TBP Balochi

بلوچستان ءِ دمگ پنجگور ءُ کیچ ءَ پاکستانی پوج ءَ پنچ مردم دزگیر کنگ ءَ پد ناشناسیں جاھاں برتگ اَنت-

کیچ ءِ دمگ تمپ کوھاڑ ءَ بیگواھیں مردمانی پجار عمر ء نبی بکش ءُ تنویر ء نزیر ءِ ناماں زانگ بیتگ اَنت –

دمگی مردمانی رد ءَ ھردوکیں مردم شپ ءِ نھگام ءَ پوج ءَ لوگانی سر ءَ بیڑ برتگ ءُ آوار جتگ اَنت –

دومی نیمگ ءَ پنجگور ءَ سر بیتگیں ھالانی رد ءَ پوج ءَ گوستگیں روچ ءَ پنجگور ءِ دمگ وشبود ءَ سَے مردم دزگیر کنگ ءَ پد بیگواہ بیتگ اَنت-

بیگواہ بیتگیں مردمانی تہ ءَ یکے ءِ پجار ریاض ءِ نام ءَ زانگ بیتگ کہ آئی ءِ بارو ءَ گوشگ بیگ ءَ اِنت آ ھبدہ سالی ئیں کسان سالیں زھگے ءُ آ دگہ دو مردمانی پجار نہ بیتگ اَنت-

زانگ بہ بیت بلوچستان ءِ جتا جتائیں جاھاں گوستگیں بیست ءُ چار ادارانی تہ ءَ پانزدہ مردم پوج ءَ دزگیر کنگ ءَ پد بیگواہ کرتگ اَنت- اشانی تہ ءَ دو مردم پوج ءَ ڈیرہ بگٹی ءَ، سَے مردم کیچ ءُ یکے شال ءَ آوار جتگ ءُ برتگ اَنت –

کیچ ءِ بنجاھی شھر تربت ءَ سَے ورنایانی آوار جنی ءِ ھال اِنت کہ پوج ءَ پبلک لائبریری ءَ آوار جتگ ءُ برتگ اَنت کہ تنی وھدی اشانی بارو ءَ دگہ گیشیں سرپدی نہ بیتگ اَنت –

آواران ءَ زمین چنڈ سما کنگ بیتگ، ریکڑر اسکیل ءَ زمین چنٍ سَے اشاریہ پنچ ٹک ریکارڈ کرتگ –

زمین چنڈ شناس ءِ رد ءَ شپ ءَ دیراں بلوچستان ءِ دمگ آواران ءُ کش ءُ گوری دمگاِ زمین چنڈ سما کنگ بیتگ، ریکٹر اسکیل ءَ زمین چنڈ ءِ زور سَے اشاریہ پنچ ٹک بیتگ –

زمین چنڈ شناس ءِ رد ءَ زمین چنڈ آواران ءَ چہ پنجاہ ءُ پنچ میل دور زربار روکپت ءَ بیتگ کہ اشی ءِ جھلانکی بیست ءُ پنچ میل ریکارڈ کنگ بیتگ –

زمین چنڈ ءِ ترس ءَ مھلوک ءَ کلمہ ءُ دوبہ وانان بیتگ ءُ لوگاں دراتکگ اَنت ءُ بے کساسیں سارتی ءَ مھلوک ءَ گوستگیں شپ ڈن ءَ گوازینتگ ءُ دگہ جانی تاوانانی ھال نہ بیتگ اَنت –

طالبان لشکر ءَ سیمسراں ھستیں لکیر ءِ سر ءَ جتگیں ٹٹ کروتکگ ءُ گوں وت برتگ –

اے وئیل بلوچستان ءِ دمگ چمن ءُ اوگانستان ءِ سیمسری دمگ اُستان ننگرھار ءَ جتا کنوکیں لکیر ءِ ھند ءَ پیش اتکگ –

سر بیتگیں اھوالانی رد ءَ طالبان ءَ نا ایوک ءَ ٹٹ دور کرتگ بلکیں آیاں پاکستانی پوج ءَ را دوبر ٹٹ جنگ ترندی ءَ مکن کتگ –

ننگرھار ءَ سر بیتگیں ھالانی رد ءَ اوگان تالبان ءَ مکیں ٹٹ دور کرتگ ءُ برتگ ءَ طالبان لشکر ءَ پاکستانی پوج ءَ را بیھار داتگ ءُ پاکستان مردہ باد اوگام جتگ –

دمگی مردماں گیشتر گشتگ کہ طالبان لشکر ءِ کمانڈر پاکستانی پوج ءِ گون ءَ گپ کنان ءَ گوشتگ ئِے کہ آگاں دیم ءَ کنز اِت ئِے گڑا جنگ ءِ واستا ساجو بہ بہ ئے-

زانگ بہ بیت اے کشتگیں لکیر اوگان ءُ بلوچ ءِ میان ءَ گوشگ بیت اِنت ھنچش کہ اوگانستان ءِ میان اُستمانی سیمسر نہ منّ ایت، ھژدہ سد ءُ نود ءُ سَے ءَ اوگان ءِ امیر عبدالرھمان ءُ برطانوی ھند سیکرٹری سر مارٹیمر ڈیورنڈ ءَ سیمسری ءِ گیشنگ ءُ اے ھمے واستا دسھت کتگ اَت کہ سدسال ئیگ اِنت –

پاکستان ءُ اوگانستان ءِ میان ءَ دوھزار ءُ شش سد کلومیٹر ءِ دراجیں سیمسر اِنت یازدہ سد کلومیٹر ءُ گیش سیمسر بلوچستان ءِ سیمسراں گوں بندوک اِنت ءُ پاکستان اے سیمسر ءَ ٹٹ جنگ اِنت –

اشی ءَ پیسر سیمسر ءَ ٹٹ جنوکیں پاکستانی ٹیم ءِ سر ءَ اوگان ءِ گوستگیں سرکار ءِ وھد ءَ اُرش بیتگ اَنت –

گوست ءَ ھم اوگانستان ءَ طالبان ءَ زوگری کتگ اَت پاکستان ءِ واکداراں ملا عمر ءِ گون ءَ لکیر ءِ بارو ءَ گیش ءُ گیواری ءِ گپ بیتگ اَت چہ ملا عمر ءَ اے میان اُستمانء رھبندی ءِ منگ ءِ زور دیگ بیتگ اَت بلے آ وھد ءَ طالبان ءِ سرکار ءَ ھم اے نہ منّ اِتگ اَت-

بلوچستان ءِ دمگ کیچ ءِ ھند بلیدہ ءَ سیادی داروکیں گوستگیں سینیٹر ڈاکٹراسماعیل بلیدی ءَ سرکٹ ھاؤس تربت ءَ یک پریس کانفرنس کنان ءَ گوشتگ کہ بلیدہ ءَ ھوار کیچ ءِ دمگاں مھلوک ءِ جیڑھانی گیش ءُ گیوار کنگ ءَ کیچ ءَ حق دو تحریک ءِ بنھشت ایر کرتگ –

کیچ ءَ حق دو تحریک ءِ پتر ءَ جد ءُ جھد بندات کنگ بیت اِنت، بلیدہ زامران ءَ ھوار کیچ ءَ سیاسی ءُ چاگردی باسک منی ھمراھداری ءَ بہ کن اَنت – ما گوادر ءِ نندانک ءِ پلامرزی ءَ کن ایں ءُ لوٹ کن ایں، مولانا ھدایت الرھمان ءِ گون ءَ بیتگیں مسام سرجم کنگ بہ بنت اگاں نہ بیت اَنت گڑا نہ بیت اَنت گڑا مولانا ھدایت الرھمان ءِ گون ءَ ھمکوپگ اِنت –

آئی ءَ گُشتگ کہ بلیدہ زامران ھوشاپ ءَ مھلوک ءِ جیڑھانی گیش ءُ گیوار کنگ ءَ ما باز براں گوستگیں کمشنر مکران، چیف سیکرٹری ءَ ھوار مزن واکداراں گوں دزبندی کتگ بلے ھچ ءَ پہ ھچ نہ بیتگ –

آئی ءَ گُشتگ کہ بلیدہ تربت ءِ دگ گوستگیں بیست ءُ پنچ سالاں چہ برجاہ اِنت انی ھم فنڈز ریلیز بیتگ اَنت بلے اے سالاں کار سستی ءِ آماچ اِنت – تربت ءُ بلیدہ ءِ دگ ءِ کار ترندتر کنگ بہ بیت – سستیں آسنانی کارمرد کنگ ءِ گامگیج زورگ بہ بنت ءُ تربت بلیدہ ءُ بلیدہ سٹی پروجیکٹ ءِ فنڈزانی پَٹ ءُ پول کنگ ءِ واستا گوستگیں کمشنر مکران پسند خان بلیدی ءِ سروکی ءَ کنگ بہ بیت اِنت –

آئی ءَ گوشتگ کہ بلیدہ زامران ءَ بجلی ءِ بندشانی سبب ءَ دھکانکار، کار ءُ باری مھلوک مشکلانی دُچار اَنت، بلیدہ ءَ اجبیں کانود ایر کنگ بیتگ اَنت بیست ءُ چار اداراں بلیدہ ءِ آباد یک نیمگے ءُ بیست ءُ چار اداراں دومی نیمگ ءَ بجلی بند کنگ بنت ءُ مھلوک ءِ گون ءَ اے ملنڈی بند کنگ بہ بیت اِنت بیست ءُ چار اداراں بجلی ءِ بندش ءِ راہ ءُ رھبند سرجمی ءَ ھلاس کنگ بہ بنت ءُ سرجمی ءَ بجلی دیگ بہ بیت اِنت –

آئی ءَ گُشتگ کہ بلیدہ ءَ جنینیں ڈاکٹر دارگ بہ بیت اِنت بلیدہ زامران ءِ زالبول چِلگی ءَ بازیں جیڑھانی دیمپان اَنت ءُ اے مزنیں آبادی یے منی لوٹانی تہ ءَ بازیں براں جنینیں ڈاکٹرانی لوٹ مان بیتگ اَنت بلے پد ءَ کینسل کنگ بیتگ اَنت، گروک دگ لھتے وھدانی واستا پچ کنگ بیتگ بلے انی بند اِنت – بلیدہ ءُ تربت ءِ دگ ءَ کورے پشت بٹ ءِ واستا لنک دگ پچ کنگ بہ بیت اِنت، زامران ءَ ھوار بی ایریا ٹیچرز ڈیوٹی نہ دے اَنت ءُ آ ڈیوٹی ءِ پابند کنگ بہ بنت، بلیدہ زامران ءَ مھکمہ پی ٹی سی ایل ءِ ٹیلہ پوج سسٹم تباہ اِنت اے گھتر کنگ بہ بیت اِنت تربت ءَ ھوار کیچ ءِ دمگاں زمین بروکانی راج اِنت ءُ مھکمہ ءِ سٹلمنٹ ءُ زمین مافیا ءِ سبب ءَ ھچ گریبانی زمین مھپوز نہ اَنگ بارڈر ٹریڈ ءِ واستا ٹوکن سسٹم ھلاس کنگ بہ بیت اِنت ءُ شناس کاڈ ءِ سر ءَ کار ءُ بار کنگ بہ بیت اِنت بجلی ءِ جیڑہ ھروھدی ءِ واستا گشینگ بہ بیت اِنت، این ایچ اے ھوشاپ داں آواران ءِ دگ ءَ کار کنگ اِنت بلے دمگی آبادیانی واستا ھچ آسراتی نیست اِنت ھمے واستا دمگی آبادیانی واستا لنک روڈ،واٹرسپلائی ءِ وڑیں کسان کسانیں کارانی واستا پنچ کروڑ کلدار دیگ بہ بیت اِنت –

اے لوٹ بیست روچانی تہ ءَ منگ نہ بیت اَنت یازدہ جنوری ءَ کیچ ءَ حق دو تحریک ءِ نیمگ ءَ بلیدہ کراس ءِ ھند ءَ شال ءُ مکران ءَ روکیں دگ سی پیک بند کنگ بیت اِنت-

بلوچستان ءِ جتا جتائیں دمگ خضدار ، حب ، گوادر ءَ دگ ءِ وئیلاں چار مردم بیران ءُ بازینے ٹپی بوتگ اَنت-

خضدار ءِ دمگ چککو چوکی ءِ نزیک ءَ یک بسے چپ بوتگ ءُ چریشی ءِ آسر ءَ دو مردم بیران ءُ بازینے ٹپی بوتگ اَنت، لاش ءُ ٹپی بوتگیں مردم پہ الاج ھاتر ءَ نادُراھجاہ ءَ برگ بوتگ اَنت-

ھمے وڑ گوادر ءِ دمگ سُربندر کراس ءَ یک پیک اپے ءَ گوں کرولا گاڑی یے ڈک وارتگ ءُ چریشی ءِ آسر ءَ یک مردمے بیران ءُ یکے ٹپی بوتگ-

بیران بوتگیں مردم ءِ پجّار منیر احمد ء پیر محمد جھمنند دشت بلنگور نام ءَ چہ بوتگ –

ھب چوکی ءَ مواچ گھوٹ پُھل ءَ پولیس ءِ گاڑی ءُ یک ڈمپرے ءَ ڈک وارتگ، چریشی ءِ آسر ءَ اے ایس آئی اجاز بیران بوتگ ءُ وھدیکہ پولیس دگہ چار کارندہ ٹپی بوتگ اَنت-

بلوچستان ءَ ھمک روچ دگ ءِ وئیلاِ مردم بیران ءُ زدگ بیگ ءَ اَنت کہ آیانی گیشتریں سبب دگانی پروشت ء پروش ءُ گاڑیانی ڈرائیورانی نادلگوشی ءِ سبب ءَ پیش آیگ ءَ اَنت –

دی بلوچستان پتر ءَ سربوتگیں ھالانی رِد ءَ بلوچستان ءِ دمگ مستونگ ءَ پاکستانی پوج ءَ یک ورناء زورانسری آوار جتگ ءُ بیگواہ کُتگ –

اھوالکار ءِ رِد ءَ ورناہ دو روچ ساری بزاں ھبدہ دسمبر ءَ پاکستانی پوج ءَ مستونگ ءِ دمگ گردگاپ ءَ آوار جتگ ءُ گوں وت بُرتگ آئی ءِ پجار راشد ء محمد یوسف ءِ نام ءَ چہ بوتگ-

زانگ بہ بیت ھمے سال ءَ راشد ء یوسف ءِ برات زاکر ءِ یوسف گوں دگہ ھمراہ ءَ مدثر ء ٹکری سیف اللہ پاکستانی پوج ءَ آوار جتگ ءُ بیگواہ کُتگ کہ تنی وھدی ھنگت بیگواہ انت –
بلوچستان ءَ زورانسری آوار جنیانی درچ یکشل ءَ برجاہ انت وھدیکہ ھمے ماہ ءَ دسمبر ءَ بلوچستان ءِ جتائیں ھند ءُ دمگاں سینزدہ مردم ءِ زورانسری آوار جنی ءِ ھال رسانکدراں اتکگ انت –

ھمے ماہ ءَ بلوچستان ءِ دمگ کیچ ءَ یانزدہ مردم وھدیکہ آواران سبی ءَ یک یک مردمے زورانسری آوار جنگ ءُ بیگواہ کنگ بوتگ انت –

بلوچستان ءَ زورانسری اوار جنیانی بگیری ءَ بیگواھیں مردمانی پانکجنیں گل وائس فار بلوچ مسنگ پرسنز ءِ رِد ءَ اے وھدی بلوچستان ءَ پنجاہ ھزار گیش مردم زورانسری اوار بیگواہ کنگ بوتگ ءُ اے بیگواہ بوتگیں مردمانی تہ ءَ بازینے ءِ زانگولیں جون دست کپتگ انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ جاؤ ءَ ریاستی کُشندہ ٹولیانی گوم ءَ جنگ ءَ شھید بوتگیں بوتگیں سرمچار شبیر بلوچ ءَ را دروت ندر کتگ ءُ پنجگور ءَ پاکستانی پوج ءِ سر ءَ بوتگیں اُرش ءِ زمّہ واری منّ اِتگ –

جارکش گوھرام بلوچ ءَ وتی درشان ءِ تہ ءَ گوشتگ کہ ھبدہ دسمبر ءَ آدینگ ءِ روچ ءَ آواران ءِ دمگ جاؤ سورگر ءَ ریاستی کُشندہ ٹولی ءُ مسلح دفاع ءِ کارندھاں سرمچارانی دیم ءِ دارگ ءِ کوشست کُتگ کہ ھردو نیمگاں جنگ بندات بوتگ –

جارکش ءَ گوشتگ اے جنگ ءَ سرمچار شبیر بلوچ پنام ء رزا بلوچ جھھمنند گریشہ ھزدار شھید بوتگ – آئی ءَ وتی سنگتانی ھمراھی ءَ جنگ داتگ ءُ کُشندہ ٹولی سک باز تاوان داتگ انت –

جارکش ءَ گوشتگ کہ اے جنگ ءَ ھواریں کُشندہ ٹولی ءِ لھتے دمگی کارمندانی پجار بوتگ کہ آھانی تہ ءَ سلیم ء لالو اے جنگ ءَ تچکی ءَ ھوار بوتگ وھدیکہ آ وت ثاقب ء میر عبدالستار سستگان جاؤ ءُ ماسٹر محمد یار ء خان جان جھمنند دمب علی محمد جاؤ ءِ سرکماشی ءَ کار ءَ انت –

آئی ءَ گوشتگ کی اے مردم پاکستانی پوج ءِ گوم ءَ جنگی جرم ءُ بلوچانی چُک چینی ءَ ھوار انت ءُ سرمچارانی نشانگ ءَ انت بلوچ راج ءَ چہ لوٹ کنیں کہ اشاں چہ دور بہ بنت –

جارکش میجر گوھرام بلوچ ءَ دگہ یک شنگ کرتگیں درشانے ءِ تہ ءَ مروچی پنجگور ءَ پاکستانی پوج ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں مروچی ادار دو ءَ پنجگور ءِ دمگ وشبود چاکرآباد ءَ پاکستانی پوج ءِ کاروان ءِ سر ءَ تراکناکیں شوروانی گون ءَ اُرش کُتگ –

آئی ءَ گوشتگ پوج ءِ کاروان ءِ سر ءَ اُرش دیرواگیں ریموٹ کنٹرول بمب ءِ گون ءَ چہ کنگ بوتگ چریشی ءَ پوج ءِ دو پرپٹ ءُ یک گاڑی یے شوروانی زد ءَ اتکگ ءُ چریشی ءَ ھردو پرپٹ سواریں کارمند ءُ گاڑی ءَ سواریں دو کارمند مُرتگ ءُ بازینے زدگ بوتگ انت –

گڈسر ءَ جارکش گوھرام بلوچ ءَ وتی درشان ءِ تہ ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت –

نبشتانک: چندے دانک پہ مادر ء وتن شھید بانک کریمہ بلوچ ءَ

نبشتہ کار: معراج لعل

دی بلوچستان پوسٹ

زندگی اِنچو گِران نہ اِنت کہ من بہ گوشاں کہ گوازینگ نہ بیت بلے! اِنچو سُبک ءُ آسان ھم نہ اِنت کہ یکیں داب ءَ ءُ یک شلہ بروت۔ پرچہ کہ زندگی ایوک ءَ زندگ بوئگے نام نہ اِنت ءُ نہ کہ زندگ بوگ ءِ مُھتاج اِنت اسل زندگی ھما اِنت کہ مَرگ چہ پد ھم تو زندگ لیکگ بوت گُڑا بزاں تو زندگے۔

اے بنی آدمانی جنگل ءَ چُشیں بازیں درورے گِندگ کیئت کہ آ بے پائدگ ءَ زندگ اَنت اَنچو گُشت کنے کہ پہ وت ءَ زندگ اَنت یاکہ پہ وتی کُوریں زندگی ءِ زندگ کنگ ءِ ھاتر ءَ زندگ اَنت بلے چُشیں درور اد ءَ باز کم گندگ ءَ کیئت کہ آ پہ وتی دِرتہ پُچیں ،لگتمالیں ، ٹپ واریں راج ءِ ھاتر ءَ زندگ بہ بیت ءُ آوانی زندگ کنگ ءِ ھاتر ءَ زندگ بہ بیت، یاکہ آوانی پجار ءُ شُناس ءَ زندگ بدار ایت۔

ھمے بے بھایں ءُ بے دروریں راج دوستانی تہ ءَ یکے بانک کریمہ بلوچ بوتگ کہ آ پہ وت ءَ ناں بلکیں پہ وتی راج ءِ پیرزال، کماش، مزن، کسان پہ راج ءِ پاد شپادیں چُک چُک ءِ ھاتر ءَ زندگ بوتگ ءُ تنی وھدی زندگ اِنت۔ چُشیں راجی ہستیانی سَپر کنگ ءَ ماں زاول گُشت نہ کناں ، پرچہ کہ زاول ھما مردم بنت کہ آیانی کرد ءُ سوچ ءُ پکر زاوال بنت یا آیاں زاوالیں زندے گوازینتگ۔ بلے شہید بانک کریمہ بلوچ ءِ زُبان ءَ چہ در اَتکگیں یک یک لبزے یک کردے ءِ واھند بوتگ یک سُوچے ءِ سرکماشی یے کُتگ ءُ یک پکرے ءِ راہ شُناس بوتگ چُشیں رھبر دائمی زندگ بنت ءُ نمیران لیکگ بنت۔

شھید بانک کریمہ بلوچ بلوچستان ءِ زالبولاں چہ ابید دنیا ءِآدگہ زالبولانی واستا یک مزنیں درورے کہ آئی ءَ کُجام سَکیانی توک ءَ اے نگیگیں جاورانی دیپانی کُتگ ءُ گوں جوریں بدّاں دیم پہ دیم بوتگ ءُ وتی بُنکی حقانی واستا آواز چست کُتگ ھما آواز کہ روچ مروچی بلوچستان ءِ کُنڈ کُنڈ ءَ جسکگ ءَ اِنت ءُ بانک ءِ اَست بوئگے شُبین ءَ دائگءَ اِنت۔
منی قلم اِنچو تمرد نہ اِنت کہ بانکیں شہید کریمہ بلوچ ءِ سال ءُ سالانی راجی جُھد ءَ گوں چندے ٹپی ئیں لبزاں بیان بہ کنت بلے گُڈ سر ءَ اِنچو گُشاں داں جہان اَستیں شہید بانک کریمہ بلوچ ءِ بے دروریں نام گوں سوچ ءُ پکر ءَ زندگ بیت ءُ دائم نمیران بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: لمہ کریمہ زمین ءِ کارست

نبشتہ کار: اکیل مراد

دی بلوچستان پوسٹ

گلامی ءِ زندگی ھنچیں زھرناکیں چیزے انسان ءَ وتی آجو کنگ ءَ ھرچ تکاں ھیلکاری ءِ نیمگ ءَ بارت انسان مہ پروش ایت گڑا انسان وتی اندر ءَ یک مارشتے ودی کنت ءُ ھمے مارشت ءَ دومی انسان ءَ سر کنت اے انسان ءِ وتی بنکی لیکہ اِنت وتی زندگ کنگ ءَ گلامی ءِ زھر ءَ کشگ ءُ وش تبیں رنگے ءَ دیم ءَ کنزگ ءِ جھد کنگ اِنت، ھمے گلامی ءِ مارشت اَنت بلوچ سرڈگار ءَ آجوئی ءِ تب ءَ مٹ بنت ھمے مارشت مروچی بلوچ زالبولانی تہ ءُ ود اِتگ ءُ جنزگ ءَ اِنت اے مارشتانی تک ءُ پھنات یکدم دور ءُ دراج نہ اَنت بلے اشانی ھنڈال یکدم دور ءُ دراج شتگ اَنت آئی ءِ سبب مروچی ءِ کارست لمہ ء وتن بانک اِنت-

بلوچ زمین ءَ کجام مسال ءَ بہ زورے ھما مسال یک کارستے ءِ رنگ ءَ دیم ءَ کیت گڑا آئی ءِ پھناتانی مھکم کنگ ءَ زالبولانی دست الم مردینانی گون ءَ ھمکوپگ اِنت گڑا ھمے دست کہ مروچی مھکم ءُ مزبوت اَنت آیانی رژنائیں باندات چو چراگ ءَ بلگ ءَ اِنت آئی ءِ بالینوک لمہ ء وتن بانک کریمہ اِنت-

بلوچ زمین ءَ بلوچ دوداں بلوچ زالبول ءِ ھما شرپ اِنت اگاں کسے یک درامدیں زالبولے ءَ بدیں نگاھے ءَ پولینگیں چمے ءَ چار ایت گڑا آئی ءَ بزاں یک ھونے ءِ کچ ءَ یک جرمے کرت-

وائے بدیں گلامی تو زنجیراں بستگ اَنت مئے پھک دامیں گوھار، وائے بدیں دود تو بستگ اَنت مئے پھک دامنیں گوھار، وائے روچ تئی چیر ءَ ساھگی ءَ کاپرے ھم نیست ھمے دودانی مھکم کنگ ءُ آیانی پراہ ءُ شاھیگان کنگ ءَ گڑا کریمہ ءِ نام الم بلوچ راجدپتر ءَ یک جوانیں کارستے ءِ نام ءَ زانگ بیت اِنت مروچی ھمک کارست گندگ بیت آئی ءِ تماہ کریمہ ءَ چہ ھچ جتا نہ اَنت ھرچ رنگ ءُ تب ءَ اے الم تئی چماں کپ ایت بلوچ سرڈگار ءَ بلوچ زالبولاں مردینانی نزیک ءَ وت ءَ رسینتگ ءُ دنیا ءِ چماں یک کارستے ءِ دروشم ءَ زندگ بیگ ءِ جھد ءَ کنگ ءَ اَنت-

بلوچستان ءِ جنک مروچی کہ راہ ءَ جنزگ ءَ اَنت اشی ءِ گیشتریں سبب بانک کریمہ ءِ کارست ءَ ھم بندوک اَنت آئی ءِ درکپگ ءَ پد بلوچستان ءَ یک نہ کُٹوکیں درچے زالبولانی جنزگ بندات بیتگ اے درچ ھما گلامی ءِ زنجیر گٹ ءَ لوپ کنگ بیتگ آئی ءِ سندگ ءِ جھد ءَ اَنت اشی ءِ تہ ءَ اے الم کارست دنت اگاں کریمہ ءَ اے جھد بندات مہ کرتین بوت کنت اے زالبولاں وتی جنزگ ءِ راہ شموشتگ اَت یا آیاں پہ وتی وشی ءِ راہ گچین کتگ اَت ھما کہ آسان تر اِنت بلے کریمہ ءَ اے منّینتگ اَت زالبولاں وتی درچ ءَ مھکم کن اں ھما راہ گران ءُ سنگین اِنت گڑا آئی ءَ پہ وت ءَ گچین بہ کن اِت، اے الم ترا گندگ ءَ کیت کریمہ ءَ وتی گرانتریں راہ ءَ ھزاراں جنک مھکم ءُ بامردی ءَ رھادگ کنگ ءَ جنزینتگ اَنت کجام جنک ءِ مسال ءَ بہ زوریں سمی، مھرنگ، بانڑی، سارین، سیما، شاری، کجام مسال ءَ بلوچ راجدپتر ءَ بہ پول ترا گران ءُ سنگینیں راہ ءِ پند جنوکیں جنک دزکپ اَنت آ ھچ رنگ ءَ وتی راہ ءِ تاب کنگ ءَ نزان اَنت-

دم نہ بروکیں لمہ ء وتن بانک کریمہ اے سال دوھزار ءُ شانزدہ ءَ بی بی سی اردو ءَ تئی نام جھد کنوکیں زالبولانی لڑءَ ھوار کتگ اَت اے ھم بلوچ چاگرد ءِ تہ ءَ یک نامے ءِ کارست اِنت اشی ءَ ھم جوان جوانیں کرد وتی اندر ءَ گوازینتگ اَنت-

منی دل ءَ زالبول جھدانی تاج اَنت بلے باز مردم تاج گوشگ ءَ مڑا کنت امریکی تھنک ٹینگ کونسل آف فارن ریلیشنز ءِ ویمن فارن بیٹھتی ءِ پالیسی ءِ نیاد ءِ ڈائریکٹر اروبیل کولین وتی کتاب “Paradise beneath her feet” ءِ تہ ءَ نبشتگ کنت ما زالبولانی زند ءَ گھتر کنگ ءَ گڑا چاگرد ءِ تہ ءَ یک مھکمی ءِ اتک کنت ھمے وڑ ءَ سال دو ھزار ءُ ھشت ءَ دو کڑوڑ ڈالر ءِ اد ءَ کنگ ءَ دنیا ءِ تہ ءَ ماہ ءِ سر ءَ روکیں داد گروکیں ایرانی زالبول انوشہ انصاری وتی کتاب “مائی ڈریم آف اسٹارز” ءِ تہ ءَ نبشتہ کنت من دنیا ءِ تہ ءَ دراھیں رُستگیں جنکاں وتی نیمگ ءَ دلگوش کنگ لوٹ آں آ ھچ بر پُشت ءَ مہ رو اَنت ءُ دیم ءَ بہ جنز اَنت چار دیواریانی تہ ءَ مہ ننداں بلکیں مردینانی گون ءَ ھمکوپگی ءَ بہ جنز اَنت وتی کچ ءَ وت دیم ءَ بہ بر اَنت اے ترس ءَ وتی اندر ءَ بہ کش اَنت کوھنیں دوداں بہ پروش اَنت نوکیں جنزے ءِ نام ءَ بنا بہ کن اَنت-“

گڑا بانک کریمہ ھمے کارستانی نام اِنت آئی ءَ چار دیواری ءِ گلامی ءَ دور چگل دیگ ءُ نوکیں کارستے ءَ دیم ءَ جنزگ بنا کنت آئی ءِ کارست ءَ ھرکس یک بھادریں رنگے ءَ چار اِیت-

مروچی دنیا ھر رنگ اِنت آ وتی تب ءَ اِنت بلے بلوچ زمین ءَ اگاں ھزارانی جنکیں کارست ودی بیتگ اَنت اے بانک ءِ ستاشانیں جھدانی برورد اَنت جنزگ ءَ اَنت لمہ وتن کریمہ ڈیھہ ءَ چہ دور شھید کنگ بیت بلے آئی ءِ ھوناں سرجمیں زمین مسینت ءُ یک نوکیں جنزگے مردمانی تہ ءَ ودینت-

یک سالے ءِ گوزگ ءَ ھرچ تب ءَ ھرچ رنگ ءَ ھرچ وڑ ءَ تو ءُ تئی کارستاں الم اگاں جھان یات نہ کنت بلے بلوچ زمین ءَ ھمک مردین ءُ زالبول ءُ جنک تئی بنا کرتگیں کارستاں الم یات کنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان لبریشن فرنٹ ءِ جارکش میجر گْوھرام بلوچ ءَ گْوشتگ کہ ھپت ءُ چیزے ءَ سرمچاراں کیچ ءِ بُنجاھی شھر تربت ءَ پارک ھوٹل ءِ دیم ءَ پاکستانی پوج ءِ چوکی ءِ سر ءَ تیرگواری کتگ ، چریشی ءِ چہ یک کارندھے ٹپی بوتگ ءُ اشی ءَ پد نادُراھجاہ ءَ مرتگ-

ھمے وڑ ھب چوکی ءَ آدینگ ءِ ھپدہ دسمبر ءِ بیگاہ ءَ رند سرمچاراں اٹک سیمنٹ شرکت ءِ مشینریانی سر ءَ اُرش کتگ ءُ یک لوڈرے ءُ ایکسکیویٹر مانداشتگ- اے سیمنٹ شرکت بازیں سالاں چہ بلوچستان ءَ سِنگ ءُ دگہ مڈی کارمرز کن اَنت ءُ سیمنٹ جوڑ کن اَنت پاکستان ءُ چین ءَ پُجّارینگ ءَ اَنت- دگہ یک ٹرانسپورٹےم شرکتے اے مڈی دیگ ءَ اِنت کہ چریشی ءَ لائم اسٹون دگہ ھوار اَنت- اے بلوچستان ءَ پُلپانچیں منسوبھے- بلوچ راج اشاں گستا بہ بنت-

جارکش ءَ گوشتگ کہ داں بلوچستان ءِ وتواجھی ءَ مئے اُرش برجاہ بنت-