TBP Balochi

بلوچستان ءِ تیابدپی دمگ گوادر ءَ بلوچستان حق دو تحریک ءِ نندانک ءَ گوستگیں روچ ءَ بیست ءُ نُھ روچ سرجم بوتگ، زالبولانی ھم مزنیں کچے ءَ نندانک ءِ پلامرزی ءَ زھرشانی کُتگ گوشتگ دان مئے مردین نشتگ انت ما گوں آھاں ھمگوپگ انت –

زالبولانی مُچی ءَ تران کنان ءَ مولانا ھدایت الرحمن ءَ اتکگیں مھمان وش اتک کُتگ ءُ گوشتگ کہ اے مچیاں ابید ما زھگانی ھم روانکے کش اتگ کہ آئی ءِ سرشون ھمے بوتگ مئے پت پرچا لاچار انت ، آ ھر جاہ بہ رو انت جست گرگ بنت کہ کجا بیتگے کجا رؤگ ءَ ئے ؟ وھدیکہ چکانی پت دریا ءَ رو انت اود ءَ ٹرالر مافیا کہ آبی ھیاتانی چکچینی ءَ کنگ انت آکہ اودا واتر گِس ءَ کائنت چُک پت ءَ جست کنت چی آؤرتگ پت گریو انت پسو دنت کہ مرچی شُدیکیں لاپ ءَ گوں وپس اِت ھچ نیاؤرتگ، آئی ءِ گوشگ ات کہ نادراھجاھاں پیناڈول گولی نیست بلے گوادر ءِ تہ ءَ مئے ورنایاں نشہ تریاک شیشہ ءَ رس ایت – سرجمیں بلوچستان ءَ جاندراھی سھولت نیست بلے بلوچستان ءِ دہ لک ورنا نشہ ءِ آماچ بوتگ انت کہ ھزارانی کچ ءَ مات ءُ گوھار وتی زھگ ءُ براتاں گند انت چم ءِ پُر ءِ ھرس انت – اے منشیات کجا چہ کائنت ؟ ھمے چیک پوسٹانی دیم ءَ چہ آیگ ءَ نہ انت گڑا اے پوج پولیس کجا انت کہ منشیات کیت روچ رھمانی بھا ھم بیت – آپ نہ رس ایت بلے شراب رس ایت –

آئی ءِ گوشگ ات کہ دیمروئی ھمیش انت کہ مئے مات ءُ گوھار پیناڈول لوٹ انت آھاں نشہ دیگ بیت آپ لوٹ انت شراب دیگ بیت ھمیشی ءِ بگیری ءَ اے زرمبشت انت تاں ھما وھد ءَ ما وتی جھد ءَ برجاہ داریں تانکہ اے منشیات باپاری ھلاس نہ بیت ٹرالر مافیا ھلاس کنگ نہ بیت بارڈر پچ کنگ نہ بیت ءُ بیگواھیں مردم یل نہ بنت –

آئی ءِ گوشگ ات بازیں مئے مات گوھارانی چُک برات دہ دہ سال انت کہ گار ءُ بیگواہ انت سرکار ءِ بندیگ جاھاں بندیگ انت ، ھما ماتاں پہ گریوگ اے دنیا سپر کُتگ بلے آھانی زھگ انگت نہ اتکگ ءُ بیگواہ انت – مروچی ھمے زلم ءُ زوراکیاں، زالمیں نزام ءَ ھما زالبول کہ دگانی سر ءَ در ایگ ءَ لاچار کتگ انت کہ پیسر ءَ ھچبر آھاں شری ءَ ڈن ندیستگ –

آئی ءِ گوشگ ات کہ اے بیست ءُ نُھ روچی نندانک ءَ مئے برات ءُ مات ءُ گوھارانی ھوسلہ بُرز انت ما دم نہ برتگ –

مچی ءَ تران کنان زین گُل ءِ شازیہ ءُ دگہ زالبولاں تران کنان ءَ گوشت کہ اے زوراک کہ مدامی مارا جست گر انت بلے مار ءَ چہ اے زمین ءَ پُل ایت نہ کن انت، تیاب ءَ چہ ماں چہ پچ گپت نہ کن انت ما باشعوریں راجے شما اے سابت کتگ کہ ھزارانی کچ ءَ ڈن ءَ در اتکگ ات ءُ مروچی دنیا ءِ چم شمار ءَ سک انت –

بلوچ ءِ ھر جیڑہ ءِ ھست آ دریا وردانی جیڑہ بہ بیت یا گار ءُ بیگواھیں مردمانی جیڑہ بہ بیت اے نوں شمئے دست انت شما ھمے وڑ جنزان بہ بیت گیش ءُ گیوار بنت –

بلوچستان میڈیکل نودربرانی زھرشانی برجاہ، شال ءَ ھوار جتا جتائیں جاھاں نودربراں پاکستان میڈیکل کمیشن ءِ ھلاپ ءَ زھرشانی کرتگ –

جھالاوان میڈیکل کالج، تربت میڈیکل کالج ءُ لورلائی میڈیکل کالج ءَ ءَ پی ایم سی ءِ نیمگ ءَ ناگتی ٹیسٹانی دیگ ءِ جار ءَ پد بلوچستان میڈیکل کالجز ءِ نودربر زھرشانی کنگ ءَ اَنت-

شال پریس کلب ءِ دیم ءَ میڈیکل نودربر زھرشانی کنان ءَ پی ایم سی ءِ نیمگ ءَ برجاھیں ٹیسٹ ترندی ءَ ایر جنگ بیتگ اَنت، نودربراں گوستگیں بازیں روچاں بنجل جتگ ءُ نشتگ اَنت ءُ زھرشانی کنگ ءَ اَنت ھمے وڑ سوشل میڈیا ءَ پی ایم سی ءِ ھلاپ ءَ زھرشانی ٹرینڈ کارمرز کنگ ءَ اَنت –

زانگ بہ بیت پاکستان میڈیکل کمیشن ءِ نیمگ ءَ بلوچستان ءِ میڈیکل کالجزاں پاکستان میڈیکل کمیشن ءِ نیمگ ءَ ناگتی ٹسٹانی جار جنگ بیتگ اَنت چریشی ءَ پد میڈیکل کالجز ءُ بلوچستان ءِ نودربر زھرشانی کنگ ءَ اَنت –

پی ایم سی ءِ نیمگ ءَ اے میڈیکل کالجزاں شنگ کرتگیں نوٹس ءِ رد ءَ بلوچستان ءِ میڈیکل کالجز سرجمی ءَ پی ایم سی ءَ رجسٹرڈ نہ بیتگ اَنت بلے زلفقار علی میڈیکل یونیورسٹی اسلام آباد ءِ چیردستی ءَ ھمک کالجزانی واستا گچینی ءِ ٹیسٹ لاگو کنگ بیتگ اَنت –

زھرشانی کنوکانی گوشگ اِنت کہ اے کالجزانی نابودانی وانگ ءِ سر ءَ کریجوئشنر ءِ واستا جیڑگ ءَ بیتگ اَنت نِی پی ایم سی ءِ جار ابید اژدری پریشر ءُ چکاس جیڑھانی دیمپانی اِنت –

ھندوستان ءِ زیر انتظام ءَ کشمیر ءَ سلاہ بندیں مردمانی پولیس ءِ بس ءِ سر ءَ اُرش کُتگ، اُرش ءِ تہءَ سَے کارمند مُرتگ اَنت وھدیکہ یازدہ ٹپی بیتگ اَنت۔

سرینگر ءَ سیادی داروکیں اھوالکارانی ردءَ سلاہ بندیں مردماں پولیس بس ءِ سرءَ سَے نیمگ ءَ اُرش کُتگ کہ اِشی تہءَ سَے کارمند مُرتگ اَنت ءُ یازدہ ٹپی کنگ بیتگ اَنت۔

ٹپیگ ءُ مرتگینانی جون سول ھسپتال ءَ برگ بیتگ اَنت کہ آودہ ھسپتال واکدارانی ردءَ یک کارمند یے جاور نگیگ اَنت وھدیکہ دگہ کارمند چہ ھترہ ءَ ڈَن اَنت۔

اُرش سرینگر ءِ پنتھہ چوک کھنمو دگ ءِ سر ءَ زیتون ءِ ھندءَ ھندوستانی ریزرو پولیس ءِ 9 می بٹالین ءِ اولاک ءِ سرءَ اُرش بیتگ۔

پھازگی لشکریاں دمگ ارش ءَ پد انگیر کتگ ءُ ارشکارانی پَٹ ءُ پول بندات کُتگ۔

بلوچستان ءِ نودربر گلاں بلوچ اسٹوڈنٹس ایکشن کمیٹی ، بلوچ اسٹوڈنٹس آرگنائزیشن ، بلوچ اسٹوڈنٹس آرگنائزیشن ( پجّار) پختون اسٹوڈنس فیڈریشن ، پی ایس ایف ( آزاد) ءُ پی ایس او ءَ وتی شنگ کتگیں درشان ءِ تہ ءَ یکجاھیں جار ءَ دمگی انتزامیہ ءَ مکن کتگ ءُ گْوشتگ کہ پرایمنی نودربرانی بگیر ءَ ھچ وڑیں لُٹ ءُ کُٹ ءُ دزگیری ڈول ءُ پیم میار اِیت بلکیں شھدربرجاہ ءِ انتزامیہ چہ نودربرانی ھکیں لوٹاں زوت گامگیج ءِ ھاتر ءَ چست ءُ ایر بہ کن اَنت-

جار ءِ تہ ءَ گوشتگ ئے کہ اگاں نودربرانی بگیری ءَ کجام وڑیں گامگیج زورگ بوتگ یا کہ دزگیری ءَ دیم ءَ کنز اِتاں گُڑا سرجمیں نودربر گلاں یکجاھیں بے سلکیں کردارانی بگیری ءَ تُرندیں گام چست کن ایں-

بلوچستان ءَ نودربر گلاں وتی یکجاھیں جار ءِ تہ ءَ گْوشتگ کہ سردار بہادر خان ویمن یونیورسٹی ءِ نودربر گوستگیں چیزے ھپتگاں چہ شھدربرجاہ ءَ انتزامیہ ءَ چہ لوٹ کنگ ءُ آھگ ءَ اَنت کہ شھدربرجاہ بُنکی آسراتی نیست اَنت ءُ نودربر اے تُرندیں سارتی ءَ کلاسز ءَ ھوار چکاسانی تیاری کُت نہ کن اَنت اگاں ھمے وڑ شھدربرجاہ انتزامیہ نودبراں آسراتی بدے اَنت تاں کہ ھاسٹل ءَ جھمنند بہ بنت ءُ نودربر چکاس دات کُت بہ کن اَنت گُڑا دو ماہ ءَ واست ءَ سارتی ءِ چوٹی بدے اَنت ءُ مارچ ماہ ءَ چکاساں بدے اَنت بلے ایس بی کے یونیورسٹی انتظامیہ وتی ھمکی ءِ سر ءَ اوشتگ ءُ نودربرانی لوٹانی گوشدارگ وتی جاہ ءَ نودربرانی سر ءَ زور دیگ ءَ اَنت-

آھاں گْوشتگ کہ شھدربرجاہ ءِ انتزامیہ رویش ھچ وڑ کبول نہ اِنت- ایس بی کے شھدربرجاہ ءِ انتزامیہ بے سوب اِنت کہ اود ءَ نودربرانی آسراتیاں دات کُت نہ کنگ ءَ ایں ءُ نودربرانی گپ ءَ گوشدارگ ءَ نہ اَنت ءُ نودربرانی توار ءَ ایر موش کنگ ءَ وڑ وڑیں ھنر کارمرز کن اَنت کہ آئی ءِ یک پدریں مسال نودربر گلانی نیمگ ءَ چہ سرجمیں شال ءَ زانشتی ادارہ بند کنگ ءِ جار ءَ بگیر ءَ شھدربرجاہ انتزامیہ کارڈمل پدریں سبوتے شھدربرجاہ انتزامیہ نودربر گلانی جار ءَ پروشتگ ءُ ھمود ءَ نودربر زورانسری ھاسٹلاں چہ کشگ ءُ کلاساں برگ بنت-

درشان ءِ گُڈی ءَ نودربر گلاں گوشتگ کہ سردار بہادر خان ویمن یونیورسٹی ءِ زھرشانی ءَ نودربرانی لوٹاں تچک ءُ ھک سر ءَ اَنت نودربرانی لوٹانی منگ وتی جاہ ءَ زھرشانی کنوکیں نودربرانی بگیری ءَ گامگیج زورگ ءَ دمگی انتزامیہ ءَ ئے لوٹائینگ دردناک اِنت ءُ بدیں کردگارے سرجمیں نودربر گلانی نودربرانی لوٹانی منوگری کن ایں ءُ شھدربرجاہ انتزامیہ ءَ چہ دزبندی کن ایں کہ نودربرانی لوٹانی سر ءَ زوت چہ زوت ءَ گامگیج بزور اَنت اگاں نودربرانی لوٹانی منّگ نہ بوتاں ءُ کجام وڑیں بدیں سلوک کُت گُڑا نودربر گل تُرندیں گام چست کنگ بیت اشی ءِ زمہ واری شھدربرجاہ انتزامیہ ءُ دمگی انتزامیہ بنت….!!!

دی بلوچستان پوسٹ

شال ءَ سردار بہادر خان زالبولانی شھدربرجاہ ءِ نودربراں یونیورسٹی میں آسراتیانی نہ بیگ ءُ زالبولیں نودربراں دیمپانیں جیڑھانی سوب ءَ وائس چانسلر ءِ کارگس انگیر کُتگ ءُ زھرشانی کُتگ۔

زھرشانی کنوکاں گُشتگ کہ زالبولیں نودربرانی شھدربرجاہ ءِ ھاسٹل گیس، آپ ءُ دگہ آسراتیانی نہ بیگ ءِ سوب ءَ جیڑھانی دیمپان اَنت، باز رندءَ شھدربرجاہ ءِ واکدراں گُشگ ءَ پد نودربر زھرشانی کنگ ءَ لاچار بیتگ اَنت۔

زھرشانی کنوکاں گُشتگ کہ شھدربرجاہ ءِ واکدارانی نادلگوشی ءُ شھدربرجاہ ءَ گیس ءُ لین ءَ ھوار آپ ءِ نہ بیگ ءِ سوب ءَ نودربر بیمار بیتگ اَنت۔

زھرشانی کنوکاں چانسلر ءِ کارگس ءِ دیما نندانک داتگ ءُ واکدارانی نالائقی ءِ ھلاپ ءَ ترندیں اوگام جتگ ءُ نودربرانی جیڑھانی گیش ءُ گیوار کنگ ءِ لوٹ کُتگ۔

سردار بہادر زالبولانی شھدربرجاہ ءِ یک نودربرے ءَ گُشتگ کہ گوستگیں بازیں روچاں چہ ھاسٹل گیس رسگ ءَ نہ اِنت کہ اِشی سوب ءَ بازیں نودربر سردی ءَ نندگ ءَ لاچار بیتگ اَنت ءُ اِشی سوب ءَ مئے لھتیں ھمراھیں نودربر فالج ءَ گپتگ اَنت۔

آیاں گُشتگ کہ زھرشانی کنوکاں بازیں رند ءَ وتی گپانی ایر کنگ ءُ بُنکی آسراتیانی نرسگ ءَ پد ما زھرشانی کنگ ءَ لاچار بیتگیں بلے واکدار گیر سنجیدہ اَنت ءُ ھاموشی ءِ درانگازی کنگ ءَ اَنت۔

زھرشانی کنوکاں گُڈسرءَ گُشتگ کہ واکدار زیتاں زیت شھدربرجاہ ءِ ھاسٹل ءُ دگہ جاھاں نودربرانی ھاترءَ بُنکی آسراتیانی رسگ ءَ سدکی بہ کن اَنت ءُ سارتی ءِ سوب ءَ شھدربرجاہ ءِ تہءَ گیس ءِ کمی ءَ ھلاس بہ کن اَنت دانکہ نودربر سارتی ءَ زند گوازینگ ءَ لاچار مہ بنت۔

بلوچ یکجھتی کمیٹی کراچی، شال، تربت، ڈی جی خان، بارکھان، ھب، اُتل، ھزدار ءُ پنجگور ءِ جارکشاں رسانکدراں وتی شنگ کرتگیں یکجاھی درشان ءِ تہ ءَ گوشتگ کہ کراچی ءَ ھوار سرجمیں بلوچستان ءَ بلوچ یکجھتی کمیٹی ءِ نیمگ ءَ چہ بانک کریمہ ءِ شھیدی ءِ سالروچ ءَ آئی ءِ بے دروریں کرد ءَ دروت ندر کنگ بیت ءُ مراگش برجم دارگ بیت اِنت –

جارکش ءَ گوشتگ کہ کریمہ بلوچ جانی دروشم ءَ راج ءَ چہ جُتا کنگ بوتگ بلے بانک کریمہ ءِ پگر پلسپہ جُھد ءُ کربانی مدامی زندگ انت ءُ ھر آؤکیں پدریچ ءِ ھاتر ءَ پگری ءُ زانشتی کرد ءَ پیلو کن انت – بانک کریمہ ءَ یک رھشون ءِ دروشم ءَ راجی پجار ءُ ھکانی ھاتر ءَ جھد کرتگ ءُ بلوچ راجمان ءِ تہ ءَ زالبولانی راستیگیں کرد پیلو کتگ وھدیکہ آئی ءَ یک زالبول ءِ جاہ ءَ راج ءِ رھشونی پرز ءِ پیلو کنان ءَ بلوچ راجمان ءِ راستیگیں اقدار ءُ روبیدگانی ترجمانی کتگ – بلوچ زالبولاں بانک کریمہ ءِ پدر رنداں رؤگ لوٹیت ءُ وتی راجی زمہ واری پیلو کنگ لوٹ انت اے درگت ءَ بانک کریمہ ءِ زند، جھد پگر ءُ پلسپہ ءُ تمردیں کرد روکیں چراگ ءِ بستار انت –

یکجاھیں درشان ءِ تہ ءَ گوشگ بوتگ کہ بانک کریمہ ءَ بلوچ ءَ دروت ندرکنگے ھاتر ءَ بلوچ یکجھتی کمیٹی کراچی ءِ نیمگ ءَ چہ کراچی پریس کلب ءِ دیم ءَ مراگش ءِ اڈ دئیگ بیت اِنت – شال ءَ بلوچ وومن فورم نیمگ ءَ بانک کریمہ ءِ درگت ءَ بؤکیں مراگش ءِ پلامرزی ءُ آھاں ھر وڈیں کمک کنگ بیت انت – وھدیکہ بانک کریمہ ءِ جھد ءُ آئی بیھال نہ بؤکیں کرد ءُ بے بھائیں جھد ءَ دروت ندر کنگے ھاتر ءَ بلوچستان ءِ جتا جتائیں ھند دمگ تربت، پنجگور، گوادر، پسنی، ڈی جی خان، بارکھان، ھب چوکی، اُتل، ھزدار ءُ دگہ دمگاں مرگش اڈ دئیگ بیت اِنت –

اے درگت ءَ آھاں چہ بلوچ راج ءَ لوٹ کتگ کہ بلوچ راجی رھشون شھید بانک کریمہ بلوچ ءِ جھد ءُ کربانیاں دروت ندر کنگے ھاتر ءَ سرجمیں بلوچستان ءَ بووکیں مراگشاں بھر بہ زوریت –

نبشتانک: راجی زُبان وانینگ لوٹ ایت

نبشتہ کار: ابدلستار بُگٹی

دی بلوچستان پوسٹ

انچوشکہ ما دْراہ سرپد ایں کہ مرچاں بازیں بلوچ بْرات ءُ گْوھار پہ راجی زُبان ءِ دیمروئی ءَ ماں وٹس ایپ، ٹیلی گرام، پیسبُک، تندجاہ ءُ دگہ دامگی پریاماں کار ءَ اَنت۔ ھر کس راجی زُبان ءَ وت دربرگ ءُ دیم ءَ ھم وانینگ ءَ اِنت۔ چوناھا راجی زُبان ھما وھد ءَ دیمروئی کنت وھدے کہ ما ھرکس راجی زُبان ءِ ھزمتکار جوڑ بَہ ایں، بزاں ما ھرکس راجی زُبان ءَ وان ایں ءُ وانین ایں۔ اِے باز وشیں گپے کہ ما دْراہ زیت وتی راجی زُبان ءَ وت وان این ءُ دربر ایں ءُ پد ءَ دیم ءَ وتی سْیاد، وارس، سنگت ءُ دزگْوھاراں ھم راجی زُبان ءِ بارو ءَ آگاھی بہ دے ایں۔

اے درگت ءَ پہ بلوچی نبشتہ دربرگ ءَ من راج ءَ یک سوجے دیگ لوٹ آں چوناھیگا شُما وت بلوچ اِت پمیشکا شما ابرمی وتی ماتی ءُ راجی زُبان ءِ وانگ ءُ سرپد بیگ ءَ زبر اِت۔ بزاں شُما وتی راجی زُبان ءِ وانگ ءَ ھچبر تکانسر نہ بَہ اِت بزاں راجی زُبان ءِ وانگ ءُ پھمگ پہ بلوچ ءَ ھچ مُشکلے نہ اِنت کہ ھر کس وتی جِند ءِ زُبان ءَ سرپد بیت پمیشکا ھر بلوچے بلوچی ءَ وت ونت ءُ سرپد بیت۔ گُڑا باید اِنت شُما لھتیں روچاں بلوچی نبشتانک، آزمانک ءُ گْوشکنداں وانان کن اِت، بزاں شُما ھم یک انچیں دابے ءَ بلوچی نبشتانک، آزمانک ءُ گْوشکنداں بہ وان اِت کہ شُما وت استاد اِت بزاں انچو نبشتھاں ھورت ءُ دلگوش ءَ بِہ وان اِت کہ شُما چَہ دِگہ نودربرانی نبشتھاں ءُ آیانی نزوری ءُ ردیاں چارگ ءَ اِت۔

بلے بَے (شَرت) ایش انت کہ شُما پیسر ءَ وت بلوچی درونتاں سرجمی ءَ بہ وان ئے ءُ ھمے وڑیں درونتاں گوں گْونڈیں گالرِداں وت ھم ھیل (پریکٹس) بہ کن اِت بزاں ھمے وڑیں کسانیں درونتاں شُما وت تیار کن اِت ءُ نودربراں وانین اِت، یکبرے بلوچی درونتانی وانگ ءَ رَند شُما انچیں دابے ءَ بلوچی وانان کن اِت کہ شُما وت استاد اِت ءُ نی شُما نودربرانی رَدیاں راست کنگ ءَ اِت گُڑا ھمے داب ءَ شُما وت راجی زُبان ءَ زیت دربر اِت چریشی ءَ مستریں پائدگ ایش انت کہ شُمارا بلوچی درونت ھم مُدام تاجگ بنت۔

گْوشگ ءِ مُراد ایش اِنت کہ راجی زُبان ءِ دربرگ ءَ اُستاد نہ لوٹ ایت بلکیں مھر ءُ دلبڈی لوٹ ایت، اگاں شُمارا زُبان دوستی ءُ راجدوستی ءِ مارشت ھست، اگاں شُما زُبان دوست اِت گُڑا شُما وت چہ پیسبُک ءُ بلوچی وٹس ایپی وانگجاھاں ءَ راجی زُبان ءَ دربُرت کن اِت وت بلوچی درونتاں نبشتہ کن اِت ءُ راج ءِ نودربراں ھم وانین اِت۔ دومی وھدیکہ تو ھر چیزے نبشتہ کن ئے گُڑا آئی ءَ یکبرے وت چمشانکے بہ دئے۔ وتی ردیاں وت راست کنگ ءِ جُھد بہ کن ئے، باید اِنت ما اشتاپ مہ کن ایں بلکیں وتی ھر نبشتگیں چیزاں ھورت چاری ءَ وانین ءُ آیانی ردی ءُ نزوریاں برابر بہ کن ایں گُڑا ما وتی راجی زُبان ءِ رھبند بلد بَہ ایں من اُمیت کن آں کہ شُما زیت وتی راجی زُبان ءِ نبشتہ دربر اِت چوناھیگا شُما وت بلوچ اِت پمیشکا پہ شُما بلوچی نبشتہ دربرگ ھچبر اڑ ءُ اڑاندے نہ بیت بس شُما اشتاپ مہ کن اِت بلوچی وت دربر اِت بلکیں شُما بلوچی درونتاں تیار کن اِت وت راج ءِ نودربراں وانین اِت۔

باید اِنت ما وٹس ایپی گلاں اڈکنان ءَ وتی لوگ ءِ مردماں بلوچی ءِ درونتاں وانین ایں۔ بزاں مارا تھنا بلوچی وت دربرگی نہ اِنت بلکیں سْیاد ءُ لوگ ءِ مردماں ھوار سرجمیں راج ھم وانینگی اِنت۔ ما ھرکس ءَ لوٹ ایت کہ بلوچی زُبان ءِ اُستاد جوڑ بِہ بہ ایں۔ کالج ءُ یونیورسٹیانی بلوچ نودربر باید انت وٹس ایپ گروپانی دربرجاھاں اڈ کن اَنت ءُ راج ءِ راجی زُبان ءِ درونتاں وانین اَنت۔

وھدے کہ شُما بلوچی نبشتہ کنگ ءَ بُنگیج کن اِت گُڑا ھمے ھیالداری بہ کن اِت کہ ھر چیزے شما نبیسّگ ءَ اِت گُڑا شُما وت ھم ھمے نبشتگیں چیزاں دو سے رند ءَ چمشانک بہ دے اِت ءُ وتی نبشتہ رَدیاں وت کَشان کن اِت چی ءَ کہ ھر زُبان ءِ ندکار ءُ نبشتہ کار نبیسّگ ءِ وھد ءَ اشتاپیگ نہ بنت بلکیں دو سَے رند ءَ وتی نبشتگیں گالرِداں وت وانان ءُ وتی رَدیاں راست کن اَنت۔

نی اے مئیگ ءُ شُمئے راجی زمہ واری اِنت کہ ما بلوچی وت دربر ایں ءُ وتی راج ءَ ھم وانین ایں کہ مئے بلوچ راجی زُبان ءَ ھم گیدی ءِ دگریں زُبانی ڈول ءَ دیمروئی بہ رس ایت۔ چوناھیگا اگاں ما دگہ بلوچ نودربراں وانین ایں گُڑا ما وت ھم زبر بہ ایں ءُ وت ماں وت وانگ ءَ مئے زیردستیں راجی زُبان ھم دیمروئی کنت چو کہ زُبان وانگ ءُ وانینگ ءِ برکت ءَ دیمروئی کن اَنت۔ چوناھا اے مئے تیوگیں راج ءِ زمہ واری اِنت کہ ما وتی راجی زُبان ءَ وت بِہ وان ایں ءُ راج ءَ ھم بہ وانین ایں۔ گِند ئے دُنیا ءِ تہ ءَ ھچ کار مُشکل ءُ نابوتنی وَ نہ اِنت اگاں ما بلوچ راج ءِ وانِندگ وت ماں وت یکمُشت ءُ تپاک بِہ بَہ ایں گُڑا بلوچ راج ءِ تہ ءَ راجی زُبان ءِ وانگ ءُ زانگ البار بیت۔ پہ راجی زُبان ءِ دیمروئی ءَ ما شُمئے ھمراھداری لوٹ ایں۔ باید اِنت ما ھرکس بلوچی وانینگ ءِ جُھد ءَ بہ کن ایں گُڑا دربر ایں۔ اگاں ما دربرگ ءِ جُھد ءَ کن ایں گُڑا ما دیر سوبین بہ ئے پمیشکا ما گْوش ایں وھدے کہ شُما وانینگ ءِ جُھد ءِ بَہ اِت گُڑا بزاں شُما زُبان دوست ءُ راج دوست اِت۔ بلوچ راج زِندگ بات ءُ بلوچی مُدام دیمروئی بہ کنات۔

اِے کلوہ ءَ دیم ءَ ھم روان بہ کن ئے کہ راج ءَ پہ وتی راجی زبان ءِ وانگ ءُ زانگ ءَ سرپدی ءُ آگاھی بہ رس ایت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گورنمنٹ بوائز مڈل سکول ءَ چھوٹازئی درنیلی نال ءِ نیمگ ءَ یک مراگشے برجم دارگ بیتگ کہ آئی ءِ تہ ءَ فیمیل ایجوکیشن ءِ زانگ، وانگ ءِ ارزشت، ٹائم منیجمنٹ نال ءِ وانگی جیڑھانی سر ءَ باوست کنگ بیتگ اَنت ءُ اے مراگش ءَ نال ءِ نودربر ءُ نال ءِ وانگی سروکاں بازیں کچے ءَ بھر اش زرتگ تران کنوکاں وتی ھیال درشان کتگ اَنت ئِے –

مراگش ءَ گورنمنٹ بوائز ھائی سکول نال ءِ ھیڈماسٹر محمد یعقوب صاحب، کاروان علم حق ءِ چیئرمین اسد نور، بلوچ اسٹوڈنٹس ایکشن کمیٹی نال زون ءِ سروک صلاالدین بلوچ، سلطان احمد بلوچ، مراد صاحب، ابوذر بلوچ، حافظ ثناہ اللہ بلوچ، سنگت اسلم بلوچ، بی ایس او پجار ءِ حاتم بلوچ ءَ وتی وتی ھیال ءُ لیکہ درشان کتگ اَنت –

مراگش ءَ مھمد یعقوب صاحب، اسد نور بلوچ، صلاح الدین بلوچ، حاجی محمد حسن، سر مراد صاحب، سلطان احمد بلوچ پہ گچینی ءِ مھماناں بھر اش زرتگ ءُ پاک تاک ءِ وانگ ءَ بیتگ –

مراگش ءَ محمد یعقوب صاحب ءَ وتی ھیالانی درشانی کنان ءَ گوشتگ ئِے کہ مروچی اے جاہ ءَ سر بیتگ من ءَ باز وشی سما بیگ ءَ اِنت کہ منی نودربر تلو ءِ سر ءَ گپ کنگ ءَ اَنت من وت ابکھاں اشانی جوان جوانیں ھیلکاری بیتگ اَنت، آئی ءَ گُشتگ من امیت کن آں اے درچ برجاہ بیت اِنت –

آئی ءَ ورنایاں گوں گپ کنان ءَ گوشتگ کہ شمارا لوٹ ایت شما وتی کُچگ ءُ کلگاں اسکولاں اے وڑیں سیشن برجم بہ دار اِت دانکہ آؤکیں باندات ءَ گھتر کت بہ کن اِت، آئی ءَ گیش گپ کنان ءَ آئی ءَ دیمتر ءَ گپ کنان ءَ گوشتگ کہ مروچی ما جاپان ءُ چائنا ءَ بہ چاریں آ وانگ ءِ تکاں کجام کساس ءَ دیم ءَ روگ ءَ اَنت گڑا اشی ءِ مستریں سبب ایش اِنت کہ وانگ ءُ زانگ ھر بنی آدم ءَ دیم ءَ بارت اِنت، مئے واھش ھمے بیت اِنت ما پر ایمنیں زندے بہ گوازین این ءُ ھرکس مئے ستاہ ءَ ھم بہ کنت بلے اشی ءِ واستا مارا جد ءُ جھد کنگی اِنت –

وانگ ءِ درگت ءَ بلوچ اسٹوڈنٹس ایکشن کمیٹی نال زون ءِ سروک صلاح الدین بلوچ ءَ تران کنان ءَ گُشتگ کہ بلوچ نودربرانی وانگ ءِ جیڑہ جمھوری رنگ ءَ مئے جد ءُ جھد اولی گام اِنت – اگاں ما بلوچ دمگاں وانگ ءِ جاورھالاں بہ چاریں گڑا مارا اشی ءِ کچو کنگ ءَ جیڑہ نہ بیت کہ مئے گوستگیں وھداں بلوچ دمگاں وانگی جیڑہ گیشتر سنگین بیان اَنت- ھمود ءَ یک نیمگے ءَ بلوچستاب ءِ وانگجاھاں وانگی تک سرجم ءَ ھشکیں سیاھگ اَنت ءُ دومی نیمگ ءَ کالج ءُ مزنیں وانگجاھاں استادانی کمی اِنت ءُ چریشی ءِ سبب ءَ وانگی تک سرجم کنگ ءَ جیڑہ جوڑ بیتگ اَنت –

آئی ءَ گُشتگ کہ نودربراں وت المی برزی ءِ واستا یک اژدری ءِ جوڑ بیتگ کہ ھمود ءَ نہ کُٹوکیں رنگے ءَ چاگرد ءِ تہ ءَ الم ءِ گیش کنگ ءَ جھلانکی ءِ مانگیجگ ءَ راجی زمہ واری ءِ بار کپ اَنت –

اسد نور بلوچ ءَ وتی ھیال ءُ لیکہ درشان کنان ءَ گُشتگ کہ مئے چاگرد ءِ تہ ءَ فیمیل ایجوکیشن ءِ سر ءَ ھچ رنگ ءَ دلستکی زیرگ بیگ ءَ نہ اِنت چُشکہ آ ھم مئے چاگرد ءِ بھر اَنت راج ھما وھد ءَ دیمروئی کن اَنت کہ آئی ءِ مات وانندگے بیت اِنت ءُ گڑا سرجمیں راج ءَ وانگ ءِ چراگ ءَ برز کرت کنت مروچی مئے چاگرد ءَ زالبولاں گیرت ءِ نام ءَ لوگاں درایگ ءَ نئیل اَنت وھدیکہ زالبول بیمار بیت اِنت گڑا آئی ءَ مردینیں ڈاکٹر ءِ گور ءَ بر اَنت آئی ءَ گُشتگ کہ درنیلی ءَ یک پرائمری گرلز اسکولے ھست اشی ءِ ٹیچر ءَ سلام پیش کن آں آ سھب ءَ نال ءِ ھند ءَ کیت حری ءَ وتی ڈیوٹی ءَ سرجم کنت شپ ءَ وتی میتگ حری ءَ جنکاں وانین ایت-

نیاد ءَ حاتم بلوچ ءَ وتی ھیال ءُ لیکہ درشان کنان ءَ گوشتگ کہ دنیا ءِ تہ ءَ ھما مردم سوبمند بیتگ اَنت آیاں وھد ءِ کدر کرتگ ءُ بے سوب ھما بیتگ اَنت کہ آیاں وھد ءِ کدر نہ کرتگ دنیا ءِ ھر ھما چیز واتر رس ایت بلے یک گوستگیں وھدے نہ رس ایت مروچی ھوٹل آباد اَنت، کرکٹ گراؤنڈ آباد اَنت بلے بدبھتی ءَ سکول ءُ کالج ویران اَنت –

نیاد ءَ مراد بلوچ ءَ وتی ھیال ءُ لیکہ درشان کنان ءَ گوشتگ کہ راجانی تہ ءَ ھما راج وشھال اَنت آ جوانیں جاھاں وت ءَ سر کن اَنت ءُ چوشکہ وتی استادانی کدر ءُ نھاد ءَ زان اَنت ءُ مئے جھد ھمیش اِنت وتی ھنداں دمگاں پت ءُ مات وتی زھگاں وانگجاھاں دیم دیگ ءَ وتی کرد ءَ پیلو بہ کن اَنت –

سلطاب اھمد ءَ وتی ھیال ءُ لیکہ درشان کنان ءَ گوشتگ کہ مروچی من ءَ ھمے بژنی اِنت مئے دمگ ءَ وانگجاہ بربادی ءِ دیمپان اَنت اشی ءِ مستریں سبب پت ءُ مات وتی زھگاں وانگ ءِ نیمگ ءَ نہ ٹوھین اَنت مروچی ما اشی ءَ اھد کن ایں وتی زھگاں وانگ ءِ نیمگ ءَ ٹوھینگ ءِ کرد ءَ پیلو کن ایں –

اسلم بلوچ ءَ وتی ھیال ءُ لیکہ درشان کنان ءَ گوشتگ کہ مروچی ءَ چہ پنچ سال پیسر وھدیکہ اے اسکول ءَ مولا بکش گدائی کنان ءَ کتگ گڑا آ وھد ءَ وانگی جاور باز جوانتر بیتگ اَنت مروچی ایشی ءَ وتی بے تھمبلی سرپد بہ ایں یا بدبھتی ما وتی اسکول ءَ توجہ دیگ ءَ نہ اِنت ھمے سبب اِنت کہ وانگی ادارہ چہ وانگ ءَ زبھر اَنت مئے چاگرد ءَ زالبول بس لوگ ءَ بند کنگ بنت تنا وھد ءَ اے برجاہ بنت تاں اے وڑیں جاورانی دیمپانی ءَ کن اَنت-

نیاد ءِ گڈسر ءَ گورنمنٹ بوئز مڈل اسکول ءِ چھوٹازئی درنیلی ءِ انچارج قاضی عبدالوحید ءَ وتی آیوکیں مھمانی ءُ کریم عالم بلوچ ءِ ارینجمنٹ ءِ منت گپتگ ءُ اے گوشتگ کہ اے مئے واستا وشی یے گپے کہ مئے کمک ءَ شما مارا کمک کرتگ ءُ گڈسر ءَ درسیں مھمانانی منت گرگ بیتگ ءُ مراگش آسر کنگ بیتگ –

نبشتانک: مزارجان! رُکست اَف، پد ءَ دُچار کپ اِیں

نبشتہ کار: مھروان کمبر

دی بلوچستان پوسٹ

مزار جان! لَھتیں زیبائیں مردُم بَہ اَنت کہ وھد چندے ساھتانی ھاتر ءَ آیاں مئے گون ءَ دُچار گیج اِیت۔ اے ھما مردُم اَنت کہ زندگی ءَ ھر کجا مئے ھمراہ بہ اَنت، یاتانی تھا ، جیڑگانی تھا، واب ءُ ھیالانی تھا ءُ رودپتر ءِ تاکانی سر ءَ بس مئے کسمت ءَ نہ بَہ اَنت۔ آ چو زیبائیں مارِشتانی وڑ ءَ مئے تھا مُدامی جلّ اَنت۔ چو یاتانی دْروشم ءَ مئے دل ءِ سرزمین ءِ سر ءَ رُد اَنت۔ چو بشّی جمبر ءَ مئے سر ءَ ساھیل ءُ ساچان بہ اَنت ءُ چو بُتکگیں سنج ءَ وتی رنگاں مئے سر ءَ شِنگ ءُ تالان کن اَنت۔ گندئے ھَورانی موسم ءَ تْرمپ زمین ءِ دلبند ءَ کپ اَنت، گُڑا ھاک ءِ چونیں وشبوھے چِست بیت، اے وشبو اِنچو زوت بیھال کنگ نہ بیت۔ ھمے وڑ ءَ ھما مردُم چو ھمے وشبو ءِ پیم ءَ زوت بیھال نہ بہ اَنت۔ ھما کہ زمین شیدا اَنت، آ چد ءُ گیش بیھال کنگ نہ بہ اَنت۔

مزار جان! تو ھم ھما زیبا ءُ زمین شیدائیں مردُمانی رم ءَ ھوارے کہ تئی شموشگ اِنچو ارزان نہ اِنت۔ گْوش اَنت مردُم مِر اَنت، بلے آھانی کِرد زندگ مان اَنت۔ آھانی داتگیں کُربانی مئے دل ءِ تاراں سُرین اَنت، جیڑگانی دریگاں پچ کن اَنت، جوزگانی آس ءَ گیش دمین اَنت، مارشتاں زُبان بکش اَنت ءُ درداں کرار، آیانی بُراِتگیں پند ءُ رِتکگیں ھون مئے رھشونی ءَ کن اَنت ءُ ویرانیں چماں زیبائیں واباں سمبھین اَنت۔ گپّے زان ئے ھما مردُم واب گِندگ زانت، گُڑا آ ھچبر نہ مِر اِیت۔ گارشیا مارکیز گْوش اِیت “ھما مردم مھر کنگ نہ زانت، گُڑا آ زوت پیر بیت۔ ھما کہ واب گندگ نہ زانت آ زوت مِر اِیت”۔

مزار جان! واب گندگ ءِ ھاتر ءَ مارا وتی دُرستیں واب آجو کنگ لوٹ اَنت۔ وھدے واب چہ وھد ءِ کھرمانیں دستاں آجو بہ بہ اَنت، گُڑا آ کدی ھم پیر نہ بہ اَنت، ناکہ مِر اَنت، بلکیں مُدام ورناہ بہ اَنت ءُ مارا دیم ءَ جُنزگ ءِ سِکین ءَ دے اَنت۔ مردُم بہ مِر اِیت ھم بلے آئی ءِ کِشتگیں واب چو درچک ءَ رُد اَنت ءُ سر سبز بہ اَنت۔ ھمے واب زُوراکی ءِ بستگیں مُھریں کلاتاں ڈورین اَنت۔ تلاریں کوھاں چہ شیر ءِ جُوہ ءَ تاچین اَنت۔ گُلامی ءِ سیاہ ءُ تھاریں شپاں گوں مھلبیں بامے ءَ بدل کن اَنت۔

مزار جان! تو مروچی مئے درمیان ءَ ساڑی نہ ئے، بلے تو زندگ ئے۔ بہ گندئے نی تئی بدن ھزاراں من ھاکانی چیر ءَ ھاکے جوڑ بیتگ، بلے تو ھَست ءُ ابدمان ئے۔ تئی ادیرہ ءَ کسے پُلّانی چادر تالان کنت شر، نہ کنت شر، بلے چو سْرپتگیں گُلاب ءِ پُل ءَ تئی وشبو مئے چاریں آتراپاں شنگ ءُ تالان اِنت۔ باریں تئی کبر ءِ سرونّ ءَ کندیل روک کنگ بہ اَنت یا نہ، بلے تو مئے دل ءُ ارواہ ءِ سر ءَ مُدام چو چراگ ءَ بَل ئے۔

مزار جان! تو مُدام سر چِست کُتگ ءُ زندگی گْوازینتگ، آجوئی ءَ گوں ترا باز مھر بیتگ۔ پمیشکا تو چہ گُلامی ءَ نپرت کُتگ ءُ زُلم ءُ زوراکی ءِ بگیری ءَ توار چِست کُتگ۔ اے گپّانی گْواھی ءَ کراچی ءِ تنک ءُ ترپشیں دمک، بلوچستان ءِ پراہ ءُ شاھیگانیں کُوچگ، نیلیں زِر ءُ ھشیمیں کوہ دے اَنت کہ تو گھگیری ءِ کندیل ھر کُجا بلینتگ۔

مزار جان! تئی لاگریں بالاد ءَ کدی ھم دمبرگ نہ زانت۔ تو مُدام جُنزگ ءَ اِت ئے، سپر کنگ ءَ اِت ئے ءُ کاراں دلگوش اِت ئے، ھردیں من ءُ تو دُچار کپتیں، یا تو نیٹورک ءَ اَتک ئے گُڑا تئی اولی جُست کارانی بارو ءَ اِت اَنت کہ چے کنگ ءَ ئے؟ چے وانگ ءَ ئے؟ چے نبشتہ کنگ ءَ ئے۔؟ بلے نی باز وھد گْوستگ کہ نہ تئی کُلوہ کا اَنت ءُ نہ تئی پُر مِھریں سلامے کَیت۔ ھردیں سنگت جامی نیٹورک ءَ کَیت گُڑا تئی کمی ءَ گیش ماراں، پرچا کہ تو مُدام گوں جامی ءِ ھمرائی ءَ نیٹورک ءَ اتکگ ئے یا کہ وتی دْروت ءُ سلام راہ داتگ اَنت۔

مزار جان! اے ساھت ءَ شپ اِنت، سارتی گیش بوھان اِنت، واب ھم وتی پاداں گِران ءُ پیداک اِنت، بلے من ترا رُکست نہ کن آں۔ بس ھواریں! پرچا کہ تئی وڑیں بچّ کُشگ نہ بہ اَنت، بلکیں پہ وتن ندْر بہ اَنت، پہ گُلزمین ءَ کُربان بہ اَنت، ءُ تئی ارواہ پہ بلوچستان ءَ پہ ندر بوت ءُ بلوچستان ءِ گْوات ءَ گوں ھوار کَپت ءُ بلوچستان ءِ دمک ءُ دراں، کوہ ءُ کوچگاں، ھشیمیں گَٹ ءُ گَراں شنگ ءُ تالان بوت۔ پمیشکا رُکست نہ اِنت ءُ ھواریں، چی ءَ کہ الّم من ءُ تو دُچار کپیں۔۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔