TBP Balochi

بلوچستان لبریشن فرنٹ ءِ جارکش میجر گوھرام بلوچ ءَ گوشتگ کہ بیست ءُ شش جون ءَ سرمچاراں مشکے ءِ دمگ تنک ءَ تیرگواری کرتگ ءُ لگور بیتگیں سرمچار گلاب ء سھراب کُشتگ –

جارکش ءَ گوشتگ کہ کشتگیں مرد بلوچ راجی آجوئی جنز ءَ تچگ ءَ پد پاکستانی پوج ءِ واستا کمکاری ءَ بیتگ – کجام ھم مردم بلوچانی نسل کُشی ءُ جنگی جرماں ھوار بیت ءُ پاکستان ءِ ھمراہ بیت گڑا آئی ءِ سزا ھم ھمے رنگ ءَ بیت اِنت –

نبشتانک: ما چی ءَ وتی زبان ڈالچار کُتگ

نبشتہ کار: نئیم مؔومن

دی بلوچستان پوسٹ

راج ءِ مستریں پجار آئی ءِ زبان اِنت چریشی ءِ سوب ءَ راج پجّا آرگ بیت ، ھمک راج ءِ مستریں ھستی آئی ءِ زبان ءُ دود ءُ ربیدگ اَنت کہ دنیا ءِ دیم ءَ شرّیں دْروشمے آئی ءِ سْیادی ءَ پدّر کن اَنت کہ کُجام راج ءِ مردمے ھمے وڑ ءَ اگاں یک راجے ءَ را زندگ بُوّگی اِنت گُڑا دْرستاں ءَ چَہ پیسر آ را وتی زبان پھریز ءُ زندگ دارگی اِنت کہ ابید چَہ زبان ءَ راج ھچبر دیمروئی ءُ زندگ بوت نہ کنت زبان ایوک ءَ توار ءُ گالوار ءَ را نہ گْوش اَنت بلکین ھمک زبان ءِ چار بھر اَنت ءُ  آ ایش اَنت کہ  ”  نبشتکاری ، وانگ ، اِشکُنگ ، ھَبَر کنگ ” ( Writing , Reading , Listing , Speaking ) ءُ  پہ بلوچی زبان ءِ زانگ ءُ دیمروئی ءِ واست ءَ مارا چاریں بھر دیم ءَ آرگی اَنت ءُ یک ھساب دَربرگی اَنت راج ءِ بیگوائی ءِ مستریں سَوب آئی ءِ زبان ءِ گاری اِنت کہ چریشی ءَ ابید راج وت ءَ را ھچ پیم ءَ دومی راجانی دیم ءَ برجم داشت نہ کنت انچوش کہ یک مردمے ھبر نہ کنت آ گنگ ءِ نام ءَ زانگ بیت گُڑا ھمے وڑ ءَ یک راجے ھم زبان ءَ ابید دومی وَتواجھیں راجانی دیم ءَ  بےزبان ءُ گُنگ لیکگ بیت زبان یک چاگردے ءَ را گوں دومی چاگرد ءَ ھمگرنچ کنت ءُ چاگرد ءُ ٹَکانی یکجاھی ءَ را یک راجے یے ءِ نام دیگ بیت ۔ 

دیمتر ءَ ، من ھمے گْوش آں کہ مئے راجی زبان  بلوچی چی ءَ مئے جند ءِ ڈیھ ءَ چُش ڈالچار ( ignore ) اِنت ءُ پرچا مئے راج وتی زبان ءِ وانگ ءَ ساڑی نہ اِنت ؟ زبان راج ءِ ساہ اِنت  کہ راج ءَ زندگ دار اِیت بلے انگت  ما وتی زبان ءِ ارزشت ءَ نہ زان ایں ۔ اگاں ما زبان دوست مہ بَہ ایں گُڑا راج دوست چتور بوت کن ایں ؟پرچاکہ راج دوست بُوّگ ءِ مستریں راز زبان اِنت یک مردمے ءَ را گوں تیوگیں راج ءَ جوڑیں اِیت ءُ گوں راج ءَ آئی ءِ سْیادی ءَ پدّر کنت اگاں مارا وتی راج زندگ کنگی اِنت گُڑا گیش ءَ گیش مارا زبان ءِ سر ءَ ھم جْھد کنگی اِنت  دانکہ آدگہ  راج بزان اَنت کہ بلوچ ءَ را وت زبانے گوں سرجمیں بُنرھبند ( Grammar ) ءَ  ھست ءُ آ دومی زبان ءِ  بُنرھبندانی وازمندگ نہ اِنت ۔

اگاں ما بہ چار ایں  پاکستان ءِ آدگہ دمگّاں بلوچ راج ءَ را بلوچی ءِ نام ءِ سر ءَ توار جن اَنت بلے آ انچو سرپد نہ اَنت کہ بلوچی راج ءِ نام نہ اِنت بلکین بلوچستان ءِ جاہ منندیں راج ءِ زبان ءِ نام اِنت ، بہ گند ئے  اے مئے جند ءِ میار اِنت کہ ما وتی زبان ءِ ھاتر ءَ جْھد نہ کُتگ ءُ تنینگہ آدگہ راج  بلوچ ءُ بلوچی ءِ میان ءِ پرک ءَ سرپد نہ اَنت پہ راج ءِ نامدار کنگ ءِ ھاتر ءَ زبان ءُ دود ءُ ربیدگانی دیم ءَ آرگ ءِ واست ءَ جْھد اَلمی اِنت گُڑا مارا اے دوئینانی ھاتر ءَ ھمک سھت ءُ دمان جْھد کنگی اِنت  ۔

چَہ زبان ءِ وانینگ ءَ پیسر من ھمے جیڑ اِت کہ راج وتی زبان ءِ وانگ ءِ سک واھدار اِنت بلے نوں من سرپد بوت آں کہ بلوچ نودربراں وتی زبان ءِ وانگ ءَ چَہ گیش دری زبانانی وانگ ءِ واھگ ھست ۔ بازیں مردم ھمے گْوش اِیت  بلوچی ءِ وانگ ءَ ھچ پائدگ نیست بلے من گْوش آں وتی زبان ءِ مستریں پائدگ ایش اِنت کہ نبشتکاری ءِ وھد ءَ شّریں وڑے ءَ نبشتہ کنگ بیت ءُ نبشتکار وتی نِکانانی ( مواد points ) یکجاہ کنگ ءِ جْھد ءَ بیت بلے آئی دل ءَ اے تُرس نیست کہ منی نبشتانک ءِ تہ ءَ بُنرھبندانی ردی بنت ءُ آ وتی نبشتانک ءَ یشلی ءَ نبشتہ کُت کنت وتی زبان ءِ زانگ ءِ پائدگ ایش کہ دومی مردم اے شگان جَت نہ کنت کہ تو راجی زبان نہ زان ئے پہ زبان ءِ  زندگ کنگ ءِ ھاتر ءَ مارا گیش ءَ چَہ گیش وتی جند ءِ زبان ءَ نبشتہ بہ کن ایں دانکہ آوکیں پدریچ وتی زبان بیھال مہ کن ۔

من وتی گُلیں راج ءِ نودربراں  گوں دزبندی کن آں کہ  وتی زبان ءَ بِہ وان اَنت نبشتہ بِہ کن اَنت دانکہ مئے شھدیں بلوچی بیگوائی ءِ آماچ مہ بیت ءُ پہ دیمروئی ءَ ردوم بزور اِیت ءُ  آکبت ءَ یک مَنّ اِتگیں( Accepted )  زبانے جوڑ بہ بیت ۔ بلوچ راج یک پدمنتگیں راجے ءُ مئے مسترین میراس وتن ،  زبان ءُ بلوچی دود ءُ ربیدگ اَنت کہ مارا مئے کماش ءُ  زانتکاراں سوگات داتگ اَنت ۔ باید اِنت ما ایشانی پھریز ءَ بہ کن ایں ءُ گاری ءَ اِش مَیل ایں ۔ 

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کوپا امریکہ ءِ کواٹر پائینل ءِ گوازی ءَ پیرو ءَ پیلانٹی ءَ چار گول ءَ، برازیل ءَ یک گولے ءَ باج برتگ، یورو کپ کواٹر پائینل ءَ اسپین ءَ پیلانٹی سَے گول ءَ ءُ اٹلی ءَ دو گول ءَ باج برتگ ءُ گوازی وتی نام ءَ کُتگ –

کوپا امریکہ ءِ گوازی برجاہ انت دوشی شپ ءَ کواٹر پائینل اولی گوازی پیرو ءُ پیراگاؤ ءِ میان ءَ بوتگ ءُ دومی گوازی برازیل ءُ چلی میان ءَ بوتگ – اولی گوازی ءَ پیرو ءُ پیراگاؤ ءِ لیبیاں جوانی ءَ گوازی کنان ءَ سَے سَے گولے اسکور کتگ ھر دو ٹیم دیمیگ بوتگ انت پیلانٹی شوٹ ءَ پیرو ءِ لیبیاں سَے گولے دیم ءَ چار گول کتگ ءُ گوازی وتی نام ءَ کتگ –

برازیل ءُ چلی ءِ میان ءَ بوتگیں گوازی ءَ چلی ءِ نیمگ ءَ چہ ھچ گول کنگ بوتگ وھدیکہ برازیل ءِ لیبی لوکاس ءَ یک گولے اسکور کتگ ءُ باج برتگ گوازی وتی نام ءَ کتگ-

کوپا امریکہ ءِ کواٹر پائینل ءِ دیم ءِ گوازی یوروگاؤ ءُ کولمبیا، ارجنٹینا ءُ ایکواڈور ءِ میان ءَ بوگ ءَ انت ـ

دومی نیمگ ءَ یوئیفا یورو کپ فٹبال گوازی برجاہ اِنت ءُ دوشی شپ سویزرلینڈ ءُ اسپین، بلجئیم ءُ اٹلی ءِ میان ءَ گوازی کنگ بوتگ اَنت –

دوشیگیں گوازی ءَ سپین ءَ سویزر لینڈ ءِ دیم ءَ پیلانٹی شوٹ سَے گول ءَ باج بُرتگ، وھدیکہ اٹلی ءَ بلجئیم ءِ دیم ءَ دو گول ءَ باج برتگ ءُ ھردو ٹیماں وت ءَ سیمی پائینل ءَ جاہ داتگ –

یوئیفا یورو کپ ءِ کواٹر پائینل ءِ اولی گوازی اسپین ءُ سویزرلینڈ ءِ میان ءَ بوتگ کہ ھردو ٹیماں یک یک گولے ءَ دیمیگ بوتگ انت پلانٹی شوٹ ءَ اسپین ءَ سَے پہ یکے ءَ باج برتگ گوازی وتی نام ءَ کتگ –

دومی گوازی اٹلی ءُ بلجئیم ءِ میان ءَ بوتگ کہ بلجئیم نیمگ ءَ چہ یک گولے اسکور کنگ بوتگ وھدیکہ اٹلی ءِ لیبیاں جوانی ءَ گوازی کنان ءَ دو گول اسکور کتگ باج برتگ ءُ گوازی وتی نام ءَ کتگ –

زانگ بہ بیت یوئیفا یورو کپ ءَ بیست ءُ چار ٹیماں بھر زرتگ ءُ بیست ءُ چار ٹیمانی تہ ءَ سویزرلینڈ ءُ اسپین، بلجئیم ءُ اٹلی، چیک ریپبلک ءُ ڈینمارک، یوکرائن ءُ انگلینڈ ءِ لیبیاں جوانی ءَ گوازی کنان ءَ وت ءَ کواٹر پائینل ءَ سرکتگ مروچیگیں کواٹر پائینل ءِ گوازی ءَ اٹلی ءُ اسپین ءَ باج برتگ ءُ وت ءَ سیمی پائینل ءَ جاہ داتگ-

یورو کپ ءِ کواٹر پائینل ءِ دیم ءِ گوازی چیک ریپبلک ءُ ڈینمارک، یوکرائن ءُ انگلینڈ ءِ میان ءَ جتا جتائیں پٹاں بوگی اِنت –

سال ءُ دو ھزار ءُ پانزدہ سَے جولائی ءَ بلوچستان ءِ تیابدپی شھر گوادر ٹی ٹی سی کالونی ءَ پاکستانی پوج ءُ چیریں ادارھانی دست ءَ آوار جنگ بیتگیں عظیم ء دوست مھمد ءِ بیگواھی ءَ شش سال سرجم بیگ ءَ چاگردی رسانکجاہ ٹوئٹر ءَ کمپین کارمرد کنگ بیت اِنت –

عظیم دوست ءِ گوھار رکسانہ دوست ءَ یک تامر بندے ءَ شنگ کرتگیں گپانی تہ ءَ گوشتگ کہ منی برات دوھزار ءُ پانزدہ سَے جوالائی ءَ گوادر ٹی ٹی سی کالونی ءَ پاکستانی پوج ءُ چیریں ادارھاں آوار جتگ ءُ بیگواہ کرتگ کہ تنی وھدی بیگواہ اِنت –

آئی ءَ گوشتگ کہ منی برات ءَ شش سال سرجم اِنت کہ گار ءُ بیگواہ اِنت چریشی ءَ چہ مئے سرجمیں کھول عظیم ءِ ودار ءِ راہ ءَ چاروک اَنت –

آئی ءَ گوشتگ کہ سَے جولائی ءَ ٹوئٹر ءَ کمپین ءِ برجم دارگ بیت اِنت دراھیں انسان دوست ءُ چاگردی رسانکدر کارمرد کنوکاں گوں دزبندی اِنت ھیش ٹیگ #saveazeemdost کارمرد بہ کن اَنت ءُ منی برات ءِ یل کنگ ءَ مئے کمک ءَ بہ کن اَنت –

بلوچستان ءَ گار ءُ بیگواھیں مردمانی جیڑہ یک مزنیں جیڑھے ءِ سر ءَ سر بیتگ ءُ اود ءَ مھلوک ءَ ھمک روچ وتی کھولانی واستا زھرشانی کنگ ءَ گندگ بنت اِنت –

بلوچستان ءَ گار ءُ بیگواھیں مردمانی کھولانی گوشگ اِنت کہ دری انسانی ھکانی گل بلوچستان ءِ ناوشیں جیڑہ ءَ دلگوش بہ کن اَنت –

ھمے رنگ ءَ چہ نوشکی ءَ بیگواھیں نصیب اللہ بادینی ءِ کھول شال ءَ بیگواھیں مردمانی بنجل ءَ اتکگ، آئی ءِ مات ءَ وتی چک ءِ یل کنگ ءِ لوٹ کرتگ –

بیگواھیں نصیب اللہ بادینی ءِ مات ءِ رد ءَ ھپت سال ءِ گوزگ ءَ پد ھم نصیب اللہ انگت ءَ زورانسری بیگواھی ءِ آماچ اِنت بازیں وھدانی گوزگ ءَ ابید ھم انگت ءَ وتی زھگ ءِ راہ ءَ چاریگ اَنت ءُ ریاستی آمیدگس انساپ بہ دے اَنت –

آئی ءَ گوشت کہ نصیب اللہ دوازدھمی تبک ءِ نودربرے بیتگ ءُ وتی وانگ ءَ گوں دلگوش بیتگ آئی ءَ اگاں کجام ھم بھتامے ھست اِنت گڑا آ آمیدگس ءَ پیش کنگ بہ بیت اِنت –

زانگ بہ بیت نصیب اللہ بادینی سال دوھزار ءُ چاردہ ءَ نوشکی ءَ پوج ءَ دزگیر کرتگ ءُ ناشناسیں جاھے ءَ برتگ کہ چریشی ءَ پد آ بیگواہ اِنت –

بیمناکیں اذیت مئے پُرایمنیں جُھد ءِ راجدپتر ءَ درشان کنت- ماما قدیر

بیگواھیں بلوچانی یل کنائینگ ءِ ھاتر ءَ بلوچستان ءِ بنجاھی شھر شال ءَ پریس کلب دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ شست ءُ سَے روچ سرجم بوتگ –

سیاسی ءُ چاگردی باسک جاوید بلوچ، ڈاکٹر ثناء اللہ بلوچ ءُ دگہ مردماں بنجل ءَ اتکگ ءُ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ باوست کنان ءَ گوشتگ کہ مروچی بیگواھیں مردمانی دیمونیانی راجدپتر جزبگ ءُ پرایمنیں جھد ءَ چہ سرریچ ءُ مچلیتگیں وتی ھون ءُ وتی نازرکیں جان ءَ سگتگیں زوراکی ءُ دژمن ازیتاں نبشتہ کنگ ءَ انت –

آئی ءِ گوشگ اَت کہ اگاں باندا یک راجدپتر نویس ءِ بلوچ راج ءِ دیمونیاں تاک ءِ سر ءَ نبشتہ کنت یا نہ کنت دنیا ءِ تاکتوریں رسانکدر بلوچ شھیدانی رتکگیں ھونانی یک یک ترمپ ءِ تاریک ءِ نبشتہ کنگ ءَ انت –

آئی ءِ گوشگ اَت کہ مروچی بیگواہ بوتگیں مردمانی نرم نازرکیں جان ءِ سر ءَ دردناکیں ازیت وت راجدپتری گواہ انت کہ پُرایمنیں جھد ءِ راجدپتر ءَ درشان کن انت –

ماما قدیر بلوچ ءِ گوشگ ات کہ چیزے واھشتانی ھاتر ءَ ماتیں سرڈگار ءِ سودا جنوکانی باندات تھار بوان انت ءُ اے بھاریانی وڑ ءَ بے وارسی ءِ پناہ گزینیں کیمپانی تہ ءَ کپ اَنت –

نیشنل پاٹی ءُ بی ایس او پجار گوادر ءِ نیمگ ءَ سربندن ءَ چائنیز ءُ بین الصوبائی ٹرالرنگ ءِ ھلاپ ءَ زھرشانی روانک کشگ بیتگ –

روانک ءِ بندات سربندن نیادی ءَ بندات بیتگ ءُ پند جنان ءَ سربندن جی ٹی ءَ سر بیتگ ءُ اود ءَ مُچی ءِ دروشم ءَ مٹ بیتگ –

زھرشانی ءَ روانک ءَ تران کنان ءَ نیشنل پاٹی ءِ بنجاھی رھشون اشرف حسین، طاھرہ خورشید، دمگی سروک فیض نگوری، اُستانی ورکنگ کمیٹی ءِ باسہ آدم قادر بکش، کلانی رھشون مجید عبداللہ، گوادر ءِ جنرل سکریٹری ولید مجید، رستم ایڈوکیٹ، بی ایس او (پجار) گوادر ءِ سروک خداداد بلوچ، نیشنل پاٹی سربندن ءِ رھشون نصیب حمید نوشیروانی، گوستگیں چیئرمین میونسپل کمیٹی گوادر عابد رحیم سھرابی ءُ انجمن اتھاد ماھگیران سربندن ءِ رھشون مراد بکش گوشتگ کہ ھستیں سرکار ءِ نیمگ ءَ بلوچستان ءِ تیاب دپ ءَ گیر ملکی ٹرالرزانی گون ءَ سودا دمگی ماھیگیرانی زرکاری ءِ بندش ءِ بروبری اِنت پیسر ءَ زر ءَ ٹرالرزانی واستا یلو درگلو بیتگ نِی گیر ملکی ٹرالرز ھم آیگ ءُ بلوچانی زر ءَ پُلگ ءَ اَنت کہ ھچ وڑ ءَ اوپار کنگ نہ بیت اِنت –

آیاں گوشت کہ گوادر ءِ دمگ ءَ پارلیمانی سیاست ءِ روچ ءُ شپی ءِ واھند بیگ ءِ نیزور ترگ ءَ ماھیگیر زر ءَ روگ ءِ ترس ءِ آماچ اَنت،باپ پاٹی ءَ بندوکیں گوادر ءَ سیادی داروکیں کلانیں ماھیگیر رھشون بیگ ءَ ابید وتی واجھاں وش کنگ ءَ سرکاری سرپدیانی پلامرزی ءَ کنگ ءَ اِنت –

آیاں گوشت کہ مکران ءِ زر ءَ چائنیز ٹرالرنگانی جاڑیگ بیگ ءَ وفاقی سرکار ءِ دیدانک دیم ءَ اتکگ اَنت سدکی اوست دارگی نہ اِنت چائنیز ٹرالرز ءِ اُستانی زر ءِ سیمسر ءَ جاڑیگ بیگ ءَ وفاقی سرکار ءِ گمراہ کنوکیں درشانی اِنت چریشی ءَ اے تاسر ءَ کمک رس اِت اِنت وفاقی سرکار ءَ بلوچستان ءِ زر ءِ سودا گیر ملکی ٹرالرز گوں کرتگ –

آیاں گوشت کہ بلوچستان ءِ زر ءِ واھند اد ءِ ماھیگیر اَنت، ءُ ماھیگیرانی زرکاری ءِ بنھِشت اِنت اے جیڑہ ایوک ءَ ماھیگیرانی نہ اِنت بلکیں ھمک تکاں بندوکیں مردمانی ئیگ اِنت ءُ ھمک تکاں پھک ءَ نابود کنت اِنت –

آیاں گوشت کہ نیشنل پاٹی ماھیگیرانی روزگار ءِ واستا شپ ھون کنوکاں ھچ رنگ ءَ اجازت نہ دنت – ماھیگیر وت ءَ ھچبر ایوک سرپد مہ بنت نیشنل پاٹی ساحل ءُ وسائل ءِ نگھپانیں پاٹی اِنت ماھیگیرانی زرکاری ءِ کوش ءَ ھچ رنگ ءَ اوپار کرت نہ کنت ءُ بے تواری ءَ نہ نند ایت –

آیاں گوشت کہ فشریز ءُ دگہ ادارھانی اے پرز بیت اِنت کہ آ ماھیگیرانی روزگار ءَ بہ پھریز اَنت بلے بژن اِنت کہ آ ٹرالرز مافیا ءِ کمکار جوڑ بیتگ اَنت – اُستانی سرکار ءِ نام ءِ بس ھست اِنت دگہ ھچ نیست اِنت – چائنیز ٹرالرز اُستان ءِ سیمسری ھداں لگتمال کنگ ءَ اَنت بلے داں انگت ءَ اُستان ءِ ھچ گامگیج گندگ ءَ نیایگ ءَ اَنت –

آیاں گوشت کہ نیشنل پاٹی ءَ اے زرمبشت چائنیز ٹرالرنگ ءُ گجہ مافیا ءِ ھلاپ ءَ برجاہ مان ایت دانکہ اُستان ءِ سرکار گیرملکی ٹرالرنگ ءُ ھمک ٹرالرنگانی ھلاسی ءِ واستا گامگیج نہ زور ایت – زھرشانی روانک ءَ نیشنل پاٹی ءِ باسک ءُ سربندن ءِ ماھیگیر بازیں کچے ءَ ھوار بیتگ اَنت –

بلوچستان ءِ بنجاھی شھر شال ءَ سر بیتگیں ھالانی رد ءَ دگ ءِ وئیل ءَ دو کس بیران بیتگ اَنت ءُ یک مردمے زدگ بیتگ، وئیل آدینگ ءِ روچ ءَ شال ءِ دمگ روکپتی شھدگ ءَ اختر آباد ءَ پیش اتکگ۔

اود ءَ ٹریلر گاڑی ءَ پرپٹے ءَ را ٹکر جتگ ءُ چریشی ءَپرپٹ سواریں فتح مھمد، نیاز مھمد بیران بیتگ اَنت ءُ والدین نامیں مردے زدگ بیتگ –

وئیل ءَ پد پولیس ءَ لاش ءُ زدگ بیتگیں مردم چِست کرتگ ءُ نادراہ جاہ ءَ سر کرتگ اَنت اود ءَ اژدری چار ءُ ٹپاس ءَ پد لاش کھول ءِ ھولگ ءَ کنگ بیتگ اَنت –

ھمے وڑ ءَ پنجگور ءَ سلاہ بندیں مردمانی تیرگواری ءَ دو کس زدگ بیتگ اَنت –

وئیل پنجگور ءِ بازار ءُ چتکان ءَ دیم ءَ اتکگ اَنت کہ اود ءَ ناشناسیں سلاہ بندین مردمانی تیرگواری ءَ نوربکش نامیں مردمے زدگ بیتگ –

ھمے وڑ پنجگور چتکان ءَ سلاہ بندیں مردماں تیرگواری کرتگ ءُ نوراھمد ء منور زدگ کرتگ –

دگہ وئیلے ڈیرہ مراد جمالی ءَ دیم ءَ اتکگ کہ اود ءَ اھوالکار وھید جنگ ءُ زدگ کنگ بیتگ –

گیشیں ھالانی رد ءَ ڈیرہ مراد جمالی پریس کلب ءِ باسک ءُ ھالتاک مشرق ءِ اھوالکار وھید رزاق بنگلزئی ناشناسیں مردماں اُرش کرتگ ءُ کرتگ –

وئیل ءِ بارو ءَ گیشیں سرپدی نہ بیتگ اَنت ءُ زدگ بیتگیں وھید سول ھسپتال ءَ برگ بیتگ –

بلوچستان ءِ دمگ چہ ھزدار ءِ ھند وڈھ ءَ جھالاوان عوامی پینل ءِ باسکاں زھرشانی کرتگ ءُ مزن شھدگ بند کرتگ ءُ ھردوکیں روگ ءُ آیگی مھتل بیتگ اَنت –

زھرشانی کنوکانی گوشگ اِنت سارونہ مائنز ءِ بندش ءَ پد باز براں آئی ءِ پچ کنگ ءِ لوٹ کرتگ بلے تنی وھدی انگت ءَ بندشی ءِ آماچ اِنت –

بازیں اداراں دگ بند بیتگ ءُ ھردوکیں گاڑیاں لین لگ اِتگ ءُ چریشی ءَ روک ءُ آؤکیں مساپراں جیڑہ ءُ جنجالانی دیمپانی بیتگ اَنت –

زھرشانی کنوکانی گور ءَ گپ ءُ تران ءَ دمگ ءِ انتزامیہ سر بیتگ ءُ اود ءَ گپ ءُ تران ءَ پد زھرشانی کنوکاں دگ پچ کرتگ ءُ زھرشانی ھلاس کرتگ –

بلوچستان ءِ دمگ کیچ ءِ ھنکین تمپ ءَ گوستگیں شپ ءَ ناشناسیں دزاں اُرش کرتگ ءُ زالبولانی سھر، دگہ گران گھادی مڈی دز اِتگ ءُ برتگ اَنت –

چہ تمپ ءَ سر بیتگیں ھالانی رد ءَ گوشگ بیتگ کہ گوستگیں شپ ءَ دازن چیری بازار ءَ دزاں اُرش کرتگ ءُ وابیں زالبولانی سر ءَ توپک داشتگ ءُ آیانی سھر، زر ءُ مباھل دز اِتگ ءُ برتگ اَنت –

ھالانی تہ ءَ گوشگ بیتگ کہ دُزی ءِ وھد ءَ زالبول ھم دُزاں لَٹ ءُ کُٹ کرتگ اَنت ءُ اشی ءَ ابید دازن ءِ سری بازار ءَ ھم یک لوگے ءَ اُرش کنگ ءِ جھد کرتگ بلے میتگ ءِ مھلوک ءَ بست کرتگ ءُ دُز تتکگ اَنت –

زانگ بہ بیت گوستگیں سال ءَ دُزاں دازن ءَ یک لوگے ءَ بیڑ برتگ ءُ اود ءَ کلثوم ء سعید ءِ گُٹ بے دردی ءَ زھگانی دیم ءَ بُر اِتگ ءُ آئی ءِ گوش ءِ سھر کش اِتگ ءُ برتگ اَنت –

ھمے رنگ ءَ تربت ڈنک ءَ ھم اود ءَ دزاں یک لوگے ءَ بیڑ برتگ اَت ءُ اود ءَ ملکناز نامیں زالبولے ءَ گھگیری کرتگ ءُ چریشی ءَ دُزاں ملکناز کُشتگ اَت ءُ آئی ءِ کسان سالیں زھگ برمش زدگ کرتگ اَت –

چرے وئیلانی بیگ ءَ پد بلوچستان ءَ سیاسی ءُ سول سوسائٹی ءَ بندوکیں مھلوک برانز گپتگ اَت ءُ بلوچستان ءَ ھوار کراچی ءُ دگہ شھراں زھرشانی کنگ بیتگ اَت –

بلوچستان ءَ سیاسی پاٹیانی گوشگ اِنت کہ دُزی ءُ ڈنگیاں ریاست ءِ نیمگ ءَ جوڑ کرتگیں توپک برداریں گل کہ“ڈیتھ اسکواڈ” ءِ نام ءَ زانگ بیت اِنت ھوار اِنت –

بلوچستان ءِ سیاسی پاٹیانی گوشگ اِنت کہ ڈیتھ اسکواڈ بلوچستان ءَ سیاسی باسک ءُ دگہ تکاں بندوکیں مردمانی کُشگ ءُ جنگ ءُ آوار جنگاں ھوار دُزی ءُ ڈنگیاں دزمان جن اِنت –

سیاسی پاٹیانی گوشگ اِنت کہ بلوچستان ءَ ریاست ءَ اے گل بے لگام کرتگ ءُ یل کرتگ کہ بلوچستان ءَ بلوچ مھلوک ءِ کُشت ءُ کوش ءُ دگہ ناوشیں وئیلاں بہ کنت –

نبشتانک: من کبرستان ءِ کش ءَ وپت آں

نبشتہ کار: شیھک شاہ

دی بلوچستان پوسٹ

من اِتاں سپر اَت جُنزان اِت ایں تھنا اِت آں پند دور اَت ھشت ساھت ءَ رند وتی منزلے ءَ سر بوتاں شپ بوت تیاری ءَ مان شانت من نشت آں جاھے چادر ءِ لمب ءَ بستگیں پُرانی ءِ ٹُکر کش اِت ءُ وارت کمو نشت آں اُستاد مُنھاج مکتار ءِ سوت ءِ چہ مباھل ءَ چالو کُت گوش داشت سوت ءِ ھلاس بوگ ءَ رند من چادر پچ کُت لوٹ اِت بہ وپس آں بلے واب آیگ ءَ نہ اَت برے اِے دیم برے آ دیم ءَ لیٹ اِتاں کمو دیراں پد واب شُت آں منی گُمان ءَ پاد برمش ءِ توار بوت چم پچ کُت اَنت توار ئِے دات تو کے ئے توار ءَ گوں من تُپنگ ءِ کُبل پچ کُت آئی ءَ منی توار ءِ پسو نہ دات ءُ گُشت ئِے من ءَ بِل تو کے ئے ۔؟
چونینے یے منی جاہ ءَ آتکگ ئے ءُ وپتگ ئے؟-

من گُشت من ھمے زمین ءِ پُسگے آں ، اِے کوہ ءُ کوچگ منی اَنت من پہ ھمیشانی رکینگ ءَ اِد ءَ اتکگ آں داں مرد سک نزیک ءَ پیداک اَت من تُپنگ دست ءَ کُت گُشت کہ منی نزیک ءَ مَیا یکبرے بگُش تو کے ئے گُشت ئِے من مُردگے آں منی کبرے کش ءَ تو وپتگ ئے ،من گُشت مُردگے ئے گُشت ئِے ھو من مُردگے آں نوں من بیایاں تئی کِر ءَ من گُشت ھو بیا۔

مُردنی منی جان ءِ پُٹ پاد آتک اَنت یک تُرسے چیر کپگ ءَ اَت مرد آتک منی کرءَ نشت ءُ ڈڈی جوڑی ئِے کُت ءُ گوشت ئِے چون ئے تو؟ من وشاں تو چون ئے؟ من ھم وش آں من وتی چاگل پہ مرد ءَ شھارت گُشت ئِے، من آپ نہ وراں تئی سپر دور اِنت اِے نزیک گور ءَ آپ ھچ نیست تو وت تُنیگ بہ ئے مرد ءَ من ءَ گُشت تو تھنا اِے کوہ ءُ گیابان ءَ گردگ ءَ ئے ترا ھیر اِنت؟ من گُشت وھدے کہ زالمے کیت منی زمین ءِ سر ءَ اُرش کنت منی زمین ءَ اچ من پُل اِیت گُڑا منی وڈیں ورناہ کوہ ءُ گیابان در کپ اَنت پہ وتی زمین ءِ رکینگ ءَ بلے تو بگُش تو اِے کوہ ءُ گیابان ءَ چی کن ئے اِد ءَ ویل ئے؟آئی ءِ چمانی ارس رتک اَنت گُشت ئِے من نزاناں من کدی مُرتگ آں ۔؟ ءُ چی ءَ مُرتگ آں؟

من ءَ ھمینچُک یات اِنت من لوگ ءِ تَہ ءَ کمبل ءِ سر ءَ وپتگ اِتاں سُھب ءِ سر ءَ من وس کُت من پاد آتک نہ کُت پد ءَ چار مردُم آتک ءُ من ءَ زُرت اِش ءُ آؤرت اِش ھمے کبرستان ءَ کبرے جت اِش من ءَ کبر اِش کُت پد ءَ چادر اِش چادرے چنڈ اِت اَنت ھرکس پہ وت بوت، وھدیکہ شپ بیت من چہ کبر ءَ در کایان ءُ ڈن ءَ نِنداں کس نہ گنداں باریں چُنت سال اِنت کہ اولی مرد تو ئے کہ اِد ءَ آتکگ ئے ترا من گندگ ءَ آں من وت ءَ را وت ملامت کنگ ءَ آں کہ تو پہ راج ءَ پہ زمین ءَ تُپنگ بڈ ءَ کُتگ کوہ ءُ گیابان ءَ ویل ئے اِے تَیاریں شپاں تھنا گردگ ءَ ئے اگاں اِے راہ ءَ ترا چیزے بہ بیت بلکیں تئی لاش ءَ کس نہ گند اِیت بلے زمین زانت منی بچ ءَ وتی ھاک ءِ ھک اَد ءَ کُت ءُ پہ زمین ءَ ندر بوت راج دپتر ترا مُدام یات کنت داں جھان ھست اِنت تو زندگ ئے، بلے من وت ءَ نزاناں من چی ءَ مُرتگ آں من ھروچ زمین ءَ جُست کن آں تو ھم منی بچے یے تو پہ من چی کُت؟ من وتی سر ءَ جھل کناں ءُ ھچ نہ گُشاں کہ پہ گُشگ ءَ ھچ نیست،بلے تئی رنگیں ھزاراں ورناہ ءُ کماش مات ءُ گُھار زمین ءِ دلبند ءَ کل اَنت آ زمین ءَ سک دوست اَنت آ مُدام گوں زمین ءَ گپ کن اَنت مُدام گل ءُ شادان اَنت چی ءَ کہ آیاں وتی زمین دوست داشتگ پہ زمین ءَ ندر بوتگ اَنت تو ھم ھمے راہ ءِ مُساپر ئے ترا ھم زمین ءَ سک دوست اِنت زمین تئی گلہ ءَ نہ کنت ھمے گپاں گوں آئی ءَ گُشت وش اِنت من رواں نوں دیر بیت آ شُت من وپت آں سُھب ءِ سر ءَ چم پچ کُت اَنت داں من کبرستان ءِ کش ءَ وپتگ آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔