بلوچستان ءِ دمگ کیچ ءَ پاکستانی پوج ءَ سَے مردم دزگیر کنگ ءَ پد بیگواہ کرتگ اَنت –
بیگواہ کنگ بیتگیں مردمانی پجار مھمد جان ء تاج مھمد، مقبول ء رفیق ءُ گنج بکش ء عصاء ءِ ناماں زانگ بیتگ اَنت –
بیگواہ کنگ بیتگیں مردم کیچ ءِ دمگ کولواہ سگک ءَ پوج ءَ گوستگیں روچ ءَ دزگیر کنگ ءَ پد آوار جتگ اَنت کہ تنی وھدی ھال نیست اِت –
ٹی بی پی کارست
کارست: بوبی سینڈز
نبشتہ ءُ پولکار: حکیم بلوچ
1954 ءَ جون ءُ روژالین سینڈز ءِ لوگ ءَ ںارتھرن آئرلینڈ ءِ دمگ انٹریم ءِ ایبٹ کراس ءَ ودی بیتگیں روبرٹ جیررڈ (بوبی) سینڈز وتی مات ءُ پِت ءِ چاریں چُکانی تہءَ مستریں چُک بیتگ، روبرٹ سینڈز ءَ دو کستریں گوھار مارسیلا ءُ برناڈیٹ ءُ یک کستریں برات ءِ جون سینڈز بیتگ – سینڈز کھولءَ وتی ھمسایگانی بیھار ءُ ناشریں رویانی سبب ءَ ایبٹ کراس یل داتگ ءُ راتھکول ءَ روگ ءَ لاچار بیتگ اَنت۔ راتھکول کہ آودہ 30% جھمنند کیتھولک عیسائی مذھب ءَ چہ سیادی داروکیں مردم بیتگ اَنت ءُ کیتھولک وانگجاہ ھم بیتگ۔ روجر (بوبی) سینڈز ءَ سٹیلا مارس اسکول ءَ ونتگ ءُ ھمے اسکول ءِ کلب ءِ ھاتر ءَ فٹبال گوازی ھم کتگ –
1966 ءِ وھد ءَ راتھکول ءَ ھوار سرجمیں بیلفاسٹ ءَ نیکراھی جنگ ءُ جدل بندات بیت اَنت ءُ جاور باز ھراب بیت اَنت، ءُ کسانیں کساس ءَ جھمنندیں کیتھولک مھلوک انگیر کنگ بیت اَنت – چہ اے جاوراں پیسر بوبی سینڈز ءِ سنگتی گوں پروٹیسٹنٹ آں (عیسائی مذھب ءِ دگہ فرقہ اِنت) بیتگ، بلے اناگتی آئی ءِ سنگتاں آئی ءِ گوما اھوال کنگ بند کُت ءُ سینڈز ءَ ھم باز زیت دربرت کہ آئی ھاترءَ المی انت کہ آ گوں کیتھولک کہ آئی ءِ فرقہ ءِ مردم اَنت گوں ھمایاں نزیکی بہ کنت –
بوبی سینڈز ءَ 1969 پانزدہ سال ءِ اُمبر ءَ اسکول یل داتگ، ءُ نیو ٹاون ایبی ٹیکنیکل کالج ایڈمیشن زرتگ اَت، بوبی سینڈز ءَ وانگ ءَ ھوار 1970 ایلکزینڈرز کوچ ورکس ءَ کار دربرگ بندات کُتگ اَت۔
بوبی سینڈز ءَ ایلکزینڈرز کوچ ورکس یک سالی ءَ چہ ھم کم وھد ءِ تہءَ یک دیگ کپت، بوبی سینڈز ءَ مدام پروٹیسٹنٹ ھم کارانی دست ءَ کم شرپی ءِ دیمپانی کنگ کپتگ، بازیں ھم کارانی رد ءَ بوبی سینڈز ءَ اے کم شرپی داں مزنیں وھدے ءَ نادلگوش کُتگ اَنت۔ بلے پدءَ جنوری 1971 ءِ یک بیگاھی ءَ وھدے آ وتی کار ءَ ھلاس کنگ لوگ ءَ روگ ءَ بیت گُڑا السٹر لویالسٹ ٹارٹن گینگ ءِ ( نارتھرن آئرلینڈ ءِ گوں برتانیہ ءَ یکجاھی لوٹوکیں سرکار دوستیں گل) لھتیں باسک کہ گوں بوبی سینڈز ءَ ھم کار بنت آئی ءَ توپگ ءِ زور ءَ دار اَنت ءُ گُش انت کہ یک فینین یے (آئرش ریپبلکن آرمی ءِ باسک ءِ اگاں آئرلینڈ ءِ آجوئی جھدکار ءِ) ھاترءَ ادا کار کنگ چہ آئی بالاد ءَ مستریں گپ اِنت ءُ اگں آ وتی زند ءَ رکینگ لوٹ گُڑا دگہ رندءِ ادا گندگ مہ بیت – بوبی سینڈز ءِ جندءِ گپانی رد ءَ ھمے ھما دمان بیتگ کہ آئی ءَ پیسلہ کُتگ کہ سلاہ بندیں جھد ءَ ابید دگہ راہ نیست اِنت –
چوناھا بوبی سینڈز ھمے ھاترءَ نام آور اِنت کہ آئی ءَ پہ وتی لوٹانی ھاترءَ شد ھڑتال کُتگ اَت ءُ داں وتی زند پہ لوٹانی ھاترءَ ندر ھم کتگ اَت –
بوبی سینڈز بازیں زوراکی ءُ وتی مھلوک ءِ سر ءَ بیوکیں برتانیہ زلماں پد 1972 ءَ آئی آر اے بزاں آئرش ریپبلکن آرمی ءَ ھوار بیت، بوبی سینڈز وتی جھد ءِ سوب ءَ دو رند ءَ دزگیر کنگ بیت اولی برءَ 1972 ءَ دزگیر کنگ بیت ءُ داں اپریل 1976 ءَ بندیگ بیت ءُ آئی سرءَ گیر قانودی سلاہ کارمرز کنگ ءِ بھتام بیت – بوبی سینڈز وھدیکہ 1976 ءَ چہ جیل ءَ یل بیت آ پد ءَ گوں وتی مھلوک ءَ وتی جھدءَ برجاہ کنت ءُ یک رندے پدءَ کساس شش ماہ ءَ پد برتانیہ ءِ پولیس آئی ءَ دزگیر کنت ءُ نارتھرن آئرلینڈ ءَ میز بندی جاہ ءَ کہ پیش لونگ کیش ڈیٹینشن سینٹر ءِ نام ءَ زانگ بیتگ بندیگ کنگ بیت –
بوبی سینڈز ءَ دومی رند ءَ چاردہ سال ءِ سزا دیگ ءُ بندیگ کنگ بیت اِنت- بوبی سینڈز وھدے دومی رند ءَ زندانی کنگ بیت گُڑا بندی جاھانی جاور مٹ بنت، آئرلینڈ ءِ سیاسی بندیگانی سر ءَ بازیں بندش جنگ بنت آیانی پیشی چیروکائی بنت، آیاں سیاسی بندیگانی حیثیت دیگ ءَ ابید جرمکارانی پیم ءَ چارگ بنت –
بندیگ جاھانی تہءَ آئرش سیاسی بندیگانی سرءَ زلم ءُ آیاں آیانی بُنکی ھک نہ دیگ ءِ بگیری ءَ آئرش جھد کار زندان ءِ تہ ءَ زھرشانی بندات کن اَنت، اے زھرشانی (بلینکیٹ) ءُ (ڈرٹی) ءِ نام ءَ زانگ بنت، بلینکٹ زھرشانی ءَ بندیگ تھنا یک کمبل (بلینکیٹ) ءِ پوش اَنت ءُ دگہ پوچ گورا نہ کن اَنت – وھدیکہ سِل (ڈرٹی) زھرشانی ءَ بندیگ وتا ساپ نہ کن اَنت بزاں نہ شود اَنت۔ بوبی سینڈز اے دوھیں زھرشانیاں بھر زیر اِت ءُ بندیگانی نیام ءَ باز نامدار بیت اِنت – پنچ سال ءِ کچ ءَ وڑ وڑیں زھرشانیاں پد ھم وھدے برتانیہ ءِ سرکار بندیگانی لوٹان پیلو نہ کنت گُڑا شُد مرگ ءِ شور بندی کنگ بیت اِنت ءُ بوبی سینڈز درستاں پیسر وتی نام ءَ دنت ءُ پد ءَ اے شُد مرگ ھڑتال ءِ سروکی ءَ کنت –
01 مارچ 1981 ءَ بندات بیتگیں شُد ھڑتال نارتھرن آئرلینڈ ءُ برتانیہ ءَ ھوار بازیں ڈیھاں نامدار بیتگ ءُ برتانیہ ءَ بازیں مردماں سرکار ھم نبشتہ کُتگ کہ بندیگانی لوٹ پیلو کنگ بہ بنت – بوبی سینڈز ءُ آئی ءِ ھمراھیں جھدکارانی شُد ھڑتال ءِ مھلوک ءِ تہ ءَ نامداری ھمینچو ود اِیت کہ بوبی سینڈز چہ بندیگ جاہ ءَ چہ گچین کاریاں اوشت اِیت ءُ 10 اپریل 1981 ءَ شُد مرگ ءِ 41 می روچ ءَ 30 ھزار اوٹاں گوں گچین کاریاں باج بر بیت اِنت – بوبی سینڈز ءِ مھلوک ءِ تہ ءَ ودوکیں مھر ءُ آئی لوٹاں گوں یکجاھی درشان ءَ ابید ھم برتانیہ ءِ کنسرویٹو پارٹی ءِ مزن وزیر مارگریٹ ٹیچر ءَ نہ تھنا بندیگانی لوٹ منگ ءَ مکن کُتگ بلکیں اے ھم گُشتگ کہ اَے مردم جرمکار اَنت ءُ ایشانی لوٹ ھچ پیم منگ نہ بنت –
03 مئی 1981 بوبی سینڈز کوما ءِ آماچ بیت ءُ 05 مئی 1981 ءَ 66 روچ ءَ شُد مرگ ءَ نند ءَ پد بیران بیت – بوبی سینڈز ءِ مرگ ءَ پد امریکہ ءَ ھوار بازیں ملکاں بوبی سینڈز ءِ مرگ ءِ پد ءَ رنج ءُ غم ءِ درشان کُتگ۔ رسانکداں مارگریٹ ٹیچر ایر جتگ ءُ گُشتگ کہ آئی ءَ وتی ملک ءِ دگہ پارلیمنٹرین ءِ لوٹ نہ من اِتگ ءُ بیرانی ءَ اِشتگ – بوبی سینڈز ءِ میت ءَ رسانکدرانی ردءَ کساس یک لک ءَ بُرز مردماں بھر زرتگ ءُ آئرش یونین زھرشانی کنان ءَ ھڑتال کُتگ اَنت – بوبی سینڈز ءِ مرگ ءَ پد کساس 9 دگہ شُد ھڑتال ءَ نشتگیں آئرش جھدکار بیران بنت ءُ زھرشانی 03 اکتوبر 1981 ءَ آسر بیت ۔ زھرشانی ءِ ھلاس بیگ ءَ پد بندیگانی لوٹ منگ بنت ءُ آیاں آیانی ھک دیگ بنت ۔
دلگوش: ٹی بی پی ءَ کارستانی درگت ءَ سرپدی ءُ اھوال چہ انٹرنیٹ ءُ دگہ جاھاں زیرگ بیتگ اَنت ءُ اِشانی تہ ءَ ردی اگاں گیشی ءُ کمی الم بیت کن اَنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
شائر: چراگ راھی
دی بلوچستان پوسٹ
براس پہ وتن زَر اِیت
براس پہ وتن مِر اِیت
براس تماهے لوٹانی
براس براهے مهرانی
براس رُژنے بانداتے
براس پُهلّیں سوگاتے
براس کردے کردارے
براس سرانی یلگارے
براس نامیں جنگانی
براس گامیں پندانی
براس برمشیں کوهانی
براس جُنزیں جُهدانی
براس لجّیں گُهارانی
براس ننگیں ماسانی
براس کوم ءِ ایمان اِنت
براس اهد ءِ سُلتان اِنت
براس جنگ ءِ دیمپان اِنت
براس ننگ ءِ پاسپان اِنت
براس سنگر براسانی
براس انگر آسانی
براس دیدے چمّانی
براس شهمے گرندانی
براس درد ءِ درمان اِنت
براس مرد ءِ ارمان اِنت
براس اسلم ریهان اِنت
براس ڈیهہ ءَ کُربان اِنت
براس هکّل توجیلے
براس مُهریں زمزیلے
براس جُنز ءِ کاروان اِنت
براس هار ئے تُوپان اِنت
براس لوٹیت آجوئی
براس نئیلیت باجوئی
براس توارے هقّانی
براس شُمارے لکّانی
براس تچوکیں آپ ءَ اِنت
براس ماتءِ لاپءَ اِنت
براس بچّے شهمیریں
براس کشکے دلگیریں
براس ملنگیں کوهگولیں
براس بالاچ جنگولیں
براس اکبر پیرین اِنت
براس بابا میرین اِنت
براس هالد گُل جان اِنت
براس مُهکم بولان اِنت
براس توکل شیرانی
براس استیں بیرانی
براس نئیلیت بدواهاں
براس سُوچیت ارواهاں
براس روکیں آسءَ اِنت
براس جیگ ءِ لاسءَ اِنت
بلوچستان ءِ ضلع ڈیرہ بگٹی ءَ پاکستانی پوج ءَ بیڑبرتگ ءُ زوراکی کنان ءَ دو مردم آوار جتگ اَنت-
سربوتگیں ھالانی رِد ءَ ضلع ڈیرہ بگٹی ءِ دمگ اوچ ءِ ھند موزوھی میتگ ءَ پاکستانی پوج ءَ لوگانی سر ءَ بیڑبرتگ ءُ زوراکی کنان ءَ دو مردم آوار جتگ ءُ گوں وت برتگ اَنت-
آوار جنگ بوتگیں مردمانی پجّار رحم علی ءُ مضام ء دریحان بگٹی ناماں چہ بوتگ اَنت کہ آ بگٹی ٹِک چاکارانی شاک ءَ گوں سیادی دار اَنت-
زانگ بہ بیت اے وھد ءَ بلوچستان ءِ بازیں ھند ءُ دمگاں لشکر کشی ءُ آوارجنیانی دْرچ برجاہ ءَ اِنت-
یورپئین پریمئیر لیگ فٹبال گوازی ءَ گوستگیں شش ٹیمانی میان ءَ گوازی کنگ بوتگ کہ مانچسٹر سٹی ءَ نیوکاسٹل ءِ دیم ءَ چار گول ءَ گوازی کٹ اتگ وھدیکہ ٹوٹنھم ءُ لیورپول، وولوز ءُ چیلسیا ءَ دیمیگ بوتگ انت –
یکشمبے ءَ بوتگیں پریمئیر لیگ ءِ اولی گوازی مانچسٹر سٹی ءُ نیوکاسٹل ءِ میان ءَ کنگ بوتگ کہ مانچسٹر سٹی ءَ چار گول ءَ گوازی کٹ اتگ ءُ نیوکاسٹل ءِ نیمگ ءَ چہ ھچ گول اسکور کنگ نہ بوتگ –
مانچسٹر سٹی ءِ نیمگ ءَ اولی ھاپ ءَ دو گول اسکور کنگ بوتگ کہ آر.ڈیاس ءُ جے.کینسیلو ءَ داتگ انت ءُ دومی ھاپ ءَ آر.مھریز ءُ آر اسٹلنگ ءَ ھم یک یک گولے اسکور کُتگ گوازی وتی ٹیم ءِ نام ءَ کُتگ –
پریمئیر لیگ ءِ دومی گوازی چیلسیا ءُ وولوز ءِ میان ءَ کنگ بوتگ کہ ھردو ٹیمانی لیبیاں جوانیں لیب پیش داشت بلے ھردو ٹیمانی نیمگ ءَ چہ ھچ گول اسکور کنگ نہ بوتگ ـ ھردو ٹیم چہ گول اسکور کنگ ءَ سوبین نہ بوتگ اَنت –
ٹوٹنھم ءُ لیور پول ءِ میان ءَ بوتگیں سیمی گوازی ءَ ھردو ٹیم دو دو گول ءَ دیمیگ بوتگ انت ھردو ٹیمانی نیمگ ءَ چہ دو دو گول اسکور کنگ بوتگ –
ٹوٹنھم ءِ نیمگ ءَ چہ اولی سینزدہ منٹانی میان ءَ ٹوٹنہم ءِ لیبی ایچ کینے ءَ یک گول ءِ اسکور کُتگ لیور پول ءِ لیبیاں جوانی ءَ گوزی کنان ءَ سِی ءُ پنچ منٹانی تہ ءَ لیبی ڈی جوٹا ءَ اولی گول اسکور کتگ ششت ءُ نہمی منٹ ءَ لیبی اے روبرٹسن ءَ لیورپول ءِ نیمگ ءَ چہ دومی گول اسکور کُتگ بلے گوازی ءِ کٹگ ءَ سوبین نہ بوتاں کہ ھپتاد ءُ چارمی منٹ ءَ ٹوٹنہم ءِ لیبی ایچ.سن ءَ وتی ٹیم ءِ نیمگ ءَ چہ دومی گول اسکور کُت داں گڈسر ءَ ھردو ٹیمانی نیمگ ءَ چہ ھچ گول اسکور کنگ نہ بوتگ ءُ ھردو ٹیم دو پہ دو گول ءَ دیمیگ بوتگ انت –
بلوچستان نیشنل پاٹی کیچ ءِ جارکش ءُ وتی شنگ کرتگیں درشانی ءَ گُشتگ کہ گوستگیں روچاں کیچ ءِ دمگ ھوشاپ ءَ سیکورٹی پورسز ءِ نیمگ ءَ لس مھلوک ءِ لوگانی سر ءَ بیڑ ءُ وتسر ءَ ترسینگ ءُ ھشت مردمانی آوار جنگ ءَ ترندی ءَ ایر جن آں –
آئی ءَ گُشتگ کہ بلوچستان ءَ ریاستی ادارھاں چہ مردم مھپوز نہ اَنت ملکی ادارھانی پرز بیت کہ آ شھریانی ھپازت ءَ بہ کن اَنت ملک ءِ تہ ءَ ھمک شھریاں آجوئی ءِ بستار ءِ ھک ھست اِنت بلے بدبھتی ءَ مروچی ءَ داں بلوچستان ءِ مھلوک ملٹری آپریشنانی دیمپان اَنت –
آئی ءَ گُشتگ کہ سی ٹی ڈی ءِ نام ءَ بیگواھیں مردماں دیم پہ دیم ءَ جنگ ءُ کُشگ یا لوگانی سر ءَ بیڑ برگ ءُ چاردر ءُ چار دیوالیانی پامال کنگ ءُ پد ورنا، زھگ، کماش ءُ زالبوال دزگیر کنگ ءُ بیگواہ کنگ بنت اے انسانی بنکی ھک ءُ دودمانیں چاگرد ءِ ھلاپ اِنت بلے اے ستھسالی پالیسی ءِ درچ بلوچستان ءَ برجاہ اَنت –
آئی ءَ گُشتگ کہ واجھاں گوں دزبندی اِنت بلوچستان ءَ برجاھیں زُلم ءُ زوراکی ءُ گیر آھینی جمھوری گامگیجانی ھلاپ ءَ گامگیج بہ زور اَنت اے وڑیں نکسانیں سر ءُ پرانی تاوان سرجمیں ملک ءِ سر ءَ کپ اَنت –
بلوچ آجوئی لوٹوکیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ سانگان اُرش ءِ زمّہ واری منّ اِتگ ءُ گوشتگ کہ مئے سرمچاراں ھژدہ دسمبر ءَ سبی ءِ دمگ سانگان ءَ زورگیریں پاکستانی پوج فرنٹیر کور ءِ یک سد ءُ پنجاھمی ونگ ءِ پوسٹ ءُ آئی ءِ کمک ءَ آؤکیں دژمن پوج ءِ گاڑیانی کاروان ءِ سر ءَ اُرش کُتگ ءُ پنچ کارمند کُشتگ اَنت ءُ بازینے زدگ کُتگ اَنت –
جارکش ءَ گوشتگ مئے سرمچاراں جوانیں شوربندیانی رِد ءَ دژمنیں پوج ءِ پوسٹ ءِ سر ءَ چہ سَے نیمگاں اُرش کُتگ چریشی ءَ دژمنیں پوج ءَ بازیں جانی ءُ مالی تاوانانی دیمپانی بوتگ وھدیکہ دژمنیں پوج ءِ کمک کنگ ءَ آؤکیں پوج ءِ گاڑیانی کاروان ءِ سر ءَ ھم مئے سرمچارانی دگہ ٹولی ءَ پیسر ءَ چہ سنگر بستگ ءُ آھانی سر ءَ اُرش کُتگ – اُرش ءِ آسر ءَ زورگیریں پوج ءَ جانی ءُ مالی تاوان بیتگ ءُ دیم ءِ رؤگ ءَ نہ اِشتگ –
جارکش جئیند بلوچ ءَ گوشتگ کہ بی ایل اے اے کول ءَ کنت کہ سرڈگار ءِ آجوئی ءَ تاں دژمنیں پوج ءُ آئی ءِ ھمکارانی سر ءَ اُرشاں ترندی ءِ گوم ءَ برجاہ بنت-
سر بیتگیں ھالانی رد ءَ روکپتی بلوچستان ءَ ناشناسیں مردمانی تیرگواری ءَ یک مردمے بیران بیتگ –
گیشیں ھالانی رد ءَ ناشناسیں سلاہ بندیں مردماں روکپتی بلوچستان ءِ دمگ دلگان ءَ تیرگواری کرتگ ءُ یک مردمے کُشتگ –
کُشگ بیتگیں مردم ءِ پجار حسن شاھی زئی ء رستم جھمنند حمید آباد دلگان ءِ نام ءَ زانگ بیتگ –
دمگی مردمانی رد ءَ ناشناسیں مردماں حسن ءِ سر ءَ ھما وھد ءَ تیرگواری کرتگ کہ حسن راہ ءَ روگ ءَ بیتگ ءُ تیرگواری کنوک تیرگواری ءَ پد تچگ ءَ سوبمند بیتگ اَنت –
روکپتی بلوچستان ءَ وھد وھد ءِ سر ءَ تیرگواریاں مردم بیران بیگ ءَ اَنت کہ آیانی تہ ءَ گیشتریں تیرگواری کنوک سرکار ءِ نیمگ ءَ سلاہ بندیں مردمانی سر ءَ لڈگ بیگ ءَ اَنت-
سربوتگیں ھالانی رِد ءَ بلوچستان ءِ دمگ کیچ ءُ آواران ءَ پاکستانی پوج ءُ ریاستی کُشندہ ٹولیانی گوم ءَ سلاہ بندیں مردمانی جنگ بوتگ چریشی ءَ ھردو نیمگاں جانی تاوان ءِ ھال انت –
گیشیں ھالانی رِد ءَ کیچ ءِ دمگ مند چُکاپ ءَ پاکستانی پوج ءُ سلاہ بندانی میان ءَجنگ بوتگ گڈی ھالاں ھردو نیمگاں تیرگواری ءُ بمب گواری برجاہ انت –
اے جنگ ءَ تنی وھدی ھچ وڑیں تاوانانی ھال نیست اِنت ءُ ناکہ پوج یا دگہ کسی ءِ اے درگت ءَ مؤقف دیم ءَ اتکگ –
دومی نیمگ ءَ آواران ءِ دمگ جاؤ ءَ چہ ھمے ھال آیگ انت کہ سورگر ءِ کوھی دمگاں ھبدہ دسمبر ءَ ادار سَے ءَ ریاستی کُشندہ ٹولی ءُ سلاہ بندانی میان ءَ جنگ ءِ بوتگ چریشی ءَ یک مردم ءِ بیران بوتگ –
ھالانی بیران بوتگیں مردم ءِ سیادی چہ بلوچ آجوئی لوٹوکیں سلاہ بندیں گل ءَ انت بلے تنی وھدی چہ سلاہ بندیں گلانی نیمگ ءَ اے درگت ءَ ھچ وڈیں درشان شنگ کنگ نہ بوتگ –
نبشتانک: ساجد ءِ دیدار
نبشتہ کار: کمالان
دی بلوچستان پوسٹ
ساجد باز دیراں پَد مُلک ءَ اَتکگ اَت، نزر آباد ءَ اَت، ما سَرپد بوت ایں کہ ساجد اَتکگ گُڑا ما وترا نزر آباد ءَ سَر کُت، من چوناھا ساجد پیسر ءَ بھ نہ دیستگ اَت، باز واھگ بوتگ اَت کہ ساجد ءَ بِگنداں بَلے نہ دیستگ اَت۔
نزر آباد مَرچاں ویران اِنت، پیشی یے نزرآباد نہ اِنت، اَسل ءَ تھنا نززآباد ناں مرچاں ھر کُجا بہ رو ئے اَبید پْرشتگیں دیوال اَنت، وداریگاں چَمّ، پَچیں دَروازگاں، ڈُراِتگیں باناں دگہ ھچ نیست، مَرچاں بلوچستان پَھک وِیرانیں، شرّیں مردم وَ مُرت اَنت، گار بوت اَنت یا وَ مُلک اِش یلدات ءُ ڈَنّاں شُت اَنت، بے واھندیں چیزّ وَت ویران بیت۔ بَلے ساجد پَد ءَ واتر بوتگ اَت نزرآباد ءَ اتکگ اَت، ھیرانی ءِ ھَبر ایش اَت کہ ساجد ءِ آیگ ءَ نزرآباد گیشتر ویران کُتگ اَت۔
ما کَبرستان ءَ اِتیں اِیمبولینس ءِ اَتک، مردم اِشتاپ اِشتاپ ءَ شُتاں ایمبولینس ءِ نیمگ ءَ، من اُوں گام جناں بوتّاں کہ ساجد ءَ چاراں چوناھا منا پُرس ءُ جنازھانی سر ءِ رَوَگ ھچ وَش نہ بیت ءُ یکروچے جیڑھے بوتگ اَت، منی دوستیں سنگتے ءِ کماش بیران بوتگ اَت ما شُتیں سنگتے چارَگ ءَ ما نِشتیں ما سلام ئِے دات ءُ جوڑی ءُ تیاری کُت دو منٹ ءَ رَند من ءَ سنگت ءَ میسج کُت کہ یار شما دَست نَداشت وَ! من کمّو ھجالت بوتاں ءُ پَد ءَ جیڑ اِت کہ نوں وَ کار بوت دگہ روچے پَد ءَ اَنچیں مسلہ ءِ بوتگ ءُ من نِندگ ءَ وتی دوئیں دَست چِست کُت اَنت پہ دُوا منی دیم ءِ نِشتگیں کماش ءَ دَرّائینت کہ منی چُک دَستاں جھل کَن دُوا ءَ چَہ دِل ءَ بہ لوٹ من پَد ءَ ھجالت بوتّاں ءُ اِے بَری من سوڑگ کُت کہ نوں پُرسی پَتّراں بِھ نہ رو آں ءُ وتی مِرگ ءَ چہ پیسر ءَ اے ھبراں مردماں ھال دِیاں کہ منی پُرس ءَ کسے دلا دُوا لوٹ اِیت یا دَستاں چِست کَنت ءُ دُوا کَنت بلّت ئِے آئی ءِ مَرزی اِنت شما کَسّ ھجالت مہ کن اِت اِیمبولینس ءَ چہ مردماں دار ءِ پیتی ءِ دَر کُت ءُ زمین ءِ سَر ءَ اِیر کُت دار ءِ پیتی ءِ سَر ءَ نِبشتہ اَت ساجد ھسین ءِ چُک اِنت من بِچکند اِت ءُ دل ءَ گُشت “ھَو ڑے ساجد تو بِزاں گوں من دْروت ءُ سلام نہ کن ئے ھاں؟”-
ھمے دمان ءَ من وت سر ءَ وَت گوں ساجد ءَ ھبرا لَگّت آں، ساجد ءِ گُٹ زَنڈ اَت ءُ من ءَ گُشگ ءَ اَت ” یار تَرا سیگریٹ گوں من دِیریں مُلکی سیگریٹ نہ کَشّ اِتگ” من چہ پارکیٹ ءَ سیگریٹے روک کُت ءُ کَشّگے لَگّیتاں یار ساجد تو دِیراں پَد مُلک ءَ اَتکگے گَل ئے! ساجد ءَ کَند اِت ءُ گُشت ” اڑے مرچی زِندگی وشتریں روچاں مَن وَ بِھ نہ جیڑ اِتگ کہ منی سَر پَد ءَ مُلک ءَ کَپ ایت، ما ھَبر ءَ اِتیں پُشت ءَ من ءَ سنگتے ءَ توار کُت من چہ ساجد ءَ کَمّیں دُور شُتاں ءُ سنگت ءَ من ءَ گُشت ئِے “یار جنازھے سَر اِنت تو سیگریٹ مہ کَش” من دِل ءَ گْوشت ساجد ءِ دیوان وَ سیگریٹ لازُم بیت من چم چِست کُت اَنت داں ساجد دیم ءَ اُوشتاتَگ اَت ” ھاں تو گار بوتّ ئے؟” ساجد ءَ من ءَ جُست کُت! ھو اَڑے اِد ءَ وَ سیگریٹ ءِ کَشّگ اُوں نئیل اَنت، دُنیا ءِ لَنڈری ءُ دَلّاری بوھگ اِنت کَسّ ھچ نہ گْوش ایت ما پہ ٹالیں سیگریٹے ءَ زلیلیں کَسم اِنت ساجد ءَ بچکند اِت ءُ گُشت:- بابا بلوچ ءِ تَھا زِندگ بوگ بلائیں جیڑھے، اِد ءَ ھرچی کَن ئے ملامت ئے تو بلوچاں بِل تَرا نزرآباد چوں لَگگ ءَ اِنت؟ یار مُلک ھر وڑ ءَ کہ بِہ بیت من ءَ دوست اِنت، من ڈنّ ءَ بوتگاں کَسمیں سُتکگیں مچکدگے واست ءَ اُوں من ءَ زھیر بوتگ، ساجد ءَ چَکّ تَرّینت ءُ دیم مچکدگ ءَ کُت ءُ کَمّیں پریشان بوت۔
اڑے ساجد تو گّریوگ ءَ ئے؟ اے منی گَلی یے ھَرس اَنت جان، دیران پَد زمین ءِ سَر ءَ پاد اِیر کُتگ اَنت پمیشکا ساجد ءِ چم اَرس اِت اَنت ءُ من چیروکائی سیگریٹ کَشّگ ءَ اِت آں۔
اَڑے اِے کَھناں باریں آپ مان یا ناں ھُشک اَنت؟ ساجد ءَ جُست کُت ھَو آ نیمگ ءَ یکّ کھنے ءَ آپ مان، من پَسّہ دات اَڑے بِاریں مردم مرچی کھن ءَ جان ءِ شود ایت کسمیں چوں وَشّ اِنت-
ما شُتیں کَھن ءِ سَر ءَ، ساجد ءَ پَشک کَشّ اِت، منی چَمّ ساجد ءِ بَڈّ ءَ کَپت اَنت ساجد تئی بَڈّ ءَ چے بوتگ؟ من جُست کُت بَڈّ ءَ چون اِنت ٹپّ ٹپ اِنت؟ ھَو ھَو مردمے کہ چہ مُلک ءَ تچ ایت ءُ رؤت آئی ءَ ٹپّ ءُ پولنگ باز پِر بیت مَن کہ درانڈیھ اِتاں من ءَ مُدام ملک گِیر اَتک، مُلک وَ ھَو منا یکروچے کُدّویے ءِ واست ءَ زھیر بوتگ، تو زان ئے کُدّو کے اِنت؟ مئے میتگ ءِ ھیروینی یے، چوں زھیر نہ کنت یار! منی کَسانی ھمد ءَ ھمے مَردمانی کِرّ ءَ گْوزینتگ، اَگاں پہ دگرے ءَ نکنت بلے پہ وَتا وَ کنت ناں-
بِلے اِنچو ٹپ گُڑا؟ یک لاشے کہ باریں چنکس وَھد اِنت کہ جاگہ ءَ کَپتگ وَ لازم اَنچو بیت۔۔۔ من ءَ وَ کمال اِنت اَنگت سلامتاں تَرا کَیا جَتگ؟ یک شپے من کار ءَ چے واتر کُتگ اَت ءُ وتی کوٹی ءَ اَتکگ اِتاں، من سک دمُبرتگ، من چوناھا بِھ دم نہ بُرتگ، درانڈیھ ءَ بَس کمّو ژند کُتگ اَت بلے من اَنگت ٹیٹ اِتاں، بلے آ شپی من چَٹّ ھلاس اِتاں، من اَنچو دَم بُرتگ اَت کہ دل ءَ نہ گُشت کوٹ ءُ بوٹّاں کَش ءُ اِیر کَن ھمد ءَ منی کوٹی ءِ دروازگ کَسے ءَ ٹُک اِت، من کہ دَروازگ پَچ کُت داں ساجد ءِ ھَبر ھلاس نہ بوتگ اَت ءُ من ءَ کَسے ءَ ھال دات کہ بِیا نمازِ جنازہ وانگ بوھگ ءَ اِنت مَن چَکّ تَرّینت داں دارے رِبّڑیں پیتی یے کہ آئی ءَ تَھا ساجد وَپتگ اَت مردمانی کوپگان ءُ رَوگ اِت اَنت۔۔
ھَو ساجِد مُرتگ اَت بَلے باریں پرچی ءَ منی گُمان ءَ ساجد زِندگ اَت من گوں ساجد ءَ ھبر کنگ ءَ اِتاں، کسّہ آرگ ءَ اِتاں ۔۔۔ من ساجد ءَ گُشگ لوٹگ ءَ اِتاں کہ یار کمّو ڈنّ ءَ دَر ءَ بِچار موسم چوں وَش اِنت، جمبری اِنت، تْرمپوک اِنت کمّو ڈنّ ءَ دَر ءَ ۔۔۔ بَلے پِیتی ڈنّ ءَ چہ مردماں نَٹّ ءُ بُلٹ کُتگ اَت۔۔۔ بِگندے ساجد تھا کوکّار کَنگ ءَ اِنت ءُ گُشگ ءَ اِنت کہ “مَن ءَ چہ اے دارے پیتی ءَ دَر کَن اِت کمّو مچکدگ ءَ چاراں او مردماں شمارا گُشگ ءَ آں” من وت سر ءَ وَت اَنچو جیڑ اِت بَلے مردم دْرست تُرک ءُ نُکّ اِت اَنت ءُ دار ءِ پیتی ءَ زمین ءَ کَلّ کَنگ ءَ اِت اَنت، ھما پیتی ءَ کہ آئی ءِ سَر ءَ نبشتہ اَت کہ ساجد سَن آپ ھسین-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
