TBP Balochi

نبشتانک :تو انگت بہ جِلِتین ئے

نبشتہ کار: لطیف سخی

دی بلوچستان پوسٹ

زند برے پیچ ءُ تابے ءَ گوں سر گیپت، دگنیا ءِ بازیں آسرانی پشت ءَ تچ اِیت۔ برے مردم گوں ھیالاں دو چار کپ اِیت برے شاہ گامیں ڈَنّ ءُ پَٹ چار اِیت پہ نیمون وتی تکانسریانی ھلاس کنگ ءَ۔

وھد ءِ ھاجتانی پیلو کنگ ءِ پشت ءَ مردم بازیں جُھلیں جاھاں رھادگ بیت برے برے انگریں ترانگانی آماچ بیت برے گوں وت ءَ جست ءُ پُستاں گَٹ بیت، مردم آسریں زند ءَ مدام پشت کپ اِیت سکّی ءُ رنجانی، یاں کہ دوستیگیں ارواہ ءِ دامن ءَ۔ ھما مردم کہ ترا پہ مدامی لوٹگ ءِ ودار ءِ سانکلاں بندوک اَنت بنی آدم اِے رنج ءُ گمانی پُشت ءَ برے یک جاھے وتی سر ءَ کَش اِیت، برے گمانی تیاب ءَ ایر بکّیت ءُ برے وتی سُنٹ درنگ کنت ءُ درداں دل ءِ دیوال ءَ مان جنت۔

اے زند چونائی ءَ یک چکاس جاھے کہ مردم بازیں چکّاساں گوں دیم پہ دیم بیت برے ماں جنگجاھے، برے ماں روزگارے ءِ تچ ءُ تاگ ءَ ءُ برے وتی مِھروانے مِھرانی چکّاساں دیمی بیت اِے زِندمان ءِ بازیں چکاس سگگ نہ بنت بازیں وھد ءَ تئی ھمکوپگیں ھمراہ چہ ترا گِسر بنت ءُ آیانی یات سینگ ءَ دجنت آ ھمراہ بوتگ اَنت کہ آیانی ھستانکی مئے زندمان ءِ سر ءَ ساھیل بوتگ اَنت، آیاں مارا کِشک پیش داشتگ بلے ارمان اِنت کہ وھد ءِ چکّاساں آ کوپگیں ھمبل چہ ما گِسر کرتگ اَنت۔

ھمے راہ ءِ کوپگانی رم ءَ یکے (ر) کہ آئی ءِ سر ءُ سوج مدام پہ مئے واست ءَ درونتانی داب ءَ بوتگ اَنت آئی ءَ مدام ھمے گْوشت کہ من یک نہ بزانتیں آں، راجکاری بہ بیت یا زانشتی پِڑ بہ بیت من آ داب ءَ ھچ سر بوت نہ کن آں۔ من یک بے زانتیں مردمے ءِ داباں گوں شما ھوار آں بلے آئی ءَ باز زانت ءُ مارا بازیں سرپدی ئِے دات آئی ءِ گِسر بوگ ءَ چہ یک ھنکینے ویران بوت من ءَ انچش سما بوت کہ یک تیار ءُ نز آرتگیں جوھانے ءَ ر ڈیل مان دیگ ءُ آس دیگ بوت۔ آئی ءَ ھما مکتب جاہ کہ ما ونتگ ءُ دربرتگ سرجم ءَ ویران بوت۔

آئی ءِ دیستگیں وابانی ماڈی کروجگ بوت اَنت بلے آئی ءِ داتگیں سِکین انگت مئے مگزانی تہ ءَ پشکپتگ اَنت بلے آئی ءِ رھادگی چہ پد کسّے ھم پہ آئی ءِ ویرانیں مکتبجاہ ءَ نہ جْیڑ اِیت۔
اِے گرم ءُ انگریں مولماں آئی پہ مکتب جاہ ءَ شپ ءُ روچ یک کرت اَنت۔ بلے ارمان اِنت کہ آئی ءِ مکتب جاہ بے آسریں کشکے ءِ مردمانی دست ءَ لگتمال اِنت اگاں زند ءَ یکبرے پد ءَ ترا موہ بہ داتیں گِند ئے تو دوبر بہ اتکین ئے ءُ مکتب جاہ ءِ اِے بدیں ھال بہ گپتیں بلے چے کن ئے اِے زندے انچیں کہ یکبرے مردم گِسر بوت پد ءَ ھیال پشت کپ اَنت شُتگیں ھمبل واتر نہ بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی بلوچستان ءِ دمگ راسک ءَ سر بیتگیں ھالانی رد ءَ ایرانی چیریں ادارھاں دو ورنا آوار جتگ ءُ بیگواہ کرتگ اَنت –

گیشیں ھالانی رد ءَ گوستگین روچ ءَ روکپتی بلوچستان ءِ دمگ جکیگور ءِ مھمنندیں پانزدہ سالی ئیں شھزاد برم ء کامران ءُ امیر ھسین ساربوکی ایرانی چیریں ادارھاں آوار جتگ ءُ برتگ اَنت –

بلوچ کمپین فعالین ءَ گوشتگ کہ ھردوکیں مردم گوستگیں روچ ءَ آوار جنگ بیتگ ءُ برگ بیتگ اَنت –

روکپتی بلوچستان ءَ روچ پہ روچ چوشیں وئیل گیش بیان اَنت گوستگیں روچ ءَ پھرہ ءِ میانی دمگ آبادان ءَ سَے کسانی جون دزکپتگ اِت اَنت ءُ لس مردم وتی گمانانی تہ ءَ دزکپتگیں جوناں بیگواھی ءِ آماچ کرار دیگ ءَ اَنت –

سربوتگیں ھالانی رِد ءَ بلوچی زبان ءِ وش الھانیں گشندہ مسلم ھمل یکرندے پد ءَ گٹگانی نادراھی ءَ نگیگ کتگ –

ھالانی رِد ءَ مسلم ھمل اے وھدی سند ءِ مزن شھر کراچی ءَ نادراھجاہ ءَ پہ الاج ءَ داخل کنگ بوتگ – بلوچی زبان ءِ گشندہ یکرندے پیسر ءَ ھم گٹگانی نادراھی ءِ آماچ بوتگ کہ آئی ءَ وتی گٹگ بدل کرتگ انت بلے گوستگیں روچ ءَ پد ءَ آئی ءِ جاور نگیگ بوتگ انت –

ڈاکٹرانی گوشگ انت کہ آئی گٹگ آکری کنڈیشن ءِ تہ ءَ انت ابید گٹگانی مٹ کنگ ءَ دگہ ھچ راہ نیست –

اے درگت ءَ مسلم ھمل ءَ ھم وتی نادراھی ءِ گپ راست کتگ گوشتگ کہ آئی ءِ تب وش وش نہ انت ءُ اے وھدی آ کراچی ءَ نادراہ جاہ ءَ ایڈمٹ انت ءُ جاور نگیگ انت کریٹیم ھم بڈیتگ ءُ گڈی اسٹیج انت ءُ من ءَ وتی گٹگ مٹ کنگی انت –

مسلم ھمل بلوچی زبان ءِ گشندھی ءَ ھوار ھوار یک راج دوست ءُ بلوچ دوستیں مردمے ءُ آئی ءَ وتی سلامتی ءِ واستا دوا دزبندی کرتگ –

بالی پٹ ءِ دگ ءِ سر ءَ زورگیریں پاکستانی پوج ءِ کاروان تراک ناکیں شوروانی نشانگ جوڑ کتگ – جئیند بلوچ

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ شال ءَ پاکستانی پوج ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں شال ءَ بالی پٹ ءِ دگ ءِ سر ءَ زورگیریں پاکستانی پوج ءِ کاروان تراک ناکیں (آئی ای ڈی) شوروانی نشانگ کتگ –

جارکش ءَ گوشتگ کہ پاکستانی پوج ھما وھد ءَ نشانگ کنگ بوتگ وھدیکہ کاروان عسکری پٹرول پمپ ءِ نزیک ءَ گوزگ ءَ بوتگ ، تراک ءِ آسر ءَ زورگیریں پوج ءِ چار کارمند مُرتگ ءُ شش ٹپی بوتگ وھدیکے یک گاڑی ءِ سرجمی ءَ تباہ بوتگ –

جارکش ءَ گوشتگ کہ مئے اُرش زورگیریں پوج ءِ درآیگ ءُ بلوچستان ءِ آجوئی ءَ تاں ترندی ءَ برجاہ بنت-

بلوچستان ءَ گوستگیں دو ھپتگانی تہ ءَ سَے سد ءُ ھشتاد وئیل دیم ءَ اتکگ اَنت – میڈیکل ایمرجنسی ریسپانس سینٹر

سربوتگیں ھالانی رِد ءَ بلوچستان ءِ دمگ نوکنڈی، جھل مگسی، چاگی ءُ ماشکیل ءَ تیرگواری ءُ دگہ وئیلاں شش مردم ٹپی ءُ دو مردم بیران بوتگ انت –

گیشیں ھالانی رِد ءَ نوکنڈی ءَ زمباد ءُ پیک اپ گاڑی ءِ ڈیک ورگ ءَ سَے مردم ٹپی بوتگ انت –
وئیل نوکنڈی ءِ نزیک ءَ آر سی ڈی دگ ءِ سر ءَ دیم ءَ اتکگ کہ مسافر کشیں پیک اپ گاڑی ءَ گوں زمباد گاڑی ءَ ڈیک وارتگ چریشی ءِ آسر ءَ مسافر کشیں گاڑی ءِ ڈرائیور ءَ ھوار دو مسافر ٹپی بوتگ اَنت – ٹپی بوتگیں مردم ڈی ایچ کیو نادراھجاہ نوکنڈی ءَ برگ بوتگ اَنت ٹپانی درمان کنگ ءَ پد پہ گیشیں الاج ءِ ھاتر ءَ دالبندین ءَ دیم دیگ بوتگ انت –

ھمے وڑ جھل مگسی ءَ دگ ءِ وئیلے ءَ یک مردمے ٹپی بوتگ – ھالانی رِد ءَ گنداواہ ءِ دمگ نوشھرہ ءَ لیویز چیک پوسٹ ءِ نزیک ءَ رکشہ گاڑی ءِ چپی بوگ ءَ یک مردمے ءِ پاد چہ جان ءَ سستگ – وئیل تیز رؤگ ءِ سبب ءَ دیم ءَ اتکگ ٹپی بوتگیں مردم ھما دمان ءَ گندواہ نادراھجاہ ءَ سرکنگ بوتگ –

زانگ بہ بیت گوستگیں دو ھپتگانی میان ءَ بلوچستان ءِ دگانی سر ءَ سَے سد ءُ ھشتاد وئیل دیم ءَ اتکگ اَنت – میڈیکل ایمرجنسی ریسپانس سینٹر ءِ رپورٹ ءِ رِد ءَ اے دؤئیں ھپتگانی تہ ءَ سَے سد ءُ ھشتاد وئیل دیم ءَ اتکگ کہ چریشی ءَ دہ مردم بیران ءُ پنچ سد ءُ ھشت مردم ٹپی بوتگ انت –

دگہ وئیل ءِ چاگی ءَ لوگی جیڑہ ءِ سر ءَ تیرگواری ءَ یک مردمے بیران ءُ آئی ءِ دو برات ٹپی بوتگ انت –

لیوز ءِ رِد ءَ وئیل چاگی ءِ دمگ پستی ءَ بوتگ کہ لوگی جیڑہ ءِ سر ءَ وتی وارس ءِ تیرگواری ءَ سَے مردم ٹپی بوتگ انت، ٹپی بوتگیں مردمانی پجار حاجی داد ، عید محمد، محمد طاھر ءِ نام ءَ چہ بوتگ اَنت کہ ھر سئیں برات انت – ٹپی بوتگیں مردم ھما دمان ءَ پرنس فھد نادراھجاہ ءَ سرکنگ بوتگ انت اود ءَ ٹپانی درمان کنگ ءَ پد شال ءَ دیم دیگ بوتگ انت بلے راہ ءِ نیم ءَ محمد طاھر ءَ وتی ٹپانی درد نہ سگتگ ءُ بیران بوتگ –

لیویز ءَ کتکار ءِ بگیری ءَ ارزی نبشتہ کتگ ءُ آئی ءِ پٹ ءُ پول ءَ کنگ انت –

ھمے وڑ ماشکیل ءَ ناشناسیں سلاہ بندیں مردمانی تیرگواری ءَ یک مردمے بیران بوتگ –

بیران بوتگیں مردم ءِ پجار ممتاز ء عبدالکریم ءِ نام ءَ بوتگ بیران بوتگیں مردم ءِ جون سول ھسپتال ماشکیل ءَ سرکنگ کنگ بوتگ اودا اژدری چارٹپاس ءَ پد جون کھول ءِ ھوالگ کنگ بوتگ –

سر بیتگیں ھالانی رد ءَ روکپتی بلوچستان ءِ دمگ آبادان ءَ سَے مردمانی جون دزکپتگ، جون پولیس ءَ آبادان ءُ پھرہ ءِ راہ ءَ یک پُھلے ءِ چیر ءَ دزکپتگ اَنت –

دمگی مردمانی رد ءَ دزکپتگیں جونانی پجار صادق کاووسی ء مھمد صدیق، محمود ریگی ء شریف ءُ صفی اللہ ءِ ناماں زانگ بیتگ اَنت-

پولیس ءَ دزکپتگیں جونانی گور ءَ یک پرپٹے ھم دزکپتگ ءُ پولیس ءَ بنداتی ھالانی تہ ءَ گوشتگ کہ گمان ھمے بیت اِنت اے مردم دگ ءِ وئیل ءِ آماچ بیتگ اَنت –

جونانی شنگ بیتگیں اکسانی تہ ءَ گندگ بیت اِنت اے مردم جنگ ءُ کُشگ بیتگ اَنت –

دمگی لس مردمانی گوشگ اِنت کہ اے مردم دزگیر کنگ ءَ پد کُشگ ءُ چگل دیگ بیتگ اَنت –

آیانی گوشگ اِنت کہ سیکورٹی فورسز مردماں آوار جنت ءُ پد ءَ آیاں کُشگ ءُ چگل دنت کہ اے روکپتی بلوچستان ءَ کساس کم یک نوکیں وئیلے درپیش بیتگ –

روکپتی بلوچستان ءَ بندوکیں مردمانی گوشگ اِنت کہ رودراتکی بلوچستان ءَ ھمے وڑ ءَ پاکستانی چیریں ادارہ اود ءَ بلوچاں آوار جنگ ءَ پد کُشگ ءُ چگل دیگ ءَ اَنت اے ھما وئیلاں گوں ھمدپ اِنت ءُ ھما جاور روکپتی بلوچستان ءَ ھم کم کم ءَ ودان اَنت –

لس مھلوک ءَ گوشگ اِنت کہ اد ءَ ھرکس وتی ھک ءَ اگاں گپ بہ کنت آ ھم گرگ ءُ زندانی کنگ بیگ ءَ اَنت –

ایرانی لشکر ءَ تنی وھدی مردمانی دزگیری ءُ کوشانی گپ یکشل ءَ رد کرتگ اَنت –

بلوچستان ءِ بنجاھی شھر شال ءَ بالی پَٹ دگ ءَ عسکری پٹرول پمپ ءِ نزیک ءَ پاکستانی پوج ءِ کاروان ءِ سر ءَ بمب تراکے بیتگ –

دمگی مردمانی رد ءَ تراک ءِ ترندی ءَ نزیکیں ماڑیانی شیشگ پرشتگ ءُ نزیک ءَ اوشتوکیں گاڑیاں ھم آس لگ اِتگ –

پولیس ءِ رد ءَ آس کُشیں گاڑی لوٹائینگ بیتگ ءُ پولیس ءُ پوج ءَ ھوار دگہ ادارھاں دمگ انگیر ءخ کرتگ، بمب ڈسپوزل اسکواڈ ھم تراک جاہ ءَ آیگ ءِ پرمان کنگ بیتگ –

تراک ءَ بیرانی گمان کنگ بیگ ءَ اِنت –

اولی بلوچی تامر “ھمل ءُ ماہ گنج ” ازمکار ءُ تامرکار انور اقبال لھتے وھداں نادراہ بیگ ءَ پد پشمبے ءَ کراچی ءَ بیران بیتگ –

انور اقبال ءِ کھول ءَ آئی ءِ بیرانی ءِ ھال راست کرتگ ءُ گوشتگ کہ انور اقبال ءِ جان وش وش نہ بیتگ ءُ لھتے روچ ءَ نادراہ جاہ ءَ وپتوک بیتگ – آئی ءِ نماز جنازہ عشاء ءَ بیت المکرن مسیت ءَ وانگ بیت اِنت آئی ءِ کل ءُ کسارات میوہ شاہ مانش ءَ بیت اِنت –

انور اقبال ءِ گوشگ اِنت کہ لھتے ماہ ءَ پیش آئی ءِ لوگی ھم بیران بیتگ –

انور اقبال ءِ اکس لھتے وھداں چاگردی رسانکجاھاں گندگ بیتگ کہ نیزور ءُ نادراہ جانی ءَ گندگ بیتگ –

انور اقبال ءَ 1975 ءَ اولی بلوچی تامر ھمل ءُ ماہ گنج جوڑ کرتگ کہ بلوچ راجدوستاں رد کرتگ ءُ زھرشانی کرتگ ءُ چریشی ءِ سبب ءَ تامر شنگ نہ بیتگ جوڑ کرتگیں تامر چِل ءُ دو سال ءَ پد سال دوھزار ءُ ھبدہ ءَ شنگ بیتگ –

آئی ءَ پاکستان ٹیلی وژن ءَ ڈرامھاں کار کرتگ کہ “شمع ءُ آخری چٹان ءَ ھم وتی کرد پیلو کرتگ اَنت –

نبشتانک: میرل جان گُلزمین ءِ سالونک انت

نبشتہ کار: مقبول ساچ

دی بلوچستان پوسٹ

مُدتے ءَ پد میرل جان تو یاد اتکگ ئے چیاکہ تو سکیں مھروانیں ھمبل ءُ جوانیں جھدکارے ات ئے میرل جان من ءَ انچُش گُمان بیت کہ من گوں تو کولواہ شندی ءَ دُچار کپتگ آں ءُ تو چہ سپرے ءَ اتکگ ات ئے ءُ پدا وش آتک، ھال ءُ اھوال بوت تو گوں سنگتان مھروانیں بچکندگ ءُ مسکراھی ءَ گوں شپ وتی آسر کُت ءُ پد ءَ سُھب ءِ بام ءَ ٹک دات، سنگت ھم راہ کپتگ انت پہ سپر ءَ ھمے دمان ءَ تو من ءَ گوانک جت ءُ گوشت! ساچ پُل بیا اد ءَ ، من اتک آں بلے من ءُ تو دوئیں گُنگ اَت ایں نا تو گپے کُت ءُ نا من چیاکہ من پیسرا نا آشنا ات آں کہ تو کئے ۔۔۔؟ بلے ساھتے ءَ پد تو من ءَ گوشت کہ منی ھیال ءَ تو من ءَ انگت پجّہ آرگ ءَ نہ ئے۔۔؟ من پسّو دات ھو راستے کہ من ترا زانگ ءَ نہ آں سنگت –

ما گپ ءُ دیوان ءَ اَت ایں، تو پسّو دات کہ من زپیر آں تیرتیج ءِ من ھیران ءُ ابکّہ بوت آں کہ تو منی سکین دلی یے سنگت ئِے ءِ من ءُ تو یکیں ھند ءِ مردم ایں ءُ مدام یکجاہ ءُ ھور بوتگ ایں زپیر ۔۔۔ بلے تو نی بدل بوتگ ئے پدا ساھتے ءَ پد تو گوشت کہ کُجام زپیر ؟ من زپیر ءَ پجّہ آرگ ءَ نہ آں، من میرل آں۔ بلے تو کوھنیں آ گپان بل بیا من ءُ تو نند ایں ءُ کوھنیں یات ءُ زھیرے تالان کنیں من ءُ میرل ساھتے ءَ نشت ءُ دیوان کُت ءُ وتی کسانی ءِ کسہ آرت انت ءُ مسکرا ءُ جاک، کندگ بنا بوت اناگت ءَ گاڑی ءِ اتک ءُ اوشتات میرل جان ھیران ءُ ابکّہ بوت کہ اے چونیں گاڈی یے کہ مئے گورا اتک، ساھتے ءَ پد من میرل ءَ پسّو دات کہ اے پمن اتکگ چیاکہ مزنیں شھر ءَ لھتیں کار پشت کپتگ، تو نشتگ ئے من ترا موکل کن آں کہ منی گاڈی اوشتاتگ، اگاں ترا شھر ءَ کار ھست تو گُشت کن ئِے تو پسّو دات سلامت بات ئے ۔

من کیچ ءَ سر بوت آں ءُ ساھتے ءَ پد منی گوانکو ءَ توار کُت ءُ من ھمے دمان ءَ گوانکو دست ءَ کُت چارت داں نوکیں نمبرے وھدے من چست کُرت ءُ ھلو ءَ گوں کندگے بنائے کُت کہ چونے ساچ ھالاں بدئے سر بوت ئے؟ من پسّو دات من وش ءُ سلامت آں تو چون ئے ءُ مرچی چونیا منی یاتاں کپتگ ئے؟ بس پُل شُمئے مھر انت ھمد ءَ مئے ھال ءُ اھوال بوت سک کندگ ءُ مسکر ءَ بوت، پدا تو منا گُشت کہ تو ھما مردم دیستگ من ھیران ءُ ابکّہ بوت آں کہ کُجام مردم ۔۔۔۔؟

ءَ تو کئی جست ءَ کنگ ءَ ئے پدا پسّو دات کہ منی مھرُل۔۔! من وتی کندگاں گوں گشت جی نہ من نہ شُتگ آں بلے منی ھیال ءَ پُل مھرُل تی ھچ ترانگ ءَ نہ اِنت ءُ بس تو وت ءَ مُپت ءَ گنوک ءُ دیوانگ کُتگ۔ پدا تو گشت پُل مھرُل منی واستہ مھروان انت ءُ من ھم پہ مھرُل ءَ من گوشت شر پُل وش انت من چہ نٹورک ءَ در کپگ ءَ آں دگہ وھد ئے ءَ موہ دات انشا ء اللہ ھال ءُ اھوال کن ایں۔

مُدت ئے ءَ پد من کولواہ ءَ اتک آں کہ یک روچے شھید پیرک جان گون وتی سنگتان نشتگ ات ءُ دیوان ات ءُ من ھم ھمے دیوان ءَ ھور بوت آں، پد ءَ ساھتے ءَ پد پیرک ءِ گوانکو ءَ توار کُت، بیا کہ بدیں ھالے ھست کہ دو سنگت شھید بوتگ من ھیران ءُ ابکّہ بوت آں سنگت ءَ گُشت کہ بالگتر ءَ جنگے بوتگ، مئے دو سنگت شھید بوتگ۔

پیرک ءَ گُشت اڑے چون کئے کئے بوتگ انت پل؟ سنگت ءَ گشت کہ یکے مراد جان ءُ یکے میرل جان انت پون ھمد ءَ چہ کٹ بوت ءُ شھید پیرک جان گُشت کہ مرچی مرادجان ءُ میرل جان شھید بوتگ انت بالگتر ءَ منی چمانی ارس شل شل بوت انت ءُ من پدا بچکندت ءُ من وت ءَ دلبڈی دات ءُ دل ءَ گوشت کہ منی میرل جان گلزمین ءِ سالونک انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: تو چہ من شر تر ءُ ارزشتر ئے

ندر انت پہ دُرسینانی نام ءَ

نبشتہ کار: میرین بلوچ

دی بلوچستان پوسٹ

دْراھبات ئے

اُمیت کن آں کہ تو وش ءُ سلامت ئے، تئی مات، پت، بْراس ءُ گْوھار، دوست ءُ دزگْوھاراں ابید گوگ ءُ پس ءُ دْرچک ءُ دار دْراہ سلامت انت ءُ تئی گِس ءِ پیژگاہ ءِ دْرچک ءُ دار تنیگت ءَ من ءَ گیر کاینت بلے چہ اے دْرستاں گیش تو من ءَ گیر کائے چی ءَ کہ زندگی ءِ باداتیں اوست گوں تو بندوک اَنت۔

ترا یات بیت کہ تو سک کسان ات ئے ءُ وتی گِس ءِ پیژگاہ ءِ دیمی بانڈُم ءَ لیب ءُ گْوازی کُت من ھم کسان اتاں کہ چہ دگنیا ءِ ھِچی گم ءُ رنج ، وانگ ءُ زانگ، شر ءُ ھراب ءِ دْرُسیں چیزاں ناآشنا اتاں بلے تو نوں رُستگ ئے لائِک ءُ مزن ئے باید انت نو تو دُرسینانی گماں وتی بہ لیک ئے مات ءُ پت ءِ گم ، بْرات ءُ گْوھارانی گم ءُ کوم ءُ راج ءِ گماں شری دار بہ بہ ئے ءُ من ھم ھمے امیت ءَ کناں۔

چی ءَ کہ بیست ءُ شش سال ءَ پد دوشی شپ ءِ کروڑ بج ءَ تو منی واب ءَ اتک ئے وھدے من واب ءَ بُست کُت ءُ چار اِت داں کس نیست بس من ءُ منی ساھگ ءُ پد ءَ گوں جیڑھاں بے وس بوتان ءُ سگریٹ ءِ دوتاں شپ آسر کُت بلے تو گار ات ئے ءُ گندگ نہ بوت ئے۔

بام ءَ روچ ءِ پدرائی کُت ءُ روچ ءِ کسان کسانُکیں شھم گس ءِ دیم ءِ دْرچکانی سر ءَ اَت اَنت ءُ شپ گوں تئی جیڑھاں بے واب ات اَنت ءُ نوں روچ ءَ ٹِک داتگ ات ءُ واب ھم پرشتگ اَت من پسیل ءَ شُت آن ءُ دیم شُشت ءُ واتر لوگ ءِ تہ ءَ اتک آں ءُ دیم گوں آدینک ءَ کُت بلے من وتی جِند نہ دیست بلکیں من ترا دیست من زان آں تو جیڑگانی آماچ بہ ئے کہ آدینک ءِ دیم ءَ ھر کس وت ءَ وت گند ایت ءُ گُش ایت چہ من ءَ شرتر کس نیست بس من ءُ منی بالاد دگہ ھچ۔۔۔؟
بلے باور کن من ترا دیست کہ تو سک باز بْراھدار ات ئے ءُ تئی ملگور دلبند ءِ سر ءَ نکش ات اَنت ءُ دمانے ءَ جیڑ اِت کہ اے کوہ ءُ زِر جنگل ءُ گیابان اے زمین ءُ آزمان تئی دْروشم ءَ جن اَنت ءُ ھمے دمان ءَ گُش ئے تو گوں من ھور ءُ ھوار ات ئے۔ منی بالاد ءِ تہ ءَ منی مارشت ءِ تہ ءَ منی اَکس ءِ تہ ءَ تو گون ات ئے ءُ اے تئی مھر انت کہ شپ ءِ کروڑ بج ءَ تو منی واب ءَ اتک ئے ءُ پد ءَ ساھتے ءَ پد من ھمے جیڑ ات کہ تو چہ من ءَ شر تر ءُ ارزشتر ءِ چی ءَ کہ تو منی پُشت پد ءِ تو منی باندات ءِ روژنائیں چراگے ئے تو ناکو اُمیتان ءِ جنکانی بامسارے ئے کہ مُدام پاد کاینت ءُ آدینک ءِ دیم ءَ وتا سینگار انت ءُ پد ءَ چہ وانگجاہ ءَ در کپ اَنت ءُ تو گنگُزار ءِ ھوٹل ءِ بٹ ءُ کابلی ئے ءُ مات روزاتون ءِ دوتکگیں پشک ءِ جالار ئے تو گْوھار گنجی ءُ شاری ءِ بچکندے ئے تو ماسٹر شپیک ءِ دست ءِ جوڑ کُرتگیں ڈرائینگے ئے ءُ ماسٹر دلیپ ءِ ریازی ءِ ھل کُرتگیں ھساب ءُ تو منی کلاس پیلوئیں بے نزیر ئے ءُ کتابانی زُلپ ءِ نِوانے ئے ءُ دُروشم ءِ آستین ءِ گوات ءُ پاتمہ ءِ سریگ ، تو چہ من ء شرتر ءُ ارزش تر ئے چی ءَ کہ تو منی پُشت پد ئے منی پیراں سری ءِ ھسایے ئے بلکیں اے نگیگیں ساھت ءَ من ترا یل بدے آن ءُ گُمنام بہ باں بلے تو ھست ئے چیاکہ تو منی اوست ءُ اُمیتانی دریگ ئے ءُ تو کچکلول ءِ گُشتگیں پربندانی گالوارے ئے ءُ دُرین ءِ سازانی بےچاڑیں موتک ءُ ساچان ءِ دست ءِ ند ءُ تو منی بالاچ ، بیبگر ءُ دودا ءُ شاری ءُ شدری ءُ ماھگنج ءُ تو منی لاڑیں بچک ءُ جَنک ، تو منی واجو ءِ دست ءِ ھسا ئے ءُ استاد ءِ داتگیں پنتانی سبکے ئے ءُ تو وابانی بانُک ءُ ھزار اوستانی اُمیت ئے تو چہ من ءَ شرتر ءُ ارزش تر ئے ءُ تو من ءَ یلا دات نہ کن ئے چی ءَ کہ تو منی ھدا ئے، منی ھستی ئے ءُ منی زیبائی ئے، منی کائنات ئے۔

اگاں تو من ءَ یلا بدئے تو اے کلکشان ءِ روژنائی وتی روژنائی ءَ یلا دے اَنت ءُ اے وشبوئیں پُلانی وشبو بے تاھیر بنت اے گْوات اوشت ءِ آماچ بیت ءُ من نپس گیر بنت ءُ منی دل ءِ دھڑکن بند بیت ءُ اے زمین ءُ آزمان اے دگنیا ءُ اے کائنات بید تئی ءَ ھچی ارزشت نہ دے اَنت ناں من ءُ ناں تو! من زان آں تو ھمے جیڑ ات کہ اے پِلمی ڈائلاک انت بلے اگاں تو من ءَ یلہ بکن ئے گُڑا اے پمن ءَ ھکیکت بنت ءُ پد ءَ یک روچے تو من ءَ جُست کن ئے کہ “کُجام گیشتر شرتِر ءُ اَلم اِنت منی زندگی یا تئی؟ گُڑا من پّسو دے آں “منی گُڑا تو یل کن ئے ءُ روئے ابید اے زانگ ءَ کہ منی زندگی وَ توئے ۔

( ھلیل جبران )

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔