TBP Balochi

سیکی میتگ ءَ پاکستانی پوج ءِ سر ءَ اُرش کُتگ ءُ دو کارمند کُشتگ اَنت – میجر گْوھرام بلوچ

دی بلوچستان پوسٹ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں پنجگور ءِ دمگ پروم ءَ سیکی میتگ ءَ پاکستانی پوج ءِ سر ءَ اُرش کُتگ، اُرش ءَ پاکستانی پوج ءَ جانی تاوان بوتگ – اُرش پد سلاہ بندیں مردم در آیگ ءُ رؤگ ءَ سوبین بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں چارشمبے ءِ روچ ءَ پروم ءِ دمگ سیکی میتگ ءَ زورگیریں پاکستانی پوج ءِ سر ءَ نوکیں سلاھانی گون ءَ اُرش کتگ ءُ دو کارمند کُشتگ اَنت-

آئی ءَ گوشتگ کہ ایردستیں بلوچستان ءِ آجوئی ءَ تاں زورگیریں پوج ءِ سر ءَ اُرش برجاہ مان انت –

بلوچستان ءِ دمگ بسیمہ ءَ بجلیانی روگ ءُ آیگ ءِ ھلاپ ءَ زھرشانی کنگ بیتگ ءُ سی پیک دگ بند کنگ بیتگ، دگ ءِ بند بیگ ءِ سوب ءَ گاڑیانی لین دراجیں کتار گندگ ءَ اتکگ اَنت –

زھرشانی آل پارٹیز، زمیندار ءُ انجمن تاجراں ھواریں جار ءِ پد ءَ کنگ بیتگ – زھرشانی کنوکانی گوشگ اِنت کہ بسیمہ ءَ بیست ءُ چار اداراں بس شش اداراں بجلی دیگ بیگ ءَ اِنت ءُ اشاں ھم وولٹیج یکدم کم اِنت کہ چریشی ءِ سوب ءَ لوگی کاراں ھوار زمینداراں تاوان بیگ ءَ اِنت –

آیاں گوشت کہ دمگ ءِ انتزامیہ ءَ گند ءُ نند کرتگ کہ اے جیڑہ ءَ ھلاس بہ کنت بلے انتزامیہ ءَ جیڑہ ءِ سر ءَ بے دلگوش اِنت –

دمگ ءِ انتزامیہ ءِ نیمگ ءَ تنی وھدی اے درگت ءَ دگہ گپ دیم ءَ نیتکگ اَنت –

ھمے رنگ ءَ بلوچستان ءِ دمگ کوھلو ءِ ھند نیوکاھان ءَ شھری گوستگیں شپ ءَ بازیں لوڈشیڈنگ ءِ سوب ءَ بیزار بیتگ ءُ دگانی سر ءَ درکپتگ اَنت – مھلوک ءَ گرینڈ اسٹیشن ءِ دیم ءَ نندانک جتگ ءُ نشتگ اَنت انتزامیہ، ڈپٹی کمشنر ءُ ایکسین واپڈا ءِ ھلاپ ءَ اوگام جتگ –

شھریانی گوشگ اِنت کہ گوستگیں بازیں وھداں نیو کاھان ءِ مھلوک سرجم ءَ لیٹ ءُ بجلیاں زبھر اَنت تھاریں کوراسی ءَ نشتگ اَنت ءُ پریشانی ءُ دگہ جیڑھانی آماچی اَنت ءُ چریشی ءَ کِشت ءُ کشاری ءَ ھم تاوان بار بیگ ءَ اِنت –

شھریاں گوشت: کوھلو ءِ انتزامیہ، ایکسن واپڈا ءِ نابودی ھنچش گیش بیتگ اَنت کہ ما شپ ءِ نسپ ءَ زھرشانی کنگ ءَ لاچار اِنت، شھریاں ایکسین واپڈا ءِ درکنگ ءِ لوٹ کرتگ ءُ چریشی ءَ پد زھرشانی کنوک ءُ انتزامیہ ءِ میان ءَ گپ ءُ تران سوبمند بیتگ –

شھریاں گوشت کہ اگاں بیست ءُ چار ادار ءَ بجلی سرجم نہ بیت اَنت گڑا ما پد ءَ دگانی سر ءَ درکپ ایں –

زانگ بہ بیت نیوکلی ءَ ھوار ءَ کوھلو ءِ دمگ تمبو، گرسنی، لاسیذئی ءُ سٹی فیڈر ءَ لوڈشیڈنگانی زنگ جنگ بیگ ءَ اِنت –

آزمانک: وابانی گُلیں ماہ گُل

آزمانکار: لطیف سخی

دی بلوچستان پوسٹ

مُدام من نند آں یک لمب ءُ گْورے، یاں کہ زھیریں دل ءِ امباریں روپانکے ءَ ھیالانی بیپار ءِ مَھری ءَ رھت کناں وتی تُستگیں دِل ءِ بُوت کامی ءَ ھُنَر جیڑ آں دل ءَ تسلی دیاں بلے منی تُنیگیں دِل پہ کیپانی ھینار بوتگیں گلاسانی ایر ریتگیں تُرند آپاں شاگام نہ بیت منی تنیگیں ارواہ وھد ءِ تَلوسوکیں مھرانی چیدَگ ءِ پَھناد گوں وت ھمراہ کَنَگ ءَ سَرجَم نہ بیت داں گڈی سیمسراں سَر بہ باں بلے اندیمیں منی بُست بوتگیں مارِشت لھڑ گِران بنت چو وابانی کسّھاں منی دیم ءَ چو مار ءِ پیم ءَ شیپ گِران بنت منی تنیگیں دمبرتگیں کسّہ سَارت کَنَگ ءِ ھچ پیمیں روانکاں ھوار نہ باں من ھمے بِستار ءَ زانگ بنت گش ئے چو پیلوشتگیں سَر ءِ وڑ ءَ مان جَتگ ءُ کَشے ءَ درھتگیں ساد ءَ مانگیشیتگ آں چار آں وتی بے وسیں زند ءِ ھمے باریگیں روچاں ھساب کن آں دل ءِ چولاں گوں سِراپ کنان ءُ اھد ءِ بستگیں سانکلاں سنِدان ءُ روان بنت۔ ھمے آگھیں وابانی بے مانَھیں چول پَشت کپتگیں بوجیگ ءِ پیم ءَ تیابانی سَر بوگ ءِ مِنزلاں ماں ھار ءُ کھرانی آماچ بنت بلے من زِراں پہ نام ءَ ماہ گل ءِ دابانی ملگُزاریں بچکندگانی دیماءَ مُدام بہ نند آں ءُ آئی شیپگیں پونز ءُ کاٹاریں بالاد ءِ ندارگاں بکناں ،آئی ءِ زانسراں سَر ءَ ایر بکناں دیم ءَ گوں بُرز ءَ آزمان ءِ شینکانی نیمگ ءَ بہ دے آں من جُست ءَ گوں دست گَٹ بہ باں ءُ ماہ گُلیں منی مھری پَسّواں گوں دل ءِ چیریں رازانی ھمراھی ءَ بِد انت ، آئی ءِ مھپرانی شیکَگ منی گوشانی موجیں زِر ءِ تیابیں چول بہ باں چو گوات ءُ ایروپیں دنزانی گُباراں منی چمانی سرا ایر بباں ءُ آ پَسو دیگ ءَ بہ بیت۔

منی جُست مُدام ھمے بہ بیت تئی گوما تئی مھر انچو پہ من چو وھد ءِ پَشت کپتگیں کاروان ءَ بہ بیت تئی کاٹاریں چَم پہ ھیرانگیں داب ءَ منی نگاھانی تہ ءَ چو آس ءَ روک بہ باں من تئی ٹھکانی تواراں گوں دل ءِ دَریگ ءَ پچ کنان ءُ ایر کناں بہ باں منی جُست گوں ترا ھمیش بہ بیت تئی مھر چنچو نھاد ءَ گومن ءَ زورَگ باں تئی پسو امیش بہ بیت تئی جِند یک تلاھیں سُھر ءُ ماڑی یے من ھمے جُستانی وازمندی یے تئی مھپراں اِے دیم ءُ آ دیم ءَ گوانز کنگ ءَ بہ باں داں شَپ روان بہ کن آں۔

واھگیں دلے ھمیش گوں ترا دوچار بہ باں ھم ءَ تئی دزگھار ءِ ھمراھی ءَ ترا چو وتسریں ماتے ءَ چو شَک ءِ دابے ءَ گِس ءَ چو مُلوک ءِ ودار ءِ سیاھگ ءَ نندگ ءَ پہ مجبور کَنت تو تَلوس ءِ پہ منی ھمراھی ءَ بلے یہ زند چو گُواڑگاں سوچان بیت ءُ گْوزان کنت روان کنت چو بے وپائیں مردمے، من لوٹ آں کہ گوں بہ باں چہ تئی میتگ ءِ مستیں جَنک ءِ ھَلک ءَ بہ ڈوبار اِیت من ءَ گوں بدیں نگاہ ءُ داباں تو بہ بہ ئے گوں منی ھمے موالیں آدتاں کدی بہ بیت ھمے وڈیں نوبتے منی دل ءِ نپس امیش انت زندگ اِنت تو ودار ءِ ساھتاں امیت بستگ نشتگ ئے من ءَ گِلَگ مہ کن من چہ دھر ءِ مَردماں سستگاں تئی چہ دوری ءَ ۔

ھمے جَم اِتگیں ھیالانی منگیراں من بہ ننداں تئی رھسراں داں تو شاہ دَربر ءِ پراھگانیں درچکانی بُن ءَ سراپ کناں بہ بہ ئے ءُ یک کَشے گوں زیبائی ءِ ندارگ ءَ نگاہ من ءَ سَک بہ باں تو منی ھیالانی وازمندگیں چارگ ءَ پہ منی وڈیں رِیٹاھیں مَردمے پہ واب زندگ دارگ ءِ بھانہ بہ کن ئے من تئی اِشک ءَ چو شئے ءَ بہ باں ھانُل ماں وابانی تہ ءَ روان کنت من گڈی سیمسراں روان کن آں۔

منی مُدام واھشت ھمیش بوتگ من چہ تئی گوستگیں جاھاں مہ نند آں آئی آیگ ءِ ودار ءَ مکن آں۔ بلے دل چو سوزمانی بیت وھدے تئی آیگ ءِ وھد بیت دل ءِ ساھتاں وھد چو وتسریں رنگ ءُ داباں مَٹ بوان کَنت من چہ وتی نند جاھاں دَرکَپاں دیم پہ ماہ گل ءِ دیدار ءَ داں چم سَر کپاں تئی ھُماریں چَم ءُ ریشمیں ءُ ڈَکّمیں مود، دزگھارانی سَروگی گش ئے منی کانچیں دل ءِ پرشتگیں شیشگاں نزاراں کَنت منی دل چو نوک بُست بوتگیں تِبلے ءِ داباں بُست کنت من آگھی ءِ سیمسراں رس آں۔

ھمروچیگیں داباں کسّہ روان بوت من ھمے بے تاھیریں دِل تئی وداریگ اَت ءُ ھچ منی ءُ تئی نیام ءَ مھر ءِ گَپ بنگیج نہ بوت بس من وابانی دگنیا گواز کُتگ ءُ دل تسلہ داتگ تو سَرپد ھم نہ بوتگ ئے چے ءَ کہ منی ءُ تئی چاگرد ءِ انچیں دود اَنت من دل ءَ چہ گَپ دپ ءَ سَر کُت نہ کُت تئی ھیال اے دابیں نہ انت من چو مُرید ءَ مُدام ھمے واھگانی پد ءَ زندگ ات آں۔ تئئ ماھلکائیں داب ءُ ناز سینگار اِتگ انت ءُ کبگیں مَلّگ ندارہ کُت انت داں شاہ دَربرجاہ ءِ چھٹیاں من نا اُمیتیں دِلے واتر بوت آں مُدام کسہ ھمے داباں روان بوت من جیڑگانی توکَل یَل نہ کُت تئی ودار ءِ ساد ءَ وت ءَ را پیڑاتگ ءُ نشتگ انت۔ بلے تو کمُکیں وتی نگاہ شانک ھم ندات انت کہ تئی واست ءَ دگہ چشیں مَردمے است کہ تئی ترانگانی آماچ انت مُدام تئی بانوری ءِ واباں من آگھی ءَ گِند آں ھچ نزان آں بلے من تئی بانوری ءِ واب وتی ھَر داب ءُ زانشتی پِڑ ءِ تاکانی تہءَ ھم دیستگ من تئی دِل ءِ توک ءَ جاہ لوٹ اتگ بلے چاگردی بَند ءُ بوج انچُش انت من وتی گپاں گُشت کُت ھم نہ کن آں منی نِِزوری بَس ھمیش انت ترا چہ دل ءِ چیریں رازاں پاشک کُت ھم نہ کن آں بس تئی گِندگ ءَ دلءَ تسلہ دے اَنت روان بنت۔

مَن نزاناں تئی چے واھگ ھست انت امروز ءَ سِرجَم بنت یاں نہ بنت تئی واب دیستگیں مانہ بنت نہ بنت بلے من وتی واب دیستگ انت منی جیڑ اتگیں کسہ مُدام تئی زلپانی تاباں پیچ داتگ انت گوں دل ءِ ھونیں ند ءِ نبشتانکاں گوں تئی ھیالانی منگیراں درَھتگ انت ،من سَرپد نہ باں کہ تئی مھر پہ من ءَ ھست انت یاں کہ نیست ان پَرچے ءَ کہ تو وھد ءِ پْیڈ بَستگیں چاگرد ءِ دودانی زمزیلاں بَستگ ئے ءُ من ھمے سیمسراں سَر گواز نہ باں بلے منی ابدمانیں واب گوں تئی ھیالاں گوزان بنت تو چو وابانی گلیں ماہ پری ءَ منی اھد ءِ کُل ءَ سینگارتگ ءُ نشتگ ئے بس من جیڑگانی دگنیا ءَ سَیل کن آں تئی میتگ ءِ ھَمک مَردم درَچک ءُ دار ءُ رُوپانکاں پہ مُرادیگ باں کسہ منی ءُ تئی نیام ءِ انگت ءَ چیر ءُ اندر انت بس من ھیالاں گوں زندگ آں ءُ تو گوں وتی دزگھاراں مان نہ گیش اتگ ئے ھمئے تھراں منی کسہ سَرجم نہ انت دیم ءَ انگت روان کنت تئی ودار بیت مدام۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ کلب کلات مند ءَ ون اسٹار گومازی دیم ءَ پیلانٹی ءَ باج برتگ ٹورنمنٹ ءِ کپ وتی نام ءَ کُتگ –

بنام ءِ شھید چئیرمین دوست محمد ، شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی فائینل گوازی کنگ بوتگ –

مروچگیں گوازی ءَ بلوچ کلب کلات مند ءُ ون اسٹار گومازی ءِ میان ءَ بوتگ ، دؤئیں ٹیمانی لیبیاں گوں جوانی ءَ لیب داشتگ ءُ دؤئیں ٹیم مکابلہ بوتگ انت – پیلانٹی مکابلہ ءَ بلوچ کلب مند ءَ باج برتگ- ون اسٹار گومازی ٹیم پروش داتگ ءُ ٹورنمنٹ کپ وتی نام ءَ کُتگ –

ٹورنمنٹ ءِ سرکماش اختر عمر ءَ رنر ءُ ونر ٹیمانی لیبی دلبڈی داتگ ءُ اتکگیں مھمان ءُ ٹورنمنٹ ءَ بھر زورکیں لیبیانی منت گپتگ –

گچینی مھمان کماش عبدالکریم، اسد تگرانی، ھیڈ ماسٹر گنی، ماسٹر منیر، ماسٹر صمد، ماسٹر عظیم آزگ ءُ چہ تربت ءَ اتکگیں مھماناں ٹورنمنٹ ستاشانی کرتگ وِنر ٹیم ءِ کیپٹن پرویز ءَ چہ گچینی مھمان ھیڈ ماسٹر گنی ءِ دست ءَ ونر کپ دست گپتگ، گچینی مھماناں دومی لیبیانی داد بھر کرتگ انت –

زانگ بہ بیت گومازی ٹورنمنٹ سَے شھیدانی یات ءَ بلوچی زبان ءِ شاعر اختر عمر ءُ ھماد بلوچ ءِ چیر دستی ءَ برجاہ دارگ بوتگ – اے ٹورنمنٹ ءَ آل ڈسٹرکٹ ءِ بیست ءُ شش ٹیماں بھر زرتگ ءُ وتی گوازی پیش داشتگ اَنت – ٹورنمنٹ ءِ گڈی گوازی مروچی برجاہ دارگ بوتگ کہ وِنر ٹیم بلوچ کلب کلات مند ءَ باج بُرتگ ـ

ونر ٹیم ءَ اولی راؤنڈ ءَ سینگار ملانٹ ءِ دیم ءَ پیلانٹی شوٹ سَے گول ءَ باج بُرتگ، پد ءَ دومی راؤنڈ ءَ ینگ اسٹار تمپ ٹیم ءِ دیم ءَ گوں جوانی لیب کُتگ یک گولے ءَ باج برتگ ءُ کواٹر فائینل ءَ وپا کُنشکلات ءِ ٹیم ءِ دیم ءَ پیلانٹی شوٹ نُھ گول ءَ باج برتگ سیمی فائینل ءَ بُلبُل ھوزئی مند ءِ ٹیم ءِ دیم ءَ پیلانٹی شوٹ پنچ گول ءَ باج برتگ ءُ مروچی رنر ٹیم ون اسٹار گومازی ءِ دیم ءَ پیلانٹی شوٹ ءَ باج برتگ ونر جوڑ بوتگ ءُ ٹورنمنٹ کپ وتی نام ءَ کُتگ –

سربوتگیں ھالانی رِد ءَ بلوچستان ءِ دمگ تفتان ءُ لورلائی ءَ دگ ءِ وئیلاں پنچ مردم بیران ءُ چار ٹپی ، ھمے وڑ بلوچستان ءِ دمگ نوشکی ءَ تیر گواری وئیلے ءَ یک مردمے ٹپی بوتگ –

گیشیں ھالانی رِد ءَ شال تفتان ءِ شھدگ ءِ سر ءَ دگ ءِ وئیل ءَ دو زھگ ءُ زالبولاں ھوار چار بیران سَے ٹپی بوتگ اَنت –

اھوالکار ءِ رِد ءَ وئیل گردگاپ ءَ دیم ءَ اتکگ کہ مسافر کشیں بس ءَ گوں گاڑی ءَ ڈیک وارتگ چریشی ءَ دو زالبولاں ھوار چار زھگ بیران بوتگ اَنت وھدیکے سَے ٹپی بوتگ اَنت –

ٹپی بوتگینانی تہ ءَ ھم کسانیں زھگ ءِ ھوار سَے ٹپی بوتگیں مردمانی جاور نگیگ انت –

ھمے وڑ بلوچستان ءِ دمگ لورلائی ءَ شال ءِ شھدگ ءِ سر ءَ دگ ءِ وئیل ءَ کسانیں ورنایے بیران ءُ زھگے ٹپی بوتگ –

وئیل شال ءَ سرکی جنگل ءَ دیم ءَ اتکگ کہ پرپٹ ءَ گوں گاڑی ڈیک وارتگ، ڈیک ورگے سوب ءَ پرپٹ سوار کسان سالیں چاردہ سالی ئیں ورنا عبدالباری ء عبداللہ خان ھما دمان ءَ بیران بوتگ وھدیکے آئی ءِ ھمراہ دہ سالی زھگ زین الدین ء میرا جان سک باز ٹپی بوتگ –

ٹپی ءُ بیران بوتگیں زھگ ھما دمان ءَ نادراھجاہ ءَ سرکنگ بوتگ ، اژدری چارٹپاس ءَ پد ورنایے جون کھول ءِ ھوالگ ءَ کنگ بوتگ ٹپی بوتگیں گونڈو پہ گیشیں جاندراھی ھاتر ءَ شال ءَ دیم دیگ بوتگ –

زانگ بہ بیت بلوچستان ءِ جتا جتائیں دمگ ءَ دگ ءِ وئیلانی سوب ءَ بازیں مردمے بیران ٹپی بیت اِنت وھدیکہ گیشتر دمگاں نادراھجاہ ءُ سھولت ءِ کمی ءِ سوب ءَ وئیلاں اماچ بوتگیں ٹپی مردم درداں نہ سگ انت ءُ وتی زند ءَ چہ زبھر بنت –

نوشکی ءَ ناشناسیں مردمانی تیرگواری ءَ نائب ناظم ٹپی بوتگ –

ھالکارانی رِد ءَ گوستگیں روچ ءَ ناشناسیں مردماں گوستگیں ڈسٹرکٹ نائب ناظم عبدالستار ساسولی ءِ سر ءَ تیرگواری کتگ چریشی ءَ آ ٹپی بوتگ –

ھمے گوشگ بوگ انت کہ ناشناسیں مردماں ھما وھد ءَ تیر باران کُتگ کہ آ اسٹیشن ءَ نندوک بوتگ ڈاکٹرانی رِد ءَ تیر آئی ءِ پاد ءَ لگ اتگ-

گوستگیں چندے روچانی تہ ءَ بلوچستان ءَ بلوچ نودربراں ھوار لس مردمانی بیگواھیانی تہ ءَ گیشی گندگ بیگ ءَ اِنت –

سر بیتگیں ھالانی رد ءَ بلوچستان ءِ دمگ ھاران ءَ پاکستانی پوج ءَ یک مردمے دزگیر کنگ ءَ پد بیگواہ کرتگ –

ھاران ءَ آوار جنگ بیتگیں مردم گوستگیں شپ ءِ ساھت سَے ءِ نزیک ءَ پاکستانی پوج ءَ ھاران ءِ شھر ءَ کبدانی میتگ ءَ ٹینکی والا قبرستان ءَ بیڑ برتگ ءُ اود ءَ عمران کبدانی ءِ کریم بکش کبدانی آوار جتگ ءُ برتگ –

ھاران ءَ چہ نوزدہ مارچ ءَ پوجی آپریشن برجاہ اَنت گوشگ بیگ ءَ اِنت کہ پوج ءَ آپریشن ءِ میان ءَ بازیں مردمے آوار جتگ ءُ برتگ کہ آیانی تہ ءَ یکے ءِ نام قدرت اللہ ء مھمد وارث ءِ نام ءَ زانگ بیتگ –

ھمے رنگ ءَ تربت یونیورسٹی ءِ نودربر آوار جنگ ءُ بیگواہ کنگ بیتگ –

آوار جنگ بیتگیں نودربر ءِ پجار نیک بکت ءِ نام ءَ زانگ بیتگ ءُ گوشگ بیگ ءَ اِنت کہ نیک بکت نوزدہ مارچ ءَ کولواھی بازار ءَ پاکستانی پوج ءَ بیڑی ءِ وھد ءَ آوار جتگ ءُ برتگ –

آوار جنگ بیتگیں ورناہ کولواہ کینچی ءِ جھمنند اِنت وانگ ءِ ھاتر ءَ تربت ءَ اتکگ ءُ وتی نزیکیں وارسانی گور ءَ بیتگ ءُ آ نوزدہ مارچ ءَ پاکستانی پوج ءَ آوار جتگ ءُ بیگواہ کرتگ –

ھمے وڑ ءَ مشکے ءَ پنچ مردمانی آوار جنگ ءِ ھال بیتگ ءُ ھالانی تہ ءَ گوشگ بیتگ کہ مشکے ءَ بازیں روچاں لشکر ءِ لشکر کشی برجاہ اَنت –

چہ مشکے ءَ پاکستانی پوج ءِ دست ءَ آوار جنگ بیتگیں مردمانی پجار داد رھیم ء مراد جان، بدل ء کریم داد، رفیق ء عظیم خان، صدام ء جان مھمد، نیک سال ء شاہ مراد ءِ ناماں زانگ بیتگ اَنت –

ھالانی تہ ءَ گوشگ بیتگ کہ لشکر کشی ءِ وھد ءَ پوج ءَ زالبول ءُ چُک ھم جتگ اَنت ءُ لوگانی مڈی ھم برتگ اَنت –

ھمے رنگ ءَ کیچ دشت ءَ مزن بند ءَ پاکستانی پوج ءَ یل نوکیں چوکی ءِ جوڑ کرتگ ءُ دمگ ءِ راہ ءُ در بستگ اَنت –

زانگ بہ بیت بلوچستان ءَ پوج ءِ نیمگ ءَ مردمانی آوار جنگ ءُ بیگواہ کنگ یکشل ءَ برجاہ اَنت ءُ گوستگیں روچ ءَ انسانی ھکانی میان اُستمانی گل ہیومن رائٹس واچ (ایچ ار ڈبلیو) ایشاء ءِ ڈائریکٹر پیٹریسیا گوس مین ءَ وتی شنگ کرتگیں بیان ءِ تہ ءَ گوشتگ کہ سروزیر پاکستان ءَ بیگواھیں مردمانی گون ءَ دوچار کپگ ءُ زورانسری آوارجنیانی درگت ءَ یک جوانیں گامگیجے، بلے نی سروزیر عمران ھان ءَ زبان ءِ سر ءَ بہ اوشتیت ءُ زورانسری بیگواہ کرتگیں مردماں یلہ بہ کنائین اِیت –

دوشمبے ءَ ایچ ار ڈبلیو ءَ وتی بیان ءِ تہ ءَ پاکستان ءَ را ایوک ءَ گپتگیں مردمانی بارہ ناں بلکیں آؤکیں وھداں ھم بیوکیں زورانسری بیگواھیانی دارگ ءِ کڈنی ءُ زورانسری آوار جنوکانی بگیری ءَ پَٹ ءُ پول ءُ آیانی سر ءَ سگوکیں برانزی بہ کنت –

ایچ ار ڈبلیو ءَ وتی بیان ءِ تہ ءَ گوشتگ کہ انسانی ھکانی میان اُستمانی رھبند اے وڑیں کاراں ترندی ءَ ایر جنت ءُ ھرکجا آ ادارہ ءَ اے ھک نیست کہ کسے ءَ بے جرم ءَ زندانی بہ کنت ءُ آئی ءِ کھولاں ھال مہ دنت ءُ چریشی ءِ سوب ءَ آیانی کھول ھم ناوشیں جاورانی دیمپانی ءَ کپ اَنت –

نبشتانک: سیمسر، سرکار ءُ سرمچار

نبشتہ کار: شاؔری بلوچ

دی بلوچستان پوسٹ

آئی ءَ داں مرچیگیں روچ ءَ گوں سَے شپ ءُ چار روچ گْوستگ اَت کہ، پاکستان ءِ سیمسر ءِ گیٹ ءِ دپ ءِ اوشتاتگیں گاڑیانی کتار ءِ تہ ءَ پسّ اِتگ اَت، نہ آئی ءَ نانے گون اَت پہ ورگ ءَ نہ آئی ءَ آپے گون اَت پہ نوشگ ءَ آئی ءَ چونائی ءَ یک سرجمیں ھپتگے پورو اَت کہ چہ لوگ ءَ در آتکگ اَت پہ ڈیزل ءِ بار ءِ جنگ ءَ لوگ ءِ در آیگ ءِ وھد ءَ آئی ءَ پہ وت ءَ توشگ ءُ کلدار یک ھپتگے ءِ سپر ء کساس ءَ زُرتگ اَت، کہ نوں اِے درھیں زَر اوں ھلاس بوتگ اِت اَنت، پیشیم ءِ روچ ءِ تبد ءُ لواریں گرمی ءَ ءُ بے آپ ءُ نانی ءَ آئی ءِ جان ءِ ھاٹیگ پروش داتگ اَت، وھدے آئی ءِ وس ءِ اوست ءِ ساد سِست گڑا آ چہ وتی گاڑی ءَ ایر کپگ لوٹ اِت بلے آئی ءَ ھچ ھالیگیں جاہ نہ دیست کہ چہ گاڈی ءَ ایر بہ کپ ایت، آ چہ گاڈی ءِ دَر ءَ در آتک ءُ زمین ءِ سر ءَ جاہ نہ بوگ ءِ سوب ءَ آ گاڈی ءِ چَت ءَ شُت ءُ اوشتات، آئی ءَ وتی چمّ چپ ءُ چاگرد ءَ شانک دات اَنت آئی ءِ چمّاں بید ءِ مُجیں دنز ءُ گاڑی ءَ دگہ ھچ نہ دیست، ھمک نیمگ ءَ گاڑیانی کتار ءُ ھارنانی توار اَت، لھتے مُدت ءَ پَد دنز ءُ گْوات کمتر بوت اَنت آئی ءَ دیست آئی ءِ پُشت ءِ گاڈی والا وتی پُشت ءِ گاڑی والا ءَ بدیں زاہ دیگ ءَ اِنت کہ تو منی گاڑی ءَ ڈکّرے جتگ اَت-

آئی ءَ دیم ءَ چار اِت کہ گیشتریں گاڑی پوجی ءَ گْوازینتگ اَنت ءُ بس چہ دو گاڑی ءَ پُشت اَت کہ چہ پاکستان ءِ سیمسر ءَ بہ گْواز اِیت بلے دیم ءَ پوجی گاڑیانی کارڈ ءُ مردمانی پجّار کارڈ ءِ یک پہ یکّ ءَ جُست ءَ اَت، آ وتی دل ءَ دلجم اَت کہ پوجی من ءَ چہ سیمسر ءَ گْوازین اِیت ءُ آ وتی دل ءَ وت ءَ گوشگ ءَ ات ”سوالی تئی بام ءَ جورکاں داتگ“ ءُ آ گل ءَ کہ شپیگیں شپ ءَ آ وتی لوگ ءَ سر بیت، پوجی گاڑیاں گْوازینان اَت اَنت کہ یک دمُوکہ جتگیں مَردمے آئی ءِ کرّ ءَ آتک، گْوشت ئِے ”اگاں ترا پنچ ھزار گون من ترا چہ سیمسر ءَ گْوازیناں“ آ گوں مَرد ءِ اِے ھبر ءَ بھمان اِت ءُ گوشت ئِے، ”من زر چے ءَ بدیاں؟ سرکار ءَ سیمسر مپتکہ پچ کتگ زر پرچا؟“-

”اگاں ترا گْوزگ ءُ روگی اِنت گڑا پنچ ھزار کَشّ اگاں نہ گڑا ھمد ءَ بہ وپس“ ”من ءَ پنچ ھزار گون نیست“ ”ھیر گڑا سے ھزار بہ دئے“ ”منی واجہ من ءَ یک کلدارے گون نیست من ءَ ھرچ زرے گون بوتگ دْراہ راہ ءَ ھلاس بوتگ اَت نی من ءَ روگ ءَ بِلّ اِت“ ”ھرامی اگاں ترا زر گون نیست گڑا وتی گاڑی ءَ سیڈ کن زَر بیار رند ءَ بہ گْوز“ دموکھی مرد آئی ءَ زاہ دیان بوت ءُ شُت پہ دگہ گاڑی ءِ کرّ ءَ زرّ ءِ گرگ ءَ ءُ آئی ءَ وتی گاڑی ءَ بُرت راہ ءِ کش ءَ اُوشتارین ایت۔

اے روچ شُت ءُ ھلاس بوت شپ ءِ تھاری ءَ مان پوش اِت دگہ یک گاڑی والایے ھم آئی ءِ کش ءَ اوشتارینگ بوت کہ آئی ءَ اوں زر گون نہ اَت، ”ترا اوں اِے دموکہ والا ء روگ ءَ نئیشت“ ”ھو کماش من ءَ ھم“ ”دیگا راھے نیست بریں من تو کیمپ ءَ پوجی ءِ اپسر ءَ گوں گپ جنیں کہ مارا چہ سیمسر ءَ گْوزگ ءَ نیل اَنت“ ”کماش تو اوں کمال کن ئے اے دموکہ والا اے اپسرانی دلّار اِنت“ ” ھو ھاں اے دلّاراں گڑا سرمچار چے ءَ نہ جن اَنت“ ”کماش تو زاناں سرپد نہ ئے اِے دموکہ والا سرمچارانی کمانڈرے ءِ برات اِنت ایشی ءَ کَے جنت کنت؟“آ گاڑی ءِ تہ ءَ نِشت ءُ پہ بے دسرسی ءَ نورھان بزنجو ءِ سوت ءَ گوشداران بوت ”لوٹ اِت کہ وت ءَ را وت بہ کُوشاں چاھے من پہ وت درگیتک نہ کُت“

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ کلب مند ءَ بُلبُل ھوزئی مند ءِ دیم ءَ پنچ گول ءَ باج برتگ گوازی وتی نام ءَ کرتگ ءُ فائنل ءَ سر بوتگ –

بنام ءِ شھید چئیرمین دوست محمد شھید تاھر، شھید محبوب ءِ یات ءَ برجم داشتگیں ٹورنمنٹ گومازی اسکول پٹبال پٹ ءَ مروچی سیمی فائینل ءِ دومی گوازی کنگ بوتگ –

مروچگیں گوازی بلوچ کلب مند ءُ بُلبُل ھوزئی مند ءِ میان ءَ بوتگ ، دؤئیں ٹیمانی لیبیاں گوں جوانی ءَ لیب داشتگ ءُ دؤئیں ٹیم مکابلہ بوتگ انت – پیلانٹی مکابلہ ءَ بُلبُل ھوزئی مند ءَ سئے گول داتگ، وھدیکے بلوچ کلب مند ءَ پنچ گول داتگ ءُ باج برتگ- بُلبل ھوزئی ٹیم پروش داتگ ءُ وت ءَ فائینل ءَ سرکتگ –

ٹورنمنٹ ءَ اتکگیں مھمان ءُ ٹورنمنٹ سرکماش اختر عمر دوئیں ٹیمانی لیبی دلبڈی داتگ ءُ آھانی ستاشانی کرتگ انت –

فائینل گوازی گومازی ءَ ون اسٹار گومازی ءُ بلوچ کلب مند ءِ میان ءَ اسکول گراؤنڈ ءِ پٹ ءَ بیت انت کجام ٹیم وِنر بیت ءُ کجام رنر –

انسانی ھکانی میان اُستمانی گل ہیومن رائٹس واچ (ایچ ار ڈبلیو) ءَ دو شمبے ءِ روچ ءَ شنگ کرتگیں وتی یک بیانے ءِ تہ ءَ پاکستانی سر وزیر عمران خان ءُ چہ پاکستانی واکداراں زورانسری آوار جنگ بیتگیں مردمانی سرجمی ءَ یلہ کنگ ءُ زورانسری بیگواھی ءِ ھلاس کنگ ءِ لوٹ کرتگ –

ایچ ار دبلیق ایشیاء ءِ ڈائریکٹر پیٹریسیا گوس مین ءَ وتی یک شنگ کرتگیں بیانے ءَ گُشتگ کہ سروزیر پاکستان ءَ بیگواھیں مردمانی کھولانی گون ءَ دوچار کپگ ءَ زورانسری بیگواھی ءِ جیڑہ ءِ بارہ ءَ جوانیں گامگیجے، بلے نِی سروزیر عمران خان ءَ لوٹ ایت کہ آ وتی زبان ءِ سر ءَ بہ اوشتیت ءُ بیگواھیں مردمانی یل کنگ ءَ سرجمی بہ کنت-

آئی ءَ گوشت کہ قانون جوڑ کنوکیں ادارہ ءَ پاکستانی واکدار بازیں وھدے ءَ شھریانی زورانسری بیگواھی ءِ ھلاس کنگ ءَ سیاسی تکاں بے سوب بیتگ اَنت -سروزیر عمران خان ءِ زبان لاچاریں کھولانی اُمیت ءَ کرناں ھلاس کنت بلے داں انگت ءَ باز کنگ ءِ زرور اِت اِنت –

سروزیر پاکستان عمران خان گوستگیں روچ ءَ چہ بلوچستان ءَ بیگواہ بیتگیں مردمانی کھولانی گون ءَ دوچار کپتگ، دوچاری ءَ عمران خان ءَ ابید ارزی گُرزی ءَ آوار جنی جرمی گوشتگ اَنت ءُ بیگواھیں مردمانی یلہ کنگ سدکی کرتگ – ھمے درچ ءَ بیگواھیں مردمانی کھولانی گوشگ اِنت کہ سروزیر ءَ بس مارا سدکی داتگ ءُ زبان ءَ ابید دگہ ھچ نہ داتگ –

گوستگیں ماہ فروری ءَ چہ بلوچستان ءَ سیزدہ بیگواھیں مردمانی کھولاں پانزدہ روچ ءَ پاکستان ءِ بنجاھی شھر اسلام آباد ءَ نندانک جتگ ءُ نشتگ اَنت -زھرشانی کنوکاں سروزیر پاکستان ءَ دوچار کپگ، زورانسری آوارجنیانی ھلاپ ءَ کانون سازیاں ھوار چہ بلوچستان ءَ بیگواھیں مردمانی یل کنگ ءِ سدکی ءِ لوٹ کرتگ –

چریشاں پد پاکستان ءِ وزیر برائے انسانی ھقوق شیرین مزاری ءَ نندانک ءَ نشتگیں زالبولانی گون ءَ گند ءُ نند کرتگ ءُ مارچ ءَ سروزیر پاکستان کھولانی گون ءَ گند ءُ نند ءِ سدکی داتگ -چریشی ءَ پد بیگواھیں مردمانی کھولاں اسلام آباد ءَ زھرشانی نندانک ھلاس کرتگ –

دوشمبے ءَ ایچ آر ڈبلیو ءَ وتی شنگ کرتگین درشان ءِ تہ ءَ پاکستان ءَ را کڈنی کرتگ کہ آ ایوک ءَ انی گپتگیں مردمانی بارہ ءَ اشی ءَ بہ کنت بلکیں آؤکیں وھداں زورانسری آوارجنی ءِ دارگ ءُ بیگواہ کنوکانی ھلاپ ءَ پَٹ ءُ پول ءُ سُبکیں کاروائی بہ کنت –

ایچ ار ڈبلیو ءَ وتی شنگ کرتگیں درشان ءَ گوشتگ کہ انسانی ھکانی میان اُستمانی رھبند اے وڑیں کاراں ترندی ءَ بگیر داریت کجا ھم کجام ادارہ کَسے ءَ بے جرم ءَ قید ءُ بند کرتگ نہ کنت ءُ ھمے درچ ءَ آئی ءِ کھول ءَ ھچ ھال مہ دے ءُ آئی ءِ کھول ءَ ھروھد ءَ درد ءُ رنجی وتی لپیٹ ءَ زیر اَنت –

سربوتگیں ھالانی رِد ءَ بلوچستان ءِ دمگ تربت، پنجگور، خاران، مشکے ءَ پاکستانی پوج ءِ سرا اُرش کنگ بوتگ، دومی نیمگ ءَ سند خیبر پور ءَ ھم پاکستانی پوج ءِ سرا اُرش کنگ بوتگ – اُرشانی آسر ءَ پاکستانی پوج ءَ جانی ءُ مالی تاوان رستگ –

دی بلوچستان پوسٹ

پاکستانی پوج ءِ سرا بوتگیں اُرشانی زمہ واری آجوئی لوٹوکیں سلاہ بندیں گلاں منّ اِتگ انت –

کیچ ءِ دمگ تربت ءَ پاکستانی پوج ءِ سرا بوتگیں اُرش ءِ زمہ واری بی ایل اے ءَ منّ اِتگ –

جارکش جئیند بلوچ ءَگوشتگ کہ مئے سرمچاراں گوَستگیں روچ ءَ کیچ ءِ بنجاھی شھر تربت ءِ دمگ آپسر پُھل ءِ سرا برجاھیں زورگیریں پاکستانی پوج ءِ پانگس ءِ سرا دستی بمب اُرش ءِ کتگ –

آئی ءَ گوَشتگ کہ اُرش ءِ آسرءَ پاکستانی پوج ءِ یک کارمندے مرتگ ءُ بازین ئے زدگ بوتگ-

مشکے ءُ بالگتر ءَ پاکستانی پوج ءِ بنجل ءِ سرا بوتگیں اُرشانی ءِ زمّہ واری بی ایل ایف ءَ منّ اِتگ –

بلوچستان لبریشن فرنٹ ءِ جارکش میجر گھرام بلوچ ءَ گوشتگ کہ مئے سرمچاراں دو شمبے ءِ شپ ءِ ادار نُہ ءَ مشکے ءِ دمگ گجر ءَ پاکستانی پوج ءِ بنجل ءِ سرا راکٹ ءُ دگہ مزنیں سلاھانی گوما اُرش کتگ –

آئی گوشتگ کہ گجر کالج ءَ برجاھیں آرمی ءِ بنجل ءِ دو بنجاھی سنگر اُرش ءَ چہ تباہ بوتگ اَنت وھدیکہ بنجل ءِ توک ءَ ھم راکٹ آس داتگ، اے اُرش ءَ زورگیریں پاکستانی پوج ءَ جانی ءُ مالی تاوان داتگ –

جارکش میجر گھرام بلوچ ءَ گوشتگ کہ مئے سرمچاراں گوَستگیں شپ ءِ ادار دہ ءَ بالگتر ءِ دمگ سری گڈگی ءِ نادراجاہ ءَ برجاھیں زورگیریں پاکستانی پوج ءِ بنجل ءِ سرا راکٹ ءُ مزنیں سلاھانی گوما ھم اُرش ءِ کُتگ – اے اُرش ھما وھد ءَ کتگ کہ پوجی کارمند بیست ءُ سئے مارچ یومِ پاکستان مراگش ءِ چن ءُ لانچ ءَ دست گٹ بوتگ اَنت –

آئی ءَ گوشتگ کہ اے اُرش ءِ آسرءَ زورگیریں پاکستانی پوج ءَ جانی ءُ مالی تاوان رستگ –

ھاران ءَ پولیس تھانہ ءُ ایپ سی پانگس ءِ سر ءَ بوتگیں اُرشانی زمہ واری یو بی اے ءَ منّ اِتگ –

جارکش مزار بلوچ ءَ گوَشتگ کہ ھاران شھر ءَ پولیس اسٹیشن ءَ بیست ءُ سئے مارچ ءِ روچ ءِ درگت ءَ چِن ءُ لانچ کنوکیں پولیس کارمندانی سر ءَ دستی بمب اُرش ءِ کتگ ءُ دومی اُرش خاران ءِ دمگ تاگزی ءَ فرنٹئیر کور ءِ پانگس ءِ سر ءَ کتگ –

آئی ءَ گوَشتگ مئے سرمچاراں زورگیریں پوج ءِ سر ءَ راکٹ لانچر ءُ دگہ ٹوھیں سِلاھانی گوما اُرش کتگ کہ اِشی ءَ چہ زوراکیں لشکر ءَ جانی ءُ مالی تاوان رستگ –

جارکش ءَ گوَشتگ کہ پولیس ءُ لیویز ءِ کارمند زورگیریں پوج ءِ گوم ءَ ھم کوپگ انت – بلوچ مھلوک ءِ گِسانی پٹ ءُ پول کنگ، بلوچ ورناھانی زورانسری آوار جنگ ءُ لُٹ ءُ پُل ءِ وڑیں کُتکاریانی سر ءَ باز رند ءَ مکن کنگ ءَ ابید ھم آھاں وتی کار یلہ نہ داتگ – دیمتر ءَ اِشانی بگیری ءَ ٹوھیں گامگیج زورگ بیت –

ھمے وڑ پنجگور ءَ پاکستانی پوج ءِ سرا بوتگیں اُرش ءِ زمّہ واری بی آر اے ءَ منّ اِتگ –

بلوچ ریپبلکن آرمی ءِ جارکش بیبگر بلوچ ءَ گوشتگ کہ مروچی سُھب ءَ کیلکور، گڈگی ءِ دمگ سیدآباد ءَ بیست ءُ سئے مارچ ءِ درگت ءَ زورگریں پاکستانی پوج ءِ نیمگ ءَ نادراھجاہ ءَ برجاھیں مراگش ءِ وھد ءَ مئے سرمچاراں نزیکیں چوکی ءِ سر ءَ دور جنگیں ءُ وتکاریں سلاھانی گوما ءَ اُرش کُتگ – اُرش ءَ پاکستانی پوج ءَ جانی ءُ مالی تاوان رستگ –

دومی نیمگ ءَ سند ءِ دمگ خیبر پور ء پاکستانی رینجرز ءِ سرا بوتگیں اُرش ءِ زمہ واری سند ءِ آجوئی لوٹوکیں گل ایس آر اے ءَ منّ اِتگ –

سندھودیش ریوولیشنری آرمی ءِ جارکش سوڈھو سندھی ءَ وتی شنگ کرتگیں درشان ءِ تھا گوشتگ کہ مئے سرمچاراں مروچی ھیر پور میرس ءَ پاکستانی رینجرز ءِ گاڑی ءِ سرا دستی بمب اُرش ءِ کتگ – اُرش ءِ آسر ءَ رینجرز ءِ لانس نائیکے ءَ ھوار پنچ کارمند زدگ بوتگ –

جارکش ءَ گوشتگ کہ سندی راج وتی سرڈگار ءِ سرا پاکستان ءِ ایردستی ءُ پنجاب ءِ گلامی ءَ نہ منّ اِیت ءُ ایس آر اے آجوئی ءِ تاں وتی جھد ءَ برجاہ داریت –