TBP Balochi

بلوچستان ءِ دمگ آواران ءَ لشکریانی نیمگ ءَ زالبول ءُ زھگاں گوں گیر انسانی سلوک ءُ کم شرپیانی بگیری ءَ زھرشانی کنگ بیتگ ءُ دگ بند کنگ بیتگ۔

اھوالانی ردءَ آواران ءِ تیرتج ھنکین ءِ زالبولاں آواران ءَ داں تُربت ءُ آواران ءَ داں کراچی ءَ رؤکیں مزن شھدگ زھرشانی کُتگ ءُ بند کُتگ اَنت۔

زھرشانی کنوکیں زالبولانی گُشگ اِنت کہ تیرتج مئے بُنکی میتگ اِنت ءُ مال مڈی ھمودءَ اَنت بلے ھمک روچ وھدے زالبول جنگلاں دار چِنگ ءَ رؤنت گُڑا پوجی کارمند کاینت گوں آیاں بدیں زبان کارمرز کن اَنت ءُ آیاں بیھار دئینت ءُ ترسین اَنت۔

آیاں گیشتر گُشتگ کہ اگں ڈی سی آواران ءَ گامگیج نہ زرت گُڑا مئے دیمترے گام آواران ءِ ڈی سی کمپلیکس ءِ بند کنگ بیت اِنت۔

گوستگیں شپ ءَ یورپئین پریمئیر لیگ ءِ شش ٹیمانی میان ءَ گوازی کنگ بوتگ، گوازی ءَ لسسٹر سٹی ءَ نیوکاسٹل ءِ دیم ءَ چار ، کرسٹال فلیس ءَ ایرٹون ءِ دیم ءَ سَے پہ یک گولے ءَ گوازی کٹ اتگ وھدیکہ ویسٹ ھام ءُ برنلی دیمیگ بوتگ انت –

یکشمبے ءَ بوتگیں پریمئیر لیگ اولی گوازی ویسٹ ھام ءُ برنلی میان ءَ کنگ بوتگ کہ ھردو ٹیمانی لیبیاں جوانیں لیب پیش داشت ءُ ھردو ٹیم دیمیگ بوت انت –

دومی گوازی لیسسٹر سٹی ءُ نیوکاسٹل ءِ دیم ءَ بوتگ کہ لیسسٹر سٹی ءَ چار گول ءَ گوازی کٹ اتگ، نیو کاسٹل ءِ نیمگ ءَ چہ ھچ گول اسکور کنگ نہ بوتگ –

لیسسٹر نیمگ ءَ چہ لیبی جے.میڈیسن ءَ یکے، پی.ڈاکا یکے ءُ وائی.ٹیلیمنس ءَ دو گول اسکور کتگ گوازی وتی ٹیم ءِ نام ءَ کتگ –

لیسسٹر سٹی ءُ ایورٹون ءِ میان ءَ بوتگیں سیمی گوازی لیسسٹر سٹی ءَ سَے گولاں گوازی کٹ اتگ ایورٹون ءِ نیمگ ءَ یک گولے اسکور کنگ بوتگ کہ ایورٹون ءِ لیبی جے روندن ءَ داتگ – لیسسٹر سٹی ٹیم ءِ نیمگ ءَ چہ جے. ٹومکنس ءَ یکے ءُ سی.گیلگھر ءَ دو گول اسکور کتگ گوازی وتی ٹیم ءِ نام ءَ کتگ –

امیر جماعت اسلامی پاکستان سراج الحق ءِ دزبندی ءَ سرجمیں ڈیھ ءَ “ یوم یکجھتی بلوچستان ” درگت ءَ کراچی ءِ مھلوک ءِ نیمگ ءَ بلوچستان ءِ مھلوک ءِ گون ءَ ھمدری ءِ درشان ءِ واستا “ بلوچستان ءِ ھکانی واستا روانک ” کشگ بیتگ –

چہ چاکیواڑہ نمبر دو ءَ لی مارکیٹ ءَ داں بیوکیں روانک ءِ سروکی امیر جماعت اسلامی کراچی ءِ حافظ نعیم الرحمن ءُ باسک اُستانی اسمبلی ءُ امیر جماعت اسلامی زرباری سید عبدالرشید ءَ کرتگ-

روانک ءَ بھر زیروکیں مردمانی دستاں بینرز ءُ پلے کارڈز بیتگ اَنت –

روانک ءَ مولانا ھدایت الرحمان ءَ ٹیلی پون ءَ تران کنان ءَ گُشتگ گوستگیں بیست ءُ ھشت روچاں بلوچستان ءِ ھکانی واستا نندانکی جد ءُ جھد کنگ ءَ آں ءُ مئے نندانک ریاست ءِ ھلاپ نہ اِنت بلکیں بلوچستان ءِ مھلوک ءِ ھکانی واستا اِنت، بلوچستان پرگنجیں مڈیاں سریچی ءَ ابید بلوچستان ءِ مھلوک ءَ داں انیگ ءَ وانگ، جانسلامتی بنکی آسراتی نیست اَنت، بلوچستان ءِ شھریاں ھمک روچ پنچ رند ءَ پاکستانی بیگ ءِ منانک دیگ لوٹ ایت-

آئی ءَ گُشتگ کہ ما سی پیک منسوبہ ءِ ھک ءَ ایں بلوچستان ءِ مھلوک ڈالچار کنگ بیگ ءَ ایں بلوچستان ءِ ھزاراں شھری بیگواہ اَنت مئے زھرشانی ءِ مول ءُ مراد ایش اَنت مارا وانگی ادارہ بہ دے ایت، ھسپتال ےُ بنکی آسراتی بہ دے ایت، بلوچستان ءَ نشہ باپاری بنجل ھلاس کنگ بہ بنت، بلوچستان زیردستیں اُستانے ءِ دروشم ءَ چارگ مہ بیت اد ءِ شھری پاکستانی شھری منگ بہ بنت-

حافظ نعیم الرحمن ءَ روانک ءَ تران کنان ءَ گوشتگ کہ مروچی لیاری ءَ ھوار کراچی ءِ مھلوک بلوچستان ءِ مزلوم ءُ زبھریں مھلوک ءِ یکجاھی ءِ واستا مُچ اَنت، مولانا ھدایت الرحمان ءِ زرمبشت ءِ ستاشانی اِنت، مروچی دردناکیں گپ ایش اِنت مہ ھاکمانی ٹولی ءِ بے سدیں پالیسانی سبب ءَ درستاں گیشتر بلوچستان ڈالچار کنگ بیتگ جاورھال ایش کہ ھمک سال ءَ بلوچستان ءَ دو ماہ ءِ واستا ھم گیس دیگ نہ بیت اِنت ءُ سی پیک نام ءِ سر ءَ دیمروئی ءِ ٹاہ دیگ بنت -بلے گوادر، تربت، پسنی ءَ ھوار دگہ جاھاں مھلوک بنکی آسراتیاں زبھر اَنت اشی ءَ ابید آ زلیل کنگ بنت ھمے سبب اِنت مولانا ھدایت الرحمان بلوچانی ھکانی واستا تحریک جنزینگ ءَ اِنت سرجمیں ملک مولانا ھدایت الرحمان ءِ ھمراہ اِنت، بلوچستان ءِ جھمنند کار ءُ بار ءِ ھلاپ نہ اَنت بلے زر ءَ اولی ھک دمگی مردمانی ئیگ اِنت ءُ پد ءَ دگرانی بجلی ءِ پیداکی ءَ بلوچستان ءَ ھچ پلانٹ نیست اِنت بجلی ءُ ورگی سامان ھم ایران ءَ چہ آرگ بنت سی پیک نام ءِ سر ءَ ھاکماں ھزارانی زر وارتگ اَنت ما مولانا ھدایت الرحمان ءِ دراھیں لوٹانی پلامرزی ءَ کن ایں بلوچستان ءِ تحریک زاتی نام ءَ نہ اِنت بلکیں اسلام ءِ بنیاد ءَ جنزگ اِنت اگاں کسے ءَ مولانا ھدایت الرحمان ءِ ترندیں چمے ءَ چارگ ءِ جھد کت گڑا سرجمیں ملک چہ ترا ھساب گر ایت-

سید عبدالرشید ءَ روانک ءَ تران کنان ءَ گُشتگ کہ مروچی پاکستان ءِ ھمک اُستان ءَ بلوچستان ءِ مزلومیں مھلوک ءِ واستا یکجھتی بیگ ءَ اِنت مولانا ھدایت الرحمان بلوچستان ءِ راستیں نمائندگ اِنت کراچی ءِ مھلوک مروچی بلوچستان ءِ مھلوک ءَ گوں مھر ءِ کلوہ دیگ ءَ مُچ بیتگ اَنت –

سربوتگیں ھالانی رِد ءَ بلوچستان ءِ دمگ کیچ تربت ءَ کرونا وائرس تیزی ءِ گوم ءَ تالان بوگ ءَ انت – اے وھدی کرونا وائرس ءِ سَے نادراہ پدر بوتگ اَنت کہ تربت نادراھجاہ ءَ الاج کنگ بوگ ءَ انت – ایم ایس ٹیچنگ نادراھجاہ ءِ بنشون ءِ رِد ءَ کرونا وائرس ءِ کچ گیش بوت کنت –

اے درگت ءَ ڈپٹی کمشنر کیچ حسین جان بلوچ ءِ چیردستی ڈاکٹر ءُ افیسرانی دیوان ءِ برجم دارگ بوتگ – دیوان اے سی، ڈی ای او، ایم ایس ڈاکٹر یوسف، دکاندارانی سرمستر، مُلا، ٹرانسپوٹر، پرائیوٹ اسکول، سوشل ویلفئیر ءِ نمائندگ ھوار بوتگ انت –

ڈی سی کیچ ءِ گوشگ ات کہ کرونا ءِ نوکیں لھر میکرون تیزی ءِ گوم ءَ تالان بوگ ءَ انت آئی ءِ گر ءُ دار ءِ یکیں راہ وتی پھریزگ انت- دکاندار بگیر ویکسینیشن والا مردماں چیز بھا مہ کن انت ، سرکاری ءُ پرائیوٹ اسکولاں ٹیچر ءُ نودربر بید کارڈ ءَ اسکولانی تہ ءَ آیگ میل انت ءُ اسکول ریکارڈ ءِ تہ ءَ ھم گیرحاضر کنگ بہ بنت – ھمے وڑ نادراھجاھاں بید ویکسینیشن کارڈ ءَ او پی ڈی ءَ چیک اپ کنگ مہ بنت – ٹرانسپوٹر وتی ڈرائیور ءُ کلینڈراں ویکسینیشن بہ کنائین اَنت ءُ بگیر ویکسینیشن ءَ مساپر ٹکٹ دیگ مہ بنت بینک ، ھوٹلاں ھم بید ویکسیشن ءَ مردماں میل انت – اگاں ھر کس ءَ اشانی سر ءَ امل نہ کُت آھانی بگیری ءَ کانودی کاروائی کنگ بیت انت –

آئی ءَ رسانکدراں گوں تران کنان ءَ گُشت کہ مھلوک ءَ چہ اے نادراھی رکینگ ءِ ھاتر ءَ آ ویکسینیشن کنگ بہ بنت دوازدہ تاں ھژدہ سالی فائزر جنگ بہ بنت آھاں چہ مستریں پاک ویک جنگ بہ بنت – اگاں ھر کسے ءَ ویکسینیشن نہ کُت آئی ءَ را سپر کنگ، وانگ جاھاں روگ، کارگس ءَ رؤگ بینک ءُ نادراھجاھاں رؤگے سر ءَ بندش جنگ بیت اِنت-

بلوچستان ءِ تیابدپی شھر گوادر ءَ وتی ھکانی واستا بلوچستان ءَ حق دو تحریک ءِ نندانک ءَ مروچی بیست ءُ ھپتمی روچ برجاہ بیتگ ھمے وڑ سرکاری واکدارانی واستا آوکیں گامگیجانی واستا شَور ءُ سَلاہ برجاہ اَنت-

ھمے وھد ءَ بلوچستان ءِ دمگ واشک ءَ بندوکیں مولانا عبدالوحید ءَ وتی آوکیں گامگیجانی سر ءَ ھیال درشان کنان ءَ گُشتگ کہ واشک ءِ دمگ گچک ءُ ناگ ءَ پوج ءِ نیمگ ءَ مھلوک تنگ بیگ ءَ اَنت –

آئی ءَ گُشتگ مھلوک ءِ روزگار ءِ بند کنگ ءُ کشاراں ماندارگ ءَ اَنت-

آئی ءَ گُشتگ کہ لھتے ماھاں پیسر پوج ءِ سر ءَ بمب تراک بیتگ اَنت اشی ءِ پژدر ءَ پوج ءَ دمگ انگیر ءَ کرتگ ءُ مردمانی سر ءُ مانسرانی سر ءَ بندش جتگ-

آئی ءَ گُشتگ دمگ ءِ مھلوک ءِ پرپٹ برگ بیتگ اَنت ءُ پس ءُ دلوت ھم برگ بیتگ اَنت-

آئی ءَ گُشتگ کہ اے بدتریں انسانی ھکانی پامالی ءُ مردمانی جیڑہ پوج ءِ دیم ءَ ایر کرتگ اَنت گڑا آیاں گشتگ اے تئی مسلہ نہ اِنت تو برو مسیت ءَ نماز بہ وانین –

آئی ءَ گُشتگ کہ بیت کنت اے گپاں پد دوبر شمئے گون ءَ مہ بنت بلے مئے اے گپانی دیم ءَ برگ ءِ واستا مھلوک ءِ سر ءَ زُلم ءُ زوراکیانی ھلاپ ءَ توار چست بہ کن اِت-

ھندوستانی مزن وزیر نریندر مودی ءِ ٹویٹر اکاونٹ کسانیں وھدے ءَ پہ ھیک کنگ بیتگ ءُ کرپٹو کرنسی درگت ءَ اشتھار جنزینگ بیتگ اَنت۔

اے رد ءَ مزن وزیر ءِ کارگس ءِ نیمگ ءَ شنگ کُتگیں یک ٹوئٹے ءِ تہ ءَ گُشگ بیتگ کہ ھندوستانی مزن وزیر نریندر مودی ءِ جند ءِ اکاونٹ سک کسانیں وھدے ءِ ھاتر ءَ ھیک کنگ بیتگ ۔

ٹوئٹ ءِ تہ ءَ گیشتر گُشگ بیتگ کہ اے جیڑہ گوں ٹویٹر واکداراں چِست کنگ بیتگ ءُ نریندر مودی ءِ اکاؤنٹ زیت رکینگ بیتگ۔

اِشی ءَ ابید ٹویٹ ءِ تہ ءَ چہ مردماں دزبندی کنگ بیتگ کہ آ ”اے نیام ءَ بیتگیں ٹوئٹسانی سر ءَ دلگوش مہ دے اَنت”۔

زانگ بہ بیت اے پئیمیں یک وئیلے پیسر ءَ ستمبر 2020 ءَ نریندر مودی ءِ تندجاہ ءِ ٹویٹر اکاؤنٹ ءِ گوم ءَ دیما اَتکگ اَت۔

کہ آئی ءِ تہ ءَ بازیں ٹویٹ کنگ ءُ چہ مھلوکاں کرپٹو کرنسی ءِ دروشم ءَ کمکی فنڈز ءِ تہ ءَ زر دیم دیگ ءِ گُشگ بیتگ اَت۔

2021 ھم پہ بلوچ راج ءَ ھون واریں سالے ءِ رنگ ءَ گڈی سیمسراں رس اتگ- ماما قدیر بلوچ

کراچی پریس کلب ءِ دیم ءَ جتگیں وائس فار بلوچ مسنگ پرسنز ءِ شُد ھڑتالی بنجل ءَ 4523 روچ سرجم بیتگ، چہ کراچی ءَ سول سوسائٹی ءُ وکیلاں بنجل ءَ اَتکگ ءُ بیگواھیں مردمانی کھولاں گوں یکجاھی درشان اِتگ۔ ھمے وھد ءَ بیگواھیں عبدالحمید زھری ءِ زھگ ءُ کھول ءِ دگہ مردماں بنجل ءَ اَتکگ ءُ زھرشانی درشان اِتگ۔

وی بی ایم پی ءِ رھشون ماما قدیر بلوچ ءَ اتگکیں مردماں گوں گپ کنان ءَ گُوشتگ کہ 2021 ءَ ھم بلوچ پُسگانی شھادت، بیگواھی، ھواریں گور، ژانگولیں جون، میتگ ءُ شھرانی سر ءَ بمب گورای، جنین ءُ زھگانی بیگواھی، زھگاں گوں سلکاریانی تاریخ نبشتہ کنگ بیتگ اَنت۔ اے سال ھم بلوچ راج ءِ واستا ھونی ئیں سالے پدر بیتگ کہ پاکستانی لشکریاں آبادیانی سر ءَ بمب گواری، ٹارگٹ کلنگ بلوچ پرزندانی بیگواھی ءُ ژانگولیں جون دور دیگ ءِ یکشلی برجاہ بیتگ اَنت۔

آئی ءَ گُشتگ ھمک دھر ءَ زورگیر ءَ ایر دستیں راجاں وتی ایر دست کنگ ءِ ھاتر ءَ زلم ءُ زوراکیانی نوکیں دپتر نبشتہ کن اَنت ھمے پیم ءَ اے سرڈگار ءِ سر ءَ بلوچ راج ھم کہ ھمک پلیٹ فارن ءِ سر ءَ وتی پر ایمنیں جدوجھد ءَ کنگ ءَ اِنت اشاں ھم زورگریں ڈیھہ زوراکیانی دیمپانی کنگ کپتگ بلوچانی جدوجھد ءَ نزور کنگ ءِ ھاتر ءَ بلوچ راج ءَ تھی دروشم ءَ نزور کنگ ءُ ایر دست کنگ ءِ ھاتر ءَ دمگی کچ ءَ وتی ھاسیں مردم گچین کُتگ اَنت ڈیتھ اسکواڈ اڈ دیگ بیتگ کہ اشانی کمک ءَ ھزاراں بلوچ پُسگ بیگواہ کنگ بیتگ اَنت ءُ ھزارانی کچ ءَ جون ھم دزکپتگ اَنت۔ پاکستان ءِ ھونواریں کردگار ءِ سر ءَ نہ بلوچ ءَ ابکہ بیگ لوٹ ایت نہ دگہ کسے ءَ بلے ھواریں راجانی پتر ءُ میان اُستمانی گلانی بلوچ نسل کشی ءِ سر ءَ ھاموشی سرجمیں انسانیت ءِ تباھی ءِ سطب اِنت۔

ماما قدیر بلوچ ءَ گُوشتگ وتی دوستیگیں مردمانی یل کنائینگ ءِ ھاتر ءَ جھد چہ تُرس ءَ دیر اِنت پمیشکہ اِشی سر ءَ ریاستی پندل بے سوب اَنت، بلے آیانی ھندی چاریگ ءُ ھندی واکدار الم دروگیں درشاناں گوں جاھاں مھکم ءُ دیمروئی ءَ گیشی کنگ ءَ اَنت بزاں نی بزگیں بلوچ پرزندانی ھوناں گوں زورگیر ءُ اِشانی چاریگ گیشتر آسراتی رس اِت بہ کن اَنت۔

پاکستان ءِ وزیراعظم عمران خان ءَ گْوشتگ کہ گوادر ءِ بزگی کشوکیں دریاوردانی ھکّیں لوٹانی پدءَ گامگیج زورگ بوتگ-

پاکستان ءِ مزن وزیر ءَ گْوشتگ کہ ٹرالرزانی نیمگ ءَ بے کانودی ماھیگری ءِ بگیر ءَ گرگ بہ بنت ءُ من سر وزیر بلوچستان ءَ گوں ھم گپ ءُ تران کن آں-

مزن وزیر پاکستان ءَ بلوچستان ءِ تیاب دپی شھر گوادر ءَ وتی لوٹانی ھک ءَ “بلوچستان حق دو تحریک” ءِ نندانک ءَ بیست ءُ ھپتمی روچ ءَ چاگردی رسانکدر ءَ اے گامگیج زورگ ءِ درشان شنگ کتگ ءُ گْوشتگ کہ آ سر وزیر بلوچستان ءَ گوں تران کن ایں-

گوستگیں روچ ءَ نندانک ءِ سروک مولوی ھدایت الرحمان بلوچ ءَ گوشتگ کہ پرگینگی ھکومت بے دسترس اِنت ءُ ٹرالرز، سیمسری ٹولی ءِ دیم ءَ بے وس اِنت-

زانگ بہ بیت نندانک ءَ نشتگیں مردم ءُ پرگینگی ھکومت ءِ میان ءَ گپ ءُ تران چار رند ءَ بے سوب بوتگ ءُ زھرشانی کنوکاں وتی ھاسیں لوٹ ءِ منّگ ءِ کہ آیانی تہ ءَ بلوچ زر ءَ بے کانودیں ٹرالرنگ، سیمسری باپاری ءِ بندی ھوار اِنت لوٹانی سرجم نہ بوگ ءَ ننداک ءَ برجاہ دارگ ءِ جار جتگ-

مولوی ھدایت الرھمان بلوچ ءَ گْوشتگ کہ مروچی بیگاہ ءِ ننداک ءِ مردمانی گوں گپ ءُ تران کن ایں آوکیں روچانی درگت ءَ چی کنگی اِنت آ کہ ایر کنگ بنت-

گوستگیں بیست ءُ ھپت روچاں بلوچستان ءِ تیابدپی شھر گوادر ءَ برجاھیں زھرشانی ءَ گمان دیان کنان ءَ گوشتگ کہ آؤکیں سَے ماہ ءَ پف دَہ لک مردمانی ھواری ءَ شال ءَ رو ایں –

دَہ لک روانک ءِ پلامرزی کنان ءَ نصیر آباد ءِ دھکانکارانی گوشگ اِنت کہ نصیرآباد گرین بلٹ ءِ دھکانکار مولانا ھدایر الرحمان ءِ چیردستی ءَ پٹ فیڈرل کینال ءِ تباھی ءُ آپ ءِ نہ بوگ ءِ سبب ءَ وتی توار ءَ برز کنان ءَ دَہ لک مردماں گوں ھوار بہ ایں-

آیاں گُشتگ کہ گرین بیلٹ ءِ دھکانکار وتی ٹریکٹر ٹرالیاں وتی وردنی ساز ءُ ساماناں زور اَنت ءُ واجہ مولانا ءِ گوشگ ءَ شال ءِ نیمگ ءَ کاینت –

مولانا ءَ اے مردمانی کاروان ءَ ھوار بیگ ءِ وش اتک گوشتگ اَنت ءُ آئی ءَ گُشتگ اشانی وش اھتی ءَ وت آیانی دیم ءَ کیت اِنت-

زانگ بہ بیت گوستگیں روچ ءَ گوادر نندانک ءَ تران کنان ءَ مولانا ھدایت الرحمان ءَ گوشتگ کہ سَے ماہ ءَ پد ما گوادر ءَ دیم پہ شال ءَ دَہ لک مردمانی ھواتء ءَ روانکے کش ایں ءُ اود ءَ ما وتی لوٹ آں ایر کن ایں –

آئی ءَ گُشتگ کہ اے لوٹ نہ بنت کہ شراب ھانہ بند کن یا نان ٹیچنگ اسٹاف ءِ جیڑھاں گیشین بلکیں اود ءَ مئے لوٹ ایف سی چہ بلوچستان ءَ کشگ بہ بیت ءُ زانگولیں لاشانی دور دیگ بند کنگ بہ بیت ءُ زورانسری آوار جنگ بیتگیں مردم یل کنگ بہ بنت ءُ گوادر پورٹ ءِ کٹ ءُ کمائی نود ءُ ھشت درسد بلوچستان ءَ دیگ بہ بیت اِنت-

سر بیتگیں ھالانی رد ءَ بلوچستان ءِ دمگ گوادر ءَ پدی زر ءَ یک لاشے دزکپتگ، لاش چِست کنگ ءُ نادراہ جاہ ءَ سر کنگ بیتگ –

گوادر پولیس ءِ رد ءَ لاش ءِ پجار مھمد عیسی ء شمبے ءِ نام ءَ زانگ بیتگ کہ آئی ءِ لاش پدی زر ءَ دزکپتگ –

دزکپتگیں لاش ءِ بارو ءَ دگہ گپ دیم ءَ نیتکگ اَنت –

ھمے وڑ ءَ کچھی ءَ پت ءُ چُکانی لاش دزکپتگ اَنت –

ھالانی تہ ءَ گوشگ بیتگ لاش کچھی ءِ دمگ سنی ءَ دزکپتگ اَنت کہ لیویز پورس ءَ لاش چست کرتگ ءُ ڈھاڈر ھسپتال ءَ سر کرتگ اَنت –

اود ءَ لاشانی پجار مھمد فضل ء گل کھور ءُ گل کھور ء عبدالرحمن مھمد ھسنی جھمنند منگچر کلات ءِ ناماں زانگ بیتگ اَنت-

لاش اژدری چار ءُ ٹپاس ءَ پد کھول ءِ گور ءَ رسینگ بیتگ اَنت-