TBP Balochi

سربوتگیں ھالانی رِد ءَ بلوچستان ءِ دمگ ھرنائی ءَ اشکرانی کھن ءِ وئیل ءَ ھپت مردم بیران وھدیکہ بلوچستان ءِ جتا جتائیں دمگاں دگ ءِ وئیلاں یازدہ مردم ٹپی ءُ تیرگواری ءِ وئیلاں سَے مردم بیران بوتگ اَنت-

گیشیں ھالانی رِد ءَ ھرنائی ءَ اشکرانی کھن ءِ وئیل ءَ ھپت بیران بوتگیں کاریز کارانی جون ھبدہ ادار ءَ پد در کنگ بوتگ انت –

ریسکو بنشون ءِ رِد ءَ ریسکیو آپریشن سرجم بوتگ درسیں جون در کنگ بوتگ انت –

ھرنائی ءِ ڈپٹی کمشنر سھیل انور ھاشمی ءِ رِد ءَ اے وئیل گوستگیں روچ ءَ دوشمبے ءَ ھرنائی ءَ چہ کساس چل ءُ پنچ کیلو میتر ءَ دیر تور غر ءَ اشکرانی کھن ءَ دیم ءَ اتکگ کہ کھن ءِ لمبگ ءُ آکسیجن ءِ کمی بوگے سوب ءَ دوازدہ سد یا چاردہ سد فٹ جھلی ھپت کاریز کار چیر تر اِتگ اَنت –

آئی ءِ گوشگ ات کہ اے دمگ ءَ مبائیل دامگ نبوگے سوب ءَ دمگی پھازدار ءُ ریسکیو ءَ پہ وھد ھال سر نہ بوتگ –
اے درگت ءَ مائینز چیف شفقت فیاض ءِ گوشگ انت کہ کھن ءِ تہ ءَ اول ءَ پنچ مردم چیر تر اِتگ بوتگ اَنت کہ آھانی درکنگے ھاتر ءَ دگہ دو کاریز کار ءَ شُتگ آھم وئیلے آماچ بوتگ انت چہ گیس ءَ دم پُر نہ بوتگ بیران بوتگ انت –

آئی ءِ گوشگ ات کہ ریسکیو آپریشن گوستگیں پانزدہ ادار ءَ برجاہ انت بلے بدکسمتی ءَ اشکرانی کھن ءَ چیر تر اِتگیں کاریز کارانی تہ ءَ یکے ھم نہ رک اِتگ درسیں کاریز کارانی جون سَے شمبے ءِ روچ ءَ درکتگ نادراہجاہ ءَ سر کتگ انت –

بیران بوتگیں سَے مردمانی سیادی چہ افغانستان انت ءُ وھدیکہ ایندگر بلوچستان ءِ دمگ پشین دگہ دمگانی جھمنند انت –

گوستگیں روچاں بلوچستان ءِ تہ ءَ اشکرانی کھن ءَ دیم ءَ اتکگیں وئیلاں چہ اے سیمی مزنیں وئیل انت گوستگیں یک ماھے ءِ میان ءَ بلوچستان ءِ تہ ءَ بیران بوتگیں کاریز کارانی کچ بیست ءُ دو انت –

پھازگی کانودانی سر ءَ امل نہ کنگ ءُ پھازگی انتزام نہ بوگے سوب ءَ بلوچستان ءَ اشکرانی کھن ءَ ھر سال سدانی کچ ءَ کاریز کار وئیلانی آماچ بنت ءُ بیران بنت یاکے سرجمیں اُمر ءَ لنگ بنت –

زانگ بہ بیت یازدہ مارچ ءَ شال ءِ دمگ مارواڑ ءَ اشکرانی کھن ءَ گیس پُر بوگے سوب ءَ شش کاریز کار بیران بوتگ اَنت وھدیکہ ھبدہ فروری ءَ ہرنائی ءِ دمگ شاھرگ ءَ گیس تراک ءَ چار کاریز کار مرگ ءِ دیمپان بوتگ اَنت-

دومی نیمگ ءَ بلوچستان ءِ دمگ نوشکی ءَ دگ ءِ وئیل ءَ دو پولیس افسراں ھوار پنچ کارندہ ٹپی بوتگ اَنت –

وئیل نوشکی ءِ دمگ مل ءَ شھدگ ءِ سر ءَ دیم ءَ اتکگ کہ کسانیں گاڑی ءَ کراس کنگے میان ءَ پولیس وین دگ ءَ چہ در اتکگ ءُ کوہ ءَ ٹکریتگ، چریشی ءَ چہ دو پولیس افیسراں ھوار سَے کارندہ ٹپی بوتگ اَنت –

ٹپی بوتگیں مردمانی پجار منیر احمد مینگل ءُ اجاز احمد سپاھیگ محمد طاہر، وحید احمد ءُ عاقل شاہ ءِ ناماں بوتگ انت – ٹپی بوتگیں مردماں جاندراھی ھاتر ءَ ٹیچنگ ھسپتال نوشکی ءَ سر کنگ بوتگ انت –
ھمے وڑ بلوچستان ءِ دمگ ڈیرہ مراد جمالی ءَ دو جاھاں دیم ءَ اتکگیں دگ ءِ وئیلاں شش مردم ٹپی بوتگ اَنت –

یک وئیلے نصیر آباد ء دمگ بیر چوکی ءِ نزیک ءَ دیم ءَ اتکگ کہ دو گاڑیانی ڈیک ورگے سوب ءَ چار مردم ٹپی بوتگ اَنت، ٹپی بوتگیں مردمانی پجار عبدالحکیم، عبدالحق، حضور بخش، نبی بخش ءِ نام ءَ بوتگ اَنت- دومی وئیل نصیر آباد ءِ دمگ پولیس چوکی ءِ نزیک ءَ پٹرول پمپ ءَ دیم ءَ اتکگ کہ موٹر سیکل ءَ گوں رکشہ ءَ ڈیک وارتگ چریشی ءَ دو عبدالطیف ءُ اربیلا ٹپی بوتگ انت – پہ جاندراھی ءِ ھاتر ءَ ھما دمان ءَ نادراھجاہ ءَ سر کنگ بوتگ انت –

بلوچستان ءِ جتا جتائیں دمگاں تیرگواری وئیلاں سَے مردم بیران بوتگ اَنت –

بلوچستان ءِ بنجاھی شھر شال ءَ ٹی اینڈ ٹی ءَ ناشناسیں سلاہ بندیں مردماں لوگے ءَ تیرگواری کُتگ، تیرگواری ءِ آسر ءَ دو مردم بیران بوتگ اَنت-

آھانی تہ ءَ یکے ءِ پجار طارق اعوان جھمنند پنجاپ ءِ نام ءَ چہ بوتگ – دوئیں مردم ھما دمان ءَ نادراھجاہ ءَ برگ بوتگ انت –

دگہ وئیلے شال ءِ دمگ پشین یارو میتگ ءَ لوگی جیڑہ ئِے سر ءَ تیر گواری ءَ یک مردمے بیران بوتگ، بیران بوتگیں مردمے پجار محمد سعید نام ءَ بوتگ –

دمگی پھازداراں لاش دست گپتگ دمگی نادراھجاہ ءَ سرکتگ اژدری چار ءُ ٹپاس ءَ پد لاش کھول ءِ ھوالہ کنگ بوتگ –

ھمے وڑ بلوچستان ءِ دمگ دالبندین ءَ ناشناسیں مردماں باپ پاٹی ءِ ضلعی صدر اسفند یار یار محمد زئی ءِ بیٹک ءَ تیر گواری کُتگ، تیر گواری ءَ ھچ وڑیں تاوان ءِ ھال نیست اسفند یار یار محمد زئی چہ آ جاہ ءَ در اتکگ ءُ شتگ –

تربت ءَ سول سوسائٹی ءِ چیردستی ءَ تربت گرلز ماڈل اسکول ءَ صنفی برابری ءُ زالبولانی وت واکی ءِ سر ھال ءِ سر ءَ مراگشے برجم دارگ بوتگ ، وھدیکہ تربت زون پنڈال ءَ “بامسار لیٹریچر” بینر ءِ چیر ءَ بُک اسٹال ءِ ھم جنگ بوتگ کہ اود ءَ جتائیں سرھالانی سر ءَ کتاب ایر کنگ بوتگ انت –

مراگش ءَ گچینی ءِ مھمان بی ایس او ءِ گوستگیں سرکماش ڈاکٹر کھور خان ، بی اس او ءِ گوستگیں سرکماش ڈاکٹر تاج بلوچ، راجی ءِ جنرل سیکرٹری بانک کلثوم بلوچ ڈی ایس ایف گوستگیں سرکماش نغمہ شیخ، تربت سیول سوسائٹی ءِ کنوینر گلزار دوست ءُ گرلز ماڈل اسکول ءِ پرنسپل میڈم زُمرِد بلوچ ءُ بی ایس او ءِ زریف رند ءَ تران کُتگ، وھدیکہ تلو ءِ ڈبہ شگر اللہ بلوچ گون بوتگ –

سیمنار ءِ سرھال ءِ سر ءَ باز جوانی زانشتی باوست کنگ بوتگ ءُ گچینی راجدپتری تک ءُ پھنات ءُ نگدکاری ءِ سر ءَ چمشانک دیگ بوتگ – وھدیکہ مراگش ءَ نودربر، استاد ورنا سیاسی باسکاں بھر زرتگ –

زانگ بہ بیت چیزے وھد اِنت بلوچستان ءِ بازیں جاھاں وانگی، لبزانکی ءُ چاگردی سرھالانی سر ءَ مراگش بیگ ءَ اَنت ءُ اشاں بلوچ زانتکار ءُ کواس زانشتی ءِ دیمروئی ءِ تکاں ساڑایگ ءَ اَنت –

سر بیتگیں ھالانی رد ءَ روکپتی بلوچستان ءَ ناشناسیں مردماں یک ورنایے سر ءَ اُرش کرتگ ءُ آ کارچ جتگ ءُ کُشتگ –

کوش ءِ وئیل روکپتی بلوچستان ءِ دمگ پھرہ ءَ بیتگ کہ اود ءَ ناشناسیں مردماں میثم جمشید زئی کارچ جتگ ءُ کُشتگ –

وئیل ءِ بارہ ءَ گیشیں سرپدی نہ بیتگ ءُ دمگداراں ھم اے درگت ءَ دگہ گپ دیم ءَ نیاؤرتگ –

لس مردمانی گوشگ اِنت کہ ایرانشھر ءِ وڑیں جاھے ءَ ایرانی پولیس ءُ آ دگہ ادارھانی جاڑیگ بیگ ءَ ابید ھم مردم کُشگ بیگ ءَ اَنت ءُ چریشی ءَ زانگ بیت کہ اے مردمانی کوشاں ایرانی چیریں ادارھانی دز کمک اَنت –

نبشتانک: جنگ المی اِنت

نبشتہ کار: رباس بلوچ

دی بلوچستان پوسٹ

اے دنیا ءِ تہ ءَ ھزارانی کساس ءَ جنگ بوتگ ءُ بیت، جنگانی یک سکیں مزنیں لڑے جوڑ بیت اگاں ما انسان ءِ پُشدر ءَ بچاراں اے سوج کنگ سک گران اِنت کہ دنیا ءِ اولی جنگ کُجام بوتگ بلے دنیا ءِ راجدپتر ءِ ھساب ءُ دادانی سوج ءُ پد اِنت کہ دنیا ءِ اولی جنگ مھسوپُٹمیا ءَ کنگ بوتگ کساس دو ہزار ھپسد بی، سی ءَ مہسوپُٹمیا دُگنیا ءِ توكا اولی تھزیباں چہ یكے دگے یک گپے اش انت کہ دُگنیا ءِ اولی کہ راہ ءُ راہبند بزاں کانون بوتگاں آ ھم مھسومٹیمیا ءَ اڑ دیگ بوتگ انت اے گپ ءَ ما شُما دُرس سدک بہ ایں کہ ارچ کُجا بنی آدم ءِ پد گندگ بنت اود ءَ جنگ ءِ بوگ الم اِنت انسان داں ھما وھد ءَ کہ ودی بوتگ تاں روچ ءِ مروچی جنگ ءِ تہ ءَ اِنت آ دگے گپے کہ برے وت ما وت ءَ ءُ برے گوں اندگیں قوماں بلے آدمزاد ءِ جنگ الم کُتگ اے جنگ کدی پہ مال ءُ زر کدی پہ زمین، بیرگیری، عشق، ننگ ءُ ناموس ءُ دگہ ہزاراں چیزانی واستا کنگ بوتگ اَنت ۔ھمے وڑ ءَ دنیا ءِ بازیں ملکاں جنگ پہ یک ہوزارے ءَ کارمز کُرتگ ءُ اے گپ ءِ توکا اچ شک نیست کہ آ اے کار ءِ تہ ءَ سوبمند بوتگ اَنت پرچا کہ جنگ ساری ءَ ھم بوتگ ءُ انوں ھم بوگ ءَ اِنت بس ھمے یکیں مٹی اتکگ کہ پیسر ءَ مڑگ بے کانونی بوتگ بلے مروچی جنگ کانونی کنگ بوتگ۔اشی ءِ مسترے درور مارا افغانستان ءُ عراق ءَ گندگ ءَ کیت بلوچی ءَ بتلے گوش اَنت زورا سر ءَ راہ اِنت ءُ انو دنیا ءِ مزنیں طاقتاں انچوش کُتگ، ھرچی کہ آ کنت آ راست ءُ فق اَنت بلے اگاں دگک کمزوریں راجے پہ وتی رکینگے یا کہ بقا ءِ واستا اگاں کسانے گامگیجے زور ایت، آ راج پاد مال کنگ بیت یا کہ آئی ءِ سرا پہ زور بندیش جنگ بیت۔

اد ءَ اگاں ما گیدی ءِ کوھنیں راجی جنگاں بچاراں گڑا آ دُرس یک وھدے ڈالچار کنگ بوتگ اَنت مزنیں راجانی دستاں مروچی امریکا کہ وت ءَ مزن لیکیت ءُ اندگہ قوماں پہ جنگ ءَ مکن کنت،آ اے گپ ءَ چہ ہچبر پرا موش مہ بیت کہ یک دورے آئی ءَ وت جنگ کُتگ پہ وتی بقاءِ واستا اے گپ ھم راست اِنت کہ چین ھم پادمالیں کوماں چہ یکے بوتگ بلے آئی ءِ جوانیں جنگ کارانی ءُ جہدکارانی زورے پد ءَ آ مروچی سک وشحال اَنت نِی اے گپ الم منگی اِنت کہ جنگ المی اِنت اگاں جُست تئی زندگ بوگ ءِ بابت ءَ اِنت ءُ ھچ کوم پُشتاہ ما کنزیت اگاں گپ آئی ءِ آؤکیں پدریچے آسودگی ئیگ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ پتر ھال ءَ سر بیتگیں ھالانی رد ءَ کیچ ءِ دمگ تمپ گومازی ءِ کوھی دمگ کلبر ءُ دگہ جاھاں پوجی کارمند جنگی ساز ءُ ساماناں روگ ءَ گندگ بیتگ اَنت –

ھالانی تہ ءَ گوشگ بیتگ کہ گومازی ءِ کوھی دمگ کلبر ءِ کوہ ءِ تہ ءَ پُتر اِتگ ءُ لشکر کشی بیگ ءَ اِنت –

کیچ ءَ ھواریں دمگ تمپ ءِ کوھی دمگاں گوستگیں بازیں روچاں پوجی لشکر کشی برجاہ اَنت ءُ گمان ھمے کنگ بیگ ءَ اِنت اے لشکر کشی گیش دراج کش کنگ بیتگ، پوجی کارمنداں سرجمیں راہ ءُ در بستگ اَنت –

گوستگیں شپ ءَ چہ مند ءَ پوجی کارمندانی بازیں کَچے ءَ گاڑی ءُ پَرپٹاں ھواریں کارمند اپسھی کھن ءِ نیمگ ءَ شتگ اَنت دمگ ءِ مردماں لشکر کشی ءِ گمان کرتگ ءُ گوشتگ کہ دمگ ءَ یک مزنیں لشکر کشی ءِ چِن ءُ لانچ کنگ بیتگ اَنت ءُ بازیں پوجی مُچیاں لشکر کشی گیش ترندیانی گمان اِنت –

زانگ بہ بیت گوستگیں روچ ءَ مند ءِ دمگ ءَ پوجی کاروان ءِ سر ءَ اُرش بیتگ اَت کہ آئی ءِ زمہ واری بلوچستان ءَ لبریشن فرنٹ ءِ جارکش میجر گوھرام بلوچ ءَ من اِتگ ءُ گوشتگ اَت کہ پوجی کاروان ءِ سر ءَ اُرش کرتگ ءُ چار پوجی کارمند کُشتگ –

پوج ءِ سر ءَ بیتگیں اُرش ءَ پد پوج ءَ مند ءِ بازار بند کرتگ ءُ پوج ءِ سر ءَ بیتگیں اُرش ءَ ھواریں مردمانی دزگیر کنگ ءِ لوٹ کرتگ –

تنی وھدی کیچ ءِ کوھی دمگاں برجاھیں پوجی آپریشنانی بارہ ءَ پوج ءِ واکدارانی نیمگ ءَ ھچ گپ دیم ءَ نیاتکگ اَنت –

بلوچ کلب مند ءَ ینگ اسٹار تمپ یک گولے ءَ باج برتگ گوازی وتی نام ءَ کرتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی دومی راؤنڈ ءِ پنچمی گوازی کنگ بوتگ –

مروچگیں گوازی ء ینگ اسٹار تمپ ءُ بلوچ کلب مند میان ءَ بوتگ ، دؤئیں ٹیمبانی لیبیاں گوں جوانی ءَ لیب داشتگ – بلوچ کلب مند ءَ یک گولے داتگ ءُ باج برتگ- ینگ اسٹار تمپ ءِ ٹیم پروش داتگ-

مھمان ھاس واجہ یاسین بلوچ ءُ ماسٹر امام بلوچ ءَ دؤئیں ٹیمانی لیبی دلبڈی داتگ انت ءُ آھانی ستاشانی کرتگ –

دومی راؤنڈ ءِ گُڈی گوازی گومازی ءَ گُلشن گومازی ءُ نونھال کنشکلات ءِ میان ءَ اسکول گراؤنڈ ءِ پٹ ءَ بیت انت- وھدیکے بُلبل ھوزئی مند سیمی راؤنڈ ءَ لیب دارگ بیت انت –

سربوتگیں ھالانی رِد ءَ شال ءَ ناشناسیں مردماں لوگے ءَ دور کتگ سَے کسانیں زھگ کُشتگ اَنت وھدیکہ یکے زدگ کُتگ، دکی ءَ اشکرانی کاریز ءِ وئیل ءَ یک مردمے بیران بوتگ –

گیشیں ھالانی رِد ءَ بلوچستان ءِ بنجاھی شھر شال ءَ ناشناسیں مردماں لوگے ءَ دور کُتگ تیزیں کارچے ءَ گوں سَے کسانیں زھگانی سر ءَ اُرش کتگ ءُ کُشتگ انت –

وئیل شال سریاب کسٹم ءِ نزیک ءَ گلام رسول پھاٹک ءَ دیم ءَ اتکگ کہ ناشناسیں مردماں محکمہ تعلیم جونئیر کلرک عطاء اللہ ءِ لوگ ءَ دور کُتگ آئی ءِ سَے کسانیں زھگ حسنین، زین ءُ اقصی کارچ جتگ ءُ کُشتگ انت وھدیکہ آئی ءِ دگہ جنکوے کشمالہ ٹپی کُتگ –

پولیس ءِ رِد ءَ وئیل ءِ وھد ءَ عطاء اللہ ءُ آئی ءِ لوگی لوگ ءَ ساڑی نہ بوتگ انت وھدیکہ لوگ ءِ کاردار ھم ساڑی نہ بوتگ – وئیل ءِ ھال ءِ سربوگ ءَ پولیس ءَ وت ءَ سر کُتگ ٹپی ءُ بیران بیتگیں گونڈو نادراہ جاہ ءَ سر کُتگ انت-

پولیس ءِ رِد ءَ گونڈوانی اُمر کساس شش سال ءَ بگر داں دوازدہ سال انت وھدیکہ پولیس ءَ لوگ ءِ کاردار دزگیر کتگ اے درگت ءَ پٹ ءُ پول کنگ ءَ اِنت –

دومی نیمگ ءَ بلوچستان ءِ دمگ دکی ءَ اشکرانی کھن ءِ وئیل ءَ یک کاریز کارے بیران بوتگ-

وئیل کھن ءِ ھاک ءِ کپگے سوب ءَ دیم ءَ اتکگ چریشی ءِ سوب ءَ رحمت اللہ ء ملا محمد خان جھمنند افغانستان بیران بوتگ –
بیران بوتگیں مردم ءِ جون ھسپتال ءَ سرکنگ بوتگ اود ءَ اژدری چارءُ ٹپاس ءَ پد افغان ءَ دیم دیگ بوتگ –

ھمے وڑ بلوچستان ءِ دمگ ھرنائی طور غر ءَ اشکرانی کھن ءَ کاریز کاری ءِ میان ءَ یک بھرے نشتگ ءُ کھن ءَ تراک ءِ توار ھم اشکنگ بوتگ -اشکرانی کھن ءَ آس برانز گرگے سوب ءَ ریسکو ءِ کار ھم اڑاندے دیمپان بوتگ –

اشکرانی کاریزے یک بھرے لمبگ ءُ آس لگگ ءِ سوب ءُ کاریز کاری ءِ میان ءَ ھپت کاریز کار چات ءِ تہ ءَ پس اتگ اَنت کہ ھمے وھد ءَ کار ءَ بوتگ انت – گڈی ھالاں دنیگت ءَ ریسکو کار بندات نہ بوتگ اشکرانی کاریز ءَ آس انگت ءَ روک انت – زانگ بہ بیت اے دمگ ءَ ریسکو سنٹر ھم نیست –

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں سینزدہ دگہ نوکیں کیس دیم ءَ اتکگ ءُ اے وھد ءَ کرونا وائرس ءَ آماچ بوتگیں مردمانی کچ نوزدہ ھزار ءُ دوسد ءُ سِی ءُ سے ءَ سر بوتگ انت –

دو شمبے ءَ جاندراھی بنشون ءِ نیمگ ءَ چہ شنگ بوتگیں رپورٹ ءِ رد ءَ بلوچستان ءِ بنجاھی شھر شال ءَ دہ ءُ سبی، تربت ءُ ژوب ءَ یک یک کیسے رپورٹ بوتگ ، اے وھدی سرجمی ءَ نادراھی ءِ آماچ بوتگینانی کچ نوزدہ ھزار ءُ دوسد ءُ سی ءُ سے ءَ سربوتگ انت –

رپورٹ ءِ رِد ءَ گوستگیں بیست ءُ چار ادارانی میان ءَ بلوچستان ءِ تہ ءَ نُہ نادراہ جاندراہ بوتگ آئی ءَ چہ پد اے وھدی سرجمی ءَ ھژدہ ھزار ھشت سد ءُ نود جاندراہ بوتگ انت – وھدیکے بلوچستان ءِ تہ ءَ شنگ بیتگیں ءِ نادراھانی کچ یکسد ءُ چل ءُ یک انت –

رپورٹ ءِ رِد ءَ بلوچستان ءَ بیران بوتگیں مردمانی کچ دو سد ءُ دو ءَ سر بوتگ اَنت وھدیکے سَے نادراہ ہائی آکسیجن فلوراَنت – رپورٹ رد ءَ بلوچستان ءِ تہ ءَ جھانی وبا کرونا وائرس ءِ نادراھی گیشتر تالان بوگ ءِ برزی سَے بما بیست ءُ شش در سد انت –

اورنگی ٹاؤن ءَ دژمنیں پاکستانی رینجرز تراک ناکیں شوروانی نشانگ جوڑ کرتگ، جانی ءُ مالی تاوان داتگ – جئیند بلوچ

سربوتگیں ھالانی رِد ءَ ناشناسیں مردماں سندھ ءِ بُنجاھی شھر کراچی ءِ دمگ اورنگی ٹاؤن ءَ رینجرز ءِ گاڑی ءِ سر ءَ بمب اُرشے کتگ، بمب اُرش ءَ پاکستانی پوج ءَ جانی ءُ مالی تاوان رس اتگ ۔

سرکاری بنشون ءِ رِد اُرش ءِ آسرا یک رینجرز کارمندے مرتگ ءُ آدگہ زدگ بوتگ اَنت بلے لس ھالانی رِد ءَ گیشتر لشکری کارمند مرتگ اَنت۔

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ ءُ گوشتگ مئے سرمچاراں کراچی ءِ دمگ اورنگی ٹاؤن ءَ دژمنیں پاکستانی رینجرز ریموٹ کنٹرول بم اُرش ءَ نشانگ جوڑ کُرتگ ۔ اُرش ءَ یک کارمندے مُرتگ سَے سک باز زدگ بوتگ، وھدیکہ رینجرز گاڑی تاوان بار بوتگ –

جارکش جئیند بلوچ ءَ دیمتر ءَ وتی درشان ءِ تہ ءَ گوشتگ کہ بی ایل اے کجام ھم شھر ءُ دمگ دژمن ءِ سر ءَ اُرش کنگے زور ءُ تاکت ءَ داریت –

آئی ءِ گوشتگ بے سوب بوتگیں دژمن بلوچ سرمچارانی سوب مندیں اُرشانی پشدر ءَ بید ء سلاہ بستگیں بلوچ ورنایاں دروگیں میڑ ءِ نام ءَ شھید کنگ ءَ ھوار چُک ءُ زالبولاں آوار جنت آھانی سر ءَ لٹ ءُ کُٹ کنت – بلوچ لبریشن آرمی راجی پوج بوگ ءَ وتی راج ءِ سر ءَ بؤکیں زوراکیانی ھساب ءَ گپت ءُ دژمن ءِ سر ءَ مئے اُرش چد ءُ گیشتر برجاہ مان انت –

دی بلوچستان پتر ھال ءَ سر بیتگیں ھالانی رد ءَ سی ٹی ڈی کراچی مروچی بیگواھیں راشد ھسین ءِ مات لوٹ اِتگ ءُ راشد ھسین ءِ بارہ ءَ کاگدے پیش کرتگ ءُ گوشتگ کہ شما ایشی ءِ سر ءَ دسھت بہ کن اِت ءُ بہ گوش ایت کہ راشد ھسین مئے گور ءَ نہ اِنت –

سی ٹی ڈی ءَ وتی کاگد ءِ سر ءَ نبشتگ کرتگ کہ اے راشد ھسین عرب امارات ءَ پاکستان ءِ چیریں واکدارانی نیمگ ءَ آرگ بیتگ ءُ پد ءَ دالبندین ءَ برگ بیتگ اود ءَ راشد ھسین تتکگ ءُ شتگ –

سی ٹی ڈی ءَ نبشتگ کرتگ کہ راشد ھسین ءِ کیس پیسر ءَ کراچی ءَ سی ٹی ڈی ءِ ھال ءِ تہ ءَ نبشتگ کنگ بیتگ بلے اے کیس ردی ءَ مئے نام ءَ کنگ بیتگ –

چاگردی رسانکجاھاں راشد ھسین ءِ مات ءِ سر ءَ نبشتگ کرتگیں کاگد ءِ سر ءَ ایراد گرگ بیگ اِنت ءُ گوشگ بیگ اِنت پاکستان راشد ھسین ءِ سر ءَ کیس ءِ لڈگ ءَ بے سوب بیتگ ءُ چریشی ءَ پاکستان ءِ واکدار راشد ھسین ءِ مات ءَ بیھار دیگ ءُ کیس ءَ دزکشی کنگ ءِ پرمان ءَ کنگ ءَ اَنت –

ھمے رنگ ءَ ایچ آر سی پی بلوچستان ءِ انفارمیشن سیکریٹری عبد اللہ اباس ءَ چاگردی رسانکجاہ ٹوئٹر ءَ گوشتگ کہ راشد ھسین ءِ بارہ ءَ آئی ءِ مات ءَ کاگدی ءِ دسھت کنگ ءِ پرمان ءُ بیھار دیگ بیتگ –

عبداللہ اباس ءَ گوشتگ مارا راشد ھسین ءِ زند ءِ بارہ ءَ ترس اِنت ءُ اگاں آئی ءَ چیزے بہ بیت گڑا آئی ءِ زمہ وار عرب امارات ءُ پاکستان ءِ سر وزیر عمران ھان اِنت –

زانگ بہ بیت راشد ھسین سال دوھزار ءُ ھبدہ ءَ اگست ءِ ماہ ءَ عرب امارات ءَ شتگ ءُ بیست ءُ شش دسمبر دوھزار ءُ ھژدہ ءَ عرب امارات شارجہ ءَ دزگیر کنگ بیتگ ءُ شش ماہ ءَ ھمود ءَ گار کنگ ءُ پد ءَ سَے جولائی دوھزار ءُ نوزدہ ءَ نیمروچ ءِ وھد ءَ پاکستان ءِ رسانکدراں اے ھال شنگ کرتگ کہ راشد ھسین نامیں مردے ھلیجی ڈیھاں دزگیر کرتگ ءُ پاکستان ءَ آرگ بیتگ ءُ ٹی وی چینلانی اسکریناں اکس شنگ بیتگ –