُ پُل کمپنی یا مزور ءِ دروشم ءَ ایف ڈبلیو او ءِ پوجی کارمند، اگاں بلوچانی مڈیانی لٹ ءُ پُل ءَ زورگیر ھمراہ دار بنت وتی بیمناکیں تاوان ءِ زمہ وار وت انت –

گڈسر ءَ بی ایل اے ءِ جارکش ءَ گوشتگ بلوچ سرڈگار ءِ آجوئی ءَ تاں اے وڑیں لٹ ءُ پُل پراجیکٹسانی بگیری ءَ مئے اُرش برجاہ مان انت –

ساکران ءَ زورگپتیں ریاست ءِ سیمنٹ فیکٹری گاڑیانی سر ءَ اُرش کتگ ءُ جانی ءُ مالی تاوان داتگ – میجر گْوھرام بلوچ

سربوتگیں ھالانی رِد ءَ سَے مارچ ءَ بلوچستان ءِ کاروباری شھر ھب ءِ دمگ ساکران ءَ ناشناسیں سلاہ بندیں مردماں سیمنٹ فیکٹری ءِ گاڑیانی کاروان ءِ سر ءَ اُرش کُتگ، اُرش ءِ آسر ءَ جانی ءُ مالی تاوان بوتگ –

دومی نیمگ ءَ مروچی بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ گوشتگ کہ مئے سرمچاراں سَے مارچ ءِ شپ ءِ ادار نہ ءُ نیم ءَ ھب ءِ دمگ ساکران ءَ زورگیریں ریاست ءِ سیمنٹ فیکٹری ءِ سَء گاڑیانی کاروان ءِ سر ءَ وتکاریں سلاھانی گون ءَ اُرش کتگ- اُرش ءِ آسر ءَ دو گاڑی تُرندیں اُرش ءِ زد ءَ اتکگ اَنت ءُ چریشی ءَ چہ آھاں جانی ءُ مالی تاوان رس اتگ –

گڈسر ءَ جارکش میجر گوھرام بلوچ ءَ وتی درشان ءِ تہ ءَ گوشتگ کہ زورگیریں پاکستانی پوج ءُ آئی ءِ کُمکار ءُ سامراجی شوربندیانی بگیری ءَ مئے اُرش بلوچستان ءِ آجوئی ءَ تاں برجاہ مان انت –

نبشتانک: من ھسیبہ آں

نبشتہ کار: برزکوھی

رجانکار: مھروان کمبر

دی بلوچستان پوسٹ

من ھما سرزمین ءِ زھگ آں کہ اُود ءِ گْوات ءِ کوپگانی سر ءَ ایریں پُلّانی وشبو وھدے زمین زادگے ءِ دیم ءَ گْوزیت، گُڑا پہ شرپ ( اَدب ) وتی سر ءَ جھل کنت۔ من ھما راج ءِ زھگ آں کہ اُود ءَ سداں سالاں چہ برجائیں جنگانی میان ءَ زالبولے بئیت، گُڑا آ وتی جنگ ءَ دار اَنت ءُ ھون چَکیں زھم ءُ سگاراں پد ءَ وتی میان ءَ کن اَنت۔ من ھما سبزیں گْواشانی زھگاں کہ اُود ءِ آھوگ وتی تِراس ، گُرک وتی کسملیکی ءَ گوں سرڈگار ءِ پُسّگانی گِندگ ءَ پلگار اِیت۔ من “مَست” ءِ شائری ءُ “چاکر” ءِ “بانڑی آں”۔ من ھما وتن ءِ زھگے آں، کہ پہ آئی ءِ آجوئی، شرپ ءُ ننگ ءَ”اسلم” کُربان بہ اَنت ءُ ورنا “ریھان”۔ من ھمے سرزمین ءِ زھگ آں، من بلوچستان آں، من ھسیبہ آں۔
بلے تو تھنا ھما زمین زادگانی ھند پہ زُورانسری پچ نہ گپتگ اَنت ، بلکیں ھما لوگ ءُ گِدان مِنندیں گْوھار دگ ءُ چارراھانی سر ءَ آؤرتگ اَنت۔ منی زمین ءِ زھگانی ھما بچکند کہ آھاں ھتم ءَ چہ پیسر پُل سْراپینتگ اَنت، تو آ پچ گپتگ ءُ آھانی چمّانی شھکَور ءَ ارسانی انچیں ھارے ملینتگ اگاں تو اُورتی ءَ بہ چارے گُڑا آ ارس تئی “ڈی چوک” ءَ چو ششمی ءِ کَور ءَ تتکگ اَنت۔ چہ منی زمین زادگانی گُٹّ ءَ دراتکگیں ھما ھالوانی توار ءَ کہ منی وتن ءِ مستریں کوہ جکس اِتگ اَنت، نی ھالوانی جاہ ءَ بس آہ ءُ پریاتاں در کاینت۔
انچیں چاگردے کہ اُود ءِ پِت، برات بزیں ساھگ ءِ درچک ءُ گْوھار ءُ جنک زھگ آپ بنت ءُ یکے دومی ءَ زندگ کن اَنت۔تو مئے ساھگیں درچک چہ ما گْوتک ءُ بُرت ، نی ما وتی ساھگانی شوھاز ءَ سربتگ ءُ وت ساھگ جوڑ بوتگ اِیں کہ ھمک روچ تئی مْیان ءَ گْوز اِیں ۔ زار جن اِیں، توار کن اِیں ، بلے کس اِش نہ کنت ءُ نہ گِند ایت۔ من ھمے وتن زادگیں ، ھمے سارتیں ساھگاں چہ یک ھسیبہ ئِے آں۔
من ھسیبہ آں، بلوچستان ءِ زھگ آں، من ھر بلوچ ءِ زھگ آں، من ھما گُلزمین ءِ زھگ آں کہ آ زمین ءِ زیبائی، آئی ءِ ارزِشت، آئی ءِ زِر، تیاب ءُ مڈّی، آئی ءِ ھاک ءِ وپاداری ءَ چہ من منی تنگوھیں برات اچ من پَچ گپت ءُ زُوراک ءِ دست ءَ گار ءُ بیگواہ کُت۔ تھنا منی برات نا! بلکیں منی وڑیں ھزارانی برات ءُ کماش پہ زُورانسری پچ گپت ءُ گار ءُ بیگواہ کُت اَنت۔ نہ زان آں باریں آ کُجام وڑیں جاورانی تہ ءَ گْوزگ ءَ اَنت؟ اگاں زندگاں! گُڑا کُجام داب ءَ زندگ اَنت؟ کُجا اَنت؟ اگاں آ شھید کنگ بیتگ اَنت تا آھانی ادیرہ کُجا اَنت؟ جنازہ کَے ءَ داتگ اَنت؟ کُجا ءُ کَے ءَ پاتیا داتگ اَنت؟
اگاں مانش نیست، جنازہ نیست، کپن نیست ،گُڑا زُوراکاں، وھد ءِ فرعوناں، من ءُ منی ڈولیں ھزاراں مات، گْوھار، چُکّاں اے بِہ گْوش اِت، مئے چمّانی نور ءُ زِرد ءِ کرارانی پش کپتگیں ھڈّ، گُدانی ٹُکّر، بوٹ ءُ چمپل کُجا کپتگ اَنت؟ کُجام جنگلاں، مچکدگاں، ریگزاراں، پٹّ ءُ میداناں، کُجام تُوتک ءُ مُرگاپاں کَلّ اَنت کہ ما اُود ءَ برو اِیں گوں وتی دستاں ھاکاں دُور بہ کن اِیں ءُ وتی چمّانی نور ءُ زرد ءِ کرارانی ھڈّاں، گُداں ءُ چمپلانی ٹُکراں چِست بہ کن اِیں ءُ بہ چُکیں ءُ وتی چمّانی سر ءَ بہ دار اِیں۔
اِنچو تو بہ گْوش، پرچا نہ گْوش ئے؟ مارا تئی دیمروئی نہ لوٹ اَنت، نیکہ تئی وانگجاہ، مزن شھدربرجاہ، روزگار، دگ، گیس، بجلی لوٹ اَنت۔ گْوش اَنت جنگ ءِ تہ ءَ رھم نیست ءُ ھر چیز جائز اِنت پمیشکا ترا چہ گیشیں اُوست ءُ اُمیت نہ داشتگ، بس گوں تو یک ارزئے کن آں کہ اگاں تو مئے چمّانی نور جتگ اَنت، گُڑا وتی لنکُک ءَ چِست کن ءُ ھما گُمنامیں کبرانی نیمگ ءَ اِشارہ بہ کن کہ اُود ءَ تو مئے دل ءِ دِریکگ ءُ زرد ءِ کرار واپینتگ اَنت، دانکہ من ھما ھاک ءِ وشبوھاں چہ وتی ارواہ ءَ بہ مالاں، ھما ھاک ءَ چہ وتی چمّاں سُرمگ بہ کن آں، ھما ھاک ءَ چہ کمے بزیراں ءُ وتی گُٹ ءِ تائیت ( تائید ) بہ کن آں ، پد ءَ مئے بدن، ارواہ ءُ واب آزات بہ بَہ اَنت۔ آ تائیت ( تائید ) ءَ مئے آیوکیں پدریچ تا ھما وھد ءَ وتی گٹُ ءَ بہ بند اِیت تا بے نامیں کبرانی سر ءَ شکاں گوں آجوئی ءَ جت بہ کنت۔
گْوشدار! ما ھما وتن ءِ زھگ اِیں، کہ آئی ءِ کُنٹگ مئے پاداں پہ ادب نہ سُمب اَنت ، آئی سنگ ءُ ڈوک مارا گِند اَنت نرم بَہ اَنت، اگاں روچ سر ءَ چِست بہ کنت مارا بہ گِند اِیت گُڑا وتی چمّاں جھل کنت، ما اگاں شپاں در بیا اِیں ماھِکانی مئے دگ ءُ کشکاں رُژناہ کنت۔ ابید چہ لوٹگ ءَ آئی ءِ درچک براں ریچنت، پرچا کہ مئے ءُ زمین ءِ آشنائی ءِ سپر ھزاراں سالاں چہ گیش اِنت کہ برجاہ اِنت۔ بلے ھما اِنت کہ تو مئے زمین ءِ سر ءَ اتکگے، منی وتن ءِ زھگ ءُ زالبُول سالاں چہ کِشک ءُ چارراہ ءُ پریس کلبانی دیم ءَ وتی زندگی ءِ شوھاز ءَ دراتکگ اَنت۔ ما تئی بُنجائی شھر ءَ ھم اتکگ اِیں، ھما شھر ءَ کہ کُرشی (کُرسی ) ءِ شوھاز ءَ مردُماں جم کن اَنت ءُ واہ ءُ زار کن اَنت۔ ما ارس ءُ درد یکجا کُتگ اَنت ءُ وتی زندگیانی شوھاز ءَ اتکگ اِیں، یک پسّویے ءِ شوھاز ءَ اتکگ اِیں۔
زندگی، وتیگانی شوھاز ءَ،بس ھمے بِہ گْوش کہ ھما برات ءَ وھدے من ءَ اولی رَند ءَ وتی دلبند ءَ داشتگ ءُ من آئی ءِ دل ءِ توار اِش کُرتگ،باریں ھما توار انگت آئی دلبند ءِ تہ ءَ پشت کپتگ؟ آ وھدے بےتواری ءَ وانگ ءَ بیتگ ءُ من آئی کِرّ ءَ نشتگ ءُ آئی دم ءِ توار مار اِتگ،باریں آ دم ءِ توار ھما وڑ ءَ انگت برجاہ اِنت؟ھما کہ شپ ءَ لوگ ءَ اتکگ، پہ بچکند چار اِتگ ئے، من زان آں تو آئی ءِ دنتان پروشتگ اَنت۔ باریں انگت رولہ ءِ ساھتاں آئی ءِ لُنٹانی سر ءَ بچکندے تالان بیت؟ من زان آں تو آئی ءِ سر ءِ کاشیں مُود گْوتکگ اَنت، باریں انگت آئی ءِ گِردیں دیم ءِ ریش ھما وڑ ءَ جلوہ دے اَنت؟ آ من زان آں تو باز گریوائینتگ، باریں آ تھنائی ءِ ساھت ءَ مارا یات کنت ءُ کند اِیت؟ من ماہ ءُ سالانی ھزاباں ترا بکشاں، بس زندگی ءِ یک نشانی ءِ بِہ دے۔۔۔
اگاں تو زندگی ءِ نشانی ءَ دات نہ کنے ، گُڑا مرگ ءِ گوائی ءَ بِی دے کہ من وتی ارس، درد ءُ براتانی اکساں وتی گُشان ءِ لمب ءَ گْرنچ بِہ دے آں ءُ شال ءَ ھما جاہ ءَ کڈّے بہ جناں ءُ کَل بہ کن آں کہ ھمود ءَ تو منی برات آوار جتگ ءُ گار ءُ بیگواہ کُتگ اَنت۔ اگاں تو مرگ ءِ گوائی ءَ دے، گُڑا اے ھم بہ گْوش کہ ساھکندن ءِ ساھت ءَ آ کَے ءَ یات کنگ ءَ اَت؟ آئی ءِ لُنٹانی سر ءَ گُڈّی نام کئی اَت؟ وھدے تو آ لٹّ ءُ کُٹ کُتگ اَت، نیم بے ھوشی ءِ جاوراں آ پہ کُمکّ ءَ کئی نام ءَ توار جَنَگ ءَ اَت؟
اگاں اِنچو ھم کُت نہ کن ئے، نہ زندگی ءِ ڈسّ ءَ دات کن ئے، نہ مَرگ ءِ نِشانی ءَ، گُڑا گُڈّی اِھسان ءَ بہ کن۔ مئے ھزاراں ورنا ءُ کماش تو آوار جتگ ءُ بُرتگ اَنت، دُرستانی نام ءَ نبشتہ بہ کن، ورد بہ کن ءُ یات بہ کن ھچبر بیھال مہ کن، پرچا کہ آھانی نام ءَ نہ من شموشت کن آں، نہ اے زمین ءِ پُلّ ءُ گْواڑگ، نہ درچک ءُ دار، نہ کوہ ءُ تیاب، نہ گُرگ ءُ آھُو، نہ سِنگ ءُ ڈُوک نہ “مست” ءُ “بانڑی” نہ روچ، ماہ، استال، سنج ، کلکشان ءُ نیکہ اے وتن ءِ ” اسلم” ءُ ” ریھان”۔ زمین زادگاں اے زمین ءِ ھزاراں سالانی مھر دیستگ اَنت ءُ تو کھراں گِندئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔