TBP Balochi

شَیر: ندر پہ شهید خالد حیدر عرف بیبگر ءِ اروه ءَ

شائر: سلیم ناز

دی بلوچستان پوسٹ

تاسپیں بَچانی گم اُوپار نہ بیت
سّدکان مئے هون پہ هالو گار نہ بیت

سرمچاراں پہ وتن دیوانگاں
آ گنوکاں گیدی ءَ بہ سار نہ بیت

جنگ هست داں کہ بلوچے هست بات
زندگیں بیبگر ءِ پگر باپار نہ بیت

سنگراں مھکم کن اِت اُو همبلاں
اے گلامی ءَ مُدام بازار نہ بیت

گلزمین لوٹ اِیت مُدام سالونکیں سر
هنییں هوناں گوں دهل تیجار نہ بیت

راجی بامرداں سلام سهریں سلام
گوں ما موتک ءُ زالی هچ پیم زار نہ بیت

ایمن ءَ هچبر نہ ننداں من سلیم
آجوئی ءِ داں کہ گوشاں جار نہ بیت

یوروکپ ءَ اٹلی ءَ انگلینڈ ءِ دیم ءَ پیلانٹی شوٹ دو پہ سَے ءَ باج برتگ – گوستگیں روچ ءَ ارجنٹینا ءُ برازیل ءِ میان ءَ کوپا امریکہ کپ ءَ ارجنٹینا ءَ باج برتگ اَت –

دوشی شپ یوئیفا یورو کپ ءِ پائینل گوازی برجم دارگ بوتگ اٹلی ءَ انگلینڈ ءِ دیم ءَ پیلانٹی شوٹ باج برتگ یورو کپ دست گپتگ –

یوئیفا یورو کپ ءِ فائینل گوازی انگلینڈ ءُ اٹلی ءِ میان ءَ بوتگ – اٹلی ءَ پیلانٹی شوٹ سَے گول ءَ انگلینڈ ءِ دیم ءَ باج برتگ کپ دست گپتگ – گوازی ءِ بندات ءَ انگلینڈ ءِ لیبیاں جوانی ءَ گوازی کنان ءَ انگلینڈ ءِ لیبی لوکی شاؤ ءَ اولی دؤئیں ملٹانی تہ ءَ یک گولے اسکور کُتگ ، وھدیکہ دومی آپ ءَ اٹلی ءِ لیبی لیونارڈو ءَ گول موکتگ ءُ ھردو ٹیم یک یک گول ءَ دیمیگ بوتگ انت – ھردو ٹیمانی لیبیاں گیشیں ملٹانی تہ ءَ ھم ھچ گول اسکور نہ کتگ وھدیکہ پیلانٹی شوٹ ءَ اٹلی ءَ انگلینڈ ءِ دیم ءَ سَے گول باج برتگ –

زانگ بہ بیت یوئیفا یورو کپ ءَ بیست ءُ چار ٹیماں بھر زرتگ ءُ بیست ءُ چار ٹیمانی تہ ءَ انگلیڈ ءُ اٹلی ءِ لیبیاں جوانی ءَ گوازی کنان ءَ وت ءَ فائینل ءَ سرکتگ – فائینل گوازی ءَ انگلینڈ اٹلی ءِ دیم ءَ پیلانٹی شوٹ ءَ بے سوب بوتگ یورو کپ اٹلی ءَ کٹیتگ –

انگلینڈ پنجاہ ءُ پنچ سال ءَ پد یک جوانیں چیزے ءِ کَٹگ ءَ اُمیتدار بیتگ بلے آ اے سوبمندی ءَ اٹلی ءِ دیم ءَ پُرشت ءُ اٹلی ءَ چار کروڑ ءُ چِل لک ڈالر ءِ گران بھائیں داد دست گپتگ ءُ وت ءَ سوبمند کرتگ –

یورو کپ ءِ آسری ءَ جتا جتائیں ڈیھاں گوازی جاھاں گوازی جوانیں رنگے ءَ سمبھینگ ءُ دوستداروکاں مزنیں کچے ءَ مزنیں اسکرینانی دیم ءَ چارگ بیتگ –

گوستگیں روچ ءَ کوپا امریکہ پائینل گوازی ءَ ارجنٹینا ءَ باج برتگ کپ دست گپتگ –

ارجنٹینا ءَ برازیل ءِ دیم ءَ یک گولے ءَ باج برتگ ءُ کوپا امریکہ ءِ نوکیں چمپئین جوڑ بوتگ –

کوپا امریکہ کپ ءِ فائنل گوازی برازیل ءُ ارجنٹائن ءِ میان ءَ بوتگ کہ ارجنٹینا ءِ لیبی ڈی ماریا ءَ بیست ءُ دومی مِلٹ ءِ تہ ءَ یک گول ءِ اسکور کتگ آئی پد ڈوئیں ٹیمانی نیمگ ءَ ھچ گول اسکور کنگ نبوتگ ھمے وڑ ارجنٹینا ءَ برازیل ءِ دیم ءَ یک گولے ءَ باج برتگ-

زانگ بہ بیت ارجنٹینا نوزدہ سد ءُ نود سَے پد کوپا امریکہ ءِ کپ ءِ کٹگ ءَ سوبین بوتگ وھدیکہ برازیل سرجمی ءَ بیست ءُ ھپت لیبانی بازی برگ ءَ پد گڈی (فائینل) ءَ ارجنٹینا ءِ دیم ءَ بے سوب بوتگ – ھمے وڑ ارجنٹینا ءِ گول کیپر ایمی مارٹینز گولڈن گلوزانی ھکدار جوڑ بیتگ ءُ ایمی مارٹینز گولڈن گلوز آنی کٹگے ارجنٹینا ءِ اولی گول کیپر جود بوتگ – برازیل ءَ بیست ءُ ھپتیں گوازیاں باج برتگ آئی ءَ بیست ءُ دو گوازی کٹیتگ ءُ پنچ گوازیاں دیمیگ بوتگ – وھدیکہ ھچ گوازی ءَ بے سوب نبوتگ بلے گڈی ءَ ارجنٹینا ءِ دیم ءَ یک گولے ءَ بے سوب بوتگ

فائینل گوازی ءَ پیش جھانی وبا کرونا وائرس ءَ بیران بوتگیں مردمانی یات ءَ یک ملٹ ھاموشی پد گوازی بندات کنگ بوتگ-

یات بہ بیت جنوبی امریکہ دہ ٹیمانی میان ءَ لیب دارگ بوتگ ءُ کوپا امریکہ کپ گوازی پانزدہ جون ءَ بندات بوتگ ءُ یانزدہ جولائی گڈی گوازی کنگ بوتگ –

سر بیتگیں ھالانی رد ءَ بلوچستان ءِ دمگ دالبندین ءَ گوادر ءَ چائنہ ٹرالنگ ءُ بلوچ دریا وردانی لاپ ءِ لگت جنگ ءِ ھلاپ ءَ دالبندین پریس کلب ءِ دیم ءَ زھرشانی کنگ بیتگ –

زھرشانی نیشنل پاٹی ءِ دمگی سروک میر عاطف بلوچ، بی ایس او (پجار) ءِ دمگی آرگنائزر وسیم بلوچ، تھسیل سیکرٹری غلام اللہ بلوچ ءُ دگہ مردماں تران کرتگ –

تران کنوکاں گوشتگ کہ گوادر ءِ زر ءَ چائنیز ٹرالنگ بلوچ دردیا وردانی لاپ ءَ لگت جنگ ءُ آیاں شد لاپ کنگ ءَ اَنت کہ اے بلوچ دردیا وردانی زرکاری ءَ نیست ءُ نابودی ءَ گوں بروبر اَنت –

آیاں گوشتگ: جھلیں زر ءَ شریں ماھیگاں گرگ ءُ نوکیں دور ءِ نام ءَ کارمرد کنگ ءُ ماھیگانی نسل ءَ گرگ ءَ وتی زراں برگ ءَ اَنت –

آیاں گوشت کہ اے رنگ ءَ ماھیگانی نسل کُشی ءُ بلوچ دریا وردانی زرکاری ءَ نیست ءُ نابود کنگ ءَ سرجمیں بلوچستان نہ منّ اِیت –

آیاں گوشت کہ سی پیک ءِ نام ءَ زر گرگ ءُ ورگ ءُ پنجاپ ءَ پائدگ بیگ ءَ اِنت ءُ بلوچستان ءِ زر ءُ مڈیاں روپگ ءُ برگ ءُ ھڑپ کنگ ءَ اَنت –

آیاں گوشت کی بلوچستان ءِ مھلوک ءِ گون ءَ نیشنل پاٹی ھر گام ءَ اوشتوک اِنت ءُ سرکار ءِ ردیں پالیساں ھمک پھناتاں بندوکیں مردم بے روزگاری ءِ سبب ءَ تکانسر اَنت ءُ دانکہ مھلوک ءَ ھک دیگ نہ بیت تنا وھدی ڈیھ دیمروئی کُت نہ کنت –

آیاں گوشت: گوادر ءِ نام ءَ مزن مزنیں ٹاہ دیگ بیگ ءَ اَنت بلے تنی وھدی اود ءِ جھمنندیں مردماں ترمپے آپ ھم نیست کہ وتی نکاں تر کُت بہ کن اَنت –

آیاں گوشت کہ دریا وردانی زراں ھلاس پرے ھاتر ءَ کنگ ءَ اَنت کہ دانکہ زر واریں مھلوک اود ءَ تنگدست بہ بیت ءُ لڈ ءُ بار ءَ لاچار کنگ بہ بیت ءُ آیانی جاہ ءَ دری مھلوک ءَ چائنیز آرگ ءُ آباد کنگ ءُ نوکیں ساز ءَ ساماناں بلوچ مزنیں پندلے سازگ بیگ ءَ اِنت –

آیاں گوشت کہ جھمنندیں مھلوک ءَ بے روزگار کنگ ءَ دری مھلوک ءَ آرگ ءُ روزگار دیگ اے ناانساپی بیگ ءَ اِنت ءُ چریشی ءَ نیشنل پاٹی ءُ بی ایس او (پجار) ءِ رھشون بے توار نہ بنت ءُ اشانی واستا توار چِست کن اَنت –

سربوتگیں ھالانی رِد ءَ بلوچستان ءِ دمگ دکی، نسیرآباد ءَ اشکرانی کاریز ءُ تیرگواری وئیلاں ھپت مردم ٹپی ءُ یک جونے دست کپتگ –

گیشیں ھالانی رِد ءَ بلوچستان ءِ بنجاھی شھر شال مارواڈ ءَ اشکرانی کھن ءَ تراک ءَ شش کاریز کار سُتکگ ءُ ٹپی بوتگ انت –

ریسکیو ءِ رِد ءَ چار کاریزکار درکنگ بوتگ اَنت ءُ شال بولان میڈیکل کمپلیکس برگ بوتگ اَنت ءُ ریسکیو وھد ءَ دو کاریز کار ءِ در کنگ ءِ جُھد کنگ بوتگ اَنت –

معدنیات بنشون ءِ رِد ءَ ھرنائی، دکی، شال ءُ کچی ءَ ھوار بلوچستان ءِ ھپت دمگانی اشکرانی کاریز ءَ دوسد ءُ پنجاہ ملین ٹن ءَ گیش مڈی ھست انت – دوھزار ءُ ھشت ءَ سد ءَ گیش اشکرانی کاریز ءَ کساس ھپتاد ھزار کاریزکار کار کنگ ءَ اَنت، کہ ایشانی تہ ءَ گیشتریں کاریزکار خیبر پختونخواہ ءِ دمگ سوات، دیر، شانگلا ءُ افغانستان ءِ جھمنند اَنت۔

اشکرانی کاریز ءَ پھازگی ءِ ھچ وڑیں آسراتی نیست پمشکا ھمک سال کساس سد ءَ گیش کاریزکار جتا جتائیں وئیلانی آماچ ءُ بیران بنت-

دگہ وئیل ءِ نسیراباد ءَ دیم ءَ اتکگ کہ ناشناسیں مردمانی تیرگواری ءَ یک مردمے زدگ بوتگ –

وئیل نسیرآباد ءِ دمگ چتر ءَ دیم ءَ اتکگیں ناشناسیں سلاہ بندیں مردماں محمد قاسم نامیں مردمے تیرانی آماچ کتگ ٹپی کتگ –

دومی نیمگ ءَ بلوچستان ءِ دمگ ژوب ءَ ناشناسیں مردمے ءِ جون دست کپتگ –

لیویز بنشون ءِ رد ءَ کلی ویالا میرباز ءَ ناشناسیں مردمے ءِ جونے دست کپتگ کہ مردم کُشگ ءَ پد مانداشتگ، لاش لیویز ءَ نادراھجاہ ءَ رسینتگ- گڈی ھالاں تاں جون ءِ پجار نہ بوتگ –

چہ بلوچی اکیڈمی شال ءِ نیمگ ءَ بانک یاسمین حلیم ءِ پولکاری کتاب “بلوچی ءَ ناول ءِ رجانک ” چاپ ءُ شنگ بیتگ –

کتاب ءَ دری لبزانکانی ترینگ ءُ بلوچی ءَ کنگ ءِ بارو ءَ اِنت ءُ کتاب ءِ تہ ءَ بانک یاسمین حلیم ءَ وتی زانشت ءَ پولکاری کرتگ ءُ تالان کرتگ –

کتاب ءَ بانک یاسمین حلیم ءَ وتی لیکھانی تہ ءَ دری لبزانک ءِ بارو ءَ جوانیں گپ ءُ ھیال درشان کرتگ اَنت ءُ فکشن ءِ بارو ءَ یک مزنیں ارزشتے داریت –

کتاب ءِ پُشت تاک ءَ ذاکر قادر ءَ کتاب ءِ بارو ءَ گُشتگ کہ بلوچی ءَ فکشن ءِ ایندگہ تھرانی تہ ءَ ناول ءَ اینچو دیمروئی نہ کرتگ ءُ گوستگیں ھپتاد سالاں بلوچی ءَ کم ناول نبشتگ کنگ بیتگ ءُ اشی ءَ گیشتر بلوچ ندکاراں دری لبزانک ءِ کمک زرتگ ءُ ناول نویستگ –

رجانک ءِ بارو ءَ گوشگ بیت کہ رجانک زبانانی دیمروئی ءِ واستا مزنیں بھرے زانگ بیت ءُ چریشی ءَ یک زبانے دومی زبان ءَ سان زرت کنت ءُ وتی دیمروئی ءُ گھتری ءِ سنچ ءَ ودینت کُت کنت –

مکران ءَ گوستگیں یک ھپتگے ءَ بجلی ءِ بندش ءِ ھلاپ ءَ مھلوک زھرشانی کنگ ءَ اِنت – مھلوک ءِ گوشگ اِنت کہ زندگی ءِ آسراتیاں زبھر اَنت مھلوک اد ءَ ترمپے آپ ءَ تلوسگ ءَ اَنت –

کیچ ءِ دمگ تمپ ءَ چاگردء باسک ءُ نبشتہ کار عندلءب گچکی ءِ سروکی ءَ زالبول ءُ چکاں نندانکی زھرشانی کرتگ ءُ سرکار ءَ زوت ءَ چہ زوت بجلیانی سرجم کنگ ءِ لوٹ کرتگ اَنت –

مکران ءَ بجلی ءِ پُجارینوکیں جیکی گور گریڈ اسٹیشن سَے شمبے ءِ سھب ءَ ابید ءِ جار ءَ بند کنگ بیتگ چریشی ءَ پد ھپتاد میگاواٹ بجلی ءِ پُجگ ءَ دَہ میگاواٹ بجلی سپلائی بندات کنگ بیتگ چریشی ءِ سبب ءَ سرجمیں مکران ءَ روچ ءَ بجلی ءِ نہ بوگ ءُ شپ ءَ بس یک یا دو اداراں بجلی پُجارینگ بیگ ءَ اَنت –

بلوچستان ءِ دمگ کیچ لھڑ تریں جاھاں ھوار اِنت کہ اود ءَ گرم ءِ زور چِل ڈگری سینٹی گریڈ ءَ برز بیت اِنت ءُ بجلی ءِ نہ بوگ ءَ مھلوک ٹوھیں جنجالانی دیمپان بنت اِنت ئِے –

عندلیب گچکی ءَ چاگردی رسانکجاہ ٹوئٹر ءَ گوشتگ کہ سرجمیں مکران ءَ بجلی ءِ بندش ءُ ڈیھ ءَ وت ءَ بجلی نہ بوگ ءَ مکران ءَ بجلی ءِ پجگ ءِ بند کنگ ءِ سبب ءَ تمپ، تربت ءَ زھرشانی برجاہ اَنت –

نبشتانک: نمدی: واجہ ڈاکٹر ناگمان ءِ نام ءَ پچیں نمدی یے

نبشتہ کار: ابدلستار بُگٹی

دی بلوچستان پوسٹ

واجہ دْروت ءُ دْراہ بات ئے، انچوشکہ تو دو بلوچی آب “ڑ ءُ ڈ” ءِ بابت ءَ یک تاُمربندے اڈ کت ءُ پد ءَ ھمے تامُربند یوٹوب ءُ پیسبُک ءَ ھم شِنگ ءُ تالان کُت۔ سنگت من تئی تامُربند ھورت چار اِت ءُ دلگوش کُت کہ ماں آئی ءِ تہ ءَ تو وتی ھیال ءُ لیکھاں دْرشان کنان ءَ راج ءِ تہ ءَ بَکڑ (کنپیوژن) ودی کنگ ءَ اِت ئے یا انچو گْوش ئے کہ تو پہ زانتکاری ءَ راج ءَ رَد دیگ ءَ اِت ئے! بہ بکش کہ منی ٹَوک کمیں تْرُند وَ بنت بلے منی ٹَوکانی لاپ ءِ ترا راستی ھم الم رس ایت۔ انچوشکہ تو وت گْوشگ ءَ ات ئے ” بلوچی آب “ڑ” ءُ “ڈ” نزیکیں آب اَنت ءُ یکیں توارکش اَنت پمیشکا منی ھیال ءِ رِد ءَ چہ دوئیناں “ڑ” دور دیگ بہ بیت” بزاں تو وت تچک نہ ئے بلکیں وتی ھیالے درشان کنگ ءَ ات ئے کہ تامُربند ءِ تہ ءَ من راج ءَ چون باوری بہ دے آں یا پد ءَ وھدیکہ راج منی تامُر ءَ چار ایت ءُ چیزے جُست بہ کنت گُڑا من آیاں چون منّانک دیان ءَ سرپد بہ کن آں چے ءَ کہ تئی تامُربند ءِ چارگ ءَ پد من انچو مار اِت کہ اِے تامُربند ءِ اڈکنگ ءَ پیش ءَ تو وت ھچ وڑیں تپاس نہ کُتگ اَت۔ چوناھا من چہ ترا سک دربُرتگ، تئی انگریزی ٹو بلوچی نوکاز پہ من یک ھُدائی ٹیکی یے کہ چریشی ءَ من بازیں گالے دربُرگ ءَ آں ءُ بلکیں وتی بازیں نبشتانکے ھم ھمے نوکاز ءَ کُمک ءَ سرجم کُتگ اَنت۔ دومی من تئی مِنتوار آں کہ ماں رجانکاری ءِ پِڑ ءَ تو “ٹِک نام” ءُ “لس نام” ءِ سرپدی دیان ءَ راج ءِ تہ ءَ بلاھیں بَکڑے ھلاس کُت چے ءَ کہ بکڑ ھر وڑیں جُنز ءُ جُھدانی گلاں اوشت ءِ آماچ کنت چریشی ءَ گل ءِ باسک دلپْروش بنت۔ البت اِے چیز ءَ تو ھم جْوان سرپد ئے بلکیں تئی وتی جِند ءِ گْوشتگیں ٹَوک اَنت کہ زُبان دوست راجدوست بنت ءُ راجدوست ڈیھ دوست۔۔۔۔ ءُ پد ءَ بلوچ راج ھم بازیں پھناتے ءَ جُنز ءُ جُھدانی توک ءَ انت ءُ پمیشکا راجی زُبان ءِ تہ ءَ بَکڑ ودی کنوک ھم راج ءِ بدواہ لیکھگ بنت۔ انچوشکہ اِے چیز ءَ ما دْراہ جْوان سرپد ایں کہ مئے راجی زُبان بلوچی یکشل ءَ رَد نبیسّگ بیگ اَنت، چے ءَ دنیا ءِ توک ءَ تھنا ھما راجانی زُبان دیمروئی کن اَنت وھدے کہ آ وتواجھیں راجانی زھگیں نودربر ءُ پدریچ وتی راجی زُباناں وت ماں وانگجاہ، دربرجاہ ءُ زانشجاھاں وان اَنت، راجی زُبان ءِ روتاک، ماھتاک ءُ گِندگُش ءِ وڑیں آسراتی بہ بنت گُڑا راجانی زُبان ھم دیمروئی کن اَنت ءُ راج ءِ لس مھلوک ھم وتی راجی زُبانانی وانگ ءُ نبشتہ شَر ھیل ءُ زبر بنت بلے پہ بلوچ راجی زُبان ءِ دیمروئی ءَ اِے وڑیں آسراتی نیست اِنت ءُ ناں کہ بلوچ راج ءَ ماں وانگجاھاں جِند ءِ راجی زُبان وانینگ بنت ءُ ناں کہ پہ براھوھی ءُ بلوچی ءِ دیمروئی ءَ آسراتی یے ھست ءُ نَیکہ بلوچ راج ءِ تہ ءَ ھم چوشیں سرپدی ءُ آگاھی یے ھست کہ ما گْوانکوانی تہ ءَ وتی راجی زُبان ءِ آبیکدار ءُ بزانت بلد ءَ ایرگیج ءُ کارمرز بہ کن این ءُ وتی دزھُورکی ءِ وھد ءَ وتی راجی زُبان ءَ وت وانان ءَ دربر ایں بلکیں واجہ منزور بسمل، واجی اَلی ایسا ءُ واجہ گوسبھار ءِ وڑیں بازیں بدواہ ءُ وتواھیں مردماں راجی زُبان ءِ تہ ءَ گیشتر بَکّڑ ودی کُتگ اَنت کہ راج ءِ وانِندگیں لس مھلوک بَکڑ ءِ آماچی ءَ دلپْروش بہ بنت ءُ وتی راجی زُبان ءَ مہ وان اَنت چمیشکا راجی زُبان ءِ نبشتہ رھبند بھر ءُ بانگ اِنت ءُ ھرکس وتی ھساب ءَ رد نبیسّ ایت۔

بِہ گِند ئے اِے بکڑاں تو وت جْوان سرپد ئے کہ راج داں روچ مرچاں بلوچی زُبان ءِ کارگال، کُمکّار گال، ستاگال، تپورگال ءُ اَربی ءِ دوازدھیں آبانی جیڑہ ءِ وڑیں رھبندی بُنھِشتاں ناں کہ بے سما انت چمیشکا ھمے رھبندی چیزاں مُدام راستیں جاھاں کارمرز نہ کن اَنت البت مرچاں دامگ ءِ زمانگ ءَ وٹس ایپ ءُ پیسبُک ءِ وڑیں آسراتیانی راست کارمرزی ءَ راجی زُبان ءِ بازیں جُھدکاریں زُبان دوست گوں منّانکاں راجی زُبان ءِ بَکڑاں ھلاس کنان ءَ راج ءَ سرپدی دیگ ءَ اَنت کہ ماں نبشتھاری بلوچی نبشتہ رھبند ءَ چے یے ءُ ایشانی لھتیں درو من وت واجہ اَلی ایسا ءُ منزور بسمل ءِ نام ءَ لھتیں پچیں نمدی نبشتگ اَنت کہ راستی راج ءِ دیم ءَ بیا اَنت ءُ راج بکڑ ءِ آماچ مہ بیت بلے مارا یک ٹوکے تچک بوگ لوٹ ایت کہ بلوچی یک شاھگانیں زُبانے ءُ ابرمی دنیا ءِ ھر شاھگانیں زُبانانی نبشتہ گوں بُن آب ءُ بُنتواریں گالاں نبیسّگ بنت نَیکہ دمگی گالوار ءِ ھساب ءَ زُبان نبیسّگ بنت چے ءَ کہ ھرکسے وتی دمگی گالوار ءِ ھساب ءَ جُتا جُتائیان توارینکاں ودی کنت ءُ اگاں ھرکسے وتی دمگی گالواری توارینک ءِ ھساب ءَ نبیسّ ایت گُڑا زُبانانی نبشتہ ءِ سْیاھگ بھر ءُ بانگ بنت ءُ زُبان ونڈ ءُ چُنڈ بیت ھزار بژن انت کہ مئے مستریں نادْراھی ھمیش انت کہ ما گْوش ایں بلوچ بس منی دمگ ءُ شھر آباد اَنت ءُ بلوچی ھمیش انت کہ منی ءُ منی گالوار ءِ بلوچانی دپ ءَ در آیگ ءَ اِنت ءُ دِگہ ھچ جاہ بلوچ نیست انت ءُ راستیں بلوچی ھمیش انت کہ من گْوشان ءُ نبیسّگ آں۔ بدواہ ءُ وتواھیں مردماں راج ءِ تہ ءَ پیش ءَ بازیں بکڑ ودی کُتگ انت انچو کہ بازیں مردمے گْوش ایت “من سلیمانی بلوچے آں پمیشکا من رکشانی ءُ مکرانی بلوچی ءِ نبشتہ نہ زان آں ءُ لھتینے گْوش ایت من رکشانی یے آں پمیشکا من “خ ءُ غ” وڑیں آباں لازُم کارمرز کن آں”
بزاں راج ءِ تہ ءَ ھمے سرپدی ھم نیست انت کہ اِے مکرانی، سلیمانی ءُ رکشانی وت جُتائیں زُبان وَ نہ انت بلکیں راجی زُبان ءِ مستریں گالوار اَنت ءُ ھمے گالوار مئے راجی زُبان ءَ براھدار، دْراج ءُ شاھگان کنگ ءَ اَنت چمیشکا مئے راجی زُبان چہ کِر ءُ کش ءِ زبانی وازمند نہ انت باید انت ما وتواھی ءَ دور دیان ءَ وت سرپد بہ این ءُ راج ءَ ھم سرپد بہ کن ایں کہ ما دْراہ بلوچ یک ایں ءُ بلوچی مئے تیوگینانی راجی ءُ ماتی زُبان انت اِے رکشانی، سلیمانی ءُ مکرانی بس راجی زّبان ءِ گالوار اَنت مارا اول وتی راجی زُبان دوست دارگ لوٹ ایت ءُ پہ راجی زُبان ءِ دیمروئی ءَ بہ جیڑ ایں چے ءَ کہ راجی زُبان ءِ نبشتہ ءُ دیمروئی دْراھیں گالوارانی دیمروئی انت چریشی ءَ ھر گالوار گالاں ھاٹیگ رس ایت مارا ھک ھست اِنت ما وتی گالوار ءِ ھساب ءَ گپ ءُ ھبر بہ کن ایں، وتی گالوار ءِ ھساب ءَ بلوچی بہ وان ایں بلے نبیسّگ وھد ءَ مارا راجی زُبان یکیں نبشتہ رھبند ءَ نبیسّگی انت کہ ھما رھبند راجی زُبان ءِ نمیرانیں جُھدکار شاھسسّا واجہ سید ھاشمی ءَ گوں بُن آب ءُ بُنتواریں گالاں اڈ کُتگ بلے واجہ سک بژن انت کہ تو مرچی راجی زُبان ءِ نودربر رد داتگ انت کہ “ڑ” آب کشگ بہ بیت من ھم بلوچے آں ءُ من ءَ ھم ھَکّ ھست کہ من چہ ترا لھتیں سوال جُست نہ گر آں کہ اگاں تو “ڑ” ءِ آب دور دئے گُڑا “اڑ” ءُ “اڈ” ءِ ڈولیں جُتائیں گال چون دگری ودی کن ئے اے “ھُڑ ءُ ھکل، اڑ ءُ اڑاند، جیڑہ، جیڑگ، ساڑی، جوڑ، وڑ، بے چاڑ، آھڑ، گُڑ ، میھڑ(میشانی رم)ءُ روڑ(گْوسک) ءِ وڑیں بلوچی ھزاریں گال ھست اَنت کہ گوں “ڈ” ءَ نبیسّگ نہ بنت۔ تو گْوش ئے “ڑ” ءُ “ڈ” یکیں توار دے اَنت بلے ھرکس سرپد انت کہ تو رد ئے اے دوئیں دگہ دگہ توار اَنت انچوشکہ “ڈڈّ ، ھڈّ ، مڈّی ، ڈنگر ، ڈوک ، ڈال ، ڈل، جوڑ ، جاڑ ، جُڑ ، وڑ ءُ چاڑ” نی بچار چوں یکیں توار اَنت؟ بزاں “تو جوڑ ئے، ڈڈ ئے” ءَ ما ترا گْوش ایں “تو جوڈ ئے، ڈڈ ئے”؟-

اگاں من باندا گْوش آں کہ “چ ءُ ش” ءِ توار ءُ “و ءُ ب” ءِ توار یک اَنت ءُ چہ ایشاں یک یک کشگ بہ بیت انچوشکہ سلیمانی گالوار ءِ لاپ ءَ “دْرچک، روچ، پدریچ، ریچگ، پاچِن، ھَنیچّگ، پچگ، سوچگ، تچگ ءُ سریچک” ءِ وڑیں ھزاریں گال اَنت کہ ما سلیمانی گالوار ءِ بلوچ “ش” ءِ توار ءَ کش ایں انچوشکہ”دْرشک، روش، پدریش، ریشگ، پاشِن، ھَنیشّگ، پشگ، سوشگ، تشگ ءُ سریشک” ءُ ھمے رنگ ءَ “نواب، ھساب، کتاب، سُبک، واب، شپ ءُ ھراب” گوں “و” ءَ توارکش بنت انچوشکہ “نواو، ھساو، کتاو، سُوک، واو، شوّ ءُ ھراوّ” گْوش بنت بلے بازیں جاھاں ” ب ءُ چ” ءِ وتی جُتائیں توار ھست اَنت انچوشکہ “بُز، بھائینگ، باج، سبر ءُ لب یا چم، چات ءُ چُکّ” گُڑا شُما چہ ھمے “ب ءُ و” ءُ “چ ءُ ش” ءَ کجام آباں کش اِت ءُ کُجاماں زُور اِت؟ راستی وَ ایش اَنت کہ اے ڈ، ڑ، چ، ش، ب ءُ و” دْراہ راجی زُبان ءِ بُن آب کہ نمیرانیں سید ھاشمی ءَ ٹوک ھلاس کُتگ۔ گُڈسری من ھمے گْوش آں کہ بلوچ راجی زُبان زیردست اَنت ءُ بلوچ راج ءِ زھگاں ماں وانگجاھاں جِند ءِ راجی زُبان وانینگ نہ بنت پمیشکا مئے راجی زُبان بے کساس ڈالچار انت بلے نی ھمے وٹس ایپ ءُ پیسبُک ءِ راست کارمرزی ءَ لھتیں زُبان ءِ جُھدکار پہ راج ءَ بلوچی وانگ ءُ زانگ ءِ جُھد ءَ انت ءُ آیانی جُھد ستا کرز ایت باید تو یک رندے پد ءَ “ڈ ” ڑ ” ءِ سر ءَ وتی لیکھاں بہ چکاس ءُ دو بر “ڈ “ڑ ” ءِ بارو ءَ جوانتریں راہ ءِ گیش ایت بہ کنت-

مُدام وش ءُ ھست بات ئے، بلوچ شالا یکمُشت ءُ یک رھبند ءِ سر ءَ تپاک بات اَنت ءُ بلوچی شالا دیمروئی بہ کنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچی زبان ءِ نمیرانیں آشوبی شائر سلمان ھمل ءِ شئیرانی اولی دپتر “ھون ء بھار ” چاپ ءُ شنگ بیتگ-

کتاب سبا دشتیاری اکیڈمی وشکوشیں پروم ءِ نیمگ ءَ شنگ ءُ چاپ بیتگ، کتاب ءَ بلوچی زبان ءِ نمیرانیں شائر سلمان ھمل ءِ گرنچ داتگیں لچہ براھداریں رنگے ءَ ھوار اَنت –

کتاب بلوچستان ءِ جتا جتائیں جاھاں کتاب جاھاں پہ وانوکاں دز کپ ایت ءُ کتاب ءَ نمیرانیں سلمان ھمل ءَ بلوچستان ءَ بیوکیں زوراکی لَچھی دروشم ءَ گرنچ داتگ اَنت –

ھالانی تہ ءَ گوشگ بیتگ کہ پہ بلوچی زبان ءِ وانوکاں ٹیکی ءِ مستاگے کہ آئی ءَ وتی ند ءِ زور پہ راستی ءَ شَئیرانی دروشم ءَ دیم ءَ آؤرتگ –

کتاب ءِ سرتاک ءَ بلوچستان ءَ ھواریں زوراکیانی ھون ریچی ءِ رُستگیں پُل مان گیجگ بیتگ اَنت –

بلوچستان ءَ جھانی نادراھی کرونا ویروس ءِ گیش بیگ ءَ بازیں جاھاں مھلوک پھریزگ ءِ کڈن کنگ بیتگ اَنت ءُ سپر کنگ ءَ ابید ءِ ویکسن جنگ ءَ بندش جنگ بیتگ –

جانسلامتی ءِ نیمگ ءَ شنگ بیتگیں رپورٹ ءِ رد ءَ بلوچستان ءَ 1039 مردمانی ٹِسٹ کنگ بیتگ اَنت ءُ چریشی ءَ نود ءُ ھشت کساں نادراھی پدر بیتگ اَنت –

جانسلامتی ءِ رد ءَ شال ءَ ھپتاد ءُ نُھ، کیچ ءَ یازدہ، واشک ءَ چار، پنجگور، ژوپ، پشین ءُ ھزدار ءَ یک یک مردماں کرونا نادراھی پدر بیتگ اَنت –

جانسلامتی ءِ رپورٹ ءِ رد ءَ نوکیں نادراھانی ھواری ءَ بلوچستان ءَ نادراھانی کچ بیست ءُ ھپت ھزار ءُ نُھ سد ءُ شست ءُ یک ءَ سر بیتگ اَنت –

رپورٹ ءِ رد ءَ گوستگیں بیست ءَ چار ادارانی تہ ءَ بلوچستان ءَ ھژدہ نادراہ وش بیتگ اَنت ءُ داں انیگ ءَ وش بیتگیں مردمانی کَچ بیست ءُ شش ھزار ءُ ھپت سد ءُ شست ءُ نُھ ءَ سر بیتگ اَنت –

رپورٹ ءِ رد ءَ بلوچستان ءَ اے وھد ءَ نَھ نادراہ ھائی فلو آکسیجن ءِ تہ ءَ دراہ بیگ ءَ اَنت ءُ اُستان ءَ اے وھد ءَ ھستیں نادراھانی کچ ھشت سد ءُ ھپتاد ءُ پنچ ءَ سر بیتگ اَنت –

رپورٹ ءِ رد ءَ بلوچستان ءَ نادراھی ءِ شنگ بیگ ءِ زور نُھ ٹک چِل ءُ سَے ءَ سر بیتگ ءُ داں انیگ ءَ سَے سد ءُ ھبدہ مردم اے نادراھی ءَ مرگ ءِ ارجان بیتگ اَنت –

بلوچستان ءِ دمگ کیچ ءَ پاکستانی پوج ءَ دو نودربر آوار جتگ ءُ بیگواہ کرتگ اَنت -آوار جنگ بیتگیں نودربرانی پجار اکبر ء برکت جھمنند نودز کیچ ءُ شاکر بلوچ ءِ ناماں زانگ بیتگ اَنت –

اکبر پاکستانی پوج ءَ تلار ءِ چیک پوسٹ ءَ ھما وھد ءَ آوار جتگ کہ آ چہ تربت ءَ دیم پہ کراچی ءَ روگ ءَ بیتگ – ھالانی تہ ءَ گوشگ بیتگ کہ اکبر نیول ٹکنیکل کالج ءِ نودربر اِنت –

ھمے وڑ ءَ کیچ ءِ بنجاھی شھر تربت ءَ بلوچستان شھدربرجاہ ءِ لاء ءِ نودربت شاکر بلوچ ھم چیریں ادارانی کارمنداں آوار جتگ ءُ بیگواہ کرتگ –

گوشگ بیتگ کہ شاکر موکلانی وھداں تربت ءَ اتکگ ءُ آ آوار جنگ ءُ بیگواہ کنگ بیتگ –

بلوچستان ءَ زورانسری آوار جنیانی درچ یکشل ءَ برجاہ اَنت گوستگیں بیست ءُ چار ادارانی تہ ءَ اے ششمی مردم اَنت کہ پوج ءَ آوار جتگ اَنت – چریشی ءَ ابید پیسر بلوچستان ءِ دمگ کیچ ءِ ھند چار ورنا سَے روچ ءَ پیسر پکنک ءَ شتگ اَنت آ پوج ءَ دزگیر کنگ ءَ پد بیگواہ کرتگ اَنت –