TBP Balochi

بلوچستان ءِ بنجاھی شھر شال ءَ مروچی شمبے ءِ روچ ءَ نودربر گلاں بلوچستان ءِ شاھدربرجاہ ءَ چہ زورانسری آوار جنگ بوتگیں نودربرانی یل کنائینگ ءِ ھاتر ءَ زھرشانی کُتگ –

ھمے سال ءَ نومبر ءِ ماہ ءَ چہ بلوچستان ءِ شاھدربر جاہ ءَ زورانسری آوار جنگ ءُ بیگواہ بوتگیں نودربر سھیل بلوچ ءُ فصیح بلوچ یل کنائینگ ءِ ھاتر ءَ نودربر گلاں مروچی شال ءِ پریس کلب ءِ دیم ءَ زھرشانی کُتگ ءُ وتی سنگتیں نودربرانی یل کنگ ءِ لوٹ کتگ –

زھرشانی کنوکانی دست ءَ بیگواھیں نودربرانی اکس، بینر ءُ پلے کارڈ بوتگ انت آھاں زورانسری آوار جنی ءِ بگیری ءَ نارہ جتگ –

زھرشانی کنوکاں لوٹ کتگ کہ زورانسری آوار جنگ بوتگیں نودربر یل کنگ بہ بنت ءُ زانشجاھاں چہ سیکورٹی پوج درکنگ بہ بیت اِنت –

آھاں شاھدربر جاہ ءَ چہ آوار جنگ بوتگیں نودربرانی یل کنگ ءُ زانشجاھاں چہ پوج ءِ درکنگ ءُ زانشجاھاں ایمنیں زانشتی ماھول آرگ ءَ زھرشانی ءِ تہ گیشی ءِ آرگ ءِ جار جتگ گوشتگ زانشجاھاں تُرس ءِ ودّینگ بوتگ –

زھرشانی ءَ ھواریں نودربراں بلوچستان ءِ تہ ءَ زورانسری آوارجنی انسانی ھکانی بگیری دارگے کرار داتگ گوشتگ کہ بلوچستان ءَ اے وھدی سک باز انسانی ھکانی لگتمالی بوگ ءَ انت ءُ اے درچ بند بوگ لوٹ ایت –

وتی سنگتانی یل کنائینگ ءِ ھاتر ءَ زھرشانی کنوکیں نودربرانی گوشگ ات کہ تاکتوریں زوراکانی دیم ءَ بلوچستان سرکار بے بس لاچار گندگ پیداک انت –

یات بہ دار ات چہ بلوچستان شھدربرجاہ ءَ دو نودربر سھیل بلوچ ءُ فصیح بلوچ ءِ ھمے سال ءِ یک نومبر ءَ زورانسری آوارجنگ ءُ بیگواہ بوتگ انت –

وتی سنگتیں نودربرانی زورانسری آوار جنی ءِ بگیری ءَ بلوچستان ءِ شاھدربرجاہ ءِ تہ ءَ سَے ھپتگاں زھرشانی کُتگ ءُ نندانک جتگ ءُ ھمے وھد ءَ بلوچستان شاھدربرجاہ ءِ درسیں سرگرمی بند کنگ بوتگ انت –

بلوچستان ءِ سرکار ءَ نودربرانی گوم ءَ نیاد کُتگ ءُ چیزے روچ ءِ تہ ءَ نودربرانی یل کنگے کرار کُتگ بلے انگت آ بے سوب بوتگ انت ءُ ھمے میان ءَ نودربر گلانی نیمگ ءَ سرجمیں بلوچستان ءَ زانشتی سرگرمی ھلاس کُتگ انت –

زانگ بہ بیت بلوچستان ءَ نودربر ءُ نودربر رھشوناں سیکورٹی پوج ءِ دست زورانسری آوار جنی بازیں سالاں برجاہ انت بلوچ نودربر رھشوناں چہ بلوچستان زانشجاھاں پوج ءِ درکنگے لوٹ کُتگ گوشتگ کہ زانشجاھاں پُرایمنیں ماھول دیگ بہ بیت نودربر وشھالیں ماھولے دیگ بہ بنت

سربوتگیں ھالانی رِد ءِ بلوچستان ءِ دمگ کیچ ءِ بنجاھی شھر تربت ءَ ناشناسیں مردماں پوجی پانگس ءِ سر ءَ دستی بمب اُرشے کُتگ، اُرش ءَ یک کارمندے زدگ بوتگ-

اُرش تربت ءَ پارک ءِ نزیک ءَ برجاھیں پوجی پانگس ءِ سر ءَ کنگ بوتگ ، چریشی ءَ یک کارمندے زدگ بوتگ –

زانگ بہ بیت کمے ادارانی میان ءَ بلوچستان ءَ اے دومی بمب اُرش انت – اشی ءَ پیش شال ءَ بمب تراک ءِ بوتگ ات کہ یک مردم ءِ بیران ءُ ھپت زدگ بوتگ – تنی وھدی ھردو اُرشانی زمہ واری ھچ وڈیں گلانی نیمگ ءَ چہ منّگ نہ بوتگ انت –

سربوتگیں ھالانی رِد ءَ بلوچستان ءِ بنجاھی شھرشال ءَ کندھاری بازار ءَ بمب تراکے بوتگ، تراک ءِ آسر ءَ یک مردمے بیران ءُ چار زدگ بوتگ اَنت –

پولیس ءِ رِد ءَ تراک ءَ چہ نزیکیں دوکان تاوان بار بوتگ انت ءُ گاڑیانی کانچ ھم پُرشتگ انت –

ریسکو ءُ دمگی مردماں زدگ بوتگیں مردم الاج ءِ ھاتر ءَ شال ءِ سول ھسپتال سرکتگ انت –

سیکورٹی پوج ءَ دمگ وتی انگیر ءَ کُتگ چیک تان کنگ انت –

بنداتی ھالانی رِد ءَ تنی وھدی زانگ نہ بوتگ کہ بمب تراک ءَ کئے نشانگ کنگ بوتگ ءُ پولیس دھماکہ درگت ءَ گیشیں پٹ پول کنگ ءَ انت –

بلوچستان ءِ دمگ ھزدار ءُ شال ءَ دو مردمانی جون دست کپتگ انت –

ھزدار ءِ دمگ زھری پیر شھر جھل ءَ چہ دست کپتگیں جون ءِ پجار ءِ نوکر خان ء ملنگ خان میراجی جاھمنند نورگامہ زھری ءِ نام ءَ چہ بوتگ –

ھال ءِ سر بوھگ ءَ دمگی لیویز پورس ءَ وت ءَ ھما جاہ ءَ سر کُتگ ءُ جون دستگپتگ ءُ نادراھجاہ ءَ بُرتگ –

نادراھجاہ ءِ بنشون ءِ رِد ءَ مرد گُٹگیر کنگ ءُ کشگ بوتگ اے درگت ءَ لیویز گیش پٹ پول کنگ ءَ انت –

دومی نیمگ ءَ شال ءِ دمگ کوئلہ پھاٹک ءِ نزیک ءَ ھم یک جون ءِ دست کپتگ –

ھالانی رِد ءَ گندگ ءَ مرد نشہ آماچیں مردمے بوتگ کہ نادراھجاہ ءَ برگ بوتگ اودا اژدری چار ٹپاس ءَ پد کھول ءِ ھوالگ ءَ کنگ بوتگ –

شھید امان جان ءِ سالروچ

نبشتہ کار: بانک مھر دشتی

دی بلوچستان پوسٹ

شھید امان جان سرنتاب ءُ وتن دوستیں سنگتے اَت شھید ءَ 2013 ءَ بلوچ راجی جھد ءَ بھر زرتگ اَت جھد ءِ بندات ئِے چہ بی آر اے ءَ بندات کتگ اَت باز جنگ ءَ ھوار بوتگ ءُ سوبین ھم بوتگ اَت شھید ءَ مدام گوشتگ کہ من اگاں شھید بوت آں گڑا پمنی بیرانی ءَ موتک میار اِت بلکیں گل بہ بہ اِت کہ ھداوند ءَ من ءَ وتی وتن ءِ واستا درچتگ اے نیکنامی ھرکسے تالہ ءَ بوت نہ کنت اے نیکنامی ءَ ھما کس زرت کنت کہ آ وتی وتن ءِ آجوئی ءُ راج ءِ باندات ءَ دل ءُ چمانی گون ءَ بہ گند اِیت-

کسے اگاں اے پگر ءَ کنت کہ من بیران بہ آں منی مات بزگ بیت گڑا سرجمیں زند ءَ ، ناں آئی ءِ مات ءَ آسودگی رس ایت ءُ ناں راج ءِ آؤکیں باندات ءَ اگاں لوٹ ئے کہ مارا ریاستے بہ بیت ، ملکے بہ بیت ، مارا زبانے بہ بیت ءُ مارا وت ءَ پجّار ءُ شناکت بہ بیت-

گڑا بن ھشتانی واستا مارا وتی جان کربان کنگی اَنت مَرگ وَ انسان ءِ سر ءَ المی اِنت بلے نمیران اِنت ھما مردم کہ آئی ءَ وتی زند پہ مکسدے گوازینتگ ءُ شھادت ءَ رند مدامی وتی راج ءِ دل ءَ نمیران بیتگ-

شھید امان جان ، 22 دسمبر 2015 ءَ دشت سورک ءِ جنگ ءَ شھید کنگ بوت اے جنگ ءَ شھید ءِ ھمراھی ءَ دگہ ھپت تمردیں گنگر ھم شھید کنگ بوت اَنگ آیاں ھم وت ءَ پہ وتن مدامی نمیران کت اے جنگ ءَ پاکستانی فوج ءِ دوئیں گاڑیاں گوں سپاھیگاں کُش اَنت بلے پد ءَ دگہ باز گاڑی کیت ءُ برز ءَ بالگرد ھم تیرگواری کن اَنت-

وھدے کہ اے چاریں نیمگاں گٹ بنت گڑا لھتے سنگت چہ بی ایل ایپ ءِ کمک ءَ وت ءَ چہ جنگ جاہ ءَ سوبین کن انت بلے اے ھشتیں دلیر شھادت ءِ شربت ءَ پہ وشنامی تنگ اَنت ءُ مدامی نمیران بنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کراچی ءَ شیرشاہ ءِ ھند ءَ تراک ءِ بیتگ کہ اِشی سوب ءَ دہ مردمانی بیرانی ءِ ھال اِنت۔

کراچی پولیس ءِ ردءَ تراک حبیب بینک پراچہ چوک شیرشاہ ءِ نزیک ءَ سوئی گیس لائن ءِ تہءَ بیتگ۔ پولیس واکدارانی گُشتگ اِنت کہ ماڑی چات ءِ سر ءَ بندگ بیتگ، گمان اِنت کہ چات ءِ تہءَ پُر بیگ ءِ سوب ءَ تراک بیتگ بلے داں انگت دلجمیں سوب ءِ درگیجگ ءِ ھاترءَ پَٹ پول برجاہ اِنت۔

پولیس ءِ گُشگ اِنت کہ بنداتی اھوالانی ردءَ تراک ناشرکاری ءِ گمان دیگ ءَ نہ اِنت بلکہ گیس ءِ لیکیج ءِ سوب ءَ تراک بیت کُت کنت، تراک ءِ وھدءَ بینک پچ بیتگ کہ آودہ ھمک روچی کار برجاہ بیتگ اَنت۔

تراک ءِ ھالے رسگ ءَ بمب ڈسپوزل اسکواڈ ھم وئیل جاہ ءَ سر بیتگ۔

کراچی پولیس ءِ مستر غلام نبی میمن ءَ گُشتگ کہ پولیس ءِ ٹیم وئیل جاہ ءَ رستگ ءُ پَٹ ءُ پول ءَ پد اے درگت ءَ گُشت کنیں۔

کراچی ٹراما سینٹر ءِ سروک ڈاکٹر صابر میمن ءَ تراک ءِ تہءَ دہ مردمانی بیرانی ءِ سدکی کُتگ ۔

بلوچستان ءِ دمگ کیچ ءَ پاکستانی پوج ءِ چوکی ءِ سر ءَ اُرش کنگ بیتگ۔

گیشتریں ھالانی رد ءَ بلوچستان ءِ دمگ کیچ ءِ ھنکین دشت مزنبند ءِ ھند ءَ ناشناسیں سلاہ بندیں مردماں پوجی چوکی ءِ سر ءَ اُرش کُتگ۔

اھوالانی رد ءَ اُرش ءِ تہ ءَ لشکریاں تاوان رسگ ءِ ھال اِنت بلے داں انگت اے درگت ءَ واکدارانی نیمگ ءَ ھچ لیکہ دیما نیتکگ اَنت۔

زانگ بہ بیت بلوچستان ءِ دمگ کیچ ءَ بلوچ سلاہ بندیں گل وھد پہ وھد پاکستانی پوج ءُ پھازگی لشکریاں ھوار سی پیک ءِ پراجیکٹسانی سر ءَ اُرش کاریانی زمہ واریاں زیر اَنت۔

بلے مروچی بیتگیں اُرش ءِ زمہ واری داں انگت ھچ گل ءَ نہ من اِتگ۔

ھمے وڑ کیچ تربت ءَ ھم بازیں کچے ءَ پوجی کاروانے دیم پہ تمپ ءُ دشت ءِ نیمگ ءَ رھادگ بیتگ اَنت ءُ تنی وھدی اے کاروان ءِ بارو ءَ دگہ گیشیں سرپدی نہ بیتگ اَنت –

بلوچستان لبریشن فرنٹ ءِ جارکش میجر گوھرام بلوچ ءَ پاکستانی لشکریانی سر ءَ بیتگیں اُرشانی زمہ واری زُرتگ ءُ گُشتگ کہ شانزدہ دسمبر ءَ سرمچاراں کیچ ءِ دمگ ءِ تمپ ھنکین ءَ برات چوکی ءِ سر ءَ گوں سنائپر ءُ دگہ مزنیں سلاھاں گوں اُرش کُتگ ءُ یک کارمندے کُشتگ۔

میجر گوھرام ءَ گیشتر دیمتر ءَ گُشتگ کہ گوستگیں شپ ءَ سرمچاراں کولواہ سگک ءِ ھند ءَ بستگیں پوجی بنجل ءِ سر ءَ راکٹ لانچر ءُ اے ون ءِ گولہ آس داتگ اَنت کہ اِشی ءِ سبب ءَ زورگیریں پوج ءَ مزنیں جانی ءُ مالی تاوانانی دیمپانی کنگ کپتگ۔

جارکش ءَ گُشتگ زورگیریں لشکر ءِ سر ءَ مئے اے اُرش داں بلوچستان ءِ آجوئی ءَ برجاہ مان اَنت۔

بلوچستان ءِ دمگ کیچ ءِ سیمسری ھنکیناں پاکستانی پوج ءِ زمینی ءُ برزی بیڑ برجاہ اِنت۔

ھالانی رد ءَ گوستگیں روچ ءَ بندات بیتگیں پوجی بیڑ داں انگت برجاہ اَنت کہ اِشی ءِ تہ ءَ بالگرداں ھوار مزنیں کساسے ءَ پادانی پوجی بھر زیرگ ءَ اَنت۔ بلے داں انگت اے بیڑ ءِ تہ ءَ ھچ پیمیں جانی ءُ مالی تاوانانی ءُ دزگیری ءِ ھال دیم ءَ نیتکگ اَنت۔

یات بہ بیت دو روچ پیسر ھمے ھنکیناں بلوچ آجوئی لوٹوکیں سلاہ بندیں گلانی ھواریں گل بلوچ راجی آجوئی سنگر (براس) ءَ پاکستانی پوج ءِ یک پوسٹے ءِ سر ءَ اُرش کُتگ ءُ وتی قوضہ ءَ زُرتگ اَت۔ براس ءِ جارکش بلوچ خان ءِ رد ءَ اے اُرش ءِ تہ ءَ یازدہ پوجی کارمند کُشگ بیتگ اَت ءُ چوکی ءِ درستیں سلاہ ءُ بمب ءُ شورو ھم گوں بُرتگ اِت اَنت۔

بلے داں انگت اے دمگاں برجاھیں بیڑ ءِ درگت ءَ واکدارانی لیکہ دیم ءَ نیتکگ اَنت وھدیکہ گوستگیں روچاں واکداراں پھازگی جیڑھانی سبب ءَ سیمسری گوز جاہ ھم عبدوئی ءِ ھند ءَ بند کُتگ اَت کہ داں انگت بند اِنت ۔