TBP Balochi

دستونک

هسابجار

دی بلوچستان پوسٹ

گار انت منی پُلیں رمگ
هور انت نزانت هچی تمگ

مانرتکہ چونیں لشکرے
ویران انت مئے هلک ءُ دمگ

یک ، یکی ءَ ما گاربئیں
لوٹ ایت مارا نوں جمگ

گوریچ پہ دابے مئیل کنت
کرگین منی انچو شمگ

” لمپ انت ءُ لیتاریں همُک
چُش کہ بجنت پونز ءَ سمگ “

گپتگ هسا نوں پیری ءَ
ریش انت تئی ماش ءُ کنگ

چہ بارکھان ءَ پنچ ماہ ساری زورانسری آوار جنگ بوتگیں ڈاکٹر جمیل بلوچ ءِ کھول ءِ نیمگ ءَ مروچی مزنیں ائید ءِ سیمی روچ ءَ زھرشانی کنگ بوتگ –

زھرشانی کنوکاں اسپتال چار راہ ءَ بگر تاں بارکھان پریس کلب ءَ روانک ءِ کش اِتگ – زھرشانی ءَ ڈاکٹر جمیل ءِ کھول، دمگی مردم، سول سوسائٹی ءُ بارکھان ویلفئیر سوسائٹی ءِ باسکاں بھر زرتگ –

زانگ بہ بیت جمیل بلوچ یک ڈاکٹرے ، کہ ھمے سال ءِ بیست ءُ سَے فروری ءَ بلوچستان ءِ دمگ بارکھان ءَ زورانسری آوار جنگ ءُ بیگواہ کنگ بوتگ –

روانک ءَ بھر زوروکیں مردماں بلوچستان ءَ ھوار دگہ شھراں بلوچ ورنایانی زورانسری آوار جنی ءُ زانشجاھانی تہ ءَ بلوچ نودربرانی ترسینگ ایر جتگ – آھاں چہ بلوچستان ءِ سرکار ءُ کانود جوڈ کنوکیں ادارھاں چہ لوٹ کتگ کہ ڈاکٹر جمیل کھیتران ءَ ھوار دگہ بیگواھیں مردم یل کنگ بہ بنت –

روانک ءَ ھواریں مردمانی گوشگ ات کہ ھمک روچ بلوچستان ءِ تہ ءَ زورانسری آوار جنیانی تہ ءَ گیشی آیگ ءَ انت، ریاستی ادارہ جھندم مھلوک ءِ پھریزگ ءَ آھاں آوار جنگ ءُ بیگواہ کنگ ءَ انت، مھلوک چہ اے پھازگی ادارھاں ترسیت – بلوچستان ءَ پھازگ ءِ نام ءَ آوار جنوک آرگ بوتگ انت –

زھرشانی ءَ بیگواھیں ڈاکٹت جمیل بلوچ کھیتران ءِ زھگ مھرناز ھم ھوار بوتگ –

مھرناز ءَ گوشتگ کہ منی پت ءِ بیگواھی ءَ نوں پنچ ماہ سرجم بوگی انت تنی وھدی آ یل کنگ نہ بوتگ – آئی ءَ گوشتگ کہ آئی ءَ وتی پت ءِ وش ءُ سلامتی یل کنائینگے ھاتر ءَ اے پنچیں ماھانی تہ ءَ بازیں زھرشانی ءِ کُتگ ءُ ھک ءِ لوٹ کتگ بلے منی پت یل کنگ بوگ ءَ نہ انت –

مھرناز کہ تنی وھدی سک باز کسان انت ءُ آئی ءِ پت ءِ ھاتر ءَ ھر زھرشانی ءِ بیت آ بھر زوریت – آئی ءَ گوشتگ کہ بازیں وھدے بیت کہ آ ودار ایں – مھرناز ءَ وتی پت ءِ وش ءُ سلامتی یل کنگے لوٹ کتگ –

زھرشانی ءَ ترانکارانی گوشگ ات کہ بلوچستان ءَ زورانسری آوار جنیانی درچ یکشل ءَ برجاہ انت کہ ھزارانی کچ ءَ ورنا چہ وتی دوستیگیں مردماں پچ گرگ بوتگ انت ریاستی ادارہ لوٹیت کہ بلوچستان ءَ برجاھیں گیر انسانی امل ءِ گر ءُ دار ءَ بہ کن انت ءُ بیگواھیں مردماں یل بہ کناں -ریاستی پالیسیاں گیشتر نپرت پیداک بوگ ءَ انت جاورھالانی شرکنگے بدل ءَ گیشتر ھراب کنگ بوگ ءَ انت –

آھانی گوشگ ات کہ ڈاکٹر جمیل بلوچ ءِ دمگ ءِ چاگردی جیڑھانی مھکمیں توارے بوتگ، جمیل بلوچ ءَ مدامی ھک ءِ گپ جتگ مروچی آ ھمے جُرمے سوب ءَ زندانی ایں –

زھرشانی کنوکاں ڈاکٹر جمیل بلوچ ءَ ھوار دگہ بیگواھیں مردمانی یل کنگے لوٹ کتگ –

ترانکاراں دیمتر ءَ گوشتگ کہ سوبائی سرکار ءُ انسانی ھکانی ادارہ بلوچستان ءَ برجاھیں زورانسری آوار جنیانی درچ ءَ بہ دار انت ءُ بیگواھیں مردمانی یل کنگ ءَ وتی کرد ءَ پیلو بہ کن انت –

بلوچستان ءِ باپاری شھر ھب چوکی ءَ پاکستانی پوج ءَ یک مردمے دزگیر کتگ ءُ ناشناسیں زنداناں برتگ-

بیگواہ کنگ بیتگیں مردم ءِ پجار فیصل ء حاصل جھمنند پیرکس لعل مھمد گوٹھ ءِ نام ءَ زانگ بیتگ-

کھول ءَ ھال راست کنان ءَ گوشتگ کہ اے ورنا دَہ روچ ءَ پیسر پوج ءَ لوگ ءَ بیڑ برگ ءِ وھد ءَ دزگیر کتگ ءُ برتگ-

کھول ءَ انسانی ھکانی گلاں گوں دزبندی کتگ کہ فیصل ءِ یل کنگ ءَ وتی کرد ءَ پیلو بہ کن اَنت-

بلوچستان ءِ دو جتا جتائیں جاھاں پیش اتکگیں وئیلاں شش مردم بیران بیتگ اَنت ءُ دَہ زدگ بیتگ اَنت-

وئیل بلوچستان ءِ دمگ چمن ءُ ڈیرہ بگٹی ءَ پیش اتکگ اَنت لیویز ءِ رد ءَ چمن ءِ دمگ شال چمب شھدگ ءَ شیلا باگ ءِ ھند ءَ گاڑی یے وئیل ءِ آماچ بیتگ-

لیویز ءِ رد ءَ ترند روگ ءِ سبب ءَ کلٹی بیتگ چریشی ءِ آسر ءَ پنچ مردم بیران ءُ دَہ زدگ بیتگ اَنت، زدگ ءُ لاش ھسپتال ءَ برگ بیتگ اَنت بلے داں انگت ءَ زدگ ءُ بیران بیتگیں مردمانی پجار نہ بوتگ اَنت –

دومی نیمگ ءَ ڈیرہ بگٹی ءِ ھند ڈکوخ ڈیم ءَ یک ورنایے بڈ اتگ ءُ بیران بیتگ کہ آئی ءِ پجار اھمد ء استاد بامی بگٹی ءِ نام ءَ زانگ بیتگ-

مزنیں ائید ءِ دومی روچ ءَ بلوچستان ءِ دمگ کیچ ءِ بُنجاھی شھر تربت ءَ پاکستانی پوج ءِ دست ءَ بلوچ نودربر ءُ سیاسی باسکانی زورانسری آوار جنی ءِ بگیری ءَ زھرشانی کنگ بوتگ-

بلوچ نودربرانی نیمگ ءَ چہ پریس کلب ءَ چہ یک روانکے کشگ بوتگ – نودربرانی دستاں بیگواھانی اکس ءُ پلے کارڈز بوتگ اَنت زھرشانی کنوکاں زورانسری آوار جنی ءِ بگیری ءَ ناراہ جنان ءَ شھید فدا احمد چوک سر ءَ زھرشانی کنگ بوتگ-

زھرشانی ءَ زالبول، زھگ ءُ بیگواھیں مردمانی کھول ھوار بوتگ اَنت-

ھمے درگت ءَ زھرشانی کنوکاں پاکستانی لشکر ءُ چیریں ادارھانی دست ءَ بیگواھیں بلوچ نودربر ءُ سیاسی باسکانی یل کنائینگ ءِ لوٹ کتگ-

زھرشانی بھر زورکیں مردماں تران کنان ءَ گْوشتگ کہ 14 سالاں چہ ھم مردم بیگواہ ءَ اَنت ءُ آیانی زندگی ءِ درگت ءَ کھول ءَ ھچ وڑیں سرپدی دیگ بوگ ءَ نہ اِنت، مملکت اللہ داد اے بیگواھیں مردماں وتی آمیدگس ءَ پیش بہ کن اَنت –

دو سال ءَ ساری چہ تربت ءَ بیگواہ کنگ بوتگیں وسیم بلوچ ءِ گْھار ءَ ھمے درگت ءَ گْوشتگ کہ ما دو سالاں چہ برات ءِ ھاتر ءَ ازیت اوپار کنگ ءَ ایں – ریاست ءُ ادارھاں گوں دزبندی کن ایں برات ءَ یل بہ کن اَنت اگاں آ کُتکار اِنت گُڑا آمیدگس پیش بہ کن اَنت ئِے اے وڑ بلوچاں ازیت مدے اَنت-

زھرشانی ءَ چہ ھمے سال ءِ مئی ءَ چہ راولپنڈی ءَ بیگواہ کنگ بوتگیں نودربر فیروز بلوچ ءِ سیادے ءَ تران کنان ءَ گْوشتگ کہ وھدے فیروز بیگواہ کنگ بوتگ گُڑا بندات ءَ مئے ایف آئی آر نکش نہ کتگ اِت پد ءَ ایمان مزاری ءِ جُھداں چہ ایف آئی آر نکش بوتگ ءُ کیس ءَ گوشدارگ بندات بوتگ –

آئی ءَ گْوشتگ کہ دومی گوشدارگ ءَ تاں جج چست ئے کتگ ءُ کیس ھم ھلاس ءِ کتگ اے نزام سر ءَ مھلوک ءِ بیسہ ھلاس بوتگ بیگواھیں مردمانی کھول ءَ ھم تُرسینگ ءَ اَنت-

آئی ءَ گْوشتگ کہ مئے ورناھاں لوگاں، بساں، وانگی ادارھاں چہ بیگواہ بیگواہ کن اَنت نو ریاست بہ گوش اِیت ما چی بہ کن ایں بلوچ کجا بہ رو اَنت؟

آیاں گْوشتگ کہ ائید ءِ روچاں مئے مات ءُ گْھار دگانی سر ءَ اَنت ما شوک ءَ چہ اناں لاچاری ءَ زھرشانی کنگ ءَ ایں-

اے زھرشانی ءَ نیشنل ڈیموکریٹک پارٹی ءِ بیگواھیں راھشون ڈاکٹر جمیل بلوچ ءِ کھول ءَ تران کنان ءَ گْوشتگ کہ ما چہ بارکھان ءَ اد اد ءَ اَتکگاں تانکہ جمیل بلوچ ءِ وئیل بابت ءَ پیش بہ کن آں-

آئی ءَ گْوشتگ کہ جمیل بلوچ ءِ جنکو اے ریاست ءَ چہ پت ءِ یل کنائینگ ءِ لوٹ ءَ کنگ ءَ اِنت بلے ریاست بلوچاں گوش ندار اِیت، مارا یک ءُ دومی ءِ توار جوڑ بوگی اِنت-

کیچ ءَ سیادی داروکیں بیگواھیں اسرار بلوچ ءِ برات ءَ گْوشتگ کہ منی برات 2015 ءَ چہ شال ءَ بیگواہ کنگ بوتگ ما آمیدگساں ءُ ادارھانی در ٹُکّ اِتگ اَنت بلے ھچ جاہ ءَ مارا ھک ءُ انساپ نہ رستگ-

آئی ءَ گْوشتگ کہ منی برات ایف سی ءَ بیگواہ کتگ کہ بازیں سالاں چہ بیگواہ ءَ اِنت ءُ مئے لوگاں وشی ٰایر کپتگ اَنت-

زھرشانی ءَ ضلع کیچ ءِ جتائیں دمگاں چہ بیگواہ کنگ بوتگیں مردمانی کھول وتی دوستناکانی اکس چست کتگ ءُ آیانی یل کنائینگ ءِ لوٹ کتگ-

کھول ءَ گْوشتگ کہ ما ریاست ءَ چہ لوٹ کن ایں مئے دوستناکاں یل بہ کن اَنت ءُ بلوچ راج ءَ ازیت دیگ ءَ بند بہ کن اَنت-

برتانیہ ءِ پارلیمنٹ ءَ ھمے سال ءِ دوازدہ جولائی ءَ سَے شمبے ءِ روچ ءِ بیگاھ ءِ شش ءَ مھماندار بیرونس نیٹلی بینیٹ ءِ چیردستی ءَ بلوچستان ءَ انسانی ھکانی لگتمالی پدر کنگ بنت –

پارلیمنٹ ہاؤس ءِ کمیٹی روم نمبر یک ءَ بلوچ لائیوز میٹر ءِ بنگپ ءِ سر ءَ اے مراگش برجم دارگ بیت اِنت –

ھمے زوتاں چیزے ماھانی تہ ءَ بلوچستان ءَ زورانسری آوار جنی ءُ درکانودی کُشت ءُ کوشانی تہ ءَ گیشی اتکگ، ھمیشی ءِ پژدر ءَ کلانیں زانتکار، انسانی ھکانی باسک ءُ راجکاریں مردم بلوچستان ءَ پاکستان ءِ پھازگی لشکر ءِ دست ءَ انسانی ھکانی لگتمالی ءُ زلم زوراکیانی سر ءَ تران کن انت –

بلوچ ہیومن رائٹس کونسل (بی ایچ آر سی) ءِ نیمگ ءَ بلوچستان ءَ انسانی ھکانی لگتمالی ءِ سر ءَ جوڈ بوتگیں ڈاکومینٹری ءِ ھم پیش دارگ بیت ایں –

ترانکارانی تہ ءَ بلوچ ہیومن رائٹس کونسل ءِ ڈاکٹر نصیر دشتی، سوآس یونیورسٹی آف لندن ءِ ڈاکٹر برزین واگھمر، ورلڈ سندی کانگریس ءِ ڈاکٹت لکھومل لوہانہ ءُ پیٹر ٹیچل فاؤنڈیشن پیٹر ٹیچل ھوار انت –

بلوچ سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءَ جاؤ ءَ موبائیل فون ٹاورءِ سر ءَ بوتگیں اُرش ءُ آئی ءِ ماندارگے زمّہ واری منّ اِتگ –

جارکش گوھرام بلوچ ءَ گوشتگ کہ مئے سرمچاراں نُھ جولائی ءَ آواران ءِ دمگ جاؤ ءَ بگاڑی زیلک ءَ موبائیل ٹاور گوں تراکناکیں شورواں تباہ کتگ –

جارکش ءَ گوشتگ کہ یوفون کمپنی ءِ موبائیل ٹاور تراکناکیں شورواں گوں تباہ کنگ ءَ پد آئی ءِ ایندگہ مشین ءُ ازباب مانداشتگ انت – آئی ءَ گوشتگ کہ زورگیریں ریاست وتی آسراتی ءُ سرمچارانی ٹریس کنگے ھاتر ءَ موبائیل فون ٹاور ءَ کارمز کنگ ءَ انت – ما زورگیریں ریاست ءِ اے پندلاں شری ءَ سرپدیں اے دابیں درسیں سامراجی شوربندی سرمچارانی نشانگ ءَ انت –

جارکش میجر گوھرام بلوچ ءَ گڈسر ءَ وتی درشان ءِ تہ ءَ گوشتگ کہ بلوچستان ءِ آجوئی ءَ تاں زورگیریں پوج ءُ سامراجی شوربندیانی سر ءَ مئے اُرش ھمے داب ءَ برجاہ مان انت –

نبشتانک: ائید مُبارک ھالو پُل

نبشتہ کار : مجاھد زاھد

دی بلوچستان پوسٹ

“بیھار مہ دئے من آں کہ من باجو نہ بوتگ آں “
“داں ھونے رگاں مان اِنت ترا چوں ھدا کن آں”

ھالد ءِ اگاں من ستا ءُ توسیپ ءَ بہ کن آں گُڑا من ءَ جند ءِ زمیر منی ملامت کنت پرچاکہ بلوچستان ءِ سرزمین ءِ سر ءَ لھتے ماتی انچیں مزن جگریں بچ ودی بوتگ اَنت کہ آھانی کِرد ءُ دلیری ءِ کسہ کنگ گوں منی وڑیں بے زانتیں ندکاراں نہ بیت ءُ ھالد ھم چَما ماتی سر نہ چنڈیں بچاں چے یکے بوتگ کہ پہ دشمن ءَ آسے بوتگ ءُ ھرگور ءَ چو دوزک ءِ آس ءَ پُُتروشتگ ئِے۔دشمن ءَ پہ ھالد ءِ گارکنگ ءِ واستا بازیں جد ءُ جھدے کُت،برے راھی بست،برے آئی ءِ نام ءَ مزنیں کچی ءِ زری ایر کُت کہ ھرکس بہ کُشتی یانکہ بْیارت ئِے من آھاں اے وڑ کناں،آ وڑ کناں،اینچوک زرّ دیاں بلے دشمن ءِ ساز اِتگیں پندل دُرست ناکام بوت اَنت ءُ ھالد انگت وتی جاہ ءَ برجاہ اَت ءُ چو سْیاجی ءِ کوہ ءَ دشمن ءِ دیم ءَ مِک اَت تھنا من ءَ ناں بلکیں مئے سرجمیں کھول ءُ مردمانی سرّ پہ پھرے چست اَت کہ ھالد ءِ پیمیں نرمزارے چہ مئے لوگ ءَ در اتکگ ءُ کوہ ءَ شُتگ پہ راج ءِ بے وسی ءِ ھاتر ءَ۔

چوناھا زانتکاریں مردم گُش انت کہ مردم وھدے کہ مھر ءِ پِڑ ءَ دور کنت گُڑا زندگی ءِ اے دگہ سرجمیں چست ءُ ایراں چہ سرگوز بیت، ھمے پیم ءَ مھر پد ءَ گوں وتی مات ءَ بزانکہ زمین ءَ بہ بیت گُڑا وَ ھچ گپ پشت نہ کپتگ۔ھالد ءَ ھم گوں وتی مات ءَ مھر بوتگ اَت،ھالد ءِ واھشت بس تھنا یکین اَنت کہ آ وتی مات ءَ چہ ھُوکّاں بہ رکین ایت۔

18 سال ءِ اُمر ءَ بہ گر داں 30 سال ءِ اُمر ءِ توک ءَ یک ورنایے ءِ دل ءَ زندگی ءَ پہ بازیں واھشتے ودی بیت، لھتے پہ کلدار،مال ءُ مڈی ءُ لھتے دگہ باریں چونیں چونیں واھشتاں گوں بندوک بیت،بلے کزا سد ورنا ءِ توک ءَ یکے ورنایے در بہ کپ ایت کہ آ چہ اے چیزاں سرگوز بہ بیت ءُ تھنا دل ءَ پہ زمین ءَ مھر بہ دار ایت،پہ راج ءَ بہ مار ایت،راج ءِ ننگ ءُ ناموس ءَ لگت مالی ءَ دیست مہ کنت،راج ءَ پہ گلامی ءَ دیست مہ کنت ءُ زمین ءِ سر ءَ درامدانی واجھی ءَ برداشت کُت مہ کنت۔ 

ھو منی مستریں لالا ھالد ءَ ھم وتی زند ءِ دُراھیں واھگ کل کُتگ اِت اَنت،آئی ءَ گوں سر ءِ چست کنگ ءُ وتی ھوش ءُ ھواس ءِ توک ءِ آئیگ ءَ گوں بس پہ راج ءَ جیڑ اِت،راج ءِ درد وتی درد کُت،آئی ءَ بس یک سرمچارے بوگ لوٹ اِت ءُ انچُش مارا دُرستاں یل کُت ءُ کوہ پہ کوہ بوت دانکہ پہ دائمی نمیران بوت۔ 20 اپریل 2021 ءَ منی لالا ءَ وتی مکھیں مات بگل ءَ کُت ءُ پہ ایمنی وپت بلے منی دل ءَ ھالد نہ مُرتگ،ھالد انگت منی توک ءَ زندگ اِنت،ھالد یک پگرے بیتگ،یک راھے بیتگ،ھمےواستا من گُشاں ھالد جان زندگ اِنت،مئے میان ءَ ھر وھد ءَ ساڑی اِنت،پمیشکا من مرچی گوں روچ ءِ ٹِک دیگ ءَ اولی ائید مبارک بات ءَ ھالد ءَ دیگ لوٹ آں۔ 

ھالو پُل،ائید مُبارک بات

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔