TBP Balochi

بلوچستان ءِ بنجاھی شھر شال ءَ یکشمبے ءِ روچ ءَ بلوچ یکجھتی کمیٹی ءِ دزبندی ءَ ھمے سال ءِ ھشت مارچ ءَ پنچ بلوچ ورنایانی دزگیری ءَ کوش ءِ ھلاپ ءَ یک روانکے کشگ بیتگ –

روانک ءَ ھواریں زالبول ءَ مردیناں وتی دستاں پلے کارڈز ءُ بینرز چِست کرتگ اَنت ءُ شھر ءِ جتا جتائیں دگاں تران بیتگ ءُ پولیس ءِ دست ءَ دروکیں دیم پہ دیم ءَ کشگ بیتگجں ورنایانی کوش ءِ سر ءَ انساپ ءِ لوٹ کرتگ –

روانک ءُ زھرشانی ءَ پشتون تھپز مومنٹ ءِ باسکاں بھر زرتگ –

ھمے وھد ءَ وائس فار بلوچ مسنگ پرسنز ءِ وائس چیئرمین ماما قدیر بلوچ، آغا طاھر خان، آغا زبیر شاہ، زین گل بلوچ ءُ دگہ مردماں تران کرتگ ءُ گوشتگ کہ ھشت مارچ ءَ مستونگ ءِ دنگ اسپلنجی ءَ سی ٹی ڈی ءَ پنچ دست ءُ گوشیں کم اُمریں ورناہ یک دروگیں جنگے ءِ نام ءَ کُشتگ اَنت –

ماما قدیر بلوچ ءَ گوشت کہ جمیل سرپرہ ءِ کماش ءَ من ءَ گوشتگ کہ منی چُک دوبر ءَ آمیدگس ءَ پیش کنگ بیتگ ءُ من آ دیتگ ءُ پد ءَ اچانگ ءَ دیم پہ دیمی ءَ کُشگ بیتگ –

ماما قدیر بلوچ ءَ گوشت کہ پیسر ءَ آئی ایس آئی، ایم آئی اے ءُ ایف سی ءِ زور ءَ بلوچ ورناہ آوار جنگ بیتگ ءُ لاش چگل دیان بیتگ اَنت نِی سی ٹی ڈی ءِ زور ءَ دروگیں جنگ ءِ نام ءَ بلوچ ورنایاں کُشگ ءَ اَنت –

ماما قدیر بلوچ ءَ گوشت کہ گوستگیں روچاں پنجگور ءَ سید اویس شاہ ءِ پت منی بنجل ءَ اتکگ اَت ءُ آئی ءِ چک پنجگور ءَ بیگواہ کنگ بیتگ بلے گوستگیں روچاں آیانی دزگیری سریاب لنک دگ ءَ پدر کنگ بیتگ – آئی ءَ گوشت کہ ما اے زُلمانی ھلاپ ءَ بے توار نہ بہ ایں –

چاگردی ءُ سیاسی باسک طاھر خان ھزارہ ءَ گوشت کہ پنچ بیگواھیں بلوچ ورنایانی دروگیں دیم پہ دیمی کوش ءَ ایر جن آں ءُ اے ڈیھ ءِ نام پاکستان ءُ کار ناپاک اَنت –

آئی ءَ گوشت کہ اگاں اے تئی ریاست ءِ مجرم بیتگ اَنت گڑا اے وڑ ءَ کُشگ ءَ مردمانی توار ءَ جھل کت نہ کن ئے –

روانک ءُ زھرشانی ءَ نودربر رھشون بیگواھیں زاکر مجید بلوچ ءِ مات، بیگواھیں کبیر بلوچ ءِ گوھار ھوار بیتگ اَنت –

گپ ءُ تران گوں بلوچ تامرکار ھمایوں مبارکی ءَ

دی بلوچستان پوسٹ

روکپتی بلوچستان ءَ چم پچ کنوکیں ھمایوں مبارکی ایران ءِ آشوب ءَ پد وتی کھول ءِ ھمراھی ءَ دیم پہ پاکستان ءِ مستریں شھر کراچی ءَ شتگ اود ءَ آئی ءَ وتی اکسکاری ءِ سپر دوازدہ سال ءِ اُمر ءَ بندات کتگ نوزدہ سد ءُ ھشتاد ءُ شش ءِ آسر ءَ میان اُستمان ءِ ھساب ءَ سویڈن ءَ شتگ –

نوزدہ سد ءُ نود ءُ ھشت ءَ آئی ءَ وتی تامرکاری بندات کتگ ءُ دَہ سال ءَ پد دسمبر دوھزار ءُ ھشت ءَ آئی ءَ اولی بلوچی میان اُستمانی سیٹلائیٹ ٹی وی رژن ٹی وی بندات کتگ ءُ چریشی ءَ نُھ سال پد سال دوھزار ءُ ھبدہ ءَ آئی ءَ وتی سرجمیں تامر انبارن سولز راستیں سرھال “افوڈہ لیوسنڈر ” بندات کتگ –

دی بلوچستان پوسٹ ءَ سوئیڈن ءَ جھمنندیں تامر جوڑ کنوکیں بلوچ تامرکار ھمایوں مبارکی ءَ گوں گند ءُ نند کرتگ، اے گند ءُ نند ءَ ھمایوں مبارکی ءَ وتی ازم ءُ زند ءِ درگت ءَ گپ جتگ ءُ اشاں ابید آئی ءَ درانڈیھاں جوڑ کرتگیں تامر کاری ءُ بلوچ تامرکاراں ھم سر ءُ سوجی ھیال درشان کرتگ اَنت-

ٹی بی پی: ما تئی منتواریں کہ تو دی بلوچستان پوسٹ ءَ گوں گپ کنگ ءِ ھاتر ءَ وھد کش اِت۔ مئے اولی جُست اِش اِنت کہ تو مارا وتی آیوکیں تامر ءِ درگت ءَ سرپدی بہ دے کہ اے چی درگت ءَ اِنت؟۔

ھمایوں مبارکی: شمئے منتواراں کہ گوں من ھال کنگ ءَ اِت، انبارن سول یک بچک ءُ جنک (کَپَل)، مونا (سنیتا سنگھ) ءُ ھینرک (میکائل لنڈرگرین) ءِ درگت ءَ اِنت۔ مونا سھیگ بیت کہ آئی ءِ لاپ پُر اِنت، آئی ءِ زندمان بدل بیت، آ زندمان ءِ رنگانی گندگ ءَ بیت، آ وش گندگ بیت، آ یک نوکیں انسانی ءَ جھان ءَ آرگ ءَ اِنت۔ آ زیت یک ماتے بیت۔ دانکہ آ وتی مھر (بوائی فرینڈ) ھینرک ءَ سرپد بہ کنت کہ آئی ءِ لاپ ءَ چکے ھست۔ ھینرک گندگ ءَ اے زمہ واری ءِ ھاتر ءَ ساڑی نہ اِنت۔ ءُ مونا ءَ گُش ایت کہ وتی لاپ ءِ چک ءَ دور بہ دے۔ اے گپ مونا ءَ دلپروش کنت ءُ آ کمک زیرگ ءَ بندات کنت۔ ھینرک سرپد بیت کہ آئی ءِ گرل فرینڈ اناگتی گمانی کال کنگ ءَ اِنت۔ ھینرک موناھا گُش ایت آئی ءِ (lake cottage) ءَ گندگ ءَ بیا اود ءَ یک گمانی چیزے بیت۔

انبارن سول یک مانگیشتگیں تامرے، من مڈل ایسٹرن ءُ ساؤتھ ایشین ءِ دود گوں روجھلی دوداں ھوار کُتگ اَنت۔ من نہ لوٹ اتگ کہ تامر ءِ گواچنی ءَ گار بہ کن آں بلے من اے ھم نہ لوٹ اتگ کہ ساؤتھ ایشین دروشم ءِ تامرے جوڑ بہ کن آں – اے سک گرانیں کارے بیتگ-

ٹی بی پی: تو وتی گالانی تہ ءَ انبار سول ءَ چون درشان کن ئے؟

ھمایوں مبارکی: منی ھساب ءَ اے گمانی ءُ سک فیمینسٹ ءِ تامرے –

ٹی بی پی: پرچہ فیمینسٹ تامر ؟

ھمایوں مبارکی: جنین آدم سرجمیں جھان ءَ سک بزگی ءِ آماچ اَنت لھتیں مردینانی سوب ءَ (ھاس ھما چاگرداں کہ مردینانی مستری اِنت)۔ آ لوگانی تہ ءَ، کار سر ءَ کم شرپ کنگ ءُ کم لیکگ بنت ءُ لھتے مردین ھمے باور کن اَنت کہ جنین یک ٹولے کہ آ الم مردینانی گپ ءِ تہ ءَ بہ بیت ءُ آئی ءِ ھکمانی منوک بہ بیت۔ انبارن سول روکپت ءُ روبرکت ءِ کسہ اِنت۔ منی ھیال ءَ ھمک جنین شرتر سرپد بیت وھدے آ تامر ءَ چار انت ۔ اے یک زانشتی تامرے گوں بازیں جوانیں چیریں کلوھاں پہ جنین ءُ مردین آدماں۔ جنین گیشتر شرتر کرزاَنت چہ مرچیگیں وڑ ءُ پیم ءَ کہ آیانی گون ءَ پیش آیگ بیگ ءَ اَنت۔ اے ھچ مشکل نہ اَنت کہ اگاں یک جنینے، یک ماتے پائلٹ اِنت، ڈرائیور اِنت، ڈاکٹر اِنت، بلے لوگ ءَ آ مدام مات اِنت، لوگ ءِ چکانی چارگ ءَ کنگ ءَ اِنت، ءُ منی ھیال ءَ تو گندے ھم۔ من گیشتریں زالبولانی گپ ءَ کنگ ءَ اَنت، لھتے جتائیں کسہ ھست۔

ٹی بی پی: مارا وتی گوست ءِ درگت ءَ کمو سرپدی بہ دے تو
چہ کجا سیادی داری ءُ تو کدی تامر کاری بندات کُتگ؟

ھمایوں مبارکی: شمئے اولی جُست ءِ پسہ: من بلوچستان ءِ یک بلوچ کھولے ءَ ودی بیتگ اَنت۔ ایران ءِ انقلاب ءَ پد ما چہ ایران یل کُت ءُ دیم پہ پاکستان ءَ شُت اِنت۔ منی کھول ءَ جھد کُت کہ پاکستان ءَ نوکتریں زند ءِ بندات کن این۔ من کراچی ءَ اردو ءُ ھندی دربرت۔ کساس دوازدہ اگاں سینزدہ سال ءِ امبر ءَ من کراچی ءَ وتی اولی کیمرہ زرت ءُ منی کھول ءِ درستیں عکس ءُ یات ھما کیمرہ ءِ چماں گوں گرگ بیت اَنت۔ 1986 ءِ آسر ءَ اقوام متھدہ ءِ ھساب ءَ ما سویڈن ءَ اتک اِنت۔ ( کہ پہ اِشی ءِ من سک منتواراں ) اد ءَ سویڈن ءَ، مارا نوکیں زندے ءِ بندات کنگی اَت۔ سویڈن ءَ من سویڈش زبان وانگ بندات کُت ءُ کمو وھد ءَ پد من ( پینٹگ) عکس جوڑکنگ ءِ مکتب ءَ شُت اَنت۔ کسانیں امبر ءَ من سویڈن ءَ جھد کُت کہ تامری اسکولے درگیجاں، بلے آ وھد ءَ ممکن نہ اَت۔ من سویڈش وانگ، اسکول ءِ روگ ءُ ڈگری زیرگ ءَ پہ جیڑھانی دیمپان اِت اَنت۔ مرچیگیں وھد ءَ تامری اسکولانی تہ ءَ روگ ارزان اِنت بلے 1987 ءَ نہ اَت۔ من بازیں سالاں پہ وانگ، کار کنگ ءُ وتی مزن شھدربرجاہ ءِ کمپیوٹر سائینس ءِ ڈگری ءِ زیرگ ءَ گوازینت۔ 1998 ءَ ما وتی اولی تامری ٹیم گولی سویڈن ءَ بندات کُت کہ اود ءَ ما لھتے لُکیں تامر اڈ کُت۔ 10 سال ءَ پد، دسمبر 2008 ءَ من اولی بلوچی میان اُستمانی سیٹلائٹ ٹی وی رژن ٹی بندات کُت۔ ءُ آئی ءَ نھ سال ءَ پد من 2017 ءَ من وتی اولی سرجمیں تامر انبارن سولز راستیں سرھال (افوڈّہ لیوسنڈر) بندات کُت۔ من کدی پیسلہ کُت کہ تامر کار بہ بنت؟ راستی ایش اِنت دانکہ منا یات کنت، من مدام لوٹ اتگ تامر کار ءِ بہ باں، دانکہ لھتے شئے جوڑ کُت بہ کن آں۔ اے منی واب بیتگ چہ کسانی ءَ ءُ وھدے من پھران (ایرانشھر) بلوچستان ءَ سیاہ ءُ اسپیتیں تامر چارتگ اَنت۔ تامر ءُ سینیما منی واھگ جوڑ بیتگ اَنت در کسانی ءَ بلے درستاں ھاسیں سوب بلوچی کسہ بیتگ کہ من ءَ گُشگ بیتگ اَنت۔ ھدا مرزی ئیں بلوک شمشوک ھدا آئی ءِ ارواہ ءَ آسودگ بہ کنت، منی مات ءُ منی ناکو بلوچ خان، اے درستاں من ءَ کسہ گوشتگ، بلوچ کسہ، من ءَ انگت چہ ھمایاں لھتے یات اَنت۔ من وتی زھن ءَ وتی ھساب ءَ تامر کشی کُتگ، منی ھیال ءَ پمیشکا اے درستاں مستریں سوب بیتگ۔ بلوچی گیدی کسہ چہ زانشت ءُ مھلوم داری ءَ چکار اَنت۔ منی اولی سیمی پروفیشنل تامری پراجیکٹ بلوچستان ءِ درگت ءَ بیتگ کہ آئی نام “فورگوٹن بلوچستان” اَت کہ من ڈائریکشن داتگ ءُ گوں اسٹوڈجیفرامیجنڈے کہ سویڈن ءِ نامی ئیں گل اِنت آئی ءِ پجیگ ءَ سال 1994 ءَ پروڈیوس کُتگ۔ آ تامر ءَ پد بلوچستان ءِ درگت ءَ یک دیوانے ھم دارگ بیت۔ اے منی بلوچستان ءِ درگت ءَ اولی سیمینار اَت۔ پنجاہ مردم ءَ بُرز مردم ءَ بھر زرتگ اَت کہ ایشانی تہ ءَ منی بلوچ ھمراہ ھم ھوار اِت اَنت کہ ھمدا سویڈن ءَ جھمنند اَنت۔ منی مات ءَ سویڈن ءِ شھر گولے ءَ بلوچستان ءِ درگت ءَ باز ورکشاپ کُتگ، آ بلوچی دو چکاری ءَ سک بلد اِنت۔ آئی ءَ یک ورکشاپ ئِے تہ ءَ گوستگیں سروزیر فریڈرک رینفیلڈٹ ءَ ھم بھر زرتگ ءُ لھتے اکس زرتگ۔ وشبھتی ءَ آیاں منی مات ءِ سر ءَ ھما اکس دیم داتگ اَنت وھدے کہ واجہ فریڈرک رینفلیڈٹ بلوچی دوچ داشتگ کہ منی مات ءَ داد کُتگ ۔ سال 2003 – 2004 ءَ من اولی بلوچی انجمن پہ ورناھاں (انجمن جواناندہ بلوچ کہ Topaak.com) ءِ نام زانگ بیتگ اڈ داتگ اَت۔ ما کساس 10 -15 مردم بیتگ اِنت۔ من وش بھت بیتگ آں ھندی واکداراں منارینگ ءَ سوبمند بیتگ انت ءُ ما اسٹاک ھوم شھر ءَ یک بلوچی ایکزیبیشن ءِ ھم جتگ کہ داں ھشت روچ ءَ جُنزیتگ، کہ اود ءَ 100 ءَ بُرز مردماں بھر زرتگ۔ داں انگت ءَ بلوچستان ءَ ڈن چُشیں دیوان برجم دارگ نہ بیتگ کہ، یک ھالے پہ سرجمیں ھپتگ ءَ بلوچستان ءِ درگت ءَ گون بہ بیت۔ (تپاک ءِ گیشتریں باسک مروچی ڈاکٹر، انجینئر، باپاری ءُ دگہ کارانی تہ ءَ ھوار اَنت۔) منی دومی مستریں ایکزیبیشن 2011 ءَ بیتگ من گوں رژن ٹی وی ءَ ھم ھمے وھد ءَ کار ءَ بیتگ اَنت ءُ من ایکزیبیشن ءِ نام “دی چلڈرن آف بلیک پرل” ایر کُتگ اَت کہ اود ءَ من اولی بلوچی دوچ ءِ پدراھی کُتگ اَت گوں “مینی کوئین” ءِ کمک ءَ، چہ اِشی ءَ بازیں مردم ءِ سانمند بیت ءُ آیاں ایران ءُ بلوچستان ءَ ھم ایکزیبیشن ایر کُتگ اَنت۔ آ ایکزیبیشن سوئیڈن ءِ بلوچاں ھم باز ساڑاتگ اَنت ءُ اولی رند ءَ دو درملکی رسانکاں ھم آئی اھوال اَتک۔ من وت دربرتگیں تامر کاریاں، من ھچبر تامری اسکولاں نہ شُتگ انت ءُ من مدام ابید تامری پِڑ ءِ مردمانی پجیگ ءَ کار کُتگ۔ ابید چہ گوستگیں دو تامرانی کہ آیانی نام “سکار ڈیٹ سکیرز می” ءُ “کاٹ آن کیمرہ” اَنت۔ اے تامرانی ھاتر ءَ ما ھالیوڈ ءِ ازمکار جوڑی بیچر زرتگ اَت ءُ یک نامداریں سوئڈش ازمکاریں میلن برگاگھن ھم زرتگ اَت۔ تامری پِڑ ءَ سیادی نہ داروکیں مردمانی گون ءَ کار کنگ ءَ من ءَ تاکت ءُ باور دات ءُ گواچنی ھم کُت کہ چوں جتائیں جاور تامر کاری ءِ تہ ءَ چارگ ءُ دارگ بہ بنت۔ لھتے ازمکار ازمکاری ءَ ھبناک نہ بیتگ اَنت بلے من آیانی تہ ءَ انچیں چیزیں دستگ ءُ من آیاں باور کنائینتگ پہ ازمکاری، ھما مردم نی منی تامرانی تہ ءَ ھوار اَنت ءُ جوانیں دروشمے ءَ کار کنگ ءَ اَنت۔ ھمک سوجکار ءِ وتی پیم ءِ بیت وتی ازم ءِ درشانگ ءَ کسہ ءِ گُشگ اِنت ابید چہ سائنس فکشن ءُ فنٹاسی تامراں، ایندگہ درستیں تامر مئے زند ءِ بھر اَنت۔ ھچ چیز نوک نہ اِنت ءُ نہ کہ ما پیسرا نہ دیستگ ءُ تجربگ نہ کُتگ۔ یک سوجکارے ءِ ھساب ءَ من وتی کسانی ءَ کارمرز کناں، وتی کش ءُ کر ءَ زند ءَ چاراں، مردماں چاراں ءُ واناں ءُ آیاں کسہ ءِ تہ ءَ ھوار کناں۔ من یک سوجکارے ءِ ھساب ءَ لوٹ آں زانشتی تامر جوڑ بہ کناں، مردمانی دیم ءَ وشی بیاراں، آیاں یات بہ گیجاں کہ شری چی اَنت ءُ پھل کنگ چی ءَ گُش اَنت۔ پہ من المی اِنت کہ تجربگ کنگ بہ بیت، وتی جند چکاسگ بہ بیت جتائیں پیمے ءَ کار کنگ ءَ وھدے منی سنگت، لوگے مردم، چُک ءُ آیانی ھمراہ شام ءِ سر ءَ گپ کنگ ءَ بنت من آیاں جُست کناں کہ شمئے گپاں ریکارڈ بہ کناں؟ (پرچہ کہ جُست گرگ المی اِنت)۔ من ھمے گپانی تہ ءَ پہ وتی تامر ءَ لھتے ڈائیلاگ درگیجاں، اے پیمیں ڈائلاگ گیشتریں وھداں راستی ءِ دروشم ءَ دیاں گوں چاروکاں نزیکی کن اَنت۔ من گرافگ ءُ انٹیرئیر ڈیزائنگ ھم کناں یک کلر کریٹیر ءِ دروشم ءَ من چیزاں آیانی جوڑ بیگ ءَ باز پیسر وتی سر ءِ تہ ءَ گنداں، تامر کاری، ازمکاری، اکس جوڑکنگ، درست یک دومی ءَ گوں سیادی کناں۔ شما الم پیسر ءَ گوشداشتگ اَنت کہ ؛ کہ یک اکس کارے وتی کار ءَ تھنائی ءَ کُت کنت، یک گرافگ ڈیزائنر ءِ دروشم ءَ من اکس ءَ تھنا کُت کناں، کسہ نبشتہ کنگ ءُ کسہ گُشگ دو جتائیں چیز اَنت۔ تامر جوڑ کنگ ءِ ھاتر ءَ ترا یک سرجمیں پوجے لوٹ ایت ءُ پمیشکا من جیڑاں اے ھساب ءَ تامر کاری درستاں بھتریں ازمے ءُ من پہ ھُب سوجکاری کُت کناں اگاں من ءَ جوانیں اسکرپٹ ءِ دستءَ بہ بیت۔

ٹی بی پی: شما رژن ٹی وی ءِ کسہ کُتگ اَت، مئے وانوکاں اِشی ءِ درگت ءَ گیشتر سرپدی بہ دے اے ھیال چون شمئے مازگ ءَ اَتکگ؟

ھمایوں مبارکی: اسل ءَ اے دوھزار ءُ پنچ ءَ بندات بیتگ اَت وھدے من اپسالہ ءَ یک شھدربرجاھے ءَ یک ورکشاپے ءَ بھر زرتگ اَت ھما وھدا ماڑن ایکس مین “بیک ٹو دی فیوچر” بلوچستان ءِ درگت ءَ نبشتگیں کتاب ءِ نبشہ کار ھمودا اَت من آئی ءِ تران ریکارڈ کُت ءُ پد ءَ گوں آئی ء یک گلگدارے کُت پد ءَ من پاول ٹیٹس ، پروفیسر بدل خان ءُ دگہ بازیں مردمے ءِ گلگدار کُت اَنت من ھمے مار اِت بلوچاں یک رسانکے زلورت اِنت اگاں آ یک دیوانے اینچو زانشتی اَت گُڑا یک رسانکدر مزنیں بدلی ءِ آورت کنت، من جیڑ ات ھما وھد ءَ مئے کر ءَ کجام ھم سیٹلائٹ چینل نہ بیتگ اَنت، من بہ ھسیئت ءِ بلوچ جیڑ اِت کہ من ءَ الم کارے کنگ لوٹ ایت وھدے دوھزار ءُ ھشت ءَ من وتی ریسٹورانٹ بھا کُت، من وتی درستیں جم کُتگیں زر کساس بیست ھزار ڈالر زرت اَنت ءُ بلوچستان ءَ شُت اَنت ءُ مردمانی گلگدار گرگ بندات کُت اَنت ما بلوچستان ءَ بازیں جاھاں شُت اِنت آ منی زند ءِ وشتریں وھد اَت۔ بلوچستان ءَ گندگ ءُ یک لس بلوچے ءِ زندے گندگ۔

ٹی بی پی: آ کجام تامر اَت کہ ترا تامر کاری ءِ نیمگ ءَ آرت ئِے ءُ تئی دوستیگیں سوجکار تامر کار کَے اِنت ؟

ھمایوں مبارکی: چوناھا منی کسانے ءَ من ءَ باز تامرانی دزرس نہ بیتگ بلے ھما تامر کہ من چار اتگ اَنت آیانی تہ ءَ چارلی چیپلن، آ من ءَ سک دوست بیتگ، آ وھد ءَ یک سیریل ءِ بیتگ “دی سکس ملین ڈالر مین” ءِ نام ءَ، ھمے پیم ءَ دی اسٹریٹس آف سین فرانسیسکو، سپارٹکس، ءُ لھتے ھندوستانی تامر چُش کہ شھلے، ڈان ءُ ڈزنی ءِ درستیں تامر ھاس پنوکیو یا سند باد بلے منی ھیال ءَ چارلی چیپلن درستاں مستریں سوب اِنت ءُ آئی ءِ تامر منی ھیال ءَ انگت تامرانی راجدپترے شرتریں تامر اِنت۔ من یک سوجکاری ءِ ھساب ءَ گُشت کن آں کہ من چہ باز مردماں سان گپتگ آیانی تہ ءَ انگر برگ من، سٹیوین سپیلبرگ، کرسٹوفر نولان، ٹارنٹینو، مارٹن سکورسی، پیٹر جیکسن، والٹ ڈسنی، فرانسس فارڈ کو پالا، سٹانلی کیوبرک، گیولرمو ڈیل ٹورو، کئیا رستومی ءُ دگہ بازیں لڑ دراج بیت۔

ٹی بی پی: تامر کاری ءَ ھما کجام گرانیں چکاس بیتگ اَنت کہ تو آیانی دیمپان بیتگے؟

ھمایوں مبارکی: منی ھیال ءَ مستریں گرانی مدام زر (فنڈنگ) اِنت وھدے ما انبارن سولس ءِ گپ ءَ کن آں، گُڑا آ سرجم ءَ یک گرانیں پُرچکاسے پراجیکٹے اَت، اے کسہ ءِ کہ من اسکرپٹ ءِ دروشم داتگ اے گران ءُ مانگیشتگینے اَت من وتی جند ءَ گُشت کہ اگاں ابید فنڈنگ ءَ، من اے تامر ءَ سرجم کُت کن آں گَڑا من دیمترا ھم ھمک تامر ءَ سرجم کُت کن آں۔

من ءَ درستیں کار وت کنگ کپتگ اَنت، کاسٹنگ، رائٹنگ، ڈائرکنٹگ، اسپیشل افیکٹس، کلر پہ ھمک فریم ءَ، ساونڈمکسن، ایڈیٹنگ، لائٹنگ پہ اوریجنل اسکور ءَ من چہ ھالیوڈ ءِ ازمکار انڈریا بیلوسی ءَ کمک زرت۔

پوسٹ پروڈکشن ءِ وھد گیشتر چیلینجگ اَت، ھمک شئے ءَ یکجاہ کنگ، ایڈیٹنگ ءَ بازیں ماہ زرُت۔

ٹی بی پی: تئی تامر کاری ءِ پِڑ ءَ کار کنگ ءِ نیام ءَ آ کجام مردم بیتگ کہ آئی ءَ تئی سر ءَ دلجمیں باور بیتگ؟

ھمایوں مبارکی: منی مات ءَ، منی کھول ءَ ھاس منی زھگاں، منی سرجمیں ٹیم، آیاں کدی من ءَ جُست نہ گپتگ۔ ابید چہ آیاں من اد ءَ نہ بیتگ اِت اَنت۔ آیاں منی سر ءَ باور کُتگ ءُ آ مروچی کھول ءِ پیم ءَ اَنت۔

ٹی بی پی: تامر کاری ءِ تہ ءَ ھما کجام پرارزشتیں درس ءِ کہ تو دربرتگ ؟

ھمایوں مبارکی: وت ءَ فلیکسیبل کنگ ءُ جھد کنگ کہ دیم ءَ اتکگیں جیڑھانی گیش ءُ گیوار کنگ ءِ ھاتر ءَ دگہ راہ بہ بیت سیٹ ءِ سر ءَ اناگتی بیوکیں شھیانی ھاتر ءَ مدام ساڑی بہ بئے پہ درور من ھمے زیتاں کمرشل تامر پروڈکشن ءِ بندات کُتگ ھمدا سویڈن ءَ منی کر ءَ یک ساھت ءِ لوکیشن سر ءَ تامر کنگ ءَ اگاں رپورٹ ءِ ٹھینگ ءِ ھاتر ءَ گلگدار مدام ارزان اَنت، بلے ابید جاگہ ءِ زانگ ءَ اسکرپٹ ءِ نہ بیگ ءَ جوانیں ءُ ھبناکیں رپورٹ جوڑ کنگ گران اِنت ءُ ترا پنچ دمان ءِ تہ ءَ راہ ءِ درگیجگی اِنت ھمے شرتریں درس اِنت، فلیکسیبل بیگ۔

ٹی بی پی: تئی ھیال پراجیکٹ ءِ بندات کنگ گران اِنت اگاں یکشل ءَ وت ءَ برجاہ دارگ ءُ دیم ء روگ؟ ءُ تو چوں چہ اے گرانیاں وت ءَ کش اِتگ؟

ھمایوں مبارکی: بندات کنگ ارزان تریں بھر اِنت ءُ من ءَ دوست بیت۔ وھدے پراجیکٹ بندات اِنت من وتی جند ءِ چکاسگ ءَ بندات کناں ءُ وتی ٹیم ءِ سر ءَ جوانیں سانمندی ءَ گوں آسر کناں۔ شوٹنگ ءِ وھد ءَ جیڑہ کائنت۔ یک سوجکارے ءِ ھساب ءَ اے باز ارزان اَنت بلے گران ءُ ھراب ھم بیت کن اَنت باز المی اِنت کہ ٹیم ءَ اوست ءُ شرپ دیگ بہ بیت بلے درستاں ھژدری ایش اِنت پد نہ کِنزگ من پد نہ کِنزاں ءُ من ءَ وش نہ بیت پد کِنزگ راستی ایش اِنت من ھچبر پد نہ کنِزاں۔

ٹی بی پی: تو دان انگت چنچو تامر جوڑ کُتگ ؟

ھمایوں مبارکی: انبارن سالس ءَ پد، من دو لُکیں تامر (ھوریڈ ءُ کاٹ آن کیمرہ)، یک سوتی تامرے جوڑ کُتگ دوئیں لُکیں تامر ءُ سوتی تامر ءَ فیسٹیولاں داد گپتگی، “پور افریگہ” چار داد گپتگ ءُ شش جاہ نامینگ بیتگ اَنت۔

اے وھد ءَ من دگہ یک لُکیں تامر ءِ “نائن” آئی ءِ تامر کاری ءِ سر ءَ کاراں اے ھم بزاں کہ سرجم اِنت، بلے کوڈ-19 ءِ سوب ءَ من گُڈ سر ءِ دو ءُ سئینانی تامر کاری دارگ کپتگ۔

اِشی ءَ ھوار من دگہ یک لُکیں تامر ءِ پروڈیسو ھم کُتگ کہ آئی ءِ نام “سکار دیٹ سکیرس می” اِنت، اِشی ءِ ڈائرکٹر مائکل اسگونی اِنت اے تامر پوسٹ پروڈکشن ءِ تہ ءَ اِنت ءُ من ھمے زیتاں اِشی ایڈیٹنگ ھلاس کُتگ۔

ٹی بی پی: ابید چہ جوڑ کُتگیں اگاں جُنزوکیں تامراں تئی مازگ ءَ نوکتریں ھیال ھست پہ تامراں؟

ھمایوں مبارکی: منی کر ءَ دو سرجمیں تامر (فیچر فلمز) جریدگ اَنت، ایشاں چہ یکے کیمروں ءَ بیت، گوں مائکل ءُ ڈیل پون ءَ ھوار ڈیل پون ءِ ھواریں نبشتہ کار ءُ کیمرون ءَ پروجیکٹ لیڈر اِنت۔ دومی سرجمیں تامر اوست اِنت کہ سوئیڈن ءُ یونائٹیڈ اسٹیٹس ءَ تامرکاری کنگ بیت اِشی ءِ اسکرپٹ سرجم اِنت ءُ اِشی نام “ڈیفیٹیڈ” اِنت۔ منی مجگ ءَ یک ڈاکومینٹری ءِ ھم ھست بلے انی باز زیت بیت آئی ءِ سر ءَ گپ کنگ۔

ٹی بی پی: تئی تامرانی تہ ءَ مستریں لوٹ چی اِنت ؟ چونیں کلوہ چیر اَنت؟

ھمایوں مبارکی: منی تامرانی گیشتریں، چیریں کلوہ مان اَنت منی واھشت مدام ھمیش اَنت کہ من زانشتی ءُ انٹرٹینگ تامر جوڑ بہ کن آں۔

ٹی بی پی: مروچی ما گندیں بلوچستان ءَ بلوچ ورناہ ءُ زالبول ھم تامر سازی ءِ نیمگ ءَ گیشتر دلگوش دیگ ءَ اَنت، گوست ءِ ھساب ءَ انی کار گِندگ ءَ پیداک اَنت بلے انگت ءَ ھم بلوچاں یک انڈسٹری ءِ نیست، شمئے ھیال ءَ ھما کجام گام اَنت کہ زیرگ بہ بنت گُڑا بلوچ یک تامر انڈسٹری ءِ نیمگ ءَ شُت بہ کن اَنت؟

ھمایوں مبارکی: وھدے کہ گپ گلانی جوڑ کنگے کیت من باز بر ءَ جھد کُتگ بلے جوانیں پسہ نہ رس اتگ شمارا یات بیت وھدے من رژن ٹی وی بندات کُتگ! من ءَ سرجمیں جھان ءِ بلوچ مھلوکاں باز جوانیں رسپانس دات، آ ساڑایگ اِت اَنت بلے بدبھتی ءَ وھدے اسپانسر کنگ ءُ بلوچی میڈیا کمک کنگ ءِ گپ اَتک گُڑا آ وھد انگت سک زیت اَت۔ مئے باپاری مھلوک پہ اے گام ءَ ساڑی نہ اَت۔ من رژن ٹی وی جنزینت دانکہ سیٹلائٹ چینل بینک کرپٹ بیت آیاں 2013 ءَ بند کُت ءُ ھما گُڈی وھد اَت کہ من براڈکاسٹ کُتگ اَت۔ اگاں من ءَ ھما وھد ءَ کمک گوں بیت اِنت مروچی مئے کِر ءَ یورپ ءَ شریں بلوچی تامری گل بیتگ اِت اَنت۔ من شمار ءَ دگہ یک درور ءِ دے آں، منی کر ءَ جوانیں کسہ ءِ ھست بلوچستان ءِ درگت ءَ من وت نبشتگ من گوں سویڈن ءُ یوکے ءِ بلوچاں گپ کُتگ، من گلف ءَ وت شُتگ آں دبی، شارجہ، العین ءُ عمان ءِ باپاری مردمانی گندگ ءَ پہ تامر ءِ فنڈنگ ءَ بلے من ابید کجام گم باوری ءَ واتر اَتکگ آں آ درست سک جوانیں ءُ مھروانیں مردم بیتگ اَنت، منی باز جوانیں پیمے ءَ چارگ کنگ بیتگ ءُ مئے انگت ءَ باز جوانیں رھوت ھست اَنت آ کسانیں کدی ءَ بیت کنت کمک کنگ لوٹگ ءَ اِت اَنت، بلے اسکرپٹ مزنیں زر ءِ لوٹ کنگ ءَ اَت ءُ آ تامرکار نہ بیگ چُشیں رِسک ءِ زرت نہ کُت من سرپد باں ءُ آیانی جیڑگانی اھترام ءَ کن آں پہ بلوچ باپاری مردماں تامر کاری نوکیں باپارے، من سرپد بیت کُت کہ پرچہ آیاں آ وھد ءَ زر جت نہ کُتگ، اے یک مردمی جیڑہ نہ اَت مئے مردماں وھد پکار اِنت تامر کاری ءِ مز ءَ سرپد بیگ ءَ مستریں بازارانی تہ ءَ آ وھد ءَ ما رژن ٹی وی بندات کُت بلوچاں ھچ سیٹلائٹ چینل نیست اَت کردانی دہ ءَ گیش سیٹلائٹ چینل اِت اَنت۔ من گوں لھتے پاکستانی زرداریں مردماں ھم گپ کُتگ اَت بلے ھچ پیمیں دیمروی ءَ ابید من دو بر ءَ ھندوستان ءَ شُت اَنت منی کسانیں دیوان ءِ گوں بانک پوجا بَٹ ءَ بیتگ اَت کہ منی انگت شرد کپور ءَ اڑ داتگ اَت، من وتی سنگت ءَ پیسر گُشتگ اَت کہ منی تامر پہ پوجا بٹ جوان نہ اِنت، اے پہ ایشی ءِ راج ءُ دگہ مزنیں کمپنیاں جوان اِنت منی گُڈ سر ءَ کبیر خان ءِ گون ءَ اھوال بیت، “ٹائگر زندہ ہے” سوجکار ءِ گون ءَ۔ آئی ءَ من ءَ گُشت وتی اسکرپٹ ءَ دیم دے، من وتی تامر ءِ کسہ ءِ کسانی بھر ءِ (سناپسس) دیم دات۔

دو سال ءَ پد آ گوں بجرنگی بھائی جان دیم ءَ اَتک، من نہ گُشاں آئی ءَ منی ھیال زرتگ یا اگاں منی کسہ ءَ چہ سانمند بیتگ، یا اگاں یک دروشمے بیت کنت بلے نی آ گپ بَہ ئِے نہ کنت، بلے آئی ءَ منی ایمیل پد ءَ ھچبر پسو نہ دات اَنت داں انگت ءَ آ تامر بالی وڈ دومی مستریں تامر بیت “دنگل” ءَ پد، گوں 160 ملین ڈالر کَٹگ ءَ اگاں مارا گل بہ بیت اِنت مروچی ما ھم جتائیں دروشمے ءَ کار کُتگ اَت۔ اے ھم ھدا یے شُگر اِنت، وھد بدل بیتگ ءُ من ءَ باور اِنت کہ بلوچ مھلوک رسانک ءِ ارزشت ءَ سرپد بیت ءُ آیوکیں پدریچ ءَ کمک کنت ۔ وھدے گپ مئے ورنایانی کیت، بازیں دھکاں، چاگرد ءَ ( مات پِت، کھول ءِ مردم ءُ دگراں) بلوچ نیشتگ اَنت کہ ازمکار بہ بنت، بلے اے لیکہ بدل بیتگ انفارمیشن ٹیکنالوجی ءِ منتواری ءَ ءُ نوکیں پدریچ ءِ تہ ءَ زانت ءِ سوب ءَ بلوچستان ءِ مردم وتی ازم ءَ جوانی ءَ گوں درانگاز کُت کنگ ءَ اَنت ءُ من اِشی ءَ اے ھاترءَ نہ گُشگ ءَ اَنت پرچہ کہ من پھر کنوکیں بلوچے آں، بلوچانی ٹیلنٹ ھست شما تھنا لھتے سال ءِ سوشل میڈیا ءَ نیمگ ءَ چمشانک بہ دے اِت شمارا سدانی کچ ءَ بلوچ ورناہ گندگ ءَ کائنت سک باز زبر اَنت ءُ آیانی پروڈکشن بے درور اَنت۔ ازمکاری، سوجکاری، سوتی تامر، تندجاہ، گراپکس، ھمک چیز شرتر بیان اَنت من دلجمی ءَ گُشت نہ کناں، اگاں بوت کنت من رد ھم بہ باں بلے منی ھیال ءَ اے دیمرویانی پُشت ءَ یکے ءَ چہ مستریں سوب ءِ ایش اِنت کہ آیاں باز جھد کُتگ کہ آ اے جاہ ءَ سر بہ بنت مروچی سر انت، آیاں ساچست کار جوڑ بیگی اَت، پرچہ آیانی کر ءَ دگہ ھچ نیست اَت پہ کنگ۔ بلوچستان ءِ گیشتریں وانندگیں ءُ زانتکاریں بلوچ ورناہ بلوچستان ءَ بیروزگار اَنت مرچاں یوٹیوب ءَ بلوچی زبان ءَ بازیں زانشتی چینل ھست اَنت ءُ جتائیں سرھالانی سر ءَ گپ کن اَنت، تندجاہ ءُ سرجمیں دانگ ءِ سر ءَ، انچو گشے منی دیستگیں واب راست بیتگ من ھمک ھما مردم ءَ دلبڈی دے آں کہ گپ کُت کنت، پد ءَ آ انسٹا گرام، یوٹیوب اگاں لنکڈن ءِ اکاونٹ جوڑ کُت کن اَنت کہ اود ءَ آ باپاری مردمانی گوں اھوال کُت کن اَنت۔ جنک ھم گوں کھول ءَ گپ بہ کن اَنت ءُ آیاں یوٹیوب چینل پچ کنگ ءِ موہ دیگ بہ بیت ءُ بلوچ زالبولانی بارو ءَ گپ بہ کن اَنت، چُشیں سک باز سرھال ھست کہ آیانی ھبر بیت کنت۔ بلوچستان ءِ انچیں بازیں ھند ءُ دمگ ھست اَنت کہ آیانی درگت ءَ مردماں گپ نہ کُتگ ءُ سرپد نہ بیتگ اَنت چُش کہ، مھرگڑ ءِ آبادی، بلوچی تھیریم بلوچستان ءِ حیوان، مئے گیدی کسہ، مئے ورگ، بلوچستان ءِ ندارگ ءُ دگہ باز۔انچش گُشگ بیت یک دیمروی کُتگیں رسانک ءُ سینیما ءِ زالبولیں ازم کار ءُ سوج کارانی دیم ءَ آرگ ءُ ھمراہ داری کنگ ءَ ابید بلوچ راج ءَ مُز دات نہ کنت بلوچ چاگرد ءُ مات ءُ پِت بائد اِنت وتی بلوچ زالبولیں ازمکاراں کمک بہ کن اَنت ءُ آیاں دیم ءَ آیگ ءَ بل اَنت سرکار باپاری مردم بائد اِنت ورکشاپ پچ بہ کن اَنت بلوچ زالبولیں ازمکارانی ھبناکی ءَ ودینگے ھاترءَ اے پہ چاگرد ءَ پائدگ مند اِنت ھما جاہ ءَ کہ مردینے اکس کش نیست اَنت جنین آدم کار کُت کنت۔ من باز پر امیت اَنت پہ بلوچ سینیما ءُ رسانک ءِ درگت ءَ، مئے نوکتریں پدریچ ھما جاہ ءَ سر بیگ ءَ اِنت، اے مئے پرز اِنت ھم، کہ پہ مدامی کارانی یکشلی ءَ برجم دارگ ءِ ھاتر ءَ ادارہ، فورم پچ بہ کنیں کہ اود ءَ نوکباھندانی کمک بہ کنیں۔

ٹی بی پی: جھان ءِ جتائیں سینیما وتی لوٹانی ھساب ءَ دیمروی کن اَنت اگاں ما بہ چاریں مروچی ھالی ووڈ ءَ ھوار بالی ووڈ ءُ چائینیز تامرانی انڈسٹری ھم سک مزن اَنت اے مزنین انڈسٹریانی نیام ءَ مستریں فرق یا تپاوت کجام اِنت ؟

ھمایوں مبارکی: منی ھیال ءَ فرق اگاں تپاوت سک مزن اَنت بلے ایشانی سوب ایش اَنت کہ ھمک جاہ ءُ ملک ءِ وتی ندارگ ھست اَنت، دود ءُ ربیدگ ھست اَنت پمیشکہ اے تامر ھندی مردمانی ھاتر ءَ الم اَنت پہ درور باز وھد ءَ پیش، ھالیوڈ ءَ سائنس فکشن تامر اڈ کنگ ءَ دیمروی کُتگ، ءُ بالیوڈ ءَ مڈل ایسٹرن، لاتن امریکہ، زرباری ایشیا ءُ یورپ ءِ بازیں بھر وتی نیمگ ءَ ترینتگ اَنت گوں وتی ڈرامہ، مھری کسہ ءُ سوتاں ءُ چین اگاں ما بہ گش ایں جیکی چین آ وت یک جتائیں کسھے تھنا اَے چارگ بہ بیت کہ ھالیوڈ ءِ اینیمیشن ءُ کارٹوناں جھان ءِ گیشتریں زھگ چار اَنت چینچو چینی، جاپانیز (منگہ) ءُ ھندوستانی اینیمیشن ءُ کارٹون ما وتی ھندی ٹی ویانی سر ءَ گندگ ءَ اِنت۔ بازیں دھکاں چہ ھالیوڈ جھان ءِ سینیما ءَ دربرگ ءَ اِنت ءُ دیمروی کنگ ءَ اِنت ءُ انگت ءَ برجاہ اَنت، ءُ آ نہ لوٹ اَنت کہ کجام ھم دری آیانی مستری ءَ گار کُت مہ کنت اگاں من رد مہ باں، ھالیوڈ ءِ ریوینو2019 ءَ کساس 43 بلین ڈالر بیتگ ءُ ھمے سال ءَ ھندوستان ءِ ریوینو 4 بلین ڈالر بیتگ، ابید چہ اے گپ ءَ کہ ھندوستان ءَ یک سالے ءَ کساس 2000 تامر جوڑ بیت ءُ ھالیوڈ ءَ 750 – 800 ءِ کچ ءَ جوڑ بیت۔ منی ھیال ءَ اے شمارا وت باز گپ کن اَنت دگری ءُ تامری کوالٹیانی بارو ءَ۔ ھالیوڈ ھمینکس تاکت ور اِنت کہ بازیں دمگانی تامر انڈسٹری وتی نامانی پجیگ ءَ وڑ جنگ ءَ لاچار اَنت، چُش کہ بولیوڈ، نولیوڈ، ٹولیوڈ، مولیوڈ، سندلوڈ، کولیوڈ ءُ دگہ بازیں اے وت پیش داریت کہ ھالیوڈ چے کساس ءَ مزن اِنت۔ منی ھیال ءَ اِشی ءِ پُشت ءَ چہ مستریں سوب آں یکے ایش اِنت کہ ھالیوڈ تامرانی سرءَ کمپرومائز نہ کنت آ تامر ءَ سک سنجیدگی ءَ گوں زیرنت، آ ٹیکنالوجیانی، کسہ کاری ءِ سر ءَ ھرچ کن اَنت وھدیکہ بالیوڈ تامر پہ مزنیں مھلوکان اِنت پہ درور، لھتے سائنس فکشن تامر چُش کہ سٹانلی کیوبرک ءِ “2001 اے اسپیس اڈیسی فرام 1968”، سٹار وار تامر 1977 ءَ اڈ بیتگ اَت ءُ آئی ءَ ھپت سال ءَ پد جیمز کیمرون ءَ 1984 ءَ ٹرمینیٹر جوڑ کُتگ اَت ھالیوڈ جھد کنت وتی چاروکاں مدام جتائیں ءُ نوکتریں چیز پہ چارگ ءَ بہ دنت، ھالیوڈ ءِ سوجکار ءُ پیشکار نوکتریں جھد کنگ ءَ چک ءُ پد نہ بنت۔ پہ بالیوڈ ءَ پیسر ءَ اے ناممکن بیتگ، آیاں گوں آرٹ تامراں جھد کُتگ، چاگرد ءَ سیادی داروکیں تامر، بلے آ سوبمند نہ بیتگ اَنت یک لس ھندوستانی ءِ کہ آ ھمک روچ سد کلدار ءَ اگاں پہ کمتر ءَ سینزدہ ءَ چہ ھشدہ ساھت کار کنگ ءَ اِنت آ نہ لوٹ ایت دگہ ھمے پئیمیں رنگے ءُ دردے ءَ چکاریں لس ھندوستانی ءِ زند ءَ سلور سکرین اگاں ٹی وی ءَ بہ چاریت، آ لوٹ اِیت اے دردمندیں زند ءَ بے ھیال بہ کن اَنت کہ آ ھمک روچ اِشی ءِ آماچ اَنت، آ لوٹ اَنت کمو وشی ءُ انٹرٹینمنٹ آیانی زند ءَ بئیت، آ لوٹ انت یک ھیرو ے ءِ یک ناچ کنوکیں جنک ئے۔ بلے پد ءَ ھم انفارمیشن ٹیکنالوجی ءِ منت ءَ گوستگیں لھتے سالانی تہ ءَ ھندوستان ءُ ایشیا ءِ دگہ بھرانی تہ ءَ کسہ کاری ءِ تہ ءَ دیمروی بیتگ۔ نیٹفلیکس ءِ آیگ ءُ عامر خان، انوراگ کشیپ ءُ زویا اختر دروشمیں ازمکار ءُ سوجکارانی بیگ ءُ مزنیں تامری کمپنی چشکہ ریڈ چیلیز، یش راج ءُ دھرما، زی ءُ ھیروز منی ھیال ءَ لھتے بدلی آرت کن اَنت۔ یک جوانیں درور ءِ من اد ءَ ریڈ چیلیز ءِ تامر “بدلہ” ءِ دیگ لوٹاں کہ آئی ءِ تہ ءَ امیتابھ بچن پیمیں مزن نامیں ازکار ھوار اَنت آ ھندوستان ءِ باکس آفس ءَ سک سومبند بیت اے گپ ءَ ابید ھم کہ بدلہ یک اسپانیش تامر، “دی انویزیبل گیسٹ” (2016) ریمیک اِنت چہ ایشی ءَ زانگ بیت کہ نی مھلوک پہ نوکتریں کشہ ءُ سوجکاری ءَ جاڑیگ اَنت۔منی ھیال ءَ، ھندوستان ءِ سینیما ءِ تہ ءَ بدلی پیداک اِنت، اے کمو باز ھترناک اِنت ھم، پرچہ کہ کس وتی دود ءُ ربیدگ ءُ پجار ءَ بے ھیال مہ کنت۔ ھندوستان ءِ نوکتریں پدریچ ءَ پیش داشتگ کہ لگان، تارے زمین پر، گُلال، لنچ باکس، ھیدر ءُ نِیٹفلکس ءِ ڈیلی کرائمز ءُ سیکریڈ گیمز پئیمیں جتاھیں تامر ءُ سیریل وش اَتک کنگ بنت۔ بدلی کم کم ءَ پیداک اِنت ءُ ھالیوڈ ھندوستان ءِ مارکیٹ ءَ سرپد بیت۔ منی ھیال ءَ کوڈ-19 ءَ پد ھالیوڈ گوں بالیوڈ ءَ ھر ھساب ءَ نزیکی ءُ ھوار کاری کنت اے یک بازی یے مزنیں اسٹریمنگ نامانی نیام ءَ چشکہ امازون، نیٹفلیکس، ھیچ بی او ءُ ایندگہ گیشتریں جھد ھمیش اَنت کہ گیش ءَ گیش مھلوک ءَ بہ رس اَنت نیٹفلکس ءَ کساس 250$ ملین ڈالر پہ آئیرش مین تامر سر ءَ ھرچ کُتگ ءُ آ دگہ لوکل سریرزانی پیش کاری کنگ ءَ انت انچو کہ من بُرز ءَ درشان کُت۔ منی ھیال ءَ ادا اے گپ ءَ کنگ الم اِنت کہ نِیٹفلکس ءُ واجہ شاھ رخ خان ءِ پیش کاری ءَ جوڑ بیتگیں بارڈ آف یکیں سیریل اِنت کہ آ بلوچستان درگت ءَ اِنت۔

ٹی بی پی: اے پِڑ ءِ تہ ءَ نوک پیداکیں مردم کہ آ ڈائیرکٹر، بیت ایکٹر بیت، ڈائیرکٹر آف پوٹو گرافی بیت، پروڈیوسر بیت یا کہ اسکپرٹ رائٹر ءِ بہ بیت آیانی ھاتر ءَ تئی کلوہ چی اَنت ؟

ھمایوں مبارکی: انچو من پیسر ءَ گُشتگ اَت منی ھیال ءَ، من سد درسد راست بیت نہ کن آں، من تھنا وتی جند ءِ تجربگ ءُ زانت ءَ درشان کنگ ءَ آں منی ھیال ءَ پہ یک سوجکاری ءَ سوجکار بیگ ءِ ھاتر ءَ درستاں المی شئے ایش اِنت کہ آ جوانیں کسہ گچین بہ کن اَنت، کسہ ءَ سرپد بہ بنت ءُ سوجکاری بہ کن اَنت پہ پری پروڈکشن ءَ شریں وھد ءِ بہ دے اَنت، زیت وتی کاراں بندات بہ کن اَنت ءُ المی لوٹاں نبشتہ بہ کن اَنت ھرکج ءَ کہ المی بیت اسکرپٹ ءِ تہ ءَ بدلی بیار اِیت۔ سوجکار بائد اِنت سرجمیں ٹیم ءِ سروکی ءَ بہ کن انت ءُ پہ جوانیں بدلیانی گُوشدارگ ءَ ساڑی بہ بنت آ ٹیم ءِ سروک اِنت سوجکار بائد اِنت سرپد بہ بیت کہ آئی ءِ پروجیکٹ چی اِنت، آئی ءَ نبشتگ اگاں دگہ یکے ءَ اگاں کسے گوں کسہ ءَ ایماندار نہ اِنت، گُڑا آ کسہ ءِ آسر جوان نہ بیت۔ یک سوجکارے بائد اِنت کہ درستانی گون ءَ جوانیں رھوت بہ داریت، آ المی بہ کنت کہ اے مردم آئی ءِ پہ پراجیکٹ ھوار گیتگ اَنت (زر سر ءَ اگاں بے زر ءَ) آ ھبناک اَنت دگہ یک المی لوٹ ئِے پہ تامر کاری ءَ جاگہ گچین کنگ اِنت اے المی اِنت کہ تو تامر کاری ءَ پیسر جاہ درگیپتگ چارتگ ءُ گچین کُتگ اَنت جھد کنگ بہ بیت تامر ءِ تہ ءَ سوجکار ءِ ھاسیں دروشم گندگ بہ بیت، مردم بہ زان اَنت اے تئی تامر اِنت پہ درور ٹارنٹینو ءُ نولان ءِ تامرانی دروشم ءَ۔ گُڑا المی اِنت تو تامر کاری بندات مہ کن اگاں تو سرجم کُت نہ کن ئے، گوں وت ءَ ایماندار بہ بئے اے الم اِنت کہ تو وتی بندات کُتگیں کار ءَ سرجم بہ کن ئے، اے ترا ھاٹیگ دنت، وتی سر ءَ باور گیش بیت، تر ءَ گیشتر کنگ ءَ پرمائیت۔ واجہ کیّا رُستمی ءَ یک برے گُشتگ اَت “ برے برے چاروکاں بِل کہ وتی فریم ءَ گچین کن اَنت۔” آئی ءَ چُش ھم گُشتگ کہ “ وھدے تئی ھمراہ راستیں مردم بہ بنت تامر وت سوجکاری کنت۔”گُڈی ءَ ھمے گُشاں کہ یک سوجکارے ءَ گوں اکساں گپ بہ کنت، نہ گوں گوں ڈائیلاگاں، اگاں تئی اکسانی فریم گوں چاروکاں گپ کنت، گُڑا تو سوبمندے چارلی چیپلن یات اِنت! آئی ءَ گیش ءَ گیش بوان اِت اگاں ترا سوجکار ءُ جوانیں ایڈیٹر بیگ لوٹ ایت۔ پہ یک پیش کارے ءَ الم اِنت کہ پیش کار درستیں المی لوٹ آں کہ پہ تامر ءَ لوٹ اَنت آ جاڑیگ اِش بہ کنت آ سوجکار ءَ کمک بہ کنت گوں پوڑی جم کنگ ءُ آسراتی یکجاہ کنگ ءَ کہ پروجیکٹ ءَ گزر بنت پیش کار لوکیشن ءَ برجم بہ کنت ءُ ازمکار ءُ سرجمیں تامر ءِ کارکنوکانی ھاتر ءَ جاھاں بہ شوھازیت اے پیش کار ءِ زمہ واری اِنت کہ سوجکار ءَ کمک بہ کنت اگاں یک ازمکار ءِ گوں سوجکار ءَ بد اخلاقی کنت اگاں سوجکار کارے جوانی ءَ گوں کُت مہ کنت یک جوانیں پیش کارے ڈائرکٹر ءَ کش اِت کنت اگاں آ وتی کار کنٹریکٹ ءِ رد ءَ کنگ ءَ مہ بیت ءُ اگاں ڈائرکٹر گوں دگہ ٹیم ءِ مردماں گوں ترندی ءَ پیش بئیت پیش کار اولی روچ ءَ داں گُڈی روچ ءَ درستیں کارانی چاروک بیت اگاں تامر ھلاس بیت ءُ جوانیں آسر گندگ مہ بیت گُڑا پیش کار گُڈی اوست بیت کہ آ پروجیکٹ ءَ رکینت کنت گوں نوکتریں سینانی تامر بند کنگ ءُ اگاں سرجمیں پروجیکٹ ءَ ری ایڈیٹ کُت کنت گوں نوکتریں ٹیم ءَ۔ پہ یک نبشتہ کارے ءَ المی اِنت کہ آ باز بوان اِت مزنیں تامرانی نبشتہ کارانی وانگ المی اِنت، دگہ اسکرپٹانی وانگ المی اِنت، جتائیں تک ءِ اسکرپٹاں بوان اِت چُش کہ ایکشن، ڈرامہ، ھورر ءُ ایندگہ، اگاں چہ ایشاں لھتے وانگ ءَ وش مہ بنت ھم، بلے پد ءَ ھم ایشانی وانگ المی اِنت داں آسر ءَ آیانی اسکرپٹانی تئی ءَ کار مرز بیتگیں اسٹائلانی دربرگ المی اِنت، ڈائلاگانی دربرگ ءُ سرپد بیگ المی اِنت، ءُ آیاں چوں ندارگ یک سینے ءَ چہ دومی سین ءَ بُرتگ اَنت ءُ سرپدی داتگ اشاں دگہ تامراں گوں یکجاہ کنگ ءُ چارگ من انسیپشن باز رند ءَ چار اِتگ، ھمک رند ءَ من چارتگ منی دل ءَ پہ نبشتہ کار، سوجکار ءُ ایڈیٹر ءَ ارژشت ءُ اوست ودیتگ ۔ پہ یک ازمکارے ءَ تو وتی جند ءَ جُست بہ کن تو کیمرہ ءِ دیم ءَ اوشتگ گپ کنگ ازمکاری کنگ ءَ مھکمے؟ تو ڈائلاگاں یات گِپت کن ئے ءُ اگاں الم بہ بیت بدلی آورت کن ئے؟ یک ازمکارے ءِ ھما رول ءَ گچین بہ کنت کہ آئی ءِ جند ءَ دوست بہ بیت ءُ ھما کسہ ءُ کارست ءَ کہ آ گوں مھکمی ءُ ایمانداری ءَ درشان کُت کنت ۔ اے ھم زانگ المی اِنت کہ سوجکار کَے اِنت؟ وھدے تو یک کولے کُتگ، گُڑا آئی ءِ سر ءَ اوشتگ ءُ ڈائرکٹر ءِ سیٹ ءِ سر ءَ کُتگیں پیسلھانی شرپ دیگ المی اِنت، اگاں ناں سرجمیں تامر جیڑھانی آماچ بیت کنت اے ھم المی اِنت وھدے یک کارستے ءِ گچین کُتگ گُڑا آئی ءِ درگت ءَ بہ وان، پرچہ کہ یک کارستے ءِ سرپد بیگ ءِ ھاتر ءَ ازمکار بائد اِنت کہ ھما کارست ءِ تہ ءَ وت ءَ گار بہ کنت وتی مزنی ءَ بے ھیال بہ کنت ءُ ھما کارست کہ آ آئی ءَ درشان کنگ ءَ اِنت گوں ھما کارست ءَ چاروکاں بہ منارین اِت کہ آ شریں اگاں بدیں کارستے اگاں نیامی مردم اِنت دگہ یک گپے من اد ءَ گیش کنگ لوٹاں کہ ھمینچو گیشتر دگہ ازمکارانی زند ءَ وانے ھمینچو گیشتر دربرت کن ئے۔ ڈائرکٹر آف پوٹو گرافی اصل ءَ تامر ءِ سیمی سوجکار اِنت۔ (اولی سوجکار دومی ایڈیٹر ءُ سیمی ڈی او پی) ۔ پہ چاروکاں کہ ھما کسہ اگاں تامر کیت آ ھما بیت کہ کیمرہ ءِ چماں چہ گرگ بیتگ یک اکس کش اگاں تامر کش ءِ بائد اِنت بزانت کہ سوجکار چی لوٹگ ءَ اِنت ءُ اے ھم المی اِنت کہ ھردوئینانی بیان ءَ جوانیں اھوالے بہ بیت دانکہ یک دومی ءَ شر سرپد بہ بنت وتی آسراتیانی زانگ ءُ سوجکار ءَ گُشگ کہ کجام سین ءَ کجام لینس کار کنگ بہ بیت ءُ پرچا دانکہ تامر ءِ تہءَ راستی زندگ بہ بیت۔ من وت پہ درور 14ایم ایم، 18ایم ایم، 35ایم ایم ءُ 50 ایم ایم ءِ لینس کار مرز کناں وتی گیشتریں تامرانی تہ ءَ پہ ھمک سوجکاراں اے کساس بدل بنت سینانی ھساب ءَ۔ منی مستریں سوج پہ ھما مردماں ھمیش اِنت اگاں کسے ڈی او پی بیگ لوٹ ایت گُڑا آ بندات گوں موبائل اگاں بُنکی کیمرہ ءَ گوں بہ کنت، وتی تہءَ چیریں زانتکاریانی شوھازگ ءِ ھاتر ءَ اے تامر ھم پہ نوک باھنداں کمک ءِ بیت کن اَنت “دی شیپ آف واٹر”؛ “پینس لبرینٹ”، “دی ریویننٹ”، “لائف آف پائی” یا اگں “ڈانس ودھ وولفز”۔

ٹی بی پی: تئی تامر مارءَ کُج ءَ دست کپت کن اَنت؟

ھمایوں مبارکی: منی کارانی چارگ ءِ درستاں بھتر ءِ پیم منی تندجاہ اِنت homayoonmobaraki.com۔ منی تندجاہ ءَ من گوں وتی انسٹا گرام ءُ یوٹیوب ءَ ھم اپڈیٹ کن آں –