TBP Balochi

نبشتانک: زالبول زندگی ءِ بھر اِنت

نبشتہ کار: کیگد شاکر

دی بلوچستان پوسٹ

مُدام کہ زالبول ءِ ھک ءُ ھکوک ءِ گپ جنگ بوت اِنت گُڑا اے سرھال ءِ تہ ءَ باز چِست ءُ ایر ود اَنت کہ زالبُول ءِ حق پہ لوگ ءُ چک ءِ سمبَلگ اِنت۔

آ اے وتی بستار ءُ سِنچ ھست کہ چُش ھر وھدَ نظرانداز کنگ بوت؟ زندگی ءِ ھر پڑ ءِ تہ ءَ آئی ءَ یک الگیں مقامے بہ بیت ۔ وھدیکہ گُشگ بوت اگاں کہ ما یک مردے ءَ تعلیم دے گڑا اے تعلیم ھمائی ءِ حد ءَ تک ھست۔ اگاں یک زالبولے ءِ تعلیم یافتہ بِت گُڑا آ وتی گون ءَ سجّھیں قوم ءَ تعلیم دنت-

مئے نوں کہ کسان سالیں نسل ءِ واستا ءُ آیانی کامیابی ءِ مستقبل ءِ وستا زالبول ءِ تعلیم یافتہ بُوگ باز الامّی اِنت اگاں بلوچ زالبول ءِ حق ءِ ھبر بہ بیت گڑا پیسرا چے آ وانی حقوق بلوچے روایت ءِ تہ ءَ موجود اِنت-

ما وتی مات ءُ گوھار ءَ چے آیانی حقوق ءَ چون دُر کرت کن آں ھرچ وھد ءَ ھرچ تکلیپ ءُ جَنجال ءِ تہ ءَ مئے مات ءُ گوھار ھرکس ءَ چے دیم ءَ اَنت وھدیکہ مئے پجار گڑا زالبُول نزام ءَ چہ مرد ءَ باز شَرتر سمبالا ءَ اِنت انگت آ وتی بنیاد ءِ ھق ءَ چَہ زھبرن اَنت –

ھرچ میدان ءَ آیانک خدمات انگت نظرانداز بوَگ ءَ اَنت مئے زالبوال چہ وانگ ءُ تعلیم ءِ تہ ءَ باز پُشت ءَ اَنت اگاں چارگ بہ بیت گڑا بلوچ زالبوال چَہ ھر راج ءُ قومے ئِے زالبوال چہ باز زھن ءُ ہنرمند اَنت اے دؤروباری ءِ تہ ءَ زالبوال پہ وتی راج ءِ ترقی باز جد ءُ جھد کَنگ ءَ انت ءُ آ وتی اے مکسد ءَ کامیاب ہم ھست اَنت زالبوال ءَ ہم وتی زندگی ءِ کامیاب مستقبل ءِ چار ءُ بچار کَنگ ءِ ھق ھست اِنت انیگیں دیمروئی ءِ دور ءَ انگت گیشتِر اِلاکہ ءِ تہ ءَ باز جنک کسان سالی ءَ آروس دیگ بیگ ءَ اَنت- اے کسان سالیں آواز ءُ پریاد ءَ پہ وتی ثقافت ءِ نام ءَ نظرانداز کن اَنگ مارا پہ وتی راج ءُ قوم ءِ ترقی ءِ واستا وتی زالبوالانی تعلیم ءُ ماحولیاتی ءِ زندگی ءِ سر ءَ توجہ دَیگ لوٹ اِت تاکہ مئے مات ءُ گوھار وتی قابلیت ءَ، وتی زھنیت ءَ دنیا ءَ پیش بہ دار ایت مئے حکومت زالبوالانی تعلیم ءُ ترقی ءِ واستا ھرچ قِسمیں ءِ گامگیج کنگ ءِ کوشاں پکائیں تکاں زالبوال ءُ مرد برابر ءِ بنیاد ءَچارگ بہ بنت ءُ وتی قوم ءُ راج ءِ دیمرئی ءُ واستا کُوشش بہ کن اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: کلکشان

نبشتہ کار: لیو ٹالسٹائی

رجانکار: الطاف منیر بلوچ

دی بلوچستان پوسٹ

مزنیں وھدے ءَ پیش سرزمین ءِ سر ءَ یک بلاھیں ڈُکالے اتکگ اَت دراہیں کور،جو،چات ءُ درچک ،کاہ ءُ ڈنگر ھُشک بوتگ ات انت بنی آدم ءُ دلوت چہ تُن ءَ مُرت انت۔

یک شپے ءَ یک کسانیں جنکے ءَ پہ وتی نادراھیں مات ءِ واستا یک تاسے زُرت ءُ ڈن ءَ پہ آپ ءِ شوہازا دراتک آئی ءَ دُراہیں جاگھاں تچ ءُ تاگ کُت بلے آپے شوہاز کُت نہ کت ءُ آئی ءَ سک دم بُرت انچوکہ تچک بوت ،واب کپت وھدے کہ چہ واب ءَ بُست ئِے کت ءُ تاس ءِ چست کت گڑا اجّکہ بوت دیستے داں تاسا را آپ مان۔تاس چہ ساپ ءُ پلگاریں آپاں چکار اَت کسانیں جنک شات ءُُ گل اَت ءُ انچو کہ آ تاسا وتی لُنٹانی نزیک ءَ بَرگی اَت ،آ وتی مات ءِ ترانگ ءَ کپت ءُ تاس ءِ دست ءَ ات ءُ دیم پہ وتی لوگ ءَ تچان بوت ،ھمنچو کہ آئی ءِ تیز تتک کُت تتک آئی ءَ انچو اشتاپ کتگ اَت کہ آئی ءِ راہ ءِ سرے کسانیں کُچک ھم ندیست اَنت۔

آ کُچک ءَ گوں ماں اڈیت ءُ تاسے دور دات کُچک ءَ بزگیں وککگے جت، کسانیں جنک ءَ زوت تاس ءَ راگِپت آئی ءِ ھمے مار اِت کہ تاس ءِ شکون دیمی ءَ آپ رتکگ انت بلے تاس راستی ءَ ایر اَت ءُ آپ ہم چو پیسریگی ءَ مان اتنت ءُُ آئی لھتے آپ وتی چنک ءَ ایر رِہت ءُ کچک ءَ چلَپ چلَپ ءَ وارت انت ءُ تاہیر ے رس ات وھدے کہ کسانیں جنک ءَ واتر تاس چست کُت آ چہ دار ءَ چاندی ءِ تہ ءَ بدل بوتگ اَت آئی ءَ تاس لوگ ءَ بُرت ءُ وتی مات ءَ را دات مات ءَ گشت،’’من ءَ بِل ھمے وڑ ءَ مِراں،شر تِراَت کہ تو بوارتیناں‘‘۔آئی ءِ مات ءَ تاس ءَ را پد ءَ آئی ءِ دست ءَ دات ھما ساہت ءَ تاس چہ چاندی ءَ سہرے ءِ تہ ءَ بدل بوت کسانیں جنک ءَ دیراں داں اوپار کت نہ کت ءُ انچو کہ تاس ءَ را وتی لنٹانی ءَ بَرگی اَت کہ دروازگ پچ بوت ءُ یک رہگززی یے تہ ءَ اتک ءُ آپے لوٹے کُت کسانیں جنک ءَ وتی گج ایربُرت انت ءُُ تاس رہگوزی ءَ را دات ءُ اناگت ءَ ہپت (۷) بلاہیں نُگراہ چہ تاس ءِ تہ ءَ پدر بوت ءُ ساپ ءُ پلگاریں آپ ءِ جوے آئی ءِ تہ ءَ چہ تچگ ءَ لگ ایت ءُ ہپتں نُگراہ بُرز ءَ روان بوت انت۔آ بُرز چہ بُرز تِر ءَ چست بوان بوت انت انچوکہ آزمان ءَ رس اِت انت ،کلکشان جوڑ بوت انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: زندگی انسان ءِ راہ ءَ

نبشتہ کار: ھدایت بلوچ

دی بلوچستان پوسٹ

 چوناھا انسان ءُ مردم دو جتا جتائیں چیز انت مردم یک ھنچیں نازانت ھیوانیں بُتے اے نام انت بلے انسان یک زانت ءُ سما ءُ سسا ءِ نام انت مردم ءُ انسان کہ وھد ءِ ھوار بنت گڑا زندگی گُشگ بیت ھمے زندگی ءَ یک منزلے است ھمے منزل ءِ آسر بوگ ءِ راہ چہ مردم ءُ انسان ءَ دوئیں نیمگ ءَ درکپ ایت پگر وھدیکہ مردمے راہ ءَ گچین بہ کنت گڑا مردم یک بے زانگیں ھیوانے ءِ بستار ءَ بیت۔

چو وکشی ایں گوک ءِ وڑ ءَ جنگل ءَ تچ ایت تچ ایت داں یک جاہ ءِ دم بارت ءُ اوشتیت ھنچو مردم زندگی ءِ آسری ڈک ءَ روت اوشت ایت نون مردم ءَ ھمے سما ء بیت منی زندگی ءَ ھچ بستار نہ بوت من بازیں چیزے پُشت چگل داتگ ۔ منا بازیں کارے گنگی بوتگ بلے بژن کہ من ھچ کہ کُرتگ پہ مال ءُ دولتے جِھت اگاں کُروڈانی تہ ءَ گار بہ بیت بلے انگت وتارا تھنا لیک ایت-

ھمے پیم اگاں پگر انسان ءِ راہ ءَ گچین بہ کنت گُڑا انسان ھما کامیابی ءِ راہ ءَ سپر جن اَنت کنت انسان چو ھما سرمچاریں سپاھی ءِ وڑ ءَ بیت کہ آ ھمک کوہ ءُ گیابان ءَ ڈڈّراں پچ کنت ءُ دُژمن ءِ دیم ءَ اوشت ایت پہ راج ءِ باندات ءَ وتارا ندر کنت ءُ ھزاران مردمانی اوست آئی ءِ سر ءَ بندوک بیت آئی ءِ پگر ءُ سوچ آرا پہ وتی زات ءَ ھچبر جیڑگ ءَ نیل ایت آ مدام ھنچیں راہ ءُ در گچین کنت کہ آئی ءَ راج وتی باندات ءَ بہ روت ءُ سر بیت ھمے راج ءِ وشھالی ءُ باندات آئی ءِ منزل جوڈ بیت ھمے راھاں وت پہ وتی زات ءَ ھچ آرام ءُ آسائش نہ گندیت بلے ھمے راج ءِ دلانی تہ ءَ اشی ءِ واستا ھما مھر ءُ دوستی کہ جوڑ بیت ھمے مھر ءُ دوستی چہ کُروڈانی ھساب ءِ  زر ءُ متاہ ءَ دیم ءَ تر انت۔

اے وڑیں انسان ءَ پہ وتی زات ءَ ھچ نہ بیت بلے دگنا ءِ دیم ءَ اشی ءَ ھنچیں بستارے بیت کہ اگاں ملکموت اشی پد ءَ کیت گُڑا آ ھوں گوں ارسیگیں چماں اشی ءَ بارت اے وڑیں انسان داں دگنیا ءِ ھست انت راج ءِ دلانی تہ ءَ ابدمان ءُ نمیران بیت بلے مئے چاگرد ءَ انسان ءِ کدر کم ءُ مردم ءَ گیشتر کدر  دے اَنت-

مال ءُ دولتاں ھستی ءُ آسائشاں چار انت ءُ مردم ءَ کُھدا ءُ سردار ءِ نام ءَ پِر کن انت آ راج کہ اے وڈیں مردماں وتی ھستی لیک انت۔ گُڈا آھان ءَ ھچ باندات نہ بیت اے اوں راستے کہ بائدیں انسان ءَ پہ وتی زات ءَ بہ بیت مال ءُ متاہ جوڈ بکنت وتارا آرام ءُ آسائش بکنت وتی نام ءَ ھر وڈا مزن کنگ لوٹیت مزن ءِ بکنت بلے وتی زندگی ءَ ھنچیں رنگے ءَ بگوازینیت کہ مرگ ءِ وھد ءَزندگی ءِ ھچ وام ءِ آئی ءِ سر ءَ پشت مہ کپیت آ وت پشومانی مہ گندیت پرچہ اے کار من وتی زند ءَ نہ کُرتگ۔

ھر وھد ءَ انسان ءِ رنگ ءَ زندگ بو ۔پرچہ کہ مردم یک بُت اے بستار ءَ انت مردم کّرنے ءَ پیسر مُرتگ بلے انسان ءَ ھچبر مرگ نہ گپت اگاں زاھر ءَ جُدا بیت بلے ابدمان ءُ نمیران بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

وپا کُنشکلات ءَ سنج تمپ پیلانٹی شوٹ ءَ پنچ گول ءَ باج برتگ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی دومی راؤنڈ ءِ دومی گوازی کنگ بوتگ –

مروچگیں گوازی ءَ سنج تمپ ءُ وپا کُنشکلات ءِ میان ءَ بوتگ ، دؤئیں ٹیمانی لیبیاں گوں جوانی ءَ لیب داشتگ ءُ دؤئیں ٹیم مکابلہ بوتگ انت – پیلانٹی مکابلہ ءَ سنج تمپ ءَ چار گول داتگ، وھدیکے وپا کُنشکلات ءَ پنچ گول داتگ ءُ باج برتگ- سنج تمپ ءِ ٹیم پروش داتگ-

تمپ کُنشکلات ءَ چہ اتکگیں مھمان واجہ انور ءُ امید بلوچ ءَ دوئیں ٹیمانی لیبی دلبڈی داتگ ءُ ستاشانی کرتگ انت –

آؤکیں گوازی گومازی ءَ سوگات گومازی ءُ پُل آباد ءِ میان ءَ اسکول گراؤنڈ ءِ پٹ ءَ بیت انت-

سر بیتگیں ھالانی رد ءَ بلوچستان ءِ دمگ کیچ ءِ بنجاھی شھر تربت ءَ واپڈا ءِ کارمنداں ارزی نامہ ءِ ھلاپ ءَ زھرشانی کرتگ –

واپڈا ءِ ملازماں ایس ای مکران سرکل ءِ ھلاپ ءَ ارزی نبشتگ کنگ ءِ واستا پولیس ءِ کارگس ءِ دیم ءَ نندانکی زھرشانی کرتگ –

واپڈا ءِ ملازمانی گوشگ اِنت کہ زھرشانی وھد ءَ پولیس ءَ بیھار ءُ زاہ ءُ بد مارا کرتگ –

آیاں گوشت کہ اگاں واپڈا ءِ یک ملازمے ءَ چیزے بہ بیت گڑا زمہ وار ایس ای بیت اِنت –

آیاں گوشت دانکہ ایس ای ءِ ھلاپ ءَ ارزی نبشتگ کنگ نہ بیت اِنت ھما وھد ءَ داں ما پولیس ءِ کارگس ءِ دیم ءَ نشتگ اِنت –

واپڈا ءِ ملازمانی ھمدردی ءَ بی این پی عوامی ءِ دمگی سروک کامریڈ ظریف زدگ، نیشنل پاٹی ءِ رھشون امجد مراد ءُ تربت سول سوسائٹی ءِ مبارک بلوچ سر بیتگ اَنت –

دست ءَ سر ءِ چیر ءَ کنگ ءُ وابیں انسانانی چاگردے تہ ءَ ھچ وڑیں بستار ءِ نہ مان ایت – ماما قدیر بلوچ

بلوچستان ءِ مزن شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار دوسد ءُ چل ءُ ھپت روچ سرجم بوتگ – بی ایس او ءِ گوستگیں سرکماش مہم خان بلوچ، بی این پی سینٹرل کمیٹی ءِ باسک جاوید بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ ھمے وھد ءَ وتی ھیال درشان اتگ ءُ گوشتگ کہ رسانکدر بلوچ راج ءِ سر ءَ بؤکیں ریاستی زوراکی لیب ءِ تماشہ ءَ چارگ ءَ انت، آھانی ند، ٹی وی ءِ سر ءَ آیگ وتی جاہ ءَ بلوچانی ریاست ءِ دست ءَ شھیدی، آوارجنی ءُ کُشت ءُ کوش ءِ ھالے ھم شنگ نہ بیت –

ماما قدیر بلوچ ءَ دیمتر ءَ گوشتگ کہ اِدے نندوکیں راجانی ھاموشی آؤکیں پدریچ ءِ ھاتر ءَ یک چکاس ءُ گرانیں زندے بیت کہ آئی ءِ زمّہ وار شما درست بہ ایت، شمے ھاموشی باندا شمئے چُک، نماسگ کُڈاسگانی ھاتر ءَ گرانتر ءُ سیاھیں باندات ءِ سوب جوڑ بوت کنت –

آئی ءَ گوشتگ کہ نوں مارا انسانی ھکانی سر ءَ وتی پرز پیلو کنگی انت، ھاموشی مئے ءُ شمے باندات ءَ سیاہ ءُ تھار کنت – ھاموشی وت یک گناھے کہ چاگردے تہ ءَ زندگیں انساناں بس بُتے جوڑ کنت –

سربوتگیں ھالانی رِد ءَ کاھان بمبور ءَ پاکستانی پوج ءَ مروچی سھب ءَ لشکر کشی بندات کرتگ – پوجی لشکر کشی بمبور ءُ چپ ءُ چاگردے دمگاں کنگ بوگ ءَ انت، جنگی بالگرداں ھم بازیں جاہ ءَ شیلنگ کرتگ ءُ چہ بالگرادانی سر ءَ پوجی کارمند آرگ بوتگ دمگ ءَ مانریتگ انت – زمینی پوج ھم بازیں کساس ءَ ھمے دمگاں مانریتکگ لشکر کشی بندات کرتگ –

زانگ بہ بیت بلوچستان ءِ جتا جتائیں دمگاں پاکستانی پوج ءِ لشکر کشیانی تہ ءَ گیشی آیگ ءَ انت –

ھالکارانی رِد ءَ مروچی پنجگور ءَ پاکستانی پوج ءِ ھشت جنگی بالگرداں دمگ ءَ گشت کُتگ واتر پوجی بنجل ءَ نشتگ انت – گمان انت کہ پنجگور ءُ چپ ءُ چاگردی دمگاں ھم لشکر کشی تہ ءَ گیشی آرگ بہ بئے –

دومی نیمگ ءَ بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مزار بلوچ ءَ وتی شنگ کرتگیں درشان ءِ تہ ءَ گوشتگ پاکستانی پوج ءَ لشکر کشی ءِ میان ءَ آھانی اوتاگ ءِ سر ءَ ھم اُرش کنگے جھد کرتگ، بلوچ سرمچاراں بالگردانی سر ءَ اُرش کتگ تاچینتگ انت –
جارکش ءَ وتی درشان ءِ تہ ءَ دیمتر ءَ گوشتگ کہ مروچی سُھب ءَ پاکستانی لشکر ءَ بمبور ءِ دمگ ءَ سَے جنگی بالگرد ءُ زمینی لشکر ءِ مزنیں کساسے ءَ مئے سرمچارانی پھناتی اوتاک ءِ سر ءَ اُرش کُرتگ- دو جنگی بالگرداں نزّیکیں کوھانی سر ءَ بمباری کُرتگ وھدیکہ یک جنگی بالگردے ءَ مئے سرمچارانی اوتاک ءِ سر ءَ تیرگواری کُرتگ-

جارکش ءَ گوشتگ کہ مئے سرمچاراں پسّھی کارروائی ءَ پاکستانی جنگی بالگردانی سر ءَ مزنیں سلاھانی گون ءَ اُرش کُرتگ، اُرش ءِ سوب ءَ پاکستانی جنگی بالگردے ءَ تاوان رس اِتگ ءُ آ چہ جنگجاہ ءَ چہ تاچینتگ –

گڈسر ءَ جارکش مزار بلوچ ءَ گوشتگ کہ مئے سرمچار زورگیریں پاکستانی لشکر ءِ بدیں واھگانی بے سوب کنگ ءِ ھاٹیگ ءُ بود ءَ دار اَنت –

دیوان ءَ پی ایچ ڈی ڈی ءِ نودربر شاکر منظور ءَ بھر زرتگ ءُ نودربر سرپد کرتگ اَنت –

دیوان کراچی شھدربرجاہ ءَ بیتگ کہ اود ءَ بازیں کچے ءَ نودربراں بھر زرتگ ءُ دیوان ءَ بیتگیں سرپدیاں سکین زرتگ –

دیوان ءِ سرھال “The Self ” وتی کمک ءَ وت اَت کہ دیوان ءَ پی ایچ ڈی نودربر ءُ کلینکل سائیکوجسٹ ءِ شاکر منظور ھَ تب زانشتی ءِ سر ءَ وتی ھیال ءُ لیکک درشان کرتگ اَنت –

دیوان ءَ بھر زیروکیں نودربراں وتی وتی جست ایر کرتگ ءُ چریشی ءِ سر ءَ شاکر منظور ءَ یک پہ یک ءَ نودربرانی پسو داتگ اَنت –

دیوان ءِ آسری ءَ شَے ھک ءَ دیوان ءِ ھلاسی ءِ جار جتگ ءُ دیوان ءَ اتکگیں دراھیں نودربرانی منت گپتگ ءُ دیوان ءَ بساک ءِ دومی بنجاھی لس مجلس ءِ پنتاک نودربراں دیگ بیتگ اَنت –

ھمے وڑ ءَ مروچی شال ءِ بازیں جاھاں بلوچ ایکشن کمیٹی شال ھنکین ءِ نیمگ ءَ کراچی ءَ بیوکیں گل ءِ بنجاھی لس مجلس ءِ بارہ ءَ دیوالانی سر ءَ پنتاک ءُ وانگ جاھاں پنتاک لِچینتگ اَنت –

زانگ بہ بیت بساک ءِ بنجاھی نیاد بیست ءُ شش، بیست ءُ ھپت ءُ بیست ءُ ھشت مارچ ءَ ماِ کراچی ءَ بیگ ءَ اِنت –

بلوچ ایکشن کمیٹی بلوچ نودربرانی مزن نامیں گلاں یکے کہ آئی ءِ جھد پہ وانگ ءُ زانگ ءُ بلوچ نودربراں وانگ ءِ نیمگ ءَ گیش ءَ گیش دلگوش کنگ اِنت –

دی بلوچستان پوسٹ

سربوتگیں ھالانی رِد ءَ مروچی ناشناسیں سلاہ بندیں مردماں بلو ءُ مبارک چات ءِ میان ءَ پاکستانی پوج ءِ کاروان ءِ سرا اُرش کُتگ، اُرش ءَ پاکستانی پوج ءِ جانی ءُ مالی تاوان داتگ ۔

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گھرام بلوچ ءَ رسانکدراں وتی شنگ کرتگیں درشان ءَ اے اُرش ءِ زمّہ واری منّ اِتگ گوشتگ کہ مروچی آدینگ ءِ روچ ءَ مئے سرمچاراں مند بلُو ءُ مبارک چات ءِ میان ءَ پاکستانی پوج ءِ کاروان ءِ دو گاڑیانی سرا مزنیں سلاھاں گوں اُرش کُتگ۔

جارکش ءَ وتی درشان ءِ تھا دیمتر ءَ گوشتگ کہ اے اُرش ءَ پاکستانی پوج ءِ چار کارمند مُرتگ ءُ بازینے ٹپی بوتگ۔ اشانی تھا یک آفیسرءِ ھم ھوار بوتگ کہ اے دمگاں گاڑیانی چیکنگ ءَ پد بنجلے نیمگ ءَ رؤگ ءَ بوتگ ۔

میجر گھرام بلوچ ءَ گڈسر ءَ وتی درشان ءِ تھا گوشتگ اے اُرش ءَ پد پاکستانی پوج ءَ اے دمگاں لشکر کشی بندات کرتگ ۔

نبشتانک: درامدیں شھر ءِ درامدیں کبر

نبشتہ کار: مھروان کمبر

دی بلوچستان پوسٹ

بیست ءُ چار ساھت ءَ گیش گْوستگ اَت کہ آ درامدیں شھرے ءِ درامدیں مردُماں ، درامدیں کبرے ءَ پہ ابدی واپینتگ اَت ءُ من انگت ھمے جیڑگ ءُ ھیالاں چہ در نہ یتکگ اِت آں کہ اے وڑ چوں بوت کنت،یکّیں دمان ءَ زندگی چوں دْروہ اِیت ۔آئی ءَ زان ءَ کُجا زِندگی ءِ بھار دیستگ اِت اَنت ، بلکیں آ نوکی چاردہ سال ءِ ورناھے اَت۔ نوک بروت ءِ سبزگ ءَ اِت اَنت، ڈلگیں چمّ ، بُرزیں پونز ءُ سبزیں لُنٹ آئی ءِ شیر سبزی ءِ گوائی ءَ دَیَگ ءَ اِت اَنت۔

بلے آ زندگی ءَ چو نیم بیلیں ساھگ ءِ پیم ءَ دروہ اِتگ اَت ءُ آ درامدیں شھرے ءِ درامدیں کبرستان ءَ درامدیں مردُماں درامدیں کبرے ءِ میار کُتگ اَت۔
ھَو! آ زندگی ءَ دْروہ اِتگ اَت،  آئی ءِ واب ، واھگ ءُ واھشت، لوٹ ءُ ارمان ، وشّی ، ٹھک ءُ بچکند دُرست آئی ءِ پجّیگ ءَ ھاکانی میار کنگ بوتگ اِت اَنت چونائی ءَ آئی ءِ واھِشت ءُ ارمان ، آئی ءِ کودکی ھما روچ ءَ ھلاس بیتگ اِت اَنت کہ آئی ءَ وتی سرزمین ءِ سر ءَ، وتی ھند ءُ دیاراں اولی رند ءَ بوٹ پادیں سپاھیگانی دْروشم ءَ درامدیں مردُم دیستگ اِت اَنت۔ بلے آئی ءَ واب گندگ بس نہ کُتگ اَت ءُ نیکہ آئی ءِ دیستگیں واب اَھد ءِ زُوراکاں پچ گپت کُتگ اِت اَنت۔ ھمے وابانی شوھاز ءَ آ دُور ءُ درامدیں ھند ءُ دیاراں درکپتگ اَت۔

آئی ءَ وتی کسانی شر یات اَت ءُ مُدام ھمے کِسّھے کُت اَنت کہ چوں وتی سرڈگار ءِ سر ءَ وتی لیبوھاں گوں دلگوش اَت کہ بوٹ پادیں سپاھیگاں آیانی گِس انگر کُت اَنت ءُ آئی ءِ لیبوھانی پجّیگ ءَ آیانی گِس، پیژگاہ ءِ شریش ءُ سبزیں چنال، باگ ءِ اَمب ءُ لیمبو ءُ مچ آس دات اَنت آئی ءِ سیاد ءُ ازیز آوار جَت ءُ شھید کُت اَنت ءُ آدرامدیں مُلکے ءِ درامدیں شھرے ءَ درامدیں مردُمانی تہ ءَ درانڈیھیں زِندے ءِ گْوازینگ ءَ لاچار بوت اَنت۔

منی ءُ آئی ءِ آشنائی ءِ سپر ھما روچ ءَ چہ بِندات بوت کہ آ وتی برات ءُ گْوھار ، ایندگہ درانڈیھ بیتگیں زھگانی ھمرائی ءَ منی گْور ءَ پہ وانگ ءِ ھاتر ءَ اتکگ اَت۔ اولی رند ءَ کہ آئی ءِ نیمگ ءَ من اِشارہ کُت ءُ جُست کُت تئی نام؟-

پہ ادب پاد اتک اُوشتات ، دست ءِ دلبند ءِ سر ءَ بست اَنت ءُ گوشت ئے منی نام ھمید بلوچ من پد ءَ جُست کُت ھمید بلوچ تو پرچا وانگ لوٹ ئے ؟ آئی ءِ سبزیں لُنٹانی سر ءَ پُرشتگیں بچکندے تالان بوت ءُ کمے بے توار بُوَگ ءَ رند درّائینت ئے وانگ ھژدری اِنت من چم پچیں کُورے بُوَگ نہ لوٹ آں ، منی لھتیں واب اَنت کہ من ءَ سرجم کنگی اَنت اے واب ھما وھد ءَ پورہ بَہ اَنت کہ من بہ واناں ءُ وت ءَ بہ زان آں ، وتی راج ءَ بہ زان آں اے دُگنیا ءَ بہ زان آں۔ زُوراک ءِ دست ءَ اچ من پُلگ بیتگیں بازیں چیزانی من ءَ شوھاز اِنت، من ءَ وتی شوھاز اِنت، ھما ھمید ءِ شوھاز اِنت کہ آئی ءِ کسانی ءِ لیبوکانی پجّیگ ءَ زُوراک ءِ دست ءَ وت گار ءُ بیگواہ بوت ءُ درامدیں مُلکے ءِ درامدیں شھرے ءَ درامدیں مردُمانی تہ ءَ درامدیں زندگی ءِ گْوازینگ ءَ لاچار بوت اے دُرست وانگ ءَ گوں بندوک اَنت من واناں ءُ چیزّے زان آں ، گُڑا وتی شوھاز ءَ در کپاں ءُ رھن بوتگیں ڈگار ءَ موکاں ۔ زُوراک ءِ دست ءَ من گار بوتگیں ھمید ءَ پولاں
آئی ءِ وانگ ءِ سپر انگت سرجم نہ اَت ، بلکیں آئی ءَ انگت بازیں چیزّے دربرگی ءُ بازیں سارت ءُ گرمے گندگی اَت چی ءَ کہ نوکی زندگی ءِ پیچ ءُ تابیں دمکانی تہ ءَ سپر کنگی اَت، گُژن ءُ تُنّ سگگی اَت نوکی آئی ءَ تراولیں پاداں گوں پند بُرگی اَت کہ زندگی ءَ درامدیں مُلکے ءِ درامدیں شھرے ءَ درامدیں دگے ءَ دْروہ اِت ءُ درامدیں کبرستانے ءِ درامدیں کبرے ءِ میار کُت۔

آ روچی آئی ءِ گُڈّی پیپر اَت۔ کسی گُمان ءَ نہ اَت کہ اے درامدیں شھر ءَ مروچی آئی ءِ زندگی ءِ گُڈّی روچ اِنت۔ مُدامی دُرستاں چہ رند وتی پیپرے ھلاس کُت ءُ من ءَ دات ءُ گْوشت ئے ، ھواریں سر! دو روچ ءِ چُٹّیاں چہ پد پدا دُچار کپیں ، شُت دیم پہ وتی سائیکل ءَ کہ آئی ءِ برات ءُ گْوھار ساری ءَ آئی ءِ ودار ءَ اِت اَنت۔ سائیکل اسٹارٹ بوت، گیٹ ءَ چہ ڈن دراتک۔ لھتیں کدم دُور درامدیں شھر ءِ درامدیں چارراہ ءِ سر ءَ درامدیں ٹرکے ءَ ڈیک وارت ءُ کپت اَنت۔ نزّیک ءِ پارک ءَ نِشتگیں درامدیں مُرگانی ھواری ءَ آئی ءِ ارواہ ءَ ھم بال کُت۔ کش ءُ گور ءَ آئی ءِ شنگ اِتگیں کتاب، کلم ءُ کاپیانی پجّیگ ءَ ھزاری ئیں واب ھم شنگ ءُ شانگ بیتگ اِت اَنت۔

بیست ءُ چار ساھت ءَ گیش گْوستگ کہ آ درامدیں شھرے ءِ درامدیں کبرستان ءَ درامدیں کبرے ءَ پہ مُدامی واپینگ بوتگ کہ اُود ءِ دُرستیں مُردگ درامدیں زُبانے ءِ واھند اَنت درامدیں زُبانے ءَ گپ جن اَنت ءُ آ ھر کس ءَ چہ درامد اِنت، بلے آئی ءِ چمّانی دیستگیں شنگ ءُ شانگیں واب انگت درامد نہ بوتگ اَنت ، ءُ الم اے واب یکروچے مانا بَہ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت