TBP Balochi

نبشتانک: لھتیں ٹیکی پَش کپتگ اَت

نبشتہ کار: مھم جان گُل

دی بلوچستان پوسٹ

چہ باتن ءَ ھرچ دردے ءَ نال اِت ءُ ھیسکار جت ، من مان نیارت ءُ ترا گِیراں بست چماں  چو نِھنگ ءَ ھار کُت ءُ من بُکّ وارت ءُ دَراتک آں ، چی ءَ کہ تئی مُدّتے ءِ ودار ءَ اِشتاپ اِت آں تئی کلوہ ءِ باپُشت ءَ من ٹپّاناں واد چنڈّ اِت ءُ گوں ھوناں ءَ شُشت اَنت ، دل گوں ھزار جیڑگاں دُچار اَت، بلے  پاداں انگت وتی سپر نہ داشت ءُ تراولاں سکینے رُودینتگ اَت۔ تئی گیرّاں انچو  پیڑاتگ اَت ، منی زِرد ءُ جبین تئی ودار ءَ انچو بے کرار کہ دل ءَ نہ مَنّ اِت کہ چہ سپر ءَ پُشت بِہ دے آں۔

من جُنزاں جنزان ءَ وتی سپر ءِ نْیام ءَ اَتک ءُ سر بیت آں ، گُڑا تئی ھبرے من ءَ گیر اَتک کہ زند چکّاسے ءُ  اِد ءَ ھرکس وت ءَ ءُ دومی ءَ چکّاس اِیت۔  دُرست چکاس ءَ پہ باج برگ ءَ دیم ءَ جُنزان کن اَنت ، من ھم یکروچے ترا چکّاساں گوں دُچار کناں باریں تو باج برے یا وھد ءِ لُوٹ! گُڑا پد ءَ  من جیڑاں کہ وھد ءِ ھمراھداری ءَ بِہ کن آںیا تئی۔

گُڑا من وتی باتن ءِ مردُم شُھاز اِت ءُ پاد داشتاں جُست کُت کہ اے پسّواں بِہ دے آں ، آئی ءَ سارتیں گینّسارتے کَشاِت ءُ گْوشت، تو اتک نہ کن ئے اے تھار ماھیں شپاں کہ رُژن نیست رُوکیں کندیلاں داں چینچُک ءَ من تئی دست ءَ بِہ گراں ءُ دیمتِر ءَ کَشان بِہ کناں ءُ بِہ براں، من گوں ترا سھت ءُ دمان گون نہ بَہ آں ، اگاں ترا اے سپر ءَ جُنزگی اِنت گُڑا تھنائی ءَ وتی کُوپگاں لَڈّ ءُ دَر بِہ کپ،  پرچا کہ باندا ترا منی ھاجت مہ بیت ، اے سپر ءَ ترا بازیں آدمی رسترانی دیمپان بُوَگی اِنت ، گُڑا ترا تُرسگی نہ اِنت، ترا آدمی رسترانی دیم ءَ چو کوہ ءَ مِکّ بُوَگی اِنت۔

آئی ءِ ھمے ھبر منی باتن ءَ سھت ءُ دمان چو شِل سریں تیرے ءَ ھیر بُکّان اَت ءُ پسّو ءِ وداریگ اَت، بلے منی باتن ءَ اِنچو ھاٹیگ ءُ توکل مان نیست اَت کہ پسّواں بِہ دے آں، پرچا کہ آئی ءِ وش آتک ءَ من ءَ پسّوانی زِر ءَ بُکّ دَیگ ءَ نیشت ءُ منی اُوشتیں پاد چو جنگولے ءَ بال گیپتاں ءُ پہ ھمائی ءِ ڈس ءُ نشان ءَ رھادگ بیت آں ، گُڑا منی پادانی ھوناں کِشک بُران کُت ، نُکّ ءَ تُکّاں گُلاٹان ءُ من وت ءَ ساکِم کُت، بلے دل ءَ کَے داشت کنت کہ وھدے ودارانی کرار دمتُوس بِہ بیت، چَم وتی رُژن ءَ تالان بِہ کنت ءُ کس مہ گِند اِیت بس لھتیں ٹیکّیاں پمّن پش کپتگ اَنت ، یک منگلیکے ءِ پُرشتگیں دو ٹُکر ءُ یک چُلمبے کہ ھاکانی تہ ءَ کپتگ ءُ گُشانے  کہ ڈنگراں مان پُوش اتگ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ پنجگور ءِ دمگ گرمکان ءَ ناشناسیں سلاہ بندیں مردماں یک مردمے آوار جتگ ءُ گوں وت برتگ ءُ یکے تیرانی آماچ کتگ ءُ ٹپی کتگ –

دمگی پولیس ءِ رِد ءَ ناشناسیں گاڑی سواراں اُسامہ ءُ آئی ءِ ھمراہ میر عالم گاڑی ءِ سوار بوگ ءَ گوشتگ انت اُسامہ گاڑی ءَ سوار بوتگ وھدیکہ آئی ءِ ھمراہ عالم تتکگ سلاہ بنداں تیرآماچ کتگ ءُ ٹپی کتگ، اسامہ گوں وت برتگ –

ھردو مردم گرمکان ءِ جھمنند انت سلاہ بندانی درگت ءَ دنیگت ءَ ھچ وڑیں سرپدی نہ رس اتگ کہ چونیں بوتگ انت ءُ کجام سوب ءَ اے مردم آوار جنگ بوتگ انت –

پنجگور ءَ ھوار کیچ ءَ ھم سلاہ بندیں مردمانی دستاں مردم آوار جنگ بیگواہ کنگ بیتگ اَنت کہ آیانی ھال رسانکدر شنگ بیتگ اَنت –

ھمے وڑ ءَ گوستگیں شپ ءَ کیچ ءِ بنجاھی شھر تربت دشتی بازار ءَ سلاہ بندیں پرپٹ سوارانی تیرگواری ءَ ملا نوید زدگ بیتگ –

دمگی مردمانی رد ءَ ملا موید النوید سروس اسٹیشن ءِ واھند اِنت ھما آئی ءِ سر ءَ تیرگواری کنگ بیتگ کہ آ وتی لوگ ءَ روگ ءَ بیتگ کہ ناشناسیں سلاہ بندیں مردماں دشتی بازار ءَ تیرگواری کرتگ ءُ زدگ کرتگ ءُ آ ناگیگیں جاوراں نادراہ جاہ ءَ برگ بیتگ –

سر وزیر پاکستان عمران خان دوشمبے ءِ روچ ءَ بلوچستان ءں تیابدپی شھر گوادر ءِ تر ءُ تاب ءَ یک روچے ءِ واستا سر بیتگ –

دمگی مردمانی رد ءَ سر وزیر پاکستان تر ءُ تاب ءِ وھد ءَ سی پیک پروجکٹ ءَ ھواریں بازیں منسوبھانی بنھشت ءَ ایر کتگ اَنت کہ آیانی تہ ءَ یکے شھر ءَ آپ ءِ پجارینگ ھوار اِنت –

دی بلوچستان پتر ھال ءَ سر بیتگیں ھالانی رد ءَ سر وزیر پاکستان گوادر ءِ تر ءُ تاب ءِ وھد ءَ شھری لوگانی تہ ءَ بند کنگ بیتگ اَنت ءُ دریا ورد زر ءِ نہ روگ ءَ کڈن کنگ بیتگ اَنت ءُ چریشی ءَ دریا ورداں ھم بازیں جیڑھانی دیمپانی کنگ کپتگ –

گوستگیں روچ ءَ پاکستان ءِ میری ٹائم سیکورٹی ایجنسی فشریز ءِ انتزامیہ ءَ ھال داتگ کہ سر وزیر پاکستان گوادر ءِ تر ءُ تاب ءَ اِنت دریا ورد زر ءِ روگ ءَ پھریز بہ کن اِت –

دو شمبے ءِ سھب ءَ بہ گر داں شپ ءَ دریا ورد وتی لوگاں ڈن در نیتکگ اَنت –

اللہ بخش یک دمگی دریا وردے کہ آئی ءَ گوشتگ کہ ھردیں ما زر ءَ شتگیں گڑا مئے لوگانی چُل ءِ آس روک بیتگ وھدیکہ شھر ءَ یک مزنیں مردمے آیگی بیت اِنت گڑا آ شپ ءَ مئے زھگ شد ءُ لاپ وپس اَنت –

اے کسہ اللہ بخش ءِ وڑیں ھزاراں دریا وردانی کسہ اَنت –

سر وزیر عمران ءَ مروچی وتی تر ءُ تاب ءَ گوادر ءَ زر ءِ آپ ءِ وش کنگ ءَ یک پلانٹے ءِ بنھشت ایر کرتگ، بلے اود ءِ مردن ڈی سیلینیشن پلانٹ ءِ بیگ ءَ واھگدار نہ اَنت پرچاکہ گوست ءَ ھم ھمے رنگیں بنھشت ایر کنگ بیتگ اَنت بلے دمگی مردمانی تن ءِ پروشگ ءَ چَٹ بے سوب بیتگ اَنت –

دمگی مردمانی رد ءَ یک ڈی سیلینیشن پلانٹے گوادر ءِ شھر ءَ سِی ءُ پنچ کلو میٹر ءِ دوری ءَ نوکیں بالی پٹ ءِ نزیک ءَ اِنت ءُ یک ارب کلدارے کچ ءَ ھرچ کنگ بیتگ بیست لَک گیلن آپ ھمک روچ ساپ بیگی بیتگ بلے نہ بیتگ –

دو ھزار ءُ دَہ ءَ پد آ لھتے روچانی تہ ءَ چلگ ءِ جھد بیتگ آ بیست لَک ناں بلے دو یا سَے لک گیلن آپ اش ساپ کرتگ ءُ پد ءَ بے سوب بیتگ –

آپ گوادر ءِ بنکی جیڑہ اِنت اے وھد ءَ گوادر، جیونی ءُ پسنی سک تھ آپی ءِ آماچ اَنت دمگی مردم سی پیک ءِ نام ءَ گچینی ءِ مومنٹ، مزنیں ٹاہ ءُ سدکیانی سر ءَ اوستی نہ بیتگ اَنت –

گوادر ءِ تر ءُ تاب ءِ وھد ءَ دمگی نمائندگ، نودربر ءُ باپاری مھلوک ءَ تران کنان ءَ سر وزیر پاکستان ءَ گوشتگ کہ جیڑگ ءَ آں جتائی ءِ لوٹوکیں زرمبشتانی جنزوکیں مردماں گوں گپ ءُ تران بہ کن اں، ھنچیں مردم کہ ھندوستان ءِ وڑیں ڈیھانی مپاداں وتی کارمرد بیگ ءَ اَنت –

سر وزیر ءَ گوشتگ کہ نِی بلوچستان ءَ گچینی دلگوش دیگ بیگ ءَ اِنت، من درستاں گیشتر پیکیج بلوچستان ءَ داتگ، وفاق ءَ ھم ءُ منی ھیال ءِ تہ ءَ دمگی سیاستداناں ھم دلگوش نہ داتگ، ھما زر مہ وفاق ءِ نیمگ ءَ اتکگ اَنت آ درست کارمرد نہ بیتگ اَنت –

نمیرانیں نواب خیر بخش ءِ برات زتک صالیہ مری ءَ چاگردی رسانکجاہ پیس بک ءَ شنگ کرتگیں جار ءَ گوشتگ کہ منی لوگ واجہ تاج مھمد سرپرہ ءَ یک سالے سرجم بیگ ءَ 15 جولائی ءَ شال ءِ پریس کلب ءِ دیم ءَ زھرشانی کنگ بیت اِنت –

صالیہ مری ءَ زھرشانی ءَ دراھیں انسان دوست، چاگردی مردم ءُ سیاسی پاٹی، نودربر گل، بلوچ ءُ پشتوناں گوں بھر زورگ ءِ لوٹ کرتگ ءُ گوشتگ کہ پانزدہ جولائی ءَ زھرشانی ءَ بھر بہ زور اَنت ءُ منی لوگ واجہ ءِ یل کنگ ءَ منی کمک ءَ بہ کن اِت –

صالیہ مری ءِ رد ءَ آئی ءِ لوگ واجہ تاج مھمد سرپرہ 19 جولائی 2020 ءَ کراچی ءَ ھما وھد ءَ گرگ بیتگ کہ ترکی ءَ روگ ءَ بیتگ –

آئی ءِ گوشگ اِنت یک سالے ءِ گوزگ ءَ پد ھم منی لوگ واجہ نا یل کنگ بیتگ ءُ نانکہ آئی ءِ بارو ءَ مارا گوشگ بیتگ –

بلوچستان ءَ بیگواھیانی درچ یک ناوشیں جاورھالے ءَ سر بیتگ ءُ اود ءَ ھمک کھول ھمے دردانی تہ ءَ گوزگ ءَ اَنت ءُ بازیں وھداں بیگواھیں مردمانی کھول یکشل ءَ زھرشانیانی تہ ءَ گندگ بیگ ءَ اَنت –

سربوتگیں ھالانی رِد ءَ بلوچستان ءِ دمگ ڈیرہ بگٹی، ھب، کوھلو ءُ جھل مگسی ءَ جتا جتائیں وئیلاں زالبولے ءَ ھوار چار مردم بیران ءُ ھپت مردم ٹپی بوتگ انت –

گیشیں ھالانی رِد ءَ ڈیرہ بگٹی ءَ ناشناسیں سلاہ بندیں مردمانی تیرگواری ءَ یک مردمے بیران بوتگ –

وئیل مٹ موندرئی ءَ بوتگ کہ سلاہ بندانی تیرگواری ءَ نور حسن نامیں مردمے بیران بوتگ –
بیران بوتگیں مردم لیویز ءَ چِست کرتگ ءُ نادراھجاہ ءَ سر کتگ اود ءَ اژدری چار ءُ ٹپاس ءَ پد کھول ءِ ھوالگ ءَ دیگ بوتگ – ھمے گوشگ بوگ ءَ انت وئیل پیشی وت ماں وتی جیڑہ ءِ سر ءَ ودی بوتگ –

ھب ءَ سیلنڈر ءِ ترکگ ءَ یک مردمے بیران بوتگ –

وئیل یوسف گوٹ بس ٹرمینل ءِ نزیک ءَ ویلڈنگ دکان ءِ تہ ءَ بوتگ کہ سیلنڈر ءِ ترکگ ءَ یک مردمے بیران ءُ دو زدگ بوتگ انت – وئیل ھما وھد ءَ بوتگ کہ گاڑی ءِ پٹرول جاہ ءَ ویلڈ کنگ ءَ بوتگ انت – ریسکیو ءُ ٹپی ءُ بیران بوتگیں مردم نادراھجاہ ءَ سر کتگ انت –

دگہ وئیلے کوھلو ءَ چنگیز پٹرول پمپ ءِ نزیک ءَ دیم ءَ اتکگ کہ پرپٹ سوار ءُ رکشہ ءَ ڈیک وارتگ، ڈیک ورگ ءِ سوب ءَ دو پرپٹ سوار ٹپی بوتگ انت –
دمگی پولیس ءَ ٹپی بوتگیں مردم نادراھجاہ ءَ سر کتگ انت ٹپانی درمان کنگ ءَ پد گیشیں الاج ءِ ھاتر ءَ ڈیرہ گازی ھان ءَ سر کنگ بوتگ انت –

دگہ وئیلے جھل مگسی ءَ دیم ءَ اتکگ کہ یازدہ ھزار تاکتوریں بجلی تار کپگ ءَ کسان سالیں گونڈلے بیران بوتگ دو زدگ بوتگ انت – واپڈہ ءِ بگیری ءَ ارزی نبشتہ کنگ بوتگ – ھمے گوشگ بوگ ءَ انت کہ بجلی ءِ تار کپتگ بوتگ انت ءُ اھانی تہ ءَ کرنٹ مان بوتگ ءُ چریشی ءَ سَے زھگ ءُ دلوت زد ءَ اتکگ انت یک زھگے ھما دمان ءَ بیران بوتگ ءُ دگہ دو نادراہ جاہ ءَ داخل انت –
دمگی مردماں واپڈہ ءِ بگیری ءَ ارزی نبشتہ کنائینتگ –

دومی نیمگ ءَ بلوچستان ءِ دمگ کوھلو ءَ ھور ءُ ھرگاں چہ زالبولے بیران ءُ دو مردم ٹپی بوتگ انت –

ھالانی رِد ءَ کوھلو ءِ دمگ ماوند ءَ ھورانی سوب ءَ توپانی ھار ءَ یک زالبولے برتگ زالبول بیران بوتگ زالبول ءِ جون شوھاز کنگ بوتگ ءُ نادراھجاہ ءَ سرکنگ بوتگ اود ءَ اژدری چار ءُ تپاس ءَ پد کھول ءِ ھولگ ءَ داتگ – ھمے وڑ تمبو ءَ گرند ءِ کپگ ءَ یک مردمے ٹپی بوتگ ٹپی بوتگیں مردم دمگی نادراھجاہ ءَ سر کنگ بوتگ –

بلوچستان ءِ دمگ کیچ ءَ سر بیتگیں ھالانی رد ءَ لیویز فورس ءَ نشہ باپاریانی بگیری ءَ بیڑ برتگ ءُ سَے نشہ باپاری مردم گپتگ اَنت –

لیویز بنشون ءِ گوشگ اِنت کہ ڈپٹی کمشنر کیچ حسین جان بلوچ ءِ گوشگ ءَ اسسٹنٹ کمشنر تربت ءِ سروکی ءَ رسالدار میجر ءَ لیویز چیک پوسٹ کلاتک ءِ ھمراھی ءَ سوبمندیں بیڑے کرتگ ءُ سَے نشہ باپاری مردم گپتگ اَنت –

لیویز بنشون ءِ رد ءَ سئیں نشہ باپاری مردمانی پجار مھمد نعیم ء شمبے، علیم ء اللہ بکش ءُ مھر اللہ ء رھمت اللہ ءِ ناماں زانگ بیتگ اَنت –

لیویز بنشون ءِ گوشگ اِنت گپتگیں مردمانی گور ءَ بازیں کچے ءَ نشہ دزکپتگ اَنت –

اے سی تربت عقیل کریم ءَ رسانکدراں گوں گپ کنان ءَ گوشتگ کہ نشہ ءِ ھلاپ ءَ لیویز فورس ءَ مزنیں گامگیج زرتگ اَنت ءُ نشہ ءِ ھلاسی ءَ کنت اِنت –

آئی ءَ گوشتگ کہ لیویز فورس ءَ ھرکجا نشہ ءِ ھال بہ رس ایت ھمود ءَ بیڑ بارت ءُ نشھیانی ھلاپ ءَ ترندیں گامگیج زور ایت ءُ دانکہ نشہ ءَ چاگرد پاک ءُ پلگار بہ بیت اِنت –

آئی ءَ کلات ءِ لیویز فورس ءِ اے گامگیج ءِ ستاشانی کرتگ ءأ گوشتگ کہ چاگردی سلکاریانی بگیری ءَ لیویز ءِ مشن اِنت ءُ ھرچ رنگ ءَ اے مشن سرجم بیت اِنت –

زانگ بہ بیت بلوچستان ءِ بازیں جاہ نشہ ءَ وتی لپیٹ ءَ زرتگ اَنت ءُ اود ءَ کسان کسانیں زھگ ھم ھمے سِلیں زھر ءِ آماچ اَنت –

بلوچستان ءَ سیاسی مردمانی گوشگ اِنت کہ نشہ باپاریانی پُشت ءَ مزنیں واکانی دست ھوار اَنت ءُ چریشی ءِ سر ءَ دمگاں لس جاھاں نشہ بھا بیگ ءَ اَنت –

بلوچستان ءَ بازی وھداں نشہ ءِ ھلاپ ءَ مھلوک زھرشانیاں ھم گندگ بیتگ اَنت ءُ گوست ءَ ھزدار ءَ نشہ ءِ ھلاپ ءَ توار چِست کنوکیں ورنایے نشہ باپاریاں تیرانی آماچ کرتگ ءُ کُشتگ اَت –

چہ بلوچستان ءَ زورانسری آوار جنی ءِ آماچیں مردمانی کھول سالانی سال وتی دوستگیں مردمانی آیگ ءِ وداراں نشتگ اَنت، بیگواھیں مردمانی کھولاں پاکستان ءِ آمیدگس ءُ میان اُستمانی انسانی ھکانی ادارھاں انساپ ءِ دیگ ءِ لوٹ ءَ کنگ ءَ اَنت –

مستونگ ءِ جھمنندیں بیگواھیں لیویز کارمند سعءد بلوچ ءِ مات ءُ چہ سوراب ءَ بیگواہ بیتگیں سیف اللہ رودینی ءِ گوھار ءَ شال ءِ پریس کلب ءِ دیم ءَ برجاھیں وائس فار بلوچ مسنگ پرسنز ءِ بنجل ءَ اتکگ ءُ وتی لاڑانی یل کنگ ءِ لوٹ کرتگ اَنت ءُ آیانی بیگواھی ءِ ھال شنگ اش کرتگ اَنت –

سعید احمد 29اگست 2013 ءَ دزگیر کنگ ءَ پد بیگواہ کنگ بیتگ ءُ سیف اللہ رودینی 22 نومبر 2013 ءَ بیگواہ کنگ بیتگ –

بیگواھیں سعید احمد ءِ مات زرگل بلوچ ءِ رد ءَ آئی ءِ زھگ ءِ بیگواھی ءِ ھلاپ ءَ گیشتر زھرشانی ءُ پریس کانفرنس کنان اِنت بلے توار ءِ گوشداروک کس نیست اِنت – سعید احمد ءِ مات ءَ گوشت کہ اسلام آباد ءَ زھرشانی ءِ وھد ءَ سر وزیر پاکستان ءَ مارا مسام کرتگ ءُ گوشتگ کہ آ مئے لاڑیں بچاں دیم ءَ کاریت اِنت –

آئی ءَ گوشت کہ عمران ءِ ٹاھاں ابید مارا مئے بیگواھیں مردمانی بارو ءَ ھچ سرپدی نیست اِنت – آئی ءَ گوشگ اَت: ھشت سال ءِ دراجیں ودار باز دردناک اِنت ما انساپ دیگ بہ بہ ایں –

بیگواھیں سیف اللہ ءِ گوھار ءَ شنگ کرتگیں تامربندے ءَ گوشتگ کہ سیف اللہ رودینی ودار کنان ءَ منی پت ءُ مات ءَ اے دنیا یل کرتگ، برات دیم ءَ آرگ بہ بیت ءُ ما انساپ دیگ بہ بہ ایں –

سیف اللہ رودینی ءِ گوھار ءَ گوشتگ کہ کجام ھم ریاست وتی شھریاں چوش گار ءُ گمسار نہ کنت ءُ شھریانی بیگواہ کنگ گیر انسانی املگ اگاں منی برات ءَ جرمے کرتگ گڑا آ آمیدگساں آرگ بہ بیت ءَ جرم منینگ بہ بیت اِنت –

سیف اللہ رودینی ءِ گوھار ءَ دیمترا گوشت کہ بیگواھیں مردمانی واستا جوڑینتگیں جے آئی ٹی ءِ دیم ءَ پیش بیگ ءَ من ءَ گوشگ بیتگ کہ تئی برات ردیں کاراں دزمانجن بیتگ ءُ چریشی ءِ سبب ءَ بیگواہ کنگ بیتگ اگاں ریاستی کانون کجام مرد ءَ بید ءِ آمیدگسانی پیش کنگ ءَ زورنسری آوار بہ جنت اے وڑیں کانود ءَ ما نہ منّیں –

آئی ءَ میان اُستمانی انسانی ھکانی ادارھاں گوں دزبندی کرتگ ءَ گوشتگ کہ آ منی برات ءِ یل کنگ ءَ وتی کرد ءَ پیلو بہ کن اَنت –

بلوچ اسٹوڈنٹس ایکشن کمیٹی کراچی ھنکین ءِ نیمگ ءَ شنگ بیتگیں ھالانی رد ءَ ملیر ءَ بنزہ ءِ جوڑینگ بیتگ کہ چریشی ءَ نور خان بلوچ سروک گچین کنگ بیتگ-

بنزہ ءِ نیاد ھنکینی کارمستر نورمان خالد ءِ سروکی ءَ برجم کنگ بیتگ کہ نیاد ءَ ھنکینی مھمان فوزیہ بلوچ ءُ ھواری مھمان کمک کارگشاد بالاچ ھسن بیتگ اَنت –

نیاد ءَ پجاروکی ءَ پد ھنکینی سرکولر، گل ءِ کارانی ءُ آؤکیں گامگیجانی سر ءَ جوانیں رنگے ءَ باوست بیتگ اَنت، نیاد ءَ دراھیں باسکاں گل ءِ کارانی گھتری ءُ جوانیں رنگے ءَ دیم ءَ جنزگ ءِ سوڑگ کرتگ –

نیاد ءَ وانگی تکانی سر ءَ ھم باوست کنگ بیتگ ءُ دراھیں باسکاں زانگ ءُ زانشت ءِ دیمروئی ءِ واستا گھتری ءِ مسام کرتگ اَنت –

نیاد ءَ بنزہ ءِ گچین بیتگیں سروک ءُ باسک گچین کنگ بیتگ ءُ بنزہ ءِ سروک نورخان بلوچ، کمکار مستر گل زیب بلوچ، کارگشاد، نعیم بلوچ، کمکار گشاد رشید بلوچ ءُ شنگکار حسنین بلوچ گچین کنگ بیتگ اَنت ءُ زالبول کوارڈینیٹر ءِ واستا ثناء بلوچ ءُ زیب النسا ء گچین کنگ بیتگ اَنت –

ھنکین ءِ کارمستر ءَ بنزہ ءِ گچین بیتگیں اگدو دار سوگند داتگ اَنت اگدو داراں گل ءِ رھبندانی سر ءَ مسام بندی کرتگ ءُ وتی زمہ واریانی پیلو کنگ ءَ سدکی کرتگ –

بلوچ ایکشن کمیٹی کراچی ءَ ھوار بلوچستان ءِ ھند ءُ دمگاں ھم وتی بنزہ ءُ گلی کاراں دیم ءَ جنزان اِنت کہ بلوچستان ءَ بلوچ نودربرانی رھشونی ءَ یک گچینی ءِ گلے ءِ نام ءَ زانگ بیت اِنت –

نبشتانک: منی گار بوگ ءَ ساری

نبشتہ کار: براھیم گُؔل

چارُمی بَھر

دی بلوچستان پوسٹ

مِھروان ! چم پہ گِندگ ءُ گوش پہ تھنا اِش کنگ ءِ واستا ھُدا ءَ بنیادم ءَ را نہ داتگ اَنت،بلکیں دگہ اوں ھزار کار کنگ ءِ توپیک کنگی اِنت۔
مِھروان! من ءَ چہ پد زُبان ءِ لَگام ءَ یلو بوگ ءِ ھِچ موہ مہ دئے،پرچا کہ اگاں یک شِپانکے وتی رمگ ءِ ھیال ءَ مہ دار ایت آئی ءِ رمگ ءَ گُرک وارت ، اگاں گُرک نہ وارت اش الّم دگرے یے ڈگاراں چَر ایت ئِے من پد ءَ برے برے زُبان ءِ لھتیں جُھد کاراں گِنداں من سک بژنیگ باں ،من باز گَلانی باسک دیستگ اَنت کہ آ پہ نام برجم دارگ بوتگ اَنت ءُ اود ءَ پہ زُبان ءَ ھِچ کار کنگ ءَ نہ اَنت ،اَنچش کہ اوتھل لسبیلہ ءَ یک روچے منی سر یک بلوچی لبزانکی گَلّے ءِ تہ ءَ کپت کہ من دیست اود ءَ ھِچ کار اوں نہ بوگ ءَ اَت ، اود ءَ دُراھیں سنگت پہ وتی اُکدہ ءَ ھودوک اِت اَنت، یکے وتی کمک کاری ءُ یکے وتی پاگواجائی ءَ ۔

مھروان ! منی گُشگ ءِ مول ءُ مُراد کہ وتی زُبان ءَ پہ نام ھِچ مہ چار ھرچی کن ئے پہ سِتک بِکن، ھرچی کن ءِ پہ مُھکمی بِہ کن،چو مہ بیت کہ باندا روچ من ءُ تو گوں وتی زُبان ءَ ملامت کنگ بِہ بہ ایں ، چو مہ بیت کہ من ءَ چہ پد منی زُبان اوں اوشت ءِ آماچ بِہ بیت چو مہ بیت کہ ھما سنگتانی گَلّ ءِ وڑ ءَ پہ نام زُبان برجم دارگ بِہ بیت، اِنّاں مِھروان من ترا پیسر ءَ گُشتگ کہ ترا بےکساس مُھکم بوگی اِنت،ترا سک باز کار کنگی اِنت،ترا وتی زُبان ھپتیں آزمان ءَ سر کنگی اِنت،ترا داں تئی آتراپ ءِ ھمُک درچک ءُ دار بِہ زان اَنت کہ ترا یک مُھکمیں زُبانے ھست ءُ آ زُبان ءِ پاسبان چو کوھساریں سرمچار ءَ اوشتاتگ اَنت، من ءَ چہ پد زُبان ءَ تند بندگ ءِ ھِچ موہ مہ دئے۔

مِھروان! اے کِشک کہ من زُرتگ ءُ رَوگ ءَ آں ، اے کِشک ءَ جھل ءُ بُرز سک باز مان، اے کِشک ءَ ھزار کُنٹگ ھست، ھر ھمُک گام ءَ پاد تراول بنت، ھون بنت، اے کِشکانی مُساپِر کُجام اوں وھد ءَ پُلگ بنت، بلے ترا جُنزگی اِنت جند ئے زُبان اِنت ءُ آئی ءِ ھاتر ءَ ترا ھمُک کِشک ءِ کُنٹگ دُور کنگ ءُ جُنزگی اِنت،پرچا کہ اے مئے جِند ءِ مات اِنت،اگاں پہ مات ءَ من ءُ تو درد ءُ رنج اوپار کُت نہ کناں گُڑا مئے زندگی ءِ ھِچ مول نیست، یک بَچّے پہ مات ءَ ندر بوت نہ کنت گُڑا آ بَچ اے مات ءِ چُک گُشگ نہ بیت اَنچو کہ ” جاھے ءَ بلوچی زُبان ءِ شھزانت سید زھور شاہ ھاشمی ساھب گُش ایت کہ ، اگاں یک راجے وتی جِند ءِ ماتی زُبان ءَ وانگ ءُ نبیسگ مہ زانت گُڑا آ وانندگے گُشگ نہ بیت” اگاں ما بِہ چاریں واجہ راست گُشتگ،پرچا کہ بےزُبان ءَ ھِچ راج زندگ نہ مان ایت ءُ پہ زندگ مانگ ءَ وتی زُبان زندگ کنگی اِنت،اگاں راجے کہ جِند ءِ زُبان ءَ نبشتہ کُت نہ کنت ءُ ونت نہ کنت گُڑا آ راج چی پیم زندگ مان ایت !-

مِھروان! من بِہ گِندئے آ جاگہ ءَ نہ رس اِت آں ءُ ساری گار بوتاں گُڑا منی ھمے کار ترا کنگی اِنت،ترا تئی سرجمیں راج پہ وتی زُبان ءِ وانگ ءُ زانگ ءُ پوہ بوگ ءَ لاچار کنگی اِنت،تو وتی راج ءَ ھما جاگہ ءَ بیار کہ تئی راج ءِ ھر چُک تئی زُبان ءِ وانگ ءُ نبشتہ کنگ بِہ زانت،تئی زُبان کہ زندگ بیت گُڑا تئی راج زندگ بیت،اگاں تئی راج زندگ بیت گُڑا تو بِزاں کہ منزل ءَ سرئے ءُ تئی زُبان زِندگ اِنت مِھروان پد ءَ گِندئے تئی زُبان ءَ ھرکس زانت ءُ ھرکس ترا یک جِتائیں پجّارے دنت گُڑا من زاناں کہ تو منی کول پیلو کُتگ اَنت۔

مِھروان! تو بلکیں پد ءَ ھمے بِہ جیڑئے کہ من یک گُنگیں راجے ءِ زُبان ءِ ھاتر ءَ جُھد کُت نہ کناں،اے راج وتی زُبان ءَ چہ گیش دگہ زُباناں گوں شوک داریت اِنّاں مِھروان اگاں تئی راج چہ واب ءَ بُست نہ کنت ءُ وتی زُبان ءِ گمان ءَ نہ اِنت گُڑا تو اے گُنگیں راج ءِ زُبان بُہ بو، تو اے راج ءَ چہ واب ءَ پاد بِہ کن،اے راج الّم پاد کیت بَلے ترا جُھد کنگی اِنت، داں ھما وھد ءَ جُھد کنگی اِنت کہ تئی گُنگیں راج آشنا بِہ بیت ءُ بِہ زانت کہ مئے زُبان ءِ زندگ کنگ ءِ اولی گامگیج ترند کنگی انت اے ھبر ءَ کدی مہ جیڑ کہ مئے جِند ءِ زُبان ءِ واھند دَری زُبان ءَ نبشتہ کنگ ءَ اَنت ءُ ما پرچا بلوچی ءِ سر ءَ بہ جُنز ایں؟ اے ھبر ءَ ھچبر مہ جیڑ ، مُدام ھمے بِہ جیڑ کہ تئی ھمُک اِسرار گوں زُبان ءَ بندوک اِنت بس،تئی زُبان تئی دُنیا اِنت،تو اگاں زُبان زندگ کُت گُڑا منی ھیال ءَ تئی مات سک گَل بیت،تئی مات چہ گَل ءَ جاگہ نہ کنت ءُ پد ءَ تئی مات ھمے جیڑ ایت کہ منی جُھد ءِ مستریں سرمچار توئے۔

روان اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءِ سیمسری دمگ مند نوکیں کھن ءِ جھمنندیں اسد ء ھاجی ناصر ءِ گوھار ءَ دزبندی کرتگ برات ءَ یل بہ کن اِت –

اسد بلوچ ءِ گوھار ءِ رد ءَ آئی ءِ برات اسد بلوچ یک جولائی دوھزار ءُ نوزدہ ءَ نوکیں کھن مند ءَ زورانسری آوار جنی ءِ آماچ بیتگ، دو سال ءِ پِر گوزگ ءَ پد انگت ءَ دیم ءَ آرگ نہ بیتگ –

آئی ءَ گوشتگ کہ برات ءِ بیگواھی ءَ دراجیں مُدتے ءِ گوزگ ءَ پد مئے کھول ترندیں دردمانانی آماچ اِنت ءُ منی مات وتی زھگ ءِ بیگواھی ءِ سبب ءَ درد ءُ رنجانی آماچی ءَ نادراھی ءُ بے ھوشی ءِ زند ءَ گوازینگ ءَ اِنت –

آئی ءَ ڈیھی ادارہ ءُ مزن واکداراں گوں برات ءِ یل کنگ ءِ لوٹ کرتگ ءُ گوشتگ کہ سالانی بیگواھی ءَ سرجمیں کھول دردناکی ءِ آماچ اِنت –

ھمے وڑ ءَ بلوچ سوشل میڈیا ایکٹیویسٹانی نیمگ ءَ اسد بلوچ ءِ زورانسری بیگواھی ءَ دو سال سرجم بیگ ءَ چاگردی رسانکجاہ ٹوئٹر ءَ کمپین کارمرد کنگ ءِ جار پِرینتگ اَنت –

بیگواھیں اسد ءِ گوھار ءَ دَہ جولائی ءَ وتی برات ءِ سلامتی ءِ یل کنگ ءَ کمپین ءِ بھر زورگ ءَ انسان دوست ءُ دگہ تکاں بندوکیں مھلوک ءَ گوں دزبندی کرتگ –