TBP Balochi

نبشتانک: راجدوستی ءُ راجدْراھی

نبشتہ کار: پاتما بلوچ ءُ آئیشہ بلوچ

گُڈی بھر

دی بلوچستان پوسٹ

ھمے داب ءَ اگاں ما 197-71 ءَ پاکستان ءِ ھلاپ ءَ بنگالی راجی آجوئی ءِ جُنز ءَ وان ایں گُڑا ما بازیں چیزاں زان ایں کہ نیکراھیں مُلا ھم دلار، کاسگ چٹّ ءُ راجدْروہ بنت۔ وھدیکہ پاکستان ءَ مار اِت کہ پاکستان ءِ لشکر چہ بنگالی راجی آجوئی لوٹوکیں سِلاھبندیں گل “مُکتی بانی” ءِ دست ءَ پْروش ورگ ءَ انت گُڑا بنگالی راجی جُنز ءِ ھلاپ ءَ پاکستانی لشکر ءِ سروگاناں دمگی بنگالی وت ماں وت مِڑائینتگ ءُ کُشائینتگ اَنت بزاں “رزکار”، “البدر” ءُ “الشمش” وڑیں کاسگ چٹّ ءُ راجدْروھیں گل چہ جمائت اسلامی ءُ دگہ نیکراھیں مُلکاری گلاں (سیاسی پاٹیاں) جوڑینتگ اَنت ءُ ھمے گل ءِ باسک ءُ کارمنداں پہ پاکستان ءِ کُمکّ ءَ بنگالی راجی جُھدکار ءُ لس مھلوک کُشت ءُ آیانی گس ماندات اَنت۔ بنگالی راجی آجوئی جُنز ءِ ھلاپ ءَ بلاھیں جْدْروھانی لَڑ اِے وڑ ءَ اِنت انچوشکہ رزاکار: اِے سِلاھبندھیں گل ءِ سروگان دمگی نیکراھیں مُلا ابول مھمد یوسپ، نورلامین، گُلام آزات ءُ ھواجہ ھیر اُدین اِت اَنت کہ آیانی سروگانی ھزار ءَ چہ گیش دگہ راجدْروھیں کارمند ھست اِت اَنت کہ پہ پاکستانی لشکر ءِ کُمک ءَ بنگلہ دیش ءِ آجوئی ءِ ھلاپ ءَ روجدوستیں نودربر، رھدربر،کواس ءُ راجی جُھدکارانی کُشگ ءُ آیانی گسانی ماندارگ ءَ ھمے گل ءِ باسک گون ات اَنت۔ اِے گل ءِ سَرپان پاکستانی میجر جنرل مھمد جمشید اَت ءُ “اپریش سرچلائیٹ” ءِ وڑیں بدیں ھون ریچی ءَ ھم اے گل ءِ دزمانگیجی ھست اَت۔ اِے گل ڈھاکہ ءُ دگہ بازیں شھراں پہ پاکستانی لشکر ءَ کار ءَ اَت۔

البدر: ھمے رنگ ءَ بنگالی راجی آجوئی ءِ ھلاپ ءَ اِے راجدْروھیں گل ءِ سروگان مُتیرالرھمان نزامی، چوھدری موھین اُدین ءُ اَلی اھسان مجاھد اِت انت کہ رزاکار گل ءِ ڈول ءَ بنگالی لس مھلوک ءِ سر ءَ زُلم ءُ کھر ءَ کنگ ءَ اِت اَنت الشمش: اے راجدْروھیں گل ءِ سروگان پیزالکادر چوھدری ءُ ھمیشی ءِ زھگ سالہ اُدین کادر چوھدری، وھاد اَلم ءُ سیپ اُدین کادر چوھدری وڑیں راجدْروھاں سرجمیں چِٹانگاگ شھر ءِ کِر ءُ کشاں راجدوستیں بنگالی کُشتگ انت۔

بلے وھدیکہ 18 دسمبر 1971 ءَ پاکستان ءِ لشکر ءَ ماں جنگ ءَ پْروش وارت ءُ ھندوستان ءِ لشکر ءِ دیم ءَ السی سرجھلی یے کُت گُڑا راجدوستیں بنگالی لس مھلوک ءَ ھمے سرکاری کاسگ چٹّ ءُ راجدْروھانی گس وت انگر کتگ ءُ ھزارانی کچ ءَ راجدْروہ گوں مُِچی ئیں اُرشاں کُشت ءُ آیانی لوگ سُتکگ اَنت۔ بازینے ءَ تتک ءُ وت چیر داتگ بلے پد ءَ آجوئیں بنگالی سرکار پولیس ءَ دزگیر کُت ءُ سرکاری آمیدگِساں آیاں چہ آیانی کتگیں گُناہ ءُ رَدی ءِ برابر ءِ مرگ ءِ سزا داتگ اَنت۔۔۔۔ آجوئی ءَ رند تاں سی سال ءَ آجوئی بنگلہ دیش ءَ پہ وتی راجی جُھدکاراں مُز ءُ انساپ ءِ ھاتر ءَ راجدْروھانی ھلاپ ءَ گْواہ ءُ دگہ سبوت یکجاہ کُتگ اَنت اِے راجدْروہ پاھو دیگ بہ بنت ءُ بنگلہ دیش ءِ سرکار ءَ یک یکی ءِ سرجمیں راجی کاسگ چٹّ ءُ راجدْروھاں بلاھیں سزا ءُ ڈند داتگ۔ چوناھیگا پہ نوک آجوئیں بیتگیں ڈیھاں ھژدری اِنت کہ وتی راجی راجدْروھاں پھل مہ کن اَنت کہ چریشی ءَ راجدوستیں جُھدکار وت بے مُزّ پھم اَنت، راج دیمروی نہ کنت بلکیں پد ءَ راج ءِ تہ ءَ راجدْروھی البار بہ بیت۔

نی بیا اِت کمیں بہ جیڑ ایں کہ بلوچ راجی آجوئی ءِ جُنز ءِ تہ ءَ چون رنگین ءُ چُنت تبک ءِ راجدْروہ اَنت۔ بِہ گِند ئے بنگلہ دیش ءَ پہ وتی راجدوستیں جُھدکارانی بیرانی گِرگ ءُ راجدْروھانی ہاھو دیگ ءَ سی سال لگ اِت کہ ھما وھد ءَ بُتگیر ءُ چاگِرد رسانکدر ءِ وڑیں آسراتی نیست اَنت بلے مرچی ماں بلوچ راجی جُنز ءَ کاسگ چٹّانی تامُربند، تواربند ءُ اَکس البار اَنت کہ چون گوں دژمن ءَ ھوار نشتگ ءُ بلوچ راج ءِ کُشگ ءَ ھوار اَنت گوں! زاناں مئے وتواجہ ءُ آجوئیں بلوچستان ءِ راجمستری ئیں سرکار ءُ آمیدگِساں چُنت سال لگ ایت کہ بلوچ راجی آجوئی جُنز ءِ راجدْروہ پاھو دیگ بہ بیت کہ بلوچ راجی شھید ءُ آیانی کھولاں انساپ ءُ مُز بہ رس ایت۔

بلوچستان آجو بات ءُ کاسگ چٹّ ءُ راجدْروہ مرگ بات انت۔
ھلاس اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

سر بیتگیں ھالانی رد ءَ بلوچستان ءِ تیابدپی شھر گوادر ڈور گٹی ءَ گوستگیں شپ ءَ پاکستانی پوج ءُ چیریں ادارھاں یک لوگے ءِ سر ءَ بیڑ برتگ ءُ اود ءَ دو کس آوار جتگ ءُ برتگ اَنت –

آوار جنگ بیتگیں مردمانی اکبر ء سید ءُ چراگ ء مراد بکش ءِ ناماں بیتگ اَنت چراگ نودربرے –

دمگی مردماں ٹی بی پی ءَ گپ کنان ءَ گوشتگ گوستگیں شپ ءَ پوج ءُ چیریں ادارھاں ڈور گٹی ءَ بیڑ برتگ ءُ اود ءَ چراگ ءُ آئی ءِ مھمان اکبر آوار جتگ ءُ برتگ اَنت ءُ اشانی ھمراھی ءَ پوج ءَ پرپٹ ھم برتگ اَنت گوں –

زانگ بہ بیت بلوچستان ءِ دمگ ڈھاڈر ءَ سَے کس آوار جتگ ءُ برتگ اَنت –

ھمے رنگ ءَ گوستگیں دو روچاں پیسر بلوچ نودربر نوید قدیر ھم چیریں ادارھاں آوار جتگ ءُ برتگ –

بلوچ مھلوک ءِ آوار جنیانی ھلاپ ءَ چاگردی رسانکجاھاں بلوچ چاگردی رسانک کارمرد کنوک ءُ سیاسی مردمانی نیمگ ءَ زھر ءِ درشان بیگ ءَ اِنت –

ونس اسٹار گومازی ءَ کلات تمپ ءِ دیم ءَ چار گول ءَ باج برتگ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی دومی راؤنڈ ءِ اولی گوازی کنگ بوتگ –

مروچگیں گوازی ءَ ونس اسٹار گومازی ءُ کلات تمپ ءِ میان ءَ بوتگ ، دؤئیں ٹیمانی لیبیاں گوں جوانی ءَ لیب داشتگ – کلات تمپ ءَ یک گولے داتگ ، وھدیکہ ونس اسٹار گومازی ءَ چار گول داتگ ءُ باج برتگ- کلات تمپ ءِ ٹیم پروش داتگ-

ٹورنمنٹ ءِ مھمان ھاس ماسٹر حکیم بلوچ اتکگ ءُ دؤئیں ٹیمانی لیبی دلبڈی داتگ ءُ ٹورنمنٹ ءِ ستاشانی کُرتگ –

آؤکیں گوازی گومازی ءَ سنج تمپ ءُ وپا کُنشکلات ءِ میان ءَ اسکول گراؤنڈ ءِ پٹ ءَ بیت انت-

بلوچستان ءَ یک رندے پد ءَ بیگواھیانی تہ ءَ گیشی گندگ آیگ ءَ اِنت – ھالانی تہ ءَ گوشگ بیتگ سَے کس دگہ بیگواہ

بیگواہ بیتگیں مردمانی سیادی کچھی ءِ دمگ ڈھاڈر ءَ اِنت –

دمگی مردماں ٹی بی پی ءَ گوں گوشتگ کہ جان بیگ رند ءُ سلطان رند دو روچ ءَ پیسر ڈھاڈر ءَ اسپیت پوشاکاں ھواریں کارندھاں دزگیر کرتگ ءُ پھمیانگیں جاھے ءَ برتگ اَنت – ھمے وڑ ڈھاڈر ءِ جھمنند غلام مصطفیٰ پنچ مارچ ءَ شال ءَ دزگیر کنگ ءَ پد بیگواہ کنگ بیتگ –

اے مردمانی کھولانی گوشگ اِنت مئے کار کسب مزدوری ءَ اِنت مئے مردم یلہ کنگ بہ بنت –

ھمے وڑ ءَ گوستگیں دو روچ ءَ پیسر شال ءَ آوار جنگ بیتگیں تربت ءِ جھمنند ءُ یونیورسٹی آف انجیئرنگ اینڈ ٹیکنالوجی لاھور مائننگ ڈیپارنمنٹ ءِ ھشتمی سمسٹر ءِ نودربر نوید بلوچ ءِ بیگواھی ءِ ھلاپ ءَ ٹوئٹر ءَ کمپئن بیتگ –

ٹوئٹر ءَ جتا جتائیں چاگردی مردماں نوید بلوچ ءِ یل کنگ لوٹ کرتگ ءُ آئی ءِ بیگواھی ایر جتگ –

ٹوئٹر کمپئن رلیز نوید قدیر بلوچ کونسل لاھور ءِ نیمگ ءَ بندات کنگ بیتگ ءُ ٹوئٹر ءَ بازیں کچے ءَ مھلوک ءَ بھر زرتگ –

بلوچ سیاسی پاٹیانی نیمگ ءَ نوید بلوچ ءِ بیگواھی ایرجنگ بیتگ ءُ آئی ءِ یل کنگ ءِ لوٹ سرکار ءَ کنگ بیتگ –

ھمے وڑ ءَ بیست ءُ نُھ نومبر دوھزار ءَ نوزدہ ءَ گوادر ءِ دمگ اورماڑہ ءَ زورانسری آوار جنگ بیتگجں نور داد بلوچ ء عرض مھمد یل بیتگ ءُ وتی لوگ ءَ سر بیتگ –

ھمے وڑ ءَ چاگردی رسانکجاھاں گوشگ بیتگ کہ گوادر ءَ سَے سال ءَ پیسر آوار جنگ بیتگیں شاہ نواز ءِ یل کنگ ءِ لوٹ آئی ءِ کھول ءَ کرتگ -.

ھالانی تہ ءَ گوشگ بیتگ کہ بیست ءُ یک فروری دوھزار ءُ ھبدہ ءَ گوادر ءَ آوار جنگ بیتگیں شاہ نواز ء جلال ھان جھمنند دشت شولی ءِ یل کنگ ءِ لوٹ آئی ءِ کھول ءَ کرتگ –

بلوچستان ءَ بیگواھیانی ھال ترندی ءَ برجاہ اَنت ءُ ھمک روچ پاکستانی پوج ءُ چیریں ادارھانی دست ءَ مردمانی آوار جنیانی ھال پیداک اَنت –

زانگ بہ بیت گوستگیں چار روچاں بلوچستان ءِ بازیں جاہ نوشکی، شال، سبی، کچھی ءُ تربت ءَ نُھ کسانی بیگواھی ءِ ھال اتکگ اَنت –

وائس فار بلوچ مسنگ پرسنز ءِ ماما قدیر بلوچ ءَ وتی درشان ءِ تہ ءَ گوشتگ کہ بلوچستان ءَ سرکاری پالیسی ھما رنگ ءَ اَنت- زانگولیں جونانی دزکپگ ءُ بے وارس گوشگ ءُ مردماں ھُشک کنگ ءُ دیم پہ دیمی ءِ نام ءَ کُشگ چگل دیگ برجاہ اَنت –

بلوچستان ءِ بنجاھی شھر شال ءَ پریس کلب دیم ءِ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ چل ءُ شش روچ سرجم بوتگ -کامریڈ اسرار بلوچ، محمد امین ایڈوکیٹ ءُ دگہ مردماں بنجل ءِ تر ءُ تاب کرتگ بیگواھیں مردمانی کھول گون ءَ دلپدردی درشان اِتگ –

وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچستان ءِ درگت ءَ ھکومت ءِ پالیسی پیشی وڑ ءَ انت – گوستگیں روچاں لھتے مردم یل کنگ بوتگ بلے سَے روچانی تہ ءَ شش مردم زورانسری آوار جنگ ءُ بیگواہ کنگ بوتگ انت – زورانسری آوار جنگ بوتگیں مردمانی تہ ءَ سَے ورنایانی سیادی نوشکی، دو سبی ءُ یکے تربت ءِ نندوک انت –

ماما قدیر بلوچ ءِ گوشگ اَت ششیں مردمانی تہ ءَ نودربر نوید ھم ھوار انت، نوید بلوچ پوزیشن ھولڈر ءُ یونیورسٹی آف انجینئیرنگ اینڈ ٹیکنالوجی لاھور ءَ مائننگ ڈیپارٹمنٹ ھشتمی سمسٹر ءِ نودربرے، کہ آئی ءِ سیادی بلوچستان ءِ دمگ تربت شھرک انت، نوید بلوچ ءَ وانگ سرجم کُتگ گڈی سال ءِ نودربرے ءُ فائینل ایئر پروجیکٹ ھاتر ءَ پنچ روچ پیش شال ءَ اتکگ بوتگ کہ نُھ جنوری دوھزار بیست ءُ یک ءَ آوار جنگ ءُ بیگواہ کنگ بوتگ –

وھدیکہ سبی ءِ دمگ بادرا ءَ چہ زرین خان مرگیانی ء عزیزو پوجی پانگس ءَ ھازری دیگ ءِ ھاتر ءَ لوٹارینگ بوتگ ءُ آوار جنی ءَ پد بیگواہ کنگ بوتگ ءُ سبی ءِ دمگ اللہ باد دگ ءَ ایاز بنگلزئی وتی جندے لوگ ءِ دیم ءَ آوار جنگ ءُ بیگواہ کنگ بوتگ –

ماما قدیر بلوچ ءِ گوشگ ات کہ بلوچستان ءِ تہ ءَ بیدے جار جتگیں مار شل لا جنگ بوتگ کہ اود ءَ ناکہ نودربر وتی پروجیکٹانی ھاتر ءَ سُر ءُ پُر کرت کن انت ناکہ آروساں روگ بوگے ھاتر ءَ وتی میتگاں شُت کن انت – ھمے وڑ ءَ مھلوک ءَ پوجی پانگس آں ھم ھازری دیگی انت کہ یک ایردستیں دمگے ءِ پدرائی ءَ کنت –

آئی ءَ گوشتگ کہ ژانگولیں جونانی دور دیگ ءُ بے وارس گوشگ ءَ پد نوں مردماں دوروگیں میڑ ء نام ءَ ھم کُشگ ءَ انت بلے انگت دمگی ءُ میان اُستمانی انسانی ھکانی گل ھاموش انت –

خارانءَ تیرگواری کرتگ ءُ یک سرکاری چاریگے کُشتگ، زامران ءَ پوج ءِ پانگس ءِ سر ءَ اُرش کتگ – میجر گوھرام بلوچ

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشانی ءَ گوشتگ کہ مئے سرمچاراں دَہ مارچ دوھزار ءُ بیست ءُ یک ءَ خاران ءَ لیویز کارگس ءِ نزیک ءَ ڈیتھ اسکواڈ ءِ کارمند حیدر سیاہ پاد تیرباران کتگ ءُ کشتگ –

میجر گوھرام بلوچ ءَ گوشتگ کہ حیدر سیاہ پاد ڈیتھ اسکواڈے باسکے بیتگ ءُ آ خاران، پنجگور ءُ دالبندین ءَ پوج ءِ ھمراھداری ءَ بیتگ ءُ آجوئی لوٹوکیں مردمانی آوار جنگ ءُ کوشاں دزمانجن بیتگ –

گوھرام بلوچ ءَ گوشتگ کہ حیدر سیاہ پاد ءِ آ دگہ ھمراہ ھم مئے نشانگ ءِ تہ ءَ اَنت – راج ءِ بگیری کنگ ءَ یلہ بہ کن اَنت آگاں آ ھم حیدر ءِ پیم ءَ نشانگ کنگ بنت –

ھمے وڑ ءَ میجر گوھرام ءَ دگہ یک اُرشے ءِ زمہ واری ھم منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشانی ءَ گوشتگ کہ مروچی نیمروچ ءَ کیچ ءِ دمگ زامران دشتگ کوتان ءَ پوجی پانگس ءِ سر ءَ دور جنگیں توپک ءِ گون ءَ اُرش کرتگ ءُ یک پوجی کارمندے کُشتگ –

جارکش ءَ گوشتگ کہ اے دمگ ءَ نندوکیں مردم پوجی زوراکیانی سوب ءَ آیاں وتی بنکی ھنکین ءُ جاہ یلہ کتگ ءُ شتگ اَنت ءُ مردم ھسابی کتگ ءُ دمگ ءَ یل کنگ ءُ درپہ دری زند ءِ گوازینگ ءَ تکانسر اَنت –

میجر گوھرام بلوچ ءَ گوشتگ کہ شھری دمگانی مردم سرکاری چاریگ ءُ پوج ءَ گستہ بہ بنت کجام ھم وھد ءَ سرمچار آیانی سر ءَ اُرش کت کن اَنت –

سر بیتگیں ھالانی رد ءَ گوستگیں شپ ءَ دزاپ ءَ دگ ءِ وئیلے ءَ دو زالبولاں ھوار سَے مردم بیران، شش زدگ بیتگ اَنت –

اھوالکار ءِ رد ءَ وئیل خاش ءُ دُزاپ ءِ میان ءَ بیتگ ءُ اود ءَ دو گاڑیاں ٹکر وارتگ ءُ چریشی ءَ دو زالبولاں ھوار سَے کس بیران بیتگ اَنت ءُ شش زدگ بیتگ اَنت –

بیران بیتگیں مردمانی پجار ءِ بیزاد شمبے زئی ء ھسین جھمنند پسکو سراوان ءُ آئی ءِ لوگ بانک ءُ لوگ بانک ءِ مات ھوار اَنت –

زدگ بیتگیں مردم شش کس بیتگ اَنت اود ءَ پھزداراں ھال ءِ سر بیگ ءَ چار لاش کشیں گاڑی سر بیتگ ءُ اود ءَ زدگ بیتگین ءُ بیران مردم چِست کتگ ءَ خاش ءَ کمونی نادراہ جاہ ءَ سر کرتگ اَنت –

آزمانک: مَرگ آسان اِنت بس پیسلہ کنگ لوٹ اِیت

آزمانکار: بی،کے بلوچ

دی بلوچستان پوسٹ

آئی ءَ یک کسانیں سُھریں رنگے کتابے دست ءَ اَت لَرزینگ ءَ اَت ءُ نادْرھجاہ (اِسپتال) ءَ پُترت  من اَجب ھیران اَتاں مرچی شال ءِ موسم سَرد ھم نہ اَت ، نے کہ ھَور ھست اَت نے کہ گْوات کشگ ءَ اَت بَلے آ ،اَنگت ءَ اَنچوش لَرزینگ ءَ اَت منی جان ءَ ھم گوھر ءَ سَر ءَ زرت اَپریل ءِ ماہ اَت موسم سَک دِلکش اَت آزمان ھم مرچی ساپ اَت روچ تْرند ،تْرند ءَ وتی منزل ءَ رَوَگ ءَ اَت۔ 

آ تچک ءَ منی کش ءِ  کرسی ءِ سَر ءَ اتک ءُ نشت من ءَ اَنچوش سَما بَیَگ ءَ اَت آ سَک ءَ جیڑگ ءَ اِنت من ھیران اَت ءُ آئی ءَ چارگ ءَ اَت آں منی چمّ  آئی ءِ گُد ءُ پوشاکانی سَر ءَ کپت اَنت آئی ءِ گُد ءَ مزنیں چِلّے پِر اَت  ھردکیں چمّ ءِ تہ ءَ شُتگ ات اَنت  سَر ءِ پُٹ ئِے نہ رستگ اَت اَنت پَشک ءِ جیگ ءِ یک تُگمہ بَٹَنے ھم سِستگ اَت ئِے آئی ءِ اُمر ءَ چہ من ءَ ھميے سَما بَیَگ ءَ اَت آئی اُمر بیست ءُ ھپت سال  بیت پد ءَ من جیڑ اِت اے منی وڑیں  نوجوانے  گُڑا اِشی ءِ جیڑہ چی بیت کنت اے سَک تکانسر ءُ بے تاھیر اِنت لَرزگ ءَ اِنت ھردکیں چَمّاں چہ سُھریں ھون شانَگ ءَ اَنت ، یکبرے من گْوشت سنگت ءَ جُست کناں تئی جیڑہ چی اِنت پد ءَ من ءَ وت ءَ را  شَر نہ لگ اِت من دِل ءَ جیڑ اِت اے نادْرھجاھے (اِسپتال) ءِ اِد ءَ ھر وڑیں مسلہ ءُ جیڑہ   بیت کن اَنت ، بیت کنت جَنّکے لاپ ئِے پر کُتگ جَنّک ءِ اِبورشن روم ءَ اِنت ، اے بیت کنت دگہ جیڑھے من ءَ چہ کار اِنت اَگاں پسّو مَہ دَنت من یاِنچوں مردمانی تہ ءَ شرمندگ باں ءُ پَشَل باں من پد ءَ ھما وھمیں ، چُرتیں مردم شَرتر اِنت یلہ ئِے دَے ۔

ساھتے ءَ پد آئی ءَ سَما بوت کہ من آئی ءَ را گمواری ءِ گوما چارگ ءَ آں من ءَ اَنچوش سَما بَیَگ ءَ اَت، آ ھساس ءِ کمتری ءَ شُتگ اَت  آئی ءَ وتی راستیں پاد چپیں ،پاد ءِ سَر ءَ کُت داں کہ اے کش ءِ سنگت بزانت کہ من ءَ ھچ نہ اِنت من لَرزینگ ءَ نہ آں ۔
پاد ماں پاد ءِ سَر ءَ کنگ ءَ چہ کتابی نامے گندگ بوت کتاب ءِ سَر ءَ نبشتہ اَت “کمیونسٹ مینی پیسٹو ” پد ءَ آئی ءَ وت ءَ را گون کتاب ءَ دست گٹ ئِے  کُت ، من ھَیران بیت آں اے سنگت ءَ چوشیں جْوانیں کتابے گون اِنت پد ءَ وانگ ءَ اِنت ءِ اِشی ءِ  جیڑہ ءَ گُڑا پکّا جَنّکی جیڑھے نہ بیت
نوکی من گْوشت کہ سنگت ءَ جُست کناں تو کجام جاگہ ءِ مردم ئے بَلے آ پاد اتک ءُ شُت نہ جُستے نہ پُرسے تچک ءَ دِیم ءِ نشتگیں مردک ءِ دست ءِ سگریٹ ئِے پچ گپت گشگ ءَ لگ اِت دِیم ءِ مردک ءَ آئی ءَ را دگہ وڑ ءَ چار اِت ءُ پد ءَ براوئی ءَ زاھے دات ئِے ” کُسنا ” بَلے آئی ءَ ھچ پرواہ نیست اَت من گُڑا پکّا زانت کہ اے بلوچے نہ بیت یہ زیادھیں کتابانی وانگ ءَ آئی ءِ جیڑہ زاہ نہ اِنت۔

بَلے یک چیزے ءَ من ءَ ھَیران ءُ ھبکّہ بیت آں  پرچا کہ بلوچ زاہ ھچ ھساب ءَ برداشت نہ کنت گُڑا  اِشی ءَ پرچی ھچ نہ گوشت بَليے ھیر دنیا اِنت اَلم نہ اِنت درستیں بلوچانی تہ ءَ زاہ برداشت کنگ ءِ زَکَت مَہ بیت
من آ روچی پینٹ شرٹ اَت آں بیت کنت آ روچی آ سرپد بیتگ اَت کہ اے پکّا دگہ راجے آ وتيی گوما گپ ءَ لگ اِت چُش گنوکانی وڑ ءَ رَپَٹگ ءَ اَت۔ آ گُشگ ءَ اَت دْرستیں سنگتانی وام دار آں کی ءَ بہ گوشاں کہ من ٹائیفائیڈ “typhoid” ءِ نادْراہ آں ءُ من تہ ءَ چہ ھلاس آں من ءَ کلدار ھم گون نیست اَگاں ڈاکٹر من ءَ درمان نبشتہ بکنت بہ دنت گُڑا پد ءَ چے کناں۔

ھمے گپ ءُ جیڑگانی تہ ءَ آئی ءَ وتيی کیسّگ ءَ چہ نوکیا یک  سَدْ ءُ ھَشت  Nokia 108 گْوانکوے کش ات پد ءَ رَپَٹگ ءَ لگ ات باریں کمپنی من ءَ وامدار کنت یہ من ءَ وام نہ دنت اَگاں کمپنی ءَ من ءَ وام نہ دات گُڑا اے کش ءِ لونڈو ءِ گْوانکو ءَ پچگراں من ھمے ساھت ءَ سرپد بیت آں کہ آ من ءَ لونڈوے زانگ ءَ اِنت لوگ ءَ برات ءَ پونے جناں من چارگ ءَ ات آں گون آئی ءَ وتيی موبائل ءَ *112# مَلّینگ ءَ ات من زانت سنگت ءِ سم وارد ءِ  کُلو Messege اَتک گل بوت گوشت ئِے شگر اِنے دگہ پنجابی ءِ زاہ ءَ چہ رکّ اِتاں ،آئی ءَ وَ انگت منی جند ءِ زبان ءَ من ءَ زاھے دات اِشی ءَ باریں چونیں زاھے داتگ اَت ” پودیا”
برات ءِ لمبر ئِے ھوار کت من شری ءِ سَر ءَ آئی ءِ گْوانکو ءِ پردہ ءَ چارگ ءَ اَت آں برات ءِ لمبر ءِ سَر ءَ برات ءِ نام ءِ جاگہ ءَ تھنا ” لالا ” نبشتہ اَت برات ءَ پون گپت گپ ءَ لگ اِت گْوانکو ءِ اسپیکر  ” speak·er” ءِ آواز  ساپ ،ساپ ءَ ڈَنّ ءَ پیداک اَت آ گُشگ ءَ اَت منی تب سَک ھراب اِنت من ءَ ٹائیفائیڈ ءِنادْراھی ءَ گورجتگ منی واست ءَ دو ھزار کلدار زر دِیم بہ دے زاناں آئی ءَ زانتگ اَت کہ آئی ءِ برات پہ آئی ءَ دو ھزار دِیم بہ دنت بزاں گنج ءَ کم نہ اِنت۔

برات ءَ پسّو دات تئی دروگ اَنت منی کَرّ ءَ چوشیں مپتیں  زرّ نیست تئی واست ءَ دیم بہ دیاں پون ءَ کٹ کن اِناں، اِناں لالا چوش مَہ کن من ءَ اے نادراھی کُش اِیت آئی ءَ مَزنیں پِری،پِری یے کُت بلے برات ءِ آواز پیداک نہ  اَت من ءَ اَنچوش گمان بَیَگ ءَ اَت برات ءَ پون کٹ کُتگ اَت بَلے آ اَنگت ءَ گپ ءَ اَت” لالا “من زیکیں روچ ءَ وتئی نادراھی ءِ ٹسٹ کُتگ “مھمود” ءِ لیبارٹری ءَ  ویڈیل ءِ ٹیسٹ کُتگ منی ٹائیفائیڈ ءِ ٹیسٹ positive اِنت من ءَ سَکیں ترندیں تپے پِر اِنت من سَک ءَ تکانسر آں من چُنت روچ اِنت کہ الکاپی ءَ وارگ نہ وارتگ ساھتے ءَ پد آئی ءَ سَما بوت کہ برات ءَ پون کٹ کُتگ آ مپت ءَ  گوں وت ءَ اِینچو وھد ءَ گپ ءَ بوتگ ھمے گپ ءَ گوں آئی ءِ دست ءُ پاد لَرزگ ءَ لگ اَت آں برات ءَ پون کٹ کُتگ اَت۔

ھميے دمان ءَ وتسَر ءَ وت ھميے دست ءِ کتاب ءِ تَاکاں لیٹینگ ءَ لگ اِت پورے ھميے کتاب ءِ تہ ءَ پاکستانی دوھزار کلدار شوھاز کنگ ءَ اَت کتاب ءِ پنچمی تاکدیم ءَ نبشتہ اَت  مرگ ھچ گران نہ اِنت بس مرگ ءِ پیسلہ کنگ گران اِنت اَگاں تو یکبرے پسلہ کُت کہ ترا مرگی اِنت پہ تو ھچ راہ نیست آ نوں تئی سر ءَ اِنت تو چونیں مرگ ءَ وت ءَ را کُشگ لوٹ ئے آئی ءِ چَمّانی ارس اَنچوش آئی مزنیں ریشّانی تہ ءَ شتور گران ات آں پورے بْرنج ءَ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: راجدوستی ءُ راجدْراھی

نبشتہ کار: پاتما بلوچ ءُ آئیشہ بلوچ

دی بلوچستان پوسٹ

اولی بھر

وھدے کہ زیردستیں راجاں پہ وتی راجی آجوئی ءُ ڈیھ ءِ وتواجھی ءَ راجی جُنز بندات کتگ انت گُڑا شھنشاہ ءُ زورگیراں پہ ایشانی راجی جُنز ءِ بے سوب ءُ ھلاس کنگ ءِ ھاتر ءَ ماں چاگِرد ءَ مُدام دپچٹ، کاسگ چٹّ دلّار ءُ راجدْروہ ودی کُتگ انت کہ راجدوست مُدام دلپْروش، تکانسر، کُشگ بہ بنت ءُ ایشانی راجی آشوب بے سوب ءُ راج مُجّتی بَکڑ ءِ آماچ بہ بیت۔ پد ءَ زیردستیں راج ءِ پدریچ ءَ ماں وانگجاھاں دْروگیں راجدپتر، زورگیر ءِ دْروگیں وزبت ءُ ستا، زورگیر ءِ وتگڑیں ھستی ءُ کوڑائیں نمیرانانی بابت ءَ دْروگ دانک ماں زورگیر ءِ زُبان وانینگ بیتگ اَنت ءُ انگت ءَ وانینگ بوگ ءَ اَنت۔

زیردستیں راج ءِ جِند ءِ راجی ھستی ءُ نمیرانانی بابت ھچ چیز ءُ دانکے وانینگ نہ بیت اگاں چیزے بیت گُڑا آ ھم دْروگ ءُ وتگڑ بنت کہ راج ئِے گیشتر بَکڑ ءِ آماچ بہ بیت آ راج چہ وتی راجدپتر ءَ بے سما ءُ بے سُدّ بہ بیت۔ چریشی ءَ راج ءِ مھلوک مجگی گُلام بیت ءُ راج وتی راجی دود ءُ پجّاراں(بزاں کہ راجی زُبان ءُ پوشاک ءِ وڑیں دوُداں) بے ھال ءُ شموشان کنت۔

البت مئے بُنگپ راجدْروھانی بابت ءَ انت پمیشکا ما ماں وتی نبشتانک ءِ تہ ءَ دلّار ءُ راجدْرھانی بابت ءَ گپ کن ایں کہ ماں راجی آجوئی جُنزانی تہ ءَ اِے دابیں مردمانی چُنت تبک بنت۔

اولی تبک: دژمن ءِ ھما رَد داتگیں مھلوک ءُ لھتیں ناسرپدیں مردم اَنت کہ آیاں وتی راجی پجّار ءُ راجدپتر ءِ بابت ءَ ھچ سما نیست اِنت اے تبک ءِ مھلوک ءَ راجی آجوئی ءِ سسّا نہ رستگ بلکیں مُدام زورگیر ءِ پوتاری ونتگ ءُ دلگوش کُتگ پمیشکا راج ءِ تہ ءَ اِے تبک مُدام زورگیر ءِ دپچٹّی کنت ءُ مُدام بے مُزّ ءَ پہ دژمن ءِ پلہّ مُرزی ءَ راج ءِ تہ ءَ بے سیتیں پوتاری کنان ءَ راجی جُنزاں تاوان ءُ بے سوب کن اَنت۔ اِے تبک چہ سرکاری روتاک، ھالتاک، گِندگُش ءُ سرکاری وانگجاھ، سرکار ءِ دمگی وارلاڈز (بزاں دمگی میر ءُ نواب کہ آیاں زورگیریں سرکار بھا زُور ایت ءُ آیاں زَر دنت ھمے وڑیں) دُژمن ءِ آسراتیانی آسر ءَ ودی بنت۔ بِہ گِند ئے اے تبک پہ راجی جُنزاں بلاھیں نادْراھی یے ءُ پہ اِے تبک ءِ راست کنگ ءَ آشوبی جُھدکار بلاھیں جُھدے کنگ لوٹ ایت کہ باید اِنت راج ءِ تہ ءَ گلامی ءِ مارشت ودی بہ بنت ءُ راج ءِ تہ ءَ ھمے سرپدی بہ بیت کہ تو وت یک سرجمیں راجے ئے، تئی وتی جُتائیں راجی دوُد ءُ شاھگانیں راجی زُبان، دود ءُ ربیدگ اَنت، ترا وت یک سرڈگارے ھست، نی تو گلامیں راج پہ وتی راجی آجوئی ءُ وتواجھی ءَ پاد بیا۔

دومی تبک: اِے ھما تبک ءِ مردم اَنت کہ پہ راجی جُنز ءِ ھلاپ ءَ سرکار ایشاں زَر دنت، چوناھیگا اِے تبک چہ بُندر ءَ ھرابیں مُردم اَنت انچوشکہ سِلکاریں دمگی رھشُون(کرپٹ لوکل لیڈرز) شَپُکی، دُزّ ءُ ڈُنگ ءِ وڑیں مردم اَنت کہ آیاں مُدام زورگیریں سرکار راجی جُنزانی ھلاپ ءَ کُمکّ کن اَنت کہ ھمے کاسگ چٹّ راجدوستیں مردماں تُرس ءُ بیھار ءِ آماچ بہ کن اَنت، چہ سرکار ءِ دست ءَ ورناھیں جُھدکارانی آوار جنگ ءُ بیگواہ کنگ ءَ دژمن ءِ بلاھیں کُمکّ بنت ءُ دُژمن پہ وتی پائدگ ءِ ھاتر ءَ آیاں دگہ بازیں جاھاں ھم کارمرز کن اَنت انچوشکہ پہ سرکار ءِ ھکّ ءَ روانکے کَشگ، راجی جُنز ءِ ھلاپ پوتاری کنگ، اگاں کسے زورگیر ءِ ھلاپ ءَ ھبرے بہ کنت گُڑا تچک ءَ ھمے ھبر ءَ دُژمن ءِ بُنجاہ سر کنگ ءِ کارمرزی اَنت۔ بزاں شھر ءُ میتگاں شپ داں روچ پہ دُژمن ءِ کاسگ چٹّی ءَ کار کن اَنت۔ ماں راجی جُنزاں اِے تبک ءِ مردم راجدْراھی ءَ شُمار بنت ءُ وھدیکہ گُلامیں راج آزات بنت گُڑا نوکیں آجو بیتگیں راجمان ءُ راجمستری سرکار اے تبک ءِ راجی گُناھکاراں تْرُندیں سزا ءُ ڈنڈ بند اَنت۔

سئمی تبک: اے ھما تبک ءِ مردم اَنت کہ پہ زورگیر ءِ کُمک ءَ دُژمن ءِ سِلاہ زُور اَنت ءُ راجی آجوئی لوٹوکیں گھگرانی ھلاپ ءَ جنگ کن اَنت۔ چوناھیگا دُژمن ءِ لشکر گُلامیں راج ءِ زُبان ءَ وَ سرپد نہ اِنت، زورگیریں دُژمن زیردستیں راج ءِ سرڈگار ءِ کوہ، لد، جنگل، کُوچگ، شھر ءُ میتگاں ھم ناشناس اِنت پمیشکا دُژمن اے تبک ءِ مردماں پہ وتی جنگی اُرش ھوار کنت، راجی آجوئی ءِ سِلاھبندیں گلانی بُنجاھاں سرکنگ ءَ کارمرز کنت ءُ اِے دابیں مردم راج ءِ لس مھلوک ءِ کُشگ ءَ ھم کارمرز بنت۔ اِے دابیں گلانی سروک دمگی میر، نواب، ڈُنگ ءُ نیکراھی مردم ھم بنت۔

اگاں ما شھنشاہ ءُ زورگیرانی ھلاپ ءَ دنیا ءِ ھر راجی جُنزاں بہ وان این ءُ چمشانکے بہ دے ایں گُڑا مارا بازیں راجدْروہ ءِ نام پہ وانگ ءَ رس ایت ءُ ما سرپد بِہ ایں کہ ماں راجی آجوئی ءِ جُزاں راجدْروھی چنکس بلاھیں ناْراھی یے انچوشکہ اگاں ما برتانیہ شھنشاہ ءِ ھلاپ ءَ آزات ھندوستان ءِ راجدوستیں رھشُونانی راجی جُنز ءَ ھورت بہ وان ایں گُڑا ما سرپد بہ ایں کہ شھنشاھیں برتانیہ ءَ کانگریس ءِ ھلاپ ءَ، سرسید اھمد ھان، ھمد اَلی جناہ ءُ لیاکت اَلی ھان وڑیں راجدْروہ دیم ءَ آورتگ اَنت کہ چہ ھمے بدواھیں مردمانی کِرداں ھندوستان دو سَے بھر ءَ پْروشت چریشی ءَ ھندوستان ءِ جھمندیں مسلمان نزور تراتگ اَنت انچوشکہ اِے بابت ءَ کانگریس ءِ رھشُون ھندوستان راج ءِ راجی نمیران واجہ مولانا ابولکام آزات ءَ 1946 ءَ ماں لاھور ءِ روتاک “چٹان” ءَ گوں واجہ شورش کاشمیری ءَ یک گُلگدارے ءَ پیشگْوھی کُتگ اَت۔

اگاں ما 1955 تا 1975 ءَ امریکہ ءِ ویتنام جنگ ءَ وان ایں اود ءَ مارا راجدْروہ واجہ نگودینا ڈئیم، ایشی ءِ برات نگودینا نُو، نگیون وان تائیُون ءُ کاؤ وان وین ءِ وڑیں وتگڑیں رھشُون پہ وانگ ءَ رس اَنت کہ آیاں پہ امریکہ ءِ کُمکّ ءَ بے شُمار ویتنامی راجی سِلاہ بندیں جُھدکار ءُ ویتنام ءِ لس مھلوک کُشتگ اَنت بلے وھدیکہ امریکہ ءَ ماں اِے جنگ ءَ پْروش وارتگ گُڑا اے وڑیں دْراھیں راجدْروہ ءُ کاسگ چٹّ کسے راج ءِ لس مھلوک ءِ دست ءَ کُشگ بیتگ ءُ لھتیں پد ءَ دزگیر ءُ سرکاری رھبندانی رِد ءَ کُشگ ءُ سزا دیگ بیتگ اَنت۔

روان اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

مروچی ھما کہ دیمروئی ءِ گپ ءَ جن انت زاناں دیمروئی چہ لاش ءُ بمباری ءَ بیت، اگاں بمباری دیمروئی انت گڑا بلوچستان ءِ تہ ءَ سک باز دیمروئی بوگ ءَ انت – ماما قدیر بلوچ

بلوچستان ءِ مزن شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ چِل ءُ پنچ روچ سرجم بوتگ – بلوچ نودربر گل ءِ باسکاں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

بیگواھیں نودربر رھشون زاکر مجید بلوچ مات ءُ دگہ کھولاں بنجل اتکگ ءُ وتی زھرشانی نبشتہ کنائینتگ –

زاکر مجید بلوچ ءِ مات ءِ گوشگ ات کہ من نادراھی ءِ ھال ءِ تہ ءَ اَنت وتی زھگ ءَ شوھازگ ءَ آں گوستگیں ماہ ءَ بیگواھیں مردمانی کھول ءِ ھمراھی ءَ ما اسلام آباد ءَ زھر شانی کرتگ کہ اود ءَ ھکومتی باسکاں مارا یکین دئیناتگ بلے انگت ھچ وڑیں گامگیج زورگ بوگ ءَ نہ انت –

آئی ءَ گوشتگ کہ وتی دوستگیں مردمانی یل بوگ ءُ اے ناانساپیانی بگیری ءَ مدامی زھر شانی کنیں –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان اتگ ءُ گوشتگ کہ مروچی ھما کہ دیمروئی ءِ گپ ءَ جن انت زاناں دیمروئی چہ لاش ءُ بمباری ءَ بیت، اگاں بمباری دیمروئی انت گڑا بلوچستان ءِ تہ ءَ سک باز دیمروئی بوگ ءَ انت کہ برات ءُ چکانی لاش ءَ دیگ ءَ دیمروئی دیگ بوگ ءَ انت – میزائل تجربہ بگر بمباری، ٹوپ ءُ گولھانی ھمراھی ءَ دیمروئی دیگ بوگ ءَ انت –

آئی ءَ دیمتر ءَ گوشتگ کہ مروچی انسانیت وتی ھیسیت ءُ پجار ءَ چہ وت جست ءِ جوڑ بوتگ، آکر پرچا کدی مزھب نامے سر ءَ کشت ءُ کوش لھتے جاہ ءَ چاگردی بھر ءُ بانگ لھتے جاہ ءَ وتی ھک لوٹوک زاندانیگ کنگ بنت ءُ آھانی زانگولیں جون دیگ بنت –

ماما قدیر بلوچ ءَ گوشتگ مروچی ایردستیں بلوچستان ءَ بوت کنت کہ کُچگے چہ انسانی ھکانی لگتمالی ءَ رکتگ ءُ نوں سندھ ءُ خیبر پختونخوا ءَ اے کار بندات کنگ بوتگ اَنت –

آئی ءَ گوشتگ کہ زاناں راج ءِ وتی ھکانی لوٹگ ءَ توار چست کنگ جُرمے گڑا پرچا پاکستان ءِ وڑیں ریاست ءِ میان اُستمان ءِ باسک ءُ راجانی پھازگ ءُ ھکانی چارٹر منیت ءُ دزنشان جنت –