TBP Balochi

چہ سکھر ءَ دیم پہ شال ءَ روکیں پاکستان اسٹیٹ آئل (پی ایس او) ءِ فیلڈ آفیسر عبدالمعید ڈرائیور نوید مھر ءِ ھمراھی ءَ بیگواہ، آئی ءِ پون نمبر بند ءُ آئی ءِ گاڑی جیکب آباد ءَ دزکپتگ –

گیشیں ھالانی رد ءَ سکھر ءَ دیم پہ شال ءَ روکیں پی ایس او ءِ فیلڈ آفیسر عبدالمعید پنام ءِ تنویر سومرو ءُ ڈرائیور نوید مھر ءِ ھمراھی ءَ بلوچستان ءِ ھند ءَ ناگتی بیگواہ بیتگ –

کھول ءِ رد ءَ عبدالمعید سومرو سھب ءَ چہ سکھر ءَ گاڑی ءِ درائیور نوید مھر ءِ ھمراھی ءَ شال ءَ روگ ءَ بیتگ ءُ ھردوکانی پون نمبر بند اَنت ءُ آیانی گاڑی جیکب آباد ءَ دزکپتگ –

کھول ءِ آوار جنی ءِ گمان پدر کرتگ ءُ مزن واکداراں گامگیج زورگ ءِ لوٹ کرتگ –

گوادر ءِ ننداک ءُ بیگواھیں مردمانی درگت ءَ سردار اختر جان مینگل ءَ گوں آج ٹی وی ءِ مراگش (فیصلہ آپکا)پیسلہ شمئے تہ ءَ اھوالکار عاصمہ شیرازی ءِ گوم ءَ درشان کنان ءَ گوشت کہ چوش کہ گوادر ءِ حق دو جیڑہ انت سرجمیں بلوچستان چہ ھکاں زبھر انت اگاں من بہ گوش آں سرجمیں پاکستان ھم وتی ھکاں چہ زبھر من رد ھم نہ اِنت – گوادر ءِ اے جیڑہ انوگینے نہ انت میاں نواز شریف ءِ وھد ءَ کہ پورٹ بندات بوگ ءَ بوتگ ما ھما وھد ءَ گوشتگ کہ اے پورٹ پہ کئی واستا جوڑ بوگ انت کہ اود ءَ نندوکیں مردماں وتی بنکی ھک رسگ ءَ نہ انت پد ءَ ھمے جیڑہ جنرل مشرف ءِ وھد ءَ دیم اتکگ ءُ پد ءَ یکبرے میاں نواز شریف سرکار بوتگ ما کانفرنس ءِ ھم کتگ کہ شما انچو بلاھیں زرے کہ ھرچ کنگ ءَ ات مار ءَ سرپد بہ کن ات کہ اود ءِ دمگی مھلوکاں چی پائدگ رس ایت روزگار اود ءَ نیست – ھما سی پیک ءِ واستا کہ گوادر ءُ سرجمیں بلوچستان ءَ انسٹرائیلیزیشن بوگ ءَ بوتگ آ نہ بوتگ – اود ءَ ھما روزگار کہ بوتگ دریا وردی ءُ بارڈر ءِ سر ءَ کار ءُ بار آ ھم بند کنگ بوتگ اَنت پرچا کہ دریا ورداں پرمیشن ءِ زلورت بوتگ کہ بہ رو انت یکبرے اجازت بگر انت پد ءَ شکار ءَ بہ رو انت اے پیسر ءَ نہ بوتگ بلے انوگیں سرکار بلکیں آھانی سر ءَ ریسٹریکشن جنگ بوتگ اگاں آ دریا ءَ ماھیگ ءِ شکار ءَ رؤنت آھاں اسپیشل پرمیشن ءِ لوٹ ایت چوش کہ اے ملک ءِ کانود ءُ وڑ ءُ ڈول ھمے وڑ ءَ انت کہ آ دریا وردانی اود ءَ اپروچ نہ بیت ھماھانی کہ اپروچ بوتگ آ ماھے یکبرے ھمائی ءَ پرمیشن رس اتگ ھما شتگ ءُ شکار کتگ ءُ ایندگہ ھزارانی کچ ءَ بیروزگار بوتگ انت – بارڈر ءِ درگت ءَ ھم بلوچ سد سال انت ھمے بارڈر سر ءَ روزگار انت بلوچستان ءِ نہ بلکیں سرجمیں دنیا کہ آ گوں بارڈر ءَ نزیک انت آھانی روزگار بارڈر ٹریڈ انت ، بارڈر بند کنگ بوتگ نوں مردم بہ رو انت گڑا کجا بہ رو انت –

آئی ءِ گوشگ ات کہ اشی ءِ تہ ءَ ھچ شک نیست کہ اود ءَ ھر راجدوستیں پاٹی ھست آ پُشت انت بلے اشی ءِ بندات کہ کنگ بوتگ آل پارٹیز ءَ کتگ کہ اشی ءِ تہ ءَ ھما درسیں کہ پولیٹیکل پاٹی ھوار بوتگ انت کہ گوادر ءَ ایکسسٹ کن انت – آئی ءِ تہ ءَ نشنلسٹ، مزھبی، وفاق ءِ ھم پاٹی ھوار بوتگ انت پرچاکہ پاٹی ھرچی بہ بنت بلے آ دمگانی جیڑہ یکین انت آھانی تہ ءَ ھچ دیگری نیست – دمگی مردمانی درسیں پولیٹیکل پاٹیانی مردم ھوار انت ھاں آھانی لیڈرشپ اود ءَ سر نہ بوتگ بلے اود ءَ مئیگ ءُ درسیں پاٹیانی مردم ساڑی انت – چو کہ گوست ءَ ٹٹ ءِ جیڑہ بوتگ ات کہ گوادر بند کنگ بوتگ ات مئے سنگتاں اسمبلی ءِ تہ ءَ توار چست کتگ ات ءُ اے بارڈر ٹریڈ دریا وردانی جیڑہ اسمبلی ھم اورتگ ات ءُ بلوچستان ءِ ھائی کورٹ ءَ ھم اے ٹٹانی دیر کنگ ءِ ھاتر ءَ مئے سنگت شتگ انت ءُ اود ءَ مُلا اشانی رھشونی ءَ کنگ ءَ انت –

اے لوٹانی تہ ءَ کہ دگہ لوٹ ھست انت چوش کہ بیگواھیں مردمانی یل کنگے لوٹ کہ ھوار کنگ بوتگ شمار ءَ لگیت کہ اے لوٹ منّگ بنت عاصمہ شیرازی ءِ جست ءِ پسو ءَ اختر جان مینگل ءَ پسو دات کہ اگاں پاکستان ءِ کانود ءُ رھبند چارگ بہ بنت اے لوٹ منگ بنت اشانی ھر لوٹ ءِ کہ پیسر ءَ بوتگ یا ھنوگ انت یا دیمتر ءَ بنت آھانی تہ ءَ ھچ چشیں لوٹ ءِ نیست کہ پاکستان ءِ کانود ءِ رھبنداں چہ در بہ بنت اے گیش ءُ گیوار بنت بلے ھکمرانانی نیت ساپ نہ انت آ اشانی گیش ءُ گواری ءَ نہ لوٹ انت ھمے سبب انت ھما چیز ءَ کہ پولیٹیکل پاٹی لیڈ کنگ ءَ بوتگ انت آ چہ پولیٹیکل پاٹیانی دائرہ ءَ در اتکگ انت مھلوک ءِ دست ءَ اتکگ انت – وھدیکہ مھلوک ءِ دست ءَ کہ کائینت گڑا ھچ کسے ءِ کنٹرول ءَ نہ بنت آ پد ءَ انکلاب ءِ دروشم ءَ بنت –

گڑا شمار ءَ سما بیت اے چد ءُ گیشتر دیم ءَ روان کنت چوش کہ کلات ءَ زالبول دراتکگ انت سرجمیں بلوچستان ءَ مردین ءُ زالبول درآیگ ءَ انت کہ جیڑہ گیش ءُ گیوار بہ بنت جست ءِ پسو ءَ آئی ءَ گُشت کہ بچار اے مدام انسان ءِ ابرم ءَ بوتگ وھدیکہ آھانی جائزیں لوٹاں نہ منّ ئے ءُ آھانی لوٹانی بدل ءَ لٹ ءُ تیر دئے وت کانود ءَ لگتمال کن ئے ءُ آھانی دیم ءِ دارگ ءِ کوشست ءَ کن اِت گڑا آ چوں شمئے آئین ءُ کانوداں منّ انت –

ٹی ایل پی ءِ جیڑہ بوتگ کہ ریاست ءَ ھمے گوشتگ کہ ما اشانی ترندی ءَ گوں داریں بلے آھانی گوم ءَ معاہدہ بوتگ آھانی گپ ھم زورگ بوتگ گڑا سبب چی انت اے مردم پاد کائینت گپ جن دست گوش انت بلے اشانی گپ گوشدارگ نہ بیت سوب چی انت؟ عاصمہ شیرازی ءِ جست ءِ پسو ءَ اختر جان مینگل ءَ درائنیت کہ اد ءَ گپ چوش انت کہ مئے ھکمران نزورینانی دیم ءَ وتی تاکت ءَ پیش دار انت ءُ تاکتورانی دیم ءَ وتی سر ءَ جھل کن انت – مدامی ملک ءِ تہ ءَ ھم اگاں اشاں چہ گیش تاکتور بوتگ انت آھانی گوم ءَ نشتگ انت مزاکرات کتگ بلکیں آھانی لوٹ منّ اِتگ انت ھم بلے ھما کہ نزور بوتگ انت آ گوں تیر لٹاں مانبستگ انت – اے مدام ھمے ھال ءَ دئے اَنت کہ اگاں شمئے گور ءَ تاکت ھست گڑا تاکت ءں دیم ءَ ما مزاکرات کنیں- مردم نہ لوٹ انت بلے وت مردماں ھما نیمگ ءَ راہ دئے اَنت ئِے – گوادر ءِ مھلوک سرجمیں بلوچستان ءِ ھند ءُ دمگاں چہ پُرایمنیں مردم بوتگ انت آھاں ھچبر زھرشانی نہ کتگ نوزدہ سد ءُ ھشتاد ءَ جیونی کہ مھلوک ءَ آپ لوٹ اتگ آھانی سر ءَ تیرگواری کنگ بوتگ یاسمین نامیں کسانیں زھگے شھید کنگ بوت بلے آھاں زھرشانی نہ کرت بلے انسان ءِ سبر ءِ ھم سیمسرے بیت اِنت ھر یکے بہ بیت الم آ ھاموش نہ بیت –

وھدیکہ نگد کنگ بیت گڑا ھمے گوشگ بیت کہ سردار تاکتور انت ٹکی نزام انت سرداراں بلوچستان وتی دست ءَ کتگ تو وت ھم سردار ئے گڑا اے بلوچستان جیڑھانی تہ ءَ اے جیڑہ ھست اِنت گوں ءُ مستریں جیڑہ سرداری نزام انت؟ پسو ءَ آئی ءَ درائینت کہ گوادر ءَ ھچ چشیں سردار ءِ نیست دریا وردانی تہ ءَ ھچ چشیں سردار نیست بارڈر ٹریڈ ءَ ھم کہ یکے پیک اپ گاڑی زوریت کار ءُ بار کنت آئی چلائینوک سردارے نہ انت اگاں سردارانی ھساب جنگ بہ بیت چوش کہ ھما وھد ءَ کہ مشرف ءَ گوشتگ کہ ھپتاد سَے سردار مئے گوم انت بس سَے سردار انت ءُ ھما سئیں سردار نوں نیست انت ایندگر شمے گوم انت گڑا بلوچستان ءِ جیڑہ چئیا گیش ءُ گیوار نہ بوگ ءَ انت –
آئی ءَ گوشت کہ اے بس مردمانی ریپینگ ءُ آھانی ھکانی ھاتر ءَ بلوچستان ءِ مھلوک ءِ دگہ دیم ءِ پیشدارگ ءِ بس مدامی پروپکنڈہ کنگ بیت سرجمیں بلوچستان کہ شمئے گوم انت آ الیکٹب نمائندگ بہ بنت سردار بہ بنت یا نواب بہ بنت ھماھانی دمگ ءَ ھاران، لسبیلہ جھل مگسی ءُ سبی ءَ رؤگ ءُ چارگ بہ بیت اے وا شمئے گوم ءَ بوتگ انت سبی ءِ مردم ھمودا آپ ورگ انت کہ دلوت آپ ور انت –

چوش کہ جیڑہ گیشتر بوان انت دومی بیگواھیں مردمانی جیڑہ انت بلوچستان ءَ اے وھدی درساں چہ مستریں جیڑہ بیگواھیں مردمانی جیڑہ انت یا ایندگہ چوش کہ تو وت ھم لسٹے بیگواھیں مردمانی پیش کتگ تو چنچُک تاں سوبمند بوتگ ات چینچو مردم یل کنگ نہ بوتگ؟ بیگواھیں مردمانی درگت ءَ عاصمہ شیرازی ءِ پسو ءَ اختر مینگل ءَ پسو دات کہ جیڑہ چارگ بہ بنت یکے ءَ چہ مستر دومی جیڑہ انت – اگاں انسانیت ءِ ھساب ءَ چارگ بہ بیت ھما مردم کہ بیگواہ بہ بیت زاھر انت آ مھل ءِ تہ ءَ کنگ نہ بیت آ زندان ءِ کوٹیاں کنگ بیت انت زندانانی تہ ءَ آ ٹارچر کنگ بیت انت اگاں ٹارچر کنگ مہ بیت ھم آ سولیٹری ءِ تہ ءَ دارگ بہ بیت آ وت ٹارچر کمتر نہ انت آئی ءِ ھواری ءَ آئی ءِ کھول ءِ مردمانی سر ءَ چی گوز ایت کہ آھانی روچ کجام ازاب ءِ تہ ءَ گوازیت – گوستگیں روچ ءَ کانفرنس کہ بوتگ ات ما ھما کانفرنس ءَ مزاک ءَ ھمے گُشت کہ یکے ءِ پون من ءَ دست کپتگ ھرکسی انت بئیت بہ زوریت ءِ تو وت دیست کہ دروستاں وتی کیسگ ءُ بیگ چار ات انت من پد ءَ گوشت کہ مناں کسی پون دست نہ کپتگ من پہ مزاک ھمے گوشتگ کہ یک پون ءِ واستا شما چینچو پریشان بئے گڑا آ زھگانی کہ پت گار انت کسے ءِ چُک گار انت گڑا آھانی سر ءَ چی گوزگ انت – جیڑہ ھست انت بلے پاکستان ءَ اگان انسانی ملک ءِ سمجھگ بیت بلوچستان انسانانی دمگ زانگ بیت گڑا منی ھیالاں اشی ءَ چہ مستریں جیڑہ نیست – ما سرکار ءَ ھما شش نکات پیش کتگ انت اولی نمبر بیگواھیں مردمانی بوتگ ءُ آ لسٹ ءِ تہ ءَ پنچ ھزار یک سد ءُ بیست ھشت مردمانی نام بوتگ آھانی تہ ءَ.کساس چارسد مردم یل بوتگ بلے ھمے میان ءَ کساس پانزدہ سد دگہ مردم آوار جنگ ءُ بیگواہ کنگ بوتگ ءُ اے درچ ھلاس نہ بوتگ –

سرکار ءِ یل دئیگ ءِ پسو ءَ آئی ءَ گوشت کہ ھو ھمے ھاتر ءَ سرکار یلا داتگ ھیر ما سرکار یلا دات بلے اے زاناں سرکار ءِ زمہ واری نہ انت کہ بیگواہ مردم یل کنگ بہ بنت – زاناں مئے شرت آنی سوب ءَ یل کنگ بوتگ انت – زاناں آ اے ملک ءِ شھری نہ بوتگ انت زاناں اے ملکے جاھمند نہ بوتگ انت اگاں اے ملک ءِ جھمنند بوتگ انت بلے اے ملک ءَ نندوک وا بوتگ انت –

آئی ءَ گوشت کہ نوں آھاں دگہ درچ ءِ بندات کتگ اول ءَ بُرتگ انت ءِ جتگ انت ءُ لاش ءِ دگانی سر ءَ ءُ ویرانگاں چگل داتگ انت ئِے نوں بلوچستان ءَ سی ٹی ڈی ءِ ادارھے جوڑ کنگ بوتگ کہ آ اول ءَ ڈرامہ کنت بیڑ بارت پد ءَ ھما بیگواھیں مردماں کہ ما لِسٹ داتگ کہ سَے سَے سال انت ھشت ھشت سال انت گار بوتگ انت آھانی لاشاں دور دئے اَنت نوزدہ نوزدہ مردم یکیں جاہ ءَ گوش انت کہ دیم پہ دیمی میڑ ءَ جنگ بوتگ انت – اے کجام دیم پہ دیمی میڑ بوت کہ سرکاری گاڑی ءِ یک شیشگ ءِ ھم نپرشیت ءُ آھانی ھژدہ یا نوزدہ مردم جنگ بیت ءُ اشانی تہ ءَ یکے ءَ ھم ٹپ پر نہ بوت اے گپ جنگ ءَ ھم آھاں شرم نہ ایت کہ گوش انت بازیں سلاہ ءِ ھم گرگ بوتگ گڑا آ سلاہ آھانی چی درد دوائیں کہ آھاں پھریز کت نہ کنت ھمے درچ نوں بندات کنگ بوتگ –

آٹارنی جرنل ءِ گوم ءَ بوتگیں اسلام آباد ھائی کورٹ گپانی پشدر ءِ جست ءَ آئی ءَ پسو دات کہ ھما کہ مزنیں سیاسی پاٹی ھست انت آ اے جیڑہ وتی پرائیوٹی ءِ تہ ءَ نیار انت پرچا کہ اشانی سیادی کسانیں سوبہ انت بدکسمتی مئے کسانیں سوبہ ناں کسی ءَ اقتدار ءَ آؤرت کنیں ناکہ اقتدار ءَ در کُت کنیں ھاں اگاں اے جیڑہ مستریں سوبہ بہ بوتیں ھستیں یک ھد ءَ تاں بلے اے ھد ءَ تاں نیست اِنت کہ بلوچستان انت یا سند کے پی کے ءَ – مئے ھما مزنیں پولیٹیکل پاٹی انت آھانی دلگوش ھمیشی ءِ سر انت کہ مار ءَ وؤٹ کجا بہ رسیت بیگواھیں مردمانی دمگاں کساس ھما سَے سد یا چارسد وؤٹ بہ بنت ھمے ھاتر ءَ اے آھانی پراءیوٹی لسٹ ءِ تہ ءَ ھوار نہ انت – ھو بلوچستان ءِ مردم در کائنت بلے آھاں ھمے زھرشانی ءِ ھم اجازت نیست اگاں گوادرے مردماں وتی لوٹانی تہ ءَ اے لوٹ مان کتگ گڈا بچار یاکہ اشانی زھرشانی وڈے ناں وڈی ءَ ھلاس کنگ بیت بوت کنت تاکت کارمرز کنگ بہ بیت –

جماعت اسلامی ءِ بُنجاھی نائب امیر لیاقت بلوچ ءَ تربت پریس کلب ءِ مراگش ” گند ءُ نند ءَ” اھوالکاراں گوں تران کنان ءَ گْوشتگ کہ گوادر ءِ نندانک ءَ سی روچ اِنت برجاہ ءَ اِنت- نندانک ءِ سانمندی گندگ بیگ ءَ اَنت-

آئی ءَ گْوشتگ کہ واکداراں گوں پدر کتگ کہ اے بلوچستان ءِ راج ءِ نندانک اِنت جماعت اسلامی ءِ اناں، نندانک ءَ نشتگیں مردمانی نیمگ ءَ راھبند ءُ کانودی لوٹ کنگ بوتگ اَنت وتی بُنکی ھکانی ھاتر ءَ اے یک مزن شانیں نندانکے کہ آ توسیپ ءِ ستا کرز اِیت-

آئی ءَ گْوشتگ کہ سیمسر ءَ ٹوکن سسٹم ، زر ءَ ٹرالنگ ءِ بگیری ءَ زوت ءَ زوت گامگیج بزور اَنت سرجمیں بیگواھیں مردماں آجو بہ کن اَنت – اگاں کسے ءَ جرمے کُتگ یا آ میاربار اِنت گُڑا آئی ءَ سزا ءِ مستری ڈیھ ءِ آمیدگس ءَ دیگ بہ بنت اگاں ناں اے آمیدگس پرچا جوڑ بوتگ اَنت-

آئی ءَ گْوشتگ کہ سی پیک ڈیھ ءِ یک مزنیں منسوبھے چریشی ءِ پائدگ ءِ ھک ساری ءَ دمگی مردمانی ئیگ اِنت، ھکومت راج ءِ سیمسر ءُ زر ءِ آسر ءَ کار ءُ بار ءِ دیم ءَ اوشتوک مہ بہ اِت، بلوچستان سک مزن ءُ ایران ءِ ھمساھگیں اُستان اِنت بلوچستان ءِ درگت ءَ سرجمیں کار ءُ باری زمہ واری ءِ زھرشانی کنگ لوٹ اِیت- راج ءَ لولی پوپ سر ءَ دارگ ءَ چہ املی گام چست بہ کن اَنت-

آئی ءَ گوشتگ کتگ مالی دروشم ءَ ڈیھ سک نزور اِنت ءُ ڈیھ ءِ سرجمیں مال ءُ مڈی آئی ایم ایف ءِ کر ءَ ایر کنگ بوتگ اَنت ، عمران خان سرجمی ءَ بے سوب بوتگ ، ڈیھ ءِ سلامتی ھاتر ءَ راہ راھبندی ءَ ساری اے وھد ءَ گچینکاری ءِ نیمگ ءَ روگ لوٹ اِیت-

سیاسی وپاداری بدل کنگ ءُ ٹکٹانی زورگ ءُ بھا کنگ جمھوریت ءِ چھرگ ءَ یک نشانے ، سیاسی ءُ جمھوری تاکت ساپ ءُ پلگاریں گچینکاری ءِ برجم دارگ ءِ ھاتر ءَ جُھد بہ کن اَنت-

آئی ءَ گوشتگ کہ تربت ءَ آل پارٹیز ءِ راھشوناں گوں گپ ءُ تران شور کنگ بوتگ ، ما اے لوٹ کن ایں کہ چیک پوسٹانی سر ءَ راج ءِ زلیل کنگ ءَ بند بہ کن اَنت ءُ مردمانی لوٹاں بہ منّ اَنت – یک جُستے پسّہ ءَ آئی ءِ اے گْوشتگ کہ اگاں دگہ پارٹیاں گوں یکجاہ بوگی کپت گُڑا یکجاہ بہ بہ ایں-

لیاقت بلوچ ءَ گوادر ءَ برجاھیں راجی ننداک ءَ راج وتی بُنکی ھکانی ھاتر ءَ کنگ ءَ اَنت- اے جماعت اسلامی ءِ نندانک نہ اِنت – اے ننداک ءِ آسر دور رو اَنت-

بلوچستان ءِ دمگ مستونگ ءُ خضدار ءَ تیرگواری ءُ دگ ءِ وئیل ءِ آسر ءَ چار مردم مرتگ ءُ نُھ ٹپی بوتگ-

سربوتگیں ھالانی رِد ءَ مستونگ ءِ ھند بدرنگ ءَ گاڑی یے چپ بوتگ ءُ چریشی ءِ آسر ءَ سے مردم بیران بوتگ – بیران بوتگیں مردمانی لاش شھید غوث بخش رئیسانی میموریل نادُراجاہ ءَ برگ بوتگ اَنت –

ھمے وڑ ءَ مستونگ ءِ ھند کلی کڑک ءَ دو ٹکانی میان ءَ تیرگواری کنگ بوتگ ءُ تیرگواری ءِ آسر ءَ یک مردمے بیران ءُ یکے ٹپی بوتگ ءُ ھردوک برات بوتگ اَنت – لاش ءُ ٹپی بوتگیں مرد نادُراھجاہ ءَ برگ بوتگ اَنت-

خضدار ءِ ھند دراکالہ ءَ اومراڑی اڈہ ءِ نزیک ءَ گاڑی یے چپ بوتگ ءُ گاڑی چپ بوگ ءِ آسر ءَ ھشت مردم ٹپی بوتگ اَنت- ٹپی بوتگیں مردمانی تہ ءَ زھگ ءُ زالبول ھوار اَنت پہ الاج ءِ ھاتر ءَ نادُراھجاہ ءَ برگ بوتگ اَنت-

کیچ ابدوئی ءُ آپسر ءَ زورگیریں پوج ءِ سر ءَ اُرش کُتگ سَے کارمند کُشتگ اَنت – بیبگر بلوچ

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں زیکیں روچ ءَ تمپ ءِ دمگ ابدوئی ءُ شیپچار ءِ نیام ءَ وتگڑیں گولڈ سمتھ لائن ءِ سر ءَ ٹَٹ جنوکیں پاکستانی پوج ءِ پانگس ءِ ھاتر ءَ آپ بروکیں ٹولی ءُ پانگس ءِ سر ءَ یکیں وھد ءَ اُرش کتگ-

جارکش ءَ گوشتگ کہ اُرش ءِ آسر ءَ زورگیریں پوج ءِ دو کارمند مُرتگ اَنت ءُ یکے زدگ بوتگ- مدامی ءِ وڑ ءَ پاکستان ءِ پوج ءَ وتی پروش وارگ ءِ چیر دیگ ءِ ھاتر ءَ وتی یک کارمندے ءِ مَرگ ءِ ھال منّ اِتگ ءُ پروش وارتگیں پاکستانی پوج ءِ جارکش ءِ مئے سرمچارانی تاوان دیگ ءِ ھبر بے بنیں ءُ سیاھیں دروگے-

جارکش ءَ دیمتر ءَ گوشتگ کہ ھمے وڑ ءَ گوستگیں شپ ءَ مئے سرمچاراں تربت ءِ دمگ آپسر آپدُرُک ءَ زورگیریں پوج ءِ پانگس ءِ سر ءَ دستی بمب اُرشے کتگ ءُ یک کارمندے کُشتگ-

آئی ءَ گوشتگ کہ بلوچستان ءَ آجوئی ءَ داں مئے اُرش برجاہ مان اَنت-

نبشتانک: بَلے سودا زمیر ئیگ انت

نبشتہ کار: ھدایت بلوچ

دی بلوچستان پوسٹ

زمستان ءِ سارتی ات شپ گوش ئیگ ءَ آپ بادینگ ءَ اَت سُھب ءَ مھلہ من چہ واب ءَ پاد اھتاں روچ درا ھگا ات بُھاریانی دوت چست اتاں  من دست ءُ دیم شُشت مات ءَ چاہ گراستگ ات روتاپ ءَ تگردے تالان ءِ کُرتگ ات ءُ نشتگ ات توارے کُرت بیا ات زھگاں چاہ بور ات۔
 
من کوٹ گور ءَ کُت بوٹ پادا کت اَنت اھت ءُ تگرد ءِ سر ءَ نشت آں مات ءَ من ءَ چاھے دیم ءَ دات ءُ جُست ئِے کُرت پُل جان تو چون ئے چم گُش ئے سُھر انت زاناں بے واب بوتگ ئے من گُشت ھاں ماتی من دوشی کمو دیرا اھتگاں مات ءَ وتی دست منی پیشانی ءِ ایر کُت ءُ گُشت ئِے تئی جان سلامت نہ انت من گُشت نہ ماتی من وشاں۔

 من ءُ مات گپ ءَ اتاں منی مبائل لوگ ءَ کیچر ءِ سرا سگنل ءَ ایر ات داں رنگ ورگ ءَ لگِت من وتی دست ءِ چاہ ایر کُت شُتان دیم پہ مبائل ءَ کہ بارین کَے انت چو مھلہ پون کنگ ءَ انت چاران سنگتے ءِ نمبر انت من پون چست کُرت ، من سلامے دات ، سنگت ءَ والیک کُرت ، من گُشت چے ھال انت ھیر انت تو چو مھلہ ، آئی ءَ پسو دات ھو ھیر انت چاہ بوَر تیار بو من تو  گونڈیں سپرے ءَ رواں من گُشت بس شر من تیاراں بیا من پون کٹ کُرت مبائل کیسگ ءَ کُرت پُشت ءَ چک جت مات اوشتاگ ات گُشت ئے ھان ھیر انت من گُشت ھو ھیر انت سنگتے گُشگا انت من تو گونڈین سپرے ءَ روگ ءَ آں مات ءَ دست منی بڈّ ءَ جت ءُ گُشتے ھُدا شمئے ھمراہ بات۔ دست ءِ پندول ءَ بُرت ءُ پنچ سد کلدارئے در کُرت  منی کیسگ ءَ دات ءُ گشت ئے جاھے دکانے ءَ تئ سر کپیت چیزے بگر بوَر من گشت شر دمانے گوست سنگت گون سینکل ءَ اھت لوگے چوڈگا داشت ئے منا توار ئے کُرت من شُتان  سوار بوتاں دیم پہ وتی سپر ءَ در کپتیں جاھے سنگت ءَ دم بُرت  من سینکل چلائینت دانکہ مارا شپ کپت سردیں زمستانی شپ ات راہ ءَ روگ نہ بوت گوات سرد سردا کشگا ات ما اندیمیں جاھے ءَ داشت۔ آسے روک کُرت نِشتاں واب اوں نہ یھت کہ سرد ات ھمدا آس ءَ را دار پر کُت ءُ نشتاں نزاناں کجام وھد ءَ مئے چم مُچ بوتاں یک وھدے بُست کُرت داں روچ در اھتگ ات لہتیں پس ءُ دلوتانی توار ات من پاد اھت چار اِت داں رمگ کئور ءَ ایر رچگا ات پس چہ مئے دیم ءَ گوزگا اتاں پسانی رند ءَ یک کماشیں مردے گوں بلوچی پاگ ءُ پادانی سواساں اتک مئے نزیکءَ اوشتات سلامے دات ءُ گُشت ئے چُکاں شما وش ءُ جوڈ ئے  ما پسو دات شکراں ناکو ما وشان چُکاں شما چونیں مردم یے ما پسو دات ما گُشتگ ما شریں مردم اِنت چیا زاناں ؟ ناکو ءَ پسو دات ھنچو جست کُرت وھد ھمے وڑ انت بلے من زاناں شما سلیّں ءُ بدیں مردم نہ ات پرچہ کہ اے راہ ءِ گوزوک سلیّں مردم نہ بوتگاں  آمردمان شریں راہ گیشینتگ آھاں چشین سردی ءُ گرمی، سکّی ءُ سوری، گُژن ءُ تُن ، اے چیزانی پرواہ نہ کُرتگ ۔ بلے ھُدا بزانت منی دل گُشی شما شریں مردم ات ۔ من گُشت ھو ناکو ما تئ چُک ایں ناکو اھت مئے نزیک ءَ نشت وتی چشمک ءِ کش اِت چادر ءِ لمبے زُرت چشمک ءَ ساپ کنگ ءَ لگِت۔ چُکان مئے گُلزمیں مئے وتیگ انت اے گُلزمیں مئے مات انت مئے جنت انت مارا وتئ مات ءِ ھک ادا کنگی انت مات ءِ ھک ادا کنگ دُرسیں چُکانی سرا المّّی انت مئے جنتیں دیار چہ زوراکانی دست ءَ پچ گرگ ءَ دُرسیں چکانی یک مشت بوگ وشیں روچانی مستاگ بیت۔ مال ءُ دولت ، آسائش ءُ آرام ،لوگ ءُ ماڑی ، گاڑی ءُ سواری، وش ءُ وشتامیں ورگ، زند ءِ دُرسیں آسراتی ھرکس ءَ پہ وت ءَ دوست بنت۔

بلے سودا زمیر ئیگ انت  
آ مردماں کہ زمیر ءِ سودا نہ جتگ وتی عزت ءُ ننگ بھا نہ کُرتگ ، آھانا کہ گُلزمین ءِ درد گون انت آھاں سردی ءُ گرمی، گژن ءُ تُن، سکّی ءُ سوری، بزگی ءُ بیماری ، درانڈیھی ءُ در پہ دری  ، رنج ءُ گم، جنگ ءُ مرگ ھچ نہ توریت پرچہ کہ آھان زمیر ءِ سودا نہ جتگ۔  بِلّے آھانی گُد دِرتگین انت، سواس اش سستگین انت ، ورگ اش ھُشکچین نان انت، بلے آ مردم تہا چہ دلجم انت کہ ما گناھگار نہ ایں ما مات ءِ ھکاں ادا کنگا ایں ھمے وڑیں مردمانی نام تاریخ ءِ تہا نکش بیت اے وڑیں مردم اگاں مریت گڈا ابدماں ءُ نمیراں بیت ۔ بلے آ مردماں کہ وتی زمیر ءِ سودا جتگ  مات ءِ گدار انت اگاں زندگ انت کہ مردگانی تہا شمار بنت ءُ اگاں مُرتاں اشانی نام داں جہان ھست انت پولنگ بیت آھانی آوکیں پدریچانی چم جہل بنت ھمے گپاں گوں ناکو  پاد اھت مارا رُکستے کُرت ءُ گُشتے ھدا شمے پُشت ءُ پناہ بات من رواں منا دیر بوت۔ ما اوں پاد اھتیں دیم پہ وتی سپر ءِ نیمگ ءَ درکپتیں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ فمگ ھرنائی شاھرگ ءَ پاکستانی پوج ءَ یک کاریزکارے آوار جتگ ءُ بیگواہ کرتگ – بیگواہ کنگ بیتگیں مردم ءِ پجار جلال خان ء مشکیانی ءِ نام ءَ زانگ بیتگ –

اھوالانی تہ ءَ گوشگ بیتگ کہ اے مرد کاریزکارے کہ پوج ءَ دَہ دسمبر ءَ کار ءَ روگ ءَ بیتگ ءُ دزگیر کنگ ءُ پھمیانیں جاھے ءَ برگ بیتگ ءُ تنی وھدی آئی ءِ درگت ءَ ھچ ھال نیست اِنت –

زانگ بہ بیت بلوچستان ءَ بیگواھیں مردمانی جیڑہ روچ پہ روچ سنگینتر بیان اِنت راجدوستیں پھنات پاکستانی پوج ءُ چیریں ادارھاں بھتام جن اَنت اے مردماں آوار جنگ ءَ اَنت بلے واکدار اے گپ ءَ نہ منّگ ءَ اَنت-

گوستگیں روچاں پاکستان ءِ وزیر اعظم عمران خان ءِ مشیر قومی سلامتی ڈاکٹر معید یوسف ءَ ٹاہ داتگ کی بلوچستان ءِ گیشتریں کیسزاں ھما مردمانی زِکر اِنت کہ ریاست ءَ گوں جنگ ءَ بیتگ اَنت یا دگہ جاھے ءَ بدبھتی ءَ اے مردم نہ بچ اِتگ اَنت- ھمے رنگ ءَ کھول ءُ اھوالکاراں اے گپ ترندی ءَ رد کرتگ –

دومی نیمگ ءَ بلوچستان ءَ حق دو تحریک ءِ سروک مولانا ھدایت الرحمان ءَ ھم یک جارانکے ءِ تہ ءَ گوشتگ کہ بیگواھیں مردمانی ھاتر ءَ جنزیں ءُ روانک ءِ ھمراھی ءُ شال ءَ دَہ لک مردمانی ھواری ءَ روئیں –

گوستگیں شپ ءَ مولانا ھدایت الرحمان ءَ بیگواھیں مردمانی بارو ءَ گپ کنان ءَ آئی ءِ ھرس رتکگ اَنت –

آئی ءَ گُشتگ کہ بلوچ مات وتی جگرانی ٹکرانی راھاں چاران اَنت ءُ وتی ابدی جاہ ءَ نمیران بنت بلے آیانی جگرانی ٹکر انگت پاکستانی پوج ءُ چیریں ادارھانی زنداناں بندیگ اَنت –

نبشتانک: راجکاری ءُ جنین چک

نبشتہ کار: آجوئیں مستاگ

دی بلوچستان پوسٹ

زندمان ءِ جیڑهانی آس چوناها هرچ بلوچ ءِ بالاد ءَ روک اِنت بلے اے آس ءَ همک مردم وتی تہ ءَ مار ایت گند ایت ءُ سرپد بیت کہ لهتیں جیڑه هست انت آ جیڑه ایوک ءَ گوں من ءَ اَنت، باز بر ءَ جیڑ اتگ کہ وتی چاگردی جیڑهاں نبشتہ بہ کن آں بلے مرچی ند آجو بیتگ نبشتہ کن آں-

اے ساهت ءَ من جنین چکے بہ آن ءُ وتی ارزشت ءَ پدر کن آں ، منی مستریں جیڑه چے انت؟منی چاگرد اِنت من دودے ءِ سانکلاں بندیگاں وانگ ءِ لوٹ چہ کسانی ءَ داشتگ کہ من اوں بواناں من اوں دنیا ءَ سرپد بہ باں بلے یکے چاگردے تنگدستی ءُ دومی سانکلیں دود ربیدگ کہ زندگی زندان اِنت ، من ءَ یات اِنت من کسان اِت آں یک بلاهیں مچی ءِ اَت ءُ درست مردماں بیرک دست ءَ اَت یک بارگیں مردکے دگہ ءِ سر ءَ گپ ءَ ات ، اے ساهت ءَ من اوں اے مچی ءِ بهر اِت آں بلے هچ پوه نہ اِت کہ اے مچی ءِ تهے مردمانی لوٹ ءُ واهگ چے اَت ، بس ما درست یکیں رم ءَ ناره بازی ءُ چاپ جت سک وش لگ اِت-

گڑا دگے سرے اوشتوکیں مرد ءَ گشت کہ ما آجو هما وهد ءَ بہ ایں کہ مئے سر ءَ زوراک دور کیت هرچ وهد کہ ما وتی جند ءَ گوں چاگرد ءَ آجو کن ایں مئے تهے ترس هلاس بیت ، وهدے ما ترس ءِ آماچی ءَ چہ آجو بیت ایں گڑا هچ کومانی زوراکے ترس مئے تہ ءَ نہ ایت ، هنچش کہ ما بلوچانی گوست ءَ پچارے هپت کوماں گوں جنگ ءُ جیڑهانی آماچی ءَ گوں سوبین بیتگ ءُ پیداک اِنت، ما اوں هما بلوچانی پُسگ اِنت ما پرچا زوراک ءِ دیم نہ اوشت ایں؟

بلے وهد جنزان ءُ منی بالاد اوں وتی توامی ءَ اتک وانگ ءَ دل ءَ باز لوٹ کت بلے وهد دستا سندان بوت دان مرچی دل ءَ همے جیڑاں کہ اے مچی ءُ اے وهدے زوراک ءَ چتو بہ رکین آں برپیں بالاد ءَ چوناها جهد ءِ همراهی ءَ هرچ جنین وتی پاسداری ءَ کنت وتی آجوئیں سرڈگارے رکینگ ءَ گوں وتی زیبائی ءَ جنگے بیرک ءِ پوش ایت ، در کیت بانک کریمہ ءُ آدگہ بلوچ شیرزالانی دورشم ءَ بلے مرچی ، جنگ گڑی سیمسر ءَ اتکگ بلوچ ءَ وتی سرڈگارے مهرگ وتی دستا کتگ بلے-

کِرد همک زیبائیں کاڑ اِنت گواڑگیں
موسمانی شہ زراں هنڈال کنت

گلزمین ءِ موکگ ءَ بند ایت کپن
دوتکگیں وجاں وتی بیهال کنت

جنگ اتکگ گوادرے چولاں سر انت
بیرک ءَ زور ایت سُرا پادمال کنت

لیکهے اَت بس ودارے آسری پش کپتگ کدی چاگرد ءَ گوں آجوئیں زندمان رکیت ءُ سانکلانی تهے بندیگ جاها آجو بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

روکپتی ءُ رودرتکی بلوچستان ءَ جتا کنوکیں سیمسر گولڈ سمتھ لائن ءِ سرءَ بستگیں پاکستانی لشکریانی چوکی ءِ سر ءَ ناشناسیں سلاہ بندیں مردماں اُرش کُتگ، اُرش ءِ تہءَ یک سپاھیگے کُشگ بیتگ۔

پاکستانی پوج ءِ جارکش آئی ایس پی آر ءَ سَے شمبے ءِ روچ ءَ یک درشان ءِ تہءَ اُرش ءِ ھال راست کنان ءَ گُشتگ کہ عبدوئی سیکٹر ءَ پھازگی لشکر ءِ چیک پوسٹ ءِ سرءَ اُرش کَنگ بیتگ ۔

آئی ایس پی آر ءِ ردءَ دونیمگی تیرگواری ءَ لانس نائیک ظھیر احمد جھمنند نوشکی کُشگ بیتگ۔

آئی ایس پی آر ءِ رد ءَ پوج ءِ نیمگ ءَ اُرشکارانی سرءَ پسھی تیر گواری ءَ ارشکار ھم تاوان بار کنگ بیتگ اَنت۔

زانگ بہ بیت کہ اے دمگانی بلوچ آجوئی لوٹوکیں سلاہ بندیں گل مدام پاکستانی لشکریانی سرءَ اُرش ءِ زمہ واریاں زیرگ ءَ اَنت بلے داں انگت عبدوئی سیکٹر ءَ بیتگیں اُرش ءِ زمہ واری ھچ گل ءَ نہ من اِتگ۔

شائر: سلیم ناز

دی بلوچستان پوسٹ

همے هیالاں دل ءَ بکن در

پہ هالو ءُ هالو نہ رَؤت گوادر

اے زر نہ انت ویل هزار هست هَمل

تو چِرّکیاں وتی بیا بر ؟

ستر تو زلمانی بور ءَ تاچین

ترا من سوچان گون آس ءُ انگر

بلوچ ءِ جنگ ءَ تو پروش وارتگ

لگور زِر ءَ تو جَن ئے نون ڈنگر

من پاسپان زمین ءُ مات ءِ

تئی زلم گٹی ایت نہ مانی آسر

همید ءِ ارواه نہ گپت آرام

چو بَزگیں وهد گندے مادر

سلیم مہ گندان من سوری پرداچ

دان آجوئی ءِ نہ شنز ایت جمبر