TBP Balochi

بلوچستان ءِ دمگ سریچ گریشہ ءَ ھائیر سیکنڈتی اسکول ءِ سالانہ چکاسانی سوبمندیانی ھواری ءَ یک مراگشے برجم دارگ بیتگ –

مراگش ءَ ہیڈماسٹر مھمد یونس ءَ ھوار اسکول ءِ استاداں ھوار نودربراں بازیں کچے ءَ بھر زرتگ ءُ مراگش ءَ استاداں نودربرانی ستاشانی ءُ تران کرتگ-

مراگش ءَ پوزیشن ھولڈرزیں نودربراں داد دیگ بیتگ ءُ آوکیں وھدانی واستا دلگوش دیگ ءِ دلبڈی داتگ اَنت ئِے –

مراگش ءَ اسکول ءِ ہیڈ ماسٹر یونس ءَ تران کنان ءَ گوشتگ کہ مروچی من ءَ وشی بیگ ءَ اِنت ما اے وڑیں مراگشے داشتگ ءُ وتی نودربراں دلبڈی دیگ ءَ ایں –

آئی ءَ گُشتگ کہ اے جھد الم برجم بیت اِنت ءُ آوکیں وھداں ھم اے وڑیں مراگش برجم دارگ بنت ءُ نودربرانی دلبڈی ءُ آیانی دیمروئی ءِ واستا ھر وڑیں جھد کنگ بیت اِنت –

آئی ءَ نودربرانی دیم ءَ تران کنان ءَ گوشتگ کہ اے وتی گرانبھائیں وھد ءَ دگہ چیزاں گیش وانگ ءَ بہ دے ایت ءُ آوکیں وھداں داں شما سوبمند بیت بہ کن ئے –

آئی ءَ گُشتگ کہ وانگ ءُ زانگ ءَ تھنا شمارا نپ نہ رس ایت بلکیں وانگ ءُ زانگ ءَ شما وتی دمگ ءَ چہ سلکاریاں رکینگ ءُ دیمروئی ءِ واستا کار کت ئے –

نبشتانک: شھید سدام ءِ نام ءَ

نبشتہ کار: گلزمان بلوچ

دی بلوچستان پوسٹ

شھیدی مراد بات

آ روچ ءَ پد من ءُ تو ھچ جاہ ءَ دوچار نہ کپت اِیں من ءُ تئی جتائی ابکھی جتائی یے اَت۔ ناں تئی لوٹ اَت کہ من جتا بہ باں ناں منی، ترا وَ زور چمن سست ءُ برت اِت۔

آیانی دل ءَ باز ارمان ھست اَت کہ من ءَ ھم تئی ھمراھی ءَ بہ بر اَنت، بلے باریں کجام پیم بوت کہ من چہ آیانی دست ءَ رک اِت آں، یکے دومی ءِ جتائی چینکس گران اَت تو اِے چیز ءَ وت زان ئے ءُ ھر کس زانت ، ھما روچ ءَ پد منی ءُ تئی ھچ رنگیں دیدار نہ بوت، تو وَ منی گور ءَ بہ گند ئے سک باز آیگ لوٹ اِت بلے تئی وس ءَ نہ اَت، منی وَ وس ءَ ھست اَت بلے من ھچ رنگ ءَ آیگ نہ لوٹ اِت ناں چشیں گونڈیں سوچے دل ءَ داشت۔

تئی کر ءَ من آیگ ھم بہ لوٹ اِت اِنت یا زور برگ بوتین آں، تئی نزیک ءُ گوراں بہ گند ئے اَتکگ بوتگ اِت آں، بلے آ گند ءُ نند ءُ آ وش گپی آ دیوان نہ بوتگ اَت کہ من ءُ تو گوں زرو ءَ بازیں سالے یکجاھی ءَ گوازینتگ اَت ءُ ھر شر ءُ ھرابیں کار ءَ ھور اِت اِیں۔ برے یک ھندے ءَ گرد اِت اِیں، بازیں کارے دل ءَ لوٹ اِتگ اَت ما کتگ اَت۔

بلے نوں تئی گور ءَ آیگ ءَ پد اِے زندمان ءِ وشی دوبر نوک نہ بوتگ اِت اَنت۔

مرچی سے سال ءَ پد تئی ھال مارا سر بوت کہ مئے گڈی امیت ھم سست کہ تو چد ءُ دورتر روگ ءَ ئے کہ پیسر ءَ تئی گونڈیں امیتے آیگ ءِ بوتگ، نوں ابدی ما اِے امیت ءَ داشت نہ کن اِیں، بلے من ترا اِے مراد باتی پہ شان دے آں کہ ترا شھیدی مراد بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یورپئین پریمئر لیگ فٹبال گوازی برجاہ انت گوستگیں شپ ءَ شش ٹیمانی میان ءَ گوازی کنگ بوتگ ، ششیں ٹیمانی تہ ءَ ولووز ءَ برائٹون ءِ دیم ءَ یکے، ارسنل ءَ ویسٹ ھام ءِ دیم ءَ دو گول ءَ گوازی کٹیتگ وھدیکہ کریسٹال فلیس ءُ ساؤتھ امپتون دو دو گول ءَ دیمیگ بوتگ انت –

چار شمبے ءَ بوتگیں پریمئیر لیگ ءِ اولی گوازی برائیٹون ءُ ولووز ءِ میان ءَ کنگ بوتگ کہ برائیٹون ءِ نیمگ ءَ چہ ھچ گول اسکور کنگ نہ بوتگ وھدیکہ وولوز ءِ لیبی رومین سائس ءَ چِل ءُ پنچ ملٹانی میان ءَ یک گول ءِ اسکور کتگ گوازی کٹیتگ –

دومی گوازی کریسٹال فیلس ءُ ساؤتھ امپتون ءِ میان ءَ کنگ بوتگ کہ ھردو ٹیم دو دو گول ءَ دیمیگ بوتگ انت – ھردو ٹیمانی لیبیاں جوانی ءَ گوازی کنان ءَ ساؤتھ امپتون ءِ لیبی جے.ورڈ ءُ اے.بروجا ءَ یک یک گول ءِ اسکور کتگ، کرسٹال ءِ نیمگ ءَ چہ ڈبلیو.زاہا ءُ جے. اییو ءَ گول اسکور کتگ انت –

پریمئیر لیگ ءِ سیمی گوازی ءَ ارسِنل ءَ ویسٹ ھام ءِ دیم ءَ دو گول ءَ گوازی کٹیتگ – ویسٹ ھام ءِ نیمگ ءَ چہ ھچ گول اسکور کنگ نہ بوتگ وھدیکہ ارسنل ءِ لیبی جی.مارٹینیلی ءُ ای. سیمیت روئے ءَ یک یک گول ءِ اسکور کتگ گوازی وتی ٹیم ءِ نام ءَ کُتگ –

بلوچستان ءِ دمگ واشک ءِ ھند ناگ رخشان ءَ گوستگیں روچ ءَ نشہ ءِ ھلاپ ءَ یک روانکے کشگ بیتگ، ناگ رخشان ءِ جھمننداں گوشت کہ انتزامیہ نشہ باپار کنوکاں ابید نشہ کنوکاں گرگ ءُ لٹ جنگ اِنت آیاں گشتگ کہ اے جیڑہ ءِ ھلاسی نہ اِنت کہ نشہ کنوکاں بہ گر ءُ بہ جن –

آیاں گشتگ کہ گوستگیں روچ ءَ شٹرڈاؤن ھرتال ءِ سبب ءَ نشہ باپار کنوکاں اھوالکار بیھار داتگ اَنت کہ اگاں شما مئے ھلاپ ءَ نیوز شنگ کنگ ءَ اشانی کمک کت گڑا شمارا مالی ءُ جانی تاوان دئیں ءُ اے رنگ ءَ شما سرپد نہ اِنت کہ ما نشہ باپار کنوک چنکس تاکتور اِنت اگاں کسے ءَ نشہ ءِ ھلاپ ءَ گپ کت گڑا آیانی آسر ناوش بیت –

مروچگیں روانک نشہ باپار ءُ اھوالکاراں بیھار دیگ ءِ ھلاپ ءَ کتگ بلے ناگ رخشان ءِ سیاسی مھلوک نشہ باپاریانی ترس ءَ بھر نہ زیرگ ءُ نشہ باپارانی ھلاپ ءَ گپ کنگ ءَ لرزگ ءَ اَنت چریشی ءَ آیاں اے روانک ءَ بھر نہ زرتگ-

روانک ءَ تران کنوکاں گوشت کہ اگاں انتزامیہ ءَ نشہ باپاری کنوکانی بنجل ھلاس نہ کت اَنت ءُ نشہ ءِ سر ءَ گامگیج نہ زرت گڑا ناگ رخشان ءِ مھلوک گیش زھرشانی کنت ءُ سی پیک دگ ءَ بند کنت-

آیاں گشتگ کہ نشہ باپاریانی بیھاراں نہ ترس ایں ءُ نشہ ءِ ھلاس کنگ ءَ ھرچ وڑیں گام زرت کن ایں –

بلوچستان ءِ تیاب دپی شھر گوادر ءَ وتی لوٹانی ھک ءَ بلوچستان ءَ ھک دے تھریک ءَ نندانک ءَ مروچی 32 روچ اِنت کہ برجاہ اِنت-

گوادر پورٹ نزیک ءَ لالا حمید چوک سر ءَ گوستگیں یک ماھے ءَ گیش اِنت کہ نندانک ءَ نشتگ اَنت نندوکیں مردمانی لوٹانی منّگ ءُ اشانی سر ءَ گامگیج زورگ ءَ تاں زھرشانی اَنت-

نندانک ءِ نندوکیں مردمانی رِد ءَ بلوچ زر ءَ بے کانودی ٹرالرنگ ءِ سرجمی ءَ ھلاس کنگ ، سیمسری باپاری ءِ پچ کنگ ، چیک پوسٹاں راج ءِ زلیل کنگ ءِ ھلاس کنگ ءَ ھوار کوسٹ گارڈ ءُ کسٹم ءِ دستگیں گاڑیانی واتری ءَ تاں زھرشانی ءَ برجاہ بیت ءُ آؤکیں روچاں چی کنگی اِنت آ ایر کنگ بنت-

چارشمبے ءِ روچ ءِ نندانک ءَ بلوچستان ءِ بار کونسل ءِ وکیلاں بھر زرتگ- وھدے کہ نندانک ءَ نشتگیں مردماں گوں ھکومتی مردمانی پنچمی گپ ءُ تران کنگ ءِ ھال اِنت-

وزیر اعلی بلوچستان قدوس بزنجو ءُ ھک دے تھریک ءِ سروک مولوی ھدایت الرحمان بلوچ ءِ میان ءَ پی سی ھوٹل ءَ گند ءُ نند بوتگ- ھمے میان ءَ اکبر آسکانی ، سید احسان شاہ ، ظھوری بلیدئی ءُ چیف سیکرٹری بلوچستان ساڑی اَنت-

دی بلوچستان پوسٹ نیوز ءَ سربوتگیں ھالانی رِد ءَ مروچی بیگاہ ءَ وزیر اعلی نندانک اسٹیج ءَ مردمانی دیم ءَ مواھدانی سر ءَ گامگیج زورگ ءِ ھاتر ءَ ٹوٹیفکیشن نندانک ءَ نشتگیں مردمانی دست ءَ دنت ئِے-

مولوی ھدایت الرحمان بلوچ ءَ گْوشتگ کہ بند کوٹیانی تہ ءَ گپ ءُ تران نہ بیت مروچی وزیر اعلیٰ اد ءَ اسٹیج سر ءَ بیت ءُ گیشتریں لوٹ منّگ بوتگ اَنت-

آئی ءَ گْوشتگ کہ بلوچستان ءِ مستریں جیڑہ زورانسری آوارجنی ئیگ اِنت، ما وتی اے جار سر ءَ اوشتاتگیں شال نیمگ ءَ روانک کش ایں-

زانگ بہ بیت کہ وائس فار بلوچ مسنگ پرسنز ءِ چیئرمین نصراللہ بلوچ ءَ مولوی ھدایت الرحمان بلوچ بیگواھیں مردمانی ھاتر ءَ شال ءَ روانک کشگ ءِ پلامرزی کتگ ءُ شریں وڑے ءَ کرد ءَ پیلو کنگ ءُ مردماں گوں بھر زورگ ءِ دزبندی کتگ-

مولوی ھدایت الرحمان بلوچ ءَ گْوشتگ کہ مروچی وھدے وزیر اعلیٰ ءَ گوں اد ءَ گپ بیت اگاں اے جیڑھانی سر ءَ گامگیج زورگ نہ بوگ ءِ سر ءَ آؤکیں زھرشانی ءِ تاریک دیگ بیت-

دی بلوچستان پوسٹ نیوز اھوالکارانی رِد ءَ ٹرالرنگ ، نان ٹیچنگ ٹیچر، شراب جاھانی لائسنس ءُ دگہ جیڑھانی سر ءَ ھکومت ءَ وتی شور بندی جوڑ کتگ ءُ مروچی ھمے درگت ءَ سر ءَ گپ ءُ تران سوبمند بیت- ءُ سیمسر باپاری ءِ سر ءَ باندا وزیر اعلیٰ نندانک ءِ اسٹیج ءَ چہ جار کت کنت-

مولوی ھدایت الرحمان بلوچ ءَ گْوشتگ کہ نو کجام وزیر اعظم یا آرمی چیف ءِ تر ءُ گرد ءَ گوادر ءَ دریاورداں شکار روگ ءَ ھچ وڑ گر ءُ دار کنگ نہ بیت ءُ پھازوکی ءِ نام ءَ بازیں سالاں چہ بند گوادر عید میلہ ھم پچ بیت-

ھدایت الرحمان بلوچ ءَ گْوشتگ کہ لھتے بُنکی جیڑہ اَنت دُرستاں چہ مستریں جیڑہ ماتانی بچّانی بیگواھی اِنت ءُ اشی ءِ سر ءَ مارچ ءَ روانک کشگ بیت-

ھدایت الرحمان بلوچ ءَ گْوشتگ کہ مئے سر ءَ ھما مردم دست چست کنگ ءَ اَنت کہ آھاں ملا موسی وارڈ ءَ نیم ساھت ءَ نندانک ءَ نشتگ ءُ کمشنر ءَ گوں گپ ترانے کتگ-

آئی ءَ گْوشتگ کہ پسنی فیش ہاربر ءِ پچ کنگ ءِ ھاتر ءَ زھرشانی کنگ بیت-

سندھ ءِ مزن شھر کراچی ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ ، زھرشانی ءَ مروچی سرجمی ءَ چار ھزار پنچ سد ءُ بیست ءُ شش روچ سرجم بوتگ – مروچی ڈاکٹر رسول بخش، ڈاکٹر منیر، ڈاکٹر شازیہ ءُ آھانی سنگتاں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ گوشتگ کہ انسان ءِ انسان ءِ سر ءَ زوراکی درسیں راجدپتر اے گپ ءَ پدر کنت کہ ایردستی زوراکی ءِ برجم دارگ ءِ ھاتر ءَ زورگیریں تاکتاں ایوک ءَ زلم زوراکی نہ کتگ بلکیں گلامی ءُ ایدستی ءُ ایردستی ءِ زھنی مَنّگے ھاتر ءَ زانشتی، لبزانکی ءُ دود ءُ ربیدگی ءَ ھوار بازیں پندل سازگ بوتگ اَنت، اے پندل وھد ءِ ھمراھی ءَ مٹ بوان ءُ نوکیں دروشمے ءَ اتکگ انت –

آئی ءِ گوشگ ات کہ راجانی پہ زور چیر ترینگ ءِ پندلاں گیشی آرگ ءَ ابید سوبمندیں ھیلکاری ءَ پدر کتگ کہ ریاست وتی زوراکی ءَ ایردستی ءَ داں چیزے وھد ءَ برجاہ داشت کنت بلے دیر نہ جنت ۔پمیشکا تاکتوران پہ ایردست کنگ ءِ ھاتر ءَ بازیں مھاز ءِ پچ کتگ اَنت –

آئی ءِ گوشگ ات کہ جُھد زورگیرانی نیمگ ءَ راستی ءَ چیر ترینگ ءِ پروپکنڈہ ءِ پژدر ءَ راستی ءَ راج ءِ دیم ءَ کار ایت ءُ آیاں چہ سرکار ءِ پندل ءُ شوربندیاں سوھو کنت-

آئی ءَ دیمتر ءَ گوشتگ کہ کہ دُرسیں زوراکی ءُ انسانی ھکانی بگیری ءَ جُھد مدام سوبمند بوتگ اَنت۔ مئے جُھد مئے چاگرد ءَ ٹکی، مزھبی، در سائنسی، ربیئت دوستی ءُ ناشرکاری روِیشت ولگْوج کنگ ءَ وتی بھر ھوار گیتکگ پمشکا ھک ءِ جُھد ءَ سیاسی گلانی بوگ، آھانی ھستی ءِ پھریزگ ءُ چہ آیاں مردمانی درشان ھژدری اِنت،چہ ایشی ءِ نہ منّگ ءَ بیگواھیں مردمانی جیڑہ ودی بیتگ ما ایشی ءَ شموشکار کُرت نہ کن ایں –

ماما قدیر ءَ گْوشتگ کہ ریاست ءِ رسانکدر انسانی ھکانی لپاشگ، بلوچ راج ءِ چُکچینی ءُ جنگی میار باریاں چہ مردمانی چماں اندیم کنگ ءِ جُھد ءَ کنت بلے چاگردی رسانکدر بلوچ راج ءُ جھان ءَ مدام سرپد کنگ ءَ یک جوانیں ھال رسانے ءِ دْروشُم ءَ دیم ءَ اَتکگ اَنت-

بلوچستان ءِ دمگ آواران ءَ پاکستانی پوج ءَ یک مردمے آوار جنگ ءَ پد بیگواہ کرتگ –

آوار جنگ بیتگیں مردم پاکستانی پوج ءَ آواران ءِ دمگ مالار ءَ چہ لوگ ءَ آوار جنگ ءَ پد بیگواہ کرتگ آئی ءِ پجار ظفر ء عبدالواحد ءِ نام ءَ زانگ بیتگ-

انتزامیہ ءِ نیمگ ءَ تنی وھدی اے درگت ءَ ھچ گپ دیم ءَ نیتکگ اَنت –

زانگ بہ بیت بلوچستان ءَ بیگواھیانی درچ یکشل ءَ برجاہ اَنت ءُ سیاسی مردمانی بھتام اِنت بلوچستان ءَ مردماں پوج ءُ چیریں ادارہ آوار جنگ ءَ اَنت-

دومی نیمگ ءَ گوادر ءَ حق دو تحریک ءِ سروک مولانا ھدایت الرھمان ءَ گوستگیں روچاں وتی درشانانی تہ ءَ گشتگ کہ سَے ماہ ءَ پد شال ءَ مزنیں نندانکے جنگ بیت اِنت –

سر بیتگیں ھالانی رد ءَ روکپتی بلوچستان ءَ سلاہ بندیں مردمانی تیرگواری ءَ یک مردمے بیران ءُ یک زالبولے زدگ بیتگ –

تیرگواری ءِ وئیل ایرانشھر ءَ پیش اتکگ ءُ اود ءَ پوجی چیک پوسٹ ءِ نزیک بیتگ ءُ بے نمبر پلیٹ والا گاڑی ءَ تیرگواری کرتگ ءُ یک مردمے کُشتگ –

کُشگ بیتگیں مردم ءِ پجار سی ءُ ھپت سالی ئیں عادل آسکانی جھمنند راسک پشامگ ءِ نام ءَ زانگ بیتگ –

دمگی مردمانی رد ءَ وئیل پھرہ ءُ واش ءِ راہ ءَ چیک پوسٹ ءِ نزیک ءَ یک بے نمبر پلیٹیں گاڑی ءَ یک گاڑی ءِ دُزگ ءِ جھد کرتگ ءُ اود ءَ شھری ءَ وتی رکینگ ءِ جھد کرتگ ءُ چریشی ءَ دُزاں تیرگواری کرتگ ءُ آ کُشتگ ءُ آیانی تیرگواری ءِ سبب ءَ یک راھگوزی زالبولے زدگ بیتگ –

دمگی مردمانی بھتام اِنت کہ اے مردماں گیشتر سرکار ءِ نیمگ ءَ سلاہ رس ایت ءُ چریشی ءَ آ دُزی ءُ مردمانی کُشت ءُ کوشاں ھم کن اَنت –

یونائیٹڈ بلوچ آرمی ءِ جارکش ءَ ھاران ءَ بیتگیں یک اُرشے ءِ زمہ واری منّ اِتگ ءُ گوشتگ کہ گل ءِ سرمچارں آباد کار ءِ نشانگ کرتگ –

یونائیٹڈ بلوچ آرمی ءِ جارکش مرید بلوچ ءَ ناشناسیں جاھے ءَ رسانکدراں شنگ کرتگیں یک درشانے ءِ تہ ءَ گوشتگ کہ گوستگیں شپ ءَ ھاران ءِ شھر ءَ ڈیری فارم ءِ نزیک ءَ فرنٹیئر کور ایف سی ءِ بنجل ءِ واستا بلاک جوڑ کنوکیں پنجابی آبادکارے ءِ سر ءَ بلوچ سرمچارے ءَ اُرش کرتگ ءُ یک آبادکارے کشتگ ءُ یکے زدگ کتگ –

مرید بلوچ ءَ گُشتگ کہ اُرش ءِ زمہ واری ءَ مئے گل یونائیٹڈ بلوچ آرمی منّ ایت –

جارکش ءَ دیمتر ءَ گوشتگ کہ مئے گل ءَ بازیں براں پنجابی آبادکار سرپد کرتگ اَنت کہ بلوچستان ءَ میا اَنت پرچاکہ بلوچستان یک جنگ آماچی ءِ دیمپان اِنت پرچاکہ ما اے وڑیں آبادکاراں وتی دشمن سرپد بہ ایں آ بلوچستان ءَ کاینت ءُ پاکستانی پوج ءِ واستا کار کن اَنت آ تری پنجابی ءِ بیت یا بلوچے بہ بیت آ پاکستانی پوج ءِ واستا کار کنت ما آئی ءَ وتی دشمن سرپد بہ ایں –

جارکش ءَ گُشتگ کہ بلوچستان ءَ ھرچ آبادکاریں پنجابی ھست اَنت آ چہ بلوچستان ءَ در بیا اَنت ءُ ما گیش وتی اُرشاں ترند کن ایں –

نبشتانک: بلوچ راج ءِ رھشُون مُلا ھداھت الرھمان

نبشتہ کار: شاری بلوچ

دی بلوچستان پوسٹ

بلوچ راج یک آزات ھیالیں راجے، پہ بلوچ راج ءَ بلوچیت وت یک سرجمیں نیکراہ ءُ چاگِردی رھبندے کہ ھمے بلوچی رواج، دود ءُ ربیدگانی رِد ءَ بلوچ چاگِرد ءِ ھر وڑیں اڑ، اڑاند ءُ جیڑھانی توجیل ھست اَنت۔ بلے گِند ئے پہ بلوچ راج ءَ رَد دیگ، زیردست ءُ بلوچ راج ءِ ھُدائی داتگیں مڈّی ءُ گواچن ءِ پُلگ ءُ بلوچ راجدوستی ءِ ھلاپ ءَ دُژمن ءَ مُدام اسلام نیکراھی کارمرز کُتگ۔ چوناھا اسلامی نیکراھی ءِ گوں سیاست ءَ ھچ سْیادی نیست انت ءُ راستی ءَ نیکراھی بنی آدم ءُ ھُدا ءِ میان ءَ یک سْیادی یے بلے کوڑائیں پاکستانیاں ھمے نیکراھی سِلاہ پہ وتی جِند ءِ سرڈگار ھندوستان ءِ بھر ءُ بانگ ءَ ھم کارمرز کُتگ۔ پد ءَ 1970-71 ءَ پاکستانی پوج ءَ اسلام بنگالی راج ءِ ھلاپ ءَ ھم کارمرز کُتگ چوکہ جمائت اسلامی سیاسی گل ءِ سِلاھبندیں گل رزاکار، الشمش ءُ البدر ءِ وڑیں کاسگ چٹّ ءُ راجدروھاں وتی بنگالی بْرات کُشت ءُ کُشارینت اَنت۔ وھدے کہ پنجابی پوج بنگالی زالبولاں لگتمال ءُ کم شرپ کنگ ءَ اِت اَنت گُڑا ھم جمائت اسلامی ءِ بنگالی کاسگ چٹّ اے کھر ءُ زُلم ءَ دزمانگیجی اِت اَنت۔ وھدے کہ پاکستان ءَ چہ بنگالی راجدوستاں پْروش وارت گُڑا پنجابی پوج ھمے اسلامی نیکراہ ءَ یکشل ءَ پشتون ءُ بلوچ راج ءِ سر ءَ کارمرز کنگ ءَ انت۔ ایشی ءِ مستریں درور مُلا شپیک مینگل ءُ دِگہ بازیں رستریں ٹولی اَنت۔

نوں ما مُلا ھداھت الرھمان ءِ رھشُونی ءَ گْوادر ءَ برجاھیں زھرشانی ءُ نِنداک ءِ بابت ءَ گپ کن ایں کہ چہ دھکاں پنجابی پوج ءِ لگتمال ءُ زُلم ءِ آماچیں بلوچ راج ءَ ھمے تْرُندیں زھرشانی ءُ زھریں نِندانک بلوچ راج ءَ یک رندے پد ءَ یکجاہ ءُیکمُشت کنان اِنت۔ چوناھا اے بابا ھیربکش رھشُونی ءُ دِگہ شھیدانی آجوئی ءِ سسّا انت کہ مرچاں لس بلوچ راج ءَ وتی گُلامی ءُ راج ءِ زیردستی مار اتگ ءُ راج سرپد انت کہ بلوچ راج ءِ ھک ءَ کَے چہ دھکاں پولگ ءَ انت، زاناں چے ءَ دُنیا ءِ ھر وڑیں گنجانی واجھیں راج زبھری ءُ گُژن ءِ آماچ انت؟ راج جْوان سرپد اِنت کہ بلوچ راج ءِ بُنکی لوٹ ءُ ھک چے اَنت ایشی ءِ مستریں نشانی گْوادر ءِ نِندانک ءَ “مرگ بات پاکستان” ءِ اوگام اَنت۔

وھدے کہ مُناپک سراج الھک گْوادر ءِ زھرشانی ئیں نِنداک ءَ گُشتانک دیان ءَ گْوش ایت کہ کشمیر ءَ زُلم بوھگ ءَ انت ءُ ھندوستان مئے مستریں دُژمن اِنت گُڑا راج ھما ساھت ءُ دمان ءَ سرپد بوتگ کہ ما بلوچ ایں ءُ مارا گوں ھندوستان ءُ کشمیر ءَ ھچ کار نیست۔ پاکستان، ھندوستان ءُ کشمیر ءِ جیڑھاں گوں گُلامیں بلوچ راج ءَ ھچ سْیادی نیست مارا پرے ھال ءَ ناں کشمیریاں کُتگ ءُ ناں کہ ھندوستان ءَ، مئے بزگی، زبھری ءُ گُژن ءِ زمہ وار گجر ءُ پنجابی زورانسری اِنت۔

اے چیزاں ما سرجمیں بلوچ راج جْوان سرپد ایں کہ پنجابی مئے ھکاں نہ دنت ءُ نَیکہ ما بلوچ راج گوں پنجابی ءَ ھچ وڑیں سْیادی یے ھم دار ایں۔ باید انت بلوچ راج رَد مہ کپ ایت ءُ چو پشتون راج ءِ وڑ ءَ بلوچ راج بکڑ ءِ آماچ ھم مہ بیت کہ گوں پنجابی بلوچ ءَ ھک رس ایت ءُ بلوچ آسودگ بیت۔ ما راج ءَ تچک سرپدی دیگ لوٹ ایں کہ ما بلوچ راج چہ دھکاں پنجابی ءِ زوراکیاں سگان ءَ وتی راجی آجوئی جُھد ءَ ایں ءُ اے جھد سد در سد راجی آجوئی ئیگ انت ناکہ ھک ءُ بک ئیگ اِنت ءُ ناں کہ پنجابی بلوچ راج ءِ ھک ءَ دنت چو کہ واجہ لھڑی گْوش ایت دُژمن تئی راجی ھستی ءِ ھلاسی ءَ لوٹ ایت تو چون چہ آئی ءَ وتی ھک ءَ لوٹ ئے؟ گِند ئے ھمے جوریں دُژمن اِنت کہ دھکاں تئی راجی زُبان ءُ تئی دود ءُ ربیداگاں لگتمال کنان اِنت۔ دُژمن ءَ بلوچ راج دمگی کاسگ چٹّیں میر، نواب ءُ سردارانی میان ءَ بھر ءُ بانگ ئِے کُتگ۔ اگاں ما ھورت بچار ایں کہ ھما دمگی بلوچ کہ پنجابی کاسگ چٹّیں نواب، سردار ءُ میرانی زیردست اَنت اود ءَ بلوچ گیشتر بلوچی راجی آجوئی ءَ بے سما اَنت ءُ ھما دمگی راج کم راجی آجوئی ءِ جُھد ءَ ھوار اَنت۔

راج ءَ انی وتی گُلامی ءُ زیر دستی مار اِتگ۔ راج مرچاں آگاہ ءُ سرپد اِنت کہ بلوچ راج وت یک جُتائیں راجے ءُ یک سرڈگارے ءِ واھُند اَت بلے پاکستان ءَ زورانسری کُت ءُ مئے مُلک بلوچستان 27 مارچ 1948 ءَ زورگری زیرست کُت۔ اگاں بلوچ راج وتی راجی آجوئی لوٹ ایت گُڑا باید انت بلوچ لس وانِندگ اے شھیدانی بُنگیج کُتگیں راجی آجوئی ءِ جُنز ءَ دیم ءَ بر اَنت، باید انت ما وانِندگیں بلوچ راج دُنیا ءِ تہ ءَ سوبمندیں آشوب ءُ آجوئی ءِ جُنزانی اے جھلی بُندری لوٹاں سرپد بِہ ایں ءُ لس راج ءَ ھم اے لوٹانی بابت ءَ سرپدی بہ دے ایں۔

1- گُلامیں راج وتی راج ءِ گْوستانک ءُ راجدپتر ءِ وانگ ءُ زانگ ءَ ھوار وتی راج ءِ گُلامی مارگ, 2 گوں دُژمن ءُ دُژمن ءِ زُبان ءَ نپرپ کنگ، وتی راجی زُبانانی وانگ ءُ راجدوستی ءِ مارشت ودی کنگ۔3 راج یکجاہ ءُ یکمُشت کنگ، ءُ راجدْروھانی ھلاپ ءَ تُرُندیں اُرش کنگ ءُ راجی آجوئی ءَ پد ھر یک راجدْروہ ءَ سزا دیگ۔

باید بلوچ راج اے راجی جُنز ءَ دیم ءَ بران ءَ گوں پنجابی ءَ نپرت ءَ بہ دار ایت ءُ نپرت ءَ گیشترّ ودی بہ کنت چے ءَ کہ دُژمن ءِ سر ءَ نپرت ءُ زھر گُلامیں راجانی آجوئی ءِ بُندری لوٹ اِنت۔ چو کہ دُنیا ءِ نامداریں آشوبی رھشُون گْوش اَنت کہ داں وھدے کہ تو گوں دُژمن ءُ دژمن ءِ زُبان ءَ نپرت نہ کن ئے تو مُدام یکشل ءَ مجگی گُلام جوڑ بہ ئے پمیشکا باید انت ما گوں دُژمن ءَ ھوار راجدْروھانی سر ءَ ھم نپرت بہ کن ایں۔ وتی دمگ ءِ کاسگ چٹّیں سردار، میر ءُ نواباں پِٹ بہ دے اِت کہ ھمے دمگی میر ءُ سردار مِدام دُژمن ءِ کاسگ چٹّ اَنت ءُ ھر راجدْروھیں میر ءُ سردار وتی ٹَکر ءِ بلوچاں پہ راجی آجوئی ءِ جُھد پاد آیگ نئیل اَنت۔ باید انت ما بلوچاں اے زھرشانی ءُ راجی آشوب بلوچستان ءِ آ دِگہ دُور ءُ نزیکیں دمگاں ھم سر کنگ لوٹ ایت کہ بلوچستان ءِ ھر دمگ ءِ بلوچ وتی گُلامی ءُ زیر دستی ءَ بہ مار اَنت، بلوچ راج ءَ وت ماں وت یکمُشت ءُ ھمکوپگ بوگ لوٹ ایت، وت ءَ راجدوست ءُ ڈیھ دوست کنگ لوٹ ایت۔ تیوگیں بلوچ راج ءَ راجدْروہ ءُ دمگی میر ءُ نوابانی ھلاپ ءَ پاد آیگ لوٹ ایت۔

راج شالا یکمُشت ءُ تپاک بہ بات، راجی آجوئی ءِ آشوب شالا دیمروئی کنان ءَ زِندگ بات، شالا اے آشوب ھچبر اوشت ءُ آماچ مہ بات بلکیں زوت سوبین بات۔ شالا انچوش بہ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔