TBP Balochi

سر بیتگیں ھالانی رد ءَ بلوچستان ءِ بنجاھی شھر شال ءَ بی ایس او ءِ باسک ھانی بلوچ بیران بیتگ-

ھالانی تہ ءَ گوشگ بیگ ءَ اِنت کہ گوستگیں روچاں میڈیکل انٹری ٹیسٹ ءِ نودربرانی زھرشانی ءَ ھوار بیتگیں ھانی بلوچ پولیس ءِ آنسو گیس ءُ لَٹ ءُ کُٹانی سبب ءَ جاور ءِ ناگیگ بیتگ اَنت چریشی ءِ سر ءَ آ نادراہ جاہ ءَ برگ بیتگ –

ھانی بلوچ گوستگیں دو روچاں نادراہ جاہ بیگ ءَ پد مروچی آ شال ءَ بیران بیتگ –

ھانی بلوچ ءِ بیرانی ءِ ھال بی ایس او ءِ چیئرمین ظریف رند ءَ راست کرتگ ءُ گُشتگ کہ ھانی بلوچ شال ءَ یک نادراہ جاھے ءَ بیران بیتگ –

ھانی بلوچ مسنگ پرسنز ءَ ھوار پی ایم سی ءِ میڈیکل ءِ انٹری ٹیستانی ھلاپ ءَ بیتگیں زھرشانیاں ھوار بیتگ –

ظریف رند ءَ گُشتگ کہ ھانی بلوچ گوستگیں روچاں پولیس ءِ آنسو گیس ءُ لَٹ ءُ کُٹانی سبب ءَ آئی ءِ جاور نگیگ بیتگ اَنت ءُ پولیس ءِ لَٹ ءُ کُٹاں پد ھانی بلوچ نادراہ جاہ ءَ برگ بیتگ ءُ چریشی ءَ آئی ءَ وتی درد نہ سگ اِتگ ءُ بیران بیتگ –

ھانی بلوچ ءِ بیرانی ءِ پژدر ءَ چاگردی رسانکجاھاں بلوچ پھناتاں زھر ءُ پدردی ءِ درشان بیگ ءَ اِنت –

بلوچ پھناتانی گوشگ اِنت کہ ھانی بلوچ ءِ بیرانی پولیس ءِ آنسو گیس ءُ لَٹ ءُ کُٹانی سبب ءَ پیش اتکگ –

ھمے وڑ وائس فار بلوچ مسنگ پرسنز ءِ وائس چیئرمین ماما کدیر بلوچ ءَ ھانی بلوچ ءِ بیرانی ءِ پژدر ءَ گُشتگ کہ گوستگیں روچاں شال ءَ میڈیکل انٹری ٹیست ءِ ھلاپ ءَ بیتگیں زھرشانی ءِ سر ءَ پولیس ءَ آنسو گیس ءُ لَٹ ءُ کُٹ کتگ اَنت چریشی ءِ سبب ءَ ھانی بلوچ زدگ بیتگ –

ماما کدیر بلوچ ءَ گُشتگ کہ چرے آنسو گیساں تنی وھدی بازیں نودربرے زدگ اِنت ءُ آ نادراہ جاھان اَنت ءُ آ برے ھوش ءُ برے بے ھوشی ءِ آماچ اَنت –

بلوچستان ءِ تیاب دپی شھر گوادر ءِ میرین ڈرائیو ءِ سر ءَ بستگیں مھمد علی جناح ءِ بُت بمب ءِ جتگ ءُ تراکینگ بیتگ۔

ھالانی رد ءَ یک شمبے ءِ سھب ءَ بت تراکے ءَ تباہ کنگ بیتگ، اھوال کارانی رد ءَ بُت ءِ نزیک ءَ تراک ناکیں شورو ایر کنگ بیتگ اَنت کہ گوں ٹائم بمب ءَ تراکینگ بیتگ۔

مھمد علی جناح ءِ بُت ھمے سال ءَ جون ءِ ماہ ءَ گوادر ءِ میرین ڈرائیو ءِ سر ءَ اڈ کنگ بیتگ اَت کہ مروچی بمب تراکے ءَ ڈورینگ بیتگ۔

تراک ءَ پد لشکریاں سرجمیں ھند بستگ ءُ ترندیں دروشمی ءَ چارگ ءُ ٹپاسگ بندات کُتگ۔

بُت ءِ نشانگ کنگ ءِ زمہ واری آجوئی لوٹوکیں سلاہ بندیں گل بلوچ ریپبلکن آرمی ءَ من اِتگ۔

گل ءِ جارکش بیبگر بلوچ ءَ چاگردی رسانکدر ءِ تندجاہ ٹوئٹر ءِ سر ءَ شنگ کُتگیں تران ءِ تہ ءَ اُرش زمہ واری زرتگ ءَ گُشتگ کہ مھمد علی جناح بلوچستان ءَ ھرابیں چمے ءَ گوں چارگ بیت اِنت، اد ءَ آئی ءِ بُت ءُ لیکھانی ھچ جاہ نیست اِنت۔

تربت پریس کلب ءَ پنجگور ءَ سیادی داروکیں چاگردی باسک جلیل سنجرانی ءِ پت ھاجی الاھی بکش ءَ وتی کھول ءِ ھمراھی ءَ گوستگیں روچ ءَ پریس کانفرنس کنان ءَ گُشتگ کہ من یک زمیندارے آں ءُ وتی مردمانی واستا سیاست کتگ ءُ ڈسٹرکٹ کونسل پنجگور ءِ باسک ھم بیتگ اَنت –

آئی ءَ گُشتگ کہ شش ستمبر ءِ بیگاہ بیتگ کہ منی سر ءَ قیامتی کھر کپتگ اَنت وھدیکہ منی بت گناھیں زھگ ملیریا کنٹرول ءِ آفیسر پنجگور جلیل سنجرانی پنجگور گریب آباد ءَ سلاہ بندیں مردماں تیرگواری کرتگ ءُ شھید کتگ –

آئی ءَ گُشتگ کہ منی زھگ ءُ من ءَ کسے ءَ گوں دشمنی نیست اِنت منی سر ھچ رنگ ءَ پِر نہ بیت اِنت منی بے گناھیں زھگ ءِ کُشگ ءَ کسے ءَ چی پائدگ رس اِتگ، منی زھگ جلیل سنجرانی ءَ شال ءَ وانگ سرجم کتگ اود ءَ ملازمی بندات ءُ لھتے ھپتگانی تہ ءَ پنجگور ءَ لگ اِتگ آئی ءِ شَری، راجدوستی ءُ انسان دوستی ءَ سرجمیں بلوچستان گواہ اِنت –

آئی ءَ گُشتگ کہ آئی ءِ بے دردی ءَ کُشگ ءَ سرجمیں بلوچستان دردیگ کرتگ ءُ سیاسی پھناتاں وتی پدردی ءِ درشان کتگ اَنت ءُ جلیل وتی مھرانی منانک داتگ اشی ءِ سر ءَ من ءَ پھر اِنت ءُ درستیں مردمانی منتواراں –

سرجمیں بلوچستان ءَ جلیل ءَ گوں وتی مھر ءُ کوشکاراں گوں نپرت ءِ درشان کوشکارانی منسوبہ ءِ بے سوب کنگ ءَ دیم ءِ چیر دیگ ءَ لاچار کتگ اَنت –

شمئے زور ءَ آیاں جُست کنگ لوٹ آں کہ منی زھگ ءِ کسور چی بیتگ اَنت یا من ءَ گناہ بیتگ، یا کسانیں زھگاں، یا زال ءَ، یا گوھار ءُ براتانی چی کسور بیتگ چہ مارا مئے سارتیں ساھگ پُلگ بیتگ، چہ زھگاں آئی ءِ ساھگ پُلگ بیتگ، زال ءِ زند ءِ ھمسپر، گوھار ءُ برات ءُ سیادانی اُمیت چہ آیاں پُلگ بیتگ نِی آئی ءِ زھگاں چہ پسو بہ دئے آں کہ آیانی پت کے ءَ شھید کتگ –

زندگی پہ من ءَ گرانیں کھر ءِ کپتگ ءُ سوھان ءَ من ءَ بُران اِنت کوشکاراں چہ اے جست اِنت کہ منی زھگ ءِ چی میار بیتگ؟، آ پرچا بے دردی ءَ مردماں کُشگ ءَ اَنت آ زاناں نہ زان اَنت اے زھگ چون مزن ءُ ورنا بنت؟ یک جلیلے ءِ کُشگ ءَ چنکس جلیل کشگ بنت درستانی دیم ءَ منی ھمے جست اِنت من ءَ پسو بہ دے اَنت سر وزیر بلوچستان، آئی جی پولیس، کمشنر مکران، ڈی سی پنجگور، ڈی پی او پنجگور ءُ درستیں ادارھاں گوں ھمے جست اِنت کہ اینکس روچ ءِ گوزگ ءَ پد ھم کوشکار پرچا دزگیر نہ بیتگ اَنت اے زمین ءَ ایر کش اِتگ اَنت یا آسمان ءَ چِک اِتگ اَنت انتزامیہ سرجم ءَ وتی کارانی سر ءَ بے سوب بیتگ کسے ءِ جان ءُ مال پھریزگ بیگ ءَ نہ اِنت من سرکار ءِ بلوچستان ءَ گوں دزبندی کن آں جرمکاراں بہ گپت ءُ مارا انساپ بہ دنت اے وھد ءَ مولوی عبدالحمید، برکت بلیدی، علی اھمد ءُ مھمد عالم سید ءَ ھوار بازیں کچے ءَ مردم جاڑیگ بیتگ اَنت-

زانگ بہ بیت پنجگور ءَ گوستگیں بازیں وھداں یکشل ءَ مردمانی کوش برجاہ اَنت لھتے ماھانی تہ ءَ سِی مردم کُشگ بیتگ اَنت کہ تنی وھدی ھچ کوشکار دزگیر کنگ ءُ دیم ءَ آرگ نہ بیتگ اَنت-

بلوچ پھناتاں ھمے گوشگ بیگ ءَ اِنت کہ کوشکارانی پُشت پناھی ءَ مزنیں واک کنگ ءَ اَنت چریشی ءِ سر ءَ کوشکار گرگ بیگ ءَ نہ اِنت –

ضلع کیچ ءَ پاکستانی پوج ءِ دست ءَ یک ورنایے آوار جنگ ءَ پد بیگواہ کنگ بوتگ –

سربوتگیں ھالانی رِد ءَ اے ورناہ گوستگیں شپ ءَ کیچ ءِ دمگ تربت سلالہ بازار ءَ چہ آوار جنگ ءَ پد بیگواہ کنگ بوتگ کہ آئی ءِ پجّار سرفراز ء حاجی غلام نام ءَ چہ بوتگ-

کھول ءَ اے وئیل راست کتگ دی بلوچستان پوسٹ ءَ گوں ھال کتگ ءُ گْوشتگ کہ بیگواہ کنگ بوتگیں ورناہ کولواہ ءِ دمگ ڈندار ءِ نندوک اِنت ءُ آ یک ڈرائیورے-

آیاں دیمتر ءَ گْوشتگ گوستگیں شپ ءَ پاکستانی پوج ءَ بلوچ دودماناں لگتمال کنان ءَ لوگاں بیڑبرتگ ءُ دو مردم آوار جتگ وھدے کہ یکے رند ءَ یل داتگ ءُ سرفراز انگت بیگواہ ءَ اِنت-

زانگ نہ بیت کولواہ ءُ کش گوراں مردم ھرروچی آسراتیانی توژگ زورگ یا کار ءِ ھاتر ءَ تربت ءَ رو اَنت ، کولواہ ءُ کش ءُ گور ءَ بازیں دمگ ءِ مردم پاکستانی پوج ءِ مدامی لشکر کشی ءَ چہ لڑ ءُ بار ءَ مجبور بوتگ ءُ دیم پہ کیچ ءُ دگہ دمگاں جھمنند اَنت –

بلوچستان ءَ زورانسری آوار جنی ءِ نہ کُٹوکیں یکشلہ برجاہ ءَ اِنت ءُ پوج ءِ نیمگ ءَ چہ نوکیں پالیسی ءَ پیسر ءَ چہ بندیگ جاہ ءَ بند بوتگیں مردماں دروگیں میڑ ءِ نام ءَ کُشگ ءَ اِنت ءُ اے پالیسی ءِ تہ ءَ نو گیشی اَتکگ ءُ ھمے درگت ءَ سیاسی ءُ انسانی ھکّاں چہ دلپدردناک بیت –

بلوچ آجوئی لوٹوکیں سلاہ بندیں گل یونائیٹڈ بلوچ آرمی ءِ جارکش مزار بلوچ ءَ رسانکدراں شنگ کرتگیں درشان ءِ تہ ءَ گوشتگ کہ گوستگیں روچ ءَ ھاران ءُ نوشکی ءِ میانی دمگ بڈو کھور، سوماری ، سینکری، کورکی ءُ سیاہ لوپ ءَ زورگیریں پوج ءَ دمگی کشندہ ٹولیانی ھمراھی ءَ بیڑ برتگ ءُ لشکر کشی بندات کتگ، لشکرکشی ءَ زورگیری پوج ءَ بُرزی کمک ھم گون بوتگ –

جارکش ءَ گوشتگ کہ بلوچ سرمچاراں زورگیریں پوج ءِ دیم دارگ ءِ ھاتر ءَ دیم پہ دیمی جنگ بندات کتگ، جنگ ءُ چوپ ءِ میان ءَ سنگت نودان بادینی پنام ءِ حمل بلوچ ڈیھ ءِ دیمونیاں کُربان بوتگ ءُ مدامی نمیران بوتگ –

جارکش ءَ گوشتگ کہ سنگت نودان بادینی ءَ یک سالے بوتگ کہ بلوچ یونائیٹڈ آرمی ءَ گوں ھمگرنچ بوتگ ءُ دژمن ءِ بگیری ءَ جنگ ءَ بوتگ –

سنگت نودان بادینی ء کامریڈ حمید بادینی جھمنند نوشکی دیمونی ءَ سھرچکیں دروت ندر کنیں –

تراک ناکیں شوروانی اُرش ءَ زورگیریں پوج ءِ چار کامند کُشتگ ءُ دو زدگ کتگ – جئیند بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں بولان ءِ دمگ شاھرگ ءَ زورگیریں پاکستانی پوج ءِ فرنٹیر کور ءِ یکسد ءُ سِی نھ ءِ ونگ ءں کاروان چیرکتگیں تراک ناکیں شوروانی نشانگ جوڈ کرتگ ءُ چار کارمند کُشتگ دو زدگ کرتگ –

آئی گوشتگ کہ دژمن پوج ءِ گاڑی شاھرگ ءِ دمگ سفرباش ءَ ھما وھد ءَ نشانگ جوڈ کنگ بوتگ کہ آ چپ چاگردی دمگاں لشکر کشی ءَ پد واتر بوتگ – تراک ءِ آسر ءَ زورگیریں پوج ءِ کارمند حسین رحمت، محمد سلیم، ماجد فرید، ءُ زاکر مرتگ انت وھدیکہ پوج ءِ کپٹن اویس ءُ لیفٹیننٹ لقمان سک باز زدگ بوتگ انت اُرش ءَ دژمن پوج ءِ یک گاڑی ءِ سرجمی ءَ تباہ بوتگ –
جارکش ءَ گوشتگ کہ دژمن پوج ءِ سر ءَ بوتگیں اُرش ءِ زمّہ واری ءَ مئے گل بی ایل اے منّ ایت ءُ دژمن پوج ءُ آئی ءِ کمک کارانی سر ءَ مئے اُرش تُرندی ءَ گوں برجاہ بنت –

بیست ستمبر ءَ کیچ ءِ دمگ آسکانی بازار ءَ پاکستانی پوج ءِ تیر گواری ءَ شھید بوتگیں زالبول تاج بی بی ءِ کوش ءِ بگیری ءَ بلوچ یکجھتی کمیٹی ءِ رھشوناں شال ءِ پریس کلب ءَ تران کنان ءَ گوشتگ کہ تاج بی بی روچ رھمانی پاکستانی پوج ءَ تیرباران کُتگ کُشتگ ءُ آئی ءِ گوم ءَ ھواری ءَ آئی ءِ لوگواجہ زدگ کُتگ –

پریس کانفرنس ءِ بندات کنان ءَ بلوچ یکجھتی کمیٹی ءِ رھشونانی گوشگ ات کہ مروچی مار ءَ یکبرے پد ءَ ایردستیں بلوچستان ءِ مردمانی سر ءَ بوتگیں زوراکی ءِ یک دگہ دردناکیں ھک لوٹی کسہ ءِ گون ءُ گوں شما تران انت – مروچی پد ءَ یک مزلومیں توارے ءَ ھاکماں سرکنگ ءِ ھاتر ءَ پریس کلب ءَ ساڑی اِنت- مروچیگیں پریس کانفرنس ھم یک مزلومیں آہ ءُ سلواتانی کِسہ اِنت – ھمے امیت ءَ گوں مروچی پد ءَ اتکگیں کہ بلوچستان ءَ برجاھیں سنگینیں انسان کوشانی سر ءَ کسے توار چست بہ کنت ءُ زوراکی ءِ دارگ ءِ ھاتر ءَ جھد بہ کنت – مروچیگیں پریس کانفرنس ءَ ما تاج بی بی ءِ دردناکیں کوش ءِ بگیری ءَ گوں شما ھم تران انت کہ آ روچ رھمانی پاکستانی پوج ءِ کارمنداں تیرباران کُتگ کُشتگ ءُ آئی ءِ ھمراہ گاڑی ءَ سواریں آئی ءِ لوگ واجہ زدگ کُتگ –

راھگوزیں گاڑی ءِ سر ءَ تیرگواری کنگ ءِ مول مراد پدر انت کہ بلوچستان ءِ تہ ءَ آ ھچ کسی ءِ کنٹرول ءَ نہ انت ءُ بلوچستان ءَ ھچ وڈیں کانود ءُ رھبند ءُ انسانانی پرواہ ءَ نہ کن اَنت –

آھانی گوشگ ات کہ بلوچستان گوستگیں دو دھکاں سُچگ انت اول ءَ مردم آوار جنگ بوتگ اَنت پد ءَ زانگولیں جونانی دور دیگ بندات کنگ بوت پد ءَ یکجاھیں کبرانی تہ ءَ بلوچ کل کنگ بوت انت پد ءَ دروگیں میڑ ء نام ءَ جنگ ءُ کُشگ بندات کنگ بوت ءُ اے درسیں پندل مروچی ھم وڑے ناں وڑے ءَ برجاہ انت ءُ نون اشی ءِ تہ ءَ گیشی ءِ آرگ ءُ مردمانی ٹارگٹ کنگ بندات کتگ – گوستگیں روچ ءَ تاج بی بی ءِ کوش ھمے زورکیانی درچ اِنت کہ بازیں وھدے ءَ بلوچستان ءَ برجاہ انت – تاج بی بی راھگوزگ ءَ پوج ءَ آئی ءِ سر ءَ تیرگواری کتگ ءُ اے گپ پدر کتگ کہ بلوچستان ءَ آھاں وتی جتائیں زوراکی کنگ ءِ سرکار ءِ جوڑ کتگ کہ ھمائی ءَ بہ لوٹ انت بہ کوش انت ھمائی ءَ بہ لوٹ انت بیگواہ بہ کن انت، انو بلوچستان ءِ تہ ءَ زورانسری آوار جنی ءِ تہ ءَ ھم گیشی آرگ بوتگ بازیں مردمے زورانسری آوار جنگ ءُ بیگواہ کنگ بوتگ اَنت کہ اے درچ یکشل ءَ برجاہ انت –

بلوچستان ءِ تہ ءَ ھنچیں جاورھال آرگ بوتگ انت کہ اود ءَ ھر یک انسانے ھمے پھمیت کہ آ پھازگ نہ بیت ءُ دومی نیمگ اے وڑے ءَ وئیل آھاں گیشتر تُرسین انت –

بی وائی سی ءِ رھشونانی گوشگ ات کہ بلوچستان ءَ یکیں تاج بی بی ءِ نہ انت کہ بے دردی کُشگ بوتگ بلکیں اشی ءَ پیش بازیں چُشیں وئیل بوتگ انت کہ زھگ، زالبول ورناہ ءُ بزرگ زوراکی ءِ آماچ کنگ بوتگ انت – تاج بی بی ءِ اے وڑ پہ بے رھمی کُشگ ھمے زوراکیانی بھر ات –

آھانی گوشگ ات کہ ما چہ شمئے نیمگ ءَ چی سرجمیں پاکستان ءِ اھوالکار، سیاست دان، انسانی ھکانی ادارہ، سپریم کورٹ ءُ ھستیں وھدے سرکار ءَ لوٹ کنیں کہ آ بلوچستان ءَ برجاھیں انسانی ھکانی بگیری داروکانی بگیری ءَ توار چست بہ کن انت پرچاکہ اے ایوک ءَ بلوچستان ءِ جیڑہ نہ انت بلکیں انسانیت ءِ جیڑہ انت اگاں اے وڑیں یکشلیں کشت ءُ کوش ءَ ھچ گوشگ نبوت گڑا اے وڑیں کتکاریانی تہ ءَ روچ پہ روچ گیشی کیت –

انوگیں بیتگیں وئیل اے گپ ءِ پدرائی کنت کہ بلوچستان ءَ پوج ھچ کس ءِ واک ءَ نہ انت آئی ءَ مھار گُٹ ءَ انت ءُ وتی مرزی ءُ منشاء بلوچستان ءِ سر ءَ ھرچی کت کنت بہ کنت –

آھانی گوشگ ات کہ بلوچ یکجھتی کمیٹی اولی روچ ءَ چہ بلوچستان ءَ بؤکیں انسانی ھکانی بگیری ءَ داروکانی بگیری ءَ وتی توار ءَ چست کنگ انت کہ مئے توار ءَ بلوچستان ءِ راج وتی گِس آں چہ در اتکگ ھکانی جھد ءَ ھوار بوتگ تاج بی بی ءِ کوش ھمے وڑ پدردی یے کہ آئی ءِ بگیری ءَ بلوچ یکجھتی کمیٹی ھمے زوتاں شال ءُ دگہ دمگاں زھرشانی کنت –

بلوچ یکجھتی کمیٹی ءِ رھشوناں ایردستیں بلوچستان ءِ راج ءَ چہ لوٹ کُتگ گوشتگ کہ آ اے زوراکیانی بگیری ءَ توار چست بہ کن انت ءُ جھد ءِ بھر جوڑ بہ بنت پرچا کہ بلوچستان ءِ تہ ءَ ھچ کس پھریزگ نہ بیت زیک حیات، کلثوم، ملک ناز بوتگ انت مروچی تاج بی بی اِنت باندا ءَ مئے تہ ءَ دگہ یکے ھمے وڈ بے دردی کُشگ بیت اِنت –

آھاں چہ درسیں تک پھناتاں سیادی داروکیں مھلوک ءَ چہ لوٹ کُتگ کہ اے وئیل ءِ بگیری ءَ در بیا انت ءُ زھرشانی بندات بہ کن انت زوراکی ءَ رکگ ءِ راہ بس جھد ءَ گوں بندوک انت –

بلوچستان ءِ دمگ بولان ءَ پاکستانی پوج ءِ یک گاڑی ءِ سر ءَ بمب تراکے بوتگ چار کارندہ بیران بیتگ اَنت-

سربوتگیں ھالانی رِد ءَ بولان ءِ دمگ شاھرگ ءِ ھند سپر پاش ءَ پاکستانی پوج گاڑی ءِ سر ءَ ناشناسیں مردماں گوں چیرکتگیں بمبے ءَ نشانگ کتگ ھالانی تہ ءَ گوشگ بیتگ چریشی ءِ آسر ءَ چار کارندہ بیران بیتگ اَنت-

اے اُرش ھما وھد ءَ کنگ بوتگ کہ گوستگیں روچ ءَ بولان ءِ دمگ ءَ پوج ءَ پیش گامی کتگ ءُ گنبدی ءِ کش ءُ گوراں لشکر کشی بندات کتگ ءُ مروچی سُھب ءَ ھمے دمگاں چہ واتری ءَ ناشناسیں مردماں سفر پاش ءِ ھند ءَ گوں تراکناکیں شورواں نشانگ کتگ –

دومی نیمگ ءَ اے بوتگیں اُرش ءِ گپ دمگی انتزامیہ ءَ راست کتگ ءُ گْوشتگ کہ اے بمب تراک ءِ آسر ءَ چار کارندہ بیران بیتگ ءُ اشانی تہ ءَ دو کارندھانی پجّار سپاھی سلیم ءُ ذاکر اللہ مروت ءِ ناماں چہ بوتگ اَنت-

زانگ بہ بیت اے ھند ءُ دمگاں پاکستانی پوج ءِ سر ءَ پیسر ءَ چہ بوتگیں گیشتر اُرش بلوچ آجوئی لوٹوکیں سلاہ بندیں گلاں منّ اِتگ اَنت بلے اے اُرش ءِ زمہ واری انگت ھچ ءَ گل نہ زرتگ-

سر بیتگیں ھالانی رد ءَ بلوچستان ءِ دمگ پنجگور ءَ گوستگیں شپ ءَ دزانی دُزی ءِ ھلاپ ءَ مھلوک ءَ زھرشانی کنان ءَ سی پیک دگ بند کرتگ، چریشی ءَ ھردوکیں نیمگاں روگ ءُ آیگی مھلوک مھتل بیتگ اَنت گاڑیانی درانیں لین لگ اِتگ اَنت-

ھالانی تہ ءَ گوشگ بیتگ کہ گوستگیں شپ ءَ پنجگور ءِ دمگ راھی نگور سیدان ءَ وارس ء منیر نامیں مردمے ءِ گس ءَ بازیں کچے ءَ سلاہ بندیں مردماں دور کتگ ءُ دزی کتگ اَنت –

دمگی مردمانی رد ءَ دُزاں لوگ ءِ ساز ءُ سامان رُپتگ ءُ برتگ اَنت ھمے وھد ءَ گھگیری ءَ تیرگواری بیتگ کہ چریشی ءَ نزیر اھمد ء مولا داد زدگ بیتگ –

چریشی ءِ پژدر ءَ مھلوک برانز گپتگ ءُ مروچی آیاں سی پیک دگ بند کرتگ ءُ روانی مھتل کتگ اَنت –

چریشی ءَ پد زھرشانی کنوکانی گپ ءُ تران ءَ ایف سی ءِ کرنل فیصل رفیق، اسسٹنٹ کمشنر امجد سومرو تھسلدار عارف علیم، تھسلدار پروم ھاجی فضل مھمد سر بیتگ اَنت اے وھد ءَ گوستگیں چیئرمین ڈسٹرکٹ کونسل پنجگور مالک سالہ بلوچ ءُ نیشنل پاٹی ءِ ھاجی سالہ مھمد بی این پی مینگل ءِ ریاز سھیل ءُ دگہ مردم جاڑیگ بیتگ اَنت –

گپ ءُ تران ءَ پد ایف سی کرنل ءَ مھلوک سدکی داتگ ءُ گوشتگ اَنت سَے روچ ءِ تہ ءَ شمارا گپے دست ءَ دیگ بیت اِنت چریشی ءَ پد زھرشانی کنوکاں زھرشانی ھلاس کرتگ –

زانگ بہ بیت گوستگیں بازیں وھداں بلوچستان ءِ دگہ جاھانی ھواری ءَ پنجگور ءَ یکشل ءَ کُشت ءُ کوش ءُ دزی ءُ ڈنگی برجاہ اَنت ءُ چریشانی ھلاپ ءَ مھلوک ءَ زھرشانی ھم کرتگ –

سیاسی مردمانی گوشگ اِنت اے دُزانی پُشت ءُ پناھی ءَ پاکستانی چیریں ادارہ کنگ ءَ اَنت کہ آیاں ڈیتھ اسکواڈ ءِ نام ءَ یک گلے جوڑ کرتگ ءُ اے گل بلوچستان ءَ مردمانی آوار جنگ ءُ کشت ءُ کوش ءُ دزی ءُ ڈنگیاں ھوار دگہ چاگردی ھراب کاریاں دزمان اَنت –