TBP Balochi

سربوتگیں ھالانی رِد ءَ بلوچستان ءِ دمگ کلات ءَ ناشناسیں مردماں پاکستانی پوج دیرواگیں تراک ناکیں شوروانی نشانگ جوڈ کتگ –

پوج ءِ سر ءَ اُرش کلات ءِ دمگ زواہ ءَ کنگ بوتگ کہ ناشناسیں مردماں دگ ءِ کش ءَ تراکناکیں شورہ کل کتگ پوج نشانگ کتگ –

ھالانی رِد ءَ اُرش ءَ پوج ءَ تاوان رستگ بلے تنی وھدی ھنگت پکائیں ھال شنگ کنگ نہ بوتگ –

زانگ بہ بیت گوستگیں روچ ءَ ھم ھمے دابیں اُرش ءِ کیچ ءِ دمگ ناسرآباد ءَ پاکستانی پوج ءِ سر ءَ کنگ بوتگ کہ آئی زمّہ واری بلوچ لبریشن آرمی ءَ منّ اِتگ –

بی ایل اے جارکش ءِ رِد ءَ اُرش ءَ ھپت پوجی کارمند مُرتگ بلے سرکار ءِ نیمگ ءَ اُرش تردید یا تصدیق نہ بوتگ –

سندھ ءِ مزن شھر کراچی ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی سرجمی ءَ چار ھزار ءُ پنچ سد ءُ چِل ءُ شش روچ سرجم بوتگ – چہ ھب چوکی ءَ سیاسی ءُ چاگردی باسک علی احمد بلوچ، دُرا بلوچ، عبدالعزیز بلوچ ءُ دگہ جنین ءُ مردیناں بنجل ءِ تر ءُ تاب کتگ بیگواھیں مردمانی کھولانی گوم ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَاتکگیں مردمانی میان ءَ تران کنان ءَ گوشت کہ اے سال ءَ مال ءُ مڈیاں سریچیں سرڈگار ءِ واھنداں چہ بنکی ھک ھم پچگرگ بوتگ انت ھمود ءَ کہ پہ نندگ ءَ کُڈوک ءِ نیست بلے آرمی ءِ یک بلاھیں بنجلے الم ھست ءُ وشھالیں زند گوازینگے درستیں سھولت ھست انت وانگجاہ چہ بندات ءَ نیست بلے ھمود ءَ کہ وانگجاہ ءِ نام ءَ جوڑ کنگ بوتگیں کوٹیاں ایف سی ھر جاہ گندگ بیت اِنت – ھر کلومیٹر ءِ سر ءَ آرمی ءُ ایف سی ءِ پانگس جوڑ کنگ بوتگ اَنت کہ اود ءَ دُز ءُ ڈنگ ارزانی گوز انت بلے ھما بلوچ ورنایانی دست ءَ کہ کلم ءُ کتاب انت بازیں اداراں تاں گرم ءِ سر ءَ اوشتارینگ بنت بلے اشی ابید ھم ھاکم زادگ مارا گوش انت کہ بلوچ دیمروئی ھلاپ انت بلوچ وانگ نہ لوٹ انت جاھلیں مردم انت اگاں شمئے دیمروئی آرمی ءُ ایف سی ءِ بنجل جوڑ کنگ انت کہ اود ءَ مئے دوستیگیں مردم یکجاھی ءَ لین ءَ اوشتارینگ ءُ تیر آماچ کنگ بنت – شمئے دیمروئی آرمی ءُ ایف سی ءِ پانگساں چہ مئے چاگرد ءِ تہ ءَ نشہ ءُ سلاہ عام کنگ ءُ دُز ءُ ڈنگاں مھار بڈا دئیگ گڑا مارا بکش ات ما راستی ءَ اے وڑیں دیمروئی نہ لوٹ اِنت –

ماما قدیر بلوچ ءِ گوشگ ات کہ بلوچستان ءَ انسانی ھکانی لگتمالی گڈی سیمسر انت بلوچستان ءَ گیشتر دمگ پوجی بنجلانی تہ ءَ بدل کنگ بوتگ انت ھمک روچ پوجی لشکر کشیاں چہ مھلوک بیزار بوتگ ءُ در پہ دری زند گوازینگ ءَ لاچار کنگ بوتگ ڈیرہ بگٹی، سوئی، کوہلو، کاھان دمگاں گیشتر مردم پیسر ءَ چہ درپہ در انت نوں شاپک، شاھرک، یوشاپ، اواران ءُ مشکے ءِ مردم بازیں پوجی لشکر کشیاں چہ در پہ در بوگ ءَ انت – آرمی ءُ ایف سی ءَ دمگاں پوجی بنجل جوڑ کنگ ءِ ھاتر ءَ بازیں پوجی بنجل جوڑ کتگ ءُ ھمک روچ لس مھلوک ءِ سر ءَ زمینی ءُ برزی بمبگواری برجاہ انت ھمے سوب ءَ دمگے بازیں مردم ءِ در پہ دری زند گوازینگ ءَ لاچار بوتگ –

بلوچستان ءِ تیابدپی شھف گوادر ءُ پنجگور ءَ پاکستانی پوج ءَ دو براتاں ھوار چار مردم بیگواہ کرتگ اَنت –

گیشیں ھالانی رد ءَ سِی ءُ یک دسمبر ءَ پاکستانی پوج ءَ پنجگور ءِ دمگ گچک ءَ دو براتاں ھوار سَے مردن دزگیر کنگ ءَ پد بیگواہ کرتگ اَنت آیانی پجار ستار ءُ ممتاز ء قادر بکش ءُ نادل ء شیر مھمد ءِ ناماں زانگ بیتگ اَنت –

دمگی مردمانی رد ءَ پوج ءَ اے مردم وتی بنجل ءَ لوٹارینتگ اَنت ءُ پد ءَ ھما اِنت بیگواہ اَنت –

دومی نیمگ ءَ بلوچستان ءِ تیابدپی شھر گوادر ءَ ھالانی تہ ءَ گوشگ بیتگ پنچ روچ ءَ ساری پوج ءَ ساجد ء عابد جھمنند کونشکلات تمپ کراچی ءَ روگ ءَ بیتگ گوادر ءِ دمگ بیری چوک ءَ دزگیر کنگ ءَ پد بیگواہ کرتگ-

دمگی مردمانی رد ءَ پوج ءَ بس داشتگ ءُ اے مرد پجار کنگ ءَ پد بس ءَ ایر گپتگ ءُ آوار جتگ –

سر بیتگیں ھالانی رد ءَ روکپتی بلوچستان ءَ بیست سال ءَ پیسر بنا بیتگیں دلرنجی مروچی شیر ءُ شکر بیتگ ءُ ھردوکیں نیمگانی ٹک وت ما وت وش بیتگ اَنت-

ھالانی تہ ءَ گوشگ بیتگ بیست سال ءَ پیسر روکپتی بلوچستان ءِ جھمنندیں زنگی زئی ءُ شَھ کرم زئی ءِ ٹک مروچی مولانا عبدالحمید ءُ دگہ سروگانی ھواری ءَ دست ءُ دروت کنگ بیتگ اَنت-

اھوالانی تہ ءَ گوشگ بیتگ کہ اے مردمانی ناوشی ءُ وت ما وتی جنگ ءَ دو مردم ھردوکیں نیمگاں کُشگ بیتگ اَنت ءُ اے جنگ گیش دیم ءَ روگ ءَ بیتگ ءُ بلے دمگ ءِ سروگاں اے جنگ ءِ دارگ ءَ مزنیں کوشست کرتگ اَنت-

مروچی ما دزاپ ءَ مجلس شوروا امام جمعہ مولانا عبدالحمید بلوچ ءُ دگہ کماشیں مردمانی سروکی ءَ بازیں گپ ءُ تران ءَ پد اے ھردوکیں ٹک شیر ءُ شکر کنگ بیتگ اَنت –

ھالانی تہ ءَ گوشگ بیتگ اے سال ءِ بندات ءَ تنی وھدی بیست ءُ ٹکانی دلرنجی ھلاس بیتگ ءُ وت ماں وت تپاک بیتگ اَنت –

بلوچستان نیشنل پاٹی ءِ سروک ءُ رکن قومی اسمبلی سردار اختر مینگل ءَ گوشتگ کہ سیندک ءَ چنکس سُھر، تانبا، سِلور کشگ بنت اشانی اندازگ نیست؟، بلوچستان ءَ بس دو درسد رائلٹی ءِ یک کاگدے دیگ بیت اِنت ھمے رنگ ءَ اُستان ءَ دراتکگیں گیس ءِ ھچ ھساب ءُ کتاب نیست، مڈیانی سر ءَ جست کنگ گداری ءِ درچ ءَ کیت اِنت، الیکشن کنگ، راجدپتر ءِ سوھو کنوک شر بنت بلے الیکشن کنوکیں جاور ھال، ناگیگ کنوکانی دیم ءَ ما بے وس اِنت –

اے گپ آئی ءَ یکشمبے ءِ روچ ءَ شال ءَ وتی گس ءَ بی این پی ءِ بنجاھی پتر ءِ نیاد ءَ پد پریس کانفرنس ءِ وھد ءَ کتگ اَنت –

سردار اختر مینگل ءَ گُشتگ کہ بی این پی ءِ سر ءَ ھروھد ءَ دیمروئی ءِ بگیری ءِ بھتام جنگ بیتگ ما دیمروئی ءِ بگیر داروک نہ اِنت بلکیں دیمروئی ءِ نام یَ بلوچستان ءِ مھلوک ءِ بُنچک ھلاس کنگ بیگ ءَ اِنت – بلوچستان ءَ چہ سوئی ءَ نوزدہ سد ءُ پنجاہ ءُ دو ءَ دراتکگیں گیس ڈیھ ءِ اُستاناں چِل ءُ شش درسد گیس پُجارینگ اِنت نِی پانزدہ درسد اِنت بلے داں مروچی ءَ بلوچستان ءِ مھلوک چہ گیس ءَ زبھر اَنت چُشکہ آئین ءِ آرٹیکل پنجاہ ءُ دو ءِ ھلاپ اِنت-

آئی ءَ گُشتگ کہ بلوچستان ءَ آئی ءِ گیس ءِ رائلٹی ءِ ھیرات ءِ رنف ءَ چارگ بہ بیت آ ھم سرجمی ءَ اد ءَ کنگ نہ بیت اِنت داں مروچی ءَ ڈیرہ بگٹی ءِ مھلوک دارانی سوچگ ءَ لاچار اَنت ڈیھ ءَ بجلی ءُ گیس اگاں کمی اِنت بلے بلوچستان ءِ وتی گیس اِنت انگت زبھر اِنت دیمروئی ءِ نام ءَ بلوچستان ءِ مڈیاں لُٹگ ءَ اَنت سیندک ءَ کار کنگ ءِ سر ءَ روزگار ءَ ابید مڈی دولت برگ بیتگ اَنت سی پیک ءَ گوادر بلوچستان ءِ لُٹ ءُ پُل بیتگ اَنت راستیں دیمروئی دگہ بھراں بیتگ اَنت ما نوزدہ سد ءُ نود ءُ نُھ ءَ رتوڈیرو گوادر ءِ شھدگ لُٹ ءُ پُل گشتگ دوزھزار ءُ سیزدہ ءَ پد سی پیک ءِ نام ءِ سر ءَ گوادر ءِ پجار سرجمیں دنیا ءَ بیت بلے شست ءُ پنچ ارب ڈالر ءِ سرمایہ کاری ءَ ابید مروچی گوادر ءِ مھلوک آپ، بجلی، روزگار، دریاوردی ءَ زبھر اَنت ٹرالر دمگی مردمانی لاپ ءَ لگت جنگ ءَ اَنت –

شھید شکیل ارپ ءِ اسدجان ءِ نام ءَ

شاکر مراد

دی بلوچستان پوسٹ

سر دئیکویں سرمچاریں مئے اسد
کُل. بلوچے جانساریں مئے اسد

ساھجی ءِ بند بندءِ ھرنامے سپر
ُکُلبری واباں دوچاریں مئے اسد

پگر ءِ آٹیگ ءَ داں است ءُ زندگیں
جھد ئے کشکانی تواریں مئے اسد

دژمن ءِ پاد تراپْ ءُ بیم ءِ پروشگ ءَ
داں ھر گور ءَ انگت تیاریں مئے اسد

نکش ایں ماں آجوئی ءِ جنگے پڈءَ
پہ گُلزمین ءَ گُل بھاریں مئے اسد

رژن ئے چیدگ واھگانی ھمبل ایں
پُل آباد ءِ پُل چکاریں مئے اسد,

ستونت کور

رجانک: پزل شیر بلوچ

دی بلوچستان پوسٹ

“مات ءَ را مہ گش کہ من اوگانستان ءَ آں” مرچی بزان 24 دسمبر ءِ روچ انت، اوگانستان ءِ سر ءَ “سرخ طاعون” بزان سوویت اتحاد ءِ ارش ءِ چل ءُ دومی سالروچ انت-

سوویت اتحاد ءَ را آئی گڈی جاہ ءَ رسینگ ءَ پد اے جنگ ءَ لکانی کچ ءَ دردناکیں کسہ ءُ یات پشت ءَ ایر کتگ ھمے کسھانی تھ ءَ جنگ جاہ ءَ ساڑی ئیں یک روسی پوجی ءِ وتی گھار ءِ نام ءَ نبشتگیں نمدی انت کہ اشرا رندا یک لچہ یے ءِ دروشم دیگ بوتگ ءُ پد ءَ اشی سر ءَ یک سوتے جوڑ کنگ بوتگ جنگ ءِ وھد ءَ اے سوت روس ءَ سک نام آں بیت اے سوت ءَ را اوگانستان ءَ یک بے مول ءُ مرادیں جنگے ءِ تھ ءَ دور داتگیں لکانی روسی پوجیانی دل ءِ آہ سرد زانگ بوتگ-

اے سوت ءِ بند اے پیم انت. “او منی گھار او منی دوستیگیں ارواہ چون ئے تو؟ گس (روس) ءَ کشکاں برپانی چادر مانپوشتگ انت اد ءَ کندھار ءَ گشئے آزمان ءَ چہ استال سدگ ءُ کپگ ءَ انت بلے مات ءَ را مہ گش کہ من اوگانستان ءَ آں” دوشی یک اوگانی (مجاھد) یے ءَ مئے ٹینک تباہ کت مئے ٹیکنیشن جنگ بوتگ، آئی ءِ جون زوتاں ماں ‘بلیک ٹیولپ’ (روسی بالی گرابے) ءَ راہ دیگ بیت. منی دل بے کساس لوٹگا انت کہ اے ھونی ئیں جنگ ءِ سرا لانت دیم بدئے آں بلے مات ءَ را مہ گش کہ من اوگانستان ءَ آں”

شنمبے گنجی ءِ روچ نزیک انت، ما وتی گُداں شودیں ءُ (ادارے ءِ ھاترا) جنگ ءَ پراموش کنیں
ما چہ ھوناں میچل ایں، ما وپت نہ کنیں، اے جنگ جاہ سک ھونریچ ات اچ ما سے مردم زندگ ءَ واتراِتگ، نوں من گریوگ لوٹاں بلے مات ءَ را مہ گش کہ من اوگانستان ءَ آں”-

ما دگہ یک ٹولی یے ءِ سرا پہ ارش ءَ روگائیں کوہ ءُ کلات مئے سرا ارش کنگا انت من وتی سنگت سامیا ءِ ھمراہ آں، من گوں آئی ءَ کول کتگ کہ ما زندگ ءَ واتر بیں بس مات ءَ را مہ گش کہ من اوگانستان ءَ آں-

گھارک من پد ءَ گوں دل ءِ جھلانک ءَ تئی منہ واراں بلے بازیں سوب ھست کہ چہ گس ءَ اتکگیں نمدی مارا نہ رس انت اگاں مات ءَ جست کت کہ من نمدی ءَ چے نبشتگ گڑا دروگ بہ بند بلے مات ءَ را مہ گش کہ من اوگانستان ءَ آں” اشی ءَ چے پد اے لچہ ءُ سوت ءِ بازیں تھر جوڑ بوتگ کہ اشانی لبز ءُ بند جتا جتا انت-

پد ءَ 1990 ءِ وھد ءَ کہ روس چیچنیا ءِ سر ءَ اُرش کنت تاں اے سوت دوبر ٹھینگ بیت ءُ اشی ءِ تھ ءَ اوگانستان ءِ جاہ ءَ چیچنیا ءُ کندھار ءِ جاہ ءَ گروزنی ءِ لبز مان کنگ بنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوستگیں شپ ءَ پورپئین پریمئیر لیگ فٹبال گوازی ءَ ھشت ٹیمانی میان ءَ گوازی کنگ بوتگ کہ برینٹفورڈ ءَ آسٹون ویلائے دیم ءَ دو ءَ، لیڈز یونائیٹڈ ءَ برنلی دیم ءَ سَے، برائیٹون ءَ ایورٹون ءِ دیم ءَ سَے گول ءَ گول ءَ گوازی کٹ اِتگ وھدیکہ چیلسیا ءُ لیور پول دو دو گول ءَ دیمیگ بوتگ انت –

دوشی شپ ءَ بوتگیں پریمئیر لیگ ءِ اولی گوازی برینٹفورڈ ءُ آسٹون ویلائے میان ءَ کنگ بوتگ کہ برینٹ فورڈ ءَ دو گول ءَ چہ گوازی کٹ اتگ وھدیکہ آسٹون ویلائے نیمگ ءَ چہ یک گولے اسکور کنگ بوتگ کہ آسٹون ءِ لیبی ڈی انگز ءَ اولی شانزدھیں ملٹانی تہ ءَ داتگ – برینٹفورڈ ءِ نیمگ ءَ چہ اولی گول وائی.ویساء ءُ دومی ایم. روئیرسلیب ءَ اسکور کتگ انت گوازی وتی ٹیم ءِ نام ءَ کتگ –

دومی گوازی لیڈز یونائیٹڈ ءُ برنلی ءَ میان ءَ کنگ بوتگ کہ لیڈز یونائیٹڈ ءَ سَے پہ یک گولے ءَ گوازی کٹ اِتگ – برنلی ءِ نیمگ ءَ چہ ایم.کارنٹ ءَ گول اسکور کتگ – وھدیکہ لیڈز یونائیٹڈ ءِ لیبی جے.ہیریسن، ایس.ڈلاس، ڈی.جیمس ءَ یک یک گولے اسکور کتگ –

ایورٹون ءُ برائیٹون ءِ میان ءَ بوتگیں سیمی گوازی ءَ سَے پہ دو گول ءَ گوازی کٹ اِتگ – ایورٹون ءِ نیمگ ءَ چہ ھردو گول اے.گارڈن ءَ اسکور کتگ انت وھدیکہ برائیٹون ءِ نیمگ ءَ چہ یک گولے ڈی.بارڈن ءَ اسکور کتگ ءُ دو گول اے.میک ایلسٹر ءَ اسکور کتگ ءُ گوازی وتی ٹیم ءِ نام ءَ کتگ –

پریمئیر لیگ ءَ دوشی شپ ءَ بوتگیں گڈی چارمی گوازی چیلسیا ءُ لیور پول ءِ میان ءَ کنگ بوتگ کہ ھردو ٹیم دو دو گول ءَ دیمیگ بوتگ اَنت –

ھردو ٹیمانی لیبیاں جوانی ءَ گوازی کنان ءَ لیور پول ءِ نیمگ ءَ چہ گوازی بندات ءَ نُھمی ملٹ ءِ تہ ءَ لیبی ایس. مانے ءَ یک گولے اسکور کتگ بیست ءُ ششمی ملٹ ءِ تہ ءَ لیور پول ءِ لیبی ایم سالح ءَ دومی گول اسکور کتگ – بلے لیور پول ءِ لیبیاں چیلسیا دیم داشت کرت نہ کرت چِل ءُ دومی ملٹ ءِ تہ ءَ چیلسیا ءِ لیبی ایم.کواکیک ءَ یک گول ءِ اسکور کت دیر نگوستگ ات کہ چِل ءُ پنچمی ملٹ ءِ تہ ءَ سی.پولیسک ءَ چیلسیا ءِ نیمگ ءَ چہ دومی گول اسکور کت- پد ءَ رند ءَ گوازی ءَ گڈسر ءَ تاں ھردو ٹیم گول اسکور کنگ ءَ بے سوب بوت انت ھردو ٹیم دو دو گول ءَ دیمیگ بوتگ انت –

بلوچستان ءِ دمگ چہ پنجگور ءَ سلاہ بندیں مردماں یک مردمے دزگیر کنگ ءَ پد بیگواہ کرتگ –

بیگواہ کنگ بیتگیں مردم ءِ پجار عبدالرھمان ء مراد ءِ نام ءَ زانگ بیتگ آ پنجگور ءِ دمگ پروم ءِ ھند گیشتی ءَ گوستگیں روچ ءَ سلاہ بندیں مردماں آئی ءِ لوگ ءِ سر ءَ بیڑ برتگ ءُ آوار جتگ –

دمگی مردمانی رد ءَ گرگ بیتگیں مردم سرکاری پلامرزی ءَ جوڑ بیتگیں گلانی ٹولی ءَ آوار جتگ ءُ برتگ – زانگ بہ بیت سیاسی ءُ چاگردی پھناتانی رد ءَ سرجمیں بلوچستان ءَ پاکستانی پوج ءُ چیریں ادارھاں سدانی کچ ءَ مردم سلاہ بند کتگ اَنت کہ آیانی نام ڈیتھ اسکواڈ ءِ نام ءَ زانگ بیت اِنت –

اے ٹولی ءِ بارو ءَ بلوچ راجدوستیں پاٹیانی نیمگ ءَ اے بھتام جنگ بیت اِنت ءَ اشاں سرجمی ءَ مھار گُٹ ءَ داتگ اَنت ءُ مردمانی کُشگ، آوار جنگ ءُ چاگردی سلکاریاں دزمانجن اَنت-

سندھ ءِ مزن شھر کراچی ءِ دمگ گلستان ءِ جوھر ءَ یکشمبے ءِ روچ ءَ پشتون تحفظ مومنٹ ءِ چیردستی ءَ برجم بوتگیں مچی ءَ چہ بلوچستان ءَ سیادی داروکیں بیگواھیں مردمانی کھولاں بھر زرتگ –

بلوچستان ءَ بیگواھیں مردمانی پانکجنیں گل وائس فار بلوچ مسنگ پرسنز ءِ کمک سرکماش ماما قدیر بلوچ، بیگواھیں راشد حسین بلوچ ءِ مات ءُ بلوچ یکجھتی کمیٹی ءِ رھشون آمنہ بلوچ ءَ ھمے وھد ءَ پشتون تحفظ مومنٹ ءِ سرکماش منظور پشتین گوں دچار کپتگ انت ءُ زورانسری اوار جنگ ءُ بیگواہ بوتگیں مردمانی بگیری ءَ جُھد کنگ ءِ باور کنائینتگ اَنت –

مُچی ءَ بیگواھیں انسانی ھکانی باسک راشد حسین بلوچ ءِ برازتک ماھزیب بلوچ ءُ بیگواھیں عبدالحمید ءِ زھگ ءَ تران کنان ءَ گوشتگ کہ بیگواھیں مردمانی درد یک انت –

آھانی گوشگ ات کہ مروچی بیگواھیں بلوچ، سندھی ءُ پشتونانی مات یکیں ازاب ءِ تہ ءَ گوزگ ءَ انت ءُ آھانی کھولانی زند ازاب ءِ جوڑ بوتگ –

آھانی گوشگ ات کہ ما ھر چار راہ ءُ دگانی سر ءَ ھمے توار ءَ چست کنیں کہ مئے دوستگیں مردم یل کنگ بہ بنت اگاں آ ریاست ءِ مجرم انت گڑا آمیدگس ءَ آرگ بہ بنت –

مُچی ءَ بلوچ نودربر رھشون بیگواھیں شبیر بلوچ ءِ کھول ھم ساڑی بوتگ –

پشتون تحفظ مومنٹ ءِ سرکماش منظور پشتین ءِ ھمے درگت ءَ بیگواھیں مردمانی یل کنگ ءِ لوٹ کتگ ءُ گوشتگ کہ پشتون ءُ بلوچ ورنایانی زورانسری آوار جنی ءِ بگیری ءَ توار چِست کنیں –