پاکستان ءِ پرگینگ خیبرپختونخوا ءَ بیتگیں یک بمب تراکے ءَ پشتون راج دوستیں پاٹی اے این پی ءِ باسک نشانگ کنگ بیتگ اَنت۔
بنداتی ھالانی ردءَ تراک باجوڑ ءِ ھند کمر سرماموند ءَ بیتگ کہ چریشی ءِ سوب ءَ 2 مردم بیران بیتگ اَنت وھدیکہ دگہ 4 ٹپیگ بیتگ اَنت۔
واکدارانی رد ءَ ناشناسیں ناشرکاریں مردماں بمب دگ ءِ کُنڈ ءَ چیر داتگ، گیشتر پَٹ ءُ پول برجاہ اِنت۔ داں انگت اُرش ءِ زمہ واری ھچ گل ءَ نہ من اِتگ۔
وائس فار بلوچ مسنگ پرسنز ءِ شدکشیں ھرتال ءَ چار ھزار ءُ پنچ سد ءُ سںی روچ سرجم بیت، چہ کراچی ملیر ءَ سول سوسا-ٹی ءِ بالاچ بلوچ، عدیل بلوچ، نورشاہ ءُ دگہ مردم بنجل ءَ اتکگ ءُ کھولانی گون ءَ یکجاھی درشان اش کرتگ –
وی بی ایم پی ءِ وائس چیئرمین ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ پاکستان ءَ آوار جنی ءُ زانگول کرتگیں جون، نشانگ کرتگیں مردمانی واستا اگاں توات چست بیتگ گڑا اشانی تہ ءَ ہیومین رائٹس واچ ایمنسٹی انٹرنیشنل ءُ پاکستان ءَ گلانی گپ ھم ھست اِنت اگاں چہ میان اُستمانی تکاں امریکہ، کینڈا، یورپی یونین پارلیمپارلیمنٹ ءَ برجاھیں درشانی بلوچستان ءَ انسانی ھکانی پامالی ءِ گپ بیتگ اَنت بلے درستاں گیش رپورٹ بی بی سی ءَ داتگ اَنت دو ماھانی تہ ءَ بندات ءَ بولان اسپلنجی مستونگ ءَ دروگیں میڑ ءَ نُھ بیگواھیں مردماں زنداناں کشگ ءُ آیانی زانگولیں جون دور دیگ بیتگ اَنت –
ماما قدیر بلوچ ءَ گوشتگ کہ وی بی ایم پی ءَ یک دراجیں پندی روانک ءُ یک دیریگیں شدکشیں ھرتالی بنجلے کہ سیزدہ سالاں چہ برجاہ اِنت – سرجمیں دنیا بلوچستان ءَ بیوکیں زلمانی بارو ءَ بلوچ راج ءِ نسل کشی ءِ بارو ءَ سرپدی داتگ اَنت بلے پاکستان ءِ واکدارانی گوشاں مورے ھم نہ وارت چُشکہ اشی ءِ آسر جمھوریت ءِ ٹاہ دیوکیں ڈیھ پاکستانی پوج ءُ چیریں اداھانی دست ءَ آوار جنگ بیتگیں بلوچ راج ءِ پسگ ھمے وڑ کہ زالبول ءُ زھگ ھم بیگواہ کنگ بیتگ اَنت اے وڑین سنگینیں جرمانی بیگ ءَ ابید ھم تماشہ چارگ ءَ اَنت، مروچی ھم ما دزبندی کن ایں دودمانیں دنیا ءَ کہ بلوچستان ءَ بلوچانی نسل کشی ءَ زوت ءَ زوت بہ دار ایت ءُ دراھیں بیگواھیں مردمانی یلو کنگ ءَ کرد ءَ پیلو بہ کن اَنت ءُ بلوچستان ءَ برجاھیں پوجی آپریشن دارگ بہ بنت انسانی ھکانی لگتمالیانی بارو ءَ پٹ ءُ پول بہ کن اَنت –
لسبیلہ وندر ءَ کوسٹ گارڈ ءِ رویشگ سر ءَ ٹرانسپورٹر لاچار بوتگ ءُ وتی کوچ مانداشتگ ءُ زھرشانی کتگ-
ٹرانسپورٹر ءِ گوشگ اِنت کل گوشگ اِنت کہ کوسٹ گارڈ یک اژدھایے ءِ دروشم ءَ اَتکگ بازیں سالاں چہ کوسٹ گارڈ ءَ بے کانودی ءَ ٹرانسپورٹ پریشان کتگ اَنت-
آیاں گوشتگ کہ پٹ ءُ پول ءِ بھانگ ءَ بازیں کلاکاں مساپراں زلیل کنگ ءُ آھاں دار اَنت ، پٹ ءُ پول ءِ مستری کسٹم کر ءَ اِنت کوسٹ گارڈ ءَ بلوچستان ءِ راج زندگی ءَ بزگ کتگ-
ٹرانسپورٹراں لوٹ کتگ کہ اگاں کوسٹ گارڈ ءِ زُلم ءَ چہ مارا نہ رکینت گُڑا زھرشانی ءَ وتی سرجمیں کوچاں ھمے وڑ ماندار ایں-
اھاں گوشتگ کہ ھما کار کہ کوسٹ گارڈ ئیگ ءَ اِنت آ تیاب اَھد ءَ اِنت اشی ءَ ھمود ءَ راہ بدے اِت دانکہ بلوچستان ءِ راج یک راھتیں زندے گوازینت بہ کن اَنت-
دی بلوچستان پوسٹ پتر ھال ءَ سر بیتگیں ھالانی رد ءَ فرنیٹر کور 150 ونگ ءِ سبی چیک پوسٹ ءِ سر ءَ شمبے ءِ شپ ءَ ناشناسیں مردماں اُرش کرتگ – دمگ ءَ گوستگیں شپ ءَ چہ پوجی بیڑ برجاہ اَنت –
واکداراں تنی وھدی اُرش ءِ بارو ءَ ایف سی ءِ دو کارندہ صوبیدار منیر ءُ سپاھیگ بشیر ءِ زدگ بیگ ءِ ھال راست کرتگ اَنت دمگی مردمانی رد ءَ بازیں وھداں تیرگواری ءُ تراکانی توار اشکنگ بیتگ اَنت-
زدگ بیتگیں کارندہ درمانی ءَ ھسپتال ءَ برگ بیتگ اَنت-
زانگ بہ بیت گوستگیں شپ ءَ بلوچستان ءِ دمگ کیچ ءِ بنجاھی شھر تربت ءَ دزبمب اُرشے ءَ یک کارندھے زدگ بیتگ اَت ءُ درمانی ءَ ھسپتال ءَ برگ بیتگ ءُ اود ءَ آئی ءَ ساہ داتگ اَنت –
چریشی ءَ پیسر بنجاھی شھر شال ءَ کندھاری بازار ءَ بیتگیں بمب تراکے ءَ یک مردمے بیران ءُ ھشت زدگ بیتگ اِت اَنت تراک ءَ شورو پرپٹے ءَ بندوک بیتگ اَنت –
تربت ءَ بیتگیں بمب تراک ءِ زمہ واری بلوچ لبریشن آرمی ءَ منّ اِتگ اَت – گل ءِ جارکش جیئند بلوچ ءَ وتی درشانی ءَ گشتگ اَت کہ بمب اُرش ءَ سَے آبادکاراں ھوار پوج ءِ یک کارندھے مرتگ –
سبی ءَ بیتگیں اُرش ءِ زمہ واری ھچ گل ءَ پہ وت ءَ نہ زرتگ ءُ ھمے وڑ گوستگیں شپ ءَ سانگان ءِ کش ءُ گوراں ھیلی کاپٹر برز ءَ بال بیتگ اَنت ءُ پوج ءِ نیمگ ءَ یکشل ءَ مارٹر گولہ آس دیگ بیگ ءَ اِنت-
واکداراں تنی وھدی اے درگت ءَ دگہ گپ دیم ءَ نیاؤرتگ اَنت –
نبشتانک: منی مِھروانیں برات
نبشتہ کار: حلیمہ بچو بلوچ
دی بلوچستان پوسٹ
منی زندگی ءِ ھما روچ کہ من سک پریشان ات آں من وھدیکہ چہ کلاساں پد وتی لوگ ءَ اتک ءُ نِشت آں وتی وانگ ءُ ھر چیز یلہ کتگ ات اَنت بس یک روچے من باز دگہ وڑ بیت آں منی دل ءَ گوشت کہ من پد ءَ وتی وانگ ءَ بندات بہ کن آں من اے گپ ءِ سر ءَ نشت ءُ سک جیڑ اِت من وتی سوچ ءُ ھیال مَٹ کت کہ نوں من دیم ءَ ھم وان آں وتی زند ءِ توک ءَ باز کار کن آں، من ءَ ھم وانگ ءِ ھک ھست من بازیں جیڑگاں پد وتی برات ءِ گوما گپ کنگ لوٹ اِت بلے منی توک ءَ اینکس بْود نیستگ ات کہ من گپ بہ کن آں من سک پریشان اِتاں، منی مَگزاں یک گپّے اتک کہ من وتی دُراھیں گپّاں یک کاگدے ءِ سر ءَ نبشتہ کن آں ءُ برات ءَ راہ اش دے آں، من پد ءَ انچش کت من نشت آں وتی سرجمیں گپ نبشتہ کت اَنت ءُ پد ءَ من نبشتہ کرتگیں کاگد وتی برات ءِ نیمگ ءَ وتی باجی ءِ دست ءَ روان دات۔
وھدیکہ کاگد ءِ سر بوگ ءَ چہ پد منی برات ءَ کاگد ونتگ اَت ءُ منی گپ دیستگ اِت اَنت، آئی ءَ منی نبشتگیں کاگد ءِ پسّو ءَ باجی ءَ را گْوشتگ اَت کہ بہ گْوش شر انت تو وت ءَ ھچ پریشان مہ کن من تئی گوما آں من وھدیکہ اے گپ اِشکرت اَنت من ءَ سک ءَ باز وشّی بُوت، من دلجم بُوت آں کہ برات ءِ کُمک من ءَ گْون ءَ اِنت۔
لھتیں وھد گوست منی برات ءَ من ءَ کراچی ءَ وانگ ءِ واست ءَ دیم دات گُڑا سالے کپّے من ھمود ءَ گواز اینت، بلے من پد ءَ سک بیمار بیت آں منی برات ءَ منی باز ھیال داری کت ھر مشکلیں روچاں منی گوما بوت اِنت منی ھلاج ءِ واست ءَ من ءَ ھر نیمگ ءِ ڈاکٹر ءَ برت ئِے ءُ منی باز ھیالداری ئِے کت منی ھر درد ءِ راہ ءَ منی گوما بیتگ، پرچے کہ آ گوں من سک نزّیک بوتگ پمیشکا آئی ءَ منی نادراھی دیست گُڑا سک ءَ باز پریشان اَت بلے اِے گْرانیں ساھتاں منی برات ءَ من ءَ یلہ نہ کرت ءُ اِے مشکل ءُ گْرانیں ساھتاں گام پہ گام منی ھمراہ داری ءُ کمک ئِے کرت من وتی چکّاس ءِ پرچہ دات اَنت، بلے اِے وھداں من انچیں جاورانی دیمپان اِت اَنت کہ من اِے وھداں کراچی ءِ تہ ءَ تھنا نشت کنگ ءَ نہ اِت اَنت، گُڑا منی مِھروانیں برات ءَ منی پریشانی پھم اِت ءُ من ءَ ئِے گْوشت کہ تو تکانسر مہ بُو من گْوں تو ھْور کراچی ءَ نند آں ترا یلہ نہ کن آں۔ ھمے پیم ءَ آئی ءَ ھر وڑ ءَ منی ھمرھداری کت۔
بس آئی ءَ من ءَ وتی وانگ ءِ برجم دارگ ءِ ھاتر ءَ دلبڈی دات کہ تو بہ وان من تئی گوما آں ھمے پیم ءَ سالے ءَ چہ پد وھدے کہ من چہ وتی نادراھی ءَ وشجان بیت آں گُڑا منی مھروانیں برات ءَ من ءَ زُرت ءُ دیم پہ شال ءَ رھادگ بوت آئی ءَ من ءَ سرجمیں راہ ءَ چْو پِت ءُ زھگے ءِ پیم ءَ چار اِت ءُ منی ھیالداری ئِے کت۔ من شال ءَ دو ماہ ھاسٹل ءَ گْواز اَینت ءُ وتی چکّاس ءِ پرچہ دات اَنت پد ءَ واتر بوت آں دیم پہ وتی لوگ ءَ، لھتیں وھد ءَ پد منی چکاس ءِ آسر اھت گُڑا منی لمبر سک کم اِت اَنت۔ من وتی لمبرانی کمّی ءِ کسّہ گْوں وتی برات ءَ کرت اَنت گُڑا آئی ءَ من دلاسہ دات ءُ گوشت ئِے کہ تکانسر مہ بو لمبر کم گْیش بنت، آئی ءِ دلبڈی ءَ من ءَ گْیش مھکم کت۔ اِے لمبرانی کمّی ءِ وھد ءَ من باز پُرشتگ اِت آں من جْیڑگ ءَ اِتاں کہ من وتی منزل نہ رس ات آں ءُ منی دیستگیں واب سرجم نہ بوت اَنت۔ بلے منی کْوھیں برات کہ ھر مشکلاں منی ھمراھداری ئِے کتگ اَت ئِے آئی ءَ منی ھمّت بُرز کت ءُ من ءَ کپگ ءَ نیشت ءُ من ءَ پادانی سر ءِ اوشتگ ءِ سکْین ئِے دات تاں منزل روگ ءِ راہ ءِ پْیش داشت ءُ آئی ءِ دلبڈیاں چہ منی بْود (تاکت) اھت، منی مِھروانیں برات ءَ منی وانگ ءِ برجم دارگ ءِ ھاتر ءَ من ءَ کراچی ءَ راہ دات ءُ من ءَ گْوشت ئِے کہ تو کجام جاہ ءَ وانگ لوٹ ئے من ترا وانین آں تئی دیستگیں واباں یک مانایے دیگ لوٹ آں، من لوٹ آں کہ تو وتی وانگ ءَ برجم بہ دار ئے، وانگ ءِ برجم دارگ ءِ واست ءَ من ھر وڑ ءَ گْوں تو گْون آں تاں کہ تئی دل ءِ مُراد پیلو بہ باں۔ من ھم وتی برات ءَ را پسّو دات ءُ گْوشت کہ منی لالا جان وھدے کہ تئی سارتیں ساھگ گْوں من گْون اِنت گُڑا من ءَ روچ کدی نہ سْوچ اِیت ءُ تو کہ ھر وڑیں اڑ ءُ جنجالاں گْوں من گْون ئے گُڑا من ھچبر تکانسر نہ باں ءُ وتی وانگ ءَ برجم دار آں ءُ کجام ھم کارگل (ڈیپارٹمنت) منی نسیب بیت من آئی ءِ وان آں وھدے کہ من وتی کاگد ءُ ڈاکومنٹس کراچی ءِ مزن شاھدربرجاہ ءَ دات اَنت گُڑا منی نام فِھزیولوجی ءَ اتک گُڑا اِے درگت ءَ منی برات ءَ چہ من جُست گپت گْوشت کہ تئی ھیال چے اِنت ؟ من پسّو دات ءُ گْوشت کہ یک سالے ءَ تاں اد ءَ وان آں ءُ پد ءَ شال ءَ ھم چکّاس دے آں۔ گُڑا آئی ءَ من ءَ گْوشت چے کہ تو وت گِھتر زان ئے ھما وڑ بہ کن بلے وت ءَ ھچ پیم ءَ تکانسر مہ کن ءُ ھر کارگل ءَ ھر وانگجاہ ءَ وانگ لوٹ ئے منی تئی ھمراہ اوں من لوٹ آں کہ تئی دل ءِ مراد سرجم بہ بنت ھمے پیم ءَ من ءَ موکل ئِے دات کہ تو وتی ھم تبکیں جنکّاں گْوں ھوار بہ بو من وتی نوکیں زند کراچی شاھدربرجاہ ءَ بندات کرت ءُ منی مھروانیں برات ءِ سارتیں ساھگ منی ھمراہ اِنت کہ من ءَ ھچ پیم ءَ گَم ءُ اندوہ نیست، من بازیں مِھروانیں برات دیستگ بلے من وتی لالا جان ءِ وڑیں مِھروانیں برات نہ دیستگ بس منی دوا ھمیش اِنت کہ لالا جان مُدامی تو ھست ءُ سلامت بات ئے ءُ تئی سارتیں ساھیگ مدام منی سر ءَ ساھیل بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
بلوچ آجوئی سنگر براس ءِنام ءَ
شائر: شاکر مراد
دی بلوچستان پوسٹ
جمبوریں دردے آسءَ بِل
وتن جنگائیں بْراسءَ بِل
پہ توکل جنزگائیں بس
پہ سنگر کنزگائیں بس
تو کمے راہ شناسءَ بِل
وتن جنگائیں بْراسءَ بِل
اے شھیدانی مئے ارمان انت
اے یکجاہی مئے ایمان اِنت
نی کوھنیں وسواس ءَ بِل
وتن جنگائیں بْراس ءَ بِل
پہ راج ءَ ھورءُ یکجاہ اِنت
پہ سِتکءُدل ما ھمراہ اِنت
گمانی تہلیں تاس ءَ بِل
وتن جنگائیں بْراس ءَ بِل
مدام دیمپانیں جنگانی
تلاھیں بچ پہ ارمانی
کپوکیں وھدءِواس ءَ بِل
وتن جنگائیں بْراس ءَ بِل
سندھ ءِ مزن شھر کراچی ءِ ھند گلستان جوھر ءَ زورانسری آوار جنگ بیتگیں بلوچستان ءِ جھمنندیں عبدالحمید زھری ءِ جنکیں چک ءَ وتی شنگ کرتگیں یک تامربندے ءَ گُشتگ کہ بیست دسمبر ءَ چاگردی رسانکجاھاں پت ءِ یل کنگ ءِ ھاتر ءَ یک کمپین ءِ برجم دارگ بیت اِنت –
آئی ءَ وتی تامربند ءَ گیش گشتگ کہ دراھیں انسان دوست، انسانی ھکانی ادارہ ءُ سیاسی مردماں گوں دزبندی اِنت کہ آ منی پت ءِ یل کنگ ءِ ھاتر ءَ اے کمپئن ءَ بھر بہ زور اَنت ءُ مئے توار جوڑ بہ بنت-
آئی ءَ گشتگ کہ اے کمپئن بیست دسمبر ءِ شپ ءِ ساھت ھشت ءَ بندات بیت ءُ داں یازدہ ءَ برجم دارگ بیت اِنت –
زانگ بہ بیت عبدالحمید زھری دَہ اپریل دوھزار ءُ بیست ءُ یک ءَ کراچی ءِ دمگ گلستان جوھر ءَ آئی ءِ جند ءِ لوگ ءَ لس پوشاکانی مردمانی ھواری ءَ پولیس ءَ آوار جتگ ءُ بیگواہ کرتگ اَت کہ تنی وھدی بیگواہ اِنت –
آئی ءِ کھول ءَ گوستگیں روچاں کراچی ءِ پریس کلب ءَ عبدالحمید زھری ءِ بیگواھی ءِ درگت ءَ پریس کانفرنسے ھم کرتگ اَت ءُ آئی ءِ یل کنگ ءِ لوٹ کتگ اَت –
نبشتانک: حمّل کوٹِکے نہ انت
نبشتہ کار : اعظم نور
دی بلوچستان پوسٹ
یک ماتے ءِ کسّہ انت تو گُشت کن ئے کہ انسانی کسھے منی سنگتے ءَ یک روچے من ءَ نان ءَ لوگ ءَ لوٹائینت،من سنگت ءِ ذال اوں پیسرا نہ دیستگ ات سنگت اتک پیسرا منی کِرّ ءَ ما کشّ ات مُلکانی چرس ءُ لوگ کہ نزّیک بُوت من ءَ گُمان بوُت کہ مرد تو پشل پشل ءِ وتسرا ،بلے من ءَ چُشیں کزاہ ءَ باز رند ءَ گِپتگ اَت من زانت چرس انت ،شُوم روچ ءَ برے برے مڑ ایت گوں ،خیر ما لوگ ءَ پُترتیں داں زال ءَ منی دست گِپت انت ءُ کندِتے کہ تو بلاھیں مردے ءِ من چُنت رند ءَ حمّل ءِ پِت ءَ گُشتگ کہ بیارے گوں بلے گُشتگے دست گٹْ انت ۔
ھیر چُشیں باز ھبر بُوت جاگہ کراچی اَت اے دمان ءَ ماما قدیر گار ءُ بیگواھیں سیاسی ءُ سماجی مردمانی کیمپ اوں کراچی ءَ آورتگ اَت ءُ من گُشت کہ باندا من رواں ماما ءِ چارگ ءَ وھدے کہ وت کراچی آں من ءَ تُرس ات بلے من گُشت رواں گُڑا حمّل مات ءَ گُشت کہ چو مہ رو انّوں ھالت شَر نہ انت حمّل ءَ بَر گوں گُوَنڈینے اگاں یکے ءَ گوں تو چیزے کنگی بہ بیت اے ساھت ءَ نہ کنت گُش ایت گونڈوے گون اِت گوں من کند ات ءُ گُشت اشاں گونڈو ءُ پیرین نداریت بلے سِتم کُتے کہ حمّل ءَ بَر گون ۔
درآیگ ءِ وھد ءَ دگہ لھتے گونڈو سمبھیبتگ اِت ئِے کہ اشاں اوں بَر گوں ،من ماما کیمپ ءَ شُتاں بلے پِیر مَرد بدقسمتے ءَ اود ءَ نہ اَت ما روایتی عکس کَشّ اِت کہ حمّل مات ءَ گُشتگ ات کہ حمّل ءُ ماما عکسے بِکَش ماما وَ اود ءَ نہ اَت-
گڑا من حمّل ءِ عکس کشّ ات انت وتی سپر جَت ءُ نزاناں چار سال ءَ رند یا پنچ سالءَ منی ھوش چرساں بُرتگ اَت بلے ھال اتک کہ حمّل پِت بیران بُوتگ منی نمبر چہ پیس بُکّ ءَ حمّل مات ءَ پچ گِپتگ ات ءُ من ءَ وٹسپ ءَ ھالے کت ءُ گُش ایت لھتے گپّ اَنت من لوٹاں گوں تو کنان اش کہ حمّل پِت سنگتاں من ءَ بس تئی سر ءَ بھروسہ کنت من کند ات ءُ گُشت کہ تو اولی مَردُمے کہ منی سر ءَ بھروسہ کنگ ءَ ئے من ءَ ھمایاں کہ نہ دیستگ منی سر ءَ بھروسہ نہ کن انت پد ءَ من گُشت کہ ما باز شکّی ئیں مارا دگراں بَل وتی سر ءَ بھروسہ نہ کنت گپ باز بُوت گُڑا من ہھیسکگانی توار اِشکُت چے ءَ گریوگ ءَ ئے ،من جُست کُت گڑا ھیسکارِتے ھیسکارتے ھیسکارتے پہ زورے دراتک کہ تو سھی نہ بُوتگ ئے کہ من ءُ بالاچ ءِ پِت ءَ اسلام ءِ ھساب ءَ نکاہ نہ کُتگ من یکبرے و پَچلَرزِتاں کہ بلوچ وَ چِشیں جیڑاں چہ اسلام ءَ تُرْند ترانت پد ءَ گریت ئِے ءُ من ءَ گریواینتے گوں منی گریوگ وَ راہ ءِ سر ءَ انت من سنگتے ءَ گُشت من ءَ سک گریوگ کیت کسانیں بزّگی یے بہ گنداں گریواں باز براں وشّیانی وھداں من گریواں کنداِت ئِے گُش ایت چرس کمتِر بِکَش من دل ءَ گُشت چرساں بُکُتیں منی پِت انچو بُوتگ ات منی ودی بُوگ ءَ پیسر کَشّگ ءَ انت، من پد ءَ جُست کُت چے؟ شُما نکاہ نہ ونتگ ؟ گُش ایت اِنّاں ِاَنّاں کَپ گُشت ئِے پد ءَ بور بور گریوگ ءَ لَگّ اِت ،گُش ایت من بُمرتیناں بلے بلوچے مہ بوتیناں آ انچو گریوگ ءَ ات کہ من ءَ اے دمان ٹیلیفون بند کنگ کپت من توارے راہ دات کہ تو ھر وھدے زان ئے گپ کُت کن ئے گُڑا من لوٹاں کہ تئی کِسھاں گوش بداراں منی توار گوشدارگ ءَ پیسر پد ءَ فون کُت ئِے من چِست کُت گُشی لال ءَ منی مَدت ءَ بکن من نفسیاتی گولیانی سر ء زندگاں گپ کُت کناں ،دُنیا ءِ دیم ءَ کندگ جُھد کن آں بلے من نوں اعظُم مرچی ئیں بانداتیں مراں۔
حمّل ءَ زَرّ ءُ مال مدی اِت بلے حمّل ءَ مہ گُش ات کہ کوٹکے حمّل کوٹکے نہ انت چوروے بزّگے آ انچیں دردناکیں گپ کنگ ءَ اَت ءُ من وش وشّ ءَ گریوگ ءَ اِتاں داں آ اِش مہ کنت ،من پہ زْورے گینسارتے کَشّ ات ءُ پُرس اِت شُما پرچہ نِکاہ نہ کُتگ پد ءَ کمّے گریت ئِے ءُ گُشت ئِے کہ من ءَ کلام چوپیں مَردے پہ زور سر ءَ داتگ اش من داں دہ سال ءَ لوگ ءَ نیشتگ کہ من ءَ طلاق دنت بلے تو زان ئے لال ءَ تو وتمردینے ءِ بلوچے بُوت آں ءُ غریبے بُوت آں پد ءَ جنینے بُوتاں بزاں کہ اللّلہ ءَ اے زوراکی تئی سر ءَ آورتگ پد ءَ پہ ھیسکارگ گُشت ئِے کہ لال ءَ سنگتاں بِگُش حمّل کوٹکے نہ انت چوروے بزّگے، پت مُرتگ ئے من ھرچی کُتگ بلے بہ من حمّل ھچ چیز ءَ تنگ نہ کُتگ۔من پہ زورے کَند ات ءُ گُشت کہ پِت ءِ وتی جاگھے بلے حمّل ءَ تئی رنگیں ماتے ھست حمّل چورہ نہ انت لال ءَ من نادراھاں من ءَ غماں چُنڈ اِتگ منی جسم ءِ گواتاں مہ گِند من مرچیگیں بانداتیں مِراں،من ءَ تُشے باور نہ بُوت کہ چُشیں بھادُرّیں زال چو مِر ات ،مئیگ ءَ مردینے ءَ اگاں چُکے بہ بیت چیر دنت ئِے زالبول وَ کُشگ بنت بلے دومی ھپتگ ءَ ھال اتک کہ حمّل مات ءَ بالاچ ءُ اے دوپوستیں دُنیا یلہ داتگ ءُ حمّل ءِ پِت ءِ نوکیں ھنکین ءَ شُتگ نُوں ھرکس باید مُدام ہمک جیڑہ ءَ گوں وت ءَ بِچاریت ھر کس اے بِہ چار ایت اگاں من حمّل بُوتین آں؟ مات ءُ پِتانی مجبوری یا ردی ءَ تو حمّل ءَ سزا دات نہ کن ئے ،بایدیں اے کوٹِک لبز چہ بلوچی زُبان ءَ گار کنگ بہِ بیت پرچہ کہ کوٹِک سکّیں ھرابیں لبزے اشی ءِ جاہ ءَ چورہ وت گیپت یک انسانے ءَ وھدے چاگرد کوٹک لیک ایت من اے پھماں کہ اے انسان نہ بلکیں چاگِرد کوٹکے کے لوٹ ایت کہ من ءَ ھرابیں نگاھاں چارگ بہ بیت مردم ءِ سر ءَ کہ زھر بنت بلوچ گُش انت کوٹکے اسل ءَ اے لبز انسانیت ءِ توھین انت پرچہ کہ اد ءَ گونڈو ءَ ھچ وس ءُ دسترس نیست،گونڈو چے بکنت کہ آ کوٹِک گُشگ نہ بیت گونڈو ءِ کِرْا آپشن زیرو نہ بلکیں مائینس انت ،نوں ھر کس وت ءَ وتی دل ءَ حمّل بہ لیک ایت ءَ پیسلہ بہ کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
بلوچ لبریشن آرمی ءِ جارکش جیئند بلوچ ءَ گْوشتگ کہ سرمچاراں مروچی کیچ ءِ بُنجاھی شھر تربت ءَ ِآبادکار ءُ پاکستانی پوج کارندہ گوں دست بمب ءَ نشانگ کتگ اَنت ، چریشی ءِ آسر ءَ سے آبادکار ءُ یک پوجی کارندھے مرتگ وھدے کہ دُشمنیں پوج ءِ بازیں کارندھے ٹپی بوتگ اَنت-
بی ایل اے ءِ جنگولیں سرمچاراں دُشمنیں پوج ءُ مزنیں آباد کار ھما وھد ءَ نشانگ کتگ اَنت، وھدے آ کمشنر دگ ءِ سر ءَ لارج پارک ءِ کینٹین ءَ نندوک بوتگ اَنت، دُشمنیں پوج ءِ کارندہ اود ءَ آبادکارانی پھازگ ءِ ھاتر ءَ ساڑی بوتگ اَنت-
بلوچ ڈیھ ءِ سر ءَ پاکستانی پوج وتی بدیں ارادگانی سرجم کنگ ءَ مزنیں کچے ءَ پنجاب ءَ چہ وتی مردماں کار اَنت بلوچستان ءَ جھمنند کنگ ءَ اِنت ئے- آیانی مول ءُ مراد تھنا پوج ءِ ھاتر ءَ چاریگی ءِ یک دامے چیر کنگ اِنت بلکیں بلوچاں وتی ڈیھ ءَ چہ کم کچ کنگ اِنت- بی ایل اے بازیں وھداں اے پدر کتگ کہ بلوچستان یک جنگجاھے ، آبادکار زانتی ءَ یا نا زانتی دروشم ءَ پاکستانی پوج زوراکی ءِ بھر بوگ ءَ چہ وتی پھریز بہ کن اَنت اگان ناں آیانی گوم ءَ ھما وڑ کنگ بیت کہ پوج بگیر ءَ کنگ بوگ ءَ اِنت-
اے اُرش ءِ زمہ واری ءَ بلوچ لبریشن آرمی منّ اِیت – پاکستانی پوج ءُ آیانی ھمبھرانی سر ءَ مئے اُرش برجاہ بنت-
بلوچستان ءِ دمگ ھزدار کودہ ءَ چہ زورانسری آوار جنگ بوتگیں عبدالواحد ءِ مات ءَ سرکار ءُ انسانی ھکانی ادارھاں چہ لوٹ کتگ گوشتگ چُک ءِ زاھر کنگ ءَ آئ ءِ کمک کنگ بہ بیت –
بیگواھیں عبدالواحد ءِ مات ءِ رِد ءَ آئی ءِ زھگ ھمے سال ءِ بیست نومبر ءَ ھزدار ءِ دمگ کودہ زورانسری آوار جنگ بوتگ –
عبدالواحد ء غلام نبی سمالانی ءِ مات ءِ گوشگ ات کہ آء چُکے زورانسری آوار جنی ءَ پد آئی ءِ زند ازاب ءِ تہ ءَ گوزگ انت ءُ ادارہ مار ءَ ھک بہ دئینت –
عبدالواحد ءِ مات ءَ انسانی ھکانی ادارہ ءُ سرکار ءَ چہ لوٹ کتگ کہ آئی ءِ زھگے یل کنائینگ ءَ وتی کرِد ءَ پیلو بہ کن انت –
