TBP Balochi

سر بیتگیں ھالانی رد ءَ روکپتی بلوچستان ءِ تیابدپی شھر چھبار ءَ رمین ءَ کایگانی لنگر جاہ ءَ سَے کس زر ءَ کپتگ ءُ بڈاِتگ اَنت –

اھوالکار ءِ رد ءَ مروچی چھبار رمین ءَ کایکانی لنگر جاہ ءَ سَے کس آپ ءَ کپتگ ءُ بڈ اِتگ اَنت،سَے کسانی تہ ءَ دو سلامتی ءَ در کنگ بیتگ اَنت ءُ سیمی بیران بیتگ –

وئیل چھبار ءِ دمگ رمین ءَ بیتگ کہ اود ءَ کایک لنگر بیتگ ءُ ماھیگانی ایرگیجگ ءَ چریشی ءَ ھمے میان ءَ سَے کس زر ءَ کپتگ اَنت ءُ اشانی تہ ءَ جاڑیگیں مردماں دو کس وتی جھداں کش اِتگ اَنت ءُ سیمی داں دیراں آپ ءِ چیر ءَ بیگ ءُ بیران بیتگ –

اشانی دو کس بے ھوش بیتگ اَنت ءُ ھردوک بے ھوشی جاوراں چھبار ءِ نادراہ جاہ ءَ برگ بیتگ اَنت –

نبشتانک: بلوچ راج ءَ تِپاک بیگ لوٹ اِیت

نبشتہ کار: عبیداللہ کلمتی

دی بلوچستان پوسٹ

ناتِپاکی یک سکّیں سِلّیں چیزے، اگاں اے چیز یک راجے ءِ، یک ٹکّے ءِ، یک کھولے ءِ ءُ یک مُلکے ءِ سر ءَ کپت گڑا آ سک پدمنتگ ءُ ویران بیت، ایشی ءِ درور مئے ءُ شمئے دیم ءَ اِنت، ما ءُ شما ایشی ءَ چم ء وت گندگ ءَ اِیں کہ مئے راج بزاں بلوچ ءِ سر ءَ کپتگ، اگاں ما اے گپ ءَ بہ گُش اِیں کہ بلوچ ءِ پدمنتگی ءِ یک مزنیں سَوَبے ناتِپاکی اِنت گڑا رد نہ بہ اِیں، مئے راج سک ناتِپاک اِنت چہ ھمے سَوَب ءَ پہ بلوچ ءَ وشّیں روچ نیست، ھر وھد ءَ بلوچ بزّگ اِنت، پہ پِٹّے آپ ءَ ھم بلوچ تلوس اِیت، پہ بلوچ ءَ ناں شرّیں وانگجاہ ءُ شھدربرجاھے ھست ءُ ناں یک جْوانیں تْرھجاہ ءُ نادْرھجاھے ھست، ناں شرّیں دگ ھست، لھتیں ھونی ئیں دَگ اَنت کہ یک سالے ءَ ھزارانی کساس ءَ ھمے دگانی سَوَب ءَ بلوچ شھید بنت، دامچراگ(بجلی) ءَ وَ یلہ کن ھمے گیس کہ بلوچ ءِ گُلزمین ءَ در آیگ ءَ اِنت ھمے ھم نہ رس اِیت ئِے، ناں کہ امن ءُ ایمنی یے ھست، چشیں روچے نیست کہ بلوچستان ءَ ماں جاگھے ءَ بمبے نہ تْرکّ اِتگ، زوراکاں مردمے گار نہ کتگ ءُ نہ کُشتگ، ناں کار ءُ روزگارے ھست، بلوچستان ءِ ھر کنڈ ءَ آس روک اِنت، لھتیں جاھاں مردم گار اَنت، لھتیں جاھاں گریبی ءُ بزّگی اِنت، لھتیں جاھاں پاکستان ءِ لشکر بزّگیں بلوچاں جنَگ ءُ چوپگ ءَ اِنت، مئے مات، گھار، برات ءُ کماش ھرّوچ دَگانی سر ءَ جتاھیں جیڑوانی سَوب ءَ زھرشانی کنگ ءَ اَنت، ھر دمگ زُلمانی آماچ اَنت، بلوچستان ءِ سروزیر، پرگِنگی وزیر ءُ اسمبلی ءِ باسک ھم پَوج ءِ گچین کتگین اَنت، بلوچ ءِ کجام جیڑو ءَ دیم ءَ بْیار اِیں؟ ھمینچو باز اَنت کہ ما وتی جاگہ ءَ، یک ھِساب زانتے ھم منی ھیال ءَ ھساب کُت نہ کنت اِش، اے دْراھیں جیڑواں یلہ دے اِیں ءُ کا اِیں ھمے ناتِپاکی ءِ گپ ءَ کن اِیں کہ ھمیشی ءَ مرچی بلوچ ءُ بلوچستان پرے ھال ءَ کتگ، بلوچ ءِ راجکاری(سیاست) ءِ تہ ءَ ناتِپاکی ھست، لبزانک ءِ تہ ءَ ھست، جنگ ءِ تہ ءَ ھست، چاگِرد ءِ تہ ءَ ھست ءُ چہ ایشاں اَبید ھم دگہ بازیں چیزانی تہ ءَ ھست، راجکاری ءِ تہ ءَ چون ھست؟ انّی ما بہ چار اِیں کہ بلوچ جمھوری راجکاری گَل ھست اَنت یا کہ راجکارانی جند، اے دْرست ناتِپاک اَنت، یکّے دومی ءَ ھراب گُش اَنت، اگاں ما بلوچ اسٹوڈنس آرگنائزیش(bso) ءَ بہ چار اِیں کہ بلوچ ءِ مستریں راجکاری گَل اِنت اے ھم تِپاک نہ اِنت بلکیں جتا جتا اِنت، یکّے بی ایس او پجّار اِنت، یکّے بی ایس او آزاد اِنت ءُ دگہ نہ زان آں گوں کجام نام ءَ زانگ بیت، بلوچ ءِ لبزانک ءِ توک ءَ ھم ناتپاکی ھست انچوش کہ دنیگا مئے بلوچ لبزانکار یکّیں سْیاھگ ءِ رھبند ءِ سر ءَ ھم تِپاک ءُ ھم لیکہ نہ اَنت، یک لبزانکارے سید ھاشمی ءِ سْیاھگ ءَ نبیسّ اِیت ءُ دگہ یکّے اِنّا۔

بازیں لبزانکارے بلوچی ءَ تازی ءِ زگریں آباں زیر اِیت ءُ لھتے انّا، اے سک بژنی گپّے کہ یک زبانے ءَ یک انچیں سْیاھگے نیست کہ سرجمیں لبزانکار ھمے یکّیں سْیاھگ ءِ سر ءَ تِپاک ءُ دلجم بہ بنت، مردم ءَ سک بژن بیت، جنگ ءِ تہ ءَ چون ناتِپاکی ھست؟ بازیں وھد اِنت کہ بلوچ ءِ آجوئی ءِ جنگ بیگ ءَ اِنت، ایشی ءِ تہ ءَ ھم منی نزّ ءَ تِپاکی نیست، یک جنگی گَلے بلوچ لبریشن آرمی(bla) ءِ نام ءَ زانگ بیت ءُ دگہ یکّے بلوچستان لبریشن پرنٹ(blf) ءِ نام ءَ زانگ بیت ءُ دگہ ھم گَل ھست کہ جتائیں ناماں گوں زانگ بنت بلے ایشانی بایَد ھمیش اَت کہ اے دْراہ ھوار بیتین اَنت، یکجاہ بیتین اَنت، بلے چوش نہ اِنت، (البت من اے گپ ءَ رد ھم بیت کناں) مئے تہ ءَ چاگردی ناتِپاکی ھم ھست کہ ما وتی چاگرد ءِ تہ ءَ ناتِپاک اِیں، ھمسائگ گوں ھمسائگ ءَ جنگ کنت، برات گوں برات ءَ، اے شر نہ اَنت بلکیں پہ مارا تاوان اَنت، چاگِردی ناتپاکی سکّیں ھرابیں چیزے۔ ءُ دگہ یک ھم مزنیں ناتِپاکی یے مئے تہ ءَ ھست، آ ایش اِنت کہ ما اے گپ ءِ سر ءَ پھر نہ بند اِیں کہ ما بلوچ اِیں بلکیں ما اے گپ ءِ سر ءَ پھر بند اِیں، درور من گشاں کہ من کلمتی یے آں، دگہ یکّے گُش اِیت من رِندے آں، یکّے گُش اِیت من چہ پِلاں ٹَکّ ءَ سْیادی دار آں، اے ناتِپاکی ءَ بلوچ بے کساس تاوان داتگ، انّا! مارا وتی ٹکّانی سر ءَ پھر بندگ نہ لوٹ اِیت، وتی پیرُکانی سر ءَ پھر بندگ نہ لوٹ اِیت، بلکیں مارا اے گپ ءِ سر ءَ پھر بندگی اِنت کہ ما بلوچ اِیں، ما چہ ھما راج ءَ اِیں کہ آئی ءِ تہ ءَ مھمانداری، ایمانداری، میارداری، دلیری ءُ دگہ شرّی مان اِنت، مارا بلوچ بیگ لوٹ اِیت، تپاک بیگ لوٹ اِیت، یکمُشت ءُ ھم ھیال بیگی اِنت۔

اگاں ما تِپاکی ءُ ھم دستی ءَ پہ وت گچین بہ کن اِیں گڑا الّم پہ بلوچ ءَ مادنیں راھے در کیت، بلوچ ءِ جیڑو توجیلّ بیت کن اَنت، وتی ھکّ ءَ چہ ریاست ءَ پچ گِپت کت کنت، وت ءَ چہ زوراکانی دست ءَ آجو کت کنت، پہ وت ءَ یک شرّیں ءُ بْراھداریں چاگِردے جوڑ کنت بلے بس ما تِپاک بہ بہ اِیں انشاءَاللہ زوت دیمروی کن اِیں ءُ چو انگریزانی وڑ ءَ ماہ ءِ سر ءَ سرکپ اِیں ءُ پد ءَ دیم پہ مریخ ءَ سرگِر اِیں۔

بلوچ ءُ بلوچی ءُ بلوچستان زندگ بات اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

وئیل راسک ءَ سپاہ ءَ تیرگواری کرتگ ءُ اود ءَ یک کسان سالیں زھگے بیران ءُ زالبولے زدگ بیتگ-

سر بیتگیں ھالانی رد ءَ روکپتی بلوچستان ءِ دمگ راسک ءَ ایرانی سپاہ ءَ تیرگواری کرتگ ءُ چریشی ءَ یک کسان سالیں زھگے بیران ءُ یک زالبولے زدگ بیتگ –

اھوالکار ءِ رد ءَ راسک ءِ سیمسری نزیک ءَ مولتان ءَ ایرانی سپاہ ءَ یک گاڑی دست داتگ چریشی ءَ گاڑی نہ اوشتاتگ ءُ سپاہ ءَ تیرگواری کرتگ کہ چریشی ءِ آسر ءَ سیزدہ سالی ئیں یونس بیران بیتگ ءُ آئی ءِ مات ءِ گوھار نور بی بی زدگ بیتگ –

اھوالکار ءِ رد ءِ بیران ءُ زدگ بیتگیں مردم چھبار ءِ نادراہ جاہ ءَ برگ بیتگ اَنت –

اھوالکار ءِ رد ءَ یونس ء مھمد بکش جھمنند مھر آباد ھنگ کہ وتی مات ءِ گوھار ءَ جاندراھی ءَ برگ ءَ بیتگ کہ آئی ءِ سر ءَ تیرگواری کنگ ءُ کُشگ بیتگ، ھمے درچ ءَ آئی ءِ مات ءِ گوھار نوربی بی زدگ بیتگ –

ھمے رنگ ءَ ایران شھر ءَ تیرگواری ءَ یک مردمے زدگ بیتگ –

تیرگواری ءِ وئیل پھرہ “ایرانشھر ” ءَ بیتگ کہ اود ءَ دکانے ءِ سر ءَ سلاہ بندیں مردماں تیرگواری کرتگ ءُ ھاجی ناسر ءِ سر ءَ تیرگواری کرتگ ءُ زدگ کرتگ –

اھوالکار ءِ رد ءَ ھاجی ناسر ابرو وتء دکان ءَ بیتگ کہ اود ءَ آئی ءِ سر ءَ تیرگواری کنگ بیتگ ءُ زدگ بیتگ زدگیں جاوراں آ ایرانشھر ءَ کاتم نادرجاہ ءَ برگ بیتگ کہ اود ءَ آئی ءَ وتی درد نہ سگگ اِتگ ءُ بیران بیتگ –

ھمے رنگ ءَ بلوچ کمپئن فعلین ءِ گوشگ اِنت کہ ایرانی لشکر ءَ بلوچستان دُز ءُ ڈنگانی دست ءَ یلہ کرتگ کہ اود ءَ ھروھد ءَ چوشیں وئیلاں بازیں مردمے وتی زندگی ءَ زبھر بیان اَنت –

سوگات گومازی ءَ شھید اکرم کسانو سَے گول ءَ باج برتگ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی دومی راؤنڈ ءِ سیمی گوازی کنگ بوتگ –

مروچگیں گوازی ءَ سوگات گومازی ءُ شھید اکرم کسانو ءِ میان ءَ بوتگ ، دؤئیں ٹیمبانی لیبیاں گوں جوانی ءَ لیب داشتگ – شھید اکرم کسانو ءَ دو گول داتگ، وھدیکے سوگات گومازی ءَ سَے گول داتگ ءُ باج برتگ- شھید اکرم کسانو ءِ ٹیم پروش داتگ-

مھمان ھاس ماسٹر ھکیم بلوچ ءُ ماسٹر عظیم بلوچ ءَ دوئیں ٹیمانی لیبی دلبڈی داتگ ءُ ستاشانی کرتگ انت –

آؤکیں گوازی گومازی برمش دازن ءُ شھید اسمائیل تمپ ءِ میان ءَ اسکول گراؤنڈ ءِ پٹ ءَ بیت انت-

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ دگہ ھژدہ نوکیں کیس رپورٹ کنگ بوتگ – نوکتریں رپورٹانی رِد ءَ جھانی وبا کرونا وائرس ءِ آماچ بوتگیں نادراھانی کچ نوزدہ ھزار ءُ دوسد ءُ شش ءَ سر بوتگ اَنت –

جاندراھی بنشون ءِ نیمگ ءَ چہ شنگ بوتگیں رپورٹ ءِ رِد ءَ شمبے ءِ روچ ءَ بلوچستان ءِ دمگ شال، ھزدار، ژوب، ءَ ھژدہ دگہ نوکیں کیس رپورٹ بوتگ ، چریشی ءَ پد کرونا وائرس ءِ نادراھانیانی کچ نوزدہ ھزار ءُ دو سد ءُ شش ءَ سر بوتگ اَنت ، رپورٹ ءِ رِد ءَ ھشت نادراھانی جاندراھی ءَ پد جاندراہ بوتگیں مردمانی کچ ھژدہ ھزار ءُ ھشت سد ءُ شست ءُ ھشت انت وھدیکے کرونا وائرس نادراھی ءَ دوسدو دو مردم دنیگت ءَ بیران بوتگ –

دروگیں دیم پہ دیمی ءَ جنگ بیتگیں مردمانی بیگواھی ءِ گواہ جاڑیگ اَنت- ماما قدیر بلوچ

دروگیں دیم پہ دیمی جنگ ءِ نام ءَ جنگ بیتگیں بیگواھیں مردمانی بیگواھی ءِ بارہ ءَ گواہ جاڑیگ اَنت کہ آ پاکستانی چیریں ادارہ ءُ پوج ءَ جتا جتائیں جاھاں چِست کرتگ ءُ بیگواہ کرتگ اَنت -دروگیں جنگ ءِ نام ءَ مردمانی کُشگ ءُ گیشیں ورنایانی دزگیری ءِ دروگیں ٹاھانی ھلاپ ءَ باندا شال ءَ زھرشانی کنگ بیت ایں-

اے گپانی درشانی وائس فار بلوچ مسنگ پرسنز ءِ کسان کمک سرکماش ماما قدیر بلوچ ءَ بلوچستان ءِ بنجاھی شھر شال ء وی بی ایم پی ءِ زھرشانی بنجل ءَ کرتگ اَنت-

بیگواھیں مردمانی زھرشانی بنجل ءَ چار ھزار ءُ دوسد ءُ چِل ءُ نُھ روچ سرجم بیتگ – بلوچ یکجھتی کمیٹی ءِ رھشون ءُ باسکاں بنجل ءَ اتکگ ءُ ھمدری درشان کتگ –

ھمے وھد ءَ سید اویس شاہ ءِ کماش بنجل ءَ اتکگ ءُ رسانکدراں تران کرتگ ءُ وتی چکے بارہ ءَ سرجمیں ھال گوشتگ اَبت – سید اویس شاہ ءُ جھانزیب ءِ سی ٹی ڈی ءِ دزگیری ءُ ٹاہ دیگ کھولاں رد کرتگ اَنت –

ماما قدیر بلوچ ءَ گوشت کہ گوستگیں روچاں مستونگ ءِ دمگ اسپلنجی ءَ پنچ مردم کہ دروگیں دیم پہ دیمی ءِ جنگ ءَ جنگ ءُ گوستگیں روچ ءَ دگہ دو ورنایانی دزگیری سی ٹی ڈی ءِ واکداراں دزگیر کنگ ءِ ٹاہ داتگ مئے گور ءَ گوست ءِ ھال جاڑیگ اَنت اے مردم پیسر ءَ گرگ ءُ بندیگ کنگ بیتگ اَنت –

آئی ءَ گوشت کہ دروگیں دیم پہ دیمی جنگ ءِ نام ءَ دزگیر کرتگیں مردم ءُ بیگواھیں مردمانی کوش ءِ ھلاپ ءَ باندا شال ءِ پریس کلب ءِ دیم ءَ بلوچ یکجھتی کمیٹی ءُ وائس فار بلوچ مسنگ پرسنز ءِ نیمگ ءَ زھرشانی کنگ بیت اِنت –

ماما قدیر ءَ گوشت کہ دراھیں تکاں بندوکیں مردماں گوں دزبندی کن آں زھرشانی ءَ ھوار بہ بنت ءُ دانکہ دگہ دزگیر ءُ بیگواھیں مردمانی زندگیاں بہ رکین اَنت ءُ اے مردمانی کوشکاراں کانود ءِ چیر ءَ بیار اَنت ءُ بہ اوشتارین اَنت –

آئی ءَ گوشت کہ دمگی ءُ میان اُستمانی انسانی ھکانی ادارھاں اے بیتگیں وئیل ءِ سر ءَ ترندیں گامگیج بہ زور اَنت ءُ وئیل ءِ بارہ ءَ پَٹ ءُ پول بہ کن اَنت –

پنجاب ءِ بنجاھی شھر لاھور ےَ لبرٹی چوک ءَ بلوچ کونسل ءِ دزبندی ءَ نوید بلوچ ءِ بیگواھی ءِ ھلاپ ءَ زھدشانی کنگ بیتگ –

زھرشانی کنوکانی دستاں پلے کارڈز ءُ بینر بیتگ اَنت کہ زھرشانی کنوکاں چہ سرکار ءَ نوید بلوچ ءِ سلامتی ءِ یل کنگ ءِ لوٹ کنگ ءُ گوشتگ کہ اے ڈیھ ءَ بلوچ بوگ جرمے –

آیاں گوشت کہ ابید پیسری بیگواھیاں دگہ ورناہ بیگواہ کنگ بیگ ءَ اَنت -زھرشانی کنوکاں گوشت کہ نوید بلوچ ءِ بیگواھی ءِ ھلاپ ءَ مھیم برجاہ مان اِیت –

زھرشانی ءَ لاھور ءِ جتا جتائیں وانگی ادارھاں بندوکیں نودربران بازیں کچے ءَ بھر زرتگ –

نوید بلوچ یونیورسٹی آف انجینرنگ اینڈ ٹیکنالوجی لاھور ءِ مائننگ ڈیپارنمنٹ ھشتمی سمسٹرے نودربرے بیتگ، کہ آئی ءِ سیادی بلوچستان ءِ شھر تربت شھرک ءَ اِنت –

نوید بلوچ گڈی سال ءِ نودربر بیتگ، فائنل ایئر پروجیکٹ ءِ سرجمی ءَ پنچ روچ ءَ پیسر آ شال ءَ شتگ کہ اود ءَ آ نُھ جنوری دوھزار ءُ بیست ءُ یک ءَ گار کنگ بیتگ –

نوید بلوچ ءِ بیگواھی ءِ ھلاپ ءَ چارگردی رسانکجاھاں کمپئن کارمرد کنگ بیتگ کہ درستاں سربر اِنت –

سیٹلائٹ ٹاؤن ءَ ایف سی ءِ ترءُگرد کنوکیں ٹولی ءِ سر ءَ دز بمب اُرشے کُتگ جانی مالی تاوان داتگ- مزار بلوچ

سربوتگیں ھالانی رِد ءَ گوستگیں شپ ءَ کیچ ءِ بُنجاھی شھر تربت سیٹلائٹ ٹاؤن ءَ ناشناسیں سلاہ بندیں مردماں زورگیریں پاکستانی پوج ءِ تر ءُ گرد کنوکیں گاڑی ءِ سر ءَ دز بمب اُرشے کتگ –

دزبمب اُرش ءَ پاکستانی پوج ءَ جانی ءُ مالی تاوان رس اتگ-

دومی نیمگ ءَ بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءِ ادار دوازدہ بج ءِ وھد ءَ زورگپتیں پوج ءِ تر ءُ گرد کنوکیں ٹولی ءِ گاڑی ءِ سر ءَ دز بمب اُرشے کُتگ –

جارکش ءَ گوشتگ اُرش ءِ آسر ءَ پاکستانی پوج ءَ جانی ءُ مالی تاوان رس اتگ –

آئی ءَ گوشتگ کہ مئے اُرش بلوچستان ءِ آجوئی ءَ تاں زورگیریں پوج سر ءَ برجاہ مان انت –

نبشتانک: زالبول زندگی ءِ بھر اِنت

نبشتہ کار: کیگد شاکر

دی بلوچستان پوسٹ

مُدام کہ زالبول ءِ ھک ءُ ھکوک ءِ گپ جنگ بوت اِنت گُڑا اے سرھال ءِ تہ ءَ باز چِست ءُ ایر ود اَنت کہ زالبُول ءِ حق پہ لوگ ءُ چک ءِ سمبَلگ اِنت۔

آ اے وتی بستار ءُ سِنچ ھست کہ چُش ھر وھدَ نظرانداز کنگ بوت؟ زندگی ءِ ھر پڑ ءِ تہ ءَ آئی ءَ یک الگیں مقامے بہ بیت ۔ وھدیکہ گُشگ بوت اگاں کہ ما یک مردے ءَ تعلیم دے گڑا اے تعلیم ھمائی ءِ حد ءَ تک ھست۔ اگاں یک زالبولے ءِ تعلیم یافتہ بِت گُڑا آ وتی گون ءَ سجّھیں قوم ءَ تعلیم دنت-

مئے نوں کہ کسان سالیں نسل ءِ واستا ءُ آیانی کامیابی ءِ مستقبل ءِ وستا زالبول ءِ تعلیم یافتہ بُوگ باز الامّی اِنت اگاں بلوچ زالبول ءِ حق ءِ ھبر بہ بیت گڑا پیسرا چے آ وانی حقوق بلوچے روایت ءِ تہ ءَ موجود اِنت-

ما وتی مات ءُ گوھار ءَ چے آیانی حقوق ءَ چون دُر کرت کن آں ھرچ وھد ءَ ھرچ تکلیپ ءُ جَنجال ءِ تہ ءَ مئے مات ءُ گوھار ھرکس ءَ چے دیم ءَ اَنت وھدیکہ مئے پجار گڑا زالبُول نزام ءَ چہ مرد ءَ باز شَرتر سمبالا ءَ اِنت انگت آ وتی بنیاد ءِ ھق ءَ چَہ زھبرن اَنت –

ھرچ میدان ءَ آیانک خدمات انگت نظرانداز بوَگ ءَ اَنت مئے زالبوال چہ وانگ ءُ تعلیم ءِ تہ ءَ باز پُشت ءَ اَنت اگاں چارگ بہ بیت گڑا بلوچ زالبوال چَہ ھر راج ءُ قومے ئِے زالبوال چہ باز زھن ءُ ہنرمند اَنت اے دؤروباری ءِ تہ ءَ زالبوال پہ وتی راج ءِ ترقی باز جد ءُ جھد کَنگ ءَ انت ءُ آ وتی اے مکسد ءَ کامیاب ہم ھست اَنت زالبوال ءَ ہم وتی زندگی ءِ کامیاب مستقبل ءِ چار ءُ بچار کَنگ ءِ ھق ھست اِنت انیگیں دیمروئی ءِ دور ءَ انگت گیشتِر اِلاکہ ءِ تہ ءَ باز جنک کسان سالی ءَ آروس دیگ بیگ ءَ اَنت- اے کسان سالیں آواز ءُ پریاد ءَ پہ وتی ثقافت ءِ نام ءَ نظرانداز کن اَنگ مارا پہ وتی راج ءُ قوم ءِ ترقی ءِ واستا وتی زالبوالانی تعلیم ءُ ماحولیاتی ءِ زندگی ءِ سر ءَ توجہ دَیگ لوٹ اِت تاکہ مئے مات ءُ گوھار وتی قابلیت ءَ، وتی زھنیت ءَ دنیا ءَ پیش بہ دار ایت مئے حکومت زالبوالانی تعلیم ءُ ترقی ءِ واستا ھرچ قِسمیں ءِ گامگیج کنگ ءِ کوشاں پکائیں تکاں زالبوال ءُ مرد برابر ءِ بنیاد ءَچارگ بہ بنت ءُ وتی قوم ءُ راج ءِ دیمرئی ءُ واستا کُوشش بہ کن اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

نبشتانک: کلکشان

نبشتہ کار: لیو ٹالسٹائی

رجانکار: الطاف منیر بلوچ

دی بلوچستان پوسٹ

مزنیں وھدے ءَ پیش سرزمین ءِ سر ءَ یک بلاھیں ڈُکالے اتکگ اَت دراہیں کور،جو،چات ءُ درچک ،کاہ ءُ ڈنگر ھُشک بوتگ ات انت بنی آدم ءُ دلوت چہ تُن ءَ مُرت انت۔

یک شپے ءَ یک کسانیں جنکے ءَ پہ وتی نادراھیں مات ءِ واستا یک تاسے زُرت ءُ ڈن ءَ پہ آپ ءِ شوہازا دراتک آئی ءَ دُراہیں جاگھاں تچ ءُ تاگ کُت بلے آپے شوہاز کُت نہ کت ءُ آئی ءَ سک دم بُرت انچوکہ تچک بوت ،واب کپت وھدے کہ چہ واب ءَ بُست ئِے کت ءُ تاس ءِ چست کت گڑا اجّکہ بوت دیستے داں تاسا را آپ مان۔تاس چہ ساپ ءُ پلگاریں آپاں چکار اَت کسانیں جنک شات ءُُ گل اَت ءُ انچو کہ آ تاسا وتی لُنٹانی نزیک ءَ بَرگی اَت ،آ وتی مات ءِ ترانگ ءَ کپت ءُ تاس ءِ دست ءَ ات ءُ دیم پہ وتی لوگ ءَ تچان بوت ،ھمنچو کہ آئی ءِ تیز تتک کُت تتک آئی ءَ انچو اشتاپ کتگ اَت کہ آئی ءِ راہ ءِ سرے کسانیں کُچک ھم ندیست اَنت۔

آ کُچک ءَ گوں ماں اڈیت ءُ تاسے دور دات کُچک ءَ بزگیں وککگے جت، کسانیں جنک ءَ زوت تاس ءَ راگِپت آئی ءِ ھمے مار اِت کہ تاس ءِ شکون دیمی ءَ آپ رتکگ انت بلے تاس راستی ءَ ایر اَت ءُ آپ ہم چو پیسریگی ءَ مان اتنت ءُُ آئی لھتے آپ وتی چنک ءَ ایر رِہت ءُ کچک ءَ چلَپ چلَپ ءَ وارت انت ءُ تاہیر ے رس ات وھدے کہ کسانیں جنک ءَ واتر تاس چست کُت آ چہ دار ءَ چاندی ءِ تہ ءَ بدل بوتگ اَت آئی ءَ تاس لوگ ءَ بُرت ءُ وتی مات ءَ را دات مات ءَ گشت،’’من ءَ بِل ھمے وڑ ءَ مِراں،شر تِراَت کہ تو بوارتیناں‘‘۔آئی ءِ مات ءَ تاس ءَ را پد ءَ آئی ءِ دست ءَ دات ھما ساہت ءَ تاس چہ چاندی ءَ سہرے ءِ تہ ءَ بدل بوت کسانیں جنک ءَ دیراں داں اوپار کت نہ کت ءُ انچو کہ تاس ءَ را وتی لنٹانی ءَ بَرگی اَت کہ دروازگ پچ بوت ءُ یک رہگززی یے تہ ءَ اتک ءُ آپے لوٹے کُت کسانیں جنک ءَ وتی گج ایربُرت انت ءُُ تاس رہگوزی ءَ را دات ءُ اناگت ءَ ہپت (۷) بلاہیں نُگراہ چہ تاس ءِ تہ ءَ پدر بوت ءُ ساپ ءُ پلگاریں آپ ءِ جوے آئی ءِ تہ ءَ چہ تچگ ءَ لگ ایت ءُ ہپتں نُگراہ بُرز ءَ روان بوت انت۔آ بُرز چہ بُرز تِر ءَ چست بوان بوت انت انچوکہ آزمان ءَ رس اِت انت ،کلکشان جوڑ بوت انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت