TBP Balochi

سربوتگیں ھالانی رِد ءَ ھشت جون ءَ بلوچستان ءِ بنجاھی شھر شال ءَ پاکستانی پوج ءُ چیریں ادارھانی دست ءَ زورانسری آوارجنگ ءُ بیگواہ بوتگیں بلوچستان یونیورسٹی ءِ نودربر قاسم ءِ عبدالغنی جھمنند گومازی ءُ بلال ء محمد بکش جھمنند مند گوستگیں روچ ءَ یل کنگ بوتگ انت –

زانگ بہ بیت بلال بلوچ ءُ قاسم بلوچ ریاستی چیریں ادارھانی کارمنداں بولان میڈیکل کالج ھاسٹل ءِ گیٹ ءِ دپ ءَ ھما وھد ءَ زورانسری آوار جتگ ءُ بیگواہ کرتگ انت کہ آ چہ بیگواھیں مردمانی یل کنائینگ ءِ ھاتر ءَ ھشت جون ءِ روانک ءُ زھرشانی ءَ پد واتر پیداک بوتگ انت –

چد ءُ پیش ھم بلوچستان ءَ انسانی ھکانی گلاں بندوکیں مردم گار ءُ بیگواہ کنگ بیتگ اَنت –

بلوچستان ءَ سیاسی پاٹیانی گوشگ اِنت کہ بلوچستان ءَ توار چِست کنگ یک جرمے جوڑ بیتگ ھرکس وتی ھک ءُ یا گار ءُ بیگواھیں مردمانی واستا توار چست کنت گڑا گرگ ءُ گار کنگ بیتگ اَنت –

بلوچستان ءَ گار ءُ بیگواھیانی بھتام پاکستانی چیریں ادارہ ءُ پوج ءِ سر ءَ لڈگ بیگ ءَ اَنت بلے تنی وھدی پوج ءُ چیریں ادارھاں بلوچستان ءَ گار ءُ بیگواھیانی گپ رد کرتگ اَنت –

دومی نیمگ ءَ بلوچستان ءِ بنجاھی شھر شال ءَ گار ءُ بیگواہ بیتگیں مردمانی گوانک وائس فار بلوچ مسنگ پرسنز ءِ زھرشانی ھرتال ماما قدیر بلوچ ءِ سروکی ءَ برجاہ اِنت ءُ گل ءِ لوٹ اِنت کہ ھما مردم کہ گرگ ءُ گار کنگ بیتگ آ آمیدگس ءَ پیش کنگ بہ بیت ءُ آئی ءِ جرم گوشگ ءُ سزا دیگ بہ بیت بلے اے وڑ ءَ زنداناں بندیگ کنگ نا ایوک ءَ آئی ءَ زندانی اِنت بلکیں آئی ءِ تیوگیں کھول بندیگ کنگ بیتگ –

نبشتانک: سلمان ھمّل یاتانی در

نبشتہ کار: واھگ نیاد

دی بلوچستان پوسٹ

وھدے بیگاہ ءِ سارتی ءَ ایر دات من وتی کلّیگ آپ کت اُرد بست اَنت گوں دو سنگت ءِ پجّی ءَ چہ اوتاک ءَ درکپتاں کہ کش ءُ گور ءِ ھالے بہ چِناں گُڈا کلاکے ءَ پد ما نیٹ ورک ءَ اتیں داں سنگت چاکر جان ءِ کلوھے اتک ” ھالکن نوتک منی گور ءَ اِنت ما جاھے کارے چاراِتگ لوٹیں ہمے کار ءَ پہ در بہ کپ ایں بلے مارا چہ شما لھتے مڈّی ءُ چار سنگت پکاریں اگاں وت اتک نہ بئے بلے ہمیشاں بہ ٹاھین پہ ما دیم دے” من گُشت من ٹاھیناں اش ءُ بوت کنت منی جند ہم بئیت بلے سسٹم ءِ زمہ دار وَ پیرک جان اِنت اگاں دزرس ءَ بیت شما ہمائی ءَ بگش اِت پد ءَ کلوھے اتک ” پیرک ءَ گوں ھال بوتگ آئی ءَ گُشتگ ترا بُگش اِت ” گُڑا ما وتا زوت گیشینت ءُ بلیدہ ءِ کوچگ ءَ سر بیتیں راھسرے ءَ سنگت چاکر جان ءُ شھید جلال جان مئے وداری اِتاں سلام دروت بوتیں پد ءَ پہ سنگتانی اوتاک ءَ در کپتیں ھود ءَ سنگت نوتک جان مئے دیما اتک دروت ءُ درھبات بوت دیوان ءُ ھال بوت پد ءَ شام کت اے منی اولی گندک اَت گوں سنگت نوتک جان ءَ کسان سالیں پَٹک بالادیں ورنایے اَت بلے آئی ءِ زانت ءُ سما ءَ منا گوں وت کَشّ اِت ءُ برت من ھیراں اِتاں اے عمر ءَ ایشی ءَ وتی گل ءِ توک ءَ پہ وت ءَ چتور اے ڈولیں مزنیں جاہ ءُ مقامے جوڑ کتگ ءُ اے ڈُبہ ءَ چتور پہ جوانی پیلو ہم کنگ ءَ اِنت (اے وھد ءَ نوتک جان ءَ بی آر اے ءِ توک ءَ مزنیں ڈُبّہ ءُ زمّہ واری یے گون اَت) آئی ءِ سنچ ءُ زانت راجی جبزگ پہ کُلیں سنگتاں راھشونی ءِ چیدگ ات شام ءَ پد نوتک ءَ منا توار کت بیا رواں کشے ءَ سوڑگے کنیں من ءُ نوتک جان ءُ سنگت چاکر نشتیں گپ بوت بلے من گوں آھاں تپاک نہ کت منی گمان اَت کہ اے کار ءِ توک ءَ اھوالکاری کنوکاں چے کسے گوں سنگتاں لیب کنگ ءَ انت من گُشت اے کار بوت نہ کنت مارا سی ءُ چِلّ سنگت گون اگاں کمیں اینگر آنگر بہ بیت پہ ما باز تاوان بیت گُڑا سنگت نوتک دگہ سے سینئریں سنگت سلاہ ءِ توک ءَ زرت گوں کہ چہ آ سنگتاں یکے شھید جلال جان اَت ہمے سنگتاں چے یکے ءَ انچیں گپے ایر کت کہ نوں من ءَ پہ مڑاہ سنگتانی گپ ھان کنگی اَت من سنگتانی پجّی ءَ درکپتاں پہ سفر ءَ بلے سجّوئیں شپ ءِ پند جنگ ءَ پد ہم ما وتی ٹارگٹ ءَ داں سر نہ بوتیں بام بوت روچ در اتک بس ہیمنچو بوت کہ کار وَ نہ بوت بلے ما وتی جند ءُ سنگتانی رکینگ ءَ سوب مند بوتیں روچ ءَ کمو آرام کنئگ ءَ پد من شتاں نیٹ ورکے ءَ جھد ہمیش اَت کہ گوں پیرک جان ھال اھوال بہ بیت پیرک جان ءَ دہ دوازدہ روچ ءَ گیش ات کہ چہ من گسر کپتگ ات گُڈی ءَ من پہ پیرک ءَ کلوھے یل دات اگاں لینے ءَ اتک ئے ھال بکن ما فلاں ھند ءُ دمگان اِیں بُرز دیگر ءَ پیرک جان ءُ گلاب جان اتک مئے گور ءَ سر بوتاں ناھاری ات ما پجّی ءَ ورگ وارت ءُ ورگ ءِ سر ءَ من پیرک جان ءَ گُشت ورگ ءَ پد من تو یک کِرّے ءَ رویں ورگ وارت من ءُ پیرک جان شت گپ ءُ ھال کت آئی ءَ منی گپانی اش کنگ ءَ پیسر گُشت ئِے اے کار اے وڑیں جاگہے ءَ اے داب ءَ بوت نہ کنت دگہ ترتیب ئِے اڈ کنگ لوٹ ایت من گشت زیکین ایں منی ھبر ہمیش بوتگ بلے سنگتاں گوں من تپاک نہ کتگ گُڑا ما سنگت نوتک ءَ لوٹاھینت گپ دیما ایر کتاں آ مئے گپانی سر ءَ رازیگ بوت بزاں نوتک جان ءِ اے وتی سنچ ءُ زانت ات کہ آئی ءَ وتی گل ءَ چے ڈن ہم ایندگہ سنگتانی سلاہ ءُ شور ھچ بر رد نہ کت اَنت گُڑا ما وتی ایندگہ سنگت نوتک ءِ گور ءَ یل کت اَنت ءُ رپتیں پہ وتی اوتاک ءَ پیرک جان ءُ گلاب جان ءَ سنگتانی راشن گون ات اَنت ما سئیں گاڑی ءَ بوتیں ءُ شھید چیسل موٹر ءِ سر ءَ مئے دیم ءَ ات ما اوتاک ءَ سر بوت ایں اے شپ ءَ ما ہمود ءَ جل اِت ایندگہ شپ ءَ من ءُ پیرک جان اتکیں جاھے ءَ نیٹ ورک ءَ داں ھال اتک کہ مروچی بلیدہ ءِ کوچگ ءَ سنگتانی سر ءَ لشکر ءَ ارش کتگ اَت سنگت در کپگ ءَ سوبین بوتگ اَت بلے لشکر ءَ واتری ءَ کوچگ ءَ سنگت امیربکش تلانگ ءِ لوگ ءَ بیڑ برتگ اَت امیر بکش ءِ کسانیں جنکوے ءِ پجّی ءَ شھید کنگ بوتگ پیرک جان گشت مئے گمان گُمانے نہ بوتگ بلکیں اسل ءَ ہمے رنگیں پلان ے بوتگ اگاں نوتک ءَ مے ھبر مہ گپتیں ءُ ہما جاہ ءَ بہ شُت ایں سنگت ءَ تاوان بوتگ اَت-

پد ءَ لھتے وھد من ءُ پیرک جان کیلکور ءُ کولواہ ءِ دمگاں رپتیں وھدے واتر اتکیں گُڑا وتی دمگ ءِ کماش ءِ گور ءَ رپتیں کماش ءَ نوتک ءِ جُست کت ما گشت ما دیستگ کماش ءَ گشت نوتک منی گور ءَ اتکگ من دیستگ اے عمر ءُ سند ءَ ایشی ءَ آفرین انت ایشی ءَ اینچو ڈبہ سر ءَ دیگ بوتگ کُلیں چیزانی سر ءَ دست رس ءِ ھست فھم ءُ زانت سما ءُ سسا کارانی ھیل ءُ ھیل کاری شون ءُ سلاہ ءُ سوج کلیں تکانی زانت داریت اے سنگت ءَ گوں ہمکاری ءُ ہمراہ داری بکن ات ہر وھد نزیک بہ بہ اِت کارانی سر ءَ سلاہ ءُ شور بکن ات ما سے چار روچ کماش ءِ گور ءَ جل اتیں ہر وھد کماش نوتک ءِ ستا ءُ توسیپ کنگ ءَ ات-

پد ءَ گُڑا برے کُلبر ءَ برے بلیدہ برے کیلکور ءُ کولواہ نوتک جان گوں ما ھوار ات ہمگام ات ہم دیوان ات من ءُ شھید پیرک جان ءُ شھید نوتک سنگت ملین ءِ پجّی ءَ شتیں پہ واجو ءِ گند ءُ گدارے ءَ یک روچے من ءُ شھید پیرک جان واجو ءِ گْور ءَ چے در کپتیں پہ کارے ءَ نوتک جان ءُ سنگت ملین ءَ ہم جتا در کپت انت پد ءَ سھب ءَ آپریشن ات جھازانی ایژ ءُ آنژ ات بمباری ات ایس ایس جی کمانڈوانی دور دیگ ات بلاھیں آپریشن ات من ءُ پیرک جان چہ جاہ ءِ جند ءَ کمیں گستا اتاں ایندگہ سنگت کل آپریشن ءِ زد ءِ توک ءَ کپتگ اتاں تگ ءُ تاچ پما ہم کم نہ ات اَنت بلے چو ایندگہ سنگتاں پما گیشن نگیگی نیست ات بس بے تاھیری ات کہ سنگتانی ھال باریں چے بیت ھاوند ءِ رھم بوت سنگتانی زند رک اِت ھشت دہ روچ ءَ پد پد ءَ ما ھور اتیں سپر ات شپ جاہ ءُ روچ جاہ اتیں داں دگہ آپ بندے ءَ اتک ءُ کمیں جل اتیں پد ءَ پیرک جان واجو ءِ گورا جلّ اِت من ءُ نوتک جان سنگتانی پجّی ءَ سفرے ءَ در کپتیں چرے سفر ءَ پد لہتیں وھد ءَ آ گوں وت ءَ ات چَٹ گوں وت ءَ من ھم ھمائی ءِ داب ءَ اتاں چَٹ گوں وت ءَ یک روچے ھال بوت کہ سنگت نادراہ انت نگیگ ایں من نزانت کہ آ گیشتر نگیگ ایں یا من بلے کمیں پرک ءُ تپاوت ءَ ابید مئے دوئینانی گیشتر یکیں ھال ات داں یک روچے منی گورا اتک گُشت ئِے مروچگیں مٹ اتگیں جاور ھالانی رد ءَ ما لوٹیں کہ کلیں سنگتانی دیوانے اڑ بکنیں کہ آئی توک ءَ بی ایل ایف، بی ایل اے، بی آر اے ءُ لشکر بلوچستان ءِ سنگتاں ھم گوانک بہ کنیں کہ جوانیں راہ ءُ درے بہ بوج ات پہ جھد ءِ دیمروی ءُ وتی ہمبلانی رکّینگ ءَ گُڑا دیوان ات نوتک جان ءَ وت ءَ جارچین کت ءُ من ءَ گشت تو اے دیوان ءَ گشتانک بدے مروچگیں جھد ءِ تک ءُ پھنات ءُ سنگتانی راہ ءُ راھبند ءُ جوانیں گامگیج کہ پہ جھد چے چے کنگ ءُ چون چون بوگ لوٹ ایت بازیں وھدے ما ھور ءُ یکجاہ اتیں پد ءَ گسر کپتیں لھتے وھد ءَ رندے یک رمزانے ءَ ما یک سنگتے ءِ اوتاک ءَ لھتے وھد ھور گوازینت آ ھمود ءَ سنگت ءِ اوتاک ءَ ات ماھے کپے ءَ رند من چہ ھود ءَ در کپتاں چندے روچ ءَ پد من چاراں تاں نوتک ءُ شھید اسد شیھو انت بلے جاھے رؤگ ءِ تیاری ءَ آں من اناگھی کہ گون کپتاں من ءَ گشت اش ما چو کشئے ءَ روگ ءَ ایں بیا کہ رویں من مزاک کت نوتک ترا شوکیں بوٹ پاد ءَ وتی بوٹاں دے من کایاں گوں اگاں نا چوناھیگا گُڑا اوشتاتگیں جاہ ءَ وتی بوٹ ئِے گوں جُرّاباں کش اِت ءُ من ءَ دات اَنت ءُ من گشت من مزاک کتگ گُشت ئِے نوں کسم کہ من پد ءَ ایشاں پادا بکاں من وس کت بوٹ منی پاداں یک نمبرے ءَ کستر اتاں من پہ مسیبتے بوٹ پادا کت اَنت آئی ءَ منی چَوٹ ہمے دیوان ءَ شھید اسد شیھو ءَ را شبین بوتگ ات کہ من شھید باں بار بار ہمے گپ ئے کت کہ من گوں لشکر ءَ دپ کپاں مزنیں جنگے بیت مزنیں لشکری یے مریت ءُ یکزد بیت من شھید باں بلے پاکستانی میڈیا گُشیت منی کس نہ مرتگ بس منی نام ءَ دنت گشیت یک دھشت گردے ھلاک بوتگ ھمے ھلاک ءِ سر ءَ شھید نواز ءُ ایندگہ سنگتاں سک کند ات ہمد ءَ سنگتے مبائل ءَ حمید ءِ سوتے گوشدارگ ءَ ات شھید شیھو ءِ من ءَ ھلوت کت گُشت ئِے گندئے سوت بند مہ بیت منی ءُ تئی جان پُرّ بیت دگہ ناچے بنا کناں من زاناں حمید وتی دیم ءَ سیاہ کنت ایندگہ روچ ءَ شھید شھیو ءُ نوتک سفرے ءَ شتگ اتاں ھال اتک کہ اولاک اش کپتگ نوتک ٹپّی انت پادے پرشتگ پد ءَ نوتک مئے گور ءَ اتکگ سر ات چیزے روچ ءَ پد شھیو ءِ شھیدی ات بلے انچش کہ شیھو جان ءَ شبین بوتگ ات شھادت ءِ ہما پئیم ءِ پئیم بوتگ ات ہما سنگت ءِ اوتاک ءَ کہ پیسر ءَ ما رمزان ءَ ھور بوتگ اتیں ہمے اوتاک ءَ پد ءَ یکبرے من ءُ نوتک جان یکجاہ اتیں بلے اے بری من ہمودا اتاں کہ نوتک جان پیسر در کپت شت اے مئے گُڈی دیدار گندی ات چد ءُ پد من لین ءَ کہ اتکاں گُڑا برے برے سلام ءُ دعا کت فون ءَ بس یک رندے پد ءَ سر ھما سنگت ءِ اوتاک ءَ کپت سنگت ءَ من ءَ گُشت بیا کہ نوتک ءَ منا ھال کتگ تئی نام ئِے گپتگ من ءَ گشتگ ئے پہ تو چیزے زر کئیت پہ واھگ ءَ مبائلے بزور دیم دے نوں کہ تو وت اتکگ ئے ترا جست کنیں اگاں زر اتکاں پہ تو چونین مبائلے بزوراں من گشت من نزاناں نوتک پہ من چونیں مبائلے زوریت وتی نمبرے مَٹ کتگ گوں من ھالے نیست من ءَ نوکیں نمبر ءَ ئِے بدے من وت ھالے کناں من ھال کت من گُشت تو دیریں درا نہ بئے کجائے ؟ نوں بیا من ءَ گُشت ئِے” یار کامُوو من نیاھاں نوں” من گُشت پرچا اینچو بے مھری ؟ من ءَ گُشت ئے” یار کامُووو ھمے تو مھر ءِ جند اِنت من ءَ واتر بوگ ءَ نوں نیل ایت” من گشت چون متلب؟ من ءَ گُشت ئِے” تئی دوستیگیں مردمے ترا چے دور ءُ گستا بہ بیت تو گیش تر ھدوک بے نہ بے؟” من گُشت ھئو گُڈا کندگے جت ءُ گُشت ئے” گُڑا ھمے گپ ایں یار دور بوگ ءَ چے مھر گیش بیت کم نہ بیت من گُشاں مھر مِھر بہ بیت تو گُش ئے بے مھری کمال کن ئے یار ” مرچی مھر ھما مھر انت کہ چہ چماں گستا انت بلے دور نہ انت ادا نہ انت بلے دل ءَ انت گوں ھاک ءِ وشبو ءَ انت گوں گوات ءِ سارتی ءَ انت گوں نود ءِ نمبی ءَ انت گوں زر ءِ زیبائی ءَ انت گوں ماہ ءِ ماھکان ءَ انت انچش گوں ھاک ءِ وشبو ءَ ھواریں کہ گوں ھر دل ءِ دریکگ ءَ واتر ایت ھر شھم ءَ شھمگ ءَ انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ جیڑہ سیاسی اِنت ءُ اد ءَ انسانی ھکانی سک باز بگیری دارگ برجاہ انت – ماما قدیر

بلوچستان ءِ بنجاھی شھر شال ءَ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ شست ءُ یک روچ سرجم بوتگ – پشتون تھپز مومنٹ شال ھنکین ءِ اگدہ دار ءُ چاگردی باسک حمیدہ نور بلوچ، خالدہ ایڈوکیٹ بلوچ بنجل ءَ اتکگ ءُ بیگواھیں مردمانی کھولانی گوما دلپدردی درشان اش کتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ایمنسٹی انٹرنیشنل ءِ نیمگ ءَ رپورٹ ءِ شنگ کنگ بوتگ آئی ءِ تہ ءَ نبشتگ بوتگ کہ آوار جنگ بوتگیں بلوچانی زند ھترہ ءِ تہ ءَ اِنت بلوچستان ءَ زورانسری آوار جنگ ءُ بیگواہ بوتگیں مردمانی تیرسپتگیں زانگولیں جونانی وئیلانی تہ ءَ گیشی اتکگ –

ماما قدیر بلوچ ءِ گوشگ ات کہ وائس فار بلوچ مسنگ پرسنز سرجمیں دنیا ءِ مردمانی گوم ءَ لوٹ کنت کہ آ پاکستان ءُ بلوچستان ءِ سرکار ءَ نمدی نبشتہ بہ کنت آھاں چہ لوٹ بہ کن انت کہ آ بلوچانی گیرجانبدار پٹ ءُ پول ءَ بہ کن انت ءُ آھانی زمہ واراں سزا بدیان انت ءُ ھما مردم یل کنگ بہ بنت یا ھنچیں اعلانیہ سرکاری بندیگ جاہ ءَ آرگ بہ بنت –

ماما قدیر بلوچ ءِ گوشگ ات کہ بلوچستان ءِ جیڑہ سیاسی اِنت ءُ اد ءَ انسانی ھکانی سک باز بگیری دارگ برجاہ انت –

آئی ءِ گوشگ ات کہ انسانی ھکانی میان استمانی ادارہ ھم اے پدر کتگ کہ بلوچستان ءَ زورانسری آوار جنی جاور ھال سک نگیگ انت –

سلاہ بندیں مردماں سَے پوریاگر چہ ڈگاراں بیگواھی ءَ پد دو کُشتگ ءُ یکے ٹپی کُتگ۔

زیارت ءِ یونین کونسل منہ ءَ چہ ناشناسیں سلاہ بندیں مردماں سبّی ءِ جھمنندیں سَے مردم اللہ داد گورگیج، شاھد خان گورگیج ءُ جمال خان سھریانی آوارجنی ءَ تیر آماچ کُتگ اَنت، دو مردم کُشتگ ءُ یکے ٹپیگ کُتگ۔

کُشگ بیتگینانی تہءَ شاھد گورگیج ءِ سند چاردہ سال گُشگ بئیگ ءَ اِنت۔ ھندی واکدارانی رد ءَ سئیں پوریاگر ایک ھندی ٹھیکیڈار ءِ گورءَ ڈگاراں پوریا گری کنگ ءَ بیتگ اَنت کہ سلاہ بندیں مردماں آور جتگ ءُ کُشتگ اَنت۔

جون ءُ ٹپی بیتگیں مردم زیارت ھسپتال ءَ برگ بیتگ اَنت کہ آودہ ٹپیگیں جمال ءَ بنداتی جاندارھی کمک دیگ ءَ پد پہ گیشتر علاج ءَ شال ءَ برگ بیتگ۔

ڈپٹی کمشنر خورشید عالم ءِ مستری ءَ واکدار وئیل ءِ ھند ءِ چارگ ءُ ٹپاسگ ءَ پد گُشتگ کہ آیانی جرم کارانی دزگیر کنگ ءِ ھاترءَ وتی کار بندات کَتگ۔

نبشتانک: رودپتر ءِ سیمی بھر

(دومی بھر)

نبشتہ کار: شاؔری لال

دی بلوچستان پوسٹ

شیما ءِ جنک کُلسوم ءِ ٹیوشن دیگ ءِ وھد ءَ منی ھیال گیشتر گوں کلسوم نہ اَت گیشتریں ھیال گوں برات ءِ رودپتر ءَ اَت کہ باریں آئی ءَ دیم ءَ چے نبشتہ کتگ، کہ من ءَ وھد نہ بوگ ءِ سوب ءَ گیشتر ونت نہ کتگ اَت من کلسوم ءَ ٹیوشن دیگ ءَ پد گوں اشتاپی ءَ لوگ ءَ شُت آں کہ من ارادگ کتگ اَت گوں لوگ ءِ رسگ ءَ رودپتر ءَ وان آں من مدامی ئیں رنگ ءَ بیگاہ ءِ ساھت ۵ بج ءَ واتر لوگ ءَ روگ ءَ ات آں۔ اے وھد ءَ جمبری ءَ آزمان ءَ شالے مان پوش اتگ اَت چرسیانی ءُ چلیمیانی دل ءِ تب ءِ موسمے ءَ اَت، لوگ ءِ رسگ ءَ من دیست کہ لوگ ءَ منی مات ءِ دزگھار آتکگ ات اَنت کہ مئے نزیکیں ھمساھگ اَنت دیوان برجاہ اَت جنینانی مدامی ئیں سُک سُک گوں یک ءُ دومی ءَ بنا اَت من ءَ وَ چونائی ءَ دیوان باز دوست نہ بیت، اِے روچی وَ من ءَ نوکیں سوگاتے رس اتگ اَت کہ من ءَ وانگی اَت سک اشتاپی ات آں من چہ لوگ ءِ دپ ءَ گْوزگ لوٹ اِت کہ دومی لوگ ءَ بہ رو آں ھمود ءَ کہ رودپتر ایر اَت من گْوزگ ءَ اِت آں وت ءَ را ھنچو بے سما کت کہ بزاں من ھچ سرپد نہ آں کہ لوگ ءَ مھمان آتکگ بلے نہ زاناں مات ءَ من ءَ چونی ءَ گْوزگ ءَ دیست ”او شارو! بورچی ءَ چلیم اِیر اِنت برو بِر کن ءُ زوت بیار ئِے“ مات ءَ گْوشت۔

2
مات ءِ گپّانی اِشکنگ ءَ گوش ئے من ءَ تپے ءَ گپت مات کہ ایوک بوتگ من آئی ءَ ساپ ءَ ساپ جواب داتگ کہ گوں من ءَ چلیم نہ بیت چے ءَ کہ منی ءُ چلیم ءِ سیادی بِیھ ءُ بُندر ءَ نہ بوتگ من ءَ ھر وھد ءَ چلیم ءِ دوتاں لگ اِت من ءَ سک جکینتگ اِش بلے مروچی من مات ءَ جواب دات نہ کت نہ زاناں چے ءَ من شُت آں بورچی ءَ لھتے زگال زرت آس ءَ دات آں۔ پِر کن ءُ ھُپ کنگ ءَ پد چلیم تیار بوت چلیم ءَ بُرت دیوان ءِ نیام ءَ ایر کت کہ دیوان ءِ براہ جوڑ بوت من مات ءِ دزگھارانی وش آتک کنگ ءَ پد چہ لوگ ءَ در نہ یتکگ اِت آں، کہ تنا وھدی لوگ چہ چلیم ءِ دوت ءَ آڈھور اَت من دومی لوگ ءَ آتک آں رودپتر زرُت وانگ ءَ بوت آں۔

”من گوں دوئیں سنگتاں موٹر سائیکل ءَ سوار بوتیں. شتیں کاردام ءِ ویرانی نیمگ ءَ وھدے ما روان اتیں پہ ویرانی نیمگ ءَ منی سنگت سیہ گوک تُرسے ءِ آماچ بوت ”سیہ گوک“ من آئی ءَ چہ دوستی ءَ گُشتگ ءُ وھدے من آئی ءَ چو گشتگ گڑا سک چِڑ اِتگ ءُ من ءَ آئی ءِ چیڑینگ وش آتکگ دیر اِنت من سیہ گوگ نہ دیستگ ءُ من ءَ پہ آئی ءَ زھیر ھم کنت بلے آ اِنت کہ منی سلاماں پہ ناز الیک کنت۔

ما روان اتین کہ آئی ءَ گشت اڑے یار ویر ءِ بُرّگ شر نہ اِنت ما شما گِرگ بئیں گڑا زندانی بئیں باز مشکل ودی بیت ءُ پد ءَ میتگ ءَ کاردام مہ بیت میتگ ءِ مردمانی کار ماٹو بنت کس کسی ھال ءَ ھم گپت نہ کنت سیہ گوک نُرنڈان ات ما آئی ءِ گپاں ھچ مان نیارت ءُ روان اتیں، من ھمد ءَ سیہ گوک ءِ بھادری زانت کہ آئی ءَ ھچ دل مان نیست پیسر ءَ سیہ گوک ءَ کہ گوں من دیوان کتگ آئی ءَ وتی بھادری ءِ سر ءَ سک باز ٹھل کتگ بلے مرچی آئی ءِ بھادری ءِ گپ کہ من ءَ یات آتک آں من دلجم بوت آں آ درھیں گپ آئی ءِ ٹاپار بوتگ اَنت۔

وھدے ما تیر برگانی نزیک ءَ اتکیں چپ ءُ چاگرد ءَ چار ات ھچ کس نیست اَت وھد بیگاہ اَت دُور ءَ میتگ ءِ پُشت ءَ دنزے گِندگ بوت شَرّی ءِ چارگ ءَ پد من دیست کُت لھتے مردم ھست اَت ٹِلّی لیب ءَ اِت اَنت بلے ما دلجم اِت آں کہ اینچو دُوری ءَ آ مارا درس کت نہ کن اَنت ما شُتین ویر ءِ نزیک ءَ داں سیہ گوک ءِ تُرس پد ءَ گیشتر بوت ءُ آئی ءَ مارا ویر بُرّگ ءَ نئیشت کہ چو شر نہ اِنت ما شما گرگ بئیں من سیکل ءِ دیم چرّینت واپس پد ءَ لوگ ءِ نیمگ ءَ شُتیں۔ اگاں آروچی سیہ گوک مارا بُرّگ ءَ بہ اشیں ما بُرّ اِت نہ کت چے ءَ کہ مارا پہ ویر ءِ برّگ ءَ ھچ چیزے یا داسے گون نہ اَت۔

اے روچ گوست ءُ سیہ گوک ءَ مار دروہ اِت بلے منی آ دگہ سنگت گون من ءَ تیار اَت ما شپ کت ءُ سرشپ ءَ روگ ءِ تیاری کت سیہ گوک ءَ مار پیسر ءَ ھمے گْوشت کہ اے ویر ءِ تہ ءَ یک زنڈیں سیمے مان کہ ایشی ءِ گُڈّگ ءُ بُرّگ باز مشکل انت، بلے من نہ زانت آئی ءَ ویر ءِ بارو ءَ چونی ءَ سرپدی ھست اَت۔

گڑا ما پہ ویر ءِ بُرّگ ءَ یک ٹال گُڈّیں تپرے زرت پد ءَ جیڑ اِت اگاں پہ تپر گُڈگ مہ بیت یک ھرّگے ءُ یک کارچے ھم زرت ءُ مارا ھمے ترس اَت بلکیں ویر ءَ بجلی مان بہ بیت ما یک دستی یے زرت ءُ یک رینچے زرت کہ ویر ءَ چہ تیربرگانی سر ءَ ایر کنیں جھل ءَ زمین ءِ سر ءَ ویر ءَ گڑا گڈّین ئِے۔

اینچو سامان زورگ ءَ پد اے سامان زرتان ءُ شتین پہ ویر ءِ نیمگ ءَ کساس ما سَے سد گام ءِ دُوری ءَ اَت آں من سیکل ھمود ءَ ڈگارے ءِ بند ءِ پُشت ءَ ایر کت کہ پد ءَ کسے سیکل ءِ پدان گپت مہ کنت سیکل ایر کنگ ءَ پد من ءُ سنگت ءَ سامان زرت آں شتیں پہ ویر ءِ نیمگ ءَ ما ھر نیمگ ءَ چاران ءُ گوشداران اتین کہ کسے مئیت۔ ما آھستہ آھستہ روان اتیں تیر برگ نزیک ءَ ات آں کہ من ءَ وتی مات ءِ یات آتک کراچی ءَ نادرجاہ ءَ اَت کہ آئی ءِ ھال گرگی انت من ھمود ءَ اوشتات آں ءُ آئی ءَ پونے جت دروت ءُ درھباتی ءَ پد مات ءَ من ءَ ھال دات کہ آ کمّو وشتر اِنت دو روچ پد واتر کیت من گیشتر گپ جنگ لوٹ اِت بلے مات ءِ آواز گار بوت۔ من ھلو ھلو کت بلے ھچ آواز نہ یتک دانکہ پون کٹ بوت من موبائل شرّی ءَ چار اِت دیستوں کاردام شتگ اِت اَنت من ھیران بوگ ءَ پد جیڑگ ءَ اِت آں کاردام ءِ ویر ءِ بُرّگ ءَ ساری کاردام چونی ءَ شُت اَنت من جیڑگ ءَ ات آں کہ من کرّکرّے ءِ آواز اشکت من وتی کِرّ ءُ گور ءَ چار اِت داں ھچ نیست اَت بُرز ءَ تیربرگ ءِ سر ءَ چار اِت منی دلیریں سنگت تیربرگ ءِ سر ءَ اَت ءُ ویر ءَ بُرّگ ءَ اَت۔

من ءَ ترسے ءَ مانرپت ءُ ترس ءِ تہ ءَ گل ات آں کہ ویر ئِے بر اِت ءُ من سنگت ءَ گوشت بس کن کارادم شُت انت آئی ءَ باور نہ بوت چہ تیربرگ ءَ ایر کپت منی گوانکوے چار ات داں کاردام شتگ ات انت گڑا آئی وت ءَ دلجم کنگ ءِ ھاتر ءَ آئی ءَ وتی گوانکو چار اِت واکی بھئی نٹورک شتگ انت آئی ءَ گوشت من تو مپتہ انچو ازباب آؤرتگ اے تپر،رینچ ءُ دستی ءِ ھچ زلورت نہ اِنت اے ویر تھنا پہ ھرّگ بُرّگ بیت ءُ پد ءَ اے ویر ءَ بجلی اوں مان نیست۔

ما گل اتیں بلے مئے دوئینانی جان ءَ بیمے ءَ پتات ما دوئیناں دْرک زُرت اَنت پہ سیکل ءِ نیمگ ءَ من کمو گوانکو ءِ لیٹ روک کت سیہ تھاریں شپ ءَ وتی دیم ءِ راہ ءَ بہ چاراں بلے منی سنگت ءَ من ءَ مکن کت کہ کسے مارا گند اِیت من لیٹ بند کت تچان بوتیں ءُ ما دوئیناں وتی پادگ چوٹ کنان کت کسے مئے پداں گپت مہ کنت من گوں وتی زوراں تچگ ءَ ات آں گشے منی پشت ءَ ملکموت کپتگ سنگت ساری ءَ ءُ من پُشت ءَ ما تچان اتیں ھرچی کہ مئے جان ءِ ھاٹی ءَ تچگ ءِ توانے من اَت ما تچگ ءَ اتیں۔

کساس دو سد گام ءِ دوری ءَ پد سنگت ءَ اناگہ ءَ کمو گوں تیز آوازی ءَ گشت ئِے ”آنگو مرو مرو لِچّے ڈے لِچّے“ من وت ءَ چہ تیزی ءَ داشت نہ کت من اوشتگ لوٹ اِت بلے من چوش تچگ ءَ نہ اِت آں کہ یکدم اوشتات بہ کن آں، گوں آئی ءِ لِچّے لِچّے گشگ ءَ لگُشت آں۔ منی گِرّان بوت آں من کمو پش کپت کہ بہ کَپ آں، بلے من نہ کپت آں من شُت آں لچّ ءِ نیام ءَ نوں من زانت من ڈگارے ءِ تلاوگ ءِ تہ ءَ آتکگ آں من لچّ ءِ تہ ءَ پسّ اِتگ ات آں ءُ سنگت ڈگار ءِ بند ءِ سر ءَ اوشتاتگ ءُ ھیسک ءُ ھمپان ات ”اڈے من ترا گشت لچّے لچّے تو انگت نہ اوشتات ئے“ آئی ءَ کندان ءَ من ءَ گْوشت من ھم گوشت اڈے زاناں من نود دو گاڑی یے آں کہ یکدم بریک کن آں“ما دوئیں کندان بوتیں من چہ لِچّ ءَ در اتک آں ما ءَ سک گل ءَ اتیں کہ ما وتی کار پہ وشّی گوازینت سیکل ءَ سوار بوتین ءُ بے لیٹی راہ کپتیں، ما اول سر ءَ وتی میتگ ءَ نہ شتیں وتی میتگ ءِ کش ءِ میتگ ءَ شتیں کہ اگاں کسے مئے پداں بہ گیپت گڑا پَد ھما میتگ ءَ بہ رو اَنت چہ ھمے میتگ ءِ تہ ءَ پترتیں پد ءَ رند ءَ وتی میتگ ءَ شتیں من سنگت ءَ را آئی ءَ لوگ ءَ رسینت ءُ پد ءَ شُت آں وتی لوگ ءَ شپ ءَ وپسگ ءَ پیسر گوں بازیں وس وساں گوست، کہ باریں باندا چون بیت کسے مئے پداں مہ گیپت ءُ ما پاشک مہ بئیں اگاں پاشک بہ بئیں گڑا من دلجم ات آں مارا پد ءَ باریں کجام بھتام ءَ سانکلانی تہ ءَ چگل دینت ما پاشک بوگ ءَ پد آگاں آھاں بہ گوش آں ما پہ میتگ ءِ دیمروئی چوش کتگ اے ھبر ءَ مئے ھچ کس ھچ وڑ ءَ باور نہ کن اَنت من اگاں تھنا گِرگ بہ باں من مِر آں من وتی سنگت ءِ نام نہ دیاں بلے من وت ءَ وت ساڑینت کہ پریشان بوگ ءِ ھچ گپ نہ اِنت من وَ ھرابیں کارے نہ کتگ ءُ شرّیں کار ءِ کمک ءَ ھُدا کنت اِنت پد ءَ جیڑ اِت مردم گوش اَنت ھرکس ھرچ وڑیں دانایے ءُ زانتکاریں پندل سازے بہ بیت وتی کار ءِ کنگ ءَ پد یک نشان ءُ پَدے یل دینت بوت کنت من چہ ھما نشان ءُ پد ءِ سوب ءَ گرگ بہ باں بلے من جیڑ اِت من ھچ چشیں نشانے یل نہ داتگ کہ گِرگ بہ باں۔ ھمے وس وسانی تہ ءَ دانکہ من واب کپت آں“۔

من روپتر ءِ سیمی بھر ءِ یازدھمی تاک ءِ وانگ ءَ پد دیم ءِ تاک لیٹینگ لوٹ اِت کہ گیشتر بہ وان آں بلے من ءَ مات ءِ توار ءَ وتی نیمگ ءَ ھیالگْور کت”شارو برو ایراناں بہ شود کہ نی روزرد اِنت من رو آں پساں کاہ ءُ کدیم کن آں“ مات ءَ گوشت ءُ شُت من ھیران بوت آں ھنی بیگاہ اَت چتور جلدی روزرد بوت کہ من ءَ گمان نہ بوت۔ من رودپتر ءَ یل دیگ نہ لوٹ اِت بلے چہ مات ءَ ناچار اِت آں شُت آں پہ ایرانانی نیمگ ءَ۔

روان اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یونائیٹڈ بلوچ آرمی ءِ جارکش مرید بلوچ ءَ پھمیانیں جاھے ءَ رسانکدراں شنگ کرتگیں درشانی ءَ گوشتگ کہ گوستگیں شپ ءَ کیچ ھوشاپ ءِ ھند تجابان ءَ سی پیک دگ ءِ سر ءَ پاکستانی پوج ءِ بنجل ءِ سر ءَ سرمچاراں راکٹ ءَ وتکاریں سلاھانی گون ءَ اُرش کرتگ ءُ پاکستانی پوج ءَ جانی ءُ مالی تاوانانی دیمپانی کنگ کپتگ –

جارکش ءَ گوشتگ کہ اُرش ءَ پد پروش وارتگیں پوج ءَ دمگ ءِ سر ءَ تیرگواری ءُ مارٹر گولہ آس داتگ ءُ سرمچارانی انگیر کنگ ءِ جھد کرتگ ءُ چریشی ءَ سرمچاراں جنگی رپکانی تہ ءَ وت ءَ کش اِتگ ءُ پھریزیں جاھاں سر کرتگ –

جارکش ءَ گوشت کہ اے بنجل تجابان ءِ بنجاھی بنجل اِنت ءُ سی پیک ءِ پھریز ءَ کنگ ءَ اِنت ءُ بلوچ مھلوک ءَ گوں دزبندی اِنت پاکستانی پوج ءِ بنجل ءُ چوکیاں دور بہ بنت کہ سرمچار کجام ھم وھد ءَ آئی ءِ سر ءَ اُرش کُرت کن اَنت –

جارکش ءَ گڈست ءَ گوشتگ کہ اے وڑیں اُرش بلوچستان ءِ آجوئی ءَ داں برجاہ مان اَنت –

سر بیتگیں ھالانی رد ءَ سیستان و بلوچستان ءَ کرونا ءِ نادراھی ءِ گیش بیگ ءَ دو روچانی موکل کنگ بیتگ اَنت –

روکپتی بلوچستان ءِ بنجاھی شھر دزاپ ءَ وانگی ادارہ جاھاں ھوار سرکاری جاھاں چار شمبے ءُ پشمبے ءَ موکلانی جار پِرینگ بیتگ اَنت –

روکپتی بلوچستان ءَ ھوار ایران ءِ دگہ اُستاناں ھم کرونا نادراھی گیش کپتگ ءُ بازیں نادراہ جاھاں نادراہ بازیں کچے ءَ تھتیگ کنگ بیتگ اَنت –

جانسلامتی ءِ گوشگ اِنت بازیں جاھاں ھمک پانزدہ دمانانی تہ ءَ کرونا وائرس ءِ تصدیق کنگ ءِ ھال بیتگ اَنت –

اُستان ءِ تہ ءَ زاھدان، سرباز، ھاش، سراوان، ایرانشھر، زابل، میر جاوہ ءُ زھک ءَ کرونا نادراھی گیش کپتگ ءُ ھمے رنگ ءَ اُستان ءِ آ دگہ جاہ سیب و سوران، ھیرمند، کسر کند، چھبار، نیکشھر، مھرستان، ھامون، نیمروز، فنوج ءُ دلگان ءَ ھم کم ءُ کساسی نادراہ دیم ءَ اتکگ اَنت ءُ چرے سبب ءَ جانسلامتی ءَ مھلوک ءِ پھریزگ ءَ کڈنی کرتگ اَنت –

نبشتانک: ماہ شان، من ءُ دردانی موسم

نبشتہ کار: مھروان کمبر

دی بلوچستان پوسٹ

ماھو! کسانی اَت، زمستان ءِ سارتیں شپ اِت اَنت، یا کہ گرماگ ءِ لُنج ءُ تاموریں شپ، ھردیں کہ من واب نہ کپت آں گُڑا مات ءَ پہ منی واب گیجگ ءِ ھاتر ءَ کِسّہ جت مُدام کِسّھانی تہ ءَ ھَست اَت یک بادشاھے ءُ بادشاہ ءَ ھَست اَت زیبائیں جنکے کہ شپانک ءِ اِشک ءَ شیدا اَت، بلے جنک بندیگ اَت ممّانی، جِننانی، شیرانی باریں دگہ کُجام کُجام رسترانی شوانگ جنک ءِ شوھاز ءَ ھمے رسترانی گون ءَ جنگ ءَ پہ سرگپتگ اَت کہ من واب شُت آں ءُ کِسّہ بھ آسر نہ بوت۔

ماھو! اے کِسّہ انگت ھَست اَنت بلے اے کِسّھانی کارست مَٹ اَنت نوں کِسّھانی تہ ءَ اَپس، شیر، شِپانک، بادشاہ، بادشاہ ءِ جنک، ممّ، جن ءُ ماڑیانی جاگہ ءَ بکتر بند گاڑیاں، بوٹ پادیں سپائیاں، تھاریں شپانی بے وھدیں پاساں لوگانی دور کنگ ءُ گِسّانی ماندارگ اَنت ھزاراں ورنایانی بیگواہ کنگ ءُ لاشانی دور دَیگ اَنت نوں دیر اِنت کہ وتی مکھیں مات ءَ چہ دیراں ، بلے ھردیں کہ من سال ءُ ماھانی سر ءَ مات ءِ ھال ءَ گراں گُڑا مات الم یک کِسّھے کار اِیت بلے اے کِسّہ نی من ءَ واب نہ گیج اَنت بلکیں گیشتر چمّانی واباں پُل اَنت ءُ آگھی ءِ سوگاتاں بکش اَنت۔

ماھو! اِنشپی ھم لھتیں انچیں درد چکاریں کِسّہ اَنت، لَھتیں ارسیگیں چم اَنت، درامدیں دَگ ءُ کِشک اَنت کہ منی چمّانی واب اَچ من پُل اَتگ اَنت ءُ کھریں شپ ءِ دامُن ءَ آگھی ءِ کُٹّ ءَ من ءَ دور اِش داتگ اَنچو گُمان بیت زندگی بس کِسّھے کہ آئی ءِ دُرستیں کارست بیگواہ کنگ بیتگ اَنت کارستانی پجّیگ ءَ منی چمّانی واب ھم بیگواہ کنگ بیتگ اَنت ءُ دگہ درامدیں واب زُور چمّانی تہ ءَ مان چِنگ بیتگ اَنت کہ اے واباں منی چمّانی روک اَچ من پُل اِتگ اَنت بس تھاری اِنت ، نہ من سُھردپیں بام ءَ دیست کن آں، نہ رولھی شینکانی تہ ءَ زردی ءِ رنگاں اے شپ انچو بے توار ءُ ویران اِنت گْوش ئے دُرستاں لڈّ اِتگ ءُ دوریں دیارے رپتگ اَنت۔

ماھو! منی بے تاھیریں دل ءِ بے تواریں دمکاں دردانی کاروانے جل اِتگ داں ھر گْور ءَ کہ چم روت ابیتکی اِنت برے برے چو ھم من ءَ گُمان بیت کہ من دردانی موسم ءَ ودی بوتگیں انچیں انسانے آں کدی درداں چہ گِسر بوت نہ کن آں، من درداں ھما درچکانی کہ بے موسم ءَ تپر ءِ دپ ءَ دَیگ بیتگ بوتگ آں من درداں ھما کدو زبھریں مُرگانی کہ تیرانی توار ءَ شپ ءِ تھاری ءَ دگہ دیاراں رپتگ اَنت من درداں یل داتگیں ھما بازار ءِ کہ بے تواری ءِ چادرے مانپوشتگ ءُ واب کپتگ من درداں ھما ماتانی کہ وتی آوار جتگیں بچّانی شوھاز ءَ برے شال ءُ برے اسلام آباد ءِ سارتیں دگاں ارساں گْوار اَنت من درداں ھما شپ آگائیں گْوھارانی کہ وتن پھازیں براتانی ھاتر ءَ دواھاں لوٹ اَنت۔ من درداں سمّی ءُ مھلب گونگیں زھگانی کہ وتی پِتانی ودار ءَ پریس کلب ءَ نشتگ ءُ واب کپتگیں مردُمانی زمیراں ٹوھینگ ءِ جُھد ءَ اَنت من درداں ھما وتن ءِ کہ آئی ءِ موکگ ءَ بچّ وتی ھوناں ریچان اَنت من درداں ھما زمین ءِ کہ آئی ءِ تھاریں شپانی مٹ کنگ ءَ ورنا سلاہ بند اَنت ءُ کوہ ءُ اگاراں پند جنان اَنت۔

ماھو! اے درد چکاریں موسمانی ساھیل ھما وھد ءَ مئے سر ءَ برجاہ مان اَنت وھدے ما اے موسمانی مٹ کنگ ءَ وت ءَ ساجو نہ کن اِیں اے تبد ءُ چاھڑیں موسم ھما وھد ءَ مٹ بنت وھدے ما گُلامی ءِ سانکلانی سِندگ ءِ ھاتر ءَ میدان ءَ درکپ اِیں میدان ءَ ما ھما وھد ءَ وتارا مُھکم کُت کن اِیں وھدے ما سما ءُ زانت ءَ چہ وتارا سرچکار کن اِیں سما ءُ زانت ھما وھد ءَ کَیت وھدے کہ ما گلزمین ءَ وان اِیں گُلزمین ءِ وانگ ھر کسی کارے نہ اِنت ، ءُ گُلزمین ءَ بس گلزمین شیدا ونت کن اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یوئیفا یورو کپ فٹبال گوازی ءِ شانزدھمی راؤنڈ ءَ دوشی شپ انگلینڈ ءُ جرمنی، سویڈن ءُ یوکرائن ءِ میان ءَ گوازی کنگ بوتگ-

دوشیگیں گوازی ءَ انگلینڈ ءَ دو گول ءُ یوکرائن ءَ دو گول ءَ باج برتگ-

یوئیفا یورو کپ ءِ شانزدھمی راؤنڈ ءِ ھپتمی گوازی انگلینڈ ءُ جرمنی ءِ میان ءَ بوتگ کہ جرمنی ٹیم ءِ نیمگ ءَ ھچ گول اسکور کنگ نبوتگ وھدیکہ انگلینڈ ءِ لیبیاں جوانی ءَ گوازی کنان ءَ دو گول داتگ ءُ باج برتگ، انگلینڈ ءِ نیمگ ءَ دوئیں گول انگلینڈ ءِ لیبی رھیم ءُ ھیری ءَ اسکور کتگ باج برتگ ءُ گوازی وتی نام ءَ کتگ-

ھشتمی گوازی سویڈن ءُ یوکرائن ءِ میان ءَ بوتگ کہ سویڈن ءِ نیمگ ءَ چہ یک گول ءِ اسکور کنگ بوتگ کہ سویڈن ءِ لیبی ایمل ءَ داتگ وھدیکہ یوکرائن ءِ لیبی اولیکسندر ءُ آرتم ءَ یک یک گول ءِ داتگ ءُ باج برتگ ءُ گوازی وتی نام ءَ کتگ-

یورو کپ ءِ کواٹر پائینل اولی گوازی آدینگ ءِ روچ ءَ سویزرلینڈ ءُ اسپین، بلجئیم ءُ اٹلی ءِ میان ءَ جتا جتائیں پٹاں بوگی اِنت-